တၢ်မၤလိ ၂၃
မိပါသ့ၣ်ဧၢ မၤစၢၤနဖိ လၢအကအဲၣ် ယဟိဝၤယွၤ
“နကဘၣ်အဲၣ် နကစၢ်ယဟိဝၤယွၤ လၢနသးဒီဖျၢၣ်, လၢနတၢ်အိၣ်မူ ကိးသနၢၣ်ဒဲးအပူၤ ဒီးလၢနတၢ်ကူၣ်တၢ်ဆး ခဲလၢာ်လီၤ.”—မးသဲ ၂၂:၃၇.
တၢ်သးဝံၣ် ၁၃၄ ပဖိမ့ၢ် တၢ်န့ၢ်သါလၢယွၤ
တၢ်မၤလိအံၤ အတၢ်တိာ်ပာ် *
၁-၂. ပတၢ်အိၣ်သး မ့ၢ်ဆီတလဲန့ၣ် လံာ်စီဆှံအတၢ်ဟံးစုနဲၣ်ကျဲ လၢပသ့ၣ်ညါပာ်စၢၤတနီၤ ကကဲဘျုးဒိၣ်ထီၣ် လၢပဂီၢ်ဒ်လဲၣ်.
ဖဲပှၤဒီတၢ်အဲၣ်တီခံဂၤ ဖျီသးတနံၤန့ၣ် ညီနုၢ်အဝဲသ့ၣ် ကနၣ်ဘၣ်ဝဲ တၢ်စံၣ်တဲၤတဲလီၤ လၢအဒိးသန့ၤထီၣ်သး လၢလံာ်စီဆှံ လၢအဘၣ်ဃးဒီး တၢ်ဆီဟံၣ်ဆီဃီအဂ့ၢ်. လံာ်စီဆှံအဆၢ လၢတၢ်စံၣ်တဲၤတဲလီၤအပူၤန့ၣ် အဝဲသ့ၣ် နၢ်ဟူဘၣ်ဝဲအဘျီအါမးလံ. ဘၣ်ဆၣ် စးထီၣ်ဖဲ အဝဲသ့ၣ် ဖျီသးတနံၤအံၤ ဒီးဆူညါန့ၣ် လံာ်စီဆှံအဆၢလၢ အဝဲသ့ၣ် နၢ်ဟူဘၣ်ဝဲတဖၣ်အံၤ အဝဲသ့ၣ် ကမၤထွဲဝဲလၢ အတၢ်အိၣ်မူပူၤအဃိ လံာ်စီဆှံအဆၢတဖၣ်အံၤ ကကဲဘျုးဒိၣ်ထီၣ် လၢအဝဲသ့ၣ်အဂီၢ်.
၂ ပှၤဒီမိၢ်ဝၤခံဂၤစ့ၢ်ကီး တချုးလၢ အဝဲသ့ၣ်ဖိအိၣ်ဒံးဘၣ်န့ၣ် အဝဲသ့ၣ်နၢ်ဟူဘၣ် တၢ်စံၣ်တဲၤတဲလီၤ ဘၣ်ဃးဒီး ပှၤကွၢ်လုၢ်ဒိၣ်ထီၣ်ဖိအဂ့ၢ် အဘျီအါမး. သနာ်က့ ခဲအံၤန့ၣ် ခီဖျိလၢ အဝဲသ့ၣ်အဖိအိၣ်အဃိ လံာ်စီဆှံ အတၢ်ဟံးစုနဲၣ်ကျဲ လၢအဘၣ်ဃးဒီး တၢ်ကွၢ်လုၢ်ဒိၣ်ထီၣ်ဖိန့ၣ် ကကဲဘျုးဒိၣ်ထီၣ် လၢအဝဲသ့ၣ်အဂီၢ်. အဝဲသ့ၣ် အိၣ်ဒီးမူဒါဖးဒိၣ်တခါ လၢကဘၣ်ကွၢ်လုၢ်ဒိၣ်ထီၣ်ဖိအဃိ မူဒါတခါအံၤ တမ့ၢ်တၢ်ညီ လၢအဝဲသ့ၣ်အဂီၢ်ဘၣ်. ပသ့ၣ်ညါဘၣ်လၢ ပတၢ်အိၣ်သး မ့ၢ်ဆီတလဲန့ၣ် လံာ်စီဆှံအတၢ်ဟံးစုနဲၣ်ကျဲ လၢပသ့ၣ်ညါပာ်စၢၤတနီၤ ကကဲဘျုးဒိၣ်ထီၣ်လၢပဂီၢ်. အဃိ ဒ်အံၣ်စရ့လး အစီၤပၤလၢညါတဖၣ် ဘၣ်မၤဝဲအသိး ပဝဲလၢ အဘူၣ်ထီၣ်ဘါထီၣ် ယဟိဝၤယွၤန့ၣ် ပဖးလံာ်စီဆှံ ကိးနံၤဒဲး တကးဒံးဘၣ် ပဆိကမိၣ်ထံအီၤ “ကိးမုၢ်နံၤမုၢ်နၤဒဲး.”—၅ မိၤၡ့ ၁၇:၁၉.
၃. လၢတၢ်မၤလိတခါအံၤန့ၣ် ပကတဲသကိး တၢ်ဂ့ၢ်မနုၤလဲၣ်.
၃ မိပါသ့ၣ်ဧၢ သုအိၣ်ဒီးမူဒါဖးဒိၣ်တခါလၢ ယဟိဝၤယွၤ ဟ့ၣ်လီၤသု. မူဒါတခါအံၤ မ့ၢ်ဝဲ သုကဘၣ်သိၣ်လိ သုဖိတဖၣ်လၢ ယဟိဝၤယွၤအဂ့ၢ် တကးဒံးဘၣ် သုကဘၣ်မၤစၢၤ အဝဲသ့ၣ် ဒ်သိး သုဖိကအဲၣ် ယဟိဝၤယွၤ လၢအသးဒီဖျၢၣ်. အဃိ ဒ်သိး သုဖိကအဲၣ် ယဟိဝၤယွၤအဂီၢ် သုမၤစၢၤအဝဲသ့ၣ် ကသ့ဒ်လဲၣ်. လၢတၢ်မၤလိတခါအံၤန့ၣ် ပကတဲသကိး လံာ်စီဆှံ အတၢ်ဟံးစုနဲၣ်ကျဲလွံၢ်မံၤ လၢကမၤစၢၤ မိပါတဖၣ်. (၂ တံၤမသ့း ၃:၁၆) တကးဒံးဘၣ် ပကထံၣ်ဘၣ်လၢ ခရံာ်ဖိမိပါတနီၤန့ၣ် အဝဲသ့ၣ် မၤထွဲဝဲ လံာ်စီဆှံအတၢ်ဟံးစုနဲၣ်ကျဲအဃိ ကဲဘျုးလၢ အဝဲသ့ၣ်အဂီၢ်ဒိၣ်မး.
လံာ်စီဆှံ အတၢ်ဟံးစုနဲၣ်ကျဲလွံၢ်မံၤ လၢကမၤစၢၤမိပါတဖၣ်
နမ့ၢ်ဃ့ ယဟိဝၤယွၤ အတၢ်ဟံးစုနဲၣ်ကျဲ ဒီးပာ်လီၤ တၢ်ဒိတၢ်တဲာ်လၢအဂ့ၤ ထီဘိန့ၣ် ကကဲဘျုးလၢ နဖိအဂီၢ် (ကွၢ်လံာ်အဆၢ ၄, ၈)
၄. ဒ်သိး မိပါတဖၣ် ကမၤစၢၤအဖိ လၢအကအဲၣ် ယဟိဝၤယွၤအဂီၢ် လံာ်စီဆှံ အတၢ်ဟံးစုနဲၣ်ကျဲ လၢကမၤစၢၤအဝဲသ့ၣ်န့ၣ် မ့ၢ်မနုၤလဲၣ်. (ယၤကိာ် ၁:၅)
၄ လံာ်စီဆှံ အတၢ်ဟံးစုနဲၣ်ကျဲ ၁– ဃ့ယဟိဝၤယွၤ အတၢ်ဟံးစုနဲၣ်ကျဲ. ယဟိဝၤယွၤန့ၣ် အကဲပှၤဟ့ၣ်ကူၣ်တၢ် လၢအဂ့ၤကတၢၢ်တဂၤ. ဘၣ်မနုၤအဃိ ပတဲဒ်န့ၣ်လဲၣ်န့ၣ် ပကဆိကမိၣ်ကွၢ်သကိး တၢ်ဂ့ၢ်ခံထံၣ်. တၢ, ယဟိဝၤယွၤန့ၣ် အကဲပါတဂၤ လၢအတၢ်လဲၤခီဖျိ အိၣ်အါကတၢၢ်. (စံးထီၣ်ပတြၢၤ ၃၆:၉) ခံ, တၢ်ဟ့ၣ်ကူၣ်လၢ ယဟိဝၤယွၤ ဟ့ၣ်ပှၤန့ၣ် ကဲဘျုးလၢပဂီၢ်ထီဘိ. (ယၡါယၤ ၄၈:၁၇) အဃိ ဒ်သိး နကမၤစၢၤနဖိ လၢအကအဲၣ် ယဟိဝၤယွၤအဂီၢ် ဃ့ယဟိဝၤယွၤ အတၢ်ကူၣ်သ့.—ဖး ယၤကိာ် ၁:၅.
၅. (က) ယဟိဝၤယွၤ အတၢ်ကရၢကရိ မၤစၢၤဝဲ မိပါတဖၣ်ဒ်လဲၣ်. (ခ) ဒ်တၢ်ဂီၤမူ ပာ်ဖျါထီၣ်ဝဲအသိး ဘၣ်ဃးဒီး ဒီပုၢ်ဝဲၢ်မုၣ်ဒီးဒီပုၢ်ဝဲၢ်ခွါ အမိရံၤ ကွၢ်လုၢ်ဒိၣ်ထီၣ်အဖိန့ၣ် နမၤလိန့ၢ်ဘၣ် တၢ်မနုၤလဲၣ်.
၅ ဒ်သိး မိပါတဖၣ် ကမၤစၢၤအဖိ လၢအဖိကအဲၣ် ယဟိဝၤယွၤအဂီၢ် ယဟိဝၤယွၤ ဟ့ၣ်လီၤမိပါတဖၣ် လၢတၢ်မၤစၢၤအါမး ဒီးတၢ်မၤစၢၤတဖၣ်အံၤ ဟဲခီဖျိ အကလုၢ်ကထါ ဒီးအတၢ်ကရၢကရိ. (မးသဲ ၂၄:၄၅) အဒိ လံာ်မဲးကစံ လၢအမ့ၢ် ပၢၢ်ထီၣ် (Awake!) န့ၣ်ပှၤထုးထီၣ်ဝဲ လၢကျိာ်လၢအဂၤ လၢအနံၣ်အါမးလံ. ဒီးတၢ်ဂ့ၢ်လၢအအိၣ်လၢ မဲးကစံအပူၤန့ၣ် ခဲအံၤ နဃုကွၢ်အီၤလၢ တၢ်ဂ့ၢ်ခိၣ်တီ လၢအမ့ၢ် “တၢ်မၤစၢၤလၢ ဟံၣ်ဖိဃီဖိအဂီၢ်” လၢပပှာ်ယဲၤသန့ (ဝဲးဘ်ဆးထ်) အပူၤသ့. တကးဒံးဘၣ် လၢ JW ပှာ်ယဲၤသန့ အပူၤန့ၣ် အိၣ်ဒီးတၢ်ဂီၤမူအါမး လၢအဒိးသန့ၤထီၣ်သးလၢ လံာ်စီဆှံ ဒ်သိးကမၤစၢၤဝဲမိပါတဖၣ် လၢအဝဲသ့ၣ် ကကွၢ်လုၢ်ဒိၣ်ထီၣ်အဖိ. *—ကတိၤဒိ ၂:၄-၆.
၆. တၢ်ဟံးစုနဲၣ်ကျဲလၢ ဒီပုၢ်ဝဲၢ်ခွါကၠိ ဒီးအမါ ဒိးန့ၢ်ဘၣ်ဝဲလၢ ယဟိဝၤယွၤ အတၢ်ကရၢကရိန့ၣ် အဝဲသ့ၣ် ထံၣ်ဝဲဒ်လဲၣ်.
၆ တၢ်မၤစၢၤလၢ မိပါတဖၣ်ဒိးန့ၢ်ဘၣ်ဝဲ လၢယဟိဝၤယွၤ အတၢ်ကရၢကရိန့ၣ် အဝဲသ့ၣ် ပာ်လုၢ်ပာ်ပှ့ၤဝဲဒိၣ်မး. ပါတဂၤ လၢအမံၤမ့ၢ်ကၠိန့ၣ် အတဲဝဲလၢ “ပကကွၢ်လုၢ်ဒိၣ်ထီၣ် ပဖိသၢဂၤ လၢတၢ်မ့ၢ်တၢ်တီအပူၤန့ၣ် တညီနီတစဲးဘၣ်. ယၤဒီးယမါန့ၣ် ပဃ့ယဟိဝၤယွၤ အတၢ်မၤစၢၤထီဘိ. အါဘျီန့ၣ် ဒ်သိးပလဲၤခီဖျိ တၢ်အိၣ်သးလၢပထံၣ်ဘၣ်တဖၣ် ကန့ၢ်အဂီၢ် တၢ်လၢအမၤစၢၤပှၤ ဒ်သိးဒီး တၢ်ဂီၤမူ ဒီးတၢ်ဂ့ၢ်တခါခါ လၢအဒိးသန့ၤထီၣ်သး လၢလံာ်စီဆှံန့ၣ် ပထံၣ်ဘၣ်လၢ အဟဲထီၣ်ဝဲ ဖဲပလိၣ်ဘၣ်အီၤအဆၢကတီၢ်. လၢပတၢ်အိၣ်မူပူၤန့ၣ် ပဃုကွၢ်ယဟိဝၤယွၤ အတၢ်ဟံးစုနဲၣ်ကျဲထီဘိ.” ဒီပုၢ်ဝဲၢ်ခွါကၠိ ဒီးအမါ သ့ၣ်ညါဝဲလၢ လံာ်လဲၢ် ဒီးတၢ်ဂီၤမူ လၢပတၢ်ကရၢကရိ ထုးထီၣ်ဝဲန့ၣ် မၤစၢၤဝဲ အဖိတဖၣ်လၢ အဝဲသ့ၣ် ကအိၣ်ဒီး တၢ်ရ့လိာ်သးဒီးယဟိဝၤယွၤ လၢအဂ့ၤ.
၇. ဘၣ်မနုၤအဃိ အရ့ဒိၣ်လၢ မိပါတဖၣ် ကပာ်လီၤ တၢ်ဒိတၢ်တဲာ် လၢအဂ့ၤလဲၣ်. (ရိမ့ၤ ၂:၂၁)
၇ လံာ်စီဆှံ အတၢ်ဟံးစုနဲၣ်ကျဲ ၂– ပာ်လီၤတၢ်ဒိတၢ်တဲာ် လၢအဂ့ၤ. တၢ်လၢမိပါတဖၣ် မၤဝဲန့ၣ် အဖိတဖၣ်ထံၣ်ဝဲ ဒီးမၤပိာ်က့ၤဝဲ အမိအပါအခံ. မိပါတဖၣ်န့ၣ် တလၢတပှဲၤ နီတဂၤဘၣ်. (ရိမ့ၤ ၃:၂၃) သနာ်က့ မိပါတဖၣ် ကဘၣ်ပာ်လီၤ တၢ်ဒိတၢ်တဲာ်လၢအဂ့ၤ လၢအဝဲသ့ၣ် အဖိတဖၣ်အဂီၢ်. (ဖး ရိမ့ၤ ၂:၂၁.) ဘၣ်ဃးဒီး ဖိသၣ်အဂ့ၢ်န့ၣ် ပါတဂၤ တဲဝဲလၢ “တၢ်လၢဖိသၣ်န့ၣ် အလီၤဂာ်ဒ်သိးဒီး ဘဲကိၣ်လိၣ် လၢအဆူးထီၣ်ထံ. ပဖိတဖၣ်ထံၣ်ဝဲ တၢ်လၢပမၤ ဒီးပမ့ၢ်တမၤ ဒ်သိးဒီး တၢ်လၢပသိၣ်လိ အဝဲသ့ၣ်ဘၣ်န့ၣ် အဝဲသ့ၣ် သ့ၣ်ညါဝဲ.” အဃိ ပမ့ၢ်အဲၣ်ဒိးလၢ ပဖိတဖၣ် ကအဲၣ်ယဟိဝၤယွၤန့ၣ် ပကဘၣ် ပာ်ဖျါထီၣ်ဆိလၢ ပအဲၣ်ယဟိဝၤယွၤနီၢ်ကီၢ်.
၈-၉. တၢ်လၢ ဒီပုၢ်ဝဲၢ်ခွါ အဲၤဒြူ ဒီးဒီပုၢ်ဝဲၢ်မုၣ် အဲမၤ တဲဝဲန့ၣ် နမၤလိန့ၢ်ဘၣ် တၢ်မနုၤလဲၣ်.
၈ ဒ်သိး နဖိတဖၣ် ကအဲၣ်ယဟိဝၤယွၤအဂီၢ် နသိၣ်လိအီၤသ့အါမး. ဒီပုၢ်ဝဲၢ်ခွါ အဲၤဒြူ လၢအနံၣ်အိၣ် ၁၇ နံၣ်တဂၤ တဲဝဲလၢ “ယမိယပါ သိၣ်လိယၤလၢ အရ့ဒိၣ်လၢ ယကဃ့ထုကဖၣ်တၢ်ထီဘိ. ယဃ့ထုကဖၣ် ဝံၤလံသနာ်က့ ယပါန့ၣ် ဟဲဃ့ထုကဖၣ်ဒီးယၤ ကိးနၤဒဲး. ယမိယပါ တဲဘၣ်ယၤလၢ ‘ကွၢ်လၢနအဲၣ်ဒိး တဲတၢ်ဒီးယဟိဝၤယွၤန့ၣ် နတဲတၢ်ဒီးအီၤ သ့ကိးဘျီဒဲးလီၤ.’ ခီဖျိလၢ ယမိယပါ သိၣ်လိပာ်စၢၤယၤ ဒ်အံၤအဃိ တၢ်ဃ့ထုကဖၣ်န့ၣ် ယထံၣ်လၢ အကဲတၢ်လၢ အရ့ဒိၣ်ဒိၣ်မး. ယဃ့ထုကဖၣ်မုာ်မး ဒီးယထံၣ်ယဟိဝၤယွၤ ဒ်သိးဒီး ပၢ်လၢအအဲၣ်ယၤတဂၤ.” မိပါသ့ၣ်ဧၢ သုတၢ်အဲၣ်လၢ ယဟိဝၤယွၤအဖီခိၣ် ကဲထီၣ်တၢ်မၤစၢၤလၢ သုဖိကအဲၣ် ယဟိဝၤယွၤန့ၣ် တဘၣ်သးပ့ၤနီၣ်တဂ့ၤ.
၉ ခဲအံၤ ပကကွၢ်သကိး ဒီပုၢ်ဝဲၢ်မုၣ် အဲမၤအဂ့ၢ်. ဒီပုၢ်ဝဲၢ်မုၣ် အဲမၤန့ၣ် အပါပာ်တ့ၢ်ကွံာ်အဝဲသ့ၣ် ဒီးအပါန့ၣ် အကမၢ်ထီၣ်ဒီဒူၣ်ညါ. အဃိ အဲမၤအမိန့ၣ် ဘၣ်လိးန့ၢ်ဝဲ အဲမၤအပါအကမၢ်အါမး. အဲမၤတဲဝဲလၢ “ယမိန့ၣ် အစ့တအိၣ်အါအါဘၣ် သနာ်က့ ယမိတဲဝဲ ဘၣ်ဃးဒီး ယဟိဝၤယွၤ အံးထွဲကွၢ်ထွဲ အပှၤဂီၢ်မုၢ်အဂ့ၢ် ထီဘိ. ယသ့ၣ်ညါဘၣ်လၢ တၢ်လၢယမိတဲဝဲန့ၣ် အနာ်ဝဲ သပှၢ်တၢၢ် ဒီးယမိန့ၣ် အမၤထွဲဒ် အသိၣ်လိယၤ.” ပမၤလိဘၣ်လၢ မိပါတဖၣ် မ့ၢ်ထံၣ်ဘၣ်ဒီး တၢ်အိၣ်သး လၢအကီအခဲ သနာ်က့ အဝဲသ့ၣ် သိၣ်လိအဖိ ခီဖျိ အတၢ်ဒိတၢ်တဲာ် လၢအဂ့ၤသ့.—ကလၤတံ ၆:၉.
၁၀. ပှၤအံၣ်စရ့လးဖိမိပါတဖၣ် တဲသကိးတၢ်ဒီး အဖိတဖၣ် သ့လၢအဆၢကတီၢ်ဖဲလဲၣ်. (၅ မိၤၡ့ ၆:၆, ၇)
၁၀ လံာ်စီဆှံ အတၢ်ဟံးစုနဲၣ်ကျဲ ၃– တဲသကိးတၢ်ဒီး နဖိထီဘိ. ယဟိဝၤယွၤ မၤလိာ်ဝဲ ပှၤအံၣ်စရ့လးဖိလၢပျၢၤတဖၣ် လၢအဝဲသ့ၣ် ကသိၣ်လိအဖိ ဘၣ်ဃးဒီး ယဟိဝၤယွၤအဂ့ၢ်ထီဘိ. (ဖး ၅ မိၤၡ့ ၆:၆, ၇.) လၢညါန့ၣ် ဒ်သိးမိပါတဖၣ် ကမၤစၢၤအဖိလၢ အဖိကအဲၣ် ယဟိဝၤယွၤအဂီၢ် အဝဲသ့ၣ် အိၣ်ဒီးတၢ်ခွဲးတၢ်ယာ် ဒီတနံၤညါ လၢကတဲသကိးတၢ်ဒီးအဖိ. အဒိ ဖိခွါတဂၤ ဘၣ်သ့ၣ်သ့ၣ် အကမၤစၢၤအပါ ဒီတနံၤညါ လၢကသူၣ်အီၣ်ဖျးအီၣ်တၢ် ဒီးကဟဲက့ၤစိာ်ဝဲ တၢ်အီၣ်တၢ်အီ လၢအဝဲသ့ၣ်သူၣ်ဝဲ. မ့မ့ၢ်လၢ ဖိမုၣ်တဂၤန့ၣ် ကမၤစၢၤအမိလၢ ကဆးတၢ်, ကထါတၢ် ဒီးကမၤစၢၤအမိလၢ ဟံၣ်ဃီတၢ်ဖံးတၢ်မၤ လၢအဂၤ. ဖဲမိပါ ဒီးဖိတဖၣ် မၤသကိးတၢ် ဒ်သိးသိးအဆၢကတီၢ် အဝဲသ့ၣ် တဲသကိး တၢ်ဂ့ၢ်လၢအရ့ဒိၣ်တဖၣ် သ့ဝဲအါမး. အဒိ အဝဲသ့ၣ် တဲသကိး ဘၣ်ဃးဒီး ယဟိဝၤယွၤ မၤဂ့ၤတၢ်ဒ်လဲၣ် အဂ့ၢ်သ့. တကးဒံးဘၣ် အဝဲသ့ၣ် တဲသကိး ဘၣ်ဃးဒီး ယဟိဝၤယွၤ မၤစၢၤအဝဲသ့ၣ်ဟံၣ်ဖိဃီဖိ ဒ်လဲၣ်အဂ့ၢ်သ့.
၁၁. မိပါတဖၣ် တဲသကိးတၢ်ဒီး အဖိတဖၣ် သ့လၢအဆၢကတီၢ်ဖဲလဲၣ်.
၁၁ ဆၢကတီၢ်ခဲအံၤန့ၣ် တဒ်သိး လၢညါလၢၤဘၣ်. လၢထံကီၢ်အါဘ့ၣ်န့ၣ် မိပါဒီးဖိတဖၣ် ကတဲသကိးတၢ်အဂီၢ် တၢ်ဆၢကတီၢ် တအိၣ်အါအါဘၣ်. မိပါန့ၣ် ဘၣ်လဲၤမၤတၢ် ဒီးဖိတဖၣ်န့ၣ် ဘၣ်လဲၤထီၣ်ကၠိ. အဃိ ဒ်သိးမိပါတဖၣ် ကတဲသကိးတၢ်ဒီး အဖိတဖၣ်အဂီၢ် အဝဲသ့ၣ် ကဘၣ်ပာ်လီၤဃာ် တၢ်ဆၢကတီၢ်. (အ့းဖ့းစူး ၅:၁၅, ၁၆; ဖံလံးပံၤ ၁:၁၀) ဒီးမိပါတဖၣ် ပာ်လီၤဃာ် တၢ်ဆၢကတီၢ် လၢကတဲသကိးတၢ်ဒီး အဖိတဖၣ်သ့ဖဲ အဝဲသ့ၣ်မၤ ဟံၣ်ဖိဃီဖိ တၢ်မၤလိလံာ်စီဆှံ အဆၢကတီၢ်. အဒိ ဒီပုၢ်ဝဲၢ်ခွါသးစၢ်တဂၤ အဲလ့ၤစါဒၢၤန့ၣ် အတဲဝဲလၢ “ယပါန့ၣ် အပာ်လီၤဃာ် တၢ်ဆၢကတီၢ် လၢပကမၤဟံၣ်ဖိဃီဖိ တၢ်မၤလိလံာ်စီဆှံအဂီၢ် ထီဘိ. အဝဲတပျဲဝဲလၢ တၢ်တမံၤမၣ် ကမၤတံာ်တာ် ပတၢ်ဆၢကတီၢ် တခါအံၤဘၣ်. ပမၤဟံၣ်ဖိဃီဖိ တၢ်မၤလိလံာ်စီဆှံဝံၤဘျီ ပတဲသကိး တၢ်ဂ့ၢ်လၢ ပအဲၣ်ဒိးတဲ.”
၁၂. ဖဲဟံၣ်ခိၣ်တဂၤ မၤဝဲဟံၣ်ဖိဃီဖိ တၢ်မၤလိလံာ်စီဆှံ အဆၢကတီၢ် အကဘၣ်မၤစၢၤ အဖိဒ်လဲၣ်.
၁၂ ဒ်သိး နဖိတဖၣ် မၤဟံၣ်ဖိဃီဖိ တၢ်မၤလိလံာ်စီဆှံ ကမုာ်အဂီၢ် နမ့ၢ်ကဲဟံၣ်ခိၣ်န့ၣ် နကဘၣ်မၤဒ်လဲၣ်. နမၤလိနဖိလၢ လံာ်အသီတဘ့ၣ် လၢအမ့ၢ် အိၣ်မူလီၤထူလီၤယိာ် ပှဲၤဒီးတၢ်သးခု သ့. လံာ်တဘ့ၣ်အံၤ ကမၤစၢၤနၤလၢ နကတဲသကိးတၢ်ဒီးနဖိ. ဒီးဖဲနမၤလိ လံာ်စီဆှံ ဒီးနဖိတဖၣ်အခါ မၤစၢၤနဖိလၢ အကတဲပၠးနၤ အတၢ်ထံၣ် ဒီးတၢ်လၢအဘၣ်ယိၣ်ဝဲတဖၣ်. အဃိ လၢဟံၣ်ဖိဃီဖိ တၢ်မၤလိလံာ်စီဆှံ အဆၢကတီၢ်န့ၣ် တဘၣ်အ့န့နဖိ ဒီးပာ်တၢ်ကမၣ်လၢ အဝဲသ့ၣ်အလိၤတဂ့ၤ. နဖိတဖၣ် မ့ၢ်တဲပၠး အတၢ်ထံၣ်မၣ် နမၤစၢၤအဝဲသ့ၣ်ကသ့. အဃိ မၤစၢၤအဝဲသ့ၣ်လၢ ကတဲဖျါထီၣ် အတၢ်ထံၣ်ပျီပျီ. ဒီးနဖိတဖၣ် အတၢ်ထံၣ် မ့ၢ်တဘၣ်လိာ်သးဒီး လံာ်စီဆှံဘၣ် သနာ်က့ တဘၣ်သးထီၣ်အဝဲသ့ၣ် တဘျီဃီတဂ့ၤ.
မိပါတဖၣ် ကွၢ်တၢ်ဘၣ်တ့ လၢအခိၣ်အဃၢၤ ဒီးအသိၣ်လိအဖိ လၢယဟိဝၤယွၤ အတၢ်ဂ့ၤတၢ်ဝါသ့ (ကွၢ်လံာ်အဆၢ ၁၃)
၁၃. မိပါတဖၣ် ဃုတၢ်ခွဲးတၢ်ယာ်လၢ အဝဲသ့ၣ် ကမၤစၢၤအဖိ ဒ်သိးအဖိ ကအဲၣ်ယဟိဝၤယွၤ ကသ့ဒ်လဲၣ်.
၁၃ မိပါသ့ၣ်ဧၢ ဒ်သိးနဖိတဖၣ် ကအဲၣ်ယဟိဝၤယွၤအဂီၢ် ဃုတၢ်ခွဲးတၢ်ယာ်လၢ ကမၤစၢၤအဝဲသ့ၣ်. ဒ်သိး နကမၤစၢၤအဝဲသ့ၣ်အဂီၢ် တလိၣ်လၢ နကဘၣ်အိၣ်ခိးတုၤလၢ တၢ်မၤလိလံာ်စီဆှံ အဆၢကတီၢ်ဘၣ်. အဒိ မိတဂၤ လၢအမံၤမ့ၢ်လံစၤန့ၣ် တဲဝဲလၢ “ပတဲဘၣ်ပဖိတဖၣ်လၢ တၢ်ဘၣ်တ့လၢ ပခိၣ်ပဃၢၤတဖၣ်န့ၣ် ပာ်ဖျါထီၣ်န့ၢ်ပှၤ ယဟိဝၤယွၤအဂ့ၢ်အါမး. ပထွံၣ်တဒု မ့ၢ်မၤတၢ်တမံၤမံၤ လၢအလီၤနံၤဘၣ်ပှၤန့ၣ် ပဖိတဖၣ်နံၤဝဲ ဒီးအဝဲသ့ၣ်သးခုညါ. အဃိ ပတဲဘၣ်ပဖိလၢ ယဟိဝၤယွၤန့ၣ် အကဲကစၢ်ယွၤ လၢအအိၣ်ဒီး တၢ်သးခု ဒီးအအဲၣ်ဒိးလၢ ပဝဲစ့ၢ်ကီး ပကအိၣ်ဒီး တၢ်သးခု.”
မိပါသ့ၣ်ဧၢ နသ့ၣ်ညါနဖိ အသကိးဧါ (ကွၢ်လံာ်အဆၢ ၁၄) *
၁၄. ဘၣ်မနုၤအဃိ အရ့ဒိၣ်လၢ မိပါတဖၣ် ကဘၣ်မၤစၢၤအဖိ လၢကဃုထၢ အသကိးလၢအဂ့ၤလဲၣ်. (ကတိၤဒိ ၁၃:၂၀)
၁၄ လံာ်စီဆှံ အတၢ်ဟံးစုနဲၣ်ကျဲ ၄– မၤစၢၤသုဖိ လၢကဃုထၢ အသကိးလၢအဂ့ၤ. လံာ်စီဆှံ ပာ်ဖျါထီၣ်ဝဲလၢ ပသကိးလၢ ပရ့ဒီးအီၤတဖၣ် အလုၢ်လၢ်သကဲာ်ပဝးန့ၣ် ကဲဘျုးလၢပဂီၢ်သ့ မ့တမ့ၢ် အမၤဘၣ်ဒိပှၤသ့. (ဖး ကတိၤဒိ ၁၃:၂၀.) မိပါသ့ၣ်ဧၢ နဖိတဖၣ် ဒီသကိးဒီး မတဂၤလဲၣ်န့ၣ် နသ့ၣ်ညါဧါ. နဖိတဖၣ် အသကိးန့ၣ် နထံၣ်ဘၣ်အဝဲသ့ၣ် ဒီးရ့ဘၣ်ဒီးအဝဲသ့ၣ် တဘျီဘျီဧါ. ဒ်သိးနဖိကရ့ဒီး ပှၤလၢအအဲၣ်ယဟိဝၤယွၤအဂီၢ် နမၤစၢၤအဝဲသ့ၣ် ကသ့ဒ်လဲၣ်. (၁ ကရံၣ်သူး ၁၅:၃၃) နကမၤစၢၤနဖိအဂီၢ် ကွဲမုာ် ပှၤလၢအအိၣ်ဒီး တၢ်ရ့လိာ်သးဒီးယဟိဝၤယွၤ လၢအဂ့ၤ လၢကဟဲရ့လိာ်သးဒီး သုဒီးသုဖိ.—စံးထီၣ်ပတြၢၤ ၁၁၉:၆၃.
၁၅. ဒ်သိးဖိတဖၣ် ကအိၣ်ဒီး သကိးလၢအဂ့ၤအဂီၢ် မိပါတဖၣ် မၤစၢၤအဝဲသ့ၣ် ကသ့ဒ်လဲၣ်.
၁၅ ပကတဲသကိး ပါတဂၤ လၢအမံၤမ့ၢ်ထိနံၤ အတၢ်လဲၤခီဖျိ. ထိနံၤ တဲဝဲလၢ ဒ်သိး အဖိတဖၣ် ကအိၣ်ဒီး သကိးလၢအဂ့ၤအဂီၢ် အီၤဒီးအမါန့ၣ် ဘၣ်မၤစၢၤအဖိအါမး. ထိနံၤ တဲဝဲလၢ “ယၤဒီးယမါန့ၣ် ပကွဲဒီပုၢ်ဝဲၢ်မုၣ်ခွါတဖၣ် လၢအညါဘီၣ်မ့ၢ်ဂ့ၤ အညါပှၢ်မ့ၢ်ဂ့ၤ လၢပဟံၣ်ထီဘိ. အဝဲသ့ၣ် ဟဲအီၣ်သကိးမ့ၤ ဒီးမၤသကိး ဟံၣ်ဖိဃီဖိ တၢ်မၤလိလံာ်စီဆှံဒီးပှၤ. ပမၤဒ်အံၤအဃိ ပသ့ၣ်ညါအါထီၣ်ဘၣ် ပှၤလၢအအဲၣ်ယဟိဝၤယွၤ ဒီးမၤယဟိဝၤယွၤအတၢ်မၤ လၢတၢ်သးခု. တကးဒံးဘၣ် ပကွဲစ့ၢ်ကီး ကဝီၤအပှၤကွၢ်တၢ်, မံၤၡၢၤနရံၤ ဒီးပှၤအဂၤ လၢအဝဲသ့ၣ် ကဟဲမံလၢပဟံၣ်. အဝဲသ့ၣ်တဲပၠးပှၤ အတၢ်လဲၤခီဖျိ, အတၢ်သးဆူၣ် ဒီးအတၢ်ဟ့ၣ်လီၤသး လၢကစၢ်ယွၤအတၢ်မၤန့ၣ် ကဲထီၣ်တၢ်ဂံၢ်တၢ်ဘါ လၢပဖိအဂီၢ် ဒီးမၤစၢၤပဖိလၢ ကအဲၣ်ယဟိဝၤယွၤအါထီၣ်.” အဃိ မိပါသ့ၣ်ဧၢ ဂုာ်ကျဲးစၢး မၤစၢၤနဖိလၢ အကအိၣ်ဒီး သကိးလၢအဂ့ၤထီဘိ.
ဆဲးအိၣ်ဒီး တၢ်မုၢ်လၢ်ထီဘိ
၁၆. နဖိမ့ၢ်တဲလၢ အတအဲၣ်ဒိးမၤ ယဟိဝၤယွၤ အတၢ်မၤဘၣ်န့ၣ် နကမၤဒ်လဲၣ်.
၁၆ နဂုာ်ကျဲးစၢးမၤစၢၤနဖိ လၢအဂ့ၤကတၢၢ်လံ ဘၣ်ဆၣ် နဖိမ့ၢ်တဲလၢ အတအဲၣ်ဒိးမၤ ယဟိဝၤယွၤ အတၢ်မၤဘၣ်န့ၣ် တဘၣ်သးဟးဂီၤတဂ့ၤ. ဒီးတဘၣ်ဆိကမိၣ်လၢ နတမၤလၢပှဲၤနမူဒါ လၢအဂ့ၤကတၢၢ်ဘၣ်န့ၣ်တဂ့ၤ. ယဟိဝၤယွၤ ဟ့ၣ်ပဝဲကိးဂၤဒဲး ဃုာ်ဒီးနဖိတဖၣ် တၢ်သဘျ့ လၢအကဃုထၢတၢ် လၢအနီၢ်ကစၢ်ဒၣ်ဝဲ အဃိ အဝဲသ့ၣ် ကမၤယဟိဝၤယွၤ အတၢ်မၤဧါ တမၤဧါန့ၣ် ဒိးသန့ၤထီၣ်သးလၢ အနီၢ်ကစၢ်တၢ်ဃုထၢ. အဃိ နဖိမ့ၢ်ပာ်တ့ၢ် ယဟိဝၤယွၤန့ၣ် အိၣ်ဒီး တၢ်မုၢ်လၢ်ထီဘိလၢ နဖိကဟဲက့ၤကဒါက့ၤ လၢယဟိဝၤယွၤအအိၣ်. ဆိမိၣ်ထီၣ်က့ၤ ယ့ၣ်ၡူးဟ့ၣ်တၢ်အဒိ ဘၣ်ဃးဒီး ဖိခွါလၢအဟးဖျိးတဂၤန့ၣ်အဂ့ၢ်. (လူၤကၣ် ၁၅:၁၁-၁၉, ၂၂-၂၄) လၢတၢ်အဒိပူၤ ဖိခွါတဂၤန့ၣ် အမၤတၢ်လၢ အတဂ့ၤဘၣ်အါမး ဘၣ်ဆၣ် လၢခံန့ၣ် ဖိခွါတဂၤအံၤ ဟဲက့ၤကဒါ လၢအပါအအိၣ်. သနာ်က့ ပှၤတနီၤကတဲဝဲလၢ “ဖိသဒါအဂ့ၢ်တခါအံၤ အကဲတၢ်တဲပူၤလီၤ. တမ့ၢ်လၢအကကဲထီၣ်သး နီၢ်ကီၢ်ဘၣ်.” ဘၣ်ဆၣ် ဘၣ်ဃးဒီးတၢ်ဂ့ၢ်တခါအံၤ တၢ်ကဲထီၣ်သးနီၢ်ကီၢ် အိၣ်ဝဲန့ၣ် ပကထံၣ်ဘၣ်လၢ ဒီပုၢ်ဝဲၢ်ခွါသးစၢ်အ့လံၤ အတၢ်လဲၤခီဖျိ.
၁၇. အ့လံၤ အတၢ်လဲၤခီဖျိအံၤန့ၣ် ဟ့ၣ်ဂံၢ်ဟ့ၣ်ဘါနၤဒ်လဲၣ်.
၁၇ ဘၣ်ဃးဒီး အ့လံၤ အမိအပါအဂ့ၢ်န့ၣ် အ့လံၤတဲဝဲလၢ “ယမိယပါ ဂုာ်ကျဲးစၢး မၤစၢၤယၤ ဒ်သိးဒီး ယကအဲၣ်ယဟိဝၤယွၤ ဒီးအကလုၢ်ကထါ လံာ်စီဆှံ. ဘၣ်ဆၣ် ဖဲယအိၣ် ၁၅ နံၣ်အခါန့ၣ် ယနၢ်က့ၣ်မး.” အ့လံၤန့ၣ် အအိၣ်မူဝဲ တၢ်အိၣ်မူခံမၠိ ဒီးတၢ်လၢအတဂ့ၤဘၣ်န့ၣ် အမၤခူသူၣ်ဝဲခဲလၢာ်. အမိအပါ ဂုာ်ကျဲးစၢး မၤစၢၤအီၤ ဒ်သိးဒီး အကအဲၣ်ယဟိဝၤယွၤ ဘၣ်ဆၣ် အတဒိကနၣ် အမိအပါ ကလုၢ်ဘၣ်. ဖဲအ့လံၤ ကၠံၣ်လီၤလၢ ဟံၣ်ဝံၤအလီၢ်ခံ အဝဲဟးမၤ လုၢ်လၢ်သကဲာ်ပဝး လၢအတဂ့ၤဘၣ်တဖၣ်. သနာ်က့ တဘျီတခီၣ်န့ၣ် အ့လံၤ တဲဘၣ်အသကိး ဘၣ်ဃးဒီး လံာ်စီဆှံအဂ့ၢ်. အ့လံၤ တဲဝဲလၢ “ယတဲဘၣ်ယသကိးလၢ ယဟိဝၤယွၤအဂ့ၢ် အါထီၣ်ဘျီ ယဆိကမိၣ်ဘၣ်ဃးဒီး ယဟိဝၤယွၤအဂ့ၢ်အါထီၣ်. လၢခံ ကယီကယီန့ၣ် တၢ်ချံလၢအမ့ၢ် လံာ်စီဆှံ တၢ်မ့ၢ်တၢ်တီ လၢယမိယပါ ဂုာ်ကျဲးစၢး သူၣ်လီၤဝဲလၢ ယသးပူၤန့ၣ် ဟဲဒိၣ်ထီၣ်ဝဲ သပှၢ်တၢၢ်.” လၢခံ အ့လံၤန့ၣ် ဟဲက့ၤကဒါက့ၤ လၢယဟိဝၤယွၤအအိၣ်. * မ့ၢ်လၢ အ့လံၤအမိအပါ သိၣ်လိပာ်စၢၤအီၤ လၢအကအဲၣ် ယဟိဝၤယွၤ လၢအနီၢ်ဆံးခါလံအဃိ ဖဲအ့လံၤ ဟဲက့ၤကဒါက့ၤလၢ ယဟိဝၤယွၤအအိၣ်အခါ အမိအပါ ကသးခုဝဲသပှၢ်တၢၢ်.—၂ တံၤမသ့း ၃:၁၄, ၁၅.
၁၈. မိပါလၢ အဂုာ်ကျဲးစၢး သိၣ်လိအဖိ လၢအဖိကအဲၣ် ယဟိဝၤယွၤန့ၣ် နထံၣ်အဝဲသ့ၣ်ဒ်လဲၣ်.
၁၈ မိပါသ့ၣ်ဧၢ ယဟိဝၤယွၤ ဟ့ၣ်လီၤနၤ မူဒါလီၤလီၤဆီဆီတခါ. မူဒါတခါအံၤ မ့ၢ်ဝဲဒ်သိး နကကွၢ်လုၢ်ဒိၣ်ထီၣ် ပှၤလၢခံတစိၤ လၢကဘူၣ်ထီၣ်ဘါထီၣ် ယဟိဝၤယွၤ. (စံးထီၣ်ပတြၢၤ ၇၈:၄-၆) မူဒါတခါအံၤ တမ့ၢ်မူဒါ ညီညီဖိဘၣ် သနာ်က့ နဂုာ်ကျဲးစၢးမၤစၢၤနဖိ လၢအဂ့ၤကတၢၢ်အဃိ ပစံးဘျုးနၤဒိၣ်မး. နမ့ၢ်ဂုာ်ကျဲးစၢး အဂ့ၤကတၢၢ် လၢနကသိၣ်လိနဖိ လၢအကအဲၣ် ယဟိဝၤယွၤ ဒီးကဒိကနၣ်အကလုၢ် ထီဘိန့ၣ် ယဟိဝၤယွၤ ကသးခုသပှၢ်တၢၢ်.—အ့းဖ့းစူး ၆:၄.
တၢ်သးဝံၣ် ၁၃၅ ယဟိဝၤယွၤ အတၢ်ဃ့ကညး “ယဖိခွါဧၢ, ကူၣ်တၢ်သ့” တက့ၢ်
^ ခရံာ်ဖိမိပါတဖၣ်န့ၣ် အဲၣ်အဖိတဖၣ်ဒိၣ်မး. အဝဲသ့ၣ် ဂုာ်ကျဲးစၢး မၤလၢပှဲၤန့ၢ် အဖိတၢ်လိၣ်ဘၣ် ဒီးမၤသးခုအဖိတဖၣ်အသး. တကးဒံးဘၣ် အဝဲသ့ၣ် မၤစၢၤအဖိ ဒ်သိးဒီး အဖိတဖၣ် ကအဲၣ်ယဟိဝၤယွၤ. အဃိ လၢတၢ်မၤလိ တခါအံၤန့ၣ် ပကတဲသကိး လံာ်စီဆှံ အတၢ်ဟံးစုနဲၣ်ကျဲလွံၢ်မံၤ. တၢ်ဟံးစုနဲၣ်ကျဲလွံၢ်မံၤအံၤ ကမၤစၢၤဝဲ မိပါတဖၣ် ဒ်သိးအဝဲသ့ၣ် ကမၤစၢၤအဖိ လၢအကအဲၣ် ယဟိဝၤယွၤအဂီၢ်.
^ ကွၢ်တၢ်ဂီၤမူ လၢအခိၣ်တီမ့ၢ်ဝဲ ယဟိဝၤယွၤ သိၣ်လိပှၤဒ်သိး ပကလုၢ်ဒိၣ်ထီၣ်ပဖိအဂီၢ် လၢ jw.org အပူၤ.
^ ကွၢ်တၢ်ဂ့ၢ် “The Bible Changes Lives” in The Watchtower of April 1, 2012.
^ တၢ်တဲဖျါထီၣ်တၢ်ဂီၤ အခီပညီ– ပါတဂၤ ဒ်သိး အကသ့ၣ်ညါ အဖိခွါအသကိးအဂီၢ် အလိာ်ကွဲ ဖျၢၣ်သွ့ (basketball) ဒီးအဖိခွါဒီး အဖိခွါအသကိး.
