တၢ်ကီၤသူၣ်ကီၤသး မ့ၢ်ဝဲတၢ်ဂ့ၤတၢ်ဝါ အရ့ဒိၣ်တခါလၢ ယဟိဝၤယွၤ ဘၣ်သူၣ်ဘၣ်သးဝဲ
“ဖဲယအ့ၣ်လိာ်သးဒီး ယတခွါအခါ ယဖီၣ်အကိာ်ဘိ ဒီးယဘံးအကိာ် ဒီးယအဲၣ်ဒိး မၤသံအီၤ.”—ဖီ(လ်).
“ယအိၣ်လၢဟံၣ်န့ၣ် ယသးထီၣ်တၢ် ညီဒိၣ်မး. တၢ်ဂ့ၢ်တၢ်ကျိၤ တအိၣ်နီတမံၤဘၣ် သနာ်က့ ယသးထီၣ်တၢ်. ယမၤဟးဂီၤကွံာ် ဟံၣ်ဃီတၢ်ပီးတၢ်လီ, ဖိသၣ်တၢ်လိာ်ကွဲ ဒီးကယဲၢ်တၢ်အိၣ်လၢ ယစုပူၤန့ၣ် ယမၤဟးဂီၤအီၤလၢၤပျီ.”—မၣ်ကိၣ်.
ပဝဲအါတက့ၢ်န့ၣ် ဘၣ်သ့ၣ်သ့ၣ် ပတသးဒိၣ်ထီၣ်တၢ် ထဲသိးဒီး ပှၤခံဂၤအံၤဘၣ်. ဘၣ်ဆၣ် တဘျီတခီၣ်န့ၣ် တညီလၢ ပကပၢၤပသးအဂီၢ်ဘၣ်. ဘၣ်မနုၤအဃိလဲၣ်. မ့ၢ်လၢပဒိးန့ၢ်ဘၣ် သးလၢအအဲၣ်ဒိးမၤ တၢ်ဒဲးဘး လၢစီၤအၤဒၣ်အအိၣ်အဃိလီၤ. (ရိမ့ၤ ၅:၁၂) ဒ်ဖီ(လ်) ဒီးမၣ်ကိၣ်အသိး ပှၤတနီၤန့ၣ် ကီလၢအကပၢၤသးအဂီၢ်လီၤ. မ့မ့ၢ်ပှၤအဂၤတနီၤန့ၣ် တညီလၢအကပၢၤ အတၢ်ဆိကမိၣ်တဖၣ်ဘၣ်. အဒိ အဝဲသ့ၣ် ဆဲးဆိကမိၣ်ဝဲ တၢ်လၢအမၤပျံၤမၤဖုးအီၤ ဒီးတၢ်လၢအမၤဟးဂီၤအဝဲသ့ၣ်သးလီၤ. ဒီးပှၤအဂၤတနီၤန့ၣ် ကီဒိၣ်မးလၢ အကဟးဆှဲးဝဲ တၢ်မၤကမၣ်မုၣ်ကမၣ်ခွါ, တၢ်အီလုၢ်ကိသံး ဒီးတၢ်သူကမၣ် ကသံၣ်ကသီဒီး ကသံၣ်မူၤဘှီးတဖၣ်န့ၣ်လီၤ.
ပှၤလၢအတပၢၤ အတၢ်ဆိကမိၣ်, တၢ်မိၣ်န့ၢ်သးလီ ဒီးတၢ်ဖံးတၢ်မၤတဖၣ်န့ၣ် အတၢ်အိၣ်မူဟးဂီၤဝဲလီၤ. အဃိ ဒ်သိးပတၢ်အိၣ်မူ သုတကဲထီၣ်အသး ဒ်န့ၣ်တဂ့ၤအဂီၢ် ပမၤကသ့ဒ်လဲၣ်. ပကဘၣ် မၤဒိၣ်ထီၣ်အါထီၣ် ပတၢ်ကီၤသူၣ်ကီၤသးလီၤ. ဘၣ်ဆၣ် ဒ်သိးပမၤဒ်န့ၣ်ကသ့အဂီၢ် ပကတဲသကိး တၢ်သံကွၢ်သၢဖျၢၣ်လၢအမ့ၢ် တၢ်ကီၤသူၣ်ကီၤသးန့ၣ် မ့ၢ်မနုၤလဲၣ်, ဘၣ်မနုၤအဃိ ပကဘၣ်အိၣ်ဒီး တၢ်ကီသူၣ်ကီၤသးန့ၣ် မ့ၢ်တၢ်လၢအရ့ဒိၣ်မးလဲၣ် ဒီးပမၤဒိၣ်ထီၣ်အါထီၣ် တၢ်ဂ့ၤတၢ်ဝါလၢ အပၣ်ဃုာ်လၢ “သးအတၤသၣ်” အကျါတခါအံၤ ကသ့ဒ်လဲၣ်န့ၣ်လီၤ. (ကလၤတံ ၅:၂၂, ၂၃) ဒီးပကတဲသကိး ဘၣ်ဃးဒီး ဖဲပတအိၣ်ဒီး တၢ်ကီၤသူၣ်ကီၤသးအခါ ပမၤတၢ်မနုၤကသ့လဲၣ်န့ၣ်လီၤ.
တၢ်ကီၤသူၣ်ကီၤသးန့ၣ် မ့ၢ်မနုၤလဲၣ်
ပှၤလၢအအိၣ်ဒီး တၢ်ကီၤသူၣ်ကီၤသးတဂၤန့ၣ် တမၤဆၢက့ၤတၢ် ဒ်အတူၢ်ဘၣ်ဝဲအသိး တဘျီဃီဘၣ်. လၢတၢ်န့ၣ်အလီၢ် အဝဲပၢၤ အတၢ်စံးတၢ်ကတိၤ ဒီးတၢ်ဖံးတၢ်မၤလၢ တဘၣ်ကစၢ်ယွၤအသးတဖၣ်န့ၣ်လီၤ.
ပကဘၣ်အိၣ်ဒီး တၢ်ကီၤသူၣ်ကီၤသး လၢကျဲဒ်လဲၣ်န့ၣ် ယ့ၣ်ၡူးပာ်လီၤန့ၢ်ပှၤ အဒိအတဲာ်လီၤ. ဘၣ်ဃးဒီးယ့ၣ်ၡူးန့ၣ် လံာ်စီဆှံတဲဝဲလၢ အ “ဘၣ်တၢ်ဒုၣ်ဒွဲၣ်, ဒီးတဒုၣ်ဒွဲၣ်ဆၢဘၣ်ဝဲဘၣ်. ဒိးတၢ်, ဒီးတကတိၤပျံၤဘၣ်တၢ်ဘၣ်, မ့ၢ်အအးလီၤအသးလၢ ပှၤစံၣ်ညီၣ်တၢ်တီတဂၤ အစုပူၤလီၤ.” (၁ ပ့းတရူး ၂:၂၃) ဖဲယ့ၣ်ၡူးအိၣ်လၢ သ့ၣ်တၢၣ်အလိၤဒီး ပှၤမၤဆဲးအဲးအီၤအခါ အဝဲပာ်ဖျါထီၣ် တၢ်ကီၤသူၣ်ကီၤသးလီၤ. (မးသဲ ၂၇:၃၉-၄၄) ဒီးဖဲတၢ်ဘူၣ်တၢ်ဘါခိၣ်နၢ်တဖၣ် သံကွၢ်အီၤတၢ်သံကွၢ်အါမး ဒ်သိးအကတဲကမၣ်ဘၣ်တၢ်အခါ အဝဲပာ်ဖျါထီၣ် တၢ်ကီၤသူၣ်ကီၤသးလီၤ. (မးသဲ ၂၂:၁၅-၂၂) ဒီးဖဲပှၤယူဒၤဖိတဖၣ် သးထီၣ်တၢ် ဒီးထၢထီၣ်လၢၢ် ဒ်သိးကကွံာ်အီၤအခါ အဝဲပာ်ဖျါထီၣ်စ့ၢ်ကီး တၢ်ကီၤသူၣ်ကီၤသး ဒီးတမၤဆၢက့ၤ အဝဲသ့ၣ်ဘၣ်. လၢတၢ်န့ၣ်အလီၢ် အဝဲ “ဟးထီၣ်ကွံာ်ဝဲလၢ တၢ်လုၢ်အဟံၣ်ပူၤလီၤ.”—ယိၤဟၣ် ၈:၅၇-၅၉.
မ့ၢ်ပမၤ ဒ်ယ့ၣ်ၡူးအသိး ကန့ၢ်ဧါ. ပမၤဖဲ အကြၢးန့ၢ်ဝဲလီၤ. တၢ်မၢဖိ ပ့းတရူးကွဲးဝဲလၢ “ခရံာ်ဒိးတၢ်လၢပဃိ, ဒီးပာ်လီၤတဲာ်အဒိအတဲာ်, ဒ်သိးပကယီၢ်အခီၣ်လီၢ်” ဘူးဘူးတံၢ်တံၢ်အဂီၢ်န့ၣ်လီၤ. (၁ ပ့းတရူး ၂:၂၁) ပမ့ၢ်ပှၤလၢ အတလၢတပှဲၤသနာ်က့ ဘၣ်ဃးဒီး တၢ်ကီၤသူၣ်ကီၤသးန့ၣ် ပမၤထွဲဒ် ယ့ၣ်ၡူးအဒိအတဲာ် ဘူးဘူးတံၢ်တံၢ် သ့ဝဲလီၤ. ဘၣ်မနုၤအဃိ အရ့ဒိၣ်လၢ ပကအိၣ်ဒီး တၢ်ကီၤသူၣ်ကီၤသးလဲၣ်.
ဘၣ်မနုၤအဃိ ပကဘၣ်အိၣ်ဒီး တၢ်ကီၤသူၣ်ကီၤသးန့ၣ် မ့ၢ်တၢ်လၢအရ့ဒိၣ်မးလဲၣ်
ပမ့ၢ်အဲၣ်ဒိး ဒိးန့ၢ်ဘၣ် ယဟိဝၤယွၤ အတၢ်ဘၣ်သးန့ၣ် ပကဘၣ်အိၣ်ဒီး တၢ်ကီၤသူၣ်ကီၤသးလီၤ. ပမၤယဟိဝၤယွၤအတၢ်မၤ လၢ
တၢ်သးတီအပူၤ မ့ၢ်အိၣ်လၢအနံၣ်အါမး သနာ်က့ ဖဲပတဲတၢ်အခါ ဒီးဖဲပမၤတၢ်အခါ ပမ့ၢ်တပၢၤပသးဘၣ်န့ၣ် ပတၢ်ရ့လိာ်သးဒီးကစၢ်ယွၤ ဟးဂီၤကွံာ်ဝဲသ့လီၤ.ဆိကမိၣ်ကွၢ် စီၤမိၤၡ့အဒိအတဲာ်တက့ၢ်. အဝဲမ့ၢ်ပှၤလၢ “အသးစူၤန့ၢ်ကယဲၢ် ပှၤလၢဟီၣ်ခိၣ်ချၢ ခဲလၢာ်တက့ၢ်လီၤ.” (၄ မိၤၡ့ ၁၂:၃) စီၤမိၤၡ့ ဝံသးစူၤဝဲ ပှၤအံၣ်စရ့လးဖိလၢ အကဒူးကဒ့ၣ်တၢ်တဖၣ် အိၣ်လၢအနံၣ်အါမးလံ. ဘၣ်ဆၣ်ဘၣ်တနံၤန့ၣ် အပၢၤအသးတန့ၢ်လၢၤဘၣ်. ဖဲပှၤအံၣ်စရ့လးဖိတဖၣ် ကဒူးကဒ့ၣ်အီၤလၢ ထံတအိၣ်ဘၣ်အခါ အဝဲသးဒိၣ်ထီၣ်တၢ်လီၤ. အဃိ အဝဲတဲတၢ်ဒီး ပှၤအံၣ်စရ့လးဖိ ဆူၣ်ဆူၣ်ကိၤကိၤလၢ “ပှၤပူထီၣ်ဖိသ့ၣ်ဧၢ, ကနၣ်တက့ၢ်, ပဘၣ်ဒုးဟဲထီၣ်ထံလၢ လၢၢ်အပူၤအံၤ, လၢသုဂီၢ်စ့ၢ်ကီးဧါ.”—၄ မိၤၡ့ ၂၀:၂-၁၁.
စီၤမိၤၡ့တပၢၤအသးလၢၤဘၣ်. ဒီးအဝဲ တမၤလၤကပီၤစ့ၢ်ကီး ယဟိဝၤယွၤ လၢအဒုးဟဲထီၣ်ထံ လၢတၢ်လီၤလိၢ်လီၤလး လၢအဝဲသ့ၣ်အဂီၢ်န့ၣ်လၢၤဘၣ်. (စံးထီၣ်ပတြၢၤ ၁၀၆:၃၂, ၃၃) လၢတၢ်န့ၣ်အဃိ ယဟိဝၤယွၤ တဒုးလဲၤနုာ်အီၤဆူ ကီၢ်တၢ်စံးပာ်အပူၤလၢၤဘၣ်. (၄ မိၤၡ့ ၂၀:၁၂) ခီဖျိလၢ စီၤမိၤၡ့တအိၣ်ဒီး တၢ်ကီၤသူၣ်ကီၤသးဘၣ်အဃိ ဘၣ်သ့ၣ်သ့ၣ် အဝဲကပီၢ်ယၢ်လီၤဘၣ်အသး တုၤလၢအသံတစုလီၤ.—၅ မိၤၡ့ ၃:၂၃-၂၇.
ပန့ၢ်ဘၣ်တၢ်မၤလိ မနုၤလဲၣ်. ပအိၣ်လၢတၢ်မ့ၢ်တၢ်တီအပူၤ အနံၣ်မ့ၢ်ယံာ်ဒၣ်လဲာ် သနာ်က့ ပတကြၢးတဲတၢ်ဒီး ပှၤလၢအမၤအ့န့ပသး ဒီးပှၤလၢအလိၣ်ဘၣ် တၢ်သိၣ်က့ၤသီက့ၤတဖၣ် လၢတၢ်တပာ်ကဲအပူၤ နီတဘျီဘၣ်. (အ့းဖ့းစူး ၄:၃၂; ကလီးစဲ ၃:၁၂) ဖဲပသးပှၢ်ထီၣ်အခါ တဘျီတခီၣ်န့ၣ် ကကီလၢ ပကအိၣ်ဒီး တၢ်သူၣ်စူၤသးစူၤအဂီၢ်လီၤ. ဘၣ်ဆၣ် သ့ၣ်နီၣ်ထီၣ်က့ၤ စီၤမိၤၡ့အဒိအတဲာ်တက့ၢ်. ပတအဲၣ်ဒိးလၢ ပမံၤကဟးဂီၤ လၢယဟိဝၤယွၤ အမဲာ်ညါ ခီဖျိလၢ ပတပၢၤပသးအဃိန့ၣ်ဘၣ်. အဃိ ပမၤဒိၣ်ထီၣ်အါထီၣ် တၢ်ကီၤသူၣ်ကီၤသး ကသ့ဒ်လဲၣ်.
ပမၤဒိၣ်ထီၣ်အါထီၣ် တၢ်ကီၤသူၣ်ကီၤသး ကသ့ဒ်လဲၣ်
ဃ့ယဟိဝၤယွၤ အသးစီဆှံတက့ၢ်. ဘၣ်မနုၤအဃိ ပကဘၣ်မၤဒ်န့ၣ်လဲၣ်. မ့ၢ်လၢ တၢ်ကီၤသူၣ်ကီၤသးန့ၣ် မ့ၢ်ဝဲတၢ်ဂ့ၤတၢ်ဝါတခါလၢ အဟဲအိၣ်ထီၣ်ခီဖျိလၢ ကစၢ်ယွၤသးစီဆှံ ဒီးယဟိဝၤယွၤ ဟ့ၣ်လီၤအသးစီဆှံလၢ ပှၤလၢအဃ့တၢ်လၢအီၤတဖၣ် အဃိလီၤ. (လူၤကၣ် ၁၁:၁၃) ဒ်သိးပအိၣ်ဒီး တၢ်ကီၤသူၣ်ကီၤသးကန့ၢ်အဂီၢ် ယဟိဝၤယွၤဟ့ၣ်လီၤပှၤ တၢ်ဂံၢ်တၢ်ဘါ ခီဖျိလၢအသးစီဆှံလီၤ. (ဖံလံးပံၤ ၄:၁၃) ဒီးယဟိဝၤယွၤ မၤစၢၤပှၤလၢ ပကမၤဒိၣ်ထီၣ်အါထီၣ် တၢ်ဂ့ၤတၢ်ဝါအဂၤ လၢအဟဲအိၣ်ထီၣ်လၢ သးစီဆှံ ဒ်သိးဒီးတၢ်အဲၣ်တၢ်ကွံလီၤ. တၢ်ဂ့ၤတၢ်ဝါအံၤ ကမၤစၢၤပှၤဒ်သိး ပကပာ်ဖျါထီၣ် ပတၢ်ကီၤသူၣ်ကီၤသးလီၤ.—၁ ကရံၣ်သူး ၁၃:၅.
ဟးဆှဲး တၢ်တမံၤဂ့ၤတမံၤဂ့ၤလၢ အကမၤစှၤလီၤ နတၢ်ကီၤသူၣ်ကီၤသးတက့ၢ်. အဒိ ဟးဆှဲး အ့ထၢၣ်နဲး ဒီးတၢ်မၤမုာ်မၤဖှံသး လၢအပာ်ဖျါထီၣ် တၢ်သကဲာ်ပဝး လၢအလီၤရၢၢ်တဖၣ်တက့ၢ်. (အ့းဖ့းစူး ၅:၃, ၄) ပကဘၣ်ဟးဆှဲး တၢ်တမံၤဂ့ၤတမံၤဂ့ၤ လၢကကဲထီၣ် တၢ်လ့ပစီလၢ ပကမၤ တၢ်ကမၣ်အဂီၢ်န့ၣ်လီၤ. (ကတိၤဒိ ၂၂:၃; ၁ ကရံၣ်သူး ၆:၁၂) အဒိ လံာ်လဲၢ်ဒီး တၢ်ဂီၤမူသ့ၣ်တဖၣ် လၢအပာ်ဖျါ ထီၣ် တၢ်အဲၣ်အဂ့ၢ် မ့ၢ်ဒုးအိၣ်ထီၣ် ပတၢ်သကဲးပဝးလၢ အလီၤရၢၢ်လီၤစၢၢ်န့ၣ် ပကဘၣ်ဟးဆှဲးကွံာ် အီၤခဲလၢာ်လီၤ.
ဘၣ်သ့ၣ်သ့ၣ် ကကီလၢ ပကမၤထွဲ တၢ်ဟ့ၣ်ကူၣ်အံၤအဂီၢ်လီၤ. ဘၣ်ဆၣ် ပမ့ၢ်ဂုာ်ကျဲးစၢးမၤထွဲန့ၣ် ယဟိဝၤယွၤ ကဟ့ၣ်ပှၤ တၢ်ဂံၢ်တၢ်ဘါ လၢပကပၢၤပသးအဂီၢ်လီၤ. (၂ ပ့းတရူး ၁:၅-၈) ယဟိဝၤယွၤ မၤစၢၤပှၤဒ်သိး ပကပၢၤ ပတၢ်ဆိကမိၣ်, ပတၢ်ကတိၤ ဒီးပတၢ်ဖံးတၢ်မၤတဖၣ်သ့ဝဲလီၤ. ဘၣ်ဃးဒီးတၢ်ဂ့ၢ်အံၤန့ၣ် ပထံၣ်ဘၣ် တၢ်အုၣ်သးလၢ ဖီ(လ်) ဒီးမၣ်ကိၣ် အဒိအတဲာ်လီၤ. အဝဲသ့ၣ်တဂၤစုာ်စုာ်န့ၣ် လၢခံန့ၣ် အဝဲသ့ၣ်ဂုာ်ကျဲးစၢးပၢၤအသး န့ၢ်ဝဲလီၤ. ဆိကမိၣ်ကွၢ် ဒီပုၢ်ဝဲၢ်ခွါတဂၤ လၢအသးထီၣ်တၢ်တလီၢ်လီၢ် ဖဲအနီကါအခါန့ၣ်တက့ၢ်. အဝဲသးထီၣ်တၢ် တုၤဒၣ်လဲာ် အတဲအါတၢ်ဒီး ပှၤနီကါအဂၤတဖၣ်လီၤ. အဝဲမၤဝဲဒ်လဲၣ်. အဝဲတဲဝဲလၢ “ယဃ့ဘါထုကဖၣ် ကိးနံၤဒဲး လၢတၢ်သူၣ်ဆူၣ်သးဆူၣ်အပူၤလီၤ. ယမၤလိ တၢ်ဂ့ၢ်လၢဘၣ်ဃးဒီး တၢ်ကီၤသူၣ်ကီၤသး ဒီးယတိၢ်နီၣ်သံဃာ် လံာ်စီဆှံအဆၢ လၢအကကဲဘျုးတဖၣ်လီၤ. ယမၤဒ်န့ၣ် န့ၢ်လၢအနံၣ်အါမးလံ သနာ်က့ ယတဲလီၤယနီၢ်ကစၢ်သး ကိးဂီၤဒဲးလၢ ယအဲၣ်ဒိးပာ်ယသး မုာ်မုာ်ခုၣ်ခုၣ်လီၤ. ယမ့ၢ်ဘၣ် လဲၤတၢ်လီၢ်တတီၤတီၤန့ၣ် ယလဲၤဆိအီၤဒ်သိး ယတကရီတၢ် တဂ့ၤအဂီၢ်လီၤ.”
ပပၢၤပသး မ့ၢ်တန့ၢ်ဘၣ်န့ၣ် တၢ်ကကဲထီၣ် အသးဒ်လဲၣ်
ပဝဲတဂၤဂ့ၤတဂၤဂ့ၤ တဘျီတခီၣ်န့ၣ် ပပၢၤပသးတန့ၢ်ဘၣ်. တၢ်မ့ၢ်ကဲထီၣ်အသးဒီးပှၤဒ်န့ၣ်န့ၣ် ပတူၢ်ဘၣ်လၢ ပဃ့ဘါထုကဖၣ်တၢ်ဆူ ယဟိဝၤယွၤအအိၣ်န့ၣ် တကြၢးလၢၤဘၣ်. ဘၣ်ဆၣ် အခါဖဲန့ၣ်န့ၣ် ပကဘၣ်ဃ့ယဟိဝၤယွၤ အတၢ်မၤစၢၤ အါကတၢၢ်န့ၣ်လီၤ. အဃိ ဖဲန့ၣ်အဆၢကတီၢ် ဃ့ဘါထုကဖၣ်ဆူ ယဟိဝၤယွၤအအိၣ် တဘျီဃီတက့ၢ်. ဃ့ပျၢ်နတၢ်ကမၣ်, ဃ့အတၢ်မၤစၢၤ ဒီးပာ်လီၤနသး ဂၢၢ်ဂၢၢ်ကျၢၤကျၢၤလၢ နသုတမၤကမၣ်ဘၣ်တၢ် ဒ်အလီၢ်လီၢ်တဂ့ၤ အဂီၢ်န့ၣ်တက့ၢ်. (စံးထီၣ်ပတြၢၤ ၅၁:၉-၁၁) နမ့ၢ်ဃ့ကညး ယဟိဝၤယွၤ လၢတၢ်သူၣ်အိၣ်သးအိၣ်အပူၤန့ၣ် အဝဲကဒိကနၣ်နၤလီၤ. (စံးထီၣ်ပတြၢၤ ၁၀၂:၁၇) တၢ်မၢဖိယိၤဟၣ် တဲဝဲလၢ ယွၤအဖိခွါအသွံၣ်န့ၣ် “သ့စီကွံာ်ပှၤလၢ ပတၢ်ဒဲးဘးခဲလၢာ်လီၤ.” (၁ ယိၤဟၣ် ၁:၇; ၂:၁; စံးထီၣ်ပတြၢၤ ၈၆:၅) သ့ၣ်နီၣ်ထီၣ်လၢ ယဟိဝၤယွၤ မၢအခ့အပှၤတဖၣ် ပျၢ်ပှၤဂၤအတၢ်ကမၣ် တလီၢ်လီၢ်န့ၣ်တက့ၢ်. အဃိ ပဝဲစ့ၢ်ကီး ပနာ်သ့သပှၢ်ကတၢၢ်လၢ အကပျၢ်ပတၢ်ကမၣ် ဒ်န့ၣ်လီၤ.—မးသဲ ၁၈:၂၁, ၂၂; ကလီးစဲ ၃:၁၃.
ဖဲစီၤမိၤၡ့ အိၣ်လၢပှၢ်မုၢ်ကနၢအခါ အတၢ်ကီၤသူၣ်ကီၤသး လီၤမၢ်ထဲတစိၢ်ဖိအတီၢ်ပူၤဒၣ်လဲာ် ယဟိဝၤယွၤ တဘၣ်သးဝဲဘၣ်. ဘၣ်ဆၣ် ယဟိဝၤယွၤ ပျၢ်အတၢ်ကမၣ်လီၤ. ဒီးကစၢ်ယွၤ အကလုၢ်ကထါ ပာ်ဖျါထီၣ်ဝဲလၢ စီၤမိၤၡ့မ့ၢ် ပှၤဒိဂ့ၤတဲာ်ဘၣ်လၢ အအိၣ်ဒီးတၢ်နာ်န့ၣ်လီၤ. (၅ မိၤၡ့ ၃၄:၁၀; ဧ့ၤဘြံၤ ၁၁:၂၄-၂၈) ယဟိဝၤယွၤ တဒုးလဲၤနုာ် စီၤမိၤၡ့ လၢကီၢ်တၢ်စံးပာ်အပူၤလၢၤဘၣ်. ဘၣ်ဆၣ် အဝဲကဒုးအိၣ်အီၤလၢ ဟီၣ်ခိၣ်ပၤရဒံစူးအပူၤ ဒီးဟ့ၣ်အီၤ တၢ်မုၢ်လၢ် လၢကအိၣ်မူဘၣ် လီၤထူလီၤယိာ်န့ၣ်လီၤ. ပဝဲသ့ၣ်စ့ၢ်ကီး ပမ့ၢ်ဆဲးဂုာ်ကျဲးစၢး မၤဒိၣ်ထီၣ်အါထီၣ် တၢ်ဂ့ၤတၢ်ဝါလၢအမ့ၢ် တၢ်ကီၤသူၣ်ကီၤသးန့ၣ် ပအိၣ်ဒီးတၢ်မုၢ်လၢ် လၢပကအိၣ်မူဘၣ် လီၤထူလီၤယိာ်အဂီၢ်သ့ဝဲလီၤ.—၁ ကရံၣ်သူး ၉:၂၅.