တၢ်အဲၣ်တၢ်ကွံ မ့ၢ်တၢ်ဂ့ၤတၢ်ဝါလၢ အလုၢ်ဒိၣ်ပှ့ၤဒိၣ်
ယဟိဝၤယွၤ ဟံးစုနဲၣ်ကျဲဝဲ တၢ်မၢဖိပီလူးလၢ ကကွဲးတၢ်ဂ့ၤတၢ်ဝါခွံခါလၢ အကဲထီၣ်အသးခီဖျိလၢ ယွၤအသးစီဆှံန့ၣ်လီၤ. (ကလၤတံ ၅:၂၂, ၂၃) တၢ်ဂ့ၤတၢ်ဝါတဖၣ်အံၤန့ၣ် ဘၣ်တၢ်ကိးအီၤလၢ “သးအတၤသၣ်” န့ၣ်လီၤ. * (ကွၢ်တၢ်ဂ့ၢ်အဘျဲၣ်တက့ၢ်.) သးအတၤသၣ်န့ၣ် ဘၣ်ထွဲလိာ်အသးဒီး “ပှၤသီ” လၢခရံာ်ဖိတဖၣ် ကဘၣ်ကူထီၣ်သိးထီၣ်ဝဲန့ၣ်လီၤ. (ကလီးစဲ ၃:၁၀) ဒ်သ့ၣ်လၢပှၤလူအထံဘၣ်ဆၢဘၣ်ကတီၢ် ဒီးသၣ်ထီၣ်ဝဲအသိး ယွၤအသးစီဆှံမ့ၢ်မၤတၢ်လၢပပူၤန့ၣ် ပကအိၣ်ဒီးတၢ်ဂ့ၤတၢ်ဝါတဖၣ်အံၤလီၤ.—စံးထီၣ်ပတြၢၤ ၁:၁-၃.
တၢ်ဂ့ၤတၢ်ဝါအဆိကတၢၢ်တခါလၢ စီၤပီလူးကွဲးလီၤဝဲန့ၣ် မ့ၢ်ဝဲတၢ်အဲၣ်တၢ်ကွံလီၤ. တၢ်ဂ့ၤတၢ်ဝါအံၤ အလုၢ်အပှ့ၤဒိၣ်ထဲလဲၣ်. စီၤပီလူးတဲဝဲလၢ အတၢ်အဲၣ်တၢ်ကွံမ့ၢ်တအိၣ်ဘၣ်န့ၣ် အဝဲမ့ၢ် “တၢ်ကလီကလီလီၤ.” (၁ ကရံၣ်သူး ၁၃:၂) ဘၣ်ဆၣ် တၢ်အဲၣ်တၢ်ကွံန့ၣ် မ့ၢ်မနုၤလဲၣ်, ဒီးပမၤဒိၣ်ထီၣ် ဒီးပာ်ဖျါထီၣ်အီၤ ကိးနံၤဒဲးကသ့ဒ်လဲၣ်.
တၢ်အဲၣ်တၢ်ကွံ မ့ၢ်မနုၤလဲၣ်
ပတဲဖျါထီၣ်တၢ်အဲၣ်တၢ်ကွံအဂ့ၢ် တသ့လီၤတံၢ်လီၤဆဲးဘၣ်. ဘၣ်ဆၣ် လံာ်စီဆှံပာ်ဖျါထီၣ်ဝဲ ပှၤလၢအိၣ်ဒီးတၢ်အဲၣ်တၢ်ကွံတဖၣ် အတၢ်ပာ်သူၣ်ပာ်သးန့ၣ်လီၤ. အဒိ, ပှၤလၢအအိၣ်ဒီး တၢ်အဲၣ်တၢ်ကွံတဂၤန့ၣ် က ‘ဝံသးစူၤတၢ် ဒီးမၤဂ့ၤတၢ်’ ဒီးက “သးခုဝဲလၢ တၢ်အမ့ၢ်အတီအပူၤလီၤ.” တကးဒံးဘၣ် “ဒိးတၢ်ခဲလၢာ်, နာ်တၢ်ခဲလၢာ်, မုၢ်လၢ်တၢ်ခဲလၢာ်, ဝံသးစူၤတၢ်ခဲလၢာ်လီၤ.” ဒီးအဝဲအိၣ်ဒီး တၢ်ဒိသူၣ်ဒိသးလၢ ပှၤဂၤအဖိခိၣ်, သူၣ်အိၣ်သးအိၣ်ပှၤဂၤ ဒီးမ့ၢ်တံၤသကိးလၢအိၣ်ဒီး တၢ်သးတီလီၤ. ဘၣ်ဆၣ် ပှၤလၢတအိၣ်ဒီး တၢ်အဲၣ်တၢ်ကွံန့ၣ် အဝဲကသးက့ၣ်တၢ်, ကပာ်ထီၣ်ထီအသး, မၤတၢ်တဂ့ၤတဘၣ်ဘၣ်, အဲၣ်လီၤထဲအနီၢ်ကစၢ်အသး ဒီးတပျၢ်ပှၤဂၤအတၢ်ကမၣ်ဘၣ်. ပတအဲၣ်ဒိးအိၣ်ဒီး တၢ်ပာ်သူၣ်ပာ်သးဒ်အံၤတဖၣ်ဘၣ်. ပအဲၣ်ဒိးပာ်ဖျါထီၣ် တၢ်အဲၣ်နီၢ်နီၢ်လၢ ပှၤဂၤအဖီခိၣ်လီၤ. တၢ်အဲၣ်နီၢ်နီၢ်န့ၣ် “တဃုဘၣ်အတၢ်ဒၣ်ဝဲဘၣ်.”—၁ ကရံၣ်သူး ၁၃:၄-၈.
ဘၣ်ဃးဒီးတၢ်အဲၣ်န့ၣ် ယဟိဝၤယွၤဒီး ယ့ၣ်ၡူးမ့ၢ်ပှၤလၢ အဒိဂ့ၤတဲာ်ဘၣ်ကတၢၢ်
“ယွၤမ့ၢ်တၢ်အဲၣ်တၢ်ကွံလီၤ.” (၁ ယိၤဟၣ် ၄:၈) ပသ့ၣ်ညါအီၤသ့ခီဖျိ အတၢ်ဖံးတၢ်မၤတဖၣ်လီၤ. ယဟိဝၤယွၤ ပာ်ဖျါထီၣ်အတၢ်အဲၣ်အဒိၣ်ကတၢၢ်ဖဲ အဆှၢလီၤအဖိခွါယ့ၣ်ၡူးလၢ ကဟဲလီၤလၢဟီၣ်ခိၣ် ဒီးတူၢ်သံအသးလၢပဂီၢ်န့ၣ်လီၤ. တၢ်မၢဖိယိၤဟၣ် တဲဝဲလၢ– “ယွၤအတၢ်အဲၣ်တၢ်ကွံ အိၣ်ဖျါဝဲလၢပဂီၢ်လၢတၢ်အံၤ, ယွၤမၢလီၤအဖိခွါတဂၤဃီ ဆူဟီၣ်ခိၣ်ချၢ, ဒ်သိးပကမူလၢအဃိလီၤ. လၢတၢ်အံၤမ့ၢ်တၢ်အဲၣ်တၢ်ကွံ, လၢပအဲၣ်ယွၤတမ့ၢ်ဘၣ်, မ့ၢ်လၢအဝဲဒၣ်အဲၣ်ပှၤ, ဒီးမၢလီၤအဖိခွါဒီး, မၤပူၤမၤဖျဲးပတၢ်ဒဲးဘးလီၤ.” (၁ ယိၤဟၣ် ၄:၉, ၁၀) ယွၤအတၢ်အဲၣ်တၢ်ကွံအဃိ ပတၢ်ဒဲးဘးပျၢ်သ့ ဒီးပအိၣ်ဒီးတၢ်မုၢ်လၢ်လၢ ပကအိၣ်မူဘၣ်လီၤထူလီၤယိာ်န့ၣ်လီၤ.
ယ့ၣ်ၡူးပာ်ဖျါထီၣ်အတၢ်အဲၣ် ပှၤဟီၣ်ခိၣ်ဖိခီဖျိ ဟ့ၣ်လီၤအသးသမူလၢ ကမၤယွၤအတၢ်ဘၣ်သးန့ၣ်လီၤ. တၢ်မၢဖိပီလူး တဲဝဲလၢ– “လၢတၢ်ဘၣ်အသးအံၤ ပကဲထီၣ်တၢ်စီဆှံ, လၢတၢ်ပာ်ထီၣ် ယ့ၣ်ၡူးခရံာ်အနီၢ်ခိတဘျီအဃိလီၤ.” (ဧ့ၤဘြံၤ ၁၀:၉, ၁၀) ယ့ၣ်ၡူးတဲဝဲလၢ– “ပှၤမ့ၢ်ပာ်လီၤကွံာ် အသးသမူလၢအတံၤသကိးအဂီၢ်ဒီး, ပှၤတအိၣ်ဘၣ်ဒီး တၢ်အဲၣ်တၢ်ကွံဒိၣ်န့ၢ်အဝဲန့ၣ် နီတဂၤဘၣ်.” (ယိၤဟၣ် ၁၅:၁၃) ပှၤဟီၣ်ခိၣ်ဖိလၢ အပာ်ဖျါထီၣ်တၢ်အဲၣ်ဒိၣ်န့ၢ်အအံၤ တအိၣ်နီတဂၤဘၣ်. ပှၤလၢအတလၢတပှဲၤတဖၣ်န့ၣ် ကွၢ်လိမၤဒိးဝဲ ယဟိဝၤယွၤ ဒီးယ့ၣ်ၡူးအတၢ်အဲၣ်ကသ့ဧါ. သ့ဝဲလီၤ. ပမၤအီၤကသ့ဒ်လဲၣ်.
“လဲၤသုဝဲလၢ တၢ်အဲၣ်တၢ်ကွံအပူၤ”
စီၤပီလူး ဟ့ၣ်သဆၣ်ထီၣ်ပှၤလၢ– “မၤသးဒ်န့ၣ်ဒီး, ကဲထီၣ်ပှၤကွၢ်လိယွၤ ဒ်ဖိသးဘိအသိးန့ၣ်တက့ၢ်. လဲၤသုဝဲလၢ တၢ်အဲၣ်တၢ်ကွံအပူၤ, ဒ်ခရံာ်အဲၣ်ပှၤကွံပှၤ, ဒီးဟ့ၣ်လီၤကွံာ်အသးလၢပဂီၢ် လၢတၢ်မၤဘူၣ် ဒီးတၢ်လုၢ်လၢယွၤလၢ တၢ်နၢမူအဂီၢ်အသိးတက့ၢ်.” (အ့းဖ့းစူး ၅:၁, ၂) “လဲၤသုဝဲလၢ တၢ်အဲၣ်တၢ်ကွံအပူၤ” န့ၣ်အဲၣ်ဒိးစံးဝဲ တၢ်မနုၤလဲၣ်. အဲၣ်ဒိးစံးဝဲ ပကဘၣ်ပာ်ဖျါထီၣ် တၢ်အဲၣ်တၢ်ကွံထီဘိလီၤ. ပအဲၣ်ပှၤဂၤန့ၣ် တမ့ၢ်ထဲပတဲလၢ ပထးခိၣ်ဘၣ်. ပကဘၣ်ပာ်ဖျါထီၣ်အီၤလၢ တၢ်မၤစ့ၢ်ကီးလီၤ. စီၤယိၤဟၣ် ကွဲးဝဲလၢ– “ယဖိဆံးသ့ၣ်ဧၢ, အဲၣ်တၢ်ထဲလၢ တၢ်ကတိၤဒီးပျ့ၤဧိၤန့ၣ်တဂ့ၤ. မ့မ့ၢ်လၢတၢ်မၤ, ဒီးလၢတၢ်မ့ၢ်တၢ်တီတက့ၢ်.” (၁ ယိၤဟၣ် ၃:၁၈) အဒိ, ပစံၣ်တဲၤတဲလီၤ “ဘီမုၢ်တၢ်သးခုကစီၣ်” န့ၣ်မ့ၢ်လၢ ပအဲၣ်ယဟိဝၤယွၤ ဒီးပှၤလၢပဃၢၤတဖၣ်အဃိလီၤ. (မးသဲ ၂၄:၁၄; လူၤကၣ် ၁၀:၂၇) ဖဲပအိၣ်ဒီး တၢ်ဝံသးစူၤ, တၢ်သူၣ်စူၤသးစူၤ ဒီးပျၢ်ပှၤဂၤအတၢ်ကမၣ်န့ၣ် မ့ၢ်ဒၣ်ပလဲၤတၢ်လၢ “တၢ်အဲၣ်တၢ်ကွံအပူၤ” လီၤ. အဃိပကဘၣ် မၤထွဲလံာ်စီဆှံ တၢ်ဟ့ၣ်ကူၣ်လၢအမ့ၢ်– “ပျၢ်လိာ်သုတၢ်ကမၣ်တဂၤဒီးတဂၤ ဒ်ကစၢ်ပျၢ်တ့ၢ်လံသုတၢ်ကမၣ်အသိးန့ၣ်တက့ၢ်.”—ကလီးစဲ ၃:၁၃, ခ့ခါစှီၤကျိာ်.
ပသိၣ်ပှၤဂၤ မ့တမ့ၢ် ဟ့ၣ်ကူၣ်ပှၤဂၤန့ၣ် တမ့ၢ်လၢပသးဟ့အဝဲသ့ၣ်အဃိဘၣ်. အဒိ, မိၢ်ပၢ်တနီၤ ဖဲအဖိဟီၣ်အခါ ဒ်သိးအဖိသုတဟီၣ်လၢၤတဂ့ၤအဂီၢ် ကဟ့ၣ်ဝဲတၢ်လၢ အဖိဃ့ဝဲတဖၣ်လီၤ. ဘၣ်ဆၣ် မိၢ်ပၢ်လၢအအဲၣ်အဖိနီၢ်နီၢ်န့ၣ် တလူၤဘၣ်ထဲအဖိအသးဘၣ်. အလီၢ်မ့ၢ်အိၣ်လၢ ကဘၣ်သိၣ်အဖိန့ၣ် ကသိၣ်ဝဲလီၤ. ဒ်န့ၣ်အသိး ယွၤမ့ၢ်တၢ်အဲၣ်တၢ်ကွံ ဘၣ်ဆၣ် အဝဲ “သိၣ်က့ၤသီက့ၤပှၤလၢအအဲၣ်” ဝဲတဖၣ်လီၤ. (ဧ့ၤဘြံၤ ၁၂:၆) လၢတၢ်န့ၣ်အဃိ ပမ့ၢ်အဲၣ်ပှၤဂၤန့ၣ် အလီၢ်မ့ၢ်အိၣ်လၢ ကဘၣ်သိၣ်အီၤန့ၣ် ပကဘၣ်သိၣ်အီၤလီၤ. (ကတိၤဒိ ၃:၁၁, ၁၂) ဘၣ်ဆၣ် သ့ၣ်နီၣ်ထီၣ်လၢ ပဝဲခဲလၢာ်ပမ့ၢ်ပှၤတၢ်ဒဲးဘးဖိအဃိ ပကပာ်ဖျါထီၣ် တၢ်အဲၣ်တၢ်ကွံအဂီၢ် တညီဝဲထီဘိဘၣ်. လၢတၢ်န့ၣ်အဃိ ပဝဲခဲလၢာ်ပမၤဒိၣ်ထီၣ် ပတၢ်အဲၣ်တၢ်ကွံသ့လီၤ. ပမၤအီၤကသ့ဒ်လဲၣ်. ပကတဲသကိးကျဲသၢဘိလီၤ.
ပမၤဒိၣ်ထီၣ် ပတၢ်အဲၣ်တၢ်ကွံကသ့ဒ်လဲၣ်
အဆိကတၢၢ်, ဒ်သိးနကအိၣ်ဒီး တၢ်အဲၣ်တၢ်ကွံအဂီၢ် ဃ့ယွၤအသးစီဆှံ အတၢ်မၤစၢၤတက့ၢ်. ယ့ၣ်ၡူးစံးဝဲလၢ ယဟိဝၤယွၤဟ့ၣ် “ပှၤလၢအဃ့တၢ်လၢအီၤတဖၣ် လၢသးစီဆှံ” လီၤ. (လူၤကၣ် ၁၁:၁၃) လၢတၢ်န့ၣ်အဃိ ပနာ်သ့သပှၢ်ကတၢၢ်လၢ ပမ့ၢ်ဃ့ယွၤအသးစီဆှံ ဒီးပျဲလၢယွၤကမၤစၢၤပှၤန့ၣ် ပတၢ်အဲၣ်ကအါထီၣ်ဝဲ ကွ့ၢ်ကွ့ၢ်လီၤ. (ကလၤတံ ၅:၁၆) အဒိ, နမ့မ့ၢ်တၢ်အိၣ်ဖှိၣ်သးပှၢ်တဂၤန့ၣ် ဖဲနဘၣ်ဟ့ၣ်ကူၣ်ပှၤဂၤလၢ လံာ်စီဆှံပူၤအခါ ဒ်သိးနကဟ့ၣ်ကူၣ်အဝဲသ့ၣ်လၢ တၢ်အဲၣ်တၢ်ကွံပူၤအဂီၢ် နဃ့ယွၤအသးစီဆှံ တၢ်မၤစၢၤသ့လီၤ. နမ့မ့ၢ်မိၢ်ပၢ်န့ၣ် ဒ်သိးနသိၣ်နဖိတဖၣ်လၢ တၢ်အဲၣ်တၢ်ကွံပူၤကသ့အဂီၢ် နဃ့ယွၤအသးစီဆှံ တၢ်မၤစၢၤသ့လီၤ.
ခံထံၣ်တထံၣ်, ဆိကမိၣ်ကွၢ် ယ့ၣ်ၡူးအဂ့ၢ်တက့ၢ်. ဖဲပှၤမၤအၢမၤနးအီၤအခါဒၣ်လဲာ် အဝဲဆဲးပာ်ဖျါထီၣ်ဝဲ တၢ်အဲၣ်တၢ်ကွံလၢ ပှၤဂၤအဖီခိၣ်လီၤ. (၁ ပ့းတရူး ၂:၂၁, ၂၃) ဖဲပှၤတဂၤဂၤမၤကမၣ်နၤ မ့တမ့ၢ် နတူၢ်ဘၣ်တၢ်တတီတလိၤအခါ သံကွၢ်လီၤနသးလၢ ‘မ့မ့ၢ်ယ့ၣ်ၡူးန့ၣ် ကမၤဝဲဒ်လဲၣ်.’ ဒီပုၢ်ဝဲၢ်မုၣ်လၢအမံၤမ့ၢ် လံၤအၣ် တူၢ်ဘၣ်ဝဲလၢ ဖဲအကွၢ်ဆၢမဲာ်ဘၣ်ဒီး တၢ်အိၣ်သးဒ်အံၤအခါ အဝဲမ့ၢ်သံကွၢ်လီၤအသးလၢ တၢ်သံကွၢ်အံၤန့ၣ် ကဲထီၣ်တၢ်မၤစၢၤလၢအဂီၢ်လီၤ. အဝဲစံးဝဲလၢ– “ဘၣ်တဘျီန့ၣ် ပှၤမၤတၢ်ဖိတဂၤဆှၢဝဲ အံမ့(လ်) လၢယသကိးအအိၣ် ဒီးတဲဟးဂီၤယၤ ဒီးယတၢ်မၤအဂ့ၢ်န့ၣ်လီၤ. အဝဲမၤဝဲဒ်န့ၣ်အဃိ ယသးဘၣ်ဒိဒိၣ်မး. ဘၣ်ဆၣ် ယသံကွၢ်လီၤယသးလၢ ‘ဘၣ်ဃးဒီးတၢ်ဂ့ၢ်အံၤ မ့မ့ၢ်ယ့ၣ်ၡူးန့ၣ် ကမၤဝဲဒ်လဲၣ်.’ ယက့ၤဆိကမိၣ်ထံက့ၤ ယ့ၣ်ၡူးအဒိအတဲာ်ဝံၤအလီၢ်ခံ ယဆၢတဲာ်လီၤယသးလၢ ယကသးပ့ၤနီၣ်ကွံာ် တၢ်ဂ့ၢ်တၢ်ကျိၤခဲလၢာ်လီၤ. လၢခံယသ့ၣ်ညါလၢ ပှၤလၢအတဲဟးဂီၤယၤတဂၤအံၤ အိၣ်ဒီးတၢ်ဆူးတၢ်ဆါ ဖးဒိၣ်တခါ ဒီးတၢ်ဆီၣ်သနံးအါမးလီၤ. လၢတၢ်န့ၣ်အဃိ ဘၣ်ဃးဒီးတၢ်လၢအဝဲတဲယၤန့ၣ် တမ့ၢ်လၢအအဲၣ်ဒိး မၤဘၣ်ဒိယၤအဃိဘၣ်. ခီဖျိလၢယဆိကမိၣ်ထံက့ၤ ဘၣ်ဃးယ့ၣ်ၡူးပာ်ဖျါထီၣ်တၢ်အဲၣ်လၢ ပှၤဂၤအဖီခိၣ်အဃိ မၤစၢၤယၤလၢ ယကပာ်ဖျါထီၣ်တၢ်အဲၣ်လၢ ပှၤလၢအမၤကမၣ်ယၤတဂၤအံၤအဖီခိၣ်လီၤ.” ပမ့ၢ်ကွၢ်လိမၤဒိး ယ့ၣ်ၡူးန့ၣ် ပကပာ်ဖျါထီၣ်တၢ်အဲၣ်တၢ်ကွံလၢ ပှၤဂၤအဖီခိၣ်ထီဘိလီၤ.
သၢထံၣ်တထံၣ်, ပကဘၣ်ပာ်ဖျါထီၣ် တၢ်အဲၣ်လၢတကွၢ်လီၤထဲဒၣ် အနီၢ်ကစၢ်အဘျုးန့ၣ်လီၤ. ပမ့ၢ်အိၣ်ဒီးတၢ်အဲၣ်ဒ်အံၤန့ၣ် ပှၤကသ့ၣ်ညါပှၤလၢ ပမ့ၢ်ယ့ၣ်ၡူးအပျဲၢ်အဘီၣ်နီၢ်နီၢ်လီၤ. (ယိၤဟၣ် ၁၃:၃၄, ၃၅) ယ့ၣ်ၡူးအိၣ်ဒီးတၢ်အဲၣ်ဒ်အံၤ ဒီးမ့ၢ်ပှၤလၢအဒိအတဲာ် ဂ့ၤကတၢၢ်လၢပဂီၢ်လီၤ. အဝဲပာ်ဖျါထီၣ်ဝဲလၢ ကျဲဒ်လဲၣ်. ပာ်ဖျါထီၣ်ဝဲခီဖျိ အဟဲလီၤဆူဟီၣ်ခိၣ်ဒီး “ညိကွံာ်အလၤအကပီၤ” တုၤဒၣ်လဲာ် “ဒိးသံအသး” လၢပဂီၢ်န့ၣ်လီၤ. (ဖံလံးပံၤ ၂:၅-၈) ပမ့ၢ်ကွၢ်လိမၤဒိးယ့ၣ်ၡူးန့ၣ် ပတၢ်ပာ်သူၣ်ပာ်သး ကလီၤဂာ်ဒ်သိးဒီးအီၤ ဒီးပကပာ်ပှၤဂၤ အတၢ်လိၣ်ဘၣ်လၢညါလီၤ.
တၢ်ပာ်ဖျါထီၣ် တၢ်အဲၣ်တၢ်ကွံန့ၣ် အဘျုးအိၣ်
တၢ်ပာ်ဖျါထီၣ် တၢ်အဲၣ်တၢ်ကွံန့ၣ် ကဲဘျုးဝဲအါမးလီၤ. ပကကွၢ်သကိးတၢ်အဒိခံခါလီၤ–
ပမ့ၢ်ပာ်ဖျါထီၣ် တၢ်အဲၣ်တၢ်ကွံန့ၣ် ကကဲဘျုးဒ်လဲၣ်
-
ဒီပုၢ်ဝဲၢ်လၢ ဟီၣ်ခိၣ်ဒီဘ့ၣ်– မ့ၢ်လၢပအဲၣ်လိာ်သး တဂၤဒီးတဂၤအဃိ ပသ့ၣ်ညါလၢ ပမ့ၢ်လဲၤလၢတၢ်အိၣ်ဖှိၣ် တဖျၢၣ်ဂ့ၤတဖျၢၣ်ဂ့ၤ ဒီပုၢ်ဝဲၢ်မုၣ်ဒီပုၢ်ဝဲၢ်ခွါတဖၣ် ကတူၢ်လိာ်မုာ်ပှၤလၢ တၢ်အဲၣ်တၢ်ကွံအပူၤလီၤ. ပသ့ၣ်ညါဘၣ်လၢပ “ဒီပုၢ်ဝဲၢ်ခဲလၢာ် . . . လၢဟီၣ်ခိၣ်ချၢ” အဲၣ်ပှၤအဃိ ပသးခုဒိၣ်မးလီၤ. (၁ ပ့းတရူး ၅:၉) ပဃုထံၣ်န့ၢ် တၢ်အဲၣ်တၢ်ကွံဒ်အံၤသ့ထဲလၢ ယွၤအခ့အပှၤတဖၣ်အကျါလီၤ.
-
တၢ်ဃူတၢ်ဖိး– မ့ၢ်လၢပ “ဝံသးစူၤ” လိာ်သးသကိးသကိးအဃိ ပအိၣ်ဒီး “တၢ်ဃူတၢ်ဖိး” လီၤ. (အ့းဖ့းစူး ၄:၂, ၃) ပထံၣ်ဘၣ်တၢ်ဃူတၢ်ဖိးတဖၣ်အံၤ ဖဲပလဲၤထီၣ်တၢ်အိၣ်ဖှိၣ်ရိဖှိၣ်, ကဝီၤတၢ်အိၣ်ဖှိၣ် ဒီးတၢ်အိၣ်ဖှိၣ်ဖးဒိၣ်တဖၣ်အခါန့ၣ်လီၤ. ဖဲနထံၣ်ဘၣ်တၢ်ဃူတၢ်ဖိးလၢ ဟီၣ်ခိၣ်လၢအပှဲၤဝဲဒီး တၢ်သဘံၣ်သဘုၣ်အံၤအခါ မ့ၢ်တၢ်လၢအလီၤကမၢကမၣ် တမ့ၢ်ဘၣ်ဧါ. (စံးထီၣ်ပတြၢၤ ၁၁၉:၁၆၅; ယၡါယၤ ၅၄:၁၃) ဖဲပဂုာ်ကျဲးစၢး မၤဃူမၤဖိးတၢ်ဒီးပှၤဂၤအခါ မ့ၢ်ဒၣ်ပပာ်ဖျါထီၣ်လၢ ပအဲၣ်အီၤနီၢ်နီၢ်လီၤ. ပမ့ၢ်မၤဒ်န့ၣ်န့ၣ် ကမၤသးခုပပၢ်အိၣ်လၢ မူခိၣ်အသးလီၤ.—စံးထီၣ်ပတြၢၤ ၁၃၃:၁-၃; မးသဲ ၅:၉.
“တၢ်အဲၣ်တၢ်ကွံန့ၣ် မၤထီၣ်မၤထီတၢ်”
စီၤပီလူးကွဲးဝဲလၢ– “တၢ်အဲၣ်တၢ်ကွံန့ၣ် မၤထီၣ်မၤထီတၢ်လီၤ.” (၁ ကရံၣ်သူး ၈:၁) တၢ်ကတိၤအံၤ အခီပညီမ့ၢ်မနုၤလဲၣ်. ၁ ကရံၣ်သူး ၁၃ န့ၣ်ပှၤကိးအီၤလၢ “တၢ်အဲၣ်အတၢ်သးဝံၣ်” လီၤ. ဖဲအံၤအဝဲတဲနၢ်ပၢၢ်ဝဲလၢ “တၢ်အဲၣ်တၢ်ကွံန့ၣ် မၤထီၣ်မၤထီတၢ်လီၤ.” တၢ်အဲၣ်တၢ်ကွံန့ၣ် မၤစၢၤပှၤလၢပကဃုထံၣ်န့ၢ် ပှၤဂၤအတၢ်ဂ့ၤတၢ်ဝါ ဒီးကပာ်ဆိပှၤဂၤအတၢ်လိၣ်ဘၣ်လၢညါလီၤ. (၁ ကရံၣ်သူး ၁၀:၂၄; ၁၃:၅) ပမ့ၢ်အိၣ်ဒီးတၢ်အဲၣ်တၢ်ကွံန့ၣ် ပကဆိကမိၣ်န့ၢ်တၢ်လၢပှၤဂၤအဂီၢ်, အိၣ်ဒီးတၢ်ဒိသူၣ်ဒိသး, တၢ်ဝံသးစူၤ ဒီးတၢ်သးကညီၤအဃိ ကမၤထီၣ်မၤထီပဟံၣ်ဖိဃီဖိ ဒီးဒုးအိၣ်ထီၣ်တၢ်ဃူတၢ်ဖိးလၢ တၢ်အိၣ်ဖှိၣ်အပူၤလီၤ.—ကလီးစဲး ၃:၁၄.
ပပာ်ဖျါထီၣ် တၢ်အဲၣ်တၢ်ကွံလၢပှၤဂၤအဖီခိၣ် သ့လၢကျဲအါမးလီၤ. ဘၣ်ဆၣ် ပတၢ်အဲၣ်ယွၤန့ၣ် မ့ၢ်တၢ်လုၢ်ဒိၣ်ပှ့ၤဒိၣ်ကတၢၢ် ဒီးအဘျုးအဖှိၣ်ဒိၣ်ကတၢၢ်လီၤ. ဘၣ်မနုၤအဃိလဲၣ်. မ့ၢ်လၢပတၢ်အဲၣ်ယွၤန့ၣ် ကဒုးအိၣ်ဃူအိၣ်ဖိးပှၤအဃိလီၤ. ပကလုာ်, ပတၢ်ဆဲးတၢ်လၤ ဒီးပတၢ်ကတိၤ မ့ၢ်လီၤဆီလိာ်အသးဘၣ်ဆၣ် ပတၢ်အဲၣ်ယွၤန့ၣ် ကမၤစၢၤပှၤဒ်သိး ပကမၤအတၢ်မၤလၢတၢ် “သးတဖျၢၣ်ဃီ” လီၤ. (စဖါနယၤ ၃:၉) မ်ပပာ်လီၤပသး ဂၢၢ်ဂၢၢ်ကျၢၤကျၢၤလၢ ပကပာ်ဖျါထီၣ် တၢ်ဂ့ၤတၢ်ဝါတခါအံၤလၢ အဟဲကဲထီၣ်အသးခီဖျိ ယွၤအသးစီဆှံ ကိးနံၤဒဲးတက့ၢ်.
^ လံာ်အဆၢ. 2 တၢ်မၤလိအံၤပကတဲသကိး တၢ်ဂ့ၤတၢ်ဝါခွံခါအကျါ အဆိကတၢၢ်တခါန့ၣ်လီၤ.