တၢ်မၤလိ ၁၆
ဒိကနၣ်, ဃုသ့ၣ်ညါ ဒီးပာ်ဖျါထီၣ် တၢ်ဒိသူၣ်ဒိသး
“သုတစံၣ်ညီၣ်တၢ် ဒ်သုမဲာ်ထံၣ်တၢ်အသိးတဂ့ၤ. စံၣ်ညီၣ်တၢ်တီတီတက့ၢ်.”—ယိၤဟၣ် ၇:၂၄.
တၢ်သးဝံၣ် ၁၀၁ မၤသကိးတၢ်လၢ တၢ်ဃူတၢ်ဖိး
တၢ်မၤလိအံၤ အတၢ်တိာ်ပာ် *
၁. ဘၣ်ဃးဒီး ယဟိဝၤယွၤန့ၣ် လံာ်စီဆှံ ပာ်ဖျါထီၣ်ဝဲ တၢ်မ့ၢ်တၢ်တီလၢ အလီၤသူၣ်မံသးမုာ် မနုၤတခါလဲၣ်.
ခီဖျိလၢ နဖံးညၣ်အလွဲၢ်, နမဲာ်သၣ်အက့ၢ်အဂီၤ ဒီးနနီၢ်ခိအက့ၢ်အဂီၤအဃိ ပှၤမ့ၢ်ကွၢ်တလီၤနၤန့ၣ် နကတူၢ်ဘၣ်ဒ်လဲၣ်. နတူၢ်ဘၣ်တမုာ်ဘၣ်. ဘၣ်ဆၣ် မ့ၢ်လၢယဟိဝၤယွၤ တစံၣ်ညီၣ်ပှၤဒ် တၢ်လၢအအိၣ်ဖျါလၢခိဘၣ်အဃိ ပသးခုဒိၣ်မးလီၤ. အဒိ ဖဲစီၤၡမူၤအ့လး ထံၣ်ဝဲစီၤယံးၡဲ အဖိခွါတဖၣ်အခါ အဝဲတထံၣ်ဝဲဒ် ယဟိဝၤယွၤ ထံၣ်ဝဲအသိးဘၣ်. လၢအပူၤကွံာ်န့ၣ် ယဟိဝၤယွၤ တဲဘၣ်စီၤၡမူၤအ့လးလၢ စီၤယံးၡဲအဖိခွါအကျါတဂၤန့ၣ် ကကဲထီၣ်စီၤပၤလီၤ. အဃိ ဖဲအဝဲထံၣ်ဝဲ စီၤယံးၡဲအဖိခွါ အဒိၣ်ကတၢၢ် စီၤအလံအာ်အခါ အဝဲတဲဝဲလၢ ‘ယွၤအပှၤဒိးတၢ်ဖှူအသးတဂၤ အိၣ်ဝဲလၢအမဲာ်ညါလီၤ.’ ဘၣ်ဆၣ် “ယွၤစံးဘၣ်စီၤၡမူၤအ့လး, အမဲာ်အက့ၢ်အဂီၤ, ဒီးအနီၢ်ထီန့ၣ်ကွၢ်တဂ့ၤ. မ့ၢ်ယညိကွံာ်လံအီၤ” လံ. အဃိ ပသ့ၣ်ညါဘၣ်လၢ “ပှၤကညီကွၢ်ပှၤအမဲာ်” ဒီးမ့မ့ၢ်ယဟိဝၤယွၤန့ၣ် “ကွၢ်ပှၤအသး” လီၤ.—၁ ၡမူၤအ့လး ၁၆:၁, ၆, ၇.
၂. ဒ် ယိၤဟၣ် ၇:၂၄ ပာ်ဖျါထီၣ်ဝဲအသိး ဘၣ်မနုၤအဃိ ပတကြၢးစံၣ်ညီၣ်ပှၤဂၤ ဒ်တၢ်အိၣ်ဖျါလၢခိ အသိးဘၣ်လဲၣ်. ဟ့ၣ်တၢ်အဒိတက့ၢ်.
၂ ခီဖျိလၢ ပတလၢတပှဲၤဘၣ်အဃိ ညီနုၢ်န့ၣ် ပစံၣ်ညီၣ်ပှၤဂၤ ဒ်တၢ်လၢအအိၣ်ဖျါလၢ ခိအသိးလီၤ. (ဖး ယိၤဟၣ် ၇:၂၄ တက့ၢ်.) နမ့ၢ်ကွၢ်ထဲ တၢ်လၢအအိၣ်ဖျါလၢ ခိတကပၤန့ၣ် နကသ့ၣ်ညါပှၤတဂၤအဂ့ၢ် ထဲတစဲးဖိလီၤ. အဒိ ကသံၣ်သရၣ်လၢအဖၠဲး ဒီးအိၣ်ဒီးတၢ်လဲၤခီဖျိ အါမးတဂၤန့ၣ် ဖဲအကွၢ်ဝဲ ပှၤဆါတဂၤ အတၢ်အိၣ်ဖျါလၢခိအခါ ကသ့ၣ်ညါဝဲ ပှၤဆါတဂၤအံၤအဂ့ၢ် တစဲးဖိလီၤ. ဘၣ်ဆၣ် အဝဲမ့ၢ်အဲၣ်ဒိးသ့ၣ်ညါဝဲ လၢအပူၤကွံာ် ပှၤဆါတဂၤအံၤ အိၣ်ဒီးတၢ်ဆါမနုၤလဲၣ်, အတူၢ်ဘၣ်ဒ်လဲၣ် ဒီးအဝဲအိၣ်ဒီး တၢ်ဆါအတၢ်ပနီၣ် မနုၤလဲၣ်န့ၣ် အဝဲကဘၣ်ဒိကနၣ် ပှၤဆါတဂၤန့ၣ် လီၤတံၢ်လီၤဆဲးလီၤ. တကးဒံးဘၣ် ဘၣ်သ့ၣ်သ့ၣ် ကသံၣ်သရၣ် ကမၢပှၤဆါတဂၤအံၤ ဒိဝဲအဲးစရ့ (X-ray) ဒ်သိးအကသ့ၣ်ညါဝဲ တၢ်လၢအအိၣ်လၢ ပှၤတဂၤအံၤ အမိၢ်ပှၢ်အပူၤလီၤ. ကသံၣ်သရၣ် မ့ၢ်တမၤဝဲဒ်န့ၣ်ဘၣ်န့ၣ် အဝဲကူစါယါဘျါဘၣ်ပှၤဆါလၢ ကျဲလၢအကမၣ်သ့လီၤ. ဒ်န့ၣ်အသိး ပမ့ၢ်ကွၢ်ထဲ တၢ်လၢအအိၣ်ဖျါလၢ ခိတခီန့ၣ် ပနၢ်ပၢၢ် ပဒီပုၢ်ဝဲၢ်မုၣ်ခွါတဖၣ် တသ့လၢလၢပှဲၤပှဲၤဘၣ်. ပကဘၣ်ဂုာ်ကျဲးစၢး ဒ်သိးပကသ့ၣ်ညါလၢ အဝဲသ့ၣ်မ့ၢ် ပှၤဒ်လဲၣ်တဂၤလဲၣ်န့ၣ်လီၤ. ဒီးမ့ၢ်လၢ ပထံၣ်တၢ်လၢ အအိၣ်လၢပှၤသးပူၤ တသ့ဘၣ်အဃိ ပနၢ်ပၢၢ်ပှၤဂၤ လၢလၢပှဲၤပှဲၤ ဒ်ယဟိဝၤယွၤအသိး တသ့ဘၣ်. ဘၣ်ဆၣ် ပဂုာ်ကျဲးစၢး ကွၢ်လိမၤဒိးယဟိဝၤယွၤ လၢအဂ့ၤကတၢၢ်သ့လီၤ. ပမၤဒ်န့ၣ်ကသ့ဒ်လဲၣ်.
၃. လံာ်စီဆှံ အတၢ်ကွဲးနီၣ်တဖၣ် လၢပကတဲသကိးအီၤ လၢတၢ်မၤလိအံၤအပူၤန့ၣ် ကမၤစၢၤပှၤ ဒ်သိးပကကွၢ်လိမၤဒိး ယဟိဝၤယွၤ ဒ်လဲၣ်.
၃ ယဟိဝၤယွၤ ရ့ဒီးအခ့အပှၤတဖၣ် ဒ်လဲၣ်. အဝဲ ဒိကနၣ် န့ၢ်အဝဲသ့ၣ်လီၤ. အဝဲဆိကမိၣ်ထံ အဝဲသ့ၣ်အတၢ်အိၣ်သး ဒီးတၢ်လၢ အဝဲသ့ၣ် လဲၤခီဖျိတ့ၢ်ဝဲတဖၣ်န့ၣ်လီၤ. ဒီးကစၢ်ယွၤ ပာ်ဖျါထီၣ် တၢ်ဒိသူၣ်ဒိသး လၢအဝဲသ့ၣ် အဖီခိၣ်လီၤ. ဖဲပမၤလိ တၢ်ဂ့ၢ်လၢ ဘၣ်ဃးဒီး ယဟိဝၤယွၤ ရ့ဒီးစီၤယိၤနါ, စီၤအ့ၤလံယၤ, နီၢ်ဟၤကၢ် ဒီးစီၤလိာ် ဒ်လဲၣ်အခါ ပကသ့ၣ်ညါဘၣ်လၢ ပဝဲသ့ၣ်စ့ၢ်ကီး ပရ့ဒီးပဒီပုၢ်ဝဲၢ်မုၣ်ခွါတဖၣ် ဒ်ယဟိဝၤယွၤ ရ့ပှၤဂၤအသိး ကသ့ဒ်လဲၣ်န့ၣ်လီၤ.
ဒိကနၣ်န့ၢ်ပှၤဂၤ လီၤတံၢ်လီၤဆဲး
၄. ဘၣ်သ့ၣ်သ့ၣ် ပကထံၣ်စီၤယိၤနါဒ်လဲၣ် ဒီးဘၣ်မနုၤအဃိလဲၣ်.
၄ မ့ၢ်လၢ ပတသ့ၣ်ညါ စီၤယိၤနါ အတၢ်အိၣ်သး ခဲလၢာ်ဘၣ်အဃိ ပကဆိကမိၣ်ဘၣ်လၢ အမ့ၢ်ပှၤလၢ ပှၤနာ်န့ၢ်အီၤတသ့ဘၣ် ဒီးပကဆိကမိၣ်ဘၣ်လၢ အမ့ၢ်ပှၤလၢ အတအိၣ်ဒီး တၢ်သးတီဘၣ်ဒၣ်လဲာ်န့ၣ်လီၤ. ယဟိဝၤယွၤ မၢစီၤယိၤနါ လဲၤစံၣ်တဲၤတဲလီၤ တၢ်စံၣ်ညီၣ်အကစီၣ် လၢဝ့ၢ်နံၤနဝ့လီၤ. ဘၣ်ဆၣ် စီၤယိၤနါတလဲၤဝဲဘၣ် လၢတၢ်န့ၣ်အလီၢ် အဝဲဒိးထီၣ်ကဘီဒီး “ဃ့ၢ်ပူၤဖျဲးအသးလၢယွၤအမဲာ်ညါ” လီၤ. (ယိၤနါ ၁:၁-၃, ခ့ခါစှီၤကျိာ်) မ့မ့ၢ်နၤန့ၣ် မ့ၢ်နကဟ့ၣ်ကဒီး စီၤယိၤနါ တၢ်ခွဲးတၢ်ယာ် လၢကမၤတၢ်မၤလၢ ယဟိဝၤယွၤ မၢအီၤန့ၣ်ဧါ. ဘၣ်သ့ၣ်သ့ၣ် နတအဲၣ်ဒိးဟ့ၣ်အီၤဘၣ်. ဘၣ်ဆၣ် မ့မ့ၢ်ယဟိဝၤယွၤန့ၣ် ဆိကမိၣ်ဝဲလၢ စီၤယိၤနါ ကြၢးန့ၢ်ဘၣ်ကဒီးဝဲ တၢ်ခွဲးတၢ်ယာ်အံၤလီၤ.—ယိၤနါ ၃:၁, ၂.
၅. စီၤယိၤနါ အတၢ်ကတိၤဖဲ ယိၤနါ ၂:၁, ၂, ၉ အပူၤန့ၣ် ပာ်ဖျါထီၣ်ဝဲလၢ စီၤယိၤနါ မ့ၢ်ပှၤဒ်လဲၣ်တဂၤလဲၣ်.
၅ ပမ့ၢ်ကွၢ် စီၤယိၤနါ အတၢ်ထုကဖၣ်န့ၣ် ပသ့ၣ်ညါဘၣ်လၢ အဝဲမ့ၢ်ပှၤဒ်လဲၣ်တဂၤလဲၣ်န့ၣ်လီၤ. (ဖး ယိၤနါ ၂:၁, ၂, ၉ တက့ၢ်.) စီၤယိၤနါ ကဃ့ဘါထုကဖၣ်တၢ် အါဘျီလီၤ. ဖဲပဆိကမိၣ်ထံ အတၢ်ထုကဖၣ်ဖဲ အအိၣ်လၢ ညၣ်ဖးဒိၣ်အဟၢဖၢပူၤအခါ ပတထံၣ်တခီတၢၤလၢ အမ့ၢ်ပှၤတဂၤလၢ အဃ့ၢ်ပူၤဖျဲးအသးလၢ အမူဒါဘၣ်. ဘၣ်မနုၤအဃိလဲၣ်. မ့ၢ်လၢ အတၢ်ထုကဖၣ်တခါအပူၤ တၢ်ကတိၤလၢ အတဲဝဲတဖၣ်န့ၣ် ပာ်ဖျါထီၣ်ဝဲလၢ အအိၣ်ဒီး တၢ်ဆီၣ်လီၤသး, တၢ်စံးဘျုးစံးဖှိၣ် ဒီးပာ်လီၤအသးလၢ အကဒိကနၣ် ယဟိဝၤယွၤအဃိလီၤ. လၢတၢ်န့ၣ်အဃိ ယဟိဝၤယွၤ တသးစၢၢ်ဆၢဝဲ စီၤယိၤနါ အတၢ်ကမၣ်ဘၣ်. လၢတၢ်န့ၣ်အလီၢ် ကစၢ်ယွၤ စံးဆၢအတၢ်ထုကဖၣ် ဒီးဆဲးသူအီၤ ဒ်ဝံတဂၤအသိးလီၤ.
ပမ့ၢ်သ့ၣ်ညါတၢ်ဂ့ၢ် ဂ့ၤဂ့ၤမး ပပာ်ဖျါထီၣ် တၢ်ဒိသူၣ်ဒိသးလၢ ပှၤဂၤအဖီခိၣ် ကညီလီၤ (ကွၢ်လံာ်အဆၢ ၆) *
၆. ပမ့ၢ်ဒိကနၣ်ပှၤဂၤ လီၤတံၢ်လီၤဆဲးန့ၣ် ကကဲဘျုးဒ်လဲၣ်.
၆ ဒ်သိး ပကဒိကနၣ်ပှၤဂၤ လီၤတံၢ်လီၤဆဲးအဂီၢ် ပကဘၣ်အိၣ်ဒီး တၢ်ဆီၣ်လီၤသး ဒီးတၢ်သူၣ်စူၤသးစူၤလီၤ. ပမ့ၢ်ဒိကနၣ်ပှၤဂၤ လီၤတံၢ်လီၤဆဲးန့ၣ် ပကဒိးန့ၢ်ဘၣ်အဘျုး အစှၤကတၢၢ် သၢမံၤလီၤ. တၢတမံၤန့ၣ် ပမ့ၢ်ဒိကနၣ်န့ၢ်ပှၤဂၤန့ၣ် ဘၣ်သ့ၣ်သ့ၣ် ပတထံၣ်ကမၣ်ပှၤဂၤ တဘျီဃီဘၣ်. ခံမံၤတမံၤန့ၣ် ပကနၢ်ပၢၢ် ပဒီပုၢ်ဝဲၢ်မုၣ်ခွါတဖၣ် အတၢ်တူၢ်ဘၣ် ဒီးဘၣ်မနုၤအဃိ အမၤဝဲဒ်အံၤ ဒ်နုၤလဲၣ် ဒီးကမၤစၢၤပှၤဒ်သိး ပကပာ်ဖျါအါထီၣ် တၢ်ဒိသူၣ်ဒိသး လၢအဖီခိၣ်န့ၣ်လီၤ. ဒီးသၢမံၤတမံၤန့ၣ် ပမ့ၢ်ပျဲလၢ အဝဲသ့ၣ်တဲတၢ်န့ၣ် ကမၤစၢၤ အဝဲသ့ၣ် ဒ်သိးအကသ့ၣ်ညါဝဲ တၢ်လၢအအိၣ်လၢအသးပူၤ နီၢ်ကီၢ်လီၤ. တဘျီတခီၣ် ဖဲပတဲဖျါထီၣ် ပတၢ်တူၢ်ဘၣ်ဝံၤမး ပသ့ၣ်ညါထီၣ် ပတၢ်တူၢ်ဘၣ် လီၤတံၢ်လီၤဆဲးလီၤ. (ကတိၤဒိ ၂၀:၅) တၢ်အိၣ်ဖှိၣ်သးပှၢ်တဂၤ လၢအအိၣ်လၢ ကီၢ်အ့ၡၢၣ်န့ၣ် တဲဝဲလၢ “ဘၣ်တဘျီ ယတဲတၢ် တချုးလၢ ယသ့ၣ်ညါ တၢ်ဂ့ၢ်တၢ်ကျိၤ ကိးမံၤဒဲး ဒံးဘၣ်အခါန့ၣ်လီၤ. ယတဲဒီပုၢ်ဝဲၢ်မုၣ်တဂၤလၢ အကဘၣ်မၤဂ့ၤထီၣ် အတၢ်စံးဆၢ လၢတၢ်အိၣ်ဖှိၣ်အပူၤလီၤ. ဘၣ်ဆၣ် လၢခံယသ့ၣ်ညါလၢ ဒီပုၢ်ဝဲၢ်မုၣ်တဂၤအံၤ ဖးလံာ်တဘၣ်အါအါဘၣ် ဒီးဒ်သိး အကဟ့ၣ် တၢ်စံးဆၢအဂီၢ် အဘၣ်ထဲးဂံၢ်ထဲးဘါ ဖးအါညါလီၤ.” အဃိ တချုးလၢ တၢ်အိၣ်ဖှိၣ်သးပှၢ်တဂၤ ဟ့ၣ်ကူၣ်ပှၤဂၤဒံးဘၣ်န့ၣ် အဝဲကဘၣ် “ဒိကနၣ်” ပှၤဂၤလီၤတံၢ်လီၤဆဲးလီၤ.—ကတိၤဒိ ၁၈:၁၃.
၇. ယဟိဝၤယွၤရ့ဒီး စီၤအ့ၤလံယၤဒ်လဲၣ် ဒီးနမၤလိန့ၢ်ဘၣ် တၢ်မနုၤလဲၣ်.
၇ ပဒီပုၢ်ဝဲၢ်မုၣ်ခွါတနီၤန့ၣ် မ့ၢ်လၢအဝဲသ့ၣ် ဒိၣ်ထီၣ်တၢ်လီၢ်, အတၢ်ဆဲးတၢ်လၤ မ့တမ့ၢ် အတၢ်ပာ်သူၣ်ပာ်သးအဃိ တညီလၢ ကတဲဘၣ်ပှၤဂၤ လၢအတၢ်တူၢ်ဘၣ်ဘၣ်. ဒ်သိး ကညီလၢ အဝဲသ့ၣ် ကတဲပၠးပှၤ အတၢ်တူၢ်ဘၣ်အဂီၢ် ပမၤကသ့ဒ်လဲၣ်. သ့ၣ်နီၣ်ထီၣ်လၢ ဖဲစီၤအ့ၤလံယၤ ဃ့ၢ်ပူၤဖျဲးအသးလၢ နီၢ်အံၤစ့ဘ့ၤလး အစုပူၤအခါ ယဟိဝၤယွၤ ရ့ဒီးအီၤ ဒ်လဲၣ်န့ၣ်တက့ၢ်. ဒ်သိးဝံအ့ၤလံယၤ ကတဲဘၣ်ယဟိဝၤယွၤ လၢအတၢ်တူၢ်ဘၣ်အဂီၢ် တၢ်ဆၢကတီၢ် ယံာ်ဝဲတဘျုးသီညါလီၤ. ယဟိဝၤယွၤ ဒိကနၣ်န့ၢ်အီၤ လီၤတံၢ်လီၤဆဲးဝံၤ ဟ့ၣ်ဂံၢ်ဟ့ၣ်ဘါအီၤ ဒီးဟ့ၣ်လီၤအီၤမူဒါ လၢအရ့ဒိၣ်လီၤ. (၁ စီၤပၤ ၁၉:၁-၁၈) တဘျီတခီၣ် ဒ်သိးပဒီပုၢ်ဝဲၢ်မုၣ်ခွါတဖၣ် တဲဘၣ်ပှၤ အတၢ်တူၢ်ဘၣ် ကဘူၣ်အဂီၢ် တၢ်ဆၢကတီၢ် ကလိၣ်ဝဲလီၤ. ဒီးအဝဲသ့ၣ် မ့ၢ်တဲဘၣ်ပှၤ အတၢ်တူၢ်ဘၣ်မး ပနၢ်ပၢၢ် အဝဲသ့ၣ် အတၢ်တူၢ်ဘၣ်နီၢ်ကီၢ် ကသ့ဝဲလီၤ. ပမ့ၢ်ကွၢ်လိမၤဒိး ယဟိဝၤယွၤ ခီဖျိပအိၣ်ဒီး တၢ်သူၣ်စူၤသးစူၤန့ၣ် အဝဲသ့ၣ် နာ်န့ၢ်ပှၤကဘူၣ်လီၤ. လၢခံအဝဲသ့ၣ် မ့ၢ်အဲၣ်ဒိးတဲဘၣ်ပှၤ အတၢ်တူၢ်ဘၣ်န့ၣ် ပကြၢးဒိကနၣ်န့ၢ် အဝဲသ့ၣ် လီၤတံၢ်လီၤဆဲးလီၤ.
ရ့ဒီးဒီပုၢ်ဝဲၢ်မုၣ်ခွါတဖၣ် ဒ်သိးနကသ့ၣ်ညါအါထီၣ် အဝဲသ့ၣ်
၈. ဒ် ၁ မိၤၡ့ ၁၆:၇-၁၃ ပာ်ဖျါထီၣ်ဝဲအသိး ယဟိဝၤယွၤ မၤစၢၤဝဲ နီၢ်ဟၤကၢ်ဒ်လဲၣ်.
၈ ဖဲနီၢ်စၤရဲ အကုၢ်ပိာ်မုၣ် နီၢ်ဟၤကၢ် ကဲထီၣ် စီၤအၤဘြၣ်အမါဝံၤ အလီၢ်ခံ အဝဲတအိၣ်ဒီး တၢ်ပာ်ကဲလၢၤဘၣ်. နီၢ်ဟၤကၢ် ဒၢထီၣ်ဒီး အဝဲတပာ်ကဲဝဲ နီၢ်စၤရဲလၢ အဖိအိၣ်တန့ၢ်ဘၣ်န့ၣ်လီၤ. လၢတၢ်န့ၣ်အဃိ တၢ်အိၣ်သးတဖၣ်အံၤ နးထီၣ်တုၤဒၣ်လဲာ် နီၢ်ဟၤကၢ် ဘၣ်ဃ့ၢ်ကွံာ်လၢအယံၤလီၤ. (၁ မိၤၡ့ ၁၆:၄-၆) မ့ၢ်လၢပတလၢတပှဲၤဘၣ်အဃိ ဘၣ်သ့ၣ်သ့ၣ် ပကဆိကမိၣ်ဘၣ်လၢ နီၢ်ဟၤကၢ်န့ၣ် မ့ၢ်ပှၤလၢအပာ်ထီၣ်ထီအသး ဒီးကြၢးဒိးန့ၢ်ဘၣ် တၢ်စံၣ်ညီၣ်လီၤ. ဘၣ်ဆၣ် မ့မ့ၢ်ယဟိဝၤယွၤန့ၣ် တဆိကမိၣ်ဝဲ ဒ်န့ၣ်ဘၣ်. အဝဲဆှၢလီၤ အမူခိၣ်ကလူးဆူ နီၢ်ဟၤကၢ်အအိၣ်လီၤ. ဖဲမူခိၣ်ကလူး ထံၣ်နီၢ်ဟၤကၢ်အခါ အဝဲမၤစၢၤနီၢ်ဟၤကၢ် ဒ်သိးကဆီတလဲ အတၢ်ပာ်သူၣ်ပာ်သး ဒီးဆိၣ်ဂ့ၤအီၤလီၤ. နီၢ်ဟၤကၢ်သ့ၣ်ညါဝဲလၢ ယဟိဝၤယွၤ ကွၢ်လီၤအီၤ ဒီးသ့ၣ်ညါ အတၢ်အိၣ်သး ခဲလၢာ်လီၤ. လၢတၢ်န့ၣ်အဃိ နီၢ်ဟၤကၢ်တဲဝဲလၢ ကစၢ်ယွၤမ့ၢ် “ထံၣ်တၢ်ကစၢ် . . . လၢအထံၣ်ယၤတဂၤ” န့ၣ်လီၤ.—ဖး ၁ မိၤၡ့ ၁၆:၇-၁၃ တက့ၢ်.
၉. ဘၣ်မနုၤအဃိ ကစၢ်ယွၤ ရ့ဒီးနီၢ်ဟၤကၢ် လၢတၢ်အဲၣ်တၢ်ကွံအပူၤလဲၣ်.
၉ ဘၣ်ဃးဒီး နီၢ်ဟၤကၢ်န့ၣ် ယဟိဝၤယွၤ သ့ၣ်ညါဝဲ တၢ်မနုၤလဲၣ်. ကစၢ်ယွၤ သ့ၣ်ညါဝဲ နီၢ်ဟၤကၢ် အတၢ်အိၣ်မူလၢ အပူၤကွံာ် ဒီးတၢ်ကိးမံၤဒဲး လၢအလဲၤခီဖျိဘၣ်ဝဲတဖၣ်လီၤ. (ကတိၤဒိ ၁၅:၃) နီၢ်ဟၤကၢ်မ့ၢ်ဝဲ ပှၤအဲၤကူပတူးဖိ လၢအဘၣ်ဟဲအိၣ်လၢ ပှၤဧ့ၤဘြံၤဖိအဟံၣ်လီၤ. ဘၣ်သ့ၣ်သ့ၣ် အဝဲကတူၢ်ဘၣ်လၢ ပှၤတအဲၣ်အီၤဘၣ် မ့တမ့ၢ် အဝဲကသ့ၣ်နီၣ်ဘၣ် အဟံၣ်ဖိဃီဖိဒီး အတၢ်အိၣ်တၢ်ဆိး အလီၢ်လီၤ. ဒီးစီၤအၤဘြၣ်အမါ တအိၣ်ထဲ နီၢ်ဟၤကၢ်တဂၤဧိၤဘၣ်. ဖဲန့ၣ်အဆၢကတီၢ် ပှၤပိာ်ခွါလၢ အတီဒီးကစၢ်ယွၤ တနီၤန့ၣ် အမါအိၣ် အါန့ၢ်ဒံးတဂၤလီၤ. ဘၣ်ဆၣ် ဖဲယဟိဝၤယွၤ တ့လီၤပှၤဟီၣ်ခိၣ်ဖိအခါ အဝဲတတိာ်ပာ်ဝဲဒ်န့ၣ်ဘၣ်. (မးသဲ ၁၉:၄-၆) ညီနုၢ်န့ၣ် တၢ်အိၣ်သးဒ်အံၤန့ၣ် ဒုးအိၣ်ထီၣ် တၢ်သူၣ်က့ၣ်သးကါ ဒီးတၢ်သးဟ့လၢ ဟံၣ်ဖိဃီဖိအပူၤလီၤ. နီၢ်ဟၤကၢ် တပာ်ကဲဝဲ နီၢ်စၤရဲဘၣ်န့ၣ် ယဟိဝၤယွၤ ထံၣ်ဝဲလၢ အကမၣ်လီၤ. ဘၣ်ဆၣ် ကစၢ်ယွၤနၢ်ပၢၢ် နီၢ်ဟၤကၢ် အတၢ်တူၢ်ဘၣ်, အတၢ်အိၣ်သး ဒီးကစၢ်ယွၤ ရ့ဒီးအီၤလၢ တၢ်အဲၣ်တၢ်ကွံအပူၤလီၤ.
ရ့ဒီးဒီပုၢ်ဝဲၢ်မုၣ်ခွါတဖၣ် ဒ်သိးနကသ့ၣ်ညါအါထီၣ် အဝဲသ့ၣ် (ကွၢ်လံာ်အဆၢ ၁၀-၁၂) *
၁၀. ပဃုသ့ၣ်ညါအါထီၣ် ပဒီပုၢ်ဝဲၢ်မုၣ်ခွါတဖၣ်အဂ့ၢ် ကသ့ဒ်လဲၣ်.
၁၀ ပကွၢ်လိမၤဒိး ယဟိဝၤယွၤ သ့ခီဖျိ ပဂုာ်ကျဲးစၢး ဒ်သိးပကနၢ်ပၢၢ် ပဒီပုၢ်ဝဲၢ်မုၣ်ခွါတဖၣ်လီၤ. အဃိ ရ့ဒီးဒီပုၢ်ဝဲၢ်မုၣ်ခွါတဖၣ် ဒ်သိးနကသ့ၣ်ညါအါထီၣ် အဝဲသ့ၣ် တက့ၢ်. တချုးလၢ တၢ်အိၣ်ဖှိၣ်ထီၣ်ဒံးဘၣ် ဒီးဖဲတၢ်အိၣ်ဖှိၣ် ဝံၤအလီၢ်ခံန့ၣ် တဲတၢ်ဒီးအဝဲသ့ၣ်, ဟးစံၣ်တဲၤတဲလီၤတၢ်ဒီး အဝဲသ့ၣ် ဒီးကွဲဒုးအီၣ်ဒုးအီအီၤ တၢ်အီၣ်တက့ၢ်. နမ့ၢ်မၤဒ်န့ၣ်န့ၣ် ဘၣ်သ့ၣ်သ့ၣ် နကကမၢကမၣ်လီၤ. အဒိ ဘၣ်သ့ၣ်သ့ၣ် နကဆိကမိၣ်လၢ ဒီပုၢ်ဝဲၢ်မုၣ်တဂၤန့ၣ် တအဲၣ်ဒိးကနၣ်ဃုာ် ပှၤဂၤအါအါဘၣ်. ဘၣ်ဆၣ် လၢခံနကသ့ၣ်ညါထီၣ်လၢ အမ့ၢ်ပှၤလၢ အမဲာ်ဆှးဆူၣ်တဂၤလီၤ. ဒီးဘၣ်သ့ၣ်သ့ၣ် နကဆိကမိၣ်လၢ ဒီပုၢ်ဝဲၢ်ခွါတဂၤန့ၣ် အအဲၣ်တၢ်ထူးတၢ်တီၤဒိၣ်မး ဘၣ်ဆၣ် လၢခံနသ့ၣ်ညါထီၣ်လၢ အဝဲမ့ၢ်ပှၤလၢ အသးအိၣ်ဟ့ၣ်တၢ်ဒိၣ်မးလီၤ. မ့တမ့ၢ် နကထံၣ်ဘၣ်လၢ ဟံၣ်ဖိဃီဖိတဒူၣ်န့ၣ် ဟဲထီၣ် တၢ်အိၣ်ဖှိၣ်စဲၤခံ တလီၢ်လီၢ်လီၤ. ဒီးလၢခံမး နသ့ၣ်ညါဘၣ်လၢ အဝဲသ့ၣ်န့ၣ် ထံၣ်ဘၣ်ဒီး တၢ်ထီဒုၣ်ထီဒါလီၤ. (ယိၤဘး ၆:၂၉) ပတအဲၣ်ဒိး ‘နုာ်လီၤမၤသဘံၣ်ဘုၣ် ပသးလၢပှၤဂၤအတၢ်ဂ့ၢ်အပူၤ’ ဘၣ်. (၁ တံၤမသ့း ၅:၁၃, ခ့ခါစှီၤကျိာ်) ဘၣ်ဆၣ် ပမ့ၢ်သ့ၣ်ညါ ပဒီပုၢ်ဝဲၢ်မုၣ်ခွါတဖၣ်အဂ့ၢ် ဒီးတၢ်လၢအဝဲသ့ၣ် လဲၤခီဖျိဘၣ် လၢအတၢ်အိၣ်မူအပူၤတဖၣ်န့ၣ် ကမၤစၢၤပှၤဒ်သိး ပနၢ်ပၢၢ်စၢၤ အဝဲသ့ၣ် ကသ့အါထီၣ် အဂီၢ်လီၤ.
၁၁. ဘၣ်မနုၤအဃိ အရ့ဒိၣ်လၢ တၢ်အိၣ်ဖှိၣ်သးပှၢ်တဖၣ် ကဘၣ်သ့ၣ်ညါဝဲ ဒီပုၢ်ဝဲၢ်မုၣ်ခွါတဖၣ် ဂ့ၤဂ့ၤလဲၣ်.
၁၁ လီၤဆီဒၣ်တၢ် တၢ်အိၣ်ဖှိၣ်သးပှၢ်တဖၣ်န့ၣ် ကဘၣ်သ့ၣ်ညါဝဲ ဒီပုၢ်ဝဲၢ်မုၣ်ခွါ လၢအအိၣ်လၢ အတၢ်တီခိၣ်ရိၤမဲအဖီလာ်တဖၣ် ဂ့ၤဂ့ၤလီၤ. ဆိကမိၣ်ကွၢ် ဒီပုၢ်ဝဲၢ်ခွါအါထူၤ လၢအမ့ၢ် ကဝီၤအပှၤကွၢ်တၢ် အဂ့ၢ်တက့ၢ်. အဝဲဒီးတၢ်အိၣ်ဖှိၣ်သးပှၢ်တဂၤ လဲၤအိၣ်သကိးဝဲ ဒီပုၢ်ဝဲၢ်မုၣ်တဂၤလၢ အဖျါလၢ အမဲာ်ဆှးန့ၣ်လီၤ. ဒီပုၢ်ဝဲၢ်ခွါအါထူၤ တဲဝဲလၢ “ပသ့ၣ်ညါဘၣ်လၢ ဖဲအဝဲဖျီအသးဝံၤ အလီၢ်ခံ တယံာ်ဘၣ်န့ၣ် အဝၤသံသဒၣ်ကွံာ်အီၤလီၤ. အဝဲထံၣ်ဘၣ်ဒီး တၢ်ကီတၢ်ခဲသနာ်က့ အဝဲသိၣ်လိအဖိမုၣ်ခံဂၤ လၢကအဲၣ်ယဟိဝၤယွၤ ဒီးအဖိမုၣ်တဖၣ်အံၤ မၤကစၢ်ယွၤ အတၢ်မၤ လၢတၢ်သးတီအပူၤလီၤ. ခဲအံၤ အဝဲအမဲာ်ချံ တထံၣ်တၢ်လၢၤဘၣ် ဒီးအိၣ်ဒီး တၢ်သးဟးဂီၤ အတၢ်ဆါလီၤ. ဘၣ်ဆၣ် အတၢ်အဲၣ်ယဟိဝၤယွၤ ဒီးအတၢ်နာ်န့ၢ်အီၤန့ၣ် ဂၢၢ်ကျၢၤဝဲထီဘိလီၤ. ပမၤလိန့ၢ်တၢ်လၢ ဒီပုၢ်ဝဲၢ်မုၣ်တဂၤအံၤ အအိၣ်အါမးလီၤ.” (ဖံလံးပံၤ ၂:၃) ကဝီၤအပှၤကွၢ်တၢ်တဂၤအံၤ ကွၢ်လိမၤဒိး ယဟိဝၤယွၤလီၤ. ယဟိဝၤယွၤ သ့ၣ်ညါဝဲ အသိတဖၣ် ဒီးသ့ၣ်ညါဝဲ တၢ်ဆူးတၢ်ဆါလၢ အသိတဖၣ် ထံၣ်ဘၣ်ဝဲန့ၣ်လီၤ. (၂ မိၤၡ့ ၃:၇) ဒ်သိး တၢ်အိၣ်ဖှိၣ်သးပှၢ်တဖၣ် မၤစၢၤဒီပုၢ်ဝဲၢ်မုၣ်ခွါတဖၣ် ကသ့ဂ့ၤဂ့ၤအဂီၢ် အဝဲသ့ၣ် ကဘၣ်သ့ၣ်ညါ ဒီပုၢ်ဝဲၢ်မုၣ်ခွါတဖၣ် အဂ့ၢ်ဂ့ၤဂ့ၤလီၤ.
၁၂. ဒီပုၢ်ဝဲၢ်မုၣ် ယံၣ်ယံၤ ဃုသ့ၣ်ညါအါထီၣ် ဒီပုၢ်ဝဲၢ်မုၣ်တဂၤအဂ့ၢ်အဃိ ကဲဘျုးလၢအဂီၢ် ဒ်လဲၣ်.
၁၂ နမ့ၢ်တူၢ်ဘၣ်လၢ ဒီပုၢ်ဝဲၢ်တဂၤ ကဲထီၣ်တၢ်တံာ်တာ်လၢနဂီၢ် တမံၤမံၤန့ၣ် ဃုသ့ၣ်ညါအါထီၣ် အဂ့ၢ်တက့ၢ်. နမ့ၢ်မၤဒ်န့ၣ်န့ၣ် ဘၣ်သ့ၣ်သ့ၣ် ကမၤစၢၤနၤဒ်သိး နကအိၣ်ဒီး တၢ်ဒိသူၣ်ဒိသးလၢ အဖီခိၣ်အဂီၢ်လီၤ. ဆိကမိၣ်ကွၢ် တၢ်အဒိအံၤတက့ၢ်. ဒီပုၢ်ဝဲၢ်မုၣ်ယံၣ်ယံၤ လၢအအိၣ်လၢ ကီၢ်အ့ၡၢၣ်တဂၤန့ၣ် တဲဝဲလၢ “ဒီပုၢ်ဝဲၢ်မုၣ်လၢ ယတၢ်အိၣ်ဖှိၣ်ပူၤတဂၤန့ၣ် အတဲတၢ် အကလုၢ်သီၣ် ဖးဒိၣ်လီၤ. ယဆိကမိၣ်လၢ အတၢ်ပာ်ကဲတအိၣ်ဘၣ်. ဘၣ်ဆၣ် ဖဲယလဲၤစံၣ်တဲၤတဲလီၤတၢ်ဒီးအီၤအခါ ယသ့ၣ်ညါဘၣ်လၢ ညီနုၢ်န့ၣ် အဝဲဆါစၢၤ အမိၢ်အပၢ်ညၣ်လၢ ပှၤဆါတၢ်အလီၢ်န့ၣ်လီၤ. ဒ်သိးပှၤကအဲၣ်ဒိးပှ့ၤအတၢ်အဂီၢ် အဝဲဘၣ်တဲတၢ် ဒိၣ်ဒိၣ်လီၤ. အဃိ ဒ်သိးယနၢ်ပၢၢ်စၢၤ ယဒီပုၢ်ဝဲၢ်မုၣ်ခွါတဖၣ်ကသ့အဂီၢ် ယကဘၣ်သ့ၣ်ညါ အဝဲသ့ၣ် အတၢ်အိၣ်သးလီၤ.” လၢတၢ်န့ၣ်အဃိ ဒ်သိးပကသ့ၣ်ညါအါထီၣ် ပဒီပုၢ်ဝဲၢ်မုၣ်ခွါတဖၣ်အဂီၢ် ပကဘၣ် ထဲးဂံၢ်ထဲးဘါလီၤ. ဒ်လံာ်စီဆှံ တဲဝဲအသိး နမ့ၢ်အိးလဲၢ်ထီၣ်နသးန့ၣ် မ့ၢ်ဒၣ်နကွၢ်လိမၤဒိး ယဟိဝၤယွၤ လၢအအဲၣ် “ပှၤကညီခဲလၢာ်” လီၤ.—၁ တံၤမသ့း ၂:၃, ၄; ၂ ကရံၣ်သူး ၆:၁၁-၁၃.
ပာ်ဖျါထီၣ် တၢ်ဒိသူၣ်ဒိသး
၁၃. ဒ် ၁ မိၤၡ့ ၁၉:၁၅, ၁၆ ပာ်ဖျါထီၣ်ဝဲအသိး ဖဲစီၤလိာ် မၤယံာ်မၤနီၢ်အသးအခါ မူခိၣ်ကလူး မၤဝဲဒ်လဲၣ် ဒီးဘၣ်မနုၤအဃိလဲၣ်.
၁၃ ဖဲစီၤလိာ်ထံၣ်ဘၣ်ဒီး တၢ်လီၤဘၣ်ယိၣ်လၢ အတၢ်အိၣ်မူအပူၤအခါ အဝဲတမၤပိာ်ထွဲ ယဟိဝၤယွၤ အတၢ်ဟံးစုနဲၣ်ကျဲ တဘျီဃီဘၣ်. မူခိၣ်ကလူးခံဂၤ ဟဲအိၣ်သကိး စီၤလိာ်ဒီး မၢဝဲစီၤလိာ် ကိးဟးထီၣ်အဟံၣ်ဖိဃီဖိလၢ ဝ့ၢ်စဒိၣ်လီၤ. ဘၣ်မနုၤအဃိလဲၣ်. အဝဲသ့ၣ်တဲဝဲလၢ “ပကမၤဟးဂီၤတၢ်အလီၢ်အံၤလီၤ.” (၁ မိၤၡ့ ၁၉:၁၂, ၁၃) လၢခံတဂီၤန့ၣ် စီၤလိာ်ဒီးအဟံၣ်ဖိဃီဖိ အိၣ်လၢအဟံၣ်ဒံးလီၤ. အဃိ မူခိၣ်ကလူး ဟ့ၣ်ပလီၢ်ကဒီး စီၤလိာ်လီၤ. ဘၣ်ဆၣ် “အမၤယံာ်မၤနီၢ်အသး” ဒံးလီၤ. ဘၣ်သ့ၣ်သ့ၣ် ပကဆိကမိၣ်လၢ စီၤလိာ်န့ၣ် အတၢ်ဒိကနၣ်တအိၣ်ဘၣ် ဒီးတပာ်ကဲဝဲ ယဟိဝၤယွၤ အတၢ်ဟံးစုနဲၣ်ကျဲဘၣ်. သနာ်က့ ယဟိဝၤယွၤ တပာ်တ့ၢ်အီၤဘၣ် ဒီးအဝဲဂုာ်ကျဲးစၢး မၤပူၤဖျဲးအီၤလီၤ. ခီဖျိလၢ “ယွၤသးအိၣ်အီၤ” မ့တမ့ၢ် အိၣ်ဒီးတၢ်ဒိသူၣ်ဒိသး လၢအဖီခိၣ်အဃိ မူခိၣ်ကလူးတဖၣ် ဖီၣ်ဃာ်အဝဲသ့ၣ်အစုဒီး ဆှၢထီၣ်အဝဲသ့ၣ်လၢ ဝ့ၢ်အချၢလီၤ.—ဖး ၁ မိၤၡ့ ၁၉:၁၅, ၁၆ တက့ၢ်.
၁၄. ယဟိဝၤယွၤ ပာ်ဖျါထီၣ် တၢ်ဒိသူၣ်ဒိသးလၢ စီၤလိာ်အဖီခိၣ်န့ၣ် ဘၣ်သ့ၣ်သ့ၣ် ကမ့ၢ်လၢ တၢ်ဂ့ၢ်မနုၤတဖၣ် အဃိလဲၣ်.
၁၄ ဘၣ်မနုၤအဃိ ယဟိဝၤယွၤ ပာ်ဖျါထီၣ် တၢ်ဒိသူၣ်ဒိသးလၢ စီၤလိာ် အဖီခိၣ်လဲၣ်န့ၣ် ဘၣ်သ့ၣ်သ့ၣ် တၢ်ဂ့ၢ်ကအိၣ်ဝဲ အါမံၤလီၤ. စီၤလိာ်မၤယံာ်မၤနီၢ်အသး ဒီးတဟးထီၣ်လၢ အဟံၣ်ပူၤတဘျီဃီဘၣ်န့ၣ် ဘၣ်သ့ၣ်သ့ၣ် ကမ့ၢ်လၢ အပျံၤဝဲပှၤအိၣ်လၢ ဝ့ၢ်အချၢတဖၣ်လီၤ. ဒီးတၢ်လီၤဘၣ်ယိၣ် လၢအဂၤတဖၣ် အိၣ်ဝဲစ့ၢ်ကီးလီၤ. ဘၣ်သ့ၣ်သ့ၣ် စီၤလိာ်ကသ့ၣ်ညါစ့ၢ်ကီးလၢ စီၤပၤခံဂၤ လီၤတဲာ်လၢ ကျဲတံးအပူၤ မ့တမ့ၢ် ကပံာ်လၢ အယုၢ်လီၤတၢ်အပူၤ လၢအအိၣ်လၢတၢ်တြီၤပူၤန့ၣ်လီၤ. (၁ မိၤၡ့ ၁၄:၈-၁၂) ဒ်အဝဲမ့ၢ် ဝၤတဂၤ ဒီးပၢ်တဂၤအသိး စီၤလိာ်ကဘၣ်ယိၣ်တၢ်လၢ အဟံၣ်ဖိဃီဖိအဂီၢ်လီၤ. တကးဒံးဘၣ် စီၤလိာ်မ့ၢ်ပှၤလၢ အတၢ်အိၣ်တၢ်ယၢၤအဃိ ဘၣ်သ့ၣ်သ့ၣ် လၢဝ့ၢ်စဒိၣ်အပူၤန့ၣ် အကအိၣ်ဒီးအဟံၣ်လၢအဂ့ၤဒိၣ်မးတဖျၢၣ်လီၤ. (၁ မိၤၡ့ ၁၃:၅, ၆) ဘၣ်ဆၣ် အဝဲတကြၢး တဲပူၤဖျဲးအသးလၢ အတဒိကနၣ်ယဟိဝၤယွၤ အတၢ်ဟံးစုနဲၣ်ကျဲ တဘျီဃီ ခီဖျိလၢ တၢ်ဂ့ၢ်သ့ၣ်တဖၣ်အံၤအဃိန့ၣ်ဘၣ်. သနာ်က့ ယဟိဝၤယွၤ တသးစၢၢ်ဆၢ အတၢ်ကမၣ်ဘၣ်, လၢတၢ်န့ၣ်အလီၢ် ယဟိဝၤယွၤထံၣ်အီၤဒ် “ပှၤတီပှၤလိၤတဂၤ” အသိးလီၤ.—၂ ပ့းတရူး ၂:၇, ၈.
ပမ့ၢ်ဒိကနၣ်န့ၢ်ပှၤဂၤန့ၣ် ကမၤစၢၤပှၤဒ်သိး ပပာ်ဖျါထီၣ် တၢ်ဒိသူၣ်ဒိသးလၢ ပှၤဂၤအဖီခိၣ်ကသ့ (ကွၢ်လံာ်အဆၢ ၁၅-၁၆) *
၁၅. လၢပကစံၣ်ညီၣ်ပှၤဂၤ ဒ်အတၢ်အိၣ်ဖျါ လၢခိအသိးအလီၢ် ပကြၢးမၤဒ်လဲၣ်.
၁၅ လၢနကစံၣ်ညီၣ်ပှၤဂၤ ဒ်အတၢ်အိၣ်ဖျါ လၢခိအသိးအလီၢ် ဂုာ်ကျဲးစၢးဃုနၢ်ပၢၢ် အတၢ်တူၢ်ဘၣ်တက့ၢ်. ဒီပုၢ်ဝဲၢ်မုၣ်ဘရါနံၤခၤ လၢအအိၣ်လၢ ကီၢ်ယူရပၤတဂၤ ဂုာ်ကျဲးစၢး မၤဝဲဒ်န့ၣ်လီၤ. အဝဲတဲဝဲလၢ “ဒီပုၢ်ဝဲၢ်မုၣ်တဂၤန့ၣ် ဖျါလၢအသးအ့န့ ထီဘိလီၤ. အဝဲဒၣ် တအဲၣ်ဒိးကနၣ်ဃုာ် ပှၤဂၤဘၣ်. ဒီးတဘျီတခီၣ်န့ၣ် ယလဲၤတဲတၢ်ဒီးအီၤမး တဘူၣ်ဘၣ်. ဘၣ်ဆၣ် ယဆိကမိၣ်လီၤယသးလၢ ‘ယမ့ၢ်အိၣ်ဘၣ် လၢအလီၢ်ဒု ယကအဲၣ်ဒိးအိၣ်ဒီး တံၤသကိးလီၤ.’ အဃိ ယပာ်လီၤယသးလၢ ယကလဲၤ သံကွၢ်အီၤလၢ မ့ၢ်အတၢ်အိၣ်သး မၤသးဒ်လဲၣ်န့ၣ်လီၤ. ဝံၤဒီး အဝဲတဲဘၣ်ယၤလၢ အတၢ်တူၢ်ဘၣ် တဖၣ်လီၤ. ခီဖျိလၢ ယမၤဒ်န့ၣ်အဃိ ခဲအံၤ ယနၢ်ပၢၢ်အါထီၣ် ဒီပုၢ်ဝဲၢ်မုၣ်တဂၤအံၤလီၤ.”
၁၆. ဘၣ်မနုၤအဃိ ပကြၢးဃ့ဘါထုကဖၣ် ဒ်သိး ပတၢ်ဒိသူၣ်ဒိသး ကအါထီၣ်အဂီၢ်လဲၣ်.
၁၆ ပှၤလၢအနၢ်ပၢၢ်ပှၤ အဂ့ၤကတၢၢ်န့ၣ် မ့ၢ်ဒၣ်ထဲယဟိဝၤယွၤတဂၤလီၤ. (ကတိၤဒိ ၁၅:၁၁) အဃိ ဃ့အီၤလၢ အကမၤစၢၤနၤဒ်သိး နကထံၣ်ပှၤဂၤဒ် အထံၣ်ဝဲအသိး ဒီးပာ်ဖျါထီၣ် တၢ်ဒိသူၣ်ဒိသးလၢ ပှၤဂၤအဖီခိၣ် ဒ်အဝဲအသိးန့ၣ်တက့ၢ်. တၢ်ဃ့ထုကဖၣ် မၤစၢၤဝဲ ဒီပုၢ်ဝဲၢ်မုၣ် အဲစလၤ ဒ်သိးအပာ်ဖျါထီၣ် တၢ်ဒိသူၣ်ဒိသး လၢပှၤဂၤဖီခိၣ် ကသ့အါထီၣ်အဂီၢ်လီၤ. လၢအတၢ်အိၣ်ဖှိၣ် အပူၤန့ၣ် ဒီပုၢ်ဝဲၢ်မုၣ်လၢ အရ့ဘၣ်ဝဲကီန့ၣ် အိၣ်ဝဲတဂၤလီၤ. ဒီပုၢ်ဝဲၢ်မုၣ် အဲစလၤ တဲဝဲလၢ “ညီလၢ ယကပာ်ဒ့ၣ် ပာ်ကမၣ်အီၤဒီး ဟးဆှဲးအီၤလီၤ. ဘၣ်ဆၣ် ယဃ့ယဟိဝၤယွၤလၢ အကမၤစၢၤယၤဒ်သိး ယကဒိသူၣ်ဒိသး ဒီပုၢ်ဝဲၢ်မုၣ်တဂၤအံၤလီၤ.” မ့ၢ်ယဟိဝၤယွၤ စံးဆၢက့ၤ ဒီပုၢ်ဝဲၢ်မုၣ် အဲစလၤ အတၢ်ဃ့ထုကဖၣ်ဧါ. ဒီပုၢ်ဝဲၢ်မုၣ် အဲစလၤ တဲဝဲလၢ “ပလဲၤစံၣ်တဲၤတဲလီၤတၢ် ဒ်သိးသိးဝံၤ ပတဲသကိးတၢ် ကအိၣ်တဘျုးနၣ်ရံၣ်ညါ. ဖဲအတဲတၢ်အခါ ယဒိကနၣ်န့ၢ်အီၤလၢ တၢ်သူၣ်အိၣ်သးအိၣ် အဃိ ယတၢ်အဲၣ်လၢ အဖီခိၣ်အါထီၣ် ဒီးယပာ်လီၤယသးလၢ ယကမၤစၢၤအီၤလီၤ.”
၁၇. ပကြၢး ပာ်လီၤပသးလၢ ပကမၤမနုၤလဲၣ်.
၁၇ ပကြၢးပာ်ဖျါထီၣ် တၢ်ဒိသူၣ်ဒိသးလၢ ပဒီပုၢ်ဝဲၢ်မုၣ်ခွါ တဂၤဂ့ၤတဂၤဂ့ၤ အဖီခိၣ်လီၤ. ဒ်စီၤယိၤနါ, စီၤအ့ၤလံယၤ, နီၢ်ဟၤကၢ် ဒီးစီၤလိာ်အသိး ပဒီပုၢ်ဝဲၢ်မုၣ်ခွါ ကိးဂၤဒဲး ထံၣ်ဘၣ်ဒီးတၢ်ကီတၢ်ခဲတဖၣ် ဒီးတၢ်ကီတၢ်ခဲတနီၤန့ၣ် အဝဲသ့ၣ်အနီၢ်ကစၢ် ဒုးအိၣ်ထီၣ်ဝဲဒၣ်လီၤ. ဒီးပမ့ၢ်ဘၣ်တဲတီတီန့ၣ် တဘျီတခီၣ် ပဝဲကိးဂၤဒဲး ပဒုးအိၣ်ထီၣ်ဘၣ် တၢ်ကီတၢ်ခဲလၢ ပနီၢ်ကစၢ်အဂီၢ်လီၤ. လၢတၢ်န့ၣ်အဃိ ယဟိဝၤယွၤ အဲၣ်ဒိးလၢ ပကပာ်ဖျါထီၣ် တၢ်ဒိသူၣ်ဒိသးလၢ ပှၤဂၤအဖီခိၣ်လီၤ. (၁ ပ့းတရူး ၃:၈) ဖဲပဒိကနၣ် ယဟိဝၤယွၤအကလုၢ်အခါ ပကအိၣ်ဒီး တၢ်ဃူတၢ်ဖိးဒီး ပဒီပုၢ်ဝဲၢ်မုၣ်ခွါ လၢအဟဲလၢ ကလုာ်ဒူၣ် အကလုာ်ကလုာ်န့ၣ်လီၤ. အဃိ ဖဲပရ့လိာ်သးဒီး ပဒီပုၢ်ဝဲၢ်မုၣ်ခွါ တဖၣ်အခါ မ်ပကပာ်လီၤပသးလၢ ပကဒိကနၣ်န့ၢ် အဝဲသ့ၣ်, ဃုသ့ၣ်ညါ အဝဲသ့ၣ်တၢ်အိၣ်သး ဒီးပာ်ဖျါထီၣ် တၢ်ဒိသူၣ်ဒိသးလၢ အဝဲသ့ၣ် အဖီခိၣ်တက့ၢ်.
တၢ်သးဝံၣ် ၈၇ ဟဲဒီးမၤဆူၣ်ထီၣ်က့ၤနဂံၢ်ဘါ
^ လံာ်အဆၢ. 5 ခီဖျိလၢ ပမ့ၢ်ပှၤလၢ အတလၢတပှဲၤဘၣ်အဃိ ညီနုၢ်ပဟးဆိကမိၣ်ကြီ ပှၤဂၤလၢ အမ့ၢ်ပှၤဒ်အံၤဒ်နုၤ ဒီးအတၢ်ပာ်သူၣ်ပာ်သးအိၣ် ဒ်အံၤဒ်နုၤန့ၣ်လီၤ. မ့မ့ၢ်ယဟိဝၤယွၤန့ၣ် “ကွၢ်ပှၤအသး” လီၤ. (၁ ၡမူၤအ့လး ၁၆:၇) လၢတၢ်မၤလိအံၤအပူၤ ပကမၤလိဘၣ်လၢ ယဟိဝၤယွၤ ရ့ဒီးစီၤယိၤနါ, စီၤအ့ၤလံယၤ, နီၢ်ဟၤကၢ် ဒီးစီၤလိာ် ဒ်လဲၣ်န့ၣ်လီၤ. ဒီးတၢ်မၤလိအံၤ ကမၤစၢၤပှၤဒ်သိး ပကရ့ဒီး ပဒီပုၢ်ဝဲၢ်မုၣ်ခွါတဖၣ် ဒ်ယဟိဝၤယွၤ မၤဝဲအသိးလီၤ.
^ လံာ်အဆၢ. 52 တၢ်တဲဖျါထီၣ်တၢ်ဂီၤ အခီပညီ– မ့ၢ်လၢ ဒီပုၢ်ဝဲၢ်ခွါသးစၢ်တဂၤ ဟဲထီၣ်တၢ်အိၣ်ဖှိၣ် စဲၤခံအဃိ ဒီပုၢ်ဝဲၢ်ခွါသးပှၢ်တဂၤ သးအ့န့ဘၣ်အီၤလီၤ. ဘၣ်ဆၣ် လၢခံအသ့ၣ်ညါဘၣ်လၢ ဒီပုၢ်ဝဲၢ်ခွါသးစၢ်အံၤန့ၣ် မ့ၢ်လၢအကါဘၣ်တဲးအဃိ အဟဲစဲၤခံလီၤ.
^ လံာ်အဆၢ. 54 တၢ်တဲဖျါထီၣ်တၢ်ဂီၤ အခီပညီ– လၢအခီၣ်ထံးန့ၣ် တၢ်စံၣ်တဲၤတဲလီၤတၢ် ကရူၢ်အပှၤကွၢ်တၢ်တဂၤ ဆိကမိၣ်ဝဲလၢ ဒီပုၢ်ဝဲၢ်မုၣ်တဂၤ တအဲၣ်ဒိးကနၣ်ဃုာ် ပှၤဂၤဘၣ်. လၢခံ အဝဲသ့ၣ်ညါဘၣ်ဝဲလၢ ဒီပုၢ်ဝဲၢ်မုၣ်တဂၤအံၤန့ၣ် မ့ၢ်ပှၤလၢ အမဲာ်ဆှးဆူၣ် ဒီးအမ့ၢ်အိၣ်လၢ ပှၤလၢအဝဲ မ့ၢ်တသ့ၣ်ညါဝဲ ဂ့ၤဂ့ၤတဖၣ်အကျါန့ၣ် အအိၣ်တဘၣ် အါအါဘၣ်.
^ လံာ်အဆၢ. 56 တၢ်တဲဖျါထီၣ်တၢ်ဂီၤ အခီပညီ– ဖဲဒီပုၢ်ဝဲၢ်မုၣ်တဂၤ ရ့လိာ်အသးဒီး ဒီပုၢ်ဝဲၢ်မုၣ်အဂၤတဂၤအခါ အဝဲသ့ၣ်ညါထီၣ်ဘၣ်လၢ ဒီပုၢ်ဝဲၢ်မုၣ်တဂၤအံၤ တမ့ၢ်ပှၤလၢအသးအ့န့ ဒီးတသူၣ်အိၣ်သးအိၣ်ပှၤဂၤ ဒ်အဆိကမိၣ်ဝဲ ဖဲအထံၣ်ဘၣ်အီၤလၢ တၢ်အိၣ်ဖှိၣ်လီၢ် အဆိကတၢၢ်တဘျီအခါန့ၣ်ဘၣ်.
