သးစၢၢ်ဆၢ တၢ်ဂ့ၢ်လၢအရ့ဒိၣ်တက့ၢ်
“ဒီးကသ့ၣ်ညါလၢ နဲဒၣ်တဂၤဃီလၢ နမံၤမ့ၢ်ယဟိဝၤန့ၣ် မ့ၢ်တၢ်ထီကတၢၢ်တဂၤလၢ ဟီၣ်ခိၣ်ဒီဘ့ၣ်ညါအဖီခိၣ်လီၤ.”—စံးထီၣ်ပတြၢၤ ၈၃:၁၈.
၁, ၂. (က) တၢ်ဂ့ၢ်လၢအရ့ဒိၣ်ကတၢၢ်န့ၣ် မ့ၢ်မနုၤလဲၣ်. (ခ) ဘၣ်မနုၤအဃိ တၢ်ဂ့ၢ်အံၤ မ့ၢ်တၢ်ဂ့ၢ်လၢ အရ့ဒိၣ်ကတၢၢ်လၢပဂီၢ်လဲၣ်.
မုၢ်မဆါတနံၤအံၤ ပှၤအါဂၤန့ၣ် ပာ်ဒိၣ်ဝဲကျိၣ်စ့လီၤ. အဝဲသ့ၣ်ဆိကမိၣ်ထဲ ကျိၣ်စ့အဂ့ၢ်ဒီး အိၣ်ဒီးတၢ်ဘၣ်ယိၣ်ဘၣ်ဘှီလီၤ. အဝဲသ့ၣ်သူအတၢ်ဆၢကတီၢ်လၢ ကဃုအါထီၣ်ကျိၣ်စ့ဒီး ကပာ်ဖှိၣ်ကျိၣ်စ့အါအါဂီၢ်ဂီၢ်လီၤ. လၢပှၤတနီၤနီၤအဂီၢ်န့ၣ် ဟံၣ်ဖိဃီဖိ, တၢ်အိၣ်ဆူၣ်အိၣ်ချ့ ဒီးအဝဲသ့ၣ်အဖီတၢၣ်န့ၣ် မ့ၢ်တၢ်လၢအရ့ဒိၣ်ကတၢၢ်လီၤ.
၂ တၢ်ဂ့ၢ်လၢအရ့ဒိၣ်န့ၢ်ဒံး ကယဲၢ်တၢ်ဂ့ၢ်ခဲလၢာ် အိၣ်ဝဲတခါလီၤ. တၢ်ဂ့ၢ်အံၤမ့ၢ်ဝဲ ပှၤကသ့ၣ်ညါလၢ ယဟိဝၤယွၤ အတၢ်ခွဲးတၢ်ယာ်လၢကပၢတၢ်န့ၣ် မ့ၢ်တၢ်လၢအကြၢးဝဲဘၣ်ဝဲလီၤ. လၢတၢ်န့ၣ်အဃိ အရ့ဒိၣ်လၢ ပကဘၣ်ဆဲးသးစၢၢ်ဆၢ တၢ်ဂ့ၢ်အံၤန့ၣ်လီၤ. ပတၢ်ဖံးတၢ်မၤအါဝဲ ကိးနံၤဒဲး မ့တမ့ၢ် ပသူၣ်ကိၢ်သးဂီၤထဲ ပတၢ်ကီတၢ်ခဲအဃိ ပမ့ၢ်တပလီၢ်ပသးဘၣ်န့ၣ် ပသးပ့ၤနီၣ်ကွံာ်တၢ်လၢ အရ့ဒိၣ်ကတၢၢ်အံၤသ့ဝဲလီၤ. ပမ့ၢ်ဆီၣ်ထွဲ ယဟိဝၤယွၤပၢတၢ်အခွဲးန့ၣ် ပမ့ၢ်ကွၢ်ဆၢၣ်မဲာ်ဘၣ် တၢ်ကီတၢ်ခဲတဖၣ်ဒၣ်လဲာ် ပလဲၤခီဖျိအီၤကန့ၢ်ဒီး ပကဘူးထီၣ်ဒီး ယဟိဝၤယွၤလီၤ.
ဘၣ်မနုၤအဃိ တၢ်ဂ့ၢ်အံၤအရ့ဒိၣ်လဲၣ်
၃. ဘၣ်ဃးဒီး ယွၤအတၢ်ပၢန့ၣ် မုၣ်ကီၤလံၢ်တဲဝဲဒ်လဲၣ်.
၃ မုၣ်ကီၤလံၢ် ဒုးအိၣ်ထီၣ်တၢ်သံကွၢ်လၢ ဘၣ်ဃးဒီး ယဟိဝၤယွၤအတၢ်ခွဲးတၢ်ယာ်လၢ ကပၢတၢ်န့ၣ်လီၤ. မုၣ်ကီၤလံၢ် အဲၣ်ဒိးဝဲလၢ ပှၤဟီၣ်ခိၣ်ဖိသ့ၣ်တဖၣ် ကဆိကမိၣ်လၢ ယဟိဝၤယွၤန့ၣ် မ့ၢ်ပှၤပၢတၢ်လၢ အအၢအသီတဂၤ ဒီးအတၢ်ပၢန့ၣ် တမ့ၢ်တၢ်လၢအဂ့ၤကတၢၢ်လၢ ပဂီၢ်ဘၣ်. ဒီးအဝဲတဲဝဲလၢ ပှၤဟီၣ်ခိၣ်ဖိသ့ၣ်တဖၣ် မ့ၢ်ပၢလီၤအသးဒၣ်ဝဲန့ၣ် ကဒိးန့ၢ်ဘၣ်တၢ်သးခုနီၢ်နီၢ်လီၤ. (၁ မိၤၡ့ ၃:၁-၅) မုၣ်ကီၤလံၢ်တဲစ့ၢ်ကီးဝဲလၢ ပှၤဟီၣ်ခိၣ်ဖိလၢ ကတီဒီးယွၤန့ၣ် တအိၣ်နီတဂၤဘၣ်. ဒီးလၢအတၢ်အိၣ်မူပူၤ မ့ၢ်ထံၣ်ဘၣ်တၢ်ကီတၢ်ခဲအါတလၢန့ၣ် အဝဲသ့ၣ်ကပာ်တ့ၢ်ကွံာ်ယွၤန့ၣ်လီၤ. (ယိၤဘး ၂:၄, ၅) လၢတၢ်န့ၣ်အဃိ ယဟိဝၤယွၤ ဟ့ၣ်ဝဲတၢ်ဆၢကတီၢ်ဒ်သိး ပှၤခဲလၢာ်ကသ့ၣ်ညါဝဲလၢ မ့ၢ်တအိၣ်လၢယွၤအတၢ်ပၢအဖီလာ်န့ၣ် တဒိးန့ၢ်ဘၣ်တၢ်မုာ်တၢ်ခုၣ်ဘၣ်.
၄. တၢ်သံကွၢ်လၢ ဘၣ်ဃးဒီးယွၤပၢတၢ်အခွဲး အတၢ်စံးဆၢကဖျါထီၣ်အဂီၢ် ဘၣ်မနုၤအဃိ မ့ၢ်တၢ်လၢအရ့ဒိၣ်လဲၣ်.
၄ ယဟိဝၤယွၤသ့ၣ်ညါဝဲလၢ မုၣ်ကီၤလံၢ်အတၢ်ကတိၤန့ၣ် မ့ၢ်တၢ်လီတၢ်ဝ့ၤလီၤ. ဘၣ်ဆၣ် ဘၣ်မနုၤအဃိ ယဟိဝၤယွၤ ဘၣ်ဟ့ၣ်တၢ်ဆၢကတီၢ်လၢ မုၣ်ကီၤလံၢ်ကဂုာ်ကျဲးစၢး ပာ်ဖျါထီၣ်တၢ်အုၣ်သးလဲၣ်. ဒ်သိးတၢ်သံကွၢ်တခါအံၤ အတၢ်စံးဆၢကဖျါထီၣ်အဂီၢ် မူခိၣ်ကလူးဒီး ပှၤဟီၣ်ခိၣ်ဖိတဖၣ် မၤစၢၤဝဲသ့လီၤ. (ဖး စံးထီၣ်ပတြၢၤ ၈၃:၁၈ တက့ၢ်.) စီၤအၤဒၣ်ဒီးနီၢ်အံၣ်အု ဂ့ၢ်လိာ်ကွံာ်ဝဲ ယဟိဝၤယွၤအတၢ်ပၢ ဒီးစးထီၣ်ဖဲန့ၣ် ပှၤအါဂၤစ့ၢ်ကီး မၤဝဲဒ်န့ၣ်လီၤ. လၢတၢ်န့ၣ်အဃိ ဘၣ်သ့ၣ်သ့ၣ် ပှၤတနီၤနီၤကဆိကမိၣ်ဝဲလၢ မုၣ်ကီၤလံၢ် အတၢ်ကတိၤန့ၣ် ဘၣ်ဝဲလီၤ. တၢ်သံကွၢ်အံၤအတၢ်စံးဆၢ မ့ၢ်တဖျါထီၣ်ဘၣ်န့ၣ် ပှၤဟီၣ်ခိၣ်ဖိဒီး မူခိၣ်ကလူးခဲလၢာ် ဒိးန့ၢ်ဘၣ်တၢ်သူၣ်မံသးမုာ် ဒီးတၢ်မုာ်တၢ်ခုၣ်နီၢ်နီၢ်တသ့ဘၣ်. ဘၣ်ဆၣ် ယဟိဝၤယွၤပၢတၢ်အခွဲး ဖျါထီၣ်မ့ၢ်ဝံၤအလီၢ်ခံ ပှၤကိးဂၤဒဲး ကဒိးပၢအသးလၢယွၤအတၢ်ပၢဖီလာ် လီၤထူလီၤယိာ်လီၤ. ဖဲန့ၣ်အခါ တၢ်ဘၣ်တ့ခဲလၢာ် ကအိၣ်ဒီးတၢ်မုာ်တၢ်ခုၣ်လီၤ.—အ့းဖ့းစူး ၁:၉, ၁၀.
၅. ပဆီၣ်ထွဲမၤစၢၤ ယွၤပၢတၢ်အခွဲး ကသ့ဒ်လဲၣ်.
၅ ကစၢ်ယွၤပၢတၢ်အခွဲး ကအိၣ်ဖျါထီၣ် မ့မ့ၢ်မုၣ်ကီၤလံၢ်ဒီး ပှၤဟီၣ်ခိၣ်ဖိတဖၣ် အတၢ်ပၢတၢ်ပြးန့ၣ် ကဘၣ်တၢ်မၤဟးဂီၤကွံာ်အီၤလီၤ. ကစၢ်ယွၤအတၢ်ပၢကမၤနၢၤတၢ် ခီဖျိမ့းၡံအၤအဘီမုၢ်န့ၣ်လီၤ. ပှၤလၢအိၣ်ဒီးတၢ်သးတီတဖၣ် ကပာ်ဖျါထီၣ်တၢ်အုၣ်သးလၢ ပှၤဟီၣ်ခိၣ်ဖိတဖၣ် ပၢၤဃာ်တၢ်သးတီဒီးဆီၣ်ထွဲ ယွၤအတၢ်ပၢလၢ တၢ်သးတီအပူၤသ့န့ၣ်လီၤ. (ယၡါယၤ ၄၅:၂၃, ၂၄) မ့ၢ်နအဲၣ်ဒိးကဲထီၣ်ပှၤလၢ အအိၣ်ဒီးတၢ်သးတီတဂၤဧါ. နမ့ၢ်အဲၣ်ဒိးကဲထီၣ်န့ၣ် နကဘၣ်နၢ်ပၢၢ် တၢ်ဂ့ၢ်လၢအရ့ဒိၣ်ကတၢၢ်အံၤ ဒီးနကဘၣ်သးစၢၢ်ဆၢအီၤန့ၣ်လီၤ.
ယွၤပၢတၢ်အခွဲး ကဖျါထီၣ်အဂီၢ် အရ့ဒိၣ်န့ၢ် ပတၢ်အုၣ်က့ၤခီၣ်က့ၤ
၆. ယဟိဝၤယွၤပၢတၢ်အခွဲး ကအိၣ်ဖျါထီၣ်အဂီၢ် မ့ၢ်အရ့ဒိၣ်ထဲလဲၣ်.
၆ ယဟိဝၤယွၤပၢတၢ်အခွဲး ကအိၣ်ဖျါထီၣ်အဂီၢ်န့ၣ် မ့ၢ်တၢ်အရ့ဒိၣ်လၢ ပှၤဟီၣ်ခိၣ်ဖိတဖၣ်အဂီၢ်လီၤ. ဒီအရ့ဒိၣ်န့ၢ်ဒံး ပှၤတဂၤအတၢ်သူၣ်ခုသးခုလီၤ. မ့ၢ်တၢ်ကတိၤအံၤ အဲၣ်ဒိးစံးဝဲလၢ ပတၢ်အုၣ်က့ၤခီၣ်က့ၤန့ၣ် အရ့တဒိၣ်ဘၣ် မ့တမ့ၢ် ယဟိဝၤယွၤ တသးအိၣ်ပှၤဘၣ်န့ၣ်ဧါ. တမ့ၢ်ဒ်န့ၣ်ဘၣ်. ပသ့ၣ်ညါအီၤကသ့ဒ်လဲၣ်.
ယဟိဝၤယွၤပၢတၢ်အခွဲး ကအိၣ်ဖျါထီၣ်အဂီၢ်န့ၣ် အရ့ဒိၣ်န့ၢ်ဒံး ပတၢ်သူၣ်ခုသးခု ဒီးပတၢ်အုၣ်က့ၤခီၣ်က့ၤ
၇, ၈. ယဟိဝၤယွၤပၢတၢ်အခွဲး မ့ၢ်ဖျါထီၣ်န့ၣ် ကကဲဘျုးလၢပဂီၢ်ဒ်လဲၣ်.
၇ ယဟိဝၤယွၤန့ၣ် အဲၣ်ပှၤဟီၣ်ခိၣ်ဖိတဖၣ် ဒိၣ်မးလီၤ. အဝဲပာ်လုၢ်ပာ်ပှ့ၤပှၤအဃိ ဟ့ၣ်လီၤအဖိခွါ ဒ်သိးပကန့ၢ်ဘၣ် တၢ်မူအထူအယိာ် အဂီၢ်လီၤ. (ယိၤဟၣ် ၃:၁၆; ၁ ယိၤဟၣ် ၄:၉) ယဟိဝၤယွၤ မ့ၢ်တတီဒီး အတၢ်အၢၣ်လီၤအီလီၤလၢ ကမၤန့ၢ်ပှၤတၢ်လၢခါဆူညါအဂီၢ်ဘၣ်န့ၣ် မုၣ်ကီၤလံၢ် ဒီးပှၤလၢအထီဒါတၢ်တဖၣ် အတၢ်ကတိၤကဘၣ်ဝဲလီၤ. မုၣ်ကီၤလံၢ်တဲဝဲလၢ ယဟိဝၤယွၤန့ၣ် မ့ၢ်ပှၤလီတၢ်တဂၤလၢ အတဟ့ၣ်ပှၤဟီၣ်ခိၣ်ဖိတဖၣ် တၢ်လၢအဂ့ၤဘၣ် ဒီးအတၢ်ပၢန့ၣ်တတီတလိၤဘၣ်. ပှၤလၢအထီဒါတၢ်တဖၣ် ဒုၣ်ဒွဲၣ်စံးအၢဝဲ ယဟိဝၤယွၤအတၢ်စံးပာ် ဒီးတဲဝဲလၢ– “တၢ်စံးပာ်လၢအဝဲဒၣ်ကဟဲန့ၣ် မ့ၢ်အအိၣ်ဖဲလဲၣ်. အဂ့ၢ်ဒ်အံၤ, ပၢ်တဖၣ်မံသပ့ၤအလီၢ်ခံန့ၣ်, တၢ်ခဲလၢာ်အိၣ်ဒၣ်တၢ်ဒ် တၢ်တ့လၢအခီၣ်ထံးလံၤလံၤအသိးန့ၣ်လီၤ.” (၂ ပ့းတရူး ၃:၃, ၄) ဘၣ်ဆၣ် ယဟိဝၤယွၤန့ၣ် တီဒီးအတၢ်အၢၣ်လီၤအီလီၤလီၤ. ဒ်သိးယဟိဝၤယွၤ ကပာ်ဖျါထီၣ်လၢ အဝဲအိၣ်ဒီးတၢ်ခွဲးတၢ်ယာ်လၢ ကပၢတၢ်အဂီၢ်န့ၣ် အဝဲကဘၣ်အုၣ်က့ၤခီၣ်က့ၤဝဲ ပှၤလၢဒိကနၣ်အကလုၢ်တဖၣ်န့ၣ်လီၤ. (ဖး ယၡါယၤ ၅၅:၁၀, ၁၁ တက့ၢ်.) ယဟိဝၤယွၤအတၢ်ပၢန့ၣ် သန့ၤထီၣ်အသးလၢ တၢ်အဲၣ်တၢ်ကွံအဖီခိၣ်လီၤ. လၢတၢ်န့ၣ်အဃိ ပနာ်သ့သပှၢ်ကတၢၢ်လၢ အဝဲကအဲၣ် ဒီးကပာ်လုၢ်ပာ်ပှ့ၤ ပှၤလၢအတီဒီးအီၤတဖၣ်ထီဘိန့ၣ်လီၤ.—၂ မိၤၡ့ ၃၄:၆.
၈ ယွၤပၢတၢ်အခွဲး ကဖျါထီၣ်အဂီၢ် မ့ၢ်တၢ်လၢအရ့ဒိၣ် ဘၣ်ဆၣ် ပတၢ်အုၣ်က့ၤခီၣ်က့ၤစ့ၢ်ကီး မ့ၢ်တၢ်လၢအရ့ဒိၣ်လီၤ. ယဟိဝၤယွၤ သူၣ်အိၣ်သးအိၣ်ပှၤနီၢ်နီၢ်လီၤ. လၢတၢ်န့ၣ်အဃိ ပဝဲခဲလၢာ် ပကဘၣ်သ့ၣ်ညါတၢ်လၢအရ့ဒိၣ်န့ၣ် မ့ၢ်တၢ်မနုၤလဲၣ်. ဒီးပကဘၣ်ဆီၣ်ထွဲ ယဟိဝၤယွၤပၢတၢ်အခွဲးလၢ တၢ်သးတီအပူၤလီၤ.
စီၤယိၤဘး ဆီတလဲအတၢ်ထံၣ်ဒ်လဲၣ်
၉. ဘၣ်ဃးဒီး စီၤယိၤဘးန့ၣ် မုၣ်ကီၤလံၢ်တဲဝဲဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၉ ပကဘၣ်အိၣ်ဒီး တၢ်ထံၣ်လၢအဂ့ၤ လၢယဟိဝၤယွၤအတၢ်ပၢအဖီခိၣ်န့ၣ် မ့ၢ်တၢ်လၢအရ့ဒိၣ်လီၤ. ဘၣ်ဃးဒီးတၢ်ဂ့ၢ်အံၤန့ၣ် လံာ်ယိၤဘးပာ်ဖျါထီၣ်ဝဲလၢ မုၣ်ကီၤလံၢ်တဲဝဲလၢ စီၤယိၤဘးမ့ၢ်ထံၣ် တၢ်နးတၢ်ဖှီၣ်ဖးဒိၣ်န့ၣ် ကပာ်တ့ၢ်ကွံာ်ကစၢ်ယွၤလီၤ. တကးဒံးဘၣ် အဝဲမၢကစၢ်ယွၤ မၤဆူးမၤဆါ စီၤယိၤဘးလီၤ. ယဟိဝၤယွၤတမၤဝဲဘၣ်, ဘၣ်ဆၣ် အဝဲဟ့ၣ်ဝဲအခွဲးလၢ မုၣ်ကီၤလံၢ် ကမၤကွၢ်စီၤယိၤဘးလီၤ. ယဟိဝၤယွၤစံးဝဲလၢ “ကယဲၢ်တၢ်လၢအအိၣ်ဒီးအီၤခဲလၢာ်န့ၣ် အိၣ်ဝဲလၢနစုပူၤလီၤ.” (ဖး ယိၤဘး ၁:၇-၁၂ တက့ၢ်.) တယံာ်ဘၣ်ဒီး စီၤယိၤဘး အကုၢ်အပှၤဒီး အဆၣ်ဖိကီၢ်ဖိ လီၤမၢ်ကွံာ်ဝဲလီၤ. ဒီးလၢခံပှၤဟဲတဲဘၣ်အီၤလၢ အဖိအဂၤတဆံန့ၣ် သံဝဲလီၤ. မုၣ်ကီၤလံၢ် အဲၣ်ဒိးဒုးဆိကမိၣ် စီၤယိၤဘးလၢ ကစၢ်ယွၤမၤဝဲတၢ်တဖၣ်အံၤလီၤ. (ယိၤဘး ၁:၁၃-၁၉) လၢခံမုၣ်ကီၤလံၢ်တီၢ်ဝဲ စီၤယိၤဘးလၢ တၢ်ဆူးတၢ်ဆါနးနးကလဲာ်လီၤ. (ယိၤဘး ၂:၇) တကးဒံးဘၣ် စီၤယိၤဘးအမါ ဒီးအတံၤသကိးအဘျၣ်သၢဂၤ ဟဲတဲဆါအီၤ ဒီးတဲဟးဂီၤအသးလီၤ.—ယိၤဘး ၂:၉; ၃:၁၁; ၁၆:၂.
၁၀. (က) စီၤယိၤဘး ပာ်ဖျါထီၣ်အတၢ်သးတီလၢ ယွၤအဖီခိၣ်ဒ်လဲၣ်. (ခ) ဘၣ်မနုၤအဃိ ကစၢ်ယွၤကဘၣ် ဘှီဘၣ်ထီၣ်က့ၤ စီၤယိၤဘး အတၢ်ထံၣ်လဲၣ်.
၁၀ မုၣ်ကီၤလံၢ်တဲတၢ်န့ၣ် မ့ၢ်အဘၣ်ဧါ. တဘၣ်ဘၣ်. စီၤယိၤဘး ဘၣ်တူၢ်ဝဲ တၢ်မၤကွၢ်နးနးကလဲာ် သနာ်က့ တပာ်တ့ၢ်ကွံာ် ယဟိဝၤယွၤဘၣ်. (ယိၤဘး ၂၇:၅) ဘၣ်ဆၣ် စီၤယိၤဘး ဆိကမိၣ်ဝဲဘၣ်ဃး တၢ်လၢအတူၢ်ဘၣ်ဝဲတဖၣ် အါတလၢအဃိ အဝဲသးပ့ၤနီၣ်ကွံာ်ဝဲ တၢ်လၢအရ့ဒိၣ်တခါန့ၣ်လီၤ. အဝဲတဲဝဲလၢ အတၢ်ကမၣ်တအိၣ်နီတမံၤဘၣ်. စီၤယိၤဘးစ့ၢ်ကီး ကတူၢ်ဘၣ်ဝဲလၢ အဝဲကြၢးသ့ၣ်ညါဝဲ ဘၣ်မနုၤအဃိ ဘၣ်တူၢ်ဘၣ်တၢ်နးတၢ်ဖှီၣ်လဲၣ်. (ယိၤဘး ၇:၂၀; ၁၃:၂၄) စီၤယိၤဘးကတူၢ်ဘၣ်ဝဲဒ်အံၤန့ၣ် ပနၢ်ပၢၢ်အီၤသ့လီၤ. အဝဲအတၢ်ထံၣ်ကမၣ်န့ၣ် ယဟိဝၤယွၤသ့ၣ်ညါဝဲအဃိ ဘှီဘၣ်ထီၣ်က့ၤအီၤလီၤ. ယဟိဝၤယွၤ ဘှီဘၣ်ထီၣ်က့ၤအီၤဒ်လဲၣ်.
၁၁, ၁၂. ယဟိဝၤယွၤ မၤစၢၤစီၤယိၤဘးဒ်လဲၣ်. မ့ၢ်စီၤယိၤဘး တူၢ်လိာ်ဝဲဧါ.
၁၁ ဖဲအဆၢဒိၣ် ၃၈ တုၤလၢ ၄၁ န့ၣ်ပာ်ဖျါထီၣ်ဝဲ ယဟိဝၤယွၤ ဘှီဘၣ်ထီၣ်ဝဲ စီၤယိၤဘးအတၢ်ထံၣ်ဒ်လဲၣ်န့ၣ်လီၤ. ဘၣ်မနုၤအဃိ စီၤယိၤဘးတူၢ်ဘၣ် တၢ်နးတၢ်ဖှီၣ်လဲၣ်န့ၣ် ယဟိဝၤယွၤ တတဲနၢ်ပၢၢ်အီၤဘၣ်. လၢတၢ်န့ၣ်အလီၢ် ယဟိဝၤယွၤမၤစၢၤအီၤဒ်သိး အကနၢ်ပၢၢ်ထီၣ်ဝဲလၢ အဝဲမ့ၢ်ထိၣ်သတြီၤအသးဒီး ကစၢ်ယွၤန့ၣ် အဝဲမ့ၢ်တၢ်ဆံးဆံးဖိလီၤ. ယဟိဝၤယွၤ ဒုးနၢ်ပၢၢ် စီၤယိၤဘး တၢ်ဂ့ၢ်လၢအရ့ဒိၣ်န့ၢ်ဒံး စီၤယိၤဘးအနီၢ်ကစၢ် အတၢ်ကီတၢ်ခဲန့ၣ်အိၣ်ဝဲလီၤ. (ဖး ယိၤဘး ၃၈:၁၈-၂၁ တက့ၢ်.) ယဟိဝၤယွၤ အတၢ်ကတိၤန့ၣ် မၤစၢၤစီၤယိၤဘးလၢ ကဆီတလဲအတၢ်ထံၣ်လီၤ.
၁၂ စီၤယိၤဘး တူၢ်ဘၣ်တၢ်နးနးကလဲာ်ဘၣ်ဆၣ် ယဟိဝၤယွၤ တဲအီၤဒ်အံၤန့ၣ် မ့ၢ်လၢယဟိဝၤယွၤ တအိၣ်ဒီးတၢ်အဲၣ်တၢ်ကွံအဃိဧါ. တမ့ၢ်ဒ်န့ၣ်ဘၣ်. စီၤယိၤဘးစ့ၢ်ကီး တဆိကမိၣ်ဝဲဒ်န့ၣ်ဘၣ်. စီၤယိၤဘး နၢ်ပၢၢ်ဒီးတူၢ်လိာ်ဝဲ ယဟိဝၤယွၤ အတၢ်သိၣ်ဃီၣ်လီၤ. အဝဲစံးဝဲလၢ– “ယသးဘၣ်အၢလီၤယသး, ဒီးပီၢ်ယၢ်လီၤက့ၤယသးလၢ ဟီၣ်ခိၣ်အကမူၣ်ဒီး ဖၣ်ဆါအကျါလီၤ.” (ယိၤဘး ၄၂:၁-၆) ပှၤသးစၢ်လၢအမံၤမ့ၢ် စီၤအလံဟူၤစ့ၢ်ကီး မၤစၢၤစီၤယိၤဘး ဒ်သိးကဆီတလဲ အတၢ်ထံၣ်လီၤ. (ယိၤဘး ၃၂:၅-၁၀) စီၤယိၤဘးဒိကနၣ်ဝဲ ယဟိဝၤယွၤ အတၢ်ဟ့ၣ်ကူၣ်လၢအအိၣ်ဒီး တၢ်အဲၣ်တၢ်ကွံ ဒီးဆီတလဲဝဲအတၢ်ထံၣ်လီၤ. ယဟိဝၤယွၤ ထံၣ်ဝဲလၢ စီၤယိၤဘး ဆီတလဲအသးအဃိ အဝဲဒုးသ့ၣ်ညါ ပှၤအဂၤတဖၣ်လၢ အဝဲပာ်လုၢ်ပာ်ပှ့ၤဝဲ စီၤယိၤဘးအတၢ်သးတီန့ၣ်လီၤ.—ယိၤဘး ၄၂:၇, ၈.
၁၃. စီၤယိၤဘး ကွၢ်ဆၢၣ်မဲာ်ဘၣ် တၢ်နးတၢ်ဖှီၣ်ဝံၤသနာ်က့ ယဟိဝၤယွၤ အတၢ်သိၣ်ဃီၣ်န့ၣ် ကဲဘျုးဝဲလၢအဂီၢ်ဒ်လဲၣ်.
၁၃ စီၤယိၤဘး ကွၢ်ဆၢၣ်မဲာ်ဘၣ် တၢ်နးတၢ်ဖှီၣ်ဝံၤသနာ်က့ ယဟိဝၤယွၤ အတၢ်သိၣ်ဃီၣ်န့ၣ် ကဲဘျုးဒံးဝဲလၢအဂီၢ်လီၤ. “ဒီးယွၤဆိၣ်ဂ့ၤစီၤယိၤဘးအကတၢၢ်န့ၣ် ဒိၣ်န့ၢ်အခီၣ်ထံးတက့ၢ်လီၤ.” တကတီၢ်ဃီန့ၣ် ကစၢ်ယွၤဟ့ၣ်က့ၤ “အဖိခွါနွံဂၤ, ဒီးအဖိမုၣ်သၢဂၤလီၤ.” (ယိၤဘး ၄၂:၁၂-၁၄) စီၤယိၤဘး အဲၣ်အဖိတဖၣ်အံၤသနာ်က့ အဝဲကသ့ၣ်နီၣ်ထီၣ်ဘၣ်ဒံး အဖိလၢအသံတဖၣ်န့ၣ်လီၤ. တၢ်လၢအဝဲဒီးအဟံၣ်ဖိဃီဖိ တူၢ်ဘၣ်ဝဲတဖၣ်န့ၣ် ဘၣ်သ့ၣ်သ့ၣ် သးပ့ၤနီၣ်ဝဲတန့ၢ်ဘၣ်. လၢခံန့ၣ် စီၤယိၤဘး မ့ၢ်သ့ၣ်ညါထီၣ်ဝဲလၢ ဘၣ်မနုၤအဃိ အတူၢ်ဘၣ်တၢ်နးတၢ်ဖှီၣ်တဖၣ်အံၤလဲၣ် သနာ်က့ အဝဲကအဲၣ်ဒိးသ့ၣ်ညါဝဲလၢ ဘၣ်မနုၤအဃိ ကစၢ်ယွၤပျဲဝဲလၢ အဝဲကတူၢ်ဘၣ်တၢ်ထဲထဲအံၤညါလဲၣ်န့ၣ်လီၤ. အတၢ်ဆိကမိၣ်ဒ်အံၤ မ့ၢ်ဟဲထီၣ်န့ၣ် အဝဲကသ့ၣ်နီၣ်ထီၣ်က့ၤဝဲ တၢ်လၢယဟိဝၤယွၤတဲအီၤတဖၣ်န့ၣ်လီၤ. ကစၢ်ယွၤအတၢ်ကတိၤတဖၣ် ကမၤမုာ်ထီၣ်က့ၤအီၤဒီး ကမၤစၢၤအီၤလၢ ကအိၣ်ဒီးတၢ်ထံၣ်လၢအဂ့ၤလီၤ.—စံးထီၣ်ပတြၢၤ ၉၄:၁၉.
ပကသးစၢၢ်ဆၢလၢ ပနီၢ်ကစၢ်အတၢ်ကီတၢ်ခဲအလီၢ် ပသးစၢၢ်ဆၢ ယဟိဝၤယွၤ ပၢတၢ်အခွဲး ကသ့ဧါ (ကွၢ် လံာ်အဆၢ ၁၄)
၁၄. ပဟံးန့ၢ်တၢ်မၤလိလၢ စီၤယိၤဘးအအိၣ်ကသ့ဒ်လဲၣ်.
၁၄ ပဝဲသ့ၣ်တဖၣ်စ့ၢ်ကီး ပမ့ၢ်ဆိကမိၣ်ထံ စီၤယိၤဘးအတၢ်လဲၤခီဖျိန့ၣ် ကမၤစၢၤပှၤဒ်သိး ပကအိၣ်ဒီးတၢ်ထံၣ်လၢအဂ့ၤ ဒီးအိၣ်ဒီးတၢ်သူၣ်မံသးမုာ်လီၤ. လံာ်ယိၤဘးန့ၣ် မ့ၢ်ဝဲလံာ်တဘ့ၣ်လၢ ယဟိဝၤယွၤ ကတဲာ်ကတီၤဝဲဒ်သိး ပကဒိးန့ၢ်ဘၣ် ‘တၢ်သိၣ်တၢ်သီ, တၢ်ဝံသးစူၤ, ဒီးတၢ်မၤမုာ်ဘၣ်ဃးဒီး တၢ်ကွဲးအသးတဖၣ်သတးဒီး ပကအိၣ်ဒီးတၢ်မုၢ်လၢ်’ အဂီၢ်လီၤ. (ရိမ့ၤ ၁၅:၄) ပဒိးန့ၢ်ဘၣ်တၢ်မၤလိလၢ ပတကြၢးဆိကမိၣ်ထဲ ပနီၢ်ကစၢ်အတၢ်ကီတၢ်ခဲတဖၣ် တုၤဒၣ်လဲာ် ပသးပ့ၤနီၣ်ကွံာ် ယဟိဝၤယွၤ ပၢတၢ်အခွဲးန့ၣ်ဘၣ်. ဒ်စီၤယိၤဘးအသိး ဖဲပထံၣ်ဘၣ်တၢ်ကီတၢ်ခဲအခါဒၣ်လဲာ် ပမ့ၢ်ဆဲးတီဒီးယဟိဝၤယွၤန့ၣ် မ့ၢ်ဒၣ်ပပာ်ဖျါထီၣ်လၢ ပတူၢ်လိာ်အပၢတၢ်အခွဲးန့ၣ်လီၤ.
၁၅. ဖဲပကွၢ်ဆၢၣ်မဲာ်ဘၣ် တၢ်ကီတၢ်ခဲအခါ ပမ့ၢ်အိၣ်ဒီးတၢ်သးတီန့ၣ် ပကဒိးန့ၢ်ဘၣ်တၢ်မနုၤလဲၣ်.
၁၅ စီၤယိၤဘးအတၢ်လဲၤခီဖျိန့ၣ် ပာ်ဖျါထီၣ်န့ၢ်ပှၤလၢ ပမ့ၢ်ကွၢ်ဆၢၣ်မဲာ်ဘၣ် တၢ်မၤကွၢ်န့ၣ် တမ့ၢ်လၢယဟိဝၤယွၤ သးထီၣ်ပှၤအဃိဘၣ်. ပသ့ၣ်ညါဘၣ်ဒ်အံၤအဃိ မၤမုာ်ထီၣ်က့ၤပသးဒိၣ်မးလီၤ. တၢ်မၤကွၢ်န့ၣ် ဟ့ၣ်ပှၤတၢ်ခွဲးတၢ်ယာ်လၢ ပကပာ်ဖျါထီၣ်လၢ ပတူၢ်လိာ်ယဟိဝၤယွၤပၢတၢ်အခွဲးလီၤ. (ကတိၤဒိ ၂၇:၁၁) ပမ့ၢ်အိၣ်ဒီးတၢ်သးတီန့ၣ် ကမၤသးခု ယဟိဝၤယွၤအသး ဒီးကမၤဂၢၢ်ကျၢၤထီၣ် ပတၢ်မုၢ်လၢ်လၢ ခါဆူညါအဂီၢ်န့ၣ်လီၤ. (ဖး ရိမ့ၤ ၅:၃-၅ တက့ၢ်.) စီၤယိၤဘး အတၢ်လဲၤခီဖျိန့ၣ် ပာ်ဖျါထီၣ်န့ၢ်ပှၤလၢ ယဟိဝၤယွၤန့ၣ်– “သူၣ်အိၣ်သးအိၣ်တၢ်, ဒီးသူၣ်ကညီၤသးကညီၤတၢ် အါမးလီၤ.” (ယၤကိာ် ၅:၁၁) ပမ့ၢ်ဆီၣ်ထွဲ ယဟိဝၤယွၤပၢတၢ်အခွဲးန့ၣ် အဝဲကဆိၣ်ဂ့ၤပှၤလီၤ. ခီဖျိလၢပသ့ၣ်ညါတၢ်ဂ့ၢ်အံၤအဃိ ကမၤစၢၤပှၤ ဒ်သိးပကတူၢ်တၢ်လၢ “တၢ်သူၣ်စူၤသးစူၤ” ဒီး “တၢ်သးခု” အပူၤန့ၣ်လီၤ.—ကလီးစဲ ၁:၁၁.
သးစၢၢ်ဆၢ တၢ်လၢအရ့ဒိၣ်တက့ၢ်
၁၆. ဘၣ်မနုၤအဃိ ပကဘၣ်သ့ၣ်နီၣ်ထီၣ်လၢ တၢ်ဆီၣ်ထွဲ ယဟိဝၤယွၤ ပၢတၢ်အခွဲးန့ၣ် မ့ၢ်တၢ်လၢအရ့ဒိၣ်လဲၣ်.
၁၆ ဖဲပတူၢ်ဘၣ်တၢ်ကီတၢ်ခဲအခါ ပကပာ်ဖျါထီၣ် ယဟိဝၤယွၤ ပၢတၢ်အခွဲးအဂီၢ် တမ့ၢ်တၢ်လၢအညီဘၣ်. တဘျီတခီၣ် တၢ်ဂ့ၢ်ဆံးဆံးဖိဒၣ်လဲာ် ပဆိကမိၣ်အီၤမ့ၢ်အါန့ၣ် ကဲထီၣ်တၢ်ကိၢ်တၢ်ဂီၤဖးဒိၣ်လၢ ပဂီၢ်သ့ဝဲလီၤ. လၢတၢ်န့ၣ်အဃိ ပမ့ၢ်ထံၣ်ဘၣ် တၢ်ကီတၢ်ခဲဒ်လဲၣ်ဂ့ၤဒ်လဲၣ်ဂ့ၤ ပကဘၣ်သ့ၣ်နီၣ်ထီၣ်လၢ တၢ်ဆီၣ်ထွဲ ယဟိဝၤယွၤ ပၢတၢ်အခွဲးန့ၣ် မ့ၢ်တၢ်လၢအရ့ဒိၣ် ဒိၣ်မးန့ၣ်လီၤ.
ပမ့ၢ်မၤယဟိဝၤယွၤ အတၢ်မၤ ဆူၣ်ဆူၣ်န့ၣ် ကမၤစၢၤပှၤ ဒ်သိး ပကသ့ၣ်နီၣ်ထီၣ် တၢ်လၢအရ့ဒိၣ်န့ၣ်လီၤ
၁၇. ပမ့ၢ်မၤယဟိဝၤယွၤ အတၢ်မၤဆူၣ်ဆူၣ်န့ၣ် ကမၤစၢၤပှၤဒ်လဲၣ်.
၁၇ ပမ့ၢ်မၤယဟိဝၤယွၤ အတၢ်မၤဆူၣ်ဆူၣ်န့ၣ် ကမၤစၢၤပှၤဒ်သိး ပကသ့ၣ်နီၣ်ထီၣ် တၢ်လၢအရ့ဒိၣ်န့ၣ်လီၤ. အဒိ, ဒီပုၢ်ဝဲၢ်မုၣ် ရန့ၤန့ၣ် ကလံၤဘၣ်အီၤ တကးဒံးဘၣ် အိၣ်ဒီးခဲစၢၣ်တၢ်ဆါအဃိ တူၢ်ဘၣ်တၢ်ဆါနးမးလီၤ. ဖဲအဝဲအိၣ်လၢတၢ်ဆါဟံၣ်အခါ စံၣ်တဲၤတဲလီၤဝဲ ပှၤမၤတၢ်ဖိ, ပှၤဆါတဖၣ် ဒီးပှၤတမှံၤလၢအဟဲဟးတဖၣ်လီၤ. ဘၣ်တဘျီ အဝဲဘၣ်ထီၣ်တၢ်ဆါဟံၣ် ယံာ်ဝဲခံနွံဘျဲၣ် ဒီးစံၣ်တဲၤတဲလီၤတၢ်န့ၢ် အနၣ်ရံၣ် ၈၀ ညါလီၤ. ရန့ၤသ့ၣ်ညါဝဲလၢ အကသံဘၣ်ဆၣ် အဝဲတသးပ့ၤနီၣ်ဝဲ တၢ်လၢအရ့ဒိၣ်နီတဘျီဘၣ်. အဝဲဆီၣ်ထွဲဝဲ ယဟိဝၤယွၤပၢတၢ်အခွဲးအဃိ ဒိးန့ၢ်ဘၣ်ဝဲ တၢ်သူၣ်မံသးမုာ်လီၤ.
၁၈. ကၠဲနံၤဖၢၤ အတၢ်လဲၤခီဖျိန့ၣ် သိၣ်လိပှၤဘၣ်ဃးဒီး တၢ်ဆီၣ်ထွဲ ယဟိဝၤယွၤ ပၢတၢ်အခွဲးဒ်လဲၣ်.
၁၈ ဖဲပထံၣ်ဘၣ် တၢ်ကီတၢ်ခဲဆံးဆံးဖိအခါ ပဆီၣ်ထွဲယဟိဝၤယွၤ ပၢတၢ်အခွဲးသ့ဝဲစ့ၢ်ကီးလီၤ. ဒီပုၢ်ဝဲၢ်မုၣ် ကၠဲနံၤဖၢၤကက့ၤလၢအဟံၣ်အဂီၢ် ကဘီယူၤ တလဲၤတၢ်ဘၣ်အဃိ အဝဲဘၣ်အိၣ်ခိးတၢ်လၢ ကဘီယူၤသန့ သၢသီညါလီၤ. ဖဲန့ၣ်အခါအဝဲလီၤဘှံးလီၤတီၤ ဒီးသူၣ်အုးသးအုးဝဲဒိၣ်မးလီၤ. ဘၣ်ဆၣ် အဝဲဃ့ဘါထုကဖၣ်ဒ်သိး ယဟိဝၤယွၤကမၤစၢၤအီၤလၢ ကစံၣ်တဲၤတဲလီၤတၢ်ဆူ ပှၤအဂၤလၢအအိၣ်ခိးတၢ်လၢ ကဘီယူၤသန့တဖၣ်န့ၣ်လီၤ. အဝဲဃ့ဘါထုကဖၣ်ဝံၤအလီၢ်ခံ စံၣ်တဲၤတဲလီၤတၢ်ဆူ ပှၤအါဂၤဒီး နီၤလီၤဘၣ်ဝဲလံာ်လဲၢ်အါမးလီၤ. ကၠဲနံၤဖၢၤ တဲဝဲလၢ “ယတူၢ်ဘၣ်တၢ်ကီတၢ်ခဲ ဘၣ်ဆၣ် ယဟိဝၤယွၤ ဆိၣ်ဂ့ၤယၤဒီး ဟ့ၣ်ယၤတၢ်ဂံၢ်တၢ်ဘါ ဒ်သိးယမၤလၤကပီၤအမံၤ ကသ့အဂီၢ်လီၤ.”
၁၉. ပှၤလၢအအိၣ်လၢ တၢ်ဘူၣ်တၢ်ဘါ အမ့ၢ်အတီအပူၤန့ၣ် ကမၤဝဲတၢ်မနုၤလဲၣ်.
၁၉ ထဲဒၣ်ယဟိဝၤယွၤ အပှၤဂီၢ်မုၢ်တဖၣ် သ့ၣ်ညါဝဲလၢ တၢ်ဆီၣ်ထွဲ ယဟိဝၤယွၤ ပၢတၢ်အခွဲးန့ၣ် မ့ၢ်တၢ်လၢအရ့ဒိၣ် ဒိၣ်မးလီၤ. မ့ၢ်လၢအဝဲသ့ၣ် နၢ်ပၢၢ်ဝဲတၢ်ဂ့ၢ်အံၤအဃိ ဘူၣ်ထီၣ်ဘါထီၣ် ယွၤလၢအမ့ၢ်အတီန့ၣ်လီၤ. လၢတၢ်န့ၣ်အဃိ မ်ပဝဲကိးဂၤဒဲး ပကဆဲးဆီၣ်ထွဲ ယဟိဝၤယွၤ ပၢတၢ်အခွဲးထီဘိတက့ၢ်.
၂၀. တၢ်ခဲလၢာ်လၢ နမၤလၢနကဆီၣ်ထွဲ ယဟိဝၤယွၤပၢတၢ်အခွဲးအဂီၢ်န့ၣ် အဝဲထံၣ်ဝဲဒ်လဲၣ်.
၂၀ ယဟိဝၤယွၤ ထံၣ်ဝဲဒီးပာ်လုၢ်ပာ်ပှ့ၤဝဲ နတၢ်သးတီ, နတၢ်တူၢ်န့ၢ်ခီၣ်ကဲ ဒီးကယဲၢ်တၢ်ခဲလၢာ်လၢ နမၤလၢနကဆီၣ်ထွဲ အပၢတၢ်အခွဲးန့ၣ်လီၤ. (စံးထီၣ်ပတြၢၤ ၁၈:၂၅) တၢ်မၤလိလၢခံတခါန့ၣ် ကပာ်ဖျါထီၣ်န့ၢ်ပှၤ ဘၣ်မနုၤအဃိ ပကြၢးဆီၣ်ထွဲ ယဟိဝၤယွၤပၢတၢ်အခွဲးလဲၣ်. ဒီးပဆီၣ်ထွဲအါထီၣ် ကသ့လၢကျဲဒ်လဲၣ်.
