“သုတၢ်ကပီၤန့ၣ် ဒုးကပီၤထီၣ်အီၤ” ဒ်သိးပှၤကစံးထီၣ်ပတြၢၤ ယဟိဝၤယွၤတက့ၢ်
“သုတၢ်ကပီၤန့ၣ် ဒုးကပီၤထီၣ်အီၤလၢ ပှၤကညီအမဲာ်ညါ ဒ်သိး . . . ကစံးထီၣ်ပတြၢၤ သုပၢ်” တက့ၢ်.—မးသဲ ၅:၁၆.
၁. ဘၣ်မနုၤအဃိ ပအိၣ်ဒီးတၢ်သးခုလဲၣ်.
ကစၢ်ယွၤအခ့အပှၤတဖၣ် ဒုးကပီၤထီၣ်ဝဲ အတၢ်ကပီၤလၢ ဟီၣ်ခိၣ်ဒီဘ့ၣ်အဃိ ပသးခုဒိၣ်မးလီၤ. လၢမဟါတနံၣ်န့ၣ် ယဟိဝၤယွၤအခ့အပှၤတဖၣ် မၤလိလံာ်စီဆှံဒီးပှၤဂၤအိၣ်ဝဲ ၁၀,၀၀၀,၀၀၀ ဘျဲၣ်ညါ. ပှၤလၢအသးအိၣ်တၢ်မ့ၢ်တၢ်တီ လၢအကကွဲၢ်တဖၣ် ဟဲထီၣ်တၢ်သ့ၣ်နီၣ်ထီၣ်က့ၤအမူး ဒီးမၤလိဘၣ်ဝဲ ယဟိဝၤယွၤအတၢ်ဟ့ၣ်လၢ အလုၢ်ဒိၣ်ပှ့ၤဒိၣ်လၢအမ့ၢ် တၢ်ပှ့ၤက့ၤအဂ့ၢ်လီၤ.—၁ ယိၤဟၣ် ၄:၉.
၂, ၃. (က) ဒ်သိးပကကပီၤထီၣ် “ဒ်တၢ်ကပီၤတဖၣ်လၢ ဟီၣ်ခိၣ်ချၢအသိး” အဂီၢ် တၢ်မနုၤတဖၣ် တကဲထီၣ်တၢ်မၤတံာ်တာ်လၢ ပဂီၢ်ဘၣ်လဲၣ်. (ခ) လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.
၂ လၢဟီၣ်ခိၣ်ဒီဘ့ၣ်န့ၣ် ယဟိဝၤပှၤအုၣ်အသးတဖၣ် ကတိၤဝဲကျိာ်အါမးလီၤ. အဝဲသ့ၣ်ကတိၤကျိာ် လီၤဆီလိာ်အသးသနာ်က့ တကဲထီၣ်တၢ်တြီမၤတံာ်တာ်လၢ ကစံးထီၣ်ပတြၢၤ ယဟိဝၤယွၤလၢ တၢ်ဃူတၢ်ဖိးအပူၤဘၣ်. (လီၣ်ဖျါ ၇:၉) ပကျိာ်မ့ၢ်လီၤဆီလိာ်အသးမ့ၢ်ဂ့ၤ ပအိၣ်လၢတၢ်လီၢ်ဖဲလဲၣ်ဂ့ၤ ဖဲလဲၣ်ဂ့ၤ ပကပီၤထီၣ် “ဒ်တၢ်ကပီၤတဖၣ်လၢ ဟီၣ်ခိၣ်ချၢအသိး” သ့ဝဲလီၤ.—ဖံလံးပံၤ ၂:၁၆.
၃ ပတၢ်စံၣ်တဲၤတဲလီၤတၢ်မၤ, ခရံာ်ဖိအတၢ်ဃူတၢ်ဖိး ဒီးပတၢ်သူၣ်ဆူၣ်သးဆူၣ်န့ၣ် ကမၤလၤကပီၤယဟိဝၤယွၤလီၤ. ပမၤကပီၤထီၣ် ပတၢ်ကပီၤလၢ ကျဲသၢဘိအံၤကသ့ဒ်လဲၣ်.—ဖး မးသဲ ၅:၁၄-၁၆ တက့ၢ်.
မၤစၢၤပှၤဂၤလၢ ကဘူၣ်ထီၣ်ဘါထီၣ် ယဟိဝၤယွၤအဂီၢ်
၄, ၅. (က) ပစံၣ်တဲၤတဲလီၤတၢ် တကးဒံးဘၣ် ပကပီၤထီၣ်လၢ ကျဲအဂၤကသ့ဒ်လဲၣ်. (ခ) ပမ့ၢ်ဖျါသးဂ့ၤန့ၣ် အဘျုးအိၣ်ဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၄ တၢ်စံၣ်တဲၤတဲလီၤတၢ်မၤ ဒီးတၢ်လဲၤဒုးကဲထီၣ်ပှၤဂၤလၢ ယ့ၣ်ၡူးအပျဲၢ်အဘီၣ်န့ၣ် မ့ၢ်ဝဲကျဲလၢအရ့ဒိၣ်တဘိလၢ ပကမၤကပီၤထီၣ် ပတၢ်ကပီၤန့ၣ်လီၤ. (မးသဲ ၂၈:၁၉, ၂၀) ဖဲ ၁၉၂၅ န့ၣ် တၢ်ဂ့ၢ်လၢအဘၣ်ဃးဒီး “ကပီၤထီၣ်လၢတၢ်ခံးကျါ” ပာ်ဖျါထီၣ်ဝဲလၢ လၢမုၢ်နံၤခံကတၢၢ် အဆၢကတီၢ်န့ၣ် “ပှၤမ့ၢ်တဟံးန့ၢ်တၢ်ခွဲးတၢ်ယာ်လၢ ကဒုးကပီၤထီၣ်အတၢ်ကပီၤဘၣ်န့ၣ်” အဝဲသ့ၣ်တီဒီးယွၤ တသ့နီတဂၤဘၣ်. ဒီးတဲကဒီးဝဲလၢ “အဝဲသ့ၣ်ကဘၣ်မၤဝဲခီဖျိ တဲဘၣ်ပှၤဂၤလၢ တၢ်သးခုအကစီၣ် ဒီးကဘၣ်အိၣ်မူထွဲ ဒ်တၢ်ကပီၤအကျဲအသိးလီၤ.” (The Watch Tower, June 1, 1925) ပတၢ်စံၣ်တဲၤတဲလီၤတၢ်မၤ ဒီးပသကဲာ်ပဝးန့ၣ် ကမၤလၤကပီၤ ယဟိဝၤယွၤလီၤ. ဖဲပဟးစံၣ်တဲၤတဲလီၤတၢ်အခါ ပှၤအါဂၤထံၣ်ဝဲလီၤ. ဖဲပနံၤကမှံပၠးအဝဲသ့ၣ် ဒီးပဆၢဂ့ၤဆၢဝါအဝဲသ့ၣ် လၢတၢ်မဲာ်မုာ်နါဆၢအခါ အဝဲသ့ၣ်ကအိၣ်ဒီး တၢ်ထံၣ်လၢအဂ့ၤ လၢပဝဲသ့ၣ်တဖၣ် ဒီးယွၤလၢပဘူၣ်ထီၣ်ဘါထီၣ်အီၤ အဖီခိၣ်န့ၣ်လီၤ.
ပတၢ်စံၣ်တဲၤတဲလီၤတၢ်မၤ ဒီးပသကဲာ်ပဝးန့ၣ် မၤလၤကပီၤယဟိဝၤယွၤ
၅ ယ့ၣ်ၡူးတဲဘၣ်အပျဲၢ်အဘီၣ်တဖၣ်လၢ “တုၤသုလဲၤနုာ်လၢဟံၣ်ပူၤဒီး, ဆိၣ်ဂ့ၤအီၤတက့ၢ်.” (မးသဲ ၁၀:၁၂) ဖဲယ့ၣ်ၡူးစံၣ်တဲၤတဲလီၤတၢ်အလီၢ်န့ၣ် လုၢ်လၢ်အိၣ်ဝဲလၢ ပှၤကွဲမုာ်ပှၤတမှံၤလၢ ဟံၣ်ပူၤန့ၣ်လီၤ. မုၢ်မဆါတနံၤအံၤ တၢ်လီၢ်အါတီၤန့ၣ် ပှၤတမၤဝဲဒ်န့ၣ်လၢၤဘၣ်. ပှၤအါတက့ၢ်မ့ၢ်ထံၣ်ဝဲ ပှၤလၢအဝဲသ့ၣ်တထံၣ်ဘၣ်ဝဲ နီတဘျီဘၣ်လၢအဟံၣ်မဲာ်ညါန့ၣ် အဝဲသ့ၣ်ဘၣ်ယိၣ်တၢ် မ့တမ့ၢ် သးထီၣ်တၢ်လီၤ. ဘၣ်ဆၣ် ပမ့ၢ်ဖျါသးဂ့ၤန့ၣ် အဝဲသ့ၣ်အတၢ်ဘၣ်ယိၣ်ကစှၤလီၤဝဲလီၤ. ဖဲနသူလ့ၣ်ဆီၣ် ဒီးစံၣ်တဲၤတဲလီၤတၢ်လၢ ကမျၢၢ်အမဲာ်ညါအခါ နမ့ၢ်အိၣ်ဒီး တၢ်မဲာ်မုာ်နါဆၢ ဒီးဆၢဂ့ၤဆၢဝါအဝဲသ့ၣ်န့ၣ် ကထိၣ်ဟူးထိၣ်ဂဲၤထီၣ် အဝဲသ့ၣ်လၢ ကဟဲဟံးန့ၢ် လံာ်လဲၢ်တဖၣ်လီၤ. ဘၣ်သ့ၣ်သ့ၣ် အဝဲသ့ၣ်ကအဲၣ်ဒိး တဲသကိးတၢ်ဒီးနၤလီၤ.
၆. ဒီပုၢ်ဝဲၢ်သးပှၢ်ဒီမါဝၤခံဂၤ ပာ်ဖျါထီၣ်လၢ အသူၣ်ဆူၣ်သးဆူၣ်လၢ တၢ်စံၣ်တဲၤတဲလီၤတၢ်မၤအပူၤဒ်လဲၣ်.
၆ ဒီပုၢ်ဝဲၢ်သးပှၢ်ဒီမါဝၤခံဂၤ လၢအအိၣ်လၢကီၢ်အဲကလံးန့ၣ် ခီဖျိလၢအတၢ်အိၣ်ဆူၣ်အိၣ်ချ့ တဂ့ၤအါအါဘၣ်အဃိ အဝဲသ့ၣ်လဲၤစံၣ်တဲၤတဲလီၤတၢ်လၢ ဟံၣ်တဖျၢၣ်ဘၣ်တဖျၢၣ် တကဲအါအါလၢၤဘၣ်. လၢတၢ်န့ၣ်အဃိ အဝဲသ့ၣ်ပာ်လီၤဝဲ စီၢ်နီၤခိၣ်တဖျၢၣ်လၢ အဟံၣ်မဲာ်ညါ ဒီးပာ်လီၤဝဲလံာ်လဲၢ်တဖၣ်န့ၣ်လီၤ. ခီဖျိလၢအဝဲသ့ၣ် အိၣ်ဘူးဒီးကၠိအဃိ ပာ်လီၤဝဲလံာ်လဲၢ်တဖၣ်လၢ အကထုးန့ၢ်မိၢ်ပၢ်လၢ အဟဲဆှၢအဖိလၢ ကၠိတဖၣ်အသးန့ၣ်လီၤ. မိၢ်ပၢ်တနီၤန့ၣ် ဟံးန့ၢ်ဝဲလံာ်လဲၢ်လီၤ. လံာ်လဲၢ်လၢ အဝဲသ့ၣ်ဟံးန့ၢ်ဝဲန့ၣ် မ့ၢ်ဝဲ Questions Young People Ask—Answers That Work, Volumes 1 and 2 (ပှၤသးစၢ်တဖၣ် အတၢ်သံကွၢ်—တၢ်စံးဆၢလၢ အကဲဘျုး အကူၣ် ၁ ဒီး ၂) ဒီးဒီပုၢ်ဝဲၢ်မုၣ်လၢ အမၤပှၤလဲၤလၢညါတဂၤ ဟဲမၤသကိးတၢ်ဒီး ပှၤနီၢ်ဒီမါဝၤခံဂၤအံၤလီၤ. မိၢ်ပၢ်တဖၣ်ထံၣ်ဘၣ်ဝဲလၢ ဒီပုၢ်ဝဲၢ်မုၣ်တဂၤအံၤ အိၣ်ဒီးတၢ်မဲာ်မုာ်နါဆၢ ဒီးပှၤဒီမါဝၤခံဂၤအံၤစ့ၢ်ကီး အသးအိၣ်မၤစၢၤပှၤဂၤလီၤ. လၢတၢ်န့ၣ်အဃိ လၢမိၢ်ပၢ်တဖၣ်အကျါတဂၤန့ၣ် စးထီၣ်မၤလိဝဲလံာ်စီဆှံလီၤ.
၇. နမၤစၢၤ ပှၤဘၣ်ကီဘၣ်ခဲလၢ နဟီၣ်ကဝီၤအပူၤတဖၣ် ကသ့ဒ်လဲၣ်.
၇ တယံာ်ဒံးဘၣ်န့ၣ် ပှၤအါဂၤဘၣ်ဃ့ၢ်ဟးထီၣ်ကွံာ်လၢ အထံအကီၢ် ဒီးလဲၤအိၣ်လၢထံဂၤကီၢ်ဂၤ ဒ်ပှၤဘၣ်ကီဘၣ်ခဲအသိးလီၤ. ဒ်သိးပှၤဘၣ်ကီဘၣ်ခဲတဖၣ်လၢ အဟဲအိၣ်လၢနဟီၣ်ကဝီၤအပူၤန့ၣ် ကသ့ၣ်ညါထီၣ် ယဟိဝၤယွၤအဂီၢ် နမၤစၢၤအီၤကသ့ဒ်လဲၣ်. အဆိကတၢၢ်န့ၣ် မၤလိသ့ထီၣ်နသးလၢ နကဘၣ်ဆၢဂ့ၤဆၢဝါ အဝဲသ့ၣ်လၢအကျိာ် ဒ်လဲၣ်န့ၣ်တက့ၢ်. နမ့ၢ်သူ JW Language app ဒီးတဲတၢ်လၢ အဝဲသ့ၣ်အကျိာ်ခံဖျၢၣ်သၢဖျၢၣ်န့ၣ် ဘၣ်သ့ၣ်သ့ၣ် အဝဲသ့ၣ်ကအဲၣ်ဒိး တဲတၢ်ဒီးနၤလီၤ. ဖဲန့ၣ်အခါ နဒုးနဲၣ်အဝဲသ့ၣ် တၢ်ဂီၤမူဒီးလံာ်လဲၢ်လၢ အဝဲသ့ၣ်အကျိာ်လၢ jw.org အပူၤသ့ဝဲလီၤ.—၅ မိၤၡ့ ၁၀:၁၉.
၈, ၉. (က) ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိန့ၣ် မၤစၢၤပှၤဒ်လဲၣ်. (ခ) ဒ်သိးဖိတဖၣ် ကဟ့ၣ်တၢ်စံးဆၢလၢ တၢ်အိၣ်ဖှိၣ်ရိဖှိၣ်ပူၤအဂီၢ် မိၢ်ပၢ်တဖၣ် မၤစၢၤအဝဲသ့ၣ် ကသ့ဒ်လဲၣ်.
၈ ဒ်သိးပတၢ်စံၣ်တဲၤတဲလီၤ ကထုးန့ၢ်ပှၤသးအဂီၢ် ယဟိဝၤယွၤ ဟ့ၣ်လီၤပှၤတၢ်ပီးတၢ်လီအါမးလီၤ. အဒိ တၢ်လၢပမၤလိဘၣ်လၢ ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိန့ၣ် မၤစၢၤပှၤဒ်သိး ပကက့ၤအိၣ်သကိးက့ၤ ဟံၣ်ကစၢ်ဒီးစးထီၣ်မၤ တၢ်မၤလိလံာ်စီဆှံ ကသ့အဂီၢ်လီၤ.
၉ ဖဲပှၤတမှံၤဟဲထီၣ်တၢ်အိၣ်ဖှိၣ်အခါ ဖိသၣ်တဖၣ် ဟ့ၣ်တၢ်စံးဆၢအဃိ အဝဲသ့ၣ်ကမၢကမၣ်ဝဲလီၤ. ပှၤတနီၤနီၤန့ၣ် ခီဖျိလၢအနၢ်ဟူဘၣ်ဝဲ ဖိသၣ်တဖၣ်စံးဆၢတၢ် ယိယိဖိဒီးပှၤနၢ်ပၢၢ်ဘၣ်အီၤညီအဃိ တၢ်မ့ၢ်တၢ်တီထုးန့ၢ် အဝဲသ့ၣ်အသးလီၤ. လၢတၢ်န့ၣ်အဃိ မိၢ်ပၢ်သ့ၣ်ဧၢ, သိၣ်လိနဖိတဖၣ် ဒ်သိးအဝဲသ့ၣ် ကဟ့ၣ်တၢ်စံးဆၢလၢ အနီၢ်ကစၢ်တၢ်ကတိၤန့ၣ်တက့ၢ်.—၁ ကရံၣ်သူး ၁၄:၂၅.
မၤအါထီၣ် တၢ်ဃူတၢ်ဖိး
၁၀. ဒ်သိးတၢ်ဃူတၢ်ဖိးကအါထီၣ်လၢ ဟံၣ်ဃီပူၤအဂီၢ် ဟံၣ်ဖိဃီဖိ တၢ်မၤလိလံာ်စီဆှံ မၤစၢၤဝဲသ့ဒ်လဲၣ်.
၁၀ ပမ့ၢ်မၤစၢၤ ပဟံၣ်ဖိဃီဖိတဖၣ် ဒ်သိးကမၤသကိးတၢ် ဒီးအိၣ်ဃူဃူဖိးဖိးန့ၣ် ယဟိဝၤယွၤအမံၤ ကဘၣ်တၢ်မၤလၤကပီၤအီၤလီၤ. အဒိ နမ့မ့ၢ်မိၢ်ပၢ်န့ၣ် ရဲၣ်လီၤကျဲၤလီၤလၢ နကမၤဟံၣ်ဖိဃီဖိ တၢ်မၤလိလံာ်စီဆှံ ထီဘိတက့ၢ်. ဟံၣ်ဖိဃီဖိအါတက့ၢ်န့ၣ် အဝဲသ့ၣ်ကွၢ်သကိးဝဲ JW တၢ်ဂီၤမူဒ်သိးသိးဝံၤ တဲသကိးဝဲတၢ်ဂ့ၢ်လၢ အဝဲသ့ၣ်မၤလိဘၣ်ဝဲတဖၣ်န့ၣ် မၤထွဲဝဲလၢအတၢ်အိၣ်မူအပူၤ ကသ့ဒ်လဲၣ်န့ၣ်လီၤ. ဒီးသ့ၣ်နီၣ်ထီၣ်လၢ တၢ်ဟံးစုနဲၣ်ကျဲလၢ ပှၤဖိသၣ်တဖၣ်လိၣ်ဘၣ်ဝဲ ဒီးတၢ်ဟံးစုနဲၣ်ကျဲလၢ ပှၤသးစၢ်တဖၣ်လိၣ်ဘၣ်ဝဲန့ၣ် ကလီၤဆီလိာ်အသးလီၤ. ဒ်သိးဟံၣ်ဖိဃီဖိ တၢ်မၤလိလံာ်စီဆှံ ကကဲဘျုးလၢ နဟံၣ်ဖိဃီဖိတဂၤစုာ်စုာ်အဂီၢ် မၤစၢၤအဝဲသ့ၣ်လၢ အဂ့ၤကတၢၢ်တက့ၢ်.—စံးထီၣ်ပတြၢၤ ၁၄၈:၁၂, ၁၃.
ကဘၣ်ရ့ဒီးပှၤသးပှၢ်တဖၣ် (ကွၢ်လံာ်အဆၢ ၁၁)
၁၁-၁၃. ဒ်သိးတၢ်ဃူတၢ်ဖိးကအါထီၣ် လၢတၢ်အိၣ်ဖှိၣ်ပူၤအဂီၢ် ပကဘၣ်မၤဒ်လဲၣ်.
၁၁ နမ့မ့ၢ်ပှၤသးစၢ်သနာ်က့ နမၤစၢၤပှၤခဲလၢာ်လၢ တၢ်အိၣ်ဖှိၣ်အပူၤ ဒ်သိးအဝဲသ့ၣ်ကတူၢ်ဘၣ်လၢ အမ့ၢ်ပှၤလၢအလုၢ်ဒိၣ်ပှ့ၤဒိၣ်သ့ဝဲလီၤ. နမၤအီၤသ့ခီဖျိ နလဲၤရ့ဒီးဒီပုၢ်ဝဲၢ်လၢ အသးပှၢ်တဖၣ်န့ၣ်လီၤ. သံကွၢ်အဝဲသ့ၣ်လၢ ဒ်သိးအဝဲသ့ၣ်ဆဲးမၤ ယဟိဝၤယွၤအတၢ်မၤ တုၤခဲအံၤကန့ၢ်အဂီၢ် တၢ်မနုၤမၤစၢၤအဝဲသ့ၣ်လဲၣ်. နမ့ၢ်မၤဒ်န့ၣ်န့ၣ် ကကဲထီၣ်တၢ်ဂံၢ်တၢ်ဘါလၢ အဝဲသ့ၣ်အဂီၢ် တကးဒံးဘၣ် ကကဲထီၣ်တၢ်ဂံၢ်တၢ်ဘါလၢ နဂီၢ်စ့ၢ်ကီးလီၤ. ပှၤသးစၢ်မ့ၢ်ဂ့ၤ ပှၤသးပှၢ်မ့ၢ်ဂ့ၤ ပဝဲခဲလၢာ် ပတူၢ်လိာ်မုာ်ပှၤတမှံၤလၢ အဟဲထီၣ်တၢ်အိၣ်ဖှိၣ်လၢ ပဘီမုၢ်ဘျီၣ်ဒိၣ်တဖၣ်သ့ဝဲလီၤ. ပာ်ဖျါထီၣ် တၢ်မဲာ်မုာ်နါဆၢ ဒီးဆၢဂ့ၤဆၢဝါအဝဲသ့ၣ်တက့ၢ်. မၤစၢၤအဝဲသ့ၣ်ဒ်သိး ကဒိးန့ၢ်ဘၣ်လီၢ်ဆ့ၣ်နီၤ ဒီးဒုးသ့ၣ်ညါအဝဲသ့ၣ်ဒီး ပှၤအဂၤတဖၣ်တက့ၢ်. နမ့ၢ်မၤဒ်န့ၣ်န့ၣ် အဝဲသ့ၣ်ကသးခုလီၤ.
၁၂ နမ့ၢ်ဘၣ်ဖီၣ်မူဒါလၢ တၢ်အိၣ်ဖှိၣ်လၢ တၢ်စံၣ်တဲၤတဲလီၢ်တၢ်အဂီၢ်န့ၣ် နမၤစၢၤပှၤသးပှၢ်တဖၣ် ဒ်သိးအဝဲသ့ၣ်ကပၣ်ဃုာ်လၢ တၢ်စံၣ်တဲၤတဲလီၤတၢ်မၤ အဂီၢ်သ့ဝဲလီၤ. မၤစၢၤအဝဲသ့ၣ် ဒ်သိးကလဲၤစံၣ်တဲၤတဲလီၤတၢ်လၢ တၢ်လီၢ်လၢအကြၢးဝဲဘၣ်ဝဲ ဒီးအဝဲသ့ၣ်န့ၣ်တက့ၢ်. ရဲၣ်လီၤကျဲၤလီၤဒ်သိး ပှၤသးစၢ်တဖၣ် ကမၤသကိးတၢ်ဒီး အဝဲသ့ၣ်န့ၣ်တက့ၢ်. ဒီပုၢ်ဝဲၢ်လၢအသးပှၢ် ဒီးအတၢ်အိၣ်ဆူၣ်အိၣ်ချ့ တဂ့ၤတဖၣ်န့ၣ် အဝဲသ့ၣ်ဟးစံၣ်တဲၤတဲလီၤတၢ်ဒ် ပှၤအဂၤအသိး တကဲလၢၤဘၣ်အဃိ အဝဲသ့ၣ်သးဆံးဝဲလီၤ. ဘၣ်ဆၣ်အဝဲသ့ၣ် မ့ၢ်သ့ၣ်ညါဝဲလၢ ပသးအိၣ် ဒီးနၢ်ပၢၢ်စၢၤအီၤန့ၣ် အဝဲသ့ၣ်အသးကမုာ်ထီၣ်ဝဲလီၤ. အဝဲသ့ၣ်အသးမ့ၢ်ပှၢ်ထဲလဲၣ်ဂ့ၤ အိၣ်လၢတၢ်မ့ၢ်တၢ်တီအပူၤ မ့ၢ်ယံာ်ထဲလဲၣ်ဂ့ၤ နတၢ်အဲၣ်န့ၣ်ကဟ့ၣ်ဂံၢ်ဟ့ၣ်ဘါ အဝဲသ့ၣ်ဒ်သိး ကဆဲးစံၣ်တဲၤတဲလီၤတၢ်လၢ တၢ်သူၣ်ဆူၣ်သးဆူၣ်အပူၤန့ၣ်လီၤ.—၃ မိၤၡ့ ၁၉:၃၂.
ဒ်သိးနကသ့ၣ်ညါအါထီၣ် ဒီပုၢ်ဝဲၢ်တဖၣ် လၢတၢ်အိၣ်ဖှိၣ်ပူၤအဂ့ၢ်အဂီၢ် မ့ၢ်နရ့ဒီးအဝဲသ့ၣ်ကသ့ဧါ
၁၃ ဖဲပှၤအံၣ်စရ့လးဖိတဖၣ် ဘူၣ်ထီၣ်ဘါထီၣ် ယဟိဝၤယွၤ တပူၤဃီအခါန့ၣ် အဝဲသ့ၣ်အသးခုဒိၣ်မးလီၤ. ပှၤကွဲးထါစံးထီၣ်ပတြၢၤတဂၤ ကွဲးဝဲလၢ “ဒီပုၢ်ဝဲၢ်အိၣ်ဝဲဆိးဝဲလၢ အသးတဖျၢၣ်ဃီအံၤ, ဂ့ၤဆံးဒိၣ်လဲၣ်, ဒီးမုာ်ဆံးဒိၣ်လဲၣ် ဆံးဒိၣ်လဲၣ်န့ၣ် ကွၢ်ကွၢ်တက့ၢ်.” (ဖး စံးထီၣ်ပတြၢၤ ၁၃၃:၁, ၂ တက့ၢ်.) အဝဲထိၣ်သတြီၤဝဲ ဒီပုၢ်ဝဲၢ်အတၢ်ဃူတၢ်ဖိး ဒီးသိလၢပှၤဒိးဖှူပှၤန့ၣ်လီၤ. သိအဝဲအံၤ မၤဘျ့ထီၣ်ပှၤအဖံးအညၣ် ဒီးနၢမူဝဲလီၤ. ဒ်န့ၣ်အသိး ပမ့ၢ်အိၣ်ဒီးတၢ်အဲၣ်တၢ်ကွံ ဒီးကဟုကယာ်ပှၤဂၤန့ၣ် ပမၤသးဖှံပဒီပုၢ်ဝဲၢ်တဖၣ်သ့ဝဲလီၤ. ပမ့ၢ်မၤဒ်န့ၣ်န့ၣ် လၢပတၢ်အိၣ်ဖှိၣ်အပူၤ တၢ်ဃူတၢ်ဖိးကအါထီၣ်ဝဲလီၤ. ဒ်သိးနကသ့ၣ်ညါအါထီၣ် ဒီပုၢ်ဝဲၢ်တဖၣ်လၢ နတၢ်အိၣ်ဖှိၣ်အပူၤအဂ့ၢ်အဂီၢ် မ့ၢ်နရ့ဒီးအဝဲသ့ၣ်ကသ့ဧါ.— ၂ ကရံၣ်သူး ၆:၁၁-၁၃.
၁၄. ပကပီၤထီၣ်လၢ ပလီၢ်ကဝီၤပူၤ ကသ့လၢကျဲဒ်လဲၣ်.
၁၄ နမ့ၢ်အိၣ်လၢ တၢ်လီၢ်ဖဲလဲၣ်ဂ့ၤဖဲလဲၣ်ဂ့ၤ နတၢ်ကပီၤန့ၣ် ကပီၤထီၣ်သ့ဝဲထီဘိလီၤ. နတၢ်သူၣ်အိၣ်သးအိၣ် ပှၤလၢနဃၢၤန့ၣ် ကထိၣ်ဟူးထိၣ်ဂဲၤထီၣ် အဝဲသ့ၣ်လၢကအဲၣ်ဒိးမၤလိ ယဟိဝၤယွၤအဂ့ၢ်လီၤ. သံကွၢ်လီၤနသးလၢ ‘ပှၤလၢယခိၣ်ယဃၢၤတဖၣ် ထံၣ်ယၤဒ်လဲၣ်. မ့ၢ်ယဟံၣ်ဒီးဟံၣ်ကရၢၢ်န့ၣ် အိၣ်ကဆှဲကဆှီဧါ. မ့ၢ်ယမၤစၢၤ ပှၤလၢယခိၣ်ယဃၢၤတဖၣ်ဧါ.’ သံကွၢ်ဒီပုၢ်ဝဲၢ်အဂၤတဖၣ် ခီဖျိလၢအဝဲသ့ၣ် ပာ်ဖျါထီၣ်တၢ်သူၣ်အိၣ်သးအိၣ် ဒီးအဒိအတဲာ်လၢအဂ့ၤအဃိ ထုးန့ၢ်အဘူးအတံၢ်, ပှၤလၢအခိၣ်အဃၢၤတဖၣ်, အတံၤသကိးလၢတၢ်မၤလီၢ် ဒီးလၢကၠိတဖၣ်အသး ဒ်လဲၣ်န့ၣ်တက့ၢ်.—အ့းဖ့းစူး ၅:၉.
ဆဲးဆိးသီတက့ၢ်
၁၅. ဘၣ်မနုၤအဃိ ပကဘၣ်ဆဲးဆိးသီလဲၣ်.
၁၅ မ့ၢ်လၢပအိၣ်မူဘၣ်လၢ မုၢ်နံၤခံကတၢၢ်အဃိ ပကဘၣ်ပလီၢ်ပသး ဒ်သိးပတၢ်ကပီၤ သုတလီၤပံာ်တဂ့ၤအဂီၢ်လီၤ. ယ့ၣ်ၡူးဟ့ၣ်ပလီၢ်အပျဲၢ်အဘီၣ် အဘျီတဖၣ်အဘျီ ဒ်သိးက “ဆိးသီ” အဂီၢ်လီၤ. (မးသဲ ၂၄:၄၂; ၂၅:၁၃; ၂၆:၄၁) ပမ့ၢ်ဆိကမိၣ်လၢ “တၢ်နးတၢ်ဖှီၣ်ဖးဒိၣ်” ကဟဲတုၤအဂီၢ် တၢ်ဆၢကတီၢ်လိၣ်ဒံးဖးယံာ်န့ၣ် ပတၢ်သူၣ်ဆူၣ်သးဆူၣ် လၢပကသိၣ်လိပှၤဂၤလၢ ယဟိဝၤယွၤအဂ့ၢ်န့ၣ် ကစှၤလီၤဝဲလီၤ. (မးသဲ ၂၄:၂၁) ဒီးပဆဲးကပီၤထီၣ် တန့ၢ်လၢၤဘၣ်အမဲာ်ညါ ပတၢ်ကပီၤတဖၣ် ကလီၤပံာ်ကွံာ်ဝဲ ကယီကယီတုၤအဟါမၢ်ကွံာ်ဝဲတစုလီၤ.
၁၆, ၁၇. ဒ်သိးပကဆဲးအိၣ်ဒီး တၢ်သူၣ်ဆူၣ်သးဆူၣ်အဂီၢ် ပကဘၣ်မၤဒ်လဲၣ်.
၁၆ မ့ၢ်လၢတၢ်အိၣ်သးတဖၣ် နးထီၣ်ဝဲအဃိ ပကဘၣ်ဆိးသီ အါန့ၢ်ဒံးလၢညါလီၤ. ဒီးပသ့ၣ်ညါလၢတၢ်အကတၢၢ်ကဟဲ ဖဲတၢ်ဆၢကတီၢ်လၢ ယဟိဝၤယွၤပာ်ပနီၣ်ဝဲန့ၣ်လီၤ. (မးသဲ ၂၄:၄၂-၄၄) အဃိဆၢကတီၢ်ခဲအံၤ ပကဘၣ်အိၣ်ဒီးတၢ်သူၣ်စူၤသးစူၤ ဒီးသးစၢၢ်ဆၢတၢ်ဆိၣ်ဂ့ၤလၢ ခါဆူညါတဖၣ်န့ၣ်လီၤ. ဖးလံာ်စီဆှံကိးနံၤဒဲး ဒီးဃ့ဘါထုကဖၣ်လၢ ယဟိဝၤယွၤအအိၣ်ထီဘိတက့ၢ်. (၁ ပ့းတရူး ၄:၇) တကးဒံးဘၣ် ပဟံးန့ၢ်တၢ်မၤလိလၢ ဒီပုၢ်ဝဲၢ်လၢအမၤ ယဟိဝၤယွၤအတၢ်မၤလၢ အနံၣ်ယံာ်တဖၣ် အအိၣ်သ့ဝဲလီၤ. အဒိ နဖးဒီပုၢ်ဝဲၢ်တဖၣ် အတၢ်အိၣ်မူတၢ်လဲၤခီဖျိ ဒ်သိးဒီး “Seventy Years of Holding On to the Skirt of a Jew” (ဖီၣ်ထုးဃာ် ပှၤယူဒၤဖိ အဆ့ အနံၣ်နွံဆံ) လၢ The Watchtower of April 15, 2012, pages 18-21.
၁၇ နကဘၣ်ဂုာ်ကျဲးစၢးမၤ ယဟိဝၤယွၤ အတၢ်မၤဆူၣ်ဆူၣ်လီၤ. တကးဒံးဘၣ် မၤစၢၤပှၤဂၤ ဒီးသူနတၢ်ဆၢကတီၢ်လၢ နကရ့လိာ်သးဒီး ဒီပုၢ်ဝဲၢ်တဖၣ်တက့ၢ်. နမ့ၢ်မၤဒ်န့ၣ်န့ၣ် နကသးခုဒိၣ် ဒီးနကတူၢ်ဘၣ်လၢ တၢ်ဆၢကတီၢ်လၢာ်ချ့မးလီၤ. (အ့းဖ့းစူး ၅:၁၆) လၢအပူၤကွံာ် အနံၣ်တကယၤ တုၤလၢခဲအံၤန့ၣ် ယဟိဝၤယွၤအခ့အပှၤတဖၣ် မၤတၢ်ကဲထီၣ်လိၣ်ထီၣ်အါမးလီၤ. ဘၣ်ဆၣ်မုၢ်မဆါတနံၤအံၤ ပတၢ်မၤအိၣ်အါန့ၢ်ဒံးလၢညါလီၤ. ဒီးယဟိဝၤယွၤ အတၢ်မၤစ့ၢ်ကီး လဲၤထီၣ်လဲၤထီဝဲဒိၣ်မးလီၤ. ပတၢ်ကပီၤ ကကပီၤထီၣ်ထဲထဲအံၤန့ၣ် ပတဆိကမိၣ်ဘၣ်နီတဘျီဘၣ်.
ဖဲတၢ်အိၣ်ဖှိၣ်သးပှၢ် ဟဲဟးအိၣ်သကိးပှၤအခါ ပကဒိးန့ၢ်ဘၣ် တၢ်ဟ့ၣ်ကူၣ်လၢ လံာ်စီဆှံအပူၤ (ကွၢ်လံာ်အဆၢ ၁၈, ၁၉)
၁၈, ၁၉. ဒ်သိးပကမၤ ယဟိဝၤယွၤအတၢ်မၤလၢ တၢ်သူၣ်ဆူၣ်သးဆူၣ်အပူၤအဂီၢ် တၢ်အိၣ်ဖှိၣ်သးပှၢ်တဖၣ် မၤစၢၤပှၤသ့ဒ်လဲၣ်. ဟ့ၣ်အဒိတက့ၢ်.
၁၈ ပမၤကမၣ်ဘၣ်တၢ်အါမး ဘၣ်ဆၣ်ယဟိဝၤယွၤ ဟ့ၣ်ပှၤတၢ်ခွဲးတၢ်ယာ်လၢ ပကမၤအတၢ်မၤလီၤ. ဒ်သိးကမၤစၢၤပှၤအဂီၢ် အဝဲဟ့ၣ်ပှၤ “တၢ်ဘျုးတၢ်ဖှိၣ်လၢပှၤကညီ” လၢအမ့ၢ် တၢ်အိၣ်ဖှိၣ်သးပှၢ်တဖၣ်န့ၣ်လီၤ. (ဖး အ့းဖ့းစူး ၄:၈, ၁၁, ၁၂ တက့ၢ်.) လၢတၢ်န့ၣ်အဃိ ဖဲတၢ်အိၣ်ဖှိၣ်သးပှၢ်တဖၣ် ဟဲအိၣ်သကိးနၤအခါ ဒ်သိးနကဒိးန့ၢ်ဘၣ် တၢ်အဘျုးအဂီၢ် ဒိကနၣ်အဝဲသ့ၣ် အတၢ်ဟ့ၣ်ကူၣ်ဟ့ၣ်ဖးတက့ၢ်.
၁၉ အဒိ ပှၤနီၢ်ဒီမါဝၤခံဂၤလၢ အအိၣ်လၢကီၢ်အဲကလံးန့ၣ် အဝဲသ့ၣ်အိၣ်ဒီး တၢ်ဂ့ၢ်သဘံၣ်သဘုၣ်လၢ အဟံၣ်ပူၤအဃိ လဲၤဃ့တၢ်မၤစၢၤလၢ တၢ်အိၣ်ဖှိၣ်သးပှၢ်ခံဂၤအအိၣ်လီၤ. မါန့ၣ်တူၢ်ဘၣ်ဝဲလၢ အဝၤတမၤလၢပှဲၤအမူဒါလၢ ကတီခိၣ်ရိၤမဲလၢ နီၢ်သးတခီဘၣ်. ဝၤန့ၣ်တူၢ်ဘၣ်ဝဲလၢ အသိၣ်လိတၢ်တသ့ဂ့ၤဂ့ၤဘၣ် ဒီးအၢၣ်လီၤဝဲလၢ အတၢ်ရဲၣ်တၢ်ကျဲၤလၢ ကမၤဟံၣ်ဖိဃီဖိ တၢ်မၤလိလံာ်စီဆှံ ထီဘိအဂီၢ်န့ၣ် တအိၣ်စ့ၢ်ကီးဘၣ်. တၢ်အိၣ်ဖှိၣ်သးပှၢ်တဖၣ် မၤစၢၤဝဲ ပှၤနီၢ်ဒီမါဝၤခံဂၤအံၤ ဒ်သိးကဆိကမိၣ်ဝဲ ဘၣ်ဃးဒီး ယ့ၣ်ၡူးအဒိအတဲာ်လီၤ. အဝဲသ့ၣ် ဟ့ၣ်ဂံၢ်ဟ့ၣ်ဘါဝဲ ဝၤလၢကကွၢ်လိမၤဒိးဝဲ ယ့ၣ်ၡူးလၢအကဟုကယာ်ဝဲ အပျဲၢ်အဘီၣ်တဖၣ်ဂ့ၤဂ့ၤန့ၣ်လီၤ. ဒီးတၢ်အိၣ်ဖှိၣ်သးပှၢ်တဖၣ် ဟ့ၣ်ဂံၢ်ဟ့ၣ်ဘါစ့ၢ်ကီး မါလၢကအိၣ်ဒီး တၢ်ဝံသးစူၤလၢအဝၤ အဖီခိၣ်န့ၣ်လီၤ. အဝဲသ့ၣ် ဟ့ၣ်စ့ၢ်ကီးတၢ်ဟ့ၣ်ကူၣ်တနီၤလၢ ပှၤဒီမါဝၤခံဂၤအံၤ ဒီးအဖိခံဂၤကဘၣ်မၤဝဲ ဟံၣ်ဖိဃီဖိတၢ်မၤလိလံာ်စီဆှံ ဒ်လဲၣ်န့ၣ်လီၤ. (အ့းဖ့းစူး ၅:၂၁-၂၉) စးထီၣ်ဖဲန့ၣ် ဝၤန့ၣ်ဂုာ်ကျဲးစၢးဒ်သိး ကကဲထီၣ်ဟံၣ်ခိၣ်လၢအဂ့ၤလီၤ. တၢ်အိၣ်ဖှိၣ်သးပှၢ်တဖၣ် ဟ့ၣ်ဂံၢ်ဟ့ၣ်ဘါအဝဲသ့ၣ်လၢ တဘၣ်ဟ့ၣ်ၡူတဂ့ၤ ဒီးကဘၣ်သန့ၤအသးလၢ ယဟိဝၤယွၤအသးစီဆှံ အတၢ်မၤစၢၤန့ၣ်လီၤ. တၢ်အိၣ်ဖှိၣ်သးပှၢ်တဖၣ် ပာ်ဖျါထီၣ်တၢ်အဲၣ် ဒီးတၢ်သူၣ်အိၣ်သးအိၣ်အဃိ ကဲထီၣ်တၢ်မၤစၢၤလၢ ဟံၣ်ဖိဃီဖိတဒူၣ်အံၤအဂီၢ် သပှၢ်တၢၢ်လီၤ.
၂၀. ဖဲနတၢ်ကပီၤ ကပီၤထီၣ်လၢ ပှၤဂၤအမဲာ်ညါအခါ ကဲဘျုးဒ်လဲၣ်.
၂၀ လံာ်စီဆှံတဲဝဲလၢ “ကယဲၢ်ပှၤလၢအပျံၤယွၤ, ဒီးပိာ်အကျဲတဖၣ်န့ၣ် ဘၣ်ဆိၣ်ဂ့ၤဝဲလီၤ.” (စံးထီၣ်ပတြၢၤ ၁၂၈:၁) နမ့ၢ်အဲၣ်ဒိးအိၣ်ဒီး တၢ်သူၣ်ခုသးခုန့ၣ် ပျဲလၢနတၢ်ကပီၤ ကကပီၤထီၣ် လၢပှၤဂၤအမဲာ်ညါတက့ၢ်. လၢတၢ်န့ၣ်အဃိ သိၣ်လိပှၤဂၤလၢ ကစၢ်ယွၤအဂ့ၢ်, မၤစၢၤနဟံၣ်ဖိဃီဖိ ဒီးဒီပုၢ်ဝဲၢ်တဖၣ်လၢ တၢ်အိၣ်ဖှိၣ်အပူၤ ဒ်သိးကအိၣ်ဒီးတၢ်ဃူတၢ်ဖိး ဒီးကဆိးသီထီဘိအဂီၢ်န့ၣ်တက့ၢ်. နမ့ၢ်မၤဒ်န့ၣ်န့ၣ် ပှၤအဂၤတဖၣ်ကထံၣ်ဝဲ နတၢ်ဒိဂ့ၤတဲာ်ဘၣ် ဒီးကစံးထီၣ်ပတြၢၤ ပပၢ်ယဟိဝၤယွၤလီၤ.—မးသဲ ၅:၁၆.
