တၢ်မၤလိ ၁၅
ပှၤလၢအအိၣ်လၢ နဟီၣ်ကဝီၤတဖၣ်န့ၣ် နထံၣ်အီၤဒ်လဲၣ်
“ကျ့ထီၣ်သုမဲာ်ဒီး ကွၢ်စံာ်ဧိၤပှဲၤဧိၤတက့ၢ်. အဂ့ၢ်ဒ်အံၤ, ခဲကနံၣ်အံၤဒၣ်လဲာ်, ဘုဂီၤလံလၢ တၢ်ကူးအဂီၢ်လံ.”—ယိၤဟၣ် ၄:၃၅.
တၢ်သးဝံၣ် ၆၄ ကူးဘုလၢတၢ်သးခုအပူၤတက့ၢ်
တၢ်မၤလိအံၤ အတၢ်တိာ်ပာ် *
၁-၂. ယ့ၣ်ၡူးအတၢ်ကတိၤဖဲ ယိၤဟၣ် ၄:၃၅, ၃၆ အပူၤန့ၣ် အအဲၣ်ဒိးတဲဝဲ တၢ်မနုၤလဲၣ်.
ဘၣ်တဘျီ ယ့ၣ်ၡူးလဲၤခီဂာ်ဝဲ စံာ်ပျီတဖၣ် ဒီးဖဲန့ၣ်အဆၢကတီၢ် ကဘၣ်ဖဲ ဘုဒိၣ်ထီၣ်သီသီလီၤ. (ယိၤဟၣ် ၄:၃-၆) ဒီးပှၤကူးဘုအခါကဘၣ်အဂီၢ် အိၣ်တ့ၢ်လွံၢ်လါဃၣ်ဃၣ်ဒံးလီၤ. ဘၣ်ဆၣ် ယ့ၣ်ၡူးတဲဝဲလၢ “ကျ့ထီၣ်သုမဲာ်ဒီး ကွၢ်စံာ်ဧိၤပှဲၤဧိၤတက့ၢ်. အဂ့ၢ်ဒ်အံၤ, ခဲကနံၣ်အံၤဒၣ်လဲာ်, ဘုဂီၤလံလၢ တၢ်ကူးအဂီၢ်လံ.” (ဖး ယိၤဟၣ် ၄:၃၅, ၃၆ တက့ၢ်.) အဃိ ယ့ၣ်ၡူးအတၢ်ကတိၤအံၤ ကလီၤဆီဘၣ်ပှၤဂၤ တစဲးလီၤ. မ့ၢ်အဝဲ အဲၣ်ဒိးတဲဝဲ တၢ်မနုၤလဲၣ်.
၂ လီၤဂာ်လၢ ယ့ၣ်ၡူးအဲၣ်ဒိးတဲဝဲ ပှၤပာ်ဖှိၣ်ထီၣ် ပှၤကညီ, ဒီးတမ့ၢ်ဘုဘၣ်. ဘၣ်မနုၤအဃိလဲၣ်န့ၣ် ဆိကမိၣ်ကွၢ် တၢ်ဂ့ၢ်အံၤတက့ၢ်. ညီနုၢ်န့ၣ် ပှၤယူဒၤဖိတဖၣ် ဟးဆှဲးဝဲ ပှၤၡၤမရံဖိတဖၣ် ဘၣ်ဆၣ်မ့မ့ၢ်ယ့ၣ်ၡူးန့ၣ် စံၣ်တဲၤတဲလီၤဝဲ ပှၤၡၤမရံမုၣ်တဂၤ လၢအဒိကနၣ်အီၤလီၤ. ဒီးလၢခံ ပှၤၡၤမရံအပှၤဂီၢ်မုၢ်တဖၣ် လၢအနၢ်ဟူဘၣ် ယ့ၣ်ၡူးအဂ့ၢ်လၢ ပိာ်မုၣ်တဂၤအံၤအအိၣ်န့ၣ် အဲၣ်ဒိးဟဲဃုသ့ၣ်ညါအါထီၣ် ယ့ၣ်ၡူးအဂ့ၢ်လီၤ. ဒီးဖဲအဝဲသ့ၣ် ဟဲလၢကျဲအဆၢကတီၢ် ယ့ၣ်ၡူးတဲဝဲလၢ “ဘုဂီၤလံလၢ တၢ်ကူးအဂီၢ်လံ.” (ယိၤဟၣ် ၄:၉, ၃၉-၄၂) ဘၣ်ဃးဒီး တၢ်ဂ့ၢ်အံၤန့ၣ် ပှၤကူၣ်ဘၣ်ကူၣ်သ့ လၢဘၣ်ဃးဒီး လံာ်စီဆှံတဂၤ ကွဲးဝဲလၢ “ပှၤသ့ၣ်တဖၣ်အံၤ ဟဲလၢယ့ၣ်ၡူးအအိၣ်ချ့ချ့ ဒ်သိးကဟဲဒိကနၣ်အီၤအဃိ . . . အဝဲသ့ၣ်န့ၣ် လီၤဂာ်ဒ် ဘုလၢအခါဘၣ်လၢ ပှၤကဘၣ်ကူးအီၤလီၤ.”
ပမ့ၢ်တူၢ်ဘၣ်လၢ လၢပလီၢ်ကဝီၤအပူၤ “ဘုဂီၤလံလၢ တၢ်ကူးအဂီၢ်လံ” န့ၣ် ပကြၢးမၤ တၢ်မနုၤလဲၣ်. (ကွၢ်လံာ်အဆၢ ၃)
၃. နမ့ၢ်အိၣ်ဒီး တၢ်ထံၣ်လၢပှၤဂၤအဖီခိၣ် ဒ်ယ့ၣ်ၡူးအသိးန့ၣ် ဘၣ်မနုၤအဃိ နကကဲထီၣ် ပှၤစံၣ်တဲၤတဲလီၤတၢ်ဖိလၢ အဂ့ၤန့ၢ်အလီၢ်လဲၣ်.
၃ ပှၤလၢနစံၣ်တဲၤတဲလီၤအီၤတဖၣ်န့ၣ် မ့ၢ်နထံၣ် အဝဲသ့ၣ်ဒ်လဲၣ်. မ့ၢ်နထံၣ်အဝဲသ့ၣ် ဒ်ဘုလၢအခါဘၣ်လၢ ပှၤကဘၣ်ကူးအီၤလံဧါ. နမ့ၢ်ထံၣ်အဝဲသ့ၣ် ဒ်န့ၣ်န့ၣ် နကတူၢ်ဘၣ် ဒ်အံၤလီၤ. အဆိကတၢၢ်န့ၣ် နကအဲၣ်ဒိး စံၣ်တဲၤတဲလီၤ အဝဲသ့ၣ်လၢ တၢ်သူၣ်ဆူၣ်သးဆူၣ်အပူၤလီၤ. ပှၤကူးဘုန့ၣ် အိၣ်ဒီးအကတီၢ်အဃိ တမ့ၢ်လၢနကအဲၣ်ဒိး ထုးယံာ်တၢ်ဆၢကတီၢ်ဘၣ်. ခံမံၤတမံၤန့ၣ် ဖဲနထံၣ်ဘၣ် ပှၤဒိကနၣ် တၢ်သးခုကစီၣ်အခါ နကသးခုလီၤ. လံာ်စီဆှံ တဲဝဲလၢ ပှၤအိၣ်ဒီး “တၢ်သးခု” ဖဲ “တၢ်ကူးဘုအကတီၢ်” လီၤ. (ယၡါယၤ ၉:၃) ဒီးသၢမံၤတမံၤန့ၣ် နကထံၣ် ပှၤတဂၤစုာ်စုာ် ဒ်ပှၤလၢအကဲထီၣ် ယ့ၣ်ၡူးအပျဲၢ်အဘီၣ်သ့လီၤ. အဃိ နကဃုကျဲလၢ နကစံၣ်တဲၤတဲလီၤအဝဲသ့ၣ် လၢကျဲလၢ ကထုးန့ၢ် အဝဲသ့ၣ်အသးလီၤ.
၄. ဘၣ်ဃးဒီး စီၤပီလူးအဂ့ၢ်န့ၣ် လၢတၢ်မၤလိအံၤအပူၤ ပကမၤလိဘၣ် တၢ်မနုၤလဲၣ်.
၄ ဘၣ်သ့ၣ်သ့ၣ် ယ့ၣ်ၡူးအပျဲၢ်အဘီၣ်တနီၤ ကဆိကမိၣ်ဝဲလၢ ပှၤၡၤမရံဖိတဖၣ်န့ၣ် တမ့ၢ်လၢ ကဟဲကဲထီၣ် ခရံာ်အပျဲၢ်အဘီၣ် နီတဘျီဘၣ်. ဘၣ်ဆၣ် မ့မ့ၢ်ယ့ၣ်ၡူးန့ၣ် တဆိကမိၣ်ဝဲ ဒ်န့ၣ်ဘၣ်. လၢတၢ်န့ၣ်အလီၢ် ယ့ၣ်ၡူးထံၣ်ဝဲ ပှၤၡၤမရံဖိတဖၣ်ဒ် ပှၤလၢအဟဲကဲထီၣ် အပျဲၢ်အဘီၣ်သ့န့ၣ်လီၤ. ပဝဲသ့ၣ်တဖၣ်စ့ၢ်ကီး ပကဘၣ်ထံၣ် ပှၤလၢပလီၢ်ကဝီၤတဖၣ် ဒ်ပှၤလၢအဟဲကဲထီၣ် ခရံာ်အပျဲၢ်အဘီၣ်သ့န့ၣ်လီၤ. တၢ်မၢဖိပီလူး ပာ်လီၤဒိဂ့ၤတဲာ်ဘၣ် လၢပဂီၢ်လီၤ. ပန့ၢ်ဘၣ် တၢ်မၤလိလၢ စီၤပီလူးအအိၣ်ဒ်လဲၣ်. လၢတၢ်မၤလိတခါအံၤအပူၤ ပကတဲသကိး ဘၣ်ဃးဒီး စီၤပီလူး သ့ၣ်ညါဝဲလၢ ပှၤလၢအလဲၤစံၣ်တဲၤတဲလီၤဝဲတဖၣ်န့ၣ် နာ်တၢ်မနုၤလဲၣ်, အသူၣ်အိၣ်သးအိၣ် တၢ်မနုၤလဲၣ်န့ၣ်လီၤ. ဒီးပကတဲသကိးစ့ၢ်ကီး အဝဲထံၣ်ဝဲ ပှၤသ့ၣ်တဖၣ်န့ၣ် ဒ်ပှၤလၢ အဟဲကဲထီၣ် ခရံာ်အပျဲၢ်အဘီၣ် သ့န့ၣ်လီၤ.
အဝဲသ့ၣ် နာ်တၢ်မနုၤလဲၣ်
၅. ဘၣ်မနုၤအဃိ စီၤပီလူး သ့ၣ်ညါနၢ်ပၢၢ်ဝဲ ပှၤလၢအဒိကနၣ်အီၤလၢ ဘူၣ်ဘျီၣ်အပူၤတဖၣ်လဲၣ်.
၅ စီၤပီလူး စံၣ်တဲၤတဲလီၤတၢ်လၢ ပှၤယူဒၤဖိ အဘူၣ်ဘျီၣ်ပူၤ တလီၢ်လီၢ်လီၤ. အဒိ ဖဲသ့းစၤလနံ အဘူၣ်ဘျီၣ်ပူၤန့ၣ်အဝဲ “ကတိၤတၢ်ဒီး [ပှၤယူဒၤဖိ] လၢတၢ်ကွဲးအသးအဂ့ၢ်အကျိၤ” လၢ “သၢအိၣ်ဘှံးနံၤညါ” လီၤ. (မၤတၢ် ၁၇:၁, ၂) လီၤဂာ်လၢ စီၤပီလူး စံၣ်တဲၤတဲလီၤတၢ်ဖဲ ဘူၣ်ဘျီၣ်အပူၤ သ့ဝဲဂ့ၤဂ့ၤလီၤ. အဝဲဒိၣ်ထီၣ်ဘၣ်လၢ ပှၤယူဒၤဖိအကျါလီၤ. (မၤတၢ် ၂၆:၄, ၅) အဃိ အဝဲသ့ၣ်ညါနၢ်ပၢၢ်ဝဲ ပှၤယူဒၤဖိတဖၣ် ဒီးအဝဲစံၣ်တဲၤတဲလီၤ အဝဲသ့ၣ် သ့ဝဲဂ့ၤဂ့ၤလီၤ.—ဖံလံးပံၤ ၃:၄, ၅.
၆. ပှၤလၢစီၤပီလူး စံၣ်တဲၤတဲလီၤအီၤလၢ အၤသ့ၣ်အတၢ်ဆါတၢ်ပှ့ၤတၢ်အလီၢ်တဖၣ်န့ၣ် လီၤဆီလိာ်အသးဒီး ပှၤလၢအဒိကနၣ်တၢ်လၢ ဘူၣ်ဘျီၣ်ပူၤတဖၣ် ဒ်လဲၣ်.
၆ ဖဲပှၤမၤအၢမၤနးတၢ်တဖၣ် နီဟးထီၣ်စီၤပီလူးလၢ သ့းစၤလနံ ဒီးဘ့းရံၤအလီၢ်ခံ စီၤပီလူး လဲၤလၢအၤသ့ၣ်လီၤ. ဖဲန့ၣ်န့ၣ်အဝဲ “တဲးလိာ်ဃိလိာ်တၢ်ဒီး ပှၤယူဒၤဖိ ဒီးပှၤယူးယီၣ်ယွၤ” လၢ “ဘူၣ်ဘျီၣ်ပူၤ” လီၤ. (မၤတၢ် ၁၇:၁၇) ဘၣ်ဆၣ် ဖဲအဝဲစံၣ်တဲၤတဲလီၤတၢ်လၢ ပှၤဆါတၢ်ပှ့ၤတၢ်အလီၢ်အခါ အဝဲစံၣ်တဲၤတဲလီၤတၢ်လၢ ကျဲလၢအဂၤတမံၤလီၤ. လၢပှၤဒိကနၣ်အီၤတဖၣ် အကျါန့ၣ် ပၣ်ဃုာ်ဒီး ပှၤကူၣ်ဘၣ်ကူၣ်သ့လၢ အသ့ဆိကမိၣ်တၢ် ဒိၣ်ဒိၣ်ယိာ်ယိာ် ဒီးအဂၤတနီၤန့ၣ်မ့ၢ်ဝဲ ပှၤတခီဘီမုၢ်ဖိလီၤ. လၢအဝဲသ့ၣ်အဂီၢ်န့ၣ် တၢ်လၢစီၤပီလူးတဲဝဲတဖၣ်န့ၣ် လီၤဂာ်ဒ် “တၢ်သိၣ်တၢ်သီအသီ” အဃိ အဝဲသ့ၣ် တဲစီၤပီလူးလၢ “နဒုးဟူဘၣ်ပနၢ်ပူၤလၢ တၢ်လီၤဆီတဖၣ်န့ၣ်လီၤ.”—မၤတၢ် ၁၇:၁၈-၂၀.
၇. ဒ် မၤတၢ် ၁၇:၂၂, ၂၃ ပာ်ဖျါထီၣ်ဝဲအသိး စီၤပီလူးဆီတလဲ အတၢ်စံၣ်တဲၤတဲလီၤတၢ် အကျိၤအကျဲဒ်လဲၣ်.
၇ ဖး မၤတၢ် ၁၇:၂၂, ၂၃ တက့ၢ်. စီၤပီလူး တစးထီၣ်တဲတၢ်ဒီး ပှၤအၤသ့ၣ်ဖိလၢအမ့ၢ် ပှၤတခီဘီမုၢ်ဖိတဖၣ် ဒ်အတဲတၢ်ဒီး ပှၤယူဒၤဖိလၢ ဘူၣ်ဘျီၣ်ပူၤအသိးဘၣ်. ဘၣ်သ့ၣ်သ့ၣ် စီၤပီလူး ကသံကွၢ်လီၤအသးလၢ ‘ပှၤအၤသ့ၣ်ဖိတဖၣ်န့ၣ် နာ်ဝဲတၢ်မနုၤလဲၣ်’ န့ၣ်လီၤ. ဒီးအဝဲပာ်သူၣ်ပာ်သး တၢ်အိၣ်လၢ အကပိာ်ကပၤ ဒီးပှၤဂၤအတၢ်ဘူၣ်တၢ်ဘါ အလုၢ်အလၢ်လီၤ. ဒ်သိးစီၤပီလူး ကစးထီၣ်တဲ လံာ်စီဆှံအတၢ်မ့ၢ်တၢ်တီအဂီၢ် အစးထီၣ်တဲ တၢ်ဂ့ၢ်လၢအဝဲသ့ၣ် တူၢ်လိာ်ပာ်စၢၤဝဲန့ၣ်လီၤ. ပှၤကူၣ်ဘၣ်ကူၣ်သ့လၢ ဘၣ်ဃးလံာ်စီဆှံတဂၤ တဲဝဲလၢ “ဒ်ပှၤယူဒၤဖိတဂၤအသိး အဝဲ [စီၤပီလူး] သ့ၣ်ညါဝဲလၢ ပှၤကြံး(စ်) ဖိလၢအမ့ၢ် ပှၤသူခိၣ်ဖိတဖၣ်န့ၣ် တဘူၣ်ထီၣ်ဘါထီၣ်ဝဲ ပှၤယူဒၤဖိ ဒီးပှၤခရံာ်ဖိအယွၤ လၢအမ့ၢ်ယွၤလၢ ‘အမ့ၢ်အတီ’ ဘၣ်. ဘၣ်ဆၣ် အဝဲဂုာ်ကျဲးစၢး ပာ်ဖျါထီၣ်ဝဲလၢ နီၢ်ကီၢ်န့ၣ် ကစၢ်ယွၤလၢ အစံၣ်တဲၤတဲလီၤဝဲအဂ့ၢ်တဂၤန့ၣ် တအိၣ်ယံၤဒီး ပှၤအၤသ့ၣ်ဖိတဖၣ်ဘၣ်.” အဃိ ပထံၣ်ဘၣ်လၢ စီၤပီလူး သးအိၣ်ဆီတလဲ အတၢ်စံၣ်တဲၤတဲလီၤတၢ် အကျိၤအကျဲလီၤ. အဝဲတဲဘၣ် ပှၤအၤသ့ၣ်ဖိတဖၣ်လၢ တၢ်ကစီၣ်လၢအတဲဝဲန့ၣ် အဟဲလၢ “ကစၢ်လၢ” အဝဲသ့ၣ် “တသ့ၣ်ညါဘၣ်အီၤ” လၢအဝဲသ့ၣ် ဂုာ်ကျဲးစၢးဘါထီၣ်ဝဲတဂၤ အအိၣ်လီၤ. ပှၤတခီဘီမုၢ်ဖိတဖၣ် တသ့ၣ်ညါဝဲ လံာ်စီဆှံအဂ့ၢ်ဘၣ် သနာ်က့ စီၤပီလူး တဆိကမိၣ်ဝဲလၢ အဝဲသ့ၣ် တကဲထီၣ်ခရံာ်အပျဲၢ်အဘီၣ် နီတဘျီဘၣ်န့ၣ်ဘၣ်. လၢတၢ်န့ၣ်အလီၢ် စီၤပီလူး ထံၣ်အဝဲသ့ၣ်ဒ် ဘုလၢအခါဘၣ်လၢ ပှၤကဘၣ်ကူးအီၤ အဃိအဝဲဆီတလဲ အတၢ်စံၣ်တဲၤတဲလီၤတၢ် အကျိၤအကျဲလီၤ.
ကွၢ်လိမၤဒိး စီၤပီလူးအဒိအတဲာ်, ပာ်သူၣ်ပာ်သး တၢ်လၢနခိၣ်နဃၢၤ, ဆီတလဲ နတၢ်စံၣ်တဲၤတဲလီၤ အကျိၤအကျဲ ဒီးထံၣ်ပှၤဂၤတဖၣ် ဒ်ပှၤလၢအကဲထီၣ် ခရံာ်အပျဲၢ်အဘီၣ်သ့န့ၣ်တက့ၢ် (ကွၢ်လံာ်အဆၢ ၈, ၁၂, ၁၈) *
၈. (က) ဒ်သိးနကသ့ၣ်ညါလၢ ပှၤလၢနလီၢ်ကဝီၤပူၤတဖၣ် နာ်တၢ်မနုၤလဲၣ်အဂီၢ် နကဘၣ်မၤဒ်လဲၣ်. (ခ) ပှၤတဂၤ မ့ၢ်တဲနၤလၢ အအိၣ်ဒီး အတၢ်ဘူၣ်တၢ်ဘါလံန့ၣ် နကတဲဆၢအီၤဒ်လဲၣ်.
၈ ဒ်စီၤပီလူးအသိး ပာ်သူၣ်ပာ်သး တၢ်လၢနခိၣ်နဃၢၤတက့ၢ်. ပာ်သူၣ်ပာ်သး တၢ်လၢနခိၣ်နဃၢၤ ဒ်သိးနကသ့ၣ်ညါလၢ ပှၤလၢနဟီၣ်ကဝီၤပူၤတဖၣ် နာ်ဝဲတၢ်ဂ့ၢ်မနုၤလဲၣ်န့ၣ်တက့ၢ်. အဒိ ပာ်သူၣ်ပာ်သးလၢ ဟံၣ်ကစၢ်န့ၣ် မၤဃံမၤလၤဝဲအဟံၣ် မ့တမ့ၢ် အတၢ်ဖိတၢ်လံၤ ဒ်လဲၣ်. မ့ၢ်အဝဲအမံၤ, အတၢ်ကူတၢ်သိး ဒီးအတၢ်စံးတၢ်ကတိၤတဖၣ်န့ၣ် ပာ်ဖျါထီၣ်ဝဲလၢ အဘါတၢ်ဘါမနုၤလဲၣ်န့ၣ်တက့ၢ်. ဘၣ်သ့ၣ်သ့ၣ် အဝဲသ့ၣ် ကတဲနၤလိၤလိၤလၢ အဝဲသ့ၣ် အိၣ်ဒီးအတၢ်ဘူၣ်တၢ်ဘါလံ. ဒီပုၢ်ဝဲၢ်မုၣ်ဖျူထရၤ လၢအမ့ၢ် ပှၤလဲၤလၢညါတဂၤန့ၣ် တဲဝဲလၢ “ယဟဲလၢ နအိၣ်န့ၣ် တမ့ၢ်လၢယကမၢဆူၣ်နၤ လၢနကနာ်တၢ် ဒ်သိးဒီးယၤဘၣ်, အိၣ်ဒၣ် ယအဲၣ်ဒိးတဲဘၣ်နၤ တၢ်ဂ့ၢ်လၢအမ့ၢ် . . .” လီၤ.
၉. ပှၤလၢအအိၣ်ဒီး အတၢ်ဘူၣ်တၢ်ဘါတဖၣ် အတၢ်နာ်လၢ နတူၢ်လိာ်အီၤသ့န့ၣ် ကမ့ၢ်မနုၤတဖၣ်လဲၣ်.
၉ ဖဲနတဲတၢ်ဒီး ပှၤလၢအအိၣ်ဒီး တၢ်ဘူၣ်တၢ်ဘါတဖၣ်အခါ နကတဲသကိး တၢ်ဂ့ၢ်မနုၤလဲၣ်. ဂုာ်ကျဲးစၢး ဃုသ့ၣ်ညါ အဝဲသ့ၣ်အတၢ်နာ်လၢ နတူၢ်လိာ်အီၤတဖၣ်တက့ၢ်. အဒိ ဘၣ်သ့ၣ်သ့ၣ် အဝဲကဘူၣ်ထီၣ်ဘါထီၣ် ထဲကစၢ်ယွၤ ထဲတဂၤဧိၤ, ကတူၢ်လိာ်ဝဲယ့ၣ်ၡူး ဒ်တၢ်အုၣ်က့ၤခီၣ်က့ၤကစၢ် မ့တမ့ၢ် ဘၣ်သ့ၣ်သ့ၣ် အဝဲကတူၢ်လိာ်ဝဲလၢ ပအိၣ်မူဘၣ်လၢ တၢ်ဆၢကတီၢ် လၢအအၢအသီ လၢကကတၢၢ်ကွံာ်ဝဲ ဘူးထီၣ်လံန့ၣ်လီၤ. စးထီၣ်တဲ အဝဲသ့ၣ် အတၢ်နာ်လၢ နတူၢ်လိာ်အီၤသ့တဖၣ် ဒီးတဲဘၣ်အီၤ လံာ်စီဆှံ အတၢ်ကစီၣ်လၢ ကျဲလၢအကထုးန့ၢ် အဝဲသ့ၣ် အသးန့ၣ်တက့ၢ်.
၁၀. ပကဘၣ်ကျဲးစၢး ဃုသ့ၣ်ညါ တၢ်မနုၤလဲၣ် ဒီးဘၣ်မနုၤအဃိလဲၣ်.
၁၀ သ့ၣ်နီၣ်ထီၣ်လၢ ပှၤတနီၤန့ၣ် တနာ်ဝဲ တၢ်လၢအတၢ်ဘူၣ်တၢ်ဘါခိၣ်နၢ်တဖၣ် သိၣ်လိဝဲ ကိးမံၤဒဲးဘၣ်. အဃိ နမ့ၢ်သ့ၣ်ညါထီၣ်လၢ ပှၤတဂၤ ဘၣ်ထွဲဒီး တၢ်ဘူၣ်တၢ်ဘါ ဖဲလဲၣ်တဖုလဲၣ် သနာ်က့ ဂုာ်ကျဲးစၢး ဃုသ့ၣ်ညါလၢ အနာ်ဝဲတၢ်မနုၤလဲၣ်န့ၣ်တက့ၢ်. ဒ့ဘ့းလၢအမ့ၢ် ပှၤလဲၤလၢညါလီၤဆီ လၢအအိၣ်လၢ ကီၢ်အီးစတြ့လံယါတဂၤန့ၣ် တဲဝဲလၢ “ပှၤအါဂၤန့ၣ် ကျဲၣ်ကျီဝဲ အတၢ်ဘူၣ်တၢ်ဘါ အတၢ်စူၢ်တၢ်နာ် ဒီးပှၤဟီၣ်ခိၣ်ဖိ အတၢ်ထံၣ်န့ၣ်လီၤ.” ဒနီထၤ လၢအအိၣ်လၢ ကီၢ်အဲလ်ဘ့နံယါန့ၣ် တဲဝဲလၢ “ပှၤလၢပထံၣ်ဘၣ်အီၤတနီၤ မ့ၢ်တဲဝဲလၢ အအိၣ်ဒီး အတၢ်ဘူၣ်တၢ်ဘါ ဘၣ်ဆၣ်လၢခံန့ၣ် အဝဲသ့ၣ်တဲဝဲလၢ အတနာ် ကစၢ်ယွၤဘၣ်.” ဒီပုၢ်ဝဲၢ်ခွါတဂၤ လၢအကဲမံးၡ့ၣ်နရ့ၣ် ဒီးအအိၣ်လၢ ကီၢ်အၣ်ကၠ့ၣ်တံနါန့ၣ် တဲဝဲလၢ ပှၤတနီၤန့ၣ် မ့ၢ်တဲဝဲလၢ အနာ်ယွၤသၢဂၤတဂၤဃီ ဘၣ်ဆၣ် နီၢ်ကီၢ်န့ၣ် လီၤဂာ်လၢ အဝဲသ့ၣ်တနာ်ဝဲလၢ ပၢ်, ဖိခွါ ဒီးသးစီဆှံန့ၣ် မ့ၢ်ပှၤတဂၤဃီဘၣ်. အဝဲတဲဝဲလၢ “ဖဲယသ့ၣ်ညါထီၣ်လၢ ပှၤလၢယတဲတၢ်ဒီးအီၤတဂၤ တနာ်ဝဲ အတၢ်ဘူၣ်တၢ်ဘါ အတၢ်သိၣ်လိခဲလၢာ်ဘၣ်အခါ ညီထီၣ်လၢ ပကစးထီၣ်တဲသကိး တၢ်အဂီၢ်လီၤ.” လၢတၢ်န့ၣ်အဃိ ဂုာ်ကျဲးစၢး ဃုသ့ၣ်ညါ ပှၤလၢနတဲတၢ်ဒီးအီၤတဂၤ အတၢ်စူၢ်တၢ်နာ်တက့ၢ်. နမ့ၢ်မၤဒ်န့ၣ်န့ၣ် ဒ်စီၤပီလူးအသိး နကကဲထီၣ် “တၢ်ခဲလၢာ်” လၢ “ပှၤခဲလၢာ်အဂီၢ်” လီၤ.—၁ ကရံၣ်သူး ၉:၁၉-၂၃.
အဝဲသ့ၣ် သူၣ်အိၣ်သးအိၣ်ဝဲ တၢ်မနုၤလဲၣ်
၁၁. ဒ် မၤတၢ် ၁၄:၁၄-၁၇ ပာ်ဖျါထီၣ်ဝဲအသိး စီၤပီလူး စံၣ်တဲၤတဲလီၤဝဲ ပှၤလူစတြၤဖိ လၢကျဲလၢ ကထုးန့ၢ်အဝဲသ့ၣ်အသး ဒ်လဲၣ်.
၁၁ ဖး မၤတၢ် ၁၄:၁၄-၁၇ တက့ၢ်. စီၤပီလူး သ့ၣ်ညါထီၣ်ဝဲ ပှၤလၢအဒိကနၣ်အီၤတဖၣ် သူၣ်အိၣ်သးအိၣ်ဝဲ တၢ်မနုၤလဲၣ် ဝံၤအလီၢ်ခံ အဝဲဆီတလဲ အတၢ်စံၣ်တဲၤတဲလီၤတၢ် အကျိၤအကျဲလီၤ. အဒိ ပှၤဂီၢ်မုၢ်လၢ စီၤပီလူးတဲတၢ်ဒီးအီၤလၢ ဝ့ၢ်လူစတြၤန့ၣ် သ့ၣ်ညါဝဲ လံာ်စီဆှံ ထဲတစဲး မ့တမ့ၢ် တသ့ၣ်ညါဝဲ နီတစဲးဘၣ်. အဃိ စီၤပီလူး တဲတၢ်ဒီးအဝဲသ့ၣ်လၢ ကျဲလၢအဝဲသ့ၣ် နၢ်ပၢၢ်ဘၣ်ဝဲညီန့ၣ်လီၤ. အဝဲတဲတၢ်လၢ ဘၣ်ဃးဒီး တၢ်သူထီၣ်သၣ်ထီၣ် အဆၢကတီၢ် ဒီးပှၤဟီၣ်ခိၣ်ဖိတဖၣ်န့ၣ် အိၣ်ဒီးတၢ်သးခုလၢ အတၢ်အိၣ်မူပူၤသ့အဂ့ၢ်လီၤ. အသူဝဲ တၢ်ကတိၤ ဒီးတၢ်အဒိလၢ ပှၤဒိကနၣ်တၢ်ဖိတဖၣ် နၢ်ပၢၢ်ဘၣ်ဝဲညီလီၤ.
၁၂. ပှၤတဂၤ သူၣ်အိၣ်သးအိၣ်ဝဲ တၢ်မနုၤလဲၣ်န့ၣ် နသ့ၣ်ညါအီၤ ကသ့ဒ်လဲၣ် ဒီးနဆီတလဲ နတၢ်စံၣ်တဲၤတဲလီၤတၢ် အကျိၤအကျဲ ကသ့ဒ်လဲၣ်.
၁၂ ပှၤလၢနလီၢ်ကဝီၤပူၤတဖၣ် သူၣ်အိၣ်သးအိၣ် တၢ်မနုၤလဲၣ်န့ၣ် ဃုသ့ၣ်ညါလၢ တၢ်ကူၣ်သ့အပူၤ ဒီးဆီတလဲ နတၢ်စံၣ်တဲၤတဲလီၤတၢ် အကျိၤအကျဲ တက့ၢ်. ဖဲနထံၣ်လိာ်သးဒီး ဟံၣ်ကစၢ်အခါ နသ့ၣ်ညါ တၢ်လၢအဝဲသ့ၣ် သူၣ်အိၣ်သးအိၣ်ဝဲ ကသ့ဒ်လဲၣ်. ပာ်သူၣ်ပာ်သး တၢ်လၢနကပိာ်ကပၤတက့ၢ်. ဘၣ်သ့ၣ်သ့ၣ် နကထံၣ်ဘၣ်လၢ အဝဲကွၢ်ထွဲအကရၢၢ်, ဖးလံာ်, ဘှီဂ့ၤထီၣ်အကါ မ့တမ့ၢ် မၤတၢ်လၢအဂၤ တမံၤမံၤလီၤ. အဃိ ဘၣ်သ့ၣ်သ့ၣ် ပစးထီၣ်တဲသကိးတၢ်ဒီးအီၤ ဘၣ်ဃးဒီး တၢ်လၢအမၤဝဲတဖၣ်သ့လီၤ. (ယိၤဟၣ် ၄:၇) ဒီးတၢ်ကူတၢ်သိးလၢ အဝဲသ့ၣ် ကူသိးဝဲန့ၣ် ကပာ်ဖျါထီၣ်ဝဲလၢ အမ့ၢ်ကလုာ်မနုၤလဲၣ်, အမၤတၢ်မၤမနုၤလဲၣ် မ့တမ့ၢ် တၢ်လိာ်ကွဲအဖွဲးလၢ အဘၣ်သူၣ်ဘၣ်သးဝဲ ဒိၣ်ကတၢၢ် မ့ၢ်ဖဲလဲၣ်တဖွဲးလဲၣ်န့ၣ်လီၤ. ကစတါဘိၤ တဲဝဲလၢ “ယတဲတၢ်ဒီး ပိာ်ခွါတဂၤလၢ အသးအိၣ် ၁၉ နံၣ်ဒီးကၤဝဲ ဆ့ကၤလၢ အအိၣ်ဒီး ပှၤသးဝံၣ်တၢ်ဖိလၢ အမံၤဟူသၣ်ဖျါတဂၤအဂီၤ ဒီးယသံကွၢ်အီၤ ဘၣ်ဃးဒီး အဆ့ကၤတဘ့ၣ်အံၤ ဒီးအဝဲတဲယၤလၢ ဘၣ်မနုၤအဃိ အဘၣ်သူၣ်ဘၣ်သးဝဲ ပှၤသးဝံၣ်တၢ်ဖိတဂၤအံၤလဲၣ်န့ၣ်လီၤ. ပတဲသကိးတၢ်ဒ်အံၤ တဆီဘၣ်တဆီဒီး လဲၤတုၤလၢ တၢ်မၤလိလံာ်စီဆှံအဂ့ၢ်လီၤ. ခဲအံၤဒု အဝဲကဲထီၣ် ပဒီပုၢ်ဝဲၢ်ခွါတဂၤလံ.”
၁၃. နတဲဘၣ်ပှၤဂၤလၢ တၢ်မၤလိလံာ်စီဆှံ အတၢ်ရဲၣ်တၢ်ကျဲၤအဂ့ၢ် လၢကျဲလၢအထုးန့ၢ်ပှၤသး ကသ့ဒ်လဲၣ်.
၁၃ နမ့ၢ်စးထီၣ်မၤ မၤလိလံာ်စီဆှံဒီးပှၤတဂၤလံန့ၣ် မၤအီၤဒ်သိး ကထုးန့ၢ် အဝဲသ့ၣ်အသူၣ်အသး ဒီးပာ်ဖျါထီၣ်န့ၢ်အီၤလၢ တၢ်မၤလိလံာ်စီဆှံန့ၣ် ကကဲဘျုးလၢအဂီၢ် ဒ်လဲၣ်န့ၣ်တက့ၢ်. (ယိၤဟၣ် ၄:၁၃-၁၅) အဒိ ဘၣ်တဘျီ ပိာ်မုၣ်လၢ အသးအိၣ်တၢ်မ့ၢ်တၢ်တီတဂၤန့ၣ် ကိးနုာ်ဒီပုၢ်ဝဲၢ်မုၣ်ဖးဖံၤ လၢအဟံၣ်ပူၤလီၤ. အဃိ ဖဲဒီပုၢ်ဝဲၢ်မုၣ်ဖးဖံၤထံၣ်ဝဲ ပှၤဖျိကၠိအလံာ်အုၣ်အသးတဖၣ်လၢ ပိာ်မုၣ်တဂၤအံၤ ဟံၣ်ဒူၣ်လိၤအခါ အဝဲသ့ၣ်ညါဝဲလၢ ပိာ်မုၣ်တဂၤအံၤ မ့ၢ်ပှၤကူၣ်ဘၣ်ကူၣ်သ့ ဖးဒိၣ်တဂၤလီၤ. အဃိ အဝဲတဲ ပိာ်မုၣ်တဂၤန့ၣ်လၢ ပဝဲစ့ၢ်ကီး ပသိၣ်လိ ပှၤဂၤလၢ တၢ်ကူၣ်ဘၣ်ကူၣ်သ့ ခီဖျိလၢ တၢ်မၤလိလံာ်စီဆှံ အတၢ်ရဲၣ်တၢ်ကျဲၤ ဒီးတၢ်အိၣ်ဖှိၣ်ရိဖှိၣ်လီၤ. ပိာ်မုၣ်တဂၤအံၤ တူၢ်လိာ်တၢ်မၤလိလံာ်စီဆှံ ဒီးလၢခံတသီန့ၣ် အလဲၤထီၣ်တၢ်အိၣ်ဖှိၣ်လီၤ. ဒီးတယံာ်ဘၣ်န့ၣ် အဝဲလဲၤထီၣ်ဝဲ ကဝီၤအတၢ်အိၣ်ဖှိၣ်လီၤ. တနံၣ်ဝံၤအလီၢ်ခံ အဝဲဒိးဘျၢထံလီၤ. အဃိ သံကွၢ်လီၤနသးလၢ ‘ပှၤလၢယက့ၤကဒါက့ၤဆူအအိၣ်န့ၣ် သူၣ်အိၣ်သးအိၣ်ဝဲ တၢ်မနုၤလဲၣ်, မ့ၢ်ယတဲဘၣ်အဝဲသ့ၣ် တၢ်မၤလိလံာ်စီဆှံအဂ့ၢ် လၢကျဲလၢ အကထုးန့ၢ် အဝဲသ့ၣ်အသး ကသ့ဧါ.’
၁၄. ပှၤမၤလိလံာ်စီဆှံဖိ တဂၤဒီးတဂၤန့ၣ် တဒ်သိးလိာ်အသးဘၣ်အဃိ နဆီတလဲ နတၢ်သိၣ်လိ အကျိၤအကျဲ ကသ့ဒ်လဲၣ်.
၁၄ ဖဲနစးထီၣ် မၤလိလံာ်စီဆှံဒီးပှၤတဂၤ ဝံၤအခါ ကတဲာ်ကတီၤနသးလၢ ပှၤမၤလိလံာ်စီဆှံဖိ တဂၤစုာ်စုာ်အဂီၢ်, ဆိကမိၣ် ဘၣ်ဃးဒီးအဝဲသ့ၣ် အဟံၣ်ဖိဃီဖိ, အတၢ်ကူၣ်ဘၣ်ကူၣ်သ့ အပတီၢ်, အတၢ်လဲၤခီဖျိ ဒီးတၢ်လၢ အသူၣ်အိၣ်သးအိၣ်ဝဲတဖၣ်န့ၣ်တက့ၢ်. ဖဲနကတဲာ်ကတီၤနသးလၢ နပှၤမၤလိလံာ်စီဆှံဖိအဂီၢ်အခါ ဃုထၢပာ်စၢၤလံာ်စီဆှံအဆၢလၢ နကဖးအီၤ, တၢ်ဂီၤမူလၢ နကပၠးအီၤ ဒီးတၢ်အဒိလၢ နကသူအီၤ ဒ်သိးနကတဲဖျါထီၣ် တၢ်မ့ၢ်တၢ်တီအဂီၢ်တက့ၢ်. သံကွၢ်လီၤနသးလၢ ‘တၢ်လၢကထုးန့ၢ်အသး ဒိၣ်ကတၢၢ်န့ၣ် မ့ၢ်မနုၤလဲၣ်’ န့ၣ်တက့ၢ်. (ကတိၤဒိ ၁၆:၂၃) ပိာ်မုၣ်တဂၤလၢ အအိၣ်လၢ ကီၢ်အဲလ်ဘ့နံယါ ဒီးအမၤလိလံာ်စီဆှံဒီး ဒီပုၢ်ဝဲၢ်မုၣ်ဖျိရၤ လၢအမၤ ပှၤလဲၤလၢညါတဂၤန့ၣ် တဲဝဲလိၤလိၤလၢ “တၢ်ဂဲၤဆၢထၢၣ်သမူထီၣ်က့ၤအဂ့ၢ်န့ၣ် ယတူၢ်လိာ်အီၤ တသ့ဘၣ်.” ဘၣ်ဆၣ် ဖျိရၤတမၢဆူၣ်ဝဲ ပိာ်မုၣ်တဂၤအံၤလၢ ကတူၢ်လိာ် တၢ်သိၣ်လိတခါအံၤ တဘျီဃီဘၣ်. အဝဲတဲဝဲလၢ “ယဆိကမိၣ်လၢ တချုးလၢ အဝဲနာ် တၢ်ဂဲၤဆၢထၢၣ်သမူထီၣ်က့ၤဒံးဘၣ်န့ၣ် အဆိကတၢၢ် အဝဲကဘၣ်သ့ၣ်ညါဝဲ ကစၢ်ယွၤလၢ အအၢၣ်လီၤဝဲ တၢ်ဂဲၤဆၢထၢၣ်သမူထီၣ်က့ၤတဂၤ အဂ့ၢ်န့ၣ်လီၤ.” စးထီၣ်ဖဲန့ၣ်န့ၣ် ဖဲအဝဲသ့ၣ် မၤလိလံာ်စီဆှံ တဘျီဂ့ၤတဘျီဂ့ၤန့ၣ် ဖျိရၤတဲဘၣ်အီၤ ယဟိဝၤယွၤ အတၢ်အဲၣ်, အတၢ်ကူၣ်သ့ ဒီးအတၢ်စိတၢ်ကမီၤအဂ့ၢ်လီၤ. လၢခံန့ၣ် ပှၤမၤလိလံာ်စီဆှံဖိတဂၤအံၤ တူၢ်လိာ်ဝဲ တၢ်ဂဲၤဆၢထၢၣ်သမူထီၣ်က့ၤလီၤ. တကးဒံးဘၣ် ခဲအံၤန့ၣ် အဝဲကဲထီၣ် ယဟိဝၤပှၤအုၣ်အသးတဂၤလၢ အသူၣ်ဆူၣ်သးဆူၣ်န့ၣ်လီၤ.
ထံၣ်ပှၤဂၤတဖၣ် ဒ်ပှၤလၢအကဲထီၣ် ခရံာ်အပျဲၢ်အဘီၣ်သ့
၁၅. ဒ် မၤတၢ် ၁၇:၁၆-၁၈ ပာ်ဖျါထီၣ်ဝဲအသိး ပှၤအၤသ့ၣ်ဖိတဖၣ် အတၢ်မၤလၢ အကဲထီၣ်တၢ်တံာ်တာ် လၢစီၤပီလူးအဂီၢ်န့ၣ် မ့ၢ်မနုၤလဲၣ် ဒီးဘၣ်မနုၤအဃိ အဝဲဆဲးစံၣ်တဲၤတဲလီၤ အဝဲသ့ၣ်လဲၣ်.
၁၅ ဖး မၤတၢ် ၁၇:၁၆-၁၈ တက့ၢ်. ပှၤအၤသ့ၣ်ဖိတဖၣ်န့ၣ် ဘူၣ်ထီၣ်ဘါထီၣ် တၢ်ဂီၤတၢ်ဖှီၣ်, မၤကမၣ်မုၣ်ကမၣ်ခွါ ဒီးနာ်ဝဲပှၤဟီၣ်ခိၣ်ဖိ အတၢ်ဆိကမိၣ်လၢ အကမၣ်တဖၣ် တကးဒံးဘၣ် ဒုၣ်ဒွဲၣ်စံးအၢ စီၤပီလူးလီၤ. ဘၣ်ဆၣ်စီၤပီလူး ဆဲးစံၣ်တဲၤတဲလီၤ အဝဲသ့ၣ်လီၤ. စီၤပီလူးမ့ၢ်တ့ၢ် “ပှၤဒုၣ်ဒွဲၣ်တၢ်, ဒီးပှၤမၤအၢမၤသီတၢ်, ဒီးပှၤအဒူ” ဘၣ်ဆၣ် အဝဲကဲထီၣ် ခရံာ်ဖိတဂၤလီၤ. (၁ တံၤမသ့း ၁:၁၃) ဒ်ယ့ၣ်ၡူးထံၣ်ဝဲ စီၤပီလူး ဒ်ပှၤလၢအကဲထီၣ် အပျဲၢ်အဘီၣ်တဂၤသ့အသိး စီၤပီလူးစ့ၢ်ကီး ထံၣ်ဝဲပှၤအၤသ့ၣ်ဖိတဖၣ် ဒ်ပှၤလၢအဟဲကဲထီၣ် ခရံာ်အပျဲၢ်အဘီၣ်သ့လီၤ. ဒီးအဝဲအတၢ်ထံၣ်န့ၣ် ဖးဘၣ်ညါလီၤ.—မၤတၢ် ၉:၁၃-၁၅; ၁၇:၃၄.
၁၆-၁၇. ပှၤတဂၤဂ့ၤတဂၤဂ့ၤ ကဲထီၣ်ခရံာ်အပျဲၢ်အဘီၣ် သ့ဧါ, ဟ့ၣ်တၢ်အဒိတက့ၢ်.
၁၆ လၢတၢ်မၢဖိအစိၤန့ၣ် ပှၤလၢအဟဲလၢ တၢ်အိၣ်သးအကလုာ်ကလုာ်တဖၣ်န့ၣ် ကဲထီၣ်ယ့ၣ်ၡူးအပျဲၢ်အဘီၣ်လီၤ. ဖဲစီၤပီလူး ကွဲးလံာ်ဆူ ခရံာ်ဖိလၢအအိၣ်လၢ ကြံး(စ်)အဝ့ၢ်ကရံၣ်သူးအခါ အဝဲတဲဝဲလၢ တၢ်အိၣ်ဖှိၣ်ဖိတနီၤန့ၣ် တဘျီခါ အဝဲသ့ၣ် မ့ၢ်ပှၤလၢ အမၤတၢ်အၢတၢ်သီ ဒီးအတၢ်သကဲာ်ပဝး လီၤရၢၢ်ဒိၣ်မးလီၤ. ဒီးအဝဲတဲဝဲလၢ “သုဝဲတနီၤနီၤ, သုမ့ၢ်တ့ၢ်ပှၤဒ်န့ၣ်အသိး . . . သုဘၣ်သ့စီကွံာ်, ဒီးသုစီဆှံထီၣ်” လီၤ. (၁ ကရံၣ်သူး ၆:၉-၁၁) မ့ၢ်နထံၣ် ပှၤဒ်န့ၣ်တဖၣ် ဒ်ပှၤလၢအဆီတလဲ အတၢ်အိၣ်မူသ့ ဒီးအကဲထီၣ် ခရံာ်အပျဲၢ်အဘီၣ်သ့န့ၣ်ဧါ.
၁၇ မုၢ်မဆါတနံၤအံၤ ပှၤအါဂၤ အဲၣ်ဒိးကဲထီၣ် ခရံာ်အပျဲၢ်အဘီၣ်အဃိ အဝဲသ့ၣ် ဆီတလဲအသးလီၤ. ဒီပုၢ်ဝဲၢ်မုၣ်ယူကံနၢ် လၢအအိၣ်လၢ ကီၢ်အီးစတြ့လံယါ ဒီးအမ့ၢ်ပှၤလဲၤလၢညါ လီၤဆီတဂၤန့ၣ် ထံၣ်ဘၣ်ဝဲလၢ ပှၤတဂၤ မ့မ့ၢ်ပှၤဒ်လဲၣ်ဂ့ၤဒ်လဲၣ်ဂ့ၤ သးအိၣ်ဒိကနၣ်ဝဲ လံာ်စီဆှံ အတၢ်ကစီၣ်သ့လီၤ. ဘၣ်တဘျီ ဖဲရူတဖျၢၣ်အမဲာ်ညါန့ၣ် အဝဲထံၣ်ဝဲ ပိာ်မုၣ်လၢ အဆဲးကံၣ်ဃ့အသး (ဆဲးယီၢ်အသး) ဒီးအကူသိးဝဲ တၢ်ကူတၢ်သိးပွးပွးလီၤ. အဝဲတဲဝဲလၢ “လၢအခီၣ်ထံးန့ၣ် ယတအဲၣ်ဒိး လဲၤတဲတၢ်ဒီးအီၤဘၣ်. ဘၣ်ဆၣ်လၢခံ ယလဲၤတဲတၢ်ဒီးအီၤလီၤ. အဃိ ယသ့ၣ်ညါဘၣ်လၢ အဝဲသူၣ်အိၣ်သးအိၣ် လံာ်စီဆှံဒိၣ်မးလီၤ. မ့ၢ်လၢတၢ်လၢ အဆဲးကံၣ်ဃ့အသးအကျါတနီၤန့ၣ် ပၣ်ဃုာ်ဒီး ထါစံးထီၣ်ပတြၢၤ အဆၢဖိတဖၣ်” လီၤ. ပိာ်မုၣ်တဂၤအံၤ စးထီၣ်မၤလိလံာ်စီဆှံ ဒီးဟဲထီၣ်တၢ်အိၣ်ဖှိၣ်လီၤ. *
၁၈. ဘၣ်မနုၤအဃိ ပတကြၢးစံၣ်ညီၣ် ပှၤဂၤဘၣ်လဲၣ်.
၁၈ ဖဲယ့ၣ်ၡူးတဲဝဲလၢ ပှၤကူးဘုအကတီၢ်ဘၣ်လံအခါ မ့ၢ်အဝဲမုၢ်လၢ်ဝဲလၢ ပှၤအါဂၤကပိာ်အခံဧါ. အဝဲတမုၢ်လၢ်ဝဲ ဒ်န့ၣ်ဘၣ်. လံာ်စီဆှံ တဲဆိပာ်စၢၤဝဲလၢ ထဲဒၣ်ပှၤစှၤဂၤန့ၣ် ကနာ်အီၤလီၤ. (ယိၤဟၣ် ၁၂:၃၇, ၃၈) ဒီးယ့ၣ်ၡူး အိၣ်ဒီးတၢ်သ့တၢ်ဘၣ်လၢ အသ့ၣ်ညါပှၤသးလီၤ. (မးသဲ ၉:၄) ဘၣ်ဆၣ် အဝဲသးစၢၢ်ဆၢ ပှၤစှၤဂၤလၢ အကနာ်အီၤ ဒီးစံၣ်တဲၤတဲလီၤ ပှၤကိးဂၤဒဲး လၢတၢ်သူၣ်ဆူၣ်သးဆူၣ်အပူၤလီၤ. မ့မ့ၢ်ပဝဲသ့ၣ်တဖၣ်န့ၣ် ပတသ့ၣ်ညါ တၢ်အိၣ်လၢ ပှၤဂၤအသးပူၤဘၣ်အဃိ ပတကြၢး စံၣ်ညီၣ်ပှၤတဂၤစုာ်စုာ် မ့တမ့ၢ် ပှၤလၢအအိၣ်လၢ ပလီၢ်ကဝီၤတဖၣ်ဘၣ်. လၢတၢ်န့ၣ်အလီၢ် ပထံၣ်အဝဲသ့ၣ် ဒ်ပှၤလၢအဟဲကဲထီၣ် ခရံာ်အပျဲၢ်အဘီၣ်သ့လီၤ. မးခ်လၢအမ့ၢ်မံးၡ့ၣ်နရ့ၣ် ဒီးအအိၣ်လၢ ကီၢ်ဘၠူခံနၤ ဖၣ်စိၤန့ၣ် တဲဝဲလၢ “ပှၤလၢယဆိကမိၣ်လၢ ကလဲၤထီၣ်လဲၤထီန့ၣ် ညီနုၢ်တမၤလိ လံာ်စီဆှံလၢၤဘၣ်. ဘၣ်ဆၣ် ပှၤလၢယဆိကမိၣ်လၢ အတလဲၤထီၣ်လဲၤထီ အါအါဘၣ်န့ၣ် ညီနုၢ်အလဲၤထီၣ်လဲၤထီ ဂ့ၤဂ့ၤလီၤ. အဃိ ယသ့ၣ်ညါထီၣ်လၢ ပကဘၣ်ပျဲလၢ ယဟိဝၤယွၤ အသးစီဆှံ ကဟံးစုနဲၣ်ကျဲပှၤန့ၣ် မ့ၢ်တၢ်လၢအဂ့ၤကတၢၢ်လီၤ.”
၁၉. ပှၤလၢအအိၣ်လၢ ပလီၢ်ကဝီၤပူၤတဖၣ်န့ၣ် ပကြၢးထံၣ်အီၤဒ်လဲၣ်.
၁၉ လၢအခီၣ်ထံးန့ၣ် ဘၣ်သ့ၣ်သ့ၣ် နကဆိကမိၣ်ဘၣ်လၢ ပှၤလၢနလီၢ်ကဝီၤပူၤတဖၣ် လၢအလီၤဂာ်ဒ် ဘုလၢအခါဘၣ်လၢ ပှၤကကူးအီၤအဂီၢ်န့ၣ် တအိၣ်အါအါဘၣ်. ဘၣ်ဆၣ် သ့ၣ်နီၣ်ထီၣ်လၢ ယ့ၣ်ၡူးတဲဘၣ် အပျဲၢ်အဘီၣ်တဖၣ်လၢ ဘုဂီၤထီၣ်လံန့ၣ်တက့ၢ်. အဝဲအဲၣ်ဒိးတဲဝဲလၢ အခါဘၣ်လၢ ပှၤကကူးဘုအဂီၢ်လံန့ၣ်လီၤ. ပှၤကိးဂၤဒဲး ဆီတလဲအသး ဒီးကဲထီၣ်ခရံာ်အပျဲၢ်အဘီၣ်သ့လီၤ. ယဟိဝၤယွၤ ထံၣ်ဝဲလၢ ပှၤလၢပလီၢ်ကဝီၤတဖၣ်န့ၣ် ကဲထီၣ်ခရံာ်အပျဲၢ်အဘီၣ်သ့ ဒီးအကဲထီၣ် “တၢ်လုၢ်ဒိၣ်ပှ့ၤဒိၣ်” သ့လီၤ. (ဃးကဲ ၂:၇, NWT) ပမ့ၢ်အိၣ်ဒီးတၢ်ထံၣ် ဒ်ယဟိဝၤယွၤ ဒီးယ့ၣ်ၡူးအသိးန့ၣ် ပကဃုသ့ၣ်ညါ အဝဲသ့ၣ် အတၢ်အိၣ်သး ဒီးတၢ်လၢ အဝဲသ့ၣ် ဘၣ်သူၣ်ဘၣ်သးဝဲတဖၣ်လီၤ. ဒီးပကထံၣ်အဝဲသ့ၣ် ဒ်ပှၤလၢအကဲထီၣ် ပဒီပုၢ်ဝဲၢ်မုၣ်ခွါတဖၣ် သ့န့ၣ်လီၤ.
တၢ်သးဝံၣ် ၅၇ စံၣ်တဲၤတဲလီၤဆူ ပှၤအကလုာ်ကလုာ်
^ လံာ်အဆၢ. 5 ပတၢ်ထံၣ်လၢ ပှၤလၢအအိၣ်လၢ ပဟီၣ်ကဝီၤတဖၣ်အဖီခိၣ်န့ၣ် အဟ့ၣ်ဆူၣ်ထီၣ်ပသး မ့တမ့ၢ် မၤလီၤစၢ်ပသးလၢ တၢ်စံၣ်တဲၤတဲလီၤတၢ် ဒီးတၢ်သိၣ်လိနဲၣ်လိတၢ်အပူၤ သ့ဝဲလီၤ. လၢတၢ်မၤလိအံၤအပူၤ ပကတဲသကိး ဘၣ်ဃးဒီး ယ့ၣ်ၡူးဒီးတၢ်မၢဖိပီလူး သ့ၣ်ညါဝဲလၢ ပှၤလၢအလဲၤစံၣ်တဲၤတဲလီၤဝဲတဖၣ် နာ်တၢ်မနုၤလဲၣ် ဒီးအသူၣ်အိၣ်သးအိၣ်ဝဲ တၢ်မနုၤလဲၣ်န့ၣ်လီၤ. တကးဒံးဘၣ် ပကတဲသကိး ဘၣ်ဃးဒီး အဝဲသ့ၣ်ထံၣ်ဝဲ ပှၤလၢအဒိကနၣ်အီၤတဖၣ် ဒ်ပှၤလၢအကဲထီၣ် ယ့ၣ်ၡူးအပျဲၢ်အဘီၣ်သ့ ဒီးပကွၢ်လိမၤဒိး အဝဲသ့ၣ် ကသ့ဒ်လဲၣ်န့ၣ်လီၤ.
^ လံာ်အဆၢ. 17 ဒ်သိးနကထံၣ်ဘၣ်အါထီၣ် တၢ်ဂ့ၢ်လၢ ဘၣ်ဃးဒီး ပှၤတနီၤဆီတလဲ အတၢ်အိၣ်မူအဂီၢ် ကွၢ်တၢ်ဂ့ၢ်လၢအမ့ၢ် “လံာ်စီဆှံဆီတလဲ ပတၢ်အိၣ်မူ” တက့ၢ်. တၢ်ဂ့ၢ်တဖၣ်အံၤန့ၣ် ဘၣ်တၢ်ပာ်ဖျါထီၣ်အီၤ တုၤလၢ တၢးထီခိးတၢ် ၂၀၁၇ အပူၤလီၤ. ဒီးခဲအံၤန့ၣ် တၢ်ဂ့ၢ်တဖၣ်အံၤ ပှၤဆဲးပာ်ဖျါထီၣ်အီၤလၢ jw.org®. ကွၢ်လၢ ABOUT US > EXPERIENCES တက့ၢ်.
^ လံာ်အဆၢ. 57 တၢ်တဲဖျါထီၣ်တၢ်ဂီၤ အခီပညီ– ဖဲပှၤဒီမါဝၤခံဂၤ လဲၤစံၣ်တဲၤတဲလီၤတၢ် တဟံၣ်ဘၣ်တဟံၣ်အခါ အဝဲသ့ၣ် ပာ်သူၣ်ပာ်သးဝဲ (၁) ဟံၣ်လၢပှၤကတဲာ်ကတီၤအီၤဂ့ၤဂ့ၤ လၢအအိၣ်ဒီးဖီတဖၣ်, (၂) ဟံၣ်ဖိဃီဖိ တဒူၣ်လၢ အအိၣ်ဒီးဖိသၣ်, (၃) ဟံၣ်တဖျၢၣ်လၢ အပူၤမ့ၢ်ဂ့ၤ အချၢမ့ၢ်ဂ့ၤ ပှၤတပာ်အီၤ ကဆှဲကဆှီဘၣ် ဒီး (၄) ဟံၣ်လၢအအဲၣ်တၢ်ဘူၣ်တၢ်ဘါ တဖျၢၣ်လီၤ. ပှၤလၢအဖျါလၢ အကကဲထီၣ် ခရံာ်အပျဲၢ်အဘီၣ် သပှၢ်တၢၢ်န့ၣ် နကထံၣ်န့ၢ်အီၤဖဲလဲၣ်.
