တၢ်မၤလိ ၃၇
သန့ၤနသးလၢ ယဟိဝၤယွၤ ဒ်စီၤၡံၡိၣ်အသိး
“တၢ်ပၢကစၢ် ယဟိဝၤယွၤဧၢ, ဝံသးစူၤ သ့ၣ်နီၣ်ထီၣ်ယၤ ဒီးမၤဆူၣ်ထီၣ်က့ၤ ယဂံၢ်ယဘါ.”—စံၣ်ညီၣ် ၁၆:၂၈.
တၢ်သးဝံၣ် ၃၀ ယသကိး, ယပၢ်, ယယွၤ
တၢ်မၤလိအံၤ အတၢ်တိာ်ပာ် a
၁-၂. ဘၣ်မနုၤအဃိ ပဘၣ်မၤလိ စီၤၡံၡိၣ်အဂ့ၢ်လဲၣ်.
ဖဲနနၢ်ဟူစီၤၡံၡိၣ်အမံၤအခါ နဆိမိၣ်ထီၣ် မနုၤလဲၣ်. ဘၣ်သ့ၣ်သ့ၣ် နကဆိမိၣ်ဘၣ်လၢ စီၤၡံၡိၣ်န့ၣ် အကဲပှၤလၢ အဂံၢ်ဆူၣ်ဒိၣ်မး. ဘၣ်ဆၣ် ခီဖျိလၢ စီၤၡံၡိၣ် ဆၢတဲာ်တၢ် ကမၣ်အဃိ အထံၣ်ဘၣ်တၢ်နးတၢ်ဖှီၣ်နးမး. စီၤၡံၡိၣ် မၤကမၣ်ဘၣ်တၢ် သနာ်က့ ယဟိဝၤယွၤ သးစၢၢ်ဆၢလၢ အတၢ်သးတီဟီ. အဃိ ဒ်သိး ပကန့ၢ်ဘၣ် အဘျုးအဂီၢ် ယဟိဝၤယွၤမၢ ပှၤကွဲးဖျါထီၣ် စီၤၡံၡိၣ်အဂ့ၢ် လၢလံာ်စီဆှံအပူၤ.
၂ ယဟိဝၤယွၤ သူဝဲစီၤၡံၡိၣ်ဒ်သိး ကမၤစၢၤဝဲ ပှၤအံၣ်စရ့လးဖိ. စီၤၡံၡိၣ် သံဝံၤ ပူၤကွံာ်အနံၣ်လၢ အကယၤတဖၣ်န့ၣ် ယဟိဝၤယွၤ အသးစီဆှံထိးဘၣ်ဝဲ တၢ်မၢဖိပီလူးအသးလၢ ကကွဲးလီၤဝဲ စီၤၡံၡိၣ်အမံၤလၢ ပိာ်ခွါလၢ အသးတီတဖၣ်အကျါ. (ဧ့ၤ ၁၁:၃၂-၃၄) စီၤၡံၡိၣ်န့ၣ် ဖဲအထံၣ်ဘၣ် တၢ်အိၣ်သး ကီခဲအခါ အသန့ၤအသးလၢ ယဟိဝၤယွၤ. အဃိ စီၤၡံၡိၣ် အဒိအတဲာ်န့ၣ် မၤစၢၤပှၤသ့. လၢတၢ်မၤလိတခါအံၤန့ၣ် ပကတဲသကိး ဘၣ်ဃးဒီး ပမၤလိန့ၢ်တၢ်လၢ စီၤၡံၡိၣ်အအိၣ် သ့ဒ်လဲၣ်. ဒီးစီၤၡံၡိၣ် အဒိအတဲာ်န့ၣ် မၤစၢၤပှၤ ကသ့ဒ်လဲၣ်.
စီၤၡံၡိၣ်နာ်န့ၢ် ယဟိဝၤယွၤ
၃. စီၤၡံၡိၣ် ဒိးန့ၢ်ဘၣ်မူဒါ မနုၤလဲၣ်.
၃ ဖဲစီၤၡံၡိၣ် အိၣ်ဖျဲၣ်ထီၣ်အခါ ပှၤဖလ့ၡသးဖိ ပၢပှၤအံၣ်စရ့လးဖိ ဒီးမၤအၢမၤနး အဝဲသ့ၣ်. (စံၣ်ညီၣ် ၁၃:၁) ခီဖျိလၢ ပှၤဖလ့ၡသးဖိ မၤအၢမၤနး ပှၤအံၣ်စရ့လးဖိအဃိ ယဟိဝၤယွၤ ဃုထၢထီၣ် စီၤၡံၡိၣ်လၢ “ကတီခိၣ်ရိၤမဲတၢ် ဒ်သိး ကမၤထူၣ်ဖျဲးထီၣ် ပှၤအံၣ်စရ့လးဖိလၢ ပှၤဖလ့ၡသးဖိ အစုပူၤ.” (စံၣ်ညီၣ် ၁၃:၅) စီၤၡံၡိၣ် အမူဒါတခါအံၤ တညီလၢ အဂီၢ်ဘၣ်. အဃိ ဒ်သိး စီၤၡံၡိၣ် ကမၤလၢပှဲၤ မူဒါတခါအံၤအဂီၢ် အကဘၣ် သန့ၤအသးလၢ ယဟိဝၤယွၤ.
စီၤၡံၡိၣ် နာ်န့ၢ် ယဟိဝၤယွၤ ဒီးဒ်သိး အကမၤလၢပှဲၤ ယဟိဝၤယွၤ အတၢ်ဘၣ်သးအဂီၢ် အသးအိၣ် ဆီတလဲအသး ဒ်တၢ်အိၣ်သးအိၣ်ဝဲအသိး (ကွၢ်လံာ်အဆၢ ၄-၅)
၄. ယဟိဝၤယွၤ မၤစၢၤစီၤၡံၡိၣ်လၢ အကထူၣ်ဖျဲးထီၣ်လၢ ပှၤဖလ့ၡသးဖိ အစုပူၤဒ်လဲၣ်. (စံၣ်ညီၣ်ကွီၢ် ၁၅:၁၄-၁၆)
၄ စီၤၡံၡိၣ်န့ၣ် အနာ်န့ၢ်ယဟိဝၤယွၤ ဒီးအနာ်ဝဲလၢ ယဟိဝၤယွၤ ကမၤစၢၤအီၤ. ဘၣ်တဘျီ ပှၤဖလ့ၡသးဖိ အသုးမုၢ်တဖု ဟဲဝဲဒ်သိး ကဖီၣ်ဝဲစီၤၡံၡိၣ် ဖဲတၢ်လီၢ်လ့ၤဃံ လၢအအိၣ်လၢ ယူဒၤအဟီၣ်ကဝီၤ. ဒီးမ့ၢ်လၢ ပှၤယူဒၤဖိတဖၣ် ပျံၤတၢ်အဃိ အဝဲသ့ၣ် ပာ်လီၤသးလၢ ကဟ့ၣ်လီၤဝဲ စီၤၡံၡိၣ် လၢအဒုၣ်အဒါတဖၣ် အစုပူၤ. စီၤၡံၡိၣ် အပှၤကလုာ်ဒၣ်ဝဲ ဖီၣ်အီၤ, စၢဃာ်အီၤလၢပျံၤခံဘိ ဝံၤဒီး ဟ့ၣ်လီၤအီၤလၢ ပှၤဖလ့ၡသးဖိအစုပူၤ. (စံၣ်ညီၣ် ၁၅:၉-၁၃) ဘၣ်ဆၣ် “ယဟိဝၤယွၤ အသးစီဆှံ ဟ့ၣ်စိဟ့ၣ်ကမီၤ” စီၤၡံၡိၣ်အဃိ ပျံၤတဖၣ်လၢ ပှၤစၢဃာ်အစုန့ၣ် အမၤထီၣ်တဲာ်ကွံာ်ဝဲ. ဝံၤဒီး စီၤၡံၡိၣ် “ထံၣ်န့ၢ်ဝဲ ကသ့ၣ်ယီၤဖါ အခၣ်ဃံသီသီ တခါ,” အဟံန့ၢ်ဝဲ ဒီးအမၤသံ ပှၤဖလ့ၡသးဖိအဂၤ ၁,၀၀၀ လၢကသ့ၣ်ယီၤအခၣ်ဃံ.—ဖး စံၣ်ညီၣ်ကွီၢ် ၁၅:၁၄-၁၆.
၅. စီၤၡံၡိၣ် သူဝဲ ကသ့ၣ်ယီၤအခၣ်ဃံအဃိ အပာ်ဖျါထီၣ်လၢ အသန့ၤအသးလၢ ယဟိဝၤယွၤဒ်လဲၣ်.
၅ ဘၣ်မနုၤအဃိ စီၤၡံၡိၣ်သူဝဲ ကသ့ၣ်ယီၤအခၣ်ဃံလဲၣ်. ညီနုၢ်န့ၣ် ပှၤတသူ ကသ့ၣ်ယီၤအခၣ်ဃံ ဒ်သိးဒီး တၢ်စုကဝဲၤတခါဘၣ်. စီၤၡံၡိၣ် သ့ၣ်ညါဝဲလၢ ယဟိဝၤယွၤ ကမၤစၢၤအီၤအဃိ အမ့ၢ်သူ တၢ်စုကဝဲၤတခါဂ့ၤတခါဂ့ၤ သနာ်က့ အကမၤနၢၤ ပှၤဖလ့ၡသးဖိ. ဒီးဒ်သိး စီၤၡံၡိၣ် ကမၤလၢပှဲၤ ယဟိဝၤယွၤ အတၢ်ဘၣ်သးအဂီၢ် အသူဝဲ တၢ်လၢအအိၣ်ဒီးအီၤ. ပထံၣ်ဘၣ်လၢ စီၤၡံၡိၣ် သန့ၤအသးလၢ ယဟိဝၤယွၤအဃိ အမၤနၢၤဝဲ ပှၤဖလ့ၡသးဖိ.
၆. ဖဲပဒိးန့ၢ်ဘၣ်မူဒါလၢ ကစၢ်ယွၤတၢ်မၤအပူၤအခါ ပဟံန့ၢ် တၢ်မၤလိလၢ စီၤၡံၡိၣ် အအိၣ်သ့ဒ်လဲၣ်.
၆ ပဝဲစ့ၢ်ကီး ပမ့ၢ်န့ၢ်ဘၣ်မူဒါလၢ ကစၢ်ယွၤတၢ်မၤအပူၤ ဒီးပမ့ၢ်ဆိမိၣ်လၢ ပမၤပမူဒါ တန့ၢ်ဘၣ်သနာ်က့ ဒ်သိးပမၤလၢပှဲၤ ပမူဒါကန့ၢ်အဂီၢ် ယဟိဝၤယွၤ ကဟ့ၣ်ပှၤ တၢ်ဂံၢ်တၢ်ဘါ ဒီးကမၤစၢၤပှၤလၢ ကျဲလၢ ပတဆိမိၣ် နီတဘျီဘၣ်. ပထံၣ်ဘၣ်လၢ ယဟိဝၤယွၤ ဟ့ၣ်စီၤၡံၡိၣ် တၢ်ဂံၢ်တၢ်ဘါ ဒီးယဟိဝၤယွၤ မၤစၢၤအီၤ. နၤစ့ၢ်ကီး နမ့ၢ်သန့ၤနသးလၢ ယဟိဝၤယွၤ ဒီးဃ့အတၢ်မၤစၢၤန့ၣ် အကမၤစၢၤနၤလၢ နကမၤလၢပှဲၤ အတၢ်ဘၣ်သး.—ကတိၤ ၁၆:၃.
၇. ပကဘၣ်မၤထွဲ ယဟိဝၤယွၤ အတၢ်ဟံးစုနဲၣ်ကျဲ မ့ၢ်တၢ်လၢအရ့ဒိၣ်န့ၣ် တၢ်အဒိမနုၤအိၣ်လဲၣ်.
၇ ဒီပုၢ်ဝဲၢ်မုၣ်ခွါအါဂၤ လၢအမၤစၢၤတၢ်လၢ တၢ်သူၣ်ထီၣ်ဘှီထီၣ် တၢ်မၤတကပၤန့ၣ် အဝဲသ့ၣ် ပာ်ဖျါထီၣ်လၢ အနာ်န့ၢ်ယဟိဝၤယွၤ. လၢအပူၤကွံာ်န့ၣ် အါတက့ၢ် ဒီပုၢ်ဝဲၢ်တဖၣ် ရဲၣ်ကျဲၤ ဒီးသူၣ်ထီၣ်ဝဲ ဘီမုၢ်ဘျီၣ်ဒိၣ် ဒီးတၢ်သူၣ်ထီၣ်အဂၤတဖၣ်. ဘၣ်ဆၣ် ခီဖျိလၢ ပှၤဒိးဘျၢထံအနီၣ်ဂံၢ် ဟဲအါထီၣ်မၣ်အါထီၣ်အဃိ ပတၢ်ကရၢကရိ ဘၣ်မၤဝဲ တၢ်ဆီတလဲ. ဒီပုၢ်ဝဲၢ်ခွါလၢ အတီခိၣ်ရိၤမဲတၢ်တဖၣ်န့ၣ် ဃ့ဝဲ ယဟိဝၤယွၤ အတၢ်ဟံးစုနဲၣ်ကျဲ ဒီးကျဲးစၢး ဃုကျဲလၢအဂၤ. အဒိ အဝဲသ့ၣ် ပှ့ၤဝဲတၢ်သူၣ်ထီၣ်တဖၣ် ဒီးဘှီဂ့ၤထီၣ်က့ၤဝဲ. ဒီပုၢ်ဝဲၢ်ခွါရီဘၢၣ် လၢအမၤတၢ်လၢ တၢ်သူၣ်ထီၣ်ဘှီထီၣ် လၢဟီၣ်ခိၣ်ဒီဘ့ၣ်န့ၣ် တဲဝဲဒ်အံၤ. “လၢအခီၣ်ထံးခါ ပကမၤထွဲ တၢ်ဟံးစုနဲၣ်ကျဲ အသီအံၤအဂီၢ် တညီဘၣ်.” ဒီးအဆဲးတဲဝဲလၢ “တၢ်ဟံးစုနဲၣ်ကျဲအသီအံၤ တဒ်သိးဒီး တၢ်လၢပမၤတ့ၢ် လၢအပူၤကွံာ် လၢအနံၣ်တဖၣ်ဘၣ်. ဘၣ်ဆၣ် ဒီပုၢ်ဝဲၢ်တဖၣ် သးအိၣ်မၤထွဲဝဲ တၢ်ဆီတလဲတခါအံၤ. အဃိ ပထံၣ်ဘၣ်လၢ ယဟိဝၤယွၤ ဆိၣ်ဂ့ၤဝဲ တၢ်ရဲၣ်တၢ်ကျဲၤ အသီတခါအံၤ.” တၢ်လဲၤခီဖျိအံၤ အကဲဝဲတၢ်အဒိတခါလၢ ယဟိဝၤယွၤ ဟံးစုနဲၣ်ကျဲ အပှၤဂီၢ်မုၢ်လၢ ကမၤလၢပှဲၤဝဲ အတၢ်ဘၣ်သးအဂီၢ်. တဘျီတခီၣ်န့ၣ် ပဝဲခဲလၢာ် ပကဘၣ်သံကွၢ်လီၤ ပသးလၢ ‘မ့ၢ်ယဃုသ့ၣ်ညါ ယဟိဝၤယွၤ အတၢ်ဟံးစုနဲၣ်ကျဲ ဒီးဖဲတၢ်ဆီတလဲ အိၣ်ထီၣ်အခါ မ့ၢ်ယမၤထွဲအီၤဧါ.’
စီၤၡံၡိၣ်သူဝဲ ယဟိဝၤယွၤ အတၢ်ဟ့ၣ် လၢအဂ့ၤကတၢၢ်
၈. ဘၣ်တဘျီ ဖဲစီၤၡံၡိၣ်အဲၣ်ဒိးအီထံဒိၣ်မးအခါ အမၤမနုၤလဲၣ်.
၈ ဘၣ်သ့ၣ်သ့ၣ် နကဖးဘၣ် တၢ်လၢအလီၤကမၢကမၣ် အဂၤတဖၣ်လၢ စီၤၡံၡိၣ်မၤတ့ၢ်ဝဲ. အဒိ စီၤၡံၡိၣ် မၤသံဝဲ ခ့ယုၢ်ဖးဒိၣ်တဒု ဒီးလၢခံ အမၤသံဝဲ ပှၤဖလ့ၡသးဖိ အဂၤ ၃၀ လၢဝ့ၢ်အၤၡကလိၣ်. (စံၣ်ညီၣ် ၁၄:၅, ၆, ၁၉) စီၤၡံၡိၣ် သ့ၣ်ညါဝဲလၢ တၢ်လၢအမၤဝဲတဖၣ်အံၤ မ့တမ့ၢ်လၢ ယဟိဝၤယွၤ မၤစၢၤအီၤဘၣ်န့ၣ် အမၤဝဲတန့ၢ်ဘၣ်. ဒီးဘၣ်တဘျီ ဖဲစီၤၡံၡိၣ်မၤသံဝဲ ပှၤဖလ့ၡသးဖိ အဂၤ ၁,၀၀၀ ဝံၤအလီၢ်ခံ အအဲၣ်ဒိးအီထံဒိၣ်မး. သနာ်က့ အတဟးဃုအီထံ လၢအနီၢ်ကစၢ် အကျိာ်အကျာ်ဘၣ် အဃ့ဝဲလၢယဟိဝၤယွၤ ကမၤစၢၤအီၤ.—စံၣ်ညီၣ် ၁၅:၁၈.
၉. ဖဲစီၤၡံၡိၣ် ဃ့ယဟိဝၤယွၤ အတၢ်မၤစၢၤအခါ ယဟိဝၤယွၤ မၤစၢၤအီၤဒ်လဲၣ်. (စံၣ်ညီၣ်ကွီၢ် ၁၅:၁၉)
၉ ဖဲစီၤၡံၡိၣ် အဲၣ်ဒိးအီထံ ဒီးအဃ့တၢ်မၤစၢၤအခါ ယဟိဝၤယွၤ မၤတၢ်လီၤလး ဒီးဒုးဟဲထီၣ်ထံလၢအဂီၢ်. စီၤၡံၡိၣ် အီထံတခါအံၤဝံၤဒီး “အဂံၢ်ဟဲထီၣ်ကဒါက့ၤ ဒီးအဂံၢ်ဆူၣ်ထီၣ်က့ၤ.” (ဖး စံၣ်ညီၣ်ကွီၢ် ၁၅:၁၉.) ထံထီၣ်ပၢၢ်တခါအံၤ အတလီၤသံးကွံာ်ဘၣ်. ဖဲဝံၡမူၤအ့လးကွဲးဝဲ လံာ်စံၣ်ညီၣ်ကွီၢ် ဝံၤအလီၢ်ခံ ထံတခါအံၤ ဆဲးအိၣ်ဝဲ တဘျုးနံၣ်ဒံးညါ. ဒီးပှၤအံၣ်စရ့လးဖိ မ့ၢ်ထံၣ်ဝဲ ထံထီၣ်ပၢၢ်တခါအံၤန့ၣ် အဝဲသ့ၣ် ကနီၣ်ဘၣ်က့ၤဝဲလၢ ဖဲအဝဲသ့ၣ် လိၣ်ဘၣ်တၢ်မၤစၢၤအခါ အမ့ၢ်သန့ၤအသးလၢ ယဟိဝၤယွၤန့ၣ် ယဟိဝၤယွၤ ကမၤစၢၤအဝဲသ့ၣ်.
စီၤၡံၡိၣ် အီထံလၢ ယဟိဝၤယွၤ ဟ့ၣ်လီၤအီၤ ဝံၤအလီၢ်ခံ အဂံၢ်ဟဲဆူၣ်ထီၣ်. ပဝဲစ့ၢ်ကီး ဒ်သိး ပကဆဲးတီဒီး ယဟိဝၤယွၤအဂီၢ် ပကဘၣ်တူၢ်လိာ် ယဟိဝၤယွၤ အတၢ်မၤစၢၤ လၢအကတဲာ်ကတီၤန့ၢ်ပှၤ ကိးမံၤဒဲး (ကွၢ်လံာ်အဆၢ ၁၀)
၁၀. ပကန့ၢ်ဘၣ် ယဟိဝၤယွၤ အတၢ်မၤစၢၤအဂီၢ် ပကဘၣ်မၤမနုၤလဲၣ်. (ကွၢ်စ့ၢ်ကီးတၢ်ဂီၤ.)
၁၀ ပမ့ၢ်အိၣ်ဒီး တၢ်သ့တၢ်ဘၣ် ဒီးပမၤတၢ် လၢယဟိဝၤယွၤအတၢ်မၤ မ့ၢ်ကဲထီၣ်လိၣ်ထီၣ် တမံၤဂ့ၤတမံၤဂ့ၤ သနာ်က့ ပဘၣ်သန့ၤပသးလၢ ယဟိဝၤယွၤ ဒီးဃ့အတၢ်မၤစၢၤဒံး. ယဟိဝၤယွၤ မ့ၢ်မၢပမၤတၢ်တမံၤမံၤန့ၣ် ပကဘၣ် ဆီၣ်လီၤသး ဒီးတူၢ်လိာ်လၢ ပမ့ၢ်သန့ၤပသးလၢ ယဟိဝၤယွၤမၣ် ပမၤတၢ် ကကဲထီၣ်လိၣ်ထီၣ်. ပထံၣ်ဘၣ်လၢ ဖဲစီၤၡံၡိၣ် အီထံလၢ ယဟိဝၤယွၤ ဟ့ၣ်လီၤအီၤအခါ အဂံၢ်ဟဲဆူၣ်ထီၣ်ဝဲ. အဃိ ပဝဲစ့ၢ်ကီး ဒ်သိးပကဆဲးတီဒီး ယဟိဝၤယွၤအဂီၢ် ပကဘၣ်တူၢ်လိာ် ယဟိဝၤယွၤ အတၢ်မၤစၢၤ လၢအကတဲာ်ကတီၤန့ၢ်ပှၤ ကိးမံၤဒဲး.—မး ၁၁:၂၈.
၁၁. ပသန့ၤပသးလၢ ယဟိဝၤယွၤ ကသ့ဒ်လဲၣ်. ဟ့ၣ်တၢ်အဒိ.
၁၁ ဆိမိၣ်ကွၢ် ဒီပုၢ်ဝဲၢ်ခွါအဲလဲးစံး အတၢ်လဲၤခီဖျိ. ဒီပုၢ်ဝဲၢ်ခွါအံၤ အအိၣ်လၢ ကီၢ်ရၢၡါ ဒီးအဘၣ်လဲၤခီဖျိ တၢ်မၤအၢမၤနး နးဒိၣ်မး. ဖဲအထံၣ်ဘၣ် တၢ်အိၣ်သးကီခဲအခါ ဒ်သိးအကဆဲးအိၣ်ဒီး တၢ်သးတီအဂီၢ် တၢ်မနုၤမၤစၢၤအီၤလဲၣ်. ဒီပုၢ်ဝဲၢ်ခွါအဲလဲးစံး ဒီးအမါ မၤလိသကိး လံာ်စီဆှံ ဒီးဘူၣ်ထီၣ်ဘါထီၣ် ယဟိဝၤယွၤ ဒ်အဝဲသ့ၣ် မၤညီနုၢ်ဝဲအသိး. ဒီပုၢ်ဝဲၢ်ခွါအဲလဲးစံး တဲဝဲလၢ “ယကျဲးစၢးမၤ နီၢ်ကစၢ် တၢ်မၤလိလံာ်စီဆှံ ဒီးဖးလံာ်စီဆှံ ကိးနံၤဒဲး. ယၤဒီးယမါန့ၣ် ပတဲသကိး တၢ်သမံသမိး လံာ်စီဆှံအဆၢ ဒီးပဃ့ထုကဖၣ်ဒ်သိးသိး ကိးဂီၤဒဲး.” လၢဒီပုၢ်ဝဲၢ်ခွါအဲလဲးစံး အတၢ်လဲၤခီဖျိန့ၣ် ပန့ၢ်ဘၣ်တၢ်မၤလိဒ်လဲၣ်. ပမၤလိဘၣ်လၢ ပကဘၣ်သန့ၤပသးလၢ ယဟိဝၤယွၤ ဒီးတဘၣ်သန့ၤသးလၢ ပနီၢ်ကစၢ်ဘၣ်. ဒီးပသန့ၤပသးလၢ ယဟိဝၤယွၤ သ့ခီဖျိ ပမၤတၢ်လၢ ကမၤအါထီၣ်ပတၢ်နာ် ဒ်သိးဒီး ပမၤနီၢ်ကစၢ် တၢ်မၤလိလံာ်စီဆှံ, ပဃ့ထုကဖၣ်, ပလဲၤစံၣ်တဲၤတဲလီၤတၢ် ဒီးလဲၤထီၣ်တၢ်အိၣ်ဖှိၣ်ထီဘိ. ပမ့ၢ်မၤတၢ်သ့ၣ်တဖၣ်အံၤန့ၣ် ယဟိဝၤယွၤ ကမၤစၢၤပှၤ ဒီးဒ်သိး ပဆဲးမၤအတၢ်မၤ ကန့ၢ်အဂီၢ် အကဟ့ၣ်ပှၤ တၢ်လၢပလိၣ်ဘၣ်. တကးဒံးဘၣ် ဒ်ယဟိဝၤယွၤ ဟ့ၣ်စီၤၡံၡိၣ် တၢ်ဂံၢ်တၢ်ဘါအသိး ယဟိဝၤယွၤ ကဟ့ၣ်ပှၤ တၢ်ဂံၢ်တၢ်ဘါစ့ၢ်ကီး.
စီၤၡံၡိၣ် တဟ့ၣ်အၡူဘၣ်
၁၂. စီၤၡံၡိၣ် အတၢ်ဆၢတဲာ် ကမၣ်ဝဲဒ်လဲၣ် ဒီးအတၢ်ဆၢတဲာ်အံၤ လီၤဆီဒီး အတၢ်ဆၢတဲာ် လၢညါတဘျီဒ်လဲၣ်.
၁၂ ဒ်ပဝဲဒၣ်အသိး စီၤၡံၡိၣ်စ့ၢ်ကီး အတကဲပှၤလၢပှၤပှဲၤဘၣ်. အဃိ တဘျီတခီၣ်န့ၣ် အဆၢတဲာ်တၢ် လၢအကမၣ်. ဘၣ်တဘျီ ခီဖျိလၢ အဆၢတဲာ်တၢ်ကမၣ်အဃိ အထံၣ်ဘၣ် တၢ်ကီတၢ်ခဲဖးဒိၣ်. ဖဲစီၤၡံၡိၣ်ကဲဝဲ ပှၤအံၣ်စရ့လးဖိ အစံၣ်ညီၣ်ကွီၢ် န့ၢ်တတီၤဖိအခါအ “အဲၣ်ဘၣ်ဝဲ ပိာ်မုၣ်တဂၤ လၢအအိၣ်လၢ စိရ့း အတၢ်တြီၤပူၤလီၤ. ပိာ်မုၣ်တဂၤန့ၣ် အမံၤမ့ၢ်ဝဲ နီၢ်ဒလံလၤ.” (စံၣ်ညီၣ် ၁၆:၄) လၢညါန့ၣ် စီၤၡံၡိၣ် ဘၣ်သးဟံန့ၢ်အမါလၢ ပှၤဖလ့ၡသးမုၣ်တဂၤ. ပထံၣ်ဘၣ်လၢ “ယဟိဝၤယွၤ ဟံးစုနဲၣ်ကျဲ” စီၤၡံၡိၣ်လၢ အကမၤဝဲဒ်န့ၣ် ဒ်သိးအက “ဃုန့ၢ် တၢ်ခွဲးတၢ်ယာ်လၢ အကဒုးဝဲ ပှၤဖလ့ၡသးဖိ” အဂီၢ်. လၢခံ စီၤၡံၡိၣ် လဲၤနုာ်လၢ ပိာ်မုၣ်ဆါလီၤအီၣ်သးတဂၤအဟံၣ် လၢအအိၣ်လၢ ပှၤဖလ့ၡသးဖိ အဝ့ၢ်ဂါစၤအပူၤ. စီၤၡံၡိၣ် အိၣ်ဝဲဖဲန့ၣ်အဃိ အန့ၢ်ဘၣ်တၢ်ခွဲးတၢ်ယာ်လၢ ယဟိဝၤယွၤ ကမၤစၢၤအီၤဒ်သိး အကမၤနၢၤဝဲ ပှၤဖလ့ၡသးဖိ. (စံၣ်ညီၣ် ၁၄:၁-၄; ၁၆:၁-၃) မ့မ့ၢ်နီၢ်ဒလံလၤန့ၣ် ဘၣ်သ့ၣ်သ့ၣ် အကဲပှၤအံၣ်စရ့လးဖိအဃိ စီၤၡံၡိၣ် ဘၣ်သးဟံအီၤန့ၣ် တမ့ၢ်ခီဖျိလၢ အကမၤနၢၤ ပှၤဖလ့ၡသးဖိ အဂီၢ်ဘၣ်.
၁၃. ဒ်သိးစီၤၡံၡိၣ် ကတဲဖျါထီၣ် အတၢ်ခူသူၣ်အဂီၢ် နီၢ်ဒလံလၤမၤဝဲဒ်လဲၣ်.
၁၃ ပှၤဖလ့ၡသးဖိ ဟ့ၣ်လီၤ နီၢ်ဒလံလၤ စ့အါမး ဒီးမၢအကွဲန့ၢ်လွဲန့ၢ် စီၤၡံၡိၣ် ဒ်သိး အကတဲဖျါထီၣ် အတၢ်ခူသူၣ်. ဘၣ်သ့ၣ်သ့ၣ် စီၤၡံၡိၣ် အဲၣ်ဘၣ်ဝဲ နီၢ်ဒလံလၤဒိၣ်မးအဃိ အတဆိမိၣ်ဝဲလၢ နီၢ်ဒလံလၤ ကကူၣ်အီၤဘၣ်. ဘၣ်မနုၤအဃိ စီၤၡံၡိၣ် ဂံၢ်ဆူၣ်ထဲအံၤညါလဲၣ်န့ၣ် နီၢ်ဒလံလၤ သံကွၢ်န့ၢ်ဆူၣ်အီၤ ခဲအံၤခဲအံၤအဃိ လၢခံစီၤၡံၡိၣ် တဲဘၣ်အီၤ. စီၤၡံၡိၣ် မၤကမၣ်တၢ် ခီဖျိ အတဲဘၣ် နီၢ်ဒလံလၤ လၢအတၢ်ခူသူၣ်အဃိ လၢခံန့ၣ် အဂံၢ်တဆူၣ် ဒ်သိးဒီးလၢညါလၢၤဘၣ် ဒီးအတၢ်ရ့လိာ်သးဒီး ယဟိဝၤယွၤစ့ၢ်ကီး ဘၣ်ဒိဝဲ.—စံၣ်ညီၣ် ၁၆:၁၆-၂၀.
၁၄. ခီဖျိလၢ စီၤၡံၡိၣ် နာ်န့ၢ် နီၢ်ဒလံလၤအဃိ တၢ်ကဲထီၣ်သးဒီးအီၤဒ်လဲၣ်.
၁၄ စီၤၡံၡိၣ် နာ်န့ၢ် နီၢ်ဒလံလၤ အါန့ၢ်အနာ်န့ၢ် ယဟိဝၤယွၤ အဃိ အထံၣ်ဘၣ် တၢ်ကီတၢ်ခဲ ဒီးအဘၣ်လဲၤခီဖျိတၢ်နးမး. ပှၤဖလ့ၡသးဖိ ဖီၣ်န့ၢ် စီၤၡံၡိၣ် ဒီးမၤဘျီၣ် အမဲာ်ချံ. ဝံၤဒီး ပှၤဖၢနုာ်အီၤလၢဃိာ်ပူၤ ဖဲဝ့ၢ်ဂါစၤ လၢအကဲဝဲ ဝ့ၢ်တဖျၢၣ်ဃီလၢ အက့ၤယိးဝဲဝ့ၢ်အတြဲၤ ဒီးပှၤမၢအဂူာ်ဘု လၢဆၢၣ်ဂူာ်. ပှၤဖလ့ၡသးဖိတဖၣ် နာ်ဝဲလၢ အယွၤဒၤကိၣ် မၤစၢၤအဝဲသ့ၣ်လၢ ကဖီၣ်န့ၢ်ဝဲ စီၤၡံၡိၣ်အဃိ လၢခံအဝဲသ့ၣ် ပာ်ဖှိၣ်ထီၣ်အသး ဒီးလုၢ်ထီၣ်တၢ်လုၢ်လၢ အယွၤဒၤကိၣ်အအိၣ်. တကးဒံးဘၣ် အဝဲသ့ၣ်ကိးထီၣ် စီၤၡံၡိၣ်လၢဃိာ်ပူၤ ဒီးလဲၤကိးအီၤလၢဘူၣ်ပူၤ ဒ်သိးပှၤ “ကနံၤဘၣ်အီၤ” ဒီးပှၤကမၤမဲာ်ဆှးအီၤအဂီၢ်.—စံၣ်ညီၣ် ၁၆:၂၁-၂၅.
ဒ်သိး ယဟိဝၤယွၤ ကစံၣ်ညီၣ် ပှၤဖလ့ၡသးဖိအဂီၢ် အမၤဆူၣ်ထီၣ် စီၤၡံၡိၣ် အဂံၢ်အဘါ (ကွၢ်လံာ်အဆၢ ၁၅)
၁၅. စီၤၡံၡိၣ်တဟ့ၣ်အၡူဘၣ်န့ၣ် အပာ်ဖျါထီၣ်ဝဲဒ်လဲၣ်. (စံၣ်ညီၣ်ကွီၢ် ၁၆:၂၈-၃၀) (ကွၢ်တၢ်ဂီၤလၢ လံာ်ကုခိၣ်.)
၁၅ စီၤၡံၡိၣ် မၤကမၣ်တၢ်ဖးဒိၣ် သနာ်က့ အတဟ့ၣ်အၡူဘၣ်. ဒ်သိး စီၤၡံၡိၣ် ကမၤလၢပှဲၤအမူဒါလၢ ကစၢ်ယွၤဟ့ၣ်အီၤ လၢအကမၤနၢၤ ပှၤဖလ့ၡသးဖိအဂီၢ် စီၤၡံၡိၣ် ဃုဝဲတၢ်ခွဲးတၢ်ယာ်. (ဖး စံၣ်ညီၣ်ကွီၢ် ၁၆:၂၈-၃၀.) ဒီးစီၤၡံၡိၣ် ဃ့ကညး ယဟိဝၤယွၤလၢ ဟ့ၣ်ယၤအခွဲးလၢ “ယကမၤကၣ်က့ၤ ပှၤဖလ့ၡသးဖိ.” ယဟိဝၤယွၤ စံးဆၢဝဲ စီၤၡံၡိၣ် အတၢ်ဃ့ကညး ဒီးဟ့ၣ်က့ၤအီၤ တၢ်ဂံၢ်တၢ်ဘါလၢ အလီၤလိၢ်လီၤလး. အဃိ တဘျီအံၤန့ၣ် စီၤၡံၡိၣ် မၤသံဝဲ ပှၤဖလ့ၡသးဖိ အါန့ၢ်လၢအပူၤကွံာ်ဒံး.
၁၆. ပဟံန့ၢ်တၢ်မၤလိလၢ စီၤၡံၡိၣ် အတၢ်ကမၣ် သ့ဒ်လဲၣ်.
၁၆ စီၤၡံၡိၣ် မၤကမၣ်တၢ်အဃိ အထံၣ်ဘၣ် တၢ်ကီတၢ်ခဲနးမး သနာ်က့ အဆဲးမၤ ယဟိဝၤယွၤ အတၢ်ဘၣ်သးဒံး. ပဝဲစ့ၢ်ကီး ပမ့ၢ်မၤကမၣ်ဘၣ်တၢ် ဒီးပမ့ၢ်ဘၣ် တၢ်သိၣ်က့ၤပှၤ မ့တမ့ၢ် ပမ့ၢ်တဒိးန့ၢ်ဘၣ် တၢ်ခွဲးတၢ်ယာ်လၢၤဘၣ် သနာ်က့ ပကဘၣ်ဆဲးမၤ ယဟိဝၤယွၤ အတၢ်ဘၣ်သးဒံး. ပကဘၣ် သ့ၣ်နီၣ်ထီၣ်လၢ ယဟိဝၤယွၤန့ၣ် အဘၣ်သး ပျၢ်ပတၢ်ကမၣ်ထီဘိ. (စံး ၁၀၃:၈-၁၀) ပမ့ၢ်မၤကမၣ်တၢ် သနာ်က့ ဒ်ယဟိဝၤယွၤ ဆဲးသူစီၤၡံၡိၣ်အသိး ယဟိဝၤယွၤ ဆဲးသူပှၤသ့ဒံး.
စီၤၡံၡိၣ် အသးကဘၣ်ဒိလၢ အတၢ်ကမၣ်အဃိ ဖးဒိၣ်ညါ ဘၣ်ဆၣ် အတဟ့ၣ်အၡူဘၣ် အဃိ ပဝဲစ့ၢ်ကီး ပတဘၣ်ဟ့ၣ်အၡူဘၣ် (ကွၢ်လံာ်အဆၢ ၁၇-၁၈)
၁၇-၁၈. ဒီပုၢ်ဝဲၢ်ခွါမဲကၢၤ အတၢ်လဲၤခီဖျိန့ၣ် ဟ့ၣ်ဂံၢ်ဟ့ၣ်ဘါပှၤဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၇ ပကတဲသကိး ဒီပုၢ်ဝဲၢ်ခွါသးစၢ် မဲကၢၤ အတၢ်လဲၤခီဖျိ. ဒီပုၢ်ဝဲၢ်ခွါမဲကၢၤန့ၣ် အမၤ ယဟိဝၤယွၤ အတၢ်မၤဆူၣ်မး. အကဲ တၢ်အိၣ်ဖှိၣ် အပှၤမၤစၢၤတၢ် ဒီးအကဲစ့ၢ်ကီး ပှၤလဲၤလၢညါတဂၤ. ဘၣ်ဆၣ် ခီဖျိလၢ အမၤကမၣ်တၢ်အဃိ လၢတၢ်အိၣ်ဖှိၣ်ပူၤန့ၣ် အတဒိးန့ၢ်ဘၣ် တၢ်ခွဲးတၢ်ယာ်လၢၤဘၣ်. ဒီပုၢ်ဝဲၢ်ခွါမဲကၢၤ တဲဝဲလၢ “တချုးတၢ်ကဲထီၣ်သး ဒ်န့ၣ်ဒံးဘၣ်န့ၣ် ယခိၣ်နူာ်ပူၤ အိၣ်ထဲ ယကမၤ ယဟိဝၤယွၤ အတၢ်မၤ. ဘၣ်ဆၣ် ဖဲတၢ်ကဲထီၣ်သးဒီးယၤ တဘျီဃီန့ၣ် ယတူၢ်ဘၣ်လၢ ယမၤ ယဟိဝၤယွၤ အတၢ်မၤ တသ့နီတမံၤလၢၤဘၣ်. ယသ့ၣ်ညါလၢ ယဟိဝၤယွၤ တပာ်တ့ၢ်ကွံာ်ယၤ နီတဘျီဘၣ်. ဘၣ်ဆၣ် ယဆိမိၣ်ထီၣ်လၢ မ့ၢ်ယတၢ်ရ့လိာ်သးဒီး ယဟိဝၤယွၤ ကဂ့ၤဒ်သိးလၢညါဒံးဧါ. ဒီးယမၤ ယဟိဝၤယွၤ အတၢ်မၤ လၢတၢ်အိၣ်ဖှိၣ်အပူၤ ဒ်သိးလၢညါကန့ၢ်ဒံးဧါ.”
၁၈ ဒီပုၢ်ဝဲၢ်ခွါမဲကၢၤ တဟ့ၣ်အၡူဘၣ်အဃိ လီၤသးခုဒိၣ်မး. အဝဲတဲဝဲလၢ “ဒ်သိး ယတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်အဂီၢ် ယကျဲးစၢးဆူၣ်ဆူၣ်. ယဃ့ထုကဖၣ် လၢယဟိဝၤယွၤအအိၣ် လၢယသးဒီဖျၢၣ်, ယမၤလိ လံာ်စီဆှံ ဒီးယဆိမိၣ်ထံ တၢ်လၢယမၤလိအီၤ.” လၢခံ ဒီပုၢ်ဝဲၢ်ခွါမဲကၢၤ န့ၢ်ဘၣ်ကဒါက့ၤ တၢ်ခွဲးတၢ်ယာ်လၢ တၢ်အိၣ်ဖှိၣ်အပူၤ. ဒီးခဲအံၤန့ၣ် အကဲတၢ်အိၣ်ဖှိၣ်သးပှၢ် ဒီးအကဲပှၤလဲၤလၢညါ. အတဲဝဲလၢ “တၢ်အိၣ်ဖှိၣ်သးပှၢ်တဖၣ် အတၢ်မၤစၢၤ ဒီးအတၢ်ဟ့ၣ်ဂံၢ်ဟ့ၣ်ဘါန့ၣ် မၤစၢၤယၤဒ်သိး ယကသ့ၣ်ညါလီၤယသးလၢ ယဟိဝၤယွၤ အဲၣ်ယၤဒံး. အဃိ ယမၤဘၣ်ကဒါ တၢ်အိၣ်ဖှိၣ် အတၢ်မၤ ဒီးယအိၣ်ဒီး သးလၢအသ့ၣ်ညါဒၣ်တၢ် လၢအကဆှီ. ယတၢ်လဲၤခီဖျိအံၤ သိၣ်လိယၤလၢ ပှၤတဂၤဂ့ၤ တဂၤဂ့ၤ လၢအပီၢ်ယၢ်လီၤက့ၤသး နီၢ်ကီၢ်န့ၣ် ယဟိဝၤယွၤ ကပျၢ်ကွံာ် အတၢ်ကမၣ်.” ပမ့ၢ်မၤကမၣ်ဘၣ်တၢ် သနာ်က့ ပမ့ၢ်ကျဲးစၢး ဘှီဘၣ်ထီၣ်က့ၤပသး ဒီးဆဲးသန့ၤသးလၢ ယဟိဝၤယွၤန့ၣ် ပနာ်သပှၢ်တၢၢ်လၢ ယဟိဝၤယွၤ ကဆဲးသူပှၤ ဒီးကဆိၣ်ဂ့ၤပှၤစ့ၢ်ကီး.—စံး ၈၆:၅; ကတိၤ ၂၈:၁၃.
၁၉. စီၤၡံၡိၣ် အဒိအတဲာ်န့ၣ် မၤဆူၣ်ထီၣ် ပဂံၢ်ပဘါဒ်လဲၣ်.
၁၉ လၢတၢ်မၤလိတခါအံၤ ပမၤလိဘၣ် ဘၣ်ဃးဒီး တၢ်ကဲထီၣ်သးတနီၤလၢ စီၤၡံၡိၣ် အတၢ်အိၣ်မူပူၤ. စီၤၡံၡိၣ်န့ၣ် အတကဲပှၤလၢပှၤပှဲၤဘၣ်. ဘၣ်ဆၣ် ဖဲနီၢ်ဒလံလၤ ကွဲန့ၢ်လွဲန့ၢ်အီၤ ဒီးအမၤကမၣ်တၢ် ဝံၤအလီၢ်ခံ အဆဲးမၤ ယဟိဝၤယွၤ အတၢ်မၤဒံး. ပထံၣ်ဘၣ်လၢ ယဟိဝၤယွၤ တပာ်တ့ၢ်အီၤ စ့ၢ်ကီးဘၣ်. ယဟိဝၤယွၤ ဆဲးသူစီၤၡံၡိၣ်လၢ အကမၤလၢပှဲၤ ယဟိဝၤယွၤ အတၢ်ဘၣ်သး. ဒီးခီဖျိလၢ အကဲပှၤလၢ အအိၣ်ဒီး တၢ်နာ်ဂၢၢ်ကျၢၤအဃိ ယဟိဝၤယွၤ သ့ၣ်နီၣ်အီၤ. အဃိ ယဟိဝၤယွၤဖၢနုာ် စီၤၡံၡိၣ်အမံၤလၢ ပှၤလၢအအိၣ်ဒီးတၢ်နာ်လၢ ဧ့ၤဘြံၤ အဆၢဒိၣ် ၁၁ ပာ်ဖျါထီၣ်ဝဲအကျါ. ယဟိဝၤယွၤန့ၣ် အကဲပါလၢ အအိၣ်ဒီး တၢ်အဲၣ်တၢ်ကွံတဂၤ. အဃိ ဖဲပထံၣ်ဘၣ် တၢ်ကီတၢ်ခဲ ဒီးပလိၣ်ဘၣ် တၢ်မၤစၢၤအခါ အကဟ့ၣ်ပှၤ တၢ်ဂံၢ်တၢ်ဘါ ဒီးအကမၤစၢၤပှၤ. ပသ့ၣ်ညါဘၣ်ဒ်န့ၣ်အဃိ ပသးခုဒိၣ်မး. ဒ်စီၤၡံၡိၣ်အသိး ပကဘၣ်ဃ့ကညး ယဟိဝၤယွၤလၢ “ဝံသးစူၤ သ့ၣ်နီၣ်ထီၣ်ယၤ ဒီးမၤဆူၣ်ထီၣ်က့ၤ ယဂံၢ်ယဘါ.”—စံၣ်ညီၣ် ၁၆:၂၈.
တၢ်သးဝံၣ် ၃ ပတၢ်ဂံၢ်တၢ်ဘါ, ပတၢ်မုၢ်လၢ်, ပတၢ်နာ်န့ၢ်အလီၢ်
a စီၤၡံၡိၣ်အဂ့ၢ်န့ၣ် အိၣ်လၢ လံာ်စီဆှံပူၤ ဒီးပှၤအါဂၤ နၢ်ဟူဘၣ်ဝဲ. ဘၣ်ဃးဒီး စီၤၡံၡိၣ်အဂ့ၢ်န့ၣ် ပှၤဂဲၤဒိဝဲလၢပူ, ပှၤထုးထီၣ်တၢ်သးဝံၣ် ဒီးပှၤထုးထီၣ်ဝဲလၢ တၢ်ဂီၤမူ. စီၤၡံၡိၣ်အဂ့ၢ်န့ၣ် တမ့ၢ်ထဲ တၢ်တဲပူ ယိယိတခါဘၣ်. စီၤၡံၡိၣ်န့ၣ် အမ့ၢ်ပှၤလၢ အအိၣ်ဒီး တၢ်နာ်လၢ အဂၢၢ်ကျၢၤအဃိ ပမၤလိန့ၢ်တၢ်လၢ အအိၣ်သ့ဒီဒူၣ်.
