ယဟိဝၤလၢအမ့ၢ် တၢ်သဘျ့နီၢ်ကီၢ်အယွၤန့ၣ် မၤအတၢ်မၤတက့ၢ်
“ဖဲယွၤအသးစီဆှံအိၣ်ဝဲအလီၢ်န့ၣ် တၢ်သဘျ့အိၣ်ဝဲလီၤ.”—၂ ကရံၣ်သူး ၃:၁၇, ခ့ခါစှီၤကျိာ်.
၁, ၂. (က) ဖဲစီၤပီလူးအစိၤန့ၣ် ဘၣ်မနုၤအဃိ ကုၢ်ဒီးတၢ်သဘျ့အဂ့ၢ်န့ၣ် မ့ၢ်တၢ်လၢအရ့ဒိၣ်လဲၣ်. (ခ) စီၤပီလူးတဲဝဲလၢ တၢ်သဘျ့နီၢ်ကီၢ် အခီၣ်ထံးခီၣ်ဘိ ဟဲလၢမတၤတဂၤအအိၣ်လဲၣ်.
ခရံာ်ဖိတဖၣ်လၢ တၢ်မၢဖိအစိၤန့ၣ် အိၣ်ဘၣ်လၢ ရိမ့ၤအဘီမုၢ်အတၢ်ပၢဖီလာ်လီၤ. ပှၤဖဲန့ၣ်တဖၣ် ပာ်ထီၣ်ထီအသးလၢ အတၢ်သိၣ်တၢ်သီ, တၢ်မူးတၢ်ရၢ် အတၢ်ရဲၣ်တၢ်ကျဲၤ ဒီးတၢ်သဘျ့အဃိလီၤ. ဘၣ်ဆၣ် ဘီမုၢ်အံၤဒိၣ်စိဝဲလၢ အကုၢ်တဖၣ်အဃိလီၤ. လၢအပူၤကွံာ်ရိမ့ၤအဘီမုၢ်ပူၤန့ၣ် ပှၤသၢဂၤအကျါတဂၤ မ့ၢ်ဝဲကုၢ်လီၤ. လၢတၢ်န့ၣ်အဃိ ဖဲစိၤအဝဲန့ၣ် လၢပှၤမုၢ်ဆ့ၣ်မုၢ်ဂီၤဖိတဖၣ်အဂီၢ်မ့ၢ်ဂ့ၤ လၢခရံာ်ဖိတဖၣ်အဂီၢ်မ့ၢ်ဂ့ၤ ကုၢ်ဒီးတၢ်သဘျ့အဂ့ၢ်န့ၣ် မ့ၢ်တၢ်ဂ့ၢ်လၢအရ့ဒိၣ်လီၤ.
၂ တၢ်မၢဖိပီလူးကွဲးဝဲဘၣ်ဃးဒီး တၢ်သဘျ့အဂ့ၢ်အါမးလီၤ. ဘၣ်ဆၣ် အဝဲတဂုာ်ကျဲးစၢး မၤဘၣ်ဂီၢ်က့ၤဟီၣ်ခိၣ်အတၢ်ကီတၢ်ခဲ ဒ်ပှၤဖဲအစိၤတဖၣ်မၤဝဲအသိးဘၣ်. လၢတၢ်န့ၣ်အလီၢ် စီၤပီလူးဒီးခရံာ်ဖိလၢအဂၤတဖၣ် ဂုာ်ကျဲးစၢးစံၣ်တဲၤတဲလီၤ ဘီမုၢ်တၢ်သးခုကစီၣ် ဒီးမၤစၢၤပှၤဂၤဒ်သိး ကနၢ်ပၢၢ်ထီၣ်ဝဲ ယ့ၣ်ၡူးအတၢ်ပှ့ၤက့ၤ အဂ့ၢ်န့ၣ်လီၤ. စီၤပီလူးတဲနၢ်ပၢၢ်ဝဲ ခရံာ်ဖိတဖၣ်လၢ တၢ်သဘျ့နီၢ်ကီၢ် အခီၣ်ထံးခီၣ်ဘိဟဲဖဲလဲၣ်န့ၣ်လီၤ. အဝဲကွဲးဝဲလၢ ယဟိဝၤယွၤန့ၣ် မ့ၢ်ဝဲပှၤနီၢ်သးဖိ “ဒီးဖဲယွၤအသးစီဆှံအိၣ်ဝဲအလီၢ်န့ၣ် တၢ်သဘျ့အိၣ်ဝဲလီၤ.”—၂ ကရံၣ်သူး ၃:၁၇, ခ့ခါစှီၤကျိာ်.
၃, ၄. (က) လၢ ၂ ကရံၣ်သူး ၃:၁၇ အပူၤန့ၣ် စီၤပီလူးတဲဝဲတၢ်ဂ့ၢ်မနုၤလဲၣ်. (ခ) ဒ်သိးပကဒိးန့ၢ်ဘၣ် တၢ်သဘျ့လၢအဟဲလၢ ယဟိဝၤယွၤအအိၣ်အဂီၢ် ပကဘၣ်မၤတၢ်မနုၤလဲၣ်.
၃ ဖဲစီၤပီလူးကွဲးအိၣ်သကိးဝဲ ကရံၣ်သူးတၢ်အိၣ်ဖှိၣ်လၢ လံာ်ပရၢခံဘ့ၣ်တဘ့ၣ်အခါ အဝဲပာ်ဖျါထီၣ်ဝဲလၢ ဖဲစီၤမိၤၡ့လဲၤထီၣ်လၢကစၢၢ်စံၤနါအလိၤ လၢယဟိဝၤယွၤ အမူခိၣ်ကလူးအအိၣ်ဝံၤ ဒီးဟဲက့ၤလီၤအခါ အမဲာ်သၣ်ကပြုၢ်ကပြီၤဝဲလီၤ. ဖဲပှၤအံၣ်စရ့လးဖိတဖၣ် ထံၣ်စီၤမိၤၡ့အခါ အဝဲသ့ၣ်ပျံၤတၢ်အဃိ အဝဲဘၣ်မၤဘၢအမဲာ်ဒီး နီၣ်ကျၢၢ်ဘၢလီၤ. (၂ မိၤၡ့ ၃၄:၂၉, ၃၀, ၃၃; ၂ ကရံၣ်သူး ၃:၇, ၁၃) စီၤပီလူး ပာ်ဖျါထီၣ်ဝဲလၢ “ဘၣ်ဆၣ်ဒီး တုၤမ့ၢ်အဃၣ်က့ၤအသးဆူ ကစၢ်အအိၣ်ဒီး, တၢ်ဟံးထီၣ်ကွံာ်နီၣ်ကျၢၢ်ဘၢမဲာ်န့ၣ်လီၤ.” (၂ ကရံၣ်သူး ၃:၁၆) စီၤပီလူး အဲၣ်ဒိးတဲဝဲတၢ်မနုၤလဲၣ်.
၄ ဒ်ပမၤလိတ့ၢ်လၢ တၢ်မၤလိလၢညါတခါအသိး ယဟိဝၤယွၤ တ့လီၤတၢ်ခဲလၢာ်အဃိ ထဲဒၣ်အဝဲတဂၤဧိၤန့ၣ် အိၣ်ဒီးတၢ်သဘျ့လၢာ်လၢာ်ဆ့ဆ့လီၤ. လၢတၢ်န့ၣ်အဃိ ဖဲယဟိဝၤယွၤအိၣ်အလီၢ် ဒီး “ဖဲယွၤအသးစီဆှံအိၣ်ဝဲအလီၢ်န့ၣ် တၢ်သဘျ့အိၣ်ဝဲလီၤ.” ဘၣ်ဆၣ် စီၤပီလူးတဲဝဲလၢ ပမ့ၢ်အဲၣ်ဒိးန့ၢ်ဘၣ် တၢ်သဘျ့ဒ်အံၤတကလုာ်န့ၣ် ပကဘၣ်ဟဲက့ၤကဒါက့ၤလၢ ယဟိဝၤယွၤအအိၣ်လီၤ. အဲၣ်ဒိးတဲဝဲ ပကဘၣ်အိၣ်ဒီးတၢ်ရ့လိာ်သးဒီး ယဟိဝၤယွၤဘူးဘူးတံၢ်တံၢ်လီၤ. ဖဲပှၤအံၣ်စရ့လးဖိတဖၣ် အိၣ်လၢပှၢ်မုၢ်ကနၢအခါ အဝဲသ့ၣ်တအိၣ်ဒီးတၢ်ထံၣ်လၢအဂ့ၤ ဒ်ယဟိဝၤယွၤအသိးဘၣ်. လၢတၢ်န့ၣ်အဃိ လီၤဂာ်ဒ်သိးတၢ်ခံး ကးဘၢဃာ် အဝဲသ့ၣ်အသးလီၤ. အဝဲသ့ၣ်အဲၣ်ဒိးသူဝဲ အတၢ်သဘျ့အသီအံၤ ဒ်သိးကမၤလၢပှဲၤ အနီၢ်ကစၢ်အတၢ်မိၣ်န့ၢ်သးလီအဂီၢ်လီၤ.—ဧ့ၤဘြံၤ ၃:၈-၁၀.
ပှၤအိၣ်လၢဃိာ်ပူၤတဖၣ်ဒၣ်လဲာ် အိၣ်ဒီးတၢ်သဘျ့သ့
၅. (က) ယဟိဝၤယွၤ အသးစီဆှံန့ၣ် ဟ့ၣ်ပှၤတၢ်သဘျ့ဒ်လဲၣ် တကလုာ်လဲၣ်. (ခ) ပှၤတဂၤမ့ၢ်ကဲကုၢ် မ့တမ့ၢ် မ့ၢ်အိၣ်လၢဃိာ်ပူၤသနာ်က့ အိၣ်ဒီးတၢ်သဘျ့လၢ ယဟိဝၤယွၤဟ့ၣ်ပှၤ တကလုာ်သ့န့ၣ် ပသ့ၣ်ညါဘၣ်ဒ်လဲၣ်. (ဂ) ပကတဲသကိး တၢ်သံကွၢ်မနုၤတဖၣ်လဲၣ်.
၅ တၢ်သဘျ့လၢ ပဒိးန့ၢ်ဘၣ်အီၤ ခီဖျိယွၤအသးစီဆှံန့ၣ် တမ့ၢ်ထဲအမၤပူၤဖျဲးထီၣ်ပှၤလၢ ကုၢ်အလီၢ်န့ၣ်ဘၣ်. ယဟိဝၤယွၤအသးစီဆှံန့ၣ် မၤပူၤဖျဲးထီၣ်ပှၤလၢ တၢ်ဒဲးဘးဒီးတၢ်သံအကုၢ် တကးဒံးဘၣ် မၤပူၤဖျဲးထီၣ်ပှၤလၢ တၢ်ဘူၣ်တၢ်ဘါလၢအကမၣ် ဒီးအလုၢ်အလၢ်တဖၣ်လီၤ. ပှၤဟီၣ်ခိၣ်ဖိတဖၣ် မၤဝဲဒ်အံၤတသ့နီတဂၤဘၣ်. (ရိမ့ၤ ၆:၂၃; ၈:၂) တၢ်အံၤမ့ၢ်ဝဲ တၢ်သဘျ့နီၢ်ကီၢ်န့ၣ်လီၤ. ပှၤလၢအဘၣ်ကဲကုၢ် ဒီးပှၤလၢအအိၣ်လၢ ဃိာ်ပူၤတဖၣ်ဒၣ်လဲာ် ဒိးန့ၢ်ဘၣ်တၢ်သဘျ့အံၤသ့ဝဲလီၤ. (၁ မိၤၡ့ ၃၉:၂၀-၂၃) ဒီပုၢ်ဝဲၢ်ခွါ ဟီဟဲ(န်) စၢၤ ဒီးပုၢ်ဝဲၢ်ခွါ ဟဲရိၤခ့ န့ၣ်ခီဖျိလၢအတၢ်နာ်အဃိ အဝဲသ့ၣ်ဘၣ်လီၤလၢဃိာ်ပူၤအါနံၣ် ဘၣ်ဆၣ်အဝဲသ့ၣ် အိၣ်ဒီးတၢ်သဘျ့ဒံးလီၤ. ဘၣ်ဃးဒီးအဝဲသ့ၣ် အတၢ်လဲၤခီဖျိအဂ့ၢ်န့ၣ် နနုာ်လီၤကွၢ်လၢ JW တၢ်ဂီၤမူအပူၤသ့လီၤ. (နုာ်လီၤကွၢ်လၢ တၢ်သံကွၢ်စံးဆၢ ဒီးတၢ်လဲၤခီဖျိတဖၣ် > လဲၤခီဖျိတၢ်မၤကွၢ်တဖၣ်) ပပာ်လုၢ်ပာ်ပှ့ၤ ပတၢ်သဘျ့န့ၣ် ပပာ်ဖျါထီၣ်ကသ့ဒ်လဲၣ်. ပသူပတၢ်သဘျ့လၢ တၢ်ကူၣ်သ့အပူၤကသ့ဒ်လဲၣ်. ခဲအံၤပကကွၢ်သကိး တၢ်သံကွၢ်ခံဖျၢၣ်အံၤ အတၢ်စံးဆၢလီၤ.
တၢ်သဘျ့လၢ ယွၤဟ့ၣ်ပှၤန့ၣ် အလုၢ်ဒိၣ်ပှ့ၤဒိၣ်ဒိၣ်မး
၆. ပှၤအံၣ်စရ့လးဖိတဖၣ်န့ၣ် ယဟိဝၤယွၤ ဟ့ၣ်အဝဲသ့ၣ်တၢ်သဘျ့သနာ်က့ အဝဲသ့ၣ်တအိၣ်ဒီး တၢ်စံးဘျုးစံးဖှိၣ်ဘၣ်န့ၣ် ပာ်ဖျါထီၣ်ဝဲလၢကျဲဒ်လဲၣ်.
၆ ဖဲပဒိးန့ၢ်ဘၣ်တၢ်ဟ့ၣ်လၢ အလုၢ်ဒိၣ်ပှ့ၤဒိၣ်အခါ ပစံးဘျုးစံးဖှိၣ် ပှၤလၢအဟ့ၣ်ပှၤတၢ်ဟ့ၣ်န့ၣ်လီၤ. ဘၣ်ဆၣ် ပှၤအံၣ်စရ့လးဖိတဖၣ်န့ၣ် ယဟိဝၤယွၤ ဟ့ၣ်အဝဲသ့ၣ်တၢ်သဘျ့သနာ်က့ အဝဲသ့ၣ်တစံးဘျုးစံးဖှိၣ် ယဟိဝၤယွၤဘၣ်. အဒိ, ယဟိဝၤယွၤ မၤပူၤဖျဲးထီၣ်အဝဲသ့ၣ်လၢ ကီၢ်အဲၤကူပတူးအပူၤ ထဲဒၣ်စှၤလါဝံၤအလီၢ်ခံ အဝဲသ့ၣ်သ့ၣ်နီၣ်ထီၣ်က့ၤ တၢ်အီၣ်တၢ်အီလၢညါတဖၣ်လီၤ. အဝဲသ့ၣ်ကဒူးကဒ့ၣ်တၢ် ဘၣ်ဃးဒီးကိၣ်မၤနၤ ဒီးတၢ်အီၣ်တၢ်အီလၢ ယဟိဝၤယွၤ ကတဲာ်ကတီၤန့ၢ်အဝဲသ့ၣ်န့ၣ်လီၤ. ဒီးအဝဲသ့ၣ်အဲၣ်ဒိးက့ၤကဒါက့ၤဆူ ကီၢ်အဲၤကူပတူးလီၤ. လၢအဝဲသ့ၣ်အဂီၢ် ‘ညၣ်, ဒံသၣ်, တဲၣ်တီသၣ်, ပကျၢဘိ, ပသၢသၣ်ဂီၤ ဒီးပသၢသၣ်ဝါ’ န့ၣ်အရ့ဒိၣ်န့ၢ်ဒံး တၢ်ဘူၣ်ထီၣ်ဘါထီၣ်ဘၣ် ယဟိဝၤယွၤလၢ တၢ်သဘျ့အပူၤန့ၣ်လီၤ. လၢတၢ်န့ၣ်အဃိ ယဟိဝၤယွၤသးထီၣ် အဝဲသ့ၣ်လီၤ. (၄ မိၤၡ့ ၁၁:၅, ၆, ၁၀; ၁၄:၃, ၄) ပဟံးန့ၢ်တၢ်မၤလိလၢ အဝဲသ့ၣ်အအိၣ်သ့ဝဲလီၤ.
၇. စီၤပီလူးမၤထွဲဝဲ အနီၢ်ကစၢ် အတၢ်ဟ့ၣ်ကူၣ်လၢ ၂ ကရံၣ်သူး ၆:၁ အပူၤန့ၣ်ဒ်လဲၣ် ဒီးပဝဲသ့ၣ်တဖၣ်စ့ၢ်ကီး ပမၤကသ့ဒ်လဲၣ်.
၇ စီၤပီလူးဟ့ၣ်ပလီၢ် ခရံာ်ဖိတဖၣ်လၢ ယဟိဝၤယွၤဟ့ၣ်ပှၤ တၢ်သဘျ့ခီဖျိလၢ အဖိခွါယ့ၣ်ၡူးခရံာ်အဃိ ပတဘၣ်သးပ့ၤနီၣ် အဘျုးအဖှိၣ်ဘၣ်. (ဖး ၂ ကရံၣ်သူး ၆:၁ တက့ၢ်.) စီၤပီလူးမ့ၢ်ဝဲ ပှၤတလၢတပှဲၤဘၣ် ဒီးတၢ်ဒဲးဘးဒီးတၢ်သံအကုၢ်အဃိ အဝဲကသးအုးဒိၣ်မးလီၤ. ဘၣ်ဆၣ် အဝဲတဲဝဲလၢ “ယစံးထီၣ်ပတြၢၤယွၤအဘျုးအဖှိၣ်လၢ ပကစၢ်ယ့ၣ်ၡူးခရံာ်အဃိလီၤ.” ဘၣ်မနုၤအဃိ အဝဲတဲဝဲဒ်အံၤလဲၣ်. စီၤပီလူးတဲနၢ်ပၢၢ်ဝဲ ခရံာ်ဖိလၢအပိာ်အခံတဖၣ်လၢ “သးအတၢ်သိၣ်တၢ်သီ ဘၣ်ဃးဒီးတၢ်မူလၢ ယ့ၣ်ၡူးခရံာ်အပူၤန့ၣ်, မၤထူၣ်ဖျဲးယၤလၢ တၢ်သိၣ်တၢ်သီဘၣ်ဃးဒီး တၢ်ဒဲးဘးဒီးတၢ်သံန့ၣ်လီၤ.” (ရိမ့ၤ ၇:၂၄, ၂၅; ၈:၂) ဒ်စီၤပီလူးအသိး ပကဘၣ်သ့ၣ်နီၣ်ထီၣ်လၢ ယဟိဝၤယွၤမၤထူၣ်ဖျဲးပှၤလၢ တၢ်ဒဲးဘးဒီးတၢ်သံအကုၢ်လီၤ. လၢတၢ်ပှ့ၤက့ၤအဃိ ပဘူၣ်ထီၣ်ဘါထီၣ် ကစၢ်ယွၤလၢ သးလၢအသ့ၣ်ညါဒၣ်တၢ်လၢ အကဆှီသ့ဝဲအဃိ ပသးခုဒိၣ်မးလီၤ.—စံးထီၣ်ပတြၢၤ ၄၀:၈.
မ့ၢ်နသူနတၢ်သဘျ့လၢ ကမၤယဟိဝၤယွၤအတၢ်မၤဧါ မ့တမ့ၢ် နကမၤဖဲနသးဧါ (ကွၢ်လံာ်အဆၢ ၈-၁၀)
၈, ၉. (က) တၢ်မၢဖိပ့းတရူး ဟ့ၣ်ပလီၢ်ပှၤလၢ ပကြၢးသူပတၢ်သဘျ့လၢကျဲဒ်လဲၣ်. (ခ) ပှၤတဂၤသူအတၢ်သဘျ့လၢ ကျဲလၢအကမၣ်သ့ဒ်လဲၣ်.
၈ ထဲပတဲလၢ ပစံးဘျုးစံးဖှိၣ်ယဟိဝၤယွၤန့ၣ် တလၢပှဲၤဒံးဘၣ်. ပကဘၣ်ပလီၢ်ပသးဒ်သိး ပသုတသူကမၣ်ဘၣ် ပတၢ်သဘျ့လၢ ယွၤဟ့ၣ်လီၤပှၤတဂ့ၤန့ၣ်လီၤ. အဒိ, တၢ်မၢဖိပ့းတရူး ဟ့ၣ်ပလီၢ်ပှၤလၢ ပတကြၢးသူပတၢ်သဘျ့အံၤ ဒ်သိးပကမၤတၢ်ကမၣ်အဂီၢ်ဘၣ်. (ဖး ၁ ပ့းတရူး ၂:၁၆ တက့ၢ်.) တၢ်ဟ့ၣ်ပလီၢ်အံၤ ဒုးသ့ၣ်နီၣ်ထီၣ်ပှၤဆၢကတီၢ်ဖဲ ပှၤအံၣ်စရ့လးဖိတဖၣ်အိၣ်လၢ ပှၢ်မုၢ်ကနၢအခါန့ၣ်လီၤ. မုၢ်မဆါတနံၤအံၤစ့ၢ်ကီး ပဝဲသ့ၣ်တဖၣ် ပလိၣ်ဘၣ်တၢ်ဟ့ၣ်ပလီၢ်အံၤဒိၣ်န့ၢ် ပှၤအံၣ်စရ့လးဖိလၢညါတဖၣ်လီၤ. မုၣ်ကီၤလံၢ် ဒီးဟီၣ်ခိၣ်လၢအပၢဝဲအံၤ ထုးထီၣ်ဝဲတၢ်ကူတၢ်ကၤ, တၢ်အီၣ်တၢ်အီ ဒီးတၢ်မၤမုာ်မၤဖှံသးလၢ အထုးန့ၢ်ပသးအါမးလီၤ. တကးဒံးဘၣ် တၢ်လၢပဆိကမိၣ်လၢ ပတလိၣ်ဘၣ်တဖၣ်ဒၣ်လဲာ် အဝဲသ့ၣ်သူဝဲ ပှၤလၢအဒိၣ်တၢ်ဂ့ၤတဖၣ် လၢကဘိးဘၣ်ရၤလီၤတၢ် ဒ်သိးပကပှ့ၤအတၢ်ဖိတၢ်လံၤအဂီၢ်လီၤ. လၢတၢ်န့ၣ်အဃိ ပသူကမၣ် ပတၢ်သဘျ့သ့ဝဲညီညီဖိလီၤ.
၉ စီၤပ့းတရူး အတၢ်ဟ့ၣ်ကူၣ်န့ၣ် ဘၣ်ထွဲလိာ်အသးဒီး တၢ်ဃုထၢလၢအရ့ဒိၣ်လၢ ပတၢ်အိၣ်မူအပူၤဒ်သိးဒီး တၢ်ဃုတၢ်ကူၣ်ဘၣ်ကူၣ်သ့ ဒီးတၢ်ဖံးတၢ်မၤစ့ၢ်ကီးလီၤ. အဒိ, မုၢ်မဆါတနံၤအံၤ ပှၤသးစၢ်တဖၣ် ဘၣ်တၢ်ဆီၣ်သနံးအီၤလၢ ကဂုာ်ကျဲးစၢးဆူၣ်ဆူၣ် ဒ်သိးကထီၣ်ဘၣ် ဖၠၣ်စိမိၤလၢအဂ့ၤကတၢၢ်အဂီၢ်လီၤ. ပှၤအါဂၤန့ၣ်တဲဝဲလၢ အဝဲသ့ၣ်မ့ၢ်အိၣ်ဒီး တၢ်ကူၣ်ဘၣ်ကူၣ်သ့လၢ အပတီၢ်ထီမး ကဒိးန့ၢ်ဘၣ်တၢ်မၤလၢအဂ့ၤ, ကန့ၢ်ဘၣ်ကျိၣ်စ့အါအါ ဒီးပှၤကပာ်ကဲအဝဲသ့ၣ်လီၤ. ဒီးဘၣ်သ့ၣ်သ့ၣ် ပှၤကဒုးနဲၣ်အဝဲသ့ၣ် တၢ်အုၣ်သးလၢ ပှၤလၢအဖျိထီၣ် ဖၠၣ်စိမိၤတဖၣ် မၤတၢ်န့ၢ်စ့အါန့ၢ်ဒံး ပှၤလၢအဖျိထီၣ်တီၤထီကၠိန့ၣ်လီၤ. တၢ်ကူၣ်ဘၣ်ကူၣ်သ့လၢ အပတီၢ်ထီန့ၣ် ဘၣ်သ့ၣ်သ့ၣ် ကဖျါလၢအမ့ၢ်တၢ်အဂ့ၤလၢ ပှၤသးစၢ်တဖၣ်အဂီၢ်လီၤ. လၢတၢ်န့ၣ်အဃိ ဖဲပှၤသးစၢ်တဖၣ် ကဘၣ်ဆၢတဲာ်တၢ် လၢအတၢ်အိၣ်မူအဂီၢ်အခါ တၢ်ဂ့ၢ်တဖၣ်အံၤ ကကဲထီၣ်တၢ်လ့ပစီလၢ အဝဲသ့ၣ်အဂီၢ်လီၤ. ဘၣ်ဆၣ် ပှၤသးစၢ်ဒီးအမိၢ်အပၢ်တဖၣ် ကြၢးသ့ၣ်နီၣ်ထီၣ် တၢ်မနုၤလဲၣ်.
၁၀. ပအိၣ်ဒီးတၢ်သဘျ့လၢ ပကမၤတၢ်ဆၢတဲာ်လၢ ပနီၢ်ကစၢ်တၢ်ဂ့ၢ်အဂီၢ်သနာ်က့ ပကဘၣ်သ့ၣ်နီၣ်ထီၣ်တၢ်မနုၤလဲၣ်.
၁၀ ပှၤတနီၤနီၤဆိကမိၣ်ဝဲလၢ တၢ်ဂ့ၢ်သ့ၣ်တဖၣ်အံၤ မ့ၢ်ဝဲအနီၢ်ကစၢ်အတၢ်ဂ့ၢ်အဃိ အဝဲသ့ၣ်အသးလၢအသ့ၣ်ညါဒၣ်တၢ် မ့ၢ်တမၤတံာ်တာ်အီၤဘၣ်န့ၣ် အဝဲသ့ၣ်အိၣ်ဒီးတၢ်သဘျ့လၢ ကဃုထၢတၢ်ဖဲအသးလီၤ. ဘၣ်သ့ၣ်သ့ၣ် အဝဲသ့ၣ် ကဆိကမိၣ်ဝဲ စီၤပီလူးအတၢ်ကတိၤလၢအမ့ၢ် “ဘၣ်မနုၤအဃိ ယတၢ်သဘျ့လၢ ယကမၤတၢ်တမံၤမံၤန့ၣ် ဘၣ်တၢ်မၤတံာ်တာ်အီၤလၢ ပှၤအဂၤတဂၤအသးလၢ အသ့ၣ်ညါဒၣ်တၢ်န့ၣ်လဲၣ်.” (၁ ကရံၣ်သူး ၁၀:၂၉, ခ့ခါစှီၤကျိာ်) ပအိၣ်ဒီးတၢ်သဘျ့လၢ ပကဃုထၢ တၢ်ကူၣ်ဘၣ်ကူၣ်သ့ ဒီးတၢ်ဖံးအီၣ်မၤအီၣ်အဂီၢ်သနာ်က့ ပကဘၣ်သ့ၣ်နီၣ်ထီၣ်လၢ ပတအိၣ်ဒီးတၢ်သဘျ့လၢာ်လၢာ်စ့စ့ဘၣ် ဒီးပတၢ်ဆၢတဲာ်န့ၣ် ကဲဘျုးဝဲ မ့တမ့ၢ် မၤဘၣ်ဒိပှၤသ့ဝဲလီၤ. လၢတၢ်န့ၣ်အဃိ စီၤပီလူးတဲဝဲလၢ “တၢ်ခဲလၢာ်မ့ၢ်အတီအလိၤ, ဘၣ်ဆၣ်ဒီး, တၢ်ခဲလၢာ်တမၤအါထီၣ် တၢ်ဘျုးတၢ်ဖှိၣ်ဘၣ်. တၢ်ခဲလၢာ်မ့ၢ်အတီအလိၤဘၣ်ဆၣ်ဒီး, တၢ်ခဲလၢာ်တမၤထီၣ်မၤထီဘၣ်တၢ်ဘၣ်.” (၁ ကရံၣ်သူး ၁၀:၂၃) ပအိၣ်ဒီးတၢ်သဘျ့လၢ ပကဆၢတဲာ်တၢ်ဘၣ်ဃးဒီး ပနီၢ်ကစၢ်တၢ်ဂ့ၢ်သနာ်က့ ပကဘၣ်သ့ၣ်နီၣ်ထီၣ်လၢ ပနီၢ်ကစၢ်အတၢ်ဘၣ်သးန့ၣ် တမ့ၢ်တၢ်လၢအရ့ဒိၣ်ကတၢၢ်ဘၣ်.
ဖဲပမၤယဟိဝၤယွၤ အတၢ်မၤအခါ မ့ၢ်ဝဲပသူ ပတၢ်သဘျ့လၢ တၢ်ကူၣ်သ့အပူၤ
၁၁. ဘၣ်မနုၤအဃိ ယဟိဝၤယွၤ မၤထူၣ်ဖျဲးပှၤလဲၣ်.
၁၁ ဖဲစီၤပ့းတရူးဟ့ၣ်ပလီၢ်ပှၤလၢ ပတဘၣ်သူပတၢ်သဘျ့လၢ ကျဲလၢအကမၣ်အခါ အဝဲတဲဖျါထီၣ်စ့ၢ်ကီးဝဲလၢ “ဒ်ယွၤအခ့အပှၤအသိး” ပကြၢးသူပတၢ်သဘျ့ လၢယွၤအဂီၢ်လီၤ. ယဟိဝၤယွၤအဲၣ်ဒိးလၢ ပကမၤအတၢ်မၤလၢ ပတၢ်အိၣ်မူတစိၤသးအဃိ အဝဲသူဝဲအဖိခွါယ့ၣ်ၡူး ဒ်သိးကမၤထူၣ်ဖျဲးထီၣ်ပှၤလၢ တၢ်ဒဲးဘးဒီးတၢ်သံအကုၢ်န့ၣ်လီၤ.
ပမ့ၢ်သူပတၢ်ဆၢကတီၢ် ဒီးပဂံၢ်ပဘါလၢ ကမၤယဟိဝၤယွၤအတၢ်မၤ လၢလၢပှဲၤပှဲၤန့ၣ် မ့ၢ်ဝဲပသူပတၢ်သဘျ့လၢ ကျဲလၢအဂ့ၤကတၢၢ်လီၤ
၁၂. စီၤနိအၤဒီးအဟံၣ်ဖိဃီဖိန့ၣ် ပာ်လီၤဝဲဒိတဲာ်လၢပဂီၢ်ဒ်လဲၣ်.
၁၂ ပမ့ၢ်သူပတၢ်ဆၢကတီၢ် ဒီးပဂံၢ်ပဘါလၢ ကမၤယဟိဝၤယွၤအတၢ်မၤ လၢလၢပှဲၤပှဲၤအဂီၢ်န့ၣ် မ့ၢ်ဝဲပသူပတၢ်သဘျ့လၢ ကျဲလၢအဂ့ၤကတၢၢ်လီၤ. ပမ့ၢ်မၤဒ်အံၤန့ၣ် ကမၤစၢၤပှၤဒ်သိး ပသုတအိၣ်ဒီးဖီတၢၣ်ဒ် ပှၤတၢ်ချၢအသိး ဒီးဒ်သိးပနီၢ်ကစၢ် အတၢ်မိၣ်န့ၢ်သးလီ သုတကဲထီၣ် တၢ်အရ့ဒိၣ်ကတၢၢ်လၢ ပဂီၢ်တဂ့ၤန့ၣ်လီၤ. (ကလၤတံ ၅:၁၆) ဆိကမိၣ်ကွၢ် စီၤနိအၤဒီးအဟံၣ်ဖိဃီဖိအဂ့ၢ်တက့ၢ်. အဝဲသ့ၣ်အိၣ်မူဘၣ်လၢ ပှၤအၢပှၤသီ ဒီးပှၤမၤကမၣ်မုၣ်ကမၣ်ခွါတဖၣ်အကျါလီၤ. ဘၣ်ဆၣ် အဝဲသ့ၣ်တမၤဝဲဒ် ပှၤလၢအခိၣ်အဃၢၤတဖၣ် မၤဝဲအသိးဘၣ်. အဝဲသ့ၣ်ဃုထၢဝဲလၢ ကဂုာ်ကျဲးစၢးမၤတၢ်လၢ ယဟိဝၤယွၤမၢအဝဲသ့ၣ်န့ၣ်လီၤ. အဝဲသ့ၣ်တ့ထီၣ်ကဘီ, ပာ်ဖှိၣ်တၢ်အီၣ်တၢ်အီလၢ အနီၢ်ကစၢ်ဒီးဆၣ်ဖိကီၢ်ဖိအဂီၢ် ဒီးဟ့ၣ်ပလီၢ်ပှၤဂၤလၢ ထံကလုၢ်ဘၢတၢ်အဂ့ၢ်လီၤ. လံာ်စီဆှံတဲဝဲလၢ “စီၤနိအၤမၤဝဲ, ဒ်ကယဲၢ်တၢ်လၢ ယွၤမၤလိာ်အီၤအသိးန့ၣ် မၤဝဲဒ်န့ၣ်အသိးလီၤ.” (၁ မိၤၡ့ ၆:၂၂) လၢတၢ်န့ၣ်အဃိ စီၤနိအၤဒီးအဟံၣ်ဖိဃီဖိ ပူၤဖျဲးဝဲလီၤ.—ဧ့ၤဘြံၤ ၁၁:၇.
၁၃. ယဟိဝၤယွၤ မၢပမၤတၢ်မနုၤလဲၣ်.
၁၃ မုၢ်မဆါတနံၤအံၤ ယဟိဝၤယွၤမၢ ပမၤတၢ်မနုၤလဲၣ်. ဒ်ယ့ၣ်ၡူးအပျဲၢ်အဘီၣ်တဖၣ်အသိး ပသ့ၣ်ညါလၢ ကစၢ်ယွၤမၤလိာ်ပှၤလၢ ပကစံၣ်တဲၤတဲလီၤတၢ်လီၤ. (ဖး လူၤကၣ် ၄:၁၈, ၁၉ တက့ၢ်.) မုၢ်မဆါတနံၤအံၤ မုၣ်ကီၤလံၢ် မၤခံးပှၤအါဂၤအမဲာ်အဃိ အဝဲသ့ၣ်တသ့ၣ်ညါလီၤအသးလၢ အကဲဝဲတၢ်ဘူၣ်တၢ်ဘါလၢ အကမၣ်, တၢ်ထူးတၢ်တီၤ ဒီးထံဂ့ၢ်ကီၢ်ဂ့ၢ်အကုၢ်ဘၣ်. (၂ ကရံၣ်သူး ၄:၄) ဒ်ယ့ၣ်ၡူးအသိး ပအိၣ်ဒီးတၢ်ခွဲးတၢ်ယာ်လၢ ပကမၤစၢၤပှၤဂၤဒ်သိး အဝဲသ့ၣ်ကသ့ၣ်ညါ ဒီးဘူၣ်ထီၣ်ဘါထီၣ် ယဟိဝၤလၢအမ့ၢ် တၢ်သဘျ့နီၢ်ကီၢ်အယွၤန့ၣ်လီၤ. (မးသဲ ၂၈:၁၉, ၂၀) ပကစံၣ်တဲၤတဲလီၤပှၤဂၤန့ၣ် တညီဘၣ်. လၢတၢ်လီၢ်တနီၤနီၤန့ၣ် ပှၤတနီၤနီၤတအဲၣ်ဒိးသ့ၣ်ညါ ကစၢ်ယွၤအဂ့ၢ်ဘၣ်အဃိ ဖဲပလဲၤစံၣ်တဲၤတဲလီၤတၢ်အခါ အဝဲသ့ၣ်အသးထီၣ်ပှၤလီၤ. ဘၣ်ဆၣ် ယဟိဝၤယွၤ မၢပစံၣ်တဲၤတဲလီၤတၢ်အဃိ ပကြၢးသံကွၢ်လီၤပသးလၢ ‘မ့ၢ်ယသူယတၢ်သဘျ့အံၤ ဒ်သိးယမၤအါထီၣ် ယဟိဝၤယွၤအတၢ်မၤကသ့ဧါ.’
၁၄, ၁၅. ယဟိဝၤယွၤ အခ့အပှၤအါဂၤန့ၣ် ဆၢတဲာ်လီၤအသးလၢ ကမၤတၢ်မနုၤလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
၁၄ ပသးခုဒိၣ်မးလၢ ယဟိဝၤယွၤ အခ့အပှၤအါဂၤ သ့ၣ်ညါဝဲလၢ တၢ်အကတၢၢ်ဘူးထီၣ်ဝဲဒိၣ်မးအဃိ အဝဲသ့ၣ်ဆၢတဲာ်လီၤအသးလၢ ကအိၣ်မူက့ၤယိယိဖိ ဒီးစးထီၣ်မၤပှၤလဲၤလၢညါလီၤ. (၁ ကရံၣ်သူး ၉:၁၉, ၂၃) ပှၤတနီၤန့ၣ် မၤဝဲပှၤလဲၤလၢညါလၢ အဝဲသ့ၣ်အိၣ်တၢ်အလီၢ် ဒီးအဂၤတနီၤန့ၣ် လဲၤသုးအသးလၢ တၢ်အိၣ်ဖှိၣ်လၢ ပှၤလိၣ်ဘၣ်တၢ်မၤစၢၤန့ၣ်လီၤ. လၢအပူၤကွံာ်ယဲၢ်နံၣ်အတီၢ်ပူၤန့ၣ် ပှၤမၤပှၤလဲၤလၢညါအိၣ်ဝဲအဂၤ ၂၅၀,၀၀၀ ဘျဲၣ်ဒီးခဲအံၤ ပှၤမၤပှၤလဲၤလၢညါအိၣ်ဝဲအဂၤ ၁,၁၀၀,၀၀၀ ဘျဲၣ်န့ၣ်လီၤ. ပှၤသ့ၣ်တဖၣ်အံၤ သူဝဲအတၢ်သဘျ့လၢ ကမၤယဟိဝၤယွၤ အတၢ်မၤဒ်အံၤအဃိ လီၤသးခုဒိၣ်မးလီၤ.—စံးထီၣ်ပတြၢၤ ၁၁၀:၃.
၁၅ ဒ်သိးပှၤသ့ၣ်တဖၣ်အံၤ ကသူအတၢ်သဘျ့လၢ တၢ်ကူၣ်သ့အပူၤအဂီၢ် တၢ်မနုၤမၤစၢၤအဝဲသ့ၣ်လဲၣ်. ဆိကမိၣ်ကွၢ် ကၠီ(န်) ဒီးကၠူဒံၣ် လၢအလဲၤမၤကစၢ်ယွၤအတၢ်မၤလၢ ထံကီၢ်အဂၤန့ၢ်ဝဲအနံၣ် ၃၀ အဂ့ၢ်တက့ၢ်. အဝဲသ့ၣ်တဲဝဲလၢ ဖဲ ၁၉၇၇ န့ၣ်ပှၤဒုးအိၣ်ထီၣ်ဝဲ ပှၤလဲၤလၢညါအကၠိလီၤ. ဒီးကၠိဖိတဖၣ် ဘၣ်တၢ်ဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကလဲၤသုးအသးလၢ တၢ်လီၢ်လၢအလိၣ်ဘၣ် တၢ်မၤစၢၤန့ၣ်လီၤ. ဒ်သိး ကၠီ(န်) ဒီးကၠူဒံၣ် ကတုၤလၢအဖီတၢၣ်အဂီၢ် အဝဲသ့ၣ်ဘၣ်အိၣ်မူက့ၤ တၢ်အိၣ်မူယိယိဖိလီၤ. လၢတၢ်န့ၣ်အဃိ ကၠီ(န်) ဘၣ်ဆီတလဲအတၢ်မၤတဖၣ်လီၤ. လၢခံအဝဲသ့ၣ် လဲၤစံၣ်တဲၤတဲလီၤတၢ်လၢ ထံကီၢ်အဂၤလီၤ. အဝဲသ့ၣ်ဘၣ်မၤလိ ကျိာ်အသီ, တၢ်ဆဲးတၢ်လၤအသီ ဒီးတၢ်ကိၢ်တၢ်ခုၣ် တဒ်သိးလိာ်အသးဘၣ်. ဘၣ်ဆၣ် ဒ်သိးအဝဲသ့ၣ်လဲၤခီဖျိဝဲ တၢ်ကီတၢ်ခဲတဖၣ်အံၤကန့ၢ်အဂီၢ် တၢ်မနုၤမၤစၢၤအဝဲသ့ၣ်လဲၣ်. အဝဲသ့ၣ်ဃ့ဘါထုကဖၣ်လၢ ယဟိဝၤယွၤအအိၣ် ဒီးနာ်ဝဲလၢယဟိဝၤယွၤ ကမၤစၢၤအီၤလီၤ. အဝဲသ့ၣ်မၤဘၣ် ယဟိဝၤယွၤအတၢ်မၤန့ၢ်အနံၣ် ထဲထဲအံၤအဃိ အဝဲသ့ၣ်တူၢ်ဘၣ်ဝဲဒ်လဲၣ်. ကၠီ(န်) တဲဝဲလၢ “ယတူၢ်ဘၣ်လၢ ယဟ့ၣ်လီၤယသးလၢာ်လၢာ်ဆ့ဆ့လၢ တၢ်မၤလၢအဂ့ၤကတၢၢ်အံၤအဂီၢ်လီၤ. လၢယဂီၢ်န့ၣ် ယဟိဝၤယွၤ လီၤဂာ်ဒ်ပၢ်နီၢ်ကီၢ်တဂၤလၢ အအိၣ်ဒီးတၢ်အဲၣ်တၢ်ကွံန့ၣ်လီၤ. ခဲအံၤယနၢ်ပၢၢ်ထီၣ် ယၤကိာ် ၄:၈ အခီပညီ လၢအတဲဝဲ ‘သုးဘူးနသးဆူယွၤအအိၣ် ဒီးအဝဲကသုးဘူးအသးဆူနအိၣ်လီၤ.’ တၢ်အိၣ်မူလၢအပှဲၤဒီး တၢ်သူၣ်မံသးမုာ်န့ၣ် ယထံၣ်န့ၢ်အီၤလံ.”
၁၆. ပှၤလၢအကထိတဖၣ်န့ၣ် သူဝဲအတၢ်သဘျ့လၢ တၢ်ကူၣ်သ့အပူၤဒ်လဲၣ်.
၁၆ ဒ်ကၠီ(န်) ဒီးကၠူဒံၣ် အသိး ပှၤတနီၤနီၤန့ၣ် မၤဝဲပှၤလဲၤလၢညါန့ၢ် အနံၣ်ဖးယံာ်လီၤ. ဘၣ်ဆၣ် တနီၤနီၤန့ၣ် ခီဖျိလၢ အဝဲသ့ၣ် အတၢ်အိၣ်သးအဃိ မၤဝဲပှၤလဲၤလၢညါသ့ဒၣ်ထဲ တစိၢ်တလီၢ်လီၤ. ပှၤအါဂၤန့ၣ် လဲၤမၤစၢၤတၢ်လၢ တၢ်သူၣ်ထီၣ်ဘှီထီၣ် တၢ်မၤန့ၣ်လီၤ. အဒိ, ဒီပုၢ်ဝဲၢ်မုၣ်ခွါအဂၤ ၂၇,၀၀၀ ဃၣ်ဃၣ်န့ၣ် လဲၤမၤစၢၤတၢ်လၢ တၢ်သူၣ်ထီၣ်ဝဲၤလီၢ်ခိၣ်သ့ၣ် လၢဝီဝံး(ခ်) နူယီးလီၤ. တနီၤန့ၣ်လဲၤမၤစၢၤတၢ်ခံနွံ, တနီၤန့ၣ် စှၤကိာ်လါ ဒီးတနီၤန့ၣ် ယံာ်လၢအနံၣ် မ့တမ့ၢ် အါန့ၢ်အန့ၣ်လီၤ. ဒီပုၢ်ဝဲၢ်မုၣ်ခွါအါမးန့ၣ် ဒ်သိးကဟဲမၤစၢၤဘၣ်တၢ်လၢ ဝီဝံး(ခ်)အဂီၢ် အဝဲသ့ၣ်ဘၣ်တူၢ်ဆါအသးအါမးလီၤ. အဝဲသ့ၣ်မ့ၢ်ပှၤဒိဂ့ၤတဲာ်ဘၣ်လၢ အသူအတၢ်သဘျ့လၢ ကစံးထီၣ်ပတြၢၤ ဒီးမၤလၤကပီၤ ယဟိဝၤယွၤ လၢအမ့ၢ်တၢ်သဘျ့အယွၤလီၤ.
၁၇. ပမ့ၢ်သူပတၢ်သဘျ့လၢ တၢ်ကူၣ်သ့အပူၤန့ၣ် ပအိၣ်ခိးကွၢ်လၢ် တၢ်မနုၤသ့ဝဲလဲၣ်.
၁၇ ပသ့ၣ်ညါထီၣ် ယဟိဝၤယွၤ ဒီးပဘူၣ်ထီၣ်ဘါထီၣ်ဘၣ်အီၤလၢ တၢ်သဘျ့အပူၤအဃိ ပစံးဘျုးစံးဖှိၣ်အီၤဒိၣ်မးလီၤ. ပပာ်လုၢ်ပာ်ပှ့ၤပတၢ်သဘျ့န့ၣ် မ်ပပာ်ဖျါထီၣ်အီၤခီဖျိ ပတၢ်ဃုထၢတဖၣ်တက့ၢ်. လၢပကသူကမၣ်ပတၢ်သဘျ့အလီၢ် မ်ပကသူအီၤလၢပကမၤအါထီၣ် ယဟိဝၤယွၤအတၢ်မၤတက့ၢ်. ပမ့ၢ်မၤဒ်န့ၣ်န့ၣ် ပအိၣ်ခိးကွၢ်လၢ် တၢ်ဆိၣ်ဂ့ၤလၢ ယဟိဝၤယွၤအၢၣ်လီၤဝဲလၢ “တၢ်ဘၣ်တ့ဒၣ်လဲာ်န့ၣ် ကထူၣ်ဖျဲးဒီး တၢ်အုၣ်တၢ်ကျၣ်အတၢ်ကဲကုၢ်, ဒီးကလဲၤနုာ်ဆူယွၤအဖိတဖၣ် အတၢ်ထူၣ်ဖျဲးအလၤကပီၤအပူၤ” သ့ဝဲလီၤ.—ရိမ့ၤ ၈:၂၁.
