ဖဲ​ယဟိဝၤယွၤ​မၢ ပှၤဟီၣ်ခိၣ်ဖိ “မၤပှဲၤထီၣ်​ဟီၣ်ခိၣ်​ ဒီး​မၤနၢၤ​အီၤ” အခါန့ၣ်​ အဘၣ်သး​ဝဲ​လၢ အဝဲသ့ၣ်​ က​မၤ​ကဲထီၣ်​ ဟီၣ်ခိၣ်ဒီဘ့ၣ်​လၢ ပၤရဒံစူး. (၁ မိၤၡ့ ၁:၂၈) ပှၤလၢ က​အိၣ်​ဘၣ်​လၢ ဟီၣ်ခိၣ်သီ​ပူၤ​စ့ၢ်ကီး က​ဘၣ်​မၤထွဲဝဲ တၢ်မၤလိာ်​တခါအံၤ. နာ်က့ ခီဖျိလၢ ဧ့ၤဒ့ၣ်​တၤသၣ်လီၢ် တအိၣ်လၢၤဘၣ်​ အဃိ ဟီၣ်ခိၣ်​တဖျၢၣ်အံၤ တကဲထီၣ်​ ပၤရဒံစူး တဘျီဃီ​ဒံးဘၣ်. အၢ်မက့းဒိၣ်​ ဝံၤအလီၢ်ခံ တၢ်လီၢ်လၢ​အဟးဂီၤ လၢ​ပ​ကဘၣ်​ မၤကဆှီထီၣ်က့ၤ​အီၤန့ၣ်​ အိၣ်​ဒီဒူၣ်. အဃိ ပ​က​ဘၣ်​မၤတၢ် ဒီဒူၣ်ညါ.

တၢ်လၢ​ပ​ကဘၣ်မၤန့ၣ်​ လီၤဂာ်​ဒ်သိးဒီး တၢ်လၢ​ပှၤအံၣ်စရ့လးဖိ ​ဘၣ်​မၤဝဲ ဖဲ​အဝဲသ့ၣ်​ ဟးထီၣ်လၢ ဘၤဘူၤလိၣ်​ ဒီး​က့ၤတုၤလၢ အတၢ်လီၢ်. ဒီး​အဝဲသ့ၣ်​ တၢ်လီၢ်န့ၣ်​ ပှၤ​တအိၣ်ဝဲဘၣ်​ န့ၢ်​အနံၣ်​ ၇၀ ညါ. နာ်က့ ဝံ​ယၡါယၤ တဲပာ်စၢၤဝဲလၢ ယဟိဝၤယွၤ က​မၤစၢၤ​အဝဲသ့ၣ်​ ဒီး​အဝဲသ့ၣ်​ အတၢ်လီၢ်​န့ၣ်​ က​ကဲထီၣ်က့ၤ ဒ်​အလီၢ်လီၢ်. ဝံ​ယၡါယၤ တဲဝဲလၢ “ကစၢ်ယွၤ က​မၤ​ကဲထီၣ်က့ၤ စံယိၣ်​ အပှၢ်မုၢ်ကနၢ ဒ်သိးဒီး ဧ့ၤဒ့ၣ်​တၤသၣ်​အလီၢ် ဒီး​အမဲးမုၢ်ပျီန့ၣ်​ က​ကဲထီၣ်က့ၤ ဒ်သိးဒီး ယဟိဝၤယွၤ အကရၢၢ်.” (ယၡါယၤ ၅၁:၃) ယဟိဝၤယွၤ မၤစၢၤ​ပှၤအံၣ်စရ့လးဖိ​အဃိ အဝဲသ့ၣ်​ န့ၢ်ဘၣ်က့ၤ အတၢ်လီၢ်​လၢ​အဃံလၤ. အဃိ ပှၤလၢ​က​အိၣ်​ဘၣ်​ လၢ ဟီၣ်ခိၣ်သီ​ပူၤန့ၣ်​ ယဟိဝၤယွၤ က​မၤစၢၤ​အဝဲသ့ၣ်​ ဒ်သိးဒီး က​မၤ​ကဲထီၣ်က့ၤ ဟီၣ်ခိၣ်ဒီဘ့ၣ်​ လၢ​ပၤရဒံစူးကၠ့ၤ. န​မ့ၢ်​ဘၣ်သး မၤစၢၤ​တၢ်လၢ ဟီၣ်ခိၣ်သီ​ပူၤန့ၣ်​ န​ကဘၣ်​ အိၣ်ကတီၤပာ်စၢၤသး လၢ​ခဲအံၤ.

ပ​အိၣ်ကတီၤပာ်စၢၤသး ခဲအံၤ​သ့​ခီဖျိ ပ​အိၣ်​ကဆှဲကဆှီ ဒီး​ပာ်​ပဟံၣ်​တၢ်ဖိတၢ်လံၤ လၢအလီၢ်​အကျဲ. ပှၤလၢ ပ​ဟံၣ်ခိၣ်ဟံၣ်ဃၢၤ မ့ၢ်​တအိၣ်​ကဆှဲကဆှီ​ဘၣ်နာ်က့ ပ​ကဘၣ်​ ကျဲးစၢး​အိၣ်​ကဆှဲကဆှီ. တကးဒံးဘၣ်​ ပ​မၤစၢၤ​အါထီၣ်​တၢ်​သ့​ခီဖျိ ပ​မၤ​ကဆှီ ဒီး​ကွၢ်​ကတီၤစၢၤ တၢ်အိၣ်ဖှိၣ်လီၢ် ဒီး​ကဝီၤ​ဘျီၣ်ဒိၣ်. မ့ၢ်သ့န့ၣ်​ ပ​တီၣ်ထီၣ်​လံာ်​လၢ က​မၤစၢၤတၢ် လၢ​န့ဆၢၣ်​တၢ်ဘၣ်ဒိဘၣ်ထံး တကပၤ​သ့. ပ​မ့ၢ်​အိၣ်ကတီၤပာ်စၢၤသး ကၠဲအံၤန့ၣ်​ ခါဆူညါ ပ​မၤစၢၤတၢ်​ကသ့ ဒီဒူၣ်. အဃိ ပ​ကဘၣ်​ ကၠးလီၤသး​လၢ ‘ယဟိဝၤယွၤ မ့ၢ်​ဟ့ၣ်​ယၤ အခွဲး​လၢ ယ​က​အိၣ်​ဘၣ်​လၢ ဟီၣ်ခိၣ်သီ​ပူၤန့ၣ်​ ယ​မၤလိ​အါထီၣ်​သး​လၢ တၢ်သ့တၢ်​ဘၣ်​တခါခါ ဒ်သိး ယ​သူက့ၤ​အီၤ​လၢ ဟီၣ်ခိၣ်သီ​ပူၤ ကသ့ဧါ.’

ယ့ၣ်ၡူး မၤသမူထီၣ်​ စီၤယၤအ့ၤရူး​အဖိမုၣ်​ ဝံၤဘျီ အမၢ​ပှၤ​ဒုးအီၣ်​ ဖိသၣ်မုၣ်ဖိန့ၣ်​လၢ တၢ်အီၣ်​တမံၤမံၤ. (မၢ်ကူး ၅:၄၂, ၄၃) ပ​မ့ၢ်​​ဘၣ်​မၤစၢၤ ဖိသၣ်မုၣ်ဖိ လၢ​အသးအိၣ်​ ၁၂ နံၣ်​တဂၤအံၤ ဒီး​ဒုးအီၣ်​အီၤ​တၢ်အီၣ်ဒု တကီဘၣ်. နာ်က့ ယ့ၣ်ၡူး တဲဝဲလၢ “ပှၤကိးဂၤဒဲး​လၢ တၢ်သွၣ်ခိၣ်တဖၣ်​အပူၤန့ၣ်​ က​နၢ်ဟူ​အကလုၢ် ဒီး​က​ဟဲက့ၤ​သမူထီၣ်ဝဲ.” (ယိၤဟၣ် ၅:၂၈, ၂၉) ဆိမိၣ်ကွၢ် ဖဲယ့ၣ်ၡူး အတၢ်ကတိၤအံၤ ဟဲလၢပှဲၤထီၣ်​အခါ ပ​က​ဘၣ်​မၤစၢၤ အဝဲသ့ၣ်​ဖးအါညါ. ပှၤလၢ က​ဂဲၤဆၢထၢၣ်​ သမူထီၣ်က့ၤတဖၣ်​ က​လိၣ်ဘၣ်​ မနုၤလဲၣ်န့ၣ်​ လံာ်စီဆှံ တပာ်ဖျါထီၣ်န့ၢ်ပှၤ​ဘၣ်. နာ်က့ အဝဲသ့ၣ်​ က​လိၣ်ဘၣ်​ တၢ်အီၣ်တၢ်အီ, တၢ်လီၢ်လၢ​ကအိၣ်ဝဲ ဒီး​တၢ်ကူတၢ်ကၤဒု လီၤတံၢ်လံ. န​မ့ၢ်​ဘၣ်သး မၤစၢၤ​အဝဲသ့ၣ်န့ၣ်​ န​အိၣ်ကတီၤပာ်စၢၤသး ခဲအံၤ​ကသ့​ကၠဲလဲၣ်. ဆိမိၣ်ကွၢ် တၢ်သံကွၢ် လၢလာ်တဖၣ်အံၤ.

ဖဲ​န​နၢ်ဟူဘၣ်​ တၢ်ဘိးဘၣ်သ့ၣ်ညါ​လၢ ကဝီၤအပှၤကွၢ်တၢ် က​ဟဲ​အိၣ်သကီး န​တၢ်အိၣ်ဖှိၣ်​ခါန့ၣ်​ န​ဘၣ်သး ဟ့ၣ်​လီၤ​န​မံၤ​လၢ န​က​ကွဲ​အီၤ​လၢ​န​ဟံၣ်​ ဒီး​အီၣ်သကီး​မ့ၤ​ကၠ့ၤဧါ. ပှၤလၢ​အမၤတၢ် လၢ​ဘ့ၤသ့လး​တဂၤ အမ့ၢ်​လီၤဘၣ်က့ၤမူဒါ လၢ​န​အိၣ်တၢ်လီၢ် မ့တမ့ၢ် ကဝီၤအပှၤကွၢ်တၢ်​တဂၤ မ့ၢ်​တမၤ ကဝီၤအပှၤကွၢ်တၢ် အတၢ်မၤ​လၢၤဘၣ်န့ၣ်​ န​ဘၣ်သး​မၤစၢၤ အဝဲသ့ၣ်​ ဒီး​ဃုစၢၤ​အဝဲသ့ၣ်​ တၢ်လီၢ်လၢ​ကအိၣ်ဝဲ အဂီၢ်ဧါ. ဒီး​ပှၤ​မ့ၢ်​မၤ တၢ်အိၣ်ဖှိၣ်ဖးဒိၣ်​ ဒီး​တၢ်အိၣ်ဖှိၣ်​လီၤဆီ လၢ​န​အိၣ်တၢ်လီၢ်န့ၣ်​ တချုးလၢ တၢ်အိၣ်ဖှိၣ်​ထီၣ်​ဒံးဘၣ်​ ဒီး​တၢ်အိၣ်ဖှိၣ်​ ဝံၤအခါ န​ဘၣ်သး​မၤစၢၤတၢ်ဧါ. ဖဲန့ၣ်​ န​မၤချုးသး​လၢ န​တူၢ်လိာ် ပှၤတမှံၤ ကသ့ဧါ.

ဖဲ​မၤတၢ် ၂၄:၁၅ န့ၣ်​ပ​သ့ၣ်ညါ​ဘၣ်​လၢ ပှၤ​အကကွဲၢ် လၢ​အကထိတဖၣ်​ က​ဂဲၤဆၢထၢၣ်​ သမူထီၣ်က့ၤ. အဝဲသ့ၣ်​ အါတက့ၢ်န့ၣ်​ တမၤလိဘၣ်​ ယဟိဝၤယွၤ အဂ့ၢ်​ဘၣ်. နာ်က့ အဝဲသ့ၣ်​ သမူထီၣ်က့ၤ ဝံၤအလီၢ်ခံ အဝဲသ့ၣ်​ ကန့ၢ်ဘၣ်​ တၢ်ခွဲးတၢ်ယာ်​လၢ က​မၤလိဘၣ်​ ယဟိဝၤယွၤ အဂ့ၢ်. a ကစၢ်ယွၤ အပှၤဂီၢ်မုၢ်​လၢ အသးတီဒီး​အီၤ ဒီး​အိၣ်ဒီး​တၢ်လဲၤခီဖျိ​အါမးန့ၣ်​ က​သိၣ်လိ​ဘၣ်​အဝဲသ့ၣ်. (ယၡါယၤ ၁၁:၉) အဒိ ဒီပုၢ်ဝဲၢ်မုၣ်​ ခၠါ​လဲၣ်​န့ၣ်​ အစံၣ်တဲၤတဲလီၤ​ဘၣ်​တၢ်လၢ ကီၢ်ယူရပၤ, ကလံၤထံး အမဲရကၤ ဒီး​ကီၢ်အၤဖြံၤကၤ. ဒီပုၢ်ဝဲၢ်မုၣ်အံၤ အိၣ်ခီး​ကွၢ်လၢ်​ဝဲ​လၢ အက​သိၣ်လိဘၣ်​ ပှၤလၢ က​ဂဲၤဆၢထၢၣ်​ သမူထီၣ်က့ၤတဖၣ်​ သပှၢ်တၢၢ်. အတဲဝဲလၢ “ယ​ခီးကွၢ်လၢ် တၢ်ဆၢကတီၢ်​လၢ ယ​က​သိၣ်လိဘၣ်​ ပှၤလၢ က​ဂဲၤဆၢထၢၣ်​ သမူထီၣ်က့ၤတဖၣ်န့ၣ်​ မၢ်မၢ်​လီၤ. ဖဲ​ယ​ဖးဘၣ်​ ပှၤဂၤ​အတၢ်လဲၤခီဖျိ အဂ့ၢ်​ခါန့ၣ်​ ယ​ဆိမိၣ်လီၤသး​လၢ ‘ပှၤ​တဂၤအံၤ မ့ၢ်​သ့ၣ်ညါဘၣ်​ ယဟိဝၤယွၤ အဂ့ၢ်ဒု အတၢ်အိၣ်မူ က​လဲၤ​အသး လၢအဂၤ​တမံၤကၠ့ၤ.’ ယဘၣ်သး​တဲပၠး ပှၤလၢ က​ဂဲၤဆၢထၢၣ်​ သမူထီၣ်က့ၤတဖၣ်အံၤ​လၢ ယဟိဝၤယွၤ အဂ့ၢ်​သပှၢ်တၢၢ်. အဝဲသ့ၣ်​ မ့ၢ်​ဘူၣ်ထီၣ်ဘါထီၣ်​ ယဟိဝၤယွၤန့ၣ်​ အတၢ်အိၣ်မူ ကမုာ်​ဖးဒိၣ်ညါ.”

ယဟိဝၤယွၤ အပှၤဂီၢ်မုၢ် လၢ​အအိၣ်မူ​ပာ်စၢၤ တချုးလၢ ယ့ၣ်ၡူး​ဟဲ​လီၤ​လၢ ဟီၣ်ခိၣ်ချၢ​ဒံးဘၣ်န့ၣ်​ အဝဲသ့ၣ်​ က​ဘၣ်​မၤလိတၢ်​ဒီဒူၣ်. အဒိ ဝံအတၢ်စံးပာ် လၢ​စီၤဒၤနံးယ့လး တဲပာ်စၢၤဝဲ ဒီး​အတနၢ်ပၢၢ်ဝဲဘၣ်န့ၣ်​ အိၣ်​အါမး. ဆိကမိၣ်ကွၢ် ဖဲ​န​အိၣ်​ဘၣ်​လၢ ဟီၣ်ခိၣ်သီ​ပူၤ​ခါ န​မ့ၢ်​မၤလိဘၣ်တၢ်​ဒီး စီၤဒၤနံးယ့လး ဒီး​တဲပၠးအီၤ ဘၣ်ဃးဒီး ဝံအတၢ်စံးပာ် လၢ​အတဲပာ်စၢၤဝဲတဖၣ်​ ဟဲလၢပှဲၤထီၣ်​ဒ်လဲၣ်န့ၣ်​ ကလီၤသးခု​ဖးဒိၣ်ညါ. (ဒၤနံးယ့လး ၁၂:၈) ဒီး​ဘၣ်သ့ၣ်သ့ၣ်​ န​က​တဲပၠး နီၢ်နၤဧမံ ဒီး​နီၢ်ရူၤသး​လၢ မ့းၡံအၤန့ၣ်​ ဟဲလီၤစၢၤ​လၢ အဝဲသ့ၣ်. ဖဲန့ၣ်​အဆၢကတီၢ် န​က​သိၣ်လိဘၣ်​ ပှၤ​အိၣ်လၢ ဟီၣ်ခိၣ်ဒီဘ့ၣ်ညါ ဒီး​ပှၤလၢ​အထီဒါတၢ် ဒီး​မၤအၢမၤသီ​တၢ် တအိၣ်လၢၤဘၣ်​ အဃိ ကမုာ်​ဖးဒိၣ်ညါ.

ခဲအံၤ န​အိၣ်ကတီၤသး​လၢ န​က​သိၣ်လိ ပှၤလၢ က​ဂဲၤဆၢထၢၣ်​သမူထီၣ်က့ၤတဖၣ်​ ကသ့​ဒ်လဲၣ်. မၤဂ့ၤထီၣ်​ န​တၢ်သ့တၢ်ဘၣ်​ လၢ​တၢ်သိၣ်လိတၢ် ဒီး​စံၣ်တဲၤတဲလီၤတၢ်​ဆူၣ်ဆူၣ်. (မးသဲ ၂၄:၁၄) ခီဖျိလၢ​န​သးနံၣ်​ ဒီး​န​တၢ်အိၣ်သး​အဃိ န​စံၣ်တဲၤတဲလီၤတၢ် မ့ၢ်​တန့ၢ်​အါအါဘၣ်​ နာ်က့ န​မ့ၢ်​ကျဲးစၢး စံၣ်တဲၤတဲလီၤတၢ်​ဆူၣ်ဆူၣ်န့ၣ်​ အကဲဝဲ န​အိၣ်ကတီၤသး​လၢ န​က​သိၣ်လိ ပှၤလၢ က​ဂဲၤဆၢထၢၣ်​ သမူထီၣ်က့ၤတဖၣ်​လံ.

န​အိၣ်ကတီၤသး​လၢ န​က​န့ၢ်သါ​ဘၣ်​ဟီၣ်ခိၣ်​ လံဧါ. န​အိၣ်ခီးကွၢ်လၢ်​လၢ န​က​မၤစၢၤ​​ဘၣ်​တၢ် ဒ်သိးဒီး ဟီၣ်ခိၣ်ဒီဘ့ၣ်​ က​ကဲထီၣ်က့ၤ ပၤရဒံစူး ဒီး​န​က​မၤစၢၤ​ဒီး သိၣ်လိဘၣ်​ ပှၤလၢ က​ဂဲၤဆၢထၢၣ်​ သမူထီၣ်က့ၤတဖၣ်န့ၣ်​ လံဧါ. အဃိ အရ့ဒိၣ်​ဒိၣ်မး​လၢ ပ​က​ဆိမိၣ်​ပာ်စၢၤ တၢ်သံကွၢ်တဖၣ်အံၤ. ဒီး​ပ​မ့ၢ်​မၤ​ဆိ​ပာ်စၢၤ တၢ်လၢ​ပ​က​ဘၣ်​မၤ​အီၤ လၢ​ဟီၣ်ခိၣ်သီ​ပူၤ လၢ​အခဲအံၤ​န့ၣ်​ ပ​ပာ်ဖျါထီၣ်​လၢ ပ​အိၣ်ကတီၤသး​လၢ ပ​က​န့ၢ်သါ​ဘၣ်​ဟီၣ်ခိၣ်​လံ.