တၢ်မၤလိ ၄၁
တၢ်မၤလိလၢ ပန့ၢ်ဘၣ်လၢ စီၤပ့းတရူး အလံာ်ပရၢခံဘ့ၣ်အပူၤ
“ယအဲၣ်ဒိးဒုးသ့ၣ်နီၣ်ထီၣ်သုလၢ တၢ်သ့ၣ်တဖၣ်အံၤ ထီဘိ.”—၂ ပ့း ၁:၁၂.
တၢ်သးဝံၣ် ၁၂၇ ယကြၢးကဲထီၣ်ပှၤဒ်လဲၣ်
တၢ်မၤလိအံၤ အတၢ်တိာ်ပာ် a
၁. တချုးလၢ စီၤပ့းတရူးသံဒံးဘၣ်န့ၣ် ကစၢ်ယွၤအသးစီဆှံ ထိးဘၣ်အီၤလၢ အကမၤ မနုၤလဲၣ်.
စီၤပ့းတရူးန့ၣ် အမၤဝဲ ယဟိဝၤယွၤအတၢ်မၤ လၢတၢ်သးတီပူၤ လၢအနံၣ်အါမး. အပိာ်ဘၣ် ယ့ၣ်ၡူးအခံလၢ တၢ်စံၣ်တဲၤတဲလီၤတၢ်မၤအပူၤ ဒီးအမ့ၢ်စ့ၢ်ကီးပှၤတဂၤလၢ အစံၣ်တဲၤတဲလီၤတၢ်လၢ ပှၤကလုာ်ဂၤတဖၣ်အကျါ. ဒီးလၢခံန့ၣ် အကဲထီၣ်ဘၣ် ပှၤပၢဆှၢတၢ်ကမံးတံာ်တဂၤ. ကဘၣ်ဖဲ ခ.န ၆၂-၆၄ ဒီးဖဲအသ့ၣ်ညါဝဲလၢ အကသံဘူးထီအခါ ကစၢ်ယွၤအသးစီဆှံထိးဘၣ်အီၤလၢ အကကွဲး လံာ်ခံဘ့ၣ် လၢအမ့ၢ် လံာ် ၁ ပ့းတရူး ဒီးလံာ် ၂ ပ့းတရူး. စီၤပ့းတရူး မုၢ်လၢ်ဝဲလၢ ဖဲအသံဝံၤအလီၢ်ခံ အလံာ်ပရၢခံဘ့ၣ်အံၤ ကကဲထီၣ်တၢ်မၤစၢၤလၢ ခရံာ်ဖိတဖၣ်အဂီၢ်.—၂ ပ့း ၁:၁၂-၁၅.
၂. ဘၣ်မနုၤအဃိ စီၤပ့းတရူး အလံာ်ပရၢခံဘ့ၣ်န့ၣ် ကဲဘျုးဝဲလၢ ခရံာ်ဖိလၢတၢ်မၢဖိအစိၤအဂီၢ်လဲၣ်.
၂ ဖဲစီၤပ့းတရူး ကွဲးလံာ်ပရၢအခါ ဒီပုၢ်ဝဲၢ်မုၣ်ခွါတဖၣ် “သးအုး . . . ခီဖျိလၢ တၢ်မၤကွၢ် အကလုာ်ကလုာ်အဃိ.” (၁ ပ့း ၁:၆) ဖဲန့ၣ်အဆၢကတီၢ် ပှၤတနီၤသိၣ်လိဝဲ တၢ်သိၣ်လိလၢအကမၣ် ဒီးလုၢ်လၢ်သကဲာ်ပဝး လၢအတဂ့ၤဘၣ်တဖၣ် လၢတၢ်အိၣ်ဖှိၣ်အပူၤ. (၂ ပ့း ၂:၁, ၂, ၁၄) ခရံာ်ဖိတဖၣ် လၢအအိၣ်လၢ ဝ့ၢ်ယရူၤၡလ့ၣ်န့ၣ် တယံာ်လၢၤဘၣ် အဝဲသ့ၣ်ကထံၣ်ဘၣ်ဒီး “တၢ်ခဲလၢာ် အကတၢၢ်” လၢအမ့ၢ် ရိမ့ၤ အသုးမုၢ်သံၣ်ဘိ ကမၤဟးဂီၤကွံာ်ဝဲ ဝ့ၢ်ယရူၤၡလ့ၣ် ဒီးတၢ်လုၢ်ဟံၣ်. (၁ ပ့း ၄:၇) အဃိ စီၤပ့းတရူး အလံာ်ပရၢ ခံဘ့ၣ်အံၤ ကမၤစၢၤဝဲ ခရံာ်ဖိတဖၣ်လၢ ကဆဲးအိၣ်ဒီး တၢ်သးတီ ဖဲအဝဲသ့ၣ်ထံၣ်ဘၣ်ဒီး တၢ်ကီတၢ်ခဲဖဲန့ၣ်အဆၢကတီၢ် တကးဒံးဘၣ် ကကတဲာ်ကတီၤ အဝဲသ့ၣ် ဖဲအဝဲသ့ၣ် ထံၣ်ဘၣ်ဒီး တၢ်မၤကွၢ် လၢခါဆူညါအဂီၢ် စ့ၢ်ကီး. b
၃. ဘၣ်မနုၤအဃိ ပဘၣ်မၤလိ စီၤပ့းတရူး အလံာ်ပရၢခံဘ့ၣ်အံၤလဲၣ်.
၃ စီၤပ့းတရူးကွဲးဝဲ လံာ်ပရၢခံဘ့ၣ်အံၤလၢ ခရံာ်ဖိလၢ တၢ်မၢဖိအစိၤအဂီၢ်. ဘၣ်ဆၣ် လံာ်ခံဘ့ၣ်အံၤ ယဟိဝၤယွၤ ပာ်လီၤစ့ၢ်ကီးဝဲ လၢလံာ်စီဆှံအပူၤ. အဃိ လံာ်ခံဘ့ၣ်အံၤ ကဲဘျုးလၢ ပဂီၢ်စ့ၢ်ကီး. (ရိ ၁၅:၄) ဒ်ခရံာ်ဖိလၢညါတဖၣ်အသိး ပဝဲစ့ၢ်ကီး ပအိၣ်မူဘၣ်လၢ ပှၤလၢအိၣ်ဒီး လုၢ်လၢ်သကဲာ်ပဝး လၢတဂ့ၤဘၣ်အကျါ ဒီးပထံၣ်ဘၣ်စ့ၢ်ကီး တၢ်မၤကွၢ်တဖၣ်အဃိ ကီဒိၣ်မးလၢ ပကမၤ ယဟိဝၤယွၤ အတၢ်ဘၣ်သး. တကးဒံးဘၣ် တယံာ်လၢၤဘၣ်န့ၣ် ပကထံၣ်ဘၣ်စ့ၢ်ကီး တၢ်နးတၢ်ဖှီၣ်ဖးဒိၣ် လၢအနးဒိၣ်န့ၢ် တၢ်ဆၢကတီၢ်ဖဲ ပှၤရိမ့ၤဖိ မၤဟးဂီၤကွံာ် ဝ့ၢ်ယရူၤၡလ့ၣ် ဒီးတၢ်လုၢ်ဟံၣ် အဆၢကတီၢ်ဒံး. အဃိ စီၤပ့းတရူး အလံာ်ပရၢခံဘ့ၣ်အံၤ ကမၤစၢၤပှၤဒ်သိး ပကအိၣ်ခိး ယဟိဝၤယွၤအမုၢ်နံၤထီဘိ, ပကမၤလီၤမၢ်ကွံာ် တၢ်ပျံၤပှၤကညီ ဒီးပမၤအါထီၣ် တၢ်အဲၣ်လၢ တဂၤဒီးတဂၤအဖီခိၣ် ကသ့အဂီၢ်. တကးဒံးဘၣ် စီၤပ့းတရူး အလံာ်ပရၢခံဘ့ၣ်အံၤ ကမၤစၢၤစ့ၢ်ကီး တၢ်အိၣ်ဖှိၣ်သးပှၢ်တဖၣ် ဒ်သိး အဝဲသ့ၣ် ကွၢ်ထွဲဝဲ ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်ပူၤ ကသ့ဂ့ၤဂ့ၤအဂီၢ်.
ဆဲးအိၣ်ခိးကွၢ်လၢ်တၢ် ထီဘိ
၄. ဒ် ၂ ပ့းတရူး ၃:၃, ၄ ပာ်ဖျါထီၣ်ဝဲအသိး တၢ်လၢကမၤလီၤစှၤ ပတၢ်နာ်န့ၣ် မ့ၢ်မနုၤလဲၣ်.
၄ ပှၤလၢပခိၣ်ပဃၢၤန့ၣ် အဝဲသ့ၣ် တနာ်တၢ်လၢ လံာ်စီဆှံတဲဝဲ ဘၣ်ဃးဒီး တၢ်ကမၤအသးလၢ ခါဆူညါအဂ့ၢ်ဘၣ်. တကးဒံးဘၣ် ခီဖျိလၢ ပစံၣ်တဲၤတဲလီၤ ဘၣ်ဃးဒီး တၢ်အကတၢၢ်အဂ့ၢ်န့ၣ် အိၣ်လၢအနံၣ်အါမးလံအဃိ ဘၣ်သ့ၣ်သ့ၣ် ပှၤလၢအထီဒါတၢ်တဖၣ် ကမၤမဲာ်ဆှးပှၤ. ပှၤတနီၤ တဲဝဲလၢ တၢ်အကတၢၢ် တဟဲနီတဘျီဘၣ်. (ဖး ၂ ပ့းတရူး ၃:၃, ၄.) ပဟံၣ်ဖိဃီဖိ, ပသကိးလၢတၢ်မၤလီၢ် မ့တမ့ၢ် ဖဲပလဲၤစံၣ်တဲၤတဲလီၤတၢ်အခါ ပှၤမ့ၢ်တဲပှၤဒ်န့ၣ်န့ၣ် ဘၣ်သ့ၣ်သ့ၣ် ပတၢ်နာ်လီၤစှၤသ့. အဃိ ဒ်သိးပတၢ်နာ် တလီၤစှၤတဂ့ၤအဂီၢ် စီၤပ့းတရူး ပာ်ဖျါထီၣ်န့ၢ်ပှၤ တၢ်ဂ့ၢ်တနီၤလၢ ကမၤစၢၤပှၤ.
၅. ဒ်သိး ပကအိၣ်ဒီး တၢ်ထံၣ်လၢအဂ့ၤ ဘၣ်ဃးဒီး တၢ်အကတၢၢ်အဆၢကတီၢ်အဂီၢ် စီၤပ့းတရူး အတၢ်ကတိၤ မၤစၢၤပှၤဒ်လဲၣ်. (၂ ပ့းတရူး ၃:၈, ၉)
၅ ပှၤတနီၤ ဆိမိၣ်ဝဲလၢ ယဟိဝၤယွၤ ထုးယံာ်တၢ်ဆၢကတီၢ်လၢ အကမၤဟးဂီၤ ပှၤအၢပှၤသီ. ဘၣ်ဆၣ် စီၤပ့းတရူး အတၢ်ကတိၤန့ၣ် ဒုးသ့ၣ်နီၣ်ထီၣ်ပှၤလၢ ယဟိဝၤယွၤ အတၢ်ဆၢကတီၢ် ဒီးပှၤဟီၣ်ခိၣ်ဖိ အတၢ်ဆၢကတီၢ်န့ၣ် လီၤဆီလိာ်သးဒိၣ်မး. (ဖး ၂ ပ့းတရူး ၃:၈, ၉.) လၢယဟိဝၤယွၤ အတၢ်ထံၣ်န့ၣ် အနံၣ်တကထိ မၤအသး ဒ်သိးဒီး တသီလီၤ. ယဟိဝၤယွၤ တအဲၣ်ဒိးလၢ ပှၤကတုၤလၢ တၢ်ဟးဂီၤနီတဂၤဘၣ် အဃိ အဝံသးစူၤတၢ်. ဘၣ်ဆၣ် ကစၢ်ယွၤ အမုၢ်နံၤ မ့ၢ်ဟဲတုၤန့ၣ် အကမၤဟးဂီၤကွံာ် ပှၤအၢပှၤသီခဲလၢာ်. အဃိ ပတၢ်ဆၢကတီၢ် လၢအအိၣ်ဒီးပှၤန့ၣ် ပကဘၣ် သူအီၤလၢ အဂ့ၤကတၢၢ် ဒ်သိးပကစံၣ်တဲၤတဲလီၤဘၣ် ပှၤကလုာ်ခဲလၢာ် လၢဟီၣ်ခိၣ်ဒီဘ့ၣ်.
၆. ပ “အိၣ်ခိးဒီးကွၢ်လၢ်” ယဟိဝၤယွၤအမုၢ်နံၤ ကသ့ဒ်လဲၣ်. (၂ ပ့းတရူး ၃:၁၁, ၁၂)
၆ စီၤပ့းတရူး ဟ့ၣ်သဆၣ်ထီၣ်ပှၤလၢ ပက “အိၣ်ခိးဒီးကွၢ်လၢ်” ယဟိဝၤယွၤအမုၢ်နံၤ. (ဖး ၂ ပ့းတရူး ၃:၁၁, ၁၂.) အဃိ ပမၤဒ်န့ၣ် ကသ့ဒ်လဲၣ်. ပမၤဒ်န့ၣ် သ့ခီဖျိ တနံၤဘၣ်တနံၤ ပဆိမိၣ်ထံ တၢ်ဆိၣ်ဂ့ၤလၢ ပကဒိးန့ၢ်ဘၣ်လၢ ဟီၣ်ခိၣ်သီအပူၤ. ပကထံၣ်တမှံလၢ ပကသါဘၣ် ကလံၤလၢ အကဆှီ, အီၣ်ဘၣ်တၢ်အီၣ် လၢအန့ၢ်ဂံၢ်န့ၢ်ဘါ ဒီးထံၣ်ဘၣ်က့ၤ ပှၤလၢပအဲၣ် လၢအသံသဒၣ်ပှၤ ဖဲအဝဲသ့ၣ် ဂဲၤဆၢထၢၣ်သမူထီၣ်က့ၤအခါ. တကးဒံးဘၣ် ထံၣ်တမှံကွၢ် ပှၤလၢအသံ လၢအနံၣ်လၢ အကယၤတဖၣ် လၢအဂဲၤဆၢထၢၣ်သမူထီၣ်က့ၤန့ၣ် ပကသိၣ်လိဘၣ် အဝဲသ့ၣ်ဘၣ်ဃးဒီး ဝံအတၢ်စံးပာ် လၢထီၣ်ပှဲၤထီၣ်ဝဲအဂ့ၢ်. ပမ့ၢ်ဆိမိၣ်ထီၣ် ဘၣ်ဃးဒီး တၢ်ဂ့ၢ်တဖၣ်အံၤန့ၣ် ကမၤစၢၤပှၤလၢ ပကအိၣ်ခိး ကစၢ်ယွၤအမုၢ်နံၤလၢ တၢ်သးဆူၣ်အပူၤ ဒီးနာ်လၢ တယံာ်လၢၤဘၣ်န့ၣ် ကစၢ်ယွၤအမုၢ်နံၤ ကဟဲဝဲသပှၢ်တၢၢ်. ခါဆူညါ တၢ်ကမၤအသးဒ်လဲၣ်န့ၣ်ပ “သ့ၣ်ညါဆိပာ်စၢၤ တၢ်ဂ့ၢ်အံၤ” အဃိ တၢ်သိၣ်လိလၢ အကမၣ်တဖၣ် “တဆှၢကမၣ်” ပှၤဘၣ်.—၂ ပ့း ၃:၁၇.
မၤလီၤမၢ်ကွံာ် တၢ်ပျံၤပှၤကညီ
၇. ပမ့ၢ်ပျံၤပှၤကညီန့ၣ် တၢ်ကဲထီၣ်သး သ့ဒ်လဲၣ်.
၇ ဖဲပအိၣ်ခိးကွၢ်လၢ် ယဟိဝၤယွၤအမုၢ်နံၤအခါ ပကဘၣ် ကျဲးစၢး တဲဘၣ်ပှၤဂၤလၢ တၢ်သးခုကစီၣ်အဂ့ၢ်. ဘၣ်ဆၣ် တဘျီတခီၣ်န့ၣ် ပပျံၤပှၤကညီအဃိ ပတတဲဘၣ်ပှၤဂၤလၢ တၢ်သးခုကစီၣ်အဂ့ၢ်ဘၣ်. တၢ်ကဲထီၣ်အသးဒီး စီၤပ့းတရူး ဒ်န့ၣ်စ့ၢ်ကီး. ဖဲပှၤဖီၣ်ယ့ၣ်ၡူးတနၤန့ၣ် စီၤပ့းတရူး တဲလီၤအသးလၢ အတကဲ ယ့ၣ်ၡူးအပျဲၢ်အဘီၣ်ဘၣ် ဒီးအတဲဝဲလၢ အတသ့ၣ်ညါယ့ၣ်ၡူးဘၣ်န့ၣ် တဘျုးဘျီညါ. (မး ၂၆:၆၉-၇၅) ဘၣ်ဆၣ် လၢခံစီၤပ့းတရူး မၤလီၤမၢ်ကွံာ် တၢ်ပျံၤပှၤကညီ ဒီးအတဲဝဲလၢ “တၢ်လၢပှၤဂၤ ပျံၤဝဲတဖၣ်န့ၣ် တဘၣ်ပျံၤအီၤတဂ့ၤ ဒီးတဘၣ် သူၣ်ကိၢ်သးဂီၤတဂ့ၤ.” (၁ ပ့း ၃:၁၄) စီၤပ့းတရူးအတၢ်ကတိၤအံၤ ဒုးသ့ၣ်ညါပှၤလၢ ပဝဲစ့ၢ်ကီး ပမၤလီၤမၢ်ကွံာ် တၢ်ပျံၤပှၤကညီသ့.
၈. ဒ်သိး ပတၢ်ပျံၤပှၤကညီ ကလီၤမၢ်ကွံာ်အဂီၢ် ပကဘၣ်မၤဒ်လဲၣ်. (၁ ပ့းတရူး ၃:၁၅)
၈ ပမၤလီၤမၢ်ကွံာ် တၢ်ပျံၤပှၤကညီ သ့ဒ်လဲၣ်. စီၤပ့းတရူး တဲပှၤလၢ “ပာ်စီဆှံခရံာ် ဒ်ကစၢ်အသိး လၢသုသးပူၤ.” (ဖး ၁ ပ့းတရူး ၃:၁၅.) ပမၤဒ်န့ၣ် ကသ့အဂီၢ် ပကဘၣ်ဆိမိၣ်ထံ ဘၣ်ဃးဒီး ပကစၢ်စီၤပၤ ယ့ၣ်ၡူးခရံာ် အလီၢ်အလၤ ဒီးအတၢ်စိတၢ်ကမီၤအဂ့ၢ်. တၢ်ခွဲးတၢ်ယာ် မ့ၢ်အိၣ်ထီၣ်လၢ နကတဲပၠးပှၤဂၤ ဘၣ်ဃးဒီး တၢ်သးခုကစီၣ်အဂ့ၢ် ဘၣ်ဆၣ် နသးမ့ၢ်တနီး ဒီးပျံၤတၢ်န့ၣ် သ့ၣ်နီၣ်ထီၣ် ပစီၤပၤယ့ၣ်ၡူး ဒီးထံၣ်တမှံကွၢ်လၢ အပၢတၢ် လၢမူခိၣ် ဒီးလၢအကပၤန့ၣ် မူခိၣ်ကလူး အိၣ်ဝဲဒီဒူၣ်ညါ. သ့ၣ်နီၣ်ထီၣ်စ့ၢ်ကီးလၢ ယ့ၣ်ၡူးန့ၣ် အအိၣ်ဒီး “ကယဲၢ်တၢ်စိတၢ်ကမီၤ လၢမူခိၣ်ဒီးဟီၣ်ခိၣ်” ဒီးအက “အိၣ်ဒီးသု ကိးမုၢ်နံၤဒဲး တုၤလီၤလၢ တၢ်အကတၢၢ်.” (မး ၂၈:၁၈-၂၀) စီၤပ့းတရူး ဟ့ၣ်သဆၣ်ထီၣ်ပှၤလၢ ပက ‘အိၣ်ကတဲာ်ကတီၤပာ်စၢၤပသး ထီဘိ’ ဒ်သိး ပကတဲပၠးပှၤဂၤ လၢပတၢ်နာ်အဂ့ၢ်. အဃိ မ့ၢ်နအဲၣ်ဒိး တဲပၠးပှၤဂၤ တၢ်သးခုကစီၣ် လၢနတၢ်မၤလီၢ်, လၢနကၠိ မ့တမ့ၢ် တၢ်လီၢ်အဂၤ တတီၤတီၤဧါ. နမ့ၢ်အဲၣ်ဒိးမၤဒ်န့ၣ်န့ၣ် ဆိမိၣ်ဆိပာ်စၢၤ တၢ်လၢ နမၤသ့တဖၣ် ဒီးကတဲာ်ကတီၤပာ်စၢၤ တၢ်လၢနကတဲတဖၣ်. ဃ့ထုကဖၣ်လၢ ယဟိဝၤယွၤအအိၣ် ဒ်သိး နကအိၣ်ဒီးတၢ်သးဒူ. ဒီးဒ်သိး နမၤလီၤမၢ်ကွံာ်တၢ်ပျံၤပှၤကညီကန့ၢ်အဂီၢ် နကဘၣ်နာ်လၢ ယဟိဝၤယွၤ ကမၤစၢၤနၤ.—မၤတၢ် ၄:၂၉.
“အဲၣ်လိာ်ကွံလိာ်သုသးဒိၣ်ဒိၣ်”
စီၤပ့းတရူးတူၢ်လိာ် စီၤပီလူးအတၢ်ဘှီဘၣ်ထီၣ်က့ၤ. ဒီးတၢ်ဂ့ၢ်လၢ စီၤပ့းတရူး အလံာ်ပရၢခံဘ့ၣ်အပူၤန့ၣ် သိၣ်လိပှၤလၢ ပကဘၣ်ပာ်ဖျါထီၣ် တၢ်အဲၣ်လၢ ဒီပုၢ်ဝဲၢ်မုၣ်ခွါအဖီခိၣ် (ကွၢ်လံာ်အဆၢ ၉)
၉. ဘၣ်တဘျီ စီၤပ့းတရူးတပာ်ဖျါထီၣ် တၢ်အဲၣ်ဘၣ်ဒ်လဲၣ်. (ကွၢ်စ့ၢ်ကီးတၢ်ဂီၤ.)
၉ ပှၤကဘၣ်ပာ်ဖျါထီၣ် တၢ်အဲၣ်ဒ်လဲၣ်န့ၣ် စီၤပ့းတရူး သ့ၣ်ညါဝဲဂ့ၤဂ့ၤ. လၢအပူၤကွံာ်န့ၣ် အနၢ်ဟူဘၣ် ယ့ၣ်ၡူးတဲဝဲလၢ “ယဟ့ၣ်သု တၢ်မၤလိာ် အသီတထံၣ်လၢ အဲၣ်လိာ်သုသး တဂၤဒီးတဂၤတက့ၢ်. ဒ်ယအဲၣ်သုအသိးန့ၣ် သုဝဲစ့ၢ်ကီး အဲၣ်လိာ်သုသး တဂၤဒီးတဂၤတက့ၢ်.” (ယိၤ ၁၃:၃၄) ဘၣ်ဆၣ် ဘၣ်တဘျီန့ၣ် စီၤပ့းတရူး တအီၣ်တၢ်ဒီး ဒီပုၢ်ဝဲၢ်မုၣ်ခွါလၢ အတကဲပှၤယူဒၤဖိတဖၣ်လၢၤဘၣ်. အဃိ တၢ်မၢဖိ ပီလူးတဲအီၤလၢ အကဲဝဲပှၤလၢ “ပာ်မၤအသး.” (ကလၤ ၂:၁၁-၁၄) စီၤပ့းတရူးတူၢ်လိာ် စီၤပီလူး အတၢ်သိၣ်က့ၤသီက့ၤ ဒီးအဟံန့ၢ်တၢ်မၤလိ လၢအတၢ်ကမၣ်. ဒီးလၢစီၤပ့းတရူး အလံာ်ပရၢခံဘ့ၣ် အပူၤန့ၣ် အကွဲးဝဲ လၢ တဘၣ်မ့ၢ်ထဲ ပသးအိၣ်အဲၣ် ပဒီပုၢ်ဝဲၢ်မုၣ်ခွါတဖၣ်ဘၣ်, ပကဘၣ် ပာ်ဖျါထီၣ် ပတၢ်အဲၣ်စ့ၢ်ကီး.
၁၀. ဒ်သိး ပကပာ်ဖျါထီၣ် “ဒီပုၢ်ဝဲၢ်တၢ်အဲၣ်လၢ အတအိၣ်ဒီး တၢ်ပာ်မၤအသးဘၣ်” အဂီၢ် တၢ်မနုၤ ကမၤစၢၤပှၤလဲၣ်. (၁ ပ့းတရူး ၁:၂၂)
၁၀ စီၤပ့းတရူး တဲဘၣ် ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်ပူၤလၢ အဝဲသ့ၣ်ကဘၣ်အိၣ်ဒီး “ဒီပုၢ်ဝဲၢ်တၢ်အဲၣ်လၢ အတအိၣ်ဒီး တၢ်ပာ်မၤအသးဘၣ်.” (ဖး ၁ ပ့းတရူး ၁:၂၂.) ပှၤလၢအ “ဒိကနၣ် တၢ်မ့ၢ်တၢ်တီ” တဖၣ်န့ၣ် အိၣ်ဒီးတၢ်အဲၣ်ဒ်အံၤ. တၢ်မ့ၢ်တၢ်တီအံၤ ပၣ်ဃုာ်ဒီး တၢ်သိၣ်လိလၢ “ကစၢ်ယွၤ တကွၢ်ဒိၣ်ဆံး အါစှၤတၢ်ဘၣ်.” (မၤတၢ် ၁၀:၃၄, ၃၅) တဘျီတခီၣ် ပမ့ၢ်အဲၣ်ပှၤတဂၤ ဒိၣ်န့ၢ်ဒံး ပအဲၣ်ပှၤအဂၤတဂၤ ဒ်ယ့ၣ်ၡူး မၤဝဲအသိးန့ၣ် အတကမၣ်ဘၣ်. ဘၣ်ဆၣ် ပမ့ၢ်အဲၣ်ဒိး မၤထွဲ ယ့ၣ်ၡူး အတၢ်မၤလိာ်န့ၣ် ပကဘၣ်ပာ်ဖျါထီၣ် တၢ်အဲၣ်လၢ ပှၤကိးဂၤဒဲးအဖီခိၣ် ဒီးပပာ်ဖျါထီၣ်တနီၤ တပာ်ဖျါထီၣ်တနီၤ တသ့ဘၣ်. (ယိၤ ၁၃:၂၃; ၂၀:၂) စီၤပ့းတရူး ဒုးသ့ၣ်နီၣ်ထီၣ်က့ၤပှၤလၢ ပဒီပုၢ်ဝဲၢ်မုၣ်ခွါ ခဲလၢာ်န့ၣ် အဝဲသ့ၣ်လီၤဂာ်ဒ်သိးဒီး ပဟံၣ်ဖိဃီဖိအဃိ ပကဘၣ်ကျဲးစၢး “အဲၣ်ဒီပုၢ်ဝဲၢ် ခဲလၢာ်.”—၁ ပ့း ၂:၁၇.
၁၁. “အဲၣ်လိာ်ကွံလိာ်သုသးဒိၣ်ဒိၣ် လၢသူၣ်ဒီဖျၢၣ်သးဒီဖျၢၣ်” န့ၣ်အခီပညီဒ်လဲၣ်.
၁၁ စီၤပ့းတရူး တဲပှၤလၢ သုကဘၣ် “အဲၣ်လိာ်ကွံလိာ်သုသးဒိၣ်ဒိၣ် လၢသူၣ်ဒီဖျၢၣ်သးဒီဖျၢၣ်.” လၢတၢ်ဂ့ၢ်တခါအံၤန့ၣ် အဲၣ်လိာ်ကွံလိာ်သး “ဒိၣ်ဒိၣ်” န့ၣ်အခီပညီမ့ၢ်ဝဲ မ့ၢ်ကီလၢ ပကပာ်ဖျါထီၣ် တၢ်အဲၣ်လၢ ပှၤတဂၤအဖီခိၣ် သနာ်က့ ပကဘၣ်အဲၣ်အီၤဒံး. အဒိ ဒီပုၢ်ဝဲၢ်မုၣ်ခွါတဂၤဂၤ မ့ၢ်မၤသးထီၣ်ပှၤ မ့တမ့ၢ် မၤဘၣ်ဒိပသးန့ၣ် ပကမၤဒ်လဲၣ်. ဘၣ်သ့ၣ်သ့ၣ် အဆိကတၢၢ်န့ၣ် ပကအဲၣ်ဒိး မၤကၣ်က့ၤအီၤ ဒ်အမၤပှၤအသိး. စီၤပ့းတရူးစ့ၢ်ကီး သ့ၣ်ညါထီၣ်ဝဲလၢ ယ့ၣ်ၡူးအအိၣ်လၢ တၢ်မၤကၣ်တၢ်န့ၣ် ကစၢ်ယွၤတဘၣ်သးဝဲဘၣ်. (ယိၤ ၁၈:၁၀, ၁၁) အဃိ စီၤပ့းတရူးကွဲးဝဲလၢ “မၤဆၢက့ၤတၢ်အၢလၢ တၢ်အၢတဂ့ၤ ဒီးတဲဆါက့ၤတၢ်လၢ တၢ်တဲဆါအဂီၢ်တဂ့ၤ. လၢတၢ်န့ၣ်အလီၢ် မၤဂ့ၤတၢ် လၢပှၤဂၤအဖီခိၣ် တက့ၢ်.” (၁ ပ့း ၃:၉) ပမ့ၢ်အိၣ်ဒီး တၢ်အဲၣ်ဒိၣ်ဒိၣ်န့ၣ် ပှၤတဂၤဂၤ မ့ၢ်မၤဘၣ်ဒိပသး သနာ်က့ ပကဘၣ်ပာ်ဖျါထီၣ်တၢ်အဲၣ်လၢ အဖီခိၣ်ဒံး.
၁၂. (က) ပမ့ၢ် အဲၣ်လိာ်ကွံလိာ် ပသးဒိၣ်ဒိၣ်န့ၣ် ကထိၣ်ဟူးထိၣ်ဂဲၤထီၣ်ပှၤလၢ ပကမၤ မနုၤလဲၣ်. (ခ) လၢတၢ်ဂီၤမူ လၢအမ့ၢ် ဂုာ်ကျဲးစၢးပၢၤဃာ် တၢ်ဃူတၢ်ဖိး အပူၤန့ၣ် နအဲၣ်ဒိး ကျဲးစၢးမၤထွဲမနုၤလဲၣ်.
၁၂ စီၤပ့းတရူး အလံာ်ပရၢ အဆိကတၢၢ်တဘ့ၣ်န့ၣ် အပာ်ဖျါထီၣ်ဝဲလၢ သုကဘၣ် “အဲၣ်လိာ်ကွံလိာ်သုသးဒိၣ်ဒိၣ်.” တၢ်အဲၣ်အံၤ ကမၤစၢၤပှၤဒ်သိး ပကပျၢ်ပှၤဂၤ အတၢ်ကမၣ် ဒီးတၢ်အဲၣ်အံၤကျၢၢ်ဘၢ “တၢ်ဒဲးဘး အါမး.” (၁ ပ့း ၄:၈) ဘၣ်သ့ၣ်သ့ၣ် စီၤပ့းတရူး ကနီၣ်ဘၣ်က့ၤဝဲလၢ ပူၤကွံာ်စှၤကိာ်နံၣ်န့ၣ် ယ့ၣ်ၡူးသိၣ်လိအီၤ ဘၣ်ဃးဒီး တၢ်ပျၢ်ပှၤဂၤအတၢ်ကမၣ်. ဖဲယ့ၣ်ၡူးသိၣ်လိအီၤအခါ အတဲဝဲလၢ အကပျၢ်ကွံာ် အဒီပုၢ်ဝဲၢ် အတၢ်ကမၣ် “တုၤလၢ အပှဲၤထီၣ် နွံဘျီညါ.” အဃိ စီၤပ့းတရူး ကဆိမိၣ်လီၤအသးလၢ အကဲပှၤသးဂ့ၤလံ. ဘၣ်ဆၣ် ယ့ၣ်ၡူးသိၣ်လိ စီၤပ့းတရူး ဒီးသိၣ်လိစ့ၢ်ကီးပှၤလၢ ပကဘၣ်ပျၢ်ကွံာ် ပှၤဂၤအတၢ်ကမၣ် “တုၤလၢ ၇၇ ဘျီ” ညါ. အခီပညီန့ၣ် ပကဘၣ်ပျၢ်ကွံာ် ပှၤတၢ်ကမၣ်ထီဘိ. (မး ၁၈:၂၁, ၂၂) ပမၤဒ်ယ့ၣ်ၡူးတဲဝဲအသိး မ့ၢ်တန့ၢ်ညီညီဘၣ် သနာ်က့ ပတဘၣ်သးဟးဂီၤဘၣ်. ယဟိဝၤယွၤ အခ့အပှၤခဲလၢာ်န့ၣ် တမ့ၢ်ပှၤလၢပှၤပှဲၤဘၣ် အဃိ ဒ်သိးပကပျၢ်ကွံာ် ပှၤအဂၤအတၢ်ကမၣ်အဂီၢ် ပဝဲကိးဂၤဒဲး ပဘၣ်ကျဲးစၢး သပှၢ်ပှၢ်. c
တၢ်အိၣ်ဖှိၣ်သးပှၢ်တဖၣ် ကဘၣ်ကွၢ်ထွဲ ယဟိဝၤယွၤအသိဖိဂ့ၤဂ့ၤ
၁၃. တၢ်အိၣ်ဖှိၣ်သးပှၢ်တဖၣ် ကကွၢ်ထွဲ ဒီပုၢ်ဝဲၢ်မုၣ်ခွါအဂီၢ် ဘၣ်မနုၤအဃိ တညီထီဘိလဲၣ်.
၁၃ ဖဲယ့ၣ်ၡူး ဂဲၤဆၢထၢၣ်သမူထီၣ်က့ၤ ဝံၤအလီၢ်ခံ ယ့ၣ်ၡူးတဲဘၣ်စီၤပ့းတရူးလၢ “ကွၢ်ထွဲ ယသိဖိတဖၣ်.” ယ့ၣ်ၡူးတၢ်ကတိၤအံၤ စီၤပ့းတရူးတသးပ့ၤနီၣ်ဝဲ နီတဘျီဘၣ်. (ယိၤ ၂၁:၁၆) နမ့မ့ၢ် တၢ်အိၣ်ဖှိၣ်သးပှၢ်တဂၤန့ၣ် နသ့ၣ်ညါလၢ ယ့ၣ်ၡူးတၢ်ကတိၤအံၤ အဘၣ်ထွဲဒီးနၤစ့ၢ်ကီး. ဘၣ်ဆၣ် တၢ်အိၣ်ဖှိၣ်သးပှၢ်တဂၤ ကမၤလၢပှဲၤအမူဒါလၢအရ့ဒိၣ်အံၤန့ၣ် တညီထီဘိဘၣ်. အဆိကတၢၢ်န့ၣ် တၢ်အိၣ်ဖှိၣ်သးပှၢ်တဖၣ် ကဘၣ်လုၢ်အီၣ်လုၢ်အီ အဟံၣ်ဖိဃီဖိ ဒီးကဘၣ်မၤစၢၤ အဟံၣ်ဖိဃီဖိ လၢကအိၣ်ဒီးတၢ်ရ့လိာ်သးလၢအဂ့ၤဒီး ယဟိဝၤယွၤ. ဒီးအဝဲသ့ၣ်ကဘၣ်ပာ်လီၤ တၢ်ဒိတၢ်တဲာ်အဂ့ၤလၢ တၢ်စံၣ်တဲၤတဲလီၤတၢ်မၤတကပၤ. တကးဒံးဘၣ် အဝဲသ့ၣ် ကဘၣ်ကတဲာ်ကတီၤ မူဒါလၢ တၢ်အိၣ်ဖှိၣ်အပူၤ, ကဝီၤတၢ်အိၣ်ဖှိၣ် ဒီးတၢ်အိၣ်ဖှိၣ်ဖးဒိၣ်အဂီၢ်. ဒီးအဝဲသ့ၣ်တနီၤန့ၣ် မၤစၢၤတၢ်လၢ ကမံးတံာ်လၢ အဆဲးကျိးဒီး တၢ်ဆါဟံၣ် မ့တမ့ၢ် မၤစၢၤတၢ်လၢ လီၢ်ကဝီၤ တၢ်သူၣ်ထီၣ်ဘှီထီၣ်ဝဲၤကျိၤ တကပၤစ့ၢ်ကီး. အဃိ တၢ်အိၣ်ဖှိၣ်သးပှၢ်တဖၣ်န့ၣ် အတၢ်မၤအိၣ်အါမး.
တၢ်အိၣ်ဖှိၣ်သးပှၢ်တဖၣ် တၢ်မၤအိၣ်အါသနာ်က့ အဝဲသ့ၣ်ကဘၣ် အံးထွဲကွၢ်ထွဲ ကစၢ်ယွၤအသိဖိဂ့ၤဂ့ၤ (ကွၢ်လံာ်အဆၢ ၁၄-၁၅)
၁၄. တၢ်မနုၤကမၤစၢၤ တၢ်အိၣ်ဖှိၣ်သးပှၢ်တဖၣ်လၢ ကကွၢ်ထွဲ ကစၢ်ယွၤအသိလဲၣ်. (၁ ပ့းတရူး ၅:၁-၄)
၁၄ စီၤပ့းတရူး ဟ့ၣ်ဂံၢ်ဟ့ၣ်ဘါ တၢ်အိၣ်ဖှိၣ်သးပှၢ်တဖၣ်လၢ “အံးထွဲကွၢ်ထွဲ ကစၢ်ယွၤအသိ.” (ဖး ၁ ပ့းတရူး ၅:၁-၄.) နမ့ၢ်ကဲတၢ်အိၣ်ဖှိၣ်သးပှၢ်န့ၣ် ပနာ်လၢ နကအဲၣ်နဒီပုၢ်ဝဲၢ်မုၣ်ခွါတဖၣ် ဒီးနဘၣ်သး အံးထွဲကွၢ်ထွဲအဝဲသ့ၣ်. သနာ်က့ ဘၣ်သ့ၣ်သ့ၣ် နတၢ်မၤအါ ဒီးနလီၤဘှံးအဃိ နကဆိမိၣ်ဘၣ်လၢ နမၤလၢပှဲၤနမူဒါ တန့ၢ်လၢၤဘၣ်. နမ့ၢ်ဆိမိၣ်ဘၣ်ဒ်န့ၣ်န့ၣ် နကမၤဒ်လဲၣ်. တဲဘၣ်ယဟိဝၤယွၤလၢ နတၢ်တူၢ်ဘၣ်တဖၣ်. စီၤပ့းတရူး တဲဝဲလၢ “ပှၤတဂၤဂၤ မ့ၢ်မၤစၢၤပှၤဂၤန့ၣ် မ်အသန့ၤအသးလၢ တၢ်ဂံၢ်တၢ်ဘါလၢ ကစၢ်ယွၤဟ့ၣ်လီၤဝဲန့ၣ်တက့ၢ်.” (၁ ပ့း ၄:၁၁) ဒီပုၢ်ဝဲၢ်မုၣ်ခွါတနီၤန့ၣ် ထံၣ်ဘၣ်ဒီး တၢ်ကီတၢ်ခဲတဖၣ်လၢ အမၤလီၤမၢ်ကွံာ်ဝဲလၢ ဆၢကတီၢ်ခဲအံၤတသ့ဘၣ်. နမ့ၢ်ကဲတၢ်အိၣ်ဖှိၣ်သးပှၢ်န့ၣ် သ့ၣ်နီၣ်ထီၣ်လၢ တၢ်လၢနမၤစၢၤအဝဲသ့ၣ်တသ့ဘၣ်န့ၣ် “ပှၤကွၢ်သိအခိၣ်” ယ့ၣ်ၡူးခရံာ် မၤစၢၤအဝဲသ့ၣ်သ့. ဒီးသ့ၣ်နီၣ်ထီၣ်လၢ ယ့ၣ်ၡူးကမၤစၢၤပှၤလၢ ဆၢကတီၢ်ခဲအံၤ ဒီးလၢဟီၣ်ခိၣ်သီအပူၤစ့ၢ်ကီး. ယဟိဝၤယွၤ ဘၣ်သးဝဲလၢ တၢ်အိၣ်ဖှိၣ်သးပှၢ်တဖၣ် ကအဲၣ်ဒီပုၢ်ဝဲၢ်မုၣ်ခွါ, ကကွၢ်ထွဲ အဝဲသ့ၣ် ဒ်သိတဖုအသိး ဒီးက “ကဲထီၣ်တၢ်ဒိတၢ်တဲာ်လၢ သိတဖုန့ၣ်အဂီၢ်.”
၁၅. တၢ်အိၣ်ဖှိၣ်သးပှၢ်တဂၤ အံးထွဲကွၢ်ထွဲ ကစၢ်ယွၤအသိဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၅ ဒီပုၢ်ဝဲၢ်ခွါဝ့လံၤယၢၤ လၢအကဲတၢ်အိၣ်ဖှိၣ်သးပှၢ် န့ၢ်တဘျုးနံၣ်လံတဂၤန့ၣ် သ့ၣ်ညါဝဲလၢ တၢ်ကွၢ်ထွဲ ကစၢ်ယွၤအသိဖိန့ၣ် အရ့ဒိၣ်ဒိၣ်မး. ဖဲ ခိၤရိၤနၤတၢ်ဆါ (COVID-19) ရၤလီၤသးသီသီအခါ အီၤဒီးတၢ်အိၣ်ဖှိၣ်သးပှၢ်အဂၤတဖၣ် ရဲၣ်ကျဲၤဝဲလၢ ကဆဲးကျိးဝဲ ဒီပုၢ်ဝဲၢ်မုၣ်ခွါတဂၤဘၣ်တဂၤ ကိးနွံဒဲး. ဒီပုၢ်ဝဲၢ်ခွါဝ့လံၤယၢၤ တဲဝဲလၢ “ဒီပုၢ်ဝဲၢ်မုၣ်ခွါအါဂၤန့ၣ် အိၣ်လၢဟံၣ်ထဲတဂၤ ဒီးအဝဲသ့ၣ်ဆိမိၣ်တၢ်အါအဃိ အဝဲသ့ၣ်တၢ်ဆိမိၣ် လၢအတဂ့ၤဘၣ်တကပၤ အိၣ်ထီၣ်ချ့မး.” ဖဲဒီပုၢ်ဝဲၢ်မုၣ်ခွါတဖၣ်ထံၣ်ဘၣ် တၢ်ကီတၢ်ခဲအခါ ဒီပုၢ်ဝဲၢ်ခွါဝ့လံၤယၢၤ ဒိကနၣ်န့ၢ် အဝဲသ့ၣ်လီၤတံၢ်လီၤဆဲး ဒီးကျဲးစၢးဃုသ့ၣ်ညါ အဝဲသ့ၣ်အတၢ်လိၣ်ဘၣ်. ဝံၤဒီး အဃုကွၢ်ဝဲ တၢ်ဂ့ၢ်တၢ်ကျိၤလၢ လံာ်လဲၢ်လၢ ပတၢ်ကရၢကရိထုးထီၣ်ဝဲ ဒီးတၢ်ဂီၤမူတဖၣ် လၢအအိၣ်လၢ ပပှာ်ယဲၤသန့အပူၤ ဒ်သိးအကမၤစၢၤအဝဲသ့ၣ်. အတဲဝဲလၢ “ဆၢကတီၢ်ခဲအံၤ တၢ်ကွၢ်ထွဲ ဒီပုၢ်ဝဲၢ်မုၣ်ခွါန့ၣ် လိၣ်ဝဲအါန့ၢ် လၢညါဒံး. ပကျဲးစၢးမၤစၢၤပှၤဂၤလၢ ကသ့ၣ်ညါထီၣ် တၢ်မ့ၢ်တၢ်တီ ဘၣ်ဃးဒီးယဟိဝၤယွၤအဂ့ၢ်. ဒ်န့ၣ်အသိး ပကဘၣ် ကျဲးစၢးကွၢ်ထွဲ ယဟိဝၤယွၤအသိ ဒီးမၤစၢၤအဝဲသ့ၣ်လၢ ကဆဲးအိၣ်လၢ တၢ်မ့ၢ်တၢ်တီအပူၤ ထီဘိစ့ၢ်ကီး.”
ပျဲယဟိဝၤယွၤ သိၣ်လိနၤ လၢလၢပှဲၤပှဲၤ
၁၆. တၢ်မၤလိလၢ ပန့ၢ်ဘၣ်လၢ စီၤပ့းတရူးအလံာ်ပရၢခံဘ့ၣ်အပူၤန့ၣ် ပမၤထွဲအီၤကသ့ဒ်လဲၣ်.
၁၆ လၢစီၤပ့းတရူး အလံာ်ပရၢခံဘ့ၣ်အပူၤန့ၣ် ပတဲသကိးဘၣ် တၢ်မၤလိတနီၤ. ဘၣ်သ့ၣ်သ့ၣ် နကသ့ၣ်ညါလီၤနသးလၢ တၢ်လၢနကဘၣ်မၤဂ့ၤထီၣ်န့ၣ် အိၣ်ဝဲအဃိ နကဘၣ်သးမၤဂ့ၤထီၣ်အီၤ. အဒိ နသမံသမိးလီၤနသး ဝံၤဒီးနကဘၣ်သးဆိမိၣ်ထံအါထီၣ် ဘၣ်ဃးဒီး တၢ်ဆိၣ်ဂ့ၤလၢ နကန့ၢ်ဘၣ်လၢ ဟီၣ်ခိၣ်သီအပူၤ မ့တမ့ၢ် နကပာ်လီၤဖီတၢၣ်လၢ နကစံၣ်တဲၤတဲလီၤတၢ် လၢကၠိ, လၢတၢ်မၤလီၢ် ဒီးလၢတၢ်လီၢ်အဂၤတဖၣ်. မ့တမ့ၢ် နကထံၣ်န့ၢ်ကျဲတဘိဘိ လၢနကပာ်ဖျါအါထီၣ် တၢ်အဲၣ်လၢ ဒီပုၢ်ဝဲၢ်မုၣ်ခွါအဖီခိၣ်. ဒီးနမ့မ့ၢ် တၢ်အိၣ်ဖှိၣ်သးပှၢ်န့ၣ် နကပာ်လီၤသးလၢ နကကွၢ်ထွဲ ယဟိဝၤယွၤအသိဖိတဖၣ်လၢ တၢ်သးအိၣ် ဒီးတၢ်သးဆူၣ်အပူၤ. ဖဲနသမံသမိးလီၤနသးအခါ ဘၣ်သ့ၣ်သ့ၣ် နကသ့ၣ်ညါထီၣ်လၢ နအိၣ်ဒီးတၢ်ဂံၢ်စၢ်ဘါစၢ်တနီၤ. ဘၣ်ဆၣ် တဘၣ်သးဟးဂီၤတဂ့ၤ. လံာ်စီဆှံ တဲဝဲလၢ “ကစၢ်န့ၣ် အသူၣ်ဂ့ၤသးဝါ” ဒီးအကမၤစၢၤပှၤ. (၁ ပ့း ၂:၃) စီၤပ့းတရူး တဲပှၤလၢ “ကစၢ်ဒၣ်ဝဲ ကဟ့ၣ်သုတၢ်သိၣ်လိ တုၤလၢအလၢအပှဲၤတစုလီၤ. အဝဲကမၤဂၢၢ်မၤကျၢၤသု, အဝဲကဒုးဆူၣ်ထီၣ်သု ဒီးအဝဲကဒုးဆၢထၢၣ်သု ဂၢၢ်ဂၢၢ်ကျၢၤကျၢၤ.”—၁ ပ့း ၅:၁၀.
၁၇. ပမ့ၢ်ဆဲးမၤနၢၤ ပတၢ်ဂံၢ်စၢ်ဘါစၢ် ဒီးပျဲယဟိဝၤယွၤ သိၣ်လိပှၤန့ၣ် ပကန့ၢ်ဘၣ် တၢ်ဆိၣ်ဂ့ၤမနုၤလဲၣ်.
၁၇ လၢအခီၣ်ထံးခါ စီၤပ့းတရူး တူၢ်ဘၣ်ဝဲလၢ အတကြၢးကဲ ယ့ၣ်ၡူးအပျဲၢ်အဘီၣ်ဘၣ်. (လူၤ ၅:၈) ဘၣ်ဆၣ် ယဟိဝၤယွၤ ဒီးယ့ၣ်ၡူးမၤစၢၤအီၤအဃိ စီၤပ့းတရူးဆဲးမၤ ယဟိဝၤယွၤအတၢ်မၤဆူၣ်ဆူၣ် လၢတၢ်သးတီအပူၤ. အဃိ စီၤပ့းတရူး အိၣ်ဒီးတၢ်ခွဲးတၢ်ယာ်လၢ က “လဲၤနုာ်လီၤဘၣ်လၢ ပတၢ်အုၣ်က့ၤခီၣ်က့ၤကစၢ် ယ့ၣ်ၡူးခရံာ် အဘီမုၢ်အထူအယိာ် အပူၤ.” (၂ ပ့း ၁:၁၁) ပထံၣ်ဘၣ်လၢ စီၤပ့းတရူးန့ၢ်ဘၣ်ဝဲ တၢ်ဆိၣ်ဂ့ၤဖးဒိၣ်ညါ. နၤစ့ၢ်ကီး နမ့ၢ်ဆဲးမၤနၢၤ နတၢ်ဂံၢ်စၢ်ဘါစၢ် ဒ်စီၤပ့းတရူးအသိး ဒီးပျဲယဟိဝၤယွၤ သိၣ်လိနၤန့ၣ် နကန့ၢ်ဘၣ် တၢ်မူအထူအယိာ်. တကးဒံးဘၣ် နက ‘ဒိးန့ၢ်ဘၣ် တၢ်အုၣ်က့ၤခီၣ်က့ၤလၢ နတၢ်နာ်အဃိ.’—၁ ပ့း ၁:၉.
တၢ်သးဝံၣ် ၁၀၉ အဲၣ်လိာ်ကွံလိာ်သုသးဒိၣ်ဒိၣ် လၢသူၣ်ဒီဖျၢၣ်သးဒီဖျၢၣ်
a လၢတၢ်မၤလိတခါအံၤ ပကမၤလိဘၣ်လၢ စီၤပ့းတရူးအလံာ်ပရၢခံဘ့ၣ်အံၤ ကမၤစၢၤပှၤဒ်သိး ပလဲၤခီဖျိ တၢ်မၤကွၢ်ကသ့အဂီၢ်. တကးဒံးဘၣ် ကမၤစၢၤဝဲ တၢ်အိၣ်ဖှိၣ်သးပှၢ်တဖၣ်လၢ အဝဲသ့ၣ် ကမၤလၢပှဲၤအမူဒါ ဒ်ပှၤကွၢ်သိတဂၤအသိး.
b လီၤဂာ်လၢ တချုး ခ.န. ၆၆ ဖဲပှၤရိမ့ၤဖိ နုာ်လီၤလၢ ဝ့ၢ်ယရူၤၡလ့ၣ်အပူၤ အဆိကတၢၢ်တဘျီ ဒံးဘၣ်န့ၣ် ခရံာ်ဖိလၢအအိၣ်လၢ ကီၢ်ပာ်လဲးစတဲ ဒိးန့ၢ်ဘၣ်ဝဲ စီၤပ့းတရူး အလံာ်ပရၢခံဘ့ၣ်အံၤ.
c ကွၢ်တၢ်ဂီၤမူ လၢအခိၣ်တီမ့ၢ် ဂုာ်ကျဲးစၢးပၢၤဃာ် တၢ်ဃူတၢ်ဖိး လၢအအိၣ်လၢ jw.org အပူၤ.
