မ့ၢ်​န​ဖး​ဘၣ်​တၢ်ဂ့ၢ်​သ့ၣ်​တဖၣ်​အံၤ​လၢ တၢးထီခိးတၢ် တနံၣ်​အံၤ​အဂီၢ်​ဧါ. န​က​စံးဆၢ​တၢ်​သံကွၢ်​တဖၣ်​အံၤ​ဒ်လဲၣ်–

ပ​ကြၢး​ရ့​ဒီး ခရံာ်ဖိ​လၢ​အဘၣ်​ တၢ်ဒိးဖှူ​အီၤ​တဖၣ်​ဒ်လဲၣ်.

ပ​ပာ်လုၢ်​ပာ်ပှ့ၤ​အဝဲသ့ၣ်​အ​တၢ်နာ်​လီၤ. ဘၣ်ဆၣ်​ ပ​တ​ပာ်ဒိၣ်​ အဝဲသ့ၣ်​အါ​တလၢ​ဘၣ်. လၢ​တၢ်​န့ၢ်​အဃိ ပ​ဟးဆှဲး​တၢ် “ပတြၢၤ​ပှၤဂၤ” လီၤ. (ယူဒၤ ၁၆) ပ​တ​သံကွၢ်​အဝဲသ့ၣ်​ တၢ်​သံကွၢ်​လၢ အ​ဘၣ်ဃး​ဒီး​အဝဲသ့ၣ်​အ​နီၢ်ကစၢ် အ​တၢ်​မုၢ်လၢ်​ဘၣ်.—တၢး​၂၀.၀၁ ကဘျံးပၤ ၂၉.

ယဟိဝၤ​ယွၤ​ပာ်သူၣ်​ပာ်သး ပ​ဝဲ​တဂၤ​စုာ်စုာ်​န့ၣ်​ ပ​သ့ၣ်ညါ​​ဘၣ်​ဒ်လဲၣ်.

လံာ်စီဆှံ​ပာ်ဖျါ​ထီၣ်​ဝဲ​လၢ တချုး​လၢ​န​အိၣ်ဖျဲၣ်​ထီၣ်လံၤ​လံၤ​န့ၣ်​ ကစၢ်​ယွၤ​ပာ်သူၣ်​ပာ်သး​နၤ​လီၤ. ဒီး​အ​ဝဲ​ဒိကနၣ်​ န​တၢ်​ထုကဖၣ်​လီၤ. ကစၢ်​ယွၤ​သ့ၣ်ညါ န​တၢ်​ဆိကမိၣ်​ ဒီး​န​တၢ်​တူၢ်​ဘၣ်​တဖၣ်​ ဒီး​တၢ်​လၢ​န​မၤ​တဖၣ်​န့ၣ်​ မၤဘၣ်ဒိ မ့တမ့ၢ် မၤ​သးခု အသး​သ့​လီၤ. (၁ ကွဲးနီၣ်​တၢ် ၂၈:၉; ကတိၤဒိ ၂၇:၁၁) အ​ဝဲ​မူၤ​နၤ​ဆူ​အ​အိၣ်​လီၤ.—တၢး​၂၀.၀၂ ကဘျံးပၤ ၁၂.

ပ​ကြၢး​တဲတၢ်​လၢ ဆၢကတီၢ်​ဖဲလဲၣ်​ ဒီး​ပ​ကြၢး​အိၣ်ဘှီၣ်​လၢ ဆၢကတီၢ်​ဖဲလဲၣ်​န့ၣ်​ တၢ်အဒိ​မနုၤ​အိၣ်​ဝဲ​လဲၣ်.

ပ​တဲ​ဘၣ်​ယဟိဝၤ​ယွၤ​အဂ့ၢ်​န့ၣ်​ ပ​သးခု​လီၤ. ဖဲ​ပ​ထံၣ်​ဘၣ်​ပှၤ​တဂၤ လဲၤ​ကျဲ​လၢ​အ​ကမၣ်​အခါ ပ​မၤစၢၤ​အီၤ​လီၤ. ဖဲ​ပှၤဂၤ​လိၣ်​ဘၣ်​တၢ်မၤစၢၤ​အခါ တၢ်​အိၣ်ဖှိၣ်​သးပှၢ်​တဖၣ်​ ဟ့ၣ်ကူၣ်​ဟ့ၣ်ဖး​အဝဲသ့ၣ်​လီၤ. ထံကီၢ်​လၢ​ပှၤ​တြီဃာ်​ပ​တၢ်ဖံး​တၢ်မၤ​န့ၣ်​ ပ​မၤ​တၢ်သးခု​ကစီၣ်​တၢ်ဖံး​တၢ်မၤ ဒ်လဲၣ်​ဒ်လဲၣ်​န့ၣ်​ ပ​တ​သ့​ကွၢ်​ဘၣ်​ ဒီး​ပ​တ​တဲ​ဘၣ်​ပှၤဂၤ​စ့ၢ်ကီး​ဘၣ်. ပ​တ​အဲၣ်ဒိး​ပာ်ဖျါ​ထီၣ်​ တၢ်ဂ့ၢ်​ခူသူၣ်​တဖၣ်​အံၤ​ဘၣ်.—တၢး​၂၀.၀၃ ကဘျံးပၤ ၂၀-၂၁.

ဒွဲၣ်​တဖၣ်​လၢ ယိၤအ့လး အဆၢဒိၣ်​ ၂ န့ၣ်​ လီၤဆီ​လိာ်အသး​ဒီး ဒွဲၣ်​တဖၣ်​လၢ လီၣ်ဖျါ အဆၢဒိၣ်​ ၉ န့ၣ်​ဒ်လဲၣ်.

ယိၤအ့လး ၂:၂၀-၂၉ တဲ​ဝဲ​လၢ ကစၢ်​ယွၤ​နီ​ထီၣ်​ကွံာ် ဒွဲၣ်​တဖၣ်​ဖးယံၤ ဒီး​အၢၣ်​လီၤ​​ဝဲ​လၢ က​ဟ့ၣ်ကၣ်​က့ၤ​တၢ်​လၢ အဝဲသ့ၣ်​မၤ​ဟးဂီၤ​​ဝဲ​လီၤ. တၢ်မၤ​အသး​တဖၣ်​အံၤ ဟဲ​လၢထီၣ်​ပှဲၤထီၣ်​​ဝဲ​ဖဲ ပှၤ​ဘၤ​ဘူၣ်​လိၣ်​ဖိ​တဖၣ်​နုာ်​လီၤ​ဒုးဝဲ ပှၤ​အံၣ်စရ့လး​ဖိ​အဆၢ​ကတီၢ်​လီၤ. လၢခံ ကစၢ်​ယွၤ​လူ​လီၤ​ဂၢ်​လီၤ​အသး​စီဆှံ​လီၤ. လီၣ်ဖျါ ၉:၁-၁၁ ပာ်ဖျါ​ထီၣ်ဝဲ ဒွဲၣ်​တဖၣ်​န့ၣ်​ ​ဘၣ်​တၢ်​ဒိ​လီၤ​အီၤ​လၢ ပှၤလၢ​အ​ဘၣ်​တၢ်ဒိးဖှူ​အီၤ​တဖၣ်​လၢ​မုၢ်မဆါ​တနံၤ​အံၤ ဒီး​အဝဲသ့ၣ်​စံၣ်တဲၤ​တဲလီၤ ကစၢ်​ယွၤ​တၢ်​စံၣ်ညီၣ်​အ​ကစီၣ်​ လၢ​အ​ဘၣ်ဃး​ဒီး ဟီၣ်ခိၣ်​လၢ​အအၢ​အသီ​အံၤ အဃိ ပှၤလၢ​အ​ဆီၣ်ထွဲ​ဝဲ ဟီၣ်ခိၣ်​တဖၣ်​န့ၣ်​ တူၢ်​ဘၣ်​​ဝဲ​တ​မုာ်​ဘၣ်.—တၢး​၂၀.၀၄ ကဘျံးပၤ ၃-၆.

“ကလံၤစိး​အ​စီၤပၤ” လၢ​မုၢ်မဆါ​တနံၤ​အံၤန့ၣ်​ မ့ၢ်​မတၤ​လဲၣ်.

မ့ၢ်ဝဲ ကီၢ်ရၢၡါ ဒီး​ပှၤလၢ​အ​ဖီၣ်​လိာ်သး​စု​ဒီး​အီၤ​တဖၣ်​လီၤ. အဝဲသ့ၣ်​ ဒုး​ဝဲ​ကစၢ်​ယွၤ အ​ပှၤ​ဂီၢ်မုၢ် ခီဖျိ​တြီဃာ်​ဝဲ တၢ်​စံၣ်တဲၤ​တဲ​လီၤ​တၢ်မၤ ဒီး​မၤအၢ​မၤနး​ဝဲ ပဒီပုၢ်ဝဲၢ်​မုၣ်​ခွါ​တဖၣ်​လီၤ. ကလံၤစိး​အ​စီၤပၤ ဆဲး​ထီဒါ​လိာ်အသး​ဒီး​ကလံၤထံး​အ​စီၤပၤ​လီၤ.—တၢး​၂၀.၀၅ ကဘျံးပၤ ၁၃.

ထဲဒၣ်​ တၢ်ဂ့ၤ​တၢ်ဝါ​ခွံ​ခါ​လၢ ကလၤတံ ၅:၂၂, ၂၃ အ​ပူၤ​န့ၣ်​ အမ့ၢ်ဝဲ “သး​စီ​ဆှဲ​အ​တၤသၣ်” ဧါ.

တမ့ၢ်​ဘၣ်. သးစီဆှံ မၤစၢၤ​ပှၤ​ဒ်သိး ပ​က​မၤ​အိၣ်​ထီၣ်​တၢ်ဂ့ၤ​တၢ်ဝါ​တဖၣ်​ ဒ်သိး​ဒီး တၢ်တီ​တၢ်လိၤ​လီၤ. (အ့းဖ့းစူး ၅:၈, ၉)—တၢး​၂၀.၀၆ ကဘျံးပၤ ၁၇.

ဖဲ​န​ပာ်ထီၣ်​တၢ်​လၢ online အ​ပူၤ​အခါ တၢ်​​လီၤ​ဘၣ်ယိၣ်​တခါ​လၢ​နဂီၢ်​န့ၣ်​ မ့ၢ်​မနုၤ​လဲၣ်.

တၢ်​လၢ​န​ပာ်ထီၣ်​အီၤ​လၢ online အ​ပူၤ​န့ၣ်​ ​ဘၣ်​သ့ၣ်​သ့ၣ်​က​ဖျါ​လၢ န​ထံၣ်​ဒိၣ်​​လီၤ​န​နီၢ်ကစၢ်​အသး ဒီး​တဖျါ​လၢ န​အိၣ်ဒီး​တၢ်ဆီၣ်​လီၤသး​ဘၣ်.—တၢး​၂၀.၀၇ ကဘျံးပၤ ၆-၇.

ပ​မၤလိ​န့ၢ်​တၢ်​လၢ ပှၤ​မၤ​ညၣ်ဖိ​လၢ​အ​ဖၠဲး​တဖၣ်​ အ​အိၣ်​က​သ့​ဒ်လဲၣ်.

အဝဲသ့ၣ်​မၤတၢ်​လၢ ညၣ်​ထီၣ်​အဆၢ​ကတီၢ် ဒီး​တၢ်လီၢ်​လၢ ညၣ်​အိၣ်​ဝဲ​မုာ်​အလီၢ်လီၤ. အဝဲသ့ၣ်​သ့ၣ်ညါ​သူဝဲ အ​တၢ်ပီးတၢ်လီ​ဂ့ၤဂ့ၤ​လီၤ. တၢ်အိၣ်သး​မ့ၢ်​ဆီတလဲ​ဒ်လဲၣ်​ သနာ်က့ အဝဲသ့ၣ်​ မၤတၢ်​လၢ တၢ်​သူၣ်ဒူ​သးဒူ​အ​ပူၤ​လီၤ. လၢ​ပ​တၢ်​စံၣ်တဲၤ​တဲလီၤ တၢ်မၤ​အ​ပူၤ​စ့ၢ်ကီး ပ​မၤ​ဒ်​န့ၣ်​အသိး​သ့​ဝဲ​လီၤ.—တၢး​၂၀.၀၉ ကဘျံးပၤ ၅.

ကျဲ​တနီၤ​လၢ ပ​မၤစၢၤ​ပ​ပှၤ​မၤလိ​လံာ်စီဆှံ​ဖိ ဒ်သိး​အ​တၢ်အဲၣ်​ ယဟိဝၤ​ယွၤ​အဒိၣ်​ထီၣ်​အဂီၢ်​န့ၣ်​ မ့ၢ်​မနုၤ​လဲၣ်.

ပ​ဟ့ၣ်ဂံၢ်​ဟ့ၣ်ဘါ​အဝဲသ့ၣ်​လၢ က​ဖး​လံာ်စီဆှံ​ကိးနံၤဒဲး ဒီး​ဆိကမိၣ်​ထံ​တၢ်​ လၢ​အ​ဖး​​ဝဲ​တဖၣ်​လီၤ. ဒီး​ပ​သိၣ်လိ​အဝဲသ့ၣ်​လၢ က​ဃ့​ဘါ​ထုကဖၣ်​တၢ်​လီၤ. —တၢး​၂၀.၁၁ ကဘျံးပၤ ၄.

“ပှၤ​ခဲလၢာ် က​ဘၣ်​ တၢ်မၤ​သမူထီၣ်​က့ၤ​အီၤ​လၢ ခရံာ်​အဃိ” န့ၣ်​ ပၣ်ဃုာ်ဒီး မ​တဂၤ​တဖၣ်​လဲၣ်.—၁ ကရံၣ်သူး ၁၅:၂၂.

စီၤ​ပီလူး​တ​အဲၣ်ဒိး​တဲ​ဝဲ​လၢ ကယဲၢ်​ပှၤ​ဟီၣ်ခိၣ်​ဖိ​ခဲလၢာ် က​ဂဲၤ​ဆၢထၢၣ်​သမူထီၣ်​က့ၤ ကိးဂၤ​ဒဲး​ဘၣ်. အ​ဝဲ​တဲ​ဘၣ်ဃး​ဒီး ပှၤ​ဘၣ်​တၢ်ဒိးဖှူ​အီၤ​တဖၣ်​လၢ “အ​ဘၣ်​တၢ်​ပာ်စီဆှံ​အီၤ လၢ​ယ့ၣ်ၡူး​ခရံာ်​အ​ပူၤ” လီၤ. (၁ ကရံၣ်​ ၁:၂; ၁၅:၁၈) —တၢး​၂၀.၁၂ ကဘျံးပၤ ၅-၆.

ဖဲ​ပှၤ​ဘၣ်​တၢ်ဒိးဖှူ​အီၤ​တဖၣ်​ ‘​ဘၣ်​တၢ်​လဲလိာ် အဝဲသ့ၣ်​ . . . လၢ​တဖျးမဲာ်​အတီၢ်ပူၤ ဖဲ​ကွဲၤ​အလီၢ်​ခံ​ကတၢၢ်​တဖျၢၣ်’ ဝံၤ​အလီၢ်​ခံ အဝဲသ့ၣ်​က​မၤ​တၢ်မနုၤ​လဲၣ်.—၁ ကရံၣ်သူး ၁၅:၅၁-၅၃.

အဝဲသ့ၣ်​က​မၤ​သကိး​တၢ်​ဒီး​ခရံာ် ဒီး​က​ပၢ​ဝဲ​ပှၤ​ဂီၢ်မုၢ်​လၢ နီၣ်ထိးဘိ​ထး​လီၤ. (လီၣ်ဖျါ ၂:၂၆, ၂၇)—တၢး​၂၀.၁၂ ကဘျံးပၤ ၁၂-၁၃.