တၢ်မၤလိ ၁၅
ပပာ်ပသးမုာ်မုာ်ခုၣ်ခုၣ်သ့ ခီဖျိပကွၢ်လိမၤဒိးယ့ၣ်ၡူး
“ယွၤအတၢ်ဃူတၢ်ဖိးလၢ အဒိၣ်န့ၢ်ယိာ်န့ၢ်ကယဲၢ်ပသ့ၣ်ညါ နၢ်ပၢၢ်တၢ်န့ၣ်ကပၢၤ သုသူၣ်သုသး” လီၤ.—ဖံလံးပံၤ ၄:၇.
တၢ်သးဝံၣ် ၁၁၃ တၢ်ဃူတၢ်ဖိးလၢ အိၣ်ဒီးပှၤ
တၢ်မၤလိအံၤ အတၢ်တိာ်ပာ် *
၁-၂. ဘၣ်မနုၤအဃိ ယ့ၣ်ၡူးအသူၣ်ကိၢ်သးဂီၤလဲၣ်.
ဖဲယ့ၣ်ၡူးတချုးသံအနံၤန့ၣ် အဝဲသူၣ်ကိၢ်သးဂီၤတၢ်ဒိၣ်မးလီၤ. တယံာ်လၢၤဘၣ်န့ၣ် ပှၤအၢပှၤသီတဖၣ် ကမၤသံအီၤလီၤ. ဘၣ်ဆၣ် တမ့ၢ်ထဲယ့ၣ်ၡူးသူၣ်ကိၢ်သးဂီၤတၢ် ခီဖျိလၢအကသံအဃိန့ၣ်ဘၣ်. အဝဲအဲၣ်အပၢ်ဒိၣ်မး ဒီးအဲၣ်ဒိးမၤ အပၢ်အတၢ်ဘၣ်သးလီၤ. ယ့ၣ်ၡူးသ့ၣ်ညါဝဲလၢ အဝဲလဲၤခီဖျိဝဲ တၢ်ကီတၢ်ခဲဖးဒိၣ်အံၤ လၢတၢ်သးတီအပူၤ မ့ၢ်န့ၢ်န့ၣ် ယဟိဝၤယွၤအမံၤ ကဘၣ်တၢ်မၤလၤကပီၤအီၤလီၤ. ယ့ၣ်ၡူးအဲၣ်စ့ၢ်ကီး ပှၤဟီၣ်ခိၣ်ဖိ ဒီးအဝဲသ့ၣ်ညါဝဲလၢ အမ့ၢ်တီဒီးယဟိဝၤယွၤ တုၤလၢအကတၢၢ်မး ပှၤဟီၣ်ခိၣ်ဖိတဖၣ် ကအိၣ်ဒီးတၢ်မုၢ်လၢ်လၢ ကဒိးန့ၢ်ဘၣ် တၢ်မူအထူအယိာ်လီၤ.
၂ ယ့ၣ်ၡူးအသူၣ်ကိၢ်သးဂီၤ ဒိၣ်မးဘၣ်ဆၣ် အဝဲပာ်အသးမုာ်မုာ်ခုၣ်ခုၣ်သ့ဝဲလီၤ. အဝဲတဲ အတၢ်မၢဖိတဖၣ်လၢ “ယတၢ်ဃူတၢ်ဖိးန့ၣ်, ယဟ့ၣ်လီၤသုလီၤ.” (ယိၤဟၣ် ၁၄:၂၇) အဝဲအိၣ်ဒီး “ယွၤအတၢ်ဃူတၢ်ဖိး” လၢအမ့ၢ် တၢ်မုာ်တၢ်ခုၣ် လၢအဟဲကဲထီၣ်အသး ခီဖျိလၢ တၢ်ရ့လိာ်သးဒီးယဟိဝၤယွၤန့ၣ်လီၤ. လၢတၢ်န့ၣ်အဃိ ယ့ၣ်ၡူးပာ်အသး မုာ်မုာ်ခုၣ်ခုၣ်သ့ဝဲလီၤ.—ဖံလံးပံၤ ၄:၆, ၇.
၃. လၢတၢ်မၤလိအံၤအပူၤ ပကမၤလိသကိး တၢ်ဂ့ၢ်မနုၤလဲၣ်.
၃ ပဝဲသ့ၣ်တဖၣ်န့ၣ် ပတထံၣ်ဘၣ် တၢ်မၤကွၢ်ထဲသိးဒီးယ့ၣ်ၡူး နီတဂၤဘၣ်. ဘၣ်ဆၣ် ပှၤလၢအပိာ်ယ့ၣ်ၡူးအခံခဲလၢာ်န့ၣ် ကထံၣ်ဘၣ် တၢ်မၤကွၢ်တဖၣ်လီၤ. (မးသဲ ၁၆:၂၄, ၂၅; ယိၤဟၣ် ၁၅:၂၀) လၢတၢ်န့ၣ်အဃိ တဘျီတခီၣ် ပကတူၢ်ဘၣ် တၢ်သူၣ်ကိၢ်သးဂီၤဒ် ယ့ၣ်ၡူးအသိးလီၤ. ဒ်သိးပသုတဘၣ်ယိၣ်တၢ် အါတလၢတဂ့ၤ ဒီးပပာ်ပသးမုာ်မုာ်ခုၣ်ခုၣ် ကသ့ထီဘိအဂီၢ် ပမၤကသ့ဒ်လဲၣ်. ပကမၤလိသကိး တၢ်ဂ့ၢ်သၢမံၤလၢ ယ့ၣ်ၡူးမၤဝဲ ဖဲအမၤကစၢ်ယွၤအတၢ်မၤလၢ ဟီၣ်ခိၣ်ချၢအဆၢကတီၢ် ဒီးဖဲပထံၣ်ဘၣ် တၢ်မၤကွၢ်တဖၣ်အခါ ပကွၢ်လိမၤဒိးယ့ၣ်ၡူး ကသ့ဒ်လဲၣ်န့ၣ်လီၤ.
ယ့ၣ်ၡူး ဆဲးဃ့ဘါထုကဖၣ်
ပဆဲး ပာ်ပသးမုာ်မုာ်ခုၣ်ခုၣ် သ့ခီဖျိ ပဃ့ထုကဖၣ် (ကွၢ်လံာ်အဆၢ ၄-၇)
၄. ဆိကမိၣ်ထံ ၁ သ့းစၤလနံ ၅:၁၇ ဒီးတဲဖျါထီၣ် တၢ်အဒိတနီၤလၢ ဘၣ်ဃးဒီး ဖဲယ့ၣ်ၡူးကသံအနံၤန့ၣ် အဝဲဃ့ဘါထုကဖၣ်တၢ် အါဘျီအဂ့ၢ်န့ၣ်တက့ၢ်.
၄ ဖး ၁ သ့းစၤလနံ ၅:၁၇ တက့ၢ်. ဖဲယ့ၣ်ၡူးကသံအနံၤန့ၣ် အဝဲဃ့ဘါထုကဖၣ်ဝဲ တလီၢ်လီၢ်လီၤ. ဖဲအဝဲဒုးအိၣ်ထီၣ် အတၢ်သံအတၢ်သ့ၣ်နီၣ်ထီၣ်က့ၤ အမူးအခါ အဝဲဃ့ဘါထုကဖၣ်တၢ်လၢ ကိၣ်ဒီးစပံးထံအဂီၢ်လီၤ. (၁ ကရံၣ်သူး ၁၁:၂၃-၂၅) ဒီးတချုးလၢ ယ့ၣ်ၡူးဟးထီၣ်လၢ အမၤဝဲဘူၣ်လဲၤကပာ်အလီၢ်ဒံးဘၣ်န့ၣ် အဝဲဃ့ဘါထုကဖၣ်တၢ် ဒီးအပျဲၢ်အဘီၣ်တဖၣ်လီၤ. (ယိၤဟၣ် ၁၇:၁-၂၆) ဒီးဖဲအဝဲသ့ၣ် လဲၤထီၣ်တုၤလၢ ကစၢၢ်သ့ၣ်စၤယံးအခါ အဝဲဃ့ဘါထုကဖၣ်တၢ် အါဘျီလီၤ. (မးသဲ ၂၆:၃၆-၃၉, ၄၂, ၄၄) ဒီးဖဲအဝဲ ဘူးထီၣ်ကသံအခါ အတၢ်ကတိၤလၢ အလီၢ်ခံကတၢၢ်တဖၣ်န့ၣ် တဲဖျါထီၣ်ဝဲ ခီဖျိလၢတၢ်ထုကဖၣ်အပူၤလီၤ. (လူၤကၣ် ၂၃:၄၆) တချုးဖဲယ့ၣ်ၡူးသံ အနံၤန့ၣ် အဝဲဃ့ဘါထုကဖၣ်ဆူ ယဟိဝၤယွၤအအိၣ် ဘၣ်ဃးဒီး တၢ်ကိးမံၤဒဲးလၢ အကဲထီၣ်အသးဒီးအီၤ ဖဲနံၤအဝဲန့ၣ်န့ၣ်လီၤ.
၅. ဘၣ်မနုၤအဃိ တၢ်မၢဖိတဖၣ်န့ၣ် တအိၣ်ဒီးတၢ်သူၣ်ဒူသးဒူ လၢလၢပှဲၤပှဲၤဘၣ်လဲၣ်.
၅ ဖဲယ့ၣ်ၡူးထံၣ်ဘၣ် တၢ်မၤကွၢ်အခါ ခီဖျိလၢအဝဲ ဃ့ဘါထုကဖၣ်ဒီး သန့ၤအသးလၢ အပၢ်အအိၣ်အဃိ အဝဲအိၣ်ဒီးတၢ်တူၢ်န့ၢ်ခီၣ်ကဲလီၤ. ဘၣ်ဆၣ် ဖဲနၤအဝဲန့ၣ်န့ၣ် ယ့ၣ်ၡူးအတၢ်မၢဖိတဖၣ် တဃ့ဘါထုကဖၣ် လၢတၢ်သးဆူၣ်အပူၤဘၣ်. လၢတၢ်န့ၣ်အဃိ ဖဲအဝဲသ့ၣ်ထံၣ်ဘၣ် တၢ်မၤကွၢ်အခါ အဝဲသ့ၣ်တအိၣ်ဒီး တၢ်သူၣ်ဒူသးဒူ လၢလၢပှဲၤပှဲၤဘၣ်. (မးသဲ ၂၆:၄၀, ၄၁, ၄၃, ၄၅, ၅၆) ဖဲပထံၣ်ဘၣ်ဒီး တၢ်မၤကွၢ်တဖၣ်အခါ ပအိၣ်ဒီးတၢ်သးတီ သ့ထဲလၢ ပကွၢ်လိမၤဒိး ယ့ၣ်ၡူးအတၢ်ဒိတၢ်တဲာ်ဒီး “ဘါထုကဖၣ်တၢ်” ထီဘိလီၤ. ပကဘၣ်ဃ့ဘါထုကဖၣ်တၢ်လၢ တၢ်ဂ့ၢ်မနုၤအဂီၢ်လဲၣ်.
၆. ဒ်သိးပပာ်ပသး မုာ်မုာ်ခုၣ်ခုၣ်ကသ့အဂီၢ် ပတၢ်နာ် ကမၤစၢၤပှၤဒ်လဲၣ်.
၆ ပဃ့ထုကဖၣ် လၢယဟိဝၤယွၤအိၣ် ဒ်သိးအက “မၤအါထီၣ်ပတၢ်နာ်” အဂီၢ်သ့လီၤ. (လူၤကၣ် ၁၇:၅; ယိၤဟၣ် ၁၄:၁) မ့ၢ်လၢမုၣ်ကီၤလံၢ် ကလ့ပစီဝဲ ပှၤလၢအပိာ်ယ့ၣ်ၡူးအခံ ကိးဂၤဒဲးအဃိ ပလိၣ်ဘၣ် တၢ်နာ်လီၤ. (လူၤကၣ် ၂၂:၃၁) ဖဲပထံၣ်ဘၣ်တၢ်မၤကွၢ် တခါဝံၤတခါအခါ ဒ်သိးပပာ်ပသးမုာ်မုာ်ခုၣ်ခုၣ် ကသ့ထီဘိအဂီၢ် ပတၢ်နာ် ကမၤစၢၤပှၤဒ်လဲၣ်. ဖဲပထံၣ်ဘၣ်တၢ်မၤကွၢ်အခါ ပမၤတၢ်လၢပကြၢးမၤအီၤတဖၣ် မ့ၢ်ဝံၤန့ၣ် ပတၢ်နာ်ကမၤစၢၤပှၤလၢ ပကပာ်လီၤ ပတၢ်ကီတၢ်ခဲလၢ ယဟိဝၤယွၤအစုပူၤလီၤ. ပသ့ၣ်ညါလၢ အဝဲမၤဘၣ်လိာ်က့ၤ ပတၢ်ကီတၢ်ခဲတဖၣ် သ့အါန့ၢ်ပှၤ စၢၢ်တလၢၢ်အဃိ ပပာ်ပသးမုာ်မုာ်ခုၣ်ခုၣ်သ့လီၤ.—၁ ပ့းတရူး ၅:၆, ၇.
၇. နမၤလိန့ၢ် တၢ်မနုၤလၢ ရီဘၢၤအတၢ်ကတိၤတဖၣ်လဲၣ်.
၇ ပမ့ၢ်ထံၣ်ဘၣ်ဒီး တၢ်မၤကွၢ်ဒ်လဲၣ်ဂ့ၤဒ်လဲၣ်ဂ့ၤ တၢ်ထုကဖၣ် ကမၤစၢၤပှၤဒ်သိး ပပာ်ပသးမုာ်မုာ်ခုၣ်ခုၣ် ကသ့အဂီၢ်လီၤ. ဆိကမိၣ်ကွၢ် ရီဘၢၤအဂ့ၢ်တက့ၢ်. အဝဲမ့ၢ်တၢ်အိၣ်ဖှိၣ်သးပှၢ်ဒီး ခဲအံၤအသးအိၣ်အနံၣ် ၈၀ လံ. အဝဲတဲဝဲလၢ “တၢ်ကွဲးနီၣ်ဖဲ ဖံလံးပံၤ ၄:၆, ၇ အပူၤန့ၣ် မၤစၢၤယၤ ဒ်သိးယလဲၤခီဖျိ တၢ်မၤကွၢ်တဖၣ် လၢယတၢ်အိၣ်မူအပူၤ ကန့ၢ်အဂီၢ်လီၤ. ယထံၣ်ဘၣ်ဒီး ကျိၣ်စ့အတၢ်ကီတၢ်ခဲတဖၣ် ဒီးယတကဲတၢ်အိၣ်ဖှိၣ်သးပှၢ်လၢၤဘၣ် တစိၢ်တလီၢ်လီၤ.” တၢ်မနုၤမၤစၢၤရီဘၢၤ ဒ်သိးအပာ်အသးမုာ်မုာ်ခုၣ်ခုၣ် ကသ့အဂီၢ်လဲၣ်. အဝဲတဲဝဲလၢ “ယမ့ၢ်စးထီၣ် သူၣ်ကိၢ်သးဂီၤတၢ်န့ၣ် ယဃ့ဘါထုကဖၣ် တဘျီဃီလီၤ. ယဃ့ဘါထုကဖၣ် ဒံးအါန့ၣ် ယသးမုာ်ဒံးဒိၣ်ထီၣ်လီၤ.”
ယ့ၣ်ၡူးစံၣ်တဲၤတဲလီၤတၢ် လၢတၢ်သူၣ်ဆူၣ်သးဆူၣ်အပူၤ
ပဆဲး ပာ်ပသးမုာ်မုာ်ခုၣ်ခုၣ် သ့ခီဖျိ ပစံၣ်တဲၤတဲလီၤတၢ် (ကွၢ်လံာ်အဆၢ ၈-၁၀)
၈. ဒ် ယိၤဟၣ် ၈:၂၉ ပာ်ဖျါထီၣ်ဝဲအသိး တၢ်မနုၤမၤစၢၤ ယ့ၣ်ၡူးဒ်သိး အဝဲပာ်အသးမုာ်မုာ်ခုၣ်ခုၣ် ကသ့အဂီၢ်လဲၣ်.
၈ ဖး ယိၤဟၣ် ၈:၂၉ တက့ၢ်. ဖဲယ့ၣ်ၡူး ဘၣ်တၢ်မၤအၢမၤနးအီၤအခါဒၣ်လဲာ် မ့ၢ်လၢအဝဲသ့ၣ်ညါဝဲလၢ အမၤသးခုအပၢ်အသးအဃိ အဝဲပာ်အသးမုာ်မုာ်ခုၣ်ခုၣ် သ့ဝဲလီၤ. ဒီးမ့ၢ်ကီလၢအဂီၢ်ဒၣ်လဲာ် အဝဲဒိကနၣ်အပၢ်အကလုၢ် ထီဘိလီၤ. ဒီးလၢအတၢ်အိၣ်မူအပူၤန့ၣ် အဝဲပာ်ဆိယဟိဝၤယွၤအတၢ်မၤ လၢနီၣ်ဂံၢ်တၢလီၤ. တချုးလၢယ့ၣ်ၡူးဟဲလီၤလၢ ဟီၣ်ခိၣ်န့ၣ် အဝဲမ့ၢ်ယွၤအ “ပှၤမၤတၢ်သ့တဂၤ” လီၤ. (ကတိၤဒိ ၈:၃၀) ဒီးဖဲအဟဲလီၤဆူ ဟီၣ်ခိၣ်ချၢအခါ အဝဲသိၣ်လိပှၤဂၤလၢ အပၢ်အဂ့ၢ် လၢတၢ်သူၣ်ဆူၣ်သးဆူၣ်အပူၤလီၤ. (မးသဲ ၆:၉; ယိၤဟၣ် ၅:၁၇) ယ့ၣ်ၡူးမၤဝဲ တၢ်မၤအံၤအဃိ အဝဲဒိးန့ၢ်ဘၣ် တၢ်သးခုအါမးလီၤ.—ယိၤဟၣ် ၄:၃၄-၃၆.
၉. ပမ့ၢ်စံၣ်တဲၤတဲလီၤတၢ်အါအါန့ၣ် ဘၣ်မနုၤအဃိ ကမၤစၢၤပှၤဒ်သိး ပပာ်ပသး မုာ်မုာ်ခုၣ်ခုၣ် ကသ့အဂီၢ်လဲၣ်.
၉ ပကွၢ်လိမၤဒိး ယ့ၣ်ၡူးသ့ခီဖျိ ပဒိကနၣ်ယဟိဝၤယွၤဒီး “မၤတၢ်အါအါဂီၢ်ဂီၢ် လၢကစၢ်အတၢ်မၤ” ထီဘိလီၤ. (၁ ကရံၣ်သူး ၁၅:၅၈) ပသးမ့ၢ် “ပှဲၤထီၣ်” မ့တမ့ၢ် ဆူၣ်ထီၣ်လၢ တၢ်စံၣ်တဲၤတဲလီၤတၢ်မၤအပူၤန့ၣ် ပအိၣ်ဒီးတၢ်ထံၣ်လၢအဂ့ၤ လၢပတၢ်ကီတၢ်ခဲတဖၣ်အဖီခိၣ် အါန့ၢ်အလီၢ် ကသ့ဝဲလီၤ. (မၤတၢ် ၁၈:၅) အဒိ ပှၤလၢပထံၣ်ဘၣ်လၢ တၢ်စံၣ်တဲၤတဲလီၤတၢ်မၤအပူၤ အါတက့ၢ်န့ၣ် ထံၣ်ဘၣ်ဒီးတၢ်ကီတၢ်ခဲ နးဒိၣ်န့ၢ်ဒံးပှၤလီၤ. ဖဲအဝဲသ့ၣ် မၤလိလံာ်စီဆှံအခါ အတၢ်အဲၣ်ယဟိဝၤယွၤဒိၣ်ထီၣ် ဒီးဖဲအဝဲသ့ၣ်မၤထွဲဝဲကစၢ်ယွၤ အတၢ်သိၣ်တၢ်သီအခါ အဝဲသ့ၣ် အတၢ်အိၣ်မူဂ့ၤထီၣ် ဒိၣ်န့ၢ်အလီၢ်အဃိ အတၢ်သးခုဟဲအါထီၣ်ဝဲလီၤ. ဖဲပထံၣ်ဘၣ် တၢ်အိၣ်သးဒ်အံၤ တဘျီလၢ်လၢ်အခါ ပတၢ်နာ်လၢ ယဟိဝၤယွၤ ကအံးထွဲကွၢ်ထွဲပှၤန့ၣ် ဟဲအါထီၣ်လီၤ. ဒီးတၢ်နာ်အံၤ ကမၤစၢၤပှၤဒ်သိး ပပာ်ပသးမုာ်မုာ်ခုၣ်ခုၣ် ကသ့အဂီၢ်လီၤ. အဒိ ဒီပုၢ်ဝဲၢ်မုၣ်တဂၤလၢ အအိၣ်ဒီးသးဂံၢ်ဘါလီၤစၢ်အတၢ်ဆါန့ၣ် လၢအတၢ်အိၣ်မူ ဒီတကတီၢ်အပူၤ တူၢ်ဘၣ်ဝဲလၢ အလုၢ်အပှ့ၤတအိၣ်ဘၣ်လီၤ. ဖဲအဝဲဟးစံၣ်တဲၤတဲလီၤတၢ် လၢတၢ်သူၣ်ဆူၣ်သးဆူၣ်အပူၤအခါ အဝဲန့ၢ်ဘၣ်တၢ်သးခုအါထီၣ်လီၤ. အဝဲတဲဝဲလၢ “ယမ့ၢ်ဟးစံၣ်တဲၤတဲလီၤတၢ် အါအါန့ၣ် ယတူၢ်ဘၣ်လၢ ယအိၣ်ဘူးဒီးယဟိဝၤယွၤအဃိ ယတၢ်တူၢ်ဘၣ် ကိညၢ်ထီၣ် ဒီးတၢ်သးခုအါထီၣ်ဝဲလီၤ.”
၁၀. နမၤလိန့ၢ် တၢ်မနုၤလၢ ဘြဲဒၤအတၢ်ကတိၤတဖၣ်လဲၣ်.
၁၀ ဆိကမိၣ်ကွၢ် ဒီပုၢ်ဝဲၢ်မုၣ် ဘြဲဒၤအဂ့ၢ်စ့ၢ်ကီးတက့ၢ်. အဝဲဒီးအဖိမုၣ်န့ၣ် အိၣ်ဒီးတၢ်ဆါလၢအနးတကလုာ်လီၤ. အဝဲဘၣ်ဟးလၢလ့ၣ်ဆီၣ် ဒီးအဂံၢ်အဘါ တအိၣ်အါအါဘၣ်. တသ့ဖဲအသ့န့ၣ် အဝဲဟးစံၣ်တဲၤတဲလီၤတၢ် တဟံၣ်ဘၣ်တဟံၣ် ဘၣ်ဆၣ် ညီနုၢ်န့ၣ် အဝဲစံၣ်တဲၤတဲလီၤတၢ် ခီဖျိကွဲးဝဲလံာ်ပရၢလီၤ. အဝဲတဲဝဲလၢ “ယသ့ၣ်ညါဒီးယတူၢ်လိာ်လၢ ဖဲပှၤဟီၣ်ခိၣ်ဖိတဖၣ် ပၢတၢ်အဆၢကတီၢ်န့ၣ် ယတၢ်ဆါအံၤ ဘျါက့ၤဝဲတန့ၢ်ဘၣ်. အဃိ ယသးစၢၢ်ဆၢလၢ တၢ်စံၣ်တဲၤတဲလီၤတၢ်မၤအပူၤ လၢလၢပှဲၤပှဲၤန့ၢ်ဝဲလီၤ. ယစံၣ်တဲၤတဲလီၤတၢ်အဃိ ယသးပ့ၤနီၣ်ကွံာ် ယတၢ်ကိၢ်တၢ်ဂီၤတဖၣ်လီၤ. ဒီးယသးစၢၢ်ဆၢလၢ ယကမၤစၢၤ ပှၤလၢယထံၣ်ဘၣ်အီၤလၢ တၢ်စံၣ်တဲၤတဲလီၤတၢ်မၤအပူၤတဖၣ်န့ၣ်လီၤ. တကးဒံးဘၣ် တၢ်စံၣ်တဲၤတဲလီၤတၢ်မၤန့ၣ် မၤစၢၤယၤဒ်သိး ယကဆိကမိၣ် ယတၢ်မုၢ်လၢ်အဂ့ၢ် ထီဘိန့ၣ်လီၤ.”
ယ့ၣ်ၡူးတူၢ်လိာ် အတံၤသကိးတဖၣ် အတၢ်မၤစၢၤ
ပဆဲး ပာ်ပသးမုာ်မုာ်ခုၣ်ခုၣ် သ့ခီဖျိ ပရ့လိာ်သးဒီး တံၤသကိးလၢအဂ့ၤတဖၣ် (ကွၢ်လံာ်အဆၢ ၁၁-၁၅)
၁၁-၁၃. (က) တၢ်မၢဖိဒီး ပှၤအဂၤတဖၣ် အဝဲသ့ၣ်ပာ်ဖျါထီၣ်ဝဲလၢ အဝဲသ့ၣ်မ့ၢ် ယ့ၣ်ၡူးအတံၤသကိး နီၢ်နီၢ်လၢကျဲဒ်လဲၣ်. (ခ) ယ့ၣ်ၡူးအတံၤသကိးတဖၣ် ကဲထီၣ်တၢ်ဂံၢ်တၢ်ဘါ လၢအဂီၢ်ဒ်လဲၣ်.
၁၁ ဖဲယ့ၣ်ၡူးဟးစံၣ်တဲၤတဲလီၤတၢ် အဆၢကတီၢ် အတၢ်မၢဖိလၢ အအိၣ်ဒီးတၢ်သးတီတဖၣ်န့ၣ် ပာ်ဖျါထီၣ်ဝဲလၢ အမ့ၢ်ယ့ၣ်ၡူးအတံၤသကိးလၢအဂ့ၤလီၤ. အဝဲသ့ၣ် လီၤဂာ်ဒ် တံၤသကိးလၢအ “အဲၣ်တၢ်တဂၤလၢ အစဲဘူးတၢ်ဒိၣ်န့ၢ် ဒီပုၢ်ဝဲၢ်တက့ၢ်” ဒ်ကတိၤဒိ တဲဝဲအသိးလီၤ. (ကတိၤဒိ ၁၈:၂၄) ယ့ၣ်ၡူးပာ်လုၢ်ပာ်ပှ့ၤ တံၤသကိးဒ်အံၤတဖၣ်လီၤ. ဖဲအဝဲမၤကစၢ်ယွၤတၢ်မၤ အဆၢကတီၢ် အဒီပုၢ်ဝဲၢ်တဖၣ် တနာ်အီၤနီတဂၤဘၣ်. (ယိၤဟၣ် ၇:၃-၅) ဘၣ်တဘျီ အဘူးအတံၢ်တဖၣ် ဆိကမိၣ်အီၤလၢ အပျုၢ်လီၤ. (မၢ်ကူး ၃:၂၁) ဘၣ်ဆၣ် တချုးဖဲယ့ၣ်ၡူးသံအနၤန့ၣ် အဝဲတဲဘၣ် အတၢ်မၢဖိလၢ အသးတီဒီးအီၤတဖၣ်လၢ “လၢယဘၣ်တၢ်လ့ပစီတဖၣ်အပူၤန့ၣ်, သုမ့ၢ်ပှၤလၢ အအိၣ်ဝဲဆိးဝဲဒီးယၤလီၤ.”—လူၤကၣ် ၂၂:၂၈.
၁၂ တၢ်မၢဖိတဖၣ်န့ၣ် မၤဟးဂီၤ ယ့ၣ်ၡူးအသး အါဘျီဘၣ်ဆၣ် ယ့ၣ်ၡူး တသးစၢၢ်ဆၢ အဝဲသ့ၣ်အတၢ်ကမၣ်ဘၣ်. လၢတၢ်န့ၣ်အလီၢ် ယ့ၣ်ၡူးထံၣ်ဝဲလၢ အတၢ်မၢဖိတဖၣ် နာ်န့ၢ်အီၤလီၤ. (မးသဲ ၂၆:၄၀; မၢ်ကူး ၁၀:၁၃, ၁၄; ယိၤဟၣ် ၆:၆၆-၆၉) တချုးလၢ ယ့ၣ်ၡူးသံအနၤန့ၣ် အဝဲတဲဘၣ် ပှၤလၢအအိၣ်ဒီးတၢ်သးတီတဖၣ်အံၤလၢ “ယကိးက့ၤလံသုလၢတံၤလၢသကိးလံ. အဂ့ၢ်ဒ်အံၤ, ကယဲၢ်ယနၢ်ဟူတၢ်လၢပၢ် အအိၣ်န့ၣ်, ယဘိးဘၣ်သ့ၣ်ညါသုလီၤ.” (ယိၤဟၣ် ၁၅:၁၅) လၢတၢ်န့ၣ်အဃိ ပနာ်သ့သပှၢ်ကတၢၢ်လၢ ယ့ၣ်ၡူးအတံၤသကိးတဖၣ်အံၤန့ၣ် ကဲထီၣ်တၢ်ဂံၢ်တၢ်ဘါ လၢအဂီၢ်ဒိၣ်မးလီၤ. ဖဲအပျဲၢ်အဘီၣ်တဖၣ် မၤစၢၤအီၤလၢ တၢ်စံၣ်တဲၤတဲလီၤတၢ်မၤအပူၤအခါ အဝဲသးခုဒိၣ်မးလီၤ.—လူၤကၣ် ၁၀:၁၇, ၂၁.
၁၃ ယ့ၣ်ၡူး အိၣ်ဒီးအသကိးမုၣ် သကိးခွါ လၢအဂၤတဖၣ်စ့ၢ်ကီးလီၤ. အဝဲသ့ၣ်တဖၣ်န့ၣ် မၤစၢၤယ့ၣ်ၡူးလၢ တၢ်စံၣ်တဲၤတဲလီၤတၢ်မၤအပူၤ ဒီးကျဲလၢအဂၤတဖၣ်လီၤ. အဝဲသ့ၣ်တနီၤန့ၣ် ကွဲမုာ်ယ့ၣ်ၡူးလၢအဟံၣ် အဃိ ယ့ၣ်ၡူးလဲၤအီၣ်တၢ် လၢအဝဲသ့ၣ်အဟံၣ်သ့ဝဲလီၤ. (လူၤကၣ် ၁၀:၃၈-၄၂; ယိၤဟၣ် ၁၂:၁, ၂) ဒီးအဝဲသ့ၣ်တနီၤန့ၣ် လဲၤတၢ်ဒီးအီၤ ဒီးသူဝဲတၢ်အိၣ်ဒီးအီၤတဖၣ် လၢယ့ၣ်ၡူးအဂီၢ်စ့ၢ်ကီးလီၤ. (လူၤကၣ် ၈:၃) ယ့ၣ်ၡူးမ့ၢ် တံၤသကိးလၢအဂ့ၤအဃိ အဝဲအိၣ်ဒီး အတံၤသကိးလၢအဂ့ၤလီၤ. ယ့ၣ်ၡူးမၤစၢၤ အတံၤသကိးတဖၣ် ဒီးအဝဲတမုၢ်လၢ်တၢ်လၢ အသကိးတဖၣ်အအိၣ် အါန့ၢ်တၢ်လၢအဝဲသ့ၣ် မၤဝဲသ့ဘၣ်. ယ့ၣ်ၡူးမ့ၢ်ပှၤလၢပှၤပှဲၤ ဘၣ်ဆၣ် အဝဲပာ်လုၢ်ပာ်ပှ့ၤ အတံၤသကိးလၢ အတလၢတပှဲၤတဖၣ် အတၢ်မၤစၢၤန့ၣ်လီၤ. အဃိပနာ်သ့သပှၢ်ကတၢၢ်လၢ အဝဲသ့ၣ်အတၢ်မၤစၢၤန့ၣ် ကမၤမုာ်ထီၣ်ယ့ၣ်ၡူးအသးဒိၣ်မးလီၤ.
၁၄-၁၅. ဒ်သိးပကအိၣ်ဒီး တံၤသကိးလၢအဂ့ၤအဂီၢ် ပကဘၣ်မၤဒ်လဲၣ် ဒီးအဝဲသ့ၣ် ကမၤစၢၤပှၤဒ်လဲၣ်.
၁၄ တံၤသကိးလၢအဂ့ၤတဖၣ်န့ၣ် ကမၤစၢၤပှၤလၢ ပကတီဒီး ယဟိဝၤယွၤအဂီၢ်လီၤ. ဒီးကျဲအဂ့ၤကတၢၢ် တဘိလၢ နကအိၣ်ဒီး တံၤသကိးလၢအဂ့ၤန့ၣ် နကဘၣ်မ့ၢ်တံၤသကိး လၢအဂ့ၤလီၤ. (မးသဲ ၇:၁၂) အဒိ လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ ပကသူပတၢ်ဆၢကတီၢ် ဒီးပတၢ်ဂံၢ်တၢ်ဘါ လၢကမၤစၢၤ ပှၤဂၤလီၤဆီဒၣ်တၢ် “ပှၤဖှီၣ်ဖိယာ်ဖိ” မ့တမ့ၢ် ပှၤလၢအလိၣ်ဘၣ် တၢ်မၤစၢၤန့ၣ်လီၤ. (အ့းဖ့းစူး ၄:၂၈) ဆိကမိၣ်ကွၢ် လၢနတၢ်အိၣ်ဖှိၣ်အပူၤ မတၤတဖၣ် လိၣ်ဘၣ်တၢ်မၤစၢၤလဲၣ်န့ၣ်တက့ၢ်. ဒီးဒီပုၢ်ဝဲၢ်မုၣ်ခွါလၢ အအိၣ်တဆူၣ်ဘၣ် မ့တမ့ၢ် အသးပှၢ်အဃိ အဟးထီၣ်ဟးလီၤ တကဲဘၣ်တဖၣ်န့ၣ် မ့ၢ်နလဲၤပှ့ၤန့ၢ်အဝဲသ့ၣ်တၢ် ကသ့ဧါ. ဒီးဟံၣ်ဖိဃီဖိလၢ အအိၣ်ဒီးကျိၣ်စ့ တၢ်ကီတၢ်ခဲတဖၣ်န့ၣ် မ့ၢ်နဟ့ၣ်အီၤတၢ်အီၣ် ကသ့ဧါ. ဒီးနသူ jw.org® ဒီး JW Library® မ့ၢ်သ့န့ၣ် နမၤစၢၤပှၤဂၤလၢ နတၢ်အိၣ်ဖှိၣ်အပူၤ ကသ့ဧါ. နမ့ၢ်သးစၢၢ်ဆၢ လၢနကမၤစၢၤပှၤဂၤန့ၣ် နကသးခုဒိၣ်ထီၣ်လီၤ.—မၤတၢ် ၂၀:၃၅.
၁၅ ပတံၤသကိးတဖၣ်န့ၣ် ကမၤစၢၤပှၤ ဖဲပအိၣ်ဒီးတၢ်ကီတၢ်ခဲအခါ ဒီးကမၤစၢၤပှၤ ဒ်သိးပပာ်ပသးမုာ်မုာ်ခုၣ်ခုၣ် ကသ့အဂီၢ်လီၤ. ဖဲစီၤယိၤဘး တဲဖျါထီၣ်အတၢ်ကီတၢ်ခဲအဂ့ၢ်အခါ စီၤအလံဟူၤ ဒိကနၣ်န့ၢ်အီၤလီၤ. ဒ်န့ၣ်အသိး ဖဲပတဲဖျါထီၣ် ပတၢ်ကိၢ်တၢ်ဂီၤအခါ ပသကိးတဖၣ်န့ၣ် ကဒိကနၣ်န့ၢ်ပှၤလၢ တၢ်သူၣ်စူၤသးစူၤအပူၤလီၤ. (ယိၤဘး ၃၂:၄) ပတကြၢးမုၢ်လၢ်လၢ ပသကိးတဖၣ် ကတဲပှၤလၢ ပကဘၣ်မၤဒ်လဲၣ်ဒ်လဲၣ်န့ၣ်ဘၣ်. ဘၣ်ဆၣ် ပမ့ၢ်ဒိကနၣ် အဝဲသ့ၣ်အတၢ်ဟ့ၣ်ကူၣ် လၢအဒိးသန့ၤထီၣ်သးလၢ လံာ်စီဆှံန့ၣ် ပမ့ၢ်ပှၤလၢအကူၣ်တၢ်သ့လီၤ. (ကတိၤဒိ ၁၅:၂၂) ဒ်စီၤပၤဒၤဝံး တူၢ်လိာ်ဝဲ အသကိးတဖၣ်အတၢ်မၤစၢၤ လၢတၢ်ဆီၣ်လီၤသးအပူၤအသိး ပဝဲသ့ၣ်တဖၣ်စ့ၢ်ကီး ဖဲပလိၣ်ဘၣ်တၢ်မၤစၢၤအခါ ပသကိးတဖၣ် မ့ၢ်မၤစၢၤပှၤန့ၣ် ပကဘၣ်တူၢ်လိာ်အဝဲသ့ၣ် အတၢ်မၤစၢၤ လၢတၢ်ဆီၣ်လီၤသးအပူၤလီၤ. (၂ ၡမူၤအ့လး ၁၇:၂၇-၂၉) တံၤသကိး လၢအဂ့ၤဒ်န့ၣ်တဖၣ်န့ၣ် မ့ၢ်တၢ်ဟ့ၣ်လၢအဟဲလၢ ယဟိဝၤယွၤအိၣ် နီၢ်ကီၢ်လီၤ.—ယၤကိာ် ၁:၁၇.
နပာ်နသး မုာ်မုာ်ခုၣ်ခုၣ်ထီဘိ ကသ့ဒ်လဲၣ်
၁၆. ဒ် ဖံလံးပံၤ ၄:၆, ၇ ပာ်ဖျါထီၣ်ဝဲအသိး ကျဲထဲတဘိလၢ ပပာ်ပသးမုာ်မုာ်ခုၣ်ခုၣ် သ့န့ၣ်မ့ၢ်မနုၤလဲၣ်. တဲဖျါထီၣ်တက့ၢ်.
၁၆ ဖး ဖံလံးပံၤ ၄:၆, ၇ တက့ၢ်. ဘၣ်မနုၤအဃိ ယဟိဝၤယွၤတဲဝဲလၢ ပဒိးန့ၢ်ဘၣ် တၢ်မုာ်တၢ်ခုၣ်လၢ အဟဲလၢယွၤအအိၣ်သ့ ခီဖျိလၢ “ယ့ၣ်ၡူးခရံာ်အပူၤ” န့ၣ်လဲၣ်. ပမ့ၢ်နာ် ဒီးနၢ်ပၢၢ် တၢ်ဂ့ၢ်ဘၣ်ဃးဒီး ယ့ၣ်ၡူးအမူဒါလၢ ကစၢ်ယွၤအတၢ်တိာ်ပာ်အပူၤမး ပပာ်ပသးမုာ်မုာ်ခုၣ်ခုၣ် ကသ့ထီဘိလီၤ. အဒိ ခီဖျိလၢ ယ့ၣ်ၡူးအတၢ်ပှ့ၤက့ၤအဃိ ပတၢ်ဒဲးဘးခဲလၢာ် ဘၣ်တၢ်ပျၢ်ကွံာ်အီၤသ့လီၤ. (၁ ယိၤဟၣ် ၂:၁၂) အဃိ ဖဲပဆိကမိၣ်တၢ်ဂ့ၢ်အံၤအခါပသးမုာ်ထီၣ်လီၤ. ဒီးဒ်ယွၤအဘီအမုၢ်အစီၤပၤအသိး ယ့ၣ်ၡူးကမၤဂ့ၤထီၣ်က့ၤ တၢ်ဟးဂူာ်ဟးဂီၤခဲလၢာ် လၢမုၣ်ကီၤလံၢ်ဒီး ပှၤဟီၣ်ခိၣ်ဖိတဖၣ် ဒုးအိၣ်ထီၣ်ဝဲန့ၣ်လီၤ. (ယၡါယၤ ၆၅:၁၇; ၁ ယိၤဟၣ် ၃:၈; လီၣ်ဖျါ ၂၁:၃, ၄) အဃိ ပအိၣ်ဒီးတၢ်မုၢ်လၢ် လၢအဂ့ၤဒိၣ်မးလီၤ. တကးဒံးဘၣ် ယ့ၣ်ၡူးဟ့ၣ်လီၤပှၤမူဒါ လၢအကီအခဲဘၣ်ဆၣ် အဝဲအိၣ်ဒီးပှၤ, မၤစၢၤပှၤ တုၤလၢတၢ်အကတၢၢ်လီၤ. (မးသဲ ၂၈:၁၉, ၂၀) အဃိ ပအိၣ်ဒီးတၢ်သူၣ်ဒူသးဒူလီၤ. တၢ်မၤမုာ်ထီၣ်, တၢ်မုၢ်လၢ် ဒီးတၢ်သူၣ်ဒူသးဒူန့ၣ် မ့ၢ်တၢ်အရ့ဒိၣ်ကတၢၢ်လၢ အကမၤစၢၤပှၤဒ်သိး ပပာ်ပသးမုာ်မုာ်ခုၣ်ခုၣ် ကသ့အဂီၢ်လီၤ.
၁၇. (က) ခရံာ်ဖိတဖၣ် ပာ်အသးမုာ်မုာ်ခုၣ်ခုၣ် ကသ့ဒ်လဲၣ်. (ခ) ဒ် ယိၤဟၣ် ၁၆:၃၃ ပာ်ဖျါထီၣ်ဝဲအသိး ပမၤနၢၤကွံာ်တၢ်မနုၤသ့လဲၣ်.
၁၇ ဖဲနအိၣ်ဒီး တၢ်သူၣ်ကိၢ်သးဂီၤ ခီဖျိနထံၣ်ဘၣ်ဒီး တၢ်မၤကွၢ်တဖၣ်အခါ နဆဲးပာ်နသး မုာ်မုာ်ခုၣ်ခုၣ်ကသ့ဒ်လဲၣ်. နကွၢ်လိမၤဒိး ယ့ၣ်ၡူးသ့ဝဲလီၤ. အဆိကတၢၢ်န့ၣ် ဃ့ဘါထုကဖၣ် ဒီးတၢ်မ့ၢ်ကဲထီၣ်သး ဒ်လဲၣ်ဂ့ၤဒ်လဲၣ်ဂ့ၤ ဆဲးဃ့ဘါထုကဖၣ်တက့ၢ်. ခံခါတခါန့ၣ် မ့ၢ်ကီလၢနဂီၢ်ဒၣ်လဲာ် ဒိကနၣ်ယဟိဝၤယွၤ အကလုၢ်ဒီး စံၣ်တဲၤတဲလီၤတၢ်လၢ တၢ်သူၣ်ဆူၣ်သးဆူၣ်အပူၤတက့ၢ်. ဒီးသၢခါတခါန့ၣ် ဃ့တၢ်မၤစၢၤလၢ နသကိးတဖၣ်အအိၣ် ဒ်သိးနလဲၤခီဖျိ တၢ်မၤကွၢ်တဖၣ် ကန့ၢ်အဂီၢ်တက့ၢ်. နမ့ၢ်မၤဒ်န့ၣ်န့ၣ် ယွၤအတၢ်ဃူတၢ်ဖိး ကမၤစၢၤနၤဒ်သိး နပာ်နသး မုာ်မုာ်ခုၣ်ခုၣ်ကသ့အဂီၢ်လီၤ. ဒီးဒ်ယ့ၣ်ၡူးအသိး နလဲၤခီဖျိ တၢ်မၤကွၢ်တဖၣ် ကန့ၢ်ဝဲလီၤ.—ဖး ယိၤဟၣ် ၁၆:၃၃ တက့ၢ်.
တၢ်သးဝံၣ် ၄၁ ဒိကနၣ်ယတၢ်ထုကဖၣ်
^ လံာ်အဆၢ. 5 ပဝဲခဲလၢာ်ပထံၣ်ဘၣ်ဒီး တၢ်ကီတၢ်ခဲလၢ အကမၤဟးဂီၤပသးလီၤ. တၢ်မၤလိတခါအံၤ ကပာ်ဖျါထီၣ်ဝဲ တၢ်ဂ့ၢ်သၢမံၤလၢ ယ့ၣ်ၡူးမၤဝဲ, ဒီးပမ့ၢ်ထံၣ်ဘၣ် ဒီးတၢ်ကီတၢ်ခဲအါမးသနာ်က့ ပမ့ၢ်ကွၢ်လိမၤဒိးယ့ၣ်ၡူးန့ၣ် ပပာ်ပသးမုာ်မုာ်ခုၣ်ခုၣ်ကသ့လီၤ.
