သိၣ်လိတၢ်မ့ၢ်တၢ်တီ
“ယွၤဧၢ, . . . နကလုၢ်ကထါအခီၣ်ထံးန့ၣ် မ့ၢ်အမ့ၢ်အတီလီၤ.”—စံးထီၣ်ပတြၢၤ ၁၁၉:၁၅၉, ၁၆၀.
၁, ၂. (က) တၢ်မၤအရ့ဒိၣ်ကတၢၢ်လၢ ယ့ၣ်ၡူးအတၢ်အိၣ်မူအပူၤန့ၣ် မ့ၢ်မနုၤလဲၣ် ဒီးဘၣ်မနုၤအဃိလဲၣ်. (ခ) ဒ် “ပမ့ၢ်ယွၤအပှၤမၤသကိးတၢ်တဖၣ်” အသိး ပမၤတၢ်ကကဲထီၣ်လိၣ်ထီၣ်အဂီၢ် ပကဘၣ်မၤမနုၤလဲၣ်.
ယ့ၣ်ၡူးမ့ၢ်ပှၤစုသ့ဖိ (လဲးသမါ) ဒီးလၢခံကဲထီၣ်ပှၤ စံၣ်တဲၤတဲလီၤတၢ်တဂၤလီၤ. (မၢ်ကူး ၆:၃; ရိမ့ၤ ၁၅:၈) အဝဲမၤဝဲတၢ်မၤခံခါအံၤ သ့ဝဲဂ့ၤဂ့ၤလီၤ. ဒ်အမ့ၢ် ပှၤစုသ့တဂၤအသိး ဒ်သိးကသူဝဲသ့ၣ်ဒီးတ့ထီၣ်ဝဲ တၢ်ဖိတၢ်လံၤအဂီၢ် အဝဲမၤလိသ့ထီၣ်အသးလၢ ကဘၣ်သူဝဲပှၤစုသ့ အတၢ်ပီးတၢ်လီတဖၣ် ဒ်လဲၣ်န့ၣ်လီၤ. ဒီးဒ်ပှၤစံၣ်တဲၤတဲလီၤတၢ်ဖိတဂၤအသိး အဝဲသူဝဲအတၢ်သ့ၣ်ညါနၢ်ပၢၢ်လံာ်စီဆှံ ဒ်သိးကမၤစၢၤပှၤဂၤလၢ ကနၢ်ပၢၢ်ထီၣ်တၢ်မ့ၢ်တၢ်တီ လၢဘၣ်ဃးဒီးကစၢ်ယွၤန့ၣ်လီၤ. (မးသဲ ၇:၂၈; လူၤကၣ် ၂၄:၃၂, ၄၅) ဖဲယ့ၣ်ၡူးအသးအိၣ် အနံၣ် ၃၀ အခါ အဝဲစးထီၣ်စံၣ်တဲၤတဲလီၤတၢ်ဒီး တမၤဝဲ ပှၤစုသ့အတၢ်မၤလၢၤဘၣ်. မ့ၢ်လၢအသ့ၣ်ညါဝဲလၢ တၢ်စံၣ်တဲၤတဲလီၤတၢ်မၤန့ၣ် မ့ၢ်တၢ်မၤလၢအရ့ဒိၣ်ကတၢၢ်အဃိလီၤ. ယ့ၣ်ၡူးတဲဝဲလၢ ကစၢ်ယွၤဆှၢလီၤအီၤလၢ ဟီၣ်ခိၣ်ချၢန့ၣ် မ့ၢ်ဒ်သိးအဝဲကစံၣ်တဲၤတဲလီၤ ယွၤအဘီအမုၢ်တၢ်သးခုကစီၣ်အဂီၢ်န့ၣ်လီၤ. (မးသဲ ၂၀:၂၈; လူၤကၣ် ၃:၂၃; ၄:၄၃) လၢယ့ၣ်ၡူးအတၢ်အိၣ်မူအပူၤန့ၣ် အဝဲအသးစၢၢ်ဆၢဝဲ ဘီမုၢ်တၢ်သးခုကစီၣ် ဒီးအဝဲအဲၣ်ဒိးလၢ ပှၤကမၤဝဲဒ်န့ၣ်စ့ၢ်ကီးလီၤ.—မးသဲ ၉:၃၅-၃၈.
၂ ပဝဲအါတက့ၢ်န့ၣ် ပတမ့ၢ်ပှၤစုသ့ဘၣ်ဆၣ် ပဝဲသ့ၣ်တဖၣ်န့ၣ် ပမ့ၢ်ပှၤလၢအသိၣ်လိပှၤဂၤ လၢတၢ်သးခုကစီၣ်လီၤ. တၢ်မၤအံၤ အရ့ဒိၣ်တုၤဒၣ်လဲာ် ကစၢ်ယွၤမၤသကိးတၢ်ဒီးပှၤလီၤ. လံာ်စီဆှံပာ်ဖျါထီၣ်ဝဲလၢ ပမ့ၢ် “ယွၤအပှၤမၤသကိးတၢ်တဖၣ်န့ၣ်လီၤ.” (၁ ကရံၣ်သူး ၃:၉; ၂ ကရံၣ်သူး ၆:၄) ပဝဲသ့ၣ်တဖၣ် ပတူၢ်ဘၣ်ဒ် ပှၤကွဲးထါစံးထီၣ်ပတြၢၤလၢအတဲဝဲ “နကလုၢ်ကထါအခီၣ်ထံးန့ၣ် မ့ၢ်အမ့ၢ်အတီလီၤ.” (စံးထီၣ်ပတြၢၤ ၁၁၉:၁၅၉, ၁၆၀) ယဟိဝၤယွၤအကလုၢ်ကထါန့ၣ် မ့ၢ်တၢ်မ့ၢ်တၢ်တီလီၤ. လၢတၢ်န့ၣ်အဃိ ပအဲၣ်ဒိးမ့ၢ်ပှၤလၢအ “နီၤဖးတၢ်မ့ၢ်တၢ်တီ အကလုၢ်အကထါအဆၢ တီတီလိၤလိၤ” လၢတၢ်စံၣ်တဲၤတဲလီၤတၢ်မၤအပူၤလီၤ. (ဖး ၂ တံၤမသ့း ၂:၁၅ တက့ၢ်.) အဃိ ဒ်သိးပကသိၣ်လိပှၤဂၤလၢ ယဟိဝၤယွၤ, ယ့ၣ်ၡူး ဒီးယွၤအဘီမုၢ်အဂ့ၢ်အဂီၢ် ထီဘိန့ၣ်ပဂုာ်ကျဲးစၢးဒ်သိး ပသူလံာ်စီဆှံလၢအမ့ၢ် ပတၢ်ပီးတၢ်လီအဂံၢ်ခိၣ်သ့ၣ် ကသ့ဂ့ၤဂ့ၤအဂီၢ်လီၤ. ဒ်သိးပတၢ်စံၣ်တဲၤတဲလီၤတၢ်မၤ ကကဲထီၣ်လိၣ်ထီၣ်အဂီၢ် ယဟိဝၤယွၤအတၢ်ကရၢကရိ ကတဲာ်ကတီၤန့ၢ်ပှၤ တၢ်ပီးတၢ်လီလၢ အကဲဘျုးတဖၣ်လီၤ. အဃိ ပကဘၣ်သ့ၣ်ညါလၢ တၢ်ပီးတၢ်လီတဖၣ်အံၤ ပကဘၣ်သူအီၤဒ်လဲၣ်န့ၣ်လီၤ. တၢ်ပီးတၢ်လီသ့ၣ်တဖၣ်အံၤ အိၣ်လၢပတၢ်ပီးတၢ်လီလၢ တၢ်သိၣ်လိနဲၣ်လိတၢ်အဂီၢ် အပူၤန့ၣ်လီၤ.
၃. လၢပတၢ်စံၣ်တဲၤတဲလီၤတၢ်မၤအပူၤ ပကြၢးသးစၢၢ်ဆၢ တၢ်ဂ့ၢ်မနုၤလဲၣ် ဒီး မၤတၢ် ၁၃:၄၈ ဟ့ၣ်ဂံၢ်ဟ့ၣ်ဘါပှၤဒ်လဲၣ်.
၃ ဘၣ်သ့ၣ်သ့ၣ်နကဆိကမိၣ်ဘၣ်လၢ ဘၣ်မနုၤအဃိပှၤကိးဝဲလၢ တၢ်ပီးတၢ်လီလၢ တၢ်သိၣ်လိနဲၣ်လိတၢ်အဂီၢ် ဒီးပှၤတကိးလၢ တၢ်ပီးတၢ်လီလၢ တၢ်စံၣ်တဲၤတဲလီၤအဂီၢ်ဘၣ်လဲၣ်. တၢ်ကတိၤလၢအမ့ၢ် “စံၣ်တဲၤတဲလီၤ” အခီပညီန့ၣ် မ့ၢ်ဝဲနဒုးသ့ၣ်ညါပှၤတၢ်ကစီၣ်လီၤ. ဘၣ်ဆၣ် တၢ်ကတိၤလၢအမ့ၢ် “သိၣ်လိ” န့ၣ်အခီပညီ မ့ၢ်ဝဲနတဲနၢ်ပၢၢ်ပှၤတဂၤလၢ တၢ်ဂ့ၢ်ဝံၤ ပှၤတဂၤန့ၣ်နၢ်ပၢၢ်ဝဲတၢ်လၢ အနၢ်ဟူဘၣ်ဝဲတဖၣ်အဃိ ထိၣ်ဟူးထိၣ်ဂဲၤထီၣ်အီၤလၢ အကမၤထွဲဝဲတၢ်လၢ အမၤလိဘၣ်ဝဲတဖၣ်လီၤ. တယံာ်လၢၤဘၣ် တၢ်အကတၢၢ်ကတုၤအဃိ ပကဘၣ်ဂုာ်ကျဲးစၢးစးထီၣ် မၤတၢ်မၤလိလံာ်စီဆှံဒီးပှၤဂၤ ဒီးသိၣ်လိအဝဲသ့ၣ်တၢ်မ့ၢ်တၢ်တီ ဒ်သိးအဝဲသ့ၣ် ကကဲထီၣ်ခရံာ်အပျဲၢ်အဘီၣ်အဂီၢ်လီၤ. အခီပညီန့ၣ် လၢတၢ်သူၣ်ဆူၣ်သးဆူၣ်အပူၤ ပကဘၣ်ကျဲးစၢးဃုပှၤလၢ “တၢ်ပာ်အီၤ လၢအကန့ၢ်ဘၣ်တၢ်မူ လီၤထူလီၤယိာ်တဖၣ်” ဒီးမၤစၢၤအဝဲသ့ၣ်လၢ ကစးထီၣ်မၤယဟိၤယွၤအတၢ်မၤလီၤ.—ဖး မၤတၢ် ၁၃:၄၄-၄၈ တက့ၢ်.
၄. ပဃုထံၣ်န့ၢ် “ပှၤလၢတၢ်ပာ်အီၤ လၢအကန့ၢ်ဘၣ်တၢ်မူ လီၤထူလီၤယိာ်တဖၣ်” ကသ့လၢကျဲဒ်လဲၣ်.
၄ ပဃုထံၣ်န့ၢ်ပှၤလၢ “တၢ်ပာ်အီၤလၢအကန့ၢ်ဘၣ်တၢ်မူ လီၤထူလီၤယိာ်တဖၣ်” ကသ့လၢကျဲဒ်လဲၣ်. ကျဲအိၣ်ဝဲထဲတဘိလၢခရံာ်ဖိလၢ တၢ်မၢဖိအစိၤတဖၣ်ဃုထံၣ်န့ၢ်ဝဲ ပှၤဒ်အံၤတဖၣ်သ့န့ၣ် မ့ၢ်ဝဲတၢ်ဟး စံၣ်တဲၤတဲလီၤတၢ်လီၤ. ယ့ၣ်ၡူးတဲဘၣ်အပျဲၢ်အဘီၣ်တဖၣ်လၢ “ဖဲဒၣ်ဝ့ၢ်မ့ၢ်ဂ့ၤ, သဝီမ့ၢ်ဂ့ၤ, လၢသုလဲၤနုာ်တဖျၢၣ်ဖျၢၣ်ဒီး, ပှၤအဂ့ၤအိၣ်လၢအပူၤမ့ၢ်မတၤမတၤတဂၤလဲၣ်န့ၣ်, သံကွၢ်ဒၣ်ကလိာ်” တက့ၢ်. (မးသဲ ၁၀:၁၁) ဆၢကတီၢ်ခဲအံၤစ့ၢ်ကီး ပကဘၣ်မၤဒ်န့ၣ်လီၤ. ဘၣ်ဆၣ် ပှၤလၢတအဲၣ်ဒိးဒိကနၣ်တၢ်နီၢ်နီၢ်, ပှၤလၢအပာ်ထီၣ်ထီအသး မ့တမ့ၢ် တအဲၣ်ဒိးကနၣ်ဃုာ်ယွၤတဖၣ်န့ၣ် ပတမၢန့ၢ်ဆူၣ်အဝဲသ့ၣ်လၢ ကဒိကနၣ် တၢ်သးခုကစီၣ်ဘၣ်. လၢတၢ်န့ၣ်အလီၢ် ပဟးဃုပှၤလၢ အသးအိၣ်ဒိကနၣ်တၢ်နီၢ်နီၢ်, ပှၤလၢအအိၣ်ဒီးတၢ်ဆီၣ်လီၤအသး ဒီးပှၤလၢအအဲၣ်ဒိးသ့ၣ်ညါ တၢ်မ့ၢ်တၢ်တီနီၢ်နီၢ်တဖၣ်လီၤ. ပတၢ်စံၣ်တဲၤတဲလီၤတၢ်မၤန့ၣ် ပထိၣ်သတြီၤအီၤဒီး ပှၤစုသ့အတၢ်မၤ လၢယ့ၣ်ၡူးမၤတ့ၢ်ဝဲသ့လီၤ. တချုးလၢအဝဲတ့ထီၣ် ဟံၣ်အတၢ်ပီးတၢ်လီတဖၣ်, ပဲတြီ, နီၣ်ယိးဘိ မ့တမ့ၢ် တၢ်တမံၤမံၤဒံးဘၣ်န့ၣ် အဝဲကဘၣ်ဟးဃုဝဲ သ့ၣ်လၢအဂ့ၤလီၤ. မ့ၢ်ဝံၤန့ၣ် အဝဲကဘၣ်သူဝဲ ပှၤစုသ့ အတၢ်ပီးတၢ်လီတဖၣ် ဒီးအတၢ်သ့တၢ်ဘၣ် ဒ်သိးကတ့ထီၣ်တၢ်အဂီၢ်လီၤ. ဒ်န့ၣ်အသိး ပဝဲသ့ၣ်တဖၣ်စ့ၢ်ကီး အဆိကတၢၢ်န့ၣ် ပကဘၣ်ဃု ပှၤလၢအသးအိၣ်ဒိကနၣ်တၢ်နီၢ်နီၢ်တဖၣ်လီၤ. ဝံၤဒီးပကဘၣ်သူ ပတၢ်သ့တၢ်ဘၣ်ဒီး တၢ်ပီးတၢ်လီလၢ တၢ်ကရၢကရိထုးထီၣ်န့ၢ်ပှၤတဖၣ် ဒ်သိးပကမၤစၢၤအဝဲသ့ၣ် လၢကကဲထီၣ်ခရံာ် အပျဲၢ်အဘီၣ်အဂီၢ်လီၤ.—မးသဲ ၂၈:၁၉, ၂၀.
၅. ဘၣ်ဃးဒီး တၢ်ပီးတၢ်လီလၢ တၢ်သိၣ်လိနဲၣ်လိတၢ်အဂီၢ် အပူၤန့ၣ် ပကဘၣ်သ့ၣ်ညါတၢ်မနုၤသ့ၣ်တဖၣ်လဲၣ်. ဟ့ၣ်တၢ်အဒိတက့ၢ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၅ တၢ်ပီးတၢ်လီတခါစုာ်စုာ်န့ၣ် ကဲဘျုးလၢ အသနၢၣ်ဒၣ်ဝဲလီၤ. အဒိ ဆိကမိၣ်ကွၢ် တၢ်ပီးတၢ်လီလၢ ယ့ၣ်ၡူးသူဝဲ ဖဲအမၤပှၤစုသ့အတၢ်မၤ အ ခါန့ၣ်တက့ၢ်. * (ကွၢ်တၢ်ဂ့ၢ်အဘျဲၣ်တက့ၢ်.) အဝဲသူဝဲတၢ်ပီးတၢ်လီတဖၣ်အံၤဒ်သိး ကထိၣ်တၢ်, မၤ နီၣ်တၢ်, မၤထီၣ်တဲာ်တၢ်, မၤဖျိတၢ်, မၤဘျ့ထီၣ်သ့ၣ်, မၤဃူထီၣ်သ့ၣ် ဒီးမၤစဲဘူးထီၣ်သ့ၣ်န့ၣ်လီၤ. ဒ်န့ၣ်အသိး တၢ်လၢအအိၣ်လၢ တၢ်ပီးတၢ်လီလၢ တၢ်သိၣ်လိနဲၣ်လိတၢ်အဂီၢ် အပူၤန့ၣ် အိၣ်ဒီးအတၢ်တိာ်ပာ်လီၤလီၤဆီဆီတခါစုာ်စုာ်လီၤ. ခဲအံၤပကတဲသကိး ပသူ တၢ်ပီးတၢ်လီလၢ တၢ်သိၣ်လိနဲၣ်လိတၢ်အဂီၢ် ကသ့ဒ်လဲၣ်အဂ့ၢ်န့ၣ်လီၤ.
တၢ်ပီးတၢ်လီလၢ အဒုးသ့ၣ်ညါပှၤဂၤလၢ ပမ့ၢ်မတၤသ့ၣ်တဖၣ်လဲၣ်
၆, ၇. (က) နသူခးက့တဖၣ်ဒ်လဲၣ်. (ခ) ဘၣ်မနုၤအဃိ ပသူတၢ်အိၣ်ဖှိၣ်ရိဖှိၣ်အလံာ်ကွဲမုာ်လဲၣ်.
၆ ခးက့တဖၣ်. ခးက့တဖၣ်အံၤ ဆံးသနာ်က့ ကဲဘျုးဒိၣ်မးလၢ အကဒုးသ့ၣ်ညါပှၤဂၤလၢ ပမ့ၢ်မတၤသ့ၣ်တဖၣ်လဲၣ် ဒီးကဒုးနဲၣ်ပှၤဂၤလၢ ပပှာ်ယဲၤသန့ (website) န့ၣ်လီၤ. လၢပပှာ်ယဲၤသန့န့ၣ် ပှၤဃုသ့ၣ်ညါအါထီၣ်ပဂ့ၢ်သ့ ဒီးပှၤဃ့ထီၣ်ဒ်သိးကမၤလိလံာ်စီဆှံသ့ဝဲလီၤ. လၢ jw.org အပူၤပှၤလၢအဃ့ထီၣ်ဒ်သိး ကမၤလိလံာ်စီဆှံန့ၣ်အိၣ်ဝဲအဂၤ ၄၀၀,၀၀၀ ဘျဲၣ်လီၤ. ဒီးကိးနံၤဒဲးန့ၣ် ပှၤဃ့ထီၣ်ဒ်သိး ကမၤလိလံာ်စီဆှံန့ၣ် အိၣ်ဝဲလၢအကယၤတဖၣ်လီၤ. နမ့ၢ်ဟးစိာ်ဃာ်ခးက့တဖၣ်န့ၣ် နသူအီၤဒီး နတဲတၢ်ဒီးပှၤတဂၤဂ့ၤတဂၤဂ့ၤကသ့ဝဲလီၤ.
၇ လံာ်ကွဲမုာ်တဖၣ်. တၢ်အိၣ်ဖှိၣ်ရိဖှိၣ်အလံာ်ကွဲမုာ်န့ၣ် တဲဝဲလၢ “ပကွဲမုာ်ဘၣ်နၤ လၢနကမၤ လိလံာ်စီဆှံ ဒီးယဟိဝၤပှၤအုၣ်အသးတဖၣ်လီၤ.” ဒီးတဲဝဲလၢ “လဲၤထီၣ်ကွၢ်ပတၢ်အိၣ်ဖှိၣ်ရိဖှိၣ်” မ့တမ့ၢ် “မၤလိလံာ်စီဆှံဒီး ယဟိဝၤပှၤအုၣ်အသးတဂၤဂၤတက့ၢ်” န့ၣ်လီၤ. လံာ်ကွဲမုာ်အံၤ ဒုးသ့ၣ်ညါပှၤဂၤလၢ ပမ့ၢ်မၤတၤသ့ၣ်တဖၣ်လဲၣ် ဒီးကဲထီၣ်တၢ်မၤစၢၤလၢပှၤလၢအ “သ့ၣ်ညါလီၤအသးလၢ အလိၣ်ဘၣ်ကစၢ်ယွၤ အတၢ်ဟံးစုနဲၣ်ကျဲ” တဖၣ်ကမၤလိလံာ်စီဆှံဒီးပှၤအဂီၢ်လီၤ. (မးသဲ ၅:၃, NWT) ပှၤလၢအမၤလိလံာ်စီဆှံမ့ၢ်ဂ့ၤ တမၤလိဘၣ်မ့ၢ်ဂ့ၤ ဟဲထီၣ်ပတၢ်အိၣ်ဖှိၣ်သ့ဝဲလီၤ. ဖဲအဝဲသ့ၣ်ဟဲထီၣ်တၢ်အိၣ်ဖှိၣ်အခါ အဝဲသ့ၣ်ကမၤလိန့ၢ်တၢ်အါမးလၢ လံာ်စီဆှံအပူၤလီၤ.
၈. ဘၣ်မနုၤအဃိ အရ့ဒိၣ်ဒိၣ်မးလၢ ပကကွဲမုာ်ပှၤဂၤလၢ ကဟဲထီၣ်ပတၢ်အိၣ်ဖှိၣ် အစှၤကတၢၢ်တဘျီန့ၣ်လဲၣ်.
၈ အရ့ဒိၣ်ဒိၣ် မးလၢ ပကကွဲမုာ်ပှၤဂၤလၢ ကဟဲထီၣ်ပတၢ်အိၣ်ဖှိၣ် အစှၤကတၢၢ်တဘျီလီၤ. ဘၣ်မနုၤအဃိလဲၣ်. အဝဲသ့ၣ်မ့ၢ်ဟဲန့ၣ် ကထံၣ်ဘၣ်ဝဲလၢ ယဟိဝၤပှၤအုၣ်အသးတဖၣ် သိၣ်လိတၢ်မ့ၢ်တၢ်တီလၢ လံာ်စီဆှံအပူၤ ဒီးမၤစၢၤပှၤဂၤတဖၣ်ဒ်သိး ကသ့ၣ်ညါထီၣ်ကစၢ်ယွၤလီၤ. မ့မ့ၢ် တၢ်ဘူၣ်တၢ်ဘါလၢအကမၣ်တဖၣ်န့ၣ် တမၤဝဲဒ်န့ၣ်ဘၣ်. (ယၡါယၤ ၆၅:၁၃) အဒိ ပှၤဒီမါဝၤခံဂၤလၢ အမ့ၢ် ရ့ဒီး လ့ဒၤ လၢအအိၣ်လၢ ကီၢ်အမဲရကၤန့ၣ် ထံၣ်ဘၣ်ဝဲတၢ်လီၤဆီဒ်န့ၣ်စ့ၢ်ကီးလီၤ. လၢအပူၤကွံာ်န့ၣ် အဝဲသ့ၣ်နာ်ကစၢ်ယွၤဒီး အဲၣ်ဒိးသ့ၣ်ညါအါထီၣ် ကစၢ်ယွၤအဂ့ၢ်လီၤ. အဃိ အဝဲသ့ၣ်ပာ်လီၤအသးလၢ ကလဲၤထီၣ်သရိာ်ကိးဖျၢၣ်ဒဲးလၢ အအိၣ်လၢအဝဲသ့ၣ်အဝ့ၢ်ပူၤ ဒီးတချုးလၢ အနုာ်လီၤလၢ တၢ်ဘူၣ်တၢ်ဘါတခါဒံးဘၣ်န့ၣ် အဝဲသ့ၣ် ကဃုကွၢ်ဝဲတၢ်ဂ့ၢ်ခံမံၤလီၤ. တၢတမံၤန့ၣ် အဝဲသ့ၣ်ကဘၣ်မၤလိန့ၢ်တၢ်တမံၤမံၤ လၢသရိာ်အပူၤ ဒီးခံမံၤတမံၤန့ၣ် ပှၤလၢအအိၣ်လၢ တၢ်ဘူၣ်တၢ်ဘါဖဲန့ၣ်အပူၤတဖၣ် အတၢ်ကူတၢ်ကၤန့ၣ် ကဘၣ်ဖျါလၢ အဝဲသ့ၣ်မၤလၤကပီၤယွၤလီၤ. ခီဖျိလၢ တၢ်ဘါသရိာ်အိၣ်အါမးအဃိ အဝဲသ့ၣ်အတၢ်ဆၢကတီၢ်လၢာ်ဝဲ အနံၣ်အါမး ဘၣ်ဆၣ် အဝဲသ့ၣ် တမၤလိန့ၢ်ဘၣ်ဝဲ တၢ်နီတမံၤဘၣ် အဃိအသးဟးဂီၤဝဲလီၤ. ပှၤလၢအပၣ်ဃုာ်လၢ တၢ်ဘူၣ်တၢ်ဘါတဖၣ်အံၤအပူၤန့ၣ် ကူကၤဝဲလီၤရၢၢ်ဒိၣ်မးလီၤ. ဖဲအဝဲသ့ၣ် လဲၤလၢသရိာ်လၢ အလီၢ်ခံကတၢၢ်တဖျၢၣ် လၢအဝဲသ့ၣ်အစရီအပူၤ ဝံၤအခါ လ့ဒၤလဲၤဆူတၢ်မၤဒီး မ့မ့ၢ်အဝၤရ့န့ၣ် က့ၤဆူဟံၣ်လီၤ. ဖဲရ့က့ၤဝဲလၢကျဲအခါ အဝဲက့ၤဖၠးဘၣ်ဝဲ ဘီမုၢ်ဘျီၣ်ဒိၣ်လီၤ. အဝဲဆိကမိၣ်ထီၣ်ဝဲလၢ ‘ယကလဲၤနုာ်ကွၢ်, ပှၤမၤမနုၤဖဲန့ၣ်လဲၣ်.’ အဝဲတူၢ်ဘၣ်ဝဲလၢ မ့ၢ်ဝဲတၢ်လဲၤခီဖျိလၢအဂ့ၤကတၢၢ်လီၤ. ပှၤကိးဂၤဒဲးလၢ ဘီမုၢ်ဘျီၣ်ဒိၣ်အပူၤန့ၣ် အသးဂ့ၤ, တူၢ်လိာ်မုာ်အီၤ ဒီးကူကၤဝဲဂ့ၤဂ့ၤဘၣ်ဘၣ်လီၤ. ရ့ဆ့ၣ်နီၤဝဲလၢ တၢ်မဲာ်ညါကတၢၢ်တကျိၤ ဒီးတၢ်လၢအနၢ်ဟူဘၣ်ဝဲတဖၣ်န့ၣ် ထုးန့ၢ်အသးဒိၣ်မးလီၤ. အဃိ တၢ်လဲၤခီဖျိတခါအံၤ ဒုးသ့ၣ်နီၣ်ထီၣ်က့ၤပှၤလၢ စီၤပီလူးအတၢ်ပာ်ဖျါလၢ ဘၣ်ဃးဒီးပှၤတဂၤလၢ အဟဲထီၣ်တၢ်အိၣ်ဖှိၣ်အဆိကတၢၢ်တဘျီ ဒီးတဲဝဲလၢ “ယွၤအိၣ်လၢသုကျါနီၢ်နီၢ်” လီၤ. (၁ ကရံၣ်သူး ၁၄:၂၃-၂၅) စးထီၣ်ဖဲန့ၣ် ရ့ဟဲထီၣ်တၢ်အိၣ်ဖှိၣ်လၢ အိၣ်ဘှံးနံၤကိးနွံဒဲးလီၤ. ဒီးလၢခံန့ၣ် အဝဲစးထီၣ်ထီၣ်ဝဲ နွံဖးဖီတၢ်အိၣ်ဖှိၣ် ကိးနွံဒဲးစ့ၢ်ကီးလီၤ. လ့ဒၤစ့ၢ်ကီး ဟဲထီၣ်ဝဲတၢ်အိၣ်ဖှိၣ် ဒီးအဝဲသ့ၣ်အသးအိၣ် အနံၣ် ၇၀ လံဘၣ်ဆၣ် မၤလိလံာ်စီဆှံဒီး ဒိးဘျၢထံလီၤ.
တၢ်ပီးတၢ်လီလၢ မၤစၢၤပှၤဒ်သိး ပကစးထီၣ်တဲတၢ်ဒီးပှၤဂၤအဂီၢ်
၉, ၁၀. (က) ဘၣ်မနုၤအဃိ လံာ်ဖိတဖၣ်န့ၣ် ပသူဘၣ်အီၤ ညီဝဲလဲၣ်. (ခ) ပကဘၣ်သူလံာ်ဖိလၢအမ့ၢ် ယွၤအဘီအမုၢ်န့ၣ် မ့ၢ်မနုၤလဲၣ် ဒ်လဲၣ်.
၉ လံာ်ဖိတဖၣ်. တၢ်ပီးတၢ်လီလၢ တၢ်သိၣ်လိနဲၣ်လိတၢ်အဂီၢ် အပူၤန့ၣ် လံာ်ဖိအိၣ်ဝဲ ဃိးဘ့ၣ်လီၤ. လံာ်ဖိတဖၣ်အံၤ နသူဘၣ်အီၤညီ ဒီးကဲထီၣ်တၢ်မၤစၢၤလၢ နကတဲသကိးတၢ်ဒီးပှၤဂၤအဂီၢ် ဒိၣ်မးလီၤ. ပှၤစးထီၣ်ရၤလီၤအီၤဖဲ ၂၀၁၃ ဒီးဘၣ်တၢ်ထုးထီၣ်အီၤကအိၣ်ဝဲ အကကွဲၢ်ယဲၢ်ကထိဃၣ်ဃၣ်လီၤ. လံာ်ဖိတဖၣ်အံၤ ဘၣ်တၢ်သူအီၤအကျိၤအကျဲ ဒ်သိးသိးလိာ်အသးလီၤ. အဃိ နသူအီၤမ့ၢ်သ့တဘ့ၣ်န့ၣ် နသူအီၤသ့ကိးဘ့ၣ်ဒဲးလီၤ. ဒ်သိးနကစးထီၣ်တဲသကိးတၢ်ဒီးပှၤဂၤအဂီၢ် နသူလံာ်ဖိကသ့ဒ်လဲၣ်.
၁၀ အဒိ နမ့ၢ်သူလံာ်ဖိလၢအမ့ၢ် ယွၤအဘီအမုၢ်န့ၣ် မ့ၢ်မနုၤလဲၣ် န့ၣ်ပၠးဟံၣ်ကစၢ်လၢ တၢ်သံကွၢ်လၢ လံာ်ဖိအကုခိၣ်ဒီး သံကွၢ်အီၤလၢ “ယွၤအဘီအမုၢ်န့ၣ် မ့ၢ်တၢ်မနုၤလဲၣ်န့ၣ် နဆိကမိၣ်ဘၣ် တဘျီဘျီဧါ. နကစံးလၢ ယွၤအဘီအမုၢ်န့ၣ်မ့ၢ် . . . ” ဝံၤဒီးသံကွၢ်အီၤလၢ တၢ်စံးဆၢသၢဖျၢၣ်အံၤန့ၣ် အဝဲကဃုထၢဝဲဖဲလဲၣ်တဖျၢၣ်လဲၣ်. လၢနကတဲအီၤလၢ အတၢ်စံးဆၢဘၣ် မ့တမ့ၢ် တဘၣ်ဘၣ်အလီၢ် အိးထီၣ်လံာ်ဖိဒီးပၠးအီၤ ဒၤနံးယ့လး ၂:၄၄ ဒီး ယၡါယၤ ၉:၆ လၢအအိၣ်ဖဲ “လံာ်စီဆှံတဲဝဲဒ်လဲၣ်” အဖီလာ်န့ၣ်တက့ၢ်. နတဲသကိးတၢ်မ့ၢ်ဝံၤန့ၣ် သံကွၢ်အီၤတၢ်သံကွၢ်လၢအအိၣ်ဖဲ “ဆိကမိၣ်ကွၢ်” အဖီလာ် “ဖဲယွၤအဘီအမုၢ် ပၢဟီၣ်ခိၣ်အဆၢကတီၢ်န့ၣ် ပတၢ်အိၣ်မူကမၤအသးဒ်လဲၣ်.” တၢ်သံကွၢ်တဖျၢၣ်အံၤန့ၣ် နက့ၤစံးဆၢက့ၤဟံၣ်ကစၢ် လၢခံတဘျီသ့ဝဲလီၤ. ဖဲနက့ၤလၢခံတဘျီန့ၣ် နသူ တၢ်သးခုကစီၣ်လၢယွၤအအိၣ် အတၢ်မၤလိ ၇ သ့ဝဲလီၤ. လံာ်တဘ့ၣ်အံၤအိၣ်လၢ တၢ်ပီးတၢ်လီလၢ တၢ်သိၣ်လိနဲၣ်လိတၢ်အဂီၢ် အပူၤစ့ၢ်ကီးလီၤ.
တၢ်ပီးတၢ်လီတဖၣ်လၢ အထုးန့ၢ်ပှၤသး
၁၁. ပမဲးကစံတဖၣ်န့ၣ် ဘၣ်တၢ်ထုးထီၣ်အီၤလၢ မတၤတဖၣ်အဂီၢ်လဲၣ် ဒီးဘၣ်ဃးဒီး ပမဲးကစံတဖၣ်န့ၣ် ပကဘၣ်သ့ၣ်ညါပာ်စၢၤ တၢ်ဂ့ၢ်မနုၤလဲၣ်.
၁၁ မဲးကစံတဖၣ်. လၢဟီၣ်ခိၣ်ဒီဘ့ၣ်န့ၣ် တၢးထီခိးတၢ် ဒီး ပၢၢ်ထီၣ် (Awake!) န့ၣ်ဘၣ်တၢ်ရၤလီၤအီၤဒီး ကွဲးကျိာ်ထံအီၤအါကတၢၢ်လီၤ. ပှၤအါဂၤလၢ အအိၣ်လၢ ထံကီၢ်အါဘ့ၣ်န့ၣ် အဝဲသ့ၣ်ဖးဝဲ မဲးကစံတဖၣ်အံၤလီၤ. ဒီးတၢ်ဂ့ၢ်ခိၣ်တီလၢ လံာ်ကုခိၣ်န့ၣ် ပှၤမၤဃာ်အီၤဒ်သိး ကထုးန့ၢ်ပှၤအါဂၤအသး အဂီၢ်လီၤ. ပကြၢးသူ မဲးကစံတဖၣ်အံၤ ဒ်သိးပကမၤစၢၤပှၤဂၤလၢ ကသးစၢၢ်ဆၢဝဲ တၢ်လၢအရ့ဒိၣ်အဂီၢ်လီၤ. ဘၣ်ဆၣ် အဆိကတၢၢ်န့ၣ် ပကဘၣ်သ့ၣ်ညါလၢ မဲးကစံတဘ့ၣ်စုာ်စုာ်န့ၣ် ဘၣ်တၢ်ထုးထီၣ်အီၤလၢ ပှၤဒ်လဲၣ်တဖၣ်အဂီၢ်လဲၣ်န့ၣ်လီၤ.
၁၂. (က) ပၢၢ်ထီၣ် န့ၣ်ဘၣ်တၢ်ထုးထီၣ်အီၤလၢ မတၤတဖၣ်အဂီၢ်လဲၣ် ဒီးအတၢ်တိာ်ပာ်န့ၣ် မ့ၢ်မနုၤလဲၣ်. (ခ) ဖဲနသူ ပၢၢ်ထီၣ် မဲးကစံအခါန့ၣ် အကဲဘျုးဒ်လဲၣ်.
၁၂ ပၢၢ်ထီၣ် န့ၣ်ဘၣ်တၢ်ထုးထီၣ်အီၤလၢ ပှၤလၢအသ့ၣ်ညါ လံာ်စီဆှံအဂ့ၢ်ထဲတစဲး မ့တမ့ၢ် တသ့ၣ်ညါဝဲ နီတစဲးတဖၣ်အဂီၢ်လီၤ. ဘၣ်သ့ၣ်သ့ၣ် ဘၣ်ဃးဒီး ခရံာ်ဖိတဖၣ် အတၢ်သိၣ်တၢ်သီန့ၣ် အဝဲသ့ၣ်တသ့ၣ်ညါဝဲနီတမံၤဘၣ်, တနာ်အီၣ်ဝဲ တၢ်ဘူၣ်တၢ်ဘါဘၣ် မ့တမ့ၢ် အဝဲသ့ၣ်တနာ်ဝဲလၢ လံာ်စီဆှံမၤစၢၤအဝဲသ့ၣ် သ့န့ၣ်ဘၣ်. ပှၤထုးထီၣ် ပၢၢ်ထီၣ် အလံာ် အတၢ်တိာ်ပာ်အခိၣ်သ့ၣ်န့ၣ်မ့ၢ် ဒ်သိးကမၤစၢၤပှၤဖးလံာ်ဖိတဖၣ်လၢ ကနာ်ဝဲလၢ ကစၢ်ယွၤအိၣ်အဂီၢ်လီၤ. (ရိမ့ၤ ၁:၂၀; ဧ့ၤဘြံၤ ၁၁:၆) လံာ်တဖၣ်အံၤ မၤစၢၤဝဲ ပှၤဖးလံာ်ဖိတဖၣ် ဒ်သိးအဝဲသ့ၣ်ကနာ်ဝဲလၢ လံာ်စီဆှံန့ၣ် “မ့ၢ်နီၢ်နီၢ် . . . ယွၤ . . . အကလုၢ်န့ၣ်လီၤ.” (၁ သ့းစၤလနံ ၂:၁၃) လၢ ၂၀၁၈ အဂီၢ်န့ၣ် ပှၤထုးထီၣ် ပၢၢ်ထီၣ် လၢအခိၣ်တီမ့ၢ်ဝဲ “The Way of Happiness” (“ကျဲလၢပကဒိးန့ၢ်ဘၣ် တၢ်သူၣ်ခုသးခု”), “12 Secrets of Successful Families” (“တၢ်ဟ့ၣ်ကူၣ် ၁၂ ခါလၢဟံၣ်မုာ်ဃီပၢၤအဂီၢ်”) ဒီး “Help for Those Who Grieve” (“တၢ်မၤစၢၤလၢ ပှၤလၢအသူၣ်အုးသးအုးတဖၣ်အဂီၢ်”) လီၤ.
၁၃. (က) တၢးထီခိးတၢ် လၢကမျၢၢ်အဂီၢ်န့ၣ် ဘၣ်တၢ်ထုးထီၣ်အီၤလၢ မတၤတဖၣ်အဂီၢ်လဲၣ်. (ခ) ဖဲနသူ တၢးထီခိးတၢ် လၢကမျၢၢ်အဂီၢ် အခါန့ၣ် အကဲဘျုးဒ်လဲၣ်.
၁၃ တၢးထီခိးတၢ် လၢကမျၢၢ်အဂီၢ်န့ၣ် အတၢ်တိာ်ပာ်မ့ၢ်ဝဲ ဒ်သိးကဆှဲပၠးဝဲ လံာ်စီဆှံအတၢ်သိၣ်လိ ဆူပှၤလၢအသ့ၣ်ညါ လံာ်စီဆှံဒီး ကစၢ်ယွၤအဂ့ၢ်တစဲးတဖၣ်အဂီၢ်လီၤ. ဘၣ်သ့ၣ်သ့ၣ် အဝဲသ့ၣ်ကသ့ၣ်ညါဝဲ တၢ်ဂ့ၢ်လၢလံာ်စီဆှံအပူၤတနီၤ ဘၣ်ဆၣ်တနၢ်ပၢၢ်ဝဲ လီၤတံၢ်လီၤဆဲးဘၣ်. ( ရိမ့ၤ ၁၀:၂; ၁ တံၤမသ့း ၂:၃, ၄) တၢးထီခိးတၢ် သၢဘ့ၣ်လၢ ၂၀၁၈ အဂီၢ်န့ၣ် ကစံးဆၢဝဲ တၢ်သံကွၢ်သၢဖျၢၣ်လၢအမ့ၢ် “မုၢ်မဆါတနံၤအံၤ မ့ၢ်လံာ်စီဆှံ အတၢ်ဟံးစုနဲၣ်ကျဲန့ၣ် ကဲဘျုးဒံးဧါ,” “ခါဆူညါန့ၣ် တၢ်ကမၤအသးဒ်လဲၣ်” ဒီး “မ့ၢ်ကစၢ်ယွၤ သးအိၣ်နၤဧါ” န့ၣ်လီၤ.
တၢ်ပီးတၢ်လီလၢ အထိၣ်ဟူးထိၣ်ဂဲၤထီၣ်ပှၤသး
၁၄. (က) တၢ်ဂီၤမူလွံၢ်ခါလၢ အအိၣ်လၢ တၢ်ပီးတၢ်လီလၢ တၢ်သိၣ်လိနဲၣ်လိတၢ်အဂီၢ် အပူၤန့ၣ် အတၢ်တိာ်ပာ်အိၣ်ဝဲဒ်လဲၣ်. (ခ) ဘၣ်ဃးဒီးတၢ်ပၠးတၢ်ဂီၤမူန့ၣ် နအိၣ်ဒီးတၢ်လဲၤခီဖျိဒ်လဲၣ်.
၁၄ တၢ်ဂီၤမူတဖၣ်. လၢယ့ၣ်ၡူးအစိၤ ပှၤစုသ့တဖၣ် ဘၣ်သူဝဲတၢ်ပီးတၢ်လီလၢ အစုလီၤ. ဘၣ်ဆၣ် ဆၢကတီၢ်ခဲအံၤ ပှၤစုသ့တဖၣ် သူဝဲတၢ်ပီးတၢ်လီလၢအအိၣ်ဒီး လီမ့ၣ်အူအဂံၢ် ဒ်သိးဒီး စဲးဘူးတၢ်, စဲးပျံာ်ဖျိတၢ်, စဲးထူးဘျ့တၢ်လီၤ. ဒ်န့ၣ်အသိး မုၢ်မဆါတနံၤအံၤ ပအိၣ်ဒီးလံာ်လဲၢ်တဖၣ် တကးဒံးဘၣ် ပအိၣ်ဒီးတၢ်ဂီၤမူလၢ အဂ့ၤဒိၣ်မးတဖၣ်လီၤ. လၢအကျါလွံၢ်ခါန့ၣ် အိၣ်ဝဲလၢ ပတၢ်ပီးတၢ်လီတဖၣ်အပူၤလီၤ. ဒီးအခိၣ်တီမ့ၢ်ဝဲ ဘၣ်မနုၤအဃိ ဘၣ်မၤလိလံာ်စီဆှံလဲၣ်, တၢ်မၤလိလံာ်စီဆှံန့ၣ် ပှၤမၤအီၤဒ်လဲၣ်, ဖဲဘီမုၢ်ဘျီၣ်ဒိၣ်န့ၣ်ပှၤမၤတၢ်မနုၤလဲၣ် ဒီး ယဟိဝၤပှၤအုၣ်အသးန့ၣ် မ့ၢ်မတၤတဖၣ်လဲၣ် န့ၣ်လီၤ. တၢ်ဂီၤမူလၢအဖုၣ်တဖၣ်န့ၣ် ယံာ်ဝဲ စှၤန့ၢ်ခံမံးနံးအဃိ ဖဲပထံၣ်လိာ်သးဒီးပှၤဂၤ အဆိကတၢၢ်တဘျီအခါ ပသူဘၣ်အီၤညီဒိၣ်မးလီၤ. တၢ်ဂီၤမူလၢ အထီတဖၣ်န့ၣ် ပသူအီၤဖဲ ပက့ၤဟးအိၣ်သကိးပှၤဂၤအခါ ဒီးပှၤလၢအတၢ်ဆၢကတီၢ်အိၣ်အါတဖၣ် အခါသ့ဝဲလီၤ. တၢ်ဂီၤမူသ့ၣ်တဖၣ်အံၤ ထိၣ်ဟူးထိၣ်ဂဲၤထီၣ်ပှၤသးလၢ ကမၤလိလံာ်စီဆှံဒီး ကဟဲထီၣ်တၢ်အိၣ်ဖှိၣ်အဃိ မ့ၢ်တၢ်ပီးတၢ်လီလၢ အကဲဘျုးဒိၣ်မးလီၤ.
၁၅. ဖဲပှၤအါဂၤ ကွၢ်ဘၣ်တၢ်ဂီၤမူလၢ အနီၢ်ကစၢ်အကျိာ်အခါ ကဲဘျုးလၢအဝဲသ့ၣ်အဂီၢ်ဒ်လဲၣ်. ဟ့ၣ်တၢ်အဒိတက့ၢ်.
၁၅ အဒိ ဒီပုၢ်ဝဲၢ်မုၣ်တဂၤထံၣ်လိာ်အသးဒီး ပိာ်မုၣ်တဂၤလၢ အအိၣ်ဟဲလၢ မဲခြိၤနံၡါ ဒီးအကတိၤဝဲ ယ့ဖံၣ်(စ်) ကျိာ်လီၤ. ဒီပုၢ်ဝဲၢ်မုၣ်စးထီၣ်ပၠးအီၤ တၢ်ဂီၤမူလၢအမ့ၢ်ဝဲ ဘၣ်မနုၤအဃိ ဘၣ်မၤလိလံာ်စီဆှံလဲၣ် လၢယ့ဖံၣ်(စ်) ကျိာ်အခါ ပိာ်မုၣ်တဂၤအံၤတဲဝဲလၢ “အဝဲအံၤမ့ၢ်ယကျိာ်, တလီၤနာ်နီတစဲးဘၣ်. တၢ်တဂၤအံၤ တဲတၢ်အကလုၢ်လီၤဂာ်ဒ်သိး ပှၤလၢအအိၣ်လၢ ပသဝီလီၤ. အဝဲတဲဝဲယကျိာ်လီၤ.” အဝဲတဲဝဲလၢ လံာ်လဲၢ်ဒီးတၢ်ဂီၤမူလၢ ယ့ဖံၣ်(စ်) ကျိာ်လၢအအိၣ်လၢ jw.org အပူၤန့ၣ် အဝဲကဖးဒီးကကွၢ်ဝဲခဲလၢာ်လီၤ. (ထိၣ်သတြီၤဒီး မၤတၢ် ၂:၈, ၁၁.) တၢ်အဒိလၢအဂၤတခါန့ၣ် ဒီပုၢ်ဝဲၢ်မုၣ်လၢအအိၣ်လၢ ကီၢ်အမဲရကၤန့ၣ် အဖိဒိၣ်အိၣ်လၢ ထံကီၢ်အဂၤတဘ့ၣ်လီၤ. အဝဲဆှၢန့ၢ်ဝဲအဖိဒိၣ်လၢ လ့(ခ်) (link) လၢအအိၣ်ဒီးတၢ်ဂီၤမူအံၤလၢ အဖိဒိၣ်အကျိာ်န့ၣ်လီၤ. အဖိဒိၣ်ကွၢ်တၢ်ဂီၤမူဒီး ဆှၢန့ၢ်က့ၤအီၤလံာ်လၢ “တၢ်ဂ့ၢ်လၢဘၣ်ဃးဒီး မုၣ်ကီၤလံၢ်ပၢဟီၣ်ခိၣ်န့ၣ် ထုးန့ၢ်ယသးဒိၣ်မး. ယဃ့ထီၣ်လၢ ယကမၤလိလံာ်စီဆှံလီၤ.” တၢ်လဲၤခီဖျိအံၤ လီၤကမၢကမၣ်ဒိၣ်မး. မ့ၢ်လၢအဝဲအိၣ်လၢ ထံကီၢ်လၢပှၤတြီဃာ် ပတၢ်စံၣ်တဲၤတဲလီၤတၢ်မၤအဃိလီၤ.
တၢ်ပီးတၢ်လီလၢ အသိၣ်လိပှၤတၢ်မ့ၢ်တၢ်တီ
၁၆. (က) လံာ်လၢအမ့ၢ် စူၢ်ယွၤအကလုၢ် ဒီး အိၣ်မူလီၤထူလီၤယိာ်တက့ၢ် န့ၣ်အတၢ်တိာ်ပာ်အိၣ်ဝဲဒ်လဲၣ်. (ခ) လံာ်လၢအမ့ၢ် တၢ်သးခုကစီၣ်လၢ ယွၤအအိၣ် န့ၣ်အတၢ်တိာ်ပာ်အိၣ်ဝဲဒ်လဲၣ်. (ဂ) လံာ်လၢအမ့ၢ် မုၢ်မဆါတနံၤအံၤ မတၤတဖၣ်မၤ ယဟိဝၤယွၤအတၢ်ဘၣ်သးလဲၣ် န့ၣ်အတၢ်တိာ်ပာ်အိၣ်ဒ်လဲၣ်.
၁၆ ဘရိၣ်ခၠၣ်တဖၣ်. ပှၤလၢအဖးလံာ်တဘၣ်တဖၣ် မ့တမ့ၢ် ပလံာ်လဲၢ်လၢ အဝဲသ့ၣ်အကျိာ် မ့ၢ်တအိၣ်နီတမံၤဘၣ်န့ၣ် ပသိၣ်လိအဝဲသ့ၣ်ကသ့ဒ်လဲၣ်. ပှၤလၢအဖးလံာ်တဘၣ်အါအါ သ့ၣ်တဖၣ် မ့တမ့ၢ် လံာ်လဲၢ်လၢ အဝဲသ့ၣ်အနီၢ်ကစၢ်အကျိာ် မ့ၢ်တအိၣ်ဘၣ်န့ၣ် ပသိၣ်လိအဝဲသ့ၣ်တၢ်မ့ၢ်တၢ်တီ ကသ့ဒ်လဲၣ်. ပသူလံာ်လၢအမ့ၢ် စူၢ်ယွၤအကလုၢ် ဒီး အိၣ်မူလီၤထူလီၤယိာ်တက့ၢ် သ့ဝဲလီၤ. * (ကွၢ်တၢ်ဂ့ၢ်အဘျဲၣ်တက့ၢ်.) ဒ်သိးပကစးထီၣ် မၤလိလံာ်စီဆှံဒီးပှၤဂၤအဂီၢ် လံာ်လၢအမ့ၢ် တၢ်သးခုကစီၣ်လၢ ယွၤအအိၣ် န့ၣ်ကဲဘျုးဝဲဒိၣ်မးလီၤ. ပၠးပှၤဂၤလၢ လံာ်အလီၢ်ခံကတၢၢ်လၢ အအိၣ်ဒီးတၢ်သံကွၢ် ၁၄ ဖျၢၣ်ဒီးသံကွၢ်အီၤလၢ မ့ၢ်အအဲၣ်ဒိးသ့ၣ်ညါဝဲဖဲလဲၣ်တခါလဲၣ်. မ့ၢ်ဝံၤန့ၣ် နစးထီၣ်မၤလိအီၤ တၢ်သံကွၢ်လၢ အအဲၣ်ဒိးသ့ၣ်ညါဝဲသ့လီၤ. ဖဲနက့ၤအိၣ်သကိး ဟံၣ်ကစၢ်အခါ မ့ၢ်နမၤဒ်န့ၣ်တဘျီဘျီဧါ. ဘရိၣ်ခၠၣ် သၢဘ့ၣ်တဘ့ၣ်လၢ အအိၣ်လၢ ပတၢ်ပီးတၢ်လီတဖၣ်အကျါန့ၣ် မ့ၢ်ဝဲ မုၢ်မဆါတနံၤအံၤ မတၤတဖၣ်မၤ ယဟိဝၤယွၤအတၢ်ဘၣ်သးလဲၣ်. လံာ်တဘ့ၣ်အံၤအတၢ်တိာ်ပာ်မ့ၢ်ဝဲလၢ ပကသိၣ်လိ ပပှၤမၤလိလံာ်စီဆှံဖိတဖၣ်လၢ ပတၢ်ကရၢကရိအဂ့ၢ်လီၤ. ပကဘၣ်သိၣ်လိ ပပှၤမၤလိလံာ်စီဆှံဖိတခါစုာ်စုာ်လၢ လံာ်အံၤဒ်လဲၣ်န့ၣ် ပကွၢ်တၢ်ဟံးစုနဲၣ်ကျဲဖဲ လါမၢ်ၡး ၂၀၁၇, ခရံာ်ဖိတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အပူၤသ့လီၤ.
၁၇. (က) တၢ်မၤလိအလံာ် တဘ့ၣ်စုာ်စုာ်န့ၣ် အတၢ်တိာ်ပာ်အိၣ်ဒ်လဲၣ်. (ခ) ပှၤလၢအဒိးဘျၢထံဝံၤခဲလၢာ် ကဘၣ်မၤတၢ်မနုၤလဲၣ် ဒီးဘၣ်မနုၤအဃိလဲၣ်.
၁၇ လံာ်တဖၣ်. နမ့ၢ်စးထီၣ်မၤလိလံာ်စီဆှံဒီး ပှၤဂၤလၢဘရိၣ်ခၠၣ်သနာ်က့ နမ့ၢ်သိၣ်လိက့ၤအီၤလၢ လံာ်စီဆှံ ကသိၣ်လိပှၤ တၢ်ဂ့ၢ်မနုၤလဲၣ် န့ၣ်သ့ဝဲလီၤ. လံာ်တဘ့ၣ်အံၤ မၤစၢၤပှၤဂၤဒ်သိး ကသ့ၣ်ညါအါထီၣ်ဝဲ လံာ်စီဆှံအတၢ်သိၣ်လိအခီၣ်ထံးခီၣ်ဘိတဖၣ်လီၤ. နပှၤမၤလိလံာ်စီဆှံဖိ မ့ၢ်လဲၤထီၣ်လဲၤထီဒီး မၤလိလံာ်အံၤမ့ၢ်ဝံၤန့ၣ် နစးထီၣ်မၤလိအီၤလံာ်လၢအမ့ၢ် ပအိၣ်ဂၢၢ်ဆိးကျၢၤလၢ ယွၤအတၢ်အဲၣ်တၢ်ကွံအပူၤကသ့ဒ်လဲၣ် သ့ဝဲလီၤ. လံာ်တဘ့ၣ်အံၤ ကမၤစၢၤပှၤမၤလိလံာ်စီဆှံဖိတဖၣ် ဒ်သိးကမၤထွဲဝဲ လံာ်စီဆှံအတၢ်ဟံးစုနဲၣ်ကျဲလၢ အတၢ်အိၣ်မူအပူၤလီၤ. ပှၤအသီတဂၤ ဒိးဘျၢထံမ့ၢ်ဝံၤဒၣ်လဲာ် အဝဲကဘၣ်ဆဲးမၤလိဝဲ လံာ်ခံဘ့ၣ်အံၤတုၤအဝံၤလီၤ. လံာ်တဖၣ်အံၤ ကမၤစၢၤအဝဲသ့ၣ်ဒ်သိး အတၢ်နာ်ယဟိဝၤယွၤကဂၢၢ်ကျၢၤဒီး ကတီဒီးအီၤအဂီၢ်လီၤ.—ဖး ကလီးစဲ ၂:၆, ၇ တက့ၢ်.
တၢ်ပီးတၢ်လီလၢ တၢ်သိၣ်လိနဲၣ်လိ တၢ်အဂီၢ်န့ၣ် အိၣ်ဒီးတၢ်ပီးတၢ်လီတဖၣ်လၢ ပလိၣ်ဘၣ်အီၤလၢ ပကသိၣ်လိပှၤဂၤ တၢ်မ့ၢ်တၢ်တီအဂီၢ်
၁၈. (က) ၁ တံၤမသ့း ၄:၁၆ ဟ့ၣ်ဂံၢ်ဟ့ၣ်ဘါပှၤ ဒ်သိးပကသိၣ်လိ တၢ်မ့ၢ်တၢ်တီတဖၣ်ဒ်လဲၣ် ဒီးကဲဘျုးဒ်လဲၣ်. (ခ) ဖဲပသူ တၢ်ပီးတၢ်လီလၢ တၢ်သိၣ်လိနဲၣ်လိတၢ်အဂီၢ်အခါ ပတၢ်တိာ်ပာ်န့ၣ် မ့ၢ်မနုၤလဲၣ်.
၁၈ ဒ်ပမ့ၢ် ယဟိဝၤပှၤအုၣ်အသးတဖၣ်အသိး ပအိၣ်ဒီးမူဒါလၢ ပကသိၣ်လိပှၤဂၤလၢ “တၢ်မ့ၢ်တၢ်တီ အကလုၢ်အကထါ ဘၣ်ဃးဒီးတၢ်သးခုအကစီၣ်” ဒ်သိးအဝဲသ့ၣ် ကဒိးန့ၢ်ဘၣ်တၢ်မူအထူအယိာ်အဂီၢ်လီၤ. (ကလီးစဲ ၁:၅; ဖး ၁ တံၤမသ့း ၄:၁၆ တက့ၢ်.) ဒ်သိးပမၤတၢ်မၤအံၤကသ့အဂီၢ် ပအိၣ်ဒီးတၢ်ပီးတၢ်လီတဖၣ် လၢအအိၣ်လၢ တၢ်ပီးတၢ်လီလၢ တၢ်သိၣ်လိနဲၣ်လိတၢ်အဂီၢ် အပူၤလီၤ. (ကွၢ်တၢ်လွံၢ်နၢၣ်လၢအမ့ၢ် “ တၢ်ပီးတၢ်လီလၢ တၢ်သိၣ်လိနဲၣ်လိတၢ်အဂီၢ်” တက့ၢ်.) မ်ပကသူ တၢ်ပီးတၢ်လီတဖၣ်အံၤ လၢအဂ့ၤကတၢၢ်တက့ၢ်. ပဝဲတဂၤစုာ်စုာ် ပကသူတၢ်ပီးတၢ်လီဖဲလဲၣ်တခါလဲၣ် ဒီးပကသူအီၤလၢဆၢကတီၢ်ဖဲလဲၣ်န့ၣ် ပဆၢတဲာ်သ့လီၤ. ဘၣ်ဆၣ် ပကဘၣ်သ့ၣ်နီၣ်ထီၣ်လၢ ပတၢ်တိာ်ပာ်န့ၣ် တမ့ၢ်ထဲ ပကဟ့ၣ်လီၤပှၤလံာ်လဲၢ်တဖၣ်ဘၣ်. ဒီးပှၤလၢအတသးအိၣ်ဒိကနၣ် တၢ်သးခုကစီၣ်န့ၣ် ပတဟ့ၣ်လီၤအဝဲသ့ၣ် ပလံာ်ပလဲၢ်တဖၣ်ဘၣ်. ပတၢ်တိာ်ပာ်န့ၣ်မ့ၢ်ဝဲ ပကမၤစၢၤ ပှၤလၢအသးအိၣ်ဒိကနၣ်တၢ်နီၢ်နီၢ်, ပှၤလၢအအိၣ်ဒီးတၢ်ဆီၣ်လီၤအသး ဒီးပှၤလၢအအဲၣ်ဒိးသ့ၣ်ညါ ကစၢ်ယွၤ နီၢ်နီၢ်တဖၣ် ဒီး “ပှၤလၢတၢ်ပာ်အီၤ လၢအကန့ၢ်ဘၣ်တၢ်မူ လီၤထူလီၤယိာ်တဖၣ်” ဒ်သိးအဝဲသ့ၣ်ကကဲထီၣ် ခရံာ်အပျဲၢ်အဘီၣ်တဖၣ်အဂီၢ်လီၤ.—မၤတၢ် ၁၃:၄၈; မးသဲ ၂၈:၁၉, ၂၀.
^ လံာ်အဆၢ. 5 ကွၢ်တၢ်မၤလိလၢအမ့ၢ် “The Carpenter” ဒီးတၢ်လွံၢ်နၢၣ်လၢအမ့ၢ် “The Carpenter’s Toolbox” in the August 1, 2010, issue of The Watchtower တက့ၢ်.
^ လံာ်အဆၢ. 16 ပှၤမၤလိလံာ်စီဆှံ ဖးလံာ်မ့ၢ်တဘၣ်န့ၣ် ဖးပၠးအီၤလံာ်လၢအမ့ၢ် စူၢ်ယွၤအကလုၢ်တက့ၢ် လၢအပၣ်ဃုာ်ဒီးတၢ်ဂီၤအါမးန့ၣ်တက့ၢ်.
