ဖဲ ၁ ကရံၣ်သူး ၁၅:၈ န့ၣ်​စီၤပီလူး တဲဝဲလၢ “လၢခံ​ကတၢၢ်န့ၣ်​ အဝဲ​လီၣ်ဖျါထီၣ်​စ့ၢ်ကီး အသး​လၢ ယ​မဲာ်ညါ, လီၤဂာ်ဒ် ယ​မ့ၢ်​ဖိသၣ်​လၢ အအိၣ်ဖျဲၣ်ထီၣ်​ တချုးလၢ အမုၢ်အလါ​ဘၣ်​ဒံးဘၣ်​ အသိး.” ဘၣ်ဃးဒီး လံာ်စီဆှံ​တဆၢအံၤန့ၣ်​ လၢအပူၤကွံာ်န့ၣ်​ ပ​နၢ်ပၢၢ်​လၢ စီၤပီလူး​အဲၣ်ဒိး​တဲဝဲ ဘၣ်ဃးဒီး​အတၢ်လဲၤခီဖျိ ဖဲ​အထံၣ်ဘၣ်ဝဲ ယ့ၣ်ၡူး​လၢမူခိၣ်​ လၢ​တၢ်ထံၣ်​လၢညါခီ​အပူၤ​အခါ. အဝဲ​ထံၣ်​ဘၣ်​တၢ်မၤသးအံၤ​အဃိ လီၤဂာ်ဒ်​အအိၣ်ဖျဲၣ်ထီၣ်, အဲၣ်ဒိး​တဲဝဲဒၣ်​ အဂဲၤဆၢထၢၣ်​သမူထီၣ်က့ၤ ဒ်​ပှၤနီၢ်သးဖိ​တဂၤ​အသိး. လၢခံ ပူၤကွံာ်​အနံၣ်​ဖးယံာ်မၣ်​ ပှၤ​စးထီၣ်​ဂဲၤဆၢထၢၣ်​သမူထီၣ်က့ၤ ဒ်​ပှၤနီၢ်သးဖိ​အသိး. အဃိ လီၤဂာ်​ဒ်သိးဒီး စီၤပီလူး​အိၣ်ဖျဲၣ်ထီၣ်​ တချုးလၢ​အမုၢ်အလါ​ဘၣ်​ဒံးဘၣ်. ဘၣ်ဆၣ်​ ဖဲ​ပ​ဃုသ့ၣ်ညါ​အါထီၣ်​ တၢ်ဂ့ၢ်​ဘၣ်ဃးဒီး လံာ်စီဆှံ​တဆၢအံၤ​အခါ ပ​သ့ၣ်ညါ​လၢ ပ​က​ဘၣ်​ဆီတလဲ ပ​တၢ်နၢ်ပၢၢ်​တခါအံၤ.

လံာ်စီဆှံ​တဆၢအံၤ စီၤပီလူး​အဲၣ်ဒိး​တဲ​ဝဲ​ဘၣ်ဃးဒီး တၢ်လၢ​အကဲထီၣ်သး​ဒီး​အီၤ ဖဲ​အကဲထီၣ်​ခရံာ်ဖိ​အခါ. ဘၣ်ဆၣ်​ ဘၣ်မနုၤအဃိ အတဲဝဲလၢ “အအိၣ်ဖျဲၣ်ထီၣ်​ တချုးလၢ အမုၢ်အလါ​ဘၣ်​ဒံးဘၣ်” န့ၣ်ဘၣ်သ့ၣ်သ့ၣ်​ တၢ်ဂ့ၢ်​ကအိၣ်​ဝဲ​အါမံၤ. အဒိ–

စီၤပီလူး​ကဲထီၣ်​ခရံာ်ဖိ သတူၢ်ကလာ်​လၢ တၢ်တမုၢ်လၢ်​အပူၤ. ပှၤ​ဖိသၣ်​လၢ အ​အိၣ်ဖျဲၣ်ထီၣ်​ တချုးလၢ​အမုၢ်အလါ​ဘၣ်​ဒံး​ဘၣ်​န့ၣ်​ ညီနုၢ်​အဟဲ​ကဲထီၣ်အသး​လၢ တၢ်တမုၢ်လၢ်​အပူၤ. ဖဲ​စီၤစီလူး (လၢခံ​ပှၤ​သ့ၣ်ညါထီၣ်​အီၤ​လၢ စီၤပီလူး) လဲၤ​လၢ ဝ့ၢ်​ဒၤမ့ၤစ့း ဒ်သိး​က​လဲၤ​မၤအၢမၤနးဝဲ ခရံာ်ဖိတဖၣ်​အခါ လၢ​တၢ်တမုၢ်လၢ်​အပူၤ အဝဲထံၣ်ဘၣ်ဝဲ ယ့ၣ်ၡူး​လၢအ​ဂဲၤဆၢထၢၣ်​ သမူထီၣ်က့ၤ​တဂၤန့ၣ်​ လၢ​တၢ်ထံၣ်​လၢညါခီ​အပူၤ. စီၤပီလူး​ကဲထီၣ်​ခရံာ်ဖိန့ၣ်​ အက​မၢ​ကမၣ်​ဘၣ်အသး​ဒိၣ်မး တကးဒံးဘၣ်​ ခရံာ်ဖိ​လၢ အက​မၤအၢမၤနးဝဲတဖၣ်​စ့ၢ်ကီး ကမၢကမၣ်ဝဲဒၣ်. တကးဒံးဘၣ်​ တၢ်​ကဲထီၣ်အသး​ဒီး စီၤပီလူး​သတူၢ်ကလာ်​ဒ်အံၤ​အဃိ အတထံၣ်တၢ်​လၢၤ​ဘၣ်န့ၣ်​ အိၣ်တတီၤဖိညါ.—မၤတၢ် ၉:၁-၉, ၁၇-၁၉.

စီၤပီလူး​ကဲထီၣ်​ခရံာ်ဖိန့ၣ်​ “အဆၢကတီၢ်​တဘၣ်ဘၣ်.” ကြံး​အတၢ်ကတိၤ​လၢအမ့ၢ် “ဖိသၣ်​လၢ အအိၣ်ဖျဲၣ်ထီၣ်​ တချုးလၢ အမုၢ်အလါ​ဘၣ်​ဒံးဘၣ်” န့ၣ်​ အခီပညီ အိၣ်​စ့ၢ်ကီး​လၢ “ဖိသၣ်​လၢ အအိၣ်ဖျဲၣ်ထီၣ်​ အဆၢကတီၢ်​တဘၣ်ဘၣ်.” လံာ်စီဆှံ​တဘ့ၣ်​ (The Jerusalem Bible) တဲဝဲလၢ “လီၤဂာ်ဒ် ယ​မ့ၢ်​ဖိသၣ်​လၢ အအိၣ်ဖျဲၣ်ထီၣ်​ လၢ​တၢ်တမုၢ်လၢ်​အပူၤ.” ဖဲ​စီၤပီလူး​ကဲထီၣ်​ခရံာ်ဖိ​အခါ ယ့ၣ်ၡူးန့ၣ်​ အက့ၤထီၣ်​အိၣ်လၢမူခိၣ်​လံ. ဖဲယ့ၣ်ၡူး​ဂဲၤဆၢထၢၣ်​သမူထီၣ်က့ၤ သီသီ​ဒီး​လီၣ်ဖျါထီၣ်​အသး​လၢ ဟီၣ်ခိၣ်​အခါ စီၤပီလူး​တထံၣ်​ဘၣ်​ယ့ၣ်ၡူး​ဒ် ပှၤ​ဂၤ​လၢ​အထံၣ်ဘၣ်တ့ၢ် ယ့ၣ်ၡူး​အသိးဘၣ်. (၁ ကရံၣ်သူး ၁၅:၄-၈) လၢ​တၢ်တမုၢ်လၢ်​အပူၤ ယ့ၣ်ၡူး​လီၣ်ဖျါထီၣ်​အသး​လၢ စီၤပီလူး​အအိၣ်​ လၢ​ဆၢကတီၢ်​ဖဲန့ၣ်​ အဃိ လီၤဂာ်​ဒ်သိးဒီး စီၤပီလူး​ထံၣ်​ဘၣ်​အီၤ​လၢ “တၢ်ဆၢကတီၢ်​တဘၣ်ဘၣ်.”

စီၤပီလူး​ပာ်ဖျါထီၣ်​ တၢ်ဆီၣ်လီၤသး. ပှၤကူၣ်ဘၣ်ကူၣ်သ့​တနီၤ တဲဝဲလၢ စီၤပီလူး​အတၢ်ကတိၤ​တခါန့ၣ်​ အပာ်ဖျါထီၣ်​ဝဲ​လၢ အဝဲ​ဆိမိၣ်ဆံးလီၤအသး. အဃိ ဘၣ်သ့ၣ်သ့ၣ်​ စီၤပီလူး​က​အဲၣ်ဒိး​တဲဝဲလၢ အတကြၢး​ဒီး တၢ်မၢဖိ​အလီၢ်​ဘၣ်. အဒိ​လၢခံ စီၤပီလူး​တဲဝဲလၢ “ယၤန့ၣ်​ ယ​မ့ၢ်​တၢ်မၢဖိ​အဆံးကတၢၢ်​လီၤ. မ့ၢ်လၢ ယ​မၤအၢမၤနး ကစၢ်ယွၤ အတၢ်အိၣ်ဖှိၣ်​အဃိ တၢ်​တကြၢး​ကိး​ယၤ​လၢ တၢ်မၢဖိ​တဂၤ​ဘၣ်. ဘၣ်ဆၣ်​ ခီဖျိလၢ ကစၢ်ယွၤ အတၢ်​သးကညီၤ ဒိၣ်ဒိၣ်မုၢ်မုၢ်​အဃိ ယ​မ့ၢ်​တၢ်မၢဖိ​တဂၤ​လီၤ.”—၁ ကရံၣ်သူး ၁၅:၉, ၁၀.

အဃိ လီၤဂာ်လၢ စီၤပီလူး​အဲၣ်ဒိး​တဲဝဲ အဝဲ​ထံၣ်​ဘၣ်​ယ့ၣ်ၡူး​လၢ တၢ်တမုၢ်လၢ်​အပူၤ ဒီး​အဝဲ​ကဲထီၣ်​ခရံာ်ဖိန့ၣ်​ တၢ်ဆၢကတီၢ်​တဘၣ်ဘၣ်. မ့တမ့ၢ်ဘၣ်န့ၣ်​ အအဲၣ်ဒိး​တဲ​လၢ အတမ့ၢ်​ပှၤလၢ အကြၢး​ထံၣ်ဘၣ်​ တၢ်ထံၣ်​လၢညါခီ​လၢ အလီၤကမၢကမၣ်​တခါအံၤ​ဘၣ်. စီၤပီလူး​မ့ၢ်​အဲၣ်ဒိး​တဲဝဲ အခီပညီ ဒ်လဲၣ်ဂ့ၤဒ်လဲၣ်ဂ့ၤ​န့ၣ်​ ဖျါလၢအ​ဝဲ​ပာ်လုၢ်ပာ်ပှ့ၤဝဲ တၢ်လၢ​အလဲၤခီဖျိ​​ဘၣ်​တခါအံၤ​ဒိၣ်မး. စီၤပီလူး​လဲၤခီဖျိဘၣ်​ဝဲ​တၢ်ဒ်အံၤ​အဃိ အဝဲ​သ့ၣ်ညါ​လီၤတံၢ်​လၢ ယ့ၣ်ၡူး​ဂဲၤဆၢထၢၣ်​သမူထီၣ်က့ၤ​အနီၢ်ကီၢ်. ဒီး​ဖဲ​အဝဲ​တဲပၠး​ပှၤလၢ ယ့ၣ်ၡူး​ဂဲၤဆၢထၢၣ်​သမူထီၣ်က့ၤ​အဂ့ၢ်​အခါ အက့ၤတဲ​ဝဲ​တၢ်လဲၤခီဖျိ​တခါအံၤ တလီၢ်လီၢ်.—မၤတၢ် ၂၂:၆-၁၁; ၂၆:၁၃-၁၈.