တၢ်မၤလိ ၁၇
“ယကိးက့ၤလံသု လၢတံၤလၢသကိးလံ”
“ယကိးက့ၤလံသု လၢတံၤလၢသကိးလံ. အဂ့ၢ်ဒ်အံၤ, ကယဲၢ်ယနၢ်ဟူတၢ်လၢ ပၢ်အအိၣ်န့ၣ်, ယဘိးဘၣ်သ့ၣ်ညါသုလီၤ.”—ယိၤဟၣ် ၁၅:၁၅.
တၢ်သးဝံၣ် ၁၃ ခရံာ်, မ့ၢ်ပှၤဒိဂ့ၤတဲာ်ဘၣ်လၢပဂီၢ်
တၢ်မၤလိအံၤ အတၢ်တိာ်ပာ် *
၁. ဒ်သိးနကဲထီၣ် ပှၤတဂၤ အသကိးကသ့အဂီၢ် နကဘၣ်မၤဒ်လဲၣ်.
ညီနုၢ်န့ၣ် ဒ်သိးပကကဲထီၣ် ပှၤတဂၤ အသကိးအဂီၢ် ပကဘၣ် ဟ့ၣ်တၢ်ဆၢကတီၢ်လၢ ပကရ့လိာ်ပသးဒီးအီၤလီၤ. ပမ့ၢ်တဲသကိးတၢ်, တဲဘၣ်လိာ်သး တၢ်ဆိကမိၣ် ဒီးတၢ်လဲၤခီဖျိတဖၣ်မး ပကကဲထီၣ်ဒီသကိးလီၤ. ဘၣ်ဆၣ် ပကကဲထီၣ်ယ့ၣ်ၡူး အသကိးအဂီၢ်န့ၣ် တညီဘၣ်. ဘၣ်မနုၤအဃိလဲၣ်.
၂. တၢ်ကီတၢ်ခဲ လၢပထံၣ်ဘၣ်အီၤ အဆိကတၢၢ်တခါန့ၣ် မ့ၢ်မနုၤလဲၣ်.
၂ ဒ်သိး ပကကဲထီၣ် ယ့ၣ်ၡူးအသကိးအဂီၢ် တၢ်ကီတၢ်ခဲ လၢပထံၣ်ဘၣ်အီၤ အဆိကတၢၢ်တခါန့ၣ်မ့ၢ်ဝဲ ပတထံၣ်ဘၣ်ယ့ၣ်ၡူးလၢ မဲာ်သကိးမဲာ် နီတဘျီဘၣ်. ခရံာ်ဖိအါဂၤလၢ တၢ်မၢဖိအစိၤစ့ၢ်ကီး တထံၣ်ဘၣ်ယ့ၣ်ၡူး နီတဘျီဘၣ်. ဘၣ်ဆၣ် တၢ်မၢဖိပ့းတရူး တဲဝဲလၢ “အဝဲဒၣ်န့ၣ် သုတထံၣ်ဘၣ်အီၤဘၣ်ဒီး, သုအဲၣ်အီၤလီၤ. ခဲကနံၣ်အံၤ သုတထံၣ်ဘၣ်နာ်သက့ဒီး, သုနာ်အီၤ” လီၤ. (၁ ပ့းတရူး ၁:၈) လၢတၢ်န့ၣ်အဃိ ပသ့ၣ်ညါဘၣ်လၢ ပမ့ၢ်တထံၣ်ဘၣ်ယ့ၣ်ၡူးလၢ မဲာ်သကိးမဲာ် သနာ်က့ ပကဲထီၣ် အသကိးသ့လီၤ.
၃. တၢ်ကီတၢ်ခဲလၢ ပထံၣ်ဘၣ်အီၤ ခံခါတခါန့ၣ် မ့ၢ်မနုၤလဲၣ်.
၃ ဒ်သိး ပကကဲထီၣ် ယ့ၣ်ၡူးအသကိးအဂီၢ် တၢ်ကီတၢ်ခဲခံခါတခါလၢ ပထံၣ်ဘၣ်န့ၣ်မ့ၢ်ဝဲ ပတဲတၢ်ဒီး ယ့ၣ်ၡူးတသ့ဘၣ်. ဖဲပဃ့ဘါထုကဖၣ်တၢ်အခါ ပတဲတၢ်ဒီး ယဟိဝၤယွၤလီၤ. ပဃ့ဘါထုကဖၣ်တၢ် လၢယ့ၣ်ၡူးအမံၤ ဘၣ်ဆၣ် ပတတဲတၢ်ဒီးယ့ၣ်ၡူးဘၣ်. ဒီးယ့ၣ်ၡူးစ့ၢ်ကီး တအဲၣ်ဒိးလၢ ပကဃ့ဘါထုကဖၣ် လၢအအိၣ်ဘၣ်. ဘၣ်မနုၤအဃိလဲၣ်. တၢ်ထုကဖၣ်န့ၣ်မ့ၢ်ဝဲ တၢ်ဘူၣ်ထီၣ်ဘါထီၣ်တခါ ဒီးပကြၢးဘူၣ်ထီၣ်ဘါထီၣ် ထဲဒၣ်ယဟိဝၤယွၤတဂၤဧိၤလီၤ. (မးသဲ ၄:၁၀) ဘၣ်ဆၣ် ပပာ်ဖျါထီၣ်လၢ ပအဲၣ်ယ့ၣ်ၡူး သ့ဒံးလီၤ.
၄. တၢ်ကီတၢ်ခဲ သၢခါတခါ လၢပထံၣ်ဘၣ်အီၤန့ၣ် မ့ၢ်မနုၤလဲၣ် ဒီးလၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.
၄ ဒ်သိး ပကကဲထီၣ် ယ့ၣ်ၡူးအသကိးအဂီၢ် တၢ်ကီတၢ်ခဲသၢခါတခါလၢ ပထံၣ်ဘၣ်အီၤန့ၣ်မ့ၢ်ဝဲ ယ့ၣ်ၡူးအိၣ်လၢမူခိၣ်အဃိ ပရ့လိာ်သးဒီးအီၤ လၢမဲာ်သကိးမဲာ် တသ့ဘၣ်. ဘၣ်ဆၣ်သနာ်က့ ပသ့ၣ်ညါယ့ၣ်ၡူးအဂ့ၢ် သ့ဒံးအါမးလီၤ. ပကတဲသကိး တၢ်ဂ့ၢ်လွံၢ်ခါ လၢကမၤစၢၤပှၤဒ်သိး ပကမၤဂ့ၤထီၣ် ပတၢ်ရ့လိာ်သးဒီးအီၤန့ၣ်လီၤ. ဘၣ်ဆၣ် အဆိကတၢၢ်န့ၣ် ပကတဲသကိး ဘၣ်ဃးဒီး ဘၣ်မနုၤအဃိ အရ့ဒိၣ်လၢ ပကဘၣ်မၤဂ့ၤထီၣ် ပတၢ်ရ့လိာ်သးဒီး ယ့ၣ်ၡူးန့ၣ်လဲၣ်.
ဘၣ်မနုၤအဃိ အရ့ဒိၣ်လၢ ပကဘၣ်ကဲထီၣ် ယ့ၣ်ၡူးအသကိးလဲၣ်
၅. ဘၣ်မနုၤအဃိ ပကဘၣ်ကဲထီၣ် ယ့ၣ်ၡူးအသကိးလဲၣ်. (ကွၢ်တၢ်လွံၢ်နၢၣ်လၢအမ့ၢ် “ တၢ်ရ့လိာ်သးဒီးယ့ၣ်ၡူးန့ၣ် ကမၤစၢၤပှၤဒ်သိး ပကအိၣ်ဒီး တၢ်ရ့လိာ်သးဒီးယဟိဝၤယွၤ” ဒီး “ ပကြၢးထံၣ် ယ့ၣ်ၡူးအလီၢ်အလၤ ဒ်လဲၣ်” တက့ၢ်.)
၅ ပမ့ၢ်အဲၣ်ဒိး အိၣ်ဒီးတၢ်ရ့လိာ်သးဒီးယဟိဝၤယွၤ ဘူးဘူးတံၢ်တံၢ်န့ၣ် ပကဘၣ်ကဲထီၣ် ယ့ၣ်ၡူးအသကိးလီၤ. ဘၣ်မနုၤအဃိလဲၣ်. ဆိကမိၣ်ကွၢ် တၢ်ဂ့ၢ်ခံခါအံၤတက့ၢ်. တၢ်ဂ့ၢ်တၢတခါန့ၣ် ယ့ၣ်ၡူးတဲဘၣ် အပျဲၢ်အဘီၣ်တဖၣ်လၢ “ပၢ်အကစၢ်ဒၣ်ဝဲ အဲၣ်သုလၢသုအဲၣ်ယၤ . . . အဃိလီၤ.” (ယိၤဟၣ် ၁၆:၂၇) ဒီးအဝဲတဲဝဲလၢ “မ့တမ့ၢ်ဘၣ်ယၤဒီး, ပှၤတဟဲဘၣ်ဆူပၢ်အအိၣ် နီတဂၤဘၣ်.” (ယိၤဟၣ် ၁၄:၆) တကးဒံးဘၣ် ယ့ၣ်ၡူးတဲစ့ၢ်ကီးဝဲလၢ “ယမ့ၢ်သိ အကျဲစၢၤ” လီၤ. (ယိၤဟၣ် ၁၀:၇) အဃိ ပမ့ၢ်ဂုာ်ကျဲးစၢး ဒ်သိးပကကဲထီၣ် ယဟိဝၤယွၤအသကိး ဘၣ်ဆၣ်ပမ့ၢ်တကဲထီၣ် ယ့ၣ်ၡူးအသကိးလၢ အဂ့ၤဘၣ်န့ၣ် ကလီၤဂာ်ဒ်သိး ပဂုာ်ကျဲးစၢး နုာ်လီၤလၢ ဟံၣ်တဖျၢၣ်အပူၤ ဘၣ်ဆၣ် ပတလဲၤနုာ်လီၤခီဖျိလၢ ပဲတြီဘၣ်. ဒီးတၢ်ဂ့ၢ်ခံခါတခါန့ၣ် ယ့ၣ်ၡူးန့ၣ် ကွၢ်လိမၤဒိး အပၢ်အတၢ်ဂ့ၤတၢ်ဝါတဖၣ်လီၤ. အဝဲတဲဘၣ် အတၢ်မၢဖိတဖၣ်လၢ “ပှၤလၢအထံၣ်ယၤန့ၣ်, မ့ၢ်အထံၣ်လံပၢ်န့ၣ်လီၤ.” (ယိၤဟၣ် ၁၄:၉) အဃိ ဒ်သိးပကကဲထီၣ် ယဟိဝၤယွၤ အသကိးအဂီၢ် ပကဘၣ်မၤလိ ယ့ၣ်ၡူးအဂ့ၢ်န့ၣ် မ့ၢ်တၢ်လၢ အရ့ဒိၣ်ဒိၣ်မးလီၤ. ပမ့ၢ်မၤလိ ယ့ၣ်ၡူး အဂ့ၢ်န့ၣ် ပတၢ်အဲၣ်အီၤ ကဒိၣ်ထီၣ် တကးဒံးဘၣ် ပတၢ်ရ့လိာ်သးစ့ၢ်ကီး ကဘူးထီၣ် ဒီးပတၢ်အဲၣ်ယ့ၣ်ၡူးအပၢ်စ့ၢ်ကီး ကဒိၣ်ထီၣ်လီၤ.
၆. တၢ်ဂ့ၢ်အဂၤတမံၤလၢ ပကဘၣ်ကဲထီၣ် ယ့ၣ်ၡူးအသကိးန့ၣ် မ့ၢ်မနုၤလဲၣ်, တဲဖျါထီၣ်တက့ၢ်.
၆ ဒ်သိးပတၢ်ထုကဖၣ် ကဘၣ်တၢ်စံးဆၢအီၤအဂီၢ် ပကဘၣ်ကဲထီၣ် ယ့ၣ်ၡူးအသကိးလီၤ. အဃိ ဖဲပဃ့ဘါထုကဖၣ်တၢ် ကတၢၢ်အခါ ထဲပတဲလၢ “ခီဖျိလၢ ယ့ၣ်ၡူးအမံၤ” န့ၣ်တလၢပှဲၤဒံးဘၣ်. ပကဘၣ်နၢ်ပၢၢ်လၢ ဒ်သိးယဟိဝၤယွၤ ကစံးဆၢ ပတၢ်ထုကဖၣ်အဂီၢ် အဝဲသူဝဲယ့ၣ်ၡူး ဒ်လဲၣ်န့ၣ်လီၤ. ယ့ၣ်ၡူးတဲဘၣ် တၢ်မၢဖိတဖၣ်လၢ “ဖဲဒၣ်သုဃ့တၢ်လၢယမံၤ တမံၤလၢ်လၢ်န့ၣ်, ယကမၤအဝဲန့ၣ်” လီၤ. (ယိၤဟၣ် ၁၄:၁၃) ယဟိဝၤယွၤ ဒိကနၣ်ပတၢ်ထုကဖၣ် လၢအနီၢ်ကစၢ် ဒီးစံးဆၢပတၢ်ထုကဖၣ် ဘၣ်ဆၣ်အဝဲဟ့ၣ်လီၤ ယ့ၣ်ၡူးလၢတၢ်စိတၢ်ကမီၤ ဒ်သိးအကမၤ ဒ်အတၢ်ဆၢတဲာ်အသိးလီၤ. (မးသဲ ၂၈:၁၈) တချုးလၢ ကစၢ်ယွၤပျၢ်ပတၢ်ကမၣ်ဒံးဘၣ်န့ၣ် အဝဲသ့ၣ်ညါဝဲလၢ မ့ၢ်ပမၤထွဲ ယ့ၣ်ၡူးအတၢ်ဟ့ၣ်ကူၣ်ဧါ ပတမၤထွဲဘၣ်ဧါန့ၣ်လီၤ. အဒိ ယ့ၣ်ၡူးတဲဝဲလၢ “အဂ့ၢ်ဒ်အံၤ, သုမ့ၢ်ပျၢ်ကွံာ်ပှၤကညီ အလီၤကမၣ်တၢ်ဒီး, သုပၢ်အိၣ်လၢမူခိၣ်န့ၣ် ကပျၢ်ကွံာ်စ့ၢ်ကီး သုလီၤကမၣ်တၢ်လီၤ. ဒီးသုမ့ၢ်တပျၢ်ကွံာ်ဘၣ် ပှၤကညီအလီၤကမၣ်တၢ်ဒီး, သုပၢ်တပျၢ်ကွံာ်စ့ၢ်ကီး သုလီၤကမၣ်တၢ်ဘၣ်.” (မးသဲ ၆:၁၄, ၁၅) အဃိ အရ့ဒိၣ်ဒိၣ်မးလၢ ပကရ့ပှၤဂၤ ဒ်ယဟိဝၤယွၤ ဒီးယ့ၣ်ၡူး ရ့ဝဲအသိးလီၤ.
၇. မတၤတဖၣ် ကဒိးန့ၢ်ဘၣ်အဘျုးလၢ ယ့ၣ်ၡူးအတၢ်ပှ့ၤက့ၤလဲၣ်.
၇ ထဲဒၣ်ပှၤလၢ အအိၣ်ဒီးတၢ်ရ့လိာ်သးဒီးယ့ၣ်ၡူး ဘူးဘူးတံၢ်တံၢ်န့ၣ် ကဒိးန့ၢ်ဘၣ်အဘျုးလၢ ယ့ၣ်ၡူးအတၢ်ပှ့ၤက့ၤလီၤ. ဘၣ်မနုၤအဃိ ပတဲဒ်န့ၣ်သ့လဲၣ်. ယ့ၣ်ၡူးတဲဝဲလၢ အက “ပာ်လီၤကွံာ်အသးသမူလၢ အတံၤအသကိးအဂီၢ်” လီၤ. (ယိၤဟၣ် ၁၅:၁၃) ယဟိဝၤယွၤ အခ့အပှၤလၢပျၢၤ လၢအအိၣ်မူတ့ၢ် တချုးလၢယ့ၣ်ၡူး ဟဲလီၤလၢဟီၣ်ခိၣ်ဒံးဘၣ် ဒ်သိးဒီး စီၤအၤဘြၤဟၣ်, နီၢ်စၤရါ, စီၤမိၤၡ့ ဒီးနီၢ်ရၤဃးန့ၣ် ကဟဲက့ၤဂဲၤဆၢထၢၣ်သမူထီၣ်က့ၤ ဘၣ်ဆၣ်ကဘၣ်မၤလိ ယ့ၣ်ၡူးအဂ့ၢ် ဒီးအဲၣ်အီၤလီၤ. အဝဲသ့ၣ် မ့ၢ်မၤဝဲဒ်န့ၣ်မး အကဒိးန့ၢ်ဘၣ် တၢ်မူအထူအယိာ်လီၤ.—ယိၤဟၣ် ၁၇:၃; မၤတၢ် ၂၄:၁၅; ဧ့ၤဘြံၤ ၁၁:၈-၁၂, ၂၄-၂၆, ၃၁.
၈-၉. ဒ် ယိၤဟၣ် ၁၅:၄, ၅ ပာ်ဖျါထီၣ်ဝဲအသိး ပမ့ၢ်ကဲထီၣ် ယ့ၣ်ၡူးအသကိးန့ၣ် ပမၤတၢ်မနုၤကသ့လဲၣ် ဒီးဘၣ်မနုၤအဃိ အရ့ဒိၣ်လၢ ပကဘၣ်ကဲထီၣ် ယ့ၣ်ၡူးအသကိးလဲၣ်.
၈ ပမၤသကိးတၢ်ဒီးယ့ၣ်ၡူး ခီဖျိလၢ ပစံၣ်တဲၤတဲလီၤတၢ် ဒီးသိၣ်လိပှၤဂၤ လၢဘီမုၢ်အတၢ်သးခုကစီၣ်လီၤ. ဖဲယ့ၣ်ၡူး အိၣ်မူလၢ ဟီၣ်ခိၣ်ချၢအခါ အဝဲမ့ၢ်သရၣ်တဂၤလီၤ. ဒီးဖဲအဝဲ က့ၤထီၣ်လၢ မူခိၣ်ဝံၤအလီၢ်ခံဒၣ်လဲာ် ဒ်အမ့ၢ် တၢ်အိၣ်ဖှိၣ်အခိၣ်တဂၤအသိး အဝဲဆဲးဟံးစုနဲၣ်ကျဲ တၢ်စံၣ်တဲၤတဲလီၤ ဒီးတၢ်သိၣ်လိနဲၣ်လိတၢ် အတၢ်မၤလီၤ. တသ့ဖဲအသ့ နဂုာ်ကျဲးစၢး ဒုးသ့ၣ်ညါပှၤဂၤလၢ အဂ့ၢ်ဒီးအပၢ်အဂ့ၢ်န့ၣ် အဝဲထံၣ်ဝဲ ဒီးပာ်လုၢ်ပာ်ပှ့ၤဝဲလီၤ. ထဲဒၣ်လၢ ယဟိဝၤယွၤ ဒီးယ့ၣ်ၡူးအတၢ်မၤစၢၤအဃိ ပမၤကဲထီၣ်လိၣ်ထီၣ် တၢ်မၤအံၤသ့ဝဲလီၤ.—ဖး ယိၤဟၣ် ၁၅:၄, ၅ တက့ၢ်.
၉ လံာ်စီဆှံ ပာ်ဖျါထီၣ်ဝဲ လီၤတံၢ်လီၤဆဲးလၢ ပမ့ၢ်အဲၣ်ယ့ၣ်ၡူး ဒီးဆဲးမၤဒိၣ်ထီၣ် ပတၢ်အဲၣ်အံၤမး ယဟိဝၤယွၤ ကဘၣ်သူၣ်ဘၣ်သးပှၤလီၤ. အဃိ ပကတဲသကိး တၢ်ဂ့ၢ်လွံၢ်ခါလၢ ကမၤစၢၤပှၤဒ်သိး ပကကဲထီၣ် ယ့ၣ်ၡူးအသကိးန့ၣ်လီၤ.
ပကဲထီၣ်ယ့ၣ်ၡူးအသကိး ကသ့ဒ်လဲၣ်
၁၀. ဒ်သိးပကကဲထီၣ် ယ့ၣ်ၡူးအသကိးအဂီၢ် တၢ်လၢပကဘၣ်မၤအီၤ အဆိကတၢၢ်တခါန့ၣ် မ့ၢ်မနုၤလဲၣ်.
၁၀ (၁) ဃုသ့ၣ်ညါအါထီၣ် ယ့ၣ်ၡူးအဂ့ၢ်တက့ၢ်. ပဃုသ့ၣ်ညါအါထီၣ် ယ့ၣ်ၡူးအဂ့ၢ် သ့ခီဖျိ ပဖးလံာ်မးသဲ, လံာ်မၢ်ကူး, လံာ်လူၤကၣ် ဒီးလံာ်ယိၤဟၣ်လီၤ. ဒီးပမ့ၢ်ဆိကမိၣ်ထံ ယ့ၣ်ၡူးအဂ့ၢ်လၢ အအိၣ်ဖဲ လံာ်တဖၣ်အံၤအပူၤန့ၣ် ပကသ့ၣ်ညါဘၣ်လၢ ယ့ၣ်ၡူးရ့ဒီးပှၤဂၤ လၢတၢ်အဲၣ်တၢ်ကွံအပူၤအဃိ ပကအဲၣ် ဒီးပာ်ကဲအီၤ ဒိၣ်ထီၣ်လီၤ. အဒိ အဝဲမ့ၢ် ကစၢ်သနာ်က့ အဝဲတရ့ဒီး အပျဲၢ်အဘီၣ်တဖၣ် ဒ်ကုၢ်အသိးဘၣ်. လၢတၢ်န့ၣ်အလီၢ် အဝဲတဲဘၣ် အပျဲၢ်အဘီၣ်တဖၣ် လၢအတၢ်ဆိကမိၣ် ဒီးအတၢ်တူၢ်ဘၣ်တဖၣ်လီၤ. (ယိၤဟၣ် ၁၅:၁၅) ဒီးဖဲအပျဲၢ်အဘီၣ်တဖၣ် အသူၣ်အုးသးအုးအခါ အဝဲအသူၣ်အုးသးအုး ဒီးဟီၣ်ဃုာ်ဒီး အဝဲသ့ၣ် လီၤ. (ယိၤဟၣ် ၁၁:၃၂-၃၆) ယ့ၣ်ၡူးအဒုၣ်အဒါတဖၣ်ဒၣ်လဲာ် ထံၣ်ဘၣ်ဝဲလၢ ပှၤလၢအတူၢ်လိာ် တၢ်ကစီၣ်လၢ ယ့ၣ်ၡူးတဲဝဲတဖၣ်န့ၣ် ကဲထီၣ်ယ့ၣ်ၡူးအသကိးလီၤ. (မးသဲ ၁၁:၁၉) ဒီးပမ့ၢ်ဆိကမိၣ်ထံ ဘၣ်ဃးဒီး ယ့ၣ်ၡူးရ့ဒီးပှၤဂၤ ဒ်လဲၣ်ဒ်လဲၣ်န့ၣ် ပတၢ်ရ့လိာ်သးဒီးပှၤဂၤ ကဂ့ၤထီၣ်, ပကအိၣ်ဒီး တၢ်သူၣ်မံသးမုာ် ဒီးတၢ်သူၣ်ခုသးခုအဃိ ပတၢ်အဲၣ်ယ့ၣ်ၡူး ဒီးတၢ်ပာ်ကဲအီၤ ကဟဲအါထီၣ်လီၤ.
၁၁. ဒ်သိးပကကဲထီၣ် ယ့ၣ်ၡူးအသကိးအဂီၢ် တၢ်လၢပကဘၣ်မၤအီၤ ခံခါတခါန့ၣ် မ့ၢ်မနုၤလဲၣ် ဒီးဘၣ်မနုၤအဃိလဲၣ်.
၁၁ (၂) ကွၢ်လိမၤဒိးယ့ၣ်ၡူး ဒီးဆိကမိၣ်တၢ် ဒ်သိးဒီးအီၤတက့ၢ်. ပမ့ၢ်သ့ၣ်ညါအါထီၣ် ယ့ၣ်ၡူးအတၢ်ဆိကမိၣ် ဒီးဆိကမိၣ်တၢ် ဒ်သိးဒီးအီၤန့ၣ် ပတၢ်ရ့လိာ်သးဒီးအီၤ ကဘူးထီၣ်လီၤ. (၁ ကရံၣ်သူး ၂:၁၆) ပကွၢ်လိမၤဒိးယ့ၣ်ၡူး ကသ့ဒ်လဲၣ်. ဆိကမိၣ်ကွၢ် တၢ်ဂ့ၢ်တခါအံၤတက့ၢ်. ယ့ၣ်ၡူးဆိကမိၣ်ဝဲလၢ အကမၤတၢ်လၢ ပှၤဂၤအဂီၢ်အါန့ၢ်ဒံး အမၤတၢ်လၢ အနီၢ်ကစၢ်အဂီၢ်လီၤ. (မးသဲ ၂၀:၂၈; ရိမ့ၤ ၁၅:၁-၃) မ့ၢ်လၢအဝဲ ဆိကမိၣ်တၢ်ဒ်အံၤအဃိ အဝဲသးအိၣ် ဟ့ၣ်လီၤအသးလၢ ပှၤဂၤအဂီၢ် ဒီးသးအိၣ်ပျၢ်ကွံာ်ပှၤဂၤ အတၢ်ကမၣ်လီၤ. ဖဲပှၤတဲဆါအီၤအခါ အဝဲတသးထီၣ်ပှၤဂၤ ညီညီဘၣ်. (ယိၤဟၣ် ၁:၄၆, ၄၇) ဒီးယ့ၣ်ၡူးတစၢဃာ် ပှၤတၢ်ကမၣ်ဘၣ် ဒီးအဝဲတရ့ဒီးပှၤ အၢအၢသီသီ ခီဖျိလၢ တၢ်ကမၣ်လၢ ပှၤမၤတ့ၢ်အီၤလၢ အပူၤကွံာ်တဖၣ်အဃိဘၣ်. (၁ တံၤမသ့း ၁:၁၂-၁၄) ယ့ၣ်ၡူးတဲဝဲလၢ “လၢသုအဲၣ်လိာ်ကွံလိာ်သုသးအဃိဒီး, ပှၤခဲလၢာ်ကသ့ၣ်ညါလၢ သုမ့ၢ်ယပျဲၢ်ယဘီၣ်လီၤ.” (ယိၤဟၣ် ၁၃:၃၅) အဃိ သံကွၢ်လီၤနသးလၢ “မ့ၢ်ယကွၢ်လိမၤဒိး ယ့ၣ်ၡူးခီဖျိ တသ့ဖဲအသ့ ယဂုာ်ကျဲးစၢး အိၣ်ဃူအိၣ်ဖိးဒီး ဒီပုၢ်ဝဲၢ်မုၣ်ခွါတဖၣ်ဧါ.”
၁၂. ဒ်သိးပကကဲထီၣ် ယ့ၣ်ၡူးအသကိးအဂီၢ် တၢ်လၢပကဘၣ်မၤအီၤ သၢခါတခါန့ၣ် မ့ၢ်မနုၤလဲၣ် ဒီးပမၤအီၤ ကသ့ဒ်လဲၣ်.
၁၂ (၃) ဆီၣ်ထွဲမၤစၢၤ ခရံာ်အဒီပုၢ်ဝဲၢ်တဖၣ်တက့ၢ်. ဖဲပဆီၣ်ထွဲမၤစၢၤ ယ့ၣ်ၡူးအဒီပုၢ်ဝဲၢ် လၢအဘၣ်တၢ်ဒိးဖှူအီၤတဖၣ်အခါ ယ့ၣ်ၡူးထံၣ်ဝဲဒ် ပမၤစၢၤအီၤအသိးလီၤ. (မးသဲ ၂၅:၃၄-၄၀) ကျဲအဂ့ၤကတၢၢ်တဘိလၢ ပဆီၣ်ထွဲမၤစၢၤ ပှၤလၢအဘၣ် တၢ်ဒိးဖှူအီၤတဖၣ်န့ၣ် မ့ၢ်ဝဲပပၣ်ဃုာ်လၢ တၢ်စံၣ်တဲၤတဲလီၤ ဒီးတၢ်သိၣ်လိနဲၣ်လိတၢ် အတၢ်မၤအပူၤ လၢလၢပှဲၤပှဲၤလီၤ. ယ့ၣ်ၡူးမၤလိာ်တ့ၢ် အပျဲၢ်အဘီၣ်တဖၣ် လၢကမၤဝဲ တၢ်မၤအံၤလီၤ. (မးသဲ ၂၈:၁၉, ၂၀; မၤတၢ် ၁၀:၄၂) ယ့ၣ်ၡူးအဒီပုၢ်ဝဲၢ်တဖၣ် မၤလၢပှဲၤဝဲ အမူဒါလၢ ဘၣ်ဃးဒီး တၢ်စံၣ်တဲၤတဲလီၤတၢ်မၤသ့ ခီဖျိလၢ “သိလၢအဂုၤအဂၤ” တဖၣ်အတၢ်မၤစၢၤအဃိလီၤ. (ယိၤဟၣ် ၁၀:၁၆) နမ့ၢ်ပၣ်ဃုာ်လၢ သိလၢအဂုၤအဂၤအကျါန့ၣ် ဖဲနစံၣ်တဲၤတဲလီၤတၢ်တဘျီလၢ်လၢ်အခါ မ့ၢ်ဒၣ်နပာ်ဖျါထီၣ်လၢ နအဲၣ်ပှၤလၢ အဘၣ်တၢ်ဒိးဖှူအီၤတဖၣ် တကးဒံးဘၣ် နအဲၣ်ယ့ၣ်ၡူးစ့ၢ်ကီးလီၤ.
၁၃. ပမၤထွဲ ယ့ၣ်ၡူးအတၢ်ဟ့ၣ်ကူၣ်ဖဲ လူၤကၣ် ၁၆:၉ အပူၤ ကသ့ဒ်လဲၣ်.
၁၃ အဂၤတမံၤန့ၣ် ပဒီတံၤဒီသကိးဒီး ယဟိဝၤယွၤ ဒီးယ့ၣ်ၡူးသ့ခီဖျိ ပဟ့ၣ်တၢ်မၤဘူၣ် လၢပကဆီၣ်ထွဲမၤစၢၤ တၢ်မၤလၢ အဝဲသ့ၣ်မၢပမၤတဖၣ်လီၤ. (ဖး လူၤကၣ် ၁၆:၉ တက့ၢ်.) အဒိ ပဟ့ၣ်တၢ်မၤဘူၣ်လၢ ဟီၣ်ခိၣ်ဒီဘ့ၣ် တၢ်မၤအဂီၢ်သ့လီၤ. တၢ်မၤဘူၣ်တဖၣ်အံၤ ပှၤသူအီၤလၢ ပှၤကဆီၣ်ထွဲမၤစၢၤ ပှၤစံၣ်တဲၤတဲလီၤတၢ် လၢတၢ်လီၢ်အယံၤအဂီၢ်, တၢ်သူၣ်ထီၣ်ဘှီထီၣ် ဒီးတၢ်ဘှီဂ့ၤထီၣ်က့ၤ တၢ်သူၣ်ထီၣ်လၢ ပှၤသူအီၤလၢ တၢ်ဘူၣ်တၢ်ဘါ အမ့ၢ်အတီအဂီၢ် ဒီးပှၤသူစ့ၢ်ကီးအီၤလၢ ပှၤလၢအထံၣ်ဘၣ် န့ဆၢၣ်တၢ်ဘၣ်ဒိဘၣ်ထံးတဖၣ် ဒီးတၢ်ဘၣ်ဒိဘၣ်ထံး လၢအဂၤတဖၣ်အဂီၢ်လီၤ. တကးဒံးဘၣ် ပဟ့ၣ်တၢ်မၤဘူၣ်လၢ ပတၢ်အိၣ်ဖှိၣ် အတၢ်လၢာ်ဘူၣ်လၢာ်စ့ၤအဂီၢ် ဒီးပမၤစၢၤ ပဒီပုၢ်ဝဲၢ်မုၣ်ခွါလၢ အလိၣ်ဘၣ် တၢ်မၤစၢၤတဖၣ်သ့လီၤ. (ကတိၤဒိ ၁၉:၁၇) ပဆီၣ်ထွဲမၤစၢၤ ခရံာ်အဒီပုၢ်ဝဲၢ်တဖၣ် သ့ခီဖျိလၢ ပမၤတၢ်သ့ၣ်တဖၣ်အံၤလီၤ.
၁၄. ဒ် အ့းဖ့းစူး ၄:၁၅, ၁၆ ပာ်ဖျါထီၣ်ဝဲအသိး ဒ်သိးပကကဲထီၣ် ယ့ၣ်ၡူးအသကိးအဂီၢ် တၢ်လၢပကဘၣ်မၤအီၤ လွံၢ်ခါတခါန့ၣ် မ့ၢ်မနုၤလဲၣ်.
၁၄ (၄) ဆီၣ်ထွဲမၤစၢၤ တၢ်ရဲၣ်တၢ်ကျဲၤလၢ ခရံာ်ဖိတၢ်အိၣ်ဖှိၣ်အပူၤတက့ၢ်. ယ့ၣ်ၡူးမ့ၢ် တၢ်အိၣ်ဖှိၣ်အခိၣ်အဃိ ပမၤဂ့ၤထီၣ် ပတၢ်ရ့လိာ်သးဒီးအီၤသ့ခီဖျိ ပမၤသကိးတၢ်ဒီး ပှၤလၢအဘၣ် တၢ်ဃုထၢထီၣ်အီၤ လၢကကွၢ်ထွဲပှၤတဖၣ်န့ၣ်လီၤ. (ဖး အ့းဖ့းစူး ၄:၁၅, ၁၆ တက့ၢ်.) အဒိ ဆၢကတီၢ်ခဲအံၤန့ၣ် ပဂုာ်ကျဲးစၢးသူ ဘီမုၢ်ဘျီၣ်ဒိၣ် လၢကျဲလၢအဂ့ၤကတၢၢ်လီၤ. အဃိ တၢ်အိၣ်ဖှိၣ်တနီၤန့ၣ် ဘၣ်တၢ်ပာ်ဖှိၣ်ထီၣ်အီၤဒီးတၢ် အိၣ်ဖှိၣ်အဂၤ ဒီးတၢ်စံၣ်တဲၤတဲလီၤတၢ် အလီၢ်ကဝီၤစ့ၢ်ကီး ဘၣ်တၢ်ဆီတလဲအီၤအဃိ ဒီပုၢ်ဝဲၢ်တနီၤ ထံၣ်ဘၣ်ဒီးတၢ်အိၣ်သးလၢအသီလီၤ. မ့ၢ်လၢတၢ်ကရၢကရိ မၤဝဲဒ်အံၤအဃိ တၢ်လၢာ်ဘူၣ်လၢာ်စ့ၤ စှၤလီၤဝဲလီၤ. ဒီပုၢ်ဝဲၢ်မုၣ်ခွါ လၢအအိၣ်ဒီး တၢ်သးတီတဖၣ်အံၤ အိၣ်ဘၣ်လၢအတၢ်အိၣ်ဖှိၣ်အပူၤ လၢအနံၣ်အါမး ဒီးအဝဲသ့ၣ် ရ့ဒီးဒီပုၢ်ဝဲၢ်ဖဲန့ၣ်တဖၣ်မုာ်မး ဘၣ်ဆၣ် ပှၤမၢအလဲၤသုးလၢ တၢ်အိၣ်ဖှိၣ်အဂၤလီၤ. ဖဲယ့ၣ်ၡူးထံၣ်ဘၣ်ဝဲလၢ အခ့အပှၤလၢ အသးတီတဖၣ် ဆီၣ်ထွဲစၢၤဝဲ တၢ်ရဲၣ်တၢ်ကျဲၤအံၤအခါ အသးကမုာ်ဒိၣ်မးလီၤ.
ပှၤလၢကကဲယ့ၣ်ၡူး အသကိးထီဘိ
၁၅. ခါဆူညါန့ၣ် ပတၢ်ရ့လိာ်သးဒီးယ့ၣ်ၡူး ကဂ့ၤဒိၣ်ထီၣ် လၢကျဲဒ်လဲၣ်.
၁၅ ပှၤလၢအဘၣ်တၢ်ဒိးဖှူအီၤ လၢသးစီဆှံတဖၣ်န့ၣ် အိၣ်ဒီးတၢ်မုၢ်လၢ်လၢ ကအိၣ်ဘၣ်ဒီး ယ့ၣ်ၡူးလီၤထူလီၤယိာ် ဒီးပၢဃုာ်တၢ်ဒီးအီၤ လၢယွၤအဘီအမုၢ်အပူၤလီၤ. အဝဲသ့ၣ် ကထံၣ်ဘၣ်ယ့ၣ်ၡူး, ကတဲဘၣ်တၢ် ဒီးကရ့လိာ်ဘၣ်အသးဒီးအီၤလီၤ. (ယိၤဟၣ် ၁၄:၂, ၃) ပှၤလၢအအိၣ်ဒီး တၢ်မုၢ်လၢ်လၢ ကအိၣ်မူဘၣ်လၢ ဟီၣ်ခိၣ်ချၢစ့ၢ်ကီး ကဒိးန့ၢ်ဘၣ် ယ့ၣ်ၡူးအတၢ်အဲၣ် ဒီးအတၢ်ကဟုကယာ်လီၤ. အဝဲသ့ၣ် မ့ၢ်တထံၣ်ဘၣ်ယ့ၣ်ၡူးသနာ်က့ ဖဲအဝဲသ့ၣ် အိၣ်မူဘၣ်ဒ် တၢ်အိၣ်မူလၢ ယဟိဝၤယွၤ ဒီးယ့ၣ်ၡူး ကတဲာ်ကတီၤပာ်စၢၤဝဲအသိးအခါ အဝဲသ့ၣ် အတၢ်ရ့လိာ်သးဒီးယ့ၣ်ၡူး ကဂ့ၤဒိၣ်ထီၣ်လီၤ.—ယၡါယၤ ၉:၆, ၇.
၁၆. ပမ့ၢ်ကဲထီၣ် ယ့ၣ်ၡူးအသကိးန့ၣ် ပကဒိးန့ၢ်ဘၣ် တၢ်ဆိၣ်ဂ့ၤမနုၤတဖၣ်လဲၣ်.
၁၆ ဖဲပကဲထီၣ် ယ့ၣ်ၡူးအသကိးအခါ ပကဒိးန့ၢ်ဘၣ် တၢ်ဆိၣ်ဂ့ၤအါမးလီၤ. အဒိ ဆၢကတီၢ်ခဲအံၤ ပဒိးန့ၢ်ဘၣ် အတၢ်အဲၣ် ဒီးအတၢ်ဆီၣ်ထွဲမၤစၢၤလီၤ. ဒီးပအိၣ်ဒီး တၢ်မုၢ်လၢ်လၢ ပကအိၣ်မူဘၣ် လီၤထူလီၤယိာ်လီၤ. တကးဒံးဘၣ် ပကဒိးန့ၢ်ဘၣ် တၢ်လၢအလုၢ်ဒိၣ်ပှ့ၤဒိၣ်ကတၢၢ် လၢအမ့ၢ် တၢ်ရ့လိာ်သးဒီးယ့ၣ်ၡူးအပၢ်န့ၣ်လီၤ. လၢတၢ်န့ၣ်အဃိ ပမ့ၢ်ကဲထီၣ် ယ့ၣ်ၡူးအသကိးန့ၣ် မ့ၢ်တၢ်ခွဲးတၢ်ယာ် ဖးဒိၣ်လၢပဂီၢ်လီၤ.
တၢ်သးဝံၣ် ၁၇ “ယသးအိၣ်”
^ လံာ်အဆၢ. 5 တၢ်မၢဖိတဖၣ် မၤသကိးဘၣ်တၢ်ဒီး တဲသကိးဘၣ်တၢ်ဒီး ယ့ၣ်ၡူးလၢ အနံၣ်အါမးလီၤ. အဃိအဝဲသ့ၣ်ကဲထီၣ် ယ့ၣ်ၡူးအသကိးလၢအဂ့ၤလီၤ. ယ့ၣ်ၡူးအဲၣ်ဒိးလၢ ပကကဲထီၣ်အသကိး စ့ၢ်ကီးလီၤ. ဘၣ်ဆၣ် ပကကဲထီၣ် ယ့ၣ်ၡူးအသကိးအဂီၢ်န့ၣ် တညီဒ်သိးဒီး တၢ်မၢဖိတဖၣ်န့ၣ်ဘၣ်. တၢ်မၤလိတခါအံၤ ကပာ်ဖျါထီၣ်န့ၢ်ပှၤ တၢ်ကီတၢ်ခဲတနီၤ လၢပကထံၣ်ဘၣ်အီၤ ဒီးကပာ်ဖျါထီၣ်န့ၢ်ပှၤ တၢ်ဟ့ၣ်ကူၣ်တနီၤလၢ ကမၤစၢၤပှၤ ဒ်သိးပက ကဲထီၣ်ယ့ၣ်ၡူးအသကိး ဒီးပဆဲးပၢၤဃာ် ပတၢ်ရ့လိာ်သးဒီးအီၤ ဘူးဘူးတံၢ်တံၢ် ကသ့အဂီၢ်လီၤ.
^ လံာ်အဆၢ. 55 တၢ်တဲဖျါထီၣ်တၢ်ဂီၤ အခီပညီ– (၁) ဖဲနမၤ ဟံၣ်ဖိဃီဖိတၢ်မၤလိလံာ်စီဆှံအခါ နမၤလိ ယ့ၣ်ၡူးအဂ့ၢ် ဒီးအတၢ်စံၣ်တဲၤတဲလီၤတၢ်မၤအဂ့ၢ်သ့လီၤ. (၂) လၢတၢ်အိၣ်ဖှိၣ်အပူၤန့ၣ် ပဂုာ်ကျဲးစၢး အိၣ်ဃူအိၣ်ဖိးဒီး ဒီပုၢ်ဝဲၢ်တဖၣ်သ့လီၤ. (၃) ပဆီၣ်ထွဲမၤစၢၤ ခရံာ်အဒီပုၢ်ဝဲၢ်တဖၣ် သ့ခီဖျိ ပပၣ်ဃုာ်လၢ တၢ်စံၣ်တဲၤတဲလီၤတၢ်မၤအပူၤ လၢလၢပှဲၤပှဲၤလီၤ. (၄) ဖဲတၢ်အိၣ်ဖှိၣ်သးပှၢ်တဖၣ် ဆၢတဲာ်ဝဲလၢ ကပာ်ဖှိၣ်ထီၣ် တၢ်အိၣ်ဖှိၣ်တဖၣ်အခါ ပဆီၣ်ထွဲအဝဲသ့ၣ် အတၢ်ဆၢတဲာ်သ့လီၤ.