တၢ်မၤလိ ၄၇
မ့ၢ်နသးအိၣ် မၤတၢ်ဆီတလဲဧါ
“တၢ်ကတိၤလၢခံကတၢၢ်န့ၣ်, ပုၢ်သ့ၣ်ဝဲၢ်သ့ၣ်ဧၢ, မ်သုသူၣ်ခုသးခုတက့ၢ်. မ်သုလၢထီၣ်ပှဲၤထီၣ် [“ဘှီဘၣ်ထီၣ်က့ၤသုသး,” NWT] တက့ၢ်.”—၂ ကရံၣ်သူး ၁၃:၁၁.
တၢ်သးဝံၣ် ၅၄ “လၢအံၤမ့ၢ်ကျဲ”
တၢ်မၤလိအံၤ အတၢ်တိာ်ပာ် *
၁. ဒ် မးသဲ ၇:၁၃, ၁၄ ပာ်ဖျါထီၣ်ဝဲအသိး ဘၣ်မနုၤအဃိ ပတဲသ့လၢ ပလဲၤတၢ်လၢ တၢ်မူအကျဲလဲၣ်.
ပဝဲဒၣ်ခဲလၢာ် ပအဲၣ်ဒိးလဲၤတုၤလၢ ဟီၣ်ခိၣ်သီလၢ ယဟိဝၤယွၤ အတၢ်ပၢအဖီလာ်လီၤ. တနံၤဘၣ်တနံၤ ပဂုာ်ကျဲးစၢးလဲၤလၢ ကျဲလၢအကဆှၢ ပှၤဆူတၢ်မူလီၤ. ဘၣ်ဆၣ် ယ့ၣ်ၡူးတဲဝဲလၢ တၢ်မူအကျဲအံၤ အအံၣ်ဒီး တဘျီတခီၣ်ကီလၢ ပကလဲၤအီၤအဂီၢ်လီၤ. (ဖး မးသဲ ၇:၁၃, ၁၄ တက့ၢ်.) ခီဖျိလၢ ပတလၢတပှဲၤဘၣ် အဃိ ညီဒိၣ်မးလၢ ပကဟ့ၣ်ၡူကွံာ်အီၤလီၤ.—ကလၤတံ ၆:၁.
၂. လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်. (ကွၢ်စ့ၢ်ကီး တၢ်လွံၢ်နၢၣ်လၢအမ့ၢ် “ တၢ်ဆီၣ်လီၤသး မၤစၢၤပှၤ ဒ်သိးပကသးအိၣ်တူၢ်လိာ် တၢ်ဆီတလဲတဖၣ်” တက့ၢ်.)
၂ ပမ့ၢ်အဲၣ်ဒိးအိၣ်လၢ တၢ်မူအကျဲ လၢအအံၣ်အံၤန့ၣ် ပကဘၣ်သးအိၣ်ဆီတလဲ ပတၢ်ဆိကမိၣ်, ပတၢ်ပာ်သူၣ်ပာ်သး ဒီးပတၢ်ဖံးတၢ်မၤတဖၣ်လီၤ. တၢ်မၢဖိပီလူး ဟ့ၣ်ဂံၢ်ဟ့ၣ်ဘါ ခရံာ်ဖိတဖၣ်လၢ ကရံၣ်သူးလၢ အဝဲသ့ၣ်ကဆဲး “လၢထီၣ်ပှဲၤထီၣ်” လီၤ. (၂ ကရံၣ်သူး ၁၃:၁၁) တၢ်ဟ့ၣ်ပလီၢ်အံၤ ဘၣ်ထွဲဒီးပှၤလၢ မုၢ်မဆါတနံၤအံၤစ့ၢ်ကီးလီၤ. လၢတၢ်မၤလိအံၤအပူၤ ပကတဲသကိး လံာ်စီဆှံမၤစၢၤပှၤဒ်သိး ပကမၤတၢ်ဆီတလဲ ကသ့ဒ်လဲၣ် ဒီးတံၤသကိးလၢ အဒိၣ်တုၤခိၣ်ပှဲၤတဖၣ် မၤစၢၤပှၤလၢ ပကလဲၤတၢ်လၢ တၢ်မူအကျဲ ကသ့ဒ်လဲၣ်န့ၣ်လီၤ. ပကတဲသကိးစ့ၢ်ကီး မ့ၢ်ကီလၢ ပကမၤထွဲ ယဟိဝၤယွၤ အတၢ်ကရၢကရိ အတၢ်ဟံးစုနဲၣ်ကျဲလၢ ဘၣ်ဃးဒီး တၢ်ဆီတလဲန့ၣ် ပကဘၣ်မၤဒ်လဲၣ်. ဒီးပကကွၢ်သကိး တၢ်ဆီၣ်လီၤသးန့ၣ် ကမၤစၢၤပှၤလၢ ပကတူၢ်လိာ်တၢ်ဆီတလဲ ဒီးပကဆဲးအိၣ်ဒီး တၢ်သးခုလၢ ယဟိဝၤယွၤ အတၢ်မၤအပူၤလီၤ.
ပျဲယွၤ အကလုၢ်ကထါလၢ ကဘှီဘၣ်ထီၣ်နၤ
၃. ကစၢ်ယွၤကလုၢ်ကထါ မၤစၢၤနၤဒ်လဲၣ်.
၃ ပကသမံသမိးလီၤက့ၤ ပတၢ်ဆိကမိၣ်ဒီး ပတၢ်တူၢ်ဘၣ်အဂီၢ်န့ၣ် တညီဝဲဘၣ်. ဘၣ်မနုၤအဃိလဲၣ်. မ့ၢ်လၢပသးန့ၣ် လီန့ၢ်တၢ် ဒီးအကထိၣ်ဟူးထိၣ်ဂဲၤထီၣ်ပှၤ ဒ်လဲၣ်န့ၣ် ပတသ့ၣ်ညါစ့ၢ်ကီးဘၣ်. (ယံးရမံယၤ ၁၇:၉) အဃိ ညီဝဲဒိၣ်မးလၢ ပကလီလီၤပသးဒီး “ကဲထီၣ်ပှၤထဲ အနၢ်ဟူတၢ်ဧိၤ” န့ၣ်လီၤ. (ယၤကိာ် ၁:၂၂) ပကဘၣ်သူလံာ်စီဆှံလၢ ပကသမံသမိးလီၤက့ၤပသး အဂီၢ်လီၤ. ကစၢ်ယွၤကလုၢ်ကထါန့ၣ် ကဒုးထံၣ်ပှၤ တၢ်အိၣ်လၢပသးပူၤ လၢအမ့ၢ် ‘ပတၢ်ဆိကမိၣ်ဒီး ပကူၣ်တၢ်တဖၣ်န့ၣ်လီၤ.’ (ဧ့ၤဘြံၤ ၄:၁၂, ၁၃) ကစၢ်ယွၤ ကလုၢ်ကထါန့ၣ် လီၤဂာ်ဒ် စဲး X-ray တၢ် လၢအဒုးထံၣ်ပှၤ တၢ်အိၣ်လၢ ပမိၢ်ပှၢ်အပူၤလီၤ. ဘၣ်ဆၣ် ပမ့ၢ်အဲၣ်ဒိး ဒိးန့ၢ်ဘၣ် တၢ်အဘျုးလၢ တၢ်ဟ့ၣ်ကူၣ်လၢ လံာ်စီဆှံ ဒီးပှၤလၢကစၢ်ယွၤ ဃုထၢထီၣ်ဝဲန့ၣ် ပကဘၣ်အိၣ်ဒီး တၢ်ဆီၣ်လီၤသးလီၤ.
၄. စီၤပၤစီလူးကဲထီၣ်ပှၤလၢ အပာ်ထီၣ်ထီအသးန့ၣ် ပသ့ၣ်ညါဘၣ်ဒ်လဲၣ်.
၄ စီၤပၤစီလူးအဒိအတဲာ်န့ၣ် ပာ်ဖျါထီၣ်န့ၢ်ပှၤလၢ ပမ့ၢ်တအိၣ်ဒီး တၢ်ဆီၣ်လီၤသးဘၣ်န့ၣ် တၢ်ကကဲထီၣ်အသးဒီးပှၤဒ်လဲၣ်. စီၤစီလူးပာ်ထီၣ်ထီအသး တုၤဒၣ်လဲာ် အဂ့ၢ်လိာ်ကွံာ်ဝဲလၢ အကဘၣ် ဆီတလဲအတၢ်ပာ်သူၣ်ပာ်သးလီၤ. (စံးထီၣ်ပတြၢၤ ၃၆:၁, ၂; ဃဘးကူာ် ၂:၄) ယဟိဝၤယွၤတဲဘၣ် စီၤစီလူးလီၤတံၢ်လီၤဆဲးလၢ ဖဲအမၤဟးဂီၤကွံာ် ပှၤဧမၤလ့းဖိ ဝံၤအလီၢ်ခံန့ၣ် အကဘၣ်မၤ တၢ်မနုၤလဲၣ်န့ၣ်လီၤ. ဘၣ်ဆၣ် စီၤစီလူးတဒိကနၣ် ယဟိဝၤယွၤအကလုၢ်ဘၣ်. အဃိ ဖဲဝံၡမူၤအ့လး လဲၤတဲဘၣ်အီၤ တၢ်ဂ့ၢ်အံၤအခါ စီၤစီလူးတအၢၣ်လီၤတူၢ်လိာ် အတၢ်ကမၣ်ဘၣ်. လၢတၢ်န့ၣ်အလီၢ် အဝဲဂုာ်ကျဲးစၢး တဲပူၤဖျဲးအသးဒီး တဲဝဲလၢပှၤဂီၢ်မုၢ် ဆီၣ်သနံးအီၤအဃိ အမၤဝဲဒ်န့ၣ်လီၤ. (၁ ၡမူၤအ့လး ၁၅:၁၃-၂၄) လၢညါတဘျီစ့ၢ်ကီး အအိၣ်ဝဲဒီး တၢ်ပာ်သူၣ်ပာ်သး ဒ်အံၤလီၤ. (၁ ၡမူၤအ့လး ၁၃:၁၀-၁၄) လီၤသးအုးဒိၣ်မးလၢ အဝဲပျဲဝဲ အတၢ်ပာ်ထီၣ်ထီသး ကဟဲဒိၣ်ထီၣ်လီၤ. အဝဲတဆီတလဲကွံာ် အတၢ်ပာ်သူၣ်ပာ်သးဘၣ် အဃိ ယဟိဝၤယွၤ တဘၣ်သူၣ်ဘၣ်သးအီၤလၢၤဘၣ် ဒီးညိကွံာ်အီၤလီၤ.
၅. စီၤစီလူးအဒိအတဲာ်န့ၣ် ပမၤလိန့ၢ်ဘၣ် တၢ်မနုၤလဲၣ်.
၅ ပတအဲၣ်ဒိး လီၤဂာ်ဒီးစီၤစီလူးဘၣ် အဃိ ပကဘၣ်သံကွၢ်လီၤ ပသးလၢတၢ်သံကွၢ် တဖၣ်အံၤလီၤ. ‘ဖဲယဖးတၢ်ဟ့ၣ်ကူၣ်လၢ ကစၢ်ယွၤ ကလုၢ်ကထါအပူၤအခါ မ့ၢ်ယတဲပူၤဖျဲးယသးလၢ အတဘၣ်ထွဲဒီးယၤဘၣ်ဧါ. တၢ်လၢယမၤန့ၣ် ယဆိကမိၣ်လၢ အတကမၣ်ဘၣ်န့ၣ်ဧါ. တၢ်လၢယမၤန့ၣ် ယပာ်တၢ်ကမၣ်လၢ ပှၤဂၤအလိၤဧါ.’ တၢ်သံကွၢ်တဖၣ်အံၤ ပမ့ၢ်စံးဆၢအီၤလၢ မ့ၢ်ခဲလၢာ်န့ၣ် ပကဘၣ်ဆီတလဲကွံာ် ပတၢ်ထံၣ်ဒီး ပတၢ်ပာ်သူၣ်ပာ်သးတဖၣ်လီၤ. ပမ့ၢ်တမၤဒ်န့ၣ်ဘၣ်န့ၣ် ပကပာ်ထီၣ်ထီပသးဒီး ယဟိဝၤယွၤ တရ့ဒီးပှၤဒ် အတံၤသကိးလၢၤဘၣ်.—ယၤကိာ် ၄:၆.
၆. တဲဖျါထီၣ် စီၤပၤစီလူးဒီး စီၤပၤဒၤဝံး အတၢ်လီၤဆီလိာ်သးတက့ၢ်.
၆ ပာ်သူၣ်ပာ်သး စီၤပၤစီလူး ဒီးစီၤပၤဒၤဝံး အတၢ်လီၤဆီလိာ်သးန့ၣ်တက့ၢ်. စီၤဒၤဝံးန့ၣ်မ့ၢ်ပှၤလၢ အအဲၣ် “ယွၤအတၢ်သိၣ်တၢ်သီ” လီၤ. (စံးထီၣ်ပတြၢၤ ၁:၁-၃) စီၤဒၤဝံးသ့ၣ်ညါဝဲလၢ ယဟိဝၤယွၤမၤပူၤဖျဲး ပှၤလၢအဆီၣ်လီၤသးဒီး ထီဒါဝဲပှၤလၢ အပာ်ထီၣ်ထီအသးလီၤ. (၂ ၡမူၤအ့လး ၂၂:၂၈) အဃိ စီၤဒၤဝံးပျဲဝဲလၢ ကစၢ်ယွၤကလုၢ်ကထါ ကဘှီဘၣ်ထီၣ်က့ၤ အတၢ်ထံၣ်လီၤ. အဝဲကွဲးဝဲလၢ “ယကစံးထီၣ်ပတြၢၤယွၤလၢ အဟ့ၣ်ကူၣ်ဘၣ်ယၤလီၤ. ယကလ့ၢ်သိၣ်လိယၤလၢ မုၢ်နၤစ့ၢ်ကီးလီၤ.”—စံးထီၣ်ပတြၢၤ ၁၆:၇.
၇. ပမ့ၢ်အိၣ်ဒီး တၢ်ဆီၣ်လီၤသးန့ၣ် ပကမၤတၢ်မနုၤလဲၣ်.
၇ ပမ့ၢ်အိၣ်ဒီးတၢ်ဆီၣ်လီၤသးန့ၣ် ပကပျဲလၢ ကစၢ်ယွၤအကလုၢ်ကထါ ကဘှီဘၣ်ထီၣ်က့ၤ ပတၢ်ဆိကမိၣ်လၢအကမၣ် တချုးလၢပမၤဘၣ် တၢ်ကမၣ်န့ၣ်လီၤ. ကစၢ်ယွၤကလုၢ်ကထါန့ၣ် လီၤဂာ်ဒ် တၢ်ကလုၢ်တခါလၢ အတဲပှၤလၢ “အဝဲအံၤမ့ၢ်ကျဲန့ၣ်လီၤ. လဲၤတၢ်လၢအပူၤတက့ၢ်, ဖဲသုကဃၣ်ဆူစုထွဲ, ဒီးဖဲသုကဃၣ်ဆူစုစ့ၣ်န့ၣ်လီၤ.” (ယၡါယၤ ၃၀:၂၁) ခီဖျိလၢ ပဒိကနၣ် ယဟိဝၤယွၤအကလုၢ်အဃိ အဘျုးအိၣ်ဝဲဒိၣ်မးလီၤ. (ယၡါယၤ ၄၈:၁၇) အဒိ ဖဲပှၤတဂၤ ဘှီဘၣ်ထီၣ်က့ၤပှၤအခါ ပတမဲာ်ဆှးဘၣ်. ခီဖျိလၢ ပသ့ၣ်ညါလၢ ယဟိဝၤယွၤ ကဟုကယာ်ပှၤဒ် ပၢ်လၢအအိၣ်ဒီး တၢ်အဲၣ်တၢ်ကွံတဂၤအသိး အဃိ ပကဘူးဒိၣ်ထီၣ်ဒီးအီၤလီၤ.—ဧ့ၤဘြံၤ ၁၂:၇.
၈. ဒ် ယၤကိာ် ၁:၂၂-၂၅ ပာ်ဖျါထီၣ်ဝဲအသိး ကစၢ်ယွၤကလုၢ်ကထါန့ၣ် ပသူအီၤဒ်မဲာ်ထံကလၤအသိး ကသ့ဒ်လဲၣ်.
၈ ကစၢ်ယွၤကလုၢ်ကထါန့ၣ် လီၤဂာ်ဒ်မဲာ်ထံကလၤလၢ ပဂီၢ်လီၤ. (ဖး ယၤကိာ် ၁:၂၂-၂၅ တက့ၢ်.) ပဝဲဒၣ်အါတက့ၢ် တချုးလၢပဟးထီၣ်လၢ ပဟံၣ်န့ၣ် ပကွၢ်လီၤမဲာ်ထံကလၤ ကိးဂီၤဒဲးလီၤ. ဒ်န့ၣ်မး ပကထံၣ်လီၤပသးလၢ ပကဘၣ်ဘှီဂ့ၤ ထီၣ်က့ၤပသး တချုးလၢ ပှၤဂၤထံၣ်ပှၤဒံးဘၣ်လီၤ. ဒ်န့ၣ်အသိး ဖဲပဖးလံာ်စီဆှံ ကိးနံၤဒဲးအခါ ပကထံၣ်လီၤပသးလၢ ပကဘၣ်ဘှီဂ့ၤထီၣ်က့ၤ ပတၢ်ဆိကမိၣ်ဒီး ပတၢ်ပာ်သူၣ်ပာ်သးတဖၣ်လီၤ. မ့ၢ်လၢပှၤအါဂၤဖးဝဲ လံာ်စီဆှံအဆၢ လၢတနံၤဘၣ်တနံၤအဂီၢ် လၢဂီၤခီအဃိ ကဲဘျုးလၢအဝဲသ့ၣ်အဂီၢ်လီၤ. တၢ်လၢအဝဲသ့ၣ်ဖးဝဲန့ၣ် ဆိကမိၣ်ထံ ဒ်သိးအကဘၣ်မၤထွဲဝဲလၢ ဒီတနံၤအတီၢ်ပူၤဒ်လဲၣ်န့ၣ်လီၤ. တကးဒံးဘၣ် ပကဘၣ်မၤလိလံာ်စီဆှံ ဒီးဆိကမိၣ်ထံအီၤ ကိးနံၤဒဲးလီၤ. ပကမၤအီၤဒ်န့ၣ်အဂီၢ် တညီဝဲဘၣ် ဘၣ်ဆၣ် ဒ်သိးပဆဲး လဲၤလၢ သးသမူအကျဲလၢအအံၣ်ကန့ၢ်အဂီၢ် ပကဘၣ်မၤတၢ်သ့ၣ်တဖၣ်အံၤ သပှၢ်ကတၢၢ်လီၤ.
ဒိကနၣ်တံၤသကိးလၢ အဒိၣ်တုၤခိၣ်ပှဲၤတဖၣ် အကလုၢ်
၉. ဘၣ်မနုၤအဃိ ပတံၤသကိး ဘၣ်ဘှီဘၣ်ထီၣ်ပှၤလဲၣ်.
၉ မ့ၢ်နမၤဘၣ်တၢ်တမံၤမံၤလၢ အကမၤဟးဂီၤ နတၢ်ရ့လိာ်သးဒီး ယဟိဝၤယွၤန့ၣ်အိၣ်ဧါ. (စံးထီၣ်ပတြၢၤ ၇၃:၂, ၃) မ့ၢ်အိၣ်န့ၣ် နတံၤသကိးလၢ အဒိၣ်တုၤခိၣ်ပှဲၤတဂၤ မ့ၢ်ဘှီဘၣ်ထီၣ်က့ၤနၤန့ၣ် မ့ၢ်နကဒိကနၣ်အီၤဒီး မၤထွဲအတၢ်ဟ့ၣ်ကူၣ်ဟ့ၣ်ဖးဧါ. နမ့ၢ်မၤထွဲအီၤန့ၣ် နမၤတၢ်လၢအဘၣ် ဒီးနကသးခုလၢ အဝဲဟ့ၣ်ပလီၢ်နၤ အဃိလီၤ.—ကတိၤဒိ ၁:၅.
၁၀. ဖဲနတံၤသကိးတဂၤ ဘှီဘၣ်ထီၣ်က့ၤနၤအခါ နကြၢးမၤဒ်လဲၣ်.
၁၀ ကစၢ်ယွၤအကလုၢ်ကထါ ဟ့ၣ်ပလီၢ်ပှၤလၢ “တံၤသကိးအဆဲးတၢ်န့ၣ် မ့ၢ်အမ့ၢ်အတီလီၤ.” (ကတိၤဒိ ၂၇:၆) တၢ်ကတိၤအံၤ အခီပညီဒ်လဲၣ်. ပကကွၢ်သကိး တၢ်အဒိတခါလီၤ. ထံၣ်တမှံကွၢ်လၢ နကခီဂာ်ဝဲ ကျဲမုၢ်တဘိလၢ ကါလ့ၢ်ထီၣ်လ့ၢ်လိၤအါ ဒီးဖဲန့ၣ်နကွၢ်လီၤနလီတဲစိလီၤ. နခါထီၣ်နခီၣ် ဒီးနတကွၢ်တၢ်လၢ နမဲာ်ညါဘၣ်. ဖဲန့ၣ်အခါ နသကိးတဂၤ ဖီၣ်ထုးနစုဒီး ထုးကွံာ်နၤလၢ ကျဲကပၤလီၤ. အဝဲဖီၣ်ထုးနစု ဆူၣ်မးအဃိ နစုထီၣ်လုးလီၤ. ဘၣ်ဆၣ် ခီဖျိလၢ အမၤဝဲဒ်န့ၣ်အဃိ ကါတဘၣ်တဲးနၤဘၣ်. မ့မ့ၢ်နစုန့ၣ် ကထီၣ်လုးဒီးကဆါဝဲ တဘျုးသီညါ. အဃိ မ့ၢ်နကသးဒိၣ်ထီၣ်အီၤဧါ. လ့တက့ၤ နတသးဒိၣ်ထီၣ်အီၤဘၣ်. လၢတၢ်န့ၣ်အလီၢ် နကသးခုလၢ အမၤပူၤဖျဲး နသးသမူအဃိလီၤ. ဒ်န့ၣ်အသိး နသကိးတဂၤ မ့ၢ်ဟ့ၣ်ပလီၢ်နၤလၢ နတၢ်စံးတၢ်ကတိၤဒီး နတၢ်ဖံးတၢ်မၤ မ့ၢ်တလီၤပလိာ်ဒီး ကစၢ်ယွၤအကလုၢ်ကထါဘၣ်န့ၣ် အခီၣ်ထံးခါဒု နကသးဒိၣ်ထီၣ်အီၤလီၤ. ဘၣ်ဆၣ် ခီဖျိလၢ အဟ့ၣ်ကူၣ်ဟ့ၣ်ဖးနၤအဃိ တဘၣ်သးဒိၣ်ထီၣ်အီၤတဂ့ၤ. နမ့ၢ်သးဒိၣ်ထီၣ်အီၤန့ၣ် နတမ့ၢ်ပှၤလၢအကူၣ်တၢ်သ့ဘၣ်. (စံၣ်တဲၤတဲလီၤတၢ် ၇:၉) လၢတၢ်န့ၣ်အလီၢ် နတံၤသကိးတဂၤအံၤ အိၣ်ဒီးတၢ်သးဒူလၢ အကတဲဘၣ်နၤ အဃိ နကဘၣ်သးခုလီၤ.
၁၁. ဘၣ်မနုၤအဃိ ပှၤတနီၤဂ့ၢ်လိာ်ကွံာ်ဝဲ အတံၤသကိး အတၢ်ဟ့ၣ်ကူၣ်ဟ့ၣ်ဖးလဲၣ်.
၁၁ ဘၣ်မနုၤအဃိ ပှၤတနီၤဂ့ၢ်လိာ်ကွံာ် တံၤသကိးလၢ အအဲၣ်အီၤတဂၤန့ၣ် အတၢ်ဟ့ၣ်ကူၣ်လဲၣ်. မ့ၢ်လၢ အပာ်ထီၣ်ထီသးအဃိလီၤ. ပှၤလၢအပာ်ထီၣ်ထီသးန့ၣ် လီၤဂာ်ဒ် “အနၢ်ကိၢ်ကွံ” ဒီး “ဃၣ်ကွံာ်အနၢ်လၢ တၢ်မ့ၢ်တၢ်တီ” လီၤ. (၂ တံၤမသ့း ၄:၃, ၄) အဝဲသ့ၣ် ဆိကမိၣ်လီၤအသးလၢ အတလိၣ်ဘၣ်ပှၤဂၤ အတၢ်ဟ့ၣ်ကူၣ်ဟ့ၣ်ဖးဘၣ်ဒီး ဆိကမိၣ်ဝဲလၢ အတၢ်ထံၣ်န့ၣ် ဂ့ၤဒိၣ်န့ၢ်ဒံးပှၤဂၤလီၤ. ဘၣ်ဆၣ် တၢ်မၢဖိပီလူးကွဲးဝဲလၢ “ပှၤလၢအတမ့ၢ်ဘၣ် တၢ်နီတမံၤဘၣ်, မ့ၢ်ဆိကမိၣ်လၢ အမ့ၢ်တၢ်ထဲအံၤထဲနုၤ ဒီးမ့ၢ်အလီလီၤအသးလီၤ.” (ကလၤတံ ၆:၃) စီၤပၤၡလိၤမိၤ ၡဲပၠးဝဲတၢ်ဂ့ၢ်အံၤ ၡဲၡဲဖိလီၤ. အဝဲကွဲးဝဲလၢ “ဖိသၣ်လၢအဖှီၣ်အယာ် ဒီးကူၣ်တၢ်သ့န့ၣ် ဂ့ၤန့ၢ်စီၤပၤလၢအသးပှၢ်, ဒီးမ့ၢ်ပှၤဟးဂီၤဖိ, ဒီးတတူၢ်လိာ်လၢၤဘၣ် တၢ်သိၣ်က့ၤအီၤဘၣ်တက့ၢ်လီၤ.”—စံၣ်တဲၤတဲလီၤတၢ် ၄:၁၃.
၁၂. ဒ် ကလၤတံ ၂:၁၁-၁၄ ပာ်ဖျါထီၣ်ဝဲအသိး ပဟံးန့ၢ်တၢ်မၤလိလၢ တၢ်မၢဖိပ့းတရူး အဒိအတဲာ် ကသ့ဒ်လဲၣ်.
၁၂ ဆိကမိၣ်ဘၣ်ဃးဒီး စီၤပ့းတရူးအဒိအတဲာ် ဖဲစီၤပီလူး ဘှီဘၣ်ထီၣ်က့ၤအီၤလၢ ပှၤအါဂၤအမဲာ်ညါန့ၣ်တက့ၢ်. (ဖး ကလၤတံ ၂:၁၁-၁၄ တက့ၢ်.) ခီဖျိလၢ စီၤပီလူး ဘှီဘၣ်ထီၣ်စီၤပ့းတရူးလၢ ပှၤအါဂၤအမဲာ်ညါအဃိ အဝဲမ့ၢ်သးဒိၣ်ထီၣ် စီၤပီလူးန့ၣ်သ့ဝဲလီၤ. ဘၣ်ဆၣ်စီၤပ့းတရူး အိၣ်ဒီးတၢ်ကူၣ်သ့လီၤ. မ့ၢ်လၢအဝဲတူၢ်လိာ် စီၤပီလူးအတၢ်သိၣ်ဃီၣ်အဃိ အဝဲတသးဒိၣ်ထီၣ်စီၤပီလူး ဒီးတဆဲးဆိကမိၣ်ထီၣ်က့ၤ တၢ်ဂ့ၢ်အံၤဘၣ်. လၢတၢ်န့ၣ်အလီၢ် အဝဲထံၣ်စီၤပီလူးဒ် “ဒီပုၢ်ဝဲၢ်ခွါသးဘိ” တဂၤအသိးလီၤ.—၂ ပ့းတရူး ၃:၁၅.
၁၃. တချုးလၢ ပဟ့ၣ်ကူၣ်ပှၤဂၤဒံးဘၣ်အခါ ပကဘၣ်ဆိကမိၣ်ထံ တၢ်မနုၤလဲၣ်.
၁၃ နမ့ၢ်တူၢ်ဘၣ်လၢ နကဘၣ်ဟ့ၣ်ကူၣ်ဟ့ၣ်ဖး နသကိးန့ၣ် နကဘၣ်သ့ၣ်နီၣ်ထီၣ် တၢ်မနုၤလဲၣ်. တချုးနလဲၤတဲတၢ်ဒီး နသကိးဒံးဘၣ်န့ၣ် သံကွၢ်လီၤနသးလၢ ‘မ့ၢ်ယပာ်ယ “သးတီကဲၣ်ဆိး” ဧါ.’ (စံၣ်တဲၤတဲလီၤတၢ် ၇:၁၆) ပှၤလၢအပာ်အသး တီကဲၣ်ဆိးန့ၣ် အစံၣ်ညီၣ်ပှၤဂၤ ဒီးအဝဲတထံၣ်ပှၤဂၤဒ် ယဟိဝၤယွၤထံၣ်ဝဲ အသိးဘၣ်. ဒီးအဝဲတအိၣ်ဒီး တၢ်သးကညီၤစ့ၢ်ကီးဘၣ်. ဖဲနသမံသမိးလီၤက့ၤနသး လီၤတံၢ်လီၤဆဲးဝံၤအလီၢ်ခံ နမ့ၢ်ထံၣ်ဒံးလၢ နကဘၣ်ဟ့ၣ်ကူၣ်ဟ့ၣ်ဖး နသကိးန့ၣ် နကဘၣ်တဲဘၣ်အီၤ တၢ်ကီတၢ်ခဲတဖၣ် ဒီးသံကွၢ်အီၤဒ်သိး အဝဲကသ့ၣ်ညါလီၤအသးလၢ အမၤကမၣ်တၢ်မနုၤလဲၣ်န့ၣ်လီၤ. တၢ်လၢနတဲတဖၣ်န့ၣ် ကဘၣ်ဒိးသန့ၤ ထီၣ်အသးလၢ လံာ်စီဆှံ ဒီးသ့ၣ်နီၣ်ထီၣ်လၢ နတဘၣ်စံၣ်ညီၣ်နသကိးဘၣ်. ဘၣ်ဆၣ် နကဘၣ်မၤစၢၤအီၤ ဒ်သိးအဝဲကသ့ၣ်ညါဝဲလၢ တၢ်လၢအမၤဝဲတဖၣ်န့ၣ် ယဟိဝၤယွၤတူၢ်ဘၣ်ဝဲ ဒ်လဲၣ်န့ၣ်လီၤ. (ရိမ့ၤ ၁၄:၁၀) ဖဲပဟ့ၣ်ကူၣ်ဟ့ၣ်ဖးပှၤဂၤအခါ ပကဘၣ်သူလံာ်စီဆှံဒီး ကွၢ်လိမၤဒိး ယ့ၣ်ၡူးအတၢ်ဒိသူၣ်ဒိသးလီၤ. (ကတိၤဒိ ၃:၅; မးသဲ ၁၂:၂၀) ဘၣ်မနုၤအဃိ ပကဘၣ်မၤဒ်န့ၣ်လဲၣ်. မ့ၢ်လၢ ယဟိဝၤယွၤကစံၣ်ညီၣ်ပှၤ ဒ်ပစံၣ်ညီၣ်ပှၤဂၤအသိးလီၤ.—ယၤကိာ် ၂:၁၃.
မၤထွဲတၢ်ဟံးစုနဲၣ်ကျဲလၢ အဟဲခီဖျိလၢ ကစၢ်ယွၤအတၢ်ကရၢကရိ
၁၄. ယဟိဝၤယွၤ အတၢ်ကရၢကရိ ဟ့ၣ်လီၤပှၤတၢ်မနုၤလဲၣ်.
၁၄ ယဟိဝၤယွၤသူဝဲ အတၢ်ကရၢကရိလၢဟီၣ်ခိၣ် လၢကဟံးစုနဲၣ်ကျဲပှၤဒ်သိး ပကလဲၤတၢ်လၢ တၢ်မူအကျဲလီၤ. တၢ်ကရၢကရိ ထုးထီၣ်ဝဲ တၢ်ဂီၤမူ, လံာ်လဲၢ်ဒီး ရဲၣ်ကျဲၤတၢ်အိၣ်ဖှိၣ်ရိဖှိၣ်တဖၣ်လၢ ကမၤစၢၤပှၤ ဒ်သိးပကမၤထွဲ တၢ်ဟ့ၣ်ကူၣ် လၢလံာ်စီဆှံပူၤ အဂီၢ်လီၤ. တၢ်သ့ၣ်တဖၣ်အံၤ ပနာ်န့ၢ်အီၤသ့ ခီဖျိ အဒိးသန့ၤထီၣ်အသးလၢ လံာ်စီဆှံလီၤ. ဖဲပှၤပၢဆှၢတၢ်ကမံးတံာ် ဆၢတဲာ်ဝဲလၢ ကမၤတၢ်စံၣ်တဲၤတဲလီၤ အကျိၤအကျဲဒ်လဲၣ်အခါ အဝဲသ့ၣ်ဃ့ဝဲ ယွၤအသးစီဆှံတၢ်မၤစၢၤလီၤ. သနာ်က့ ထီဘိန့ၣ် အဝဲသ့ၣ်က့ၤကွၢ်အဒါက့ၤ အတၢ်ဆၢတဲာ်အံၤ ဒီးအလီၢ်မ့ၢ်အိၣ်လၢ ကဘၣ်မၤတၢ်ဆီတလဲန့ၣ် အဝဲသ့ၣ်မၤဝဲလီၤ. ဘၣ်မနုၤအဃိ အဝဲသ့ၣ်ဘၣ်မၤဝဲဒ်န့ၣ်လဲၣ်. မ့ၢ်လၢဟီၣ်ခိၣ်တၢ်အိၣ်သး ဆီတလဲဝဲအဃိ ကစၢ်ယွၤအတၢ်ကရၢကရိစ့ၢ်ကီး မၤဝဲတၢ်ဆီတလဲလီၤ. လံာ်စီဆှံတဲဝဲလၢ “တၢ်အိၣ်လၢခိအံၤ, အက့ၢ်အဂီၤဒံကွံာ်ဝဲလီၤ.”—၁ ကရံၣ်သူး ၇:၃၁.
၁၅. ဒီပုၢ်ဝဲၢ်တနီၤထံၣ်ဘၣ်ဒီး တၢ်ကီတၢ်ခဲ မနုၤတဖၣ်လဲၣ်.
၁၅ ဖဲကစၢ်ယွၤ အတၢ်ကရၢကရိ ဒုးသ့ၣ်ညါပှၤ လံာ်စီဆှံ အတၢ်နၢ်ပၢၢ်အသီ ဒီးတၢ်ဟံးစုနဲၣ်ကျဲလၢ အဘၣ်ဃးဒီး လုၢ်လၢ်သကဲာ်ပဝးအခါ ပတူၢ်လိာ်ဒီးမၤထွဲအီၤလီၤ. ဘၣ်ဆၣ် ကစၢ်ယွၤအတၢ်ကရၢကရိ မၤတၢ်ဆၢတဲာ်လၢ မ့ၢ်ကီဝဲလၢ ပတၢ်အိၣ်မူအဂီၢ်န့ၣ် ပကမၤဒ်လဲၣ်. အဒိ ပူၤကွံာ်တယံာ်ဒံးဘၣ်န့ၣ် တၢ်သူၣ်ထီၣ်ဘှီထီၣ် ဒီးတၢ်ကွၢ်ထွဲဘှီဂ့ၤထီၣ်က့ၤ တၢ်ဘူၣ်ထီၣ်ဘါထီၣ်အလီၢ်န့ၣ် တၢ်လၢာ်ဘူၣ်လၢာ်စ့ၤအိၣ်အါမးလီၤ. အဃိ ပှၤပၢဆှၢတၢ်ကမံးတံာ် ဟံးစုနဲၣ်ကျဲဝဲလၢ တၢ်အိၣ်ဖှိၣ်ဖိအါဒူၣ်န့ၣ် ကသူဝဲ ဘီမုၢ်ဘျီၣ်ဒိၣ်တဖျၢၣ်ဃီလီၤ. ခီဖျိလၢ တၢ်ဆီတလဲအံၤအဃိ ဘီမုၢ်ဘျီၣ်ဒိၣ်တနီၤဘၣ်တၢ်ဆါကွံာ်အီၤ ဒီးတၢ်အိၣ်ဖှိၣ်ဖိအါဖု ဘၣ်သူက့ၤဝဲ ဘီမုၢ်ဘျီၣ်ဒိၣ်တဖျၢၣ်ဃီလီၤ. လၢတၢ်ဂ့ၢ်ဒ်အံၤအဃိ ကျိၣ်စ့တဖၣ်န့ၣ် ဘၣ်တၢ်သူက့ၤအီၤလၢ ပှၤကသူၣ်ထီၣ်ဘီမုၢ်ဘျီၣ်ဒိၣ်လၢ တၢ်လီၢ်လၢ ပှၤလိၣ်ဘၣ်ဝဲ ဘီမုၢ်ဘျီၣ်ဒိၣ် နီၢ်နီၢ်န့ၣ်လီၤ. နမ့ၢ်အိၣ်ဘၣ်တၢ်လီၢ်လၢ ဘီမုၢ်ဘျီၣ်ဒိၣ် ဘၣ်တၢ်ဆါကွံာ်အီၤ ဒီးတၢ်အိၣ်ဖှိၣ်ဖိအါဖု မ့ၢ်ဘၣ်သူက့ၤဝဲ ဘီမုၢ်ဘျီၣ်ဒိၣ်တဖျၢၣ်ဃီန့ၣ် နကမၤထွဲ တၢ်ဆီတလဲအသီအံၤအဂီၢ် ကကီလၢနဂီၢ်လီၤ. အဃိ တၢ်အိၣ်ဖှိၣ်ဖိတနီၤ ကဘၣ်လဲၤထီၣ် တၢ်အိၣ်ဖှိၣ်အလီၢ်န့ၣ် ယံၤထီၣ်ဝဲလီၤ. မ့မ့ၢ် ဒီပုၢ်ဝဲၢ်လၢအသူၣ်ထီၣ် ဒီးကွၢ်ထွဲဘှီဂ့ၤထီၣ်က့ၤ ဘီမုၣ်ဘျီၣ်ဒိၣ်န့ၣ် ကဆိကမိၣ်ဘၣ်ဝဲလၢ ဘၣ်မနုၤအဃိ ပှၤဘၣ်ဆါကွံာ်အီၤ
လဲၣ်. အဝဲသ့ၣ်ကတူၢ်ဘၣ်ဝဲလၢ တၢ်လၢအဝဲသ့ၣ်မၤတ့ၢ်ဝဲန့ၣ် ကဲထီၣ်တၢ်ကလီကလီလီၤ. ဘၣ်ဆၣ် အဝဲသ့ၣ်တူၢ်လိာ်ဝဲ တၢ်ဆီတလဲအသီအံၤအဃိ ပကြၢးစံးပတြၢၤအဝဲသ့ၣ်လီၤ.၁၆. ဒ်သိး ပကဆဲးသးခုအဂီၢ် တၢ်ဟ့ၣ်ကူၣ်လၢ ကလီးစဲ ၃:၂၃, ၂၄ အပူၤန့ၣ် မၤစၢၤပှၤဒ်လဲၣ်.
၁၆ ပမ့ၢ်သ့ၣ်နီၣ်ထီၣ်လၢ ပမၤန့ၢ်တၢ်လၢ ယဟိဝၤယွၤအဂီၢ်ဒီး အဝဲဟံးစုနဲၣ်ကျဲ အတၢ်ကရၢကရိန့ၣ် ပကဆဲးအိၣ်ဒီး တၢ်သးခုလီၤ. (ဖး ကလီးစဲ ၃:၂၃, ၂၄ တက့ၢ်.) စီၤပၤဒၤဝံး ပာ်လီၤဒိဂ့ၤတဲာ်ဘၣ် ဖဲအဝဲမၤဘူၣ်လီၤကျိၣ်စ့လၢ ကသူၣ်ထီၣ် တၢ်လုၢ်ဟံၣ်အခါလီၤ. အဝဲတဲဝဲလၢ “ယမ့ၢ်မတၤတဂၤလဲၣ်. ဒီးယပှၤဂီၢ်မုၢ်လၢ ပဟ့ၣ်လီၤတီနံဒၣ်တၢ်ဒ်အံၤကသ့ ပမ့ၢ်မတၤတဖၣ်လဲၣ်. အဂ့ၢ်ဒ်အံၤ, တၢ်ခဲလၢာ်န့ၣ် ဟဲလၢနၤ, ဒီးလၢနစုပူၤန့ၣ် ပဟ့ၣ်တၢ်လၢနၤလီၤ.” (၁ ကွဲးနီၣ်တၢ် ၂၉:၁၄) ဖဲပဟ့ၣ်မၤဘူၣ်လီၤ ကျိၣ်စ့အခါ မ့ၢ်ဒၣ်ပဟ့ၣ်က့ၤတၢ်လၢ ယဟိဝၤယွၤဟ့ၣ်လီၤပှၤလီၤ. အဃိ ဖဲပဟ့ၣ်လီၤတၢ်ဆၢကတီၢ်, တၢ်ဂံၢ်တၢ်ဘါ ဒီးကျိၣ်စ့လၢ ပကမၤယဟိဝၤယွၤ အတၢ်မၤအခါ အသးခုဝဲဒိၣ်မးလီၤ.—၂ ကရံၣ်သူး ၉:၇.
ဆဲးလဲၤတၢ်လၢ ကျဲအံၣ်အဖီခိၣ်
၁၇. ဖဲနသ့ၣ်ညါလၢ နကဘၣ်မၤတၢ်ဆီတလဲအခါ ဘၣ်မနုၤအဃိ နတဘၣ်သးဟးဂီၤဘၣ်လဲၣ်.
၁၇ ဒ်သိး ပကဆဲးလဲၤတၢ်လၢ တၢ်မူကျဲအဂီၢ် ပကဘၣ်ယီၢ် ယ့ၣ်ၡူးအခီၣ်လီၢ် ဘူးဘူးတံၢ်တံၢ်လီၤ. (၁ ပ့းတရူး ၂:၂၁) နမ့ၢ်ထံၣ်လၢ နကဘၣ် ဘှီဂ့ၤထီၣ်က့ၤနသးန့ၣ် တဘၣ်သးဟးဂီၤတဂ့ၤ. နမၤဒ်န့ၣ်မ့ၢ်လၢ နအဲၣ်ဒိးမၤထွဲ ယဟိဝၤယွၤအတၢ်ဟံးစုနဲၣ်ကျဲ အဃိလီၤ. သ့ၣ်နီၣ်ထီၣ်က့ၤလၢ ယဟိဝၤယွၤသ့ၣ်ညါဝဲလၢ ပမ့ၢ်ပှၤလၢ အတလၢတပှဲၤဘၣ်အဃိ အဝဲ တမုၢ်လၢ်ဝဲလၢ ပကကွၢ်လိမၤဒိး ယ့ၣ်ၡူးအဒိအတဲာ် လၢလၢပှဲၤပှဲၤဘၣ်.
၁၈. ဒ်သိးပမၤလၢပှဲၤထီၣ် ပဖီတၢၣ်အန့ၢ်အဂီၢ် ပကဘၣ်မၤတၢ်မနုၤလဲၣ်.
၁၈ ပဝဲဒၣ်အါဂၤ ပအဲၣ်ဒိး သးစၢၢ်ဆၢတၢ်လၢ ခါဆူညါဒီး ပသးအိၣ်ဆီတလဲ ပတၢ်ထံၣ်, ပတၢ်ပာ်သူၣ်ပာ်သး ဒီးပတၢ်ဖံးတၢ်မၤတဖၣ်လီၤ. (ကတိၤဒိ ၄:၂၅; လူၤကၣ် ၉:၆၂) မ်ပကဆဲးအိၣ်ဒီး တၢ်ဆီၣ်လီၤသး, တၢ် “သူၣ်ခုသးခု . . . လၢထီၣ်ပှဲၤထီၣ် [“ဘှီဘၣ်ထီၣ်က့ၤသး,” NWT] တက့ၢ်.” (၂ ကရံၣ်သူး ၁၃:၁၁) ပမ့ၢ်မၤဒ်န့ၣ်န့ၣ် “တၢ်အဲၣ်တၢ်ကွံ, ဒီးတၢ်ဃူတၢ်ဖိးအကစၢ်န့ၣ်, ကအိၣ်ဒီး” ပှၤလီၤ. ကစၢ်ယွၤကမၤစၢၤပှၤ ဒ်သိးပကအိၣ်ဒီးတၢ်သးခု လၢဆၢကတီၢ်ခဲအံၤ ဒီးကဟ့ၣ်ပှၤတၢ်အိၣ်မူ လၢဟီၣ်ခိၣ်အသီအပူၤလီၤ.
တၢ်သးဝံၣ် ၃၄ လဲၤတၢ်လၢတၢ်တီတၢ်လိၤအပူၤ
^ လံာ်အဆၢ. 5 ပဝဲတနီၤ ပကမၤတၢ်ဆီတလဲ ဘၣ်ဃးဒီး ပတၢ်ဆိကမိၣ်, ပတၢ်ပာ်သူၣ်ပာ်သး ဒီးပတၢ်ဖံးတၢ်မၤအဂီၢ် တညီဝဲဘၣ်. တၢ်မၤလိအံၤ ကတဲပၠးပှၤ ဘၣ်မနုၤအဃိ ပဝဲခဲလၢာ် ဘၣ်မၤတၢ်ဆီတလဲလဲၣ် ဒီးဖဲပမၤတၢ်ဆီတလဲအခါ ပအိၣ်ဒီးတၢ်သးခုကသ့ဒ်လဲၣ်.
^ လံာ်အဆၢ. 76 တၢ်တဲဖျါထီၣ် တၢ်ဂီၤအခီပညီ– ဖဲဒီပုၢ်ဝဲၢ်ခွါသးစၢ်တဂၤ တဲဖျါထီၣ်ဝဲလၢ အမၤဘၣ်တၢ်ဆၢတဲာ်လၢအကမၣ်အခါ ဒီပုၢ်ဝဲၢ်ခွါသးပှၢ်တဂၤ (လၢအစုထွဲ) ဒိကနၣ်န့ၢ်အီၤလၢ တၢ်သးစူၤအပူၤ ဒ်သိးကမၤစၢၤအီၤအဂီၢ်လီၤ.