“ယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ် ကယဲၢ်ပသ့ၣ်ညါနၢ်ပၢၢ်တၢ်”
“ယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ်ကယဲၢ်ပသ့ၣ်ညါနၢ်ပၢၢ်တၢ်န့ၣ် ကပၢၤသုသူၣ်သုသး” လီၤ. —ဖံလံးပံၤ ၄:၇.
၁, ၂. လၢဝ့ၢ်ဖံလံးပံၤအပူၤန့ၣ် တၢ်ကဲထီၣ်အသးဒီး စီၤပီလူးဒီး စီၤစံလၤဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
ထံၣ်တမှံကွၢ် ပှၤမံးၡ့ၣ်နရ့ၣ်ခံဂၤ လၢအမ့ၢ်စီၤပီလူးဒီးစီၤစံလၤ အတၢ်အိၣ်သးတက့ၢ်. ဘၣ်တနၤဖဲဖးဖီမုၢ်န့ၣ် ပှၤမံးၡ့ၣ်နရ့ၣ် ခံဂၤအံၤဘၣ်အိၣ်လၢ ဝ့ၢ်ဖံလံးပံၤအဃိာ်ပူၤ လၢအခံးသူအကျါန့ၣ်လီၤ. ဒီးမ့ၢ်လၢ ပှၤမၤတံၢ်ဃာ်အခီၣ်အဃိ ဟူးဝဲတန့ၢ်ဘၣ် ဒီးအယီၢ်ဒ့စ့ၢ်ကီးဆါဝဲ မ့ၢ်လၢပှၤတီၢ်အဝဲသ့ၣ်အဃိလီၤ. (မၤတၢ် ၁၆:၂၃, ၂၄) ဖဲတၢ်တဂီၤန့ၣ် ပှၤဝ့ၢ်ဖိတဖၣ်တွံၢ်ထီၣ် စီၤပီလူးဒီးစီၤစံလၤ လၢဖၠါပူၤ ဒီးပဒိၣ်တဖၣ် သမံသမိးအဝဲသ့ၣ်လီၤ. ဒီးပှၤထုးညာ်ကွံာ်အဆ့ကၤဒီး တီၢ်အီၤလၢနီၣ်တီၢ်နးနးကလဲာ်လီၤ. (မၤတၢ် ၁၆:၁၆-၂၂) စီၤပီလူးမ့ၢ်ဝဲ ရိမ့ၤအထံဖိကီၢ်ဖိအဃိ ပှၤတကြၢးမၤအီၤဒ်န့ၣ်ဘၣ်. *—ကွၢ်တၢ်ဂ့ၢ်အဘျဲၣ်တက့ၢ်.
၂ ဖဲစီၤပီလူးအိၣ်လၢ ဃိာ်ပူၤအခါ ဘၣ်သ့ၣ်သ့ၣ် အဝဲကဆိကမိၣ်ထီၣ်က့ၤဝဲ တၢ်ဂ့ၢ်လၢအကဲထီၣ်အသးဒီးအီၤ ဒီးပှၤလၢအအိၣ်လၢ ဝ့ၢ်ဖံလံးပံၤအပူၤတဖၣ်အဂ့ၢ်န့ၣ်လီၤ. ဝ့ၢ်အါဖျၢၣ်လၢ စီၤပီလူးလဲၤဟးအိၣ်သကိးဝဲန့ၣ် အိၣ်ဒီးဘူၣ်ဘျီၣ်လီၤ. ဘၣ်ဆၣ် မ့မ့ၢ်လၢဝ့ၢ်ဖံလံးပံၤန့ၣ် ဘူၣ်ဘျီၣ်တအိၣ်ဘၣ်. လၢတၢ်န့ၣ်အဃိ ပှၤယူဒၤဖိတဖၣ် ဘၣ်လဲၤဘါတၢ်လၢ ထံကျိကပၤလၢ ဝ့ၢ်အချၢန့ၣ်လီၤ. (မၤတၢ် ၁၆:၁၃, ၁၄) ဘၣ်မနုၤအဃိ လၢဝ့ၢ်ဖံလံးပံၤအပူၤန့ၣ် ဘူၣ်ဘျီၣ်တအိၣ်ဘၣ်လဲၣ်. ဒ်သိးပှၤကသူၣ်ထီၣ် ဘူၣ်ဘျီၣ်အဂီၢ်လိၣ်ဘၣ်ဝဲ ပှၤယူဒၤဖိအပိာ်ခွါ အစှၤကတၢၢ်အဂၤတဆံလီၤ. ဘၣ်ဆၣ်ဝ့ၢ်အံၤ ဘူၣ်ဘျီၣ်တအိၣ်ဘၣ်န့ၣ် မ့ၢ်လၢပှၤယူဒၤဖိပိာ်ခွါအဂၤ ၁၀ တအိၣ်ဘၣ်အဃိဧါ. ဖဲန့ၣ်အဆၢကတီၢ် ပှၤအိၣ်လၢဝ့ၢ်ဖံလံးပံၤတဖၣ် အဝဲသ့ၣ်ပာ်ထီၣ်ထီအသးလၢ အကဲဘၣ် ရိမ့ၤအထံဖိကီၢ်ဖိအဃိလီၤ. (မၤတၢ် ၁၆:၂၁) ဘၣ်သ့ၣ်သ့ၣ် အဝဲသ့ၣ်ဆိကမိၣ်ဝဲလၢ စီၤပီလူးဒီးစီၤစံလၤ လၢအမ့ၢ်ပှၤယူဒၤဖိန့ၣ် တမ့ၢ်ရိမ့ၤအထံဖိကီၢ်ဖိဘၣ်. ဒ်လဲၣ်ဂ့ၤဒ်လဲၣ်ဂ့ၤ ပတသ့ၣ်ညါတၢ်ဂ့ၢ် လီၤတံၢ်လီၤဆဲးဘၣ်. ဘၣ်ဆၣ် ပသ့ၣ်ညါလီၤတံၢ်လီၤဆဲးလၢ ပှၤတကြၢးထၢနုာ် စီၤပီလူးဒီးစီၤစံလၤလၢ ဃိာ်ပူၤဘၣ်.
၃. ဖဲပှၤထၢနုာ် စီၤပီလူးလၢ ဃိာ်ပူၤအခါ အဝဲကဆိကမိၣ်ထီၣ်ဘၣ်ဝဲဒ်လဲၣ်. ဘၣ်ဆၣ်အဝဲအိၣ်ဒီး တၢ်ပာ်သူၣ်ပာ်သးဒ်လဲၣ်.
၃ ဘၣ်သ့ၣ်သ့ၣ် စီၤပီလူးကဆိကမိၣ်ထီၣ်ဝဲဘၣ်ဃး အဝဲဟဲတုၤလၢ ဝ့ၢ်ဖံလံးပံၤဒ်လဲၣ်အဂ့ၢ်န့ၣ်လီၤ. လၢအပူၤကွံာ် စှၤကိာ်လါန့ၣ် စီၤပီလူးအိၣ်ဝဲလၢ ပီၣ်လဲၣ်အ့ဒြံၤဝၢ်ဘးခီလၢ အၤစံန့ၣ်လီၤ. ဖဲအဝဲအိၣ်ဖဲန့ၣ်အခါ ယွၤအသးစီဆှံ တြီအီၤလၢ အဝဲတဘၣ်လဲၤ စံၣ်တဲၤတဲလီၤတၢ်လၢ တၢ်လီၢ်တဘျုးတီၤညါလီၤ. လီၤဂာ်လၢ ယွၤအသးစီဆှံ အဲၣ်ဒိးလၢ အဝဲကလဲၤလၢ တၢ်လီၢ်အဂၤ တတီၤတီၤလီၤ. (မၤတၢ် ၁၆:၆, ၇) ဘၣ်ဆၣ် အဝဲကဘၣ်လဲၤလၢ တၢ်လီၢ်ဖဲလဲၣ်. ဖဲစီၤပီလူးအိၣ်လၢ တြိၤအါအခါ အဝဲထံၣ်ဝဲတၢ်ထံၣ်လၢညါခီ ဒီးတၢ်ကလုၢ်စံးဘၣ်အီၤလၢ– “ဟဲခီဂာ်တၢ်ဆူ မၤက့းဒနံ” တက့ၢ်. အဝဲသ့ၣ်ညါဝဲ လီၤတံၢ်လီၤဆဲးလၢ ယဟိဝၤယွၤအဲၣ်ဒိးလၢ အဝဲကဘၣ်လဲၤလၢ တၢ်လီၢ်ဖဲလဲၣ်န့ၣ်လီၤ. လၢတၢ်န့ၣ်အဃိ စီၤပီလူးလဲၤဝဲလၢ မၤက့းဒနံတဘျီဃီလီၤ. (ဖး မၤတၢ် ၁၆:၈-၁၀ တက့ၢ်.) ဘၣ်ဆၣ် တၢ်ကဲထီၣ်အသးဒီးအီၤဒ်လဲၣ်. ဖဲအဝဲလဲၤတုၤလၢ မၤက့းဒနံ တယံာ်ဘၣ်ဒီး အဝဲလီၤဘၣ်လၢ ဃိာ်ပူၤလီၤ. ဘၣ်မနုၤအဃိ ယဟိဝၤယွၤ ဟ့ၣ်အခွဲးလၢ တၢ်ကကဲထီၣ်အသးဒီး အီၤဒ်အံၤလဲၣ်. ဒီးအဝဲကဘၣ်အိၣ်လၢ ဃိာ်ပူၤယံာ်ထဲလဲၣ်. စီၤပီလူးမ့ၢ်ဆိကမိၣ်ထီၣ်ဝဲ ဒ်အံၤဘၣ်ဆၣ် အတၢ်နာ်ဒီးအတၢ်သူၣ်ခုသးခုန့ၣ် တစှၤလီၤဝဲဘၣ်. စီၤပီလူးဒီးစီၤစံလၤ “ဘါထုကဖၣ်တၢ်, ဒီးသးဝံၣ်သးဆၢယွၤ” လီၤ. (မၤတၢ် ၁၆:၂၅) ယွၤအတၢ်ဃူတၢ်ဖိး မၤမုာ်ထီၣ်က့ၤအဝဲသ့ၣ်အသးလီၤ.
၄, ၅. (က) ပတၢ်အိၣ်သးန့ၣ် လီၤဂာ်လိာ်အသးဒီး စီၤပီလူးအတၢ်အိၣ်သးသ့လၢ ကျဲဒ်လဲၣ်. (ခ) လၢတၢ်တမုၢ်လၢ်အပူၤ စီၤပီလူးအတၢ်အိၣ်သး ဆီတလဲအသးဒ်လဲၣ်.
၄ မ့ၢ်နတူၢ်ဘၣ်ဒ် စီၤပီလူးအသိးတဘျီဘျီဧါ. ဘၣ်သ့ၣ်သ့ၣ်လၢ နတၢ်အိၣ်မူအပူၤန့ၣ် နဃ့တၢ်မၤစၢၤလၢ ကစၢ်ယွၤအအိၣ် ဒ်သိးကမၤစၢၤနၤလၢ နကမၤတၢ်ဆၢတဲာ်အဂီၢ် ဒီးနတူၢ်ဘၣ်လၢ နမၤပိာ်ထွဲဒ် သးစီဆှံဟံးစုနဲၣ်ကျဲနၤအသိးလီၤ. ဘၣ်ဆၣ်လၢခံ နထံၣ်ဘၣ်တၢ်ကီတၢ်ခဲအါမး မ့တမ့ၢ် နတၢ်အိၣ်မူတလဲၤအသး ဒ်နမုၢ်လၢ်အသိးဘၣ်. (စံၣ်တဲၤတဲလီၤတၢ် ၉:၁၁) ဖဲန့ၣ်အခါ နကဆိကမိၣ်ဘၣ်လၢ ဘၣ်မနုၤအဃိ ယဟိဝၤယွၤပျဲဝဲလၢ တၢ်သ့ၣ်တဖၣ်အံၤ ဟဲကဲထီၣ်အသးဒီးနၤလဲၣ်. ဒ်သိးနလဲၤခီဖျိ တၢ်ကီတၢ်ခဲကန့ၢ် ဒီးနကနာ်ယဟိဝၤယွၤ လၢနသးဒီဖျၢၣ်အဂီၢ် တၢ်မနုၤကမၤစၢၤနၤလဲၣ်. ပကထံၣ်ဘၣ် တၢ်သံကွၢ်အံၤ အတၢ်စံးဆၢလၢ စီၤပီလူးဒီး စီၤစံလၤအတၢ်လဲၤခီဖျိန့ၣ်လီၤ.
၅ ဖဲစီၤပီလူးဒီးစီၤစံလၤ စးထီၣ်သးဝံၣ်တၢ်အခါ တၢ်လၢအလီၤကမၢကမၣ် ဟဲကဲထီၣ်အသးအါမးလီၤ. တၢ်ကဲထီၣ်အသးအဆိကတၢၢ်တခါန့ၣ် ဟီၣ်ခိၣ်ဟူးဝဲဒိၣ်မးအဃိ ဃိာ်အတြဲၤအိးထီၣ်အသးလီၤ. တကးဒံးဘၣ် ပျံၤလၢပှၤစၢဃာ် ပှၤဃိာ်ဖိသ့ၣ်တဖၣ်န့ၣ် လီၤဃ့ၣ်ကွံာ်ဝဲခဲလၢာ်လီၤ. ဒီးလၢခံစီၤပီလူး လဲၤတြီဝဲပှၤခိးဃိာ်ဖိ ဒ်သိးအသုတမၤသံလီၤအသးတဂ့ၤအဂီၢ်န့ၣ်လီၤ. လၢခံပှၤခိးဃိာ်ဖိဒီး အဟံၣ်ဖိဃီဖိခဲလၢာ် ဒိးဘျၢအသးလၢထံလီၤ. ဒီးလၢခံတဂီၤန့ၣ် ပှၤဘၣ်မူဘၣ်ဒါတဖၣ် မၢပှၤလဲၤပျၢ်လီၤကွံာ် စီၤပီလူးဒီး စီၤစံလၤလၢဃိာ်ပူၤ ဒီးမၢအဝဲသ့ၣ်ဟးထီၣ်ကွံာ်လၢ ဝ့ၢ်ပူၤမုာ်မုာ်ခုၣ်ခုၣ်လီၤ. အဝဲသ့ၣ်သ့ၣ်ညါလီၤအသးလၢ အမၤကမၣ်ဘၣ်တၢ်ဖးဒိၣ် မ့ၢ်လၢစီၤပီလူးဒီး စီၤစံလၤန့ၣ် မ့ၢ်ဝဲရိမ့ၤအထံဖိကီၢ်ဖိအဃိလီၤ. လၢတၢ်န့ၣ်အဃိ အဝဲသ့ၣ်လဲၤထုးထီၣ်ကွံာ် စီၤပီလူးဒီးစီၤစံလၤ လၢဃိာ်ပူၤလီၤ. ဘၣ်ဆၣ်တချုးလၢ စီၤပီလူးဒီးစီၤစံလၤ ဟးထီၣ်လၢဝ့ၢ်ပူၤဒံးဘၣ်န့ၣ် အဝဲသ့ၣ်ဃ့ဝဲလၢ ကလဲၤထံၣ်လိာ်အသးဒီး နီၢ်လူၤဒံ လၢအကဲထီၣ်ခရံာ်ဖိသီသီန့ၣ်လီၤ. အဝဲသ့ၣ်ဟံးန့ၢ်ဝဲ တၢ်ခွဲးတၢ်ယာ်အံၤ ဒ်သိးကဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်လၢ ဖံလံးပံၤတဖၣ်န့ၣ်လီၤ. (မၤတၢ် ၁၆:၂၆-၄၀) စီၤပီလူးဒီးစီၤစံလၤ အတၢ်အိၣ်သးန့ၣ် ဆီတလဲအသးချ့ဒိၣ်မးလီၤ.
“ယွၤအတၢ်ဃူတၢ်ဖိး လၢအဒိၣ်န့ၢ်ယိာ်န့ၢ် ကယဲၢ်ပသ့ၣ်ညါနၢ်ပၢၢ်တၢ်”
၆. ပကတဲသကိး တၢ်ဂ့ၢ်မနုၤလဲၣ်.
၆ ပဟံးန့ၢ်တၢ်မၤလိလၢ တၢ်ကဲထီၣ်အသးလၢ ထးတဖၣ်အံၤ ကသ့ဒ်လဲၣ်. တၢ်လၢပတမုၢ်လၢ်ဒၣ်လဲာ် ယဟိဝၤယွၤမၤဝဲသ့အဃိ ဖဲပထံၣ်ဘၣ်တၢ်မၤကွၢ်အခါ တလိၣ်ပသူၣ်ကိၢ်သးဂီၤတၢ်ဘၣ်. တၢ်ကဲထီၣ်အသးတဖၣ်န့ၣ် ကဲထီၣ်တၢ်မၤစၢၤလၢ စီၤပီလူးအဂီၢ်ဒိၣ်မးလီၤ. ပသ့ၣ်ညါအီၤသ့ခီဖျိ ဖဲစီၤပီလူး ကွဲးန့ၢ်ဝဲလံာ်ပရၢလၢ ဒီပုၢ်ဝဲၢ်လၢအအိၣ်လၢ ဝ့ၢ်ဖံလံးပံၤတဖၣ် အအိၣ်အခါ အဝဲကွဲးဝဲတၢ်ဂ့ၢ်လၢဘၣ်ဃးဒီး တၢ်သူၣ်ကိၢ်သးဂီၤ ဒီးယွၤအတၢ်ဃူတၢ်ဖိးအဂ့ၢ်န့ၣ်လီၤ. လၢတၢ်မၤလိအံၤအပူၤ ပကတဲသကိး စီၤပီလူးအတၢ်ကတိၤလၢ ဖံလံးပံၤ ၄:၆, ၇ (ဖးတက့ၢ်.) အပူၤန့ၣ်လီၤ. ဝံၤဒီးပကတဲသကိး တၢ်ဂ့ၢ်တၢ်ကျိၤလၢ လံာ်စီဆှံပာ်ဖျါထီၣ်ဝဲ ဖဲယဟိဝၤယွၤမၤဝဲ တၢ်လၢအလီၤကမၢကမၣ်တဖၣ်လီၤ. ဒီးလၢခံကတၢၢ်န့ၣ် ပကတဲသကိးဘၣ်ဃး ဖဲပထံၣ်ဘၣ်တၢ်မၤကွၢ်အခါ ပမ့ၢ်နာ်ယဟိဝၤယွၤလၢ ပသးဒီဖျၢၣ်န့ၣ် “ယွၤအတၢ်ဃူတၢ်ဖိး” ကမၤစၢၤပှၤဒ်သိး ပလဲၤခီဖျိ တၢ်မၤကွၢ်တဖၣ်ကန့ၢ်အဂီၢ်လီၤ.
တၢ်လၢပတမုၢ်လၢ်ဒၣ်လဲာ် ယဟိဝၤယွၤမၤဝဲသ့အဃိ ဖဲပထံၣ်ဘၣ်တၢ်မၤကွၢ်အခါ တလိၣ်ပသူၣ်ကိၢ်သးဂီၤတၢ်ဘၣ်
၇. ဖဲစီၤပီလူးကွဲးလံာ်ပရၢလၢ ဒီပုၢ်ဝဲၢ်လၢအအိၣ်လၢ ဝ့ၢ်ဖံလံးပံၤတဖၣ်အအိၣ်အခါ အဝဲဟ့ၣ်ဂံၢ်ဟ့ၣ်ဘါဝဲလၢ ကမၤတၢ်မနုၤလဲၣ်. ဒီးပဟံးန့ၢ်တၢ်မၤလိ ကသ့ဒ်လဲၣ်.
၇ ဖဲဒီပုၢ်ဝဲၢ်လၢအအိၣ်လၢ ဝ့ၢ်ဖံလံးပံၤတဖၣ် ဖးဝဲစီၤပီလူးအလံာ်ပရၢအခါ အဝဲသ့ၣ်ကသ့ၣ်နီၣ်ထီၣ်တၢ်မနုၤလဲၣ်. အဝဲသ့ၣ်အါဂၤ ကသ့ၣ်နီၣ်ထီၣ်ဝဲ ယဟိဝၤယွၤမၤစၢၤ စီၤပီလူးဒီးစီၤစံလၤ လၢကျဲဒ်လဲၣ်န့ၣ်လီၤ. လၢလံာ်ပရၢအံၤအပူၤ စီၤပီလူးဟ့ၣ်ဂံၢ်ဟ့ၣ်ဘါ အဝဲသ့ၣ်လၢကမၤတၢ်မနုၤလဲၣ်. စီၤပီလူးဟ့ၣ်ဂံၢ်ဟ့ၣ်ဘါ အဝဲသ့ၣ်လၢ တလိၣ်ဘၣ်ယိၣ်တၢ်ဘၣ်, ကဘၣ်ဃ့ဘါထုကဖၣ်တၢ် ဒီးအဝဲသ့ၣ်ကဒိးန့ၢ်ဘၣ် “ယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ် ကယဲၢ်ပသ့ၣ်ညါနၢ်ပၢၢ်တၢ်” လီၤ. တၢ်ကတိၤအံၤ အဲၣ်ဒိးစံးဝဲတၢ်မနုၤလဲၣ်. ပှၤကွဲးကျိာ်ထံလံာ်စီဆှံတနီၤန့ၣ် ကွဲးကျိာ်ထံဝဲ တၢ်ကတိၤအံၤလၢ “ဒိၣ်န့ၢ်ယိာ်န့ၢ် ကယဲၢ်တၢ်လၢပမုၢ်လၢ်” မ့တမ့ၢ် “ဂ့ၤဒိၣ်န့ၢ်ဒံးပှၤဟီၣ်ခိၣ်ဖိ အတၢ်ရဲၣ်တၢ်ကျဲၤခဲလၢာ်လီၤ.” စီၤပီလူးအဲၣ်ဒိးတဲဝဲ ယွၤအတၢ်ဃူတၢ်ဖိး ကဲဘျုးဒိၣ်န့ၢ်ဒံးတၢ်လၢ ပမုၢ်လၢ်အီၤသ့ၣ်တဖၣ်န့ၣ်လီၤ. တဘျီတခီၣ် ပကဘၣ်မၤဘၣ်ဂီၢ်က့ၤ ပတၢ်ဂ့ၢ်ကီတဖၣ်ဒ်လဲၣ်န့ၣ် ပတသ့ၣ်ညါဘၣ်. မ့မ့ၢ်ယဟိဝၤယွၤန့ၣ် သ့ၣ်ညါဝဲလီၤ. ဒီးတၢ်လၢပတမုၢ်လၢ်ဘၣ်ဒၣ်လဲာ် အဝဲမၤဝဲသ့ခဲလၢာ်လီၤ.—ဖး ၂ ပ့းတရူး ၂:၉ တက့ၢ်.
၈, ၉. (က) စီၤပီလူးထံၣ်ဘၣ်ဝဲ တၢ်မၤအၢမၤနးလၢအတတီတလိၤ လၢဝ့ၢ်ဖံလံးပံၤအပူၤဘၣ်ဆၣ် လၢခံကဲဘျုးဝဲလၢကျဲဒ်လဲၣ်. (ခ) ဘၣ်မနုၤအဃိ ဒီပုၢ်ဝဲၢ်လၢ ဝ့ၢ်ဖံလံးပံၤတဖၣ် ပာ်လုၢ်ပာ်ပှ့ၤဝဲ စီၤပီလူးအတၢ်ကတိၤလဲၣ်.
၈ ဖဲဒီပုၢ်ဝဲၢ်လၢအအိၣ်လၢ ဝ့ၢ်ဖံလံးပံၤတဖၣ် ဖးဝဲစီၤပီလူးအလံာ်ပရၢအခါ အဝဲသ့ၣ်ကဆိကမိၣ်ထီၣ်ဝဲ တၢ်ဂ့ၢ်ဘၣ်ဃး ယဟိဝၤယွၤမၤစၢၤဝဲ စီၤပီလူးလၢအပူၤကွံာ် အနံၣ်တဆံအတီၢ်ပူၤလီၤ. ဒီးတၢ်ဂ့ၢ်သ့ၣ်တဖၣ်အံၤ ကကဲထီၣ်တၢ်ဂံၢ်တၢ်ဘါလၢ အဝဲသ့ၣ်အဂီၢ်ဒိၣ်မးလီၤ. အဒိ, ယဟိဝၤယွၤ ဟ့ၣ်အခွဲးလၢ စီၤပီလူးဒီးစီၤစံလၤ ကတူၢ်ဘၣ်တၢ်မၤအၢမၤနးလၢ အတတီတလိၤတဖၣ်လီၤ. ဘၣ်ဆၣ်ခီဖျိလၢ အဝဲသ့ၣ်တူၢ် တၢ်နးတၢ်ဖှီၣ်တဖၣ်အံၤအဃိ ဒိးန့ၢ်ဘၣ်တၢ်ခွဲးတၢ်ယာ်လၢ “ကတိၤပူၤဖျဲးတၢ်, ဒီးမၤဂၢၢ်မၤကျၢၤ တၢ်သးခုကစီၣ်” န့ၣ်လီၤ. (ဖံလံးပံၤ ၁:၇) လၢတၢ်န့ၣ်အဃိ ဝ့ၢ်ဖံလံးပံၤအပဒိၣ်တဖၣ် မၤအၢမၤနးဝဲ ခရံာ်ဖိတၢ်အိၣ်ဖှိၣ်လၢ အသူၣ်ထီၣ်အသးသီသီအံၤ တဘူၣ်လၢၤဘၣ်. ဘၣ်သ့ၣ်သ့ၣ် မ့ၢ်လၢစီၤပီလူး ပာ်ဖျါထီၣ်ဝဲလၢအမ့ၢ် ရိမ့ၤအထံဖိကီၢ်ဖိအဃိ လၢခံဖဲအဝဲသ့ၣ်တအိၣ်လၢၤလၢ ဝ့ၢ်ဖံလံးပံၤအခါဒၣ်လဲာ် စီၤလူၤကၣ်ဆဲးအိၣ်ဝဲဖဲန့ၣ်သ့လီၤ. ဒီးစီၤလူၤကၣ်မၤစၢၤဘၣ်ဝဲ ခရံာ်ဖိအသီလၢ ဝ့ၢ်ဖံလံးပံၤအပူၤန့ၣ်လီၤ.
၉ ဖဲဒီပုၢ်ဝဲၢ်လၢအအိၣ်လၢ ဝ့ၢ်ဖံလံးပံၤတဖၣ် ဖးဝဲစီၤပီလူးအလံာ်ပရၢအခါ အဝဲသ့ၣ်သ့ၣ်ညါဝဲလၢ တၢ်ကွဲးသ့ၣ်တဖၣ်အံၤ တမ့ၢ်ထဲစီၤပီလူးကွဲးလီၤဝဲ အနီၢ်ကစၢ်တၢ်ဆိကမိၣ်ဘၣ်. အဝဲကွဲးဝဲ အတၢ်လဲၤခီဖျိလၢ အတူၢ်ဘၣ်ဝဲတၢ်မၤအၢမၤနး နီၢ်နီၢ်အဂ့ၢ်န့ၣ်လီၤ. ဖဲအဝဲကွဲးန့ၢ် ဒီပုၢ်ဝဲၢ်တဖၣ်လံာ်ပရၢအခါ အဝဲအိၣ်လၢ ဝ့ၢ်ရိမ့ၤအဃိာ်ပူၤန့ၣ်လီၤ. ဘၣ်ဆၣ် အဝဲပာ်ဖျါထီၣ်လၢ အအိၣ်ဒီး “ယွၤအတၢ်ဃူတၢ်ဖိး” လီၤ.—ဖံလံးပံၤ ၁:၁၂-၁၄; ၄:၇, ၁၁, ၂၂.
“သုတဘၣ်ယိၣ်တၢ်နီတမံၤတဂ့ၤ”
၁၀, ၁၁. ဖဲပအိၣ်ဒီးတၢ်သူၣ်ကိၢ်သးဂီၤ တမံၤမံၤအခါ ပကဘၣ်မၤတၢ်မနုၤလဲၣ်, ဒီး ပကဘၣ်သ့ၣ်နီၣ်ထီၣ်တၢ်မနုၤလဲၣ်.
၁၀ ဒ်သိးပကအိၣ်ဒီး “ယွၤအတၢ်ဃူတၢ်ဖိး” ဒီးပ “သုတဘၣ်ယိၣ်တၢ်နီတမံၤတဂ့ၤ” အဂီၢ် တၢ်မနုၤကမၤစၢၤပှၤလဲၣ်. စီၤပီလူးအလံာ်ပရၢလၢ အကွဲးန့ၢ်ဝဲပှၤဖံလံးပံၤဖိတဖၣ်န့ၣ် ပာ်ဖျါထီၣ်န့ၢ်ပှၤလၢ ဖဲပသူၣ်ကိၢ်သးဂီၤတၢ်အခါ တၢ်လၢကမၤခုၣ်လီၤပသးန့ၣ် မ့ၢ်ဝဲတၢ်ဃ့ဘါထုကဖၣ်လီၤ. လၢတၢ်န့ၣ်အဃိ ဖဲပသူၣ်ကိၢ်သးဂီၤတၢ်အခါ ပကဘၣ်ပာ်ထီၣ် ပတၢ်ဘၣ်ယိၣ်ဘၣ်ဘှီတဖၣ်လၢ ယဟိဝၤယွၤအလိၤဒီး ဃ့ဘါထုကဖၣ်တၢ်လီၤ. (ဖး ၁ ပ့းတရူး ၅:၆, ၇ တက့ၢ်.) ဖဲနဃ့ဘါထုကဖၣ်တၢ်လၢ ယဟိဝၤယွၤအအိၣ်အခါ နာ်နီၢ်နီၢ်လၢ အဝဲသူၣ်အိၣ်သးအိၣ်နၤ သပှၢ်ကတၢၢ်န့ၣ်တက့ၢ်. ထီဘိန့ၣ် စံးဘျုးစံးဖှိၣ်ယဟိဝၤယွၤလၢ တၢ်ဆိၣ်ဂ့ၤလၢ နဒိးန့ၢ်ဘၣ်တဖၣ်တက့ၢ်. ဒီးယဟိဝၤယွၤမၤတၢ်သ့ “အါန့ၢ်ဒိၣ်န့ၢ်ကယဲၢ် ပဃ့တၢ်ဒီးဆိကမိၣ်တၢ်” န့ၣ်တဘၣ်သးပ့ၤနီၣ် နီတဘျီတဂ့ၤ.—အ့းဖ့းစူး ၃:၂၀.
၁၁ ဒ်စီၤပီလူးဒီး စီၤစံလၤအသိး တၢ်လၢယဟိဝၤယွၤ မၤစၢၤပှၤတဖၣ်န့ၣ် ကလီၤကမၢကမၣ်လၢ ပဂီၢ်ဒိၣ်မးလီၤ. ဘၣ်သ့ၣ်သ့ၣ် တၢ်လၢယဟိဝၤယွၤ မၤန့ၢ်ပှၤတဖၣ်န့ၣ် တမ့ၢ်ဒ်ပမုၢ်လၢ်အသိးဘၣ်. ဘၣ်ဆၣ် မ့ၢ်ဝဲတၢ်လၢပလိၣ်ဘၣ်တဖၣ်လီၤ. (၁ ကရံၣ်သူး ၁၀:၁၃) တၢ်အံၤအခီပညီတမ့ၢ်လၢ ပကဘၣ်ဆ့ၣ်နီၤအိၣ်ဃိကဒိဒီး အိၣ်ခိးလၢယဟိဝၤယွၤ ကမၤဘၣ်ဂီၢ်က့ၤ ပတၢ်ဂ့ၢ်ကီတဖၣ်န့ၣ်ဘၣ်. ပကဘၣ်မၤဒ် ပတၢ်ဃ့ဘါထုကဖၣ်အသိးလီၤ. (ရိမ့ၤ ၁၂:၁၁) ခီဖျိလၢပမၤဒ်န့ၣ်အဃိ ပပာ်ဖျါထီၣ်လၢ ပသးအိၣ်တၢ်လၢပဃ့အီၤနီၢ်ကီၢ် ဒီးပပျဲလၢအဝဲကဆိၣ်ဂ့ၤပှၤလီၤ. ထီဘိန့ၣ် ပကဘၣ်သ့ၣ်နီၣ်ထီၣ်လၢ ယဟိဝၤယွၤ မၤတၢ်သ့အါန့ၢ်ဒံး တၢ်လၢပဃ့ ဒီးပမုၢ်လၢ်တဖၣ်န့ၣ်လီၤ. တဘျီတခီၣ် အဝဲဟ့ၣ်ပှၤတၢ်အါန့ၢ်ဒံး တၢ်လၢပမုၢ်လၢ်တဖၣ်န့ၣ်လီၤ. ခဲအံၤပကတဲသကိး တၢ်ဂ့ၢ်တဖၣ်လၢ ကမၤစၢၤပှၤဒ်သိး ပကနာ်လၢယဟိဝၤယွၤအိၣ်ဒီး တၢ်သ့တၢ်ဘၣ်လၢ ကမၤစၢၤပှၤလၢ ကျဲလၢပတမုၢ်လၢ်ဘၣ်န့ၣ်လီၤ.
တၢ်အဒိအတဲာ်လၢ ယဟိဝၤယွၤမၤတၢ်လၢ တၢ်တမုၢ်လၢ်အပူၤ
၁၂. (က) ဖဲစီၤပၤစၤနဃ့ရံာ် ဟဲတဲပျံၤတဲဖုးဝဲ စီၤပၤဃံးစကံယၤအခါ စီၤဃံးစကံယၤမၤဝဲဒ်လဲၣ်. (ခ) ယဟိဝၤယွၤမၤဘၣ်ဂီၢ်က့ၤဝဲ တၢ်ကီတၢ်ခဲတဖၣ်အံၤန့ၣ် ကဲထီၣ်တၢ်ဂံၢ်တၢ်ဘါလၢပဂီၢ်ဒ်လဲၣ်.
၁၂ လၢလံာ်စီဆှံအပူၤန့ၣ် ပထံၣ်ဘၣ် တၢ်အဒိအတဲာ်အါမးလၢ အဘၣ်ဃးဒီး ယဟိဝၤမၤစၢၤဝဲ အခ့အပှၤတဖၣ်လၢ တၢ်တမုၢ်လၢ်အပူၤန့ၣ်လီၤ. အဒိ, ဖဲစီၤဃံးစကံယၤ ကဲဝဲယူဒၤအစီၤပၤအခါ အၤၡူၢ်အစီၤပၤ စၤနဃ့ရံာ် မၤနၢၤဝဲကီၢ်ယူဒၤအဝ့ၢ်ခဲလၢာ် ဒီးအိၣ်တ့ၢ်ထဲ ဝ့ၢ်ယရူၤၡလ့ၣ်တဖျၢၣ်ဧိၤလီၤ. (၂ စီၤပၤ ၁၈:၁-၃, ၁၃) ဒီးလၢခံ စၤနဃ့ရံာ် ဟဲဒုးဝဲဝ့ၢ်ယရူၤၡလ့ၣ်န့ၣ်လီၤ. စီၤပၤဃံးစကံယၤ မၤဝဲဒ်လဲၣ်. အဆိကတၢၢ်န့ၣ် အဝဲဃ့ဘါထုကဖၣ်လၢ ယဟိဝၤယွၤအအိၣ် ဒီးဃ့တၢ်ဟ့ၣ်ကူၣ်လၢ ယဟိဝၤယွၤအဝံ စီၤယၡါယၤအအိၣ်လီၤ. (၂ စီၤပၤ ၁၉:၅, ၁၅-၂၀) တကးဒံးဘၣ် ဟ့ၣ်ဝဲတၢ်ခိတၢ်သွဲလၢ စၤနဃ့ရံာ်ဃ့ဝဲအဃိ အဝဲပာ်ဖျါထီၣ်စ့ၢ်ကီးဝဲလၢ အတမ့ၢ်ပှၤလၢအခိၣ်ကိၤဘၣ်. (၂ စီၤပၤ ၁၈:၁၄, ၁၅) ဒီးတချုးလၢပှၤဟဲကဝီၤဃာ် ဝ့ၢ်ဒံးဘၣ်အခါ စီၤဃံးစကံယၤ အိၣ်ကတဲာ်ကတီၤပာ်အသးလီၤ. (၂ ကွဲးနီၣ်တၢ် ၃၂:၂-၄) လၢခံ တၢ်ကဲထီၣ်အသးဒ်လဲၣ်. ယဟိဝၤယွၤ ဆှၢလီၤဝဲ မူခိၣ်ကလူးတဂၤလၢ အမၤဟးဂီၤကွံာ်ဝဲ စၤနဃ့ရံာ်အသုးမုၢ်သံၣ်ဘိ ၁၈၅,၀၀၀ လၢတနၤဃီအတီၢ်ပူၤန့ၣ်လီၤ. စီၤပၤဃံးစကံယၤ တဆိၣ်ကမိၣ်ဘၣ်ဝဲလၢ ယဟိဝၤယွၤကမၤစၢၤအီၤလၢ ကျဲဒ်အံၤဘၣ်.—၂ စီၤပၤ ၁၉:၃၅.
ပဟံးန့ၢ်တၢ်မၤလိလၢ စီၤယိၤသး အတၢ်လဲၤခီဖျိကသ့ဒ်လဲၣ်.—၁ မိၤၡ့ ၄၁:၄၂ (ကွၢ်လံာ်အဆၢ ၁၃)
၁၃. (က) ပဟံးန့ၢ်တၢ်မၤလိလၢ စီၤယိၤသးအတၢ်လဲၤခီဖျိ ကသ့ဒ်လဲၣ်. (ခ) လၢတၢ်တမုၢ်လၢ်ဘၣ်အပူၤ တၢ်ကဲထီၣ်အသးဒီး နီၢ်စၤရါဒ်လဲၣ်.
၁၃ ပကကွၢ်သကိး တၢ်ကဲထီၣ်အသးဒီး စီၤယိၤသးဒ်လဲၣ်န့ၣ်လီၤ. ဖဲအဝဲအိၣ်လၢ ဃိာ်ပူၤအခါ အဝဲတဆိကမိၣ်ဘၣ်ဝဲလၢ အကကဲထီၣ်ဘၣ် ပှၤအဒိၣ်ကတၢၢ်ခံဂၤတဂၤလၢ ကီၢ်အဲၤကူပတူးအပူၤဘၣ်. တကးဒံးဘၣ် အဝဲတဆိကမိၣ်ဘၣ်ဝဲလၢ ယဟိဝၤယွၤကသူအီၤလၢ အကမၤပူၤဖျဲးအဟံၣ်ဖိဃီဖိလၢ တၢ်သၣ်ဝံၤလီၤဒိစ့ၢ်ကီးဘၣ်. (၁ မိၤၡ့ ၄၀:၁၅; ၄၁:၃၉- ၄၃; ၅၀:၂၀) တၢ်လၢယဟိဝၤယွၤ မၤဝဲတဖၣ်အံၤန့ၣ် တမ့ၢ်လၢစီၤယိၤသး ကမုၢ်လၢ်တ့ၢ်ဝဲနီတဘျီဘၣ်. တကးဒံးဘၣ် ဆိကမိၣ်ကွၢ်စီၤယိၤသးအဖံ နီၢ်စၤရါအဂ့ၢ်တက့ၢ်. အဝဲဒိးန့ၢ်ဘၣ်အဖိလၢ အကုၢ်ပိာ်မုၣ်အအိၣ် ဒီးအသးပှၢ်ထီၣ်လံအဃိ မ့ၢ်အဝဲမုၢ်လၢ်ဝဲလၢ အကအိၣ်ဖျဲၣ်ထီၣ်အနီၢ်ကစၢ်အဖိ စ့ၢ်ကီးဧါ. ဒီးခီဖျိလၢ နီၢ်စၤရါအိၣ်ဖျဲၣ်ထီၣ်အဖိ စီၤအံၤစဲးအဃိ ယဟိဝၤယွၤမၤစၢၤအီၤ အါန့ၢ်ဒံးတၢ်လၢအမုၢ်လၢ်ဝဲန့ၣ်လီၤ.—၁ မိၤၡ့ ၂၁:၁-၃, ၆, ၇.
၁၄. ပနာ်သ့လၢ ယဟိဝၤယွၤကဟ့ၣ်ပှၤတၢ်မနုၤလဲၣ်.
၁၄ တချုးလၢ ဟီၣ်ခိၣ်သီဟဲတုၤဒံးဘၣ်န့ၣ် ပတမုၢ်လၢ်လၢ ယဟိဝၤယွၤကမၤလီၤမၢ်ကွံာ် ပတၢ်ကီတၢ်ခဲခဲလၢာ်လၢ တၢ်လီၤလိၢ်လီၤလးအပူၤဘၣ်. ဒီးပတဃ့ယဟိဝၤယွၤလၢ ကမၤန့ၢ်ပှၤတၢ် လီၤဘီလီၤမုၢ်လၢ ပတၢ်အိၣ်မူအပူၤစ့ၢ်ကီးဘၣ်. ဘၣ်ဆၣ် ပသ့ၣ်ညါလၢ လၢညါန့ၣ်ယဟိဝၤယွၤ မၤစၢၤဝဲအခ့အပှၤလၢ အတီဒီးအီၤတဖၣ်လၢ တၢ်လီၤလိၢ်လီၤလးအပူၤလီၤ. ဒီးယဟိဝၤယွၤန့ၣ် တဆီတလဲနီတဘျီဘၣ်. (ဖး ယၡါယၤ ၄၃:၁၀-၁၃ တက့ၢ်.) လၢတၢ်န့ၣ်အဃိ ပနာ်န့ၢ်အီၤသ့ဝဲလီၤ. ပနာ်သ့နီၢ်နီၢ်လၢ ဒ်သိးပကမၤအတၢ်ဘၣ်သးအဂီၢ် အဝဲကဟ့ၣ်ပှၤ တၢ်ဂံၢ်တၢ်ဘါလၢ ပလိၣ်ဘၣ်သ့ၣ်တဖၣ်လီၤ. (၂ ကရံၣ်သူး ၄:၇-၉) ပဟံးန့ၢ်တၢ်မၤလိလၢ စီၤဃံးစကံယၤ, စီၤယိၤသး ဒီးနီၢ်စၤရါ အအိၣ်ကသ့ဒ်လဲၣ်. ပထံၣ်ဘၣ်တၢ်ကီတၢ်ခဲ မ့ၢ်ဒိၣ်ထဲလဲၣ်သနာ်က့ ပမ့ၢ်ဆဲးတီဒီး ယဟိဝၤယွၤန့ၣ် အဝဲကမၤစၢၤပှၤ သပှၢ်ကတၢၢ်လီၤ.
ပထံၣ်ဘၣ်တၢ်ကီတၢ်ခဲ မ့ၢ်ဒိၣ်ထဲလဲၣ်သနာ်က့ ပမ့ၢ်ဆဲးတီဒီး ယဟိဝၤယွၤန့ၣ် အဝဲကမၤစၢၤပှၤ သပှၢ်ကတၢၢ်လီၤ
၁၅. ဖဲပအိၣ်ဒီးတၢ်ကီတၢ်ခဲအခါ ဒ်သိးပအိၣ်ဒီး “ယွၤအတၢ်ဃူတၢ်ဖိး” ကသ့အဂီၢ် တၢ်မနုၤကမၤစၢၤပှၤလဲၣ်, ဒီးတၢ်သ့ၣ်တဖၣ်အံၤ ဟဲကဲထီၣ်အသးသ့လၢ ကျဲဒ်လဲၣ်.
၁၅ ပမ့ၢ်အိၣ်ဒီး တၢ်ကီတၢ်ခဲသနာ်က့ ပအိၣ်ဒီး “ယွၤအတၢ်ဃူတၢ်ဖိး” ကသ့ဒ်လဲၣ်. ပဘၣ်အိၣ်ဒီးတၢ်ရ့လိာ်သးဒီး ယဟိဝၤယွၤလၢအဂ့ၤန့ၣ်လီၤ. ပအိၣ်ဒီးတၢ်ရ့လိာ်သး ဒီးယဟိဝၤယွၤလၢ အဂ့ၤသ့ခီဖျိ ယ့ၣ်ၡူးအတၢ်ဟ့ၣ်လုၢ်ထီၣ်အသးအဃိန့ၣ်လီၤ. တၢ်ပှ့ၤက့ၤန့ၣ်မ့ၢ်ဝဲ တၢ်ဟ့ၣ်လၢ အလုၢ်ဒိၣ်ပှ့ၤဒိၣ်လၢ ယဟိဝၤယွၤအအိၣ်န့ၣ်လီၤ. မ့ၢ်လၢတၢ်ပှ့ၤက့ၤအဃိ အဝဲပျၢ်ကွံာ်ပတၢ်ကမၣ် ဒီးပအိၣ်ဒီး သးလၢအသ့ၣ်ညါဒၣ်တၢ်လၢအကဆှီ ဒီးပသုးဘူးပသးဆူ ယဟိဝၤယွၤအအိၣ်သ့ဝဲလီၤ.—ယိၤဟၣ် ၁၄:၆; ယၤကိာ် ၄:၈; ၁ ပ့းတရူး ၃:၂၁.
ယွၤအတၢ်ဃူတၢ်ဖိး ကပၢၤသုသူၣ်သုသးဒီး သုဆိကမိၣ်တၢ်
၁၆. ပမ့ၢ်အိၣ်ဒီး “ယွၤအတၢ်ဃူတၢ်ဖိး” န့ၣ် တၢ်ကမၤအသးဒီးပှၤဒ်လဲၣ်, ဟ့ၣ်တၢ်အဒိတက့ၢ်.
၁၆ ပမ့ၢ်ဒိးန့ၢ်ဘၣ် “ယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ် ကယဲၢ်ပသ့ၣ်ညါနၢ်ပၢၢ်တၢ်” န့ၣ် တၢ်ကမၤအသးဒီးပှၤဒ်လဲၣ်. လံာ်စီဆှံတဲဝဲလၢ ယွၤအတၢ်ဃူတၢ်ဖိးက “ပၢၤ” ပသးဒီး ပတၢ်ဆိကမိၣ်တဖၣ်လီၤ. (ဖံလံးပံၤ ၄:၇) တၢ်ကတိၤလၢအမ့ၢ် “ပၢၤ” န့ၣ်ပှၤသူဝဲလၢအဘၣ်ဃးဒီး သုးဖိတဖုလၢအကဘၣ်ပၢၤဝဲ ဝ့ၢ်အဂီၢ်န့ၣ်လီၤ. အဒိ, ပှၤသုးဖိတဖုန့ၣ် အဝဲသ့ၣ်ဘၣ်ဒီသဒၢဝဲ ဝ့ၢ်ဖံလံးပံၤ ဒ်သိးပှၤဝ့ၢ်ဖိတဖၣ် ကအိၣ်ဘၣ်ဘံၣ်ဘံၣ်ဘၢဘၢ ဒီးကမံၤဘၣ်မုာ်မုာ်ခုၣ်ခုၣ်အဂီၢ်န့ၣ်လီၤ. ဒ်န့ၣ်အသိး ပမ့ၢ်အိၣ်ဒီး “ယွၤအတၢ်ဃူတၢ်ဖိး” န့ၣ် တလိၣ်ပဘၣ်ယိၣ်တၢ်လၢၤဘၣ် ဒီးပအိၣ်မုာ်မုာ်ခုၣ်ခုၣ်သ့ဝဲလီၤ. ပသ့ၣ်ညါလၢ ယဟိဝၤယွၤအဲၣ်ပှၤဒီး အဲၣ်ဒိးဝဲလၢပကအိၣ်ဒီး တၢ်သူၣ်ဖှံသးညီလီၤ. (၁ ပ့းတရူး ၅:၁၀) ပသ့ၣ်ညါဘၣ်ဒ်အံၤအဃိ ဖဲပထံၣ်ဘၣ်တၢ်ဘၣ်ယိၣ်ဘၣ်ဘှီ ဒီးတၢ်သူၣ်ဟးဂီၤသးဟးဂီၤအခါ ကဲထီၣ်တၢ်မၤစၢၤလၢပဂီၢ်လီၤ.
၁၇. ဖဲတၢ်နးတၢ်ဖှီၣ်ဖးဒိၣ်အဆၢကတီၢ် ဒ်သိးပကသန့ၤပသးလၢ ယဟိဝၤယွၤအဂီၢ် တၢ်မနုၤကမၤစၢၤပှၤလဲၣ်.
၁၇ တယံာ်လၢၤဘၣ်န့ၣ် တၢ်နးတၢ်ဖှီၣ်ဖးဒိၣ် ကဘၣ်ပှၤဟီၣ်ခိၣ်ဖိတဖၣ်လီၤ. (မးသဲ ၂၄:၂၁, ၂၂) ပဝဲတဂၤစုာ်စုာ် တၢ်ကကဲထီၣ်အသးဒီးပှၤဒ်လဲၣ်န့ၣ် ပတသ့ၣ်ညါဘၣ်. ဘၣ်ဆၣ် ပတဘၣ်သူၣ်ကိၢ်သးဂီၤတၢ် အါတလၢဘၣ်. တၢ်လၢယဟိဝၤယွၤကမၤဝဲတဖၣ် ပတသ့ၣ်ညါခဲလၢာ်ဘၣ်. ဘၣ်ဆၣ် ပကစၢ်ယွၤ မ့ၢ်ယွၤဒ်လဲၣ်တဂၤလဲၣ်န့ၣ် ပသ့ၣ်ညါအီၤဂ့ၤဂ့ၤလီၤ. ပသ့ၣ်ညါတၢ်လၢအဝဲမၤန့ၢ်ဝဲ အခ့အပှၤလၢပျၢၤတဖၣ်အဃိ ဒ်လဲၣ်ဂ့ၤဒ်လဲၣ်ဂ့ၤ ယဟိဝၤယွၤအတၢ်အၢၣ်လီၤအီလီၤန့ၣ် ကဟဲလၢထီၣ်ပှဲၤထီၣ်ဝဲထီဘိလီၤ. ဒီးဘၣ်သ့ၣ်သ့ၣ် အဝဲကမၤဝဲလၢ ကျဲလၢပတမုၢ်လၢ်ဘၣ်န့ၣ်လီၤ. လၢတၢ်န့ၣ်အဃိ ဖဲယဟိဝၤယွၤ မၤန့ၢ်ပှၤတၢ်တဘျီလၢ်လၢ်အခါ မ့ၢ်ဒၣ်တၢ်ခွဲးတၢ်ယာ်လၢ ပကထံၣ်ဘၣ် “ယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ် ကယဲၢ်ပသ့ၣ်ညါနၢ်ပၢၢ်တၢ်” န့ၣ်လီၤ.
^ လံာ်အဆၢ. 1 လီၤဂာ်လၢ စီၤစံလၤစ့ၢ်ကီးမ့ၢ်ဝဲ ရိမ့ၤအထံဖိကီၢ်ဖိတဂၤလီၤ.—မၤတၢ် ၁၆:၃၇.
