မၤသကိးတၢ်ဒီး ယဟိဝၤယွၤကိးနံၤဒဲး
“ပမ့ၢ်ယွၤအပှၤမၤသကိးတၢ်တဖၣ်န့ၣ်လီၤ.”—၁ ကရံၣ်သူး ၃:၉.
၁. ပမၤသကိးတၢ်ဒီး ယဟိဝၤယွၤ သ့လၢကျဲဒ်လဲၣ်.
ယဟိဝၤယွၤတ့လီၤ ပှၤဟီၣ်ခိၣ်ဖိတဖၣ်ဝံၤ အဝဲအဲၣ်ဒိးဝဲလၢ အဝဲသ့ၣ်ကမၤသကိးတၢ်ဒီးအီၤလီၤ. မုၢ်မဆါတနံၤအံၤ ပှၤဟီၣ်ခိၣ်ဖိတဖၣ် တမ့ၢ်ပှၤလၢပှၤပှဲၤသနာ်က့ ပှၤလၢအသးတီတဖၣ် ဆဲးမၤသကိးတၢ်ဒီးယဟိဝၤယွၤသ့ဝဲ ကိးနံၤဒဲးလီၤ. အဒိ ဖဲပဟးစံၣ်တဲၤတဲလီၤ ယွၤအဘီမုၢ်တၢ်သးခုကစီၣ် ဒီးဒုးကဲထီၣ်ပှၤဂၤလၢ ခရံာ်အပျဲၢ်အဘီၣ်အခါ “ပမ့ၢ်ယွၤအပှၤမၤသကိးတၢ်တဖၣ်” လီၤ. (၁ ကရံၣ်သူး ၃:၅-၉) တၢ်ဘၣ်တ့ခဲလၢာ်အကစၢ်တဂၤ ဃုထၢပှၤလၢပကမၤအတၢ်မၤလၢ အရ့ဒိၣ်တခါအံၤအဃိ မ့ၢ်ဝဲတၢ်ခွဲးတၢ်ယာ်ဖးဒိၣ်တခါလီၤ. ပမၤသကိးတၢ်ဒီးယဟိဝၤယွၤန့ၣ် တမ့ၢ်ထဲ တၢ်စံၣ်တဲၤတဲလီၤတၢ်မၤတခါဘၣ်. လၢတၢ်မၤလိအံၤအပူၤ ပကမၤလိဘၣ်လၢ ဖဲပမၤသကိးတၢ်ဒီး ပဟံၣ်ဖိဃီဖိ ဒီးပှၤလၢတၢ်အိၣ်ဖှိၣ်ပူၤ တကးဒံးဘၣ် ဖဲပတူၢ်လိာ်မုာ်တမှံၤ, ဖဲပမၤစၢၤတၢ်လၢ တၢ်ကရၢကရိအတၢ်ဖံးတၢ်မၤ ဒီးဖဲပမၤအါထီၣ် ပတၢ်စံၣ်တဲၤတဲလီၤတၢ်မၤအခါ မ့ၢ်ဝဲပမၤသကိးတၢ်ဒီးယဟိဝၤယွၤလီၤ.—ကလီးစဲ ၃:၂၃.
၂. ပမၤယဟိဝၤယွၤအတၢ်မၤန့ၣ် ဘၣ်မနုၤအဃိ ပတကြၢးထိၣ်သတြီၤပသးဒီး ပှၤဂၤဘၣ်လဲၣ်.
၂ ဖဲပမၤလိ တၢ်မၤလိအံၤအခါ အရ့ဒိၣ်လၢ ပကဘၣ်သ့ၣ်နီၣ်ထီၣ် လၢပဝဲတဂၤဒီးတဂၤ ပတၢ်အိၣ်သးတဒ်သိးလိာ်အသးဘၣ်. ပသးအနံၣ်, ပတၢ်အိၣ်ဆူၣ်အိၣ်ချ့, ပတၢ်အိၣ်သး ဒီးပတၢ်သ့တၢ်ဘၣ် တဒ်သိးလိာ်အသးဘၣ်. လၢတၢ်န့ၣ်အဃိ ဖဲနမၤယဟိဝၤယွၤအတၢ်မၤအခါ တဘၣ်ထိၣ်သတြီၤနသးဒီး ပှၤဂၤတဂ့ၤ. တၢ်မၢဖိ ပီလူးတဲဝဲလၢ “မ်ပှၤပစီကွၢ် အတၢ်မၤဒၣ်ဝဲကိးဂၤဒဲးတက့ၢ်. တုၤနုၤတစုကအိၣ် ဒီးတၢ်သးခုလၢ အကစၢ်ဒၣ်ဝဲတဂၤဃီအဂ့ၢ်, ဒီးတမ့ၢ်ဘၣ်လၢ ပှၤဂၤအဂ့ၢ်ဘၣ်.”—ကလၤတံ ၆:၄.
မၤစၢၤ နဟံၣ်ဖိဃီဖိ ဒီးပှၤလၢတၢ်အိၣ်ဖှိၣ်ပူၤတဖၣ်
၃. ဘၣ်မနုၤအဃိ ပတဲသ့လၢ ပှၤလၢအကွၢ်ထွဲ အဟံၣ်ဖိဃီဖိန့ၣ် မ့ၢ်ဝဲပှၤမၤသကိးတၢ်ဒီး ယဟိဝၤယွၤလဲၣ်.
၃ ယဟိဝၤယွၤမုၢ်လၢ်ဝဲလၢ ပကကွၢ်ထွဲ ပဟံၣ်ဖိဃီဖိတဖၣ်လီၤ. အဒိ နကဘၣ်ဃုစ့ ဒ်သိး နကကွၢ်ထွဲ နဟံၣ်ဖိဃီဖိအဂီၢ်လီၤ. မိၢ်အါဂၤ ဘၣ်အိၣ်လၢဟံၣ် ဒီးကွၢ်အဖိဆံးလီၤ. ဖဲပမိၢ်ပပၢ် ကွၢ်ထွဲလီၤအနီၢ်ကစၢ်အသး တသ့လၢၤဘၣ်အခါ ပကဘၣ်ကွၢ်ထွဲအဝဲသ့ၣ်လီၤ. မူဒါတဖၣ်အံၤ မ့ၢ်ဝဲတၢ်လၢ အရ့ဒိၣ်လၢ ပကဘၣ်မၤအီၤလီၤ. လံာ်စီဆှံတဲဝဲလၢ “ပှၤမ့ၢ်တအံးတကွၢ်ဘၣ်အတၢ်ဒၣ်ဝဲ, လီၤဆီဒၣ်တၢ်အဟံၣ်ဖိဒၣ်ဝဲဒီး, မ့ၢ်အညိကွံာ်တၢ်နာ် ဒီးအၢန့ၢ်ပှၤတနာ်ဘၣ်တၢ်တက့ၢ်လီၤ.” (၁ တံၤမသ့း ၅:၈) နမ့ၢ်အိၣ်ဒီးမူဒါလၢ နဘၣ်ကွၢ်ထွဲ နဟံၣ်ဖိဃီဖိန့ၣ် ဘၣ်သ့ၣ်သ့ၣ် နမၤယဟိဝၤယွၤအတၢ်မၤတန့ၢ် ထဲသိးဒီး နအဲၣ်ဒိးမၤဘၣ်. ဘၣ်ဆၣ်တဘၣ်သးဟးဂီၤတဂ့ၤ. ဖဲနမၤန့ၢ်တၢ်လၢ နဟံၣ်ဖိဃီဖိအဂီၢ်အခါ ယဟိဝၤယွၤသးခုဝဲလီၤ.—၁ ကရံၣ်သူး ၁၀:၃၁.
၄. မိၢ်ပၢ်တဖၣ် ပာ်ဆိယွၤအဘီအမုၢ်ကသ့ဒ်လဲၣ်, ဒီးအဝဲသ့ၣ်မ့ၢ်မၤဝဲဒ်န့ၣ်န့ၣ် ကကဲဘျုးဒ်လဲၣ်.
၄ ခရံာ်ဖိမိၢ်ပၢ်တဖၣ် မၤသကိးတၢ်ဒီးယဟိဝၤယွၤသ့ခီဖျိ မၤစၢၤအဖိတဖၣ်လၢ ကအိၣ်ဒီးဖီတၢၣ်လၢ ကမၤယဟိဝၤယွၤအတၢ်မၤန့ၣ်လီၤ. မိၢ်ပၢ်အါဂၤမၤဝဲဒ်န့ၣ်လီၤ. လၢတၢ်န့ၣ်အဃိ လၢခံန့ၣ်အဖိတဖၣ် ဆၢတဲာ်လီၤအသးလၢ ကမၤကစၢ်ယွၤအတၢ်မၤလၢ ဆၢကတီၢ်လၢပှဲၤ ဒီးတနီၤနီၤန့ၣ် လဲၤမၤယွၤအတၢ်မၤလၢ တၢ်လီၢ်အယံၤလီၤ. ဒီးအဝဲသ့ၣ်တနီၤနီၤန့ၣ် မ့ၢ်ဝဲ မံးၡ့ၣ်နရ့ၣ်, တနီၤန့ၣ်လဲၤမၤပှၤလဲၤလၢညါလၢ တၢ်လီၢ်လၢ ပှၤလိၣ်ဘၣ်အါထီၣ် ပှၤစံၣ်တဲၤတဲလီၤတၢ်ဖိ ဒီးတနီၤနီၤလဲၤမၤတၢ်လၢ ဘ့ၤသ့လးန့ၣ်လီၤ. ခီဖျိလၢ ဖိတဖၣ်အိၣ်လၢတၢ်လီၢ်ယံၤအဃိ မိၢ်ပၢ်တဖၣ် တရ့ဘၣ်ဒီးအဝဲသ့ၣ်အါအါဘၣ်. ဘၣ်ဆၣ်အဝဲသ့ၣ် ဟ့ၣ်ဂံၢ်ဟ့ၣ်ဘါအဖိတဖၣ်လၢ ကဆဲးမၤယဟိဝၤယွၤအတၢ်မၤလီၤ. ဘၣ်မနုၤအဃိလဲၣ်. ခီဖျိလၢ အဝဲသ့ၣ်အဖိတဖၣ် ပာ်ယဟိဝၤယွၤလၢ နီၣ်ဂံၢ်တၢလၢ အတၢ်အိၣ်မူအပူၤအဃိ အဝဲသ့ၣ်သးခုဒိၣ်မးလီၤ. (၃ ယိၤဟၣ် ၄) မိၢ်ပၢ်အါဂၤ တူၢ်ဘၣ်ဝဲဒ် နီၢ်ဃးနၤအသိးလီၤ. နီၢ်ဃးနၤတဲဝဲလၢ အဝဲ “ဒုးလိၢ်” အဖိခွါစီၤၡမူၤအ့လးလၢ ယဟိဝၤယွၤလီၤ. အဝဲသ့ၣ်တူၢ်ဘၣ်ဝဲလၢ အမၤသကိးဘၣ်တၢ်ဒီး ယဟိဝၤယွၤလၢ ကျဲဒ်အံၤန့ၣ် မ့ၢ်ဝဲတၢ်ခွဲးတၢ်ယာ်ဖးဒိၣ်တခါလီၤ.—၁ ၡမူၤအ့လး ၁:၂၈.
၅. နမၤစၢၤဒီပုၢ်ဝဲၢ်မုၣ်ဒီပုၢ်ဝဲၢ်ခွါလၢ နတၢ်အိၣ်ဖှိၣ်အပူၤကသ့ဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၅ နမ့ၢ်တဘၣ်ကွၢ်ထွဲနဟံၣ်ဖိဃီဖိဒံးဘၣ်န့ၣ် နမၤစၢၤ ဒီပုၢ်ဝဲၢ်မုၣ်ခွါလၢ အအိၣ်တဆူၣ်ဘၣ်, အသးပှၢ် မ့တမ့ၢ် လၢအလိၣ်ဘၣ်တၢ်မၤစၢၤတဖၣ်ကသ့ဧါ. မ့တမ့ၢ် နမၤစၢၤ ပှၤလၢအကွၢ်ထွဲ အဝဲသ့ၣ်တဖၣ်သ့ဧါ. ဃုကျဲလၢ နကမၤစၢၤပှၤလၢ တၢ်အိၣ်ဖှိၣ်အပူၤ လၢအလိၣ်ဘၣ်တၢ်မၤစၢၤတဖၣ်တက့ၢ်. အဒိ ဘၣ်သ့ၣ်သ့ၣ် ဒီပုၢ်ဝဲၢ်မုၣ်တဂၤ ကကွၢ်ထွဲဝဲ အမိၢ်အပၢ်လၢ အသးပှၢ်လီၤ. ဒ်သိးအဝဲမၤတၢ်လၢအဂၤတမံၤမံၤ ကသ့အဂီၢ် နလဲၤကွၢ်စၢၤအမိၢ်အပၢ်ကသ့ဧါ. မ့တမ့ၢ် ဘၣ်သ့ၣ်သ့ၣ် နမၤစၢၤပှၤလၢ အလိၣ်ဘၣ်တၢ်မၤစၢၤလၢ ကလဲၤထီၣ်တၢ်အိၣ်ဖှိၣ် မ့တမ့ၢ် ကလဲၤပှ့ၤတၢ်တဖၣ်သ့ဝဲလီၤ. ဒီးနလဲၤဟးအိၣ်သကိး ပှၤလၢထီၣ်တၢ်ဆါဟံၣ်တဖၣ်သ့ဝဲလီၤ. နမ့ၢ်မၤဒ်န့ၣ်န့ၣ် မ့ၢ်ဝဲနမၤသကိးတၢ်ဒီး ယဟိဝၤယွၤဒ်သိး အဝဲကစံးဆၢ ပှၤဂၤအတၢ်ထုကဖၣ်အဂီၢ်လီၤ.—ဖး ၁ ကရံၣ်သူး ၁၀:၂၄ တက့ၢ်.
တူၢ်လိာ်မုာ်ပှၤတမှံၤ
၆. ပပာ်ဖျါထီၣ် တၢ်အဲၣ်တၢ်ကွံကသ့ဒ်လဲၣ်.
ဖဲတၢ်ခွဲးတၢ်ယာ်အိၣ် တဘျီလၢ်လၢ်န့ၣ် ပကြၢးမၤစၢၤပှၤဂၤ
၆ ပှၤလၢအမၤသကိးတၢ် ဒီးယွၤန့ၣ် ဘၣ်တၢ်သ့ၣ်ညါအီၤလၢ အမ့ၢ်ပှၤလၢ အတူၢ်လိာ်မုာ်ပှၤတမှံၤလီၤ. လၢလံာ်စီဆှံပူၤ ကြံးအတၢ်ကတိၤလၢ ဘၣ်တၢ်ကွဲးကျိာ်ထံက့ၤအီၤလၢ “တၢ်အဲၣ်ပှၤတမှံၤ” န့ၣ် အခီပညီမ့ၢ်ဝဲ ‘တၢ်ပာ်ဖျါထီၣ် တၢ်အဲၣ်တၢ်ကွံလၢ ပှၤလၢအအိၣ်ဟဲလၢ တၢ်လီၢ်အဂၤတဖၣ်’ န့ၣ်လီၤ. (ဧ့ၤဘြံၤ ၁၃:၂) လံာ်စီဆှံပာ်ဖျါထီၣ်ဝဲ တၢ်အဒိအတဲာ်ဘၣ်ဃးဒီး ပပာ်ဖျါထီၣ် တၢ်အဲၣ်တၢ်ကွံကသ့ဒ်လဲၣ်န့ၣ်လီၤ. (၁ မိၤၡ့ ၁၈:၁-၅) ပမၤစၢၤပှၤဂၤသ့ဒီး တၢ်ခွဲးတၢ်ယာ် မ့ၢ်အိၣ်ထီၣ်လၢ ပကမၤစၢၤပှၤဂၤန့ၣ် အဝဲသ့ၣ်မ့တမ့ၢ် “ပှၤစူၢ်က့ၤနာ်က့ၤတၢ်” သနာ်က့ ပကြၢးမၤစၢၤအဝဲသ့ၣ်လီၤ.—ကလၤတံ ၆:၁၀.
၇. ပမ့ၢ်တူၢ်လိာ်မုာ် ပှၤလၢအမၤကစၢ်ယွၤအတၢ်မၤ လၢဆၢကတီၢ်လၢပှဲၤန့ၣ် ကကဲဘျုးဝဲဒ်လဲၣ်.
၇ ဖဲပှၤလၢအမၤယွၤအတၢ်မၤလၢ ဆၢကတီၢ်လၢပှဲၤတဖၣ် ဟဲလၢနအိၣ်တၢ်လီၢ်အခါ မ့ၢ်နတူၢ်လိာ်မုာ်အီၤလၢနဟံၣ်ကသ့ဧါ. နမ့ၢ်တူၢ်လိာ်မုာ်အဝဲသ့ၣ်န့ၣ် မ့ၢ်ဒၣ်နမၤသကိးတၢ်ဒီးယဟိဝၤယွၤလီၤ. (ဖး ၃ ယိၤဟၣ် ၅, ၈ တက့ၢ်.) တကးဒံးဘၣ် ကကဲဘျုးလၢအဝဲသ့ၣ်အဂီၢ် ဒီးကကဲဘျုးလၢ ပဂီၢ်စ့ၢ်ကီးလီၤ. လံာ်စီဆှံတဲဝဲလၢ ပမ့ၢ်မၤဒ်န့ၣ်န့ၣ် မ့ၢ်ဝဲတၢ်ခွဲးတၢ်ယာ်လၢ ပက ‘မၤမုာ်ထီၣ်ပသး’ တဂၤဒီးတဂၤလီၤ. (ရိမ့ၤ ၁:၁၁, ၁၂) ပကဆိကမိၣ်ကွၢ် ဒီပုၢ်ဝဲၢ်ခွါအိလီၣ် အတၢ်လဲၤခီဖျိအဂ့ၢ်လီၤ. ဖဲအဝဲအသးစၢ်ဒံးအခါ ကဝီၤအပှၤကွၢ်တၢ်လၢ အသဘျ့တဂၤ ဟဲဟးလၢအတၢ်အိၣ်ဖှိၣ်လီၤ. ဒီးကဝီၤအပှၤကွၢ်တၢ်န့ၣ် ကအိၣ်ဝဲအဂီၢ် တၢ်လီၢ်တအိၣ်ဘၣ် ဒီးလၢတၢ်အိၣ်ဖှိၣ်အပူၤ ဒီပုၢ်ဝဲၢ်တဖၣ်စ့ၢ်ကီး မၤစၢၤအီၤတသ့နီတဂၤဘၣ်. ဒီပုၢ်ဝဲၢ်အိလီၣ် အမိၢ်အပၢ်န့ၣ် တမ့ၢ်ယဟိဝၤပှၤအုၣ်အသးဘၣ်. ဘၣ်ဆၣ် ဒီပုၢ်ဝဲၢ်အိလီၣ်ဃ့အခွဲးလၢ အမိၢ်အပၢ်အအိၣ် ဒ်သိးကဝီၤအပှၤကွၢ်တၢ် ကဟဲအိၣ်လၢအဟံၣ်အဂီၢ်လီၤ. အမိၢ်အပၢ် တဲအီၤလၢ ကဝီၤအပှၤကွၢ်တၢ်ဟဲအိၣ်သ့ ဘၣ်ဆၣ် အမ့ၢ်ဟဲအိၣ်န့ၣ် ဒီပုၢ်ဝဲၢ်အိလီၣ်ကဘၣ်မံလၢ လီၢ်ဆ့ၣ်နီၤအဖီခိၣ်လီၤ. ဘၣ်ဆၣ်အဝဲတူၢ်လိာ်ဝဲလီၤ. ခီဖျိလၢ အဝဲမၤဝဲဒ်န့ၣ်အဃိ အဝဲတသးအုးဘၣ်. အဝဲရ့ဘၣ်ဒီး ကဝီၤအပှၤကွၢ်တၢ်ဒီတနွံကျၢၤ ဒီးလၢဂီၤခီကိးဂီၤဒဲးန့ၣ် အဝဲသ့ၣ် ပၢၢ်ထီၣ်ဒီး တဲသကိးဝဲတၢ်ဂ့ၢ်လၢအကဲဘျုးအါမံၤ ဒီးအီၣ်သကိးဝဲဂီၤခီတၢ်အီၣ် ဒ်သိးသိးလီၤ. တၢ်ဟ့ၣ်ဂံၢ်ဟ့ၣ်ဘါလၢ ဒီပုၢ်ဝဲၢ်အိလီၣ် ဒိးန့ၢ်ဘၣ်ဝဲလၢ ကဝီၤအပှၤကွၢ်တၢ်အအိၣ်န့ၣ် မၤစၢၤအီၤဒ်သိး အဝဲကမၤယဟိဝၤယွၤအတၢ်မၤလၢ ဆၢကတီၢ်လၢပှဲၤအဂီၢ်လီၤ. အဝဲလဲၤမၤဝဲ မံးၡ့ၣ်နရ့ၣ် လၢထံကီၢ်အါဘ့ၣ် န့ၢ်အနံၣ် ၄၀ ဘျဲၣ်လံလီၤ.
၈. ပှၤမ့ၢ်တစံးဘျုးစံးဖှိၣ်ပှၤသနာ်က့ ဘၣ်မနုၤအဃိ ပဘၣ်ဆဲးပာ်ဖျါထီၣ် တၢ်အဲၣ်တၢ်ကွံလၢ အဝဲသ့ၣ် အဖီခိၣ်လဲၣ်, ဟ့ၣ်အဒိတက့ၢ်.
၈ ဖဲပပာ်ဖျါထီၣ် တၢ်အဲၣ်တၢ်ကွံလၢ ပှၤလၢပတသ့ၣ်ညါတဖၣ်အဖီခိၣ်အခါ အဝဲသ့ၣ် မ့ၢ်တစံးဘျုးစံးဖှိၣ်ပှၤသနာ်က့ ပဆဲးပာ်ဖျါထီၣ်တၢ်အဲၣ်တၢ်ကွံ သ့ဒံးလၢကျဲအါဘိလီၤ. အဒိ ဒီပုၢ်ဝဲၢ်မုၣ်လၢ အအိၣ်လၢကီၢ်စပ့ၣ်တဂၤ သိၣ်လိဝဲ ယဲစံၤခၤ လံာ်စီဆှံလီၤ. ယဲစံၤခၤန့ၣ် အဝဲ အိၣ်ဟဲလၢကီၢ်အဲးခွံးဒီလီၤ. ဘၣ်တနံၤ ဖဲယဲစံၤခၤမၤလိလံာ်စီဆှံအခါ အဝဲဟီၣ်ဝဲလီၤ. အဃိ ဒီပုၢ်ဝဲၢ်မုၣ်သံကွၢ်အီၤလၢ ဘၣ်မနုၤအဃိ အဝဲဟီၣ်လဲၣ်. ယဲစံၤခၤ တဲဝဲလၢ တချုးလၢအဟဲလၢ ကီၢ်စပ့ၣ်ဒံးဘၣ်န့ၣ် အဝဲဖှီၣ်ဒိၣ်မးလီၤ. ဘၣ်တနံၤ အဝဲကဒုးအီၣ်အဖိတၢ်အီၣ်အဂီၢ် အတၢ်အီၣ်တအိၣ်နီတမံၤဘၣ်. အိၣ်ထဲထံတခါဧိၤလီၤ. ဖဲအဝဲမၤမံအဖိအခါ အဝဲဃ့ဘါထုကဖၣ်လီၤ. တယံာ်ဘၣ်ဒီး ယဟိဝၤပှၤအုၣ်အသးခံဂၤ ဟဲဒီးဟ့ၣ်အီၤလံာ်လီၤ. ဘၣ်ဆၣ်အဝဲသးဒိၣ်ထီၣ်တၢ်ဒီး မၤညာ်ဝဲ လံာ်န့ၣ်လီၤ. အဝဲတဲဝဲ “အအံၤမ့ၢ်ဝဲ တၢ်အီၣ်လၢ နမၢယဒုးအီၣ်ယဖိမုၣ်န့ၣ်ဧါ.” ဒီပုၢ်ဝဲၢ်မုၣ်ခံဂၤန့ၣ် ဂုာ်ကျဲးစၢးမၤမုာ်ထီၣ်အသး ဘၣ်ဆၣ် ယဲစံၤခၤတဒိကနၣ်ဝဲဘၣ်. ဘၣ်ဆၣ်လၢခံ ဒီပုၢ်ဝဲၢ်မုၣ်ခံဂၤ ဟဲပာ်လီၤဝဲတၢ်အီၣ်လၢ အပဲတြီမဲာ်ညါန့ၣ်လီၤ. ဖဲအမၤလိလံာ်စီဆှံအခါ အဝဲဟီၣ်ဝဲ မ့ၢ်လၢ အဝဲသ့ၣ်ညါဝဲလၢ ယဟိဝၤယွၤ စံးဆၢက့ၤအတၢ်ထုကဖၣ်န့ၣ် အဝဲတတူၢ်လိာ်ဝဲဘၣ်အဃိလီၤ. ဘၣ်ဆၣ် ယဲစံၤခၤအသးဆူၣ်လၢ ကမၤယဟိဝၤယွၤအတၢ်မၤလီၤ. အဃိပသ့ၣ်ညါဘၣ်လၢ ဒီပုၢ်ဝဲၢ်မုၣ်ခံဂၤန့ၣ် အတၢ်သးအိၣ်ဟ့ၣ်တၢ်န့ၣ် ကဲဘျုးဝဲလီၤ.—စံၣ်တဲၤတဲလီၤတၢ် ၁၁:၁, ၆.
မၤစၢၤ တၢ်ကရၢကရိအတၢ်မၤတဖၣ်
၉, ၁၀. (က) ပှၤအံၣ်စရ့လးဖိတဖၣ် အိၣ်ဒီးတၢ်ခွဲးတၢ်ယာ်လၢ ကမၤစၢၤတၢ်ဒ်လဲၣ်. (ခ) မုၢ်မဆါတနံၤအံၤ ပဒီပုၢ်ဝဲၢ်တဖၣ် မၤစၢၤတၢ်လၢ တၢ်အိၣ်ဖှိၣ်အပူၤ သ့လၢကျဲဒ်လဲၣ်.
၉ လၢအပူၤကွံာ်န့ၣ် ပှၤအံၣ်စရ့လးဖိတဖၣ်အိၣ်ဒီး တၢ်ခွဲးတၢ်ယာ်အါမးလၢ ကမၤစၢၤတၢ်လီၤ. (၂ မိၤၡ့ ၃၆:၂; ၁ ကွဲးနီၣ်တၢ် ၂၉:၅; နဃ့မယၤ ၁၁:၂) မုၢ်မဆါတနံၤအံၤ နၤစ့ၢ်ကီး နအိၣ်ဒီးတၢ်ခွဲးတၢ်ယာ်အါမးလၢ နကဟ့ၣ်လီၤ နတၢ်ဆၢကတီၢ်, တၢ်ထူးတၢ်တီၤ ဒီးတၢ်သ့တၢ်ဘၣ်တဖၣ်လၢ နကမၤစၢၤ ဒီပုၢ်ဝဲၢ်မုၣ်ခွါတဖၣ်အဂီၢ်လီၤ. နမ့ၢ်မၤဒ်န့ၣ်န့ၣ် နကပှဲၤဒီးတၢ်သူၣ်ခုသးခု ဒီးယဟိဝၤယွၤကဆိၣ်ဂ့ၤနၤလီၤ.
၁၀ ယွၤအကလုၢ်ကထါ ဟ့ၣ်ဂံၢ်ဟ့ၣ်ဘါဝဲ ပိာ်ခွါတဖၣ်လၢ ကမၤသကိးတၢ်ဒီး ယဟိဝၤယွၤခီဖျိ ကဲထီၣ်တၢ်အိၣ်ဖှိၣ်အပှၤမၤစၢၤတၢ် ဒီးတၢ်အိၣ်ဖှိၣ်သးပှၢ်န့ၣ်လီၤ. (၁ တံၤမသ့း ၃:၁, ၈, ၉; ၁ ပ့းတရူး ၅:၂, ၃) ပှၤလၢအမၤဝဲဒ်န့ၣ်န့ၣ် သးအိၣ်မၤစၢၤပှၤဂၤလၢ နီၢ်ခိဒီးနီၢ်သးတကပၤလီၤ. (မၤတၢ် ၆:၁-၄) မ့ၢ်တၢ်အိၣ်ဖှိၣ်သးပှၢ် မၢနတူၢ်လိာ်မုာ်ပှၤတမှံၤ မ့တမ့ၢ် မၤစၢၤတၢ်လၢ တၢ်နီၤလီၤလံာ်လဲၢ်,တၢ်စံၣ်တဲၤတဲလီၤတၢ် ဟီၣ်ကဝီၤပူၤ, တၢ်ကွၢ်ထွဲဘှီဂ့ၤထီၣ်က့ၤတၢ် မ့တမ့ၢ် တၢ်အဂၤတမံၤမံၤဧါ. ဒီပုၢ်ဝဲၢ်ခွါလၢ အမၤစၢၤတၢ်ဒ်အံၤတဖၣ်န့ၣ် တဲဝဲလၢ အဝဲသ့ၣ်မၤဝဲ မုာ်ဒိၣ်မးလီၤ.
ပှၤလၢ အမၤစၢၤ တၢ်ကရၢကရိအတၢ်မၤတဖၣ်န့ၣ် န့ၢ်ဘၣ်တံၤသကိးအသီတဖၣ် (ကွၢ်လံာ်အဆၢ ၁၁)
၁၁. ဒီပုၢ်ဝဲၢ်မုၣ်တဂၤ မၤတၢ်လၢ တၢ်သူၣ်ထီၣ်ဘှီထီၣ်တၢ်မၤအဃိ ဒိးန့ၢ်ဘၣ်ဝဲအဘျုးဒ်လဲၣ်.
၁၁ ပှၤလၢ အလဲၤမၤစၢၤတၢ်လၢ တၢ်သူၣ်ထီၣ်ဘှီထီၣ်အလီၢ်တဖၣ်န့ၣ် အဝဲသ့ၣ်န့ၢ်ဘၣ် တံၤသကိးအသီတဖၣ်လီၤ. ဒီပုၢ်ဝဲၢ်မုၣ်တဂၤလၢအမံၤမ့ၢ် မါကၠံၤန့ၣ် အမၤတၢ်လၢ တၢ်သူၣ်ထီၣ်ဘှီထီၣ်တၢ်အိၣ်ဖှိၣ်လီၢ် အိၣ် ၁၈ နံၣ်လံ. ဖဲအဝဲမၤတၢ်အခါ အဝဲပာ်သူၣ်ပာ်သးဝဲ ဒီပုၢ်ဝဲၢ်မုၣ်သးစၢ်တဖၣ် ဒီးသိၣ်လိအဝဲသ့ၣ်လီၤ. အဝဲတဲဝဲ မ့ၢ်ဝဲကျဲအဂ့ၤတဘိလၢ ပကမၤစၢၤ ဒီးဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤန့ၣ်လီၤ. (ရိမ့ၤ ၁:၁၂) တကးဒံးဘၣ် ဖဲအဝဲထံၣ်ဘၣ်တၢ်ကီတၢ်ခဲလၢ အတၢ်အိၣ်မူအပူၤအခါ အတံၤသကိးလၢ အဒိးန့ၢ်ဘၣ်ဝဲလၢ တၢ်မၤအံၤအပူၤန့ၣ် ဟ့ၣ်ဂံၢ်ဟ့ၣ်ဘါအီၤလီၤ. မ့ၢ်နမၤစၢၤဘၣ်တၢ်လၢ တၢ်သူၣ်ထီၣ်ဘှီထီၣ် တဘျီဘျီဧါ. နတၢ်သ့တၢ်ဘၣ် လီၤလီၤဆီဆီမ့ၢ်တအိၣ်သနာ်က့ နလဲၤမၤစၢၤတၢ်သ့ဝဲလီၤ.
၁၂. န့ဆၢၣ်အတၢ်ဘၣ်ဒိဘၣ်ထံး ကဲထီၣ်ဝံၤ နမၤစၢၤတၢ်သ့လၢကျဲဒ်လဲၣ်.
၁၂ ပမၤသကိးတၢ်ဒီး ယဟိဝၤယွၤ သ့ခီဖျိ ပမၤစၢၤပဒီပုၢ်ဝဲၢ်လၢ အထံၣ်ဘၣ်တၢ်ကီတၢ်ခဲ ခီဖျိလၢ န့ဆၢၣ်တၢ်ဘၣ်ဒိဘၣ်ထံးတဖၣ်န့ၣ်လီၤ. အဒိ ပဟ့ၣ်မၤစၢၤတၢ်လၢစ့ သ့ဝဲလီၤ. (ယိၤဟၣ် ၁၃:၃၄, ၃၅; မၤတၢ် ၁၁:၂၇-၃၀) ဒီးကျဲလၢအဂၤတဘိလၢ ပမၤစၢၤတၢ်သ့န့ၣ် မ့ၢ်ဝဲပလဲၤမၤကဆှဲကဆှီ ဒီးမၤဂ့ၤထီၣ်က့ၤတၢ်လၢ အဟးဂူာ်ဟးဂီၤတဖၣ်လီၤ. ဒီပုၢ်ဝဲၢ်မုၣ် ကဲၤဘြ့ၤအဲလၤ လၢအအိၣ်လၢ ဖိလဲ(န်)န့ၣ် ထံဒိၣ်ထီၣ်အဃိ အဟံၣ်ဟးဂီၤဝဲလီၤ. ဘၣ်ဆၣ်အဝဲထံၣ်ဘၣ်ဝဲ ဒီပုၢ်ဝဲၢ်မုၣ်ခွါလၢ အအိၣ်လၢတၢ်အိၣ်ဖှိၣ်ဘူးဒီးအီၤတဖၣ် ဟဲမၤစၢၤအီၤအဃိ အဝဲသးခုဒိၣ်မးလီၤ. ဖဲအဝဲဆိကမိၣ်ထီၣ်တၢ်လဲၤခီဖျိအံၤအခါ အဝဲတဲဝဲ တၢ်လၢအိၣ်ဒီးအီၤတဖၣ်လီၤမၢ်ဘၣ်ဆၣ် အဝဲတဘၣ်ယိၣ်တၢ်ဘၣ်. လၢတၢ်န့ၣ်အလီၢ် အဝဲသးစၢၢ်ဆၢဝဲ တၢ်လၢအဒိးန့ၢ်ဘၣ်က့ၤဝဲတဖၣ်န့ၣ်လီၤ. အဝဲတဲဝဲ “တၢ်လဲၤခီဖျိတခါအံၤ ဒုးနာ်န့ၢ်ယၤလၢ ယအိၣ်ဘၣ်လၢ ခရံာ်ဖိတၢ်အိၣ်ဖှိၣ်အံၤအဃိ မ့ၢ်ဝဲတၢ်ခွဲးတၢ်ယာ်လၢအလီၤဆီ တကးဒံးဘၣ် ယဒိးန့ၢ်ဘၣ်တၢ်သူၣ်မံသးမုာ်ဒီး တၢ်သူၣ်ခုသးခုလီၤ.” ပှၤအါဂၤလၢ အထံၣ်ဘၣ် န့ဆၢၣ်တၢ်ဘၣ်ဒိးဘၣ်ထံး ဒီးဒိးန့ၢ်ဘၣ်တၢ်မၤစၢၤတဖၣ်န့ၣ် တဲဝဲလၢ အဝဲသ့ၣ်တူၢ်ဘၣ်ဝဲဒ်န့ၣ်စ့ၢ်ကီးလီၤ. ဒီးပှၤလၢအမၤသကိးတၢ်ဒီး ယဟိဝၤယွၤ ခီဖျိအမၤစၢၤ ဒီပုၢ်ဝဲၢ်မုၣ်ခွါတဖၣ်န့ၣ် အဝဲသ့ၣ်ဒိးန့ၢ်ဘၣ် တၢ်သူၣ်ခုသးခုဒီး တၢ်သူၣ်မံသးမုာ်စ့ၢ်ကီးလီၤ.—ဖး မၤတၢ် ၂၀:၃၅; ၂ ကရံၣ်သူး ၉:၆, ၇ တက့ၢ်.
၁၃. ဖဲပလဲၤမၤစၢၤတၢ်အခါ ပတၢ်အဲၣ်ယဟိဝၤယွၤ ဒိၣ်ထီၣ်သ့လၢကျဲဒ်လဲၣ်, ဟ့ၣ်တၢ်အဒိတက့ၢ်.
၁၃ ဒီပုၢ်ဝဲၢ်မုၣ်ခွါတနီၤနီၤန့ၣ် လၢတၢ်ဒုးတၢ်ယၤအဃိ အဝဲသ့ၣ်ဃ့ၢ်မှံဟးဖျိးဝဲလၢ တၢ်လီၢ်အဂၤလီၤ. ဒီးအဝဲသ့ၣ်တနီၤနီၤန့ၣ် လဲၤအိၣ်ဝဲလၢ ကီၢ်အမဲရကၤလီၤ. ဒီပုၢ်ဝဲၢ်မုၣ်စတဲးဖၢၣ်နံၤ ဒီးပှၤစံၣ်တဲၤတဲလီၤတၢ်ဖိလၢအဂၤတဖၣ် မၤသကိးတၢ်ဒီး ကစၢ်ယွၤခီဖျိ မၤစၢၤဝဲဒီပုၢ်ဝဲၢ်တဖၣ်အံၤလီၤ. အဝဲသ့ၣ်မၤစၢၤဝဲ ပှၤဘၣ်ကီဘၣ်ခဲဖိတဖၣ်အံၤဒ်သိး ကငါအိၣ်ဟံၣ် ဒီးကပှ့ၤဟံၣ်တၢ်ပီးတၢ်လီတဖၣ်န့ၣ်လီၤ. ဒီပုၢ်ဝဲၢ်မုၣ်အံၤတဲဝဲလၢ “ပထံၣ်ဘၣ်လၢ အဝဲသ့ၣ်သူၣ်ခုသးခု ဒီးပာ်လုၢ်ပာ်ပှ့ၤဝဲ တၢ်အဲၣ်လၢအဒိးန့ၢ်ဘၣ်ဝဲလၢ ဒီပုၢ်ဝဲၢ်မုၣ်ခွါတဖၣ်အအိၣ်အဃိ ပသူၣ်မံသးမုာ်ဒိၣ်မးလီၤ. အဝဲသ့ၣ်ဆိကမိၣ်လၢ ပမၤစၢၤအီၤ ဘၣ်ဆၣ်နီၢ်ကီၢ်န့ၣ် အဝဲသ့ၣ်မၤစၢၤပှၤအါန့ၢ်ပမၤစၢၤအီၤလီၤ. ပထံၣ်ဘၣ်အဝဲသ့ၣ်အတၢ်အဲၣ်, အတၢ်ဃူတၢ်ဖိး, အတၢ်နာ် ဒီးအဝဲသ့ၣ်သန့ၤအသးလၢ ယဟိဝၤယွၤအအိၣ်အဃိ ပတၢ်အဲၣ်ယဟိဝၤယွၤအါထီဝဲလီၤ. တကးဒံးဘၣ် အဝဲသ့ၣ်အဒိအတဲာ်န့ၣ် မၤစၢၤပှၤလၢ ပကပာ်လုၢ်ပာ်ပှ့ၤ တၢ်ခဲလၢာ်လၢ ပဒိးန့ၢ်ဘၣ်အီၤလၢ ယဟိဝၤယွၤအတၢ်ကရၢကရိအပူၤန့ၣ်လီၤ.”
မၤအါထီၣ် ယဟိဝၤယွၤအတၢ်မၤ
၁၄, ၁၅. (က) ဝံယၡါယၤ အိၣ်ဒီးတၢ်ပာ်သူၣ်ပာ်သးဒ်လဲၣ်. (ခ) ခရံာ်ဖိတဖၣ် ကွၢ်လိမၤဒိး ဝံယၡါယၤအတၢ်ပာ်သူၣ်ပာ်သးသ့လၢကျဲဒ်လဲၣ်.
၁၄ နအဲၣ်ဒိးမၤသကိးအါထီၣ်တၢ်ဒီး ယဟိဝၤယွၤဧါ. နအဲၣ်ဒိး လဲၤသုးနသးဆူ တၢ်လီၢ်လၢပှၤလိၣ်ဘၣ်အါထီၣ် ပှၤစံၣ်တဲၤတဲလီၤတၢ်ဖိဧါ. ပလဲၤလၢ တၢ်လီၢ်အယံၤမ့ၢ်တသ့သနာ်က့ ပပာ်ဖျါထီၣ်တၢ်သးအိၣ်ဟ့ၣ်တၢ်သ့ဝဲလီၤ. ဘၣ်ဆၣ် ပဒီပုၢ်ဝဲၢ်မုၣ်ဒီပုၢ်ဝဲၢ်ခွါတနီၤန့ၣ် လဲၤမၤစၢၤတၢ်လၢ တၢ်လီၢ်အယံၤသ့ဝဲလီၤ. အဝဲသ့ၣ်န့ၣ် အတၢ်ပာ်သူၣ်ပာ်သးလီၤဂာ်ဒ် ဝံယၡါယၤလီၤ. ဖဲယဟိဝၤယွၤသံကွၢ်ဝဲလၢ “ယကမၢလီၤမတၤတဂၤလဲၣ်. ဒီးမ့ၢ်မတၤကလဲၤလၢပဂီၢ်လဲၣ်” အခါအဝဲတဲဝဲလၢ “ကွၢ်ကွၢ်, ယၤလီၤ. မၢလီၤယၤတက့ၢ်.” (ယၡါယၤ ၆:၈) မ့ၢ်နအဲၣ်ဒိးမၤစၢၤ မ့တမ့ၢ် နမၤစၢၤ ယဟိဝၤယွၤအတၢ်ကရၢကရိသ့ဧါ. နမၤစၢၤသ့လၢ ကျဲဒ်လဲၣ်တဖၣ်လဲၣ်.
၁၅ ဘၣ်ဃးဒီး တၢ်စံၣ်တဲၤတဲလီၤတၢ်မၤဒီး တၢ်ဒုးကဲထီၣ်ပှၤဂၤလၢ ခရံာ်အပျဲၢ်အဘီၣ်န့ၣ် ယ့ၣ်ၡူးတဲဝဲလၢ “ကူးဘုအလီၢ်အိၣ်အါမး, မ့မ့ၢ်ပှၤမၤတၢ်ဖိတဖၣ်န့ၣ် အိၣ်စှၤဂၤလီၤ. မၤသးဒ်န့ၣ်ဒီးဃ့ ကူးတၢ်အလီၢ်အကစၢ်, ဒ်သိးအကမၢလီၤ ပှၤမၤတၢ်ဖိဆူအကူးတၢ်အလီၢ်န့ၣ်တက့ၢ်.” (မးသဲ ၉:၃၇, ၃၈) နလဲၤမၤစၢၤတၢ်လၢ တၢ်လီၢ်လၢအလိၣ်ဘၣ်အါထီၣ် ပှၤစံၣ်တဲၤတဲလီၤတၢ်ဖိကသ့ဧါ. မ့တမ့ၢ် မ့ၢ်နမၤစၢၤပှၤဂၤလၢ ကမၤဝဲဒ်န့ၣ် ကသ့ဧါ. ဒီပုၢ်ဝဲၢ်မုၣ်ခွါအါဂၤ တူၢ်ဘၣ်ဝဲလၢ ကျဲအဂ့ၤကတၢၢ်တဘိလၢ ပကပာ်ဖျါထီၣ်လၢ ပအဲၣ်ကစၢ်ယွၤ ဒီးပှၤလၢပဃၢၤန့ၣ် မ့ၢ်ဝဲပလဲၤမၤပှၤလဲၤလၢညါလၢ တၢ်လီၢ်လၢ အလိၣ်ဘၣ်အါထီၣ် ပှၤစံၣ်တဲၤတဲလီၤတၢ်ဖိန့ၣ်လီၤ. ကျဲအဂၤလၢ နမၤအါထီၣ်ယဟိဝၤယွၤအတၢ်မၤသ့န့ၣ် အိၣ်တဘိဘိဧါ. နမ့ၢ်မၤဒ်န့ၣ်န့ၣ် နကပှဲၤဒီးတၢ်သးခုလီၤ.
၁၆, ၁၇. နမၤအါထီၣ် ယဟိဝၤယွၤအတၢ်မၤကသ့လၢ ကျဲဒ်လဲၣ်.
၁၆ မ့ၢ်နသးအိၣ်မၤစၢၤတၢ်လၢ ဘ့ၤသ့လး မ့တမ့ၢ် တၢ်သူၣ်ထီၣ်ဘှီထီၣ်တၢ်မၤ တစိၢ်တလီၢ် မ့တမ့ၢ် တနွံတသီ မ့တမ့ၢ် အါန့ၢ်အန့ၣ်ဧါ. ယဟိဝၤယွၤ အတၢ်ကရၢကရိန့ၣ် လိၣ်ဘၣ်ပှၤလၢ အသးအိၣ်ဟ့ၣ်လီၤအသး ဖဲပှၤလိၣ်ဘၣ်တၢ်မၤစၢၤအခါ ဒီးပှၤလၢအအိၣ်ဒီး တၢ်လဲၤခီဖျိလၢတၢ်မၤအဂၤတမံၤဘၣ်ဆၣ် သးအိၣ်မၤဝဲတၢ်မၤလၢ ပှၤကမၢအီၤ တမံၤဂ့ၤတမံၤဂ့ၤန့ၣ်လီၤ. ယဟိဝၤယွၤ ပာ်လုၢ်ပာ်ပှ့ၤ ပှၤလၢအသးအိၣ်ဟ့ၣ်လီၤအသး ဒီးမၤစၢၤတၢ် ဖဲပှၤလိၣ်ဘၣ်တၢ်မၤစၢၤအခါန့ၣ်လီၤ.—စံးထီၣ်ပတြၢၤ ၁၁၀:၃.
၁၇ နအဲၣ်ဒိး ဒိးန့ၢ်အါထီၣ်တၢ်သိၣ်လိ ဒ်သိးနမၤယဟိဝၤယွၤ အတၢ်မၤကသ့ဂ့ၤထီၣ်အဂီၢ်ဧါ. ဘၣ်သ့ၣ်သ့ၣ် နတီၣ်ထီၣ် ပှၤစိာ်ဘီမုၢ်တၢ်သးခုကစီၣ်ဖိအကၠိသ့ဝဲလီၤ. ကၠိအံၤ သိၣ်လိဝဲဒီပုၢ်ဝဲၢ်မုၣ်ခွါလၢ အဒိၣ်တုာ်ခိၣ်ပှဲၤ လၢအမၤတ့ၢ်ယဟိဝၤယွၤအတၢ်မၤ လၢဆၢကတီၢ်လၢပှဲၤတဖၣ် ဒ်သိးအဝဲသ့ၣ် ကဒိးသူအါထီၣ်အသးလၢ ယဟိဝၤယွၤ အတၢ်ကရၢကရိအပူၤအဂီၢ်န့ၣ်လီၤ. ပှၤလၢအလဲၤထီၣ်ကၠိအံၤန့ၣ် ပှၤမ့ၢ်ဆှၢအဝဲသ့ၣ်လၢ တၢ်လီၢ်တတီၤဂ့ၤတတီၤဂ့ၤ ကဘၣ်သးအိၣ်လဲၤဝဲလီၤ. မ့ၢ်နမၤအါထီၣ် ယဟိဝၤယွၤအတၢ်မၤလၢ ကျဲဒ်အံၤသ့ဧါ.—၁ ကရံၣ်သူး ၉:၂၃.
၁၈. ပမၤသကိးတၢ်ဒီး ယဟိဝၤယွၤကိးနံၤဒဲးအဃိ ပဒိးန့ၢ်ဘၣ်အဘျုးဒ်လဲၣ်.
၁၈ ခီဖျိလၢ ပကဲယဟိဝၤယွၤအခ့အပှၤအဃိ ပသးအိၣ်ဟ့ၣ်တၢ်, ပမၤဂ့ၤတၢ်, ပအိၣ်ဒီးတၢ်အဲၣ် ဒီးတၢ်သးကညီၤပှၤဂၤလီၤ. ပသူၣ်အိၣ်သးအိၣ်ပှၤဂၤ ကိးနံၤဒဲးလီၤ. ပမၤဒ်န့ၣ်အဃိ ပဒိးန့ၢ်ဘၣ် တၢ်သူၣ်ခုသးခု, ပအိၣ်ဒီးတၢ်ဃူတၢ်ဖိး ဒီးတၢ်သူၣ်မံသးမုာ်လီၤ. (ကလၤတံ ၅:၂၂, ၂၃) ပမ့ၢ်ကွၢ်လိမၤဒိးယဟိဝၤယွၤ အတၢ်သးအိၣ်ဟ့ၣ်တၢ် ဒီးမၤသကိးတၢ်ဒီးအီၤန့ၣ် ပတၢ်အိၣ်သးမ့ၢ်အိၣ်ဒ်လဲၣ်ဂ့ၤဒ်လဲၣ်ဂ့ၤ ပကပှဲၤဒီးတၢ်သးခုလီၤ.—ကတိၤဒိ ၃:၉, ၁၀.
