တၢ်မၤလိ ၂၄
မၤလီၤမၢ်ကွံာ် တၢ်ဆိကမိၣ်လၢ အထီဒါလိာ်အသးဒီး ကစၢ်ယွၤ အတၢ်သိၣ်လိ
“တ့ၢ်လီၤကွံာ် တၢ်ကူၣ်တၢ်ဖးတဖၣ်, ဒီးကယဲၢ်တၢ်ပာ်ထီၣ်ထီအသး ထီဒါတၢ်သ့ၣ်ညါယွၤန့ၣ်” တက့ၢ်.—၂ ကရံၣ်သူး ၁၀:၅.
တၢ်သးဝံၣ် ၁၂၄ တီထီဘိ
တၢ်မၤလိအံၤ အတၢ်တိာ်ပာ် *
၁. တၢ်မၢဖိပီလူး ဟ့ၣ်ပလီၢ်ဝဲ ခရံာ်ဖိလၢ အဘၣ်တၢ်ဒိးဖှူအီၤတဖၣ် ဒ်လဲၣ်.
တၢ်မၢဖိပီလူးတဲဝဲလၢ “သုတအိၣ်ဒီး ပှၤအအံၤတဃၣ်ဖိ အက့ၢ်အဂီၤတဂ့ၤ.” (ရိမ့ၤ ၁၂:၂) အဝဲကွဲးဝဲ တၢ်ကတိၤတဖၣ်အံၤဆူ ခရံာ်ဖိလၢညါ လၢအဟ့ၣ်လုၢ်ထီၣ်အသးဆူ ယွၤအအိၣ်ဒီး ဘၣ်တၢ်ဒိးဖှူအီၤလၢ သးစီဆှံတဖၣ် အအိၣ်လီၤ. ဘၣ်မနုၤအဃိ စီၤပီလူး ဟ့ၣ်ပလီၢ်အဝဲသ့ၣ် ဒ်န့ၣ်လဲၣ်.—ရိမ့ၤ ၁:၇.
၂-၃. ဒ်သိးပကယံၤထီၣ်ဒီး ယဟိဝၤယွၤအဂီၢ် မုၣ်ကီၤလံၢ် ဂုာ်ကျဲးစၢးဝဲဒ်လဲၣ် ဒီးပထုးထီၣ်ကွံာ် “တိာ်အဒိၣ်အထီတဖၣ်” မ့တမ့ၢ် တၢ်လၢအဂံၢ်စဲၤလီၤလၢ ပသးပူၤတဖၣ် ကသ့ဒ်လဲၣ်.
၂ ဖျါလၢခရံာ်ဖိဖဲန့ၣ်တနီၤန့ၣ် အိၣ်ဒီးတၢ်ပာ်သူၣ်ပာ်သးဒ် ပှၤဟီၣ်ခိၣ်ဖိလၢ အဒိးပၢအသးလၢ မုၣ်ကီၤလံၢ်အတၢ်ပၢ အဖီလာ်တဖၣ်လီၤ. (အ့းဖ့းစူး ၄:၁၇-၁၉) ပဝဲသ့ၣ်တဖၣ်စ့ၢ်ကီး တၢ်ကဲထီၣ်အသးဒီးပှၤ ဒ်န့ၣ်သ့လီၤ. ဒ်သိးပကယံၤထီၣ်ဒီး ယဟိဝၤယွၤအဂီၢ် မုၣ်ကီၤလံၢ်လၢအမ့ၢ် ဟီၣ်ခိၣ်အကစၢ်န့ၣ် လ့ပစီပှၤလၢ ကျဲအါဘိလီၤ. အဒိ ပမ့ၢ်အဲၣ်ဒိးကဲထီၣ် ပှၤလၢအရ့ဒိၣ် မ့တမ့ၢ် ပှၤလၢအမံၤဟူသၣ်ဖျါန့ၣ် အဝဲကသူဝဲ တၢ်သ့ၣ်တဖၣ်အံၤဒီး ကမၤယံၤထီၣ်ပှၤဒီး ယဟိဝၤယွၤလီၤ. တကးဒံးဘၣ် အဝဲကသူဝဲ ပတၢ်ဆဲးတၢ်လၤ, ပတၢ်အိၣ်မူလၢအပူၤကွံာ် မ့တမ့ၢ် ပတၢ်ကူၣ်ဘၣ်ကူၣ်သ့ ဒီးကမၤဝဲဒ်သိး ပကဆိကမိၣ်တၢ် ဒ်သိးဒီးအီၤအဂီၢ်လီၤ.
၃ ပထုးထီၣ်ကွံာ် တၢ်လၢအဂံၢ်စဲၤလီၤလၢပသးပူၤ လၢအလီၤဂာ်ဒီး “တိာ်အဒိၣ်အထီတဖၣ်” ကသ့ဧါ. (၂ ကရံၣ်သူး ၁၀:၄) စီၤပီလူးတဲဝဲလၢပ “တ့ၢ်လီၤကွံာ် တၢ်ကူၣ်တၢ်ဖးတဖၣ်, ဒီးကယဲၢ်တၢ်ပာ်ထီၣ်ထီအသး ထီဒါတၢ်သ့ၣ်ညါယွၤန့ၣ်, ဒီးမၢကဲကုၢ်ကယဲၢ် တၢ်ဆိကမိၣ်တမံၤလၢ်လၢ် ဆူတၢ်စူၢ်ခရံာ်အပူၤ” သ့လီၤ. (၂ ကရံၣ်သူး ၁၀:၅) အဃိ ပသ့ၣ်ညါဘၣ်လၢ ခီဖျိလၢ ယဟိဝၤယွၤ အတၢ်မၤစၢၤအဃိ ပမၤလီၤမၢ်ကွံာ် တၢ်ပာ်သူၣ်ပာ်သးလၢ အတဂ့ၤတဖၣ် သ့ဝဲလီၤ. ဒ်ကသံၣ်ကသီ မၤလီၤမၢ်ကွံာ် တၢ်စုၣ်တၢ်ပျၢ်သ့အသိး ကစၢ်ယွၤအကလုၢ်ကထါ မၤလီၤမၢ်ကွံာ် တၢ်စုၣ်တၢ်ပျၢ်လၢ အဟဲလၢ မုၣ်ကီၤလံၢ် အဟီၣ်ခိၣ်အအိၣ်သ့လီၤ.
“မၤက့ၤသုသးသီ”
၄. ပဝဲအါဂၤန့ၣ် ဖဲပသ့ၣ်ညါထီၣ် တၢ်မ့ၢ်တၢ်တီအခါ ပဘၣ်မၤ တၢ်ဆီတလဲ မနုၤတဖၣ်လဲၣ်.
၄ ဆိကမိၣ်က့ၤ ဖဲနသ့ၣ်ညါထီၣ် လံာ်စီဆှံတၢ်မ့ၢ်တၢ်တီ ဒီးနဆၢတဲာ်လီၤနသးလၢ နကမၤ ကစၢ်ယွၤအတၢ်မၤအခါ နဘၣ်ဆီတလဲ တၢ်မနုၤတဖၣ်လဲၣ် န့ၣ်တက့ၢ်. ပဝဲအါဂၤန့ၣ် ဒ်သိးပကမၤ ယဟိဝၤယွၤအတၢ်မၤအဂီၢ် ပပတုာ်မၤ တၢ်လၢအတဂ့ၤဘၣ်တဖၣ်န့ၣ်လီၤ. (၁ ကရံၣ်သူး ၆:၉-၁၁) ယဟိဝၤယွၤ မၤစၢၤပှၤဒ်သိး ပပတုာ်မၤ တၢ်လၢအတဂ့ၤတဖၣ် ကန့ၢ်အဂီၢ်အဃိ ပစံးဘျုးဘၣ်အီၤ ဒိၣ်မးလီၤ.
၅. ရိမ့ၤ ၁၂:၂ ပာ်ဖျါထီၣ်ဝဲ တၢ်လၢပကဘၣ်မၤအီၤ ခံမံၤန့ၣ် မ့ၢ်မနုၤလဲၣ်.
၅ ပတဘၣ် ဆိကမိၣ်လၢ ပတလိၣ် ဆဲးဆီတလဲပသးလၢၤဘၣ်န့ၣ်ဘၣ်. တချုးလၢ ပဒိးဘျၢထံအခါ ပမ့ၢ်ပတုာ်မၤ တၢ်ကမၣ်ဖးဒိၣ်တဖၣ် ဘၣ်ဆၣ် ဖဲပဒိးဘျၢထံဝံၤအခါ ဒ်သိးပသုတမၤဘၣ်ကဒီး တၢ်ကမၣ်တဖၣ်အံၤတဂ့ၤအဂီၢ် ပကဘၣ်ဆဲးဂုာ်ကျဲးစၢးဟးဆှဲး တၢ်လ့ပစီကိးမံၤဒဲးလီၤ. ပမၤဒ်န့ၣ် ကသ့ဒ်လဲၣ်. စီၤပီလူး တဲဝဲလၢ “အိၣ်ဒီး ပှၤအအံၤတဃၣ်ဖိ အက့ၢ်အဂီၤတဂ့ၤ, မ့မ့ၢ်လဲလိာ် သုက့ၢ်သုဂီၤလၢ တၢ်မၤက့ၤသုသးသီ” တက့ၢ်. (ရိမ့ၤ ၁၂:၂) လၢတၢ်န့ၣ်အဃိ ပကဘၣ်မၤတၢ် အိၣ်ဝဲခံမံၤလီၤ. အဆိကတၢၢ်န့ၣ် ပတဘၣ် “အိၣ်ဒီး ပှၤအအံၤတဃၣ်ဖိ အက့ၢ်အဂီၤ” မ့တမ့ၢ် ပတဘၣ်ပျဲ ဟီၣ်ခိၣ်အတၢ်ပာ်သူၣ်ပာ်သးတဖၣ် လုၢ်ဘၢပှၤဘၣ်. ခံမံၤတမံၤန့ၣ် ပကဘၣ် ‘လဲလိာ် ပက့ၢ်ပဂီၤ’ ခီဖျိ ဆီတလဲ ပတၢ်ပာ်သူၣ်ပာ်သးလီၤ.
၆. ပမၤလိန့ၢ်တၢ်မနုၤလၢ ယ့ၣ်ၡူးအတၢ်ကတိၤဖဲ မးသဲ ၁၂:၄၃-၄၅ အပူၤန့ၣ်လဲၣ်.
၆ စီၤပီလူးတဲဝဲလၢ ပကဘၣ်လဲလိာ်ပက့ၢ်ပဂီၤန့ၣ် တမ့ၢ်ထဲ ပကဘၣ်ဆီတလဲ ပသးထဲလၢအဘ့ၣ်ခိၣ်ဘၣ်. ပကဘၣ်ဆီတလဲ တၢ်လၢအဘၣ်ဃးဒီး ပတၢ်အိၣ်မူ ကိးသနၢၣ်ဒဲးလီၤ. (ကွၢ်တၢ်လွံၢ်နၢၣ်လၢအမ့ၢ် “ မ့ၢ်နလဲလိာ်နသးဧါ မ့တမ့ၢ် နပျိာ်လဲနသးဧါ” တက့ၢ်.) ပကဘၣ်ဆီတလဲ ပတၢ်ပာ်သူၣ်ပာ်သး လၢာ်လၢာ်ဆ့ဆ့ ခီဖျိဆီတလဲ ပတၢ်ဆိကမိၣ်, ပတၢ်တူၢ်ဘၣ် ဒီးပတၢ်အဲၣ်ဒိးတဖၣ် ခဲလၢာ်လီၤ. အဃိ ပကဘၣ်သံကွၢ်လီၤပသးလၢ ‘ဖဲယဆီတလဲယသး ဒ်သိးယကကဲထီၣ် ခရံာ်ဖိတဂၤအဂီၢ်အခါ မ့ၢ်ယဆီတလဲယသးထဲလၢ အဘ့ၣ်ခိၣ်လီၤဧါ, မ့တမ့ၢ် ယဆီတလဲယသး အနီၢ်ကီၢ်ဧါ.’ တၢ်ဆီတလဲခံမံၤအံၤန့ၣ် လီၤဆီလိာ်အသးဒိၣ်မးလီၤ. မးသဲ ၁၂:၄၃-၄၅ ပာ်ဖျါထီၣ်ဝဲ ယ့ၣ်ၡူးအတၢ်ကတိၤ လၢအဘၣ်ဃးဒီး တၢ်လၢပကဘၣ်မၤအီၤတဖၣ်န့ၣ်လီၤ. (ဖးတက့ၢ်.) ယ့ၣ်ၡူးအတၢ်ကတိၤတဖၣ်အံၤန့ၣ် သိၣ်လိပှၤ တၢ်မၤလိလၢ အရ့ဒိၣ်ဒိၣ်မးတခါလီၤ. ပန့ၢ်ဘၣ်တၢ်မၤလိလၢ ထဲဒၣ်ပထုးထီၣ်ကွံာ် တၢ်ဆိကမိၣ်လၢ အတဂ့ၤတဖၣ်န့ၣ် တလၢပှဲၤဒံးဘၣ်, ပကဘၣ်ဆိကမိၣ် တၢ်လၢကစၢ်ယွၤ ဘၣ်သူၣ်ဘၣ်သးဝဲတဖၣ်လီၤ.
“ကဲထီၣ် ပှၤအသီလၢ သးအတၢ်ဆိကမိၣ်”
၇. ပဆီတလဲ တၢ်လၢအအိၣ်လၢ ပသူၣ်ပသးပူၤနီၢ်နီၢ်တဖၣ် ကသ့ဒ်လဲၣ်.
၇ မ့ၢ်ပဆီတလဲ ပတၢ်ပာ်သူၣ်ပာ်သး မ့တမ့ၢ် တၢ်လၢအအိၣ်လၢ ပသူၣ်ပသးပူၤနီၢ်နီၢ်တဖၣ်သ့ဧါ. လံာ်စီဆှံ တဲဝဲလၢ “ကဲထီၣ် ပှၤအသီလၢ သးအတၢ်ဆိကမိၣ်, ဒီးကူထီၣ်သိးထီၣ်သုနီၢ်သီတ့အသးလၢ တၢ်လီၤဂာ်ယွၤအသိး, လၢတၢ်တီတၢ်လိၤ, ဒီးတၢ်စီဆှံနီၢ်နီၢ်အပူၤ” တက့ၢ်. (အ့းဖ့းစူး ၄:၂၃, ၂၄) အဃိ ပသ့ၣ်ညါဘၣ်လၢ ပဆီတလဲ တၢ်လၢအအိၣ်လၢ ပသူၣ်ပသးပူၤနီၢ်နီၢ်တဖၣ် သ့ဝဲလီၤ. ဘၣ်ဆၣ် ပကမၤဒ်န့ၣ်အဂီၢ် တညီဘၣ်. ဒ်သိးပကမၤဒ်န့ၣ်အဂီၢ် ပကဘၣ်တြီဆၢကွံာ် တၢ်မိၣ်န့ၢ်သးလီ လၢအကမၣ်တဖၣ် ဒီးပတုာ်မၤ တၢ်လၢအကမၣ်တဖၣ်လီၤ. ပကဘၣ် ဆီတလဲပ “သးအတၢ်ဆိကမိၣ်” န့ၣ်အဲၣ်ဒိးတဲဝဲ ပကဘၣ်ဆီတလဲကွံာ် ပတၢ်အဲၣ်ဒိး, ပတၢ်မၤ ဒီးတၢ်ဂ့ၢ်လၢ အထိၣ်ဟူးထိၣ်ဂဲၤထီၣ်ပှၤ လၢပကမၤတၢ်အဂီၢ်လီၤ. ဒ်သိး ပမၤဒ်အံၤကန့ၢ်အဂီၢ် ပကဘၣ်ဆဲးဂုာ်ကျဲးစၢး ထီဘိလီၤ.
၈-၉. ပလိၣ်ဘၣ်ဆီတလဲ တၢ်လၢအအိၣ်လၢ ပသူၣ်ပသးပူၤနီၢ်နီၢ်န့ၣ် ဒီပုၢ်ဝဲၢ်တဂၤ အဒိအတဲာ် ပာ်ဖျါထီၣ်ဝဲဒ်လဲၣ်.
၈ ပကဆိကမိၣ်ကွၢ်သကိး ဒီပုၢ်ဝဲၢ်ခွါတဂၤအဂ့ၢ်လီၤ. လၢအပူၤကွံာ်န့ၣ် အဝဲမ့ၢ်ပှၤလၢ အမၤဆူၣ်မၤစိးတၢ်, အအီလုၣ်ကိသံး ဒီးအ့ၣ်လိာ်အသးဒီး ပှၤဂၤလီၤ. လၢခံ အဝဲပာ်ပတုာ်ဝဲ တၢ်မၤတဖၣ်အံၤန့ၢ်ဝဲ ဒီးဒိးဘျၢထံလီၤ. လၢတၢ်န့ၣ်အဃိ ကဲထီၣ် တၢ်အုၣ်အသးလၢ ပှၤလၢအကပိာ်ကပၤတဖၣ်အဂီၢ် ဒိၣ်မးလီၤ. ဘၣ်ဆၣ် ဖဲအဝဲဒိးဘျၢထံဝံၤ တယံာ်ဒံးဘၣ်န့ၣ် လၢတၢ်တမုၢ်လၢ်အပူၤ အဝဲထံၣ်ဘၣ်ဒီး တၢ်မၤကွၢ်လီၤ. ဘၣ်တဟါန့ၣ် ပှၤပိာ်ခွါလၢ အမူၤသံးတဂၤ ဟဲလၢအဟံၣ် ဒီးဟဲဃုအ့ၣ်လိာ်သးဒီးအီၤလီၤ. လၢအခီၣ်ထံးန့ၢ် အဝဲပၢၤအသးန့ၢ်ဘၣ်ဆၣ် ဖဲပှၤမူၤသံးတဂၤအံၤ ဒုၣ်ဒွဲၣ်စံးအၢ ယဟိဝၤယွၤအမံၤအခါ ဒီပုၢ်ဝဲၢ်တဂၤအံၤ ပၢၤအသးတန့ၢ်လၢၤဘၣ်. အဝဲဟးထီၣ်လၢ တၢ်ချၢဒီး ထိပှၤမူၤသံးတဂၤအံၤလီၤ. ဘၣ်မနုၤအဃိ အဝဲမၤဝဲဒ်န့ၣ်လဲၣ်. တၢ်မၤလိလံာ်စီဆှံ မၤစၢၤအီၤ ဒ်သိးအဝဲ ကဆီတလဲကွံာ် အတၢ်မၤတဖၣ်ဘၣ်ဆၣ် အဝဲဆီတလဲ အတၢ်ပာ်သူၣ်ပာ်သးတန့ၢ်ဒံးဘၣ်. ပမ့ၢ်တဲလၢ ကျဲအဂၤတဘိန့ၣ် အဝဲဆီတလဲကွံာ် တၢ်လၢအအိၣ်လၢ အသူၣ်အသးပူၤနီၢ်နီၢ် တန့ၢ်ဒံးဘၣ်.
၉ ဘၣ်ဆၣ် ပဒီပုၢ်ဝဲၢ်တဂၤအံၤ တဟ့ၣ်အၡူဘၣ်. (ကတိၤဒိ ၂၄:၁၆) ခီဖျိလၢ တၢ်အိၣ်ဖှိၣ်သးပှၢ်တဖၣ် အတၢ်မၤစၢၤအဃိ အဝဲဆဲးလဲၤထီၣ်လဲၤထီ ဒီးလၢခံန့ၣ် အဝဲကဲထီၣ် တၢ်အိၣ်ဖှိၣ်သးပှၢ်တဂၤလီၤ. ဒီးဘၣ်တဟါ ဖဲအဝဲဟဲဟးထီၣ်လၢ ဘီမုၢ်ဘျီၣ်ဒိၣ်အခါ အဝဲထံၣ်ဘၣ်ဒီး တၢ်အိၣ်အသး ဒ်အပူၤကွံာ်တဘျီအသိးလီၤ. ဖဲန့ၣ်အခါ ပှၤအီမူၤသံးတဂၤ ကထိဝဲ တၢ်အိၣ်ဖှိၣ်သးပှၢ်တဂၤလီၤ. ဘၣ်ဆၣ် ပဒီပုၢ်ဝဲၢ်တဂၤအံၤ ပာ်အသးမုာ်မုာ်ခုၣ်ခုၣ် ဒီးတဲတၢ်ဒီး ပှၤအီမူၤသံးတဂၤအံၤ လၢတၢ်ဆီၣ်လီၤသးအပူၤ ဝံၤက့ၤဆှၢက့ၤဝဲ ဆူအဟံၣ်လီၤ. တဘျီအံၤန့ၣ် ဘၣ်မနုၤအဃိ ပဒီပုၢ်ဝဲၢ်တဂၤအံၤ တမၤဆၢက့ၤဝဲ ဒ်လၢညါအသိးဘၣ်လဲၣ်. မ့ၢ်လၢအဝဲဆီတလဲ အတၢ်ပာ်သူၣ်ပာ်သး န့ၢ်အဃိလီၤ. အဝဲကဲထီၣ် ပှၤလၢအအိၣ်ဃူဃူဖိးဖိးဒီးပှၤဂၤ ဒီးအိၣ်ဒီး တၢ်ဆီၣ်လီၤသးအနီၢ်ကီၢ်လီၤ. လၢတၢ်န့ၣ်အဃိ ယဟိဝၤယွၤအမံၤ ဘၣ်တၢ်မၤလၤကပီၤအီၤလီၤ.
၁၀. ဒ်သိး ပကဆီတလဲ တၢ်လၢအအိၣ်လၢ ပသူၣ်ပသးပူၤနီၢ်နီၢ်အဂီၢ် ပကဘၣ်မၤဒ်လဲၣ်.
၁၀ ပဆီတလဲပသးဒ်အံၤ လၢတနၤဃီအတီၢ်ပူၤတသ့ဘၣ် ဒီးပမၤအီၤ ညီညီဖိ တသ့စ့ၢ်ကီးဘၣ်. ဒ်သိးပကဆီတလဲပသး ဒ်အံၤအဂီၢ် ဘၣ်သ့ၣ်သ့ၣ် ပကဘၣ် “ဂုာ်မၤ” ဆူၣ်ဆူၣ် လၢအနံၣ်အါမးလီၤ. (၂ ပ့းတရူး ၁:၅) တၢ်ဆီတလဲဒ်အံၤန့ၣ် တဟဲကဲထီၣ်အသး ခီဖျိထဲလၢ ပအိၣ်လၢ “တၢ်မ့ၢ်တၢ်တီအပူၤ” အနံၣ်ယံာ်အဃိန့ၣ်ဘၣ်. ဒ်သိးပဆီတလဲ တၢ်လၢအအိၣ်လၢ ပသူၣ်ပသးပူၤနီၢ်နီၢ် ကန့ၢ်အဂီၢ် ပကဘၣ်ထဲးဂံၢ်ထဲးဘါ သပှၢ်ကတၢၢ်လီၤ. ခဲအံၤ ပကတဲသကိး တၢ်ဂ့ၢ်ခိၣ်သ့ၣ်တနီၤလၢ ကမၤစၢၤပှၤဒ်သိး ပဆီတလဲပသးဒ်အံၤ ကန့ၢ်အဂီၢ်လီၤ.
ပဆီတလဲ တၢ်လၢအအိၣ်လၢ ပသူၣ်ပသးပူၤနီၢ်နီၢ် ကသ့ဒ်လဲၣ်
၁၁. ဒ်သိးပကဆီတလဲ တၢ်လၢအအိၣ်လၢ ပသူၣ်ပသးပူၤနီၢ်နီၢ်အဂီၢ် တၢ်ထုကဖၣ် ကမၤစၢၤပှၤဒ်လဲၣ်.
၁၁ တၢ်ဃ့ဘါထုကဖၣ်န့ၣ် မ့ၢ်တၢ်အရ့ဒိၣ်လၢ ပကဘၣ်မၤအီၤ အဆိကတၢၢ်န့ၣ်လီၤ. ပကဘၣ်ဃ့ထုကဖၣ်ဒ် ပှၤကွဲးထါ စံးထီၣ်ပတြၢၤ လၢအဃ့ထုကဖၣ်ဝဲလၢ “ကစၢ်ယွၤဧၢ, တ့လီၤသးအကဆှီလၢယပူၤ, ဒီးသူၣ်သီသးသီ ဒီးသူၣ်ဂၢၢ်ယသးကျၢၤလၢ ယပူၤတက့ၢ်.” (စံးထီၣ်ပတြၢၤ ၅၁:၁၀, ခ့ခါစှီၤကျိာ်) ပကဘၣ်သ့ၣ်ညါလီၤပသးလၢ ပကဘၣ်ဆီတလဲကွံာ် တၢ်လၢအအိၣ် လၢပသူၣ်ပသးပူၤနီၢ်နီၢ် ဒီးဃ့ယဟိဝၤယွၤ အတၢ်မၤစၢၤလီၤ. ယဟိဝၤယွၤ ကမၤစၢၤပှၤန့ၣ် ပသ့ၣ်ညါအီၤကသ့ဒ်လဲၣ်. လၢဝံယဃ့းစက့လးအစိၤန့ၣ် ယဟိဝၤယွၤတဲဝဲ ပှၤအံၣ်စရ့လးဖိလၢ အတအိၣ်ဒီး တၢ်ဒိကနၣ်တဖၣ်လၢ ‘ယကဟ့ၣ်လီၤအီၤလၢ အသးတဖျၢၣ်ဃီ, ဒီးယကဒၢနုာ် အသူၣ်သီအသးသီလၢအပူၤ, . . . ဒီးယကဟ့ၣ်လီၤအီၤလၢ အသးညၣ်’ လၢအမ့ၢ် သးလၢအအဲၣ်ဒိးဒိကနၣ် ကစၢ်ယွၤ အတၢ်ဟံးစုနဲၣ်ကျဲလီၤ. (ယဃ့းစက့လး ၁၁:၁၉) တၢ်ကတိၤတဖၣ်အံၤ ကဲထီၣ်တၢ်ဂံၢ်တၢ်ဘါ လၢပဂီၢ်ဒိၣ်မးလီၤ. ဒ်ယဟိဝၤယွၤ သးအိၣ်မၤစၢၤဝဲ ပှၤအံၣ်စရ့လးဖိတဖၣ်အသိး အဝဲသးအိၣ်မၤစၢၤပှၤ စ့ၢ်ကီးလီၤ.
၁၂-၁၃. (က) ဒ် စံးထီၣ်ပတြၢၤ ၁၁၉:၅၉ ပာ်ဖျါထီၣ်ဝဲအသိး ပကဘၣ်ဆိကမိၣ်ထံ တၢ်ဂ့ၢ်မနုၤတဖၣ်လဲၣ်. (ခ) ပကဘၣ်သံကွၢ်လီၤပသး လၢတၢ်သံကွၢ် မနုၤတဖၣ်လဲၣ်.
၁၂ တၢ်အဂၤတမံၤလၢ ပကဘၣ်မၤန့ၣ်မ့ၢ်ဝဲ ပကဘၣ်ဆိကမိၣ်ထံတၢ်လီၤ. ပကဘၣ်ဖးလံာ်စီဆှံ ကိးနံၤဒဲး ဒီးဖဲပဖးအီၤအခါ ပကဘၣ်ဟံးန့ၢ် တၢ်ဆၢကတီၢ် လၢပကဆိကမိၣ်ထံအီၤယိာ်ယိာ် မ့တမ့ၢ် ဆိကမိၣ်ဘၣ်ဃးဒီး ပကဘၣ်ဆီတလဲ ပတၢ်ဆိကမိၣ်ဒီး ပတၢ်တူၢ်ဘၣ် မနုၤတဖၣ်လဲၣ်န့ၣ်လီၤ. (ဖး စံးထီၣ်ပတြၢၤ ၁၁၉:၅၉ တက့ၢ်; ဧ့ၤဘြံၤ ၄:၁၂; ယၤကိာ် ၁:၂၅) ပကဘၣ် သံကွၢ်လီၤပသး တီတီလိၤလိၤလၢ မ့ၢ်ပအိၣ်ဒီးတၢ်တူၢ်ဘၣ် ဒီးတၢ်ဆိကမိၣ်လၢ အလီၤဂာ်လိာ်အသးဒီး ပှၤဟီၣ်ခိၣ်ဖိတဖၣ် တမံၤမံၤဧါ. ပကဘၣ်ထံၣ်လီၤက့ၤ ပတၢ်ဂံၢ်စၢ်ဘါစၢ်တဖၣ် ဒီးဂုာ်ကျဲးစၢး မၤနၢၤကွံာ်အီၤလီၤ.
၁၃ တကးဒံးဘၣ် သံကွၢ်လီၤနသးလၢ လၢယသးပူၤန့ၣ် မ့ၢ်ယအိၣ်ဒီး တၢ်သူၣ်က့ၣ်သးကါ တစဲးဖိဧါ. (၁ ပ့းတရူး ၂:၁) ဒီး ‘ခိဖျိလၢ ယတၢ်အိၣ်သးလၢ အပူၤကွံာ်, ယတၢ်ကူၣ်ဘၣ်ကူၣ်သ့ ဒီးယတၢ်ထူးတၢ်တီၤတဖၣ်အဃိ မ့ၢ်ယဆိကမိၣ်လၢ ယဂ့ၤဒိၣ်န့ၢ်ဒံးပှၤဂၤဧါ.’ (ကတိၤဒိ ၁၆:၅) ‘မ့ၢ်ယထံၣ်ဆံး ပှၤလၢအတၢ်တအိၣ် ဒ်သိးဒီးယၤ မ့တမ့ၢ် အကလုာ်ဒူၣ် တဒ်သိးဒီးယၤတဖၣ်ဧါ.’ (ယၤကိာ် ၂:၂-၄) ‘မ့ၢ်ယဘၣ်သူၣ်ဘၣ်သး တၢ်လၢပှၤဟီၣ်ခိၣ်ဖိတဖၣ် ဟ့ၣ်ဂံၢ်ဟ့ၣ်ဘါဝဲန့ၣ်ဧါ.’ (၁ ယိၤဟၣ် ၂:၁၅-၁၇) ‘မ့ၢ်ယဘၣ်သူၣ်ဘၣ်သး တၢ်မၤမုာ်မၤဖှံသးလၢ အပာ်ဖျါထီၣ်ဝဲ တၢ်သကဲာ်ပဝးလၢ အလီၤရၢၢ် ဒီးတၢ်မၤဆူၣ်မၤစိးန့ၣ်ဧါ.’ (စံးထီၣ်ပတြၢၤ ၉၇:၁၀; ၁၀၁:၃; ဧၤမိၣ် ၅:၁၅) ဖဲနစံးဆၢ တၢ်သံကွၢ်တဖၣ်အံၤအခါ ဘၣ်သ့ၣ်သ့ၣ် နကထံၣ်ဘၣ်လၢ တၢ်လၢနကဘၣ် ဆဲးမၤဂ့ၤထီၣ်န့ၣ် အိၣ်ဝဲလီၤ. ပဆီတလဲ ပတၢ်ဆိကမိၣ် မ့တမ့ၢ် ပတၢ်တူၢ်ဘၣ် မ့ၢ်န့ၢ်န့ၣ် ပပၢ်အိၣ်လၢမူခိၣ် ကသးခုဝဲလီၤ.—စံးထီၣ်ပတြၢၤ ၁၉:၁၄.
၁၄. ဘၣ်မနုၤအဃိ ပကဘၣ်ဃုထၢ တံၤသကိးလၢအဂ့ၤန့ၣ် မ့ၢ်တၢ်လၢအရ့ဒိၣ်လဲၣ်.
၁၄ ပကဘၣ်ဃုထၢ ပတံၤသကိးလၢအဂ့ၤန့ၣ် မ့ၢ်တၢ်လၢအရ့ဒိၣ် စ့ၢ်ကီးလီၤ. တၢ်လၢပတံၤသကိးတဖၣ်န့ၣ် ကဲဘျုးလၢပဂီၢ် မ့တမ့ၢ် မၤဘၣ်ဒိပှၤသ့ဝဲလီၤ. (ကတိၤဒိ ၁၃:၂၀) ပှၤလၢပထံၣ်ဘၣ်အီၤ လၢကၠိ မ့တမ့ၢ် လၢတၢ်မၤလီၢ်အါတက့ၢ်န့ၣ် တမၤစၢၤပှၤဒ်သိး ပကဆိကမိၣ်တၢ် ဒ်ကစၢ်ယွၤအသိးဘၣ်. သနာ်က့ လၢခရံာ်ဖိတၢ်အိၣ်ဖှိၣ်န့ၣ် ပဃုထံၣ်န့ၢ် တံၤသကိးလၢ အဂ့ၤသ့လီၤ. ခရံာ်ဖိတၢ်အိၣ်ဖှိၣ်န့ၣ် မ့ၢ်ဝဲတၢ်လီၢ်တခါလၢ အကထိၣ်ဟူးထိၣ်ဂဲၤထီၣ်ပှၤ ဒီးဟ့ၣ်ဂံၢ်ဟ့ၣ်ဘါပှၤလၢ ပကအိၣ်ဒီး “တၢ်အဲၣ်တၢ်ကွံ, ဒီးတၢ်မၤဂ့ၤတၢ်” အဂီၢ်လီၤ.—ဧ့ၤဘြံၤ ၁၀:၂၄, ၂၅.
“အိၣ်ဂၢၢ်ဆိးကျၢၤလၢတၢ်နာ်အပူၤ” တက့ၢ်
၁၅-၁၆. မုၣ်ကီၤလံၢ် ဂုာ်ကျဲးစၢး ဆီတလဲဝဲ ပတၢ်ဆိကမိၣ်တဖၣ် ဒ်လဲၣ်.
၁၅ သ့ၣ်နီၣ်ထီၣ်လၢ မုၣ်ကီၤလံၢ် ပာ်လီၤအသးလၢ ကဆီတလဲ ပတၢ်ဆိကမိၣ်န့ၣ်တက့ၢ်. ဒ်သိးအဝဲကမၤဟးဂီၤကွံာ် ပတၢ်ဆိကမိၣ်လၢ အဒိးသန့ၤထီၣ်အသးလၢ ယွၤအကလုၢ်ကထါအဂီၢ် အဝဲသူဝဲကျဲအကလုာ်ကလုာ်လီၤ.
၁၆ လၢဧ့ၤဒ့ၣ်တၤသၣ်လီၢ်ပူၤန့ၣ် မုၣ်ကီၤလံၢ် သံကွၢ်ဝဲ နီၢ်အံၣ်အုလၢ “ယွၤမၤလိာ်သု . . . သပှၢ်တၢၢ်ဧါ” လီၤ. (၁ မိၤၡ့ ၃:၁) ဆၢကတီၢ်ခဲအံၤစ့ၢ်ကီး အဝဲဆဲးသံကွၢ်ဝဲ တၢ်သံကွၢ်လၢ အလီၤဂာ်ဒ် န့ၣ်တဖၣ်လီၤ. ဟီၣ်ခိၣ်လၢ မုၣ်ကီၤလံၢ် ပၢဝဲတဖျၢၣ်အံၤအပူၤန့ၣ် ပနၢ်ဟူဘၣ်တၢ်သံကွၢ် ဒ်အံၤတဖၣ် အါမးလီၤ. အဒိ ပနၢ်ဟူဘၣ် တၢ်သံကွၢ်ဒ်သိးဒီး ‘မ့ၢ်ကစၢ်ယွၤ တတူၢ်လိာ်ဝဲ မုၣ်ကဒဲကဒဲ ခွါကဒဲကဒဲ တၢ်ဆီဟံၣ်ဆီဃီဘၣ်န့ၣ် သပှၢ်တၢၢ်ဧါ, မ့ၢ်ကစၢ်ယွၤ တအဲၣ်ဒိးလၢ ပှၤကမၤ ခရံာ်အိၣ်ဖျဲၣ် ဒီးတၢ်အိၣ်ဖျဲၣ်ဆၢက့ၤအမူးတဖၣ်ဘၣ်န့ၣ် သပှၢ်တၢၢ်ဧါ, မ့ၢ်ကစၢ်ယွၤ တအဲၣ်ဒိးလၢ ပှၤကသွီသွံၣ်ဘၣ်န့ၣ် သပှၢ်တၢၢ်ဧါ, မ့ၢ်ကစၢ်ယွၤ လၢအပှဲၤဒီး တၢ်အဲၣ်တၢ်ကွံတဂၤန့ၣ် တအဲၣ်ဒိးလၢ ပရ့လိာ်ပသးဒီး ပှၤလၢအဘၣ် တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်အပူၤတဖၣ်ဘၣ်န့ၣ် သပှၢ်တၢၢ်ဧါ.’
၁၇. ဖဲပှၤဂၤသံကွၢ်ပှၤ တၢ်သံကွၢ်လၢ အမၤဒ့ဒီပသးအခါ ပကြၢးမၤဒ်လဲၣ် ဒီးပမ့ၢ်မၤဒ်န့ၣ်န့ၣ်ဒ် ကလီးစဲ ၂:၆, ၇ ပာ်ဖျါထီၣ်ဝဲအသိး ပကဒိးန့ၢ်ဘၣ် အဘျုးဒ်လဲၣ်.
၁၇ ပကဘၣ် မၤဂၢၢ်ကျၢၤထီၣ် ပတၢ်နာ်လီၤ. ပမ့ၢ်အိၣ်ဒီးတၢ်သံကွၢ် ဒီးပမ့ၢ်တဃု ပတၢ်သံကွၢ်တဖၣ် အတၢ်စံးဆၢဘၣ်န့ၣ် လၢခံပကအိၣ်ဒီး တၢ်သးဒ့ဒီလီၤ. ဒီးတၢ်သးဒ့ဒီတဖၣ်အံၤ မၤဘၣ်ဒိပတၢ်ဆိကမိၣ် ဒီးမၤဟးဂီၤကွံာ် ပတၢ်နာ်သ့ဝဲလီၤ. လၢတၢ်န့ၣ်အဃိ ပကဘၣ် မၤဒ်လဲၣ်. ကစၢ်ယွၤအကလုၢ်ကထါ တဲပှၤလၢ ဒ်သိးပကသ့ၣ်ညါ “ယွၤအတၢ်ဘၣ်သးလၢ အမ့ၢ်တၢ်ဂ့ၤ, ဒီးတၢ်လၢပဂ့ၤအဲၣ်ဒိး, ဒီးတၢ်လၢတၢ်ပှဲၤ” အဂီၢ် ပကဘၣ် ဆီတလဲ ပတၢ်ပာ်သူၣ်ပာ်သးလီၤ. (ရိမ့ၤ ၁၂:၂) ပမ့ၢ် မၤလိလံာ်စီဆှံထီဘိန့ၣ် ပကသ့ၣ်ညါလၢ တၢ်လၢပမၤလိဘၣ်အီၤတဖၣ်န့ၣ် မ့ၢ်တၢ်လၢအဘၣ်လီၤ. ဒီးပကနာ်လၢ ယဟိဝၤယွၤ အတၢ်ဘျၢတဖၣ်န့ၣ် မ့ၢ်တၢ်လၢအဘၣ်လီၤ. ဒီးပက “အိၣ်ဂၢၢ်ဆိးကျၢၤလၢတၢ်နာ်အပူၤ” ဒ်သ့ၣ်လၢ အဂံၢ်စဲၤလီၤအသး ယိာ်ယိာ်အသိးလီၤ.—ဖး ကလီးစဲ ၂:၆, ၇ တက့ၢ်.
၁၈. ဒ်သိးပဒီသဒၢလီၤပသးလၢ တၢ်စုၣ်တၢ်ပျၢ်လၢ အဟဲလၢ မုၣ်ကီၤလံၢ်အဟီၣ်ခိၣ်အအိၣ် ကန့ၢ်အဂီၢ် တၢ်မနုၤ ကမၤစၢၤပှၤလဲၣ်.
၁၈ ဒ်သိးပတၢ်နာ် ကဂၢၢ်ကျၢၤထီၣ်အဂီၢ် ပှၤဂၤမၤန့ၢ်ပှၤ တသ့နီတဂၤဘၣ်. အဃိ ပကဘၣ် ဆဲးဆီတလဲ တၢ်လၢအအိၣ်လၢ ပသူၣ်ပသးပူၤနီၢ်နီၢ်လီၤ. ပကဘၣ်ဆဲး ဃ့ဘါထုကဖၣ် ဒီးဃ့ယဟိဝၤ အသးစီဆှံ အတၢ်မၤစၢၤထီဘိလီၤ. ဆိကမိၣ်ထံတၢ်ယိာ်ယိာ် ဒီးသံကွၢ်လီၤနသး ဘၣ်ဃးဒီးနတၢ်ဆိကမိၣ် ဒီးနတၢ်ပာ်သူၣ်ပာ်သးတဖၣ်န့ၣ်တက့ၢ်. ဃုထၢတံၤသကိးလၢအဂ့ၤ ဒီးအိၣ်ဘူးဒီး ပှၤလၢအကမၤစၢၤနၤ ဒ်သိးနကဆီတလဲ နတၢ်ဆိကမိၣ်တဖၣ်န့ၣ်တက့ၢ်. နမ့ၢ်မၤဒ်န့ၣ်န့ၣ် နဒီသဒၢလီၤနသးလၢ တၢ်စုၣ်တၢ်ပျၢ်လၢ အဟဲလၢ မုၣ်ကီၤလံၢ်အဟီၣ်ခိၣ်အအိၣ် ကန့ၢ်ဝဲ ဒီးနမၤနၢၤ “တၢ်ကူၣ်တၢ်ဖးတဖၣ်, ဒီးကယဲၢ် တၢ်ပာ်ထီၣ်ထီအသး ထီဒါတၢ်သ့ၣ်ညါယွၤ” ကန့ၢ်လီၤ.—၂ ကရံၣ်သူး ၁၀:၅.
တၢ်သးဝံၣ် ၅၀ ယတၢ်ထုကဖၣ်လၢ ယဟ့ၣ်လီၤယသး
^ လံာ်အဆၢ. 5 ပတၢ်အိၣ်မူလၢအပူၤကွံာ်, ပတၢ်ဆဲးတၢ်လၤ ဒီးပတၢ်ကူၣ်ဘၣ်ကူၣ်သ့တဖၣ်န့ၣ် လုၣ်ဘၢပှၤဒ်သိး ပကအိၣ်ဒီးတၢ်ဆိကမိၣ် လၢအဂ့ၤ မ့တမ့ၢ် လၢအအၢသ့လီၤ. ဒီးဘၣ်သ့ၣ်သ့ၣ် ပကထံၣ်ဘၣ်လၢ ပတၢ်မၤတဖၣ်န့ၣ် ပာ်ဖျါထီၣ်ဝဲလၢ ပအိၣ်ဒီးတၢ်ပာ်သူၣ်ပာ်သးလၢ အတဂ့ၤ ဒီးပကမၤလီၤမၢ်ကွံာ်အီၤအဂီၢ် တညီဘၣ်. တၢ်မၤလိအံၤ ကပာ်ဖျါထီၣ်ဝဲဘၣ်ဃးဒီး ပမ့ၢ်အိၣ်ဒီး တၢ်ပာ်သူၣ်ပာ်သးလၢ အတဂ့ၤတဖၣ်န့ၣ် ပမၤလီၤမၢ်ကွံာ်အီၤ ကသ့ဒ်လဲၣ်န့ၣ်လီၤ.
