တၢ်မၤလိ ၄၀
“ပၢၤတၢ်လၢ တၢ်ဟ့ၣ်လီၤနၤန့ၣ်တက့ၢ်”
“စီၤတံၤမသ့းဧၢ, ပၢၤတၢ်လၢ တၢ်ဟ့ၣ်လီၤနၤန့ၣ်တက့ၢ်.”—၁ တံၤမသ့း ၆:၂၀.
တၢ်သးဝံၣ် ၂၉ အိၣ်မူဒ်ပမံၤအသိး
တၢ်မၤလိအံၤ အတၢ်တိာ်ပာ် *
၁-၂. ဒ် ၁ တံၤမသ့း ၆:၂၀ ပာ်ဖျါထီၣ်ဝဲအသိး စီၤတံၤမသ့း ဘၣ်မၤဝဲတၢ်မနုၤလဲၣ်.
ညီနုၢ် တၢ်လုၢ်ဒိၣ်ပှ့ၤဒိၣ်တဖၣ်န့ၣ် ပပာ်ခူသူၣ်အီၤဂ့ၤဂ့ၤ ဒီးဘံၣ်ဘံၣ်ဘၢဘၢလီၤ. မ့ၢ်လၢ ပတအဲၣ်ဒိးလၢ အကလီၢ်မၢ်ဒီး ပှၤဟဲဟုၣ်ဘၣ်အဃိ ပပာ်ဃာ်အီၤလၢ တၢ်လီၢ်မူၤမူၤနီၢ်နီၢ်တခါလီၤ. ခီဖျိလၢ ပမၤအီၤဒ်အံၤအဃိ ပတလိၣ်ဘၣ်ယိၣ်တၢ် အါအါလၢၤဘၣ်.
၂ ဖး ၁ တံၤမသ့း ၆:၂၀ တက့ၢ်. တၢ်မၢဖိပီလူး ဒုးသ့ၣ်နီၣ်ထီၣ်က့ၤ စီၤတံၤမသ့းလၢ အဝဲဒိးန့ၢ်ဘၣ်ဝဲ တၢ်လုၢ်ဒိၣ်ပှ့ၤဒိၣ်လၢ အမ့ၢ်ဝဲ တၢ်သ့ၣ်ညါနီၢ်နီၢ် ဘၣ်ဃးဒီး ကစၢ်ယွၤအတၢ်တိာ်ပာ်လၢ ပှၤဟီၣ်ခိၣ်ဖိအဂီၢ်လီၤ. ယဟိဝၤယွၤဟ့ၣ်လီၤ စီၤတံၤမသ့း တၢ်ခွဲးတၢ်ယာ်လၢ “ကစံၣ်တဲၤတဲလီၤ တၢ်သးခုကစီၣ်” ဒီး “မၤပှၤစံၣ်တဲၤတဲလီၤ တၢ်သးခုအကစီၣ် အတၢ်မၤ” န့ၣ်လီၤ. (၂ တံၤမသ့း ၄:၂, ၅, ခ့ခါစှီၤကျိာ်) စီၤပီလူး ဟ့ၣ်ဂံၢ်ဟ့ၣ်ဘါ စီၤတံၤမသ့းလၢ ကပၢၤဃာ်တၢ်လၢ အဒိးန့ၢ်ဘၣ်ဝဲ တဖၣ်န့ၣ်လီၤ. ဒ်စီၤတံၤမသ့းအသိး ပဒိးန့ၢ်ဘၣ် တၢ်လုၢ်ဒိၣ်ပှ့ၤဒိၣ် စ့ၢ်ကီးလီၤ. တၢ်လုၢ်ဒိၣ်ပှ့ၤဒိၣ်မနုၤလဲၣ်. ဘၣ်မနုၤအဃိ ပကဘၣ်ပၢၤဃာ် တၢ်လုၢ်ဒိၣ်ပှ့ၤဒိၣ် လၢယဟိဝၤယွၤ ဟ့ၣ်လီၤပှၤအံၤလဲၣ်.
ပၢၤဃာ်တၢ်မ့ၢ်တၢ်တီ လၢအလုၢ်ဒိၣ်ပှ့ၤဒိၣ်
၃-၄. ဘၣ်မနုၤအဃိ လံာ်စီဆှံတၢ်မ့ၢ်တၢ်တီန့ၣ် မ့ၢ်တၢ်လၢ အလုၢ်ဒိၣ်ပှ့ၤဒိၣ်လဲၣ်.
၃ ယဟိဝၤယွၤ သးအိၣ်ဟ့ၣ်ပှၤ တၢ်သ့ၣ်ညါ အမ့ၢ်အတီလၢ အလုၢ်ဒိၣ်ပှ့ၤဒိၣ် လၢလံာ်စီဆှံအပူၤလီၤ. တၢ်မ့ၢ်တၢ်တီတဖၣ်အံၤ မ့ၢ်ဝဲတၢ်လုၢ်ဒိၣ်ပှ့ၤဒိၣ် တခါလီၤ. မ့ၢ်လၢ အသိၣ်လိပှၤ ဒ်သိးပကအိၣ်ဒီး တၢ်ရ့လိာ်သးဒီး ယဟိဝၤယွၤလၢ အဂ့ၤကသ့ဒ်လဲၣ်ဒီး ပကအိၣ်ဒီးတၢ်သးခုနီၢ်နီၢ် ကသ့ဒ်လဲၣ်န့ၣ်လီၤ. ဖဲပတူၢ်လိာ် တၢ်မ့ၢ်တၢ်တီတဖၣ်အံၤ ဒီးပအိၣ်မူမၤထွဲအီၤအခါ ပထူၣ်ဖျဲးထီၣ်လၢ တၢ်သိၣ်လိလၢအကမၣ် ဒီးလုၢ်လၢ်လၢ အတကဆှီဘၣ်တဖၣ်န့ၣ်လီၤ.—၁ ကရံၣ်သူး ၆:၉-၁၁.
၄ ကျဲလၢအဂၤတဘိန့ၣ် ဘၣ်မနုၤအဃိ လံာ်စီဆှံတၢ်မ့ၢ်တၢ်တီ ပာ်ဖျါထီၣ်ဝဲလၢ ယဟိဝၤယွၤ ဒုးသ့ၣ်ညါထဲ ပှၤလၢအအိၣ်ဒီး တၢ်ဆီၣ်လီၤသးတဖၣ် လၢအဘၣ် “တၢ်ပာ်အီၤလၢ အကန့ၢ်ဘၣ် တၢ်မူလီၤထူလီၤယိာ်” န့ၣ်လဲၣ်. (မၤတၢ် ၁၃:၄၈) ပှၤလၢအအိၣ်ဒီး တၢ်ဆီၣ်လီၤသးတဖၣ်န့ၣ် သ့ၣ်ညါဝဲလၢ ကုၢ်လၢအကလုၢ်တီဒီး ကူၣ်တၢ်သ့သိၣ်လိပှၤ လံာ်စီဆှံတၢ်မ့ၢ်တၢ်တီလၢ မုၢ်မဆါတနံၤညါအံၤလီၤ. (မးသဲ ၁၁:၂၅; ၂၄:၄၅) ပသ့ၣ်ညါ ထီၣ် တၢ်မ့ၢ်တၢ်တီလၢ ပနီၢ်ကစၢ်တသ့ဘၣ်. တၢ်လၢအလုၢ်ဒိၣ်ပှ့ၤဒိၣ်န့ၢ်ဒံး တၢ်သ့ၣ်ညါထီၣ် တၢ်မ့ၢ်တၢ်တီန့ၣ် တအိၣ်နီတမံၤလၢၤဘၣ်.—ကတိၤဒိ ၃:၁၃, ၁၅.
၅. ယဟိဝၤယွၤ ဟ့ၣ်လီၤပှၤမူဒါ မနုၤတဖၣ်လဲၣ်.
၅ ယဟိဝၤယွၤ ဟ့ၣ်လီၤပှၤမူဒါလၢ ပကဘၣ်သိၣ်လိပှၤဂၤ တၢ်မ့ၢ်တၢ်တီ ဘၣ်ဃးဒီးအဂ့ၢ် ဒီးအတၢ်တိာ်ပာ်တဖၣ်လီၤ. (မးသဲ ၂၄:၁၄) တၢ်ကစီၣ်လၢ ပစံၣ်တဲၤတဲလီၤအီၤန့ၣ် အလုၢ်ဒိၣ်ပှ့ၤဒိၣ်ဒိၣ်မး မ့ၢ်လၢအမၤစၢၤ ပှၤဂၤလၢကကဲထီၣ်ဘၣ် ယဟိဝၤယွၤ အဒူၣ်ဖိထၢဖိ ဒီးကန့ၢ်ဘၣ် တၢ်မူလီၤထူလီၤယိာ် အဃိလီၤ. (၁ တံၤမသ့း ၄:၁၆) ပစံၣ်တဲၤတဲလီၤဘၣ်တၢ် အါမ့ၢ်ဂ့ၤ, စှၤမ့ၢ်ဂ့ၤန့ၣ် ပဆီၣ်ထွဲမၤစၢၤဘၣ် တၢ်စံၣ်တဲၤတဲလီၤတၢ်မၤလၢ အရ့ဒိၣ်လၢ အဆၢကတီၢ်ခဲအံၤလီၤ. (၁ တံၤမသ့း ၂:၃, ၄) ပမၤသကိးဘၣ်တၢ်ဒီး ကစၢ်ယွၤန့ၣ် မ့ၢ်ဝဲတၢ်ခွဲးတၢ်ယာ် ဖးဒိၣ်တခါလီၤ.—၁ ကရံၣ်သူး ၃:၉.
ပၢၤဃာ်တၢ်လၢ နဒိးန့ၢ်ဘၣ်တဖၣ်တက့ၢ်
ဖဲပှၤဂၤပာ်တ့ၢ်ကွံာ် ယဟိဝၤယွၤအခါ စီၤတံၤမသ့း ဆဲးအိၣ်ဂၢၢ်ကျၢၤလၢ တၢ်မ့ၢ်တၢ်တီအပူၤလီၤ (ကွၢ်လံာ်အဆၢ ၆)
၆. ပှၤလၢအတပၢၤဃာ် တၢ်လၢအဒိးန့ၢ်ဘၣ်ဝဲတဖၣ်န့ၣ် တၢ်ကဲထီၣ်သးဒီး အဝဲသ့ၣ်ဒ်လဲၣ်.
၆ ဖဲစီၤတံၤမသ့းအစိၤန့ၣ် ခရံာ်ဖိတနီၤ တပာ်လုၢ်ပာ်ပှ့ၤဝဲ တၢ်ခွဲးတၢ်ယာ်လၢ အမၤသကိးဘၣ်တၢ်ဒီး ကစၢ်ယွၤဘၣ်. စီၤဒ့မၤအဲၣ်ဝဲ ဟီၣ်ခိၣ်အတၢ်ထူးတၢ်တီၤ အဃိ အဝဲတမၤသကိးတၢ်ဒီး စီၤပီလူးလၢၤဘၣ်. (၂ တံၤမသ့း ၄:၁၀) စီၤဖူက့းလူးဒီး စီၤအ့းရံမိက့းန့ၤန့ၣ် ပာ်တီၢ်ကွံာ်ဝဲ တၢ်စံၣ်တဲၤတဲလီၤတၢ်မၤ မ့ၢ်လၢအဝဲသ့ၣ်ပျံၤတၢ် ဒီးဘၣ်ယိၣ်လၢ ပှၤကမၤအၢမၤနးအဝဲသ့ၣ် ဒ်စီၤပီလူးအသိးအဃိလီၤ. (၂ တံၤမသ့း ၁:၁၅) မ့မ့ၢ်လၢ စီၤဟူၤမ့းနဲ, စီၤအလ့းစၣ်ဒြူး ဒီးစီၤဖံလ့ၤတူးန့ၣ် ကဲထီၣ်ပှၤလၢအထီဒါက့ၤ တၢ်မ့ၢ်တၢ်တီ ဒီးပာ်တ့ၢ်ကွံာ်ဝဲ ယဟိဝၤယွၤလီၤ. (၁ တံၤမသ့း ၁:၁၉, ၂၀; ၂ တံၤမသ့း ၂:၁၆-၁၈) လၢအခီၣ်ထံးန့ၣ် ပှၤသ့ၣ်တဖၣ်အံၤ မ့ၢ်တ့ၢ်ပှၤလၢ အနီၢ်သးဆူၣ် ဘၣ်ဆၣ်လၢခံန့ၣ် အဝဲသ့ၣ်တပာ်လုၢ်ပာ်ပှ့ၤ တၢ်လၢအဒိးန့ၢ် ဘၣ်ဝဲတဖၣ်လၢၤဘၣ်.
၇. ဒ်သိးမုၣ်ကီၤလံၢ် ထီဒါပှၤကန့ၢ်အဂီၢ် အဝဲသူဝဲတၢ်လံၣ်တၢ်လီ မနုၤတဖၣ်လဲၣ်.
၇ ဒ်သိးပကပာ်တ့ၢ်ကွံာ် တၢ်လုၢ်ဒိၣ်ပှ့ၤဒိၣ်လၢ ယဟိဝၤယွၤ ဟ့ၣ်လီၤပှၤန့ၣ် မုၣ်ကီၤလံၢ် ဂုာ်ကျဲးစၢးမၤဝဲဒ်လဲၣ်. ပကဘၣ်ပလီၢ်သးလၢ မုၣ်ကီၤလံၢ် အတၢ်လံၣ်တၢ်လီတဖၣ်လီၤ. ဒ်သိးပသုတအဲၣ် ယဟိဝၤယွၤ ဒီးဒိကနၣ်အကလုၢ်ကထါ လၢၤတဂ့ၤအဂီၢ် မုၣ်ကီၤလံၢ်သူဝဲ TV တၢ်ဂီၤမူ, အ့ထၢၣ်နဲး, တၢ်ကစီၣ်, လံာ်လဲၢ် ဒီးမဲးကစံတဖၣ် လၢအကလုၢ်ဘၢကွံာ်ပှၤန့ၣ်လီၤ. တကးဒံးဘၣ် အဝဲဂုာ်ကျဲးစၢး ဆီၣ်သနံးပှၤ မ့တမ့ၢ် မၤအၢမၤသီပှၤ လၢကျဲအဘိဘိ ဒ်သိးပကပတုာ် ဟးစံၣ်တဲၤတဲလီၤ တၢ်အဂီၢ်လီၤ. ဒီးဒ်သိးပကပာ်တ့ၢ်ကွံာ် တၢ်မ့ၢ်တၢ်တီအဂီၢ် မုၣ်ကီၤလံၢ် ဂုာ်ကျဲးစၢးဝဲလၢ ပကကနၣ် “တၢ်လၢပှၤကိးကမၣ်ဝဲလၢ တၢ်သ့ၣ်ညါ” လၢပှၤလၢအညိကွံာ် တၢ်စူးတၢ်နာ်တဖၣ် အတၢ်သိၣ်လိန့ၣ်လီၤ.—၁ တံၤမသ့း ၆:၂၀, ၂၁.
၈. ဒီပုၢ်ဝဲၢ်ခွါ ဒဲနံၣ်ယၢၤ အတၢ်လဲၤခီဖျိန့ၣ် ပမၤလိန့ၢ်ဘၣ် တၢ်မနုၤလဲၣ်.
၈ ပမ့ၢ် တပလီၢ်ပသးဘၣ်န့ၣ် ပကပာ်တ့ၢ်ကွံာ် တၢ်မ့ၢ်တၢ်တီ ကယီကယီလီၤ. ပကကွၢ်သကိး ဒီပုၢ်ဝဲၢ်ခွါ ဒဲနံၣ်ယၢၤ * အတၢ်လဲၤခီဖျိလီၤ. ဒီပုၢ်ဝဲၢ်ခွါအံၤန့ၣ် အမ့ၢ်ပှၤလၢအလိာ်ကွဲ ဝံၣ်ဒံၣ်အိၣ်က့(မ်) မုာ်ဒိၣ်မးလီၤ. အဝဲတဲဝဲလၢ “ဖဲယအိၣ်အနံၣ် တဆံအခါန့ၣ် ယစးထီၣ်လိာ်ကွဲ ဝံၣ်ဒံၣ်အိၣ်က့(မ်) လီၤ. အခီၣ်ထံးခါန့ၣ် ယလိာ်ကွဲ က့(မ်) လၢအတအိၣ်ဒီး တၢ်လီၤဘၣ်ယိၣ်အါအါဘၣ်. ဘၣ်ဆၣ် လၢခံန့ၣ် ယစးထီၣ်လိာ်ကွဲ တၢ်လိာ်ကွဲလၢအပၣ်ဃုာ်ဒီး တၢ်မၤဆူၣ်မၤဆိး ဒီးတၢ်ဝံတၢ်နါတဖၣ်န့ၣ်လီၤ.” လၢခံအဝဲ လိာ်ကွဲဝဲ ဝံၣ်ဒံၣ်အိၣ်က့(မ်) ကိးနံၤဒဲး ဒီးတနံၤန့ၣ်ယံာ်ဝဲ ၁၅ နၣ်ရံၣ် ဃၣ်ဃၣ်ညါလီၤ. ဒီးဒဲနံၣ်ယၢၤ ဆဲးတဲဝဲလၢ “ယမ့ၢ်တဲတီတီန့ၣ် က့(မ်) လၢယလိာ်ကွဲ ဒီးတၢ်ဆၢကတီၢ်လၢ ယသူလၢာ်ဂီၤအီၤန့ၣ် ထုးယံၤထီၣ်ယၤဒီး ယဟိဝၤယွၤန့ၣ် ယသ့ၣ်ညါ ဘၣ်ဆၣ် ယနာ်န့ၢ်လီၤယသး သပှၢ်တၢၢ်လၢ ယတမၤကမၣ်ဘၣ် လံာ်စီဆှံတၢ်ဟံးစုနဲၣ်ကျဲ နီတထံၣ်ဒံးဘၣ်.” အဃိ ပမ့ၢ်တပလီၢ်ပသး ဘၣ်ဃးဒီး တၢ်မၤမုာ်မၤဖှံသးဘၣ်န့ၣ် ပကယံၤထီၣ်ဒီး တၢ်မ့ၢ်တၢ်တီ ကယီကယီလီၤ. တၢ်သ့ၣ်တဖၣ်အံၤ မ့ၢ်ကဲထီၣ်သးဒီးပှၤန့ၣ် ဘၣ်သ့ၣ်သ့ၣ် ပကပာ်တ့ၢ်ကွံာ် တၢ်လုၢ်ဒိၣ်ပှ့ၤဒိၣ်တဖၣ်လၢ ယဟိဝၤယွၤဟ့ၣ်လီၤပှၤန့ၣ်လီၤ.
ပပၢၤဃာ် တၢ်မ့ၢ်တၢ်တီ ကသ့ဒ်လဲၣ်
၉. ဒ် ၁ တံၤမသ့း ၁:၁၈, ၁၉ ပာ်ဖျါထီၣ်ဝဲအသိး စီၤပီလူးထိၣ်သတြီၤဝဲ စီၤတံၤမသ့းဒီး မတၤတဂၤလဲၣ်.
၉ ဖး ၁ တံၤမသ့း ၁:၁၈, ၁၉ တက့ၢ်. စီၤပီလူး ထိၣ်သတြီၤဝဲ စီၤတံၤမသ့းဒီး ပှၤသုးဖိတဂၤ ဒီးတဲအီၤလၢ န “ကဒုးတၢ်ဒုးလၢအဂ့ၤ” လီၤ. တၢ်ဒုးအံၤ တမ့ၢ်တၢ်ဒုးလၢ နီၢ်ခိတခီဘၣ်. မ့ၢ်ဝဲတၢ်ဒုးလၢ နီၢ်သးတခီန့ၣ်လီၤ. ဒ်ပှၤသုးဖိတဖၣ်အသိး ခရံာ်ဖိတဖၣ် ကဘၣ်ဒုးတၢ် လၢကျဲဒ်လဲၣ်. ဒ်ခရံာ်အပှၤသုးဖိတဖၣ်အသိး ပကဘၣ်မၤဒိၣ်ထီၣ် ပတၢ်ဂ့ၤတၢ်ဝါ မနုၤတဖၣ်လဲၣ်. ပကတဲသကိး တၢ်မၤလိယဲၢ်ခ လၢ အဘၣ်ဃးဒီး တၢ်အဒိလၢ စီၤပီလူးသူဝဲန့ၣ်လီၤ. တၢ်မၤလိသ့ၣ်တဖၣ်အံၤ ကမၤစၢၤပှၤဒ်သိး ပကပၢၤဃာ် တၢ်မ့ၢ်တၢ်တီအဂီၢ်လီၤ.
၁၀. တၢ်သးတီဒီးယွၤန့ၣ် မ့ၢ်မနုၤလဲၣ် ဒီးဘၣ်မနုၤအဃိ ပဘၣ်သးတီဒီးယွၤလဲၣ်.
၁၀ မၤအါထီၣ် တၢ်သးတီဒီး ယွၤတက့ၢ်. သုးဖိလၢအဂ့ၤတဂၤန့ၣ် အိၣ်ဒီးတၢ်သးတီလီၤ. အဝဲကဒုးတၢ်ဆူၣ်ဆူၣ် ဒ်သိးကဒီသဒၢဝဲ တၢ်လၢအအဲၣ်ဝဲ ဒီးတၢ်လၢအပာ်လုၢ်ပာ်ပှ့ၤဝဲ တဖၣ်န့ၣ်လီၤ. စီၤပီလူး ဟ့ၣ်ဂံၢ်ဟ့ၣ်ဘါ စီၤတံၤမသ့းလၢ ကမၤဒိၣ်ထီၣ်ဝဲ အတၢ်ပျံၤယွၤဒ်သိး ကတီဒီးကစၢ်ယွၤအဂီၢ်လီၤ. (၁ တံၤမသ့း ၄:၇) ပတၢ်အဲၣ်ကစၢ်ယွၤ ဒီးပတၢ်သးတီ မ့ၢ်အါထီၣ်န့ၣ် ပကအဲၣ်ဒိး ဆဲးပၢၤဃာ် တၢ်မ့ၢ်တၢ်တီလီၤ.—၁ တံၤမသ့း ၄:၈-၁၀; ၆:၆.
ပဖံးတၢ်မၤတၢ် ဒီတနံၤကျၢၤအဃိ ပကလဲၤထီၣ်တၢ်အိၣ်ဖှိၣ်အဂီၢ် ပကဘၣ်ဂုာ်ကျဲးစၢး ထဲးဂံၢ်ထဲးဘါလီၤ. ဒီးပမၤအီၤဒ်အံၤအဃိ ပကဒိးန့ၢ်ဘၣ်တၢ်ဆိၣ်ဂ့ၤလီၤ (ကွၢ်လံာ်အဆၢ ၁၁)
၁၁. ဘၣ်မနုၤအဃိ ပကဘၣ်အိၣ်ဒီး တၢ်ပၢၤသးလဲၣ်.
၁၁ မၤအါထီၣ် တၢ်ပၢၤသးတက့ၢ်. ပှၤသုးဖိတဂၤန့ၣ် အကဘၣ် မၤလိသးဆူၣ်ဆူၣ် ဒ်သိးအကအိၣ် ကတဲာ်ကတီၤအသးလၢ တၢ်ဒုးအဂီၢ်လီၤ. စီၤတံၤမသ့း တြီဆၢကွံာ် မုၣ်ကီၤလံၢ်အတၢ်စိတၢ်ကမီၤ န့ၢ်ဝဲန့ၣ် ခီဖျိလၢ အဝဲမၤထွဲဝဲ စီၤပီလူးအတၢ်ဟ့ၣ်ကူၣ် ဒီးတြီဆၢကွံာ်စ့ၢ်ကီး အတၢ်မိၣ်န့ၢ်သးလီလၢ အတဂ့ၤဘၣ်တဖၣ်န့ၣ်လီၤ. တကးဒံးဘၣ် အဝဲဆဲးမၤဒိၣ်ထီၣ် ခရံာ်ဖိတၢ်ဂ့ၤတၢ်ဝါတဖၣ် ဒီးအရ့ဒီး ဒီပုၢ်ဝဲၢ်မုၣ်ခွါတဖၣ်လီၤ. (၂ တံၤမသ့း ၂:၂၂) ဒ်သိးစီၤတံၤမသ့း မၤဝဲဒ်န့ၣ်ကန့ၢ်အဂီၢ် အကဘၣ်အိၣ်ဒီး တၢ်ပၢၤသးလီၤ. ပကဘၣ်အိၣ်ဒီး တၢ်ပၢၤသး လၢပကမၤနၢၤကွံာ် ပတၢ်မိၣ်န့ၢ်သးလီတဖၣ်အဂီၢ်လီၤ. (ရိမ့ၤ ၇:၂၁-၂၅) ဒီးပကဘၣ်အိၣ်ဒီးတၢ်ပၢၤသး ဒ်သိးပကဆဲး ဘ့ၣ်လီၤကွံာ် ပနီၢ်လီၢ်လံၤ ဒီးကူထီၣ်သိးထီၣ်က့ၤ ပနီၢ်သီအဂီၢ်လီၤ. (အ့းဖ့းစူး ၄:၂၂, ၂၄) မ့ၢ်လၢပဖံးတၢ်မၤတၢ် ဒီတနံၤကျၢၤအဃိ ပကလီၤဘှံးလီၤတီၤဝဲလီၤ. ဘၣ်ဆၣ် ပကဘၣ်ဂုာ်ကျဲးစၢး ထဲးဂံၢ်ထဲးဂံၢ်ဘါ ဒ်သိးပကထီၣ်ဘၣ် တၢ်အိၣ်ဖှိၣ်ရိဖှိၣ်အဂီၢ်လီၤ.—ဧ့ၤဘြံၤ ၁၀:၂၄, ၂၅.
၁၂. ဒ်သိးပသူ လံာ်စီဆှံကသ့ဂ့ၤဂ့ၤအဂီၢ် ပမၤအီၤကသ့လၢ ကျဲဒ်လဲၣ်.
၁၂ ပှၤသုးဖိတဂၤ ကဘၣ်မၤလိအသး ဒ်သိးအသူဝဲ အတၢ်စုကဝဲၤ ကသ့အဂီၢ်လီၤ. ဒ်သိးအသူ အတၢ်စုကဝဲၤ ကသ့ဂ့ၤဂ့ၤအဂီၢ် အကဘၣ်မၤလိအသး ထီဘိလီၤ. ဒ်န့ၣ်အသိး ပကဘၣ်သ့ၣ်ညါသူ ကစၢ်ယွၤကလုၢ်ကထါ ဂ့ၤဂ့ၤလီၤ. (၂ တံၤမသ့း ၂:၁၅) ပမၤဒ်န့ၣ်ကသ့အဂီၢ် ပမၤလိဘၣ်အီၤဖဲ ပထီၣ်တၢ်အိၣ်ဖှိၣ်အခါလီၤ. ဘၣ်ဆၣ် ပမ့ၢ်အဲၣ်ဒိး မၤစၢၤပှၤဂၤလၢ ကနာ်ဝဲလံာ်စီဆှံ တၢ်မ့ၢ်တၢ်တီန့ၣ် ပကဘၣ်မၤနီၢ်ကစၢ် တၢ်မၤလိလံာ်စီဆှံ ထီဘိလီၤ. ပကဘၣ်သူဝဲ ကစၢ်ယွၤအကလုၢ်ကထါ ဒ်သိးပတၢ်နာ် ကဂၢၢ်ကျၢၤထီၣ်အဂီၢ်လီၤ. အခီပညီန့ၣ် တမ့ၢ်ထဲပကဘၣ်ဖး လံာ်စီဆှံတခါဧိၤဘၣ်. ပကဘၣ်ဆိကမိၣ်ထံ တၢ်လၢပဖးအီၤတဖၣ်လီၤ. တကးဒံးဘၣ် ဒ်သိးပကနၢ်ပၢၢ် လံာ်စီဆှံအဆၢတဖၣ် လီၤတံၢ်လီၤဆဲးအဂီၢ် ပကဘၣ်ဃုကွၢ် လံာ်လဲၢ်လၢ ပတၢ်ကရၢကရိ ထုးထီၣ်ဝဲတဖၣ် ဒီးအိၣ်မူမၤထွဲအီၤလီၤ. (၁ တံၤမသ့း ၄:၁၃-၁၅) ပမ့ၢ်မၤဒ်န့ၣ်န့ၣ် ပသိၣ်လိပှၤဂၤလၢ ကစၢ်ယွၤ ကလုၢ်ကထါကသ့ဝဲလီၤ. တမ့ၢ်ထဲလၢ ပဖးပၠးအဝဲသ့ၣ် လံာ်စီဆှံအဆၢဧိၤဘၣ်. ပအဲၣ်ဒိးမၤစၢၤ အဝဲသ့ၣ်ဒ်သိး အဝဲသ့ၣ်ကနၢ်ပၢၢ်ထီၣ်ဝဲ လံာ်စီဆှံအဆၢတဖၣ် ဒီးကအိၣ်မူမၤထွဲအီၤ အဂီၢ်လီၤ. ပမ့ၢ်မၤနီၢ်ကစၢ် တၢ်မၤလိလံာ်စီဆှံထီဘိ န့ၣ် ပသိၣ်လိပှၤဂၤလၢ ကစၢ်ယွၤအကလုၢ်ကထါ ကသ့အါထီၣ်ဝဲလီၤ.—၂ တံၤမသ့း ၃:၁၆, ၁၇.
၁၃. ဒ် ဧ့ၤဘြံၤ ၅:၁၄ ပာ်ဖျါထီၣ်ဝဲအသိး ဘၣ်မနုၤအဃိ ပကဘၣ်သ့ ပဲာ်ထံနီၤဖးတၢ်လဲၣ်.
၁၃ သ့ၣ်ညါ ပဲာ်ထံနီၤဖးတၢ်တက့ၢ်. ပှၤသုးဖိတဂၤန့ၣ် ကဘၣ်ထံၣ်စိပာ်စၢၤ တၢ်ဘၣ်ယိၣ်အလီၢ် ဒီးကဘၣ်ဟးဆှဲးဝဲလီၤ. ပဝဲစ့ၢ်ကီး ပကဘၣ်သ့ၣ်ညါ တၢ်အိၣ်သးလၢ အကမၤဘၣ်ဒိပှၤ ဒီးပကဘၣ်ဟးဆှဲးအီၤလီၤ. (ကတိၤဒိ ၂၂:၃; ဖး ဧ့ၤဘြံၤ ၅:၁၄ တက့ၢ်.) အဒိ ပကဘၣ်ဃုထၢ တၢ်မၤမုာ်မၤဖှံသးဒီး တၢ်ဟးကသုၣ်ကသီလၢ တၢ်ကူၣ်သ့အပူၤလီၤ. TV တၢ်ဂီၤမူတနီၤန့ၣ် ပာ်ဖျါထီၣ် လုၢ်လၢ်သကဲးပဝးလၢ အတဂ့ၤတဖၣ်န့ၣ်လီၤ. ပဟးဆှဲးဝဲ တၢ်မၤမုာ်မၤဖှံသးတဖၣ်အံၤ မ့ၢ်လၢအမၤစှၤလီၤ ပတၢ်အဲၣ်ယဟိဝၤယွၤအဃိလီၤ. ပသ့ၣ်ညါ ယဟိဝၤယွၤသးဟ့ဝဲ လုၢ်လၢ်လၢ အတဂ့ၤဘၣ်တဖၣ်အံၤ ဒီးပှၤလၢအသကဲးပဝး တဂ့ၤဘၣ်တဖၣ်အံၤ မၤဘၣ်ဒိအဝဲသ့ၣ်အနီၢ်ကစၢ် ဒီးပှၤအဂၤတဖၣ်လီၤ.—အ့းဖ့းစူး ၅:၅, ၆.
၁၄. တၢ်သ့ပဲာ်ထံနီၤဖးတၢ်န့ၣ် မၤစၢၤဒီပုၢ်ဝဲခွါ ဒဲနံၣ်ယၢၤဒ်လဲၣ်.
၁၄ ဒီပုၢ်ဝဲၢ်ခွါ ဒဲနံၣ်ယၢၤ သ့ၣ်ညါထီၣ်ဝဲလၢ တၢ်ဂဲၤလိာ်ကွဲ ဝံၣ်ဒံၣ်အိၣ်က့(မ်) လၢအဘၣ်ထွဲလိာ်သးဒီး တၢ်မၤဆူၣ်မၤစိး ဒီးတၢ်ဝံတၢ်နါ အတၢ်ဖံးတၢ်မၤတဖၣ်န့ၣ် မ့ၢ်တၢ်လၢ အလီၤဘၣ်ယိၣ်လီၤ. အဃိ အဝဲဃုကွၢ်ဝဲ တၢ်ဂ့ၢ်တၢ်ကျိၤလၢ တၢးထီခိးတၢ် လံာ်ရိဒၢး (Watchtower Library) ဒ်သိးကမၤစၢၤအီၤလၢ ကလဲၤခီဖျိဝဲ တၢ်ကီတၢ်ခဲတဖၣ်အံၤအဂီၢ်လီၤ. ဒီးအကဲဘျုးလၢ အဂီၢ်ဒ်လဲၣ်. တၢ်ဂဲၤလိာ်ကွဲ ဝံၣ်ဒံၣ်အိၣ်က့(မ်) လၢအတဂ့ၤတဖၣ်န့ၣ် အဝဲတဆဲးဂဲၤဝဲလၢၤဘၣ်. အဝဲပတုာ်ကွံာ်ဝဲ တၢ်ဂဲၤလိာ်ကွဲ က့(မ်) လၢအ့းထၢၣ်နဲးပူၤ ဒီးတဆဲးကျိးစ့ၢ်ကီး ဒီးပှၤဂဲၤလိာ်ကွဲဖိ လၢအဂၤတဖၣ်လၢၤဘၣ်. ဒီးဒီပုၢ်ဝဲၢ်ခွါအံၤ တဲဝဲလၢ “လၢယကဂဲၤလိာ်ကွဲ ဝံၣ်ဒံၣ်အိၣ်က့(မ်) အလီၢ် ယလဲၤမၤတၢ်လၢ တၢ်ချၢတမံၤမံၤ မ့တမ့ၢ်ဘၣ် ယလဲၤဟးလိာ်ကွဲဒီး ဒီပုၢ်ဝဲၢ်မုၣ်ခွါတဖၣ်လီၤ.” ခဲအံၤ ဒီပုၢ်ဝဲၢ်ခွါ ဒဲနံၣ်ယၢၤန့ၣ် မၤဝဲပှၤလဲၤလၢညါ ဒီးကဲဝဲတၢ်အိၣ်ဖှိၣ်သးပှၢ်တဂၤလီၤ.
၁၅. တၢ်ဂ့ၢ်တၢ်ကျိၤ လၢအတမ့ၢ်တတီဘၣ်န့ၣ် ဘၣ်မနုၤအဃိ မ့ၢ်တၢ်လၢ အလီၤဘၣ်ယိၣ်လဲၣ်.
၁၅ ဒ်စီၤတံၤမသ့းအသိး ပကဘၣ်သ့ၣ်ညါပာ်စၢၤလၢ ပှၤလၢအညိကွံာ် တၢ်နာ်တဖၣ်န့ၣ် ကရၤလီၤဝဲ တၢ်ဂ့ၢ်တၢ်ကျိၤ လၢအကမၣ်တဖၣ် ဒီးမ့ၢ်တၢ်လၢအလီၤဘၣ်ယိၣ်ဒိၣ်မးလီၤ. (၁ တံၤမသ့း ၄:၁, ၇; ၂ တံၤမသ့း ၂:၁၆) အဒိ အဝဲသ့ၣ်ရၤလီၤ တၢ်ကစီၣ်လၢ အကမၣ်တဖၣ် ဘၣ်ဃးဒီး ပဒီပုၢ်ဝဲၢ်အဂ့ၢ် ဒီးမၤဒ့ဒီပသး ဒ်သိးပသု တနာ်န့ၢ်လၢၤ ယဟိဝၤယွၤအတၢ်ကရၢကရိ တဂ့ၤအဂီၢ်လီၤ. တၢ်ဂ့ၢ်တၢ်ကျိၤလၢ အကမၣ်သ့ၣ်တဖၣ်အံၤန့ၣ် မၤလီၤစှၤဝဲ ပတၢ်နာ်လီၤ. ပကဘၣ်ဟးဆှဲး ပှၤဟီၣ်ခိၣ်ဖိ အတၢ်လံၣ်တၢ်လီတဖၣ်အံၤလီၤ. ဘၣ်မနုၤအဃိလဲၣ်. ခီဖျိလၢ တၢ်ဂ့ၢ်တၢ်ကျိၤသ့ၣ်တဖၣ်အံၤ “ဘၣ်ဃးဒီး ပှၤအသူၣ်အၢအသးသီ, ဒီးတအိၣ်ဘၣ်ဒီး တၢ်မ့ၢ်တၢ်တီဘၣ်” တဖၣ်အဃိလီၤ. အဝဲသ့ၣ် အတၢ်ပညိၣ်န့ၣ် မ့ၢ်ဒ်သိး ကဒုးအိၣ် ထီၣ်ဝဲ “တၢ်သံကွၢ်သံဒိး ဒီးတၢ်တဲးလိာ်ဃိလိာ်” သးအဂီၢ်လီၤ. (၁ တံၤမသ့း ၆:၄, ၅) အဝဲသ့ၣ်အဲၣ်ဒိးလၢ ပကနာ်ဝဲ အတၢ်လံၣ်တၢ်လီ ဒီးပသုတနာ်န့ၢ်လၢၤ ပဒီပုၢ်ဝဲၢ်မုၣ်ခွါတဖၣ် တဂ့ၤအဂီၢ်လီၤ.
၁၆. ဒ်သိးပကဆဲးသးစၢၢ်ဆၢတၢ်အဂီၢ် ပကဘၣ်ဟးဆှဲးတၢ်မနုၤလဲၣ်.
၁၆ ဆဲးအိၣ်ဒီး တၢ်သးစၢၢ်ဆၢတက့ၢ်. “ဒ်ယ့ၣ်ၡူးခရံာ်အသုးဖိလၢ အဂ့ၤတဂၤအသိး” စီၤတံၤမသ့း ကဘၣ်သးစၢၢ်ဆၢ တၢ်စံၣ်တဲၤတဲလီၤတၢ်မၤလီၤ. တကးဒံးဘၣ် အဝဲတဟ့ၣ် တၢ်ဆၢကတီၢ်လၢ တၢ်ဃုကျိၣ်ဃုစ့, တၢ်ထူးတၢ်တီၤ ဒီးဖီတၢၣ်တဂၤတဖၣ် လၢအတၢ်အိၣ်မူအပူၤဘၣ်. (၂ တံၤမသ့း ၂:၃, ၄) ဒ်စီၤတံၤမသ့းအသိး ပတအဲၣ်ဒိး ဃုအါထီၣ် ကျိၣ်စ့ဒီးတၢ်ထူးတၢ်တီၤတဖၣ် လၢပတၢ်အိၣ်မူအပူၤဘၣ်. “တၢ်လီတၢ်ဝ့ၤဘၣ်ဃးဒီး တၢ်ထူးတၢ်တီၤတဖၣ်” န့ၣ် မၤစှၤလီၤဝဲ ပတၢ်အဲၣ်ယဟိဝၤယွၤ, ပတၢ်ပာ်လုၢ်ပာ်ပှ့ၤလံာ်စီဆှံ ဒီးပတၢ်သူၣ်ဆူၣ်သးဆူၣ်လၢ ပကတဲဘၣ်ပှၤဂၤလၢ တၢ်မ့ၢ်တၢ်တီအဂီၢ်လီၤ. (မးသဲ ၁၃:၂၂) ပကဘၣ်အိၣ်မူယိယိဖိ ဒီးပကသူ ပတၢ်ဆၢကတီၢ် ဒီးပတၢ်ဂံၢ်တၢ်ဘါလၢ ပကဆဲး “ဃုဆိယွၤအဘီအမုၢ်” အဂီၢ်လီၤ.—မးသဲ ၆:၂၂-၂၅, ၃၃.
၁၇-၁၈. ဒ်သိးပတၢ်ရ့လိာ်သးဒီး ယဟိဝၤယွၤ သုတဟးဂီၤတဂ့ၤအဂီၢ် ပကဒီသဒၢလီၤ ပသးဒ်လဲၣ်.
၁၇ အိၣ်ကတဲာ်ကတီၤသးလၢ ပကဒီသဒၢလီၤပသးလၢ အဆိအချ့အက့ၢ်. သုးဖိတဂၤ ကဘၣ်အိၣ် ကတဲာ်ကတီၤ ပာ်စၢၤဆိအသးလၢ အကဒီသဒၢလီၤ အသးအဂီၢ်လီၤ. ပမ့ၢ်ပၢၤဃာ် တၢ်လၢယဟိဝၤယွၤ ဟ့ၣ်လီၤပှၤတဖၣ်န့ၣ် ဖဲပထံၣ်ဘၣ် တၢ်လီၤဘၣ်ယိၣ်အခါ ပကဒီသဒၢလီၤပသးလၢ အဆိအချ့လီၤ. ပကမၤဒ်န့ၣ်အဂီၢ် တၢ်မနုၤကမၤစၢၤပှၤလဲၣ်. တချုးဖဲ ပထံၣ်ဘၣ် တၢ်လီၤဘၣ်ယိၣ်အခါ ပကဘၣ်အိၣ် ကတဲာ်ကတီၤဆိပာ်စၢၤ ပသးန့ၣ်လီၤ.
၁၈ အဒိ ပှၤကမၤဝဲတၢ်အိၣ်ဖှိၣ်လၢ တၢ်သူၣ်ထီၣ်တဖျၢၣ်အပူၤလီၤ. တချုးလၢတၢ်အိၣ်ဖှိၣ်စးထီၣ်ဒံးဘၣ်န့ၣ် ပှၤပၢၤလီၢ်ဆ့ၣ်နီၤ ကဘိးသ့ၣ်ညါဘၣ် ကမျၢၢ်လၢ ကျဲဟးထီၣ်န့ၣ်လီၤ. ဘၣ်မနုၤအဃိ အဝဲဘၣ်ဘိးဘၣ်သ့ၣ်ညါဝဲလဲၣ်. မ့ၢ်လၢ ဂ့ၢ်ဂီၢ်အူမ့ၢ်ဟဲကဲထီၣ်အသးန့ၣ် ကမျၢၢ်တဖၣ်သ့ၣ်ညါဝဲလၢ ကဘၣ်ဃ့ၢ်ထီၣ်ဝဲ အဆိအချ့လၢ ကျဲအံၤန့ၣ်လီၤ. ဒ်န့ၣ်အသိး ပအဲၣ်ဒိးအိၣ်ကတဲာ်ကတီၤပသးဖဲ ပသူအ့ထၢၣ်နဲး, ကွၢ်တၢ်ဂီၤမူ ဒီး TV အတၢ်ရဲၣ်တၢ်ကျဲၤအခါန့ၣ်လီၤ. ဖဲပသူ အ့ထၢၣ်နဲး, ကွၢ်တၢ်ဂီၤမူ အခါ ပမ့ၢ်ထံၣ် တၢ်လၢအတကြၢးတဘၣ်တဖၣ်, တၢ်မၤဆူၣ်မၤဆိး ဒီးပှၤလၢအစူးကွံာ်ညိကွံာ်တၢ်နာ် အတၢ်ကစီၣ်တဖၣ်န့ၣ် ပကပံးကွံာ်အီၤ တဘျီဃီလီၤ. ပမ့ၢ်အိၣ်ကတဲာ်ကတီၤ ပသးန့ၣ် ဖဲတၢ်သ့ၣ်တဖၣ်အံၤ ကဲထီၣ်အသးအခါ ပတပျဲလၢ တၢ်သ့ၣ်တဖၣ်အံၤ ကမၤဟးဂီၤ ပတၢ်ရ့လိာ်သးဒီး ယဟိဝၤယွၤဘၣ်. လၢတၢ်န့ၣ်အလီၢ် ပကဆဲးမၤတၢ်လၢ အဘၣ်ကစၢ်ယွၤအသးလီၤ.—စံးထီၣ်ပတြၢၤ ၁၀၁:၃; ၁ တံၤမသ့း ၄:၁၂.
၁၉. ပမ့ၢ်ပၢၤဃာ် တၢ်လုၢ်ဒိၣ်ပှ့ၤဒိၣ်လၢ ယဟိဝၤယွၤဟ့ၣ်လီၤပှၤန့ၣ် ပကဒိးန့ၢ်ဘၣ် တၢ်ဆိၣ်ဂ့ၤ မနုၤတဖၣ်လဲၣ်.
၁၉ ပကဘၣ်ပၢၤဃာ် ပတၢ်လုၢ်ဒိၣ်ပှ့ၤဒိၣ်လၢ ယဟိဝၤယွၤဟ့ၣ်လီၤပှၤလၢ အမ့ၢ်ဝဲ လံာ်စီဆှံတၢ်မ့ၢ်တၢ်တီ ဒီးတၢ်ခွဲးတၢ်ယာ်လၢ ပကသိၣ်လိပှၤဂၤ လၢတၢ်မ့ၢ်တၢ်တီန့ၣ်လီၤ. ဖဲပမၤဒ်န့ၣ်အခါ ပကအိၣ်ဒီးသးလၢ အသ့ၣ်ညါဒၣ်တၢ် လၢအကဆှီ, ပတၢ်အိၣ်မူန့ၣ် ကပှဲၤဒီးတၢ်သးခုနီၢ်နီၢ် ဒီးပသးခုလၢ ပမၤစၢၤဘၣ်ပှၤဂၤလၢ ကသ့ၣ်ညါထီၣ်ဘၣ် ယဟိဝၤယွၤအဂီၢ်လီၤ. ခီဖျိလၢ ယဟိဝၤယွၤမၤစၢၤပှၤအဃိ ပပၢၤဃာ် တၢ်လုၢ်ဒိၣ်ပှ့ၤဒိၣ်လၢ အဟ့ၣ်လီၤပှၤတဖၣ်န့ၢ်ဝဲလီၤ.—၁ တံၤမသ့း ၆:၁၂, ၁၉.
တၢ်သးဝံၣ် ၁၂၇ ယကြၢးမ့ၢ်ပှၤဒ်လဲၣ်
^ လံာ်အဆၢ. 5 ယဟိဝၤယွၤဟ့ၣ်ပှၤ တၢ်လုၢ်ဒိၣ်ပှ့ၤဒိၣ်လၢအမ့ၢ် တၢ်သ့ၣ်ညါထီၣ် တၢ်မ့ၢ်တၢ်တီ ဒီးပသိၣ်လိဘၣ်က့ၤ တၢ်မ့ၢ်တၢ်တီအံၤလၢ ပှၤအဂၤတဖၣ်လီၤ. တၢ်မၤလိအံၤ ကမၤစၢၤပှၤလၢ ပကပၢၤဃာ် တၢ်လုၢ်ဒိၣ်ပှ့ၤဒိၣ်အံၤ ဒီးပတပျဲ လီၤမၢ်ကွံာ်အီၤ နီတဘျီဘၣ်.
^ လံာ်အဆၢ. 8 ပှၤမံၤ ဘၣ်တၢ်ဆီတလဲအီၤလီၤ.