တၢ်မၤလိ ၃၃
ပှၤလၢအ “ဒိကနၣ်” နၤတဖၣ် ကဒိးန့ၢ်ဘၣ် တၢ်အုၣ်က့ၤခီၣ်က့ၤ
“ပလီၢ်နသးလၢ နကစၢ်ဒၣ်နဲအဂ့ၢ်, ဒီးလၢတၢ်သိၣ်တၢ်သီအဂ့ၢ်တက့ၢ်. အိၣ်လၢအပူၤဆိးလၢအပူၤတက့ၢ်. အဂ့ၢ်ဒ်အံၤ, နမ့ၢ်မၤဒ်န့ၣ်ဒီး, နကအုၣ်က့ၤခီၣ်က့ၤ နသးဒၣ်နဲ, ဒီးပှၤလၢအနၢ်ဟူ [“ဒိကနၣ်,” NWT] တၢ်လၢနၤတဖၣ်လီၤ.”—၁ တံၤမသ့း ၄:၁၆.
တၢ်သးဝံၣ် ၆၇ “စံၣ်တဲၤတဲလီၤ တၢ်အကလုၢ်အကထါ”
တၢ်မၤလိအံၤ အတၢ်တိာ်ပာ် *
၁. ပဝဲခဲလၢာ် ပအဲၣ်ဒိးလၢ ပဘူးပတံၢ်တဖၣ် ကမၤတၢ်မနုၤလဲၣ်.
ဖီလံ * တဲဝဲလၢ “စးထီၣ်လၢ ယမၤလိ တၢ်မ့ၢ်တၢ်တီန့ၣ် ယအဲၣ်ဒိးလၢ ယဟံၣ်ဖိဃီဖိကိးဂၤဒဲး ကအိၣ်ဘၣ်ဒီးယၤ လၢပၤရဒံစူးအပူၤလီၤ. လီၤဆီဒၣ်တၢ် ယအဲၣ်ဒိးလၢ ယဝၤ ဝ့(န်) ဒီးယဖိခွါ ကမၤသကိး ယဟိဝၤယွၤအတၢ်မၤ ဃုာ်ဒီးယၤလီၤ.” မ့ၢ်နအိၣ်ဒီး နဘူးနတံၢ်တဖၣ်လၢ အတသ့ၣ်ညါ ဒီးတအဲၣ် ယဟိဝၤယွၤဒံးဘၣ်န့ၣ်ဧါ. မ့မ့ၢ်ဒ်န့ၣ်န့ၣ် ဒ်ဖီလံအသိး ဘၣ်သ့ၣ်သ့ၣ် နကအဲၣ်ဒိးလၢ နဘူးနတံၢ်တဖၣ် ဘူၣ်ထီၣ်ဘါထီၣ် ယဟိဝၤယွၤန့ၣ်လီၤ.
၂. လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.
၂ ပမၢဆူၣ် ပဘူးပတံၢ်တဖၣ်လၢ ကတူၢ်လိာ် တၢ်သးခုကစီၣ် တသ့ဘၣ်. ဘၣ်ဆၣ် ပဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကဒိကနၣ် ဒီးကဆိကမိၣ် တၢ်လၢအဘၣ်ဃးဒီး လံာ်စီဆှံအတၢ်ကစီၣ်တဖၣ်သ့လီၤ. (၂ တံၤမသ့း ၃:၁၄, ၁၅) ဘၣ်မနုၤအဃိ ပကြၢးစံၣ်တဲၤတဲလီၤ ပဘူးပတံၢ်တဖၣ်လဲၣ်. ဘၣ်မနုၤအဃိ ပကဘၣ်ဂုာ်ကျဲးစၢးနၢ်ပၢၢ် အဝဲသ့ၣ် အတၢ်တူၢ်ဘၣ်လဲၣ်. ဒ်သိး ပဘူးပတံၢ်တဖၣ် ကအဲၣ်ယဟိဝၤယွၤ ဒ်ပအဲၣ်ကစၢ်ယွၤအသိးအဂီၢ် ပမၤစၢၤအဝဲသ့ၣ် ကသ့ဒ်လဲၣ်. ဒီးပှၤလၢ ပတၢ်အိၣ်ဖှိၣ်အပူၤ ကိးဂၤဒဲး မၤစၢၤပှၤကသ့ဒ်လဲၣ်.
ဘၣ်မနုၤအဃိ ပကဘၣ်စံၣ်တဲၤတဲလီၤ ပဘူးပတံၢ်တဖၣ်လဲၣ်
၃. ဒ် ၂ ပ့းတရူး ၃:၉ ပာ်ဖျါထီၣ်ဝဲအသိး ဘၣ်မနုၤအဃိ ပကြၢးစံၣ်တဲၤတဲလီၤ ပဘူးပတံၢ်တဖၣ်လဲၣ်.
၃ တယံာ်လၢၤဘၣ်န့ၣ် ယဟိဝၤယွၤ ကမၤကတၢၢ်ကွံာ် ဟီၣ်ခိၣ်အတၢ်ရဲၣ်တၢ်ကျဲၤတဖၣ်လီၤ. ထဲဒၣ် “ပှၤလၢတၢ်ပာ်အီၤ လၢအကန့ၢ်ဘၣ်တၢ်မူ လီၤထူလီၤယိာ်တဖၣ်” န့ၣ်ကပူၤဖျဲးလီၤ. (မၤတၢ် ၁၃:၄၈) ပသူပတၢ်ဆၢကတီၢ် ဒီးပဂံၢ်ပဘါအါမး လၢပကစံၣ်တဲၤတဲလီၤ ပှၤလၢပတသ့ၣ်ညါအီၤတဖၣ်လီၤ. အဃိ ပအဲၣ်ဒိးစံၣ်တဲၤတဲလီၤစ့ၢ်ကီး ပဘူးပတံၢ်တဖၣ် ဒ်သိးအဝဲသ့ၣ် ကဘူၣ်ထီၣ်ဘါထီၣ် ယဟိဝၤယွၤ ဃုာ်ဒီးပှၤအဂီၢ်လီၤ. ပပၢ်ယဟိဝၤယွၤ လၢအပှဲၤဒီး တၢ်အဲၣ်တၢ်ကွံတဂၤန့ၣ်တ “ဘၣ်အသးလၢ ပှၤကတုၤလၢ တၢ်ဟးဂူာ်ဟးဂီၤ နီတဂၤဘၣ်. မ့ၢ်လၢပှၤခဲလၢာ် ကန့ၢ်ဘၣ် တၢ်ပီၢ်ယၢ်လီၤက့ၤအသးလီၤ.”—ဖး ၂ ပ့းတရူး ၃:၉ တက့ၢ်.
၄. ဖဲပစံၣ်တဲၤတဲလီၤ ပဘူးပတံၢ်တဖၣ်အခါ ပမၤကမၣ်ဘၣ်တၢ် သ့လၢကျဲဒ်လဲၣ်.
၄ ပကဘၣ်သ့ၣ်နီၣ်ထီၣ်လၢ ပစံၣ်တဲၤတဲလီၤ တၢ်အုၣ်က့ၤခီၣ်က့ၤအကစီၣ်န့ၣ် အိၣ်ဒီးကျဲလၢအဘၣ် ဒီးကျဲလၢအကမၣ်လီၤ. အဒိ ဖဲပစံၣ်တဲၤတဲလီၤ ပှၤလၢပတသ့ၣ်ညါအီၤဘၣ်တဖၣ်အခါ ဘၣ်သ့ၣ်သ့ၣ် ပကတဲတၢ်ဒီးအဝဲသ့ၣ် လၢတၢ်အဲၣ်တၢ်ကွံအပူၤ ဘၣ်ဆၣ် ဖဲပစံၣ်တဲၤတဲလီၤ ပဘူးပတံၢ်တဖၣ်အခါ ဘၣ်သ့ၣ်သ့ၣ် ပကတဲအဝဲသ့ၣ်လိၤလိၤလီၤ.
၅. တချုးလၢ ပတဲဘၣ် ပဘူးပတံၢ်တဖၣ် လၢတၢ်မ့ၢ်တၢ်တီအဂ့ၢ်ဒံးဘၣ်န့ၣ် ပကြၢးသ့ၣ်နီၣ်ထီၣ် တၢ်မနုၤလဲၣ်.
၅ ပဝဲအါဂၤ ဖဲပဆိကမိၣ်ကဒါက့ၤ ဘၣ်ဃးဒီး ပစးထီၣ်စံၣ်တဲၤတဲလီၤ ပဘူးပတံၢ်တဖၣ်အခါ ဘၣ်သ့ၣ်သ့ၣ် ပသးကဘၣ်ဒိ ဒီးပကဆိကမိၣ်ဘၣ်လၢ ပမ့ၢ်တဲအီၤလၢ ကျဲလၢအဂၤန့ၣ် ကဂ့ၤဝဲလီၤ. တၢ်မၢဖိပီလူး ဟ့ၣ်ကူၣ်ခရံာ်ဖိတဖၣ်လၢ “သုဂ့ၤစံးဆၢ ပှၤတဂၤလၢ်လၢ် ဒ်လဲၣ်ဒ်လဲၣ်, ဒ်သိးသုကသ့ၣ်ညါဒီး, မ်သုကလုၢ်ကထါအိၣ်ဒီး တၢ်ဘျုးတၢ်ဖှိၣ်ဒီး ဟီဒီးအံသၣ်, တဘိယူၢ်ဃီ တက့ၢ်.” (ကလီးစဲ ၄:၅, ၆) အဃိဖဲပစံၣ်တဲၤတဲလီၤ ပဘူးပတံၢ်တဖၣ်အခါ ပကြၢးသ့ၣ်နီၣ်ထီၣ် တၢ်ဟ့ၣ်ကူၣ်အံၤလီၤ. ပမ့ၢ်တမၤဒ်န့ၣ်ဘၣ်န့ၣ် ဘၣ်သ့ၣ်သ့ၣ် ပကမၤဘၣ်ဒိဘၣ် အဝဲသ့ၣ်အသး ဒီးအဝဲသ့ၣ် တအဲၣ်ဒိး ဒိကနၣ်ပှၤလၢၤဘၣ်.
ပမၤစၢၤ ပဘူးပတံၢ်တဖၣ် ကသ့ဒ်လဲၣ်
တၢ်လၢနမၤတဖၣ် ဒီးတၢ်နၢ်ပၢၢ်စၢၤပှၤဂၤန့ၣ် ကဲထီၣ်တၢ်အုၣ်အသး လၢအဂ့ၤဒိၣ်မး လၢပှၤဂၤအဂီၢ်သ့ (ကွၢ်လံာ်အဆၢ ၆-၈) *
၆-၇. ဘၣ်မနုၤအဃိ အရ့ဒိၣ်လၢ ခရံာ်ဖိတဖၣ် ကဘၣ်ပာ်ဖျါထီၣ်လၢ အနၢ်ပၢၢ်စၢၤ အသးသမူတံၤသကိး လၢအတဘူၣ်ထီၣ်ဘါထီၣ် ယဟိဝၤယွၤတဖၣ်လဲၣ်, ဟ့ၣ်တၢ်အဒိတက့ၢ်.
၆ နၢ်ပၢၢ်စၢၤအဝဲသ့ၣ် အတၢ်တူၢ်ဘၣ်. ဖီလံတဲဝဲလၢ “လၢအခီၣ်ထံးန့ၣ် ယအဲၣ်ဒိးတဲဘၣ်ယဝၤထဲ ကစၢ်ယွၤ ဒီးလံာ်စီဆှံအဂ့ၢ်လီၤ. ဒီးဘၣ်ဃးဒီး တၢ်ဂ့ၢ်တၢ်ကျိၤလၢ ‘မုၢ်ဆ့ၣ်မုၢ်ဂီၤ’ တဖၣ်အဂီၢ်န့ၣ် ပတတဲသကိး နီတဘျီဘၣ်.” မ့မ့ၢ် ဖီလံအဝၤ ဝ့(န်) န့ၣ်တသ့ၣ်ညါ လံာ်စီဆှံအဂ့ၢ်အါအါဘၣ် ဒီးအမါတဲတၢ်ဂ့ၢ်မနုၤလဲၣ်န့ၣ် တနၢ်ပၢၢ်ဝဲဘၣ်. အဝဲထံၣ်ဝဲလၢ အမါန့ၣ် ဆိကမိၣ်ထဲ အတၢ်ဘူၣ်တၢ်ဘါအဂ့ၢ်လီၤ. အဝဲဘၣ်ယိၣ်ဝဲလၢ တၢ်ကရၢကရိလၢ အမါလဲၤမၤဘၣ်ထွဲအသးန့ၣ် ကမ့ၢ်တၢ်ကရၢကရိလၢ အလီၤဘၣ်ယိၣ် ဒီးကဘၣ်တၢ်ကွဲန့ၢ်လွဲန့ၢ်အီၤန့ၣ်လီၤ.
၇ ဖီလံတဲဝဲလၢ အဝဲအတၢ်ဆၢကတီၢ်လၢဟါလီၤခီ ဒီးမုၢ်ဃုနံၤ, အိၣ်ဘှံးနံၤန့ၣ် အါတက့ၢ် အသူဝဲဒီး ဒီပုၢ်ဝဲၢ်မုၣ်ခွါ လၢတၢ်ထီၣ်တၢ်အိၣ်ဖှိၣ်, တၢ်စံၣ်တဲၤတဲလီၤတၢ် ဒီးတၢ်ရ့လိာ်မုာ်လိာ်တဖၣ်အဂီၢ်လီၤ. ဖီလံ တဲဝဲလၢ “တဘျီတခီၣ် ဖဲဝ့(န်) ဟဲက့ၤတုၤလၢဟံၣ်အခါ ပှၤတအိၣ်လၢဟံၣ် နီတဂၤဘၣ်အဃိ အဝဲတူၢ်ဘၣ် တၢ်သယုၢ်သညိလီၤ.” ဖဲန့ၣ်အဆၢကတီၢ် ဝ့(န်) ကအဲၣ်ဒိးထံၣ် အဖိဒီးအမါလီၤ. ဒီးအဝဲတသ့ၣ်ညါဝဲ ပှၤလၢအဖိဒီးအမါ လဲၤရ့ဝဲတဖၣ်ဘၣ်. ဒီးဖျါလၢ အဖိဒီးအမါ ပာ်လုၢ်ပာ်ပှ့ၤဝဲ အသကိးလၢ အသီတဖၣ် ဒိၣ်န့ၢ်ဒံးအီၤလီၤ. လၢတၢ်န့ၣ်အဃိ အဝဲတဲပျံၤတဲဖုးအမါ လၢအကမၤကတၢၢ်ကွံာ် အတၢ်ဆီဟံၣ်ဆီဃီန့ၣ်လီၤ. ဆိကမိၣ်ကွၢ်လၢ ဖီလံပာ်ဖျါထီၣ်လၢ အနၢ်ပၢၢ်စၢၤ အဝၤအတၢ်တူၢ်ဘၣ် အါန့ၢ်အန့ၣ် ကသ့ဒ်လဲၣ်န့ၣ်တက့ၢ်.
၈. ဒ် ၁ ပ့းတရူး ၃:၁, ၂ ပာ်ဖျါထီၣ်ဝဲအသိး ဖျါလၢပဘူးပတံၢ်တဖၣ်န့ၣ် ဘၣ်သူၣ်ဘၣ်သးဝဲ တၢ်မနုၤလဲၣ်.
၈ ပာ်လီၤတၢ်ဒိဂ့ၤတဲာ်ဘၣ်. ညီနုၢ်န့ၣ် တၢ်လၢပမၤအီၤတဖၣ် ထုးန့ၢ်ပဘူးပတံၢ်တဖၣ်အသး ဒိၣ်န့ၢ်ဒံး တၢ်လၢပတဲအီၤတဖၣ်ဒံးလီၤ. (ဖး ၁ ပ့းတရူး ၃:၁, ၂ တက့ၢ်.) ဖီလံသ့ၣ်ညါထီၣ်ဝဲ တၢ်ဂ့ၢ်အံၤလီၤ. အဝဲတဲဝဲလၢ “ယသ့ၣ်ညါလၢ ဝ့(န်) န့ၣ်အဲၣ်ပှၤ ဒီးတအဲၣ်ဒိးမၤကတၢၢ်ကွံာ် အတၢ်ဆီဟံၣ်ဆီဃီဒီးယၤဘၣ်. ဘၣ်ဆၣ် ခီဖျိလၢ အတဲပျံၤယၤ ဒ်န့ၣ်အဃိ ယသ့ၣ်ညါထီၣ်လၢ ယကဘၣ်မၤထွဲ ယဟိဝၤယွၤ အတၢ်ဟ့ၣ်ကူၣ် လၢဘၣ်ဃးဒီး တၢ်ဆီဟံၣ်ဆီဃီလီၤ.” အဃိဖီလံ တမၢဆူၣ် ဝ့(န်)လၢကတဲသကိး လံာ်စီဆှံအဂ့ၢ်လၢၤဘၣ် ဒီးအဝဲစးထီၣ်တဲသကိးဝဲ တၢ်ဂ့ၢ်တၢ်ကျိၤလၢ တနံၤဘၣ်တနံၤန့ၣ်လီၤ. ဝ့(န်) ထံၣ်ဘၣ်ဝဲလၢ အမါကဲထီၣ်ပှၤလၢ အအိၣ်မုာ်မုာ်ခုၣ်ခုၣ် ဒီးအဖိခွါစ့ၢ်ကီး အနၢ်လိၤ ဒီးအိၣ်ဒီးတၢ်ဒိကနၣ် အါန့ၢ်ဒံးလၢညါလီၤ. (ကတိၤဒိ ၃၁:၁၈, ၂၇, ၂၈) ဖဲဝ့(န်) ထံၣ်ဘၣ်ဝဲလၢ လံာ်စီဆှံ အတၢ်ကစီၣ်တဖၣ် ကဲဘျုးလၢ အဟံၣ်ဖိဃီဖိအဂီၢ်အခါ အဝဲစးထီၣ်ဆိကမိၣ် ဒီးဒိကနၣ်ဝဲ ကစၢ်ယွၤအကလုၢ်ကထါလီၤ.—၁ ကရံၣ်သူး ၇:၁၂-၁၄, ၁၆.
၉. ဘၣ်မနုၤအဃိ ပကဘၣ်ဆဲးမၤစၢၤ ပဘူးပတံၢ်တဖၣ်လဲၣ်.
၉ ဆဲးမၤစၢၤ နဘူးနတံၢ်တဖၣ်. ယဟိဝၤယွၤ ပာ်လီၤတၢ်ဒိဂ့ၤတဲာ်ဘၣ် လၢပဂီၢ်လီၤ. ဒ်သိးပှၤကန့ၢ်ဘၣ်တၢ်မူအဂီၢ် ကစၢ်ယွၤဟ့ၣ်အဝဲသ့ၣ် တၢ်ခွဲးတၢ်ယာ် “ကိးမုၢ်နံၤဒဲး” လၢအဝဲသ့ၣ် ကဒိကနၣ် တၢ်သးခုကစီၣ် အဂီၢ်န့ၣ်လီၤ. (ယံးရမံယၤ ၇:၂၅) တၢ်မၢဖိပီလူး မၢစီၤတံၤမသ့း ဂုာ်ကျဲးစၢးမၤစၢၤ ပှၤဂၤလီၤ. စီၤတံၤမသ့း မ့ၢ်မၤဝဲဒ်န့ၣ်န့ၣ် အဝဲဒီးပှၤလၢ အဒိကနၣ်အီၤတဖၣ် ကဒိးန့ၢ်ဘၣ် တၢ်အုၣ်က့ၤခီၣ်က့ၤလီၤ. (၁ တံၤမသ့း ၄:၁၆) ပအဲၣ်ပဘူးပတံၢ်တဖၣ်အဃိ ပအဲၣ်ဒိးလၢ အဝဲသ့ၣ်ကသ့ၣ်ညါထီၣ် တၢ်မ့ၢ်တၢ်တီလၢ ကစၢ်ယွၤအကလုၢ်ကထါအပူၤလီၤ. ဖီလံအတၢ်ကတိၤ ဒီးအတၢ်မၤတဖၣ်န့ၣ် ကဲဘျုးလၢ အဟံၣ်ဖိဃီဖိတဖၣ်အဂီၢ်လီၤ. ခဲအံၤအဝဲဒီးအဝၤ မၤသကိး ယဟိဝၤယွၤအတၢ်မၤ ဒ်သိးသိးလီၤ. အဝဲသ့ၣ်ခံဂၤလၢာ်န့ၣ် မၤဝဲပှၤလဲၤလၢညါ ဒီးဝ့(န်) မ့ၢ်စ့ၢ်ကီး တၢ်အိၣ်ဖှိၣ်သးပှၢ်တဂၤလီၤ.
၁၀. ဘၣ်မနုၤအဃိ ပကဘၣ်အိၣ်ဒီး တၢ်သူၣ်စူၤသးစူၤလဲၣ်.
၁၀ အိၣ်ဒီးတၢ်သူၣ်စူၤသးစူၤ. ဖဲပအိၣ်မူဒ် ကစၢ်ယွၤ အတၢ်သိၣ်တၢ်သီတဖၣ်အခါ ကကီလၢ ပဘူးပတံၢ်တဖၣ် ကတူၢ်လိာ်ဝဲ တၢ်ဆီတလဲလၢ ပမၤအီၤတဖၣ်န့ၣ်လီၤ. ညီနုၢ်န့ၣ် အဆိကတၢၢ် အဝဲသ့ၣ် ပာ်သူၣ်ပာ်သးဝဲလၢ ပတပၣ်ဃုာ်ဒီးအဝဲသ့ၣ် လၢတၢ်ဘူၣ်တၢ်ဘါ အမူးပွဲအပူၤလၢၤဘၣ်, ဒီးပတပၣ်ဃုာ်လၢ ထံဂ့ၢ်ကီၢ်ဂ့ၢ်အကျါလၢၤဘၣ်. လၢအခီၣ်ထံးန့ၣ် ဘၣ်သ့ၣ်သ့ၣ် အဝဲသ့ၣ်တနီၤ ကသးထီၣ်ပှၤလီၤ. (မးသဲ ၁၀:၃၅, ၃၆) ဘၣ်ဆၣ် ပတကြၢးဆိကမိၣ်လၢ အဝဲသ့ၣ် တဆီတလဲအသး နီတဘျီဘၣ်န့ၣ်ဘၣ်. ပမ့ၢ်တဆဲး ဂုာ်ကျဲးစၢးမၤစၢၤ အဝဲသ့ၣ်ဒ်သိး ကနၢ်ပၢၢ်ထီၣ် ပတၢ်နာ်ဘၣ်န့ၣ် ကလီၤဂာ်ဒ်သိး ပဆၢတဲာ်လၢ အဝဲသ့ၣ် တကြၢးဒိးန့ၢ်ဘၣ် တၢ်မူအထူအယိာ်ဘၣ်န့ၣ်လီၤ. ယဟိဝၤယွၤ တဟ့ၣ်လီၤပှၤမူဒါ လၢပကဆၢတဲာ်တၢ် ဒ်န့ၣ်ဘၣ်. အဝဲဟ့ၣ်လီၤဝဲ ယ့ၣ်ၡူးလၢ မူဒါအံၤလီၤ. (ယိၤဟၣ် ၅:၂၂) ပမ့ၢ်အိၣ်ဒီး တၢ်သူၣ်စူၤသးစူၤန့ၣ် ပဘူးပတံၢ်တဖၣ် ကသးအိၣ်ဒိကနၣ် တၢ်ကစီၣ်လၢ ပတဲအီၤတဖၣ်န့ၣ်လီၤ.—ကွၢ်တၢ်လွံၢ်နၢၣ်လၢအမ့ၢ် “ သူပပှာ်ယဲၤသန့ လၢနကသိၣ်လိတၢ်အဂီၢ်” တက့ၢ်.
၁၁-၁၃. ဘၣ်ဃးဒီး အဲလဲး(စ်) ရ့ဒီးအမိၢ်အပၢ်န့ၣ် နမၤလိန့ၢ်ဘၣ် တၢ်မနုၤလဲၣ်.
၁၁ ပာ်ဖျါထီၣ် တၢ်အဲၣ်တၢ်ကွံ ဘၣ်ဆၣ် တဘၣ်ပျဲလၢ နဘူးနတံၢ်တဖၣ် ကဆီတလဲ နတၢ်ဆၢတဲာ်တဂ့ၤ. (ကတိၤဒိ ၁၅:၂) ဆိကမိၣ်ကွၢ် အဲလဲး(စ်) အဒိအတဲာ်န့ၣ်တက့ၢ်. အဝဲသ့ၣ်ညါထီၣ် ယဟိဝၤယွၤအဂ့ၢ် ဖဲအအိၣ်ယံၤဒီးအမိၢ်အပၢ် အဆၢကတီၢ်န့ၣ်လီၤ. ဒီးအမိၢ်အပၢ်မ့ၢ် ပှၤလၢအတနာ် ကစၢ်ယွၤ ဒီးအသးဆူၣ်လၢ ထံဂ့ၢ်ကီၢ်ဂ့ၢ် တကပၤလီၤ. အဝဲသ့ၣ်ညါဝဲလၢ အကဘၣ်တဲဘၣ် အမိၢ်အပၢ်လၢ တၢ်ဂ့ၢ်လၢ အမၤလိဘၣ်ဝဲတဖၣ် လၢအဆိအချ့လီၤ. အဝဲတဲဝဲလၢ “နမ့ၢ်ထုးတၢ်ဆၢကတီၢ်လၢ နကတဲဘၣ် နဟံၣ်ဖိဃီဖိလၢ နတၢ်နာ်အသီ ဒီးနတၢ်မၤတဖၣ်န့ၣ် လၢခံအဝဲသ့ၣ် အသးကအုးဒိၣ်န့ၢ်အန့ၢ်ဒံးလီၤ.” အဝဲဂုာ်ကျဲးစၢး ဃုဝဲတၢ်ဂ့ၢ်တၢ်ကျိၤလၢ အဆိကမိၣ်ဝဲလၢ အမိၢ်အပၢ် ကသူၣ်အိၣ်သးအိၣ်ဝဲ ဒ်သိးဒီး တၢ်အဲၣ်အဂ့ၢ်န့ၣ်လီၤ. ဝံၤဒီးအဝဲကွဲးလံာ်ဆူ အမိၢ်အပၢ်အအိၣ် ဒီးတဲဖျါထီၣ်ဝဲလၢ ဘၣ်ဃးဒီး တၢ်အဲၣ်အဂ့ၢ်န့ၣ် လံာ်စီဆှံတဲဝဲဒ်လဲၣ် ဒီးအဝဲသံကွၢ် အမိၢ်အပၢ် အတၢ်ထံၣ်လၢ ဘၣ်ဃးဒီးတၢ်အဲၣ်န့ၣ်လီၤ. (၁ ကရံၣ်သူး ၁၃:၁-၁၃) ဒီးအဝဲစံးဘျုးစံးဖှိၣ် အမိၢ်အပၢ် ခီဖျိလၢအကွၢ်လုၢ်ဒိၣ်ထီၣ်အီၤ ဒီးအံးထွဲကွၢ်ထွဲအီၤ အဃိန့ၣ်လီၤ. ဒီးအဝဲ ဆှၢလီၤန့ၢ်အမိၢ်အပၢ် တၢ်ဟ့ၣ်တဖၣ်လီၤ. တကးဒံးဘၣ် ဖဲအဝဲက့ၤဟးလၢ အဟံၣ်အခါစ့ၢ်ကီး တသ့ဖဲအသ့ မၤစၢၤအမိၢ် လၢဟံၣ်ဃီအတၢ်ဖံးတၢ်မၤန့ၣ်လီၤ. ဖဲအဲလဲး(စ်) တဲဘၣ်အမိၢ်အပၢ်လၢ အတၢ်စူၢ်တၢ်နာ်အဂ့ၢ်အခါ လၢအခီၣ်ထံးန့ၣ် အမိၢ်အပၢ်တဖၣ် တဘၣ်သူၣ်ဘၣ်သးဝဲဘၣ်.
၁၂ ဖဲ အဲလဲး(စ်) က့ၤအိၣ်လၢ အမိၢ်အပၢ်အဟံၣ်အခါ အဝဲဆဲးဖးလံာ်စီဆှံ ကိးနံၤဒဲးလီၤ. အဝဲတဲဝဲလၢ “ခီဖျိလၢယမၤဒ်န့ၣ်အဃိ ကဲထီၣ်တၢ်မၤစၢၤလၢ ယမိကနၢ်ပၢၢ်ဝဲလၢ လံာ်စီဆှံန့ၣ် အရ့ဒိၣ်လၢယဂီၢ် ထဲလဲၣ်န့ၣ်လီၤ.” ဖဲန့ၣ်အဆၢကတီၢ် အဲလဲး(စ်) အပၢ်စ့ၢ်ကီး အဲၣ်ဒိးသ့ၣ်ညါဝဲလၢ ဘၣ်မနုၤအဃိ အဖိမုၣ်ဆီတလဲ အတၢ်ဆိကမိၣ်လဲၣ် ဒီးအဲၣ်ဒိးဃုဝဲ လံာ်စီဆှံအတၢ်ကမၣ်အဃိ အဝဲပာ်လီၤအသးလၢ ကမၤလိ လံာ်စီဆှံလီၤ. အဲလဲး(စ်) တဲဝဲလၢ ‘ယဟ့ၣ်ယပါ လံာ်စီဆှံ ဒီးလၢအပူၤန့ၣ် ယကွဲးန့ၢ်အီၤ တၢ်ဂ့ၢ်တၢ်ကျိၤလၢအဂီၢ်လီၤ.’ ဒီးတၢ်ကဲထီၣ်အသးဒ်လဲၣ်. အဲလဲး(စ်)အပၢ် တထံၣ်ဝဲတၢ်ကမၣ်လၢ ဘၣ်ဃးဒီး လံာ်စီဆှံအတၢ်ဂ့ၢ်တၢ်ကျိၤ နီတမံၤဘၣ်. လၢတၢ်န့ၣ်အလီၢ် တၢ်လၢအဖးဘၣ်ဝဲတဖၣ်န့ၣ် ဘၣ်သူၣ်ဘၣ်သးဝဲ ဒိၣ်မးလီၤ.
၁၃ ပမ့ၢ်ကထံၣ်ဘၣ်ဒီး တၢ်ကီတၢ်ခဲတဖၣ် သနာ်က့ ပတဘၣ်ပျဲလၢ ပဘူးပတံၢ်တဖၣ် ကဆီတလဲ ပတၢ်ဆၢတဲာ်ဘၣ်, ဘၣ်ဆၣ် ပကဘၣ်အိၣ်ဒီး တၢ်အဲၣ်တၢ်ကွံလီၤ. (၁ ကရံၣ်သူး ၄:၁၂ခ) အဒိ အဲလဲး(စ်) ထံၣ်ဘၣ်ဒီး အမိၢ်အတၢ်ထီဒုၣ်ထီဒါလီၤ. အဝဲတဲဝဲလၢ “ဖဲယဒိးဘျၢထံအခါ ယမိကိးယၤလၢ ‘ဖိမုၣ် နၢ်က့ၣ်’ လီၤ.” ဖဲန့ၣ်အဆၢကတီၢ် အဲလဲး(စ်) မၤဝဲဒ်လဲၣ်. အဝဲတဲဝဲလၢ “ယဆဲးတဲဘၣ်ယမိလၢ ယတၢ်နာ်အဂ့ၢ်ဒံး. လၢတၢ်ပာ်ကဲအပူၤ ယတဲဘၣ်အီၤလၢ ယပာ်လီၤယသးလၢ ယကကဲ ယဟိဝၤပှၤအုၣ်အသးတဂၤ ဒီးယတဆီတလဲ ယတၢ်ဆၢတဲာ်အံၤဘၣ်. ဒီးယဂုာ်ကျဲးစၢးဒ်သိး ယမိကသ့ၣ်ညါဝဲလၢ ယအဲၣ်အီၤအနီၢ်ကီၢ်လီၤ. ပဟီၣ်ခံဂၤလၢာ်လီၤ. ဒီးယဖီဒုးအီၣ်အီၤ တၢ်အီၣ်ဝံၣ်ဝံၣ်တခါလီၤ. စးထီၣ်ဖဲန့ၣ်ဝံၤအလီၢ်ခံ ယမိပာ်သူၣ်ပာ်သးဝဲလၢ လံာ်စီဆှံ မၤစၢၤယၤဒ်သိး ယကကဲထီၣ် ပှၤလၢအဂ့ၤန့ၢ်အလီၢ်လီၤ.”
၁၄. ဘၣ်မနုၤအဃိ ပတဘၣ်ပျဲလၢ ပဘူးပတံၢ်တဖၣ် ကဆီတလဲ ပတၢ်ဆၢတဲာ်လၢ ပကဘူၣ်ထီၣ်ဘါထီၣ် ယဟိဝၤယွၤဘၣ်လဲၣ်.
၁၄ ဒ်သိးပဘူးပတံၢ်တဖၣ် ကနၢ်ပၢၢ်ထီၣ်လၢ တၢ်မၤယဟိဝၤယွၤအတၢ်မၤ မ့ၢ်တၢ်အရ့ဒိၣ်ဒိၣ်မးလၢပဂီၢ်န့ၣ် တၢ်ဆၢကတီၢ် ကလိၣ်ဝဲအါမးလီၤ. အဒိ ဖဲအဲလဲး(စ်) ပာ်လီၤအသးလၢ ကမၤပှၤလဲၤလၢညါ ဒီးတမၤတၢ်မၤလၢ အမိၢ်အပၢ်အဲၣ်ဒိးလၢအမၤအခါ အမိၢ်ဟီၣ်ကဒီးလီၤ. ဘၣ်ဆၣ် အဲလဲး(စ်) တဆီတလဲ အတၢ်ဆၢတဲာ်ဘၣ်. အဝဲတဲဝဲလၢ “ဖဲနဟံၣ်ဖိဃီဖိတဖၣ် ဆီၣ်သနံးနၤအခါ နမ့ၢ်ဟ့ၣ်ၡူအဝဲသ့ၣ်တဘျီန့ၣ် ဘၣ်သ့ၣ်သ့ၣ် ဘၣ်ဃးဒီး တၢ်ဂ့ၢ်အဂၤစ့ၢ်ကီး အဝဲသ့ၣ် ကအဲၣ်ဒိး ဆီၣ်သနံးနၤလီၤ. ဘၣ်ဆၣ် နမ့ၢ်ဆၢတဲာ်လီၤနသး ဂၢၢ်ဂၢၢ်ကျၢၤကျၢၤ ဒီးပာ်ဖျါထီၣ်တၢ်အဲၣ်န့ၣ် အဝဲသ့ၣ်တနီၤ ကအဲၣ်ဒိးဒိကနၣ်နၤလီၤ.” တၢ်ကဲထီၣ်အသးဒီး အဲလဲး(စ်) ဒ်န့ၣ်လီၤ. ခဲအံၤအဲလဲး(စ်) အမိအပါ ခံဂၤလၢာ်န့ၣ် မၤဝဲပှၤလဲၤလၢညါ ဒီးအပါန့ၣ် ကဲစ့ၢ်ကီး တၢ်အိၣ်ဖှိၣ်သးပှၢ်တဂၤလီၤ.
ပှၤလၢတၢ်အိၣ်ဖှိၣ်ပူၤတဖၣ် မၤစၢၤပှၤ ကသ့ဒ်လဲၣ်
ပဒီပုၢ်ဝဲၢ်မုၣ်ခွါတဖၣ် မၤစၢၤပဘူးပတံၢ် လၢအတမ့ၢ် ယဟိဝၤပှၤအုၣ်အသးတဖၣ် သ့ဒ်လဲၣ် (ကွၢ်လံာ်အဆၢ ၁၅-၁၆) *
၁၅. ဒ် မးသဲ ၅:၁၄-၁၆ ဒီး ၁ ပ့းတရူး ၂:၁၂ ပာ်ဖျါထီၣ်ဝဲအသိး ‘တၢ်မၤလၢအဂ့ၤ’ န့ၣ်မၤစၢၤ ပဘူးပတံၢ်တဖၣ် သ့ဒ်လဲၣ်.
၁၅ ယဟိဝၤယွၤ မိၤပှၤဂၤဆူအအိၣ်ခီဖျိ ဒီပုၢ်ဝဲၢ်မုၣ်ခွါတဖၣ်အ ‘တၢ်မၤလၢအဂ့ၤ’ န့ၣ်လီၤ. (ဖး မးသဲ ၅:၁၄-၁၆; ၁ ပ့းတရူး ၂:၁၂ တက့ၢ်.) နသးသမူတံၤသကိး မ့တမ့ၢ် ယဟိဝၤပှၤအုၣ်အသးန့ၣ် မ့ၢ်အဝဲထံၣ်ဘၣ်ဒီး ဒီပုၢ်ဝဲၢ်မုၣ်ခွါတဖၣ် လၢတၢ်အိၣ်ဖှိၣ်အပူၤ တဘျီဘျီလံဧါ. ဖီလံကွဲမုာ် ဒီပုၢ်ဝဲၢ်မုၣ်ခွါတဖၣ် ဒ်သိးအဝၤကသ့ၣ်ညါထီၣ် အဝဲသ့ၣ်အဂီၢ်လီၤ. ဝ့(န်) တဲကဒါက့ၤဝဲလၢ ဒီပုၢ်ဝဲၢ်တဂၤ မၤစၢၤအီၤဒ်သိး အဝဲကမၤလီၤမၢ်ကွံာ် အတၢ်နၢ်ပၢၢ်ကမၣ်လၢ ယဟိဝၤပှၤအုၣ်အသးတဖၣ် အဖီခိၣ်ဒ်လဲၣ်န့ၣ်လီၤ. အဝဲတဲဝဲလၢ “ဒီပုၢ်ဝဲၢ်တဂၤအံၤ ဟံးန့ၢ်အခွဲးလၢ အတၢ်မၤလီၢ် ဒ်သိးကဟဲကွၢ်သကိး ပှၤလိာ်ကွဲဘီဒီးယၤ လၢယဟံၣ်အဃိ ယဆိကမိၣ်လၢ ‘အဝဲမ့ၢ်ဒ် ပှၤဂၤအသိးလီၤမၢၤ.’”
၁၆. ဘၣ်မနုၤအဃိ ပကြၢးကွဲမုာ် ပဘူးပတံၢ်တဖၣ် လၢကဟဲထီၣ် တၢ်အိၣ်ဖှိၣ်အဂီၢ်လဲၣ်.
၁၆ ပမ့ၢ်ကွဲမုာ် ပဘူးပတံၢ်တဖၣ်လၢ ကဟဲထီၣ် တၢ်အိၣ်ဖှိၣ်ရိဖှိၣ်န့ၣ် မ့ၢ်ဝဲကျဲအဂ့ၤဒိၣ်မးတဘိ လၢပကမၤစၢၤ ပဘူးပတံၢ်တဖၣ်န့ၣ်လီၤ. (၁ ကရံၣ်သူး ၁၄:၂၄, ၂၅) ဝ့(န်) လဲၤထီၣ်တၢ်အိၣ်ဖှိၣ် အဆိကတၢၢ်တဘျီ ဖဲပှၤမၤ တၢ်သ့ၣ်နီၣ်ထီၣ်က့ၤအမူးပွဲအခါန့ၣ်လီၤ. ခီဖျိလၢ တၢ်အိၣ်ဖှိၣ်အံၤ အတၢ်ရဲၣ်တၢ်ကျဲၤန့ၣ် ပှၤမၤအီၣ်ဖုၣ်ဖုၣ်ဖိ ဒီးဘၣ်ဖဲ အဝဲအတၢ်မၤဝံၤ အလီၢ်ခံအဃိန့ၣ်လီၤ. အဝဲတဲဝဲလၢ ‘တၢ်ဂ့ၢ်လၢ ပှၤစံၣ်တဲၤတဲလီၤအီၤန့ၣ် ယတနၢ်ပၢၢ်အီၤ ခဲလၢာ်ဘၣ်. ဘၣ်ဆၣ် ယဘၣ်သူၣ်ဘၣ်သး ပှၤအိၣ်ဖဲန့ၣ်တဖၣ်လီၤ. အဝဲသ့ၣ် ဟဲလၢယအိၣ်, ဆၢဂ့ၤဆၢဝါယၤ ဒီးတူၢ်လိာ်ယၤဂ့ၤဂ့ၤလီၤ. ယနာ်လၢ အဝဲသ့ၣ် မ့ၢ်ပှၤအဂ့ၤလီၤ.’ လီၤဆီဒၣ်တၢ် ပှၤဒီမါဝၤခံဂၤ ပာ်ဖျါထီၣ်တၢ်အဲၣ်လၢ ဖီလံအဖီခိၣ် ဒီးအဝဲသ့ၣ် မၤစၢၤဝဲ ဖီလံဒီးအဖိခွါ လၢတၢ်အိၣ်ဖှိၣ် ဒီးတၢ်စံၣ်တဲၤတဲလီၤတၢ်မၤအပူၤလီၤ. လၢတၢ်န့ၣ်အဃိ ဝ့(န်)ပာ်လီၤအသးလၢ အကမၤလိအါထီၣ် အမါအတၢ်စူၢ်တၢ်နာ်အသီအဂ့ၢ် ဒီးအဝဲဃ့မၤလိလံာ်စီဆှံဒီး ဒီပုၢ်ဝဲၢ်ခွါတဂၤန့ၣ်လီၤ.
၁၇. ပတကြၢး ပာ်တၢ်ကမၣ်လၢ ပနီၢ်ကစၢ်အလိၤ လၢတၢ်ဂ့ၢ်မနုၤအဃိလဲၣ်, ဘၣ်ဆၣ် ဘၣ်မနုၤအဃိ ပတဘၣ်ဆိကမိၣ်လၢ ပဘူးပတံၢ်တဖၣ် တဆီတလဲအသး နီတဘျီဘၣ်န့ၣ်လဲၣ်.
၁၇ ပမုၢ်လၢ်လၢ ပဘူးပတံၢ် ခဲလၢာ် ကဘူၣ်ထီၣ်ဘါထီၣ် ယဟိဝၤယွၤ ဃုာ်ဒီးပှၤလီၤ. ဘၣ်ဆၣ် ပမ့ၢ်ဂုာ်ကျဲးစၢး သပှၢ်ကတၢၢ်သနာ်က့ ဘၣ်သ့ၣ်သ့ၣ် အဝဲသ့ၣ် တဟဲနုာ်လီၤလၢ တၢ်မ့ၢ်တၢ်တီအပူၤဘၣ်. မ့ၢ်လၢပမၢဆူၣ်ပှၤဂၤ ဒ်သိးအကတူၢ်လိာ် ပတၢ်နာ် တသ့ဘၣ်အဃိ တၢ်မ့ၢ်ကဲထီၣ်အသးဒ်န့ၣ်န့ၣ် ပတကြၢးပာ်တၢ်ကမၣ် လၢပလိၤဘၣ်. ဖဲနဘူးနတံၢ်တဖၣ် မ့ၢ်ထံၣ်ဘၣ်ဝဲလၢ ခီဖျိလၢ နမၤကစၢ်ယွၤအတၢ်မၤအဃိ နအိၣ်ဒီးတၢ်သးခုအါမးန့ၣ် ကဲဘျုးလၢ အဝဲသ့ၣ်အဂီၢ်သ့လီၤ. ဃ့ဘါထုကဖၣ် လၢအဝဲသ့ၣ်အဂီၢ်, တဲတၢ်ဒီးအဝဲသ့ၣ်လၢ တၢ်အဲၣ်တၢ်ကွံအပူၤ ဒီးဆဲးဂုာ်ကျဲးစၢး မၤစၢၤအဝဲသ့ၣ်တက့ၢ်. (မၤတၢ် ၂၀:၂၀) နာ်လၢယဟိဝၤယွၤ ကဆိၣ်ဂ့ၤ နတၢ်ဂုာ်ကျဲးစၢးတဖၣ်န့ၣ်တက့ၢ်. နဘူးနတံၢ်တဖၣ် မ့ၢ်ဒိကနၣ်နၤန့ၣ် အဝဲသ့ၣ် ကဒိးန့ၢ်ဘၣ် တၢ်အုၣ်က့ၤခီၣ်က့ၤလီၤ.
တၢ်သးဝံၣ် ၅၇ စံၣ်တဲၤတဲလီၤဆူ ပှၤအကလုာ်ကလုာ်
^ လံာ်အဆၢ. 5 ပအဲၣ်ဒိးလၢ ပဘူးပတံၢ်တဖၣ် ကသ့ၣ်ညါထီၣ် ယဟိဝၤယွၤ ဘၣ်ဆၣ်အဝဲသ့ၣ် ကဘူၣ်ထီၣ်ဘါထီၣ် ယဟိဝၤယွၤဧါ တဘူၣ်ထီၣ်ဘါထီၣ်ဝဲဘၣ်ဧါန့ၣ် အဝဲသ့ၣ် ကဘၣ်ဆၢတဲာ်ဝဲလၢ အနီၢ်ကစၢ်လီၤ. ဒ်သိးကညီလၢ ပဘူးပတံၢ်တဖၣ် ကဒိကနၣ်ပှၤအဂီၢ် ပကဘၣ်မၤဒ်လဲၣ်. လၢတၢ်မၤလိအံၤအပူၤ ပကတဲသကိး ဘၣ်ဃးဒီး တၢ်ဂ့ၢ်အံၤလီၤ.
^ လံာ်အဆၢ. 1 ပှၤမံၤတနီၤ ဘၣ်တၢ်ဆီတလဲအီၤလီၤ. လၢတၢ်မၤလိအံၤအပူၤ တၢ်ကတိၤလၢအမ့ၢ်ပ “ဘူးတံၢ်တဖၣ်” န့ၣ်အဲၣ်ဒိးတဲဝဲ ပဟံၣ်ဖိဃီဖိလၢ အတဘူၣ်ထီၣ်ဘါထီၣ် ယဟိဝၤယွၤဒံးဘၣ်တဖၣ်န့ၣ်လီၤ.
^ လံာ်အဆၢ. 53 တၢ်တဲဖျါထီၣ်တၢ်ဂီၤ အခီပညီ– ဒီပုၢ်ဝဲၢ်ခွါသးစၢ်တဂၤ မၤစၢၤအပါလၢ တမ့ၢ်ယဟိဝၤပှၤအုၣ်အသးတဂၤ ဖဲအပါဘှီထီၣ်ကါအခါ. ဒီးဖဲတၢ်ဆၢကတီၢ် ကြၢးဝဲဘၣ်ဝဲအခါ အဝဲပၠးဝဲအပါ လၢတၢ်ဂီၤမူလၢ jw.org® အပူၤလီၤ.
^ လံာ်အဆၢ. 55 တၢ်တဲဖျါထီၣ်တၢ်ဂီၤ အခီပညီ– ဒီပုၢ်ဝဲၢ်မုၣ်တဂၤ ဖဲအဝၤလၢ အတမ့ၢ် ယဟိဝၤပှၤအုၣ်အသးတဂၤ တဲဘၣ်အီၤ အတၢ်မၤအဂ့ၢ်အခါ အဝဲဒိကနၣ်ဝဲလၢ တၢ်သူၣ်အိၣ်သးအိၣ်အပူၤ. လၢခံ အဝဲမၤဝဲ တၢ်မၤမုာ်မၤဖှံသးဒီး အဟံၣ်ဖိဃီဖိလီၤ.
^ လံာ်အဆၢ. 57 တၢ်တဲဖျါထီၣ်တၢ်ဂီၤ အခီပညီ– ဒီပုၢ်ဝဲၢ်မုၣ်တဂၤ ကွဲမုာ်ဝဲ ဒီပုၢ်ဝဲၢ်မုၣ်ခွါတဖၣ် လၢအဟံၣ်လီၤ. ဒီးဒီပုၢ်ဝဲၢ်မုၣ်ခွါတဖၣ် ဂုာ်ကျဲးစၢးရ့ဒီး ဒီပုၢ်ဝဲၢ်မုၣ်တဂၤအံၤ အဝၤလီၤ. လၢခံန့ၣ် ဝၤတဂၤအံၤ လဲၤထီၣ်တၢ်သ့ၣ်နီၣ်ထီၣ်က့ၤအမူးပွဲဒီး အမါလီၤ.
