ပှၤဖးလံာ်ဖိတဖၣ် အတၢ်သံကွၢ်
ဖဲ ၃ မိၤၡ့ ၁၉:၁၆ အပူၤ တၢ်မၤလိာ်လၢအမ့ၢ် “ဆၢထၢၣ်ထီဒါ ပှၤလၢနဃၢၤအသွံၣ်” တဂ့ၤန့ၣ် အဲၣ်ဒိးတဲဝဲတၢ်မနုၤလဲၣ် ဒီးပမၤလိန့ၢ်ဘၣ်တၢ်မနုၤလဲၣ်.
▪ ယဟိဝၤယွၤ ဟ့ၣ်ဂံၢ်ဟ့ၣ်ဘါဝဲ ပှၤအံၣ်စရ့လးဖိတဖၣ်လၢ ကအိၣ်စီဆှံလီၤ. ဒ်သိးအဝဲသ့ၣ် ကအိၣ်စီဆှံအဂီၢ် ကစၢ်ယွၤတဲဘၣ်အဝဲသ့ၣ်လၢ “သုတလဲၤဝ့ၤဝီၤခဲၣ်ကပိာ်ခဲၣ်ကပၤတၢ်လၢ သုပှၤဂီၢ်မုၢ်အကျါတဂ့ၤ. ဒီးဆၢထၢၣ်ထီဒါ ပှၤလၢနဃၢၤအသွံၣ်တဂ့ၤ. ယဲဒၣ်အံၤယမ့ၢ်ယွၤလီၤ.”—၃ မိၤၡ့ ၁၉:၂, ၁၆.
တၢ်ကတိၤလၢအမ့ၢ် “ဆၢထၢၣ်ထီဒါ” လၢဧ့ၤဘြံၤအကျိာ်န့ၣ် အခီပညီအိၣ်ဝဲဒ်လဲၣ်. ပှၤယူဒၤဖိအလံာ်လၢ အဘၣ်ဃးဒီး လံာ် ၃ မိၤၡ့န့ၣ် ပာ်ဖျါထီၣ်ဝဲဒၣ်လၢ “တၢ်ကတိၤတခါအံၤ အလီၤဂာ်ဒ် ဧ့ၤဘြံၤအတၢ်ကတိၤဒိ အဃိကီဝဲလၢ ပှၤကကျိာ်ထံအီၤအဂီၢ်လီၤ. ဘၣ်ဆၣ် အခီပညီလိၤလိၤန့ၣ် မ့ၢ်ဝဲ ‘တဘၣ်ဆၢထၢၣ်လၢ အဖီခိၣ်, အကပၤ မ့တမ့ၢ် ဘူးဒီးအီၤတဂ့ၤ.’”
ပှၤကူၣ်ဘၣ်ကူၣ်သ့တဖၣ် တဲဝဲလၢ တၢ်ကတိၤအံၤန့ၣ် အဘၣ်ထွဲလိာ်သးဒီး အဆၢဖိလၢ အမဲာ်ညါတဆၢလီၤ. ဖဲန့ၣ်တဲဝဲလၢ “လၢတၢ်စံၣ်ညီၣ်အပူၤန့ၣ် မၤတၢ်တတီတလိၤဘၣ်တဂ့ၤ. ကွၢ်မဲာ်ပှၤဖှီၣ်ဖိယာ်ဖိတဂ့ၤ. ဒီးပာ်လၤကပီၤပှၤအဒိၣ်တဂ့ၤ. နဘၣ်စံၣ်ညီၣ်ပှၤလၢနဃၢၤ ဒီးတၢ်တီတၢ်လိၤလီၤ.” (၃ မိၤၡ့ ၁၉:၁၅) မ့မ့ၢ်ဒ်န့ၣ်န့ၣ် လၢအဆၢဖိ ၁၆ အပူၤ တၢ်ကတိၤလၢအမ့ၢ် တဘၣ် “ဆၢထၢၣ်ထီဒါ” ပှၤဂၤတဂ့ၤန့ၣ် ဘၣ်သ့ၣ်သ့ၣ် အခီပညီကမ့ၢ်ဝဲ ပှၤအံၣ်စရ့လးဖိတဖၣ် တဘၣ်မၤတၢ်တတီတလိၤ ဖဲအဝဲသ့ၣ်ထီၣ်ရူထီၣ်တ့, မၤစံပွါယ့ ဒီးလၢဟံၣ်ဖိဃီဖိအပူၤဘၣ်. ဒီးပှၤအံၣ်စရ့လးဖိတဂၤန့ၣ် တကြၢးမၤလံၣ်မၤလီတၢ် ဒ်သိးကဒိးန့ၢ်ဘၣ်အဘျုးအဂီၢ် နီတမံၤဘၣ်. ပတဘၣ်မၤတၢ်သ့ၣ်တဖၣ်အံၤဒု မ့ၢ်မီၤ, ဘၣ်ဆၣ် တၢ်ကတိၤလၢ အဆၢဖိ ၁၆ အံၤအပူၤန့ၣ် ပနၢ်ပၢၢ်အီၤလၢ ကျဲလၢအဂၤတဘိသ့ဒံးဝဲလီၤ.
ဖဲအဆၢဖိတဆၢအံၤ အဆိကတၢၢ်တကျိၤန့ၣ် ကစၢ်ယွၤမၤလိာ် အပှၤဂီၢ်မုၢ်တဖၣ်လၢ အဝဲသ့ၣ်တဘၣ်ဟးဝ့ၤဝီၤ တဲဟးဂီၤပှၤဂၤအဂ့ၢ်ဘၣ်. ပှၤမ့ၢ်တဲအီၣ်ပှၤဂ့ၢ်န့ၣ် တၢ်ကီတၢ်ခဲအိၣ်ထီၣ်သ့. ဘၣ်ဆၣ် ပှၤမ့ၢ်တဲဟးဂီၤပှၤဂၤအဂ့ၢ်န့ၣ် တၢ်ကီတၢ်ခဲကအိၣ်ထီၣ် နးန့ၢ်အန့ၣ်သ့ဒံး. (ကတိၤဒိ ၁၀:၁၉; စံၣ်တဲၤတဲလီၤတၢ် ၁၀:၁၂-၁၄; ၁ တံၤမသ့း ၅:၁၁-၁၅; ယၤကိာ် ၃:၆) ညီနုၢ်တၢ်တဲဟးဂီၤပှၤဂၤအဂ့ၢ်န့ၣ် အဲၣ်ဒိးတဲဝဲ နတိာ်ပာ်လၢ နကမၤဟးဂီၤ ပှၤဂၤအမံၤဂ့ၤသၣ်ဂ့ၤအဃိ နတဲလံၣ်တဲလီတၢ်လီၤ. တကးဒံးဘၣ် မ့ၢ်စ့ၢ်ကီး နအုၣ်နသးကဘျံးကဘျၣ်လၢ ပှၤဂၤအဂ့ၢ်. ဒီးနမ့ၢ်သ့ၣ်ညါလၢ တၢ်လီၤဘၣ်ယိၣ်အိၣ်ထီၣ်လၢ ပှၤတဂၤအဂီၢ်ဒၣ်လဲာ်န့ၣ် နကမၤဒ်န့ၣ်လီၤ. ပကနီၣ်ထီၣ်ဘၣ်ကဒါက့ၤ ဖဲပှၤလၢအတဲဟးဂီၤပှၤဂ့ၢ်တဖၣ်န့ၣ် အုၣ်အသးကဘျံးကဘျၣ် ဘၣ်ဃးဒီး စီၤနၤဘိး အဃိ ပှၤကွံာ်သံအီၤလၢလၢၢ်လီၤ. (၁ စီၤပၤ ၂၁:၈-၁၃) အဃိ ပမ့ၢ်တဲဟးဂီၤဘၣ်ပှၤဂၤအဂ့ၢ်န့ၣ် ဘၣ်သ့ၣ်သ့ၣ် ပကဆၢထၢၣ်ထီဒါဘၣ် ပှၤဂၤအသွံၣ် ဒ် ၃ မိၤၡ့ ၁၉:၁၆ တဲဝဲအသိးလီၤ.
ပှၤတနီၤနီၤန့ၣ် ကတဲဟးဂီၤပှၤတဂၤအဂ့ၢ် ခီဖျိလၢအသးဟ့ဝဲ ပှၤတဂၤန့ၣ်အဃိလီၤ. ဖဲ ၁ ယိၤဟၣ် ၃:၁၅ န့ၣ်တဲဝဲလၢ “ပှၤကိးဂၤဒဲးလၢ အသးဟ့ အဒီပုၢ်ဝဲၢ်န့ၣ် မ့ၢ်ပှၤလၢအမၤသံပှၤဂၤလီၤ. ဒီးသုသ့ၣ်ညါလၢ ပှၤလၢအမၤသံပှၤဂၤန့ၣ် တၢ်မူအထူအယိာ် တအိၣ်တဆိးလၢအပူၤဘၣ်.” တကးဒံးဘၣ် ဖဲကစၢ်ယွၤတဲဝဲလၢ သုတဘၣ်ဆၢထၢၣ်ထီဒါ ပှၤလၢနဃၢၤအသွံၣ်တဂ့ၤ ဝံၤအလီၢ်ခံ အဆဲးတဲဝဲလၢ “သးဟ့နဒီပုၢ်ဝဲၢ်လၢ နသးကံၢ်ပူၤတဂ့ၤ.”—၃ မိၤၡ့ ၁၉:၁၇.
အဃိ တၢ်မၤလိာ်လၢ အအိၣ်လၢ ၃ မိၤၡ့ ၁၉:၁၆ အပူၤန့ၣ် အရ့ဒိၣ်ဒိၣ်မးလၢ ခရံာ်ဖိတဖၣ် ကဘၣ်မၤထွဲဝဲလီၤ. ပကဘၣ်ဟးဆှဲး တၢ်ဆိကမိၣ်လၢ အတဂ့ၤဘၣ် ဒီးတၢ်တဲဟးဂီၤပှၤဂၤအဂ့ၢ်လီၤ. ပမ့ၢ် “ဆၢထၢၣ်ထီဒါ” ပှၤတဂၤဂၤ ခီဖျိပတဲဟးဂီၤအဂ့ၢ် မ့တမ့ၢ် ပသးက့ၣ်အီၤန့ၣ် ဖျါလၢပသးဟ့ဝဲ ပှၤတဂၤန့ၣ်လီၤ. အဃိ ခရံာ်ဖိသ့ၣ်တဖၣ်န့ၣ် တဘၣ်သးဟ့ပှၤဂၤ နီတစဲးဘၣ်.—မးသဲ ၁၂:၃၆, ၃၇.