ဒ်သိးနသးလၢ အသ့ၣ်ညါဒၣ်တၢ် ကမၤတၢ်ဂ့ၤဂ့ၤအဂီၢ် ပျဲယွၤအတၢ်သိၣ်တၢ်သီ ဒီးအတၢ်ဟံးစုနဲၣ်ကျဲ သိၣ်လိနၤတက့ၢ်
“ယဆိကမိၣ်လၢ နတၢ်အုၣ်အသးတဖၣ် အဂ့ၢ်အကျိၤလီၤ.”—စံးထီၣ်ပတြၢၤ ၁၁၉:၉၉.
၁. ပလီၤဆီဒီး ဆၣ်ဖိကီၢ်ဖိတဖၣ်ဒ်လဲၣ်.
ယဟိဝၤယွၤဟ့ၣ်ဝဲ ပှၤဟီၣ်ခိၣ်ဖိတဖၣ် တၢ်ဟ့ၣ်လၢအလုၢ်ဒိၣ်ပှ့ၤဒိၣ်တခါလီၤ. တၢ်ဟ့ၣ်တခါအံၤမ့ၢ်ဝဲ သးလၢအသ့ၣ်ညါဒၣ်တၢ်လီၤ. မ့ၢ်လၢပအိၣ်ဒီး တၢ်ဟ့ၣ်တခါအံၤအဃိ ပလီၤဆီဒီးဆၣ်ဖိကီၢ်ဖိတဖၣ်လီၤ. နီၢ်အံၣ်အု ဒီးစီၤအၤဒၣ် အိၣ်ဒီးသးလၢအသ့ၣ်ညါဒၣ်တၢ်န့ၣ် ပသ့ၣ်ညါသ့ဒ်လဲၣ်. မ့ၢ်လၢအသးလၢအသ့ၣ်ညါဒၣ်တၢ် မၤတံာ်တာ်အဝဲသ့ၣ်အဃိ ဖဲအဝဲသ့ၣ်တဒိကနၣ် ယွၤအကလုၢ်ဝံၤအလီၢ်ခံ အဝဲသ့ၣ်အိၣ်ခူသူၣ်လီၤ.
၂. သးလၢအသ့ၣ်ညါဒၣ်တၢ်န့ၣ်လီၤဂာ်ဒီး တၢ်ပီးတၢ်လီတခါလၢ အဟံးစုနဲၣ်ကျဲ ပှၤနီကဘီဖိဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၂ ပသးလၢအသ့ၣ်ညါဒၣ်တၢ်န့ၣ် မ့ၢ်ဝဲတၢ်တခါလၢ ကဟံးစုနဲၣ်ကျဲပှၤ ဒ်သိးပကနီၤဖး တၢ်ဂ့ၤဒီးတၢ်အၢ ဒီးပကဆၢတဲာ်တၢ်လၢအဘၣ် အဂီၢ်န့ၣ်လီၤ. သးလၢအသ့ၣ်ညါဒၣ်တၢ် မ့ၢ်တဘၣ်တၢ်သိၣ်လိအီၤ ဂ့ၤဂ့ၤဘၣ်န့ၣ် လီၤဂာ်ဒ်သိးဒီး တၢ်ပီးတၢ်လီ (compass) အဟးဂီၤတခါလၢ အဟံးစုနဲၣ်ကျဲပှၤနီကဘီဖိန့ၣ်လီၤ. တၢ်ပီးတၢ်လီတခါလၢ အဟံးစုနဲၣ်ကျဲ ပှၤနီကဘီဖိ မ့ၢ်မၤတၢ်ဂ့ၤဂ့ၤန့ၣ် ကလံၤမုၢ်မ့ၢ်လီၤ သနာ်က့ ကမၤစၢၤဝဲ ပှၤနီကဘီဖိ ဒ်သိးအသု တဟးဖျိးကျဲတဂ့ၤအဂီၢ်လီၤ. ဒ်န့ၣ်အသိး ပသးလၢအသ့ၣ်ညါဒၣ်တၢ် မ့ၢ်မၤတၢ်ဂ့ၤဂ့ၤန့ၣ် ကဟံးစုနဲၣ်ကျဲပှၤ ဒ်သိး ပကဆၢတဲာ်လၢ အဘၣ်အဂီၢ်လီၤ.
၃. ပမ့ၢ်တသိၣ်လိ ပသးလၢအသ့ၣ်ညါဒၣ်တၢ်ဂ့ၤဂ့ၤဘၣ်န့ၣ် တၢ်ကကဲထီၣ်အသးဒီးပှၤဒ်လဲၣ်.
၃ ပမ့ၢ်တသိၣ်လိ ပသးလၢအသ့ၣ်ညါဒၣ်တၢ် ဂ့ၤဂ့ၤဘၣ်န့ၣ် တချုးဖဲပကမၤဘၣ် တၢ်အၢအဆၢကတီၢ် အတဟ့ၣ်ပလီၢ်ပှၤဘၣ်. (၁ တံၤမသ့း ၄:၁, ၂) တကးဒံးဘၣ် ပသးလၢအသ့ၣ်ညါဒၣ်တၢ်န့ၣ် ကဆီၣ်ထွဲပှၤလၢ ပကထံၣ် “တၢ်အၢလၢတၢ်ဂ့ၤ” လီၤ. (ယၡါယၤ ၅:၂၀) ယ့ၣ်ၡူးတဲဘၣ် အပျဲၢ်အဘီၣ်တဖၣ်လၢ “အဆၢအကတီၢ် ကဘၣ်ဝဲလၢကယဲၢ်ပှၤလၢ အမၤသံသုန့ၣ်, ကဆိကမိၣ်လၢ အမၤယွၤအတၢ်လီၤ.” (ယိၤဟၣ် ၁၆:၂) ပှၤလၢအမၤသံ စီၤစတ့ဖးစ့ၢ်ကီး ဆိကမိၣ်ဝဲဒ်န့ၣ်လီၤ. (မၤတၢ် ၆:၈, ၁၂; ၇:၅၄-၆၀) လၢအပူၤကွံာ်တုၤခဲအံၤ ပှၤလၢအဲၣ်တၢ်ဘူၣ်တၢ်ဘါတဖၣ်န့ၣ် မၤတၢ်ကမၣ်ဒိၣ်ဒိၣ်မုၢ်မုၢ် ဒ်သိးဒီးတၢ်မၤသံပှၤဂၤန့ၣ်လီၤ. ဘၣ်ဆၣ်အဝဲသ့ၣ်တဲဝဲလၢ အမၤတၢ်လၢယွၤအဂီၢ်လီၤ. နီၢ်နီၢ်န့ၣ် အဝဲသ့ၣ်မၤတၢ်လၢအထီဒါ ယွၤအတၢ်သိၣ်တၢ်သီလီၤ. (၂ မိၤၡ့ ၂၀:၁၃) ခီဖျိလၢအဝဲသ့ၣ် မၤဝဲဒ်အံၤအဃိ ပသ့ၣ်ညါလၢ အဝဲသ့ၣ်အသးလၢအသ့ၣ်ညါဒၣ်တၢ် ဆှၢကမၣ်အီၤလီၤ.
၄. ဒ်သိး ပသးလၢအသ့ၣ်ညါဒၣ်တၢ် ကမၤတၢ်ဂ့ၤဂ့ၤအဂီၢ် ပကဘၣ်မၤဒ်လဲၣ်.
၄ ဒ်သိးပသးလၢအသ့ၣ်ညါဒၣ်တၢ် ကမၤတၢ်ဂ့ၤဂ့ၤအဂီၢ် ပသိၣ်လိအီၤကသ့ဒ်လဲၣ်. လံာ်စီဆှံ အတၢ်သိၣ်တၢ်သီ ဒီးတၢ်ဟံးစုနဲၣ်ကျဲတဖၣ်န့ၣ် “ဂ့ၤလၢသိၣ်တၢ်သီတၢ်အဂီၢ်, လၢသိၣ်ဃီၣ်တၢ်အဂီၢ်, လၢဃၣ်လိၤတၢ်အဂီၢ်, လၢသိၣ်လိနဲၣ်လိတၢ်လၢ တၢ်တီတၢ်လိၤအပူၤအဂီၢ်” လီၤ. (၂ တံၤမသ့း ၃:၁၆) လၢတၢ်န့ၣ်အဃိ ပကဘၣ်ဖးဒီးမၤလိလံာ်စီဆှံ, ဆိကမိၣ်ထံတၢ်ဂ့ၢ်လၢပဖးအီၤတဖၣ် ဒီးအိၣ်မူထွဲမၤထွဲအီၤလီၤ. ပမ့ၢ်မၤဒ်န့ၣ်န့ၣ် ပကဆိကမိၣ်တၢ်ဒ် ယဟိဝၤယွၤအသိး ဒီးပသးလၢအသ့ၣ်ညါဒၣ်တၢ်န့ၣ် ကမၤတၢ်ဂ့ၤဂ့ၤလီၤ. ခဲအံၤပကတဲသကိး တၢ်ဂ့ၢ်လၢအဘၣ်ဃးဒီး ပသူယဟိဝၤယွၤ အတၢ်သိၣ်တၢ်သီ ဒီးအတၢ်ဟံးစုနဲၣ်ကျဲ ဒ်သိးပသိၣ်လိ ပသးလၢအသ့ၣ်ညါဒၣ်တၢ် ကသ့ဒ်လဲၣ်န့ၣ်လီၤ.
ပျဲယွၤအတၢ်သိၣ်တၢ်သီ သိၣ်လိနၤတက့ၢ်
၅, ၆. ယွၤအတၢ်သိၣ်တၢ်သီတဖၣ် မၤစၢၤပှၤဒ်လဲၣ်.
၅ ပမ့ၢ်အဲၣ်ဒိးလၢ ယွၤအတၢ်သိၣ်တၢ်သီ ကမၤစၢၤပှၤန့ၣ် ထဲဒၣ်ပဖးဒီးသ့ၣ်ညါ ယွၤအတၢ်သိၣ်တၢ်သီန့ၣ် တလၢပှဲၤဒံးဘၣ်. ပကဘၣ်အဲၣ်ယွၤအတၢ်သိၣ်တၢ်သီ ဒီးပာ်ကဲအီၤလီၤ. လံာ်စီဆှံတဲဝဲလၢပကဘၣ် “သးဟ့တၢ်အၢ, ဒီးအဲၣ်တၢ်ဂ့ၤ” လီၤ. (ဧၤမိၣ် ၅:၁၅) ဘၣ်ဆၣ် ပမၤအီၤကသ့ဒ်လဲၣ်. ပကဘၣ်မၤလိပသး ဒ်သိးပကအိၣ်ဒီးတၢ်ထံၣ်ဒ် ယဟိဝၤယွၤအသိးလီၤ. ဆိကမိၣ်ကွၢ် တၢ်ဂ့ၢ်တခါအံၤတက့ၢ်. အဒိ နမံတန့ၢ်ဘၣ် ဒီးကသံၣ်သရၣ်တဲနၤလၢ နကဘၣ်အီၣ်တၢ်အီၣ်လၢ အန့ၢ်ဂံၢ်န့ၢ်ဘါ, မၤနီၢ်ခိတၢ်ဟူးတၢ်ဂဲၤ ဒီးဆီတလဲ နတၢ်အိၣ်မူလီၤ. မ့ၢ်လၢနမၤထွဲ အတၢ်ဟံးစုနဲၣ်ကျဲအဃိ နမံန့ၢ်က့ၤလံလီၤ. မ့မ့ၢ်ဒ်န့ၣ်န့ၣ် ကသံၣ်သရၣ် အတၢ်ဟံးစုနဲၣ်ကျဲတဖၣ်န့ၣ် နကထံၣ်အီၤဒ်လဲၣ်.
၆ ဒ်န့ၣ်အသိး ပတၢ်ဘၣ်တ့ကစၢ်ဟ့ၣ်လီၤပှၤ တၢ်သိၣ်တၢ်သီတဖၣ်လၢ အကဒီသဒၢပှၤ ဒ်သိးပသုတမၤဘၣ် တၢ်ကမၣ်ဒီးထံၣ်ဘၣ် တၢ်ကီတၢ်ခဲတဂ့ၤအဂီၢ် ဒီးဒ်သိးပတၢ်အိၣ်မူ ကလဲၤထီၣ်လဲၤထီအဂီၢ်လီၤ. အဒိ လံာ်စီဆှံတဲဝဲလၢ ပတဘၣ်လံၣ်တၢ်လီတၢ်, ဟုၣ်တၢ်, မၤကမၣ်မုၣ်ကမၣ်ခွါ, မၤဆူၣ်မၤစိးတၢ် ဒီးပတဘၣ်မၤဘၣ်ဃးပသးဒီး တၢ်ဝံတၢ်နါ အတၢ်ဖံးတၢ်မၤတဖၣ်န့ၣ်ဘၣ်. (ဖး ကတိၤဒိ ၆:၁၆-၁၉ တက့ၢ်; လီၢ်ဖျါ ၂၁:၈) ပမ့ၢ်ဒိကနၣ် ယဟိဝၤယွၤအကလုၢ်န့ၣ် ပကဒိးန့ၢ်ဘၣ် တၢ်အဘျုးအဖှိၣ်အါမးလီၤ. လၢတၢ်န့ၣ်အဃိ ပတၢ်အဲၣ်ယွၤ ဒီးအတၢ်သိၣ်တၢ်သီ ကအါထီၣ်စ့ၢ်ကီးလီၤ.
၇. တၢ်အဒိအတဲာ်တဖၣ်လၢ လံာ်စီဆှံပူၤန့ၣ် မၤစၢၤပှၤသ့ဒ်လဲၣ်.
၇ ဒ်သိးပကသ့ၣ်ညါ တၢ်အဘၣ်ဒီးတၢ်အကမၣ်အဂီၢ် တလိၣ်လၢပကဘၣ်မၤကမၣ် ယွၤအတၢ်သိၣ်တၢ်သီ ဒီးတူၢ်ဘၣ်တၢ်ကီတၢ်ခဲတဖၣ်ဘၣ်. ပဟံးန့ၢ်တၢ်မၤလိလၢ ပှၤလၢအမၤကမၣ်တၢ်လၢ အပူၤကွံာ်တဖၣ် အဒိအတဲာ်သ့ဝဲလီၤ. တၢ်အဒိအတဲာ်တဖၣ်အံၤ ပထံၣ်ဘၣ်အီၤလၢ လံာ်စီဆှံအပူၤလီၤ. ကတိၤဒိ ၁:၅ တဲဝဲလၢ “မ်ပှၤကူၣ်တၢ်သ့ကနၣ်တက့ၢ်. ဒီးအမၤလိတၢ်ကအါထီၣ်” လီၤ. တၢ်သိၣ်လိသ့ၣ်တဖၣ်အံၤ ဟဲလၢယွၤအအိၣ် ဒီးမ့ၢ်စ့ၢ်ကီးတၢ်သိၣ်လိလၢ အဂ့ၤကတၢၢ်လီၤ. အဒိ ဆိကမိၣ်ကွၢ် စီၤပၤဒၤဝံးန့ၣ် တဒိကနၣ်ယွၤအကလုၢ် ဒီးမၤကမၣ်မုၣ်ကမၣ်ခွါ ဒီးနီၢ်ဘၤသၡ့ဘၤအဃိ ထံၣ်ဘၣ်ဝဲတၢ်ကီတၢ်ခဲအါမးလီၤ. (၂ ၡမူၤအ့လး ၁၂:၇-၁၄) ဖဲနဖးတၢ်ဂ့ၢ်တဖၣ်အံၤအခါ သံကွၢ်လီၤနသးလၢ ‘ဒ်သိးစီၤဒၤဝံး တထံၣ်ဘၣ် တၢ်ကီတၢ်ခဲတဖၣ်အံၤအဂီၢ် အဝဲမၤတၢ်မနုၤသ့လဲၣ်. ယမ့ၢ်ထံၣ်ဘၣ် တၢ်အိၣ်သးဒ်သိးသိးဒီး စီၤဒၤဝံးန့ၣ် ယကမၤဒ်လဲၣ်. မ့ၢ်ယကမၤကမၣ်မုၣ်ကမၣ်ခွါ ဒ်သိးဒီးစီၤဒၤဝံးဧါ မ့တမ့ၢ် ယကဟးဆှဲး တၢ်မၤကမၣ်မုၣ်ကမၣ်ခွါ ဒ်သိးဒီးစီၤယိၤသးဧါ.’ (၁ မိၤၡ့ ၃၉:၁၁-၁၅) ပမ့ၢ်ဆိကမိၣ်ထံ တၢ်ကီတၢ်ခဲလၢ အကဟဲကဲထီၣ်အသး ခီဖျိလၢပမၤဘၣ် တၢ်ကမၣ်အဃိန့ၣ် ပက “သးဟ့တၢ်အၢ” ဒံးယံာ်ဒံးအါထီၣ်လီၤ.
၈, ၉. (က) ပသးလၢအသ့ၣ်ညါဒၣ်တၢ် ကမၤစၢၤပှၤလၢ ပကမၤတၢ်မနုၤလဲၣ်. (ခ) ဒ်သိးပသးလၢအသ့ၣ်ညါဒၣ်တၢ် ကမၤတၢ်ဂ့ၤဂ့ၤအဂီၢ် ယဟိဝၤယွၤအတၢ်ဟံးစုနဲၣ်ကျဲ ကမၤစၢၤပှၤဒ်လဲၣ်.
၈ ပဂုာ်ကျဲးစၢးဟးဆှဲး တၢ်လၢကစၢ်ယွၤ သးဟ့ဝဲတဖၣ်န့ၣ်လီၤ. ဘၣ်ဆၣ် ပမ့ၢ်ထံၣ်ဘၣ် တၢ်ကီတၢ်ခဲဒီး လံာ်စီဆှံအတၢ်သိၣ်တၢ်သီလၢ ကဟံးစုနဲၣ်ကျဲပှၤ မ့ၢ်တအိၣ်လီၤတံၢ်လီၤဆဲးန့ၣ် ပကမၤဒ်လဲၣ်. ကစၢ်ယွၤအဲၣ်ဒိးလၢ ပကမၤတၢ်မနုၤလဲၣ်န့ၣ် ပသ့ၣ်ညါအီၤကသ့ဒ်လဲၣ်. ပမ့ၢ်ပျဲလၢ လံာ်စီဆှံကသိၣ်လိ ပသးလၢအသ့ၣ်ညါဒၣ်တၢ်န့ၣ် ပဆၢတဲာ်တၢ်လၢအဘၣ်ကသ့လီၤ.
၉ ယဟိဝၤယွၤ အဲၣ်ပှၤအဃိ ဟ့ၣ်လီၤပှၤတၢ်ဟံးစုနဲၣ်ကျဲတဖၣ်လၢ ကမၤစၢၤပှၤ ဒ်သိး ပသးလၢအသ့ၣ်ညါဒၣ်တၢ် မၤတၢ်ဂ့ၤဂ့ၤ ကသ့အဂီၢ်လီၤ. ယဟိဝၤယွၤ တဲဝဲလၢ “ယဲဒၣ်အံၤ, ယမ့ၢ်ယွၤ, နကစၢ်လၢအသိၣ်လိနၤ ဒ်သိးနကဘၣ်ဘျုးဘၣ်ဖှိၣ်, ဒီးယဒုးလဲၤနၤလၢ ကျဲလၢနဂ့ၤလဲၤန့ၣ်လီၤ.” (ယၡါယၤ ၄၈:၁၇, ၁၈) ပမ့ၢ်ဆိကမိၣ်ထံ လံာ်စီဆှံအတၢ်ဟံးစုနဲၣ်ကျဲတဖၣ် တုၤအနုာ်လီၤလၢပသးအပူၤန့ၣ် ကမၤစၢၤပှၤဒ်သိး ပကဘှီဘၣ်ထီၣ် ဒီးမၤဂ့ၤထီၣ် ပသးလၢအသ့ၣ်ညါဒၣ်တၢ်လီၤ. တကးဒံးဘၣ် ပဆၢတဲာ်တၢ်လၢအဘၣ် ကသ့လီၤ.
ပျဲယွၤအတၢ်ဟံးစုနဲၣ်ကျဲ မၤစၢၤနၤတက့ၢ်
၁၀. ကစၢ်ယွၤအတၢ်ဟံးစုနဲၣ်ကျဲတဖၣ် မၤစၢၤပှၤဒ်လဲၣ် ဒီးယ့ၣ်ၡူးသူဝဲ တၢ်ဟံးစုနဲၣ်ကျဲတဖၣ်အံၤလၢ ကသိၣ်လိအပျဲၢ်အဘီၣ်တဖၣ်ဒ်လဲၣ်.
၁၀ ကစၢ်ယွၤအတၢ်ဟံးစုနဲၣ်ကျဲတဖၣ် မၤစၢၤပှၤဒ်သိး ပဆၢတဲာ်တၢ်လၢအဘၣ် ကသ့အဂီၢ်လီၤ. ပမ့ၢ်သ့ၣ်ညါယဟိဝၤယွၤ အတၢ်ဟံးစုနဲၣ်ကျဲတဖၣ်ဂ့ၤဂ့ၤန့ၣ် ကမၤစၢၤပှၤဒ်သိး ပကသ့ၣ်ညါအတၢ်ထံၣ်အိၣ်ဒ်လဲၣ် ဒီးဘၣ်မနုၤအဃိ အဝဲဟ့ၣ်ပှၤ တၢ်သိၣ်တၢ်သီတဖၣ်အံၤလဲၣ်န့ၣ်လီၤ. ယ့ၣ်ၡူးသူဝဲ လံာ်စီဆှံအတၢ်ဟံးစုနဲၣ်ကျဲတဖၣ် ဒ်သိးကသိၣ်လိဝဲ အပျဲၢ်အဘီၣ်တဖၣ်လၢ တၢ်ပာ်သူၣ်ပာ်သး ဒီးတၢ်ဖံးတၢ်မၤတနီၤန့ၣ် ဒုးအိၣ်ထီၣ်တၢ်ကီတၢ်ခဲသ့လီၤ. အဒိ အဝဲသိၣ်လိဝဲလၢ တၢ်သူၣ်ဒိၣ်သးဖျိးန့ၣ် ကဒုးအိၣ်ထီၣ် တၢ်မၤဆူၣ်မၤစိး ဒီးတၢ်ဆိကမိၣ်လၢ အတဂ့ၤတဖၣ်န့ၣ် ကဆှၢပှၤဆူ တၢ်မၤကမၣ်မုၣ်ကမၣ်ခွါလီၤ. (မးသဲ ၅:၂၁, ၂၂, ၂၇, ၂၈) ပမ့ၢ်တူၢ်လိာ်ယဟိဝၤယွၤ အတၢ်ဟံးစုနဲၣ်ကျဲန့ၣ် ပသးလၢအသ့ၣ်ညါဒၣ်တၢ် ကမၤတၢ်ဂ့ၤဂ့ၤ ဒီးပတၢ်ဆၢတဲာ်တဖၣ်န့ၣ် ကမၤလၤကပီၤယွၤလီၤ.—၁ ကရံၣ်သူး ၁၀:၃၁.
ခရံာ်ဖိလၢ အဒိၣ်တုာ်ခိၣ်ပှဲၤတဂၤန့ၣ် ကပာ်ကဲပှၤဂၤ အသးလၢအသ့ၣ်ညါဒၣ်တၢ်လီၤ (ကွၢ်လံာ်အဆၢ ၁၁, ၁၂)
၁၁. ပဝဲတဂၤဒီးတဂၤ ပသးလၢအသ့ၣ်ညါဒၣ်တၢ်န့ၣ် လီၤဆီလိာ်သးသ့ဒ်လဲၣ်.
၁၁ ခရံာ်ဖိတဖၣ်မ့ၢ်လူၤပိာ်ထွဲ လံာ်စီဆှံတၢ်ဟံးစုနဲၣ်ကျဲသနာ်က့ ဘၣ်ဃးဒီးတၢ်ဂ့ၢ်တနီၤနီၤန့ၣ် အဝဲသ့ၣ်အတၢ်ထံၣ် ကလီၤဆီလိာ်အသးလီၤ. အဒိ ပကကွၢ်သကိး ဘၣ်ဃးဒီးတၢ်အီသံးအဂ့ၢ်န့ၣ်လီၤ. လံာ်စီဆှံတတဲဝဲလၢ တၢ်အီသံးန့ၣ် ကမၣ်ဘၣ်. ဘၣ်ဆၣ် လံာ်စီဆှံဟ့ၣ်ပလီၢ်ပှၤလၢ ပတဘၣ်အီသံးအါတလၢဘၣ် ဒီးပတဘၣ်အီတုၤလၢပမူၤဘၣ်. (ကတိၤဒိ ၂၀:၁; ၁ တံၤမသ့း ၃:၈) မ့မ့ၢ်ဒ်န့ၣ်န့ၣ် အဲၣ်ဒိးတဲဝဲလၢ ခရံာ်ဖိတဖၣ် မ့ၢ်တအီသံးအါတလၢဘၣ်န့ၣ် အဝဲသ့ၣ်တလိၣ် ဆိကမိၣ်န့ၢ်တၢ်လၢ ပှၤဂၤအဂီၢ်ဘၣ်ဧါ. တမ့ၢ်ဒ်န့ၣ်ဘၣ်. ပသးလၢအသ့ၣ်ညါဒၣ်တၢ် မ့ၢ်ပျဲပှၤလၢပကအီသံးဘၣ်ဆၣ် ပကဘၣ်ပလီၢ်ပသး ဒ်သိးပသုတမၤတံာ်တာ် ပှၤဂၤအသးလၢ အသ့ၣ်ညါဒၣ်တၢ်တဂ့ၤအဂီၢ်န့ၣ်လီၤ.
၁၂. ဒ် ရိမ့ၤ ၁၄:၂၁ ပာ်ဖျါထီၣ်ဝဲအသိး ပပာ်ကဲပှၤဂၤ အသးလၢအသ့ၣ်ညါဒၣ်တၢ် ကသ့ဒ်လဲၣ်.
၁၂ စီၤပီလူးပာ်ဖျါထီၣ်ဝဲလၢ ပကဘၣ်ပာ်ကဲပှၤဂၤ အသးလၢအသ့ၣ်ညါဒၣ်တၢ်လီၤ. လၢတၢ်န့ၣ်အဃိ အဝဲကွဲးဝဲလၢ “အီၣ်တၢ်ညၣ်မ့ၢ်ဂ့ၤ, အီစပံးထံမ့ၢ်ဂ့ၤ, မၤတၢ်အဂုၤအဂၤလၢအကမၤ နဒီပုၢ်ဝဲၢ်ဘၣ်တိၢ်မ့ၢ်ဂ့ၤ, ဘၣ်တၢ်လီၤကမၣ်မ့ၢ်ဂ့ၤ, ဘၣ်တၢ်မၤစၢ်လီၤ အဂံၢ်အဘါမ့ၢ်ဂ့ၤ, ဂ့ၤဟးဆှဲး” လီၤ. (ရိမ့ၤ ၁၄:၂၁) ပဝဲသ့ၣ်တဖၣ် ပအိၣ်ဒီးတၢ်ခွဲးတၢ်ယာ်လၢ ပကအီသံးသနာ်က့ ပမ့ၢ်သ့ၣ်ညါလၢ အကကဲထီၣ်တၢ်လီၤဃံၢ်အလီၢ်လၢ ပဒီပုၢ်ဝဲၢ်တဂၤဂၤအဂီၢ်န့ၣ် ပတအီလၢၤဘၣ်. ဘၣ်သ့ၣ်သ့ၣ် ဒီပုၢ်ဝဲၢ်တဂၤအံၤ တချုးလၢအသ့ၣ်ညါ တၢ်မ့ၢ်တၢ်တီဒံးဘၣ်န့ၣ် အဝဲကမ့ၢ်သံးအကစၢ်အဃိ အဝဲဆၢတဲာ်လီၤအသးလၢ တအီသံးနီတစဲးလၢၤဘၣ်. လၢတၢ်န့ၣ်အဃိ ပတအဲၣ်ဒိးကဲထီၣ် တၢ်လီၤဃံၢ်အလီၢ်လၢအဂီၢ်ဘၣ်. (၁ ကရံၣ်သူး ၆:၉, ၁၀) အဒိ ပမ့ၢ်ကိးအီၣ်ဒီပုၢ်ဝဲၢ်တဂၤအံၤ မ့ၤလၢပဟံၣ် ဒီးအဝဲမ့ၢ်တအီသံးဘၣ်န့ၣ် မ့ၢ်ပကဂုာ်ကျဲးစၢး ဒုးအီန့ၢ်ဆူၣ်အီၤဧါ. ပတမၤဒ်န့ၣ်ဘၣ်.
မ့ၢ်နသးအိၣ်တူၢ်ဆါနသးလၢ နကမၤစၢၤပှၤဂၤဧါ
၁၃. ဒ်သိးပှၤဂၤကတူၢ်လိာ် ဘီမုၢ်တၢ်သးခုကစီၣ်အဂီၢ် စီၤတံၤမသ့းမၤဝဲဒ်လဲၣ်.
၁၃ ဖဲစီၤတံၤမသ့း အသးစၢ်အခါ အဝဲဘၣ်တၢ်ကူးတရံးအီၤလီၤ. အဝဲကမၤဝဲဒ်န့ၣ်အဂီၢ် ကဆါဒိၣ်မး သနာ်က့ မ့ၢ်လၢတၢ်ကူးတရံးန့ၣ် အရ့ဒိၣ်လၢပှၤယူဒၤဖိလၢ အဝဲကလဲၤစံၣ်တဲၤတဲလီၤဝဲ တဖၣ်အဂီၢ်အဃိ အဝဲမၤဝဲဒ်န့ၣ်လီၤ. ဒ်စီၤပီလူးအသိး စီၤတံၤမသ့းတအဲၣ်ဒိးလၢ ပှၤကလီၤဃံၢ်လၢအဃိနီတဂၤဘၣ်. (မၤတၢ် ၁၆:၃; ၁ ကရံၣ်သူး ၉:၁၉-၂၃) မ့မ့ၢ်နၤမီၤ နတူၢ်ဆါနသးလၢ ပှၤဂၤအဂီၢ်ကကဲစ့ၢ်ကီးဧါ.
“လဲၤလၢညါတုၤလၢ တၢ်လၢတၢ်ပှဲၤတက့ၢ်”
၁၄, ၁၅. (က) ပကဲထီၣ်ပှၤလၢ အဒိၣ်တုာ်ခိၣ်ပှဲၤ ကသ့ဒ်လဲၣ်. (ခ) ခရံာ်ဖိလၢ အဒိၣ်တုာ်ခိၣ်ပှဲၤန့ၣ် ရ့ဒီးပှၤဂၤဒ်လဲၣ်.
၁၄ ပဝဲခဲလၢာ် “မ်ပလဲၤပူၤကွံာ် ခရံာ်အကလုၢ်ကထါ အခီၣ်ထံးအဂ့ၢ်, ဒီးလဲၤလၢညါ တုၤလၢ တၢ်လၢတၢ်ပှဲၤ တက့ၢ်.” (ဧ့ၤဘြံၤ ၆:၁) ပအိၣ်လၢ တၢ်မ့ၢ်တၢ်တီအပူၤယံာ်အဃိ ပကဲထီၣ်ပှၤဒိၣ်တုာ်ခိၣ်ပှဲၤ တမ့ၢ်ဘၣ်. ဒ်သိး ပကကဲထီၣ် ပှၤဒိၣ်တုာ်ခိၣ်ပှဲၤအဂီၢ် ပကဘၣ်ထဲးဂံၢ်ထဲးဘါအါမးလီၤ. ဒ်သိး ပတၢ်သ့ၣ်ညါနၢ်ပၢၢ် ကစၢ်ယွၤကလုၢ်ကထါ ကအါထီၣ်အဂီၢ် ပကဘၣ်ဖးလံာ်စီဆှံ ကိးနံၤဒဲးလီၤ. (စံးထီၣ်ပတြၢၤ ၁:၁-၃) နမ့ၢ်ဖးလံာ်စီဆှံကိးနံၤဒဲးန့ၣ် နကနၢ်ပၢၢ်အါထီၣ် ယဟိဝၤယွၤအတၢ်သိၣ်တၢ်သီ ဒီးအတၢ်ဟံးစုနဲၣ်ကျဲတဖၣ်လီၤ.
၁၅ တၢ်သိၣ်တၢ်သီအရ့ဒိၣ်ကတၢၢ်လၢ ခရံာ်ဖိအဂီၢ်န့ၣ် မ့ၢ်မနုၤလဲၣ်. မ့ၢ်ဝဲတၢ်သိၣ်တၢ်သီလၢ အဘၣ်ဃးဒီးတၢ်အဲၣ်တၢ်ကွံလီၤ. ယ့ၣ်ၡူးတဲဘၣ် အပျဲၢ်အဘီၣ်တဖၣ်လၢ “သုအဲၣ်လိာ်ကွံလိာ်သုသးအဃိဒီး, ပှၤခဲလၢာ်ကသ့ၣ်ညါလၢ သုမ့ၢ်ယပျဲၢ်ယဘီၣ်လီၤ.” (ယိၤဟၣ် ၁၃:၃၅) တၢ်အဲၣ်တၢ်ကွံန့ၣ် မ့ၢ်ဝဲ “တၢ်သိၣ်တၢ်သီစီၤပၤ” ဒီး “မ့ၢ်တၢ်မၤလၢထီၣ်ပှဲၤထီၣ် တၢ်သိၣ်တၢ်သီလီၤ.” (ယၤကိာ် ၂:၈; ရိမ့ၤ ၁၃:၁၀) လံာ်စီဆှံတဲဝဲလၢ “ယွၤမ့ၢ်တၢ်အဲၣ်တၢ်ကွံ” အဃိ တၢ်အဲၣ်တၢ်ကွံမ့ၢ်တၢ်လၢ အရ့ဒိၣ်ဒိၣ်မးလီၤ. (၁ ယိၤဟၣ် ၄:၈) လၢကစၢ်ယွၤအဂီၢ် တၢ်အဲၣ်တၢ်ကွံန့ၣ် တမ့ၢ်ထဲတၢ်တူၢ်ဘၣ်တခါဧိၤဘၣ်. အဝဲပာ်ဖျါထီၣ်အတၢ်အဲၣ် ခီဖျိအတၢ်မၤလီၤ. စီၤယိၤဟၣ် ကွဲးဖျါထီၣ်ဝဲလၢ “ယွၤအတၢ်အဲၣ်တၢ်ကွံ အိၣ်ဖျါဝဲလၢပဂီၢ်လၢတၢ်အံၤ, ယွၤမၢလီၤအဖိခွါတဂၤဃီ ဆူဟီၣ်ခိၣ်ချၢ, ဒ်သိးပကမူလၢအဃိလီၤ.” (၁ ယိၤဟၣ် ၄:၉) ပမ့ၢ်အဲၣ်ယဟိဝၤယွၤ, ယ့ၣ်ၡူး, ဒီပုၢ်ဝဲၢ်တဖၣ် ဒီးပှၤအဂၤန့ၣ် မ့ၢ်ဒၣ်ပပာ်ဖျါထီၣ်လၢ ပမ့ၢ်ခရံာ်ဖိလၢ အဒိၣ်တုာ်ခိၣ်ပှဲၤန့ၣ်လီၤ.—မးသဲ ၂၂:၃၇-၃၉.
ပမ့ၢ်ဆိကမိၣ်ထံ လံာ်စီဆှံ အတၢ်ဟံးစုနဲၣ်ကျဲတဖၣ်န့ၣ် ပသးလၢအသ့ၣ်ညါဒၣ်တၢ် ကမၤတၢ်ဂ့ၤဂ့ၤလီၤ (ကွၢ်လံာ်အဆၢ ၁၆)
၁၆. ခရံာ်ဖိလၢအဒိၣ်တုာ်ခိၣ်ပှဲၤလၢ နီၢ်သးတကပၤန့ၣ် ဘၣ်မနုၤအဃိ ပာ်လုၢ်ပာ်ပှ့ၤဝဲ လံာ်စီဆှံအတၢ်ဟံးစုနဲၣ်ကျဲ ဒံးယံာ်ဒံးအါထီၣ်လဲၣ်.
၁၆ ပမ့ၢ်ဒိၣ်တုာ်ခိၣ်ပှဲၤလၢ နီၢ်သးတကပၤန့ၣ် ပတၢ်ပာ်လုၢ်ပာ်ပှ့ၤ လံာ်စီဆှံအတၢ်ဟံးစုနဲၣ်ကျဲ ကအါထီၣ်ဝဲကွ့ၢ်ကွ့ၢ်လီၤ. တၢ်သိၣ်တၢ်သီအါတက့ၢ်န့ၣ် ကကဲဘျုးဝဲထဲလၢ တၢ်အိၣ်သးတခါအဂီၢ်လီၤ. မ့မ့ၢ်လံာ်စီဆှံ အတၢ်ဟံးစုနဲၣ်ကျဲတဖၣ်န့ၣ် ကဲဘျုးဝဲလၢပတၢ်အိၣ်မူ ကိးသနၢၣ်ဒဲးအဂီၢ်လီၤ. အဒိ တၢ်ဒီတံၤဒီသကိးဒီးပှၤအၢပှၤသီ လီၤဘၣ်ယိၣ်ထဲလဲၣ်န့ၣ် ဖိသၣ်တဂၤတနၢ်ပၢၢ်ဝဲဘၣ်. လၢတၢ်န့ၣ်အဃိ မိၢ်ပၢ်တဖၣ် ကပာ်လီၤတၢ်သိၣ်တၢ်သီ ဒ်သိးကဒီသဒၢအီၤလီၤ. (၁ ကရံၣ်သူး ၁၅:၃၃) ဘၣ်ဆၣ် ဖဲဖိသၣ်တဂၤအံၤ ဒိၣ်တုာ်ခိၣ်ပှဲၤအခါ အဝဲကမၤထွဲဝဲ လံာ်စီဆှံအတၢ်ဟံးစုနဲၣ်ကျဲ ဒ်သိးကဃုထၢ တံၤသကိးလၢအဂ့ၤလီၤ. (ဖး ၁ ကရံၣ်သူး ၁၃:၁၁; ၁၄:၂၀ တက့ၢ်.) ပမ့ၢ်ဆိကမိၣ်ထံ လံာ်စီဆှံအတၢ်ဟံးစုနဲၣ်ကျဲန့ၣ် ပသးလၢအသ့ၣ်ညါဒၣ်တၢ် မၤတၢ်ကဂ့ၤထီၣ်စ့ၢ်ကီးလီၤ. တကးဒံးဘၣ် တၢ်အိၣ်သးမ့ၢ်အိၣ်ဒ်လဲၣ်ဂ့ၤဒ်လဲၣ်ဂ့ၤ ပကသ့ၣ်ညါလၢ ကစၢ်ယွၤအဲၣ်ဒိးလၢ ပကမၤတၢ်မနုၤလဲၣ်န့ၣ်လီၤ.
၁၇. ဒ်သိးပဆၢတဲာ်တၢ်လၢအဘၣ် ကသ့အဂီၢ် ဘၣ်မနုၤအဃိ ပတဲသ့လၢ ပအိၣ်ဒီးတၢ်မၤစၢၤ လၢလၢပှဲၤပှဲၤလဲၣ်.
၁၇ ဒ်သိး ပကမၤတၢ်ဘၣ် ယဟိဝၤယွၤ အသးအဂီၢ် ပဒိးန့ၢ်ဘၣ်တၢ်မၤစၢၤ လၢလၢပှဲၤပှဲၤလီၤ. လံာ်စီဆှံန့ၣ် အိၣ်ဒီးတၢ်သိၣ်တၢ်သီ ဒီးတၢ်ဟံးစုနဲၣ်ကျဲလၢ ကမၤစၢၤပှၤဒ်သိးပ ‘ကလၢထီၣ်ပှဲၤထီၣ် ဒီးကအိၣ် ကတဲာ်ကတီၤပသး လၢလၢပှဲၤပှဲၤ လၢကယဲၢ်တၢ်မၤဂ့ၤ တမံၤလၢ်လၢ်အဂီၢ်လီၤ.’ (၂ တံမသ့း ၃:၁၆, ၁၇) လံာ်စီဆှံတၢ်ဟံးစုနဲၣ်ကျဲတဖၣ်အံၤ မၤစၢၤပှၤဒ်သိး ပကသ့ၣ်ညါယဟိဝၤယွၤ အတၢ်ထံၣ်အိၣ်ဒ်လဲၣ်န့ၣ်လီၤ. ဘၣ်ဆၣ် ဒ်သိးပကသ့ၣ်ညါအဂီၢ် ပကဘၣ်ထဲးဂံၢ်ထဲးဘါ သပှၢ်ကတၢၢ်လီၤ. (အ့းဖ့းစူး ၅:၁၇) ပကမၤဒ်န့ၣ်အဂီၢ် ပအိၣ်ဒီး Watch Tower Publications Index, the Research Guide for Jehovah’s Witnesses, the Watchtower Library, the Watchtower ONLINE LIBRARY, and the JW Library app လၢကမၤစၢၤပှၤအဂီၢ်လီၤ. ပမ့ၢ်သူတၢ်ပီးတၢ်လီတဖၣ်အံၤ ဖဲပမၤနီၢ်ကစၢ်တၢ်မၤလိလံာ်စီဆှံ ဒီးဟံၣ်ဖိဃီဖိ တၢ်မၤလိလံာ်စီဆှံအခါန့ၣ် ကကဲဘျုးဝဲလီၤ.
ပသးလၢအသ့ၣ်ညါဒၣ်တၢ် မ့ၢ်ဘၣ်တၢ်သိၣ်လိအီၤလၢ လံာ်စီဆှံန့ၣ် ပကဒိးန့ၢ်ဘၣ် တၢ်ဆိၣ်ဂ့ၤ
၁၈. ပမ့ၢ်အိၣ်မူမၤထွဲဒ် လံာ်စီဆှံအတၢ်ဟံးစုနဲၣ်ကျဲအသိးန့ၣ် ပတၢ်အိၣ်မူကမၤအသးဒ်လဲၣ်.
၁၈ ဖဲပမၤထွဲယဟိဝၤယွၤ အတၢ်သိၣ်တၢ်သီ ဒီးအတၢ်ဟံးစုနဲၣ်ကျဲအခါ ပတၢ်အိၣ်မူဂ့ၤထီၣ်ဝဲလီၤ. စံးထီၣ်ပတြၢၤ ၁၁၉:၉၇-၁၀၀ တဲဝဲလၢ “ယအဲၣ်ဒိး နတၢ်သိၣ်တၢ်သီန့ၣ် ဆံးဒိၣ်လဲၣ်. ယဆိကမိၣ်တၢ်လၢအဂ့ၢ်အကျိၤ သ့သ့တနံၤလီၤ. နတၢ်မၤလိာ်တဖၣ် ဒုးကူၣ်သ့ထီၣ်ယၤအါန့ၢ် ယဒုၣ်ယဒါတဖၣ်တက့ၢ်လီၤ. အဂ့ၢ်ဒ်အံၤ, အိၣ်ဒီးယၤလီၤထူလီၤယိာ်လီၤ. ယနူၤပၢၢ်ယနၢ်ပၢၢ်တၢ်န့ၣ်အါန့ၢ် ပှၤသိၣ်လိယၤခဲလၢာ်တက့ၢ်လီၤ. အဂ့ၢ်ဒ်အံၤ, ယဆိကမိၣ်လၢ နတၢ်အုၣ်အသးတဖၣ် အဂ့ၢ်အကျိၤလီၤ. ယနၢ်ပၢၢ်တၢ်အါန့ၢ် ပမှံၤပပှၢ်တက့ၢ်လီၤ. အဂ့ၢ်ဒ်အံၤ, ယတိၢ်န့ၢ်ဖံးဃာ် နတၢ်မၤလိာ်တဖၣ်လီၤ.” ပမ့ၢ်ဟံးန့ၢ်တၢ်ဆၢကတီၢ် ဒီးဆိကမိၣ်ထံ ကစၢ်ယွၤအတၢ်သိၣ်တၢ်သီ ဒီးအတၢ်ဟံးစုနဲၣ်ကျဲန့ၣ် ပတၢ်ကူၣ်သ့ဒီးပတၢ်သ့ၣ်ညါနၢ်ပၢၢ် ကအါထီၣ်ဝဲလီၤ. ဖဲပအိၣ်မူမၤထွဲ ယွၤအတၢ်သိၣ်တၢ်သီ ဒီးအတၢ်ဟံးစုနဲၣ်ကျဲအခါ ပသးလၢအသ့ၣ်ညါဒၣ်တၢ် ကမၤတၢ်ဂ့ၤဂ့ၤ ဒီးပက “ဒိၣ်တုာ်ခိၣ်ပှဲၤလၢ တၢ်ထဲသိးဒီးခရံာ်အနီၢ် အတၢ်လၢတၢ်ပှဲၤအပူၤလီၤ.”—အ့းဖ့းစူး ၄:၁၃.
