ပှၤဘျၢတၢ် စီၤယိၤဟၣ်—တၢ်အဒိအတဲာ် လၢကမၤစၢၤပှၤဒ်သိး ပကအိၣ်ဒီး တၢ်သးခုထီဘိ
လၢတၢ်အိၣ်ဖှိၣ်အပူၤ မူဒါလၢ နအဲၣ်ဒိးမၤအီၤန့ၣ် မ့ၢ်အအိၣ်တမံၤမံၤဧါ. ဘၣ်သ့ၣ်သ့ၣ် ပှၤတဂၤဂၤ ကဒိးန့ၢ်ဘၣ် မူဒါအံၤလီၤ. မ့တမ့ၢ် ဘၣ်သ့ၣ်သ့ၣ် လၢအပူၤကွံာ်န့ၣ် နကမၤတ့ၢ်မူဒါတခါအံၤ မ့တမ့ၢ် နကအိၣ်ဒီး တၢ်ခွဲးတၢ်ယာ်လီၤဆီအံၤလီၤ. ခီဖျိလၢ နသးပှၢ်ထီၣ်, နတၢ်အိၣ်ဆူၣ်အိၣ်ချ့ တဂ့ၤဘၣ်, ကျိၣ်စ့အတၢ်ကီတၢ်ခဲ မ့တမ့ၢ် ဟံၣ်ဖိဃီဖိ အမူဒါတဖၣ်အဃိ နမၤတၢ်ထဲသိးဒီး နအဲၣ်ဒိးမၤ တသ့လၢၤဘၣ်. မ့တမ့ၢ် ခီဖျိလၢ တၢ်ကရၢကရိ အတၢ်ဆီတလဲတဖၣ်အဃိ နဘၣ်ပာ်တ့ၢ်ကွံာ် နမူဒါလၢ နမၤတ့ၢ်အီၤ ဖးယံာ်န့ၣ်လီၤ. လၢတၢ်န့ၣ်အဃိ ဘၣ်သ့ၣ်သ့ၣ် နကတူၢ်ဘၣ်လၢ နမၤကစၢ်ယွၤ အတၢ်မၤထဲသိးဒီး နအဲၣ်ဒိးမၤအီၤ တသ့လၢၤဘၣ်. နမ့ၢ်အိၣ်ဒီး တၢ်အိၣ်သးဒ်အံၤန့ၣ် ဘၣ်သ့ၣ်သ့ၣ် နသးကဟးဂီၤလီၤ. ဘၣ်ဆၣ် ဒ်သိးနသးသုတဟးဂီၤ ဒီးသးဘၣ်ဒိ ထီဘိတဂ့ၤအဂီၢ် တၢ်မနုၤ ကမၤစၢၤနၤလဲၣ်. ဒီးနဆဲးအိၣ်ဒီး တၢ်သးခု ကသ့ဒ်လဲၣ်.
ပှၤဘျၢတၢ် စီၤယိၤဟၣ် အဒိအတဲာ် ကမၤစၢၤပှၤဒ်သိး ပကအိၣ်ဒီးတၢ်သးခု ထီဘိအဂီၢ်လီၤ. စီၤယိၤဟၣ် အိၣ်ဒီးတၢ်ခွဲးတၢ်ယာ် လီၤဆီတဖၣ် ဒီးအဝဲဘၣ်သူၣ်ဘၣ်သးဝဲ ဒိၣ်မးန့ၣ်လီၤ. ဘၣ်သ့ၣ်သ့ၣ် အဝဲတဆိကမိၣ်ဘၣ်ဝဲ တၢ်လၢအကဟဲကဲထီၣ်အသးဒီးအီၤန့ၣ်ဘၣ်. ဘၣ်သ့ၣ်သ့ၣ် အဝဲတဆိကမိၣ်ဘၣ်ဝဲလၢ အကအိၣ်ဘၣ်လၢဃိာ်ပူၤ ယံာ်န့ၢ်ဒံး တၢ်ဆၢကတီၢ် လၢအစံၣ်တဲၤတဲလီၤတၢ်န့ၣ်ဘၣ်. အဝဲဆဲးအိၣ်ဒီး တၢ်သးခုလၢ အတၢ်အိၣ်မူအပူၤလီၤ. တၢ်မနုၤ မၤစၢၤအီၤ ဒ်သိးအကဆဲးအိၣ်ဒီး တၢ်သးခုအဂီၢ်လဲၣ်. ပဝဲသ့ၣ်တဖၣ်စ့ၢ်ကီး ပမ့ၢ်ထံၣ်ဘၣ်ဒီး တၢ်လၢအလီၤသူၣ်အုးသးအုးဒၣ်လဲာ် ပဆဲးအိၣ်ဒီး တၢ်သးခု ကသ့ဒ်လဲၣ်.
မူဒါလၢ အမၤသးခု စီၤယိၤဟၣ်
ယဟိဝၤယွၤ ဟ့ၣ်လီၤစီၤယိၤဟၣ်မူဒါ လၢအဝဲကကတဲာ်ကတီၤထီၣ် ပှၤဂီၢ်မုၢ်တဖၣ် ဒ်သိးကတူၢ်လိာ် မ့းၡံအၤအဂီၢ်လီၤ. အဝဲစးထီၣ်မၤဝဲ အမူဒါအံၤဖဲ ခ.န ၂၉ ဒီးအဝဲတဲဝဲလၢ “ပီၢ်ယၢ်လီၤက့ၤသုသးတက့ၢ်. အဂ့ၢ်ဒ်အံၤ မူခိၣ်အဘီအမုၢ်န့ၣ် ဘူးထီၣ်လံ.” (မးသဲ ၃:၂; လူၤကၣ် ၁:၁၂-၁၇) ပှၤအါဂၤ ဒိကနၣ်ဝဲ စီၤယိၤဟၣ်လီၤ. ပှၤဂီၢ်မုၢ်တဖၣ် ဟဲလၢတၢ်လီၢ်အယံၤ ဒ်သိးကဒိကနၣ်ဝဲ တၢ်ကစီၣ်လၢ အဝဲတဲဝဲ ဒီးအဝဲသ့ၣ်အါဂၤ ပီၢ်ယၢ်လီၤအသး ဒီးဒိးဘျၢထံလီၤ. ဒီးလၢတၢ်သူၣ်ဒူသးဒူအပူၤ စီၤယိၤဟၣ် ဟ့ၣ်ပလီၢ်ဝဲ တၢ်ဘူၣ်တၢ်ဘါခိၣ်နၢ် လၢအပာ်တီပာ်လိၤအသးတဖၣ် လၢအဝဲသ့ၣ် မ့ၢ်တပီၢ်ယၢ်လီၤအသးဘၣ်န့ၣ် ကဘၣ်တၢ်စံၣ်ညီၣ်န့ၣ်လီၤ. (မးသဲ ၃:၅-၁၂) ဒီးဃုလါဃၣ်ဃၣ် ဝံၤအလီၢ်ခံ စီၤယိၤဟၣ် မၤဝဲတၢ်မၤလၢ အရ့ဒိၣ်ကတၢၢ်လၢအမ့ၢ် အဒိးဘျၢ ယ့ၣ်ၡူးလၢထံလီၤ. စးထီၣ်ဖဲန့ၣ်န့ၣ် အဝဲဟံးစုနဲၣ်ကျဲပှၤဂၤ လၢကပိာ်ယ့ၣ်ၡူး လၢအမ့ၢ် တၢ်စံးပာ် မ့းၡံအၤအခံလီၤ.—ယိၤဟၣ် ၁:၃၂-၃၇.
ခီဖျိလၢ စီၤယိၤဟၣ် အိၣ်ဒီးမူဒါလၢ အလီၤဆီတခါအံၤအဃိ ယ့ၣ်ၡူးတဲဝဲလၢ “ပှၤလၢပိာ်မုၣ် ဆံးစၢ်န့ၢ်အီၤအကျါန့ၣ်, ပှၤဒိၣ်န့ၢ် ပှၤဘျၢတၢ်စီၤယိၤဟၣ် တအိၣ်ထီၣ်ဘၣ်နီတဂၤဘၣ်” လီၤ. (မးသဲ ၁၁:၁၁) စီၤယိၤဟၣ် ကသးခုလၢ အဒိးန့ၢ်ဘၣ်ဝဲ တၢ်ဆိၣ်ဂ့ၤတဖၣ်အဃိလီၤ. ဒ်စီၤယိၤဟၣ်အသိး ဆၢကတီၢ်ခဲအံၤ ပှၤအါဂၤန့ၣ် ဒိးန့ၢ်ဘၣ် ကစၢ်ယွၤအတၢ်ဆိၣ်ဂ့ၤတဖၣ်လီၤ. ဆိကမိၣ်ကွၢ် ဒီပုၢ်ဝဲၢ်ခွါထဲရံၤ အဒိအတဲာ်တက့ၢ်. အဝဲဒီးအမါ စဲဒရၣ်န့ၣ် မၤကစၢ်ယွၤအတၢ်မၤ လၢဆၢကတီၢ်လၢပှဲၤ အိၣ်ဝဲအနံၣ် ၅၀ ဘျဲၣ်လီၤ. ထဲရံၤတဲဝဲလၢ “ယဒိးန့ၢ်ဘၣ် တၢ်ခွဲးတၢ်ယာ် လီၤဆီအါမးလီၤ. ယမၤဘၣ် ပှၤလဲၤလၢညါ, ယကဲဘၣ် ပှၤဘ့ၤသ့လးဖိ, ပှၤလဲၤလၢညါလီၤဆီ, ကဝီၤအပှၤကွၢ်တၢ်, ကီၢ်ရ့ၣ်အပှၤကွၢ်တၢ် ဒီးခဲအံၤန့ၣ် ယမၤဘၣ်ကဒီး ပှၤလဲၤလၢညါလီၤဆီလီၤ.” ပမ့ၢ်ဒိးန့ၢ်ဘၣ် မူဒါလီၤဆီတဖၣ်လၢ ကစၢ်ယွၤအတၢ်မၤအပူၤန့ၣ် ပသးခုဘၣ်ဆၣ် ဖဲပမၤလိ စီၤယိၤဟၣ် အဒိအတဲာ်အခါ ပကသ့ၣ်ညါဘၣ်လၢ ဖဲပတၢ်အိၣ်သး ဆီတလဲအခါ ဒ်သိးပကဆဲးအိၣ်ဒီး တၢ်သးခုအဂီၢ် ပကဘၣ် ထဲးဂံၢ်ထဲးဘါလီၤ.
ပာ်လုၢ်ပာ်ပှ့ၤ တၢ်ခွဲးတၢ်ယာ် လၢယဟိဝၤယွၤဟ့ၣ်နၤ
ခီဖျိလၢ စီၤယိၤဟၣ် ပာ်လုၢ်ပာ်ပှ့ၤဝဲ တၢ်ခွဲးတၢ်ယာ်လၢ အအိၣ်ဒီးအီၤတဖၣ်အဃိ အဝဲအိၣ်ဒီး တၢ်သးခုလီၤ. ဆိကမိၣ်ကွၢ် တၢ်အဒိအံၤတက့ၢ်. ဖဲအဝဲ ဒိးဘျၢယ့ၣ်ၡူးလၢထံ ဝံၤအလီၢ်ခံ ပှၤလၢအပိာ်ယ့ၣ်ၡူးအခံတဖၣ် ဟဲအါထီၣ် ဒီးပှၤလၢအပိာ် အခံတဖၣ်န့ၣ် စှၤလီၤဝဲလီၤ. လၢတၢ်န့ၣ်အဃိ စီၤယိၤဟၣ် အပျဲၢ်အဘီၣ်တဖၣ် ဘၣ်ယိၣ်တၢ်ဒီး ဟဲတဲဘၣ်အီၤလၢ “ကွၢ်ကွၢ်, ပှၤ . . . တဂၤန့ၣ်, ဘျၢတၢ်, ဒီးပှၤခဲလၢာ် ဟဲဆူအအိၣ်လီၤ.” (ယိၤဟၣ် ၃:၂၆) ဖဲန့ၣ်န့ၣ် စီၤယိၤဟၣ် တဲဆၢက့ၤ အဝဲသ့ၣ်လၢ “ပှၤလၢအအိၣ်ဒီး တလးမူးပိာ်မုၣ်န့ၣ်, မ့ၢ်တလးမူးပိာ်ခွါလီၤ. ဘၣ်ဆၣ်ဒီး တလးမူးပိာ်ခွါအတံၤအသကိး လၢအဆၢထၢၣ်, ဒီးနၢ်ဟူ တလးမူးပိာ်ခွါအကလုၢ်န့ၣ်, သးခုဒိၣ်မးလီၤ. မၤသးဒ်န့ၣ်ဒီး ယတၢ်သးခုအံၤ လၢထီၣ်ပှဲၤထီၣ်လီၤ.” (ယိၤဟၣ် ၃:၂၉) စီၤယိၤဟၣ်န့ၣ် တပြၢလိာ်အသးဒီး ယ့ၣ်ၡူးဘၣ်. ယ့ၣ်ၡူးအမူဒါန့ၣ် အရ့ဒိၣ်န့ၢ်ဒံး စီၤယိၤဟၣ်အမူဒါ ဘၣ်ဆၣ် စီၤယိၤဟၣ် တတူၢ်ဘၣ်ဝဲလၢ အမူဒါန့ၣ် အလုၢ်အပှ့ၤ တအိၣ်လၢၤဘၣ်န့ၣ်ဘၣ်. အဝဲဆဲးပာ်လုၢ်ပာ်ပှ့ၤဝဲ အမူဒါလၢအမ့ၢ် “တလးမူးပိာ်ခွါ အတံၤအသကိး” အဃိအဝဲဆဲးအိၣ်ဒီး တၢ်သးခုလီၤ.
စီၤယိၤဟၣ်အမူဒါန့ၣ် တမ့ၢ်တၢ်လၢအညီဘၣ်ဆၣ် အတၢ်ပာ်သူၣ်ပာ်သး မၤစၢၤအီၤဒ်သိး အကအိၣ်ဒီး တၢ်သးခုအဂီၢ်လီၤ. လၢအဝဲအိၣ်ဖျဲၣ်ထီၣ်လံၤလံၤန့ၣ် အဝဲမ့ၢ် နစၤရံဖိအဃိ အဝဲအီစပံးထံ တန့ၢ်ဘၣ်. (လူၤကၣ် ၁:၁၅) ယ့ၣ်ၡူးတဲဝဲလၢ “စီၤယိၤဟၣ်ဟဲဝဲ, ဒီးတအီၣ်ဘၣ်တၢ်ဘၣ်, ဒီးတအီဘၣ်တၢ်ဘၣ်.” အဃိပသ့ၣ်ညါဘၣ်လၢ စီၤယိၤဟၣ် အိၣ်မူဝဲယိယိဖိလီၤ. မ့မ့ၢ်ယ့ၣ်ၡူး အပျဲၢ်အဘီၣ်တဖၣ်န့ၣ် တလိၣ်မၤဝဲ ဒ်နစၤရံအတၢ်သိၣ်တၢ်သီ အိၣ်ဝဲအသိးဘၣ်. အဃိအဝဲသ့ၣ် အိၣ်မူဝဲဒ် ပှၤမုၢ်ဆ့ၣ်မုၢ်ဂီၤဖိတဖၣ်အသိး သ့ဝဲလီၤ. (မးသဲ ၁၁:၁၈, ၁၉) စီၤယိၤဟၣ်န့ၣ် တမၤတၢ်လီၤလး နီတမံၤဘၣ်. ဘၣ်ဆၣ် အဝဲသ့ၣ်ညါဝဲလၢ ယ့ၣ်ၡူးအပျဲၢ်အဘီၣ်တဖၣ် ဒီးအဝဲအပျဲၢ်အဘီၣ်လၢ အကဲထီၣ် ယ့ၣ်ၡူးအပျဲၢ်အဘီၣ်တနီၤန့ၣ် မၤတၢ်လီၤလးတဖၣ်လီၤ. (မးသဲ ၁၀:၁; ယိၤဟၣ် ၁၀:၄၁) အဝဲတဆိကမိၣ်ဝဲ အပျဲၢ်အဘီၣ် ဒီးယ့ၣ်ၡူးအပျဲၢ်အဘီၣ် အတၢ်လီၤဆီလိာ်အသးအဂ့ၢ် အါတလၢဘၣ်. လၢတၢ်န့ၣ်အလီၢ် အဝဲသးစၢၢ်ဆၢဝဲ အမူဒါလၢ ယဟိဝၤယွၤ ဟ့ၣ်လီၤအီၤန့ၣ်လီၤ.
ပမ့ၢ်ပာ်လုၢ်ပာ်ပှ့ၤ ပမူဒါလၢ ကစၢ်ယွၤဟ့ၣ်လီၤပှၤခဲအံၤန့ၣ် ပဆဲးအိၣ်ဒီး တၢ်သးခုသ့လီၤ. ထဲရံၤတဲဝဲလၢ “ယသးစၢၢ်ဆၢ ယမူဒါ လၢယဒိးန့ၢ်ဘၣ်အီၤ တခါစုာ်စုာ်လီၤ.” ဖဲအဝဲဆိကမိၣ်ကဒါက့ၤ အမၤကစၢ်ယွၤအတၢ်မၤ လၢဆၢကတီၢ်လၢပှဲၤအခါ အဝဲတဲဝဲလၢ “ယတသးအုးဘၣ်, ယအိၣ်ဒီး တၢ်လဲၤခီဖျိ ထဲအလီၤသးခုတဖၣ်လီၤ.”
ပမ့ၢ်ဒိးန့ၢ်ဘၣ် မူဒါဒ်လဲၣ်ဂ့ၤဒ်လဲၣ်ဂ့ၤ ပမ့ၢ်ဆိကမိၣ်ထံ ဘၣ်ဃးဒီး မူဒါလၢပဒိးန့ၢ်ဘၣ်အီၤတဖၣ် မ့ၢ်ဝဲတၢ်ခွဲးတၢ်ယာ် လီၤဆီထဲလဲၣ်န့ၣ် ပဒိးန့ၢ်ဘၣ်တၢ်သးခု အါန့ၢ်အလီၢ်သ့ဝဲလီၤ. “ပမ့ၢ်ယွၤအပှၤမၤသကိးတၢ်” အဃိမ့ၢ်တၢ်ခွဲးတၢ်ယာ်လီၤဆီ လၢပဂီၢ်လီၤ. (၁ ကရံၣ်သူး ၃:၉) တၢ်ဖိတၢ်လံၤလၢ အလုၢ်ဒိၣ်ပှ့ၤဒိၣ်တခါန့ၣ် နမ့ၢ်ကတဲာ်ကတီၤအီၤထီဘိန့ၣ် အကဖျါဃံဖျါလၤ ထီဘိလီၤ. ဒ်န့ၣ်အသိး နမ့ၢ်ဆဲးဆိကမိၣ် ဘၣ်ဃးဒီး ပမၤသကိးဘၣ်တၢ်ဒီး ယဟိဝၤယွၤ မ့ၢ်တၢ်ခွဲးတၢ်ယာ်ဒိၣ်ထဲလဲၣ်န့ၣ် ပကဆဲးအိၣ်ဒီး တၢ်သူၣ်ခုသးခုလီၤ. ပတထိၣ်သတြီၤ တၢ်လၢပမၤအီၤတဖၣ် ဒီးတၢ်လၢပှၤဂၤ မၤဝဲတဖၣ်န့ၣ်ဘၣ်. ဒီးပတဆိကမိၣ်လၢ တၢ်မၤလၢ ယဟိဝၤယွၤဟ့ၣ်ပှၤန့ၣ် အလုၢ်အပှ့ၤ တအိၣ်ထဲသိးဒီး တၢ်မၤလၢ ယဟိဝၤယွၤ ဟ့ၣ်ပှၤဂၤန့ၣ်ဘၣ်.—ကလၤတံ ၆:၄.
သးစၢၢ်ဆၢ နီၢ်သးအတၢ်ဖံးတၢ်မၤတဖၣ်
စီၤယိၤဟၣ်သ့ၣ်ညါလၢ အတမၤဘၣ် တၢ်စံၣ်တဲၤတဲလီၤတၢ်မၤ ယံာ်ယံာ်လၢၤဘၣ်. ဘၣ်ဆၣ် ဘၣ်သ့ၣ်သ့ၣ် အဝဲတသ့ၣ်ညါဝဲလၢ အတၢ်မၤအံၤ ကကတၢၢ်ဝဲ အၢအၢသီသီန့ၣ်ဘၣ်. (ယိၤဟၣ် ၃:၃၀) ဖဲ ခ.န ၃၀, စီၤယိၤဟၣ် ဒိးဘျၢယ့ၣ်ၡူးလၢထံဝံၤ ကအိၣ်ဃုလါဃၣ်ဃၣ်န့ၣ် စီၤပၤဟ့ၤရိာ် ထၢနုာ်စီၤယိၤဟၣ် လၢဃိာ်ပူၤလီၤ. ဘၣ်ဆၣ် စီၤယိၤဟၣ် ဆဲးသိၣ်လိ တၢ်လၢအမ့ၢ်အတီလီၤ. (မၢ်ကူး ၆:၁၇-၂၀) မ့ၢ်လၢစီၤယိၤဟၣ် ဆဲးသးစၢၢ်ဆၢ နီၢ်သးအတၢ်ဖံးတၢ်မၤတဖၣ်အဃိ အဝဲဆဲးအိၣ်ဒီး တၢ်သးခုလီၤ.
ဖဲစီၤယိၤဟၣ် အိၣ်လၢဃိာ်ပူၤအခါ အဝဲနၢ်ဟူဘၣ် ယ့ၣ်ၡူးအတၢ်စံၣ်တဲၤတဲလီၤ လဲၤထီၣ်လဲၤထီအဂ့ၢ်လီၤ. (မးသဲ ၁၁:၂; လူၤကၣ် ၇:၁၈) စီၤယိၤဟၣ်နာ်ဝဲလၢ ယ့ၣ်ၡူးမ့ၢ် မ့းၡံအၤ ဘၣ်ဆၣ် ဘၣ်သ့ၣ်သ့ၣ် အဝဲကအဲၣ်ဒိးသ့ၣ်ညါဝဲလၢ ယ့ၣ်ၡူးကမၤလၢပှဲၤ ဝံအတၢ်စံးပာ်ခဲလၢာ် လၢအဘၣ်ဃးဒီး မ့းၡံအၤ ဒ်လဲၣ်န့ၣ်လီၤ. စီၤယိၤဟၣ်သ့ၣ်ညါဝဲလၢ မ့းၡံအၤ ကကဲစီၤပၤအဃိ အဝဲကဆိကမိၣ်ဘၣ်လၢ တယံာ်လၢၤဘၣ်န့ၣ် မ့ၢ်ယ့ၣ်ၡူး ကစးထီၣ်ပၢတၢ်ဧါ, မ့ၢ်အကမၤပူၤဖျဲးအီၤလၢ ဃိာ်ပူၤဧါ န့ၣ်လီၤ. မ့ၢ်လၢအဝဲ အဲၣ်ဒိးသ့ၣ်ညါအါထီၣ်ဝဲလၢ ယ့ၣ်ၡူးကမၤ တၢ်မနုၤလဲၣ် အဃိအဝဲ မၢအပျဲၢ်အဘီၣ်ခံဂၤ လဲၤသံကွၢ်ယ့ၣ်ၡူးလၢ “နဲဒၣ်အံၤ, နမ့ၢ်ပှၤလၢအဟဲဝဲတဂၤန့ၣ်, မ့ၢ်ပဘၣ်ကွၢ်လၢ်ဒံး ပှၤအဂၤတဂၤအကျဲလဲၣ်” န့ၣ်လီၤ. (လူၤကၣ် ၇:၁၉) အဃိ ယ့ၣ်ၡူးမၢအဝဲသ့ၣ် က့ၤတဲဘၣ်စီၤယိၤဟၣ်လၢ “ပှၤလၢအမဲာ်ဘျီၣ်တဖၣ်န့ၣ်, ထံၣ်ထီၣ်က့ၤတၢ်, ပှၤလၢအခီၣ်ဟးဂီၤတဖၣ်န့ၣ်, ဟးထီၣ်က့ၤဝဲ, ပှၤဘၣ်တၢ်ဆါအၢတဖၣ်န့ၣ် ကဆှီထီၣ်က့ၤဝဲ, ပှၤလၢအနၢ်တအၢတဖၣ်န့ၣ်, နၢ်ဟူထီၣ်က့ၤတၢ်, ပှၤလၢအသံတဖၣ်န့ၣ်, ဂဲၤဆၢထၢၣ်က့ၤဝဲ, ပှၤလၢအဖှီၣ်အယာ်တဖၣ်န့ၣ်, တၢ်စံၣ်တဲၤတဲလီၤအီၤလၢ တၢ်သးခုအကစီၣ်” လီၤ. (လူၤကၣ် ၇:၂၀-၂၂) ဖဲအဝဲသ့ၣ်တဲဝဲ ယ့ၣ်ၡူးမၤတၢ်လီၤလးတဖၣ် ဒီးမၤဘျါတၢ်ဆူးတၢ်ဆါတဖၣ် အဂ့ၢ်အခါ စီၤယိၤဟၣ် ကဒိကနၣ်အဝဲသ့ၣ်လၢ တၢ်သးစၢၢ်ဆၢအပူၤလီၤ.
ဖဲစီၤယိၤဟၣ် နၢ်ဟူဘၣ်ဝဲ တၢ်လၢအပျဲၢ်အဘီၣ်တဖၣ် ဟဲက့ၤတဲအီၤအခါ အဂံၢ်အဘါ ကထီၣ်ဝဲလီၤ. ဒီးအဝဲကနာ်ဝဲလၢ ယ့ၣ်ၡူးမၤလၢပှဲၤ ဝံအတၢ်စံးပာ်လၢ အဘၣ်ဃးဒီး မ့းၡံအၤတဖၣ်န့ၣ်လီၤ. ယ့ၣ်ၡူးတမၤပူၤဖျဲးထီၣ်အီၤ လၢဃိာ်ပူၤဘၣ်ဆၣ် အဝဲသ့ၣ်ညါဝဲလၢ အတၢ်စံၣ်တဲၤတဲလီၤတၢ်မၤန့ၣ် အလုၢ်အပှ့ၤအိၣ်ဝဲလီၤ. အတၢ်အိၣ်သး မ့ၢ်အိၣ်ဒ်လဲၣ်ဂ့ၤဒ်လဲၣ်ဂ့ၤ အဝဲအိၣ်ဒီးတၢ်သးခုလီၤ.
ဒ်စီၤယိၤဟၣ်အသိး ပမ့ၢ်သးစၢၢ်ဆၢ နီၢ်သးအတၢ်ဖံးတၢ်မၤတဖၣ်န့ၣ် ပကအိၣ်ဒီး တၢ်သူၣ်ဒူသးဒူ, တၢ်သူၣ်ခုသးခု ဒီးတၢ်သူၣ်စူၤသးစူၤလီၤ. (ကလီးစဲ ၁:၉-၁၁) ပမၤဒ်န့ၣ်သ့ခီဖျိ ပဖးလံာ်စီဆှံ ဒီးဆိကမိၣ်ထံအီၤလီၤ. ပမ့ၢ်မၤဒ်န့ၣ်န့ၣ် ကမၤစၢၤပှၤဒ်သိး ပကသ့ၣ်ညါလၢ တၢ်လၢပမၤလၢ ယဟိဝၤယွၤအဂီၢ် ကိးမံၤဒဲးန့ၣ် တမ့ၢ်တၢ်ကလီကလီ နီတဘျီဘၣ်. (၁ ကရံၣ်သူး ၁၅:၅၈) စဲဒရၣ် တဲဝဲလၢ “ယဖးလံာ်စီဆှံ အဆၢဒိၣ်တဆၢ ကိးနံၤဒဲးအဃိ မၤစၢၤယၤဒ်သိး ယကဘူးထီၣ်ဒီး ယဟိဝၤယွၤအဂီၢ်လီၤ. ဒီးအမၤစၢၤစ့ၢ်ကီးယၤ ဒ်သိးယတသးစၢၢ်ဆၢ လီၤထဲယနီၢ်ကစၢ်ဘၣ် ဒီးယကသးစၢၢ်ဆၢအီၤ အဂီၢ်လီၤ.” ပမ့ၢ်သးစၢၢ်ဆၢ တၢ်ကစီၣ်လၢ ဘၣ်ဃးဒီး ပဒီပုၢ်ဝဲၢ်မုၣ်ခွါတဖၣ် မၤယဟိဝၤယွၤအတၢ်မၤန့ၣ် ကမၤစၢၤပှၤဒ်သိး ပသုတသးစၢၢ်ဆၢလီၤထဲ ပနီၢ်ကစၢ် အတၢ်အိၣ်သးတဂ့ၤ ဒီးပကသးစၢၢ်ဆၢ တၢ်လၢယဟိဝၤယွၤ မၤကဲထီၣ်လိၣ်ထီၣ်ဝဲတဖၣ်လီၤ. စဲဒရၣ် တဲဝဲလၢ “JW တၢ်ဂီၤမူအတၢ်ရဲၣ်တၢ်ကျဲၤ လၢတလါဘၣ်တလါအဂီၢ်န့ၣ် မၤစၢၤယၤဒ်သိး ယကဘူးထီၣ်ဒီး ယဟိဝၤယွၤ အတၢ်ကရၢကရိ ဒီးယကဆဲးအိၣ်ဒီး တၢ်သးခုလၢ ယမူဒါအပူၤအဂီၢ်လီၤ.”
လၢတၢ်ဆၢကတီၢ် ဖုၣ်ကိာ်ဖိအတီၢ်အပူၤ စီၤယိၤဟၣ် စံၣ်တဲၤတဲလီၤတၢ်ဒီး “စီၤအ့ၤလံယၤ အသူၣ်အသးဒီး အစိအကမီၤ” လီၤ. ဒ်စီၤအ့ၤလံယၤအသိး စီၤယိၤဟၣ်မ့ၢ် “ပှၤကညီ, ဒ်ပဝဲအသိး” လီၤ. (လူၤကၣ် ၁:၁၇; ယၤကိာ် ၅:၁၇) ပမ့ၢ်ကွၢ်လိမၤဒိး စီၤယိၤဟၣ်အဒိအတဲာ်, ပာ်လုၢ်ပာ်ပှ့ၤ တၢ်ခွဲးတၢ်ယာ် လၢကစၢ်ယွၤဟ့ၣ်ပှၤ ဒီးသးစၢၢ်ဆၢ နီၢ်သးအတၢ်ဖံးတၢ်မၤတဖၣ်န့ၣ် တၢ်မ့ၢ်ကဲထီၣ်အသးလၢ ပတၢ်အိၣ်မူအပူၤ ဒ်လဲၣ်ဂ့ၤဒ်လဲၣ်ဂ့ၤ ပအိၣ်ဒီးတၢ်သးခုလၢ ယွၤအဘီအမုၢ်အတၢ်မၤအပူၤ သ့ဝဲလီၤ.