ပတၢ်အိၣ်သးဆီတလဲသနာ်က့ ပပာ်ပသးမုာ်မုာ်ခုၣ်ခုၣ်ကသ့ဒ်လဲၣ်
“ယသူၣ်မံသးမုာ်ဒီး ယသးပှဲၤဒီးတၢ်ဃူတၢ်ဖိးလီၤ.”—စံးထီၣ်ပတြၢၤ ၁၃၁:၂.
၁, ၂. (က) ဖဲပထံၣ်ဘၣ်တၢ်ဆီတလဲ သတူၢ်ကလာ်အခါ ပကတူၢ်ဘၣ်ဒ်လဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.) (ခ) စံးထီၣ်ပတြၢၤ ၁၃၁ ပာ်ဖျါထီၣ်ဝဲလၢ တၢ်မနုၤကမၤစၢၤပှၤဒ်သိး ပပာ်ပသးမုာ်မုာ်ခုၣ်ခုၣ်ကသ့အဂီၢ်လဲၣ်.
ဖဲ လွ့(ဒ်) ဒီး အဲးလဲစါဒြၤ မၤတၢ်လၢဘ့ၤသ့လး ၂၅ နံၣ်ဝံၤအလီၢ်ခံ အဝဲသ့ၣ်ဒိးန့ၢ်ဘၣ်မူဒါအသီလၢ ကမၤဝဲပှၤလဲၤလၢညါလီၤ. အဆိကတၢၢ်န့ၣ် အဝဲသ့ၣ်အသးအုးဒိၣ်မးလီၤ. လွ့(ဒ်) တဲဝဲလၢ “ယတူၢ်ဘၣ်လၢ ယမ့ၢ်တမၤဘၣ်တၢ်လၢ ဘ့ၤသ့လးန့ၣ် ယမၤတၢ်အဂၤ တမုာ်နီတမံၤလၢၤဘၣ်. ပှၤမၤတၢ်ဆီတလဲတဖၣ်အံၤန့ၣ် ယထံၣ်အီၤလၢအဂ့ၤ ဘၣ်ဆၣ် ဒ်တၢ်ဆၢကတီၢ်လဲၤပူၤကွံာ် တနွံဘၣ်တနွံ, တလါဘၣ်တလါန့ၣ် ယတူၢ်ဘၣ်လၢ ပှၤတကနၣ်ဃုာ်ယၤဘၣ်.” ဘၣ်ဃးဒီးတၢ်ဆီတလဲတခါအံၤန့ၣ် လွ့(ဒ်) တူၢ်ဘၣ်ဝဲ တၢ်သးခုတဘျီဘျီ, တၢ်သးအုးတဘျီဘျီလီၤ.
၂ လၢတၢ်တမုၢ်လၢ်အပူၤ တၢ်ဆီတလဲတဖၣ်အိၣ်ထီၣ်ဝဲအဃိ ကမၤသးအုးပှၤ ဒီးမၤသူၣ်ကိၢ်သးဂီၤပှၤ သ့ဝဲလီၤ. (ကတိၤဒိ ၁၂:၂၅) အဃိ မ့ၢ်ကီလၢပကတူၢ်လိာ်တၢ်ဆီတလဲ မ့တမ့ၢ် မၤတၢ်ဆီတလဲအဂီၢ်သနာ်က့ ပပာ်ပသးမုာ်မုာ်ခုၣ်ခုၣ်ကသ့ဒ်လဲၣ်. (ဖး စံးထီၣ်ပတြၢၤ ၁၃၁:၁-၃ တက့ၢ်.) ပကမၤလိဘၣ်တၢ်ဂ့ၢ်လၢ ဘၣ်ဃးဒီး ကစၢ်ယွၤအခ့အပှၤလၢပျၢၤဒီး လၢဆၢကတီၢ်ခဲအံၤန့ၣ် အဝဲသ့ၣ် ကွၢ်ဆၢၣ်မဲာ်ဘၣ်ဝဲ တၢ်ဆီတလဲသတူၢ်ကလာ်သနာ်က့ အဝဲသ့ၣ် ပာ်အသးမုာ်မုာ်ခုၣ်ခုၣ်သ့ဒ်လဲၣ်န့ၣ်လီၤ.
“ယွၤအတၢ်ဃူတၢ်ဖိး” မၤစၢၤပှၤဒ်လဲၣ်
၃. စီၤယိၤသးအတၢ်အိၣ်မူ ဆီတလဲသတူၢ်ကလာ်ဒ်လဲၣ်.
၃ ဆိကမိၣ်ကွၢ် စီၤယိၤသးအဒိအတဲာ်န့ၣ်တက့ၢ်. လၢစီၤယၤကိာ်အဖိခွါတဖၣ်အကျါ စီၤယၤကိာ်အဲၣ်ဝဲ စီၤယိၤသးအဒိၣ်ကတၢၢ်လီၤ. အဃိ အဒီပုၢ်ဝဲၢ်ခွါတဖၣ် သးက့ၣ်အီၤဒိၣ်မးလီၤ. ဖဲစီၤယိၤသးအသးအိၣ် ၁၇ နံၣ်အခါ အဝဲသ့ၣ်ဆါလီၤကွံာ်အီၤ ဒ်ကုၢ်တဂၤအသိးလီၤ. (၁ မိၤၡ့ ၃၇:၂-၄, ၂၃-၂၈) စီၤယိၤသး တူၢ်ဘၣ်တၢ်နးတၢ်ဖှီၣ်ဖဲ ကီၢ်အဲၤကူပတူးအပူၤကအိၣ် ၁၃ နံၣ်ဃၣ်ဃၣ်လီၤ. အဆိကတၢၢ်န့ၣ် အဝဲဘၣ်ကဲကုၢ် ဒီးလၢခံန့ၣ် အဝဲဘၣ်အိၣ်လၢဃိာ်ပူၤလီၤ. စီၤယိၤသးဘၣ်အိၣ်ယံၤဒီး အပၢ်လၢအအဲၣ်ဝဲဒိၣ်မးန့ၣ်လီၤ. ဖဲန့ၣ်အဆၢကတီၢ် မ့ၢ်စီၤယိၤသးကတူၢ်ဘၣ်ဝဲလၢ အတၢ်မုၢ်လၢ်တအိၣ်လၢၤဘၣ်ဧါ မ့တမ့ၢ် အသးထီၣ်တၢ်ဧါ. တတူၢ်ဘၣ်ဝဲဒ်န့ၣ်ဘၣ်. မ့မ့ၢ်ဒ်န့ၣ်န့ၣ် တၢ်မနုၤမၤစၢၤအီၤလဲၣ်.
၄. (က) ဖဲစီၤယိၤသးလီၤဘၣ်လၢ ဃိာ်ပူၤအခါ အဝဲမၤဝဲတၢ်မနုၤလဲၣ်. (ခ) ယဟိဝၤယွၤစံးဆၢဝဲ စီၤယိၤသး အတၢ်ထုကဖၣ်ဒ်လဲၣ်.
၄ ဖဲစီၤယိၤသး လီၤဘၣ်လၢဃိာ်ပူၤအခါ အဝဲကဆိကမိၣ်ဘၣ်က့ၤဝဲလၢ ယဟိဝၤယွၤမၤစၢၤတ့ၢ်အီၤ ဒ်လဲၣ်န့ၣ်လီၤ. (၁ မိၤၡ့ ၃၉:၂၁; စံးထီၣ်ပတြၢၤ ၁၀၅:၁၇-၁၉) ဘၣ်သ့ၣ်သ့ၣ် အဝဲကဆိကမိၣ်ဝဲ အတၢ်မံမီၣ်လၢ အမံမီၣ်ဝဲဖဲအနီၢ်ဆံးအခါ ဒီးကတူၢ်ဘၣ်ဝဲလၢ ယဟိဝၤယွၤအိၣ်ဒီးအီၤလီၤ. (၁ မိၤၡ့ ၃၇:၅-၁၁) ဘၣ်သ့ၣ်သ့ၣ် အဝဲကဃ့ဘါထုကဖၣ်တၢ် တလီၢ်လီၢ်ဒီး ကတဲဘၣ်ဝဲ ယဟိဝၤယွၤလၢ အတၢ်တူၢ်ဘၣ်ခဲလၢာ်လီၤ. (စံးထီၣ်ပတြၢၤ ၁၄၅:၁၈) ယဟိဝၤယွၤစံးဆၢက့ၤ စီၤယိၤသးအတၢ်ထုကဖၣ်ခီဖျိ ဒုးနာ်န့ၢ်အီၤလၢ တၢ်မ့ၢ်ကဲထီၣ်အသးဒီးအီၤ ဒ်လဲၣ်ဂ့ၤဒ်လဲၣ်ဂ့ၤ အဝဲက “အိၣ်ဒီးအီၤ” လီၤ.—မၤတၢ် ၇:၉, ၁၀. * (ကွၢ်တၢ်ဂ့ၢ်အဘျဲၣ်တက့ၢ်.)
၅. “ယွၤအတၢ်ဃူတၢ်ဖိး” မၤစၢၤပှၤလၢ ပကဆဲးမၤယဟိဝၤယွၤအတၢ်မၤ ဒ်လဲၣ်.
၅ ပတၢ်အိၣ်သးမ့ၢ်ကီ ထဲလဲၣ်ဂ့ၤထဲလဲၣ်ဂ့ၤ ပဒိးန့ၢ်ဘၣ် “ယွၤအတၢ်ဃူတၢ်ဖိး” လၢအဒီသဒၢပတၢ် “ဆိကမိၣ်” ဒီးမၤမုာ်ထီၣ်ပသးသ့န့ၣ်လီၤ. (ဖး ဖံလံးပံၤ ၄:၆, ၇ တက့ၢ်.) ဖဲပတူၢ်ဘၣ် တၢ်ကီတၢ်ခဲ ဒီးတၢ်သူၣ်ကိၢ်သးဂီၤအခါ “ယွၤအတၢ်ဃူတၢ်ဖိး” ဟ့ၣ်ဆူၣ်ထီၣ်ပဂံၢ်ပဘါ ဒ်သိးပကဆဲးမၤ ယဟိဝၤယွၤအတၢ်မၤဒီး ပသုတဟ့ၣ်အၡူတဂ့ၤအဂီၢ်လီၤ. ခဲအံၤပကမၤလိသကိး ပဒီပုၢ်ဝဲၢ်မုၣ်ခွါတဖၣ်လၢ ပစိၤခဲအံၤ လၢအလဲၤခီဖျိဘၣ်ဝဲဒ်အံၤတဖၣ်အဂ့ၢ်န့ၣ်လီၤ.
ဃ့ယဟိဝၤယွၤ ဒ်သိးနပာ်နသးမုာ်မုာ်ခုၣ်ခုၣ်ကသ့အဂီၢ်
၆, ၇. တၢ်ဃ့ဘါထုကဖၣ် မၤစၢၤပှၤဒ်သိး ပပာ်ပသးမုာ်မုာ်ခုၣ်ခုၣ်ကသ့ဒ်လဲၣ်. ဟ့ၣ်တၢ်အဒိတက့ၢ်.
၆ ဖဲ ရါယၢၤဒီးကၠူလံယၢး နၢ်ဟူဘၣ်ဝဲလၢ အဝဲသ့ၣ်အမူဒါလၢ အမ့ၢ်ပှၤလဲၤလၢညါလီၤဆီ တစိၢ်တလီၢ်ကဝံၤဝဲအခါ အဝဲသ့ၣ် အသးအဂံၢ်အဘါလီၤစၢ်ဝဲလီၤ. ရါယၢၤတဲဝဲလၢ “ပဃ့ထုကဖၣ်လၢ ယဟိဝၤယွၤအအိၣ် တဘျီဃီလီၤ. ပသ့ၣ်ညါလၢ တဘျီအံၤဒု ပအိၣ်ဒီးတၢ်ခွဲးတၢ်ယာ်လီၤဆီလၢ ပကပာ်ဖျါထီၣ်လၢ ပနာ်န့ၢ်အီၤန့ၣ်လီၤ. လၢပတၢ်အိၣ်ဖှိၣ်အံၤအပူၤန့ၣ် ပှၤလၢအသ့ၣ်ညါထီၣ်တၢ်မ့ၢ်တၢ်တီသီသီတဖၣ် အိၣ်ဝဲအါမးလီၤ. အဃိ ပဃ့ထုကဖၣ်လၢ ယဟိဝၤယွၤကမၤစၢၤပှၤဒ်သိး ပကပာ်လီၤတၢ်ဒိဂ့ၤတဲာ်ဘၣ်လၢ ဘၣ်ဃးဒီးတၢ်နာ်န့ၣ်လီၤ.”
၇ ယဟိဝၤယွၤစံးဆၢ အဝဲသ့ၣ်အတၢ်ထုကဖၣ်ဒ်လဲၣ်. ရါယၢၤတဲဝဲလၢ “ဖဲယဃ့ဘါထုကဖၣ်တၢ် ဝံၤအလီၢ်ခံ ပတၢ်တူၢ်ဘၣ်လၢ
အတဂ့ၤ ဒီးတၢ်သူၣ်ကိၢ်သးဂီၤ လီၢ်မၢ်ကွံာ်ဝဲ သတူၢ်ကလာ်လီၤ. ကစၢ်ယွၤအတၢ်ဃူတၢ်ဖိး ပၢၤဃာ်ပသူၣ်ပသးဒီး ပတၢ်ဆိကမိၣ်လီၤ. ပနာ်လၢ ပမ့ၢ်အိၣ်ဒီးတၢ်ထံၣ်လၢအဂ့ၤန့ၣ် ယဟိဝၤယွၤဆဲးသူပှၤကသ့လီၤ.”၈-၁၀. (က) ဖဲပသူၣ်ကိၢ်သးဂီၤအခါ ယွၤအသးစီဆှံ မၤစၢၤပှၤသ့ဒ်လဲၣ်. (ခ) ပမ့ၢ်မၤယဟိဝၤယွၤအတၢ်မၤလၢ တၢ်သးစၢၢ်ဆၢအပူၤန့ၣ် အဝဲကဆိၣ်ဂ့ၤပှၤဒ်လဲၣ်.
၈ ယွၤအသးစီဆှံ မၤစၢၤပှၤဒ်သိး ပပာ်ပသးမုာ်မုာ်ခုၣ်ခုၣ်ကသ့အဂီၢ် ဒီးပဃုထံၣ်န့ၢ်လံာ်စီဆှံအဆၢလၢ ကမၤစၢၤပှၤဒ်သိး ပကနၢ်ပၢၢ်ထီၣ် တၢ်လၢအရ့ဒိၣ်ကတၢၢ်အဂီၢ်သ့န့ၣ်လီၤ. (ဖး ယိၤဟၣ် ၁၄:၂၆, ၂၇ တက့ၢ်.) ဆိကမိၣ်ကွၢ် ပှၤဒီမါဝၤခံဂၤလၢ အမ့ၢ် ဖံလံးဒီးမဲၤရံၤ လၢအမၤတ့ၢ်တၢ်လၢဘ့ၤသ့လး ၂၅ နံၣ်ဃၣ်ဃၣ် အဂ့ၢ်န့ၣ်တက့ၢ်. လၢလွံၢ်လါအတီၢ်ပူၤန့ၣ် အဝဲသ့ၣ်ခံဂၤလၢာ် အမိၢ်ဒီးဖံလံးအဘူးအတံၢ်လၢအဂၤသံသဒၣ်ကွံာ်အီၤ ဒီးအဝဲသ့ၣ် ကဘၣ်ကွၢ်ထွဲဝဲ မဲၤရံၤ အပၢ်လၢ အအိၣ်ဒီးခိၣ်နူာ်တၢ်ဆါန့ၣ်လီၤ.
၉ ဖံလံး တဲဝဲလၢ “ယဆိကမိၣ်လၢ ယလဲၤခီဖျိယတၢ်ကီတၢ်ခဲန့ၢ်ဝဲ ဂ့ၤဂ့ၤလံ, ဘၣ်ဆၣ် တၢ်လိၣ်ဒံးတမံၤဒံး. ယအိးထီၣ်ဖးကွၢ် ကလီးစဲ ၁:၁၁ လၢယထံၣ်ဘၣ်အီၤဖဲ တၢးထီခိးတၢ် လံာ်လၢတၢ်မၤလိအပူၤလီၤ. ယလဲၤခီဖျိ တၢ်ကီတၢ်ခဲန့ၢ်ဘၣ်ဆၣ် တန့ၢ်လၢလၢပှဲၤပှဲၤဒံးဘၣ်. ယကဘၣ်လဲၤခီဖျိ တၢ်ကီတၢ်ခဲလၢ ‘ကယဲၢ်တၢ်ဝံသးစူၤ, ဒီးတၢ်သူၣ်စူၤသးစူၤဒီးတၢ်သးခု’ လီၤ. လံာ်စီဆှံတဆၢအံၤ ဒုးသ့ၣ်နီၣ်ထီၣ်ယၤလၢ ယတၢ်အိၣ်မူကပှဲၤဒီးတၢ်သးခုအဂီၢ် တဒိးသန့ၤထီၣ်အသးလၢ ယတၢ်အိၣ်သးအဖီခိၣ်ဘၣ်. ဒိးသန့ၤထီၣ်အသးလၢ ကစၢ်ယွၤအသးစီဆှံ အတၢ်မၤစၢၤန့ၣ်လီၤ.”
၁၀ ခီဖျိလၢ ဖံးလံးဒီးမဲၤရံၤ ဆဲးသးစၢၢ်ဆၢ ယဟိဝၤယွၤအတၢ်မၤအဃိ ယဟိဝၤယွၤဆိၣ်ဂ့ၤအဝဲသ့ၣ်လၢ ကျဲအါဘိလီၤ. ဖဲအဝဲသ့ၣ် ဟးထီၣ်လၢဘ့ၤသ့လး တယံာ်ဘၣ်န့ၣ် အဝဲသ့ၣ်ခံဂၤလၢာ် အိၣ်ဒီး ပှၤမၤလိလံာ်စီဆှံဖိလၢ အလဲၤထီၣ်လဲၤထီဒီး အအဲၣ်ဒိးမၤလိလံာ်စီဆှံ တနွံတဘျီခံဘျီလီၤ. မဲၤရံၤ တဲဝဲလၢ “အဝဲသ့ၣ်မ့ၢ်ပတၢ်သးခု ဒီးလီၤဂာ်ဒ်သိး ယဟိဝၤယွၤတဲပှၤလၢ တၢ်ခဲလၢာ် ကလဲၤအသးဂ့ၤဂ့ၤဘၣ်ဘၣ်လီၤ.”
ဒ်သိးယဟိဝၤယွၤကဆိၣ်ဂ့ၤနၤအဂီၢ် မၤတၢ်တမံၤမံၤ
ပမ့ၢ်ထံၣ်ဘၣ်ဒီး တၢ်အိၣ်သးဒ်လဲၣ်ဂ့ၤဒ်လဲၣ်ဂ့ၤ ပကွၢ်လိမၤဒိး စီၤယိၤသးကသ့ဒ်လဲၣ် (ကွၢ်လံာ်အဆၢ ၁၁-၁၃)
၁၁, ၁၂. (က) ဒ်သိးယဟိဝၤယွၤ ကဆိၣ်ဂ့ၤစီၤယိၤသးအဂီၢ် စီၤယိၤသးမၤဝဲတၢ်မနုၤလဲၣ်. (ခ) ယဟိဝၤယွၤဆိၣ်ဂ့ၤ စီၤယိၤသးဒ်လဲၣ်.
၁၁ လၢပတၢ်အိၣ်မူအပူၤ ဖဲပထံၣ်ဘၣ် တၢ်ဆီတလဲသတူၢ်ကလာ်အခါ ပကသူၣ်ကိၢ်သးဂီၤဒီး ပကဆိကမိၣ်ဘၣ်ထဲ ပတၢ်ကီတၢ်ခဲတဖၣ်လီၤ. ဘၣ်သ့ၣ်သ့ၣ် စီၤယိၤသးကတူၢ်ဘၣ်ဝဲဒ်န့ၣ်လီၤ. ဘၣ်ဆၣ် အဝဲထံၣ်ဘၣ်တၢ်ကီတၢ်ခဲသနာ်က့ တၢ်လၢအဝဲမၤဝဲသ့တဖၣ်န့ၣ် မၤဝဲလၢအဂ့ၤကတၢၢ်လီၤ. ဒ်အဝဲဂုာ်ကျဲးစၢးမၤတၢ်လၢ စီၤပိၤတံၤဖၢ်အဂီၢ်အသိး ဖဲအဝဲလီၤဘၣ်လၢဃိာ်ပူၤအခါ အဝဲဂုာ်ကျဲးစၢးမၤဝဲတၢ်ကိးမံၤဒဲးလၢ ပှၤကွၢ်ထွဲဃိာ်မၢအီၤန့ၣ်လီၤ.—၁ မိၤၡ့ ၃၉:၂၁-၂၃.
၁၂ ဘၣ်တနံၤ ပှၤဟ့ၣ်လီၤစီၤယိၤသးမူဒါလၢ ကကကွၢ်ထွဲဝဲ ပှၤဃိာ်ဖိခံဂၤလၢ အမၤတ့ၢ်တၢ်လၢ စီၤပၤဖၤရိၤအနီပူၤန့ၣ်လီၤ. စီၤယိၤသး အိၣ်ဒီးတၢ်သးကညီၤလၢ အဝဲသ့ၣ်အဖီခိၣ်အဃိ ၁ မိၤၡ့ ၄၀:၅-၈) ခီဖျိလၢတၢ်ကတိၤသကိးတၢ်အံၤအဃိ အဝဲကပူၤဖျဲးထီၣ်လၢ ဃိာ်ပူၤန့ၣ် စီၤယိၤသးတသ့ၣ်ညါဝဲဘၣ်. ပူၤကွံာ်ခံနံၣ်ဝံၤအလီၢ်ခံ အဝဲဟးထီၣ်ဘၣ်လၢဃိာ်ပူၤဒီး ကဲထီၣ်ပှၤပၢတၢ်လၢ အအိၣ်ဒီးတၢ်စိတၢ်ကမီၤဖးဒိၣ်လၢ ကီၢ်အဲၤကူပတူးအပူၤလီၤ. ဖဲန့ၣ်န့ၣ် ပှၤလၢအစိကမီၤဒိၣ်န့ၢ်အီၤန့ၣ် အိၣ်ထဲဖၤရိၤတဂၤလီၤ.—၁ မိၤၡ့ ၄၁:၁, ၁၄-၁၆, ၃၉-၄၁.
အဝဲသ့ၣ်တဲဘၣ်ဝဲစီၤယိၤသးလၢ အတၢ်ကိၢ်တၢ်ဂီၤဒီး အတၢ်မံမီၣ်လၢအမၤတံာ်တာ်အသး န့ၣ်လီၤ. (၁၃. ပတၢ်အိၣ်သး မ့ၢ်အိၣ်ဒ်လဲၣ်ဂ့ၤဒ်လဲၣ်ဂ့ၤ ဒ်သိးကစၢ်ယွၤကဆိၣ်ဂ့ၤပှၤအဂီၢ် ပမၤတၢ်မနုၤသ့လဲၣ်.
၁၃ ဒ်စီၤယိၤသးအသိး ဘၣ်သ့ၣ်သ့ၣ် ပကထံၣ်ဘၣ်တၢ်အိၣ်အသးလၢ ပဆီတလဲအီၤတန့ၢ်ဘၣ်. ဘၣ်ဆၣ် ပမ့ၢ်အိၣ်ဒီး တၢ်သူၣ်စူၤသးစူၤဒီး မၤတၢ်လၢအဂ့ၤကတၢၢ်န့ၣ် ယဟိဝၤယွၤကဆိၣ်ဂ့ၤပှၤလီၤ. (စံးထီၣ်ပတြၢၤ ၃၇:၅) ပမ့ၢ်အိၣ်ဒီးတၢ်ကိၢ်တၢ်ဂီၤ ဒီးတၢ်သးဒ့ဒီတဖၣ်ဒၣ်လဲာ် “ပတၢ်မုၢ်လၢ်တဟါမၢ်ဘၣ်.” (၂ ကရံၣ်သူး ၄:၈) လီၤဆီဒၣ်တၢ် ပမ့ၢ်သးစၢၢ်ဆၢ ပတၢ်စံၣ်တဲၤတဲလီၤတၢ်မၤန့ၣ် ယဟိဝၤယွၤကအိၣ်ဒီးပှၤလီၤ.
သးစၢၢ်ဆၢ တၢ်စံၣ်တဲၤတဲလီၤတၢ်မၤ ထီဘိ
၁၄-၁၆. စီၤဖံလံးပူး အတၢ်အိၣ်မူဆီတလဲသနာ်က့ အဝဲဆဲးသးစၢၢ်ဆၢဝဲ တၢ်စံၣ်တဲၤတဲလီၤတၢ်မၤဒ်လဲၣ်.
၁၄ စီၤဖံလံးပူး မ့ၢ်ပှၤစိာ်ဘီမုၢ်တၢ်သးခုကစီၣ်ဖိလၢ အဒိဂ့ၤတဲာ်ဘၣ်တဂၤလီၤ. အဝဲမ့ၢ်ထံၣ်ဘၣ်ဝဲ တၢ်ဆီတလဲဒ်လဲၣ်ဂ့ၤဒ်လဲၣ်ဂ့ၤ အဝဲသးစၢၢ်ဆၢဝဲ တၢ်စံၣ်တဲၤတဲလီၤတၢ်မၤန့ၣ်လီၤ. ဘၣ်တဘျီန့ၣ် အဝဲဒိးန့ၢ်ဘၣ်ဝဲ မူဒါအသီလၢ ဝ့ၢ်ယရူၤၡလ့ၣ်အပူၤဒီး မၤဝဲလၢတၢ်သးခုလီၤ. (မၤတၢ် ၆:၁-၆) ဘၣ်ဆၣ် တၢ်ဆီတလဲတဖၣ် အိၣ်ထီၣ်ဝဲလီၤ. ဖဲပှၤမၤသံ စီၤစတ့းဖၣ်ဝံၤအလီၢ်ခံ ပှၤမၤအၢမၤနး ပှၤခရံာ်ဖိတဖၣ်ဒိၣ်မးအဃိ ခရံာ်ဖိတဖၣ် ဃ့ၢ်ဟးထီၣ်ကွံာ်လၢ ဝ့ၢ်ယရူၤၡလ့ၣ်လီၤ. ဘၣ်ဆၣ် စီၤဖံလံးပူး အဲၣ်ဒိးဆဲးမၤဒံး ယဟိဝၤယွၤအတၢ်မၤအဃိ အဝဲလဲၤဆူဝ့ၢ်ၡၤမရံ လၢပှၤလၢအတနၢ်ဟူဘၣ်ဒံး တၢ်သးခုကစီၣ်တဖၣ်အအိၣ်န့ၣ်လီၤ.—မးသဲ ၁၀:၅; မၤတၢ် ၈:၁, ၅.
၁၅ စီၤဖံလံးပူး အသးအိၣ်လဲၤလၢ တၢ်လီၢ်ကိးပူၤဒဲးလၢ ယွၤအသးစီဆှံ မၢအလဲၤန့ၣ်လီၤ. အဃိ ယဟိဝၤယွၤသူအီၤဒ်သိး ကလဲၤစံၣ်တဲၤတဲလီၤတၢ်ဆူ တၢ်လီၢ်လၢ ပှၤတနၢ်ဟူဘၣ် တၢ်သးခုကစီၣ်ဒံးဘၣ်တဖၣ်န့ၣ်လီၤ. ပှၤယူဒၤဖိအါတက့ၢ်န့ၣ် ဆိကမိၣ်ဆံးဝဲ ပှၤၡၤမရံဖိတဖၣ်ဒီး တရ့ဒီးအဝဲသ့ၣ်ဂ့ၤဂ့ၤဘၣ်. ဘၣ်ဆၣ် စီၤဖံလံးပူးန့ၣ် တဆိကမိၣ်ဆံးအဝဲသ့ၣ်ဘၣ်. ဒီးအသးဆူၣ်လၢ ကစံၣ်တဲၤတဲလီၤအဝဲသ့ၣ် လၢတၢ်သးခုကစီၣ်န့ၣ်လီၤ. အဃိ ပှၤၡၤမရံဖိတဖၣ် ဒိကနၣ်အီၤလၢ “အသးတဖျၢၣ်ဃီလီၤ.”—မၤတၢ် ၈:၆-၈.
၁၆ လၢခံန့ၣ် ယွၤအသးစီဆှံမၢစီၤဖံလံးပူး လဲၤစံၣ်တဲၤတဲလီၤတၢ်ဆူ အးစဒိာ် ဒီးကဲၤစါရံၤ အခူအဝ့ၢ်တဖၣ်လီၤ. ဖဲန့ၣ်န့ၣ် ပှၤတခီဘီမုၢ်ဖိအိၣ်ဝဲအါမးလီၤ. (မၤတၢ် ၈:၃၉, ၄၀) လၢခံ အဝဲဆီဟံၣ်ဆီဃီအဃိ အတၢ်အိၣ်မူဆီတလဲကဒီးတဘျီ လီၤ. စီၤဖံလံးပူးအတၢ်အိၣ်မူ မ့ၢ်ဆီတလဲဒ်လဲၣ်ဂ့ၤဒ်လဲၣ်ဂ့ၤ အဝဲဆဲးမၤကစၢ်ယွၤအတၢ်မၤဆူၣ်ဆူၣ် ဒီးယဟိဝၤယွၤဆဲးဆိၣ်ဂ့ၤအီၤဒီး အဟံၣ်ဖိဃီဖိလီၤ.—မၤတၢ် ၂၁:၈, ၉.
၁၇, ၁၈. ဖဲပတၢ်အိၣ်သးဆီတလဲအခါ ပမ့ၢ်သးစၢၢ်ဆၢ တၢ်စံၣ်တဲၤတဲလီၤတၢ်မၤန့ၣ် ကမၤစၢၤပှၤဒ်လဲၣ်.
၁၇ ပှၤလၢအမၤကစၢ်ယွၤအတၢ်မၤလၢ ဆၢကတီၢ်လၢပှဲၤတဖၣ်တဲဝဲလၢ ဖဲအဝဲသ့ၣ် အတၢ်အိၣ်သးဆီတလဲအခါဒၣ်လဲာ် တၢ်သးစၢၢ်ဆၢတၢ်စံၣ်တဲၤတဲလီၤတၢ်မၤန့ၣ် မၤစၢၤအဝဲသ့ၣ်ဒ်သိး ကအိၣ်ဒီးတၢ်သးခုဒီး တၢ်ထံၣ်လၢအဂ့ၤန့ၣ်လီၤ. အဒိ, ပှၤဒီမါဝၤခံဂၤလၢအမ့ၢ် အီစဘီဒီးဖိလဲးလၢ အအိၣ်လၢ ကလံၤထံး အၤဖြံၤကၤန့ၣ် အဝဲသ့ၣ်ဟးထီၣ်လၢဘ့ၤသ့လး ဒီးဆိကမိၣ်ဝဲလၢ အဃုတၢ်မၤလၢ ဆၢကတီၢ်တပှဲၤဘၣ်ဒီး ဟံၣ်လၢကအိၣ်ဝဲအဂီၢ် ကန့ၢ်ညီညီဖိလီၤ. ဘၣ်ဆၣ် အီစဘီ တဲဝဲလၢ “ပဃုတၢ်မၤန့ၢ် တညီထဲသိးဒီး ပဆိကမိၣ်ပာ်စၢၤန့ၣ်ဘၣ်.” ဖိလဲးတဲဝဲလၢ “ပဃုတၢ်မၤတဘၣ်ဘၣ်သၢလါညါ, ပစူးပာ်စၢၤစ့တအိၣ်ဘၣ်အဃိ တၢ်ကီတၢ်ခဲဘၣ်ပှၤဒိၣ်မး.”
၁၈ ဖဲ အီစဘီဒီး ဖိလဲးထံၣ်ဘၣ်တၢ်သူၣ်ကိၢ်သးဂီၤအခါ တၢ်မနုၤမၤစၢၤအဝဲသ့ၣ်လဲၣ်. အီစဘီတဲဝဲလၢ “ခီဖျိလၢပဟးစံၣ်တဲၤတဲလီၤတၢ်ဒီး ပဒီပုၢ်ဝဲၢ်တဖၣ်လၢ တၢ်အိၣ်ဖှိၣ်ပူၤအဃိ မၤစၢၤပှၤဒ်သိး ပသးသုတဒံဝ့ၤဒံဝီၤဒီး ပကအိၣ်ဒီးတၢ်ထံၣ်လၢအဂ့ၤအဂီၢ်လီၤ.” လၢအဝဲသ့ၣ်ကအိၣ်လၢဟံၣ်ဒီး သူၣ်ကိၢ်သးဂီၤတၢ်အလီၢ် အဝဲသ့ၣ် ပာ်လီၤအသးလၢ ကဟးစံၣ်တဲၤတဲလီၤတၢ်ဆူၣ်ဆူၣ်န့ၣ်လီၤ. အဝဲသ့ၣ်မၤဝဲဒ်န့ၣ်အဃိ ဒိးန့ၢ်ဘၣ်ဝဲတၢ်သးခုဖးဒိၣ်လီၤ. အီစဘီတဲဝဲလၢ “ပဟးဃုတၢ်မၤအမၠိမၠိ ဒီးလၢခံကတၢၢ်န့ၣ် ပန့ၢ်ဘၣ်တၢ်မၤလီၤ.”
နာ်န့ၢ်ယဟိဝၤယွၤ လၢလၢပှဲၤပှဲၤ
၁၉-၂၁. (က) တၢ်မနုၤကမၤစၢၤပှၤဒ်သိး ပပာ်ပသးမုာ်မုာ်ခုၣ်ခုၣ် ကသ့အဂီၢ်လဲၣ်. (ခ) ပမ့ၢ်မၤတၢ်ဆီတလဲန့ၣ် ပကဒိးန့ၢ်ဘၣ်အဘျုးဒ်လဲၣ်.
ဖဲပလိၣ်ဘၣ်မၤတၢ်ဆီတလဲအခါ ပမ့ၢ်မၤအီၤန့ၣ် ကမၤဂၢၢ်ကျၢၤထီၣ် ပတၢ်ရ့လိာ်သးဒီးယဟိဝၤယွၤ
၁၉ ဒ်ပသ့ၣ်ညါတ့ၢ်အသိး ပတၢ်အိၣ်သး မ့ၢ်အိၣ်ဒ်လဲၣ်ဂ့ၤဒ်လဲၣ်ဂ့ၤ ပမ့ၢ်မၤတၢ်လၢအဂ့ၤကတၢၢ်ဒီး နာ်န့ၢ်ယဟိဝၤယွၤ လၢလၢပှဲၤပှဲၤန့ၣ် ပကဒိးန့ၢ်ဘၣ်တၢ်သူၣ်မံသးမုာ်လီၤ. (ဖး မံကၤ ၇:၇ တက့ၢ်.) ဒီးပကထံၣ်ဘၣ်လၢ ဖဲတၢ်ဆီတလဲအိၣ်ထီၣ်အခါ ပသးအိၣ်တူၢ်လိာ်တၢ်ဆီတလဲအဃိ ပတၢ်ရ့လိာ်သးဒီးယဟိဝၤယွၤ ဂၢၢ်ကျၢၤထီၣ်ဝဲလီၤ. ဖိလဲးတဲဝဲလၢ ခီဖျိလၢအဝဲဟးထီၣ်ဘၣ်လၢ ဘ့ၤသ့လးအပူၤအဃိ အဝဲနၢ်ပၢၢ်ထီၣ်ဝဲလၢ အတၢ်အိၣ်မူမ့ၢ်ကီထဲလဲၣ်သနာ်က့ တၢ်သန့ၤအသးလၢ ယဟိဝၤယွၤန့ၣ် အရ့ဒိၣ် ဒိၣ်မးန့ၣ်လီၤ. အဝဲတဲဝဲလၢ “ယတၢ်ရ့လိာ်သးဒီး ယဟိဝၤယွၤ ဂၢၢ်ကျၢၤထီၣ်လီၤ.”
၂၀ မဲၤရံၤလၢ ပပာ်ဖျါထီၣ်အဂ့ၢ်လၢထးန့ၣ် အဝဲကွၢ်ထွဲဝဲ အပၢ်သးပှၢ်ဒီး မၤဝဲပှၤလဲၤလၢညါလီၤ. အဝဲတဲဝဲလၢ “ယသ့ၣ်ညါထီၣ်လၢ ဖဲယဘၣ်ယိၣ်တၢ်အခါ ယကဘၣ်အိၣ်ပတုာ်, ဃ့ဘါထုကဖၣ် ဒီးပာ်သးမုာ်မုာ်ခုၣ်ခုၣ်န့ၣ်လီၤ. ဒီးယန့ၢ်ဘၣ်တၢ်မၤလိအဒိၣ်ကတၢၢ်တခါန့ၣ် မ့ၢ်ဝဲယကဘၣ်ပာ်ထီၣ် ယတၢ်ကီတၢ်ခဲတဖၣ်ဆူ ယဟိဝၤယွၤအလိၤလီၤ. ဒီးခါဆူညါစ့ၢ်ကီး ယကဘၣ်မၤဒ်န့ၣ်လီၤ.”
၂၁ လွ့(ဒ်) ဒီး အဲးလဲစါဒြၤတဲဝဲလၢ လၢတၢ်တမုၢ်လၢ်အပူၤ အဝဲသ့ၣ်ထံၣ်ဘၣ် တၢ်ဆီတလဲတဖၣ်လၢ အမၤကွၢ်အတၢ်နာ်လီၤ. ဘၣ်ဆၣ် ခဲအံၤအဝဲသ့ၣ်ထံၣ်ဘၣ်ဝဲလၢ တၢ်မၤကွၢ်တဖၣ်အံၤ ကဲထီၣ်တၢ်မၤစၢၤလၢ အဝဲသ့ၣ်အဂီၢ်ဒိၣ်မးန့ၣ်လီၤ. ခဲအံၤအဝဲသ့ၣ် အိၣ်ဒီးတၢ်နာ်တုၤဒၣ်လဲာ် အမ့ၢ်ထံၣ်ဘၣ်ကဒီးတၢ်ကီတၢ်ခဲတဖၣ်သနာ်က့ တဘၣ်ယိၣ်တၢ်လၢၤဘၣ်. ဒီးအဝဲသ့ၣ်တူၢ်ဘၣ်ဝဲလၢ အကဲထီၣ်ပှၤလၢအဂ့ၤဒိၣ်န့ၢ်အလီၢ်လီၤ.
တၢ်ဆီတလဲလၢ ပတမုၢ်လၢ်အီၤတဖၣ်န့ၣ် ဒုးအိၣ်ထီၣ်တၢ်ဆိၣ်ဂ့ၤလၢ ပတမုၢ်လၢ်အီၤတဖၣ် (ကွၢ်လံာ်အဆၢ ၁၉-၂၁)
၂၂. တၢ်လၢပမၤအီၤသ့တဖၣ် ပမ့ၢ်မၤအီၤလၢအဂ့ၤကတၢၢ်န့ၣ် ပနာ်န့ၢ်တၢ်မနုၤသ့လဲၣ်.
၂၂ ဆၢကတီၢ်ခဲအံၤ ပတၢ်အိၣ်သး ဆီတလဲသတူၢ်ကလာ်သ့န့ၣ်လီၤ. ဘၣ်သ့ၣ်သ့ၣ် လၢယဟိဝၤယွၤအတၢ်မၤအပူၤ ပကဒိးန့ၢ်ဘၣ်မူဒါလၢအဂၤတခါ, ပတၢ်အိၣ်ဆူၣ်အိၣ်ချ့ နးဒိၣ်ထီၣ် မ့တမ့ၢ် ပကဘၣ်ကွၢ်ထွဲ ပဟံၣ်ဖိဃီဖိလၢ ကျဲအဂၤန့ၣ်လီၤ. ဘၣ်ဆၣ် တၢ်မ့ၢ်ကဲထီၣ်အသးဒီးပှၤ ဒ်လဲၣ်ဂ့ၤဒ်လဲၣ်ဂ့ၤ နာ်န့ၢ်ယဟိဝၤယွၤလၢ အခါမ့ၢ်ဘၣ်န့ၣ် အဝဲကဒီသဒၢနၤဒီး ကမၤစၢၤနၤ န့ၣ်လီၤ. (ဧ့ၤဘြံၤ ၄:၁၆; ၁ ပ့းတရူး ၅:၆, ၇) ဒီးတၢ်လၢနမၤအီၤသ့တဖၣ်န့ၣ် မၤအီၤလၢအဂ့ၤကတၢၢ်တက့ၢ်. ဃ့ဘါထုကဖၣ်ဆူ ပပၢ်ယဟိဝၤယွၤအအိၣ်ဒီး သန့ၤနသးလၢ အအိၣ်လၢလၢပှဲၤပှဲၤတက့ၢ်. နမ့ၢ်မၤဒ်န့ၣ်န့ၣ် ယဟိဝၤယွၤကမၤစၢၤနၤဒ်သိး နပာ်နသးမုာ်မုာ်ခုၣ်ခုၣ်ကသ့အဂီၢ်လီၤ.
^ လံာ်အဆၢ. 4 နံၣ်တဖၣ်လဲၤပူၤကွံာ်ဝံၤအလီၢ်ခံ စီၤယိၤသးကိးန့ၢ်ဝဲ အဖိဝဲၢ်ကိအမံၤလၢ မနၤၡ့ၤလီၤ. မံၤအံၤအခီပညီမ့ၢ်ဝဲ “ယွၤဒုးသးပ့ၤနီၣ်ယၤလၢ ယတၢ်ကိၢ်တၢ်ဂီၤခဲလၢာ်” လီၤ. အဃိ အဝဲသ့ၣ်ညါဝဲလၢ အဖိခွါတဂၤအံၤ မ့ၢ်တၢ်ဟ့ၣ်လၢ ယဟိဝၤယွၤအအိၣ် ဒ်သိးကမၤမုာ်ထီၣ်အသးအဂီၢ်န့ၣ်လီၤ.—၁ မိၤၡ့ ၄၁:၅၁.