ယဟိဝၤယွၤဆိၣ်ဂ့ၤ ပှၤလၢအက့ၤအိၣ်ကဒါက့ၤလၢ အထံအကီၢ်
ဒီပုၢ်ဝဲၢ်မုၣ်ခွါအါဂၤလၢ အလဲၤသုးလီၢ်သုးကျဲလၢ ထံကီၢ်လၢ အလဲၤထီၣ်လဲၤထီတဖၣ်န့ၣ် ခဲအံၤအဝဲသ့ၣ်ဟဲက့ၤကဒါက့ၤလၢ အထံအကီၢ်လီၤ. ခီဖျိလၢအဝဲသ့ၣ် အဲၣ်ယဟိဝၤယွၤဒီးပှၤဂၤအဃိ အဝဲသ့ၣ်သုးလီၢ်သုးကျဲလၢ တၢ်လီၢ်လၢပှၤလိၣ်ဘၣ်အါထီၣ် ပှၤစံၣ်တဲၤတဲလီၤတၢ်ဖိန့ၣ်လီၤ. (မးသဲ ၂၂:၃၇-၃၉) အဝဲသ့ၣ်ဘၣ်တူၢ်ဆါအသးဒ်လဲၣ် ဒီးဒိးန့ၢ်ဘၣ်ဝဲ တၢ်ဆိၣ်ဂ့ၤဒ်လဲၣ်. ပကသ့ၣ်ညါ တၢ်စံးဆၢအဂီၢ် ပကကွၢ်သကိး တၢ်လဲၤခီဖျိတနီၤလၢ ကီၢ်ခဲမရူအပူၤ လၢအအိၣ်လၢ အၤဖြံၤကၤ မုၢ်နုာ်တခီလီၤ.
“တၢ်လီၢ်လၢပှၤမၤန့ၢ်ဘၣ် ညၣ်ညီ”
ဖဲ ၁၉၉၈ နံၣ်န့ၣ် ဒီပုၢ်ဝဲၢ်ခွါ အိနံၤစံမံၤ ဟးထီၣ်ကွံာ်လၢ အထံကီၢ်ခဲမရူ အပူၤလီၤ. အဝဲလဲၤအိၣ်လၢ ထံကီၢ်အဂၤတဘ့ၣ်န့ၢ် ၁၄ နံၣ်လီၤ. ဘၣ်တနံၤ လၢတၢ်အိၣ်ဖှိၣ်အပူၤ အဝဲနၢ်ဟူဝဲ တၢ်အဒိဘၣ်ဃးဒီး တၢ်စံၣ်တဲၤတဲလီၤတၢ်မၤအဂ့ၢ်လီၤ. ဒီပုၢ်ဝဲၢ်ခွါလၢ အဟ့ၣ်တၢ်စံၣ်တဲၤတဲလီၤတၢ်န့ၣ် တဲဝဲလၢ “ပှၤဒီသကိးခံဂၤ လဲၤစဲၤအီၣ်တခွဲလၢ တၢ်လီၢ်ခံတီၤလီၤ. အဝဲတဂၤန့ၣ် စဲၤအီၣ်ညၣ်န့ၢ်အါမး ဒီးအဝဲတဂၤန့ၣ် စဲၤအီၣ်ညၣ် တန့ၢ်အါအါဘၣ်. အဃိ ပှၤလၢအစဲၤအီၣ်ညၣ်န့ၢ်စှၤတဂၤန့ၣ် တအဲၣ်ဒိးလဲၤသုးအလီၢ်လၢ ပှၤလၢအစဲၤအီၣ်ညၣ်န့ၢ်အါတဂၤန့ၣ် အအိၣ်ဘၣ်ဧါ.”
တၢ်အဒိအံၤ မၤစၢၤ ဒီပုၢ်ဝဲၢ်ခွါ အိနံၤစံမံၤလၢ ကဆိကမိၣ်ထီၣ်ဝဲလၢ ကက့ၤကဒါလၢ ကီၢ်ခဲမရူ ဒ်သိးကမၤစၢၤ ပှၤလၢအအဲၣ်ဒိး မၤလိလံာ်စီဆှံတဖၣ်န့ၣ်လီၤ. ဘၣ်ဆၣ် အဝဲဘၣ်ယိၣ်တၢ်လီၤ. ခီဖျိလၢအဝဲအိၣ်လၢ ထံကီၢ်အဂၤယံာ်လံ အဃိ မ့ၢ်အဝဲက့ၤအိၣ်လၢ ကီၢ်ခဲမရူ ကညီဧါ. ဒ်သိးအဝဲကသ့ၣ်ညါ တၢ်အိၣ်သးအဂီၢ် အဝဲက့ၤအိၣ်ကွၢ်လၢ ကီၢ်ခဲမရူ ဃုလါလီၤ. လၢခံ ဖဲ ၂၀၁၂ န့ၣ် အဝဲက့ၤအိၣ်က့ၤလၢ ကီၢ်ခဲမရူလီၤ.
ဒီပုၢ်ဝဲၢ်ခွါ အိနံၤစံမံၤ တဲဝဲလၢ “ဒ်သိး ယတူၢ်တၢ်ကိၢ်ကကဲ ဒီးယအိၣ်ဖဲန့ၣ် ကသ့အဂီၢ် ယဘၣ်ဆီတလဲ ယတၢ်အိၣ်မူလီၤ. လၢဘီမုၣ်ဘျီၣ်ဒိၣ်အပူၤန့ၣ် ပဘၣ်ဆ့ၣ်နီၤ လီၢ်ဆ့ၣ်နီၤလၢပှၤတ့အီၤလၢသ့ၣ်အဃိ ယဆ့ၣ်နီၤန့ၣ် ယယီၢ်ဒ့ဆါ ဒီးအမၤတံာ်တာ်ယသးလီၤ. ဘၣ်ဆၣ် ခီဖျိလၢယသးစၢၢ်ဆၢ အါထီၣ်တၢ်အိၣ်ဖှိၣ် အတၢ်ရဲၣ်တၢ်ကျဲၤအဃိ ယသးပ့ၤနီၣ်က့ၤ တၢ်လၢအမၤတံာ်တာ် ယသးတဖၣ်လီၤ.”
ဖဲ ၂၀၁၃ န့ၣ် ဒီပုၢ်ဝဲၢ်ခွါ အိနံၤစံမံၤ ဖျီအသးဒီး ဒီပုၢ်ဝဲၢ်မုၣ် ကၠရီဒံၤ လီၤ. ဒီပုၢ်ဝဲၢ်မုၣ် ကၠရီဒံၤ စ့ၢ်ကီးအဝဲလဲၤအိၣ်လၢ ကီၢ်ဖြၣ်စ့ၣ် ခွံနံၣ်ဝံၤဒီး ဟဲက့ၤကဒါက့ၤလၢ ကီၢ်ခဲမရူလီၤ. ခီဖျိလၢ အဝဲသ့ၣ် ပာ်ဆိယဟိဝၤယွၤ အတၢ်ဘၣ်သးလၢနီၣ်ဂံၢ်တၢ အဃိ ယဟိဝၤယွၤဆိၣ်ဂ့ၤ အဝဲသ့ၣ်ဒ်လဲၣ်. ဒီပုၢ်ဝဲၢ်ခွါ အိနံၤစံမံၤ တဲဝဲလၢ “ပလဲၤထီၣ်ဘၣ် ပှၤစိာ်ဘီမုၢ်တၢ်သးခုကစီၣ်ဖိအကၠိ တပူၤဃီ ဒီးမၤဘၣ်တၢ်လၢ ဘ့ၤသ့လးလီၤ. ပူၤကွံာ်တနံၣ်န့ၣ် ပှၤမၤလိလံာ်စီဆှံဖိ အဂၤ ၂၀ လၢပတၢ်အိၣ်ဖှိၣ်အပူၤ ဒိးဘျၢထံလီၤ. ခဲအံၤ ယသ့ၣ်ညါဘၣ်လၢ ယအိၣ်ဘၣ် တၢ်လီၢ်လၢပှၤမၤန့ၢ်ဘၣ် ညၣ်ညီလီၤ.” (မၢ်ကူး ၁:၁၇, ၁၈) ဒီပုၢ်ဝဲၢ်မုၣ် ကၠရီဒံၤ တဲဝဲလၢ “ယဒိးန့ၢ်ဘၣ် တၢ်ဆိၣ်ဂ့ၤအါန့ၢ်ဒံးလၢ ယမုၢ်လၢ်ပာ်အီၤလီၤ.”
တၢ်သးခုလၢ ဒုးကဲထီၣ်ဘၣ်ပှၤဂၤလၢ ခရံာ်အပျဲၢ်အဘီၣ်
ကၠူဒံၤ ဒီး စဲမ် ခါစတိၤ
ဒီပုၢ်ဝဲၢ်မုၣ် ကၠူဒံၤ လၢအလဲၤအိၣ်လၢ ကီၢ်အမဲရကၤန့ၣ် အဝဲအဲၣ်ဒိးမၤအါထီၣ် ယဟိဝၤယွၤအတၢ်မၤလီၤ. အဝဲတဲဝဲလၢ “ဖဲယက့ၤအိၣ်သကိး ယဟံၣ်ဖိဃီဖိ တဘျီလၢ်လၢ်လၢ ကီၢ်ခဲမရူ ဝံၤဒီးယဘၣ်ဟဲက့ၤအခါ ယဟီၣ်ဝဲလီၤ. မ့ၢ်လၢယဘၣ်ပာ်တ့ၢ်ကွံာ် ယပှၤမၤလိလံာ်စီဆှံဖိလီၤ.” ဘၣ်ဆၣ် ဒီပုၢ်ဝဲၢ်မုၣ်န့ၣ် အသးဒ့ဒီလၢ ကက့ၤအိၣ်ကဒါလၢ ကီၢ်ခဲမရူလီၤ. အဝဲအိၣ်ဒီးတၢ်မၤလၢ န့ၢ်စ့ဂ့ၤဒီး မၤစၢၤဝဲအပၢ် တၢ်အိၣ်ဆူၣ်အိၣ်ချ့အပှ့ၤလၢ ကီၢ်ခဲမရူန့ၢ်ဝဲလီၤ. ဘၣ်ဆၣ် ဒီပုၢ်ဝဲၢ်မုၣ် နာ်န့ၢ်ယဟိဝၤယွၤ ဒီးက့ၤအိၣ်ကဒါက့ၤလၢ ကီၢ်ခဲမရူလီၤ. အဝဲတဲဝဲလၢ အနီၣ်ဘၣ်က့ၤ အတၢ်အိၣ်မူအမုာ်အခုၣ် ဖဲအအိၣ်လၢ ကီၢ်ချၢအခါလီၤ. ဒ်သိးအမၤတၢ်ဆီတလဲကန့ၢ်အဂီၢ် အဝဲဃ့ဘါထုကဖၣ်လၢ ယဟိဝၤယွၤအအိၣ် ဒီးကဝီၤအပှၤကွၢ်တၢ်ဒီး အမါန့ၣ် ဟ့ၣ်ဂံၢ်ဟ့ၣ်ဘါအီၤစ့ၢ်ကီးလီၤ.
ဒီပုၢ်ဝဲၢ်မုၣ် ကၠူဒံၤနီၣ်ဘၣ်က့ၤဝဲ တၢ်မၤအသးဖဲအဟဲက့ၤလၢ ကီၢ်ခဲမရူန့ၣ် အဝဲတဲဝဲလၢ “လၢသၢနံၣ်အတီၢ်ပူၤန့ၣ် ယမၤစၢၤဘၣ်ပှၤလွံၢ်ဂၤလၢ ကဒိးဘျၢထံလီၤ.” ဒီပုၢ်ဝဲၢ်မုၣ်အံၤ စးထီၣ်မၤဝဲ ပှၤလဲၤလၢညါလီၤဆီလီၤ. ခဲအံၤအဝဲမၤသကိးတၢ်ဒီးအဝၤ စဲမ် ခါစတိၤ လၢကဝီၤအပှၤကွၢ်တၢ် တၢ်မၤလီၤ. ဘၣ်ဆၣ်တၢ်ကဲထီၣ်အသးဒီး ဒီပုၢ်ဝဲၢ်မုၣ် ကၠူဒံၤ အပၢ်ဒ်လဲၣ်. ဒီပုၢ်ဝဲၢ်မုၣ် ဒီးအဟံၣ်ဖိဃီဖိန့ၣ် ဃုန့ၢ်ဝဲ တၢ်ဆါဟံၣ်လၢကီၢ်ချၢ လၢကမၤစၢၤဝဲ အပၢ်ထီၣ်တၢ်ဆါဟံၣ် အတၢ်လၢာ်ဘူၣ်လၢာ်စ့ၤအဂီၢ်လီၤ. ဒီးအပၢ်ဖွဲးဘၣ်အသး ဒီးတၢ်လဲၤအသးဂ့ၤဂ့ၤဘၣ်ဘၣ်လီၤ.
ထံၣ်ဘၣ်ယဟိဝၤယွၤ အတၢ်မၤစၢၤ
ခၤရိၤလ့ ဒီး ဝံးထၢၣ်
ဒီပုၢ်ဝဲၢ်ခွါ ဝံးထၢၣ် န့ၣ်လဲၤအိၣ်လၢ ကီၢ်ခဲနဒၣ်လီၤ. အဖးဘၣ် တၢးထီခိးတၢ် တဘ့ၣ်လၢ အဘၣ်ဃးဒီး တၢ်ကူၣ်ဘၣ်ကူၣ်သ့လၢ အပတီၢ်ထီအဂ့ၢ်လီၤ. ဒီးအဝဲဆိကမိၣ်ထီၣ် ဘၣ်ဃးဒီးအတၢ်ကူၣ်ဘၣ်ကူၣ်သ့လီၤ. လၢအကလဲၤထီၣ် ဖၠၣ်စိမိၤကၠိအလီၢ် အဝဲလဲၤထီၣ်က့ၤဝဲ တၢ်မၤလိခါ ဒီးလၢတၢ်ဆၢကတီၢ်ဖုၣ်ကိာ်ဖိန့ၣ် အဝဲဖျိထီၣ်ဝဲလီၤ. အဝဲတဲဝဲလၢ “ခီဖျိလၢယမၤဒ်န့ၣ်အဃိ ယဃုတၢ်မၤန့ၢ်ချ့လီၤ. ဒီးယမၤတၢ်လၢ ယအဲၣ်ဒိးမၤအီၤသ့စ့ၢ်ကီးလီၤ.” လၢခံ ဒီပုၢ်ဝဲၢ်ခွါ ဝံးထၢၣ် ဖျီအသးဒီး ဒီပုၢ်ဝဲၢ်မုၣ် ခၤရိၤလ့ လီၤ. လၢခံ အဝဲသ့ၣ်လဲၤဟးလၢ ကီၢ်ခဲမရူလီၤ. ဖဲအဝဲသ့ၣ်လဲၤဟးလၢ ဝဲၤတြၢ်အခါ ဒီပုၢ်ဝဲၢ်တဖၣ် ဟ့ၣ်ဂံၢ်ဟ့ၣ်ဘါအဝဲသ့ၣ်လၢ ကဟဲမၤကစၢ်ယွၤတၢ်မၤလၢ ကီၢ်ခဲမရူလီၤ. ဒီပုၢ်ဝဲၢ်ခွါ ဝံးထၢၣ် တဲဝဲလၢ “ပအဲၣ်ဒိးဂ့ၢ်လိာ်သနာ်က့ ပတဂ့ၢ်လိာ်အီၤဘၣ်. မ့ၢ်လၢပအိၣ်မူယိယိဖိလံ ဒီးပမ့ၢ်တူၢ်လိာ် တၢ်ကွဲမုာ်အံၤသ့ဝဲလီၤ.” ဒီပုၢ်ဝဲၢ်မုၣ် ခၤရိၤလ့ အတၢ်အိၣ်ဆူၣ်အိၣ်ချ့တဂ့ၤအါအါဘၣ် သနာ်က့ အဝဲသ့ၣ်ဆၢတဲာ်ဝဲလၢ ကလဲၤအိၣ်လၢ ကီၢ်ခဲမရူလီၤ.
ဒီပုၢ်ဝဲၢ် ဝံးထၢၣ် ဒီး ခၤရိၤလ့န့ၣ် အဝဲသ့ၣ်လဲၤမၤပှၤလဲၤလၢညါ လၢတၢ်လီၢ်လၢ ပှၤသူၣ်အိၣ်သးအိၣ်လံာ်စီဆှံန့ၣ်လီၤ. ဖဲအဝဲသ့ၣ်လဲၤအိၣ်ဝဲဖဲန့ၣ်အခါ အဝဲသ့ၣ်သူစ့လၢ အစူးပာ်စၢၤဝဲတဖၣ်န့ၣ်လီၤ. ဖဲန့ၣ်ဝံၤအလီၢ်ခံ အဝဲသ့ၣ်က့ၤမၤတၢ်မၤလၢ ကီၢ်ခဲနဒၣ် စှၤကိးလါဒီး ဟဲက့ၤကဒါက့ၤလၢ ကီၢ်ခဲမရူဒီးဆဲးမၤဝဲ ပှၤလဲၤလၢညါလီၤ. အဝဲသ့ၣ်ဒိးန့ၢ်ဘၣ် တၢ်ဆိၣ်ဂ့ၤဒ်လဲၣ်. အဝဲသ့ၣ်လဲၤထီၣ်ဘၣ် ပှၤစိာ်ဘီမုၢ် တၢ်သးခုကစီၣ်ဖိအကၠိ, ကဲထီၣ်ပှၤလဲၤလၢညါလီၤဆီ ဒီးခဲအံၤအဝဲသ့ၣ်မၤတၢ်လၢ တၢ်သူၣ်ထီၣ်ဘှီထီၣ် တၢ်မၤတကပၤလီၤ. ဒီပုၢ်ဝဲၢ်ခွါ ဝံးထၢၣ် တဲဝဲလၢ “ခီဖျိပပာ်တ့ၢ်ကွံာ် ပတၢ်အိၣ်မူလၢအညီတဖၣ်အဃိ ပကဘၣ်နာ်န့ၢ်ယဟိဝၤယွၤ ဒီးအဝဲကွၢ်ထွဲပှၤလီၤ.”
တၢ်သးခုလၢ မၤစၢၤဘၣ်ပှၤဂၤလၢ ကဟ့ၣ်လုၢ်ထီၣ်အသးလၢ ယဟိဝၤယွၤအအိၣ်
စတဲၣ်ဖနံၤ ဒီး အဲလၢၤ
ဖဲ ၂၀၀၂ န့ၣ် ဒီပုၢ်ဝဲခွါ အဲလၢၤ လၢအမ့ၢ်ဝဲ ပှၤဖၠၣ်စိမိၤကၠိဖိလၢ ကီၢ်ကၠၢမနံၣ် န့ၣ် အဝဲဖးဘၣ်ဝဲ လံာ်ဖိလၢအမ့ၢ် Youths—What Will You Do With Your Life? လီၤ. တၢ်ဂ့ၢ်တၢ်ကျိၤတဖၣ်န့ၣ် ထိၣ်ဟူးထိၣ်ဂဲၤထီၣ်အီၤလၢ အကပာ်လီၤဖီတၢၣ် လၢအသီလီၤ. ဖဲ ၂၀၀၆ န့ၣ် အဝဲလဲၤထီၣ်ဘၣ်ဝဲ ကၠိလၢအသိၣ်လိပှၤလၢ ကကွၢ်ထွဲတၢ်အိၣ်ဖှိၣ်အဂီၢ်လီၤ. ဝံၤအလီၢ်ခံအဝဲလီၤဘၣ်က့ၤ မူဒါလၢ ထံကီၢ်လၢအဝဲအိၣ်ဖျဲၣ်ထီၣ်ဝဲလီၤ.
လၢကီၢ်ခဲမရူန့ၣ် ဒီပုၢ်ဝဲၢ်ခွါ အဲလၢၤ အိၣ်ဒီးအတၢ်မၤလၢ နၣ်ရံၣ်တပှဲၤဘၣ်လီၤ. လၢခံ အဝဲထံၣ်န့ၢ် တၢ်မၤလၢ အန့ၢ်စ့အါတခါလီၤ. ဘၣ်ဆၣ် အဝဲဘၣ်ယိၣ်ဝဲလၢ အဟးစံၣ်တဲၤတဲလီၤတၢ် ဒီးသိၣ်လိလံာ်စီဆှံ တချုးဒ်လၢညါအသိးလၢၤဘၣ်လီၤ. အဃိ ဖဲပှၤကွဲမုာ်အီၤလၢ အကမၤဝဲ ပှၤလဲၤလၢညါလီၤဆီအခါ အဝဲတူၢ်လိာ်ဝဲ တဘျီဃီလီၤ. အတၢ်မၤခိၣ် ကဟ့ၣ်အါထီၣ်အီၤစ့ ဘၣ်ဆၣ် အဝဲဂ့ၢ်လိာ်ကွံာ်ဝဲ ဒီးအမၤဝဲပှၤလဲၤလၢညါလီၤဆီလီၤ. လၢခံ အဲလၢၤ ဖျီအသးဒီး ဒီပုၢ်ဝဲၢ်မုၣ် စတဲၣ်ဖနံၤ လၢအလဲၤအိၣ်တ့ၢ်လၢ ကီၢ်ဖြၣ်စ့ၣ် တဘျုးနံၣ်ညါလီၤ. ဖဲဒီပုၢ်ဝဲၢ်မုၣ် ဟဲက့ၤအိၣ်လၢ ကီၢ်ခဲမရူအခါ အဝဲထံၣ်ဘၣ်ဒီးတၢ်ကီတၢ်ခဲ မနုၤတဖၣ်လဲၣ်.
ဒီပုၢ်ဝဲၢ်မုၣ် စတဲၣ်ဖနံၤ တဲဝဲလၢ “အတၢ်အိၣ်ဆူၣ်အိၣ်ချ့တဂ့ၤဘၣ်ဒီး တၢ်လၢတဖီးလိာ်အသးဒီးအီၤန့ၣ်အိၣ်ဝဲအါမး ဘၣ်ဆၣ် အဝဲကူဆါယါဘျါအသးန့ၢ်ဝဲ ဒီးကိၣ်ညၣ်ထီၣ်က့ၤဝဲလီၤ.” အဝဲသ့ၣ်အိၣ်ဒီးတၢ်တူၢ်န့ၢ်ခီၣ်ကဲအဃိ ဒိးန့ၢ်ဘၣ်ဝဲတၢ်ဆိၣ်ဂ့ၤလီၤ. ဒီပုၢ်ဝဲၢ်ခွါ တဲဝဲလၢ “ဖဲပလဲၤစံၣ်တဲၤတဲလီၤတၢ်လၢ သဝီ ခ့ၣ်ထံၤ လၢပှၤလဲၤတတုၤကြီကြီဘၣ်အခါ ပထံၣ်န့ၢ်ပှၤလၢ အအဲၣ်ဒိးမၤလိလံာ်စီဆှံ အိၣ်ဝဲဒီဒူၣ်လီၤ. လၢခံပမၤလိလံာ်စီဆှံ ဒီးအဝဲသ့ၣ်လၢ လီတဲစိအပူၤလီၤ. ပှၤမၤလိလံာ်စီဆှံဖိ ခံဂၤန့ၣ်ဒိးဘျၢထံလီၤ. ဒီးပှၤစံၣ်တဲၤတဲလီၤတၢ်ဖိအကရူၢ် ဟဲအိၣ်ထီၣ်ဝဲလီၤ.” ဒီပုၢ်ဝဲၢ်မုၣ် စတဲၣ်ဖနံၤ ဆဲးတဲဝဲလၢ “တၢ်သးခုလၢအဒိၣ်န့ၢ်ဒံး နမၤစၢၤဘၣ်ပှၤဂၤလၢ အကဟ့ၣ်လုၢ်ထီၣ်အသးလၢ ယဟိဝၤယွၤအအိၣ်န့ၣ် တအိၣ်လၢၤဘၣ်. ပဟဲမၤစၢၤတၢ်ဖဲအံၤ အဃိ ပသးခု မ့ၢ်လၢပထံၣ်ဘၣ်ပှၤမၤလိလံာ်စီဆှံတဖၣ် ဒိးဘျၢထံလီၤ.” ခဲအံၤ ဒီပုၢ်ဝဲၢ် အဲလၢၤ ဒီး စတဲၣ်ဖနံၤ မၤတၢ်လၢ ကဝီၤအပှၤကွၢ်တၢ် တၢ်မၤလီၤ.
“တၢ်လၢပကဘၣ်မၤအီၤန့ၣ် ပမၤအီၤလီၤတံၢ်လီၤဆဲးလီၤ”
လံအိၤ ဒီး ကံၣ်စလံ
ဒီပုၢ်ဝဲၢ်မုၣ် ကံၣ်စလံ ဒိးဘျၢထံဖဲ အထီၣ်ဝဲကသံသရၣ်ကၠိ လၢကီၢ်အံးထလံၣ်အခါလီၤ. ပှၤလဲၤလၢညါ ဒီမါဝၤခံဂၤ လၢအသိၣ်လိအီၤ လံာ်စီဆှံန့ၣ် အိၣ်မူဝဲယိယိဖိ အဃိ ဒီပုၢ်ဝဲၢ်မုၣ် ကံၣ်စလံ ဘၣ်သူၣ်ဘၣ်သးဝဲ ဒီးအီၤစ့ၢ်ကီး အဟ့ၣ်လီၤအသးအါထီၣ်လၢ တၢ်စံၣ်တဲၤတဲလီၤတၢ်မၤအပူၤလီၤ. အဃိ ဒီပုၢ်ဝဲၢ်မုၣ် ကံၣ်စလံ စးထီၣ်မၤဝဲပှၤလဲၤလၢညါ ဖဲအဝဲထီၣ်ဝံၤက့ၤ ကၠိအဆၢကတီၢ်န့ၣ်လီၤ.
ဒီပုၢ်ဝဲၢ်မုၣ် ကံၣ်စလံ အဲၣ်ဒိးက့ၤလၢကီၢ်ခဲမရူ ဒ်သိးအဝဲကမၤအါထီၣ်ဘၣ် ယဟိဝၤယွၤအတၢ်မၤအဂီၢ်လီၤ. ဘၣ်ဆၣ်အဝဲဘၣ်ယိၣ်တၢ်စ့ၢ်ကီးလီၤ. အတဲဝဲလၢ “ယဘၣ်ပာ်တီၢ်ကွံာ်တၢ်ခွဲးတၢ်ယာ်လၢ ယအိၣ်ဘၣ်လၢ ကီၢ်အံးထလံၣ် ဒီးဘၣ်လီၤဖးဒီး ယတံၤသကိးဒီး ယဟံၣ်ဖိဃီဖိတနီၤ လၢအအိၣ်လၢ ကီၢ်အံးထလံၣ်လီၤ.” အဘၣ်မၤဝဲဒ်န့ၣ် သနာ်က့ ဖဲ ၂၀၁၆ န့ၣ် ဒီပုၢ်ဝဲၢ်မုၣ် ကံၣ်စလံ က့ၤအိၣ်ဝဲလၢ ကီၢ်ခဲမရူလီၤ. လၢခံ အဝဲဖျီအသး ဒီးဒီပုၢ်ဝဲၢ်ခွါ လံအိၤလီၤ. ဒီးဝဲၤတြၢ်လၢ ကီၢ်ခဲမရူ မၢအဝဲသ့ၣ်လဲၤ မၤစၢၤတၢ်လၢ အ့ယိၤ တၢ်လီၢ်လၢပှၤလိၣ်ဘၣ် ပှၤစံၣ်တဲၤတဲလီၤတၢ်ဖိန့ၣ်လီၤ.
တၢ်လီၢ်အ့ယိၤန့ၣ် တၢ်မၤအသးဒ်လဲၣ်. ဒီပုၢ်ဝဲၢ်မုၣ် ကံၣ်စလံ တဲဝဲလၢ “ညီနုၢ်န့ၣ် မ့ၣ်အူတဟဲလၢ အနွံညါ ဒီးပသွီထီၣ် ပလီတဲစိအဂံၢ်တန့ၢ်ဘၣ်. အါဒၣ်တက့ၢ် ပလီတဲစိန့ၣ် အပံးအသးလီၤ. ဒီးယဘၣ်ဖီအီၣ်တၢ်လၢ သ့ၣ်မုၣ်လီၤ. ဒီးပဘၣ်လဲၤဒၢၣ်ထံလၢ မုၢ်နၤခီလီၤ. ဖဲန့ၣ်အဆၢကတီၢ် ပှၤဟဲဒၢၣ်ထံတအိၣ်လၢၤဘၣ်. ပကလဲၤဒၢၣ်ထံအဂီၢ် ပသူဝဲ လ့ၣ်ဆီၣ်ဒီး ဒးမံလီၤ.” ပှၤဒီမါဝၤခံဂၤအံၤ လဲၤခီဖျိဝဲ တၢ်သ့ၣ်တဖၣ်အံၤဒ်လဲၣ်. ဒီပုၢ်ဝဲၢ်မုၣ် ကံၣ်စလံ တဲဝဲလၢ “ယဟိဝၤယွၤမၤစၢၤ ပှၤခီဖျိအသးစီဆှံ ဒ်သိးပလဲၤခီဖျိတၢ် ကန့ၢ်အဂီၢ်လီၤ. ယၤဒီးယဝၤပဆီၣ်ထွဲ မၤစၢၤလိာ်သး ကဒဲဒဲလီၤ. ပဟံၣ်ဖိဃီဖိဒီးတံၤသကိးတဖၣ် ဟ့ၣ်ဂံၢ်ဟ့ၣ်ဘါပှၤ ဒီးတဘျီတခီၣ်န့ၣ် အဝဲသ့ၣ်မၤစၢၤပှၤလၢ ကျိၣ်စ့လီၤ.”
ဒီပုၢ်ဝဲၢ်မုၣ် ကံၣ်စလံ က့ၤအိၣ်လၢ အနီၢ်ကစၢ်ထံကီၢ်အဃိ မ့ၢ်အသးခုဧါ. အတဲဝဲလၢ “မ့ၢ် ယသးခုသပှၢ်တၢၢ်လီၤ. ခီၣ်ထံးခါဒု အကီခဲဝဲ ဒီးယသးလီၤစၢ် စ့ၢ်ကီးလီၤ. ဘၣ်ဆၣ် ဖဲပလဲၤခီဖျိ တၢ်သ့ၣ်တဖၣ် န့ၢ်ဝဲအခါ ယၤဒီးယဝၤ ပတူၢ်ဘၣ်လၢ တၢ်လၢပကဘၣ်မၤအီၤန့ၣ် ပမၤအီၤလီၤတံၢ်လီၤဆဲးလီၤ. ပနာ်န့ၢ်ယဟိဝၤယွၤ ဒီးပတူၢ်ဘၣ်လၢ ပဘူးဒိၣ်ထီၣ်ဒီးအီၤလီၤ.” ဒီးဒီပုၢ်ဝဲၢ်ခွါ လံအိၤ ဒီးဒီပုၢ်ဝဲၢ်မုၣ် ကံၣ်စလံ လဲၤထီၣ်ဘၣ်ဝဲ ပှၤစိာ်ဘီမုၢ်တၢ်သးခုကစီၣ်ဖိအကၠိ ဒီးခဲအံၤအဝဲသ့ၣ် မၤပှၤလဲၤလၢညါလီၤဆီ တစိၢ်တလီၢ်လီၤ.
ဒ်ပှၤမၤအီၣ်ညၣ်ဖိတဂၤ ကန့ၢ်အီၣ်ဘၣ်ညၣ်အဂီၢ် အဝဲထံၣ်ဘၣ်ဒီး တၢ်အိၣ်သးအကလုာ်ကလုာ်အသိး ပှၤလၢအအဲၣ်ဒိးက့ၤမၤစၢၤ ပှၤလၢအအိၣ်ဒီးတၢ်သူၣ်ဘျၢသးဘျၢတဖၣ်လၢ ကနၢ်ဟူဘၣ်တၢ်သးခုကစီၣ်လၢ အနီၢ်ကစၢ်ထံကီၢ်အဂီၢ်န့ၣ် အဝဲသ့ၣ်ကဘၣ် တူၢ်ဆါအသးအါမးလီၤ. ယဟိဝၤယွၤတသးပ့ၤနီၣ် ဒီပုၢ်ဝဲၢ်မုၣ်ခွါလၢ အမၤတၢ်ဆူၣ်ဆူၣ် လၢအအဲၣ်အမံၤတဖၣ်န့ၣ်ဘၣ်. (နဃ့မယၤ ၅:၁၉; ဧ့ၤဘြံၤ ၆:၁၀) နမ့ၢ်အိၣ်လၢကီၢ်ချၢ ဒီးပှၤမ့ၢ်လိၣ်ဘၣ် ပှၤစံၣ်တဲၤတဲလီၤတၢ်ဖိ လၢနနီၢ်ကစၢ်ထံကီၢ်န့ၣ် မ့ၢ်နကသးအိၣ် က့ၤမၤစၢၤတၢ်ဧါ. နမ့ၢ်သးအိၣ်က့ၤမၤစၢၤတၢ်န့ၣ် ယဟိဝၤယွၤ ကဆိၣ်ဂ့ၤနၤနီၢ်နီၢ်လီၤ.—ကတိၤဒိ ၁၀:၂၂.
