တၢးထီခိးတၢ် လၢ​တနံၣ်အံၤ​အဂီၢ်န့ၣ်​ န​ဖး​ဘၣ်​တၢ်ဂ့ၢ်တဖၣ်အံၤ လၢာ်လံဧါ. န​က​စံးဆၢ တၢ်သံကွၢ်တဖၣ်အံၤ ဒ်လဲၣ်–

ပ​မ့ၢ်​ဟံန့ၢ် တၢ်ဆၢကတီၢ်​လၢ ပ​က​ဃ့ထုကဖၣ်, မၤလိ​လံာ်စီဆှံ ဒီး​ဆိကမိၣ်ထံ ဘၣ်ဃးဒီး ယဟိဝၤယွၤ​အဂ့ၢ်န့ၣ်​ က​ကဲဘျုး​ဒ်လဲၣ်.

ပ​ဆၢတဲာ်တၢ်​လၢအဘၣ်​ ကသ့​အါထီၣ်, ပ​သိၣ်လိတၢ် ကသ့​ဒိၣ်ထီၣ်, ပ​တၢ်နာ်​က​ဟဲ​ဂၢၢ်ကျၢၤ​ဒိၣ်ထီၣ်​ ဒီး​ပတၢ်အဲၣ်​ယဟိဝၤယွၤ က​ဟဲ​ဒိၣ်ထီၣ်.—တၢး​၂၂.၀၁, ကဘျံးပၤ ၃၀-၃၁.

ပ​မ့ၢ်​မၤဂၢၢ်ကျၢၤထီၣ်​ ပ​တၢ်နာ်န့ၢ် ယဟိဝၤယွၤ ဒီး​ပှၤလၢ​အဃု​ထၢထီၣ်​ဝဲ​လၢ ကတီခိၣ်ရိၤမဲ​တၢ်​တဖၣ်န့ၣ်​ က​ကဲဘျုး​ဒ်လဲၣ်.

ဆၢကတီၢ်​ခဲအံၤ ပ​က​ဘၣ်​နာ်န့ၢ် ယဟိဝၤယွၤ အတၢ်ရဲၣ်တၢ်ကျဲၤ အါန့ၢ်ဒံး​လၢညါ. ဒီး​ပ​တ​ဘၣ်​သးဒ့ဒီ​လၢ တၢ်အိၣ်ဖှိၣ်သးပှၢ်တဖၣ်​ အတၢ်ဆၢတဲာ်​အဖီခိၣ်ဘၣ်. အဃိ​ဖဲ​တၢ်နးတၢ်ဖှီၣ်ဖးဒိၣ်​ အဆၢကတီၢ်န့ၣ်​ ပ​မ့ၢ်​န့ၢ်ဘၣ်​ တၢ်ဟံးစုနဲၣ်ကျဲ​လၢ အဖျါ​လီၤဆီ​ဘၣ်ပှၤ ဒီး​ပ​မ့ၢ် တနၢ်ပၢၢ်​အီၤဘၣ်​ နာ်က့ ပ​က​မၤထွဲ တၢ်ဟံးစုနဲၣ်ကျဲတဖၣ်.—တၢး​၂၂.၀၂, ကဘျံးပၤ ၄-၆.

မူခိၣ်ကလူး​တဲဘၣ်​ စကၤရယၤ ဘၣ်ဃးဒီး “နီၣ်ထူၣ်ကလာ်​အပျံၤ​လၢ [ပဒိၣ်] စီၤ​စရူဘၤဘ့လး အစုပူၤ” န့ၣ်​အဲၣ်ဒီး​တဲဝဲ အခီပညီ​ဒ်လဲၣ်. (စကၤရယၤ ၄:၈-၁၀)

တၢ်ထံၣ်လၢညါခီ​တခါအံၤ မၤစၢၤ​ကစၢ်ယွၤ​အပှၤဂီၢ်မုၢ်​လၢ က​သ့ၣ်ညါ​ဝဲ​လၢ တၢ်လုၢ်ဟံၣ်​အသီ တဖျၢၣ်အံၤ ပှၤသူၣ်ထီၣ်​အီၤ က​ဝံၤဝဲ ဒီး​ယဟိဝၤယွၤ က​ဘၣ်သူၣ်ဘၣ်သးဝဲ.—တၢး​၂၂.၀၃, ကဘျံးပၤ ၁၆-၁၇.

“လၢ​တၢ်စံးတၢ်ကတိၤ” န့ၣ်ပ “ကဲထီၣ်​တၢ်ဒိတၢ်တဲာ်” ကသ့​ဒ်လဲၣ်. (၁ တံၤမသ့း ၄:၁၂)

လၢ​တၢ်စံၣ်တဲၤတဲ​လီၤ​တၢ်မၤ​အပူၤန့ၣ်​ ပ​တဲတၢ်ဒီး​ပှၤဂၤ​လၢ တၢ်အဲၣ်တၢ်ကွံ ဒီး​တၢ်ပာ်ကဲ, လၢ​တၢ်အိၣ်ဖှိၣ်ပူၤန့ၣ်​ ပ​သးဝံၣ်တၢ်​လၢ ပ​သးဒီဖျၢၣ်​ ဒီး​ပ​ဟ့ၣ်ထီၣ်​ တၢ်စံးဆၢ, တကးဒံးဘၣ်​ ပ​တဲတၢ် တီတီလိၤလိၤ ဒီး​တဲ​တၢ်ကတိၤ​လၢ အဟ့ၣ်ဂံၢ်ဟ့ၣ်ဘါ​ပှၤဂၤ ဒီး​ပ​ဟးဆှဲး​တၢ်ကတိၤ ဒုၣ်ဒွဲၣ်စံးအၢ.—တၢး​၂၂.၀၄, ကဘျံးပၤ ၆-၉.

ဆၣ်ဖိကီၢ်ဖိ​အအၢ ဖးဒိၣ်လွံၢ်ဒု (တၢ်ပၢတၢ်ပြး) လၢ​လံာ်​ဒၤနံးယ့လး အဆၢဒိၣ်​ ၇ ပာ်ဖျါထီၣ်ဝဲန့ၣ်​ ဘၣ်မနုၤအဃိ အလီၤဂာ်ဒီး ဆၣ်ဖိကီၢ်ဖိ​လၢ အအၢ​တဒု လၢ​လံာ်​လီၣ်ဖျါ ၁၃:၁, ၂ ပာ်ဖျါထီၣ်ဝဲန့ၣ်​လဲၣ်.

ဆၣ်ဖိကီၢ်ဖိ​လၢ အအၢ​တဒု လၢ​လီၣ်ဖျါ အဆၢဒိၣ်​ ၁၃ ပာ်ဖျါထီၣ်ဝဲန့ၣ်​ တကဲဝဲ တၢ်ပၢတၢ်ပြး လီၤလီၤဆီဆီ​တခါ ဒ်သိးဒီး ရိမ့ၤန့ၣ်ဘၣ်. ဘၣ်ဆၣ်​ လံာ်စီဆှံ ဒိလီၤ​ဝဲ​လၢ အကဲ ပဒိၣ်လၢ​အပၢတၢ်​ခဲလၢာ်.—တၢး​၂၂.၀၅, ကဘျံးပၤ ၉.

ပ​နာ်​လၢ ယဟိဝၤယွၤ က​မၤတၢ်လၢ အတီအလိၤန့ၣ်​ ပ​ပာ်ဖျါထီၣ်​ ကသ့​ဒ်လဲၣ်.

ပှၤ​မ့ၢ် တဲဆါ​ပှၤ, မၤဘၣ်ဒိ​ဆါ​ပှၤ ဒီး​မၤကမၣ်​ဘၣ်​ပှၤန့ၣ်​ ပ​တဘၣ်​ သးဒိၣ်ထီၣ်တၢ် ဒီး​စၢဃာ် ပှၤဂၤ​တၢ်ကမၣ်​ဘၣ်. ဒီး​ပ​က​ဘၣ်​အးလီၤ တၢ်ဂ့ၢ်အံၤ​လၢ ယဟိဝၤယွၤ​အစုပူၤ. တၢ်ကီတၢ်ခဲ​လၢ အဟဲ​အိၣ်ထီၣ်​ ခီဖျိလၢ တၢ်ဒဲးဘး​အဃိန့ၣ်​ ယဟိဝၤယွၤ က​မၤလီၤမၢ်ကွံာ်​ခဲလၢာ်.—တၢး​၂၂.၀၆, ကဘျံးပၤ ၁၀-၁၁.

ဒီပုၢ်ဝဲၢ်ခွါ​တဂၤ အမ့ၢ်​​ဘၣ်​ဃ့ထုကဖၣ်​လၢ တၢ်အိၣ်ဖှိၣ်​အပူၤန့ၣ်​ အက​ဘၣ်​နီၣ်ဘၣ်​ တၢ်ဂ့ၢ်​မနုၤလဲၣ်.

တၢ်ဃ့ဘါထုကဖၣ်န့ၣ်​ တမ့ၢ်​တၢ်ဆၢကတီၢ်​လၢ န​က​သိၣ်​ပှၤဂၤ ဒီး​ဘိးဘၣ်သ့ၣ်ညါလီၤ တၢ်တမံၤမံၤ​ဘၣ်. အဃိ န​တဘၣ်​ “တဲတၢ်​အါအါ” ဘၣ်. (မးသဲ ၆:၇)—တၢး​၂၂.၀၇, ကဘျံးပၤ ၂၄-၂၅.

“ပှၤ​မၤတၢ်အၢတဖၣ်” လၢအက​ဂဲၤဆၢထၢၣ်​သမူထီၣ်က့ၤ​ဒီး “က​ဘၣ်​တၢ်စံၣ်ညီၣ်​အီၤ” န့ၣ်​အခီပညီ​ဒ်လဲၣ်. (ယိၤဟၣ်​ ၅:၂၉)

ပှၤ​မၤတၢ်အၢတဖၣ်​အံၤ ပှၤ​တစံၣ်ညီၣ်​အဝဲသ့ၣ်​ ခီဖျိ တၢ်ကမၣ်​လၢ အဝဲသ့ၣ်​မၤတ့ၢ် လၢအပူၤကွံာ်န့ၣ်​ဘၣ်. ဖဲ​အဝဲသ့ၣ်​ ဂဲၤဆၢထၢၣ်​သမူထီၣ်က့ၤ​အလီၢ်ခံ ပှၤ​က​စံၣ်ညီၣ်​ အဝဲသ့ၣ်​ခီဖျိ ပှၤ​က​ကွၢ် ဒီးသမံသမိးဝဲ တၢ်လၢ​အဝဲသ့ၣ်​ မၤဝဲတဖၣ်.—တၢး​၂၂.၀၉, ကဘျံးပၤ ၁၈.

တၢ်အိၣ်ဖှိၣ်ဖးဒိၣ်​ဖဲ လါစဲးပတ့ဘၢၣ်​ ၁၉၂၂ န့ၣ်​ဒီပုၢ်ဝဲၢ်ခွါ ရၢၤသဖၢၤ ဟ့ၣ်​တၢ်စံၣ်တဲၤတဲလီၤ လၢ​အလီၤသးအိၣ်​ဒ်လဲၣ်.

တၢ်အိၣ်ဖှိၣ်ဖးဒိၣ်​ လၢ​ပှၤ​မၤ​ဝဲ​ဖဲ စံဒၢၤဖွဲၣ်, အိၤဟါအိၤ, ကီၢ်အမဲရကၤန့ၣ်​ ဒီပုၢ်ဝဲၢ်ခွါ ရၢၤသဖၢၤ ဟ့ၣ်​တၢ်စံၣ်တဲၤတဲလီၤတၢ် ဒီး​အတဲဝဲလၢ “စီၤပၤ​ပၢတၢ်လံ. သု​ဝဲ​ခဲလၢာ်န့ၣ်​ သု​အိၣ်ဒီး​မူဒါ​လၢ သု​က​တဲဘၣ်​ ပှၤကီးဂၤဒဲး လၢ​တၢ်ဂ့ၢ်အံၤ. အဃိန့ၣ်​ စံၣ်တဲၤတဲလီၤ, စံၣ်တဲၤတဲလီၤ, စံၣ်တဲၤတဲလီၤ စီၤပၤ ဒီး​အဘီမုၢ်​အဂ့ၢ်.”—တၢး​၂၂.၁၀, ကဘျံးပၤ ၃-၅.

ဒ်သိးဒီး ပ​လဲၤခီဖျိ တၢ်ကီတၢ်ခဲ​ကန့ၢ်​အဂီၢ် ယၡါယၤ အဆၢဒိၣ်​ ၃၀ ပာ်ဖျါထီၣ်ဝဲ တၢ်သၢမံၤ​လၢ ကစၢ်ယွၤ​မၤစၢၤ​ပှၤန့ၣ်​ မ့ၢ်​မနုၤလဲၣ်.

ယၡါယၤ အဆၢဒိၣ်​ ၃၀ ပာ်ဖျါထီၣ်​ဝဲ​လၢ ကစၢ်ယွၤ မၤစၢၤ​ပှၤ​ခီဖျိ (၁) အကနၣ်​ ပ​တၢ်ထုကဖၣ်​ ဒီး​အစံးဆၢ ပ​တၢ်ထုကဖၣ်, (၂) အဟံးစုနဲၣ်ကျဲ​ပှၤ, (၃) အဟ့ၣ်ပှၤ​တၢ်ဆိၣ်ဂ့ၤ လၢ​ခဲအံၤ ဒီး​ခါဆူညါ.—တၢး​၂၂.၁၁, ကဘျံးပၤ ၉.

ပတဲလၢ တၢ်ကတိၤ​ဖဲ စံးထီၣ်ပတြၢၤ ၃၇:၁၀, ၁၁, ၂၉ န့ၣ်​လၢညါ အလၢပှဲၤထီၣ်လံ ဒီး​ခါဆူညါ အက​လၢပှဲၤထီၣ်ဒံး. ဘၣ်မနုၤဃိ ပ​တဲ​ကၠဲန့ၣ်​လဲၣ်.

တၢ်လၢ​စီၤဒၤဝံး ကွဲး​ဝဲ​အံၤန့ၣ်​ အလၢ​ပှဲၤထီၣ်​လၢညါ လၢ​ကီၢ်​အံၣ်စရ့ ဒ်သိးဒီး ဖဲ​စီၤပၤ​ၡလိၤမိၤ ပၢတၢ်​အဆၢကတီၢ်. တကးဒံးဘၣ်​ ဖဲယ့ၣ်ၡူး တဲကဒါက့ၤ တၢ်ကတိၤ​ဖဲ အဆၢဖိ ၁၁ န့ၣ်​အတဲဝဲ ဘၣ်ဃးဒီး ဟီၣ်ခိၣ်​ပၤရဒံစူး​အဂ့ၢ် လၢ​ခါဆူညါ. (မးသဲ ၅:၅; လူၤကၣ်​ ၂၃:၄၃)—တၢး​၂၂.၁၂, ကဘျံးပၤ ၈-၁၀, ၁၄.