သိးထီၣ်နီၢ်သီ ဒီးဘ့ၣ်လီၤကွံာ်အီၤလၢၤတဂ့ၤ
“ကူထီၣ်သိးထီၣ် သုနီၢ်သီ” တက့ၢ်. —အ့းဖ့းစူး ၄:၂၄.
၁, ၂. (က) ပအိၣ်ဒီးတၢ်ဂ့ၤတၢ်ဝါလၢ အဘၣ်ဃးဒီးနီၢ်သီသ့ဝဲန့ၣ် ပသ့ၣ်ညါဘၣ်ဒ်လဲၣ်. (ခ) လၢ ကလီးစဲ ၃:၁၀-၁၄ အပူၤန့ၣ် ပသ့ၣ်ညါဘၣ် တၢ်ဂ့ၤတၢ်ဝါတဖၣ်လၢ အဘၣ်ဃးဒီးနီၢ်သီန့ၣ် မ့ၢ်မနုၤလဲၣ်.
လၢလံာ်စီဆှံအပူၤန့ၣ် ပထံၣ်ဘၣ်တၢ်ကတိၤလၢအမ့ၢ် “နီၢ်အသီ” လီၤ. (အ့းဖ့းစူး ၄:၂၄, ခ့ခါစှီၤကျိာ်; ကလီးစဲ ၃:၁၀) တၢ်ကတိၤလၢ အမ့ၢ်နီၢ်သီန့ၣ် အဲၣ်ဒိးစံးဝဲ ပတၢ်ပာ်သူၣ်ပာ်သး “လၢအဘၣ်တၢ်တ့လီၤအီၤ လီၤဂာ်ဒီးကစၢ်ယွၤ” န့ၣ်လီၤ. ပကူထီၣ်သိးထီၣ်နီၢ်သီ ကသ့ဧါ. သ့ဝဲလီၤ. ယဟိဝၤယွၤတ့လီၤ ပှၤဟီၣ်ခိၣ်ဖိဒ် အက့ၢ်အဂီၤအသိးအဃိ ပကွၢ်လိမၤဒိး အတၢ်ဂ့ၤတၢ်ဝါတဖၣ်သ့ဝဲလီၤ.—၁ မိၤၡ့ ၁:၂၆, ၂၇; အ့းဖ့းစူး ၅:၁.
၂ ပမ့ၢ်ပှၤတလၢတပှဲၤဘၣ်အဃိ တဘျီတခီၣ် ပအိၣ်ဒီးတၢ်သူၣ်လီသးကွံလၢ အကမၣ်လီၤ. တကးဒံးဘၣ် ပှၤအါဂၤလၢပခိၣ်ပဃၢၤန့ၣ် အိၣ်ဒီးတၢ်သူၣ်လီသးကွံလၢ အကမၣ်တဖၣ်လီၤ. ဘၣ်ဆၣ် ယဟိဝၤယွၤလၢ အအိၣ်ဒီးတၢ်သးကညီၤန့ၣ် ကမၤစၢၤပှၤအဃိ ပကဲထီၣ်ပှၤဒ် အအဲၣ်ဒိးဝဲအသိးသ့လီၤ. ဒ်သိးပမၤဒ်န့ၣ်ကသ့အဂီၢ် ပကတဲသကိးတၢ်ဂ့ၤတၢ်ဝါတနီၤလၢ အဘၣ်ဃးဒီးပနီၢ်သီန့ၣ်လီၤ. (ဖး ကလီးစဲ ၃:၁၀-၁၄ တက့ၢ်.) ဒီးပကထံၣ်ဘၣ်လၢ ပပာ်ဖျါထီၣ် တၢ်ဂ့ၤတၢ်ဝါတဖၣ်အံၤလၢ တၢ်စံၣ်တဲၤတဲလီၤတၢ်မၤအပူၤ ကသ့ဒ်လဲၣ်န့ၣ်လီၤ.
“သုမ့ၢ်တၢ်တမံၤဃီခဲလၢာ်”
၃. တၢ်ဂ့ၤတၢ်ဝါလၢ အဘၣ်ဃးဒီး နီၢ်သီန့ၣ်မ့ၢ်မနုၤလဲၣ်.
၃ စီၤပီလူးပာ်ဖျါထီၣ်ဝဲလၢ ပှၤလၢအကူထီၣ်သိးထီၣ်နီၢ်သီန့ၣ် တကွၢ်ဒိၣ်ဆံးအါစှၤတၢ်ဘၣ်. အဝဲတဲဝဲလၢ– “ပှၤဟ့းလ့ၣ်ဖိဒီးပှၤယူဒၤဖိတအိၣ်, ပှၤဒိးတၢ်ကူးတရံး ဒီးပှၤတဒိးဘၣ်တၢ်ကူးတရံးတအိၣ်, ပှၤပှၢ်လၢ်ကျါဖိ, ပှၤစကူသ့ၤဖိ, ပှၤကုၢ်ဖိ, ပှၤသဘျ့ဖိတအိၣ်ဘၣ်.” * (ကွၢ်တၢ်ဂ့ၢ်အဘျဲၣ်တက့ၢ်.) ဒီပုၢ်ဝဲၢ်လၢတၢ်အိၣ်ဖှိၣ်ပူၤန့ၣ် အဝဲသ့ၣ်တကြၢးဆိကမိၣ်လၢ အဂ့ၤန့ၢ်ဒံးပှၤဂၤ ခီဖျိလၢအအိၣ်ဟဲတၢ်လီၢ်, ကလုာ်ဒူၣ်, အလီၢ်အလၤ ဒီးအပတီၢ်ထီအဃိဘၣ်. ဘၣ်မနုၤအဃိ ပတကြၢးဆိကမိၣ် ဒ်န့ၣ်လဲၣ်. မ့ၢ်လၢပဝဲခဲလၢာ် ပမ့ၢ်ခရံာ်အပျဲၢ်အဘီၣ်အဃိပ “မ့ၢ်တၢ်တမံၤဃီခဲလၢာ်” လီၤ.—ကလီးစဲ ၃:၁၁; ကလၤတံ ၃:၂၈.
ပမ့ၢ်ကူထီၣ်သိးထီၣ်နီၢ်သီန့ၣ် ပှၤလၢ အအိၣ်ဟဲလၢ တၢ်လီၢ်တတီၤဂ့ၤ တတီၤဂ့ၤ ပကရ့ဒီးအဝဲသ့ၣ်လၢ တၢ်ယူးယီၣ်ပာ်ကဲအပူၤလီၤ
၄. (က) ယဟိဝၤယွၤ အခ့အပှၤတဖၣ် ကဘၣ်ရ့ဒီးပှၤဂၤဒ်လဲၣ်. (ခ) တၢ်လၢကမၤဟးဂီၤ ခရံာ်ဖိတဖၣ်အတၢ်ဃူတၢ်ဖိးန့ၣ် မ့ၢ်မနုၤလဲၣ်, ဟ့ၣ်အဒိတက့ၢ်.
၄ ပမ့ၢ်ကူထီၣ်သိးထီၣ်နီၢ်သီန့ၣ် ပှၤလၢအအိၣ်ဟဲလၢ တၢ်လီၢ်တတီၤဂ့ၤတတီၤဂ့ၤ ပကရ့ဒီးအဝဲသ့ၣ်လၢ တၢ်ယူးယီၣ်ပာ်ကဲအပူၤလီၤ. (ရိမ့ၤ ၂:၁၁) တၢ်လီၢ်တနီၤနီၤန့ၣ် ပှၤကအိၣ်ဒီးတၢ်ပာ်သူၣ်ပာ်သး ဒ်အံၤအဂီၢ်တမ့ၢ်တၢ်လၢအညီဘၣ်. အဒိ, လၢညါကီၢ်အၤဖြံၤကၤ ကလံၤထံး အပူၤန့ၣ် ပဒိၣ်တဖၣ်ပာ်ပနီၣ်ဝဲတၢ်လီၢ်တဖၣ် ဒ်သိးကနီၤဖးဝဲ ကလုာ်ဒူၣ်အဆၢအဂီၢ်န့ၣ်လီၤ. ပှၤအါတက့ၢ်ဃုာ်ဒီး ယဟိဝၤယွၤပှၤအုၣ်အသးတဖၣ် အိၣ်ဒံးဝဲလၢ တၢ်လီၢ်လၢပှၤပာ်ပနီၣ်ဝဲတဖၣ်အံၤ တုၤလၢခဲအံၤလီၤ. ပှၤပၢဆှၢတၢ်ကမံးတံာ် အဲၣ်ဒိးဟ့ၣ်ဂံၢ်ဟ့ၣ်ဘါဝဲ ဒီပုၢ်ဝဲၢ်တဖၣ်လၢက “မၤလဲၢ်ထီၣ်” အသးလီၤ. လၢတၢ်န့ၣ်အဃိ ဖဲ ၂၀၁၃ လါအီးကထိဘၢၣ်န့ၣ် ပှၤပၢဆှၢတၢ်ကမံးတံာ် ကတဲာ်ကတီၤဝဲ တၢ်ရဲၣ်တၢ်ကျဲၤလီၤဆီတခါ ဒ်သိးဒီပုၢ်ဝဲၢ်လၢ အဖံးအလွဲၢ်တလီၤဂာ်လိာ်အသးတဖၣ် ကရ့လိာ်အသး ဒီးကသ့ၣ်ညါလိာ်အသး ဂ့ၤဂ့ၤအဂီၢ်လီၤ.—၂ ကရံၣ်သူး ၆:၁၃.
၅, ၆. (က) လၢထံကီၢ်တဘ့ၣ်အပူၤ ဒ်သိးဒီပုၢ်ဝဲၢ်လၢ ကလုာ်ဒူၣ်တဒ်သိးလိာ်အသးတဖၣ် ကရ့လိာ်အသးအဂီၢ် အဝဲသ့ၣ်ရဲၣ်ကျဲၤဝဲဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.) (ခ) အဝဲသ့ၣ်ဒိးန့ၢ်ဘၣ်ဝဲ အဘျုးဒ်လဲၣ်.
၅ တဘျီတခီၣ် ဒီပုၢ်ဝဲၢ်တဖၣ် ရဲၣ်လီၤကျဲၤလီၤဝဲလၢ မုၢ်ဃုနံၤ ဒီးအိၣ်ဘှံးနံၤန့ၣ် ယဟိဝၤပှၤအုၣ်အသးအတၢ်အိၣ်ဖှိၣ်လၢ အကတိၤကျိာ် မ့တမ့ၢ် အကလုာ်ဒူၣ်လီၤဆီလိာ်အသးခံဖု ကရ့လိာ်မုာ်လိာ်သကိးအသးန့ၣ်လီၤ. ဒီပုၢ်ဝဲၢ်လၢအအိၣ်လၢ တၢ်အိၣ်ဖှိၣ်ခံဖုလၢာ်န့ၣ် လဲၤစံၣ်တဲၤတဲလီၤတၢ်, ထီၣ်တၢ်အိၣ်ဖှိၣ်ရိဖှိၣ်ဒ်သိးသိး ဒီးလဲၤအိၣ်သကိးလိာ်အသးလၢ အဟံၣ်န့ၣ်လီၤ. တၢ်အိၣ်ဖှိၣ်လၢ အကယၤတဖၣ်န့ၣ် ဂုာ်ကျဲးစဲးမၤဝဲ ဒ်တၢ်ရဲၣ်တၢ်ကျဲၤအံၤအသိး ဒီးအဝဲသ့ၣ်အဝဲၤတြၢ်န့ၣ် ဒိးန့ၢ်ဘၣ်ဝဲတၢ်ကွဲးစံးဘျုးစံးဖှိၣ် လံာ်ပရၢအါမးလီၤ. မ့ၢ်လၢဒီပုၢ်ဝဲၢ်တဖၣ် မၤဝဲဒ်အံၤအဃိ ပှၤလၢအတမ့ၢ် ယဟိဝၤပှၤအုၣ်အသးဒၣ်လဲာ် ကမၢကမၣ်ဝဲဒိၣ်မးလီၤ. အဒိ, တၢ်ဘူၣ်တၢ်ဘါခိၣ်နၢ်တဂၤ တဲဝဲလၢ– “ယတမ့ၢ်ယဟိဝၤပှၤအုၣ်အသးဘၣ်ဆၣ် သုတၢ်စံၣ်တဲၤတဲလီၤတၢ် အတၢ်ရဲၣ်တၢ်ကျဲၤန့ၣ် ဂ့ၤဒိၣ်မး ဒီးသုကလုာ်ဒူၣ် တဒ်သိးလိာ်အသးဘၣ်ဆၣ် သုအိၣ်ဒီးတၢ်ဃူတၢ်ဖိးလီၤ.” ဘၣ်ဃးဒီးတၢ်ရဲၣ်တၢ်ကျဲၤအံၤန့ၣ် ဒီပုၢ်ဝဲၢ်တဖၣ် တူၢ်ဘၣ်ဝဲဒ်လဲၣ်.
၆ အဆိကတၢၢ် ဒီပုၢ်ဝဲၢ်မုၣ်တဂၤလၢ အမံၤမ့ၢ် နိမၤလၢအကတိၤ ဟိစၤအကျိာ်န့ၣ် ကကွဲမုာ်ဝဲဒီပုၢ်ဝဲၢ်ကီၤလၤဝါတဖၣ်လၢ အဟံၣ်ယိယိဖိအပူၤအဂီၢ် အဝဲဘၣ်ယိၣ်တၢ်လီၤ. ဘၣ်ဆၣ် အဝဲလဲၤစံၣ်တဲၤတဲလီၤတၢ်ဒီး ဒီပုၢ်ဝဲၢ်မုၣ်ကီၤလၤဝါတဂၤ ဒီးလဲၤဟးဝဲလၢအဟံၣ်ဝံၤအလီၢ်ခံ အဝဲတဘၣ်ယိၣ်တၢ်လၢၤဘၣ်. အဝဲတဲဝဲလၢ– “အဝဲသ့ၣ်မ့ၢ်ပှၤယိယိဖိ ဒ်သိးဒီးပှၤလီၤ.” လၢတၢ်န့ၣ်အဃိ ဖဲဒီပုၢ်ဝဲၢ်ကီၤလၤဝါတဖၣ် ဟဲစံၣ်တဲၤတဲလီၤတၢ် ဒီးဒီပုၢ်ဝဲၢ်လၢအကတိၤ ဟိစၤကျိာ်တဖၣ်အခါ ဒီပုၢ်ဝဲၢ်မုၣ် နိမၤကွဲမုာ် အဝဲသ့ၣ်တနီၤလၢ ကဟဲအီၣ်တၢ်အီတၢ်လၢအဟံၣ်လီၤ. အဝဲထံၣ်ဝဲလၢ ဒီပုၢ်ဝဲၢ်ကီၤလၤဝါတဂၤ မ့ၢ်တၢ်အိၣ်ဖှိၣ်သးပှၢ်ဘၣ်ဆၣ် ဆ့ၣ်နီၤဝဲလၢ ဖျးစတံးဖၣ်တဖျၢၣ်အဖီခိၣ်အဃိ အဝဲကမၢကမၣ်ဝဲဒိၣ်မးလီၤ. ခီဖျိလၢ တၢ်ရဲၣ်တၢ်ကျဲၤအံၤအဃိ ဒီပုၢ်ဝဲၢ်မုၣ်ဒီပုၢ်ဝဲၢ်ခွါလၢ ကလုာ်ဒူၣ်တဒ်သိးလိာ်အသးတဖၣ် ရ့လိာ်မုာ်လိာ်အသး ဒီးကဲထီၣ်ဝဲတံၤသကိးန့ၣ်လီၤ.
ကူထီၣ်သိးထီၣ် တၢ်သးကညီၤ ဒီးတၢ်အဲၣ်တၢ်ကွံတက့ၢ်
၇. ဘၣ်မနုၤအဃိ ပကဘၣ်ပာ်ဖျါထီၣ် တၢ်သးကညီၤထီဘိန့ၣ်လဲၣ်.
၇ တချုးလၢမုၣ်ကီၤလံၢ် အတၢ်ပၢတၢ်ပြး ဘၣ်တၢ်မၤဟးဂီၤအီၤဒံးဘၣ်န့ၣ် ယဟိဝၤယွၤအခ့အပှၤတဖၣ် ကထံၣ်ဘၣ်တၢ်ကီတၢ်ခဲလီၤ. ဘၣ်သ့ၣ်သ့ၣ် ခီဖျိလၢပတၢ်ဖံးတၢ်မၤတအိၣ်ဘၣ်, ပဆိးက့နးနးကလဲာ်, တၢ်မၤအၢမၤနး, န့ဆၢၣ်တၢ်ဘၣ်ဒိဘၣ်ထံး, ပတၢ်စုလီၢ်ခီၣ်ခိၣ်လီၤမၢ် မ့တမ့ၢ် လၢတၢ်ကီတၢ်ခဲအဂၤတဖၣ်အဃိ ပဝဲခဲလၢာ် ပကထံၣ်ဘၣ်တၢ်ကီတၢ်ခဲလီၤ. ဒ်သိးပကမၤစၢၤလိာ်သး တဂၤဒီးတဂၤအဂီၢ် ပကဘၣ်အိၣ်ဒီး တၢ်သူၣ်ကညီၤသးကညီၤလီၤ. တၢ်သူၣ်ကညီၤသးကညီၤန့ၣ် ကထိၣ်ဟူးထိၣ်ဂဲၤထီၣ်ပှၤလၢ ပကရ့ဒီးပှၤဂၤလၢ တၢ်အဲၣ်တၢ်ကွံလီၤ. (အ့းဖ့းစူး ၄:၃၂) ပှၤလၢအကူထီၣ်သိးထီၣ်နီၢ်သီန့ၣ် ကအိၣ်ဒီးတၢ်ဂ့ၤတၢ်ဝါတဖၣ်အံၤလီၤ. တၢ်ဂ့ၤတၢ်ဝါတဖၣ်အံၤ ကမၤစၢၤပှၤဒ်သိး ပကကွၢ်လိမၤဒိးကစၢ်ယွၤ ဒီးမၤမုာ်ထီၣ်က့ၤပှၤဂၤအဂီၢ်လီၤ.—၂ ကရံၣ်သူး ၁:၃, ၄.
၈. ပမ့ၢ်ပာ်ဖျါထီၣ် တၢ်သးကညီၤ ဒီးတၢ်အဲၣ်တၢ်ကွံလၢ တၢ်အိၣ်ဖှိၣ်အပူၤန့ၣ် ကကဲဘျုးဒ်လဲၣ်, ဟ့ၣ်တၢ်အဒိတက့ၢ်.
၈ ပပာ်ဖျါထီၣ် တၢ်အဲၣ်တၢ်ကွံလၢ ဒီပုၢ်ဝဲၢ်လၢအဟဲလၢထံဂၤကီၢ်ဂၤ မ့တမ့ၢ် ဒီပုၢ်ဝဲၢ်လၢအဖှီၣ်အယာ်လၢ အအိၣ်လၢပတၢ်အိၣ်ဖှိၣ်အပူၤတဖၣ်ကသ့ဒ်လဲၣ်. ပအဲၣ်ဒိးတူၢ်လိာ်မုာ်အဝဲသ့ၣ်, ရ့ဒီးအဝဲသ့ၣ် ဒီးမၤစၢၤအဝဲသ့ၣ် ဒ်သိးကသ့ၣ်ညါဝဲလၢ ပလိၣ်ဘၣ်အီၤလၢ တၢ်အိၣ်ဖှိၣ်ပူၤလီၤ. (၁ ကရံၣ်သူး ၁၂:၂၂, ၂၅) အဒိ, ဒါနၤခၤန့ၣ် အိၣ်လၢကီၢ်ဖံးလံးဖံ(စ်) ဒီးလဲၤသုးလီၢ်သုးကျဲလၢ ကီၢ်ယပၣ်န့ၣ်လီၤ. မ့ၢ်လၢအဝဲဟဲလၢထံကီၢ်အဂၤအဃိ လၢတၢ်မၤလီၢ်န့ၣ် ပှၤတရ့အီၤဒ်သိး ပှၤမၤတၢ်ဖိအဂၤတဖၣ်ဘၣ်. ဘၣ်ဆၣ် ဖဲဒါနၤခၤ လဲၤထီၣ်တၢ်အိၣ်ဖှိၣ်ရိဖှိၣ် ဒီးယဟိဝၤပှၤအုၣ်အသးတဖၣ်အခါ အဝဲတဲဝဲလၢ– “ပှၤဟဲထီၣ်တၢ်အိၣ်ဖှိၣ်ရိဖှိၣ် အါတက့ၢ်န့ၣ် မ့ၢ်ဝဲပှၤယပၣ်ဖိလီၤ. ဘၣ်ဆၣ် အဝဲသ့ၣ်တူၢ်လိာ်မုာ်ယၤ ဒ်ယတံၤသကိးလီၢ်လံၤတဖၣ်အသိးလီၤ.” ဒီပုၢ်ဝဲၢ်တဖၣ် အတၢ်အဲၣ်တၢ်ကွံန့ၣ် မၤစၢၤအီၤဒ်သိး အဝဲကသုးဘူးအသးဆူ ယဟိဝၤယွၤအအိၣ်လီၤ. လၢခံ ဒါနၤခၤ ဒိးဘျၢထံ ဒီးခဲအံၤကဲထီၣ် တၢ်အိၣ်ဖှိၣ်သးပှၢ်တဂၤလီၤ. တၢ်အိၣ်ဖှိၣ်သးပှၢ်တဖၣ်သးခုဝဲ မ့ၢ်လၢဒီပုၢ်ဝဲၢ်ဒါနၤခၤ ဒီးအမါ အိၣ်လၢအဝဲသ့ၣ် အတၢ်အိၣ်ဖှိၣ်အဃိလီၤ. ဒီးအဝဲသ့ၣ် တဲစ့ၢ်ကီးဝဲလၢ– “ဒီပုၢ်ဝဲၢ်ဒါနၤခၤ ဒီးအမါန့ၣ် မ့ၢ်ဝဲပှၤလဲၤလၢညါလၢ အအိၣ်မူယိယိဖိ ဒီးဃုဆိယွၤအဘီအမုၢ်န့ၣ်လီၤ.”—လူၤကၣ် ၁၂:၃၁.
၉, ၁၀. ဖဲပဟးစံၣ်တဲၤတဲလီၤတၢ်အခါ ပမ့ၢ်ပာ်ဖျါထီၣ် တၢ်သးကညီၤန့ၣ် ကကဲဘျုးဒ်လဲၣ်. ဟ့ၣ်အဒိတက့ၢ်.
၉ ဖဲပဟးစံၣ်တဲၤတဲလီၤ ဘီမုၢ်တၢ်သးခုကစီၣ်အခါ ပအိၣ်ဒီးတၢ်ခွဲးတၢ်ယာ်လၢ ပက “မၤဂ့ၤတၢ်လၢ ပှၤကညီကိးဂၤဒဲး” န့ၣ်လီၤ. (ကလၤတံ ၆:၁၀) ယဟိဝၤပှၤအုၣ်အသးတဖၣ် သးကညီၤဘၣ်ဝဲ ပှၤလၢအဟဲသုးလီၢ်သုးကျဲလၢ အဝဲသ့ၣ်အထံအကီၢ် ဒီးအဝဲသ့ၣ်အါဂၤမၤလိသ့အသးလၢ ပှၤသ့ၣ်တဖၣ်အံၤအကျိာ်လီၤ. (၁ ကရံၣ်သူး ၉:၂၃) ဒီးမ့ၢ်လၢအဝဲသ့ၣ် မၤဝဲဒ်န့ၣ်အဃိ ကဲဘျုးဒိၣ်မးလီၤ. အဒိ, ဒီပုၢ်ဝဲၢ်မုၣ်ထံဘၢၤနံၤန့ၣ် မ့ၢ်ပှၤလဲၤလၢညါတဂၤ ဒီးအဝဲအိၣ်လၢ ကီၢ်အီးစတြ့လံယါလီၤ. ဒ်သိးအဝဲလဲၤမၤစၢၤတၢ်လၢ စွါဟံလံၤတၢ်အိၣ်ဖှိၣ် လၢအအိၣ်လၢ ဝ့ၢ်ပြံၣ်စဘဲ ကသ့အဂီၢ် အဝဲမၤလိဝဲ စွါဟံလံၤအကျိာ်န့ၣ်လီၤ. အဝဲမၤလိဝဲကျိာ်အံၤ တညီလၢအဂီၢ်ဘၣ်ဆၣ် အတၢ်အိၣ်မူပှဲၤဒီး တၢ်သူၣ်ဖှံသးညီလီၤ. ထံဘၢၤနံၤ တဲဝဲလၢ– “နမ့ၢ်အဲၣ်ဒိး ဒိးန့ၢ်ဘၣ်တၢ်သူၣ်ခုသးခုလၢ နတၢ်စံၣ်တဲၤတဲလီၤတၢ်မၤအပူၤန့ၣ် လဲၤမၤစၢၤတၢ်လၢ တၢ်အိၣ်ဖှိၣ်လၢ ပှၤမၤလၢကျိာ်အဂၤတက့ၢ်. နမ့ၢ်မၤဒ်အံၤန့ၣ် နကအိၣ်ဘၣ်လၢ နတၢ်လီၢ်တၢ်ကျဲ ဒီးတလိၣ်နလဲၤသုးလီၢ်သုးကျဲလၢ ထံကီၢ်အဂၤဘၣ်. ဒီးနကထံၣ်ဘၣ်ဒီပုၢ်ဝဲၢ်တဖၣ် အိၣ်ဟဲလၢတၢ်လီၢ်အါတီၤ ဘၣ်ဆၣ်ပှဲၤဒီးတၢ်ဃူတၢ်ဖိးအဃိ နကကမၢကမၣ်လီၤ.”
တၢ်မနုၤထိၣ်ဟူးထိၣ်ဂဲၤထီၣ် ခရံာ်ဖိသ့ၣ်တဖၣ်လၢ ကမၤစၢၤပှၤတမှံၤလၢ အဟဲအိၣ်လၢ အဝဲသ့ၣ်အထံအကီၢ်န့ၣ်လဲၣ် (ကွၢ်လံာ်အဆၢ ၁၀)
၁၀ ဟံၣ်ဖိဃီဖိတဒူၣ်လၢ အအိၣ်လၢကီၢ်ယပၣ်န့ၣ် မၤဝဲဒ်န့ၣ်အသိးလီၤ. အဝဲသ့ၣ်အဖိမုၣ်ဖိလၢအမ့ၢ် စါခံခိၤ တဲဝဲလၢ– “လၢပတၢ်စံၣ်တဲၤတဲလီၤတၢ် ဟီၣ်ကဝီၤအပူၤန့ၣ် အါတက့ၢ်ပထံၣ်ဘၣ် ပှၤဘြၣ်စ့(လ်)ဖိလၢ အဟဲအိၣ်တမှံၤလၢ ပထံပကီၢ်န့ၣ်လီၤ. ဖဲပဖးပၠးအဝဲသ့ၣ် လံာ်စီဆှံအဆၢဒ်သိးဒီး လီၣ်ဖျါ ၂၁:၃, ၄ မ့တမ့ၢ် စံးထီၣ်ပတြၢၤ ၃၇:၁၀, ၁၁, ၂၉ လၢ ဖီၣ်တူၢ်ကံးကျိာ်အခါ အဝဲသ့ၣ် ဒိကနၣ်ဝဲဂ့ၤဂ့ၤ ဒီးတဘျီတခီၣ်အမဲာ်ထံလီၤဝဲလီၤ.” အဝဲသ့ၣ်အဟံၣ်ဖိဃီဖိခဲလၢာ် မၤလိဝဲဖီၣ်တူၢ်ကံးအကျိာ် ဒ်သိးကမၤစၢၤဝဲ ပှၤလၢအဟဲအိၣ်တမှံၤတဖၣ်လၢ ကသ့ၣ်ညါထီၣ် တၢ်မ့ၢ်တၢ်တီအဂီၢ်လီၤ. လၢခံအဝဲသ့ၣ်မၤစၢၤဝဲ ဒ်သိးဖီၣ်တူၢ်ကံး တၢ်အိၣ်ဖှိၣ်ကအိၣ်ထီၣ်အဂီၢ်လီၤ. ဒီးဖဲန့ၣ်အဝဲသ့ၣ်မၤစၢၤဘၣ်ဝဲ ပှၤအါဂၤလၢအကတိၤ ဖီၣ်တူၢ်ကံးအကျိာ် ဒ်သိးကကဲထီၣ် ယဟိဝၤယွၤအခ့အပှၤန့ၣ်လီၤ. စါခံခိၤတဲဝဲလၢ– “ပကမၤလိ ဖီၣ်တူၢ်ကံးအကျိာ်အဂီၢ် ပဘၣ်ထဲးဂံၢ်ထဲးဘါသပှၢ်ကတၢၢ်လီၤ. ဘၣ်ဆၣ် ပဒိးန့ၢ်ဘၣ်တၢ်ဆိၣ်ဂ့ၤအါမးလီၤ. လၢတၢ်န့ၣ်အဃိ ပစံးဘျုးဘၣ် ယဟိဝၤယွၤဒိၣ်မးလီၤ.”—ဖး မၤတၢ် ၁၀:၃၄, ၃၅ တက့ၢ်.
ကူထီၣ်သိးထီၣ် တၢ်ဆီၣ်လီၤသးတက့ၢ်
၁၁, ၁၂. (က) ဘၣ်မနုၤအဃိ ပအဲၣ်ဒိးကူထီၣ်သိးထီၣ်နီၢ်သီလဲၣ်. (ခ) ဒ်သိးပကအိၣ်ဒီး တၢ်ဆီၣ်လီၤသးအဂီၢ် တၢ်မနုၤကမၤစၢၤပှၤလဲၣ်.
၁၁ ဘၣ်မနုၤအဃိ ပအဲၣ်ဒိးကူထီၣ်သိးထီၣ်နီၢ်သီလဲၣ်. တမ့ၢ်လၢပအဲၣ်ဒိးလၢပှၤဂၤ ကစံးပတြၢၤပှၤအဃိဘၣ် မ့ၢ်ဒၣ်ပအဲၣ်ဒိးမၤလၤကပီၤ ယဟိဝၤယွၤအဃိလီၤ. သ့ၣ်နီၣ်ထီၣ်လၢ မူခိၣ်ကလူးလၢအလၢအပှဲၤတဂၤဒၣ်လဲာ် လၢခံအဝဲအိၣ်ဒီးတၢ်ပာ်ထီၣ်ထီသးအဃိ အဝဲမၤဘၣ်တၢ်ကမၣ်လီၤ. (ထိၣ်သတြီၤဒီး ယဃ့းစက့လး ၂၈:၁၇) ပဝဲသ့ၣ်တဖၣ် ပတလၢတပှဲၤအဃိ ပကဟးဆှဲးတၢ်ပာ်ထီၣ်ထီသးအဂီၢ် တညီဝဲဘၣ်. ဘၣ်ဆၣ် ပကူထီၣ်သိးထီၣ် တၢ်ဆီၣ်လီၤသး သ့ဝဲလီၤ. ဒ်သိးပကူထီၣ်သိးထီၣ် တၢ်ဆီၣ်လီၤသးကသ့အဂီၢ် တၢ်မနုၤကမၤစၢၤပှၤလဲၣ်.
၁၂ ဒ်သိးပကအိၣ်ဒီး တၢ်ဆီၣ်လီၤသးအဂီၢ် ပကဘၣ်ဖးလံာ်စီဆှံ ကိးနံၤဒဲး ဒီးဆိကမိၣ်ထံတၢ်လၢပဖးတဖၣ်လီၤ. (၅ မိၤၡ့ ၁၇:၁၈-၂၀) လီၤဆီဒၣ်တၢ် ပကဘၣ်ဆိကမိၣ်ထံ တၢ်လၢယ့ၣ်ၡူးသိၣ်လိပှၤတဖၣ် ဒီးတၢ်အဒိအတဲာ်လၢ အဝဲပာ်ဖျါထီၣ်ဝဲလၢ အဘၣ်ဃးဒီးတၢ်ဆီၣ်လီၤသးန့ၣ်လီၤ. (မးသဲ ၂၀:၂၈) ယ့ၣ်ၡူးအိၣ်ဒီး တၢ်ဆီၣ်လီၤသးဒိၣ်မးအဃိ အဝဲသ့န့ၢ် အပျဲၢ်အဘီၣ်တဖၣ်အခီၣ်လီၤ. (ယိၤဟၣ် ၁၃:၁၂-၁၇) ဒီးအဂၤတမံၤန့ၣ် ဒ်သိးပကအိၣ်ဒီး တၢ်ဆီၣ်လီၤသးအဂီၢ် ပကဘၣ်ဃ့ယွၤအသးစီဆှံ အတၢ်မၤစၢၤလီၤ. ယွၤအသးစီဆှံန့ၣ် ကမၤစၢၤပှၤဒ်သိး ပကမၤနၢၤကွံာ် ကယဲၢ်ပတၢ်ပာ်သူၣ်ပာ်သးလၢအတဂ့ၤ လၢအဒုးအိၣ်ထီၣ် တၢ်ပာ်ထီၣ်ထီသးန့ၣ်လီၤ.—ကလၤတံ ၆:၃, ၄; ဖံလံးပံၤ ၂:၃.
ပမ့ၢ်အိၣ်ဒီးတၢ်ဆီၣ်လီၤသးန့ၣ် ပကဒိးန့ၢ်ဘၣ် တၢ်ဆိၣ်ဂ့ၤအါမး တကးဒံးဘၣ် တၢ်အိၣ်ဖှိၣ်ကအိၣ်ဒီး တၢ်မုာ်တၢ်ခုၣ် ဒီးတၢ်ဃူတၢ်ဖိးလီၤ
၁၃. ပမ့ၢ်အိၣ်ဒီးတၢ်ဆီၣ်လီၤသးန့ၣ် ပကဒိးန့ၢ်ဘၣ် တၢ်မနုၤလဲၣ်.
၁၃ ဖး ကတိၤဒိ ၂၂:၄ တက့ၢ်. ယဟိဝၤယွၤအဲၣ်ဒိးဝဲလၢ ပကအိၣ်ဒီးတၢ်ဆီၣ်လီၤသးလီၤ. ပမ့ၢ်အိၣ်ဒီးတၢ်ဆီၣ်လီၤသးန့ၣ် ပကဒိးန့ၢ်ဘၣ် တၢ်ဆိၣ်ဂ့ၤအါမး တကးဒံးဘၣ် တၢ်အိၣ်ဖှိၣ်ကအိၣ်ဒီး တၢ်မုာ်တၢ်ခုၣ် ဒီးတၢ်ဃူတၢ်ဖိးလီၤ. ဒီးယဟိဝၤယွၤစ့ၢ်ကီး ကအဲၣ်ပှၤဒိၣ်မးလီၤ. တၢ်မၢဖိပ့းတရူး တဲဝဲလၢ– “ပာ်လိာ်သုသးလၢ သုဖီလာ်သကိးသကိး, ဒီးကူထီၣ်သိးထီၣ် တၢ်ဆီၣ်လီၤပသးတက့ၢ်. အဂ့ၢ်ဒ်အံၤ, ယွၤတြီဃာ်ပှၤပာ်ထီၣ်ထီအသး, ဒီးဟ့ၣ်လီၤတၢ်ဘျုးတၢ်ဖှိၣ်လၢ ပှၤဆီၣ်လီၤအသးလီၤ.”—၁ ပ့းတရူး ၅:၅.
ကူထီၣ်သိးထီၣ် တၢ်ဆီၣ်လီၤသး ဒီးတၢ်သးစူၤတက့ၢ်
၁၄. ဘၣ်ဃးဒီး တၢ်ဆီၣ်လီၤသး ဒီးတၢ်သးစူၤန့ၣ် မတၤမ့ၢ်ပှၤလၢအဒိဂ့ၤတဲာ်ဘၣ် အဂ့ၤကတၢၢ်လဲၣ်.
၁၄ မုၢ်မဆါတနံၤအံၤ ပှၤတဂၤမ့ၢ်အိၣ်ဒီးတၢ်ဆီၣ်လီၤသး ဒီးတၢ်သးစူၤန့ၣ် ပှၤဆိကမိၣ်ဆံးအီၤလီၤ. ဘၣ်ဆၣ် ပှၤမ့ၢ်ဆိကမိၣ်ဒ်အံၤန့ၣ် တဘၣ်ဘၣ်. မ့ၢ်လၢတၢ်ဂ့ၤတၢ်ဝါတခါအံၤ ဟဲလၢယဟိဝၤယွၤ လၢအမ့ၢ်သ့တၢ်လၢာ်ကစၢ် အအိၣ်အဃိလီၤ. ဘၣ်ဃးဒီး တၢ်ဆီၣ်လီၤသး ဒီးတၢ်သးစူၤန့ၣ် ယဟိဝၤယွၤ မ့ၢ်ပှၤလၢအဒိဂ့ၤတဲာ်ဘၣ် အဂ့ၤကတၢၢ်လီၤ. (၂ ပ့းတရူး ၃:၉) အဒိ, ဆိကမိၣ်ကွၢ် ယဟိဝၤယွၤ အိၣ်ဒီးတၢ်သးစူၤ ဖဲအစံးဆၢ စီၤအၤဘြၤဟၣ်ဒီး စီၤလိာ် ခီဖျိဆှၢလီၤဝဲ မူခိၣ်ကလူးန့ၣ်တက့ၢ်. (၁ မိၤၡ့ ၁၈:၂၂-၃၃; ၁၉:၁၈-၂၁) တကးဒံးဘၣ် ပှၤအံၣ်စရ့လးဖိတဖၣ် တဒိကနၣ်အကလုၢ်သနာ်က့ ယဟိဝၤယွၤ ဝံသးစူၤအဝဲသ့ၣ် အနံၣ် ၁,၅၀၀ ဘျဲၣ်ညါလီၤ.—ယဃ့းစက့လး ၃၃:၁၁.
၁၅. ယ့ၣ်ၡူးပာ်ဖျါထီၣ် တၢ်ဆီၣ်လီၤသး ဒီးတၢ်သးစူၤဒ်လဲၣ်.
၁၅ ယ့ၣ်ၡူးန့ၣ် မ့ၢ်ပှၤလၢအ “သးစူၤ” တဂၤလီၤ. (မးသဲ ၁၁:၂၉) အပျဲၢ်အဘီၣ်တဖၣ် အိၣ်ဒီးတၢ်ဂံၢ်စၢ်ဘါစၢ်သနာ်က့ ယ့ၣ်ၡူးဝံသးစူၤအဝဲသ့ၣ်လီၤ. ဖဲယ့ၣ်ၡူး ဟးစံၣ်တဲၤတဲလီၤတၢ်အခါ ပှၤတဲဆါအီၤ ဒီးဒုၣ်ဒွဲၣ်စံးအၢအီၤလီၤ. ဘၣ်ဆၣ် အဝဲအိၣ်ဒီးတၢ်ဆီၣ်လီၤသး ဒီးတၢ်သးစူၤတုၤအသံတစုလီၤ. ဖဲပှၤပျၤထီၣ်အီၤလၢ သ့ၣ်တၢၣ်လိၤအခါ ယ့ၣ်ၡူးကတူၢ်ဘၣ် တၢ်ဆါနးနးကလဲာ် ဘၣ်ဆၣ်အဝဲဃ့ဝဲလၢ အပၢ်ကပျၢ်ကွံာ်ပှၤလၢ အမၤသံအီၤတဖၣ် အတၢ်ကမၣ်လီၤ. အဝဲစံးဝဲလၢ– “မ့ၢ်အမၤဝဲဒ်လဲၣ်ဒ်လဲၣ်န့ၣ်, တသ့ၣ်ညါဘၣ်.” (လူၤကၣ် ၂၃:၃၄) ယ့ၣ်ၡူးအိၣ်ဒီးတၢ်သူၣ်ကိၢ်သးဂီၤ ဒီးတူၢ်ဘၣ်တၢ်ဆါ နးနးကလဲာ်သနာ်က့ အဝဲဆဲးအိၣ်ဒီး တၢ်ဆီၣ်လီၤသး ဒီးတၢ်သးစူၤလီၤ.—ဖး ၁ ပ့းတရူး ၂:၂၁-၂၃ တက့ၢ်.
၁၆. ပပာ်ဖျါထီၣ် တၢ်ဆီၣ်လီၤသး ဒီးတၢ်သးစူၤကသ့လၢ ကျဲဒ်လဲၣ်.
၁၆ ပပာ်ဖျါထီၣ် တၢ်ဆီၣ်လီၤသး ဒီးတၢ်သးစူၤကသ့လၢ ကျဲဒ်လဲၣ်. စီၤပီလူး ဟ့ၣ်သဆၣ်ထီၣ်ပှၤလၢ– “ဝံသးစူၤလိာ်သုသး, သူၣ်ကညီၤသးကညီၤလိာ်သုသး, ပျၢ်လိာ်သုတၢ်, ဒ်ယွၤအိၣ်လၢ ခရံာ်အပူၤပျၢ်သုတၢ်အသိးန့ၣ်တက့ၢ်.” (အ့းဖ့းစူး ၄:၃၂) ဒ်သိးပပျၢ်ပှၤဂၤအတၢ်ကမၣ် ကညီအဂီၢ် ပလိၣ်ဘၣ်တၢ်ဆီၣ်လီၤသး ဒီးတၢ်သးစူၤလီၤ. ပမ့ၢ်မၤဒ်န့ၣ်န့ၣ် ပတၢ်အိၣ်ဖှိၣ်ကအိၣ်ဒီး တၢ်ဃူတၢ်ဖိးလီၤ.
၁၇. တၢ်ဆီၣ်လီၤသး ဒီးတၢ်သးစူၤန့ၣ် ဘၣ်မနုၤအဃိ မ့ၢ်တၢ်လၢ အရ့ဒိၣ်လဲၣ်.
၁၇ ယဟိဝၤယွၤ အဲၣ်ဒိးလၢပကအိၣ်ဒီး တၢ်ဆီၣ်လီၤသး ဒီးတၢ်သးစူၤ လၢပှၤဂၤအဖီခိၣ်လီၤ. ပမ့ၢ်အဲၣ်ဒိးအိၣ်လၢ ဟီၣ်ခိၣ်သီအပူၤန့ၣ် ပလိၣ်ဘၣ်တၢ်ဂ့ၤတၢ်ဝါတဖၣ်အံၤလီၤ. (မးသဲ ၅:၅; ယၤကိာ် ၁:၂၁) ပမ့ၢ်အိၣ်ဒီး တၢ်ဆီၣ်လီၤသး ဒီးတၢ်သးစူၤန့ၣ် မ့ၢ်ဒၣ်ပမၤလၤကပီၤ ယဟိဝၤယွၤ ဒီးမၤစၢၤစ့ၢ်ကီး ပှၤဂၤလၢကမၤလၤကပီၤယွၤအဂီၢ်လီၤ.—ကလၤတံ ၆:၁; ၂ တံၤမသ့း ၂:၂၄, ၂၅.
ကူထီၣ်သိးထီၣ် တၢ်အဲၣ်တၢ်ကွံတက့ၢ်
၁၈. တၢ်အဲၣ်တၢ်ကွံ ဒီးတၢ်တကွၢ်ဒိၣ်ဆံးအါစှၤတၢ်န့ၣ် ဘၣ်ထွဲလိာ်သးဒ်လဲၣ်.
၁၈ တၢ်ဂ့ၤတၢ်ဝါလၢ ပတဲသကိးတ့ၢ်အီၤတဖၣ်န့ၣ် ဘၣ်ထွဲလိာ်အသးဒီး တၢ်အဲၣ်တၢ်ကွံလီၤ. အဒိ, ခရံာ်အပျဲၢ်စီၤယၤကိာ် ဘၣ်သိၣ်ဝဲဒီပုၢ်ဝဲၢ်တဖၣ် မ့ၢ်လၢအဝဲသ့ၣ် ကွၢ်ဒိၣ်ဆံးအါစှၤတၢ်အဃိလီၤ. အဝဲတဲနၢ်ပၢၢ်ဝဲလၢ တၢ်ကွၢ်ဒိၣ်ဆံးအါစှၤတၢ်န့ၣ် ထီဒါလိာ်အသးဒီး ယွၤအတၢ်သိၣ်တၢ်သီလၢအမ့ၢ် “အဲၣ်ပှၤလၢနဃၢၤ ဒ်နအဲၣ်လီၤနသးအသိးတက့ၢ်.” ဒီးအဝဲတဲကဒီးဝဲလၢ– “မ့မ့ၢ်သုမ့ၢ်ကွၢ်မဲာ်ပှၤကညီဒီး, သုမၤတၢ်ဒဲးဘး, ဒီးဘၣ်တၢ်သိၣ်ဃီၣ်လၢ တၢ်သိၣ်တၢ်သီ, ဒ်ပှၤမၤကမၣ်ဖိအသိးလီၤ.” (ယၤကိာ် ၂:၈, ၉) ပမ့ၢ်အဲၣ်ပှၤဂၤနီၢ်နီၢ်န့ၣ် ပတကွၢ်ဒိၣ်ဆံးအါစှၤ ပှၤဂၤခီဖျိလၢ အဝဲသ့ၣ်အတၢ်ကူၣ်ဘၣ်ကူၣ်သ့, ကလုာ်ဒူၣ် ဒီးအလီၢ်အလၤအဃိဘၣ်. ပတဘၣ်ပာ်မၤပသးဒ်သိး ပတကွၢ်ဒိၣ်ဆံးအါစှၤတၢ်န့ၣ်ဘၣ်. ပတၢ်အဲၣ်ပှၤဂၤန့ၣ် ကဘၣ်မ့ၢ်တၢ်အိၣ်လၢပသးပူၤနီၢ်နီၢ်လီၤ.
၁၉. ပကဘၣ်ကူထီၣ်သိးထီၣ် တၢ်အဲၣ်တၢ်ကွံန့ၣ် ဘၣ်မနုၤအဃိ မ့ၢ်တၢ်လၢအရ့ဒိၣ်လဲၣ်.
၁၉ တၢ်အဲၣ်တၢ်ကွံန့ၣ် “ဝံသးစူၤတၢ်ဃဲးဃဲး” ဒီး “တပာ်ထီၣ်ထီအသးဘၣ်.” (၁ ကရံၣ်သူး ၁၃:၄) လၢတၢ်န့ၣ်အဃိ ဒ်သိးပဆဲးစံၣ်တဲၤတဲလီၤ တၢ်သးခုကစီၣ်လၢပှၤဂၤအအိၣ် ကသ့အဂီၢ် ပလိၣ်ဘၣ် တၢ်သးစူၤ, တၢ်အဲၣ်တၢ်ကွံ ဒီးတၢ်ဆီၣ်လီၤသးလီၤ. (မးသဲ ၂၈:၁၉) တကးဒံးဘၣ် တၢ်ဂ့ၤတၢ်ဝါတဖၣ်အံၤ ကမၤစၢၤပှၤဒ်သိး ပကအိၣ်ဃူလိာ်ဖိးလိာ်သးဒီး ပဒီပုၢ်ဝဲၢ်လၢ တၢ်အိၣ်ဖှိၣ်ပူၤခဲလၢာ်လီၤ. ပဝဲခဲလၢာ်ပမ့ၢ်အိၣ်ဒီး တၢ်အဲၣ်တၢ်ကွံန့ၣ် တၢ်အိၣ်ဖှိၣ်ကအိၣ်ဒီးတၢ်ဃူတၢ်ဖိး ဒီးကကဲထီၣ်တၢ်မၤလၤကပီၤ ယဟိဝၤယွၤလီၤ. ပှၤအဂၤတဖၣ် မ့ၢ်ထံၣ်ဝဲလၢ ပအိၣ်ဒီးတၢ်ဃူတၢ်ဖိးန့ၣ် ကထုးန့ၢ်အဝဲသ့ၣ်အသး ဒ်သိးကအဲၣ်ဒိး မၤလိတၢ်မ့ၢ်တၢ်တီန့ၣ်လီၤ. လၢတၢ်န့ၣ်အဃိ ဘၣ်ဃးဒီးနီၢ်သီန့ၣ် လံာ်စီဆှံတဆၢအံၤ ကတိၤကျၢၢ်တံၢ်ဝဲလၢ– “တၢ်န့ၣ်တဖၣ်ခဲလၢာ်အဖီခိၣ်, ကူထီၣ်သိးထီၣ် တၢ်အဲၣ်တၢ်ကွံလၢအမ့ၢ် တၢ်လၢတၢ်ပှဲၤ အပျံၤစၢဃာ်တၢ်န့ၣ်တက့ၢ်.”—ကလီးစဲ ၃:၁၄.
“ကဲထီၣ်ပှၤအသီ”
၂၀. (က) ပကြၢးသံကွၢ်လီၤပသးဒ်လဲၣ်, ဒီးဘၣ်မနုၤအဃိလဲၣ်. (ခ) ခါဆူညါန့ၣ် နအိၣ်ခိးကွၢ်လၢ် တၢ်မနုၤသ့ဝဲလဲၣ်.
၂၀ ပဝဲခဲလၢာ် ပကြၢးသံကွၢ်လီၤပသးလၢ ‘ဒ်သိးယကသိးထီၣ်နီၢ်သီ ဒီးဒ်သိးယသုတဘ့ၣ်လီၤကွံာ် အီၤလၢၤတဂ့ၤအဂီၢ် ယကဘၣ်ဆီတလဲ ယတၢ်အိၣ်မူဒ်လဲၣ်.’ ပကဘၣ်ဃ့ဘါထုကဖၣ် ဒီးဃ့တၢ်မၤစၢၤလၢ ယဟိဝၤယွၤအအိၣ်လီၤ. ဒ်သိးပက “န့ၢ်ဘၣ်သါယွၤအဘီအမုၢ်” အဂီၢ် ပကဘၣ်ဂုာ်ကျဲးစၢးဆီတလဲ ပတၢ်ဆိကမိၣ် ဒီးပတၢ်ဖံးတၢ်မၤလၢအတဂ့ၤတဖၣ်န့ၣ်လီၤ. (ကလၤတံ ၅:၁၉-၂၁) တကးဒံးဘၣ် ပကြၢးသံကွၢ်လီၤပသးလၢ ‘ဒ်သိးယကမၤယဟိဝၤယွၤ အတၢ်ဘၣ်သးအဂီၢ် မ့ၢ်ယဆီတလဲ ယတၢ်ပာ်သူၣ်ပာ်သးဧါ.’ (အ့းဖ့းစူး ၄:၂၃, ၂၄) မ့ၢ်လၢပတလၢတပှဲၤဘၣ်အဃိ ပကဘၣ်ဂုာ်ကျဲးစၢး ဒီးဆဲးကူထီၣ်သိးထီၣ်နီၢ်သီ ထီဘိလီၤ. ဆိကမိၣ်ကွၢ် ပဝဲကိးဂၤဒဲး မ့ၢ်ကူထီၣ်သိးထီၣ်နီၢ်သီ ဒီးကွၢ်လိမၤဒိး ယဟိဝၤယွၤန့ၣ် ပတၢ်အိၣ်မူကမုာ်ထဲလဲၣ်န့ၣ်တက့ၢ်.
^ လံာ်အဆၢ. 3 လၢညါန့ၣ် ပှၤစကူသ့ၤဖိတဖၣ်န့ၣ် ပှၤဆိကမိၣ်လၢ အဝဲသ့ၣ်အတၢ်အိၣ်မူ အပတီၢ်ဖုၣ်အဃိ ပှၤသးဘၣ်အၢအဝဲသ့ၣ်လီၤ.
