တၢ်ဝံသးစူၤ—အိၣ်ဒီးတၢ်တူၢ်န့ၢ်ခီၣ်ကဲလၢ တၢ်မုၢ်လၢ်အပူၤ
“မုၢ်နံၤအခံကတၢၢ်” န့ၣ်မ့ၢ်ဝဲတၢ်ဆၢကတီၢ်လၢ အကီခဲဒိၣ်မးအဃိ ပလိၣ်ဘၣ် တၢ်ဝံသးစူၤအါန့ၢ်ဒံးလၢညါလီၤ. (၂ တံၤမသ့း ၃:၁-၅) ပှၤအါဂၤလၢ ပခိၣ်ပဃၢၤန့ၣ် အဝဲသ့ၣ်တအိၣ်ဒီးတၢ်ဝံသးစူၤလၢၤဘၣ်. အဝဲသ့ၣ်အဲၣ်လီၤထဲအသး, အ့ၣ်လိာ်သးဒီးပှၤဂၤ ဒီးတပၢၤအသးလၢၤဘၣ်. လၢတၢ်န့ၣ်အဃိ ပဘၣ်သံကွၢ်လီၤပသးလၢ ‘မ့ၢ်ယလီၤဂာ်ထီၣ်ဒီးပှၤလၢယဃၢၤ ဒီးယတအိၣ်ဒီးတၢ်ဝံသးစူၤလၢၤဘၣ်ဧါ. ပဘၣ်အိၣ်ဒီးတၢ်ဝံသးစူၤနီၢ်ကီၢ်န့ၣ် အခီပညီဒ်လဲၣ်. ဒ်သိးတၢ်ဝံသးစူၤ ကကဲထီၣ်ယလုၢ်ယလၢ်တခါအဂီၢ် ယမၤတၢ်မနုၤသ့ဝဲလဲၣ်.’
တၢ်ဝံသးစူၤန့ၣ် မ့ၢ်မနုၤလဲၣ်
လၢလံာ်စီဆှံအပူၤ တၢ်ကတိၤလၢအမ့ၢ် “တၢ်ဝံသးစူၤ” န့ၣ်အခီပညီမ့ၢ်မနုၤလဲၣ်. အခီပညီတမ့ၢ်ထဲ ပအိၣ်ဒီးတၢ်ဝံသးစူၤ ဖဲပထံၣ်ဘၣ် တၢ်ကီတၢ်ခဲအခါဘၣ်. အဲၣ်ဒိးတဲစ့ၢ်ကီးဝဲ ပှၤလၢအိၣ်ဒီးတၢ်ဝံသးစူၤန့ၣ် အိၣ်ဒီးတၢ်တူၢ်န့ၢ်ခီၣ်ကဲ ဒီးလဲၤခီဖျိဝဲတၢ်ကီတၢ်ခဲန့ၢ် မ့ၢ်လၢအဝဲသ့ၣ်မုၢ်လၢ်ဝဲလၢ တၢ်အိၣ်သးကဂ့ၤထီၣ်ဝဲအဃိလီၤ. အဝဲတဆိကမိၣ်ထဲ အနီၢ်ကစၢ်အဂီၢ်ဘၣ် လၢတၢ်န့ၣ်အလီၢ်အဝဲဆိကမိၣ်န့ၢ်တၢ်လၢ ပှၤဂၤအဂီၢ် ဃုာ်ဒီးပှၤလၢ အတဲဆါအီၤ မ့တမ့ၢ် ပှၤလၢတရ့ဒီးအီၤဂ့ၤဂ့ၤတဖၣ် အဂီၢ်စ့ၢ်ကီးလီၤ. အဝဲဆဲးမုၢ်လၢ်ဝဲလၢ အဝဲသ့ၣ်အတၢ်ရ့လိာ်သး ကဂ့ၤထီၣ်ဝဲလီၤ. လၢတၢ်န့ၣ်အဃိ လံာ်စီဆှံတဲဝဲလၢ တၢ်အဲၣ်တၢ်ကွံ ဝံသးစူၤတၢ်ကဲန့ၣ် တမ့ၢ်တၢ် အလီၤကမၢကမၣ်ဘၣ်. * (ကွၢ်တၢ်ဂ့ၢ်အဘျဲၣ်တက့ၢ်.) (၁ ကရံၣ်သူး ၁၃:၄) တၢ်ဝံသးစူၤန့ၣ် မ့ၢ်စ့ၢ်ကီး “သးအတၤသၣ်” လီၤ. (ကလၤတံ ၅:၂၂, ၂၃) မ့မ့ၢ်ဒ်န့ၣ်န့ၣ် ဒ်သိးပကအိၣ်ဒီးတၢ်ဝံသးစူၤနီၢ်ကီၢ်အဂီၢ် ပကဘၣ်မၤတၢ်မနုၤလဲၣ်.
ပအိၣ်ဒီးတၢ်ဝံသးစူၤကသ့ဒ်လဲၣ်
ဒ်သိးပကအိၣ်ဒီးတၢ်ဝံသးစူၤအဂီၢ် ပကဘၣ်ဃ့ ယဟိဝၤယွၤအသးစီဆှံအတၢ်မၤစၢၤ ဒီးပှၤလၢအနာ်အီၤန့ၣ် အဝဲကမၤစၢၤဝဲလီၤ. (လူၤကၣ် ၁၁:၁၃) သးစီဆှံန့ၣ် အစိအကမီၤအိၣ် ဘၣ်ဆၣ်ပကဘၣ်အိၣ်မူထွဲဒ် ပတၢ်ဃ့ဘါထုကဖၣ်အသိးစ့ၢ်ကီးလီၤ. (စံးထီၣ်ပတြၢၤ ၈၆:၁၀, ၁၁) အဲၣ်ဒိးတဲဝဲလၢ ဒ်သိး တၢ်ဝံသးစူၤကကဲထီၣ်ပလုၢ်ပလၢ်အဂီၢ် ပကဘၣ်ဂုာ်ကျဲးစၢးအိၣ်ဒီး တၢ်ဝံသးစူၤကိးနံၤဒဲးလီၤ. တဘျီတခီၣ်န့ၣ် ပမၤအီၤတညီဘၣ်. ဘၣ်ဆၣ် တၢ်မနုၤမၤစၢၤပှၤသ့လဲၣ်.
ပကဘၣ်မၤလိ ယ့ၣ်ၡူးအဂ့ၢ်ဒီး ကွၢ်လိမၤဒိးအီၤလီၤ. ဖဲတၢ်မၢဖိပီလူး တဲဝဲဘၣ်ဃးဒီး “ပှၤသီ” အဂ့ၢ်အခါန့ၣ် ပၣ်ဃုာ်ဒီး တၢ်ဝံသးစူၤစ့ၢ်ကီးလီၤ. အဝဲဟ့ၣ်သဆၣ်ထီၣ်ပှၤလၢ “မ်ခရံာ်အတၢ်ဃူတၢ်ဖိးပၢတၢ်လၢ သုသးကံၢ်ပူၤတက့ၢ်.” (ကလီးစဲ ၃:၁၀, ၁၂, ၁၅) ဒ်သိးပမၤဒ်န့ၣ်ကသ့အဂီၢ် ပကဘၣ်ကွၢ်လိမၤဒိး ယ့ၣ်ၡူး ဒီးနာ်န့ၢ်ယဟိဝၤယွၤ လၢလၢပှဲၤပှဲၤလၢ တၢ်ဆၢကတီၢ်မ့ၢ်ဘၣ်န့ၣ် အဝဲကမၤဘၣ်ဂီၢ်ထီၣ်က့ၤ တၢ်ဂ့ၢ်ကီတဖၣ်လီၤ. ပမ့ၢ်အိၣ်ဒီးတၢ်နာ်ဒ်န့ၣ်န့ၣ် လၢပခိၣ်ပဃၢၤ တၢ်မ့ၢ်ကဲထီၣ်အသး ဒ်လဲၣ်ဂ့ၤဒ်လဲၣ်ဂ့ၤ ပကဆဲးအိၣ်ဒီးတၢ်ဝံသးစူၤလီၤ.—ယိၤဟၣ် ၁၄:၂၇; ၁၆:၃၃.
ပဝဲခဲလၢာ် ပအဲၣ်ဒိးလၢ ဟီၣ်ခိၣ်သီကဟဲတုၤချ့ချ့လီၤ. ဘၣ်ဆၣ် ဖဲပဆိကမိၣ်ထံဘၣ်ဃး ယဟိဝၤယွၤအတၢ်ဝံသးစူၤလၢပဖီခိၣ် အိၣ်ဝဲထဲလဲၣ်အခါ ကမၤစၢၤပှၤဒ်သိး ပတၢ်ဝံသးစူၤကအါထီၣ်လီၤ. လံာ်စီဆှံအၢၣ်လီၤပှၤလၢ “ကစၢ်တမၤယံာ်မၤနီၢ်တၢ်လၢအတၢ်စံးပာ်အဂ့ၢ်အကျိၤ, ဒ်ပှၤကညီတနီၤနီၤ ပာ်တၢ်မၤယံာ်မၤနီၢ်အသိးန့ၣ်ဘၣ်. မ့မ့ၢ်မ့ၢ်အဝံသးစူၤသုဃဲးဃဲးလီၤ. အဂ့ၢ်ဒ်အံၤ, တဘၣ်ဘၣ်အသးလၢ ပှၤကတုၤလၢ တၢ်ဟးဂူာ်ဟးဂီၤနီတဂၤဘၣ်. မ့ၢ်လၢပှၤခဲလၢာ် ကန့ၢ်ဘၣ်တၢ်ပီၢ်ယၢ်လီၤက့ၤအသးလီၤ.” (၂ ပ့းတရူး ၃:၉) လၢတၢ်န့ၣ်အဃိ ပမ့ၢ်ဆိကမိၣ်ထံ ယဟိဝၤယွၤ ဝံသးစူၤပှၤအဂ့ၢ်န့ၣ် ပဝဲစ့ၢ်ကီး ပတၢ်ဝံသးစူၤပှၤဂၤ ကအါထီၣ်ဝဲလီၤ. (ရိမ့ၤ ၂:၄) တၢ်အိၣ်သးတနီၤလၢ ပကဘၣ်အိၣ်ဒီးတၢ်ဝံသးစူၤန့ၣ် မ့ၢ်မနုၤလဲၣ်.
တၢ်အိၣ်သးတဖၣ်လၢ ပလိၣ်ဘၣ်တၢ်ဝံသးစူၤ
လၢပတၢ်အိၣ်မူအပူၤ တၢ်အိၣ်သးလၢ ပလိၣ်ဘၣ်တၢ်ဝံသးစူၤန့ၣ် အိၣ်ဝဲအါမးလီၤ. အဒိ ဖဲပအဲၣ်ဒိးတဲ တၢ်ဂ့ၢ်လၢအရ့ဒိၣ်တမံၤမံၤအခါ ပကဘၣ်အိၣ်ဒီးတၢ်ဝံသးစူၤ ဒ်သိးပသုတမၤတံာ်တာ်ဘၣ် ပှၤဂၤတဂ့ၤအဂီၢ်လီၤ. (ယၤကိာ် ၁:၁၉) တကးဒံးဘၣ် ဖဲပှၤဂၤမၤအ့န့ပှၤအခါ ပလိၣ်ဘၣ်တၢ်ဝံသးစူၤစ့ၢ်ကီးလီၤ. ပတကြၢးက့ၤမၤဆၢက့ၤအဝဲသ့ၣ်တဘျီဃီဘၣ်. လၢတၢ်န့ၣ်အလီၢ် ပမ့ၢ်ဆိကမိၣ်ထံ ဘၣ်ဃးယဟိဝၤယွၤဒီး ယ့ၣ်ၡူးကွၢ်ကပာ်ကွံာ်ဝဲ ပတၢ်ဂံၢ်စၢ်ဘါစၢ်တဖၣ်အဂ့ၢ်န့ၣ် ကဂ့ၤဝဲလီၤ. အဝဲသ့ၣ်တကွၢ်ဝဲလၢ တၢ်ကမၣ်ဆံးဆံးဖိလၢ ပမၤဘၣ်တဖၣ်ဘၣ်. လၢတၢ်န့ၣ်အလီၢ် အဝဲသ့ၣ်ဃုထံၣ်ဝဲတၢ်ဂ့ၤတၢ်ဝါလၢ အိၣ်ဒီးပှၤ ဒီးဟ့ၣ်ပှၤတၢ်ဆၢကတီၢ်လၢ ပကမၤအါထီၣ် ပတၢ်ဂ့ၤတၢ်ဝါတဖၣ်လီၤ.—၁ တံၤမသ့း ၁:၁၆; ၁ ပ့းတရူး ၃:၁၂.
တကးဒံးဘၣ် ဖဲပှၤဂၤတဲပှၤလၢ ပတဲကမၣ် မ့တမ့ၢ် ပမၤကမၣ်တၢ်တမံၤမံၤအခါ ပလိၣ်ဘၣ်တၢ်ဝံသးစူၤစ့ၢ်ကီးလီၤ. ဘၣ်သ့ၣ်သ့ၣ် ပှၤမ့ၢ်တဲပှၤဒ်န့ၣ်န့ၣ် ပကသးထီၣ်တၢ် မ့တမ့ၢ် ပကတဲပူၤဖျဲးပသးလီၤ. ဘၣ်ဆၣ်လံာ်စီဆှံတဲဝဲလၢ ပတဘၣ်မၤဆၢက့ၤဒ်န့ၣ်ဘၣ်. လံာ်စီဆှံတဲဝဲလၢ “တၢ်ဝံသးစူၤန့ၣ်ဂ့ၤန့ၢ် တၢ်ပာ်ထီၣ်ထီအသးတက့ၢ်လီၤ, သးထီၣ်ချ့တဂ့ၤ. အဂ့ၢ်ဒ်အံၤ, တၢ်သးထီၣ်အိၣ်ဝဲဆိးဝဲလၢ ပှၤဟးဂီၤဖိအသးနါပှၢ်အပူၤလီၤ.” (စံၣ်တဲၤတဲလီၤတၢ် ၇:၈, ၉) လၢတၢ်န့ၣ်အဃိ ပှၤပာ်ဒ့ၣ်ပာ်ကမၣ်ပှၤ မ့ၢ်တတီတလိၤသနာ်က့ တချုးလၢ ပမၤဆၢက့ၤတမံၤမံၤအခါ ပကဘၣ်အိၣ်ဒီးတၢ်ဝံသးစူၤဒီး ဆိကမိၣ်ထံတၢ်လီၤတံၢ်လီၤဆဲးလီၤ. ယ့ၣ်ၡူးစ့ၢ်ကီး ဖဲပှၤပာ်ဒ့ၣ်ပာ်ကမၣ်အီၤအခါ အဝဲမၤဝဲဒ်န့ၣ်လီၤ.—မးသဲ ၁၁:၁၉.
မိၢ်ပၢ်တဖၣ် လိၣ်ဘၣ်ဝဲ တၢ်ဝံသးစူၤ, လီၤဆီဒၣ်တၢ်ဖဲ အဝဲသ့ၣ်သိၣ်လိအဖိ မ့တမ့ၢ် မၤစၢၤအဝဲသ့ၣ် ဒ်သိးကဟးဆှဲး တၢ်သူၣ်လီသးကွံလၢ အတဂ့ၤတဖၣ်အခါန့ၣ်လီၤ. ပကတဲသကိး ဒီပုၢ်ဝဲၢ် မဲးထါယဲး(စ်) လၢအမၤတၢ်လၢ စကဒံၤန့ဘံယၢၤ ဘ့ၤသ့လး အဂ့ၢ်န့ၣ်လီၤ. ဖဲအဝဲသးစၢ်ဒံးအခါ အတံၤသကိးလၢကၠိ မၤမဲာ်ဆှးအီၤ ခီဖျိလၢ အတၢ်စူၢ်တၢ်နာ်အဃိလီၤ. လၢအခီၣ်ထံးန့ၣ် အမိၢ်အပၢ်တသ့ၣ်ညါဝဲ တၢ်ကဲထီၣ်အသးဒီးအီၤအဂ့ၢ်ဘၣ်. ဘၣ်ဆၣ်လၢခံအဝဲသ့ၣ် ထံၣ်ဝဲလၢ မဲးထါယဲး(စ်) အိၣ်ဒီးတၢ်သးဒ့ဒီလၢ အတၢ်စူၢ်တၢ်နာ်အဖီခိၣ်န့ၣ်လီၤ. မဲးထါယဲး(စ်) အပါ ကဲလဲး(စ်) တဲဝဲလၢ ဖဲန့ၣ်အခါ အဝဲဒီးအမါလိၣ်ဘၣ်တၢ်ဝံသးစူၤအါမးလီၤ. မဲးထါယဲး(စ်) သံကွၢ်ဝဲတၢ်သံကွၢ်ဒ်သိးဒီး “ကစၢ်ယွၤန့ၣ် မ့ၢ်မတၤလဲၣ်, လံာ်စီဆှံ ဟဲလၢယွၤအအိၣ်နီၢ်ကီၢ်ဧါ, တၢ်လၢအအိၣ်လၢ လံာ်စီဆှံအပူၤတဖၣ်န့ၣ် မ့ၢ်ဝဲ ကစၢ်ယွၤအတၢ်ဘၣ်သးနီၢ်ကီၢ်ဧါ.” အဝဲသံကွၢ်စ့ၢ်ကီးအပၢ်လၢ “ယမ့ၢ်တနာ်တၢ်ဒ်သိးဒီးနၤဘၣ်ဆၣ် ဘၣ်မနုၤအဃိ ပှၤတဲဆါယၤလဲၣ်.”
ကဲလဲး(စ်) တဲဝဲလၢ “တဘျီတခီၣ် ပဖိခွါ သံကွၢ်တၢ်သံကွၢ် လၢတၢ်သူၣ်ဒိၣ်သးဖျိးအပူၤ, ဘၣ်ဆၣ်တမ့ၢ်လၢ အထီဒါ ယၤဒီးအမိၢ်အဃိဘၣ်. ခီဖျိလၢ အဝဲတူၢ်ဘၣ်ဝဲလၢ တၢ်မ့ၢ်တၢ်တီတနီၤန့ၣ် ကီဝဲလၢ အကမၤထွဲဝဲအဃိလီၤ.” ကဲလဲး(စ်) မၤစၢၤအဖိခွါဒ်လဲၣ်. “ယဖိခွါဒီးယၤ ပဆ့ၣ်နီၤတဲသကိးတၢ် ယံာ်လၢအနၣ်ရံၣ်တဖၣ်ညါ” အါတက့ၢ်န့ၣ် ကဲလဲး(စ်) ဒိကနၣ်ဝဲ တၢ်သံကွၢ်လၢ မဲးထါယဲး(စ်) သံကွၢ်ဝဲတဖၣ် ဒ်သိးအကနၢ်ပၢၢ်အဖိအတၢ်တူၢ်ဘၣ်ဒီး အတၢ်ဆိကမိၣ်လီၤ. ကဲလဲး(စ်) တဲဝဲ တဘျီတခီၣ်န့ၣ် အဝဲတဲနၢ်ပၢၢ်အဖိခွါတၢ်ဂ့ၢ်တမံၤ ဒီးဟ့ၣ်ဝဲတၢ်ဆၢကတီၢ်တသီလၢ ကက့ၤဆိကမိၣ်ထံဝဲတၢ်ဂ့ၢ် ဒီးက့ၤတဲသကိးဝဲတၢ်ဂ့ၢ်အံၤလၢခံတသီလီၤ. ဒီးတဘျီတခီၣ် ကဲလဲး(စ်) အနီၢ်ကစၢ်စ့ၢ်ကီး လိၣ်ဘၣ်ဝဲ တၢ်ဆၢကတီၢ်စှၤကိာ်သီ ဒ်သိးကက့ၤဆိကမိၣ်ထံဝဲ တၢ်ဂ့ၢ်လၢ အဖိခွါသံကွၢ်အီၤန့ၣ်လီၤ. ခီဖျိလၢ အဝဲသ့ၣ်တဲသကိးတၢ်ဒ်အံၤထီဘိအဃိ အဖိခွါ နၢ်ပၢၢ်ထီၣ်ဝဲ တၢ်ပှ့ၤက့ၤအခီပညီ ဒီးနၢ်ပၢၢ်ထီၣ်ဝဲလၢ ယဟိဝၤယွၤအဲၣ်ပှၤ ဒီးအဝဲအိၣ်ဒီးတၢ်ခွဲးတၢ်ယာ်လၢ ကပၢပှၤန့ၣ်လီၤ. ကဲလဲး(စ်) တဲဝဲ “ပလိၣ်ဘၣ်တၢ်ဆၢကတီၢ်ဖးအါညါ ဒီးတမ့ၢ်တၢ်လၢအညီစ့ၢ်ကီးဘၣ်. ဘၣ်ဆၣ်လၢခံကယီကယီန့ၣ် ပဖိခွါ အတၢ်အဲၣ်ယဟိဝၤယွၤ ဟဲဒိၣ်ထီၣ်ဝဲလၢအသးပူၤလီၤ. မ့ၢ်လၢယၤဒီးယမါပတဟ့ၣ်ၡူဘၣ် ဒီးပမၤစၢၤအီၤလၢတၢ်ဝံသးစူၤအပူၤအဃိ ပသးခုဒိၣ်မးလီၤ.”
ဖဲ ကဲလဲး(စ်) ဒီးအမါ မၤစၢၤအဖိခွါလၢ တၢ်ဝံသးစူၤအပူၤအခါ အဝဲသ့ၣ်နာ်ဝဲသပှၢ်ကတၢၢ်လၢ ယဟိဝၤယွၤကမၤစၢၤအဝဲသ့ၣ်လီၤ. ကဲလဲး(စ်) တဲဝဲလၢ “ထီဘိန့ၣ် ယတဲ မဲးထါယဲး(စ်) လၢ ပအဲၣ်အီၤဒိၣ်မးအဃိ ထိၣ်ဟူးထိၣ်ဂဲၤထီၣ် အမိဒီးယၤလၢ ပကဃ့တၢ်လၢအဂီၢ် လၢယဟိဝၤယွၤအအိၣ် အါန့ၢ်ဒံးလၢညါလီၤ.” ခီဖျိမိၢ်ပၢ်ခံဂၤအံၤ ဝံသးစူၤတၢ်ဒီး တဟ့ၣ်ၡူဘၣ်အဃိ အဝဲသ့ၣ်ဒိးန့ၢ်ဘၣ်တၢ်သးခုနီၢ်ကီၢ်လီၤ.
တကးဒံးဘၣ် ဖဲပကွၢ်ထွဲပဟံၣ်ဖိဃီဖိလၢ အအိၣ်ဒီးတၢ်ဆါလၢ ယံာ်ယံာ်ထၢထၢလၢ အဘျါတန့ၢ်လၢၤဘၣ်အခါ ပလိၣ်ဘၣ်တၢ်ဝံသးစူၤစ့ၢ်ကီးလီၤ. ပကကွၢ်သကိး အဲလဲၤ(န်) လၢအအိၣ်လၢ စကဒံၤန့ဘံယၢၤ ဘ့ၤသ့လးအဂ့ၢ်န့ၣ်လီၤ. * (ကွၢ်တၢ်ဂ့ၢ်အဘျဲၣ်တက့ၢ်.)
လၢအပူၤကွံာ်ဃိးနံၣ်ဃၣ်ဃၣ်န့ၣ် ဒီပုၢ်ဝဲၢ်မုၣ် အဲလဲၤ(န်) အဝၤ ဘၣ်ကလံၤခံဘျီအဃိ အခိၣ်နူာ်ဘၣ်ဒိဝဲလီၤ. လၢတၢ်န့ၣ်အဃိ အဝဲတတူၢ်ဘၣ် တၢ်သူၣ်အုးသးအုး, တၢ်သူၣ်ခုသးခု ဒီးတၢ်သးကညီၤလၢၤဘၣ်. လၢအဲလဲၤ(န်)အဂီၢ်န့ၣ် မ့ၢ်တၢ်လၢအကီဒိၣ်မးတခါလီၤ. အဝဲတဲဝဲ “ယဘၣ်ဃ့ဘါထုကဖၣ်ထီဘိ ဒီးယလိၣ်ဘၣ်တၢ်ဝံသးစူၤအါမးလီၤ.” ဒီးအဝဲတဲကဒီးဝဲလၢ “လံာ်စီဆှံအဆၢလၢ အမၤမုာ်ထီၣ်ယသးအဒိၣ်ကတၢၢ်န့ၣ် မ့ၢ်ဝဲ ဖံလံးပံၤ ၄:၁၃ လီၤ. ဖဲန့ၣ်တဲဝဲလၢ ‘ယမၤတၢ်ခဲလၢာ်သ့လၢ ပှၤလၢ အဒုးဆူၣ်ထီၣ်ယဂံၢ်ယဘါတဂၤ’ အဃိလီၤ.” ခီဖျိလၢ ယဟိဝၤယွၤအစိအကမီၤဒီး အတၢ်ဆီၣ်ထွဲမၤစၢၤအဃိ အဲလဲၤ(န်) လဲၤခီဖျိဝဲ တၢ်အိၣ်သးအံၤလၢ တၢ်ဝံသးစူၤအပူၤန့ၢ်ဝဲလီၤ.—စံးထီၣ်ပတြၢၤ ၆၂:၅, ၆.
ကွၢ်လိမၤဒိး ယဟိၤဝၤယွၤအတၢ်ဝံသးစူၤတက့ၢ်
ပှၤလၢအဒိဂ့ၤတဲာ်ဘၣ်ကတၢၢ်လၢ အိၣ်ဒီးတၢ်ဝံသးစူၤန့ၣ် မ့ၢ်ဝဲယဟိဝၤယွၤလီၤ. (၂ ပ့းတရူး ၃:၁၅) လံာ်စီဆှံ ပာ်ဖျါထီၣ်ဝဲယဟိဝၤယွၤ အတၢ်ဝံသးစူၤအဂ့ၢ်အါမးလီၤ. (နဃ့မယၤ ၉:၃၀; ယၡါယၤ ၃၀:၁၈) ဖဲစီၤအၤဘြၤဟၣ် သံကွၢ်တၢ်ဘၣ်ဃးဒီး ယဟိဝၤယွၤအတၢ်ဆၢတဲာ်လၢ ကစံၣ်ညီၣ် ဝ့ၢ်စဒိၣ်အခါ ယဟိဝၤယွၤမၤဝဲဒ်လဲၣ်န့ၣ် မ့ၢ်နနီၣ်ဘၣ်ဒံးဧါ. ယဟိဝၤယွၤ ပျဲဝဲလၢ စီၤအၤဘြၤဟၣ် ကပာ်ဖျါထီၣ်အတၢ်ထံၣ်လီၤ. လၢတၢ်ဝံသးစူၤအပူၤ အဝဲဒိကနၣ် စီၤအၤဘြၤဟၣ်အတၢ်သံကွၢ် ဒီးအတၢ်ဘၣ်ယိၣ်ဘၣ်ဘှီ တဘျီဝံၤတဘျီလီၤ. တကးဒံးဘၣ် အဝဲပာ်ဖျါထီၣ်လၢ အဝဲနၢ်ဟူဝဲ တၢ်လၢစီၤအၤဘြၤဟၣ် အတၢ်ကိၢ်တၢ်ဂီၤ ဒီးအဝဲမၤမုာ်ထီၣ်က့ၤ စီၤအၤဘြၤဟၣ်အသးလၢ ပှၤတီပှၤလိၤမ့ၢ်အိၣ်လၢ ဝ့ၢ်အပူၤ ထဲအဂၤတဆံဧိၤဒၣ်လဲာ် အဝဲတမၤဟးဂီၤကွံာ်ဝဲ ဝ့ၢ်စဒိၣ်ဘၣ်. (၁ မိၤၡ့ ၁၈:၂၂-၃၃) ယဟိဝၤယွၤ ဒိကနၣ်တၢ်လၢ တၢ်ဝံသးစူၤအပူၤထီဘိ ဒီးအဝဲတမၤဆၢကဒါက့ၤတၢ် ကရီကဒးဘၣ်.
တၢ်ဝံသးစူၤန့ၣ် မ့ၢ်ဝဲတၢ်ဂ့ၤတၢ်ဝါတခါလၢ ကဘၣ်အိၣ်ဒီး ခရံာ်ဖိခဲလၢာ်န့ၣ်လီၤ. ပမ့ၢ်ဂုာ်ကျဲးစၢး အိၣ်ဒီးတၢ်ဝံသးစူၤန့ၣ် မ့ၢ်ဝဲပမၤလၤကပီၤ ပပၢ်ယဟိဝၤယွၤလၢ အအိၣ်ဒီးတၢ်သးကညီၤ ဒီးအိၣ်ဒီးတၢ်ဝံသးစူၤတဂၤန့ၣ်လီၤ. တကးဒံးဘၣ် ပကပၣ်ဃုာ်လၢ ပှၤလၢအ “ဝံသးစူၤတၢ်သတးဒီး န့ၢ်သါတၢ်စံးပာ်တဖၣ်” အကျါန့ၣ်လီၤ.—ဧ့ၤဘြံၤ ၆:၁၀-၁၂.
^ လံာ်အဆၢ. 4 တၢ်ဂ့ၤတၢ်ဝါခွံခါ လၢအဟဲကဲထီၣ်အသးခီဖျိ ယွၤအသးစီဆှံန့ၣ် ပၣ်ဃုာ်ဒီးတၢ်အဲၣ်တၢ်ကွံလီၤ. ဒီးတၢ်အဲၣ်တၢ်ကွံအဂ့ၢ်န့ၣ် ပတဲသကိးတ့ၢ်အီၤအဆိကတၢၢ်လီၤ.
^ လံာ်အဆၢ. 15 ပှၤမံၤ ဘၣ်တၢ်ဆီတလဲအီၤလီၤ.
တၢ်ဂ့ၤအဂၤလၢ နကဘၣ်သး
တၢးထီခိးတၢ်—လံာ်လၢတၢ်မၤလိအဂီၢ်
တၢ်အဲၣ်တၢ်ကွံ မ့ၢ်တၢ်ဂ့ၤတၢ်ဝါလၢ အလုၢ်ဒိၣ်ပှ့ၤဒိၣ်
လံာ်စီဆှံ ပာ်ဖျါထီၣ်ဝဲလၢ တၢ်အဲၣ်တၢ်ကွံန့ၣ် ဟဲကဲထီၣ်အသး ခီဖျိလၢယဟိဝၤယွၤ အသးစီဆှံလီၤ. တၢ်အဲၣ်တၢ်ကွံ မ့ၢ်မနုၤလဲၣ်. ပမၤအါထီၣ်အီၤကသ့ဒ်လဲၣ်. ဒီးပပာ်ဖျါထီၣ်အီၤ ကိးနံၤဒဲးကသ့ဒ်လဲၣ်.
တၢးထီခိးတၢ်—လံာ်လၢတၢ်မၤလိအဂီၢ်
တၢ်သူၣ်ခုသးခု တၢ်ဂ့ၤတၢ်ဝါလၢ ပဒိးန့ၢ်ဘၣ်လၢ ယွၤအအိၣ်
နမ့ၢ်တူၢ်ဘၣ်လၢ တၢ်မၤကွၢ်လၢ တနံၤဘၣ်တနံၤတဖၣ် မၤစှၤလီၤ နတၢ်သူၣ်ခုသးခုန့ၣ် ဒ်သိးနကန့ၢ်ဘၣ်က့ၤ တၢ်သးခုအဂီၢ် နမၤတၢ်မနုၤသ့ဝဲလဲၣ်.
တၢးထီခိးတၢ်—လံာ်လၢတၢ်မၤလိအဂီၢ်
တၢ်ဃူတၢ်ဖိး ပထံၣ်န့ၢ်အီၤ ကသ့ဒ်လဲၣ်
ပအိၣ်မူဘၣ်လၢ ဟီၣ်ခိၣ်လၢအပှဲၤဒီး တၢ်ကီတၢ်ခဲအဃိ ဒ်သိးပကအိၣ်ဒီး တၢ်ဃူတၢ်ဖိးအဂီၢ် ပကဘၣ်ဂုာ်ကျဲးစၢးလီၤ. လံာ်စီဆှံ မၤစၢၤပှၤသ့လီၤ.
တၢးထီခိးတၢ်—လံာ်လၢတၢ်မၤလိအဂီၢ်
တၢ်သူၣ်ကညီၤသးကညီၤ—တၢ်ဂ့ၤတၢ်ဝါတခါလၢ ဘၣ်တၢ်ပာ်ဖျါထီၣ်အီၤလၢ တၢ်ကတိၤဒီးတၢ်မၤ
တၢ်သးကညီၤန့ၣ် ပၣ်ဃုာ်လၢ သးအတၤသၣ်အကျါန့ၣ်လီၤ. ပမၤဂ့ၤထီၣ် တၢ်ဂ့ၤတၢ်ဝါတခါအံၤ ကသ့ဒ်လဲၣ်
