တၢ်မၤလိ ၅၀
“နကအိၣ်ဒီးယၤလၢ ပၤရဒံစူးအပူၤ”
“တနံၤညါအံၤ ယကတဲနၤ တီတီလၢ နကအိၣ်ဒီးယၤလၢ ပၤရဒံစူးအပူၤ.” —လူၤကၣ် ၂၃:၄၃.
တၢ်သးဝံၣ် ၁၄၅ ယွၤအတၢ်အၢၣ်လီၤ ပၤရဒံစူး
တၢ်မၤလိအံၤ အတၢ်တိာ်ပာ် a
၁. တချုးလၢ ယ့ၣ်ၡူးသံဒံးဘၣ်န့ၣ် အတဲဘၣ် ပှၤမၤကမၣ်တၢ် လၢအပီၢ်ယၢ်လီၤက့ၤသးတဂၤန့ၣ် လၢတၢ်ဂ့ၢ်မနုၤလဲၣ်. (လူၤကၣ် ၂၃:၃၉-၄၃)
တချုးလၢ ယ့ၣ်ၡူး ဒီးပှၤမၤကမၣ်တၢ် လၢအအိၣ်လၢ အကပၤခံဂၤ သံဒံးဘၣ်န့ၣ် အဝဲသ့ၣ် ဘၣ်တူၢ်တၢ် ဖၣ်နးညါ. (လူၤကၣ် ၂၃:၃၂, ၃၃) ပှၤမၤကမၣ်တၢ်ခံဂၤအံၤ အဝဲသ့ၣ် တဲအၢတဲသီ ယ့ၣ်ၡူးအဃိ ပသ့ၣ်ညါလၢ အဝဲသ့ၣ်တကဲ ယ့ၣ်ၡူးအပျဲၢ်အဘီၣ်ဘၣ်. (မးသဲ ၂၇:၄၄; မၢ်ကူး ၁၅:၃၂) နာ်က့ အဝဲသ့ၣ်တဂၤန့ၣ် ပီၢ်ယၢ်လီၤက့ၤသး ဒီးအတဲယ့ၣ်ၡူးလၢ “ယ့ၣ်ၡူးဧၢ, ဖဲနနုာ်လီၤလၢ နဘီမုၢ်အပူၤအခါ သ့ၣ်နီၣ်ထီၣ်က့ၤယၤနီၤ.” အဃိ ယ့ၣ်ၡူး တဲက့ၤအီၤလၢ “တနံၤညါအံၤ ယကတဲနၤ တီတီလၢ နကအိၣ်ဒီးယၤလၢ ပၤရဒံစူးအပူၤ.” (ဖး လူၤကၣ် ၂၃:၃၉-၄၃.) နာ်က့ တၢ်ကစီၣ် ဘၣ်ဃးဒီး “မူခိၣ်အဘီအမုၢ်” အဂ့ၢ်လၢ ယ့ၣ်ၡူး စံၣ်တဲၤတဲလီၤဝဲန့ၣ် လၢညါ လီၤဂာ်လၢ ပှၤမၤကမၣ်တၢ်တဂၤအံၤ တကနၣ်ဃုာ်ဝဲဘၣ်. ဒီးပှၤမၤကမၣ်တၢ်တဂၤအံၤ ကအိၣ်ဘၣ်လၢ ကစၢ်ယွၤအဘီမုၢ်န့ၣ် ယ့ၣ်ၡူးတတဲဝဲ နီတဘျီဘၣ်. (မးသဲ ၄:၁၇) ဖဲယ့ၣ်ၡူးတဲဘၣ် ပှၤမၤကမၣ်တၢ်တဂၤအံၤ ဘၣ်ဃးဒီး ပၤရဒံစူးအဂ့ၢ်ခါန့ၣ် အဘၣ်သးတဲဝဲ ဘၣ်ဃးဒီး ဟီၣ်ခိၣ် ပၤရဒံစူး လၢအကကဲထီၣ်သး လၢခါဆူညါ. ဘၣ်မနုၤအဃိ ပတဲကၠဲန့ၣ်လဲၣ်.
ပှၤမၤကမၣ်တၢ် လၢအပီၢ်ယၢ်လီၤက့ၤသးတဂၤန့ၣ် သ့ၣ်ညါပာ်စၢၤဝဲ ပှၤယူဒၤဖိ အတၢ်စူၢ်တၢ်နာ် အဂ့ၢ်အဃိ လီၤဂာ်လၢ အကဲပှၤယူဒၤဖိ (ကွၢ်လံာ်အဆၢ ၂-၃)
၂. ပှၤမၤကမၣ်တၢ် လၢအပီၢ်ယၢ်လီၤက့ၤသးတဂၤအံၤ အကဲပှၤယူဒၤဖိန့ၣ် ပသ့ၣ်ညါဘၣ်ဒ်လဲၣ်.
၂ ပှၤယူဒၤဖိန့ၣ် အဘူၣ်ထီၣ်ဘါထီၣ် ထဲကစၢ်ယွၤတဂၤ မ့မ့ၢ်လၢ ပှၤကလုာ်အဂၤဟီန့ၣ် အဝဲသ့ၣ်ဘူၣ်ထီၣ်ဘါထီၣ် ယွၤအါဂၤ. (၂ မိၤၡ့ ၂၀:၂, ၃; ၁ ကရံၣ်သူး ၈:၅, ၆) ပှၤမၤကမၣ်တၢ် လၢအပီၢ်ယၢ်လီၤက့ၤသးတဂၤန့ၣ် လီၤဂာ်လၢအကဲ ပှၤယူဒၤဖိ. အဃိ အတဲဘၣ် ပှၤမၤကမၣ်တၢ် လၢအဂၤတဂၤလၢ “နတပျံၤ ကစၢ်ယွၤ နီတစဲးဧီၤ.” (လူၤကၣ် ၂၃:၄၀) ပှၤမၤကမၣ်တၢ်ခံဂၤအံၤ မ့ၢ်တကဲပှၤယူဒၤဖိဘၣ်န့ၣ် ပှၤမၤကမၣ်တၢ် လၢအဝဲတဂၤန့ၣ် ကတဲအီၤလၢ “နတပျံၤ ယွၤတဖၣ် နီတစဲးဧီၤ.” တကးဒံးဘၣ် ယဟိဝၤယွၤ မၢလီၤယ့ၣ်ၡူးလၢ ကလဲၤလၢ “ပှၤအံၣ်စရ့လးဖိ လၢအမ့ၢ် သိလၢအလီၤမၢ်တဖု အအိၣ်,” တမ့ၢ်လၢ ပှၤကလုာ်ဂၤအအိၣ်ဘၣ်. (မးသဲ ၁၅:၂၄) ဒီးကစၢ်ယွၤ ကမၤသမူထီၣ်က့ၤပှၤသံန့ၣ် ပှၤအံၣ်စရ့လးဖိတဖၣ် သ့ၣ်ညါဝဲ. အဃိ ပှၤမၤကမၣ်တၢ်တဂၤအံၤ ကသ့ၣ်ညါဘၣ်ဃးဒီး တၢ်ဂဲၤဆၢထၢၣ် သမူထီၣ်က့ၤအဂ့ၢ် ဒီးအနာ်ဝဲလၢ ယဟိဝၤယွၤ ကမၤသမူထီၣ်က့ၤ ယ့ၣ်ၡူး ဒီးယ့ၣ်ၡူးန့ၣ် ကပၢတၢ်လၢ ကစၢ်ယွၤအဘီမုၢ်. ပှၤမၤကမၣ်တၢ် လၢအပီၢ်ယၢ်လီၤက့ၤသးတဂၤအံၤ အဘၣ်သးလၢ ကစၢ်ယွၤ ကမၤသမူထီၣ်က့ၤအီၤကၠ့ၤ.
၃. ပၤရဒံစူးလၢ ယ့ၣ်ၡူးတဲဝဲန့ၣ် ပှၤမၤကမၣ်တၢ် လၢအပီၢ်ယၢ်လီၤက့ၤသးတဂၤ ကဆိမိၣ်ဘၣ်ဝဲ ဒ်လဲၣ်. (၁ မိၤၡ့ ၂:၁၅)
၃ ပှၤမၤကမၣ်တၢ် လၢအပီၢ်ယၢ်လီၤက့ၤသးတဂၤအံၤ အကဲပှၤယူဒၤဖိအဃိ အကသ့ၣ်ညါဘၣ်ဝဲ နီၢ်အံၣ်အု ဒီးစီၤအၤဒၣ် အိၣ်ဘၣ်လၢ ပၤရဒံစူးအဂ့ၢ်. အဃိ ပၤရဒံစူးလၢ ယ့ၣ်ၡူး တဲဘၣ်အီၤန့ၣ် အသ့ၣ်ညါဝဲလၢ အကကဲ တၢ်လီၢ်ဃံဃံလၤလၤတတီၤ လၢဟီၣ်ခိၣ်ချၢ.—ဖး ၁ မိၤၡ့ ၂:၁၅.
၄. တၢ်လၢယ့ၣ်ၡူးတဲဘၣ် ပှၤမၤကမၣ်တၢ် လၢအပီၢ်ယၢ်လီၤက့ၤသးတဂၤန့ၣ် မၤစၢၤပှၤလၢ ပကဆိမိၣ်ထံ တၢ်ဂ့ၢ်မနုၤလဲၣ်.
၄ တၢ်လၢ ယ့ၣ်ၡူးတဲဘၣ် ပှၤမၤကမၣ်တၢ် လၢအပီၢ်ယၢ်လီၤက့ၤသးတဂၤန့ၣ် မၤစၢၤပှၤလၢ ပကဆိမိၣ်ဘၣ်ဃးဒီး ခါဆူညါ ပတၢ်အိၣ်မူလၢ ပၤရဒံစူးပူၤန့ၣ် ကမၤအသးဒ်လဲၣ်. ဒီးပမ့ၢ်ဆိမိၣ်ထီၣ် ဖဲစီၤၡလိၤမိၤ ပၢတၢ်အခါ တၢ်မုာ်တၢ်ခုၣ်အိၣ်ဝဲန့ၣ် ပကသ့ၣ်ညါအါထီၣ် ပၤရဒံစူး အဂ့ၢ်ကၠ့ၤ. တကးဒံးဘၣ် လံာ်စီဆှံ တဲဝဲလၢ ယ့ၣ်ၡူးန့ၣ် အကဲပှၤလၢ အဒိၣ်န့ၢ်ဒံး စီၤၡလိၤမိၤ အဃိ ပသ့ၣ်ညါ သပှၢ်တၢၢ်လၢ ယ့ၣ်ၡူး ဒီးပှၤလၢကပၢတၢ်ဒီးအီၤန့ၣ် ကမၤကဲထီၣ်က့ၤ ဟီၣ်ခိၣ်ဒီဘ့ၣ် လၢပၤရဒံစူးနီၢ်ကီၢ်. (မးသဲ ၁၂:၄၂) ပသ့ၣ်ညါဘၣ်လၢ ဒ်သိး “သိလၢအဂၤ” ကအိၣ်မူဘၣ် လီၤထူလီၤယိာ်လၢ ဟီၣ်ခိၣ်ပၤရဒံစူးပူၤအဂီၢ် တၢ်လၢအဝဲသ့ၣ် ကဘၣ်မၤန့ၣ်အိၣ်ဝဲ.—ယိၤဟၣ် ၁၀:၁၆.
တၢ်အိၣ်မူလၢ ပၤရဒံစူးပူၤန့ၣ် ကမၤသးဒ်လဲၣ်
၅. နဆိမိၣ် တၢ်အိၣ်မူလၢ ပၤရဒံစူးပူၤန့ၣ် ကမၤသးဒ်လဲၣ်.
၅ နဆိမိၣ် တၢ်အိၣ်မူလၢ ပၤရဒံစူးပူၤန့ၣ် ကမၤသးဒ်လဲၣ်. ဘၣ်သ့ၣ်သ့ၣ် နကထံၣ်တမှံလၢ ပၤရဒံစူးန့ၣ် အကဲဝဲကရၢၢ်ဃံလၤ ဒ်သိးဒီး ဧ့ၤဒ့ၣ်တၤသၣ်လီၢ်. (၁ မိၤၡ့ ၂:၇-၉) နကနီၣ်ဘၣ်က့ၤလၢ ဝံမံကၤ တဲဝဲဘၣ်ဃးဒီး ကစၢ်ယွၤ အပှၤဂီၢ်မုၢ် “တဂၤစုာ်စုာ် ကဆ့ၣ်နီၤလၢ အနီၢ်ကစၢ် အစပံးမုၢ် ဒီးအချၢၣ်ဒၢထူၣ် အဖီလာ်.” (မံကၤ ၄:၃, ၄) နကနီၣ်ဘၣ်စ့ၢ်ကီး လံာ်စီဆှံအဆၢဖိ လၢအတဲဘၣ်ဃးဒီး တၢ်အီၣ်တၢ်အီ ကအိၣ်ဒီဒူၣ်. (စံးထီၣ်ပတြၢၤ ၇၂:၁၆; ယၡါယၤ ၆၅:၂၁, ၂၂) အဃိ နကထံၣ်တမှံလီၤနသးလၢ နဆ့ၣ်နီၤအိၣ်လၢ ကရၢၢ်ဃံလၤအပူၤ ဒီးတၢ်အီၣ်တၢ်အီ လၢအဝံၣ်အဘဲန့ၣ် ကအိၣ်ဒီဒူၣ်. နကကသါဘၣ် ကလံၤလၢအဆှံ, တၢ်မုၢ်တၢ်ဘိ ဒီးဖီတဖၣ် ကနၢမူဘၣ်နၤ အကလုာ်ကလုာ်. ဝံၤဘျီ နကထံၣ်တမှံကွၢ်လၢ နဟံၣ်ဖိဃီဖိ, နသကီး ဃုာ်ဒီး ပှၤလၢ အဂဲၤဆၢထၢၣ်သမူထီၣ်က့ၤတဖၣ်န့ၣ် သူၣ်ဖှံသးညီ ဒီးရ့လိာ်သးမုာ်မး. တၢ်လၢ နထံၣ်တမှံတဖၣ်အံၤ တကဲဝဲ တၢ်မံမီၢ်ဘၣ် ဒီးအကဟဲကဲထီၣ်သး လၢဟီၣ်ခိၣ်ချၢ နီၢ်ကီၢ်. တကးဒံးဘၣ် လၢပၤရဒံစူးပူၤန့ၣ် နကမၤဘၣ် တၢ်မၤလၢ အလီၤသးခု သပှၢ်တၢၢ်.
ပကန့ၢ်ဘၣ် တၢ်ခွဲးတၢ်ယာ်လၢ ပကမၤလိလံာ်စီဆှံဒီး ပှၤလၢ အဂဲၤဆၢထၢၣ်သမူထီၣ်က့ၤတဖၣ် (ကွၢ်လံာ်အဆၢ ၆)
၆. ခါဆူညါ လၢပၤရဒံစူးပူၤန့ၣ် ပကမၤဘၣ် မနုၤလဲၣ်. (ကွၢ်တၢ်ဂီၤ.)
၆ ဖဲပမၤတၢ်အခါ ယဟိဝၤယွၤ ဘၣ်သးဝဲလၢ ပကအိၣ်ဒီး တၢ်သးခု. (စံၣ်တဲၤတဲလီၤတၢ် ၂:၂၄) ဖဲယ့ၣ်ၡူးပၢတၢ် အနံၣ်တကထိ အဆၢကတီၢ်န့ၣ် ပတၢ်မၤ ကအိၣ်ဒီဒူၣ်. ပှၤလၢ အပူၤဖျဲးထီၣ်လၢ တၢ်နးတၢ်ဖှီၣ်ဖးဒိၣ် ဒီးပှၤအကကွဲၢ် လၢကဂဲၤဆၢထၢၣ် သမူထီၣ်က့ၤန့ၣ် ကလိၣ်ဘၣ် တၢ်ကူတၢ်ကၤ, တၢ်အီၣ်တၢ်အီ ဒီးတၢ်လီၢ်လၢ ကအိၣ်ဝဲအဂီၢ်. အဃိ ပကဘၣ် မၤစၢၤအဝဲသ့ၣ်ဖးအါ နာ်က့ ပမၤစၢၤအဝဲသ့ၣ်မုာ်. လၢညါန့ၣ် ယဟိဝၤယွၤ မၢဝဲ စီၤအၤဒၣ် ဒီးနီၢ်အံၣ်အု ကွၢ်ထွဲဝဲ ဧ့ၤဒ့ၣ်တၤသၣ်လီၢ်. ပဝဲသ့ၣ်စ့ၢ်ကီး ခါဆူညါန့ၣ် ပကအိၣ်ဒီး တၢ်ခွဲးတၢ်ယာ်လၢ ပကကွၢ်ထွဲဟီၣ်ခိၣ် ဒီးမၤဂ့ၤထီၣ်က့ၤအီၤ ဒ်သိးဒီး ပၤရဒံစူး. တကးဒံးဘၣ် ပှၤအကကွဲၢ် လၢကဂဲၤဆၢထၢၣ် သမူထီၣ်က့ၤန့ၣ် တသ့ၣ်ညါ ယဟိဝၤယွၤ အဂ့ၢ်အါအါဘၣ်. ဒီးပှၤတီပှၤလိၤ လၢအသံပာ်စၢၤ တချုးလၢ ယ့ၣ်ၡူးအစိၤန့ၣ် ဖဲအဝဲသ့ၣ် သံဝံၤအလီၢ်ခံ တၢ်ကဲထီၣ်သးတဖၣ်န့ၣ် အဝဲသ့ၣ်တသ့ၣ်ညါဝဲ နီတမံၤဘၣ်. အဃိ ပကန့ၢ်ဘၣ် တၢ်ခွဲးတၢ်ယာ်လၢ ပကသိၣ်လိ အဝဲသ့ၣ် ဘၣ်ဃးဒီး ယဟိဝၤယွၤ ဒီးအတၢ်တိာ်ပာ်အဂ့ၢ်န့ၣ် ကလီၤသးခုဖးဒိၣ်ညါ.
၇. လၢပၤရဒံစူးပူၤန့ၣ် ပတၢ်အိၣ်မူ ကမၤသးဒ်လဲၣ်.
၇ လၢပၤရဒံစူးပူၤန့ၣ် ပတၢ်အိၣ်မူ ကမၤသးဒ်လဲၣ်. ပကအိၣ်ဘၣ် မုာ်မုာ်ခုၣ်ခုၣ်, ပကန့ၢ်ဘၣ် တၢ်လၢပလိၣ်ဘၣ် ဒီးတၢ်အိၣ်သး ကလဲၤသးဂ့ၤဂ့ၤ. ပတဲကၠဲန့ၣ် ခီဖျိလၢ ပသ့ၣ်ညါဘၣ် တၢ်အိၣ်သးလၢ စီၤပၤၡလိၤမိၤ ပၢတၢ်အစိၤ. တကးဒံးဘၣ် ခါဆူညါ ဖဲယ့ၣ်ၡူးပၢဟီၣ်ခိၣ်အခါ ပတၢ်အိၣ်မူ ကမၤသးဒ်လဲၣ်န့ၣ် ယဟိဝၤယွၤ တဲပာ်စၢၤဝဲလံ.
စီၤၡလိၤမိၤ အတၢ်ပၢန့ၣ် ဒုးသ့ၣ်ညါအါထီၣ်ပှၤ ဘၣ်ဃးဒီးပၤရဒံစူး
၈. တၢ်ကတိၤလၢ စီၤပၤဒၤဝံး ကွဲးဝဲဖဲ စံးထီၣ်ပတြၢၤ ၃၇:၁၀, ၁၁, ၂၉ န့ၣ်လၢညါ အလၢပှဲၤထီၣ်ဒ်လဲၣ်. (ကွၢ် “ပှၤဖးလံာ်ဖိတဖၣ် အတၢ်သံကွၢ်” လၢလံာ်တဘ့ၣ်အံၤအပူၤ.)
၈ ဖဲစီၤပၤလၢအကူၣ်တၢ်သ့ ဒီးအသးတီတဂၤ ပၢတၢ်အဆၢကတီၢ် တၢ်အိၣ်သး ကမၤသးဒ်လဲၣ်န့ၣ် စီၤပၤဒၤဝံး ကွဲးဖျါထီၣ်ဝဲ. (ဖး စံးထီၣ်ပတြၢၤ ၃၇:၁၀, ၁၁, ၂၉.) အဒိ ပမ့ၢ်တဲပၠးပှၤဂၤ ဘၣ်ဃးဒီး ပၤရဒံစူးအဂ့ၢ်န့ၣ် ညီနုၢ် ပဖးပၠးအဝဲသ့ၣ် စံးထီၣ်ပတြၢၤ ၃၇:၁၁. ပမၤကၠဲန့ၣ်န့ၣ် အဘၣ်လိာ်သးဒီး တၢ်လၢယ့ၣ်ၡူးတဲဝဲ ဖဲအစံၣ်တဲၤတဲလီၤတၢ်လၢ ကစၢၢ်ခိၣ် ဒီးတၢ်လၢ အတဲဝဲန့ၣ် ပသ့ၣ်ညါလၢ အကလၢပှဲၤထီၣ် လၢခါဆူညါ. (မးသဲ ၅:၅) နာ်က့ တၢ်လၢ စီၤဒၤဝံး ကွဲးဝဲန့ၣ် အဘၣ်လိာ်သးဒီး တၢ်ဆၢကတီၢ်ဖဲ စီၤပၤၡလိၤမိၤ ပၢတၢ်အခါကၠ့ၤ. ပသ့ၣ်ညါဘၣ်လၢ ဖဲစီၤၡလိၤမိၤ ပၢတၢ်အခါ ကစၢ်ယွၤအပှၤဂီၢ်မုၢ် အိၣ်ဘၣ်ဝဲမုာ်မုာ် ဒီးဘီၣ်ဘီၣ်ညီညီ အဃိ လၢကီၢ်အံၣ်စရ့လးပူၤန့ၣ် လီၤဂာ်ဒ်သိးဒီး “တၢ်နုၢ်ထံ ဒီးကနဲစီ ယွၤလီၤဝဲ.” တကးဒံးဘၣ် ကစၢ်ယွၤ တဲအပှၤဂီၢ်မုၢ်လၢ “သုမ့ၢ်လဲၤတၢ် ဒ်ယတၢ်ဘျၢတဖၣ်အသိး . . . ယကဟ့ၣ်လီၤသုလၢ တၢ်မုာ်တၢ်ခုၣ်လၢ ထံကီၢ်အပူၤ ဒီးသုကမံ ဒီးပှၤတမၤပျံၤမၤဖုးသု နီတဂၤဘၣ်.” (၃ မိၤၡ့ ၂၀:၂၄; ၂၆:၃, ၆) ဖဲစီၤၡလိၤမိၤ ပၢတၢ်ခါန့ၣ် ကစၢ်ယွၤ အတၢ်အၢၣ်လီၤအံၤ လၢပှဲၤထီၣ်ဝဲလံ. (၁ ကွဲးနီၣ်တၢ် ၂၂:၉; ၂၉:၂၆-၂၈) တကးဒံးဘၣ် ယဟိဝၤယွၤ အၢၣ်လီၤဝဲလၢ ပှၤအၢပှၤသီ “တအိၣ်လၢၤဘၣ်.” (စံးထီၣ်ပတြၢၤ ၃၇:၁၀) အဃိ တၢ်အၢၣ်လီၤဖဲ စံးထီၣ်ပတြၢၤ ၃၇:၁၀, ၁၁, ၂၉ န့ၣ်လၢညါ အလၢပှဲၤထီၣ်လံ ဒီးလၢခါဆူညါစ့ၢ်ကီး အကလၢပှဲၤထီၣ်ဒံး.
၉. ဘၣ်ဃးဒီး စီၤၡလိၤမိၤ အတၢ်ပၢန့ၣ် ၡဘၤအနီၢ်ပၤမုၣ် တဲဝဲဒ်လဲၣ်.
၉ ပှၤအံၣ်စရ့လးဖိ လၢအအိၣ်လၢ စီၤၡလိၤမိၤ အတၢ်ပၢဖီလာ်န့ၣ် အိၣ်ဘၣ်မုာ်မုာ် ဒီးဘီၣ်ဘီၣ်ညီညီ. ဘၣ်ဃးဒီးတၢ်ဂ့ၢ်အံၤ ၡဘၤအနီၢ်ပၤမုၣ် နၢ်ဟူဝဲ ဒီးအဘၣ်သးထံၣ် တၢ်အိၣ်သး လၢအနီၢ်ကစၢ်အဃိ အလဲၤဝဲလၢ ဝ့ၢ်ယရူၤၡလ့ၣ် ဒီးအဘၣ်လဲၤတၢ် ဖၣ်ယံၤညါ. (၁ စီၤပၤ ၁၀:၁) တၢ်လၢအနၢ်ဟူဝဲ ဘၣ်ဃးဒီး စီၤၡလိၤမိၤ အတၢ်ပၢန့ၣ် အထံၣ်ဘၣ်ဝဲလၢ အနီၢ်ကစၢ်ဝံၤဘျီ အတဲဝဲလၢ “တၢ်လၢပှၤတဲယၤန့ၣ် အိၣ်ဒၣ်တစဲးဒံးလီၤ. . . . နပှၤဂီၢ်မုၢ် ဒီးနခ့နပှၤတဖၣ်လၢ အမၤတၢ်လၢ နမဲာ်ညါထီဘိ ဒီးနၢ်ဟူဘၣ် နတၢ်ကူၣ်သ့န့ၣ် ကသးခုဝဲ.” (၁ စီၤပၤ ၁၀:၆-၈) စီၤၡလိၤမိၤ အတၢ်ပၢ လၢအမုာ်အခုၣ်အံၤ ဒုးသ့ၣ်ညါအါထီၣ်ပှၤလၢ ဖဲယ့ၣ်ၡူး ပၢဝဲဟီၣ်ခိၣ်ခါန့ၣ် ယဟိဝၤယွၤ ကမၤဝဲ တၢ်အဂ့ၤအါမးလၢ ပှၤဟီၣ်ခိၣ်ဖိအဂီၢ်.
၁၀. ယ့ၣ်ၡူးန့ၣ် အဂ့ၤဒိၣ်န့ၢ်ဒံး စီၤပၤၡလိၤမိၤ ဒ်လဲၣ်.
၁၀ ယ့ၣ်ၡူးန့ၣ် အဂ့ၤဒိၣ်န့ၢ်ဒံး စီၤၡလိၤမိၤလၢ တၢ်ခဲလၢာ်. စီၤၡလိၤမိၤန့ၣ် အတလၢတပှဲၤဘၣ် ဒီးအမၤကမၣ်ဘၣ်တၢ် ဖးဒိၣ်. ဒီးခီဖျိလၢ အမၤကမၣ်တၢ်အဃိ ကစၢ်ယွၤအပှၤဂီၢ်မုၢ် ထံၣ်ဘၣ်တၢ်ကီတၢ်ခဲ. မ့မ့ၢ်လၢ ယ့ၣ်ၡူးန့ၣ် အကဲပှၤလၢပှၤပှဲၤ ဒီးတမၤကမၣ်တၢ် နီတဘျီဘၣ်. (လူၤကၣ် ၁:၃၂; ဧ့ၤဘြံၤ ၄:၁၄, ၁၅) အဒိ မုၣ်ကီၤလံၢ် မၤကွၢ်ယ့ၣ်ၡူး အကလုာ်ကလုာ် နာ်က့ ယ့ၣ်ၡူးသးတီဒီး ယဟိဝၤယွၤထီဘိ. ခီဖျိလၢ ယ့ၣ်ၡူးသးတီအဃိ ပသ့ၣ်ညါဘၣ်လၢ အတမၤကမၣ်တၢ် နီတဘျီဘၣ်. ဒီးပှၤလၢအအိၣ်လၢ အတၢ်ပၢဖီလာ်စ့ၢ်ကီး တထံၣ်ဘၣ် တၢ်ကီတၢ်ခဲဘၣ်. အဃိ ယ့ၣ်ၡူးကဲဘၣ် ပစီၤပၤန့ၣ် ပသးခု.
၁၁. မတဂၤ ကပၢတၢ်ဒီးယ့ၣ်ၡူးလဲၣ်.
၁၁ ယ့ၣ်ၡူး ဒီးပှၤ ၁၄၄,၀၀၀ န့ၣ်ကပၢဝဲ ပှၤဟီၣ်ခိၣ်ဖိ ဒီးကမၤလၢပှဲၤထီၣ် ယဟိဝၤယွၤ အတၢ်တိာ်ပာ် လၢဟီၣ်ခိၣ်ချၢ. (လီၣ်ဖျါ ၁၄:၁-၃) ပှၤလၢ ကပၢတၢ်ဒီးယ့ၣ်ၡူးန့ၣ် ဖဲအဝဲသ့ၣ်အိၣ်လၢ ဟီၣ်ခိၣ်ချၢအခါ အဝဲသ့ၣ် ထံၣ်ဘၣ်ဒီးတၢ်မၤကွၢ် အကလုာ်ကလုာ်အဃိ အဝဲသ့ၣ် ကနၢ်ပၢၢ်စၢၤဝဲ ပှၤဟီၣ်ခိၣ်ဖိ အတၢ်ကီတၢ်ခဲ. ပှၤသ့ၣ်တဖၣ်အံၤ အမူဒါအိၣ်ဒ်လဲၣ်.
ပှၤလၢ ကပၢတၢ်ဒီးယ့ၣ်ၡူးန့ၣ် အမူဒါအိၣ်ဒ်လဲၣ်
၁၂. ယဟိဝၤယွၤဟ့ၣ်ဝဲ ပှၤ ၁၄၄,၀၀၀ လၢမူဒါမနုၤလဲၣ်.
၁၂ ယ့ၣ်ၡူး ဒီးပှၤလၢ ကပၢတၢ်ဒီးအီၤန့ၣ် အဝဲသ့ၣ် မူဒါအိၣ်အါန့ၢ်ဒံး စီၤပၤၡလိၤမိၤဒံး. လၢညါ အံၣ်စရ့လးအစီၤပၤန့ၣ် ဘၣ်ပၢတၢ် ထဲလၢအနီၢ်ကစၢ်ဘီမုၢ် ဒီးကွၢ်ထွဲဝဲ ပှၤလၢအကကွဲၢ်လီၤ. မ့မ့ၢ် ကစၢ်ယွၤအဘီမုၢ်န့ၣ် ကပၢတၢ်လၢ ဟီၣ်ခိၣ်ဒီဘ့ၣ် ဒီးကကွၢ်ထွဲဝဲ ပှၤအကကွဲၢ် လၢအကထိညါ. အဃိ မူဒါလၢ ယဟိဝၤယွၤဟ့ၣ်ဝဲ ပှၤ ၁၄၄,၀၀၀ အံၤန့ၣ် ကဲဝဲတၢ်ခွဲးတၢ်ယာ် လၢအဂ့ၤဖးဒိၣ်တခါညါ.
၁၃. ပှၤလၢ ကပၢတၢ်ဒီးယ့ၣ်ၡူးန့ၣ် အဝဲသ့ၣ်ကန့ၢ်ဘၣ် မူဒါလီၤလီၤဆီဆီ ဒ်လဲၣ်.
၁၃ ယ့ၣ်ၡူး ဒီးပှၤ ၁၄၄,၀၀၀ န့ၣ်ကကဲစီၤပၤ ဒီးပှၤလုၢ်တၢ်ဒိၣ်. (လီၣ်ဖျါ ၅:၁၀) စီၤမိၤၡ့ အတၢ်သိၣ်တၢ်သီ အိၣ်ဝဲလၢ ပှၤလုၢ်တၢ်ဒိၣ်တဖၣ်န့ၣ် အမူဒါအိၣ်လၢ အကဘၣ်မၤစၢၤ ပှၤအံၣ်စရ့လးဖိ ဒ်သိးဒီး အဝဲသ့ၣ် ကအိၣ်ကဆှဲကဆှီ လၢနီၢ်ခိတကပၤ ဒီးအတၢ်ရ့လိာ်သးဒီး ယဟိဝၤယွၤ ကဂ့ၤ. စီၤမိၤၡ့ အတၢ်သိၣ်တၢ်သီအံၤ “မ့ၢ်တၢ်အကဒုလၢ အပာ်ဖျါထီၣ် တၢ်လၢအဂ့ၤလၢ အကဟဲဝဲတဖၣ်” အဃိ ပှၤလၢ ကပၢတၢ်ဒီးယ့ၣ်ၡူးန့ၣ် ကမၤစၢၤဝဲ ကစၢ်ယွၤ အပှၤဂီၢ်မုၢ် ကၠဲန့ၣ်ကၠ့ၤ. (ဧ့ၤဘြံၤ ၁၀:၁) နာ်က့ အဝဲသ့ၣ် ကမၤစၢၤ ပှၤဟီၣ်ခိၣ်ဖိအဂီၢ် တၢ်ရဲၣ်တၢ်ကျဲၤ အိၣ်ဒ်လဲၣ်န့ၣ် ပတသ့ၣ်ညါဒံးဘၣ်. ဘၣ်ဆၣ် ခါဆူညါ လၢဟီၣ်ခိၣ် ပၤရဒံစူးန့ၣ် ပနာ်သပှၢ်တၢၢ်လၢ ယဟိဝၤယွၤ ကရဲၣ်ကျဲၤတၢ် မူာ်မူာ်နီၢ်နီၢ် ဒ်သိးဒီး ပကန့ၢ်ဘၣ် တၢ်ဟံးစုနဲၣ်ကျဲ လၢပလိၣ်ဘၣ်.—လီၣ်ဖျါ ၂၁:၃, ၄.
“သိလၢအဂၤ” ကအိၣ်ဘၣ်လၢ ပၤရဒံစူးပူၤအဂီၢ် အဝဲသ့ၣ် ကဘၣ်မၤဒ်လဲၣ်
၁၄. “သိလၢအစှၤတဖု” ဒီး “သိလၢအဂၤ” ကဲဝဲသိတဖုဃီန့ၣ် ပသ့ၣ်ညါဘၣ်ဒ်လဲၣ်.
၁၄ ပှၤလၢ ကပၢတၢ်ဒီးယ့ၣ်ၡူးန့ၣ် ယ့ၣ်ၡူး ကီးအဝဲသ့ၣ်လၢ “သိလၢအစှၤတဖု.” (လူၤကၣ် ၁၂:၃၂) မ့မ့ၢ် ပှၤလၢ ကအိၣ်ဘၣ်လၢ ဟီၣ်ခိၣ်ပၤရဒံစူးန့ၣ် ယ့ၣ်ၡူး ကီးအဝဲသ့ၣ်လၢ “သိလၢအဂၤ.” ပှၤခံဖုအံၤန့ၣ် အကဲဝဲ သိတဖုဃီ ဒီးခဲအံၤ အမၤသကီးတၢ် ဃူဃူဖိးဖိးလံ. (ယိၤဟၣ် ၁၀:၁၆) ခါဆူညါ လၢပၤရဒံစူးန့ၣ် အဝဲသ့ၣ် ကဆဲးမၤသကီးတၢ်ဒံး. နာ်က့ “သိလၢအစှၤတဖု” န့ၣ်ကအိၣ်လၢမူခိၣ်. မ့မ့ၢ် “သိလၢအဂၤ” န့ၣ်ကန့ၢ်ဘၣ် တၢ်ခွဲးတၢ်ယာ်လၢ ကအိၣ်မူဘၣ် လီၤထူလီၤယိာ် လၢဟီၣ်ခိၣ်ချၢ. ဘၣ်ဆၣ် “သိလၢအဂၤ” ကအိၣ်ဘၣ်လၢ ပၤရဒံစူးပူၤအဂီၢ် ခဲအံၤ တၢ်လၢအဝဲသ့ၣ် ကဘၣ်မၤန့ၣ်အိၣ်ဝဲ.
ခဲအံၤ ပဘၣ်အိၣ်ကတီၤပာ်စၢၤသး ဒ်သိးဒီး ပကအိၣ်ဘၣ်လၢ ဟီၣ်ခိၣ်ပၤရဒံစူးအပူၤ (ကွၢ်လံာ်အဆၢ ၁၅) b
၁၅. (က) “သိလၢအဂၤ” ဆီၣ်ထွဲမၤစၢၤ ပှၤလၢအဘၣ်တၢ်ဒိးဖှူအီၤ ကသ့ဒ်လဲၣ်. (ခ) လၢတၢ်ဂီၤပူၤ ဒီပုၢ်ဝဲၢ်ခွါလၢ အလဲၤပှ့ၤတၢ်လၢ ပှၤဆါကသံၣ်လီၢ်န့ၣ် နကွၢ်လိအဒိအတဲာ် ကသ့ဒ်လဲၣ်. (ကွၢ်တၢ်ဂီၤ.)
၁၅ ပှၤမၤကမၣ်တၢ် လၢအပီၢ်ယၢ်လီၤက့ၤသးတဂၤန့ၣ် အပာ်လုၢ်ပာ်ပှ့ၤဝဲ တၢ်လၢယ့ၣ်ၡူး မၤန့ၢ်အီၤ ဘၣ်ဆၣ် ခီဖျိလၢ အသံအဃိ အတအိၣ်ဒီး တၢ်ခွဲးတၢ်ယာ်လၢ အကပာ်ဖျါထီၣ် တၢ်စံးဘျုးစံးဖှိၣ်ဘၣ်. မ့မ့ၢ် “သိလၢအဂၤ” ဟီန့ၣ် အဝဲသ့ၣ် ကပာ်ဖျါထီၣ် တၢ်စံးဘျုးစံးဖှိၣ်အဂီၢ် အဝဲသ့ၣ် န့ၢ်ဘၣ်တၢ်ခွဲးတၢ်ယာ်အါမး. အဒိ ပပာ်ဖျါထီၣ်လၢ ပအဲၣ်ယ့ၣ်ၡူး ခီဖျိပမၤစၢၤ ပှၤလၢအဘၣ်တၢ်ဒိးဖှူအီၤ. (မးသဲ ၂၅:၃၁-၄၀) ဒီးပဆီၣ်ထွဲ အဝဲသ့ၣ် ခီဖျိ ပစံၣ်တဲၤတဲလီၤတၢ် လၢတၢ်သးဆူၣ် ဒီးဒုးကဲထီၣ်ပှၤဂၤ လၢယ့ၣ်ၡူးအပျဲၢ်အဘီၣ်. (မးသဲ ၂၈:၁၈-၂၀) တကးဒံးဘၣ် ပမ့ၢ်သူ တၢ်ပီးတၢ်လီလၢ တၢ်သိၣ်လိနဲၣ်လိတၢ်အဂီၢ် ဒ်သိးဒီးလံာ် အိၣ်မူလီၤထူလီၤယိာ် ပှဲၤဒီးတၢ်သးခု န့ၣ်ပပာ်ဖျါထီၣ်လၢ ပဆီၣ်ထွဲအဝဲသ့ၣ်. နပှၤမၤလိလံာ်စီဆှံဖိ မ့ၢ်တအိၣ်နီဂၤဒံးဘၣ်န့ၣ် ပာ်လီၤဖီတၢၣ်လၢ နကမၤလိ လံာ်စီဆှံဒီးပှၤတဂၤဂၤ.
၁၆. ပကအိၣ်ဘၣ်လၢ ကစၢ်ယွၤအဘီမုၢ် တၢ်ပၢဖီလာ်အဂီၢ် ခဲအံၤန့ၣ် ပကဘၣ်မၤ မနုၤလဲၣ်.
၁၆ ပကအိၣ်ဘၣ်လၢ ကစၢ်ယွၤအဘီမုၢ် တၢ်ပၢဖီလာ်အဂီၢ် ပကဘၣ်ကဲ ပှၤလၢ ယဟိဝၤယွၤ ဘၣ်သးဝဲ. အဃိ ခဲအံၤ ပမ့ၢ်တအိၣ်ဘၣ်လၢ ပၤရဒံစူးပူၤဒံးဘၣ်နာ်က့ ပကဘၣ်ကျဲးစၢး ကဲပှၤလၢ အမၤတၢ်ဒီးတဲတၢ် တီတီလိၤလိၤ ဒီးပကဘၣ်ကဲပှၤလၢ အပၢၤအတၢ်အိၣ်မူ ကိးသနၢၣ်ဒဲး. ပကဘၣ် သးတီဒီး ယဟိဝၤယွၤ, သးတီဒီး ပမါဒီးပဝၤ ဒီးသးတီဒီး ပဒီပုၢ်ဝဲၢ်မုၣ်ခွါ. ပအိၣ်မူဘၣ်လၢ မုၢ်နံၤခံကတၢၢ်နာ်က့ ပမ့ၢ်ကနၣ် ဒီးမၤထွဲပာ်စၢၤ ယဟိဝၤယွၤ အတၢ်ဟံးစုနဲၣ်ကျဲ လၢခဲအံၤန့ၣ် ခါဆူညါ ဖဲပအိၣ်ဘၣ်လၢ ပၤရဒံစူးပူၤအခါ ပကနၣ် ဒီးမၤထွဲ အတၢ်ဟံးစုနဲၣ်ကျဲ ကညီထီၣ်. တကးဒံးဘၣ် ခဲအံၤ ပမ့ၢ်မၤဂ့ၤထီၣ် ပတၢ်သ့တၢ်ဘၣ် ဒီးမၤလိပသးလၢ တၢ်တမံၤမံၤန့ၣ် ပဆဲးသူအီၤလၢ ဟီၣ်ခိၣ်သီအပူၤသ့. ကွၢ်တၢ်ဂ့ၢ် လၢအမ့ၢ် “နအိၣ်ကတီၤသးလၢ နက ‘န့ၢ်သါဘၣ်ဟီၣ်ခိၣ်’ လံဧါ” လၢလံာ်တဘ့ၣ်အံၤအပူၤ.
၁၇. ပမ့ၢ်မၤကမၣ်ဘၣ်တၢ်ဖးဒိၣ်နာ်က့ ဘၣ်မနုၤအဃိ ပတဘၣ်ဆဲးသးဟးဂီၤ လၢပတၢ်ကမၣ် အဃိဘၣ်လဲၣ်.
၁၇ ပမၤကမၣ်ဘၣ်တၢ်ဖးဒိၣ် အဃိ ပသးတမုာ်ဘၣ် ဒီးပမ့ၢ်တူၢ်ဘၣ်လၢ ပတၢ်ကမၣ်အိၣ်ဒံးန့ၣ် ပကဘၣ် ကျဲးစၢးမၤလီၤမၢ်ကွံာ် တၢ်တူၢ်ဘၣ်တခါအံၤ. ဘၣ်ဆၣ် ပတဘၣ် “ဆဲးမၤ တၢ်ဒဲးဘးလၢ တၢ်သူၣ်အိၣ်သးအိၣ်အပူၤ” ဝံၤဒီးဆိမိၣ်လၢ ယဟိဝၤယွၤ ကပျၢ်ကွံာ် ပတၢ်ကမၣ် ခီဖျိ တၢ်ပှ့ၤက့ၤအဃိဘၣ်. (ဧ့ၤဘြံၤ ၁၀:၂၆-၃၁) ပမ့ၢ်ပီၢ်ယၢ်လီၤက့ၤသး နီၢ်ကီၢ်, တမၤတၢ်ဒဲးဘးလၢၤဘၣ် ဒီးဃ့တၢ်မၤစၢၤလၢ ယဟိဝၤယွၤ ဒီးတၢ်အိၣ်ဖှိၣ်သးပှၢ်အအိၣ်န့ၣ် ပနာ်သပှၢ်တၢၢ်လၢ ယဟိဝၤယွၤ ကပျၢ်ကွံာ် ပတၢ်ကမၣ် လၢာ်လၢာ်ဆ့ဆ့. (ယၡါယၤ ၅၅:၇; မၤတၢ် ၃:၁၉) ယ့ၣ်ၡူး တဲဘၣ် ပှၤဖၤရံၤၡဲတဖၣ်လၢ “ယဟဲကိးက့ၤ ပှၤတၢ်ဒဲးဘးဖိ, တမ့ၢ်ပှၤတီပှၤလိၤဘၣ်.” (မးသဲ ၉:၁၃) ပသ့ၣ်ညါဘၣ်လၢ ပတၢ်ကမၣ် မ့ၢ်အါထဲလဲၣ်နာ်က့ ခီဖျိလၢ တၢ်ပှ့ၤက့ၤအဃိ ယဟိဝၤယွၤ ကပျၢ်ကွံာ် ပတၢ်ကမၣ်ခဲလၢာ်.
နကအိၣ်မူဘၣ် လီၤထူလီၤယိာ် လၢဟီၣ်ခိၣ်ပၤရဒံစူးအပူၤ
၁၈. နမ့ၢ်ထံၣ်လိာ်သးဒီး ပှၤမၤကမၣ်တၢ် လၢအပီၢ်ယၢ်လီၤက့ၤသး လၢပှၤပျၤထီအီၤ ဖဲယ့ၣ်ၡူးကပၤန့ၣ် နဘၣ်သးကၠးအီၤ မနုၤလဲၣ်.
၁၈ ခဲအံၤ ထံၣ်တမှံကွၢ် လၢပၤရဒံစူးပူၤန့ၣ် နတဲသကီးတၢ်ဒီး ပှၤမၤကမၣ်တၢ် လၢအပီၢ်ယၢ်လီၤက့ၤသး လၢပှၤပျၤထီအီၤ ဖဲယ့ၣ်ၡူးကပၤ. ဘၣ်သ့ၣ်သ့ၣ် သုကတဲသကီး ဘၣ်ဃးဒီး သုပာ်လုၢ်ပာ်ပှ့ၤ ယ့ၣ်ၡူး အတၢ်ဟ့ၣ်လုၢ်ထီၣ်သး လၢသုဂီၢ်. ဒီးဘၣ်သ့ၣ်သ့ၣ် နကကၠးအီၤ ဘၣ်ဃးဒီး တၢ်လၢအကဲထီၣ်သး တချုးယ့ၣ်ၡူးသံဒံးဘၣ် ဒီးယ့ၣ်ၡူး အၢၣ်လီၤတၢ်ဒီးအီၤအဃိ အသးခုဧါ. မ့မ့ၢ်လၢအီၤဟီန့ၣ် ဘၣ်သ့ၣ်သ့ၣ် အကကၠးနၤ ဘၣ်ဃးဒီး တၢ်လၢနလဲၤခီဖျိဘၣ် လၢမုၢ်နံၤခံကတၢၢ် အဆၢကတီၢ်. ပမ့ၢ်မၤလိဘၣ် လံာ်စီဆှံဒီး ပှၤလၢအလီၤဂာ်ဒီး ပှၤမၤကမၣ်တၢ် လၢအပီၢ်ယၢ်လီၤက့ၤသး တဂၤအံၤဒု ကမုာ်ဖးဒိၣ်ညါ.—အ့းဖ့းစူး ၄:၂၂-၂၄.
ဖဲယ့ၣ်ၡူး ပၢတၢ်အနံၣ်တကထိ အဆၢကတီၢ်န့ၣ် ဒီပုၢ်ဝဲၢ်ခွါတဂၤ မၤဘၣ်ဝဲ တၢ်လၢအဘၣ်သး မၤဝဲ (ကွၢ်လံာ်အဆၢ ၁၉)
၁၉. ပမ့ၢ်အိၣ်ဘၣ်လၢ ပၤရဒံစူးပူၤန့ၣ် ဘၣ်မနုၤအဃိ တၢ်တကၢၣ်ပသးဘၣ်လဲၣ်. (ကွၢ်တၢ်ဂီၤလၢလံာ်ကုခိၣ်.)
၁၉ ပမ့ၢ်အိၣ်ဘၣ်လၢ ပၤရဒံစူးပူၤန့ၣ် ပကသးခုထီဘိ ဒီးတၢ်တကၢၣ်ပသး နီတဘျီဘၣ်. ပကထံၣ်လိာ်ဘၣ်သးဒီး ပှၤလၢပတထံၣ်ဘၣ် နီတဘျီဘၣ် ဒီးပကမၤဘၣ် တၢ်မၤလၢ အလီၤသးခု. တကးဒံးဘၣ် တနံၤဘၣ်တနံၤန့ၣ် ပကသ့ၣ်ညါ ယဟိဝၤယွၤအဂ့ၢ်အါထီၣ် ဒီးပကသးမံဒီး တၢ်ခဲလၢာ်လၢ ယဟိဝၤယွၤမၤန့ၢ်ပှၤ. ယဟိဝၤယွၤအဂ့ၢ်န့ၣ် ပမၤလိတလၢာ် နီတဘျီဘၣ် ဒီးအတၢ်ဘၣ်တ့အဂ့ၢ်စ့ၢ်ကီး ပကမၤလိဘၣ်ဒီဒူၣ်ဒံး. အဃိ ပအိၣ်မူဘၣ်မ့ၢ်ယံာ်န့ၣ် ပအဲၣ်ယဟိဝၤယွၤ ကဒိၣ်ထီၣ်မၣ်ဒိၣ်ထီၣ်. ယဟိဝၤယွၤ ဒီးယ့ၣ်ၡူး အၢၣ်လီၤပှၤလၢ ပကအိၣ်မူဘၣ် လီၤထူလီၤယိာ်လၢ ဟီၣ်ခိၣ်ပၤရဒံစူးပူၤအဃိ ပစံးဘျုးဘၣ်အဝဲသ့ၣ်ဖးဒိၣ်.
တၢ်သးဝံၣ် ၂၂ ဘီမုၢ်သူၣ်ထီၣ်အသးလံ—မ်အဟဲတက့ၢ်
a ခါဆူညါ လၢဟီၣ်ခိၣ်ပၤရဒံစူးအပူၤ နတၢ်အိၣ်မူ ကမၤသးဒ်လဲၣ်န့ၣ် နဆိမိၣ်အဂ့ၢ် မၢ်မၢ်ကၠ့ၤဧါ. ပမ့ၢ်ဆိမိၣ်ထီၣ် ဘၣ်ဃးဒီး တၢ်လၢ ယဟိဝၤယွၤ ကမၤန့ၢ်ပှၤ အဂ့ၢ်မၢ်မၢ်န့ၣ် ပကသးဆူၣ်လၢ ပကတဲပၠးပှၤဂၤ ဘၣ်ဃးဒီး ဟီၣ်ခိၣ်သီအဂ့ၢ်. တၢ်မၤလိတခါအံၤ ကမၤဂၢၢ်ကျၢၤထီၣ် ပတၢ်နာ်လၢ ယ့ၣ်ၡူးအတၢ်အၢၣ်လီၤ ဘၣ်ဃးဒီး ဟီၣ်ခိၣ်ပၤရဒံစူး အဂ့ၢ်.
b တၢ်ဂီၤ အခီပညီ – ဒီပုၢ်ဝဲၢ်ခွါတဂၤ ဘၣ်သးမၤလိ လံာ်စီဆှံဒီး ပှၤလၢအဂဲၤဆၢထၢၣ် သမူထီၣ်က့ၤ အဃိ ခဲအံၤ အမၤလိပှၤဂၤ လံာ်စီဆှံလံ.
