ဒီသဒၢလီၤနသးလၢ မုၣ်ကီၤလံၢ် အပျံၤသကွီၤ
ဖဲပှၤအံၣ်စရ့လးဖိ လၢပျၢၤတဖၣ် ဘူးကလဲၤခီဂာ် ထံကျိယၢ်ဒ့ၣ် ဒ်သိးကလဲၤနုာ်ဝဲဆူ ကီၢ်တၢ်စံးပာ်အခါ ပှၤတမှံၤတနီၤ ဟဲအိၣ်သကိးအီၤလီၤ. ပှၤတမှံၤတဖၣ်အံၤ မ့ၢ်ဝဲပှၤတခီဘီမုၢ်ဖိ ပိာ်မုၣ်တဖၣ် ဒီးအဝဲသ့ၣ် ကွဲမုာ်ဝဲ ပှၤအံၣ်စရ့လးပိာ်ခွါတဖၣ် လၢအဝဲသ့ၣ်အမူးပွဲလီၤ. ဘၣ်သ့ၣ်သ့ၣ် ပှၤအံၣ်စရ့လးပိာ်ခွါတဖၣ် ကဆိကမိၣ်ဘၣ်ဝဲလၢ မ့ၢ်တၢ်ခွဲးတၢ်ယာ်လီၤဆီလၢ အဝဲသ့ၣ်အဂီၢ်လီၤ. အါန့ၢ်အန့ၣ် အဝဲသ့ၣ် ကဘၣ်သူၣ်ဘၣ်သးဝဲ တၢ်ဂဲၤကလံၣ်, တၢ်အီၣ်သကိးအီသကိး တၢ်အီၣ်ဝံၣ်ဝံၣ်ဆၢဆၢ ဒီးကန့ၢ်ဘၣ်တံၤသကိး လၢအသီန့ၣ်လီၤ. ဘၣ်ဆၣ် ပှၤပိာ်မုၣ်တဖၣ်အံၤ အလုၢ်အလၢ် ဒီးအတၢ်သကဲာ်ပဝးတဖၣ်န့ၣ် တလီၤပလိာ်ဒီး ကစၢ်ယွၤ အတၢ်သိၣ်တၢ်သီလၢ အဟ့ၣ်လီၤဝဲ ပှၤအံၣ်စရ့လးဖိတဖၣ်န့ၣ်ဘၣ်. အဃိ ဘၣ်သ့ၣ်သ့ၣ် ပှၤအံၣ်စရ့လးဖိ ပိာ်ခွါတနီၤ ကဆိကမိၣ်ဘၣ်ဝဲလၢ ‘ပသ့ၣ်ညါ တၢ်အဘၣ် ဒီးတၢ်အကမၣ်လီၤ. ပကပလီၢ်ပသးလီၤ.’
ဘၣ်ဆၣ် တၢ်ကဲထီၣ်အသးဒ်လဲၣ်. လံာ်စီဆှံ ပာ်ဖျါထီၣ်ဝဲလၢ “ပှၤဂီၢ်မုၢ် မၤကမၣ်မုၣ်ကမၣ်ခွါဒီး မိၤအးအဖိမုၣ်တဖၣ်လီၤ.” နီၢ်နီၢ်န့ၣ် ပှၤပိာ်မုၣ်တဖၣ်အံၤ အဲၣ်ဒိးလၢ ပှၤအံၣ်စရ့လးဖိ ပိာ်ခွါတဖၣ် ကဘူၣ်ထီၣ်ဘါထီၣ် ယွၤလၢအကမၣ်လီၤ. ဒီးပှၤပိာ်ခွါတဖၣ်အံၤ မၤဝဲဒ်န့ၣ်အသိးလီၤ. အဃိ “ယွၤအသးထီၣ်ကဲၤထီၣ်ဘၣ် အံၣ်စရ့လး” လီၤ.—၄ မိၤၡ့ ၂၅:၁-၃.
ပှၤအံၣ်စရ့လးဖိတဖၣ်အံၤ မၤကမၣ် ကစၢ်ယွၤအတၢ်သိၣ်တၢ်သီ လၢကျဲခံဘိလီၤ. အဝဲသ့ၣ် ဘူၣ်ထီၣ်ဘါထီၣ် တၢ်ဂီၤတၢ်ဖှီၣ် ဒီးမၤကမၣ်မုၣ်ကမၣ်ခွါလီၤ. အဝဲသ့ၣ် တဒိကနၣ် ကစၢ်ယွၤအကလုၢ်အဃိ ပှၤလၢအကထိတဖၣ် ဘၣ်သံဝဲလီၤ. (၂ မိၤၡ့ ၂၀:၄, ၅, ၁၄; ၅ မိၤၡ့ ၁၃:၆-၉) ပှၤပိာ်ခွါတဖၣ်အံၤ မ့ၢ်တမၤကမၣ်တၢ်ဘၣ်န့ၣ် တယံာ်လၢၤဘၣ် အဝဲသ့ၣ် ကလဲၤခီဂာ်ဘၣ် ထံကျိယၢ်ဒ့ၣ် ဒီးကလဲၤနုာ်ဘၣ်ဆူ ကီၢ်တၢ်စံးပာ်လီၤ. အဃိ တၢ်ကဲထီၣ်အသးဒီး အဝဲသ့ၣ်ဒ်န့ၣ်န့ၣ် မ့ၢ်တၢ်လၢ အလီၤသးအုးဒိၣ်မးလီၤ.—၄ မိၤၡ့ ၂၅:၅, ၉.
ဘၣ်ဃးဒီး တၢ်ဂ့ၢ်သ့ၣ်တဖၣ်အံၤန့ၣ် တၢ်မၢဖိပီလူးကွဲးဝဲလၢ “တၢ်န့ၣ်တဖၣ်ခဲလၢာ် မၤအသးလၢ အဝဲသ့ၣ်အလိၤ, ဒီးကဲလၢတၢ်အဒိအတဲာ်, ဒီးအိၣ်ကွဲးအသးလၢ ပဝဲဒၣ်, လၢတၢ်အစိၤကတၢၢ် ဟဲဘၣ်အီၤအဂီၢ်, ဒ်သိးပကဘၣ် တၢ်သိၣ်က့ၤသီက့ၤန့ၣ်လီၤ.” (၁ ကရံၣ်သူး ၁၀:၇-၁၁) ဖဲပှၤအံၣ်စရ့လးဖိတနီၤ မၤကမၣ်တၢ်ဖးဒိၣ် ဒီးတလဲၤနုာ်ဘၣ်ဝဲဆူ ကီၢ်တၢ်စံးပာ်အခါ မုၣ်ကီၤလံၢ် ကသးခုဝဲ သပှၢ်ကတၢၢ်လီၤ. ဆၢကတီၢ်ခဲအံၤစ့ၢ်ကီး ဒ်သိးပသုတလဲၤနုာ်ဘၣ်ဆူ ဟီၣ်ခိၣ်သီတဂ့ၤအဂီၢ် မုၣ်ကီၤလံၢ် လ့ပစီပှၤ မ့ၢ်န့ၢ်န့ၣ် အဝဲကသးခုဝဲဒိၣ်မးလီၤ. လၢတၢ်န့ၣ်အဃိ ပကဘၣ်ဟံးန့ၢ်တၢ်မၤလိလၢ ပှၤအံၣ်စရ့လးဖိလၢ အမၤကမၣ်တၢ်တဖၣ် အဒိအတဲာ်န့ၣ်လီၤ.
ပျံၤသကွီၤ လၢအလီၤဘၣ်ယိၣ်
ဆၢကတီၢ်ခဲအံၤစ့ၢ်ကီး မုၣ်ကီၤလံၢ်အဲၣ်ဒိး လ့ပစီဝဲ ခရံာ်ဖိတဖၣ် ဒီးအဝဲသူဝဲ ပျံၤသကွီၤလၢ အပူၤကွံာ် အသူတ့ၢ်ဝဲလၢ အကဲထီၣ်လိၣ်ထီၣ်တဖၣ်န့ၣ်လီၤ. ဒ်ပဖးဘၣ်တ့ၢ်အသိး လၢပှၤအံၣ်စရ့လးဖိတဖၣ်အစိၤန့ၣ် မုၣ်ကီၤလံၢ်သူဝဲ တၢ်မၤကမၣ်မုၣ်ကမၣ်ခွါလီၤ. လၢပစိၤခဲအံၤစ့ၢ်ကီး မုၣ်ကီၤလံၢ် ဆဲးသူဝဲ ပျံၤသကွီၤလၢအမ့ၢ် တၢ်မၤကမၣ်မုၣ်ကမၣ်ခွါလီၤ. ဒ်သိးပကမၤဘၣ် တၢ်မၤကမၣ်မုၣ်ကမၣ်ခွါအဂီၢ် မုၣ်ကီၤလံၢ် လ့ပစီပှၤခီဖျိလၢ အသူဝဲ တၢ်ဂီၤဘ့ၣ်ဆ့လီၤ.
ဆၢကတီၢ်ခဲအံၤ ပှၤကွၢ်ခူသူၣ်တၢ်ဂီၤဘ့ၣ်ဆ့ ဒ်သိးပှၤသုတသ့ၣ်ညါ နီတဂၤတဂ့ၤအဂီၢ်သ့လီၤ. လၢအပူၤကွံာ် အနံၣ်တဖၣ်န့ၣ် ပှၤလၢအအဲၣ်ဒိးကွၢ် တၢ်ဂီၤဘ့ၣ်ဆ့န့ၣ် အဝဲသ့ၣ် ဘၣ်လဲၤကွၢ်ဝဲ တၢ်ဂီၤမူလၢ အတကြၢးတဘၣ် လၢတၢ်ဂီၤမူအဒၢး မ့တမ့ၢ် ဘၣ်လဲၤဝဲဆူပှၤဆါ တၢ်ဂီၤဘ့ၣ်ဆ့ အလံာ်လဲၢ်တဖၣ် အလီၢ်န့ၣ်လီၤ. ဒီးပှၤအါဂၤန့ၣ် အမဲာ်ဆှး ဒီးဘၣ်ယိၣ်ဝဲလၢ ပှၤကထံၣ်အဝဲသ့ၣ်အဃိ ဘၣ်သ့ၣ်သ့ၣ် အဝဲသ့ၣ် တလဲၤဝဲဖဲန့ၣ် မ့တမ့ၢ် တလဲၤဘူးဒီး တၢ်လီၢ်ဖဲန့ၣ်ဘၣ်. ဘၣ်ဆၣ် မ့မ့ၢ်ဆၢကတီၢ်ခဲအံၤန့ၣ် ပှၤလၢအသူ အ့ထၢၣ်နဲးတဖၣ်န့ၣ် ကွၢ်ဝဲတၢ်ဂီၤဘ့ၣ်ဆ့ လၢတၢ်မၤလီၢ် မ့တမ့ၢ် လၢအကါပူၤသ့ဝဲလီၤ. ဒီးပှၤပိာ်မုၣ်ဒီးပှၤပိာ်ခွါလၢ ထံကီၢ်အါဘ့ၣ်န့ၣ် တလိၣ်လဲၤကွၢ် တၢ်ဂီၤဘ့ၣ်ဆ့လၢ တၢ်လီၢ်အဂၤဘၣ် ဒီးအဝဲသ့ၣ် ကွၢ်ဝဲလၢ အနီၢ်ကစၢ်အဟံၣ်သ့ဝဲလီၤ.
တကးဒံးဘၣ် ပှၤကွၢ်တၢ်ဂီၤဘ့ၣ်ဆ့ လၢလီတဲစိ ဒီးအံၣ်လဲးထြီနံး တၢ်ပီးတၢ်လီတဖၣ်အပူၤ သ့ဝဲညီညီဖိလီၤ. ဖဲပှၤဟးလၢ ကျဲအခါမ့ၢ်ဂ့ၤ, ဒိးဘၢးစ်ကါ မ့တမ့ၢ် လ့ၣ်မ့ၣ်အူအခါမ့ၢ်ဂ့ၤ ပှၤကွၢ်တၢ်ဂီၤလၢအတကြၢးတဘၣ် လၢတၢ်ပီးတၢ်လီလၢ အအိၣ်လၢအစုပူၤ သ့ဝဲလီၤ.
ပှၤကွၢ်တၢ်ဂီၤဘ့ၣ်ဆ့ လၢတၢ်ခူသူၣ်အပူၤ ဒံးယံာ်ဒံးညီထီၣ်ဝဲလီၤ. တၢ်ကွၢ်တၢ်ဂီၤဘ့ၣ်ဆ့န့ၣ် အမၤဘၣ်ဒိပှၤဂၤ အါန့ၢ်ဒံးလၢညါလီၤ. အဒိ မၤဘၣ်ဒိ ပှၤအါဂၤ အတၢ်ဆီဟံၣ်ဆီဃီ, အသးလၢအသ့ၣ်ညါဒၣ်တၢ် ဒီးအတၢ်ပာ်ကဲလီၤသးလီၤ. ဒီးတၢ်လၢ အနးဒိၣ်ကတၢၢ်တခါန့ၣ် အဝဲသ့ၣ် အတၢ်ရ့လိာ်သးဒီးကစၢ်ယွၤ ဟးဂီၤဝဲလီၤ. အဃိ ပမ့ၢ်ကွၢ် တၢ်ဂီၤဘ့ၣ်ဆ့န့ၣ် ကမၤဘၣ်ဒိပှၤ သပှၢ်ကတၢၢ်လီၤ. ဒီးမၤဘၣ်ဒိ ပှၤဂၤအတၢ်တူၢ်ဘၣ် ဒီးအတၢ်ဆိကမိၣ် နးနးကလဲာ်လီၤ. တၢ်ဘၣ်ဒိဘၣ်ထံးတဖၣ်အံၤန့ၣ် လၢခံအဘျါက့ၤဝဲ ကယီကယီဘၣ်ဆၣ် အလီၢ်ကအိၣ်တ့ၢ်ဝဲလီၤ.
ပသ့ၣ်ညါလၢ ယဟိဝၤယွၤ ဒီသဒၢပှၤလၢ မုၣ်ကီၤလံၢ် အပျံၤသကွီၤအံၤလီၤ. ဒ်သိးပကန့ၢ်ဘၣ် ယဟိဝၤယွၤ အတၢ်ဒီသဒၢအဂီၢ် ပတဘၣ်လီၤဂာ်ဒ် ပှၤအံၣ်စရ့လးဖိ ပိာ်ခွါတဖၣ်န့ၣ်ဘၣ်. ပကဘၣ် ‘ဒိကနၣ် [ကစၢ်ယွၤ] အကလုၢ်သပှၢ်တၢၢ်’ လီၤ. (၂ မိၤၡ့ ၁၉:၅) ပကဘၣ်သ့ၣ်နီၣ်ထီၣ်လၢ ကစၢ်ယွၤ သးဟ့ဝဲ တၢ်ဂီၤဘ့ၣ်ဆ့ ဒိၣ်မးလီၤ. ဘၣ်မနုၤအဃိ ပတဲဒ်န့ၣ်သ့လဲၣ်.
သးဟ့အီၤ ဒ်ယဟိဝၤယွၤ သးဟ့ဝဲအသိး
ဆိကမိၣ်ကွၢ်, ဖဲန့ၣ်အဆၢကတီၢ် တၢ်သိၣ်တၢ်သီလၢ ကစၢ်ယွၤဟ့ၣ်လီၤ ပှၤအံၣ်စရ့လးဖိတဖၣ်န့ၣ် လီၤဆီန့ၣ်ဒံး ကလုာ်အဂၤခဲလၢာ် အတၢ်သိၣ်တၢ်သီတဖၣ်လီၤ. ဒ်တၢ်ဒူၣ်အသိး တၢ်သိၣ်တၢ်သီတဖၣ်အံၤန့ၣ် ဒီသဒၢဝဲ ပှၤအံၣ်စရ့လးဖိတဖၣ် ဒီးသိၣ်လိအဝဲသ့ၣ် ဒ်သိးအသုတမၤကမၣ်ဘၣ်တၢ် ဒ်ပှၤတခီဘီမုၢ်ဖိလၢ အအိၣ်ဘူးဒီးအဝဲသ့ၣ်တဖၣ် မၤဝဲအသိးတဂ့ၤအဂီၢ်လီၤ. (၅ မိၤၡ့ ၄:၆-၈) တၢ်သိၣ်တၢ်သီတဖၣ်အံၤ ပာ်ဖျါထီၣ်ဝဲလၢ ယဟိဝၤယွၤ သးဟ့ဝဲ တၢ်မၤကမၣ်မုၣ်ကမၣ်ခွါန့ၣ်လီၤ.
ယဟိဝၤယွၤ ပာ်ဖျါထီၣ်ဝဲ ပှၤတခီဘီမုၢ်ဖိ ဖဲန့ၣ်တဖၣ် အတၢ်သကဲာ်ပဝးလၢ အလီၤရၢၢ်တဖၣ် ဒီးအဝဲတဲဘၣ် ပှၤအံၣ်စရ့လးဖိတဖၣ်လၢ “မၤဒ်ပှၤကနၤဧၣ်ဖိ လၢယဒုးလဲၤနုာ်သု ဆူအကီၢ်အပူၤ အသိးန့ၣ်တဂ့ၤ. . . အဝဲသ့ၣ်အတၢ်မၤတဖၣ်အံၤ မၤဘၣ်အၢထံကီၢ်လီၤ. လၢတၢ်န့ၣ်အဃိ ယွၤစံၣ်ညီၣ်ထံကီၢ်” လီၤ. ပှၤကနၤဧၣ်ဖိတဖၣ် အတၢ်အိၣ်မူန့ၣ် လီၤသးဘၣ်အၢဒီး လီၤရၢၢ်ဒိၣ်မးအဃိ ယွၤလၢအစီအဆှံတဂၤအံၤ ထံၣ်အဝဲသ့ၣ် အထံအကီၢ်ဒ် ထံကီၢ်လၢ အလီၤသးဘၣ်အၢလီၤ.—၃ မိၤၡ့ ၁၈:၃, ၂၅, ခ့ခါစှီၤကျိာ်.
ယဟိဝၤယွၤ စံၣ်ညီၣ်ပှၤကနၤဧၣ်ဖိတဖၣ် ဘၣ်ဆၣ် ပှၤအဂၤတဖၣ်န့ၣ် ဆဲးမၤဝဲ တၢ်မၤကမၣ်မုၣ်ကမၣ်ခွါလီၤ. ဒီးဖဲအနံၣ် ၁,၅၀၀ ပူၤကွံာ်ဝံၤအလီၢ်ခံ ဘၣ်ဃးဒီး ပှၤတခီဘီမုၢ်ဖိတဖၣ် လၢခရံာ်ဖိအစိၤန့ၣ် စီၤပီလူးတဲဝဲလၢ အဝဲသ့ၣ် “အမဲာ်တဆှးလၢၤဘၣ်ဒီး, ဟ့ၣ်လီၤဒၣ်အသးလၢ အသးကတၢအပူၤ, ဒ်သိးအကဂုာ်မၤ ကယဲၢ်တၢ်အဲၣ်တလ့ၤအဲၣ်တဘီ ခဲလၢာ်လီၤ.” (အ့းဖ့းစူး ၄:၁၇-၁၉) ဆၢကတီၢ်ခဲအံၤ ပှၤအါဂၤန့ၣ် အတၢ်သကဲာ်ပဝး လီၤရၢၢ်ဒိၣ်မး ဒီးအဝဲသ့ၣ် အမဲာ်တဆှးလၢ အတၢ်မၤတဖၣ်အံၤအဃိဘၣ်. မ့မ့ၢ်ပှၤလၢအဘူၣ်ထီၣ်ဘါထီၣ်တၢ် အမ့ၢ်အတီတဖၣ်န့ၣ် တသ့ဖဲအသ့ ကဘၣ်ဟးဆှဲးကွၢ်ဝဲ တၢ်လၢအလီၤရၢၢ်တဖၣ်လီၤ.
ကစၢ်ယွၤသးဘၣ်အၢဝဲ တၢ်ဂီၤဘ့ၣ်ဆ့ဒိၣ်မးလီၤ. အဝဲတ့လီၤပှၤ ဒ်အဂီၤဒၣ်ဝဲ အသိးဒီး ဟ့ၣ်လီၤပှၤ တၢ်သ့တၢ်ဘၣ်လၢ ပကသ့ၣ်ညါ တၢ်လၢအဘၣ် ဒီးအကမၣ်န့ၣ်လီၤ. ဒီးကစၢ်ယွၤ အတၢ်သိၣ်တၢ်သီလၢ ဘၣ်ဃးဒီး တၢ်မံဃုာ်အိၣ်ဃုာ်န့ၣ် ပှဲၤဒီးတၢ်ကူၣ်သ့လီၤ. အဝဲတိာ်ပာ်ဝဲလၢ တၢ်မံဃုာ်အိၣ်ဃုာ်န့ၣ် ကမ့ၢ်တၢ်လၢ အမၤသးခု ပှၤနီၢ်ဒီမါဝၤခံဂၤ အဂီၢ်လီၤ. (၁ မိၤၡ့ ၁:၂၆-၂၈; ကတိၤဒိ ၅:၁၈, ၁၉) ဘၣ်ဆၣ် မ့မ့ၢ်ပှၤလၢ အထုးထီၣ် တၢ်ဂီၤဘ့ၣ်ဆ့ မ့တမ့ၢ် အဟ့ၣ်ဂံၢ်ဟ့ၣ်ဘါပှၤဂၤ လၢကကွၢ်တၢ်ဂီၤဘ့ၣ်ဆ့န့ၣ် မ့ၢ်ပှၤလၢ အလုၢ်သ့ၣ်ခါပတာ် ကစၢ်ယွၤအတၢ်ဘျၢလၢ ဘၣ်ဃးဒီး တၢ်သကဲာ်ပဝး လၢာ်လၢာ်ဆ့ဆ့လီၤ. အဃိ ပှၤလၢ အဟ့ၣ်ဂံၢ်ဟ့ၣ်ဘါပှၤဂၤ လၢကကွၢ်တၢ်ဂီၤဘ့ၣ်ဆ့န့ၣ် မ့ၢ်ပှၤလၢ အတပာ်ကဲ ယဟိဝၤယွၤဘၣ်. ပှၤလၢအလုၢ်သ့ၣ်ခါပတာ် ကစၢ်ယွၤအတၢ်ဘျၢခီဖျိ အထုးထီၣ် မ့တမ့ၢ် အဟ့ၣ်ဂံၢ်ဟ့ၣ်ဘါပှၤဂၤ လၢကကွၢ်ဝဲ တၢ်လၢအလီၤရၢၢ်တဖၣ်န့ၣ် ကစၢ်ယွၤကစံၣ်ညီၣ် အဝဲသ့ၣ်လီၤ.—ရိမ့ၤ ၁:၂၄-၂၇.
မ့မ့ၢ် ပှၤလၢအဃုဖး မ့တမ့ၢ် ကွၢ်ဝဲတၢ်ဂီၤဘ့ၣ်ဆ့မီၤ. ပှၤတနီၤကဆိကမိၣ်ဝဲလၢ ပှၤမ့ၢ်ဖး မ့တမ့ၢ် ကွၢ်တၢ်ဂီၤဘ့ၣ်ဆ့န့ၣ် တဘၣ်ဒိပှၤ နီတမံၤဘၣ်. သနာ်က့ နီၢ်နီၢ်န့ၣ် မ့ၢ်ဒၣ်အဝဲသ့ၣ် ဆီၣ်ထွဲမၤစၢၤဝဲ ပှၤလၢအတပာ်ကဲ ယဟိဝၤယွၤ အတၢ်ဘျၢတဖၣ်လီၤ. ဖဲအဝဲသ့ၣ် စးထီၣ်ကွၢ် တၢ်ဂီၤဘ့ၣ်ဆ့အခါ တမ့ၢ်လၢအဝဲသ့ၣ် ကတိာ်ပာ်ဝဲဒ်န့ၣ်ဘၣ်. ဒ်လဲၣ်ဂ့ၤဒ်လဲၣ်ဂ့ၤ လံာ်စီဆှံပာ်ဖျါထီၣ်ဝဲ လီၤတံၢ်လီၤဆဲးလၢ ပှၤလၢအဘူၣ်ထီၣ်ဘါထီၣ် ယွၤလၢအမ့ၢ်အတီန့ၣ် ကြၢးသးဟ့ဝဲ တၢ်ဂီၤဘ့ၣ်ဆ့ သပှၢ်ကတၢၢ်လီၤ. လံာ်စီဆှံ ဟ့ၣ်ဂံၢ်ဟ့ၣ်ဘါဝဲလၢ “ပှၤလၢအအဲၣ်ယွၤသ့ၣ်ဧၢ, သးဟ့တၢ်အၢတက့ၢ်.”—စံးထီၣ်ပတြၢၤ ၉၇:၁၀.
ပှၤလၢအအဲၣ်ဒိး ဟးဆှဲးကွၢ် တၢ်ဂီၤဘ့ၣ်ဆ့ဒၣ်လဲာ် ကဟးဆှဲးဝဲအဂီၢ် တညီဘၣ်. ပမ့ၢ်ပှၤ တလၢတပှဲၤအဃိ ပကဘၣ်တြီဆၢကွံာ် ပတၢ်မိၣ်န့ၢ်သးလီ လၢအတဂ့ၤတဖၣ်လီၤ. ဒီးဘၣ်သ့ၣ်သ့ၣ် ပကဂုာ်ကျဲးစၢး လီလီၤပသးလၢ တၢ်ကွၢ်တၢ်ဂီၤဘ့ၣ်ဆ့န့ၣ် တမ့ၢ်တၢ်လၢ အကမၣ်ဘၣ်. (ယံးရမံယၤ ၁၇:၉) ဘၣ်ဆၣ် ပှၤအါဂၤလၢအကဲထီၣ် ခရံာ်ဖိတဖၣ်န့ၣ် လဲၤခီဖျိဝဲ တၢ်သ့ၣ်တဖၣ်အံၤ န့ၢ်ဝဲလီၤ. လၢတၢ်န့ၣ်အဃိ နမ့ၢ်အိၣ်ဒီး တၢ်ကီတၢ်ခဲဒ်န့ၣ်န့ၣ် နနာ်သ့သပှၢ်ကတၢၢ်လၢ နမၤနၢၤကွံာ်အီၤသ့လီၤ. ပကဆိမိၣ်ကွၢ် ဘၣ်ဃးဒီး ကစၢ်ယွၤ အကလုၢ်ကထါ မၤစၢၤပှၤဒ်သိး ပဟးဆှဲး မုၣ်ကီၤလံၢ်အပျံၤသကွီၤ လၢအမ့ၢ် တၢ်ဂီၤဘ့ၣ်ဆ့ ကသ့ဒ်လဲၣ်န့ၣ်လီၤ.
တဘၣ်ဆဲးဆိကမိၣ် လုၢ်လၢ်လၢ အလီၤသးဘၣ်အၢတဖၣ် လၢၤတဂ့ၤ
ဒ်ပဖးဘၣ်လၢ အခီၣ်ထံးအသိး ပှၤအံၣ်စရ့လးဖိအါဂၤန့ၣ် မၤဒိၣ်ထီၣ် အတၢ်သူၣ်လီသးကွံ လၢအတဂ့ၤအဃိ အဝဲသ့ၣ် မၤဘၣ်တၢ်လၢ အဒုးအိၣ်ထီၣ် တၢ်ကီတၢ်ခဲလီၤ. မုၢ်မဆါတနံၤအံၤစ့ၢ်ကီး တၢ်ကဲထီၣ်အသးဒီးပှၤ ဒ်န့ၣ်သ့လီၤ. ယ့ၣ်ၡူးအဒီပုၢ်ဝဲၢ်ခိၣ်ချၢ စီၤယၤကိာ် တဲဖျါထီၣ် တၢ်လီၤဘၣ်ယိၣ်လၢ “ပှၤတဂၤဂၤအတၢ်သးကွံဒၣ်ဝဲထုးအီၤ . . . လၢခံက့ၤဒီး တၢ်သးကွံန့ၣ်ဒၢထီၣ်, ဒီးဆံးစၢ်တၢ်ဒဲးဘး” လီၤ. (ယၤကိာ် ၁:၁၄, ၁၅) ပှၤတဂၤ မ့ၢ်ပျဲလၢ တၢ်မိၣ်န့ၢ်သးလီလၢ အတဂ့ၤဘၣ်တဖၣ် ကဒိၣ်ထီၣ်လၢ အသးပူၤန့ၣ် လၢခံန့ၣ် ဘၣ်သ့ၣ်သ့ၣ် အဝဲကမၤကမၣ်ဘၣ်တၢ်လီၤ. အဃိ ပကဘၣ်ဂုာ်ကျဲးစၢး ထုးထီၣ်ကွံာ် တၢ်ဆိကမိၣ်လၢ အတဂ့ၤတဖၣ် ဒီးပတဘၣ် ဆိကမိၣ်အီၤလၢၤဘၣ်.
နမ့ၢ်ဆဲးဆိကမိၣ်ဒံး တၢ်လၢအလီၤရၢၢ်တဖၣ်န့ၣ် မၤတၢ်တမံၤမံၤ ဒ်သိးနသးပ့ၤနီၣ် တၢ်သ့ၣ်တဖၣ်န့ၣ် ကန့ၢ်အဂီၢ်တက့ၢ်. ယ့ၣ်ၡူးတဲဝဲလၢ “နစုမ့ၢ်ဂ့ၤ, နခီၣ်မ့ၢ်ဂ့ၤ, မ့ၢ်ဒုးလီၤဃံၤနၤဒီး, ဒီၣ်တဲာ်ကွံာ်အီၤ, ဒီးကွံာ်တ့ၢ်ကွံာ်အီၤလၢ နအိၣ်တက့ၢ်. . . . နမဲာ်မ့ၢ်ဒုးလီၤဃံၤနၤဒီး, အူခွဲးထီၣ်ကွံာ်အီၤ, ဒီးကွံာ်တ့ၢ်ကွံာ်အီၤလၢ နအိၣ်တက့ၢ်.” (မးသဲ ၁၈:၈, ၉) ယ့ၣ်ၡူးတအဲၣ်ဒိးတဲဝဲလၢ ပကဘၣ်မၤ ပနီၢ်ခိက့ၢ်ဂီၤဒ်န့ၣ် အနီၢ်ကီၢ်ဘၣ်. အဝဲဟ့ၣ်ဝဲတၢ်အဒိ ဒီးအဲၣ်ဒိးတဲဝဲလၢ ပကဘၣ်မၤလီၤမၢ်ကွံာ် တၢ်လၢအမၤလီၤဃံၢ်ပှၤတဖၣ် ချ့ချ့ဒီး လၢာ်လၢာ်ဆ့ဆ့လီၤ. ဘၣ်ဃးဒီး တၢ်ဂီၤဘ့ၣ်ဆ့န့ၣ် ပမၤထွဲ တၢ်ဟ့ၣ်ကူၣ်အံၤ ကသ့ဒ်လဲၣ်.
ဖဲနထံၣ်ဘၣ် တၢ်ဂီၤဘ့ၣ်ဆ့အခါ တဘၣ်ဆိကမိၣ်လၢ ‘ယမ့ၢ်ပလီၢ်သးန့ၣ် တဘၣ်နီတမံၤဘၣ်’ တဂ့ၤ. ဃၣ်ကွံာ်နမဲာ် တဘျီဃီတက့ၢ်. ပံးကွံာ်တၢ်ဂီၤမူ မ့တမ့ၢ် နခီၣ်ဖၠူထၢၣ် မ့တမ့ၢ် နလီတဲစိ တဘျီဃီတက့ၢ်. ဒီးသးစၢၢ်ဆၢကဒါက့ၤ တၢ်လၢအကဆှီတဖၣ်န့ၣ်တက့ၢ်. နမ့ၢ်မၤဒ်န့ၣ်န့ၣ် ကမၤစၢၤနၤဒ်သိး နတၢ်ဆိကမိၣ် ဒီးနတၢ်သူၣ်လီသးကွံ လၢအတဂ့ၤ သုတဒိၣ်ထီၣ်တဂ့ၤအဂီၢ်လီၤ.
နမ့ၢ်ဆဲးဆိကမိၣ်ဘၣ်ဒံး တၢ်ဂီၤဘ့ၣ်ဆ့လၢ နထံၣ်ဘၣ်အီၤလၢ အပူၤကွံာ်တဖၣ်န့ၣ် နကဘၣ်မၤဒ်လဲၣ်
နပတုာ်ကွၢ် တၢ်ဂီၤဘ့ၣ်ဆ့ မ့ၢ်န့ၢ်သနာ်က့ နမ့ၢ်သ့ၣ်နီၣ်ထီၣ်က့ၤ တၢ်လၢနကွၢ်တ့ၢ်အီၤ လၢအပူၤကွံာ်တဖၣ် တဘျီဘၣ်တဘျီန့ၣ် နကဘၣ်မၤဒ်လဲၣ်. တၢ်ဂီၤ မ့တမ့ၢ် တၢ်ဆိကမိၣ်လၢ အတကဆှီဘၣ်တဖၣ်န့ၣ် အိၣ်တ့ၢ်လၢ ပှၤတဂၤအခိၣ်နူာ်အပူၤ ဖးယံာ်သ့လီၤ. ဒီးလၢတၢ်တပလီၢ်သးအပူၤ တၢ်သ့ၣ်တဖၣ်အံၤ ဟဲက့ၤနုာ်လီၤလၢ အတၢ်ဆိကမိၣ်အပူၤ သ့ဝဲကိးဆၢကိးကတီၢ်ဒဲးလီၤ. ဒီးတၢ်မ့ၢ်ကဲထီၣ်အသးဒ်န့ၣ်န့ၣ် အဝဲကအဲၣ်ဒိးမၤ တၢ်လၢအတကဆှီဘၣ်တဖၣ် ဒ်သိးဒီး တၢ်ဖူးလဲးနီၢ်ကစၢ်မုၣ်ခွါက့ၢ်ဂီၤလၢ တၢ်သးကတၢအပူၤလီၤ. တၢ်ဆိကမိၣ် ဒ်န့ၣ်တဖၣ်န့ၣ် ဟဲက့ၤနုာ်လီၤဝဲသ့ ကိးဆၢကိးကတီၢ်ဒဲးအဃိ အိၣ်ကတဲာ်ကတီၤပာ်စၢၤနသးလၢ နကတြီဆၢကွံာ်အီၤတက့ၢ်.
ဆၢတဲာ်လီၤနသးလၢ နကဆိကမိၣ် ဒီးမၤတၢ်လၢ အဘၣ်ကစၢ်ယွၤအသး အါန့ၢ်ဒံးလၢညါတက့ၢ်. သးအိၣ်မၤဒ် တၢ်မၢဖိပီလူးလၢအ ‘မၤနၢၤမၤဃၣ်အနီၢ်ခိ, ဒီးအမၢကဲကုၢ်’ ဝဲန့ၣ်တက့ၢ်. (၁ ကရံၣ်သူး ၉:၂၇) တဘၣ်ပျဲလၢ နကကဲထီၣ် တၢ်မိၣ်န့ၢ်သးလီ လၢအတကဆှီတဖၣ် အကုၢ်တဂ့ၤ. လၢတၢ်န့ၣ်အလီၢ် ‘လဲလိာ် နက့ၢ်နဂီၤလၢ တၢ်မၤက့ၤနသးသီ, ဒ်သိးနကမၤကွၢ် ယွၤအတၢ်ဘၣ်သးလၢ အမ့ၢ်တၢ်ဂ့ၤ, ဒီးတၢ်လၢပဂ့ၤအဲၣ်ဒိး, ဒီးတၢ်လၢတၢ်ပှဲၤ မ့ၢ်တၢ်ဒ်လဲၣ်ဒ်လဲၣ်န့ၣ်တက့ၢ်.’ (ရိမ့ၤ ၁၂:၂) သ့ၣ်နီၣ်ထီၣ်လၢ နမ့ၢ်ဆိကမိၣ် ဒီးမၤတၢ်လၢ အတကဆှီဘၣ်တဖၣ်န့ၣ် နတဒိးန့ၢ်ဘၣ် တၢ်သးခုဘၣ်, ဘၣ်ဆၣ် နမ့ၢ်အိၣ်မူဒ် ကစၢ်ယွၤ အတၢ်ဘၣ်သးအသိးန့ၣ် နကဒိးန့ၢ်ဘၣ် တၢ်သးခုလီၤ.
နမ့ၢ်ဆိကမိၣ် ဒီးမၤတၢ်လၢအတကဆှီဘၣ်န့ၣ် နတဒိးန့ၢ်ဘၣ် တၢ်သးခုဘၣ်, ဘၣ်ဆၣ် နမ့ၢ်အိၣ်မူဒ် ကစၢ်ယွၤ အတၢ်ဘၣ်သးအသိးန့ၣ် နကဒိးန့ၢ်ဘၣ် တၢ်သးခု
ဂုာ်ကျဲးစၢး တိၢ်နီၣ်သံဃာ် လံာ်စီဆှံအဆၢဖိတဖၣ်တက့ၢ်. ဖဲတၢ်ဆိကမိၣ်လၢ အကမၣ်တဖၣ် နုာ်လီၤလၢနသးပူၤအခါ ဆိကမိၣ်ထံက့ၤ လံာ်စီဆှံအဆၢတဖၣ်န့ၣ်တက့ၢ်. လံာ်စီဆှံအဆၢ ဒ်သိးဒီး စံးထီၣ်ပတြၢၤ ၁၁၉:၃၇; ယၡါယၤ ၅၂:၁၁; မးသဲ ၅:၂၈: အ့းဖ့းစူး ၅:၃; ကလီးစဲ ၃:၅ ဒီး ၁ သ့းစၤလနံ ၄:၄-၈ န့ၣ်ကမၤစၢၤနၤဒ်သိ နကထံၣ် တၢ်ဂီၤဘ့ၣ်ဆ့တဖၣ် ဒ်ယဟိဝၤယွၤအသိး ဒီးနကသ့ၣ်ညါလၢ ယဟိဝၤယွၤ အဲၣ်ဒိးလၢ နကမၤတၢ်မနုၤလဲၣ်န့ၣ်လီၤ.
တဘျီတခီၣ် နမ့ၢ်အဲၣ်ဒိးကွၢ် မ့တမ့ၢ် ဆိကမိၣ် တၢ်လၢအတကဆှီဘၣ်တဖၣ် တုၤဒၣ်လဲာ် နအိၣ်တသ့ဘၣ်န့ၣ် နကဘၣ်မၤဒ်လဲၣ်. ကွၢ်လိမၤဒိး ယ့ၣ်ၡူးလၢအမ့ၢ် ပှၤလၢအဒိဂ့ၤတဲာ်ဘၣ်န့ၣ်တက့ၢ်. (၁ ပ့းတရူး ၂:၂၁) ဖဲယ့ၣ်ၡူးဒိးဘျၢထံ ဝံၤအလီၢ်ခံ မုၣ်ကီၤလံၢ် လ့ပစီအီၤ တဘျီဝံၤတဘျီလီၤ. ဖဲန့ၣ်အခါ အဝဲမၤဝဲဒ်လဲၣ်. အဝဲဆဲးတြီဆၢကွံာ် မုၣ်ကီၤလံၢ်လီၤ. အဝဲတြီဆၢကွံာ် မုၣ်ကီၤလံၢ် အတၢ်လ့ပစီတဖၣ် ခီဖျိသူဝဲ လံာ်စီဆှံ အဆၢတဆၢဝံၤတဆၢလီၤ. ဒီးအဝဲတဲဝဲလၢ “မုၣ်ကီၤလံၢ်ဧၢ, ဟးထီၣ်ကွံာ်” ဒီးမုၣ်ကီၤလံၢ် ဟးထီၣ်ကွံာ်ဝဲလီၤ. ဒ်ယ့ၣ်ၡူး တဟ့ၣ်ၡူဝဲ မုၣ်ကီၤလံၢ်နီတဘျီဘၣ်အသိး နၤစ့ၢ်ကီး နတကြၢးဟ့ၣ်အၡူဘၣ်. (မးသဲ ၄:၁-၁၁) မုၣ်ကီၤလံၢ် ဒီးအပှၤဟီၣ်ခိၣ်ဖိတဖၣ် ကဆဲးဂုာ်ကျဲးစၢးဝဲဒ်သိး နကဆိကမိၣ် တၢ်လၢအလီၤရၢၢ်တဖၣ်န့ၣ်လီၤ. ဘၣ်ဆၣ် တဘၣ်ဟ့ၣ်ၡူတဂ့ၤ. နမၤနၢၤကွံာ် တၢ်ကွၢ်တၢ်ဂီၤဘ့ၣ်ဆ့သ့လီၤ. ခီဖျိလၢ ယဟိဝၤယွၤ အတၢ်မၤစၢၤအဃိ နမၤနၢၤကွံာ် နဒုၣ်နဒါသ့လီၤ.
ဃ့ထုကဖၣ်ဆူ ယဟိဝၤယွၤအအိၣ် ဒီးဒိကနၣ် အကလုၢ်
ဆဲးဃ့ဘါထုကဖၣ်လၢ ယဟိဝၤယွၤအအိၣ် ဒီးဃ့အတၢ်မၤစၢၤတက့ၢ်. စီၤပီလူး တဲဝဲလၢ “ဘိးဘၣ်သ့ၣ်ညါယွၤ လၢသုတၢ်အဲၣ်ဒိးတဖၣ်န့ၣ်တက့ၢ်. ဒီးယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ် ကယဲၢ်ပသ့ၣ်ညါ နၢ်ပၢၢ်တၢ်န့ၣ် ကပၢၤသုသူၣ်သုသးဒီး သုဆိကမိၣ်တၢ်လၢယ့ၣ်ၡူးခရံာ်အပူၤလီၤ.” (ဖံလံးပံၤ ၄:၆, ၇) ယွၤအတၢ်ဃူတၢ်ဖိး ကမၤစၢၤနၤ ဒ်သိးနတြီဆၢကွံာ် တၢ်မၤလၢအကမၣ်တဖၣ် ကန့ၢ်အဂီၢ်လီၤ. နမ့ၢ်သုးဘူးနသး ဆူယဟိဝၤယွၤအအိၣ်န့ၣ် အဝဲ ‘ကသုးဘူးအသးဆူနအိၣ်လီၤ.’—ယၤကိာ် ၄:၈.
ပမ့ၢ်ဆဲးမၤဂၢၢ်ကျၢၤထီၣ် ပတၢ်ရ့လိာ်သးဒီး ယွၤလၢအတ့လီၤ တၢ်ခဲလၢာ်တဂၤန့ၣ် အဝဲကဒီသဒၢပှၤလၢ မုၣ်ကီၤလံၢ် အပျံၤသကွီၤလီၤ. ယ့ၣ်ၡူးတဲဝဲလၢ “ပှၤလၢအပၢ ဟီၣ်ခိၣ် [မုၣ်ကီၤလံၢ်] တဂၤဟဲလံဝဲလံ . . . အဝဲအစိကမီၤ တအိၣ်လၢယဖီခိၣ် နီတမံၤဘၣ်.” (ယိၤဟၣ် ၁၄:၃၀, ခ့ခါစှီၤကျိာ်) ဘၣ်မနုၤအဃိ ယ့ၣ်ၡူးတဲဝဲဒ်န့ၣ်သ့လဲၣ်. အဝဲတဲဝဲလၢ “ပှၤလၢအမၢလီၤယၤတဂၤန့ၣ် အိၣ်ဒီးယၤလီၤ. တဟးသဒၣ်ဘၣ်ယၤဘၣ်. အဂ့ၢ်ဒ်အံၤ, တၢ်လၢအဘၣ် အသးတဖၣ်န့ၣ်, ယမၤတထံၣ်ဃီလီၤ.” (ယိၤဟၣ် ၈:၂၉) အဃိ ပနာ်သ့သပှၢ်ကတၢၢ်လၢ ပမ့ၢ်ဂုာ်ကျဲးစၢးမၤ ယဟိဝၤယွၤ အတၢ်ဘၣ်သး လၢတၢ်လီၢ်ကိးပူၤဒဲးန့ၣ် အဝဲတပာ်တ့ၢ်ပှၤဘၣ်. နမ့ၢ်ဟးဆှဲး တၢ်ဂီၤဘ့ၣ်ဆ့န့ၣ် မုၣ်ကီၤလံၢ် ကွဲန့ၢ်လွဲန့ၢ်နၤလၢ ကျဲဒ်အံၤ တန့ၢ်လၢၤဘၣ်.
