တၢ်မၤလိ ၂၁
လံာ်လီၣ်ဖျါ ပာ်ဖျါထီၣ်န့ၢ်ပှၤ ပတၢ်အိၣ်မူလၢ ခါဆူညါအဂီၢ်ဒ်လဲၣ်
“အၤမ့ၣ်, ယကစၢ်ယ့ၣ်ၡူးဧၢ, ဟဲတက့ၢ်.”—လီၣ်ဖျါ ၂၂:၂၀.
တၢ်သးဝံၣ် ၁၄၂ တၢ်မုၢ်လၢ်လၢ အမၤဂၢၢ်မၤကျၢၤပှၤ
တၢ်မၤလိအံၤ အတၢ်တိာ်ပာ် *
၁. တၢ်ဂ့ၢ်အရ့ဒိၣ်တခါလၢ ပှၤကိးဂၤဒဲး ကဘၣ်ဆၢတဲာ်ဝဲန့ၣ် မ့ၢ်မနုၤလဲၣ်.
ဆၢကတီၢ်ခဲအံၤ ပှၤကိးဂၤဒဲး ကဘၣ်ဆၢတဲာ်ဝဲ တၢ်ဂ့ၢ်အရ့ဒိၣ်တခါ. မ့ၢ်အဝဲသ့ၣ် ကဆီၣ်ထွဲ ယဟိဝၤယွၤ လၢအမ့ၢ် တၢ်ပၢကစၢ် လၢအပၢဝဲ မူခိၣ်ဟီၣ်ခိၣ်ဧါ မ့တမ့ၢ် ကဆီၣ်ထွဲဝဲ ကစၢ်ယွၤအဒုၣ်အဒါ လၢအမ့ၢ် မုၣ်ကီၤလံၢ်ဧါ. ပှၤကိးဂၤဒဲး ကဘၣ်ဃုထၢဝဲ တခါခါ ဒီးအဝဲသ့ၣ်အိၣ်လၢ တၢ်ဘၢၣ်စၢၤ တသ့ဘၣ်. အဃိ အဝဲသ့ၣ် ကအိၣ်မူဘၣ် လီၤထူလီၤယိာ်ဧါ တအိၣ်မူဘၣ်ဧါန့ၣ် ဒိးသန့ၤထီၣ်သးလၢ အဝဲသ့ၣ် အတၢ်ဆၢတဲာ် အဖီခိၣ်. (မးသဲ ၂၅:၃၁-၃၃, ၄၆) တကးဒံးဘၣ် ဖဲ “တၢ်နးတၢ်ဖှီၣ်ဖးဒိၣ်အဆၢကတီၢ်” ပှၤလၢအသးတီတဖၣ်န့ၣ် ယဟိဝၤယွၤ ကပာ်ပနီၣ် အဝဲသ့ၣ်လၢ အကပူၤဖျဲး. (လီၣ်ဖျါ ၇:၁၄; ယဃ့းစက့လး ၉:၄, ၆) မ့မ့ၢ် ပှၤလၢအအိၣ်ဒီး ဆၣ်ဖိကီၢ်ဖိ လၢအအၢတဒု အတၢ်ပနီၣ်န့ၣ် ယဟိဝၤယွၤ ကမၤဟးဂီၤကွံာ် အဝဲသ့ၣ်.—လီၣ်ဖျါ ၁၄:၉-၁၁.
၂. (က) ဧ့ၤဘြံၤ ၁၀:၃၅-၃၉ ဟ့ၣ်ဂံၢ်ဟ့ၣ်ဘါပှၤလၢ ပကမၤ တၢ်မနုၤလဲၣ်. (ခ) လံာ်လီၣ်ဖျါ မၤစၢၤပှၤ သ့ဒ်လဲၣ်.
၂ ဖး ဧ့ၤဘြံၤ ၁၀:၃၅-၃၉. နဆၢတဲာ်လီၤနသးလၢ နကဆီၣ်ထွဲ ယဟိဝၤယွၤ အတၢ်ပၢအဃိ နတၢ်ဆၢတဲာ်အံၤ ဂ့ၤဒိၣ်မး. ဒီးခဲအံၤ နအဲၣ်ဒိး မၤစၢၤပှၤဂၤလၢ ကဆၢတဲာ် တၢ်လၢအဘၣ်. ဒ်သိး နကမၤစၢၤ အဝဲသ့ၣ်အဂီၢ် နတဲပၠးတၢ်ဂ့ၢ်လၢ လံာ်လီၣ်ဖျါအပူၤသ့. လံာ်လီၣ်ဖျါ ပာ်ဖျါထီၣ်ဝဲ ဘၣ်ဃးဒီး တၢ်ကကဲထီၣ်သးဒီး ပှၤလၢအထီဒါ ယဟိဝၤယွၤ. တကးဒံးဘၣ် ပာ်ဖျါထီၣ်စ့ၢ်ကီးဝဲ ဘၣ်ဃးဒီး ယဟိဝၤယွၤ ကဆိၣ်ဂ့ၤ ပှၤသးတီ လၢအဆီၣ်ထွဲ အတၢ်ပၢတဖၣ်. အဃိ ပကဘၣ်မၤလိ တၢ်မ့ၢ်တၢ်တီ လၢအရ့ဒိၣ် တဖၣ်အံၤအဂ့ၢ်. ပမ့ၢ်မၤလိသကိး တၢ်မ့ၢ်တၢ်တီတဖၣ်အံၤန့ၣ် ကမၤစၢၤပှၤလၢ ပကမၤ ယဟိဝၤယွၤ အတၢ်မၤထီဘိ. တကးဒံးဘၣ် ဒ်သိးဒီး ပှၤဂၤ ကဆၢတဲာ်လီၤသးလၢ ကဘူၣ်ထီၣ်ဘါထီၣ် ယဟိဝၤယွၤ ဒီးကမၤအတၢ်မၤ ထီဘိအဂီၢ် တၢ်လၢပမၤလိဘၣ် တဖၣ်အံၤ ပကဘၣ်တဲဘၣ်ပှၤဂၤ.
၃. လၢတၢ်မၤလိအံၤန့ၣ် ပကတဲသကိး တၢ်ဂ့ၢ်မနုၤလဲၣ်.
၃ လၢတၢ်မၤလိအံၤ ပကတဲသကိး တၢ်သံကွၢ်ခံဖျၢၣ် လၢအမ့ၢ်ဝဲ ပှၤလၢအဆီၣ်ထွဲ ကစၢ်ယွၤအတၢ်ပၢန့ၣ် ခါဆူညါ တၢ်ကမၤအသးဒီး အဝဲသ့ၣ်ဒ်လဲၣ်. မ့မ့ၢ် ပှၤလၢအဆီၣ်ထွဲ ဆၣ်ဖိကီၢ်ဖိလၢအအၢ လၢအလွဲၢ်ဂီၤဆှုၣ်ကလာ်တဒု လၢလံာ်လီၣ်ဖျါ ပာ်ဖျါထီၣ်ဝဲန့ၣ် တၢ်ကမၤအသးဒီး အဝဲသ့ၣ်ဒ်လဲၣ်.
ပှၤလၢအသးတီတဖၣ်န့ၣ် ခါဆူညါ တၢ်ကမၤအသးဒီး အဝဲသ့ၣ်ဒ်လဲၣ်
၄. တၢ်မၢဖိယိၤဟၣ် ထံၣ်ဝဲ မတဂၤသ့ၣ်တဖၣ် ဆၢထၢၣ်ဒီးယ့ၣ်ၡူး လၢမူခိၣ်လဲၣ်.
၄ လၢတၢ်ထံၣ်လၢညါခီ တခါအပူၤ တၢ်မၢဖိယိၤဟၣ် ထံၣ်ဝဲပှၤခံဖု လၢအဆီၣ်ထွဲ ယဟိဝၤယွၤ အတၢ်ပၢ ဒီးအဝဲသ့ၣ် ကအိၣ်မူဘၣ် လီၤထူလီၤယိာ်. ပှၤအဆိကတၢၢ်တဖုန့ၣ် အနီၣ်ဂံၢ်အိၣ်ဝဲ ၁၄၄,၀၀၀. (လီၣ်ဖျါ ၇:၄) ကစၢ်ယွၤ ဃုထၢထီၣ်အဝဲသ့ၣ် လၢပှၤဟီၣ်ခိၣ်ဖိအကျါ ဒီးအဝဲသ့ၣ် ကပၢတၢ်ဒီးယ့ၣ်ၡူး လၢမူခိၣ် ဒီးကပၢဘၣ်ဝဲ ဟီၣ်ခိၣ်ဒီဘ့ၣ်ညါ. (လီၣ်ဖျါ ၅:၉, ၁၀; ၁၄:၃, ၄) လၢတၢ်ထံၣ်လၢညါခီန့ၣ် စီၤယိၤဟၣ် ထံၣ်ဝဲလၢ အဝဲသ့ၣ် ဆၢထၢၣ်ဒီးယ့ၣ်ၡူး လၢကစၢၢ်စံယိၣ်အလိၤ လၢမူခိၣ်.—လီၣ်ဖျါ ၁၄:၁.
၅. ပှၤ ၁၄၄,၀၀၀ လၢအအိၣ်မူဒံး လၢဟီၣ်ခိၣ်ချၢန့ၣ် တယံာ်လၢၤဘၣ် တၢ်ကမၤအသးဒီး အဝဲသ့ၣ်ဒ်လဲၣ်.
၅ စးထီၣ်လၢ တၢ်မၢဖိအစိၤ တုၤလီၤလၢ အခဲအံၤန့ၣ် ယဟိဝၤယွၤ ဃုထၢထီၣ် ပှၤလၢအကထိတဖၣ် လၢကပၣ်ဃုာ်လၢ ပှၤ ၁၄၄,၀၀၀ အကျါ. (လူၤကၣ် ၁၂:၃၂; ရိမ့ၤ ၈:၁၇) ဘၣ်ဆၣ် မူခိၣ်ကလူးတဂၤ တဲဘၣ် စီၤယိၤဟၣ်လၢ ဖဲမုၢ်နံၤခံကတၢၢ်တဖၣ် အဆၢကတီၢ်န့ၣ် ပှၤလၢအဘၣ်တၢ်ဒိးဖှူအီၤ လၢအအိၣ်မူဒံး လၢဟီၣ်ခိၣ်ချၢန့ၣ် အနီၣ်ဂံၢ် တအိၣ်အါအါလၢၤဘၣ်. တချုးလၢ တၢ်နးတၢ်ဖှီၣ်ဖးဒိၣ် စးထီၣ်သးဒံးဘၣ်န့ၣ် ပှၤလၢ “အအိၣ်တ့ၢ်ဒံး” တဖၣ်အံၤ ကဒိးန့ၢ်ဘၣ်ဝဲ “တၢ်စဲပနီၣ်ဃာ်” လၢအမ့ၢ် ယဟိဝၤယွၤ အတၢ်ဘၣ်သး. (လီၣ်ဖျါ ၇:၂, ၃; ၁၂:၁၇) ဝံၤဒီး ပှၤလၢအဘၣ်တၢ်ဒိးဖှူအီၤ လၢအအိၣ်မူဒံး လၢဟီၣ်ခိၣ်ချၢန့ၣ် ကလဲၤထီၣ်လၢမူခိၣ် ဖဲတၢ်နးတၢ်ဖှီၣ်ဖးဒိၣ် အဆၢကတီၢ် တတီၤတီၤ. အဝဲသ့ၣ် ကအိၣ်ဘၣ်တပူၤဃီဒီး ပှၤလၢအဘၣ်တၢ်ဒိးဖှူအီၤ အဂၤတဖၣ် လၢအလဲၤထီၣ်ပာ်စၢၤ လၢမူခိၣ်.—မးသဲ ၂၄:၃၁; လီၣ်ဖျါ ၅:၉, ၁၀.
၆-၇. (က) စီၤယိၤဟၣ် ထံၣ်စ့ၢ်ကီးဝဲ မတဂၤသ့ၣ်တဖၣ်လဲၣ်. ဘၣ်ဃးဒီး အဝဲသ့ၣ်န့ၣ် ပသ့ၣ်ညါအါထီၣ် တၢ်မနုၤလဲၣ်. (ခ) ပှၤလၢအဘၣ်တၢ်ဒိးဖှူအီၤ လၢအအိၣ်မူဒံး လၢဟီၣ်ခိၣ်ချၢ ဒီး “ပှၤဂီၢ်မုၢ်ဖးဒိၣ်” န့ၣ်ဘၣ်မနုၤအဃိ အဝဲသ့ၣ် ကဘၣ်သးစၢၢ်ဆၢ တၢ်ဂ့ၢ်လၢ လီၣ်ဖျါ အဆၢဒိၣ် ၇ အပူၤလဲၣ်.
၆ စီၤယိၤဟၣ် ထံၣ်ဝဲ ပှၤအဆိကတၢၢ်တဖု ဝံၤဒီး အထံၣ်စ့ၢ်ကီးဝဲ ပှၤအဂၤတဖု လၢအမ့ၢ် “ပှၤဂီၢ်မုၢ်ဖးဒိၣ်.” ပှၤအဂၤတဖုအံၤ လံာ်စီဆှံ တပာ်ဖျါထီၣ် အနီၣ်ဂံၢ် လီၤတံၢ်လီၤဆဲးဘၣ်. (လီၣ်ဖျါ ၇:၉, ၁၀) ဘၣ်ဃးဒီး အဝဲသ့ၣ်န့ၣ် ပသ့ၣ်ညါဘၣ် တၢ်မနုၤလဲၣ်. စီၤယိၤဟၣ် တဲဝဲလၢ “ပှၤသ့ၣ်တဖၣ်အံၤ မ့ၢ်ပှၤလၢ အလဲၤခီဖျိ တၢ်နးတၢ်ဖှီၣ်ဖးဒိၣ် ဒီးအဝဲသ့ၣ် ဆှုၣ်အဆ့ဖးထီ ဒီးမၤဝါထီၣ်ဝဲလၢ သိဖိအသွံၣ်န့ၣ်လီၤ.” (လီၣ်ဖျါ ၇:၁၄) “ပှၤဂီၢ်မုၢ်ဖးဒိၣ်” ပူၤဖျဲးထီၣ်ကွံာ်လၢ တၢ်နးတၢ်ဖှီၣ်ဖးဒိၣ် ဝံၤအလီၢ်ခံ အဝဲသ့ၣ် ကအိၣ်မူဘၣ် လၢဟီၣ်ခိၣ်ချၢ ဒီးကဒိးန့ၢ်ဘၣ်ဝဲ တၢ်ဆိၣ်ဂ့ၤအါမး.—စံးထီၣ်ပတြၢၤ ၃၇:၉-၁၁, ၂၇-၂၉; ကတိၤဒိ ၂:၂၁, ၂၂; လီၣ်ဖျါ ၇:၁၆, ၁၇.
၇ ပတၢ်မုၢ်လၢ် မ့ၢ်အိၣ်လၢ ပကအိၣ်လၢ မူခိၣ်မ့ၢ်ဂ့ၤ ပတၢ်မုၢ်လၢ် မ့ၢ်အိၣ်လၢ ပကအိၣ်လၢ ဟီၣ်ခိၣ်ချၢမ့ၢ်ဂ့ၤ တၢ်ဂ့ၢ်လၢ ပဖးဘၣ်ဖဲ လီၣ်ဖျါ အဆၢဒိၣ် ၇ န့ၣ် ပကဘၣ်နာ်လၢ အကဟဲလၢထီၣ်ပှဲၤထီၣ် သပှၢ်တၢၢ်. ဖဲတၢ်ကွဲးအသး ဟဲလၢထီၣ်ပှဲၤထီၣ်အခါ ပှၤလၢအမၤ ကစၢ်ယွၤအတၢ်မၤ ခံဖုလၢာ်အံၤ ကသးခုဒိၣ်မး. မ့ၢ်လၢ ပဆၢတဲာ်လီၤပသး လၢပကဆီၣ်ထွဲ ယဟိဝၤယွၤ အတၢ်ပၢအဃိ ပကသးခုဘၣ် သပှၢ်တၢၢ်. တကးဒံးဘၣ် ဘၣ်ဃးဒီး တၢ်နးတၢ်ဖှီၣ်ဖးဒိၣ်အဂ့ၢ်န့ၣ် လံာ်လီၣ်ဖျါ တဲဒံးဝဲ တၢ်ဂ့ၢ်မနုၤလဲၣ်.—မးသဲ ၂၄:၂၁.
ပှၤလၢအထီဒါ ကစၢ်ယွၤန့ၣ် ခါဆူညါ တၢ်ကမၤအသးဒီး အဝဲသ့ၣ်ဒ်လဲၣ်
၈. တၢ်နးတၢ်ဖှီၣ်ဖးဒိၣ် ကစးထီၣ်သးဒ်လဲၣ် ဒီးပှၤအါဂၤ ကမၤမနုၤလဲၣ်.
၈ ပသ့ၣ်ညါလၢ တယံာ်လၢၤဘၣ်န့ၣ် ပဒိၣ်လၢအပၢတၢ်တဖၣ် ကမၤဟးဂီၤကွံာ် ဘၤဘူၤလိၣ်ဖးဒိၣ် လၢအမ့ၢ် တၢ်ဘူၣ်တၢ်ဘါကမၣ် လၢအဒိၣ်စိလၢ ဟီၣ်ခိၣ်ဒီဘ့ၣ်ညါ. (လီၣ်ဖျါ ၁၇:၁၆, ၁၇) ဖဲပဒိၣ်တဖၣ် မၤဝဲဒ်အံၤအခါ မ့ၢ်ဝဲတၢ်ပနီၣ်လၢ တၢ်နးတၢ်ဖှီၣ်ဖးဒိၣ်အခီၣ်ထံး စးထီၣ်အသး. ဖဲန့ၣ်အခါ မ့ၢ်ပှၤအါဂၤ ကဆၢတဲာ်လီၤသးလၢ အကမၤ ယဟိဝၤယွၤ အတၢ်မၤဧါ. အဝဲသ့ၣ် တမၤဝဲဘၣ်. မ့ၢ်လၢ လီၣ်ဖျါ အဆၢဒိၣ် ၆ ပာ်ဖျါထီၣ်ဝဲလၢ ဖဲတၢ်ဆၢကတီၢ် လၢအကီအခဲအခါ ပှၤလၢ အတဘူၣ်ထီၣ်ဘါထီၣ် ယဟိဝၤယွၤဘၣ် တဖၣ်န့ၣ် ကသန့ၤသးလၢ ပဒိၣ်လၢအပၢတၢ်တဖၣ် ဒီးစံပွါယ့ အတၢ်ကရၢကရိ လၢလံာ်စီဆှံ ဒိလီၤအဝဲသ့ၣ် ဒ်သိးဒီး ကစၢၢ်တဖၣ်. ခီဖျိလၢ အဝဲသ့ၣ် တဆီၣ်ထွဲ ယဟိဝၤယွၤ အဘီအမုၢ်ဘၣ်အဃိ ယဟိဝၤယွၤ ကထံၣ်အဝဲသ့ၣ် ဒ်သိးဒီး အဒုၣ်အဒါ.—လူၤကၣ် ၁၁:၂၃; လီၣ်ဖျါ ၆:၁၅-၁၇.
၉. ဖဲတၢ်နးတၢ်ဖှီၣ်ဖးဒိၣ် အဆၢကတီၢ် ယဟိဝၤယွၤ အပှၤဂီၢ်မုၢ် လၢအသးတီတဖၣ်န့ၣ် ကဖျါလီၤဆီန့ၢ်ဒံး ပှၤဂၤဒ်လဲၣ် ဒီးပှၤကမၤ အဝဲသ့ၣ်ဒ်လဲၣ်.
၉ ဖဲတၢ်နးတၢ်ဖှီၣ်ဖးဒိၣ် အဆၢကတီၢ် ယဟိဝၤယွၤ အပှၤဂီၢ်မုၢ် လၢအသးတီတဖၣ်န့ၣ် ကဆဲးဘူၣ်ထီၣ်ဘါထီၣ် ယဟိဝၤယွၤ ဒီးအဝဲသ့ၣ် တဆီၣ်ထွဲ “ဆၣ်ဖိကီၢ်ဖိလၢ အအၢတဒု” န့ၣ်ဘၣ်. အဝဲသ့ၣ် ကဖျါလီၤဆီန့ၢ်ဒံး ပှၤဂၤသပှၢ်တၢၢ်. (လီၣ်ဖျါ ၁၃:၁၄-၁၇) တကးဒံးဘၣ် ခီဖျိလၢ အဝဲသ့ၣ်တီဒီး ယဟိဝၤယွၤ ထီဘိအဃိ ပှၤလၢအထီဒါ ယဟိဝၤယွၤန့ၣ် ကသးဒိၣ်ထီၣ်တၢ်ဒိၣ်မး. အဃိ ပှၤကလုာ်တဖၣ် လၢအပာ်ဖှိၣ်ထီၣ်အသးန့ၣ် ကထီဒါဝဲ ကစၢ်ယွၤ အပှၤဂီၢ်မုၢ် လၢအအိၣ်လၢ ဟီၣ်ခိၣ်ဒီဘ့ၣ်ညါ. တၢ်အိၣ်သးတခါအံၤ လံာ်စီဆှံကိးဝဲလၢ စီၤကိးလၢကီၢ်မါကူး အတၢ်ဒုး.—ယဃ့းစက့လး ၃၈:၁၄-၁၆.
၁၀. ဖဲပှၤကလုာ်တဖၣ် ပာ်ဖှိၣ်ထီၣ်အသး လၢကထီဒါ ယဟိဝၤယွၤ အပှၤဂီၢ်မုၢ်အခါ ယဟိဝၤယွၤ အသးကမၤအသးဒ်လဲၣ်. (လီၣ်ဖျါ ၁၉:၁၉-၂၁)
၁၀ ဖဲပှၤကလုာ်တဖၣ် ပာ်ဖှိၣ်ထီၣ်သး လၢကထီဒါ ယဟိဝၤယွၤ အပှၤဂီၢ်မုၢ်အခါ ယဟိဝၤယွၤ အသးကမၤအသးဒ်လဲၣ်. ယဟိဝၤယွၤ တဲဘၣ်ပှၤလၢ “ယတၢ်သးဒိၣ်ကကဲၤထီၣ်ဝဲ.” (ယဃ့းစက့လး ၃၈:၁၈, NWT, ၂၁-၂၃) ဝံၤဒီး တၢ်ကမၤအသးဒ်လဲၣ်န့ၣ် လီၣ်ဖျါ အဆၢဒိၣ် ၁၉ ပာ်ဖျါထီၣ်န့ၢ်ပှၤ. ဖဲန့ၣ် ပထံၣ်ဘၣ်လၢ ယဟိဝၤယွၤ ကဆှၢလီၤအဖိခွါ လၢကဒီသဒၢ အပှၤဂီၢ်မုၢ် ဒီးကမၤနၢၤကွံာ်ဝဲ အဒုၣ်အဒါတဖၣ်. ယ့ၣ်ၡူးဒီးအ “သုးမုၢ်သံၣ်ဘိလၢမူခိၣ်” ကဒုးဝဲ ဒုၣ်ဒါတဖၣ်အံၤ. သုးမုၢ်သံၣ်ဘိ လၢမူခိၣ်န့ၣ် အဲၣ်ဒိးတဲဝဲ မူခိၣ်ကလူး လၢအသးတီတဖၣ် ဒီးပှၤ ၁၄၄,၀၀၀. (လီၣ်ဖျါ ၁၇:၁၄; ၁၉:၁၁-၁၅) ဖဲတၢ်ဒုးအံၤ ကဲထီၣ်အခါ တၢ်ကရၢကရိ ဒီးပှၤဟီၣ်ခိၣ်ဖိ လၢအထီဒါ ယဟိဝၤယွၤန့ၣ် ကဟးဂီၤကွံာ်ဝဲခဲလၢာ်.—ဖး လီၣ်ဖျါ ၁၉:၁၉-၂၁.
အၢ်မက့းဒိၣ်တၢ်ဒုး ဝံၤအလီၢ်ခံ တၢ်ဖျီအမူးအိၣ်ထီၣ်ဝဲတခါ
၁၁. လၢလံာ်လီၣ်ဖျါအပူၤ တၢ်ကဲထီၣ်သး အရ့ဒိၣ်ကတၢၢ်တခါန့ၣ် မ့ၢ်မနုၤလဲၣ်.
၁၁ ဖဲကစၢ်ယွၤ မၤဟးဂီၤကွံာ် အဒုၣ်အဒါအခါ ပှၤလၢအသးတီတဖၣ် ပူၤဖျဲးဝဲအဃိ အဝဲသ့ၣ် ကသးခုထဲလဲၣ်န့ၣ် ထံၣ်တမှံကွၢ်. ဖဲန့ၣ်အခါ ပှၤကိးဂၤဒဲး ကသးခုဝဲဒိၣ်မး. တကးဒံးဘၣ် ဖဲဘၤဘူၤလိၣ်ဖးဒိၣ် ဟးဂီၤကွံာ်အခါ ပှၤအိၣ်လၢမူခိၣ်တဖၣ် ကသးခုဒိၣ်မး. ဘၣ်ဆၣ် တၢ်လၢကမၤသးခု အဝဲသ့ၣ်အသးန့ၣ် ကအိၣ်တမံၤဒံး. (လီၣ်ဖျါ ၁၉:၁-၃) တၢ်သးခုတခါအံၤ ကဲဝဲ “သိဖိအတၢ်ဖျီ” ဒီးတၢ်ဖျီအံၤ ကဲဝဲ တၢ်ဂ့ၢ်လၢ အရ့ဒိၣ်ကတၢၢ် လၢလံာ်လီၣ်ဖျါအပူၤ.—လီၣ်ဖျါ ၁၉:၆-၉.
၁၂. လီၣ်ဖျါ ၂၁:၁, ၂ ပာ်ဖျါထီၣ်ဝဲလၢ သိဖိအတၢ်ဖျီအမူးအံၤ ကစးထီၣ်သး အခါဖဲလဲၣ်.
၁၂ တချုးလၢ အၢ်မက့းဒိၣ်တၢ်ဒုး စးထီၣ်ဒံးဘၣ်န့ၣ် ပှၤ ၁၄၄,၀၀၀ ကအိၣ်လၢ မူခိၣ်ခဲလၢာ်. ဘၣ်ဆၣ် ဖဲန့ၣ်အခါ သိဖိအတၢ်ဖျီအမူး တစးထီၣ်သးဒံးဘၣ်. (ဖး လီၣ်ဖျါ ၂၁:၁, ၂.) အဃိ သိဖိအတၢ်ဖျီ အမူးတခါအံၤ ကစးထီၣ်သး အခါဖဲလဲၣ်. အၢ်မက့းဒိၣ်တၢ်ဒုး မ့ၢ်ဝံၤ ဒီးကစၢ်ယွၤအဒုၣ်အဒါ ဟးဂီၤကွံာ် ခဲလၢာ်ဝံၤမၣ် သိဖိအတၢ်ဖျီအမူး ကစးထီၣ်အသး.—စံးထီၣ်ပတြၢၤ ၄၅:၃, ၄, ၁၃-၁၇.
၁၃. ခီဖျိလၢ သိဖိအတၢ်ဖျီအမူးအဃိ တၢ်မနုၤ ကကဲထီၣ်သးလဲၣ်.
၁၃ ဖဲသိဖိအတၢ်ဖျီ အမူးန့ၣ် တၢ်မနုၤ ကကဲထီၣ်သးလဲၣ်. ဆိကမိၣ်ကွၢ်မီၤ ပိာ်မုၣ်ဒီးပိာ်ခွါခံဂၤ ဖျီသးမ့ၢ်ဝံၤန့ၣ် အဝဲသ့ၣ် ကဲထီၣ်ဒီမိၢ်ဝၤ ဒီးအဝဲသ့ၣ် မၤသကိးတၢ်. ဒ်န့ၣ်အသိး ခီဖျိလၢ သိဖိအတၢ်ဖျီအံၤအဃိ စီၤပၤယ့ၣ်ၡူးခရံာ် ဒီးအ “တလးမူးပိာ်မုၣ်” လၢအမ့ၢ် ပှၤ ၁၄၄,၀၀၀ န့ၣ်ကမၤသကိးတၢ် ဒ်သိးသိး. တကးဒံးဘၣ် ခီဖျိလၢ သိဖိအတၢ်ဖျီအံၤအဃိ တၢ်ပၢအသီတခါ အိၣ်ထီၣ်ဝဲလၢမူခိၣ် ဒီးအကပၢစိတၢ်လၢ ဟီၣ်ခိၣ်ချၢ အနံၣ်တကထိ.—လီၣ်ဖျါ ၂၀:၆.
ဝ့ၢ်လၢအအိၣ်ဒီး အလၤကပီၤတဖျၢၣ် ဒီးနတၢ်အိၣ်မူလၢခါဆူညါ
လီၣ်ဖျါ အဆၢဒိၣ် ၂၁ ပာ်ဖျါထီၣ်ဝဲလၢ ဝ့ၢ်လၢလံာ်စီဆှံဒိလီၤဝဲဒ် ယရူၤၡလ့ၣ်အသီ “လၢအအိၣ်လၢ ကစၢ်ယွၤအိၣ်တၢ်အလီၢ် လၢမူခိၣ်န့ၣ် ဟဲလီၤဝဲ.” ဒီးဖဲအနံၣ်တကထိ အဆၢကတီၢ်န့ၣ် ယရူၤၡလ့ၣ်အသီအံၤ ကဒုးအိၣ်ထီၣ် တၢ်ဆိၣ်ဂ့ၤအါမး လၢပှၤဟီၣ်ခိၣ်ဖိ လၢအဒိကနၣ်တၢ်တဖၣ်အဂီၢ် (ကွၢ် လံာ်အဆၢ ၁၄-၁၆)
၁၄-၁၅. လီၣ်ဖျါ အဆၢဒိၣ် ၂၁ ဒိလီၤဝဲ ပှၤ ၁၄၄,၀၀၀ လၢတၢ်မနုၤလဲၣ်. (ကွၢ်တၢ်ဂီၤလၢလံာ်ကုခိၣ်.)
၁၄ လီၣ်ဖျါ အဆၢဒိၣ် ၂၁ ဒိလီၤဝဲ ပှၤ ၁၄၄,၀၀၀ ဒ်သိးဒီး ဝ့ၢ်လၢ အဃံလၤဒိၣ်မးတဖျၢၣ် ဒီးလံာ်စီဆှံ ကိးဝဲဝ့ၢ်တဖျၢၣ်အံၤလၢ “ယရူၤၡလ့ၣ်အသီ.” (လီၣ်ဖျါ ၂၁:၂, ၉) ဝ့ၢ်တဖျၢၣ်အံၤ အခီၣ်ထံးန့ၣ် အိၣ်ဒီးလၢၢ် ၁၂ ဖျၢၣ်. ဒီးလၢလၢၢ်တဖၣ်အံၤ အလိၤန့ၣ် “မံၤအိၣ်ဝဲ ၁၂ ဖျၢၣ် လၢအမ့ၢ်သိဖိ အတၢ်မၢဖိ ၁၂ ဂၤအမံၤလီၤ.” စီၤယိၤဟၣ် ထံၣ်ဝဲအမံၤ လၢလၢၢ်တဖျၢၣ် အလိၤအဃိ ထုးန့ၢ်အသးဒိၣ်မး ဒီးကဲဝဲ တၢ်ခွဲးတၢ်ယာ်ဖးဒိၣ် လၢအဂီၢ်.—လီၣ်ဖျါ ၂၁:၁၀-၁၄; အ့းဖ့းစူး ၂:၂၀.
၁၅ ဝ့ၢ်ဃံလၤတဖျၢၣ်အံၤ တလီၤဂာ်ဒီး ဝ့ၢ်အဂၤဘၣ်. ဝ့ၢ်တဖျၢၣ်အံၤ အကျဲမုၢ်ခိၣ်န့ၣ် မ့ၢ်ဝဲထူစီ, အတြဲၤ ၁၂ ဘ့ၣ်န့ၣ် မ့ၢ်ဝဲပလဲ, ဝ့ၢ်အဒူၣ် ဒီးဝ့ၢ်အခီၣ်ထံးန့ၣ် တၢ်မၤဃံမၤလၤထီၣ်အီၤလၢ လၢၢ်လၢအလုၢ်ဒိၣ်ပှ့ၤဒိၣ်တဖၣ် ဒီးဝ့ၢ်တဖျၢၣ်အံၤ အလဲၢ်, အဒီၣ်ဃီၤ ဒီးအထီန့ၣ် တုၤသိးထဲသိးလိာ်အသး. (လီၣ်ဖျါ ၂၁:၁၅-၂၁) ဘၣ်ဆၣ် တၢ်လၢစီၤယိၤဟၣ် တထံၣ်ဝဲဘၣ်န့ၣ် အိၣ်တမံၤဒံး. စီၤယိၤဟၣ် တဲဝဲလၢ “လၢဝ့ၢ်ပူၤန့ၣ် ယတထံၣ်တၢ်လုၢ်ဟံၣ်ဘၣ်, မ့ၢ်လၢဝ့ၢ်အံၤ အတၢ်လုၢ်ဟံၣ်န့ၣ် မ့ၢ်ဝဲသ့တၢ်လၢာ်ကစၢ် ယဟိဝၤယွၤဒီးသိဖိအဃိလီၤ. ဒီးမ့ၢ်လၢ ကစၢ်ယွၤအလၤကပီၤန့ၣ် မၤကပီၤထီၣ်ဝ့ၢ်တဖျၢၣ်အံၤ ဒီးဝ့ၢ်အံၤ အမ့ၣ်အူဒၢန့ၣ် မ့ၢ်ဝဲသိဖိအဃိ တလိၣ်လၢ မုၢ်မ့ၢ်ဂ့ၤ, လါမ့ၢ်ဂ့ၤ, အတၢ်ကပီၤ ကဆဲးကပီၤလီၤလၢအပူၤဘၣ်.” (လီၣ်ဖျါ ၂၁:၂၂, ၂၃) ဖဲအံၤ ပသ့ၣ်ညါဘၣ်လၢ ယဟိဝၤယွၤ ဒီးယ့ၣ်ၡူးန့ၣ် မ့ၢ်ဝဲ ဝ့ၢ်တဖျၢၣ်အံၤ အတၢ်လုၢ်ဟံၣ်. ဒီးယရူၤၡလ့ၣ်အသီ လၢအမ့ၢ် ပှၤ ၁၄၄,၀၀၀ န့ၣ်ကအိၣ်ဘၣ် တပူၤဃီဒီး ယဟိဝၤယွၤ. တကးဒံးဘၣ် ယ့ၣ်ၡူး လၢအမ့ၢ် ပှၤလုၢ်တၢ်ခိၣ် အဒိၣ်ကတၢၢ်န့ၣ် ကတီခိၣ်ရိၤမဲအဝဲသ့ၣ် လၢကမၤ ကစၢ်ယွၤအတၢ်မၤစီဆှံ အဃိ အဝဲသ့ၣ်တလိၣ်ဘၣ် တၢ်လုၢ်ဟံၣ်လၢၤဘၣ်.—ဧ့ၤဘြံၤ ၇:၂၇; လီၣ်ဖျါ ၂၂:၃, ၄.
တၢ်ဆိၣ်ဂ့ၤ လၢယဟိဝၤယွၤ ကတဲာ်ကတီၤပာ်စၢၤဝဲန့ၣ် လံာ်စီဆှံ ဒိလီၤဝဲလၢ “ထံမူအထံကျိ” ဒီး “သ့ၣ်တၢ်မူတဖၣ်.” တၢ်ဆိၣ်ဂ့ၤတဖၣ်အံၤ မတဂၤ ကဒိးန့ၢ်ဘၣ်ဝဲလဲၣ် (ကွၢ်လံာ်အဆၢ ၁၆-၁၇)
၁၆. ဖဲကစၢ်ယွၤ အဘီအမုၢ်ပၢတၢ် အနံၣ်တကထိ အဆၢကတီၢ်န့ၣ် ပှၤဟီၣ်ခိၣ်ဖိ ကဒိးန့ၢ်ဘၣ် တၢ်ဆိၣ်ဂ့ၤဒ်လဲၣ်.
၁၆ ပှၤလၢ အဘၣ်တၢ်ဒိးဖှူအီၤတဖၣ် မ့ၢ်ဆိကမိၣ်ထံဝဲ ဘၣ်ဃးဒီး ဝ့ၢ်တဖျၢၣ်အံၤအဂ့ၢ်န့ၣ် အဝဲသ့ၣ် ကသးခုဒိၣ်မး. ပှၤလၢအအိၣ်ဒီး တၢ်မုၢ်လၢ်လၢ အကအိၣ်ဘၣ်လၢ ဟီၣ်ခိၣ်ချၢန့ၣ် အဝဲသ့ၣ် ကဘၣ်ဆိကမိၣ် ဘၣ်ဃးဒီး ဝ့ၢ်တဖျၢၣ်အံၤ အဂ့ၢ်စ့ၢ်ကီး. တကးဒံးဘၣ် ဖဲကစၢ်ယွၤ အဘီအမုၢ်ပၢတၢ် အနံၣ်တကထိ အဆၢကတီၢ် ပှၤ ၁၄၄,၀၀၀ လၢအမ့ၢ် ယရူၤၡလ့ၣ်အသီန့ၣ် ကဒုးအိၣ်ထီၣ်ဝဲ တၢ်ဆိၣ်ဂ့ၤအါမး. တၢ်ဆိၣ်ဂ့ၤတဖၣ်အံၤ စီၤယိၤဟၣ်ထံၣ်ဝဲလၢ အယွၤလီၤဒ်သိးဒီး “ထံမူအထံကျိ.” ဒီးလၢထံကျိအံၤ အကပၤ ခံကပၤလၢာ်န့ၣ် အိၣ်ဝဲဒီး “သ့ၣ်တၢ်မူတဖၣ်” လၢ “ကမၤဘျါက့ၤ ပှၤကလုာ်တဖၣ်အဂီၢ်လီၤ.” (လီၣ်ဖျါ ၂၂:၁, ၂) ဖဲကစၢ်ယွၤ အဘီအမုၢ်ပၢတၢ် အနံၣ်တကထိ အဆၢကတီၢ် ပှၤကိးဂၤဒဲး ကဒိးန့ၢ်ဘၣ် တၢ်ဆိၣ်ဂ့ၤလၢ ယဟိဝၤယွၤ ကတဲာ်ကတီၤပာ်စၢၤဝဲ. တကးဒံးဘၣ် ပှၤလၢအဒိကနၣ် ယဟိဝၤယွၤ အကလုၢ်န့ၣ် ကလၢထီၣ်ပှဲၤထီၣ်ဝဲ ကယီကယီ. အဃိ တၢ်ဆူးတၢ်ဆါမ့ၢ်ဂ့ၤ, တၢ်လၢအဆါမ့ၢ်ဂ့ၤ, တၢ်လၢအမၤသးအုး အဝဲသ့ၣ်အသးမ့ၢ်ဂ့ၤ တအိၣ်လၢၤဘၣ်.—လီၣ်ဖျါ ၂၁:၃-၅.
၁၇. ဒ် လီၣ်ဖျါ ၂၀:၁၁-၁၃ ပာ်ဖျါထီၣ်ဝဲအသိး ဖဲကစၢ်ယွၤ အဘီအမုၢ်ပၢတၢ် အနံၣ်တကထိ အဆၢကတီၢ်န့ၣ် မတဂၤ ကဒိးန့ၢ်ဘၣ် တၢ်ဆိၣ်ဂ့ၤလဲၣ်.
၁၇ တၢ်ဆိၣ်ဂ့ၤ လၢယဟိဝၤယွၤ ကတဲာ်ကတီၤပာ်စၢၤဝဲန့ၣ် မတဂၤ ကဒိးန့ၢ်ဘၣ်ဝဲလဲၣ်. အဆိကတၢၢ် ပှၤလၢကဒိးန့ၢ်ဘၣ် တၢ်ဆိၣ်ဂ့ၤအံၤန့ၣ် မ့ၢ်ဝဲ ပှၤဂီၢ်မုၢ်ဖးဒိၣ် လၢအပူၤဖျဲးထီၣ်လၢ အၢ်မက့းဒိၣ် ဒီးဖိသၣ်လၢ ကအိၣ်ဖျဲၣ်ထီၣ် လၢဟီၣ်ခိၣ်သီအပူၤ. တကးဒံးဘၣ် လီၣ်ဖျါ အဆၢဒိၣ် ၂၀ ပာ်ဖျါထီၣ်စ့ၢ်ကီးလၢ ပှၤသံတဖၣ် ကဂဲၤဆၢထၢၣ်သမူထီၣ်က့ၤဝဲ. (ဖး လီၣ်ဖျါ ၂၀:၁၁-၁၃.) အဃိ “ပှၤတီပှၤလိၤ” လၢအမ့ၢ် ပှၤသးတီ လၢအသံတ့ၢ်ဒီး “ပှၤတတီတလိၤ” လၢအမ့ၢ် ပှၤလၢတဒိးန့ၢ်ဘၣ် တၢ်ခွဲးတၢ်ယာ် လၢကမၤလိ ယဟိဝၤယွၤအဂ့ၢ် အါအါဘၣ်န့ၣ် အဝဲသ့ၣ် ကဂဲၤဆၢထၢၣ် သမူထီၣ်က့ၤ လၢဟီၣ်ခိၣ်ချၢ. (မၤတၢ် ၂၄:၁၅; ယိၤဟၣ် ၅:၂၈, ၂၉) ဘၣ်ဆၣ် ဖဲကစၢ်ယွၤ အဘီအမုၢ်ပၢတၢ် အနံၣ်တကထိ အဆၢကတီၢ်န့ၣ် ပှၤတဂဲၤဆၢထၢၣ်သမူထီၣ်က့ၤ လၢဟီၣ်ခိၣ်ချၢ ကိးဂၤဒဲးဘၣ်. ပှၤအၢပှၤသီတဖၣ်အံၤ တချုးလၢ အဝဲသ့ၣ် သံဒံးဘၣ်န့ၣ် အဝဲသ့ၣ်အိၣ်ဒီး တၢ်ခွဲးတၢ်ယာ် လၢကဘူၣ်ထီၣ်ဘါထီၣ် ယဟိဝၤယွၤ ဘၣ်ဆၣ် အဝဲသ့ၣ် ပာ်လီၤသးလၢ တဘူၣ်ထီၣ်ဘါထီၣ် ယဟိဝၤယွၤဘၣ်. အဃိ အဝဲသ့ၣ် တဂဲၤဆၢထၢၣ် သမူထီၣ်က့ၤဘၣ် ဒီးတအိၣ်မူဘၣ်လၢ ဟီၣ်ခိၣ်ပၤရဒံစူး အပူၤဘၣ်.—မးသဲ ၂၅:၄၆; ၂ သ့းစၤလနံ ၁:၉; လီၣ်ဖျါ ၁၇:၈; ၂၀:၁၅.
တၢ်မၤကွၢ် လၢအလီၢ်ခံကတၢၢ်တဘျီ
၁၈. အနံၣ်တကထိ ဝံၤအလီၢ်ခံ ပှၤဟီၣ်ခိၣ်ဖိ ကကဲထီၣ်ပှၤဒ်လဲၣ်.
၁၈ အနံၣ်တကထိ ဝံၤအလီၢ်ခံ ပှၤဟီၣ်ခိၣ်ဖိခဲလၢာ် ကကဲထီၣ် ပှၤလၢပှၤပှဲၤ. တကးဒံးဘၣ် တၢ်ဆိၣ်ဃီၣ်လၢ စီၤအၤဒၣ် ဒိးန့ၢ်ဘၣ်ဝဲန့ၣ် ကလီၤမၢ်ကွံာ် ခဲလၢာ်ခဲဆ့ အဃိ တၢ်ဒဲးဘးလၢ အဟဲလီၤစၢၤလၢ စီၤအၤဒၣ်အအိၣ်န့ၣ် တမၤဘၣ်ဒိ ပှၤဟီၣ်ခိၣ်ဖိလၢၤဘၣ်. (ရိမ့ၤ ၅:၁၂) အနံၣ်တကထိ ဝံၤအလီၢ်ခံ ပှၤဟီၣ်ခိၣ်ဖိခဲလၢာ် ကကဲထီၣ် ပှၤလၢပှၤပှဲၤအဃိ အဝဲသ့ၣ်က “မူထီၣ်ဝဲ.”—လီၣ်ဖျါ ၂၀:၅.
၁၉. ဘၣ်မနုၤအဃိ ပကထံၣ်ဘၣ် တၢ်မၤကွၢ် လၢအလီၢ်ခံကတၢၢ်တဘျီလဲၣ်.
၁၉ ယ့ၣ်ၡူးန့ၣ် မုၣ်ကီၤလံၢ် မၤကွၢ်အီၤ သနာ်က့ အဝဲသးတီဒီး ယဟိဝၤယွၤ ထီဘိ. မ့မ့ၢ် ပှၤဟီၣ်ခိၣ်ဖိမီၤ. ဖဲမုၣ်ကီၤလံၢ် ဂုာ်ကျဲးစၢး လ့ပစီ အဝဲသ့ၣ်အခါ မ့ၢ်အဝဲသ့ၣ် ကသးတီဒီး ယဟိဝၤယွၤ ထီဘိဧါ. အနံၣ်တကထိ ဝံၤအလီၢ်ခံ မုၣ်ကီၤလံၢ် ကထူၣ်ဖျဲးထီၣ်ကွံာ် လၢတၢ်ပူၤယိာ်. (လီၣ်ဖျါ ၂၀:၇) အဃိ ပှၤဟီၣ်ခိၣ်ဖိ ပာ်ဖျါထီၣ်လၢ အသးတီဒီး ယဟိဝၤယွၤ ဖဲတၢ်မၤကွၢ် အလီၢ်ခံကတၢၢ်တဘျီ အဆၢကတီၢ်သ့. ဒီးပှၤလၢအသးတီတဖၣ် ကအိၣ်မူဘၣ် လီၤထူလီၤယိာ် ဒီးကဒိးန့ၢ်ဘၣ် တၢ်သဘျ့ အနီၢ်ကီၢ်. (ရိမ့ၤ ၈:၂၁) မ့မ့ၢ်မုၣ်ကီၤလံၢ် ဃုာ်ဒီးအတၢ်ဝံတၢ်နါ ဒီးပှၤလၢအထီဒါက့ၤ ယဟိဝၤယွၤန့ၣ် အဝဲသ့ၣ် ကဟးဂီၤကွံာ်ဝဲ လီၤထူလီၤယိာ်.—လီၣ်ဖျါ ၂၀:၈-၁၀.
၂၀. နသ့ၣ်ညါဘၣ် ဝံအတၢ်စံးပာ် လၢလံာ်လီၣ်ဖျါ အပူၤအဃိ နဆိကမိၣ်ဒ်လဲၣ်.
၂၀ တၢ်ဂ့ၢ်တဖၣ်လၢ ပတဲသကိးလၢ လံာ်လီၣ်ဖျါအပူၤအံၤ နဆိကမိၣ်ဒ်လဲၣ်. နထံၣ်လီၤနသးလၢ နပၣ်ဃုာ်လၢ ဝံအတၢ်စံးပာ်တဖၣ်အံၤ အကျါအဃိ နကသးခုဒိၣ်မး. တကးဒံးဘၣ် နသးကဆူၣ်လၢ နကမၤစၢၤပှၤဂၤ လၢအကဘူၣ်ထီၣ်ဘါထီၣ် ယဟိဝၤယွၤ. (လီၣ်ဖျါ ၂၂:၁၇) ဘၣ်ဃးဒီး တၢ်ကမၤအသး လၢခါဆူညါအဂ့ၢ်န့ၣ် ခဲအံၤ ပသ့ၣ်ညါဘၣ်လံ အဃိ ပသးခုဒိၣ်မး. ဒ်တၢ်မၢဖိယိၤဟၣ် တဲဝဲအသိး ပအဲၣ်ဒိးတဲလၢ “အၤမ့ၣ်, ယကစၢ်ယ့ၣ်ၡူးဧၢ, ဟဲတက့ၢ်.”—လီၣ်ဖျါ ၂၂:၂၀.
တၢ်သးဝံၣ် ၂၇ ကစၢ်ယွၤကလီၣ်ဖျါထီၣ် အဖိခွါတဖၣ်
^ တၢ်မၤလိ အလီၢ်ခံကတၢၢ်တခါအံၤ အကဲဝဲ တၢ်ဂ့ၢ်သၢထံၣ်တထံၣ် လၢအဘၣ်ဃးဒီး လံာ်လီၣ်ဖျါအဂ့ၢ်. လၢတၢ်မၤလိတခါအံၤ ပကသ့ၣ်ညါဘၣ်လၢ ပှၤကိးဂၤဒဲး လၢအသးတီဒီး ယဟိဝၤယွၤန့ၣ် ခါဆူညါ အဝဲသ့ၣ် ကအိၣ်မူဘၣ် မုာ်မုာ်ခုၣ်ခုၣ် လီၤထူလီၤယိာ်. မ့မ့ၢ်ပှၤလၢ အတဆီၣ်ထွဲ ကစၢ်ယွၤအတၢ်ပၢဘၣ်န့ၣ် အဝဲသ့ၣ် ကထံၣ်ဘၣ် တၢ်မဲာ်ဆှး ဒီးကဟးဂီၤကွံာ်ဝဲ.
