တဘၣ်စံၣ်ညီၣ်တၢ်ဒ် တၢ်လၢပထံၣ်အီၤလၢ ပမဲာ်အသိးတဂ့ၤ
“သုတစံၣ်ညီၣ်တၢ် ဒ်သုမဲာ်ထံၣ်တၢ်အသိးတဂ့ၤ. စံၣ်ညီၣ်တၢ်တီတီတက့ၢ်.”—ယိၤဟၣ် ၇:၂၄.
၁. ဝံယၡါယၤ တဲဆိပာ်ဝဲဘၣ်ဃးဒီး ယ့ၣ်ၡူးအဂ့ၢ်ဒ်လဲၣ် ဒီးဘၣ်မနုၤအဃိ ဝံအတၢ်စံးပာ်အံၤ ကဲထီၣ်တၢ်ဂံၢ်တၢ်ဘါလၢ ပဂီၢ်လဲၣ်.
ဝံယၡါယၤ တဲဆိပာ်ဝဲဘၣ်ဃး ယ့ၣ်ၡူးအဂ့ၢ်န့ၣ် ဟ့ၣ်ဆူၣ်ထီၣ်ပဂံၢ်ပဘါ ဒီးဟ့ၣ်ပှၤတၢ်မုၢ်လၢ်လီၤ. ဝံယၡါယၤတဲဆိပာ်ဝဲလၢ ယ့ၣ်ၡူး “တစံၣ်ညီၣ်ဘၣ်တၢ် ဒ်တၢ်လၢအထံၣ်လၢအမဲာ်အသိးဘၣ်န့ၣ်, ဒီးတစံၣ်ညီၣ်တဲာ်ဘၣ်တၢ်ဒ် တၢ်လၢအနၢ်ဟူလၢအနၢ်အသိးဘၣ်. ဒီးကစံၣ်ညီၣ်ပှၤဖှီၣ်ဖိယာ်ဖိလၢတၢ်တီ” လီၤ. (ယၡါယၤ ၁၁:၃, ၄) ဘၣ်မနုၤအဃိ ဝံအတၢ်စံးပာ်အံၤ ကဲထီၣ်တၢ်ဂံၢ်တၢ်ဘါလၢ ပဂီၢ်လဲၣ်. ခီဖျိလၢ ပအိၣ်မူဘၣ်လၢ ဟီၣ်ခိၣ်လၢအပှဲၤဒီး တၢ်ကွၢ်ဒိၣ်ဆံးအါစှၤပှၤဂၤ ဒီးပှၤအါဂၤစံၣ်ညီၣ်လိာ်သးဒ် တၢ်လၢအထံၣ်ဝဲလၢ အမဲာ်အသိးအဃိလီၤ. လၢတၢ်န့ၣ်အဃိ ပလိၣ်ဘၣ် စံၣ်ညီၣ်ကွီၢ်လၢ အလၢအပှဲၤ ဒီးအတစံၣ်ညီၣ်တၢ်ဒ်အထံၣ်ဝဲအသိးဘၣ်န့ၣ်လီၤ.
၂. ယ့ၣ်ၡူးမၢပမၤ တၢ်မနုၤလဲၣ် ဒီးလၢတၢ်မၤလိအံၤအပူၤ ပကမၤလိသကိးတၢ်ဂ့ၢ်မနုၤလဲၣ်.
၂ ကိးနံၤဒဲးန့ၣ် ပစံၣ်ညီၣ်ပှၤဂၤဒ် ပထံၣ်အီၤလၢပမဲာ်အသိးလီၤ. ဘၣ်ဆၣ် ပတမ့ၢ်ပှၤလၢပှၤပှဲၤ ဒ်ယ့ၣ်ၡူးအသိးဘၣ်အဃိ ပတၢ်စံၣ်ညီၣ်န့ၣ်တဘၣ်ထီဘိဘၣ်. အါတက့ၢ်န့ၣ် ပစံၣ်ညီၣ်တၢ်ဒ် တၢ်လၢပထံၣ်အီၤအသိးလီၤ. ဘၣ်ဆၣ် ယ့ၣ်ၡူး ဟ့ၣ်ပလီၢ်ပှၤလၢ “သုတစံၣ်ညီၣ်တၢ် ဒ်သုမဲာ်ထံၣ်တၢ်အသိးတဂ့ၤ. စံၣ်ညီၣ်တၢ်တီတီတက့ၢ်.” (ယိၤဟၣ် ၇:၂၄) ယ့ၣ်ၡူးအဲၣ်ဒိးလၢ ပကလီၤဂာ်ဒီးအီၤ ဒီးတစံၣ်ညီၣ်ပှၤဂၤ ဒ်တၢ်လၢပထံၣ်အသိးဘၣ်. လၢတၢ်မၤလိအံၤအပူၤ ပကတဲသကိး တၢ်ဂ့ၢ်သၢခါလၢ ပှၤအါဂၤကွၢ်ဒီး စံၣ်ညီၣ်ဝဲန့ၣ်လီၤ. တၢ်ဂ့ၢ်သၢခါအံၤမ့ၢ်ဝဲ ကလုာ်ဒူၣ်, ကျိၣ်စ့ ဒီးပှၤသးအနံၣ်အလါန့ၣ်လီၤ. လၢတၢ်ဂ့ၢ်တခါစုာ်စုာ်အဖီခိၣ်န့ၣ် ပကမၤလိဘၣ်လၢ ပဒိကနၣ် ယ့ၣ်ၡူးအတၢ်မၤလိာ် ကသ့ဒ်လဲၣ်. ဒီးဘၣ်မနုၤအဃိ ပတကြၢး စံၣ်ညီၣ်ပှၤဂၤ ဒ်ပထံၣ်အီၤလၢပမဲာ်အသိးဘၣ်လဲၣ်.
စံၣ်ညီၣ်ပှၤဂၤခီဖျိ အကလုာ်ဒူၣ်အဃိတဂ့ၤ
၃, ၄. (က) ဘၣ်မနုၤအဃိ စီၤပ့းတရူး အတၢ်ထံၣ်လၢ ပှၤတခီဘီမုၢ်ဖိတဖၣ် အဖီခိၣ်ဆီတလဲလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.) (ခ) ယဟိဝၤယွၤသိၣ်လိ စီၤပ့းတရူး တၢ်မ့ၢ်တၢ်တီလၢအသီ မနုၤတခါလဲၣ်.
၃ ဆိကမိၣ်ကွၢ် ဖဲစီၤပ့းတရူးဘၣ်လဲၤဆူကဲၤစါရံၤ လၢပှၤတခီဘီမုၢ်ဖိလၢအမံၤမ့ၢ် စီၤကန့လံးအဟံၣ်အခါ အဝဲကတူၢ်ဘၣ်ဝဲဒ်လဲၣ်. (မၤတၢ် ၁၀:၁၇-၂၉) လၢစီၤပ့းတရူး အနီၢ်ဆံးခါလံၤလံၤ အဝဲထံၣ်ဝဲလၢ ပှၤတခီဘီမုၢ်ဖိတဖၣ်န့ၣ် တကဆှီဘၣ်. ဘၣ်ဆၣ် တၢ်ကဲထီၣ်အသးဒီးအီၤတခါလၢ ဆီတလဲအတၢ်ထံၣ်လီၤ. အဒိ အဝဲထံၣ်ဘၣ်ဝဲ တၢ်ထံၣ်လၢညါခီလၢအဟဲလၢယွၤအအိၣ်န့ၣ်လီၤ. (မၤတၢ် ၁၀:၉-၁၆) လၢတၢ်ထံၣ်လၢညါခီအပူၤ စီၤပ့းတရူးထံၣ်ဝဲ တၢ်လၢအလီၤဂာ်ဒ် ယၣ်ဖးဒိၣ်တဘ့ၣ် ဟဲလီၤလၢမူခိၣ် ဒီးလၢအပူၤန့ၣ် အိၣ်ပှဲၤဝဲဒီးဆၣ်ဖိကီၢ်ဖိလၢ ဘၣ်တၢ်ထံၣ်အီၤလၢ အတကဆှီဘၣ်တဖၣ်န့ၣ်လီၤ. ဒီးတၢ်ကလုၢ်သီၣ်ထီၣ်ဝဲလၢ “ဂဲၤဆၢထၢၣ်မၤသံတၢ်, ဒီးအီၣ်တၢ်တက့ၢ်.” ဘၣ်ဆၣ် စီၤပ့းတရူးတတူၢ်လိာ်ဝဲဘၣ်. လၢတၢ်န့ၣ်အဃိ တၢ်ကလုၢ်သီၣ်ထီၣ်ဝဲလၢ “တၢ်လၢယွၤမၤကဆှီန့ၣ်, သုတပာ်လၢ တၢ်တစီတဆှံဘၣ်တဂ့ၤ.” ဒီးအဝဲထံၣ် တၢ်ထံၣ်လၢညါခီဝံၤသနာ်က့ တၢ်ကလုၢ်အံၤအဲၣ်ဒိး တဲအီၤတၢ်မနုၤလဲၣ်န့ၣ် အဝဲတနၢ်ပၢၢ်ဝဲဒံးဘၣ်. ဘၣ်ဆၣ် တၢ်ကဲထီၣ်အသးဒ်အံၤဝံၤဒီး ပှၤလၢစီၤကန့လံး ဆှၢလီၤဝဲတဖၣ် ဟဲတုၤလၢအအိၣ်လီၤ. သးစီဆှံဟံးစုနဲၣ်ကျဲဝဲ စီၤပ့းတရူးလၢ ကလဲၤပိာ်ဝဲ ပှၤသ့ၣ်တဖၣ်န့ၣ်အခံဆူ စီၤကန့လံးအဟံၣ်လီၤ.
၄ စီၤပ့းတရူး မ့ၢ်ဆၢတဲာ်တၢ်ဒ်အ “မဲာ်ထံၣ်တၢ်အသိး” န့ၣ်တမ့ၢ်လၢအဝဲကလဲၤလၢ စီၤကန့လံးအဟံၣ်နီတဘျီဘၣ်. ပှၤယူဒၤဖိတဖၣ် တလဲၤလၢပှၤတခီဘီမုၢ်ဖိတဖၣ် အဟံၣ်နီတဘျီဘၣ်. ဘၣ်ဆၣ်ဘၣ်မနုၤအဃိ စီၤပ့းတရူးလဲၤဝဲလဲၣ်. လၢညါန့ၣ်အဝဲဆိၣ်မိၣ်ဆံးဝဲ ပှၤတခီဘီမုၢ်ဖိတဖၣ် ဘၣ်ဆၣ် ခီဖျိလၢတၢ်ထံၣ်လၢညါခီ ဒီးသးစီဆှံအတၢ်ဟံးစုနဲၣ်ကျဲအဃိ အတၢ်ထံၣ်ဆီတလဲဝဲလီၤ. စီၤပ့းတရူးဒိကနၣ် စီၤကန့လံးတဲတၢ်ဝံၤအလီၢ်ခံ အဝဲတဲဝဲလၢ “ယထံၣ်နီၢ်နီၢ်လၢ ယွၤတကွၢ်ဒိၣ်ဆံးအါစှၤဘၣ်ပှၤကညီဘၣ်. မ့ၢ်အတူၢ်လိာ်ပှၤလၢအပျံၤအီၤ, ဒီးမၤတၢ်တီတၢ်လိၤလၢပှၤကိးကလုာ်ဒဲးအကျါလီၤ” (မၤတၢ် ၁၀:၃၄, ၃၅) လၢစီၤပ့းတရူးအဂီၢ်န့ၣ် မ့ၢ်ဝဲတၢ်နၢ်ပၢၢ်အသီလၢ အလီၤသူၣ်ပိၢ်သးဝးလီၤ. ဒီးတၢ်ဂ့ၢ်တခါအံၤ ကဲဘျုးဝဲလၢ ခရံာ်ဖိခဲလၢာ်အဂီၢ်လီၤ. ကဲဘျုးဝဲလၢကျဲဒ်လဲၣ်.
နကဆိမိၣ်လၢ နတကွၢ် ဒိၣ်ဆံးအါစှၤတၢ်ဘၣ်သနာ်က့ လၢတၢ်တဆိကမိၣ်အပူၤ နကဲထီၣ်ပှၤလၢ အကွၢ်ဒိၣ်ဆံးအါစှၤတၢ်သ့ဝဲလီၤ
၅. (က) ယဟိဝၤယွၤအဲၣ်ဒိးလၢ ခရံာ်ဖိခဲလၢာ် ကနၢ်ပၢၢ်ထီၣ် တၢ်ဂ့ၢ်မနုၤလဲၣ်. (ခ) ပသ့ၣ်ညါတၢ်မ့ၢ်တၢ်တီ သနာ်က့ ပအိၣ်ဒီး တၢ်ပာ်သူၣ်ပာ်သး မနုၤသ့ဒံးဝဲလဲၣ်.
၅ ယဟိဝၤယွၤသူဝဲစီၤပ့းတရူးဒ်သိး ကမၤစၢၤဝဲ ခရံာ်ဖိတဖၣ်လၢ ကသ့ၣ်ညါထီၣ်ဝဲလၢ ယွၤတကွၢ်မဲာ်တၢ်ဘၣ်. လၢယဟိဝၤယွၤအဂီၢ်န့ၣ် ကလုာ်ဒူၣ်, ထံကီၢ် ဒီးကျိာ်တဖၣ်န့ၣ် တမ့ၢ်တၢ်လၢအရ့ဒိၣ်ဘၣ်. ပမ့ၢ်ပျံၤယွၤ ဒီးမၤတၢ်လၢအဘၣ်န့ၣ် အဝဲကတူၢ်လိာ်ပှၤလီၤ. (ကလၤတံ ၃:၂၆-၂၈; လီၣ်ဖျါ ၇:၉, ၁၀) ဘၣ်သ့ၣ်သ့ၣ် နကသ့ၣ်ညါတ့ၢ်တၢ်ဂ့ၢ်အံၤလီၤ. ဘၣ်ဆၣ် နမ့ၢ်ဒိၣ်ထီၣ်ဘၣ်လၢ ထံကီၢ် မ့တမ့ၢ် ဟံၣ်ဖိဃီဖိလၢ အဆိမိၣ်ဆံးပှၤဂၤန့ၣ် နကမၤဒ်လဲၣ်. နကဆိမိၣ်လၢ နတကွၢ်ဒိၣ်ဆံးအါစှၤတၢ်ဘၣ်သနာ်က့ လၢတၢ်တဆိကမိၣ်အပူၤ နကဲထီၣ် ပှၤလၢ အကွၢ်ဒိၣ်ဆံးအါစှၤတၢ်သ့ဝဲလီၤ. စီၤပ့းတရူးစ့ၢ်ကီး အဝဲမၤစၢၤပှၤဂၤ ဒ်သိးပှၤကသ့ၣ်ညါလၢ ယွၤတကွၢ်ဒိၣ်ဆံးအါစှၤတၢ်ဘၣ် သနာ်က့ လၢခံအနီၢ်ကစၢ်ဒၣ်ဝဲ ပာ်ဖျါထီၣ်ဝဲလၢ အကွၢ်ဒိၣ်ဆံးအါစှၤတၢ်ဒံးလီၤ. (ကလၤတံ ၂:၁၁-၁၄) မ့မ့ၢ်ဒ်န့ၣ်န့ၣ် ပဝဲသ့ၣ်တဖၣ် ဒ်သိးပကဒိကနၣ် ယ့ၣ်ၡူးအကလုၢ် ဒီးစံၣ်ညီၣ်ပှၤဂၤဒ် ပထံၣ်အီၤအသိးတဂ့ၤအဂီၢ် တၢ်မနုၤကမၤစၢၤပှၤလဲၣ်.
၆. (က) ဒ်သိး ပတဆိကမိၣ်ဆံးပှၤဂၤတဂ့ၤအဂီၢ် တၢ်မနုၤကမၤစၢၤပှၤလဲၣ်. (ခ) တၢ်အိၣ်ဖှိၣ်သးပှၢ်တဂၤ ဖဲအဝဲကွဲးဖျါထီၣ် ဒီပုၢ်ဝဲၢ်တဂၤအဂ့ၢ်အခါ အတၢ်ကတိၤန့ၣ် ပာ်ဖျါထီၣ်ဝဲလၢ အမ့ၢ်ပှၤဒ်လဲၣ်တဂၤလဲၣ်.
၆ မ့ၢ်ပဆိကမိၣ်ဆံးပှၤဂၤဧါ တဆိကမိၣ်ဆံးပှၤဂၤဘၣ်ဧါန့ၣ် ဒ်သိးပကသ့ၣ်ညါအဂီၢ် ပကဘၣ် သမံသမိးလီၤက့ၤပသးလီၤ. ဒီးပထိၣ်သတြီၤကွၢ် ပတၢ်ပာ်သူၣ်ပာ်သးဒီး တၢ်ဂ့ၢ်လၢပမၤလိဘၣ်လၢ လံာ်စီဆှံအပူၤသ့ဝဲလီၤ. (စံးထီၣ်ပတြၢၤ ၁၁၉:၁၀၅) ခီဖျိလၢ ပတထံၣ်လီၤ ပနီၢ်ကစၢ်အသးဘၣ်အဃိ ဘၣ်သ့ၣ်သ့ၣ် ပသံကွၢ်ပတံၤသကိးတဂၤ ဒ်အံၤသ့ဝဲလီၤ. အဒိ မ့ၢ်အဝဲထံၣ်ဝဲလၢ ပအိၣ်ဒီးတၢ်ပာ်သူၣ်ပာ်သးလၢ ပဆိကမိၣ်ဆံးပှၤဂၤဧါ. (ကလၤတံ ၂:၁၁, ၁၄) ဘၣ်သ့ၣ်သ့ၣ် ပကအိၣ်ဒီး တၢ်ပာ်သူၣ်ပာ်သးဒ်အံၤ ယံာ်လံဘၣ်ဆၣ် ပတသ့ၣ်ညါလီၤပသးဘၣ်. တၢ်အိၣ်ဖှိၣ်သးပှၢ်တဂၤ တၢ်ကဲထီၣ်အသးဒီးအီၤဒ်န့ၣ်လီၤ. အဝဲကွဲးဖျါထီၣ်ဝဲ ပှၤဒီမါဝၤခံဂၤလၢ အမၤကစၢ်ယွၤအတၢ်မၤလၢ ဆၢကတီၢ်လၢပှဲၤအဂ့ၢ်န့ၣ်လီၤ. ဒီပုၢ်ဝဲၢ်ခွါလၢ အမၤတၢ်လၢ ဆၢကတီၢ်လၢပှဲၤတဂၤန့ၣ်မ့ၢ်ဝဲ ကလုာ်ဒူၣ်လၢ ပှၤအါဂၤဆိကမိၣ်ဆံးဝဲန့ၣ်လီၤ. တၢ်အိၣ်ဖှိၣ်သးပှၢ်တဂၤန့ၣ် ကွဲးဖျါထီၣ်ဝဲဒီပုၢ်ဝဲၢ်ခွါအံၤ အဂ့ၢ်လၢအဂ့ၤအါမး ဘၣ်ဆၣ် အဝဲဆဲးတဲကဒီးဝဲလၢ “အဝဲမ့ၢ် ပှၤတကလုာ်အံၤဘၣ်ဆၣ် အတၢ်ပာ်သူၣ်ပာ်သးဒီး အတၢ်အိၣ်ထီၣ်အိၣ်လီၤန့ၣ် ပာ်ဖျါထီၣ်ဝဲလၢ ပှၤလၢအမ့ၢ်ကလုာ်ဒူၣ်တဒူၣ်အံၤန့ၣ် တမ့ၢ်ပှၤလၢအဘၣ်အၢ ဒီးအပတီၢ်ဖုၣ်ကိးဂၤဒဲးဘၣ်.” ဖဲအံၤ ပန့ၢ်ဘၣ်တၢ်မၤလိဒ်လဲၣ်. လၢကစၢ်ယွၤအတၢ်ကရၢကရိအပူၤ ပအိၣ်ဒီး မူဒါမ့ၢ်အါဘၣ်ဆၣ် ပကဘၣ်သံကွၢ်လီၤပသးလၢ မ့ၢ်ပဆိကမိၣ်ဆံးပှၤဂၤဧါ. ဒီးပမ့ၢ်သ့ၣ်ညါလီၤပသးလၢ ပလိၣ်ဘၣ်တၢ်မၤစၢၤန့ၣ် ပကဘၣ်တူၢ်လိာ်အီၤလီၤ. ပမၤတၢ်မနုၤ ကသ့ဒံးဝဲလဲၣ်.
၇. ပပာ်ဖျါထီၣ်လၢပ ‘အိးလဲၢ်ထီၣ်ပသး’ ကသ့ဒ်လဲၣ်.
၇ ပမ့ၢ် ‘အိးလဲၢ်ထီၣ်ပသး’ န့ၣ်လၢပကကွၢ်တလီၤပှၤဂၤအလီၢ် ပကအဲၣ်အဝဲသ့ၣ်လီၤ. (၂ ကရံၣ်သူး ၆:၁၁-၁၃) မ့ၢ်နရ့ထဲ ပှၤလၢအကလုာ်ဒူၣ်ဒ်သိးဒီးနၤ, ကတိၤကျိာ်ဒ်သိးဒီးနၤတဖၣ်လီၤဧါ. နမ့မ့ၢ်ပှၤဒ်န့ၣ်န့ၣ် ဂုာ်ကျဲးစၢးရ့ ဒီးပှၤအဂၤတဖၣ်စ့ၢ်ကီးတက့ၢ်. နကွဲမုာ် ဒီပုၢ်ဝဲၢ်မုၣ်ခွါ လၢအကလုာ်တဒ်သိးဒီးနၤတဖၣ် လၢကလဲၤစံၣ်တဲၤတဲလီၤတၢ်ဒီးနၤသ့ဝဲလီၤ. မ့တမ့ၢ်နကွဲမုာ်အဝဲသ့ၣ်လၢ နဟံၣ်ဒ်သိးကရ့လိာ်သး ဒီးအီၣ်သကိးအီသကိးတၢ်ဒီးနၤ သ့ဝဲလီၤ. (မၤတၢ် ၁၆:၁၄, ၁၅) နမ့ၢ်မၤဒ်န့ၣ်န့ၣ် လၢနသးပူၤကပှဲၤဒီးတၢ်အဲၣ်တၢ်ကွံ ဒီးနတဆိကမိၣ်ဆံးပှၤဂၤလၢၤဘၣ်. ခဲအံၤပကတဲသကိး ကျဲအဂၤတဘိလၢ ပကဲထီၣ်ပှၤလၢ အစံၣ်ညီၣ်ပှၤဂၤဒ်ပ “မဲာ်ထံၣ်တၢ်အသိး” သ့ဒ်လဲၣ်န့ၣ်လီၤ.
တဘၣ်ကွၢ်မဲာ်ပှၤဂၤ ခီဖျိအကဲဒိၣ် မ့တမ့ၢ် အဖှီၣ်အဃိတဂ့ၤ
၈. ၃ မိၤၡ့ ၁၉:၁၅ ပာ်ဖျါထီၣ်လၢ ပှၤကဲဒိၣ်မ့ၢ်ဂ့ၤ ပှၤဖှီၣ်ဖိမ့ၢ်ဂ့ၤ ပကြၢးထံၣ်အီၤဒ်လဲၣ်.
၈ ဘၣ်သ့ၣ်သ့ၣ် ပကကွၢ်မဲာ်ပှၤဂၤ ခီဖျိလၢ အကဲဒိၣ် မ့တမ့ၢ် အဖှီၣ်အဃိလီၤ. ဘၣ်ဆၣ် ၃ မိၤၡ့ ၁၉:၁၅ တဲဝဲလၢ “ကွၢ်မဲာ်ပှၤဖှီၣ်ဖိယာ်ဖိတဂ့ၤ. ဒီးပာ်လၤကပီၤပှၤအဒိၣ်တဂ့ၤ. နဘၣ်စံၣ်ညီၣ်ပှၤလၢနဃၢၤ ဒီးတၢ်တီတၢ်လိၤလီၤ.” ပကဲထီၣ်ပှၤလၢအကွၢ်မဲာ် ပှၤဂၤ ခီဖျိအကဲဒိၣ်မ့တမ့ၢ် အဖှီၣ်အဃိသ့ လၢကျဲဒ်လဲၣ်.
၉. တၢ်မ့ၢ်တၢ်တီလၢ အလီၤသးအုး လၢစီၤၡလိၤမိၤပာ်ဖျါထီၣ်ဝဲန့ၣ် မ့ၢ်မနုၤလဲၣ် ဒီး သိၣ်လိပှၤတၢ်ဂ့ၢ်မနုၤလဲၣ်.
ကတိၤဒိ ၁၄:၂၀) လံာ်စီဆှံတဆၢအံၤ သိၣ်လိပှၤတၢ်ဂ့ၢ်မနုၤလဲၣ်. ပမ့ၢ်တပလီၢ်ပသးဘၣ်န့ၣ် ပကရ့ထဲ ပှၤလၢ အကဲဒိၣ်တဖၣ်ဒီး ပတရ့ဒီး ပှၤလၢ အဖှီၣ်တဖၣ်ဘၣ်. ပမ့ၢ်ကွၢ်မဲာ် ပှၤဂၤခီဖျိလၢ အကဲဒိၣ်မ့တမ့ၢ် အဖှီၣ်အဃိန့ၣ် ဘၣ်မနုၤအဃိ မ့ၢ်တၢ်လၢအလီၤဘၣ်ယိၣ်လဲၣ်.
၉ စီၤၡလိၤမိၤ ဘၣ်တၢ်ထိၣ်ဟူးထိၣ်ဂဲၤထီၣ်အီၤလၢ ကကွဲးဝဲ တၢ်မ့ၢ်တၢ်တီလၢ အလီၤသူၣ်အုးသးအုးတခါအံၤလီၤ. အဝဲကွဲးဝဲလၢ “ပှၤလၢအဃၢၤဒၣ်လဲာ် သးဟ့ပှၤဖှီၣ်ဖိယာ်ဖိလီၤ. မ့မ့ၢ်ပှၤအဲၣ်ပှၤထူးပှၤတီၤန့ၣ် အိၣ်ဝဲအါဂၤလီၤ.” (၁၀. စီၤယၤကိာ်ဟ့ၣ်ပလီၢ် ခရံာ်ဖိတဖၣ် လၢတၢ်ဂ့ၢ်မနုၤလဲၣ်.
၁၀ ပမ့ၢ်ကွၢ်မဲာ်ပဒီပုၢ်ဝဲၢ်တဖၣ် ခီဖျိလၢ အကဲဒိၣ်မ့တမ့ၢ် အဖှီၣ်အဃိန့ၣ် ပဒုးအိၣ်ထီၣ် တၢ်လီၤမုၢ်လီၤဖးလၢ တၢ်အိၣ်ဖှိၣ်အပူၤသ့ဝဲလီၤ. လၢတၢ်မၢဖိအစိၤန့ၣ် တၢ်ကဲထီၣ်အသးဒီးတၢ်အိၣ်ဖှိၣ်တနီၤဒ်အံၤအဃိ စီၤယၤကိာ် ဟ့ၣ်ပလီၢ်အဝဲသ့ၣ်လီၤ. (ဖး ယၤကိာ် ၂:၂-၄ တက့ၢ်.) ပတဘၣ်ပျဲတၢ်လီၤမုၢ်လီၤဖး အိၣ်ထီၣ်လၢ ပတၢ်အိၣ်ဖှိၣ်အပူၤဘၣ်. မ့မ့ၢ်ဒ်န့ၣ်န့ၣ် ပဟးဆှဲး တၢ်စံၣ်ညီၣ်ပှၤဂၤ ဒ်တၢ်လၢပထံၣ်အီၤအသိး ကသ့ဒ်လဲၣ်.
ပမ့ၢ်သ့ၣ်ညါလီၤပသးလၢ ပလိၣ်ဘၣ်တၢ်မၤစၢၤန့ၣ် ပကဘၣ်တူၢ်လိာ်အီၤလီၤ
၁၁. ပတၢ်ရ့လိာ်သးဒီး ယဟိဝၤယွၤန့ၣ် ဒိးသန့ၤထီၣ်အသးလၢ တၢ်ထူးတၢ်တီၤအဖီခိၣ်ဧါ, တဲဖျါထီၣ်တက့ၢ်.
၁၁ ပကဘၣ်ထံၣ်ပဒီပုၢ်ဝဲၢ်တဖၣ် ဒ်ယဟိဝၤယွၤထံၣ်ဝဲအသိးလီၤ. ယဟိဝၤယွၤ ပာ်လုၢ်ပာ်ပှ့ၤပှၤ တမ့ၢ်လၢပကဲဒိၣ် မ့တမ့ၢ် ပဖှီၣ်အဃိဘၣ်. ပတၢ်ရ့လိာ်သးဒီး ယဟိဝၤယွၤန့ၣ် တဒိးသန့ၤထီၣ်အသးလၢ ပစ့ မ့တမ့ၢ် ပတၢ်ထူးတၢ်တီၤအိၣ်ထဲလဲၣ်န့ၣ်ဘၣ်. ယ့ၣ်ၡူးတဲဝဲလၢ “ပှၤအထူးအတီၤ ကလဲၤနုာ်ဆူ မူခိၣ်မးသဲ ၁၉:၂၃) ယ့ၣ်ၡူးတဲစ့ၢ်ကီးဝဲလၢ “ပှၤဖှီၣ်ဖိယာ်ဖိတဖၣ်အံၤ, ဘၣ်ဆိၣ်ဂ့ၤဝဲလီၤ. အဂ့ၢ်ဒ်အံၤ, ယွၤအဘီအမုၢ်န့ၣ်မ့ၢ်သုတၢ်လီၤ.” (လူၤကၣ် ၆:၂၀) ဘၣ်ဆၣ် အခီပညီတမ့ၢ်လၢ ပှၤလၢအဖှီၣ်ခဲလၢာ် ကဒိကနၣ်ယ့ၣ်ၡူး ဒီးဒိးန့ၢ်ဘၣ်တၢ်ဆိၣ်ဂ့ၤလၢ အလီၤဆီန့ၣ်ဘၣ်. ပှၤအဖှီၣ်အါဂၤ တပိာ်ယ့ၣ်ၡူးအခံဘၣ်. ပမ့ၢ်တဲတီတီန့ၣ် ပှၤတဂၤအတၢ်ရ့လိာ်သးဒီး ယဟိဝၤယွၤန့ၣ် တဒိးသန့ၤထီၣ်အသးလၢ အတၢ်ထူးတၢ်တီၤအဃိဘၣ်.
အဘီအမုၢ်အပူၤကီမးလီၤ” ဘၣ်ဆၣ်အဝဲတတဲဝဲလၢ အဝဲသ့ၣ်လဲၤနုာ်လီၤဘၣ်ဝဲ တသ့ဘၣ်န့ၣ်ဘၣ်. (၁၂. ပှၤကဲဒိၣ်မ့ၢ်ဂ့ၤ ပှၤအဖှီၣ်မ့ၢ်ဂ့ၤ လံာ်စီဆှံဟ့ၣ်ပလီၢ်အဝဲသ့ၣ်ဒ်လဲၣ်.
၁၂ လၢယဟိဝၤယွၤအတၢ်ကရၢကရိအပူၤ ဒီပုၢ်ဝဲၢ်မုၣ်ခွါလၢ အကဲဒိၣ်အိၣ် ဒီးအဖှီၣ်အိၣ်ဝဲစ့ၢ်ကီးလီၤ. ဘၣ်ဆၣ်အဝဲသ့ၣ်ခဲလၢာ် အဲၣ်ယဟိဝၤယွၤဒီးမၤအတၢ်မၤလၢ သူၣ်ဒီဖျၢၣ်သးဒီဖျၢၣ်လီၤ. လံာ်စီဆှံတဲဘၣ် ပှၤကဲဒိၣ်တဖၣ် ဒ်သိးအ “သုတပာ်ထီၣ်ထီအသး, ဒီးသနံာ်သန့ၤအသး လၢတၢ်ထူးတၢ်တီၤလၢ အတဂၢၢ်တကျၢၤဘၣ်တဂ့ၤ. မ့ၢ်လၢယွၤ” အအိၣ်န့ၣ်တက့ၢ်. (ဖး ၁ တံၤမသ့း ၆:၁၇-၁၉ တက့ၢ်.) ယဟိဝၤယွၤ အခ့အပှၤခဲလၢာ်လၢ အကဲဒိၣ်မ့ၢ်ဂ့ၤ အဖှီၣ်မ့ၢ်ဂ့ၤ ယွၤအကလုၢ်ကထါ ဟ့ၣ်ပလီၢ် အဝဲသ့ၣ်လၢ တၢ်အဲၣ်စ့န့ၣ် ကဲထီၣ်တၢ်လၢ အလီၤဘၣ်ယိၣ်ဒိၣ်မးလီၤ. (၁ တံၤမသ့း ၆:၉, ၁၀) ပမ့ၢ်ထံၣ်ပဒီပုၢ်ဝဲၢ်တဖၣ် ဒ်ယဟိဝၤယွၤထံၣ်ဝဲအသိးန့ၣ် ပတကွၢ်မဲာ်အဝဲသ့ၣ်ခီဖျိ အတၢ်ထူးတၢ်တီၤအဃိဘၣ်. ဘၣ်ဆၣ် ပမ့ၢ်ဆိကမိၣ်ဆံးပှၤဂၤ ခီဖျိ အသးအနံၣ်အလါအဃိန့ၣ် ကြၢးဝဲဘၣ်ဝဲစ့ၢ်ကီးဧါ.
တဘၣ်ဆိကမိၣ်ဆံးပှၤဂၤ ခီဖျိအသးနံၣ်အဃိတဂ့ၤ
၁၃. လံာ်စီဆှံသိၣ်လိပှၤလၢ ပကဘၣ်ရ့ဒီးပှၤသးပှၢ်တဖၣ်ဒ်လဲၣ်.
၁၃ လံာ်စီဆှံ ပာ်ဖျါထီၣ်ဝဲလၢ ပကဘၣ်ပာ်ကဲပှၤသးပှၢ်လီၤ. ၃ မိၤၡ့ ၁၉:၃၂ တဲဝဲလၢ “နဘၣ်ဂဲၤဆၢထၢၣ်လၢ တၢ်ခိၣ်ဝါအမဲာ်ညါ, ဒီးပာ်လၤကပီၤပှၤသးပှၢ်အမဲာ်, ဒီးပျံၤနကစၢ်လီၤ.” ဒီး ကတိၤဒိ ၁၆:၃၁ တဲစ့ၢ်ကီးဝဲလၢ ပှၤလၢ “ခိၣ်ဝါန့ၣ်မ့ၢ်အိၣ်ဝဲလၢ တၢ်တီတၢ်လိၤအကျဲဒီး, မ့ၢ်တၢ်ခိၣ်သလုးအိၣ်ဒီးအလၤကပီၤလီၤ.” စီၤပီလူးတဲဘၣ် စီၤတံၤမသ့းလၢတဘၣ် အ့န့ပှၤသးပှၢ်တဖၣ်တဂ့ၤ ဒီးပိာ်ခွါလၢ အသးပှၢ်န့ၣ် ရ့ဒီးအီၤဒ်ပၢ်အသိးတက့ၢ်. (၁ တံၤမသ့း ၅:၁, ၂) စီၤတံၤမသ့း အိၣ်ဒီးမူဒါလၢ အပတီၢ်ထီန့ၢ်ဒံး ပှၤသးပှၢ်တဖၣ် ဘၣ်ဆၣ်အဝဲအိၣ်ဒီးတၢ်သးကညီၤ ဒီးတၢ်ပာ်ကဲထီဘိလီၤ.
၁၄. ဘၣ်မနုၤအဃိ တဘျီတခီၣ် ပဘၣ်သိၣ်က့ၤသီက့ၤ ပှၤလၢအသးပှၢ်န့ၢ်ပှၤတဖၣ်လဲၣ်.
၁၄ ပှၤလၢအသးပှၢ်တဂၤ မ့ၢ်မၤတၢ်ဒဲးဘး မ့တမ့ၢ် မၤတၢ်တမံၤမံၤလၢ တဘၣ်ကစၢ်ယွၤအသးဘၣ်န့ၣ် နကမၤဒ်လဲၣ်. ပှၤလၢအသးအိၣ်မၤ တၢ်ကမၣ်တဂၤ အဝဲမ့မ့ၢ်ပှၤသးပှၢ် ဒီးပှၤလၢ ပှၤပာ်ကဲအီၤသနာ်က့ ယဟိဝၤယွၤတကွၢ်မဲာ်အီၤဘၣ်. ပာ်သူၣ်ပာ်သးလၢ ဖဲ ယၡါယၤ ၆၅:၂၀ န့ၣ် တဲဝဲလၢ “ပှၤတၢ်ဒဲးဘးဖိလၢ အသးပှၢ်တကယၤန့ၣ် ကဘၣ်တၢ်ဆိၣ်အၢအီၤလီၤ.” ဒီးလံာ်စီဆှံ အတၢ်သိၣ်တၢ်သီလၢ ယဃ့းစက့လးအပူၤစ့ၢ်ကီး တဲဝဲဒ်န့ၣ်လီၤ. (ယဃ့းစက့လး ၉:၅-၇) တၢ်လၢအရ့ဒိၣ်ကတၢၢ်န့ၣ် ပကဘၣ်ပာ်ကဲ ပှၤလၢအသးပှၢ်ကတၢၢ်လၢအမ့ၢ် ယဟိဝၤယွၤန့ၣ်လီၤ. (ဒၤနံးယ့လး ၇:၉, ၁၀, ၁၃, ၁၄) ပတၢ်ပာ်ကဲအီၤန့ၣ် ကဟ့ၣ်ပှၤတၢ်သူၣ်ဒူသးဒူ ဒ်သိးပကသိၣ်က့ၤသီက့ၤ ပှၤလၢအသးပှၢ်မ့ၢ်ဂ့ၤ အသးစၢ်မ့ၢ်ဂ့ၤ လၢအလိၣ်ဘၣ် တၢ်သိၣ်က့ၤသီက့ၤတဖၣ်န့ၣ်လီၤ.—ကလၤတံ ၆:၁.
ဒီပုၢ်ဝဲၢ်ခွါလၢ အသးစၢ်တဖၣ်န့ၣ် မ့ၢ်နပာ်ကဲအီၤဧါ (ကွၢ်လံာ်အဆၢ ၁၅)
၁၅. ဘၣ်ဃးဒီး တၢ်ပာ်ကဲ ဒီပုၢ်ဝဲၢ်ခွါလၢ အသးစၢ်တဖၣ်န့ၣ် ပမၤလိန့ၢ်တၢ်လၢ တၢ်မၢဖိပီလူးအအိၣ်ဒ်လဲၣ်.
၁၅ ဒီပုၢ်ဝဲၢ်ခွါတဂၤ အဝဲမ့မ့ၢ်ပှၤသးစၢ်သနာ်က့ မ့ၢ်ပှၤကြၢး ယူးယီၣ်ပာ်ကဲအီၤစ့ၢ်ကီးဧါ. ပှၤကြၢးယူးယီၣ်ပာ်ကဲအီၤလီၤ. စီၤပီလူးတဲစီၤတံၤမသ့းလၢ “နဲဒၣ်အံၤ, မ်နသုတဒုးမၤတရီတပါနၤလၢနသးစၢ်အဃိ, လၢပှၤနီတဂၤတဂ့ၤ. မ့မ့ၢ်မ်နကဲလၢ တၢ်အဒိအတဲာ်လၢ ပှၤစူၢ်က့ၤနာ်က့ၤတၢ်အမဲာ်ညါ လၢတၢ်ကတိၤ, လၢတၢ်ဖံးတၢ်မၤ, လၢတၢ်အဲၣ်တၢ်ကွံ, လၢတၢ်စူၢ်တၢ်နာ်, လၢတၢ်စီဆှံအပူၤတက့ၢ်.” (၁ တံၤမသ့း ၄:၁၂) ဖဲစီၤပီလူးကွဲးလံာ်အံၤအခါ ဘၣ်သ့ၣ်သ့ၣ် စီၤတံၤမသ့းကအိၣ်အနံၣ် ၃၀ ဃၣ်ဃၣ်လီၤ. ဘၣ်ဆၣ် စီၤပီလူးဟ့ၣ်လီၤအီၤ မူဒါလၢအရ့ဒိၣ်တဖၣ်လီၤ. ပန့ၢ်ဘၣ်တၢ်မၤလိဒ်လဲၣ်. ပတကြၢးဆိမိၣ်ဆံး ဒီပုၢ်ဝဲၢ်ခွါ သးစၢ်တဖၣ် ခီဖျိလၢအသးနံၣ်အဃိဘၣ်. သ့ၣ်နီၣ်ထီၣ်လၢ ယ့ၣ်ၡူးစ့ၢ်ကီးဖဲအသးအိၣ် ၃၃ နံၣ်အခါ အဝဲမၤဝဲအတၢ်မၤလၢ ကစၢ်ယွၤဟ့ၣ်လီၤအီၤလၢ ဟီၣ်ခိၣ်န့ၣ်ဝံၤဝဲခဲလၢာ်လီၤ.
၁၆, ၁၇. (က) ဒီပုၢ်ဝဲၢ်ခွါတဂၤ အဝဲတုၤထီၣ်ထီၣ်ဘးလၢ ကကဲတၢ်အိၣ်ဖှိၣ်အပှၤမၤစၢၤတၢ်ဧါ တတုၤထီၣ်ထီၣ်ဘးဒံးဘၣ်ဧါန့ၣ် တၢ်အိၣ်ဖှိၣ်သးပှၢ်တဖၣ် ကဘၣ်ဆၢတဲာ်ဝဲဒ်လဲၣ်. (ခ) ပနီၢ်ကစၢ်တၢ်ထံၣ် မ့တမ့ၢ် ပှၤလၢပဟီၣ်ကဝီၤအပူၤတဖၣ် အလုၢ်အလၢ်န့ၣ် ထီဒါလိာ်သးဒီး တၢ်လၢလံာ်စီဆှံတဲဝဲတဖၣ်သ့ဒ်လဲၣ်.
၁၆ တၢ်လီၢ်တနီၤနီၤန့ၣ် လုၢ်လၢ်အိၣ်ဝဲလၢ ပှၤတပာ်ကဲ ပှၤသးစၢ်တဖၣ်ဘၣ်. လၢတၢ်န့ၣ်အဃိ သးစၢ်တဂၤ မ့ၢ်တုၤထီၣ်ထီၣ်ဘးလၢ ကကဲတၢ်အိၣ်ဖှိၣ်အပှၤမၤစၢၤတၢ် မ့တမ့ၢ် တၢ်အိၣ်ဖှိၣ်သးပှၢ်သနာ်က့ တၢ်အိၣ်ဖှိၣ်သးပှၢ်တနီၤနီၤ တဒုးကဲထီၣ်အီၤဒံးဘၣ်. ဘၣ်ဆၣ် ဒ်သိးဒီပုၢ်ဝဲၢ်တဂၤ ကကဲထီၣ်တၢ်အိၣ်ဖှိၣ်သးပှၢ် မ့တမ့ၢ် တၢ်အိၣ်ဖှိၣ်အပှၤမၤစၢၤတၢ်အဂီၢ် အသးနံၣ်ကဘၣ်အိၣ်ထဲလဲၣ်န့ၣ် လံာ်စီဆှံတပာ်ဖျါထီၣ်ဝဲဘၣ်. (၁ တံၤမသ့း ၃:၁-၁၀, ၁၂, ၁၃; တံတူး ၁:၅-၉) တၢ်အိၣ်ဖှိၣ်သးပှၢ် မ့ၢ်ထုးထီၣ်တၢ်သိၣ်တၢ်သီဒ်အံၤ ခီဖျိလၢ အတၢ်ဆဲးတၢ်လၤအဃိန့ၣ် တမ့ၢ်အဝဲမၤထွဲလံာ်စီဆှံ အတၢ်သိၣ်တၢ်သီလၢၤဘၣ်. တၢ်အိၣ်ဖှိၣ်သးပှၢ်တဖၣ် တကြၢးကွၢ်ဝဲ ဒီပုၢ်ဝဲၢ်သးစၢ်တဖၣ် ခီဖျိအနီၢ်ကစၢ်တၢ်ထံၣ် မ့တမ့ၢ် အတၢ်ဆဲးတၢ်လၤန့ၣ်ဘၣ်. လၢတၢ်န့ၣ်အလီၢ် အဝဲသ့ၣ်ကဘၣ်ကွၢ်ဝဲ ဒ်လံာ်စီဆှံအတၢ်သိၣ်တၢ်သီအိၣ်ဝဲအသိးလီၤ.—၂ တံၤမသ့း ၃:၁၆, ၁၇.
၁၇ တၢ်အိၣ်ဖှိၣ်သးပှၢ်တဖၣ် မ့ၢ်တမၤထွဲလံာ်စီဆှံအတၢ်ဟံးစုနဲၣ်ကျဲဘၣ်န့ၣ် လီၤဂာ်ဒ်သိးအဝဲသ့ၣ် တြီဝဲဒီပုၢ်ဝဲၢ်ခွါလၢ အတုၤထီၣ်ထီၣ်ဘးတဖၣ် လၢကကဲထီၣ်တၢ်အိၣ်ဖှိၣ်သးပှၢ် မ့တမ့ၢ် တၢ်အိၣ်ဖှိၣ်အပှၤမၤစၢၤတၢ်န့ၣ်လီၤ. လၢထံကီၢ်တဘ့ၣ်န့ၣ် တၢ်အိၣ်ဖှိၣ်အပှၤမၤစၢၤတၢ်တဂၤ မၤဝဲမူဒါလၢအရ့ဒိၣ်တဖၣ်သ့ဂ့ၤဂ့ၤလံ ဒီးတၢ်အိၣ်ဖှိၣ်သးပှၢ်တနီၤ တူၢ်လိာ်ဝဲလၢ ဒ်လံာ်စီဆှံပာ်ဖျါထီၣ်ဝဲအသိး အဝဲတုၤထီၣ်ထီၣ်ဘးလၢ ကကဲထီၣ် တၢ်အိၣ်ဖှိၣ်သးပှၢ်လံ. ဘၣ်ဆၣ် တၢ်အိၣ်ဖှိၣ်သးပှၢ်တနီၤ တဲဝဲလၢ ဒီပုၢ်ဝဲၢ်အံၤ အသးစၢ်တလၢလၢ ကကဲထီၣ်တၢ်အိၣ်ဖှိၣ်သးပှၢ်အဃိ အဝဲသ့ၣ်တဒုးကဲထီၣ်ဝဲဘၣ်. လီၤသးအုးဒိၣ်မးလၢ ဒီပုၢ်ဝဲၢ်သးစၢ်တဂၤအံၤ ပှၤထံၣ်အီၤလၢအသးစၢ်ဒံးအဃိ ပှၤတဒုးကဲထီၣ်အီၤလၢ တၢ်အိၣ်ဖှိၣ်သးပှၢ်ဘၣ်. ဒီးဖျါလၢ တၢ်လီၢ်အါတီၤန့ၣ် ပှၤအါဂၤ အတၢ်ထံၣ်အိၣ်ဝဲဒ်န့ၣ်လီၤ. လၢတၢ်န့ၣ်အဃိ ပတကြၢးမၤဒ်ပနီၢ်ကစၢ်အတၢ်ထံၣ် မ့တမ့ၢ် ပှၤလၢပဟီၣ်ကဝီၤပူၤတဖၣ် အလုၢ်အလၢ်အသိးန့ၣ်ဘၣ်. အရ့ဒိၣ်ဒိၣ်မးလၢ ပကဘၣ်မၤထွဲလံာ်စီဆှံ အတၢ်ဟံးစုနဲၣ်ကျဲန့ၣ်လီၤ. ပမ့ၢ်မၤဒ်န့ၣ်န့ၣ် မ့ၢ်ဝဲပဒိကနၣ်ယ့ၣ်ၡူးအကလုၢ် ဒီးပတစံၣ်ညီၣ်ပှၤဂၤဒ် တၢ်လၢပထံၣ်အီၤလၢပမဲာ်အသိးဘၣ်.
စံၣ်ညီၣ်တၢ်တီတီလိၤလိၤတက့ၢ်
၁၈, ၁၉. ဒ်သိးပကထံၣ် ပဒီပုၢ်ဝဲၢ်တဖၣ် ဒ်ယဟိဝၤယွၤထံၣ်ဝဲအသိးဂီၢ် တၢ်မနုၤကမၤစၢၤပှၤလဲၣ်.
၁၈ ပတမ့ၢ်ပှၤလၢပှၤပှဲၤသနာ်က့ ပမၤလိသ့ထီၣ်ပသးလၢ ပကထံၣ်ပှၤဂၤဒ် ယဟိဝၤယွၤထံၣ်ဝဲအသိး သ့ဝဲလီၤ. (မၤတၢ် ၁၀:၃၄, ၃၅) ပမၤဒ်န့ၣ်သ့ခီဖျိ ပမၤထွဲ လံာ်စီဆှံအတၢ်ဟံးစုနဲၣ်ကျဲထီဘိန့ၣ်လီၤ. ပမ့ၢ်မၤထွဲအီၤန့ၣ် မ့ၢ်ဒၣ်ပမၤထွဲ ယ့ၣ်ၡူးအတၢ်ပမၤလိာ် လၢအမ့ၢ် “စံၣ်ညီၣ်တၢ် ဒ်သုမဲာ်ထံၣ်တၢ်အသိးတဂ့ၤ. စံၣ်ညီၣ်တၢ်တီတီတက့ၢ်.”—ယိၤဟၣ် ၇:၂၄.
၁၉ တယံာ်လၢၤဘၣ်န့ၣ် ပစီၤပၤယ့ၣ်ၡူး ကစံၣ်ညီၣ်ပှၤခဲလၢာ်လီၤ. အတၢ်စံၣ်ညီၣ်န့ၣ် ကဒိးသန့ၤထီၣ် အသးလၢ ယဟိဝၤယွၤအတၢ်သိၣ်တၢ်သီ ဒီးအဝဲတစံၣ်ညီၣ် တၢ်ဒ်တၢ်လၢအထံၣ် ဒီးအနၢ်ဟူဝဲအသိးဘၣ်. (ယၡါယၤ ၁၁:၃, ၄) ပခိးကွၢ်လၢ်တၢ်ဆၢကတီၢ်လၢ အပှဲၤဒီးတၢ်သူၣ်ခုသးခုအံၤလီၤ.