၁-၂. (က) ​ဘၣ်​မနုၤ​အဃိ ပှၤ​ထီၣ်ပှၢ်​သီသီ​တဖၣ်​ က​​ဘၣ်​သန့ၤ​အသး​လၢ ယဟိဝၤ​ယွၤ​လဲၣ်. (စံးထီၣ်​ပတြၢၤ ၃၇:၃, ၄) (ခ) လၢ​တၢ်​မၤလိ​အံၤ​အ​ပူၤ ပ​က​တဲသကိး​တၢ်မနုၤ​လဲၣ်.

န​မ့ၢ်​ပှၤလၢ က​ဆီဟံၣ်​ဆီဃီ ဘူးထီၣ်လံ​ဧါ မ့တမ့ၢ် န​မ့ၢ်​ပှၤလၢ အ​ထီၣ်ပှၢ်​သီသီ​ဧါ. မ့မ့ၢ်​ဒ်​န့ၣ်​န့ၣ်​ န​က​​ဘၣ်​သးအိၣ်​တပူၤဃီ​ဒီး ပှၤလၢ​န​အဲၣ်​ဘၣ်​အီၤ​တဂၤ မုာ်မုာ်​ခုၣ်ခုၣ်​ ပှဲၤ​ဒီး​တၢ်​သးခု​လီၤ. ပှၤလၢ​အ​ဆီဟံၣ်​ဆီဃီ​တဖၣ်​န့ၣ်​ က​ထံၣ်​ဘၣ်​ဒီး တၢ်ကီ​တၢ်ခဲ​အါမံၤ ဒီး​က​​ဘၣ်​မၤတၢ်​ဆၢတဲာ် လၢ​အ​ရ့​ဒိၣ်​တဖၣ်​လီၤ. ပှၤလၢ​အ​ထီၣ်ပှၢ်​သီသီ​တဖၣ်​ မၤ​ဘၣ်ဂီၢ်က့ၤ အတၢ်ကီ​တၢ်ခဲ​ဒ်လဲၣ်​ ဒီး​ဆၢတဲာ်​တၢ်​ဒ်လဲၣ်​န့ၣ်​ မၤ​သးခု မ့တမ့ၢ် မၤ​ဘၣ်ဒိ အဝဲသ့ၣ်​လၢ ခါဆူညါ​သ့​လီၤ. အဝဲသ့ၣ်​ မ့ၢ်​သန့ၤ​အသး​လၢ ယဟိဝၤ​ယွၤ​န့ၣ်​ အဝဲသ့ၣ်​မၤတၢ်​ဆၢတဲာ်​လၢ အ​ဘၣ်​က​သ့ ဒီး​အ​တၢ်​ဆီဟံၣ်​ဆီဃီ က​ဂၢၢ်ကျၢၤ​ထီၣ်​ ဒီး​အဝဲသ့ၣ်​အ​တၢ်​သးခု ကဟဲ​အါထီၣ်. ဘၣ်ဆၣ်​အဝဲသ့ၣ်​ မ့ၢ်​တ​မၤ​ပိာ်ထွဲ ယဟိဝၤ​ယွၤ အ​တၢ်​ဟံးစု​နဲၣ်ကျဲ​​ဘၣ်​န့ၣ်​ အဝဲသ့ၣ်​က​ထံၣ်ဘၣ်​ တၢ်ကီ​တၢ်ခဲ လၢ​အ​တၢ်​ဆီဟံၣ်​ဆီဃီ​အ​ပူၤ အဃိ တမ့ၢ်​လၢ​အဝဲသ့ၣ်​ကအိၣ်​ဒီး တၢ်​သးခု​ဘၣ်.—ဖး စံးထီၣ်​ပတြၢၤ ၃၇:၃, ၄.

^၂ လၢ​တၢ်​မၤလိ​အံၤ​အ​ပူၤ အ​တဲ​ဘၣ်ဃး​ဒီး ပှၤလၢ​အ​ထီၣ်ပှၢ်​သီသီ​တဖၣ်​အဂီၢ် သနာ်က့ က​တဲ​စ့ၢ်ကီး တၢ်ကီ​တၢ်ခဲ​လၢ ပှၤ​နီၢ်​ဒီမါဝၤ​တဖၣ်​ ထံၣ်​ဘၣ်​​ဝဲ​သ့​လီၤ. တကး​ဒံးဘၣ်​ ကပာ်ဖျါ​ထီၣ်​စ့ၢ်ကီး တၢ်​မၤလိ​လၢ ပ​ဒိးန့ၢ်​​ဘၣ်​လၢ ပှၤ​ဒိ​ပှၤ​တဲာ်​လၢ လံာ်စီဆှံ​အ​ပူၤ​တဖၣ်​လီၤ. ပှၤ​သ့ၣ်​တဖၣ်​အံၤ အဒိ​အတဲာ်​န့ၣ်​ က​ကဲဘျုး​လၢ ပ​တၢ်​အိၣ်မူ​ပူၤ လၢ​ကျဲ​အါဘိ ဒီး​က​ကဲဘျုး​စ့ၢ်ကီး​လၢ ပှၤ​နီၢ်​ဒီမါဝၤ​တဖၣ်​အဂီၢ်​လီၤ. တကး​ဒံးဘၣ်​ ပ​က​တဲသကိး​စ့ၢ်ကီး ပှၤ​နီၢ်​ဒီမါဝၤ​လၢ ပစိၤ​ခဲအံၤ​တဖၣ်​ အ​တၢ်​လဲၤ​ခီဖျိ​န့ၣ်​ မၤစၢၤ​ပှၤ​က​သ့​ဒ်လဲၣ်.

၃-၄. ပှၤလၢ​အ​ထီၣ်ပှၢ်​သီသီ​တဖၣ်​ ထံၣ်​ဘၣ်​ဒီး တၢ်ကီ​တၢ်ခဲ မနုၤ​သ့​လဲၣ်.

^၃ ပှၤ​တနီၤ ဟ့ၣ်ဂံၢ်​ဟ့ၣ်ဘါ​ဝဲ ပှၤလၢ​အ​ထီၣ်ပှၢ်​သီသီ​တဖၣ်​လၢ က​မၤ​ဝဲ​ဒ် ပှၤဂၤ​တဖၣ်​ မၤ​ဝဲ​အသိး. အဒိ, ပှၤလၢ​အ​ထီၣ်ပှၢ်​သီသီ​တဖၣ်​ အ​မိ​အ​ပါ က​ဆီၣ်သနံး​အဝဲသ့ၣ်​လၢ က​ဟံးန့ၢ်​အ​ဖိ​လၢ အဆိ​အ​ချ့ မ့တမ့ၢ် အ​သကိး ဒီး​အ​ဟံၣ်ဖိ​ဃီဖိ​တဖၣ်​ က​ဟ့ၣ်ဂံၢ်​ဟ့ၣ်ဘါ အဝဲသ့ၣ်​လၢ က​ပှ့ၤ​ဟံၣ်​ ဒီး​တၢ်ဖိ​တၢ်လံၤ​တဖၣ်​ ဒ်သိး​အဝဲသ့ၣ်​ ကအိၣ်​ဘၣ်​ မုာ်မုာ်​ခုၣ်ခုၣ်​အဂီၢ်​လီၤ.

^၄ ပှၤလၢ​အ​ထီၣ်ပှၢ်​သီသီ​တဖၣ်​ မ့ၢ်​တ​ပလီၢ်​အသး​​ဘၣ်​န့ၣ်​ အဝဲသ့ၣ်​က​မၤ​ဘၣ်​ တၢ်​ဆၢတဲာ်​လၢ​အ​ကမၣ်​ ဒီး​အ​ကမၢ်​န့ၣ်​ က​ထီၣ်​တုၤ​လၢ​အ​ကိာ်ဘိ. တၢ်မ့ၢ်​ကဲထီၣ်​အသး​ဒ်​န့ၣ်​န့ၣ်​ အဝဲသ့ၣ်​ က​​ဘၣ်​မၤတၢ်​ဆူၣ်ဆူၣ်​ ဒ်သိး​အဝဲသ့ၣ်​လိးက့ၤ​အ​ကမၢ် က​န့ၢ်​အဂီၢ်. အဃိ အဝဲသ့ၣ်​က​မၤ နီၢ်ကစၢ်​တၢ်​မၤလိ​လံာ်စီဆှံ, ဟံၣ်ဖိ​ဃီဖိ​တၢ်​မၤလိ​လံာ်စီဆှံ ဒီး​က​ဟး​စံၣ်တဲၤ​တဲ​လီၤ​တၢ်​အဂီၢ် အ​တၢ်​ဆၢကတီၢ် က​လီၤ​စှၤ​ဝဲ. တကး​ဒံးဘၣ်​ ဒ်သိး​အဝဲသ့ၣ်​က​န့ၢ် အါထီၣ်​စ့​အဂီၢ် မ့တမ့ၢ် က​ဆဲး​မၤ​ဘၣ်​ တၢ်မၤ​အံၤ​ထီဘိ​အဂီၢ် အဝဲသ့ၣ်​ က​​ဘၣ်​မၤ​တၢ်မၤ​အါန့ၢ်​ဒံး​အလီၢ် အဃိ ​ဘၣ်​သ့ၣ်​သ့ၣ်​ အဝဲသ့ၣ်​ထီၣ်​တၢ်​အိၣ်ဖှိၣ်​ တချုး​ထီဘိ​လၢၤဘၣ်. တၢ်မ့ၢ်​ကဲထီၣ်​အသး ဒ်​န့ၣ်​န့ၣ်​ အဝဲသ့ၣ်​ မၤ​ကစၢ်​ယွၤ​အ​တၢ်မၤ​လၢ အ​က​ဟ့ၣ်​အီၤ​တၢ်​သးခု​န့ၣ်​ တန့ၢ်​အါအါ​လၢၤဘၣ်. အဃိ​အဝဲသ့ၣ်​ အ​တၢ်​သးခု​က​လီၤ​စှၤ​ကွံာ်​ဝဲ​လီၤ.

၅. ပ​မၤလိ​န့ၢ်​တၢ်​လၢ ချီ(စ်) ဒီး​မရံစၤ ဒီမါဝၤ​ခံဂၤ အ​တၢ်​လဲၤ​ခီဖျိ​ဒ်လဲၣ်.

^၅ တၢ်​လဲၤ​ခီဖျိ အိၣ်​ဝဲ​အါမး​လၢ ပှၤလၢ​အ​ပာ်ဒိၣ်​ တၢ်ထူး​တၢ်တီၤ​န့ၣ်​ တအိၣ်​ဒီး တၢ်​သးခု​နီၢ်နီၢ်​ဘၣ်. ဘၣ်ဃး​ဒီး​တၢ်ဂ့ၢ်​အံၤန့ၣ်​ ပ​ကကွၢ်​သကိး ပှၤ​ဒီမါဝၤ​ခံဂၤ​လၢ​အမ့ၢ် ချီ(စ်) ဒီး မရံစၤ အတၢ်​လဲၤ​ခီဖျိ. * ဖဲ​အဝဲသ့ၣ်​ထီၣ်ပှၢ်​သီသီ​အခါ အဝဲသ့ၣ်​မၤ​တၢ်မၤ​လၢ ဆၢကတီၢ်​ပှဲၤ​ပှဲၤ ဒ်သိး​အဝဲသ့ၣ်​ က​အိၣ်မူ​ဘၣ်​ ဘီၣ်​ဘီၣ်​ညီ​ညီ​အဂီၢ်. ဘၣ်ဆၣ်​အဝဲသ့ၣ်​ တ​ဒိးန့ၢ်​ဘၣ်​ တၢ်​သူၣ်မံ​သးမုာ်​နီၢ်ကီၢ်​ဘၣ်. ဒီပုၢ်ဝဲၢ်​ခွါ​ချီ(စ်) တဲ​ဝဲ​လၢ “တၢ်​အိၣ်ဒီး​ပှၤ​အါန့ၢ် ပ​လိၣ်​ဘၣ်​ဒံး. ဘၣ်ဆၣ်​ လၢ​နီၢ်သး​တ​ကပၤ​န့ၣ်​ ပ​ဖီတၢၣ်​တအိၣ်​နီတမံၤ​ဘၣ်. ယ​မ့ၢ်​တဲ​တီတီ​န့ၣ်​ ပ​တၢ်​အိၣ်မူ​ပှဲၤ​ဒီး တၢ်​သူၣ်ကိၢ်​သးဂီၤ ဒီးပတၢ်​သးခု​တအိၣ်​ နီ​တစဲး​ဘၣ်.” ​ဘၣ်​သ့ၣ်​သ့ၣ်​ နၤ​စ့ၢ်ကီး န​က​သ့ၣ်ညါ​​ဘၣ်​လၢ တၢ်​သးစၢၢ်ဆၢ​ထဲ တၢ်​ဃု​ကျိၣ်စ့ ဒီး​တၢ်​စုလီၢ်​ခီၣ်ခိၣ်​န့ၣ်​ တ​ဟ့ၣ်​နၤ​တၢ်​သးခု ဒီး​တၢ်​သူၣ်မံ​သးမုာ် နီၢ်နီၢ်​ဘၣ်. ဘၣ်ဆၣ်​ တ​ဘၣ်​သး​ဟးဂီၤ​တဂ့ၤ. ပ​ကကွၢ်​သကိး ပှၤ​ဒိဂ့ၤ​တဲာ်​ဘၣ်​တနီၤ ဒ်သိး က​မၤစၢၤ​နၤ​လၢ န​ဆီတလဲ​သး က​သ့​အဂီၢ်. အဆိ​ကတၢၢ် ပ​ကကွၢ်​သကိး ဝၤ​တဖၣ်​မၤလိ​န့ၢ်​တၢ်​လၢ စီၤပၤ​ယဟိၤၡၤဖး အအိၣ်​က​သ့​ဒ်လဲၣ်.

၆. ဖဲ​စီၤ​ယဟိၤၡၤဖး ထံၣ်​ဘၣ်​ဒီး တၢ်ကီ​တၢ်ခဲ​ဖးဒိၣ်​အခါ အ​မၤထွဲ​ဝဲ တၢ်ဟ့ၣ်ကူၣ်​လၢ ပ​ထံၣ်​ဘၣ်​အီၤ​ဖဲ ကတိၤဒိ ၃:၅, ၆ အ​ပူၤ​ဒ်လဲၣ်.

^၆ သု​မ့ၢ်​ကဲ​ဝၤ​န့ၣ်​ တဘျီ​တခီၣ်​ သု​က​တူၢ်​ဘၣ်​လၢ သု​အိၣ်ဒီး​မူဒါ အါ​တလၢ​လီၤ. မ့မ့ၢ်​ဒ်​န့ၣ်​န့ၣ်​ သု​ဟံးန့ၢ်​တၢ်​မၤလိ​လၢ စီၤပၤ​ယဟိၤၡၤဖး အ​အိၣ်​သ့. စီၤပၤ​ယဟိၤၡၤဖး​န့ၣ်​ အိၣ်ဒီး​မူဒါ​လၢ က​ဒီသဒၢ​ဝဲ အ​ထံဖိ​ကီၢ်ဖိ​ခဲလၢာ်​လီၤ. အ​ဝဲ​မၤ​လၢပှဲၤ အ​မူဒါ​ဖးဒိၣ်​အံၤ​ဒ်လဲၣ်. စီၤပၤ​ယဟိၤၡၤဖး ဂုာ်ကျဲးစၢး ဒီသဒၢ​အ​ထံဖိ​ကီၢ်ဖိ​တဖၣ်​ လၢ​အဂ့ၤ​ကတၢၢ် ခီဖျိ​အ​မၤကျၢၤ​ထီၣ်ဝဲ ဝ့ၢ်​တဖၣ်​လၢ​အအိၣ်​လၢ ယူဒၤ​အ​တၢ်လီၢ်​တၢ်ကျဲ ဒီး​ပာ်ထီၣ်​​ဝဲ​သုးဖိ​အဂၤ ၁,၁၆၀,၀၀၀ ဘျဲၣ်​ညါ. (၂ ကွဲးနီၣ်​တၢ် ၁၇:၁၂-၁၉) လၢခံ​န့ၣ်​ စီၤ​ယဟိၤၡၤဖး ထံၣ်​ဘၣ်​ဒီး​တၢ်ကီ​တၢ်ခဲ ဖးဒိၣ်​တခါ​လီၤ. ပှၤ​ဧၣ်မိၣ်​ဖိ ဒီး​ပှၤ​မိၤအးဖိ ဒီး​ပှၤ​ကစၢၢ်​စ့ဧၢ်​ဖိ အ​သုးမုၢ်​ဖးဒိၣ်​တဖၣ်​ ဟဲ​မၤပျံၤ​မၤဖုး​အီၤ​ဒီး အ​ဟံၣ်ဖိ​ဃီဖိ ဒီး​အ​ထံဖိ​ကီၢ်ဖိ​တဖၣ်​လီၤ. (၂ ကွဲးနီၣ်​တၢ် ၂၀:၁, ၂) အဃိ စီၤ​ယဟိၤၡၤဖး မၤ​ဝဲ​ဒ်လဲၣ်. အ​ဃ့​ယဟိဝၤ​ယွၤ အ​တၢ်​မၤစၢၤ ဒီး​တၢ်ဂံၢ်​တၢ်​ဘါလီၤ. စီၤပၤ​ယဟိၤၡၤဖး မၤ​ဝဲ​ဒ်အံၤ​န့ၣ်​ ​လီၤ​ပလိာ်​ဒီး တၢ်​ဟ့ၣ်ကူၣ်​ ဖဲ ကတိၤဒိ ၃:၅, ၆ အပူၤ​လီၤ. (ဖး.) စီၤ​ယဟိၤၡၤဖး အ​တၢ်​ထုကဖၣ်​လၢ အပှဲၤ​ဒီး​ တၢ်​ဆီၣ်​လီၤ​သး​န့ၣ်​ ​ဘၣ်​တၢ်​ကွဲးနီၣ်​အီၤ​ဖဲ ၂ ကွဲးနီၣ်​တၢ် ၂၀:၅-၁၂ ဒီး​အ​တၢ်​ထုကဖၣ်​အံၤန့ၣ်​ ပာ်ဖျါ​ထီၣ်​ဝဲ​လၢ အ​ဝဲ​နာ်န့ၢ် အပၢ်​လၢ​မူခိၣ်​ဒိၣ်မး​လီၤ. အဃိ ယဟိဝၤ​ယွၤ​စံးဆၢ အ​တၢ်​ထုကဖၣ်​ဒ်လဲၣ်.

၇. ယဟိဝၤ​ယွၤ​စံးဆၢ စီၤ​ယဟိၤၡၤဖး အ​တၢ်​ထုကဖၣ်​ဒ်လဲၣ်.

^၇ ယဟိဝၤ​ယွၤ​မၢ ပှၤ​လ့ၤဝံ​ဖိ စီၤ​ယၤဃစအ့လး တဲ​ဘၣ်​ စီၤပၤ​ယဟိၤၡၤဖး​လၢ “ပာ်​ဆၢထၢၣ်​သု​သး, ဒီး​ဆၢထၢၣ်, ဒီးထံၣ်ဘၣ်​ ယွၤ​အ​တၢ်​အုၣ်က့ၤ​ခီၣ်က့ၤ အိၣ်ဒီး​သု​တက့ၢ်.” (၂ ကွဲးနီၣ်​တၢ် ၂၀:၁၃-၁၇) စီၤ​ယဟိၤၡၤဖး နာ်န့ၢ်​ယဟိဝၤ​ယွၤ လၢ​လၢပှဲၤ​ပှဲၤ ဒီး​အ​မၤ​ဝဲ​ဒ် ကစၢ်​ယွၤ တဲ​အီၤ​အသိး​လီၤ. ဖဲ​အီၤ​ဒီး အပှၤ​ဂီၢ်မုၢ်​တဖၣ်​ လဲၤ​ထံၣ်​လိာ်သး​ဒီး အဒုၣ်​အဒါ​တဖၣ်​အခါ အ​ဝဲ​တ​မၢ ပှၤ​သုးဖိ​လၢ အ​အိၣ်ဒီး​တၢ်​သ့​တၢ်​ဘၣ်​တဖၣ်​ လဲၤ​လၢ​တၢ်​မဲာ်ညါ​ဘၣ်. အ​မၢ​ပှၤ​သးဝံၣ်​တၢ်ဖိ​လၢ အ​တအိၣ်​ဒီး တၢ်​စုကဝဲၤ​တဖၣ်​ လဲၤ​လၢ တၢ်​မဲာ်ညါ​ကတၢၢ်. ညီနုၢ်​န့ၣ်​ ဖဲ​ပှၤ​လဲၤ​ဒုးတၢ်​အခါ ပှၤ​တ​မၤ​ဝဲ​ဒ်​န့ၣ်​ဘၣ်. ဘၣ်ဆၣ်​ တၢ်​ဟံးစု​နဲၣ်ကျဲ​အံၤ တ​ဟဲ​လၢ ပှၤ​ဟီၣ်ခိၣ်​ဖိ​အ​အိၣ်ဘၣ်, ဟဲ​လၢ​ကစၢ်​ယွၤ​အ​အိၣ်​ဟီ. အဃိ ယဟိဝၤ​ယွၤ​မၤစၢၤ စီၤ​ယဟိၤၡၤဖး ဒ်​အ​အၢၣ်​လီၤ​ပာ်စၢၤ​အီၤ အသိး​လီၤ. ဒီး​စီၤ​ယဟိၤၡၤဖး မၤနၢၤ​ကွံာ် အဒုၣ်​အဒါ​တဖၣ်​လီၤ.—၂ ကွဲးနီၣ်​တၢ် ၂၀:၁၈-၂၃.

၈. ဝၤ​တဖၣ်​ မၤလိ​န့ၢ်​တၢ်​လၢ စီၤ​ယဟိၤၡၤဖး အ​အိၣ်​က​သ့​ဒ်လဲၣ်.

^၈ န​မ့ၢ်​ကဲ​ဝၤ​န့ၣ်​ န​ဟံးန့ၢ်​တၢ်​မၤလိ​လၢ စီၤ​ယဟိၤၡၤဖး အအိၣ်​သ့​လီၤ. န​အိၣ်ဒီး​မူဒါ​လၢ န​က​ကွၢ်ထွဲ န​ဟံၣ်ဖိ​ဃီဖိ​အဃိ နက​​ဘၣ်​မၤတၢ်​ဆူၣ်ဆူၣ်​ ဒ်သိး​န​က​ဒီသဒၢ ဒီး​လုၢ်အီၣ်​လုၢ်အီ နဟံၣ်ဖိ​ဃီဖိ​လီၤ. ဖဲ​န​ထံၣ်​ဘၣ်​ဒီး တၢ်ကီ​တၢ်ခဲ​တဖၣ်​အခါ ဘၣ်သ့ၣ်​သ့ၣ်​ န​က​ဆိကမိၣ်​လၢ န​မၤ​​ဘၣ်​ဂီၢ်​ထီၣ်​က့ၤ လၢ​န​နီၢ်ကစၢ်​သ့​လီၤ. တြီဆၢ​ကွံာ် တၢ်​ပာ်သူၣ်​ပာ်သး​အ​ဝဲ​န့ၣ်​ ဒီး​တ​ဘၣ်​သန့ၤ​န​သး​လၢ န​နီၢ်ကစၢ်​တဂ့ၤ. လၢ​တၢ်န့ၣ်​အလီၢ် န​က​​ဘၣ်​ဃ့ ယဟိဝၤ​ယွၤ အ​တၢ်​မၤစၢၤ ​လီၤ​လီၤဆီ​ဆီ ထဲ​တဂၤ​ဧိၤ. တကး​ဒံးဘၣ်​ ဖဲနဃ့​ဘါ​ထုကဖၣ်​တၢ် ဒီး​န​မါ​အခါ တဲဖျါ​ထီၣ်​ န​တၢ်​တူၢ်​ဘၣ်​ပျီပျီ. ဃု​ယဟိဝၤ​ယွၤ အ​တၢ်​ဟံးစု​နဲၣ်ကျဲ ခီဖျိ​မၤလိ​လံာ်စီဆှံ ဒီး​လံာ်လဲၢ်​လၢ တၢ်​ကရၢကရိ ထုးထီၣ်​​ဝဲ​တဖၣ်​ ဒီး​မၤထွဲ တၢ်​ဟ့ၣ်ကူၣ်​လၢ န​ထံၣ်​န့ၢ်​အီၤ​တဖၣ်. န​တၢ်​ဆၢတဲာ်​လၢ အ​ဒိးသန့ၤ​ထီၣ်​အသး​လၢ လံာ်စီဆှံ​န့ၣ်​ တမ့ၢ်​လၢ ပှၤ​တနီၤ က​ဘၣ်သူၣ်​ဘၣ်သး​​ဝဲ​ဘၣ်. ဒီး​​ဘၣ်​သ့ၣ်​သ့ၣ်​ အဝဲသ့ၣ်​က​တဲ​နၤ​လၢ န​ပျုၢ်​ဟီ​ဒံး. ​ဘၣ်​တဘၣ်​ အဝဲသ့ၣ်​ က​တဲ​နၤ​လၢ န​မ့ၢ်​အိၣ်ဒီး ကျိၣ်စ့​ဒီး​တၢ်ထူး​တၢ်တီၤ​မး နကွၢ်ထွဲ န​ဟံၣ်ဖိ​ဃီဖိ​လၢ အဂ့ၤ​ကတၢၢ်​က​သ့. ဘၣ်ဆၣ်​ န​က​​ဘၣ်​သ့ၣ်နီၣ်​ထီၣ်​ စီၤ​ယဟိၤၡၤဖး အဒိ​အတဲာ်. စီၤ​ယဟိၤၡၤဖး နာ်န့ၢ် ယဟိဝၤ​ယွၤ​န့ၣ်​ အ​ပာ်ဖျါ​ထီၣ်​လၢ အ​တၢ်မၤ​လီၤ. ဒ်​ယဟိဝၤ​ယွၤ တ​ပာ်တ့ၢ်​အခ့​အပှၤ​လၢ အသး​တီ​တဂၤ​အံၤ​​ဘၣ်​အသိး အ​ဝဲ​တ​ပာ်တ့ၢ်​နၤ​စ့ၢ်ကီး​ဘၣ်. (စံးထီၣ်​ပတြၢၤ ၃၇:၂၈; ဧ့ၤဘြံၤ ၁၃:၅) ဒ်သိး​ပှၤ​နီၢ်​ဒီမါဝၤ​တဖၣ်​ ကအိၣ်​ဒီး​တၢ်​သးခု​အဂီၢ် အဝဲသ့ၣ်​မၤတၢ်​အဂၤ မနုၤ​က​သ့ဒံး​လဲၣ်.

၉. ဝံ​ယၡါယၤ ဒီး​အမါ​န့ၣ်​ မ့ၢ်​ပှၤ​ဒ်လဲၣ်.

^၉ ဝံ​ယၡါယၤ ဒီး​အမါ​န့ၣ်​ ပာ်​ဝဲ​ယဟိဝၤ​ယွၤ အ​တၢ်မၤ​လၢ​အရ့​ဒိၣ်​ကတၢၢ်. ဝံ​ယၡါယၤ​န့ၣ်​ မ့ၢ်​ဝဲ​ဝံ​တဂၤ. ဒီး​အမါ​စ့ၢ်ကီး လံာ်စီဆှံ​ကိး​အီၤ​လၢ “ဝံ​ပိာ်မုၣ်” အဃိ​​ဘၣ်​သ့ၣ်​သ့ၣ်​ အ​ကအိၣ်​ဒီး​မူဒါ​လၢ အ​က​​ဘၣ်​တဲဝဲ ဝံ​အ​တၢ်စံးပာ်​တဖၣ်. (ယၡါယၤ ၈:၁-၄) အဃိ ပ​သ့ၣ်ညါ​​ဘၣ်​လၢ ဝံ​ယၡါယၤ ဒီး​အမါ​န့ၣ်​ ပာ်ဆိ​တၢ်​ဘူၣ်ထီၣ်​ဘါထီၣ်​ ယဟိဝၤ​ယွၤ လၢညါ​လီၤ. အဝဲသ့ၣ်​ပာ်လီၤ ဒိဂ့ၤ​တဲာ်​ဘၣ်​လၢ ပှၤ​နီၢ်​ဒီမါဝၤ​လၢ ပစိၤ​ခဲအံၤ​အဂီၢ်​လီၤ.

၁၀. ပှၤ​နီၢ်​ဒီမါဝၤ​တဖၣ်​ မ့ၢ်​မၤလိ​ဝံ​အ​တၢ်စံးပာ်​တဖၣ်​န့ၣ်​ အဝဲသ့ၣ်​ အ​တၢ်​သးဆူၣ်​လၢ ကစၢ်​ယွၤ​အ​တၢ်မၤ​အ​ပူၤ က​ဟဲ​အါထီၣ်​ဒ်လဲၣ်.

^၁၀ မုၢ်မဆါ​တနံၤ​အံၤ ပှၤ​ဒီမါဝၤ​တဖၣ်​ ကွၢ်လိ​မၤဒိး ဝံ​ယၡါယၤ​ဒီး​အမါ ဒီး​မၤ​ယဟိဝၤ​ယွၤ​အ​တၢ်မၤ လၢ​အဂ့ၤ​ကတၢၢ်​သ့​လီၤ. အဝဲသ့ၣ်​ မၤဂၢၢ်​ကျၢၤထီၣ်​ အ​တၢ်​နာ်န့ၢ် ယဟိဝၤ​ယွၤ ခီဖျိ​မၤလိ ဝံ​အ​တၢ်စံးပာ်​တဖၣ်​ ဒ်သိး​သိး ဒီး​ဆိကမိၣ်​ထံ​ဝဲ ဘၣ်ဃး​ဒီး ဝံ​အ​တၢ်စံးပာ်​တဖၣ်​ ဟဲ​လၢထီၣ်​ပှဲၤထီၣ်​​ဝဲ​ထီဘိ အဂ့ၢ်​လီၤ. * (တံတူး ၁:၂) ဒီး​အဝဲသ့ၣ်​ က​ဆိကမိၣ်​ထံ ဘၣ်ဃး​ဒီး​လံာ်စီဆှံ အတၢ်စံးပာ်​တဖၣ်​ က​လၢထီၣ်​ပှဲၤထီၣ်​အဂီၢ် အဝဲသ့ၣ်​ မၤ​တၢ်မနုၤ​က​သ့​လဲၣ်. အဒိ, အဝဲသ့ၣ်​ က​ဆိကမိၣ်​ထံ ယ့ၣ်ၡူး​အ​တၢ်စံးပာ်​လၢ တၢ်​သးခု​ကစီၣ်​ က​​ဘၣ်​တၢ်​စံၣ်တဲၤ​တဲ​လီၤ​အီၤ​လၢ ဟီၣ်ခိၣ်​ ဒီဘ့ၣ်​ တချုး​လၢ တၢ်​အ​ကတၢၢ်​ဟဲ​​ဘၣ်​န့ၣ်​ က​လၢထီၣ်​ပှဲၤထီၣ်​အဂီၢ် အဝဲသ့ၣ်​ မၤစၢၤ​ဝဲ​က​သ့​ဒ်လဲၣ်. (မးသဲ ၂၄:၁၄) ပှၤ​နီၢ်​ဒီမါဝၤ​တဖၣ်​ မ့ၢ်​ထံၣ်​ဘၣ်​​ဝဲ​လၢ ဝံ​အ​တၢ်စံးပာ်​တဖၣ်​ ဟဲ​လၢထီၣ်​ပှဲၤထီၣ်​ ဒံး​အါထီၣ်​န့ၣ်​ အဝဲသ့ၣ်​အ​တၢ်​သးဆူၣ်​လၢ ကစၢ်​ယွၤ​အ​တၢ်မၤ​အ​ပူၤ က​ဟဲ​အါထီၣ်​လီၤ.

၁၁. နီၢ်​ပြံစကံးလၤ ဒီး​စီၤ​အကူလၤ​န့ၣ်​ ထံၣ်​ဘၣ်​ဒီး တၢ်မနုၤ​လဲၣ်, ဒီး​​ဘၣ်​မနုၤ​အဃိ အဝဲသ့ၣ်​ လဲၤ​ခီဖျိ​​ဝဲ​န့ၢ်​လဲၣ်.

^၁၁ ပှၤ​သးစၢ်​လၢ​အ​ထီၣ်ပှၢ်​သီ​တဖၣ်​န့ၣ်​ မၤလိ​န့ၢ်​တၢ်​လၢ နီၢ်​ပြံစကံးလၤ ဒီး​စီၤ​အကူလၤ အ​အိၣ်​သ့​ဝဲ​လီၤ. ပှၤ​နီၢ်​ဒီမါဝၤ​ခံဂၤ​အံၤ မ့ၢ်​ပှၤ​ယူဒၤ​ဖိ​လၢ အ​အိၣ်​လၢ​ဝ့ၢ်​ရိမ့ၤ​အ​ပူၤ​လီၤ. အဝဲသ့ၣ်​ နၢ်ဟူ​​ဘၣ်​တၢ်​သးခု​ကစီၣ်​ ဘၣ်ဃး​ဒီး​ယ့ၣ်ၡူး ဒီး​အဝဲသ့ၣ်​ကဲထီၣ်​ ပှၤ​ခရံာ်ဖိ​လီၤ. အဃိ​အဝဲသ့ၣ်​ က​အိၣ်မူ​ဘၣ်​ မုာ်မုာ်​ခုၣ်ခုၣ်​ ဒီး​က​သးခု​​ဝဲ​လီၤ. ဘၣ်ဆၣ်​ မ့ၢ်​လၢ စီၤပၤ​ကျီၤဒံ ဟ့ၣ်​​လီၤ​တၢ်​ကလုၢ်​လၢ ပှၤယူဒၤ​ဖိ​တဖၣ်​ က​​ဘၣ်​ဟးထီၣ်​လၢ ရိမ့ၤ​အ​ပူၤ အဃိ အဝဲသ့ၣ်​အတၢ်​အိၣ်မူ ဆီတလဲ​ကွံာ်ဝဲ လၢ​သတူၢ်​ကလာ်​အ​တီၢ်ပူၤ​လီၤ. တၢ်မၤ​အသး​ဒီး နီၢ်​ပြံစကံးလၤ ဒီး​စီၤ​အကူလၤ​ဒ်လဲၣ်. အဝဲသ့ၣ်​ က​​ဘၣ်​ပာ်​တီၢ်​ကွံာ် တၢ်လီၢ်​တၢ်ကျဲ​လၢ အ​အိၣ်​ညီနုၢ်​ဝဲ ဒီး​က​​ဘၣ်​လဲၤ​ဃု​က့ၤ တၢ်လီၢ်​တၢ်ကျဲ​လၢ​အသီ ဒီး​စးထီၣ်​မၤ​က့ၤ တၢ်ဆး​ဒဲ​အ​တၢ်ဖံး​တၢ်မၤ​လၢ​အသီ တဘျီ​က​ဒီး​လီၤ. မ့ၢ်လၢ​အဝဲသ့ၣ်​ အတၢ်အိၣ်သး ဆီတလဲ​​ဝဲ​အဃိ မ့ၢ်​အဝဲသ့ၣ်​ တ​ပာ်ဆိ​ယွၤ​အဘီ​အမုၢ်​လၢညါ လၢၤ​ဘၣ်​ဧါ. ပ​သ့ၣ်ညါ​​ဘၣ်​လၢ အဝဲသ့ၣ်​ တ​မၤ​ဝဲ​ဒ်​န့ၣ်​ဘၣ်. နီၢ်​ပြံစကံးလၤ ဒီး​စီၤ​အကူလၤ​န့ၣ်​ လဲၤ​အိၣ်​ဝဲ​လၢ ဝ့ၢ်​ကရံၣ်သူး ဒီး​အဝဲသ့ၣ်​ မၤစၢၤ​ဝဲ​တၢ်​အိၣ်ဖှိၣ်​ဖိ​ဖဲန့ၣ်. ဒီး​အ​မၤ​သကိး​တၢ်​ဒီး တၢ်မၢဖိ​ပီလူး လၢ​က​ဟ့ၣ်ဂံၢ်​ဟ့ၣ်ဘါ​ဝဲ ဒီပုၢ်ဝဲၢ်​မုၣ်​ခွါ ဖဲန့ၣ်​တဖၣ်​လီၤ. လၢခံ​အဝဲသ့ၣ်​ လဲၤ​သုးလီၢ်​လၢ သဝီ​အဂၤ​တဖၣ်​ လၢ​တၢ်လီၢ်​လၢ ပှၤ​လိၣ်​ဘၣ်​အါထီၣ်​ ပှၤ​စံၣ်တဲၤ​တဲ​လီၤ​တၢ်ဖိ. (မၤတၢ် ၁၈:၁၈-၂၁; ရိမ့ၤ ၁၆:၃-၅) အဝဲသ့ၣ်​ အ​တၢ်မၤ​အါ​လၢ ကစၢ်​ယွၤ​အ​တၢ်မၤ​ပူၤ​အဃိ အဝဲသ့ၣ်​ ပှဲၤ​ဝဲ​ဒီး တၢ်​သးခု​လီၤ.

၁၂. ​ဘၣ်​မနုၤ​အဃိ ပှၤ​နီၢ်​ဒီမါဝၤ​တဖၣ်​ က​​ဘၣ်​ပာ်လီၤ နီၢ်သး​အ​ဖီတၢၣ်​လဲၣ်.

^၁၂ မုၢ်မဆါ​တနံၤ​အံၤ ပှၤ​ဒီမါဝၤ​တဖၣ်​ ကွၢ်လိဝဲ နီၢ်​ပြံစကံးလၤ ဒီး​စီၤ​အကူလၤ ခီဖျိ​ပာ်ဆိ ယွၤ​အဘီ​အမုၢ်​လၢ နီၣ်ဂံၢ်​တၢ​သ့​ဝဲ​လီၤ. ပှၤ​ဒီ​တၢ်အဲၣ်တီ​ခံဂၤ တချုး​လၢ အ​ဖျီ​သး​ဒံးဘၣ်​ မ့ၢ်​တဲသကိး​ဆိ နီၢ်သး​အ​ဖီတၢၣ်​န့ၣ်​ က​ဂ့ၤဒိၣ်​​ဝဲ​လီၤ. အဝဲသ့ၣ်​ မ့ၢ်​ပာ်​လီၤ​ဖီတၢၣ်​လၢ က​မၤ​ယဟိဝၤ​ယွၤ​အ​တၢ်မၤ ဒီး​မၤ​သကိး​တၢ်​တပူၤဃီ လၢ​က​မၤ​လၢပှဲၤ အ​ဖီတၢၣ်​တဖၣ်​န့ၣ်​ အဝဲသ့ၣ်​ ကထံၣ်​ဘၣ်​ဝဲ ယဟိဝၤ​ယွၤ အ​တၢ်​မၤစၢၤ​လၢ အ​တၢ်​အိၣ်မူ​အ​ပူၤ​လီၤ.  (စံၣ်တဲၤ​တဲ​လီၤ​တၢ် ၄:၉, ၁၂) ပ​ကကွၢ်​သကိး ဒီပုၢ်ဝဲၢ်​ခွါ​ရးစၢၤ ဒီး​အမါ​အဲလံစဘဲၤ အ​တၢ်​လဲၤ​ခီဖျိ. ဒီပုၢ်ဝဲၢ်​ခွါ​ရးစၢၤ တဲ​ဝဲ​လၢ “ဖဲပ​ပာ်​တၢ်အဲၣ်တီ​အခါ ပ​တဲသကိး နီၢ်သး​အ​ဖီတၢၣ်​လၢ ပ​အဲၣ်ဒိး​မၤ​အီၤ​တဖၣ်​ လီၤတံၢ်​လီၤဆဲး​လီၤ.” ဒီပုၢ်ဝဲၢ်​မုၣ်​ အဲလံစဘဲၤ တဲ​ဝဲ​လၢ “ပ​တဲသကိး ပ​ဖီတၢၣ်​တဖၣ်​အံၤ​အဃိ လၢခံ​ဖဲ​ပ​​ဘၣ်​မၤဝဲ တၢ်​ဆၢတဲာ်​အဂၤ​သ့ၣ်​တဖၣ်​အခါ​န့ၣ်​ အ​ကဲထီၣ်​တၢ်​မၤစၢၤ​လၢ ​ပ​က​ဟးဆှဲး တၢ်​ဆၢတဲာ်​လၢ အ​က​မၤ​တံာ်တာ်​ဝဲဒၣ်​ ပ​ဖီတၢၣ်​တဖၣ်​အံၤ​သ့ဝဲ.” လၢခံ​ဒီပုၢ်ဝဲၢ်​ခွါ​ရးစၢၤ ဒီး​အမါ​အဲလံစဘဲၤ အတၢ်ခွဲး​တၢ်ယာ်​အိၣ်​ထီၣ်​ ဒီး​အဝဲသ့ၣ်​ လဲၤ​မၤစၢၤ​တၢ်​လၢ မဲခြိၤနံၡါ လၢ​ပှၤ​လိၣ်​ဘၣ်​အါထီၣ်​ ပှၤ​စံၣ်တဲၤ​တဲ​လီၤ​တၢ်ဖိ​လီၤ.

၁၃. ဒ် စံးထီၣ်​ပတြၢၤ ၂၈:၇ ပာ်ဖျါ​ထီၣ်​ဝဲ​အသိး ပ​မ့ၢ်​နာ်န့ၢ် ယဟိဝၤ​ယွၤ​န့ၣ်​ က​ကဲဘျုး​​ဝဲ​ဒ်လဲၣ်.

^၁၃ ဒ်​ဒီပုၢ်ဝဲၢ်​ခွါ​ရးစၢၤ ဒီး​အမါ​အဲလံစဘဲၤ အသိး ပှၤ​ဒီမါဝၤ​အါဂၤ ပာ်​လီၤ​အသး​လၢ က​အိၣ်မူ​က့ၤ ယိယိ​ဖိ ဒီး​တၢ်​လၢ​အ​ရ့​တ​ဒိၣ်​​ဘၣ်​တဖၣ်​န့ၣ်​ အဝဲသ့ၣ်​တ​မၤ​ဝဲ​လၢၤဘၣ်​ အဃိ အ​တၢ်​ဆၢကတီၢ် အိၣ်​အါထီၣ်​လၢ က​စံၣ်တဲၤ​တဲ​လီၤ​တၢ် ဒီး​က​သိၣ်လိ​ပှၤဂၤ​လံာ်စီဆှံ​လီၤ. ဖဲ​ပှၤ​နီၢ်​ဒီမါဝၤ​တဖၣ်​ ပာ်​လီၤ​ဖီတၢၣ်​လၢ က​မၤ​ယဟိဝၤ​ယွၤ အ​တၢ်မၤ ဒီး​အဝဲသ့ၣ်​ဂုာ်ကျဲးစၢး အဂ့ၤ​ကတၢၢ်​လၢ ကမၤ​လၢပှဲၤ အ​ဖီတၢၣ်​အခါ​န့ၣ်​ က​ကဲဘျုး​ဝဲ ဒိၣ်မး. အဝဲသ့ၣ်​ က​ထံၣ်​ဘၣ်​လၢ ယဟိဝၤ​ယွၤ​ကဟု​ကယာ် အဝဲသ့ၣ်​ ဒီး​အဝဲသ့ၣ်​ အ​တၢ်​နာ်န့ၢ်​ယဟိဝၤ​ယွၤ က​ဟဲ​အါထီၣ်​ ဒီး​အဝဲသ့ၣ်​ က​ဒိးန့ၢ်​​ဘၣ်​တၢ်​သးခု အ​နီၢ်ကီၢ်​လီၤ.—ဖး စံးထီၣ်​ပတြၢၤ ၂၈:၇.

၁၄. စီၤ​ပ့းတရူး​ဒီး​အမါ ပာ်ဖျါ​ထီၣ်​ဝဲ​လၢ အ​နာ်န့ၢ် ယဟိဝၤ​ယွၤ​အ​တၢ်အၢၣ်​လီၤ​လၢ အ​အိၣ်​ဖဲ မးသဲ ၆:၂၅, ၃၁-၃၄ အ​ပူၤ​န့ၣ်​ဒ်လဲၣ်.

^၁၄ ပှၤ​နီၢ်​ဒီမါဝၤ​တဖၣ်​ ကွၢ်လိ​မၤဒိး​ဝဲဒၣ်​ တၢ်မၢဖိ​ပ့းတရူး​ဒီး​အမါ အဒိ​အတဲာ်​သ့ဝဲ. ဖဲ​တၢ်မၢဖိ​ပ့းတရူး ထံၣ်​လိာ်သး​ဒီး ယ့ၣ်ၡူး​အဆိ​ကတၢၢ် ဝံၤ​အလီၢ်​ခံ လၢ​ဃု​လါ မ့တမ့ၢ် လၢ​တနံၣ်​အ​တီၢ်ပူၤ​န့ၣ်​ အ​ဝဲ​​ဘၣ်​ဆၢတဲာ်​တၢ်​လၢ အ​ရ့​ဒိၣ်​တခါ. စီၤ​ပ့းတရူး လုၢ်အီၣ်​လုၢ်အီ အ​ဟံၣ်ဖိ​ဃီဖိ​လၢ တၢ်​ဃုအီၣ်​ညၣ်​အ​တၢ်မၤ​လီၤ. အဃိ ဖဲယ့ၣ်ၡူး​အဲၣ်ဒိး​လၢ စီၤ​ပ့းတရူး ကပိာ်​အခံ​လၢ ဆၢကတီၢ်​လၢပှဲၤ​အခါ စီၤ​ပ့းတရူး က​ဆိကမိၣ်​န့ၢ်​တၢ်​လၢ အ​ဟံၣ်ဖိ​ဃီဖိ​အဂီၢ်​စ့ၢ်ကီး. (လူၤကၣ်​ ၅:၁-၁၁) စီၤ​ပ့းတရူး ဃုထၢ​​ဝဲ​လၢ​ကပိာ်​ယ့ၣ်ၡူး​အခံ လၢ​တၢ်​စံၣ်တဲၤ​တဲ​လီၤ​တၢ်မၤ​အ​ပူၤ. ဒီး​အ​တၢ်​ဆၢတဲာ်​န့ၣ်​​ဘၣ်​ဝဲ. လံာ်စီဆှံ ပာ်ဖျါ​ထီၣ်​ဝဲ​လၢ ဖဲ​ယ့ၣ်ၡူး​ဂဲၤ​ဆၢထၢၣ်​သမူထီၣ်​က့ၤ ဝံၤ​အလီၢ်​ခံ စီၤ​ပ့းတရူး​အမါ ဟး​ပိာ်​အခံ​တတီၤ​ဖိ. (၁ ကရံၣ်သူး ၉:၅) အဃိ ပ​သ့ၣ်ညါ​​ဘၣ်​လၢ စီၤ​ပ့းတရူး​န့ၣ်​ အမါ​ဆီၣ်ထွဲ အ​တၢ်​ဆၢတဲာ်​လီၤ. ပ​ထံၣ်​ဘၣ်​လၢ စီၤ​ပ့းတရူး​အမါ​န့ၣ်​ မ့ၢ်​ခရံာ်ဖိ​ပိာ်မုၣ်​လၢ အ​ဒိဂ့ၤ​တဲာ်​ဘၣ်​အဃိ စီၤ​ပ့းတရူး ဟ့ၣ်ဂံၢ်​ဟ့ၣ်ဘါ ခရံာ်ဖိ​နီၢ်​ဒီမါဝၤ​တဖၣ်​သ့ဝဲ. (၁ ပ့းတရူး ၃:၁-၇) စီၤ​ပ့းတရူး​ဒီး​အမါ​န့ၣ်​ နာ်​ဝဲ​လၢ အမ့ၢ်​ပာ်ဆိ ယွၤ​အဘီ​အမုၢ်​လၢ နီၣ်ဂံၢ်​တၢ​န့ၣ်​ ယဟိဝၤ​ယွၤ​က​ကွၢ်ထွဲ အဝဲသ့ၣ်​လီၤ.—ဖး မးသဲ ၆:၂၅, ၃၁-၃၄.

၁၅. ပ​မၤလိ​န့ၢ်​ဘၣ်​တၢ်​လၢ ဒီပုၢ်ဝဲၢ်​ခွါ​ထံၤအဲကိၤ ဒီး​အမါ​အ့​စ​ထၢၤ အ​တၢ်​လဲၤ​ခီဖျိ​ဒ်လဲၣ်.

^၁၅ န​ထီၣ်ပှၢ်​မ့ၢ်​ယံာ်​လံ​န့ၣ်​ န​ဆဲး​မၤ​အါထီၣ်​ န​တၢ်​သူၣ်ဆူၣ်​သးဆူၣ်​လၢ ကစၢ်​ယွၤ အ​တၢ်မၤ​ပူၤ​က​သ့​ဒ်လဲၣ်. န​မၤ​အီၤ​သ့​ခီဖျိ နဃု​သ့ၣ်ညါ ပှၤ​ဒီမါဝၤ​အဂၤ​တဖၣ်​ အ​တၢ်​လဲၤ​ခီဖျိ. အဒိ, န​ဖး​တၢ်ဂ့ၢ်​လၢ​အ​ဘၣ်ဃး​ဒီး ပှၤလၢ​အသး​အိၣ်​ဟ့ၣ်​​လီၤ​အသး​တဖၣ်​ (“They Offered Themselves Willingly”) အဂ့ၢ်​သ့​လီၤ. တၢ်​လဲၤ​ခီဖျိ​ဒ်အံၤ​တဖၣ်​န့ၣ်​ မၤစၢၤ ဒီပုၢ်ဝဲၢ်​ခွါ​ထံၤအဲကိၤ ဒီး​အမါ​အ့​စ​ထၢၤ လၢ​အ​အိၣ်​လၢ ကီၢ်​ဘြၣ်​စ့(လ်) ဒ်သိး​အဝဲသ့ၣ်​ အ​တၢ်​သူၣ်ဆူၣ်​သးဆူၣ်​ က​ဟဲ​အါထီၣ်​လၢ ​က​လဲၤ​မၤစၢၤ​တၢ်​လၢ တၢ်လီၢ်​လၢ​အ​လိၣ်ဘၣ်​ တၢ်​မၤစၢၤ​အဂီၢ်​လီၤ. ဒီပုၢ်ဝဲၢ်​ခွါ​ထံၤအဲကိၤ တဲ​ဝဲ​လၢ “ဖဲ​ပ​ဖးဘၣ်​ တၢ်​လဲၤ​ခီဖျိ​လၢ ယဟိဝၤ​ယွၤ မၤစၢၤ​အခ့​အပှၤ​လၢ ပစိၤ​ခဲအံၤ​ဒ်လဲၣ်​အခါ ပ​ဝဲ​စ့ၢ်ကီး ပ​အဲၣ်ဒိး​ထံၣ်ဘၣ်​ ယဟိဝၤ​ယွၤ အ​စု​အ​တၢ်​မၤစၢၤ ဒီး​အ​တၢ်​ကဟု​ကယာ်​ပှၤလီၤ.” လၢခံ​ဖဲ ၂၀၁၄ န့ၣ်​အဝဲသ့ၣ်​ လဲၤ​သုးလီၢ်​လၢ ကီၢ်​ပၤ​ရၤကွ့ ဒီး​အဝဲသ့ၣ်​ မၤစၢၤ​တၢ်​လၢ ပှၤ​ကတိၤ ဖီၣ်တူၢ်ကံး အ​လီၢ်ကဝီၤ​လီၤ. ဒီပုၢ်ဝဲၢ်​မုၣ်​အ့​စ​ထၢၤ တဲ​ဝဲ​လၢ “လံာ်စီဆှံ​အဆၢ​လၢ ပ​ခံဂၤ​လၢာ် ဘၣ်သူၣ်​ဘၣ်သး​အီၤ​န့ၣ်​ မ့ၢ်ဝဲ အ့းဖ့းစူး ၃:၂၀. ဖဲ​ပ​မၤ​ယဟိဝၤ​ယွၤ အ​တၢ်မၤ​န့ၣ်​ ပ​ထံၣ်​ဘၣ်​လၢ လံာ်စီဆှံ​တ​ဆၢ​အံၤ ဟဲလၢထီၣ်​ပှဲၤထီၣ်​ဝဲ အါဘျီ.” စီၤ​ပီလူး အ​လံာ်ပရၢ​လၢ အ့းဖ့းစူး​အပူၤ​န့ၣ်​ တဲ​ဝဲ​လၢ ယဟိဝၤ​ယွၤ အၢၣ်​လီၤ​အီ​လီၤ​ပှၤလၢ က​ဟ့ၣ်​​လီၤ​ ပှၤ​တၢ် အါန့ၢ်​ဒံး​တၢ်​လၢ​ပ​ဃ့​အီၤ​လီၤ. တၢ်အၢၣ်​လီၤ​အံၤ ဟဲ​လၢထီၣ်​ပှဲၤထီၣ်​ဝဲ အါဘျီ​လီၤ.

၁၆. ပှၤ​သးစၢ်​လၢ အ​ထီၣ်ပှၢ်​တဖၣ်​ ဒ်သိး​က​ပာ်​လီၤ​ဖီတၢၣ်​ လၢ​အ​တၢ်​အိၣ်မူ​ပူၤ​အဂီၢ် ဃ့​တၢ်​ဟ့ၣ်ကူၣ်​လၢ မ​တဂၤ​အ​အိၣ်​သ့​လဲၣ်.

^၁၆ မုၢ်မဆါ​တနံၤ​အံၤ ပှၤ​သးစၢ်​လၢ အ​ထီၣ်ပှၢ်​သ့ၣ်​တဖၣ်​န့ၣ်​ မၤလိ​န့ၢ်​တၢ်​လၢ ပှၤလၢ​အ​သန့ၤ​အသး​လၢ ​ယဟိဝၤ​ယွၤ​အ​အိၣ်​တဖၣ်​ သ့ဝဲ. ပှၤ​နီၢ်​ဒီမါဝၤ​တနီၤ​န့ၣ်​ မၤ​ကစၢ်​ယွၤ​အ​တၢ်မၤ လၢဆၢကတီၢ်​လၢပှဲၤ လၢ​အ​နံၣ်​အါမး. န​မ့ၢ်​အဲၣ်ဒိး​ပာ်​လီၤ​ဖီတၢၣ်​န့ၣ်​ န​လဲၤ​ဃ့​တၢ်​ဟ့ၣ်ကူၣ်​လၢ အဝဲသ့ၣ်​အ​အိၣ်​သ့. န​မ့ၢ်​မၤ​ဒ်​န့ၣ်​န့ၣ်​ မ့ၢ်ဒၣ်​ န​ပာ်ဖျါ​ထီၣ်​လၢ န​နာ်န့ၢ်​ယဟိဝၤ​ယွၤ​လီၤ. (ကတိၤဒိ ၂၂:၁၇, ၁၉) တၢ်​အိၣ်ဖှိၣ်​သးပှၢ်​တဖၣ်​စ့ၢ်ကီး မၤစၢၤ​ပှၤ​သးစၢ်​လၢ အထီၣ်ပှၢ်​တဖၣ်​ ဒ်သိး က​ပာ်​လီၤ​ဖီတၢၣ်​ ဒီး​က​မၤ​လၢပှဲၤ အ​ဖီတၢၣ်​အဂီၢ်​သ့​လီၤ.

၁၇. ပ​မၤလိ​န့ၢ်​ဘၣ်​တၢ်​လၢ ဒီပုၢ်ဝဲၢ်​ခွါ​ချီ(စ်) ဒီး​အမါ​မရံစၤ အ​တၢ်​လဲၤ​ခီဖျိ​ဒ်လဲၣ်.

^၁၇ တဘျီ​တခီၣ်​န့ၣ်​ ပ​ပာ်​လီၤ​ဖီတၢၣ်​တမၠိ ဘၣ်ဆၣ်​ ယဟိဝၤ​ယွၤ​မၢ​ပ​မၤ တမၠိ​လီၤ. အဒိ, ဆိကမိၣ်​ကွၢ် ဒီပုၢ်ဝဲၢ်​ခွါ​ချီ(စ်) ဒီး​အမါ​မရံစၤ အဒိ​အတဲာ်​လၢ ပ​ပာ်ဖျါ​ထီၣ်​လၢ အ​ခီၣ်ထံး​တက့ၢ်. ဖဲအဝဲသ့ၣ်​ ဖျီ​သး​သၢ​နံၣ်​ ဝံၤ​အလီၢ်​ခံ အဝဲသ့ၣ်​ ပာ်တ့ၢ်​ကွံာ် အဟံၣ်​အဃီ ဒီး​လဲၤ​မၤစၢၤ​တၢ်​လၢ ကီၢ်​ဖ့ၣ်လဲ(န်) အ​ဝဲၤတြၢ် လၢ​တၢ်​သူၣ်ထီၣ်​ဘှီထီၣ်​တၢ်မၤ တ​ကပၤ​လီၤ. ဘၣ်ဆၣ်​ အဝဲသ့ၣ်​ သ့ၣ်ညါ​​ဘၣ်​​ဝဲ​လၢ အ​ကအိၣ်​​ဘၣ်​ဖဲန့ၣ်​ ထဲ​ဃု​လါ အဃိ​အဝဲသ့ၣ်​ သး​ဟးဂီၤ​ဒိၣ်မး. ဘၣ်ဆၣ်​ တယံာ်​​ဘၣ်​န့ၣ်​ ပှၤ​ကွဲမုာ်​အဝဲသ့ၣ်​လၢ ကလဲၤထီၣ်​ အၣ်ရးဘံး ကျိာ်​တၢ်​မၤလိ ဒီး​အဝဲသ့ၣ်​ လဲၤ​စံၣ်တဲၤ​တဲ​လီၤ​​ဘၣ်​တၢ်​လၢ ပှၤ​တဲ​အၣ်ရးဘံး ကျိာ်​အ​ဟီၣ်​ကဝီၤ လၢ​ထံကီၢ်​အဂၤ​တ​ဘ့ၣ်​အဃိ အဝဲသ့ၣ်​ ပှဲၤ​ဒီး​တၢ်​သးခု​. ဒီပုၢ်ဝဲၢ်​မုၣ်​မရံစၤ သ့ၣ်နီၣ်​ဘၣ်က့ၤ တၢ်​လၢ​အ​ပူၤကွံာ် ဒီး​တဲ​ဝဲ​လၢ “ယ​က​​ဘၣ်​မၤတၢ်​လၢ ယ​တ​မၤ​ဘူ​အီၤ နီတဘျီ​​ဘၣ်​န့ၣ်​ အ​တညီဘၣ်. အဃိ ယ​က​​ဘၣ်​နာ်န့ၢ် ယဟိဝၤ​ယွၤ သပှၢ်​ကတၢၢ်. ဘၣ်ဆၣ်​ ယ​ထံၣ်​ဘၣ်​လၢ ယဟိဝၤ​ယွၤ​န့ၣ်​ မၤစၢၤ​ပှၤ​ထီဘိ လၢ​ကျဲ​လၢ ပ​တ​မုၢ်လၢ်​​ဘၣ်​အီၤ​အ​ပူၤ​ဘၣ်. ယ​လဲၤ​ခီဖျိ​​ဘၣ်​တၢ် ဒ်အံၤ​အဃိ ယ​တၢ်​နာ်န့ၢ် ယဟိဝၤ​ယွၤ ဟဲ​ဂၢၢ်ကျၢၤ​ထီၣ်ဝဲ.” တၢ်​လဲၤ​ခီဖျိ​ဒ်အံၤ​တဖၣ်​ ပာ်ဖျါ​ထီၣ်​ဝဲ​လၢ ပ​မ့ၢ်​နာ်န့ၢ် ယဟိဝၤ​ယွၤ လၢ​လၢပှဲၤ​ပှဲၤ​န့ၣ်​ ပနာ်​သ့​သပှၢ်​ကတၢၢ်​လၢ ယဟိဝၤ​ယွၤ​က​ဆိၣ်ဂ့ၤ​ပှၤ ထီဘိ​လီၤ.

၁၈. ပှၤ​နီၢ်​ဒီမါဝၤ​တဖၣ်​ ပာ်ဖျါ​ထီၣ်​လၢ အ​ဆဲး​နာ်န့ၢ် ယဟိဝၤ​ယွၤ က​သ့​ဒ်လဲၣ်.

^၁၈ တၢ်​ဆီဟံၣ်​ဆီဃီ​န့ၣ်​ မ့ၢ်​ဝဲ​တၢ်ဟ့ၣ်​တခါ​လၢ ယဟိဝၤ​ယွၤ အ​အိၣ်​လီၤ. (မးသဲ ၁၉:၅, ၆) ယဟိဝၤ​ယွၤ အဲၣ်ဒိး​ဝဲ​လၢ နီၢ်​ဒီမါဝၤ​လၢ အ​ဆီဟံၣ်​ဆီဃီ​တဖၣ်​န့ၣ်​ ကအိၣ်​ဒီး​တၢ်​သးခု. (ကတိၤဒိ ၅:၁၈) အဃိ န​မ့မ့ၢ်​ပှၤ​သးစၢ်​လၢ အ​ထီၣ်ပှၢ်​တဖၣ်​န့ၣ်​ ဆိကမိၣ်​​လီၤ​က့ၤ မ့ၢ်​သု​မၤ​တၢ်မနုၤ​လၢ သု​တၢ်​အိၣ်မူ​ပူၤ​လဲၣ်. ယဟိဝၤ​ယွၤ ဟ့ၣ်​သု​တၢ်ဟ့ၣ်​အံၤ​အဃိ မ့ၢ်​သု​ပာ်ဖျါ​ထီၣ်​ တၢ်​စံးဘျုး​စံးဖှိၣ်​လၢ ကျဲ​လၢ​အဂ့ၤ​ကတၢၢ်​လံဧါ. ဒီး​ဃ့​ဘါ​ထုကဖၣ်​လၢ ယဟိဝၤ​ယွၤ​အ​အိၣ်​ ဒီး​ဃု​သ့ၣ်ညါ လံာ်စီဆှံ​အ​တၢ်​ဟံးစု​နဲၣ်ကျဲ လၢ​ဘၣ်ထွဲ​လိာ်သး​ဒီး သု​တၢ်အိၣ်သး​တက့ၢ်. သု​မ့ၢ်​မၤထွဲ ယဟိဝၤ​ယွၤ အတၢ်​ဟံးစု​နဲၣ်ကျဲ​န့ၣ်​ သု​နာ်​သ့​သပှၢ်တၢၢ်​လၢ သု​ကအိၣ်​ဒီး​တၢ်​သးခု. ဒီး​သု​မ့ၢ်​ပာ်ဆိ ယဟိဝၤ​ယွၤ​လၢ နီၣ်ဂံၢ်​တၢ​န့ၣ်​ သု​တၢ်​အိၣ်မူ​က​ပှဲၤ​ဒီး တၢ်​သးခု​နီၢ်နီၢ်​လီၤ.