တၢ်မၤလိ ၅၂
မၤစၢၤပှၤဂၤ ဒ်သိးဒီး အဝဲသ့ၣ်လဲၤခီဖျိ တၢ်ကီတၢ်ခဲကန့ၢ်
“နမၤစၢၤမ့ၢ်သ့န့ၣ် တဘၣ်တြီနစုလၢ နကမၤဂ့ၤ ပှၤလၢအလိၣ်ဘၣ် တၢ်မၤစၢၤတဖၣ်န့ၣ်တဂ့ၤ.”—ကတိၤဒိ ၃:၂၇.
တၢ်သးဝံၣ် ၁၀၃ ပှၤကွၢ်သိ—ပှၤပိာ်ခွါလၢအမ့ၢ်တၢ်ဟ့ၣ်တဖၣ်
တၢ်မၤလိအံၤ အတၢ်တိာ်ပာ် a
၁. ယဟိဝၤယွၤ စံးဆၢအခ့အပှၤ အတၢ်ထုကဖၣ်ဒ်လဲၣ်.
နသ့ၣ်ညါဧါ. နကဲ တၢ်အိၣ်ဖှိၣ်သးပှၢ်မ့ၢ်ဂ့ၤ, တၢ်အိၣ်ဖှိၣ်အပှၤမၤစၢၤတၢ်မ့ၢ်ဂ့ၤ, ပှၤလဲၤလၢညါမ့ၢ်ဂ့ၤ, ပှၤစံၣ်တဲၤတဲလီၤတၢ်ဖိမ့ၢ်ဂ့ၤ, ပှၤသးစၢ်မ့ၢ်ဂ့ၤ, ပှၤသးပှၢ်မ့ၢ်ဂ့ၤ, ဒီပုၢ်ဝဲၢ်မုၣ်မ့ၢ်ဂ့ၤ, ဒီပုၢ်ဝဲၢ်ခွါမ့ၢ်ဂ့ၤ နမၤစၢၤ ဒီပုၢ်ဝဲၢ်မုၣ်ခွါသ့. ဒီးခီဖျိလၢ နမၤစၢၤအဝဲသ့ၣ်အဃိ လီၤဂာ်ဒ်သိးဒီး ယဟိဝၤယွၤ စံးဆၢက့ၤ အဝဲသ့ၣ် တၢ်ထုကဖၣ်. ယဟိဝၤယွၤ သူဝဲတၢ်အိၣ်ဖှိၣ်သးပှၢ် ဒီးအခ့အပှၤလၢ အသးတီတဖၣ် လၢက “ဟ့ၣ်ဂံၢ်ဟ့ၣ်ဘါ” ပှၤလၢအအဲၣ်အီၤ ဒီးဃ့တၢ်မၤစၢၤ လၢအအိၣ်. (ကလီးစဲ ၄:၁၁) ပမၤဘၣ် ယဟိဝၤယွၤအတၢ်မၤ ဒီးမၤစၢၤဘၣ် ဒီပုၢ်ဝဲၢ်မုၣ်ခွါ အဃိ ပသးခုညါ. ဖဲတၢ်ဆါရၤလီၤသး, ဖဲပဒီပုၢ်ဝဲၢ်မုၣ်ခွါ ထံၣ်ဘၣ် န့ဆၢၣ်တၢ်ဘၣ်ဒိဘၣ်ထံး ဒီးတၢ်မၤအၢမၤနးအခါ ပမၤစၢၤအဝဲသ့ၣ် ဒီးဟ့ၣ်ဂံၢ်ဟ့ၣ်ဘါအဝဲသ့ၣ်သ့.
မၤစၢၤပှၤဂၤ ဖဲတၢ်ဆါရၤလီၤသးအခါ
၂. ဖဲတၢ်ဆါရၤလီၤသးအခါ ဘၣ်မနုၤအဃိ ကကီလၢ ပကမၤစၢၤပှၤဂၤလဲၣ်.
၂ ဖဲတၢ်ဆါရၤလီၤသးအခါ ပကမၤစၢၤလိာ်သး တဂၤဒီးတဂၤန့ၣ် တညီဘၣ်. အဒိ ပဘၣ်သး လဲၤအိၣ်သကီး ပသကီးနာ်က့ တၢ်လီၤဘၣ်ယိၣ်အိၣ် အဃိ ပလဲၤတသ့ဘၣ်. ဒီးပှၤလၢ အတၢ်တအိၣ်အါအါဘၣ်တဖၣ်န့ၣ် ပဘၣ်သး ကီးအီၣ်အဝဲသ့ၣ်မ့ၤ နာ်က့ ပကီးအဝဲသ့ၣ် တသ့ကၠ့ၤဘၣ်. ဘၣ်သ့ၣ်သ့ၣ် ပဘၣ်သး မၤစၢၤပှၤဂၤနာ်က့ ပဟံၣ်ဖိဃီဖိစ့ၢ်ကီး တၢ်ကီတၢ်ခဲအိၣ်အဃိ ပမၤစၢၤပှၤဂၤ တသ့အါအါဘၣ်. နာ်က့ပကျဲးစၢး မၤစၢၤပှၤဂၤ လၢအဂ့ၤကတၢၢ်အဃိ ယဟိဝၤယွၤ ဘၣ်သးပှၤ. (ကတိၤဒိ ၃:၂၇; ၁၉:၁၇) ပမၤစၢၤပှၤဂၤ ကသ့ဒ်လဲၣ်.
၃. တၢ်အိၣ်ဖှိၣ်သးပှၢ်လၢ အအိၣ်တၢ်အိၣ်ဖှိၣ် တဖျၢၣ်ဃီဒီး ဒီပုၢ်ဝဲၢ်မုၣ်ဒဲစံၤန့ၣ် ပမၤလိန့ၢ်တၢ်လၢ အဝဲသ့ၣ်အိၣ်ဒ်လဲၣ်. (ယံးရမံယၤ ၂၃:၄)
၃ တၢ်အိၣ်ဖှိၣ်သးပှၢ်တဖၣ် မၤစၢၤ ဒီပုၢ်ဝဲၢ်မုၣ်ခွါတဖၣ် ကသ့ဒ်လဲၣ်. နမ့ၢ်ကဲ တၢ်အိၣ်ဖှိၣ်သးပှၢ်န့ၣ် နဘၣ်သ့ၣ်ညါ ဒီပုၢ်ဝဲၢ်မုၣ်ခွါအဂ့ၢ်ဂ့ၤဂ့ၤ. (ဖး ယံးရမံယၤ ၂၃:၄.) ဒီပုၢ်ဝဲၢ်မုၣ်ဒဲစံၤ လၢပမၤလိအဂ့ၢ်လၢ တၢ်မၤလိလၢ အပူၤကွံာ်တခါန့ၣ် အတဲဝဲလၢ “တၢ်အိၣ်ဖှိၣ်သးပှၢ်တဖၣ်န့ၣ် ဟးစံၣ်တဲၤတဲလီၤတၢ်ဒီးယၤ ဒီးဒီပုၢ်ဝဲၢ်အဂၤတဖၣ် ဒီးအဝဲသ့ၣ် ရ့ဒီးပှၤကၠ့ၤ.” b တၢ်အိၣ်ဖှိၣ်သးပှၢ်တဖၣ် မၤဝဲဒ်န့ၣ်အဃိ ဖဲခိၤရိၤနၤတၢ်ဆါလီၤ ဒီးဒီပုၢ်ဝဲၢ်မုၣ်ဒဲစံၤ အဟံၣ်ဖိဃီဖိတနီၤ သံဝဲအခါ ညီဝဲလၢ တၢ်အိၣ်ဖှိၣ်သးပှၢ်တဖၣ် ကမၤစၢၤအီၤ.
၄ ဘၣ်မနုၤအဃိ ဒီပုၢ်ဝဲၢ်မုၣ်ဒဲစံၤ ဃ့တၢ်မၤစၢၤလၢ တၢ်အိၣ်ဖှိၣ်သးပှၢ်အအိၣ် ဘူၣ်လဲၣ်. ဒီးပန့ၢ်ဘၣ် တၢ်မၤလိဒ်လဲၣ်.
၄ ဒီပုၢ်ဝဲၢ်မုၣ်ဒဲစံၤ တဲဝဲလၢ “တၢ်အိၣ်ဖှိၣ်သးပှၢ်တဖၣ် ကဲပာ်စၢၤယသကီးလံ အဃိ ယတဲဘၣ် အဝဲသ့ၣ်လၢ ယတၢ်တူၢ်ဘၣ် ဒီးယတၢ်ကီတၢ်ခဲဘူၣ်.” နမ့ၢ်ကဲတၢ်အိၣ်ဖှိၣ်သးပှၢ်န့ၣ် တချုးလၢ တၢ်ကီတၢ်ခဲ ကဲထီၣ်ဒံးဘၣ်အခါ ရ့လိာ်သးဒီး ဒီပုၢ်ဝဲၢ်မုၣ်ခွါ ဒီးကဲအဝဲသ့ၣ်သကီး. နမ့ၢ်မၤဒ်န့ၣ်န့ၣ် ဖဲတၢ်ဆါရၤလီၤသးအခါ နလဲၤဟးအိၣ်သကီးအဝဲသ့ၣ် မ့ၢ်တသ့ဘၣ်နာ်က့ နမၤစၢၤ အဝဲသ့ၣ်သ့ဒံး. ဒီပုၢ်ဝဲၢ်မုၣ်ဒဲစံၤ တဲဝဲလၢ “ဘၣ်တနံၤနံၤန့ၣ် တၢ်အိၣ်ဖှိၣ်သးပှၢ် ကီးယၤလၢလီတဲဆိ ဒီးဆှၢန့ၢ်မဲးစ့း တဘျုးဂၤညါ. လံာ်စီဆှံအဆၢ လၢအဝဲသ့ၣ်ဆှၢန့ၢ်ယၤ တနီၤန့ၣ် ယသ့ၣ်ညါပာ်စၢၤလံနာ်က့ အထီးဘၣ်ယသးဒံး.”
၅. တၢ်အိၣ်ဖှိၣ်သးပှၢ်တဖၣ် ကသ့ၣ်ညါ ဒီပုၢ်ဝဲၢ်မုၣ်ခွါ တၢ်လိၣ်ဘၣ် ဒီးမၤစၢၤအဝဲသ့ၣ်အဂီၢ် ကဘၣ်မၤဝဲဒ်လဲၣ်.
၅ ဒ်သိးဒီး ပကသ့ၣ်ညါ ဒီပုၢ်ဝဲၢ်မုၣ်ခွါတဖၣ် အတၢ်လိၣ်ဘၣ်အဂီၢ် ပကဘၣ် သံကွၢ်အဝဲသ့ၣ် သ့သ့ဘၣ်ဘၣ် ဒီးတဘၣ် မၤမဲာ်ဆှးအဝဲသ့ၣ်ဘၣ်. (ကတိၤဒိ ၂၀:၅) အဒိ သံကွၢ် အဝဲသ့ၣ်လၢ အလိၣ်ဘၣ်တၢ်မၤစၢၤ လၢတၢ်အီၣ်တၢ်အီ, ကသံၣ်ကသီ ဒီးတၢ်အဂၤအဂီၢ်ဧါ. အဝဲသ့ၣ် ဖံးအီၣ်မၤအီၣ်ဒ်လဲၣ်, အဝဲသ့ၣ် ဟ့ၣ်ဟံၣ်လဲန့ၢ်ဧါ ဒီးဒ်သိးဒီး အဝဲသ့ၣ် ကန့ၢ်ဘၣ် ပဒိၣ်တၢ်မၤစၢၤအဂီၢ် အလိၣ်ဘၣ်လၢ ပှၤကမၤစၢၤအီၤဧါ. ဒီပုၢ်ဝဲၢ်မုၣ်ဒဲစံၤန့ၣ် ဒီပုၢ်ဝဲၢ်မုၣ်ခွါတဖၣ် မၤစၢၤအီၤလၢ နီၢ်ခိတၢ်လိၣ်ဘၣ်. မ့မ့ၢ်တၢ်အိၣ်ဖှိၣ်သးပှၢ်တဖၣ်န့ၣ် မၤစၢၤအီၤလၢ နီၢ်သးတကပၤ ဒီးမၤမုာ်ထီၣ်အသး ဒ်သိးဒီး အလဲၤခီဖျိ တၢ်မၤကွၢ်တဖၣ်ကန့ၢ်. ဒီပုၢ်ဝဲၢ်မုၣ်ဒဲစံၤ တဲဝဲလၢ “တၢ်အိၣ်ဖှိၣ်သးပှၢ်တဖၣ်န့ၣ် အဃ့ထုကဖၣ်တၢ်ဒီးယၤ ဒီးအဝဲသ့ၣ်ဃ့ မနုၤလဲၣ်န့ၣ် ယတနီၣ်ဘၣ်လၢၤဘၣ်နာ်က့ ယနီၣ်ဘၣ်လၢ ယသးမုာ်ထီၣ်က့ၤ. အဝဲသ့ၣ် မၤစၢၤယၤ ကၠဲအံၤအဃိ လီၤဂာ်ဒ်သိးဒီး ယဟိဝၤယွၤ တဲယၤလၢ ‘နတအိၣ်ထဲတဂၤဘၣ်.’”—ယၡါယၤ ၄၁:၁၀, ၁၃.
ပှၤထီၣ်တၢ်အိၣ်ဖှိၣ် လၢတၢ်အိၣ်ဖှိၣ်လီၢ် ဒီးလၢအ့ၤထၢၤနဲၣ်ပူၤ ဒီဒူၣ်ညါ. ဒီပုၢ်ဝဲၢ်တဖၣ် ဟ့ၣ်ထီၣ်တၢ်စံးဆၢ ဒီးဒီပုၢ်ဝဲၢ်တဂၤ အိၣ်တဆူၣ်ဘၣ် နာ်က့ အထီၣ်တၢ်အိၣ်ဖှိၣ် ဒီးဟ့ၣ်တၢ်စံးဆၢအဃိ ဒီပုၢ်ဝဲၢ်ခွါလၢ အဖီၣ်မူဒါန့ၣ် နၢ်ဟူဘၣ်တၢ်စံးဆၢအါမး ဒီးအသးခု (ကွၢ်လံာ်အဆၢ ၆)
၆. ပဝဲကီးဂၤဒဲးန့ၣ် ပဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ ကသ့ဒ်လဲၣ်. (ကွၢ်တၢ်ဂီၤ.)
၆ ဒီပုၢ်ဝဲၢ်မုၣ်ခွါတဖၣ် မၤစၢၤလိာ်သး ကသ့ဒ်လဲၣ်. ဘၣ်သ့ၣ်သ့ၣ် ပကဆိမိၣ်လၢ တၢ်အိၣ်ဖှိၣ်သးပှၢ်တဖၣ် အိၣ်ဒီးမူဒါလၢ ကဘၣ်ဟ့ၣ်ဂံၢ်ဟ့ၣ်ဘါပှၤဂၤ. နာ်က့ ယဟိၤယွၤ ဘၣ်သးဝဲလၢ ပကဟ့ၣ်ဂံၢ်ဟ့ၣ်ဘါ ဒီးမၤစၢၤလိာ်သးကၠ့ၤ. (ကလၤတံ ၆:၁၀) ပမၤစၢၤ ပှၤလၢအအိၣ်တဆူၣ်ဘၣ် မ့ၢ်သ့ ထဲတစဲးဖိနာ်က့ ကကဲဘျုးလၢအဂီၢ် ဖးဒိၣ်ညါ. အဒိ ဖိသၣ်တဂၤ ကကွဲးလံာ် ဒီးဆွဲတၢ်ဂီၤလၢ ကဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်တဂၤဂၤ. မ့မ့ၢ်လၢပှၤသးစၢ်န့ၣ် ကလဲၤပှ့ၤန့ၢ်တၢ်လၢ ဒီပုၢ်ဝဲၢ်တဂၤဂၤအဂီၢ်. မ့မ့ၢ်လၢ ဒီပုၢ်ဝဲၢ်မုၣ်ခွါအဂၤန့ၣ် ကဖီတၢ်အီၣ် လၢဒီပုၢ်ဝဲၢ်လၢ အအိၣ်တဆူၣ်ဘၣ်တဂၤဂၤအဂီၢ် ဒီးလဲၤဆှၢန့ၢ်ဝဲ လၢအဟံၣ်. ဖဲတၢ်ဆါရၤလီၤသးအခါ ပဒီပုၢ်ဝဲၢ်လၢ တၢ်အိၣ်ဖှိၣ်ပူၤကီးဂၤဒဲး လိၣ်ဘၣ်ဝဲ တၢ်ဟ့ၣ်ဂံၢ်ဟ့ၣ်ဘါ. ဒီးပမ့ၢ်ထီၣ်တၢ်အိၣ်ဖှိၣ်လၢ ဘီမုၢ်ဘျီၣ်ဒိၣ်မ့ၢ်ဂ့ၤ ထီၣ်လၢအ့ၤထၢၤနဲၣ်ပူၤမ့ၢ်ဂ့ၤ ဖဲတၢ်အိၣ်ဖှိၣ်ဝံၤအခါ ပအိၣ်တ့ၢ် ဒီးတဲသကီးတၢ်ဒီး ဒီပုၢ်ဝဲၢ်မုၣ်ခွါသ့. တကးဒံးဘၣ် ဖဲတၢ်ဆါရၤလီၤသးခါန့ၣ် တၢ်အိၣ်ဖှိၣ်သးပှၢ်တဖၣ် ဘၣ်မၤတၢ် ဒီဒူၣ်ညါ ဒီးအဝဲသ့ၣ်လိၣ်ဘၣ် တၢ်ဟ့ၣ်ဂံၢ်ဟ့ၣ်ဘါကၠ့ၤ. အဃိ ဒီပုၢ်ဝဲၢ်မုၣ်ခွါတဖၣ် ကွဲးစံးဘျုးစံးဖှိၣ်အဝဲသ့ၣ်. ပဝဲကီးဂၤဒဲးန့ၣ် ပကဘၣ် “ဆဲးဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ ဒီးမၤမုာ်ထီၣ်လိာ်သး တဂၤဒီးတဂၤ.”—၁ သ့းစၤလနံ ၅:၁၁.
မၤစၢၤပှၤဂၤ ဖဲန့ဆၢၣ်တၢ်ဘၣ်ဒိဘၣ်ထံး ကဲထီၣ်အခါ
၇. န့ဆၢၣ်တၢ်ဘၣ်ဒိဘၣ်ထံး ကဲထီၣ်အဃိ ပှၤအါဂၤထံၣ်ဘၣ် တၢ်ကီတၢ်ခဲဒ်လဲၣ်.
၇ န့ဆၢၣ်တၢ်ဘၣ်ဒိဘၣ်ထံး ကဲထီၣ်အဃိ လၢတဖျးမဲာ်အတီၢ်ပူၤန့ၣ် ပှၤတနီၤ အတၢ်ဖိတၢ်လံၤ ဒီးအဟံၣ်အဃီဟးဂီၤကွံာ် ဒီးပှၤလၢအဝဲသ့ၣ်အဲၣ်ဝဲန့ၣ် သံသဒၣ်ကွံာ်အီၤ. ပဒီပုၢ်ဝဲၢ်မုၣ်ခွါ တနီၤ ထံၣ်ဘၣ် တၢ်ကီတၢ်ခဲဒ်န့ၣ်. အဃိ ပမၤစၢၤအဝဲသ့ၣ် ကသ့ဒ်လဲၣ်.
၈. တချုးလၢ န့ဆၢၣ်တၢ်ဘၣ်ဒိဘၣ်ထံး ကဲထီၣ်ဒံးဘၣ်န့ၣ် တၢ်အိၣ်ဖှိၣ်သးပှၢ် ဒီးဟံၣ်ခိၣ်တဖၣ် ကဘၣ်မၤဝဲမနုၤလဲၣ်.
၈ တၢ်အိၣ်ဖှိၣ်သးပှၢ်တဖၣ် မၤစၢၤ ဒီပုၢ်ဝဲၢ်မုၣ်ခွါတဖၣ် ကသ့ဒ်လဲၣ်. တချုးလၢ န့ဆၢၣ်အတၢ်ဘၣ်ဒိဘၣ်ထံး ကဲထီၣ်ဒံးဘၣ်န့ၣ် မၤစၢၤ ဒီပုၢ်ဝဲၢ်မုၣ်ခွါတဖၣ် ဒ်သိးဒီး အဝဲသ့ၣ် ကအိၣ်ကတီၤပာ်စၢၤသး. ဒီးဒ်သိးဒီး ဒီပုၢ်ဝဲၢ်မုၣ်ခွါတဖၣ် ကပူၤဖျဲးဒီး တၢ်လီၤဘၣ်ယိၣ်အဂီၢ် အဝဲသ့ၣ် ကဘၣ်မၤဒ်လဲၣ် ဒီးကဘၣ်ဆဲးကျိးဒီး တၢ်အိၣ်ဖှိၣ်သးပှၢ်ဒ်လဲၣ်န့ၣ် အဝဲသ့ၣ် ကသ့ၣ်ညါအဂီၢ် မၤစၢၤအဝဲသ့ၣ်. ဒီပုၢ်ဝဲၢ်မုၣ်မါကြဲၣ် လၢပမၤလိဘၣ်အဂ့ၢ် လၢအပူၤကွံာ်တနွံန့ၣ် အတဲဝဲ “လၢတၢ်အိၣ်ဖှိၣ် အတၢ်လိၣ်ဘၣ်န့ၣ် တၢ်အိၣ်ဖှိၣ်သးပှၢ် ဟ့ၣ်ပလီၢ်ပှၤလၢ မ့ၣ်အူအီၣ်တၢ်လၢ ပှၢ်ပူၤသ့အဃိ ပဒိၣ်မ့ၢ်မၢပဟးထီၣ် ဒီးတၢ်လီၤဘၣ်ယိၣ် မ့ၢ်အိၣ်န့ၣ် ပကဘၣ်ဟးထီၣ် တဘျီဃီ.” တၢ်ဟ့ၣ်ပလီၢ်အံၤ ဖၣ်ဘၣ်အတီၤညါ. ယဲၢ်နွံဝံၤအလီၢ်ခံ မ့ၣ်အူအီၣ်ပှၢ် ဒီးတၢ်လီၤဘၣ်ယိၣ်အိၣ်လၢ ပှၤသးသမူအဂီၢ်ဖးဒိၣ်. အဃိ ဖဲဟံၣ်ဖိဃီဖိ တၢ်မၤလိလံာ်စီဆှံန့ၣ် ဟံၣ်ခိၣ်တဖၣ် ကဘၣ်တဲသကီးဝဲ ဘၣ်ဃးဒီး ဟံၣ်ဖိဃီဖိ တဂၤဘၣ်တဂၤန့ၣ် ကဘၣ် အိၣ်ကတီၤပာ်စၢၤသးလၢ န့ဆၢၣ်တၢ်ဘၣ်ဒိဘၣ်ထံး အဂီၢ်ဒ်လဲၣ်. ဟံၣ်ဖိဃီဖိ ကီးဂၤဒဲး မ့ၢ်အိၣ်ကတီၤပာ်စၢၤသးန့ၣ် ဖဲန့ဆၢၣ်တၢ်ဘၣ်ဒိဘၣ်ထံး ကဲထီၣ်အခါ အဝဲသ့ၣ် တဘၣ်ယိၣ်တၢ် အါအါဘၣ်.
၉. တချုးလၢ န့ဆၢၣ်တၢ်ဘၣ်ဒိဘၣ်ထံး ကဲထီၣ်ဒံးဘၣ် ဒီးကဲထီၣ်ဝံၤအလီၢ်ခံန့ၣ် တၢ်အိၣ်ဖှိၣ်သးပှၢ်တဖၣ် ကဘၣ်ရဲၣ်ကျဲၤတၢ်ဒ်လဲၣ်.
၉ နမ့ၢ်ကဲ ကရူၢ်အပှၤကွၢ်တၢ်န့ၣ် တချုးလၢ န့ဆၢၣ်တၢ်ဘၣ်ဒိဘၣ်ထံး ကဲထီၣ်ဒံးဘၣ်အခါ ဟံန့ၢ်ပာ်စၢၤ ဒီပုၢ်ဝဲၢ်လၢအအိၣ်လၢ နတၢ်စံၣ်တဲၤတဲလီၤတၢ်ကရူၢ် အလီတဲစိနီၣ်ဂံၢ်. ကွဲးနီၣ်ဃာ်အီၤ ဒီးကၠးအဝဲသ့ၣ်လၢ မ့ၢ်အသူ အလီတဲစိနီၣ်ဂံၢ် တခါန့ၣ်ဒံးဧါ ဒီးမ့ၢ်အအိၣ်လၢ တၢ်လီၢ်တတီၤန့ၣ်ဒံးဧါ. နမ့ၢ်မၤဒ်န့ၣ်န့ၣ် ဖဲန့ဆၢၣ်တၢ်ဘၣ်ဒိဘၣ်ထံး ကဲထီၣ်သးခါ နဆဲးကျိးဒီး ဒီပုၢ်ဝဲၢ်မုၣ်ခွါကန့ၢ် ဒီးနကဘၣ်မၤစၢၤ အဝဲသ့ၣ်ဒ်လဲၣ်န့ၣ် နကသ့ၣ်ညါ. ဆှၢတၢ်ဂ့ၢ်တၢ်ကျိၤတဖၣ်အံၤလၢ တၢ်အိၣ်ဖှိၣ်သးပှၢ် လၢအရဲၣ်ကျဲၤတၢ်တဂၤ အအိၣ်တဘျီဃီ ဒီးအဝဲကဆဲးကျိးဒီး ကဝီၤအပှၤကွၢ်တၢ်. ဒီပုၢ်ဝဲၢ်ခွါတဖၣ်အံၤ မ့ၢ်မၤသကီးတၢ်ဒ်သိးသိးန့ၣ် အဝဲသ့ၣ်ကမၤစၢၤဘၣ် ဒီပုၢ်ဝဲၢ်မုၣ်ခွါ လၢအဂ့ၤကတၢၢ်. မ့ၣ်အူအီၣ်တၢ်ဝံၤအလီၢ်ခံ လၢ ၃၆ နၣ်ရံၣ်အတီၢ်ပူၤန့ၣ် ဒီပုၢ်ဝဲၢ်မုၣ်မါကြဲၣ် အကဝီၤအပှၤကွၢ်တၢ်န့ၣ် တမံဝဲဘၣ်. အမၤသကီးတၢ်ဒီး တၢ်အိၣ်ဖှိၣ်သးပှၢ်တဖၣ် ဒ်သိးကဆဲးကျိး ဒီးမၤစၢၤ ဒီပုၢ်ဝဲၢ်မုၣ်ခွါအဂၤ ၄၅၀ လၢအဘၣ်ဟးထီၣ် လၢအတၢ်လီၢ်. (၂ ကရံၣ်သူး ၁၁:၂၇) အဃိ ဒီပုၢ်ဝဲၢ်မုၣ်ခွါတဖၣ်အံၤ န့ၢ်ဘၣ်တၢ်မၤစၢၤ ဒီးန့ၢ်ဘၣ် တၢ်အိၣ်တၢ်ဆိးအလီၢ်.
၁၀. ဘၣ်မနုၤအဃိ တၢ်အိၣ်ဖှိၣ်သးပှၢ်တဖၣ်န့ၣ် ကဘၣ်လဲၤဟးအိၣ်သကီး ဒီပုၢ်ဝဲၢ်မုၣ်ခွါ ဒီးဟ့ၣ်ဂံၢ်ဟ့ၣ်ဘါ အဝဲသ့ၣ်လဲၣ်. (ယိၤဟၣ် ၂၁:၁၅)
၁၀ တၢ်အိၣ်ဖှိၣ်သးပှၢ်တဖၣ်န့ၣ် အိၣ်ဒီးမူဒါလၢ ကဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါ ဒီးဖဲဒီပုၢ်ဝဲၢ်မုၣ်ခွါ သးအုးအခါ အဝဲသ့ၣ် ကဘၣ်မၤမုာ်ထီၣ်အဝဲသ့ၣ် လၢကစၢ်ယွၤ ကလုၢ်ကထါ. (၁ ပ့းတရူး ၅:၂) ဖဲန့ဆၢၣ်တၢ်ဘၣ်ဒိဘၣ်ထံး ကဲထီၣ်အခါ အဆိကတၢၢ်န့ၣ် တၢ်အိၣ်ဖှိၣ်သးပှၢ်တဖၣ် ကဘၣ် သ့ၣ်ညါဝဲလၢ ဒီပုၢ်ဝဲၢ်မုၣ်ခွါတဖၣ် လဲၤတုၤလၢ တၢ်လီၢ်လၢအပူၤဖျဲးလံဧါ. အဝဲသ့ၣ်အိၣ်ဒီး တၢ်အီၣ်တၢ်အီ, တၢ်ကူတၢ်ကၤ ဒီးတၢ်အိၣ်တၢ်ဆိးအလီၢ်လံဧါ. ဒီပုၢ်ဝဲၢ်လၢ အထံၣ်ဘၣ် န့ဆၢၣ်တၢ်ဘၣ်ဒိဘၣ်ထံးန့ၣ် အကလိၣ်ဘၣ် တၢ်ဟ့ၣ်ဂံၢ်ဟ့ၣ်ဘါ လၢနီၢ်သးတကပၤ ဒီးအကလိၣ်ဘၣ်လၢ ပှၤကမၤမုာ်ထီၣ်အသး တဘျုးလါညါ. (ဖး ယိၤဟၣ် ၂၁:၁၅.) ဒီပုၢ်ဝဲၢ်ခွါဟဲရိၤန့ၣ် အကဲဝဲ ဝဲၤတြၢ်ကမံးတံာ် ဒီးအထံၣ်လိာ်သးဒီး ဒီပုၢ်ဝဲၢ်မုၣ်ခွါအါဂၤ လၢအထံၣ်ဘၣ် န့ဆၢၣ်တၢ်ဘၣ်ဒိဘၣ်ထံး. အတဲဝဲလၢ “ဒ်သိးဒီး ဒီပုၢ်ဝဲၢ်တဖၣ်န့ၣ် အတၢ်အိၣ်သး ကကဲထီၣ်က့ၤ ဒ်လီၢ်လီၢ်အဂီၢ် အဝဲသ့ၣ်လိၣ်ဘၣ် တၢ်ဆၢကတီၢ် ဖၣ်ယံာ်ညါ. ဘၣ်ဆၣ် လၢခံကယီကယီန့ၣ် အဝဲသ့ၣ် အိၣ်က့ၤဝဲ ဒ်အအိၣ်ညီနုၢ်အသိးသ့ နာ်က့ ပှၤလၢ အအဲၣ်ဝဲတဂၤဂၤ မ့ၢ်သံသဒၣ်ကွံာ်အီၤ ဒီးတၢ်လၢ အပာ်လုၢ်ပာ်ပှ့ၤဝဲ မ့ၢ်လီၤမၢ် ဒီးအမ့ၢ်ထံၣ်ဘၣ် တၢ်လီၤပျံၤလီၤဖုးဟီဒု ဘၣ်သ့ၣ်သ့ၣ် တၢ်ကဲထီၣ်သးတဖၣ်န့ၣ် ကအိၣ်တ့ၢ်လၢအသးပူၤ ဖၣ်ယံာ်ဒံး. တၢ်လၢပှၤဟီၣ်ခိၣ်ဖိန့ၣ် ညီနုၢ်အဝဲသ့ၣ် ကတူၢ်ဘၣ်တၢ်ကၠဲန့ၣ်. ပဒီပုၢ်ဝဲၢ် မ့ၢ်တူၢ်ဘၣ်တၢ်ကၠဲန့ၣ်နာ်က့ အတၢ်နာ်အိၣ်ဒံး.”
၁၁. ဟံၣ်ဖိဃီဖိလၢ အထံၣ်ဘၣ် န့ဆၢၣ်တၢ်ဘၣ်ဒိဘၣ်ထံးန့ၣ် အဝဲသ့ၣ်ကလိၣ်ဘၣ် တၢ်မနုၤလဲၣ်.
၁၁ တၢ်အိၣ်ဖှိၣ်သးပှၢ်တဖၣ် မၤထွဲဝဲ တၢ်ဟ့ၣ်ကူၣ်လၢ “ပှၤလၢအဟီၣ်န့ၣ် ဟီၣ်ဃုာ်ဒီးအီၤ.” (ရိမ့ၤ ၁၂:၁၅) အဃိ ဒီပုၢ်ဝဲၢ်မုၣ်ခွါလၢ အထံၣ်ဘၣ် န့ဆၢၣ်တၢ်ဘၣ်ဒိဘၣ်ထံးန့ၣ် တၢ်အိၣ်ဖှိၣ်သးပှၢ်တဖၣ် ကဘၣ်မၤစၢၤအဝဲသ့ၣ် ဒ်သိးဒီး အဝဲသ့ၣ် ကသ့ၣ်ညါလၢ ယဟိဝၤယွၤ ဒီးဒီပုၢ်ဝဲၢ်မုၣ်ခွါတဖၣ် အဲၣ်အဝဲသ့ၣ်ဒံး. တကးဒံးဘၣ် တၢ်အိၣ်ဖှိၣ်သးပှၢ်တဖၣ် ကဘၣ်မၤစၢၤ ဟံၣ်ဖိဃီဖိတဖၣ် ဒ်သိးအဝဲသ့ၣ် ကဆဲးဃ့ထုကဖၣ်, မၤလိလံာ်စီဆှံ, ထီၣ်တၢ်အိၣ်ဖှိၣ် ဒီးကဆဲး စံၣ်တဲၤတဲလီၤတၢ်. တၢ်အိၣ်ဖှိၣ်သးပှၢ်တဖၣ်န့ၣ် ကဘၣ်ဟ့ၣ်ဂံၢ်ဟ့ၣ်ဘါ မိပါတဖၣ် ဒ်သိးဒီး အဝဲသ့ၣ် ကမၤစၢၤအဖိလၢ အဖိကသးစၢၢ်ဆၢဝဲ အတၢ်ရ့လိာ်သးဒီး ယဟိဝၤယွၤ ဒီးကဆိမိၣ်ထံ ယဟိဝၤယွၤ အတၢ်အၢၣ်လီၤ. ဒီးမိပါတဖၣ် ကဘၣ်တဲပၠးအဖိလၢ ယဟိဝၤယွၤန့ၣ် ကဲအသကီး ဒီးကဆဲးမၤစၢၤအဝဲသ့ၣ်. တကးဒံးဘၣ် ကဘၣ်တဲပၠးအဖိလၢ ပဒီပုၢ်ဝဲၢ်မုၣ်ခွါလၢဟီၣ်ခိၣ်ဒီဘ့ၣ်န့ၣ် သးအိၣ်မၤစၢၤ အဝဲသ့ၣ်ထီဘိ.—၁ ပ့းတရူး ၂:၁၇.
န့ဆၢၣ်တၢ်ဘၣ်ဒိဘၣ်ထံး ကဲထီၣ်ဝံၤအလီၢ်ခံ နမၤစၢၤတၢ်သ့ဧါ (ကွၢ်လံာ်အဆၢ ၁၂) e
၁၂. ဖဲန့ဆၢၣ်တၢ်ဘၣ်ဒိဘၣ်ထံး ကဲထီၣ်အခါ ဒီပုၢ်ဝဲၢ်မုၣ်ခွါတဖၣ် မၤစၢၤလိာ်သး ကသ့ဒ်လဲၣ်. (ကွၢ်တၢ်ဂီၤ.)
၁၂ ဒီပုၢ်ဝဲၢ်မုၣ်ခွါတဖၣ် မၤစၢၤလိာ်သး ကသ့ဒ်လဲၣ်. န့ဆၢၣ်တၢ်ဘၣ်ဒိဘၣ်ထံး မ့ၢ်ကဲထီၣ်သးလၢ အဘူးဒီးနတၢ်လီၢ်န့ၣ် ဒ်သိးဒီး နကမၤစၢၤ ဒီပုၢ်ဝဲၢ်မုၣ်ခွါအဂီၢ် နဃ့တၢ်ဟ့ၣ်ကူၣ်လၢ တၢ်အိၣ်ဖှိၣ်သးပှၢ်တဖၣ် အအိၣ်သ့. ဒီပုၢ်ဝဲၢ်မုၣ်ခွါလၢ အထံၣ်ဘၣ် န့ဆၢၣ်တၢ်ဘၣ်ဒိဘၣ်ထံးန့ၣ် ဘၣ်သ့ၣ်သ့ၣ် နကီးအိၣ် အဝဲသ့ၣ် လၢနဟံၣ်သ့ ဒီးဒီပုၢ်ဝဲၢ်လၢ အမၤစၢၤတၢ်လၢ န့ဆၢၣ်တၢ်ဘၣ်ဒိဘၣ်ထံးန့ၣ် ဟဲအိၣ်လၢနဟံၣ် တစိၢ်တလီၢ်သ့. နဆှၢန့ၢ် အဝဲသ့ၣ် တၢ်အီၣ်တၢ်အီ ဒီးတၢ်ဖိတၢ်လံၤလၢ အဝဲသ့ၣ်လိၣ်ဘၣ်ဝဲသ့. မ့မ့ၢ် ဒီပုၢ်ဝဲၢ်တဖၣ်လၢ အထံၣ်ဘၣ် န့ဆၢၣ်တၢ်ဘၣ်ဒိဘၣ်ထံး လၢအယံၤဒီး နအိၣ်တၢ်လီၢ်ဟီန့ၣ် နကမၤစၢၤ အဝဲသ့ၣ်ဒ်လဲၣ်. နမၤစၢၤအဝဲသ့ၣ် သ့ခီဖျိ နဃ့ထုကဖၣ်န့ၢ်တၢ်လၢ အဝဲသ့ၣ်အဂီၢ်. (၂ ကရံၣ်သူး ၁:၈-၁၁) န့ဆၢၣ်တၢ်ဘၣ်ဒိဘၣ်ထံးမ့ၢ်ကဲထီၣ်န့ၣ် နမၤစၢၤတၢ်သ့ခီဖျိ နဟ့ၣ်တၢ်မၤဘူၣ်လၢ ဟီၣ်ခိၣ်ဒီဘ့ၣ် တၢ်မၤအဂီၢ်. (၂ ကရံၣ်သူး ၈:၂-၅) နမ့ၢ်ဘၣ်သး လဲၤမၤစၢၤတၢ်လၢ န့ဆၢၣ်တၢ်ဘၣ်ဒိဘၣ်ထံး ကဲထီၣ်အလီၢ်န့ၣ် တဲပၠး နတၢ်အိၣ်ဖှိၣ်သးပှၢ် ဒီးကၠးအီၤလၢ နကဘၣ် မၤစၢၤတၢ်ဒ်လဲၣ်. ပှၤမ့ၢ်တူၢ်လိာ်နၤလၢ နကလဲၤမၤစၢၤတၢ်န့ၣ် ပှၤကဟ့ၣ်နၤ တၢ်သိၣ်လိတနီၤ ဒီးနမၤစၢၤတၢ်ကသ့ထီၣ်.
ဖဲဒီပုၢ်ဝဲၢ်မုၣ်ခွါတဖၣ် ထံၣ်ဘၣ်တၢ်မၤအၢမၤနးအခါ မၤစၢၤအဝဲသ့ၣ်
၁၃. လၢတၢ်လီၢ်လၢ ပှၤတြီ ပတၢ်ကရၢကရိတၢ်ဖံးတၢ်မၤန့ၣ် ပဒီပုၢ်ဝဲၢ်မုၣ်ခွါတဖၣ် ထံၣ်ဘၣ် တၢ်ကီတၢ်ခဲဒ်လဲၣ်.
၁၃ တၢ်လီၢ်လၢ ပှၤတြီ ပတၢ်ကရၢကရိတၢ်ဖံးတၢ်မၤန့ၣ် ဒီပုၢ်ဝဲၢ်မုၣ်ခွါတဖၣ် ထံၣ်ဘၣ် တၢ်မၤအၢမၤနး အဃိ ကီလၢအဝဲသ့ၣ်အဂီၢ်ဒိၣ်မး. တကးဒံးဘၣ် ဒီပုၢ်ဝဲၢ်လၢအအိၣ်လၢ တၢ်လီၢ်ဖဲန့ၣ်တဖၣ် ထံၣ်ဘၣ်ကျိၣ်စ့တၢ်ကီတၢ်ခဲ, အိၣ်တဆူၣ်ဘၣ် ဒီးပှၤလၢအဝဲသ့ၣ်အဲၣ်ဝဲတဖၣ် သံသဒၣ်အီၤ. ခီဖျိလၢ ပှၤတြီ ပတၢ်ကရၢကရိတၢ်ဖံးတၢ်မၤအဃိ တၢ်အိၣ်ဖှိၣ်သးပှၢ်တဖၣ် ကလဲၤဟးအိၣ်သကီး ဒီးတဲတၢ်ဒီး ဒီပုၢ်ဝဲၢ်မုၣ်ခွါလၢ အလိၣ်ဘၣ် တၢ်ဟ့ၣ်ဂံၢ်ဟ့ၣ်ဘါန့ၣ် တညီဘၣ်. ဒီပုၢ်ဝဲၢ်ခွါအီဒြ့ၤ လၢပတဲသကီးအဂ့ၢ် လၢတၢ်မၤလိ လၢပူၤကွံာ်တခါန့ၣ် တၢ်ကဲထီၣ်သးဒီးအီၤ ကၠဲန့ၣ်. လၢအတၢ်စံၣ်တဲၤတဲလီၤတၢ် ကရူၢ်ပူၤန့ၣ် ဒီပုၢ်ဝဲၢ်မုၣ်လၢ အထံၣ်ဘၣ်ကျိၣ်စ့ တၢ်ကီတၢ်ခဲ အိၣ်ဝဲတဂၤ. ဒီပုၢ်ဝဲၢ်မုၣ်တဂၤန့ၣ် အကါဘၣ်တဲးအဃိ အဘၣ်ဖွဲးသး တဘျုးဘျီညါ ဒီးအမၤတၢ်မၤ တကဲကၠ့ၤဘၣ်. ပှၤတြီ ပတၢ်ကရၢကရိတၢ်ဖံးတၢ်မၤတနီၤ ဒီးတၢ်ဆါရၤလီၤသးနာ်က့ ပဒီပုၢ်ဝဲၢ်မုၣ်ခွါတဖၣ် မၤစၢၤ ဒီပုၢ်ဝဲၢ်မုၣ်တဂၤအံၤအဃိ ပသ့ၣ်ညါဘၣ်လၢ ယဟိဝၤယွၤ ကွၢ်ထွဲဝဲ ပဒီပုၢ်ဝဲၢ်မုၣ်တဂၤအံၤ သပှၢ်တၢၢ်.
၁၄. တၢ်အိၣ်ဖှိၣ်သးပှၢ်တဖၣ် ပာ်လီၤတၢ်ဒိတၢ်တဲာ် လၢအဂ့ၤ ခီဖျိ သန့ၤအသးလၢ ယဟိဝၤယွၤ ကသ့ဒ်လဲၣ်.
၁၄ တၢ်အိၣ်ဖှိၣ်သးပှၢ်တဖၣ် မၤစၢၤ ဒီပုၢ်ဝဲၢ်မုၣ်ခွါတဖၣ် ကသ့ဒ်လဲၣ်. ဒီပုၢ်ဝဲၢ်ခွါအီဒြ့ၤန့ၣ် အဃ့ထုကဖၣ် လၢယဟိဝၤယွၤအအိၣ် ဒီးတၢ်လၢအမၤဝဲသ့ၣ်န့ၣ် အမၤဝဲ. အဃိ ယဟိဝၤယွၤ မၤဝဲဒ်လဲၣ်. ယဟိဝၤယွၤ သူဝဲ ဒီပုၢ်ဝဲၢ်မုၣ်ခွါအါဂၤ လၢတၢ်အိၣ်ဖှိၣ်ပူၤ ဒ်သိးကမၤစၢၤ ဒီပုၢ်ဝဲၢ်မုၣ်မၢကၢာ်တဂၤန့ၣ်. အဃိ ဒီပုၢ်ဝဲၢ်တနီၤန့ၣ် လဲၤဆှၢ ဒီပုၢ်ဝဲၢ်မုၣ်တဂၤန့ၣ်လၢ တၢ်ဆါဟံၣ်. မ့မ့ၢ်လၢအဂၤတနီၤန့ၣ် ဟ့ၣ်မၤစၢၤ ဒီပုၢ်ဝဲၢ်မုၣ်တဂၤန့ၣ် လၢကျိၣ်စ့. ယဟိဝၤယွၤ သူဝဲဒီပုၢ်ဝဲၢ်မုၣ်ခွါတဖၣ် လၢကမၤစၢၤ ဒီပုၢ်ဝဲၢ်မုၣ်တဂၤန့ၣ် လၢတၢ်လၢအဝဲသ့ၣ် မၤစၢၤဝဲသ့. ပဒီပုၢ်ဝဲၢ်တဖၣ်န့ၣ် အိၣ်ဒီးတၢ်သးဒူ, မၤသကီးတၢ်ဃူဃူဖိးဖိး ဒီးမၤစၢၤဝဲ ဒီပုၢ်ဝဲၢ်မုၣ်တဂၤန့ၣ်အဃိ ယဟိဝၤယွၤ ဆိၣ်ဂ့ၤအဝဲသ့ၣ်. (ဧ့ၤဘြံၤ ၁၃:၁၆) နမ့ၢ်ကဲ တၢ်အိၣ်ဖှိၣ်သးပှၢ်န့ၣ် ဖဲပှၤတြီ ပတၢ်ကရၢကရိတၢ်ဖံးတၢ်မၤအခါ ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါလၢ အဝဲသ့ၣ် ကမၤစၢၤလိာ်သး. (ယံးရမံယၤ ၃၆:၅, ၆) အဃိ ဒ်သိးနမၤစၢၤ ဒီပုၢ်ဝဲၢ်မုၣ်ခွါလၢ အလိၣ်ဘၣ်တၢ်မၤစၢၤ ကန့ၢ်အဂီၢ် အရ့ဒိၣ်ဒိၣ်မးလၢ နကဘၣ်သန့ၤသးလၢ ယဟိဝၤယွၤ ဒီးယဟိဝၤယွၤ ကမၤစၢၤနၤ.
၁၅. ဖဲပထံၣ်ဘၣ် တၢ်မၤအၢမၤနးအခါ ပအိၣ်ဃူအိၣ်ဖိးဒီး ပဒီပုၢ်ဝဲၢ်မုၣ်ခွါ ကသ့ဒ်လဲၣ်.
၁၅ ဒီပုၢ်ဝဲၢ်မုၣ်ခွါတဖၣ် မၤစၢၤလိာ်သး ကသ့ဒ်လဲၣ်. ပှၤမ့ၢ်တြီ ပတၢ်ကရၢကရိတၢ်ဖံးတၢ်မၤန့ၣ် ဘၣ်သ့ၣ်သ့ၣ် ပကဘၣ်အိၣ်ဖှိၣ်က့ၤလၢ ကရူၢ်ဆံးဆံးဖိ. အဃိ ခဲအံၤန့ၣ် အရ့ဒိၣ်ဒိၣ်မးလၢ ပကဘၣ်အိၣ် ဃူဃူဖိးဖိးထီဘိ. ပှၤလၢပကဘၣ်ဒုးအီၤန့ၣ် တကဲပဒီပုၢ်ဝဲၢ်ဘၣ်, အကဲဝဲ မုၣ်ကီၤလံၢ်. အဃိ တၢ်ဂ့ၢ်ကီမ့ၢ်အိၣ်န့ၣ် ပကဘၣ် မၤဘၣ်ဂီၢ်က့ၤ တဘျီဃီ ဒီးပကဘၣ် ကွၢ်ကပာ်ကွံာ် ဒီပုၢ်ဝဲၢ်တဖၣ် အတၢ်ကမၣ်. (ကတိၤဒိ ၁၉:၁၁; အ့းဖ့းစူး ၄:၂၆) တကးဒံးဘၣ် ပကဘၣ် သးအိၣ်မၤစၢၤလိာ်သး ထီဘိ. (တံတူး ၃:၁၄) ပထံၣ်ဘၣ်လၢ ဒီပုၢ်ဝဲၢ်မုၣ် လၢအလိၣ်ဘၣ်တၢ်မၤစၢၤတဂၤန့ၣ် ဒီပုၢ်ဝဲၢ်မုၣ်ခွါ မၤစၢၤသကီးအီၤအဃိ ကဲဘျုးလၢ ပှၤလၢအအိၣ်လၢ တၢ်စံၣ်တဲၤတဲလီၤကရူၢ်ပူၤ ဒီးအဝဲသ့ၣ် ထံၣ်လိာ်သးဒ်သိးဒီး အကဲဟံၣ်ဖိဃီဖိနီၢ်ကီၢ်.—စံးထီၣ်ပတြၢၤ ၁၃၃:၁.
၁၆. ဒ်ကလီးစဲ ၄:၃, ၁၈ ပာ်ဖျါဝဲအသိး ပမၤစၢၤ ပဒီပုၢ်ဝဲၢ်မုၣ်ခွါလၢ အထံၣ်ဘၣ် တၢ်မၤအၢမၤနးတဖၣ် ကသ့ဒ်လဲၣ်.
၁၆ ပဒိၣ်တဖၣ် တြီဝဲ ပတၢ်ကရၢကရိတၢ်ဖံးတၢ်မၤနာ်က့ ပဒီပုၢ်ဝဲၢ်မုၣ်ခွါအါဂၤန့ၣ် မၤဝဲ ယဟိဝၤယွၤ အတၢ်မၤဒံး. ခီဖျိလၢ အဝဲသ့ၣ်တၢ်စူၢ်တၢ်နာ်အဃိ တနီၤန့ၣ်လီၤဘၣ်လၢဃိာ်ပူၤ. အဃိ ပဃ့ထုကဖၣ်န့ၢ်တၢ်လၢ အဝဲသ့ၣ်ဒီးအဟံၣ်ဖိဃီဖိအဂီၢ် ဒီးပှၤလၢအဟ့ၣ်လီၤသး ဒီးမၤစၢၤအဝဲသ့ၣ်လၢ နီၢ်ခိနီၢ်သး ဒီးလဲၤထီၣ်ရူထီၣ်တ့ တကပၤအဂီၢ်သ့. c (ဖး ကလီးစဲ ၄:၃, ၁၈.) ပတၢ်ဃ့ထုကဖၣ်န့ၣ် ကဲဘျုးလၢ ပဒီပုၢ်ဝဲၢ်မုၣ်ခွါ အဂီၢ်ဖးဒိၣ်ညါ.—၂ သ့းစၤလနံ ၃:၁, ၂; ၁ တံၤမသ့း ၂:၁, ၂.
ခဲအံၤ နမၤစၢၤ နဟံၣ်ဖိဃီဖိလၢ ကအိၣ်ကတီၤပာ်စၢၤသး လၢတၢ်မၤအၢမၤနးအဂီၢ် ကသ့ဒ်လဲၣ် (ကွၢ်လံာ်အဆၢ ၁၇)
၁၇. ခဲအံၤ နအိၣ်ကတီၤပာ်စၢၤသးလၢ တၢ်မၤအၢမၤနးအဂီၢ် ကသ့ဒ်လဲၣ်.
၁၇ နၤဒီးနဟံၣ်ဖိဃီဖိန့ၣ် အိၣ်ကတီၤပာ်စၢၤသး လၢတၢ်မၤအၢမၤနး အဂီၢ်သ့. (မၤတၢ် ၁၄:၂၂) တဘၣ်ဆိမိၣ်ထဲ တၢ်ကီတၢ်ခဲ ကဟဲဘၣ်နၤတဂ့ၤ. နကဘၣ် မၤဂၢၢ်ကျၢၤထီၣ် နတၢ်ရ့လိာ်သးဒီး ယဟိဝၤယွၤ ဒီးမၤစၢၤနဖိတဖၣ် ဒ်သိးဒီး အတၢ်ရ့လိာ်သးဒီး ယဟိဝၤယွၤကဂ့ၤ. တဘျီတခီၣ် နမ့ၢ်ဘၣ်ယိၣ်တၢ်န့ၣ် တဲဘၣ်ယဟိဝၤယွၤ လၢနတၢ်ဘၣ်ယိၣ် ခဲလၢာ်. (စံးထီၣ်ပတြၢၤ ၆၂:၇, ၈) ဘၣ်မနုၤအဃိ ပနာ်န့ၢ်ယဟိဝၤယွၤ သ့လဲၣ်န့ၣ် တဲသကီးဒီး နဟံၣ်ဖိဃီဖိထီဘိ. d နမ့ၢ်မၤဒ်န့ၣ်န့ၣ် ဖဲနၤဒီးနဖိတဖၣ် ထံၣ်ဘၣ် တၢ်မၤအၢမၤနးအခါ သုပာ်သးမုာ်မုာ်ကသ့ ဒီးသုကအိၣ်ဒီး တၢ်သးဒူ.
၁၈. ခါဆူညါန့ၣ် ပကန့ၢ်ဘၣ် တၢ်မနုၤလဲၣ်.
၁၈ တၢ်သူၣ်မံသးမုာ် လၢကစၢ်ယွၤဟ့ၣ်ပှၤန့ၣ် မၤစၢၤပှၤလၢ ပကအိၣ်ဘၣ် ပူၤပူၤဖျဲးဖျဲး ဒီးပတပျံၤတၢ်ဘၣ်. (ဖံလံးပံၤ ၄:၆, ၇) ခီဖျိလၢ ယဟိဝၤယွၤ ဟ့ၣ်ပှၤ တၢ်သူၣ်မံသးမုာ်အဃိ ပမ့ၢ်ဆိးက့, ထံၣ်ဘၣ် န့ဆၢၣ်တၢ်ဘၣ်ဒိဘၣ်ထံး ဒီးထံၣ်ဘၣ် တၢ်မၤအၢမၤနး လၢဆၢကတီၢ်ခဲအံၤနာ်က့ ပပာ်ပသးမုာ်မုာ်သ့. ယဟိဝၤယွၤ သူဝဲတၢ်အိၣ်ဖှိၣ်သးပှၢ် လၢအမၤတၢ်ဆူၣ်ဆူၣ် လၢကကွၢ်ထွဲပှၤ. တကးဒံးဘၣ် အဟ့ၣ်ပှၤ တၢ်ခွဲးတၢ်ယာ်လၢ ပကမၤစၢၤလိာ်သး. ပမ့ၢ်အိၣ်ကတီၤပာ်စၢၤသး တချုးလၢ ပထံၣ်ဘၣ် တၢ်မၤကွၢ်ဒံးဘၣ်န့ၣ် ခါဆူညါ ဖဲပထံၣ်ဘၣ် တၢ်မၤကွၢ်တဖၣ်ဒီး “တၢ်နးတၢ်ဖှီၣ်ဖးဒိၣ်” အခါ ပလဲၤခီဖျိအီၤကန့ၢ်. (မးသဲ ၂၄:၂၁) ဖဲပထံၣ်ဘၣ် တၢ်မၤကွၢ်တဖၣ်အခါ ပကဘၣ်အိၣ်ဒီး တၢ်သူၣ်မံသးမုာ် ဒီးပကဘၣ်မၤစၢၤပှၤဂၤလၢ အဝဲသ့ၣ် ကအိၣ်ဒီး တၢ်သူၣ်မံသးမုာ်. ဒီးဖဲတၢ်နးတၢ်ဖှီၣ်ဖးဒိၣ် ဝံၤအလီၢ်ခံန့ၣ် ပတထံၣ်ဘၣ် တၢ်ဘၣ်ယိၣ်တဖၣ်အံၤလၢၤဘၣ်. ဒီးလၢခံကတၢၢ်န့ၣ် ပကန့ၢ်ဘၣ် တၢ်သူၣ်မံသးမုာ်လၢ ယဟိဝၤယွၤ ကဟ့ၣ်ပှၤ လီၤထူလီၤယိာ်.—ယၡါယၤ ၂၆:၃, ၄.
တၢ်သးဝံၣ် ၁၀၉ အဲၣ်လိာ်ကွံလိာ်သုသးဒိၣ်ဒိၣ် လၢသူၣ်ဒီဖျၢၣ်သးဒီဖျၢၣ်
a အါဘျီန့ၣ် ယဟိဝၤယွၤ သူဝဲအခ့အပှၤ လၢအသးတီတဖၣ် ဒ်သိးဒီး ကမၤစၢၤ ပှၤလၢအထံၣ်ဘၣ် တၢ်ကီတၢ်ခဲ. ဒီးပဒီပုၢ်ဝဲၢ်မုၣ်ခွါတဖၣ် မ့ၢ်ထံၣ်ဘၣ် တၢ်ကီတၢ်ခဲန့ၣ် ယဟိဝၤယွၤ သူပှၤဒ်သိးဒီး ပကဟ့ၣ်ဂံၢ်ဟ့ၣ်ဘါ အဝဲသ့ၣ်. အဃိ ပှၤလၢအလိၣ်ဘၣ် တၢ်မၤစၢၤန့ၣ် ပမၤစၢၤအဝဲသ့ၣ် ကသ့ဒ်လဲၣ်. ပကတဲသကီး လၢတၢ်မၤလိတခါအံၤ.
b ပှၤမံၤတနီၤန့ၣ် ပှၤဆီတလဲဝဲ.
c ပှၤမ့ၢ်ကွဲးလံာ်လၢ ဒီပုၢ်ဝဲၢ်လၢ အလီၤဘၣ်လၢဃိာ်ပူၤအအိၣ်န့ၣ် ဝဲၤတြၢ် မ့တမ့ၢ် ပှၤလၢအအိၣ်လၢ ဝဲၤလီၢ်ခိၣ်သ့ၣ်န့ၣ် ဆှၢန့ၢ်လံာ်ပရၢ လၢအဝဲသ့ၣ်အအိၣ် တသ့ဘၣ်.
d ကွၢ်တၢ်မၤလိလၢ အခိၣ်တီမ့ၢ်ဝဲ “ဆၢကတီၢ်ခဲအံၤ အိၣ်ကတဲာ်ကတီၤပာ်စၢၤနသး လၢတၢ်မၤအၢမၤနးအဂီၢ်” လၢအအိၣ်လၢ လါယူၤလံ, ၂၀၁၉ တၢးထီခိးတၢ် အပူၤ.
e တၢ်ဂီၤ အခီပညီ– ပှၤဒီမိၢ်ဝၤခံဂၤ ဟဲစိာ်န့ၢ်ဝဲ တၢ်အီၣ်တၢ်အီလၢ ဟံၣ်ဖိဃီဖိတဒူၣ် လၢအထံၣ်ဘၣ် န့ဆၢၣ်တၢ်ဘၣ်ဒိဘၣ်ထံး ဒီးအအိၣ်ဝဲလၢ တၢ်လီၢ်လၢ ပှၤအိၣ်ဝဲ တစိၢ်တလီၢ်လၢဒဲပူၤ
