၁. “တၢ်သူၣ်မံသးမုာ်​လၢ အဟဲ​လၢ ကစၢ်ယွၤ​အအိၣ်” န့ၣ်အကဲ​မနုၤလဲၣ်. ပ​မ့ၢ်အိၣ်ဒီး တၢ်သူၣ်မံသးမုာ် တခါအံၤန့ၣ်​ က​မၤစၢၤ​ပှၤ​ဒ်လဲၣ်. (ဖံလံးပံၤ ၄:၆, ၇)

 “တၢ်သူၣ်မံသးမုာ်​လၢ အဟဲ​လၢ ကစၢ်ယွၤ​အအိၣ်” န့ၣ်​ဘၣ်သး​တဲဝဲ တၢ်သူၣ်မံသးမုာ်​လၢ ပ​န့ၢ်​ဘၣ်​အီၤ ခီဖျိ ပ​အိၣ်ဒီး​တၢ်ရ့လိာ်သး​ဒီး ပ​ပၢ်​အိၣ်လၢမူခိၣ်. ပ​မ့ၢ်အိၣ်ဒီး တၢ်သူၣ်မံသးမုာ်​တခါအံၤန့ၣ်​ လီၤဂာ်​ဒ်သိးဒီး ပအိၣ်ဘၣ်လၢ တၢ်ပူၤဖျဲးအလီၢ် ဒီး​ပ​တပျံၤတၢ်ဘၣ်. (ဖး ဖံလံးပံၤ ၄:၆, ၇.) တကးဒံးဘၣ်​ ပ​ရ့ဘၣ်ဒီး ပှၤလၢ အအဲၣ်​ကစၢ်ယွၤ ဒီး​ပ​ကဲထီၣ်ဘၣ်​ “ကစၢ်ယွၤ​လၢ အဟ့ၣ်လီၤ တၢ်သူၣ်မံသးမုာ်” တဂၤန့ၣ်​ အသကီး. (၁ သ့းစၤလနံ ၅:၂၃) ပ​မ့ၢ်​သ့ၣ်ညါထီၣ်​ ယဟိဝၤယွၤ, နာ်န့ၢ်​အီၤ ဒီး​ကနၣ်​အကလုၢ်န့ၣ်​ ဖဲ​ပ​ထံၣ်ဘၣ်​ တၢ်ကီတၢ်ခဲ​အခါ တၢ်သူၣ်မံသးမုာ်​လၢ အဟဲ​လၢ ကစၢ်ယွၤ​အအိၣ်န့ၣ်​ က​မၤစၢၤ​ပှၤ ဒ်သိးဒီး ပ​က​ပာ်ပသး​မုာ်မုာ်. မ့မ့ၢ် ပှၤတၢ်ချၢတဖၣ်န့ၣ်​ တန့ၢ်ဘၣ်​ တၢ်သူၣ်မံသးမုာ်​တခါအံၤ​ဘၣ်.

၂. ဘၣ်မနုၤအဃိ ပ​နာ်​လၢ ပ​န့ၢ်ဘၣ်​ တၢ်သူၣ်မံသးမုာ်​လၢ အဟဲ​လၢ ကစၢ်ယွၤ​အအိၣ်လဲၣ်.

^၂ ဖဲ​ပ​ထံၣ်ဘၣ်​ တၢ်ဆါ​ရၤလီၤသး, န့ဆၢၣ်​တၢ်ဘၣ်ဒိဘၣ်ထံး, ထံကီၢ်​တၢ်အိၣ်သး တဂၢၢ်တကျၢၤ ဒီး​တၢ်မၤအၢမၤနး​အခါ ပ​အိၣ်ဒီး တၢ်သူၣ်မံသးမုာ်​လၢ အဟဲ​လၢ ကစၢ်ယွၤ​အအိၣ်​ ကသ့ဧါ. ခီဖျိလၢ တၢ်ကီတၢ်ခဲတဖၣ်အံၤ အဃိ ပ​ဘၣ်ယိၣ်တၢ်. နာ်က့ ယ့ၣ်ၡူး ဟ့ၣ်ကူၣ်ဝဲလၢ “တဘၣ်​ သူၣ်ကိၢ်သးဂီၤတၢ်​တဂ့ၤ ဒီး​တဘၣ်ပျဲ သု​သး​က​လီၤစၢ်​လၢ တၢ်ပျံၤတၢ်ဖုး အဃိ​တဂ့ၤ.” (ယိၤဟၣ်​ ၁၄:၂၇) ဒီပုၢ်ဝဲၢ်မုၣ်ခွါတဖၣ်​ မၤထွဲဝဲ ယ့ၣ်ၡူး အတၢ်ဟ့ၣ်ကူၣ်အံၤ​အဃိ ပ​သးခုညါ. တကးဒံးဘၣ်​ ခီဖျိလၢ ယဟိဝၤယွၤ အတၢ်မၤစၢၤ​အဃိ အဝဲသ့ၣ်​ထံၣ်ဘၣ်​ တၢ်မၤကွၢ်​နာ်က့ အဝဲသ့ၣ်​ ပာ်အသး​မုာ်မုာ် ဒီး​လဲၤခီဖျိ တၢ်မၤကွၢ်​န့ၢ်ဝဲ.

၃. ခီဖျိလၢ တၢ်ဆါသံသတြိာ် ဒီး​တၢ်ဆါ​ရၤလီၤသး​အဃိ အမၤဘၣ်ဒိ ပှၤအါဂၤ​ဒ်လဲၣ်.

^၃ ခီဖျိလၢ တၢ်ဆါသံသတြိာ် ဒီး​တၢ်ဆါ​ရၤလီၤသး​အဃိ ပှၤ​အါတက့ၢ် အတၢ်အိၣ်မူ  ဆီတလဲသး. အဒိ ဖဲ​ခိၤရိၤနၤ (COVID-19) တၢ်ဆါ​ရၤလီၤသး​ခါန့ၣ်​ အမၤဘၣ်ဒိ​တၢ်​အါမး. ပှၤ​ဃုသ့ၣ်ညါ​တၢ်​တဒူၣ်​ ပာ်ဖျါထီၣ်​ဝဲ​လၢ ဖဲ​ခိၤရိၤနၤ တၢ်ဆါ​ရၤလီၤသး​ခါန့ၣ်​ ပှၤအါဂၤ​မံ​တန့ၢ်ဘၣ်, ပှၤ​ဘၣ်ယိၣ်တၢ်, ပှၤ​သးဟးဂီၤ, ပှၤ​အီသံး ဒီး​ပှၤ​သူ​ကသံၣ်မူၤဘှီး အါထီၣ်. တကးဒံးဘၣ်​ ပှၤ​မၤဆူၣ်မၤစိးတၢ် ဒီး​ပှၤ​မၤသံလီၤနီၢ်ကစၢ်သး အါထီၣ်မၣ်​အါထီၣ်. လၢ​န​အိၣ်တၢ်လီၢ် တၢ်ဆါ​မ့ၢ်​ရၤလီၤသး​န့ၣ်​ ဒ်သိး​န​တသးကိၢ်တၢ် အါတလၢ​တဂ့ၤ ဒီး​န​က​အိၣ်ဒီး တၢ်သူၣ်မံသးမုာ်​လၢ အဟဲ​လၢ ကစၢ်ယွၤ​အအိၣ်​အဂီၢ် န​က​ဘၣ်​မၤ​ဒ်လဲၣ်.

၄. တၢ်လၢ​ယ့ၣ်ၡူး တဲပာ်စၢၤဝဲ ဘၣ်ဃးဒီး ခါဆူညါန့ၣ်​ မၤစၢၤ​ပှၤလၢ ပ​က​ပာ်ပသး မုာ်မုာ်​ဒ်လဲၣ်.

^၄ ယ့ၣ်ၡူး တဲဆိပာ်စၢၤဝဲလၢ ဖဲ​မုၢ်နံၤခံကတၢၢ် အဆၢကတီၢ်န့ၣ်​ တၢ်ဆါ​ကရၤ​လီၤ​သး ဒီး​တၢ်ဆါသံသတြိာ် က​ကဲထီၣ်သး​လၢ “တၢ်လီၢ်​တတီၤ ဝံၤတတီၤ.” (လူၤကၣ်​ ၂၁:၁၁) ခီဖျိလၢ ပ​သ့ၣ်ညါပာ်စၢၤ​လၢ တၢ်​က​ကဲထီၣ်သး ဒ်အံၤ​အဃိ ပ​တဖုး​ဘၣ်​ပသးဘၣ်. ပ​သ့ၣ်ညါ​လၢ တၢ်ဆါ​ရၤလီၤသးန့ၣ်​ ဟဲ​ကဲထီၣ်သး ဒ်သိးဒီး ယ့ၣ်ၡူး တဲပာ်စၢၤဝဲ. ဒီး​ပ​အိၣ်မူ​ဘၣ်​လၢ မုၢ်နံၤခံကတၢၢ်​အဃိ ပ​က​ဘၣ်​မၤထွဲ ယ့ၣ်ၡူး အတၢ်ဟ့ၣ်ကူၣ်​လၢ အတဲဝဲလၢ “ပျံၤတၢ်​တဂ့ၤ.”—မးသဲ ၂၄:၆.

၅. (က) ဖဲ​တၢ်ဆါ​ရၤလီၤသး​ခါန့ၣ်​ ပ​ကဘၣ်​ ဃ့ထုကဖၣ်​လၢ တၢ်ဂ့ၢ်​မနုၤအဂီၢ်လဲၣ်. (ဖံလံးပံၤ ၄:၈, ၉) (ခ) ပ​မ့ၢ်​ကနၣ်​ လံာ်စီဆှံ​လၢ ပှၤသွီဃာ်​လၢ​တၢ်ကလုၢ်န့ၣ်​ က​ကဲဘျုး​ဒ်လဲၣ်.

^၅ တၢ်ဆါ​ရၤလီၤသး​အဃိ ပှၤအါဂၤန့ၣ်​ ဘၣ်ယိၣ်တၢ်​အါတလၢ ဒီး​ပျံၤတၢ်. ဒီပုၢ်ဝဲၢ်မုၣ်​ဒဲစံၤ တူၢ်ဘၣ်​ဝဲ​ဒ်န့ၣ်. b ဖဲ​အတံ, အတခွါ ဒီး​ကသံၣ်သရၣ်​ သံ​လၢ ခိၤရိၤနၤ​တၢ်ဆါ ဝံၤအလီၢ်ခံန့ၣ်​ အဘၣ်ယိၣ်​ဝဲ​လၢ ခိၤရိၤနၤ​တၢ်ဆါ ကကူ​အီၤ ဒီး​ကကူ​ဃုာ်ဒီး​အမိ. ဒီး​ခီဖျိလၢ တၢ်ဆါ​ရၤလီၤသး​အဃိ အဘၣ်ယိၣ်​ဝဲ​လၢ အတၢ်မၤ​တအိၣ်လၢၤဘၣ်​ ဒီး​အပှ့ၤ​တၢ်အီၣ်​ ဒီး​ဟ့ၣ်​ဟံၣ်လဲ တန့ၢ်လၢၤဘၣ်. အဘၣ်ယိၣ်တၢ် ဒ်န့ၣ်​အဃိ လၢ​မုၢ်နၤခီန့ၣ်​ အမံ​မၣ်တန့ၢ်ဘၣ်. ဘၣ်ဆၣ်​ လၢခံန့ၣ်​ အပာ်က့ၤအသး​မုာ်မုာ်. အမၤ​ဝဲ​ဒ်လဲၣ်. အဃ့ ယဟိဝၤယွၤ တၢ်မၤစၢၤ​လၢ က​ပာ်အသး​မုာ်မုာ် ဒီး​က​အိၣ်ဒီး တၢ်ထံၣ်လၢအဂ့ၤ. (ဖး ဖံလံးပံၤ ၄:၈, ၉.) အကနၣ်​ ယဟိဝၤယွၤ​အ “ကလုၢ်” ခီဖျိ အကနၣ်ဝဲ လံာ်စီဆှံ​လၢ ပှၤသွီဃာ်​လၢ​တၢ်ကလုၢ်. အတဲဝဲလၢ “ပှၤဖးလံာ်စီဆှံဖိ အကလုၢ်န့ၣ်​ မၤမုာ်ထီၣ်​ယ​သး ဒီး​ယ​သ့ၣ်ညါ​လၢ ယဟိဝၤယွၤ သးအိၣ်​ယၤ.”—စံးထီၣ်ပတြၢၤ ၉၄:၁၉.

၆. ပ​မ့ၢ်​မၤ နီၢ်ကစၢ်​တၢ်မၤလိ​လံာ်စီဆှံ ဒီးထီၣ်​တၢ်အိၣ်ဖှိၣ်​ ထီဘိန့ၣ်​ က​ကဲဘျုး​ဒ်လဲၣ်.

^၆ ဖဲ​တၢ်ဆါ​ရၤလီၤသး အဆၢကတီၢ် ပ​က​မၤတၢ် ဒ်သိးဒီး ပ​မၤ​အီၤ​လၢညါန့ၣ်​ တသ့​ခဲလၢာ်ဘၣ်. ဘၣ်ဆၣ်​ ပ​က​ဘၣ်​မၤ နီၢ်ကစၢ်​တၢ်မၤလိ​လံာ်စီဆှံ ဒီးထီၣ်​တၢ်အိၣ်ဖှိၣ်​ ထီဘိ. ဒီပုၢ်ဝဲၢ်မုၣ်ခွါတဖၣ်​ အတၢ်လဲၤခီဖျိ လၢအအိၣ်လၢ လံာ်လဲၢ်​ဒီး​တၢ်ဂီၤမူ​ပူၤန့ၣ်​ ပာ်ဖျါထီၣ်​ဝဲ​လၢ အဝဲသ့ၣ်​ထံၣ်ဘၣ်​ တၢ်ကီတၢ်ခဲ နာ်က့ အဝဲသ့ၣ်​ ဆဲး​အိၣ်ဒီး တၢ်သးတီ. (၁ ပ့းတရူး ၅:၉) တကးဒံးဘၣ်​ ပ​မ့ၢ်​ထီၣ်​တၢ်အိၣ်ဖှိၣ်န့ၣ်​ ပ​ကန့ၢ်ဘၣ်​ တၢ်ဂံၢ်တၢ်ဘါ​လၢ လံာ်စီဆှံ​ပူၤ. ပ​ကန့ၢ်ဘၣ်​ တၢ်ခွဲးတၢ်ယာ်​လၢ ပ​က​ဟ့ၣ်ဂံၢ်ဟ့ၣ်ဘါ​ပှၤဂၤ ဒီး​ပ​ကန့ၢ်ဘၣ်​ တၢ်ဂံၢ်တၢ်ဘါ​လၢ ပှၤဂၤ​အအိၣ်. (ရိမ့ၤ ၁:၁၁, ၁၂) ပှၤလၢ အဘူၣ်ထီၣ်ဘါထီၣ်​ ယဟိဝၤယွၤ လၢ​အတူၢ်ဘၣ်​ တၢ်ဆူးတၢ်ဆါ,  အပျံၤတၢ် ဒီး​အိၣ်သယုၢ်​ထဲတဂၤန့ၣ်​ ယဟိဝၤယွၤ မၤစၢၤ​အဝဲသ့ၣ်. အဃိ ပ​မ့ၢ်​ဆိမိၣ်ထံ အဝဲသ့ၣ်​အဂ့ၢ်န့ၣ်​ ပ​တၢ်နာ် က​ဂၢၢ်ကျၢၤထီၣ်​ ဒီး​ပ​က​နာ်​သပှၢ်တၢၢ်​လၢ ယဟိဝၤယွၤ က​မၤစၢၤ​ပှၤ.

၇. လၢ​တၢ်မၢဖိ​ယိၤဟၣ်​ အအိၣ်န့ၣ်​ န​န့ၢ်ဘၣ်​ တၢ်မၤလိ​ဒ်လဲၣ်.

^၇ ပ​က​ဘၣ်​ကျဲးစၢး ရ့လိာ်သး​ဒီး​တဲသကီးတၢ်ဒီး ပ​ဒီပုၢ်ဝဲၢ်မုၣ်ခွါတဖၣ်. ခီဖျိလၢ တၢ်ဆါ​ရၤလီၤသး​အဃိ ပ​အိၣ်​တၢ်လီၢ် ဘူးလိာ်သး​နာ်က့ ပ​လဲၤ​အိၣ်သကီးလိာ်သး တသ့ဘၣ်. အဒိ တၢ်မၢဖိ​ယိၤဟၣ်​န့ၣ်​ အဘၣ်သး ထံၣ်လိာ်သးဒီး အသကီး စီၤကါယူး. (၃ ယိၤဟၣ်​ ၁၃, ၁၄) ဘၣ်ဆၣ်​ အသ့ၣ်ညါ​ဝဲ​လၢ အထံၣ်လိာ်သး​ဒီး စီၤကါယူး တသ့​ဒံး​ဘၣ်​အဃိ အကွဲး​အိၣ်သကီး​စီၤကါယူး. ပဝဲစ့ၢ်ကီး တဘျီတခီၣ်န့ၣ်​ ပ​က​တူၢ်ဘၣ်​ ဒ်သိးဒီး တၢ်မၢဖိ​ယိၤဟၣ်. ပ​လဲၤဟး​အိၣ်သကီး ဒီပုၢ်ဝဲၢ်မုၣ်ခွါတဖၣ်​ မ့ၢ်​တသ့​ထီဘိ​ဘၣ်နာ်က့ ပ​ဆဲး​အိၣ်သကီး အဝဲသ့ၣ်​လၢ လီတဲစိ, ကီး​အဝဲသ့ၣ်​လၢ တၢ်ဂီၤမူ (video calls) ဒီး​ကွဲး​အိၣ်သကီး အဝဲသ့ၣ်​သ့. ပ​မ့ၢ်​ရ့ဒီး ဒီပုၢ်ဝဲၢ်မုၣ်ခွါတဖၣ်​ ဒ်အံၤ​ထီဘိန့ၣ်​ ပ​တၢ်ဘၣ်ယိၣ်​က​စှၤလီၤ, ပ​တတူၢ်​ဘၣ်​လၢ ပ​အိၣ်​ထဲတဂၤဘၣ်​ ဒီး​ပ​ပာ်က့ၤပသး မုာ်မုာ်​သ့. ပ​မ့ၢ်​ဘၣ်ယိၣ်တၢ် အါတလၢန့ၣ်​ ပ​က​ဘၣ်​တဲပၠး တၢ်အိၣ်ဖှိၣ်သးပှၢ် ဒီး​တူၢ်လိာ်​အဝဲသ့ၣ်​ တၢ်ဟ့ၣ်ဂံၢ်ဟ့ၣ်ဘါ.—ယၡါယၤ ၃၂:၁, ၂.

၈. န့ဆၢၣ်​တၢ်ဘၣ်ဒိဘၣ်ထံးန့ၣ်​ မၤလီၤမၢ်ကွံာ် န​တၢ်သူၣ်မံသးမုာ်​သ့​ဒ်လဲၣ်.

^၈ လၢညါ န​မ့ၢ်​ထံၣ်ဘၣ်​ န့ဆၢၣ်​တၢ်ဘၣ်ဒိဘၣ်ထံး ဒ်သိးဒီး ထံဒိၣ်ထီၣ်, ဟီၣ်ခိၣ်ဟူး, မ့ၣ်အူအီၣ်တၢ်​န့ၣ်​ ဘၣ်သ့ၣ်သ့ၣ်​ န​က​သးကိၢ်တၢ် ဒီး​န​တၢ်သးကိၢ် က​အိၣ်တီၢ် ဖၣ်ယံာ်ညါ. ဒီး​ခီဖျိလၢ တၢ်ကဲထီၣ်သး ဒ်န့ၣ်​အဃိ ပှၤလၢ​န​အဲၣ်​တဂၤဂၤ မ့ၢ်​သံသဒၣ်ကွံာ်​နၤ မ့တမ့ၢ် န​ဟံၣ်​ဒီး​န​တၢ်ဖိတၢ်လံၤ မ့ၢ်​ဟးဂီၤကွံာ်န့ၣ်​ န​က​သးအုး, န​မၤတၢ်​တ​ဘၣ်​နီမံၤလၢၤဘၣ်​ ဒီး​ဘၣ်သ့ၣ်သ့ၣ်​ န​က​ပှံၢ်ထီၣ်တၢ်ဒံး. န​မ့ၢ်​တူၢ်ဘၣ်​ ဒ်န့ၣ်​နာ်က့ န​တကဲ​ပှၤလၢ အအဲၣ်​တၢ်ထူးတၢ်တီၤ​ဘၣ်​ ဒီး​န​တၢ်နာ်​အိၣ်ဒံး. န​ထံၣ်​ဘၣ်​တၢ်ကီတၢ်ခဲ​လံ ဒီး​ပှၤတနီၤန့ၣ်​ က​တဲဟးဂီၤ​နသးဒံး. (ယိၤဘး ၁:၁၁) န​မ့ၢ်​ထံၣ်ဘၣ်​ တၢ်ကီတၢ်ခဲ ဒ်အံၤ​နာ်က့ န​ပာ်​န​သး မုာ်မုာ်ခုၣ်ခုၣ်​ သ့ဒံးဧါ.

၉. ယ့ၣ်ၡူး​တဲပာ်စၢၤဝဲ ဘၣ်ဃးဒီး န့ဆၢၣ်​တၢ်ဘၣ်ဒိဘၣ်ထံး အဃိ ကဲထီၣ်​တၢ်မၤစၢၤ လၢပဂီၢ်​ဒ်လဲၣ်.

^၉ ယ့ၣ်ၡူး တဲပာ်စၢၤဝဲလၢ “ဟီၣ်ခိၣ်​ က​ဟူး​ဝဲ​ဖးဒိၣ်” ဒီး​န့ဆၢၣ်​တၢ်ဘၣ်ဒိဘၣ်ထံး လၢအနးတဖၣ်​ က​ဟဲ​ကဲထီၣ်ဝဲ. ပှၤတၢ်ချၢ​တနီၤန့ၣ်​ ဆိမိၣ်​ဝဲ​လၢ န့ဆၢၣ်​တၢ်ဘၣ်ဒိဘၣ်ထံး တဟဲ​ဘၣ်​အဝဲသ့ၣ်​ဘၣ်. မ့မ့ၢ်​ပှၤန့ၣ်​ ပ​သ့ၣ်ညါ​လၢ ပစိၤ​ခဲအံၤ န့ဆၢၣ်​တၢ်ဘၣ်ဒိဘၣ်ထံး က​ဟဲ​အါထီၣ်​ ဒီး​ပထံၣ်ဘၣ်လၢ ပ​နီၢ်ကစၢ်​လံ. (လူၤကၣ်​ ၂၁:၁၁) တကးဒံးဘၣ်​ ယ့ၣ်ၡူး တဲပာ်စၢၤဝဲလၢ “တၢ်အၢတၢ်သီ က​အိၣ်​အါထီၣ်ဝဲ.” အဃိ ပ​ထံၣ်ဘၣ်​ တၢ်အၢတၢ်သီ, တၢ်မၤဆူၣ်မၤစိး ဒီး​တၢ်​မၤတၢထီၣ်တၢလီၤတၢ်. (မးသဲ ၂၄:၁၂) ယဟိဝၤယွၤ အခ့အပှၤ​လၢ အသးတီတဖၣ်​စ့ၢ်ကီး ထံၣ်ဘၣ်ဝဲ တၢ်ကီတၢ်ခဲ. အဃိ ပ​မ့ၢ်​ထံၣ်ဘၣ်​ တၢ်ကီတၢ်ခဲန့ၣ်​ မ့ၢ်​ယ့ၣ်ၡူး ဘၣ်သး​တဲဝဲလၢ ယဟိဝၤယွၤ ပာ်တ့ၢ်ကွံာ်​ပှၤလံဧါ. ယ့ၣ်ၡူး တဘၣ်သး တဲ​ဝဲ​ဒ်န့ၣ်ဘၣ်. (ယၡါယၤ ၅၇:၁; ၂ ကရံၣ်သူး ၁၁:၂၅) ဆၢကတီၢ်​ခဲအံၤ ပ​မ့ၢ်​ထံၣ်ဘၣ်​ တၢ်ကီတၢ်ခဲန့ၣ်​ ယဟိဝၤယွၤ တမၤ​တၢ်လီၤလး လၢ​က​မၤပူၤဖျဲး​ပှၤ​ဘၣ်. ဘၣ်ဆၣ်​ အဝဲ​က​ဟ့ၣ်ပှၤ တၢ်လၢပလိၣ်ဘၣ်​ ဒ်သိးဒီး ပ​က​ပာ်ပသး​မုာ်မုာ်.

၁၀. ပ​မ့ၢ်​အိၣ်ကတီၤပာ်စၢၤသး​လၢ န့ဆၢၣ်​တၢ်ဘၣ်ဒိဘၣ်ထံး​အဂီၢ်န့ၣ်​ ဘၣ်မနုၤအဃိ ပတဲလၢ ပ​အိၣ်ဒီး​တၢ်နာ်​လဲၣ်. (ကတိၤဒိ ၂၂:၃)

^၁၀ ပ​မ့ၢ်​အိၣ်ကတီၤပာ်စၢၤသး​န့ၣ်​ ဖဲ​တၢ်ကဲထီၣ်သး သတူၢ်ကလာ်​အခါ ပ​တဘၣ်ယိၣ်တၢ် အါတလၢဘၣ်​ ဒီး​ပ​က​ပာ်ပသး​မုာ်မုာ်. လံာ်စီဆှံ ဟ့ၣ်ကူၣ်​ပှၤလၢ တချုးလၢ န့ဆၢၣ်​တၢ်ဘၣ်ဒိဘၣ်ထံး ကဲထီၣ်​ဒံးဘၣ်န့ၣ်​ ပ​ကဘၣ်​ အိၣ်ကတီၤပာ်စၢၤသး. (ဖး ကတိၤဒိ ၂၂:၃.) အဃိ ပ​အိၣ်​ကတီၤ​ပာ်စၢၤ​ပ​သး ဒီး​ပ​နာ်​သပှၢ်တၢၢ်​လၢ ယဟိဝၤယွၤ က​ကွၢ်ထွဲ​ပှၤ. တကးဒံးဘၣ်​ ကစၢ်ယွၤ အတၢ်ကရၢကရိ ဟ့ၣ်ပလီၢ်​ပှၤလၢ ပ​ကဘၣ်​ အိၣ်ကတီၤပာ်စၢၤသး​လၢ တၢ်ကဲထီၣ်သး သတူၢ်ကလာ်​အဂီၢ် မၢ်မၢ်​လီၤ. c ပ​န့ၢ်ဘၣ်​ တၢ်ဟ့ၣ်ပလီၢ်​ခီဖျိ တၢ်ကရၢကရိ လံာ်လဲၢ်တဖၣ်, တၢ်အိၣ်ဖှိၣ်​ ဒီး​တၢ်ဘိးဘၣ်သ့ၣ်ညါ. အဃိ ခဲအံၤ​ပ​မ့ၢ်​မၤထွဲ တၢ်ကရၢကရိ အတၢ်ဟ့ၣ်ကူၣ်​ တချုးလၢ န့ဆၢၣ်​တၢ်ဘၣ်ဒိဘၣ်ထံး ကဲထီၣ်​ဒံးဘၣ်န့ၣ်​ ပ​ပာ်ဖျါထီၣ်​လၢ ပ​နာ်န့ၢ် ယဟိဝၤယွၤ.

၁၁. လၢ​ဒီပုၢ်ဝဲၢ်မုၣ်​မါကြဲၣ်​ အအိၣ်န့ၣ်​ ပ​န့ၢ်ဘၣ်​ တၢ်မၤလိ​ဒ်လဲၣ်.

 ^၁၁ ပ​က​ကွၢ်သကီး ဒီပုၢ်ဝဲၢ်မုၣ်​မါကြဲၣ်​ အတၢ်လဲၤခီဖျိ. လၢ​ဒီပုၢ်ဝဲၢ်မုၣ်​မါကြဲၣ်​ အိၣ်တၢ်လီၢ်န့ၣ်​ မ့ၣ်အူအီၣ်ပှၢ်​အဃိ ပှၤဘၣ်မူဘၣ်ဒါ မၢ​ပှၤ​ဟးထီၣ်ကွံာ် လၢ​တၢ်လီၢ်​ဖဲန့ၣ်. ပှၤအါဂၤန့ၣ်​ ကျဲးစၢး​ဃ့ၢ်ပူၤဖျဲးသး တဘျီဃီ​အဃိ ကျဲ​ကတံာ်. ဒီး​ခီဖျိလၢ မ့ၣ်အူခုၣ်​အါမး​အဃိ ဒီပုၢ်ဝဲၢ်မုၣ်​မါကြဲၣ်​ ​ဘၣ်​အိၣ်​ဝဲ​လၢ​အကါပူၤ တစိၢ်ဖိညါ. နာ်က့ ဒီပုၢ်ဝဲၢ်မုၣ်​မါကြဲၣ်​ အိၣ်ကတီၤပာ်စၢၤသး ဒီး​လၢ​အကါပူၤန့ၣ်​ အပာ်ဃာ်ဝဲ ဟီၣ်ခိၣ်ဂီၤ လၢ​က​မၤစၢၤအီၤ ဒ်သိးဒီး က​ထံၣ်န့ၢ်ဝဲ ကျဲ​အဂၤ​တဘိ​လၢ အက​ဃ့ၢ်ပူၤဖျဲး​အသး. ဒီး​လၢအပူၤကွံာ်န့ၣ်​ အလဲၤ​နီ​ဆိ​ကွၢ်ဝဲ ကျဲတဘိအံၤ​လံ​အဃိ ဖဲ​တၢ်ကဲထီၣ်သး​ခါန့ၣ်​ ဒီပုၢ်ဝဲၢ်မုၣ်​မါကြဲၣ်​ လဲၤ​တုၤ​ဝဲ​လၢ ပှၤ​ဃ့ၢ်ပူၤဖျဲးသး​အလီၢ်​ဂ့ၤဂ့ၤ. ဒီပုၢ်ဝဲၢ်မုၣ်​မါကြဲၣ်​ အိၣ်ကတီၤပာ်စၢၤသး အဃိ အပူၤဖျဲး ဒီး​ပ​သးခုစၢၤ​အီၤ​ညါ.

၁၂. ဘၣ်မနုၤအဃိ ပ​ဘၣ်​မၤထွဲ တၢ်ဟံးစုနဲၣ်ကျဲ​လဲၣ်.

^၁၂ ပှၤဘၣ်မူဘၣ်ဒါ​တဖၣ်န့ၣ်​ ဒ်သိးဒီး က​ဒီသဒၢ​ပှၤလၢ န့ဆၢၣ်​တၢ်ဘၣ်ဒိဘၣ်ထံး အဂီၢ်​အဝဲသ့ၣ်​ က​မၢ​ပ​အိၣ်လၢ​ဟံၣ်, က​မၢ​ပ​လဲၤ​လၢ ပှၤ​ဃ့ၢ်ပူၤဖျဲးသး​အလီၢ် မ့တမ့ၢ် က​မၢ​ပ​မၤတၢ်လၢ အဂၤ​တမံၤမံၤ. ဘၣ်ဆၣ်​ ပှၤတနီၤန့ၣ်​ ဘၣ်သ့ၣ်သ့ၣ်​ အဝဲသ့ၣ်​လီကီဝဲ အတၢ်ဖိတၢ်လံၤ​အဃိ က​ထုးယံာ်အသး ဒီး​တကနၣ်​ တၢ်သိၣ်တၢ်သီ တဘျီဃီဘၣ်. မ့မ့ၢ်​ပှၤန့ၣ်​ ပ​က​ဘၣ်​မၤ​ဒ်လဲၣ်. လံာ်စီဆှံ​တဲဝဲ “လၢ​ကစၢ်​အဃိ ဒိးပၢ​သု​သး​လၢ တၢ်စိတၢ်ကမီၤ​လၢ ပှၤဟီၣ်ခိၣ်ဖိ ဒုးအိၣ်ထီၣ်​ဝဲ​ခဲလၢာ် အဖီလာ်​တက့ၢ်. စီၤပၤ​လၢအမ့ၢ် ပှၤလၢ​အဒိၣ်န့ၢ်ဒံး​သု ဒီး​ပဒိၣ်​ဖးဒိၣ်တဖၣ်​ လၢအမ့ၢ် ပှၤလၢ​စီၤပၤ​ဆှၢလီၤဝဲ . . . န့ၣ်​ ဒိးပၢ​သု​သး​လၢ အဝဲသ့ၣ်​ အဖီလာ်​တက့ၢ်.” (၁ ပ့းတရူး ၂:၁၃, ၁၄) ကစၢ်ယွၤ အတၢ်ကရၢကရိ​စ့ၢ်ကီး ဟ့ၣ်ပှၤ တၢ်ဟံးစုနဲၣ်ကျဲ ဒ်သိးဒီး ပ​က​ပူၤဖျဲး ဒီး​ပ​က​ဒီသဒၢလီၤသး. တကးဒံးဘၣ်​ အဟ့ၣ်ကူၣ်ပှၤ​လၢ ပ​က​ဟ့ၣ်​ ပ​လီတဲစိ​နီၣ်ဂံၢ်, ပ​အိၣ်တၢ်လီၢ် ဒီး​ပဂ့ၢ်ပကျိၤ လၢ​တၢ်အိၣ်ဖှိၣ်သးပှၢ်​အအိၣ်. အဃိ န​မၤ​ဒ်န့ၣ်​ ဝံၤလံဧါ. ဘၣ်သ့ၣ်သ့ၣ်​ ပ​ကန့ၢ်ဘၣ်​ တၢ်ဟံးစုနဲၣ်ကျဲ​လၢ ပ​ကဘၣ်​ လဲၤ​ဃ့ၢ်ပူၤဖျဲးသး ဖဲလဲၣ်, ပ​က​ဘၣ်​လဲၤ​ဟံန့ၢ် တၢ်ဖိတၢ်လံၤ လၢ​ပ​လိၣ်ဘၣ်တဖၣ်​ဖဲလဲၣ်, ပ​ကဘၣ်​ မၤစၢၤ​ပှၤဂၤ​ဒ်လဲၣ်​ ဒီး​မၤစၢၤ​ပှၤဂၤ လၢအခါ​ဖဲလဲၣ်. တၢ်အိၣ်ဖှိၣ်သးပှၢ်​တဖၣ်န့ၣ်​ အိၣ်ဒီး​မူဒါ​လၢ က​ကွၢ်ထွဲ​ပှၤ​ထီဘိ. အဃိ ပ​မ့ၢ်​တမၤထွဲ တၢ်ဟံးစုနဲၣ်ကျဲ​ဘၣ်န့ၣ်​ တၢ်လီၤဘၣ်ယိၣ်​ က​အိၣ်ထီၣ်​လၢ ပ​သးသမူ​အဂီၢ် ဒီး​တၢ်အိၣ်ဖှိၣ်သးပှၢ် အဂီၢ်​စ့ၢ်ကီး. (ဧ့ၤဘြံၤ ၁၃:၁၇) ဒီပုၢ်ဝဲၢ်မုၣ်​မါကြဲၣ်​ တဲဝဲလၢ “ခီဖျိလၢ ယ​မၤထွဲ တၢ်အိၣ်ဖှိၣ်သးပှၢ်တဖၣ်​ အတၢ်ဟံးစုနဲၣ်ကျဲ အဃိ ယ​ပူၤဖျဲး.”

၁၃. ဒီပုၢ်ဝဲၢ်မုၣ်ခွါ​အါဂၤ​လၢ အ​ဘၣ်​ပာ်တီၢ်ကွံာ် အဟံၣ်န့ၣ်​ အဝဲသ့ၣ်​ က​ဆဲး​အိၣ်ဒီး တၢ်သးခု ဒီး​တၢ်သူၣ်မံသးမုာ်​အဂီၢ် တၢ်မနုၤ​မၤစၢၤ အဝဲသ့ၣ်​လဲၣ်.

^၁၃ ဒီပုၢ်ဝဲၢ်မုၣ်ခွါ​အါဂၤ ထံၣ်ဘၣ်​ န့ဆၢၣ်​တၢ်ဘၣ်ဒိဘၣ်ထံး, တၢ်ဒုးတၢ်ယၤ ဒီး​ထံကီၢ်​တၢ်အိၣ်သး တဂၢၢ်တကျၢၤ​အဃိ အဝဲသ့ၣ်​ ​ဘၣ်​ပာ်တီၢ်ကွံာ်​အဟံၣ်. ဘၣ်ဆၣ်​ အဝဲသ့ၣ်​ မၤညီနုၢ်ထီၣ်သး​လၢ တၢ်အိၣ်သး​အသီ ဒီး​ဆဲးမၤဝဲ နီၢ်သး​တၢ်ဖံးတၢ်မၤ. အဝဲသ့ၣ်​  မၤ​ဝဲ​ဒ်သိးဒီး ခရံာ်ဖိ လၢညါတဖၣ်​မၤဝဲ. ခရံာ်ဖိ လၢညါတဖၣ်န့ၣ်​ ပှၤ​မၤအၢမၤနး​အဝဲသ့ၣ်​အဃိ အဝဲသ့ၣ်​ လီၤပြံလီၤပြါ​နာ်က့ အဝဲသ့ၣ်​ “စံၣ်တဲၤတဲလီၤ တၢ်သးခုကစီၣ်” ဒံး. (မၤတၢ် ၈:၄) တၢ်စံၣ်တဲၤတဲ​လီၤ​တၢ်မၤန့ၣ်​ မၤစၢၤ ဒီပုၢ်ဝဲၢ်မုၣ်ခွါတဖၣ်​ ဒ်သိး အဝဲသ့ၣ်​ တသးစၢၢ်ဆၢ​ထဲ အကစၢ်​တၢ်ကီတၢ်ခဲ အါတလၢ​တဂ့ၤ ဒီး​အဝဲသ့ၣ်​ က​သးစၢၢ်ဆၢ​ဝဲ​လၢ ကစၢ်ယွၤအဘီမုၢ်. အဃိ အဝဲသ့ၣ်​ဆဲး​အိၣ်ဒီး တၢ်သးခု ဒီး​တၢ်သူၣ်မံသးမုာ်.

၁၄. ပှၤ​မ့ၢ်​မၤအၢမၤနး​ပှၤန့ၣ်​ ဘၣ်သ့ၣ်သ့ၣ်​ ပ​က​တူၢ်​ဘၣ်​ဒ်လဲၣ်.

^၁၄ ပှၤ​မ့ၢ်​မၤအၢမၤနး​ပှၤန့ၣ်​ ဘၣ်သ့ၣ်သ့ၣ်​ ပ​က​ပာ်ပသး​မုာ်မုာ်​အဂီၢ် တညီဘၣ်. ပ​ထီၣ်​ဘၣ်​တၢ်အိၣ်ဖှိၣ်, ဟး​စံၣ်တဲၤတဲ​လီၤ​ဘၣ်တၢ် ဒီး​မၤဘၣ်တၢ်လၢ ပ​မၤညီနုၢ်​အီၤ လၢ​တၢ်သဘျ့​အပူၤန့ၣ်​ အမုာ်ဘၣ်ပှၤ​ဒိၣ်မး. ဘၣ်ဆၣ်​ ပှၤ​မ့ၢ်​တဟ့ၣ်ပှၤအခွဲး​လၢ ပ​က​မၤ တၢ်သ့ၣ်တဖၣ်အံၤ​လၢၤဘၣ်န့ၣ်​ ဘၣ်သ့ၣ်သ့ၣ်​ ပ​က​သးကိၢ်တၢ် ဒီး​ပ​က​ဘၣ်ယိၣ်​လၢ တၢ်မနုၤ က​ကဲထီၣ်သးဒံး​လဲၣ်. ပ​မ့ၢ်​တူၢ်​ဘၣ်​ဒ်န့ၣ်န့ၣ်​ တ​ဘၣ်​နီမံၤဘၣ်. နာ်က့ ယ့ၣ်ၡူး​တဲဝဲလၢ ပ​မ့ၢ်​ထံၣ်ဘၣ်​ တၢ်မၤအၢမၤနး​န့ၣ်​ ပ​နီၢ်သး​လီၤစၢ်​သ့​အဃိ ပ​ကဘၣ်​ ပလီၢ်ပသး. (ယိၤဟၣ်​ ၁၆:၁, ၂) အဃိ ဖဲ​ပှၤ​မၤအၢမၤနး​ပှၤ​အခါ ပ​ပာ်ပသး​မုာ်မုာ် ကသ့​ဒ်လဲၣ်.

၁၅. ဘၣ်မနုၤအဃိ ပ​တလိၣ်​ပျံၤ တၢ်မၤအၢမၤနး​ဘၣ်လဲၣ်. (ယိၤဟၣ်​ ၁၅:၂၀; ၁၆:၃၃)

^၁၅ လံာ်စီဆှံ တဲပှၤလၢ “ပှၤလၢ​အအဲၣ်ဒိး တီဒီး​ကစၢ်ယွၤ ဒ်​ယ့ၣ်ၡူး​ခရံာ် အပျဲၢ်​တဂၤ​အသိးန့ၣ်​ က​ဘၣ်​တၢ်မၤနးမၤဖှီၣ်​ အဝဲသ့ၣ်​ကိးဂၤဒဲး​လီၤ.” (၂ တံၤမသ့း ၃:၁၂) ဖဲ​ပှၤ​တြီဝဲ ပ​တၢ်ကရၢကရိ​တၢ်ဖံးတၢ်မၤ​လၢ ဒီပုၢ်ဝဲၢ်ခွါ​အီဒြ့ၤ အထံကီၢ်​ခါန့ၣ်​ အဆိမိၣ်​ဝဲ​လၢ လံာ်စီဆှံ​တဆၢအံၤ လၢပှဲၤထီၣ်​တသ့ဘၣ်. ဒီပုၢ်ဝဲၢ်ခွါ​အီဒြ့ၤ တဲဝဲလၢ ‘ယဟိဝၤပှၤအုၣ်အသး အိၣ်ဒီဒူၣ်ညါ​အဃိ ပဒိၣ်​ဖီၣ်​ ပ​ဝဲ​ကီးဂၤဒဲး ကသ့​ဒ်လဲၣ်.’ အဆိမိၣ်တၢ်​ဒ်န့ၣ်​အဃိ အဘၣ်ယိၣ်တၢ်​ထီဘိ. မ့မ့ၢ်​ဒီပုၢ်ဝဲၢ်​အဂၤန့ၣ်​ အဝဲသ့ၣ်​ သ့ၣ်ညါ​လၢ ပဒိၣ်​က​ဖီၣ်​အဝဲသ့ၣ်​ နာ်က့ အဝဲသ့ၣ်​ နာ်န့ၢ်​ယဟိဝၤယွၤ. အဃိ အဝဲသ့ၣ်​ တဘၣ်ယိၣ်တၢ် ထဲသိးဒီး ဒီပုၢ်ဝဲၢ်ခွါ​အီဒြ့ၤ​ဘၣ်. လၢခံ ဒီပုၢ်ဝဲၢ်ခွါ​အီဒြ့ၤ ဆီတလဲက့ၤ အတၢ်​ဆိမိၣ်​ ဒီး​သန့ၤအသး​လၢ ကစၢ်ယွၤ. အဃိ အပာ်က့ၤအသး​မုာ်မုာ် ဒီး​အထံၣ်ဘၣ်​ တၢ်ကီတၢ်ခဲ​နာ်က့ အသးခုဒံး. ပဝဲစ့ၢ်ကီး ယ့ၣ်ၡူး​တဲဝဲလၢ ပ​က​ထံၣ်ဘၣ်​ တၢ်မၤအၢမၤနး ဒီး​ပ​မ့ၢ်​ထံၣ်ဘၣ်​ တၢ်မၤအၢမၤနး​နာ်က့ ပ​တီ​တုၤလၢ အကတၢၢ်​သ့.—ဖး ယိၤဟၣ်​ ၁၅:၂၀; ၁၆:၃၃.

၁၆. ပှၤ​မ့ၢ်​တြီ ပ​တၢ်ကရၢကရိ​တၢ်ဖံးတၢ်မၤန့ၣ်​ ပ​က​ဘၣ်​မၤထွဲ တၢ်ဟံးစုနဲၣ်ကျဲ မနုၤတဖၣ်လဲၣ်.

^၁၆ ပှၤ​မ့ၢ်​တြီ ပ​တၢ်ကရၢကရိ​တၢ်ဖံးတၢ်မၤ မ့တမ့ၢ် ပှၤ​မ့ၢ်​ထီဒါ​ပှၤန့ၣ်​ ပ​ကန့ၢ်ဘၣ်​ တၢ်ဟံးစုနဲၣ်ကျဲ​လၢ ဝဲၤတြၢ် ဒီး​တၢ်အိၣ်ဖှိၣ်သးပှၢ်​အအိၣ်. တၢ်ဟံးစုနဲၣ်ကျဲတဖၣ်အံၤ က​ဒီသဒၢ​ပှၤ  ဒီး​က​မၤစၢၤ​ပှၤ​ဒ်သိးဒီး ပ​က​ဆဲး​န့ၢ်ဘၣ်​ နီၢ်သး​တၢ်အီၣ်​ ဒီး​တသ့ဖဲအသ့ ပ​က​ဆဲး​စံၣ်တဲၤတဲလီၤတၢ်. အဃိ ပ​မ့ၢ်​တနၢ်ပၢၢ် တၢ်ဟံးစုနဲၣ်ကျဲ လီၤတံၢ်လီၤဆဲး​ဘၣ်နာ်က့ ပ​က​ဘၣ်​မၤထွဲအီၤ လၢ​အဂ့ၤကတၢၢ်. (ယၤကိာ် ၃:၁၇) တကးဒံးဘၣ်​ ပ​တ​ဘၣ်​တဲဖျါထီၣ်​ ဒီပုၢ်ဝဲၢ်မုၣ်ခွါတဖၣ်​ ဒီး​တၢ်အိၣ်ဖှိၣ်​ အတၢ်ဂ့ၢ်တၢ်ကျိၤ​လၢ ပှၤလၢ အတကြၢး​သ့ၣ်ညါဝဲ အအိၣ်​ဘၣ်.—စံၣ်တဲၤတဲလီၤတၢ် ၃:၇.

၁၇. ဒ်​တၢ်မၢဖိ​လၢညါတဖၣ်​အသိး န​ပာ်လီၤနသး​လၢ န​က​မၤ​တၢ်မနုၤလဲၣ်.

^၁၇ ကစၢ်ယွၤ အခ့အပှၤတဖၣ်​ “အုၣ်အသး​လၢ ယ့ၣ်ၡူး​အဂ့ၢ်” အဃိ မုၣ်ကီၤလံၢ် ဘၣ်သး​ထီဒါ​အဝဲသ့ၣ်​ သပှၢ်တၢၢ်. (လီၣ်ဖျါ ၁၂:၁၇) နာ်က့ ပ​တ​ဘၣ်​ပျံၤ မုၣ်ကီၤလံၢ် ဒီး​ပှၤလၢ အပိာ်အခံ​ဘၣ်. ပှၤ​မ့ၢ်​ထီဒါ​ပှၤ​နာ်က့ ပ​မ့ၢ်​စံၣ်တဲၤတဲလီၤတၢ် ဒီး​သိၣ်လိ​ပှၤဂၤ တၢ်မ့ၢ်တၢ်တီန့ၣ်​ က​မၤစၢၤ​ပှၤလၢ ပကအိၣ်ဒီး တၢ်သူၣ်မံသးမုာ် ဒီး​ပ​က​သးခု. လၢညါ ဖဲ​တၢ်မၢဖိ​အစိၤန့ၣ်​ ပှၤယူဒၤဖိ အခိၣ်အနၢ်တဖၣ်​ တဲဘၣ်​ တၢ်မၢဖိ​တဖၣ်လၢ တဘၣ်​ စံၣ်တဲၤတဲလီၤတၢ်​လၢၤတဂ့ၤ. ဘၣ်ဆၣ်​ တၢ်မၢဖိ လၢ​အသးတီတဖၣ်​ ကနၣ်​ကစၢ်ယွၤ​ကလုၢ် ဒီး​ဆဲး​စံၣ်တဲၤတဲလီၤတၢ်​အဃိ အဝဲသ့ၣ်​သးခု. (မၤတၢ် ၅:၂၇-၂၉, ၄၁, ၄၂) အဃိ ပှၤ​မ့ၢ်​ပတုာ် ပ​တၢ်စံၣ်တဲၤတဲ​လီၤ​တၢ်မၤန့ၣ်​ ဖဲ​ပ​စံၣ်တဲၤတဲလီၤတၢ်​အခါ ပ​ကဘၣ်​ စံၣ်တဲၤတဲ​လီၤ​တၢ်လၢ တၢ်ကူၣ်သ့. (မးသဲ ၁၀:၁၆) ပ​မ့ၢ်​ကျဲးစၢး စံၣ်တဲၤတဲလီၤတၢ် လၢ​အဂ့ၤကတၢၢ်န့ၣ်​ ပ​သ့ၣ်ညါ​လၢ ပ​မၤသးခု ယဟိဝၤယွၤ​အသး ဒီး​ပ​စံၣ်တဲၤတဲလီၤ တၢ်ကစီၣ်​လၢ က​မၤပူၤဖျဲး ပှၤ​သးသမူ​အဃိ ပ​အိၣ်ဒီး​တၢ်သူၣ်မံသးမုာ်.

၁၈. တၢ်သူၣ်မံသးမုာ် နီၢ်ကီၢ်န့ၣ်​ ပ​န့ၢ်​ဘၣ်​သ့​လၢ မတဂၤ​အအိၣ်လဲၣ်.

^၁၈ ပ​မ့ၢ်​ထံၣ်ဘၣ်​ တၢ်အိၣ်သး​လၢ အကီ​ကတၢၢ်​နာ်က့ ပ​အိၣ်ဒီး တၢ်သူၣ်မံသးမုာ် သ့ဒံး. တၢ်သူၣ်မံသးမုာ်​တခါ​လၢ ပ​လိၣ်​ဘၣ်​အီၤန့ၣ်​ အကဲဝဲ တၢ်သူၣ်မံသးမုာ်​လၢ အဟဲ​လၢ ကစၢ်ယွၤ​အအိၣ်​ အဃိ ပှၤလၢ​အဟ့ၣ်ပှၤ တၢ်သူၣ်မံသးမုာ်​တခါအံၤ​သ့န့ၣ်​ အကဲဝဲ ယဟိဝၤယွၤ တဂၤ​လီၤ. ဖဲ​ပ​ထံၣ်ဘၣ်​ တၢ်ဆါ​ရၤလီၤသး, န့ဆၢၣ်​တၢ်ဘၣ်ဒိဘၣ်ထံး ဒီး​တၢ်မၤအၢမၤနး​အခါ ပ​က​ဘၣ်​နာ်​လၢ ယဟိဝၤယွၤ က​မၤစၢၤ​ပှၤ ဒီး​ပ​က​ဘၣ်​အိၣ်ဘူးဒီး အတၢ်ကရၢကရိ. ပ​ကဘၣ်​ သးစၢၢ်ဆၢ တၢ်ဆိၣ်ဂ့ၤ​လၢ ကစၢ်ယွၤ က​ဟ့ၣ်ပှၤ လၢ​ခါဆူညါ. ပ​မ့ၢ်​မၤ​ဒ်န့ၣ်န့ၣ်​ “ကစၢ်​လၢ​အဟ့ၣ်လီၤ တၢ်သူၣ်မံသးမုာ်” န့ၣ်​က​အိၣ်ဒီး​ပှၤ. (ဖံလံးပံၤ ၄:၉) တၢ်မၤလိ​လၢခံ​တခါန့ၣ်​ ပ​က​တဲသကီး​ဘၣ်ဃးဒီး ဒီပုၢ်ဝဲၢ်မုၣ်ခွါ လၢ​အထံၣ်ဘၣ်​ တၢ်နးတၢ်ဖှီၣ်​န့ၣ်​ ဒ်သိး​အဝဲသ့ၣ်​ က​အိၣ်ဒီး တၢ်သူၣ်မံသးမုာ်​လၢ အဟဲ​လၢ ကစၢ်ယွၤ​အအိၣ်​အဂီၢ် ပ​မၤစၢၤ​အဝဲသ့ၣ်​ ကသ့​ဒ်လဲၣ်.