တၢ်မၤလိ ၂၃
ဆဲးကဲၤကပျီၤထီၣ် ဒ်သိးဒီး “ယဟိဝၤယွၤ အမ့ၣ်အူလၣ်”
“တၢ်အဲၣ်အံၤ လီၤဂာ်ဒ် မ့ၣ်အူလၣ်လၢ အကဲၤကပျီၤထီၣ်အသိး ဒီးမ့ၢ်ဝဲ ယဟိဝၤယွၤ အမ့ၣ်အူလၣ်.”—တၢ်သးဝံၣ်တဖၣ်အတၢ်သးဝံၣ် ၈:၆.
တၢ်သးဝံၣ် ၁၃၁ “တၢ်လၢကစၢ်ယွၤဒုးအိၣ်ဃုာ်ဝဲ”
တၢ်မၤလိအံၤ အတၢ်တိာ်ပာ် a
၁. လံာ်စီဆှံတဲဖျါထီၣ်လၢ တၢ်အဲၣ်အမ့ၢ်အတီန့ၣ် လီၤဂာ်ဒီးမနုၤလဲၣ်.
တၢ်အဲၣ်န့ၣ် “လီၤဂာ်ဒ် မ့ၣ်အူလၣ်လၢ အကဲၤကပျီၤထီၣ်အသိး ဒီးမ့ၢ်ဝဲ ယဟိဝၤယွၤ အမ့ၣ်အူလၣ်လီၤ. ထံလၢ အယွၤလီၤဆူၣ်ဆူၣ် ဒၣ်လဲာ် မၤလီၤပံာ်ကွံာ် တၢ်အဲၣ်တန့ၢ်ဘၣ်.” b (တၢ်သးဝံၣ်တဖၣ်အတၢ်သးဝံၣ် ၈:၆, ၇) လံာ်စီဆှံ တဲဖျါထီၣ်ဘၣ်ဃးဒီး တၢ်အဲၣ်အမ့ၢ်အတီအဂ့ၢ်အံၤ ဖၣ်ဘၣ်ညါ. တၢ်ကတိၤအံၤ ဟ့ၣ်ဂံၢ်ဟ့ၣ်ဘါ ပှၤဒီမိၢ်ဝၤတဖၣ်လၢ အဝဲသ့ၣ် အိၣ်ဒီးတၢ်အဲၣ်လၢ အဂၢၢ်ကျၢၤထီဘိသ့.
၂. ဒ်သိးပှၤဒီမိၢ်ဝၤခံဂၤ အတၢ်အဲၣ် တလီၤစၢ်တဂ့ၤအဂီၢ် အဝဲသ့ၣ် ကဘၣ်မၤမနုၤလဲၣ်.
၂ ဒ်သိးပှၤဒီမိၢ်ဝၤခံဂၤ အတၢ်အဲၣ် တလီၤစၢ်တဂ့ၤအဂီၢ် အဝဲသ့ၣ် ကဘၣ်ကျဲးစၢး မၤဂၢၢ်ကျၢၤ အတၢ်အဲၣ်ထီဘိ. အဒိ ဒ်သိးမ့ၣ်အူပူၣ် ကဆဲးကဲၤထီဘိအဂီၢ် ပှၤကဘၣ်ဖၢနုာ် သ့ၣ်မုၣ်ခံ မၢ်မၢ်လီၤ. ဒီးပှၤမ့ၢ်တဖၢနုာ် သ့ၣ်မုၣ်ခံလၢ မ့ၣ်အူပူၤ နီတဂၤဘၣ်န့ၣ် မ့ၣ်အူကလီၤပံာ်ကွံာ်ဝဲ. အဃိ ဒ်သိးပှၤဒီမိၢ်ဝၤခံဂၤ အတၢ်အဲၣ်လိာ်သး ကဂၢၢ်ကျၢၤထီဘိအဂီၢ် အဝဲသ့ၣ်ကဘၣ်မၤဂ့ၤထီၣ် အတၢ်ရ့လိာ်သး. ဘၣ်ဆၣ် တဘျီတခီၣ် ဖဲပှၤဒီမိၢ်ဝၤခံဂၤ ထံၣ်ဘၣ်ဒီး ကျိၣ်စ့တၢ်ကီတၢ်ခဲ, တၢ်ဆိးက့မံနီၤ ဒီးဘၣ်ကွၢ်လုၢ်ဒိၣ်ထီၣ် အဖိအခါ အဝဲသ့ၣ်အတၢ်အဲၣ်လိာ်သးန့ၣ် လီၤစၢ်ဝဲသ့. အဃိ နမ့ၢ်ဆီဟံၣ်ဆီဃီလံန့ၣ် နတၢ်အဲၣ်လိာ်သး ဆဲးကဲၤ ဒ်သိးဒီး “ယဟိဝၤယွၤ အမ့ၣ်အူလၣ်” ကသ့ဒ်လဲၣ်. လၢတၢ်မၤလိအံၤ ပကတဲသကီး တၢ်ဂ့ၢ်သၢထံၣ်လၢ ကမၤစၢၤနၤ ဒ်သိးနကဆဲးအဲၣ် နသးသမူတံၤသကိးထီဘိ ဒီးကမၤစၢၤနၤ ဒ်သိး နတၢ်ဆီဟံၣ်ဆီဃီ ကအိၣ်ဒီးတၢ်သးခု. c
ဆဲးမၤဂ့ၤထီၣ် နတၢ်ရ့လိာ်သးဒီး ယဟိဝၤယွၤ
ဒ်စီၤယိၤသး ဒီးနီၢ်မၤရံအသိး ပှၤဒီမိၢ်ဝၤတဖၣ် ကဘၣ်အိၣ်ဒီး တၢ်ရ့လိာ်သးဒီး ယဟိဝၤယွၤ လၢအဂ့ၤထီဘိ (ကွၢ်လံာ်အဆၢ ၃)
၃. နတၢ်ရ့လိာ်သးဒီး ယဟိဝၤယွၤ မ့ၢ်ဂ့ၤန့ၣ် အကမၤစၢၤ နတၢ်ဆီဟံၣ်ဆီဃီဒ်လဲၣ်. (စံၣ်တဲၤတဲလီၤတၢ် ၄:၁၂) (ကွၢ်စ့ၢ်ကီးတၢ်ဂီၤ.)
၃ ဒ်သိး “ယဟိဝၤယွၤ အမ့ၣ်အူလၣ်” ကဆဲးကဲၤထီဘိအဂီၢ် ပှၤဒီမိၢ်ဝၤခံဂၤလၢာ် ကဘၣ်မၤဂ့ၤထီၣ် အတၢ်ရ့လိာ်သးဒီး ယဟိဝၤယွၤ. နတၢ်ရ့လိာ်သးဒီး ယဟိဝၤယွၤ မ့ၢ်ဂ့ၤန့ၣ် အကမၤစၢၤ နတၢ်ဆီဟံၣ်ဆီဃီဒ်လဲၣ်. ဖဲပှၤဒီမိၢ်ဝၤခံဂၤ အတၢ်ရ့လိာ်သးဒီး ယဟိဝၤယွၤ ဂ့ၤဝဲအခါ အဝဲသ့ၣ် ကမၤထွဲဝဲ ယဟိဝၤယွၤအတၢ်ဟ့ၣ်ကူၣ်. ဒီးတၢ်ဟ့ၣ်ကူၣ်တဖၣ်န့ၣ် ကမၤစၢၤအဝဲသ့ၣ်လၢ အကဟးဆှဲး တၢ်ကီတၢ်ခဲ ဒီးလဲၤခီဖျိ တၢ်ကီတၢ်ခဲလၢ ကမၤလီၤစၢ်အဝဲသ့ၣ် အတၢ်အဲၣ်လိာ်သး တဂၤဒီးတဂၤ. (ဖး စံၣ်တဲၤတဲလီၤတၢ် ၄:၁၂.) ပှၤလၢအတၢ်ရ့လိာ်သးဒီး ယဟိဝၤယွၤဂ့ၤန့ၣ် အဝဲသ့ၣ်ကျဲးစၢး ကွၢ်လိ ယဟိဝၤယွၤ ဒီးမၤထွဲ ယဟိဝၤယွၤ အတၢ်ဂ့ၤတၢ်ဝါ ဒ်သိးဒီး တၢ်သူၣ်ဂ့ၤသးဝါ, တၢ်ဝံသးစူၤ ဒီးတၢ်ပျၢ်ပှၤဂၤတၢ်ကမၣ်. (အ့းဖ့းစူး ၄:၃၂–၅:၁) အဃိ ပှၤဒီမိၢ်ဝၤခံဂၤ မ့ၢ်ပာ်ဖျါထီၣ် တၢ်ဂ့ၤတၢ်ဝါတဖၣ်အံၤန့ၣ် အဝဲသ့ၣ်တၢ်အဲၣ်လိာ်သး ကဂၢၢ်ကျၢၤဒိၣ်ထီၣ်. အဒိ ဒီပုၢ်ဝဲၢ်မုၣ်လံနၤန့ၣ် အထီၣ်ပှၢ်န့ၢ် ၂၅ နံၣ်လံ. ဒီးအတဲဝဲလၢ “ပှၤတဂၤ အတၢ်ရ့လိာ်သးဒီး ယဟိဝၤယွၤ မ့ၢ်ဂ့ၤန့ၣ် နအဲၣ်ဘၣ်အီၤ ဒီးနပာ်ကဲဘၣ်အီၤညီ.”
၄. ဘၣ်မနုၤအဃိ ယဟိဝၤယွၤ ဃုထၢ နီၢ်မၤရံဒီးစီၤယိၤသးလၢ ကကဲထီၣ် မ့းၡံအၤအမိအပါလဲၣ်.
၄ ပကတဲသကီး ပှၤအဒိတနီၤလၢ လံာ်စီဆှံပူၤ. ဖဲယဟိဝၤယွၤ ဃုထၢ ပှၤဒီမိၢ်ဝၤခံဂၤလၢ ကကဲထီၣ် မ့းၡံအၤ အမိအပါအခါ အဃုထၢဝဲ နီၢ်မၤရံဒီးစီၤယိၤသးလၢ အဟဲလီၤစၢၤလၢ စီၤဒၤဝံးအစၢၤအသွဲၣ်အကျါ. ခီဖျိလၢ အဝဲသ့ၣ်တၢ်ရ့လိာ်သးဒီး ယဟိဝၤယွၤဂ့ၤဝဲအဃိ ယဟိဝၤယွၤ ဃုထၢအဝဲသ့ၣ်. ဒီးယဟိဝၤယွၤ သ့ၣ်ညါဝဲလၢ အဝဲသ့ၣ်ကအဲၣ်လိာ်သး ဒီးကမၤထွဲ ယဟိဝၤယွၤ အတၢ်ဟံးစုနဲၣ်ကျဲလၢ အတၢ်ဆီဟံၣ်ဆီဃီအပူၤ. ပှၤဒီမိၢ်ဝၤတဖၣ် ကွၢ်လိ နီၢ်မၤရံဒီးစီၤယိၤသး ကသ့ဒ်လဲၣ်.
၅. ဝၤတဖၣ် မၤလိန့ၢ်တၢ်လၢ စီၤယိၤသးအအိၣ် သ့ဒ်လဲၣ်.
၅ စီၤယိၤသးန့ၣ် အကနၣ်ဒီးမၤထွဲဝဲ ယဟိဝၤယွၤအတၢ်ဟံးစုနဲၣ်ကျဲ အဃိ အကဲဝၤလၢ အဂ့ၤတဂၤ. ယဟိဝၤယွၤ ဟံးစုနဲၣ်ကျဲ စီၤယိၤသးလၢ အကဘၣ်ဒီသဒၢ အဟံၣ်ဖိဃီဖိဒ်လဲၣ်န့ၣ် ကအိၣ်သၢဘျီညါ. ဒီးတၢ်ဟံးစုနဲၣ်ကျဲတဖၣ် မ့ၢ်ကီလၢ စီၤယိၤသးအဂီၢ်နာ်က့ စီၤယိၤသး မၤထွဲဝဲ တဘျီဃီ. (မးသဲ ၁:၂၀, ၂၄; ၂:၁၃-၁၅, ၁၉-၂၁) ခီဖျိလၢ စီၤယိၤသး မၤထွဲကစၢ်ယွၤ အတၢ်ဟံးစုနဲၣ်ကျဲအဃိ အကွၢ်ထွဲ နီၢ်မၤရံ, အမၤစၢၤအီၤ ဒီးအဒီသဒၢအီၤ. ဆိမိၣ်ကွၢ် ခီဖျိလၢစီၤယိၤသး မၤဝဲဒ်န့ၣ်အဃိ နီၢ်မၤရံ ကအဲၣ်အီၤ ဒီးကပာ်ကဲအီၤဒိၣ်မး. ဝၤတဖၣ် ကွၢ်လိ စီၤယိၤသးအဒိအတဲာ်သ့ခီဖျိ အဝဲသ့ၣ်မၤထွဲ လံာ်စီဆှံတၢ်ဟံးစုနဲၣ်ကျဲ ဒီးကွၢ်ထွဲ အဟံၣ်ဖိဃီဖိ. d ဒီးဖဲဝၤတဖၣ်မၤထွဲ တၢ်ဟံးစုနဲၣ်ကျဲအခါ တဘျီတခီၣ် တၢ်လၢအကဘၣ်ဆီတလဲန့ၣ် ကအိၣ်ဝဲ. ဘၣ်ဆၣ် အမ့ၢ်မၤဒ်န့ၣ်န့ၣ် အပာ်ဖျါထီၣ်လၢ အအဲၣ်အမါ ဒီးအမၤဂ့ၤထီၣ် အတၢ်ဆီဟံၣ်ဆီဃီ. ဒီပုၢ်ဝဲၢ်မုၣ်တဂၤ လၢအအိၣ်လၢ ကီၢ်ဘၣ်နူၤအတူၣ်န့ၣ် အထီၣ်ပှၢ် န့ၢ်ဝဲအနံၣ် ၂၀ လံ. ဒီးအတဲဝဲလၢ “ခီဖျိလၢယဝၤ ဃုသ့ၣ်ညါဒီးမၤထွဲဝဲ ယဟိဝၤယွၤ အတၢ်ဟံးစုနဲၣ်ကျဲအဃိ ယပာ်ကဲအီၤအါထီၣ်. ယသ့ၣ်ညါလၢ အကကွၢ်ထွဲယၤဂ့ၤဂ့ၤ ဒီးယနာ်န့ၢ် အတၢ်ဆၢတဲာ်ထီဘိ.”
၆. မါတဖၣ် မၤလိန့ၢ်တၢ်လၢ နီၢ်မၤရံအအိၣ် သ့ဒ်လဲၣ်.
၆ နီၢ်မၤရံ အတၢ်ရ့လိာ်သးဒီး ယဟိဝၤယွၤန့ၣ်ဂ့ၤမး. အအိၣ်ဒီး တၢ်နာ်လၢအဂၢၢ်ကျၢၤ ဒီးအသ့ၣ်ညါ လံာ်စီဆှံအဆၢတဖၣ်ဂ့ၤဂ့ၤ. (လူၤကၣ် ၁:၄၆) နီၢ်မၤရံ ဟံန့ၢ်တၢ်ဆၢကတီၢ်လၢ အကဆိမိၣ်ထံဝဲ ကစၢ်ယွၤကလုၢ်ကထါ လီၤတံၢ်လီၤဆဲး ထီဘိ. (လူၤကၣ် ၂:၁၉, ၅၁) ပသ့ၣ်ညါလၢ နီၢ်မၤရံန့ၣ် အတၢ်ရ့လိာ်သးဒီး ယဟိဝၤယွၤ ဂ့ၤဒိၣ်မးအဃိ အကဲမါလၢ အဂ့ၤတဂၤ. ဆၢကတီၢ်ခဲအံၤ မါတဖၣ် ကွၢ်လိ နီၢ်မၤရံ အဒိအတဲာ်စ့ၢ်ကီး. အဒိ ဒီပုၢ်ဝဲၢ်မုၣ်အံၤမံကိၤ တဲဝဲလၢ “ဖဲယအိၣ်သဘျ့ဒံးအခါ ယမၤ နီၢ်သးအတၢ်ရဲၣ်တၢ်ကျဲၤ လၢယနီၢ်ကစၢ်. ဘၣ်ဆၣ် ယထီၣ်ပှၢ်ဝံၤအလီၢ်ခံ ယဝၤဃ့ထုကဖၣ် လၢပဂီၢ် ဒီးတီခိၣ်ရိၤမဲဝဲ ပဟံၣ်ဖိဃီဖိ တၢ်မၤလိလံာ်စီဆှံ. အဃိလၢခံ ယသ့ၣ်ညါလီၤက့ၤသးလၢ ယတမၤ နီၢ်သးအတၢ်ရဲၣ်တၢ်ကျဲၤ လၢယနီၢ်ကစၢ်လၢၤဘၣ် ဒီးယသန့ၤက့ၤယသးလၢ ယဝၤအအိၣ်ခဲလၢာ်. အဃိ ယသ့ၣ်ညါဘၣ်လၢ ယကဘၣ်မၤဂၢၢ်ကျၢၤထီၣ်က့ၤ ယတၢ်ရ့လိာ်သးဒီး ယဟိဝၤယွၤ လၢယနီၢ်ကစၢ်. ဒီးခဲအံၤန့ၣ် ဒ်သိးယကဃ့ထုကဖၣ်လၢ ယဟိဝၤယွၤအအိၣ်, ဖးလံာ်စီဆှံ ဒီးဆိမိၣ်ထံက့ၤ တၢ်ဂ့ၢ်လၢယဖးအီၤအဂီၢ် ယဟံန့ၢ်တၢ်ဆၢကတီၢ်လၢ ယကအိၣ်ထဲတဂၤ.” (ကလၤတံ ၆:၅) ပထံၣ်ဘၣ်လၢ မါတဖၣ် မ့ၢ်ဆဲးမၤဂၢၢ်ကျၢၤထီၣ် အတၢ်ရ့လိာ်သးဒီး ယဟိဝၤယွၤန့ၣ် အဝၤကပတြၢၤအီၤ ဒီးကအဲၣ်အီၤဒိၣ်ထီၣ်.—ကတိၤဒိ ၃၁:၃၀.
၇. ပှၤဒီမိၢ်ဝၤခံဂၤ ကဘူၣ်ထီၣ်ဘါထီၣ် ယဟိဝၤယွၤ တပူၤဃီအဂီၢ် အဝဲသ့ၣ် မၤလိန့ၢ်တၢ်လၢ နီၢ်မၤရံဒီးစီၤယိၤသးအအိၣ် သ့ဒ်လဲၣ်.
၇ နီၢ်မၤရံဒီးစီၤယိၤသးန့ၣ် ဒ်သိးအဝဲသ့ၣ် အတၢ်ရ့လိာ်သးဒီး ယဟိဝၤယွၤ ကဂၢၢ်ကျၢၤဒိၣ်ထီၣ်အဂီၢ် အဝဲသ့ၣ်မၤသကီးတၢ် တပူၤဃီစ့ၢ်ကီး. အဝဲသ့ၣ်သ့ၣ်ညါဝဲလၢ ဟံၣ်ဖိဃီဖိ ကဘၣ်ဘူၣ်ထီၣ်ဘါထီၣ် ယဟိဝၤယွၤ တပူၤဃီန့ၣ် အရ့ဒိၣ်ဒိၣ်မး. (လူၤကၣ် ၂:၂၂-၂၄, ၄၁; ၄:၁၆) ဘၣ်ဆၣ် ခီဖျိလၢ အဝဲသ့ၣ်အဖိအိၣ်အါဂၤအဃိ အဝဲသ့ၣ်ကမၤဝဲ ဒ်န့ၣ်အဂီၢ်တညီဘၣ် နာ်က့ အဝဲသ့ၣ်ဆဲးမၤဝဲထီဘိ. နီၢ်မၤရံဒီးစီၤယိၤသး ပာ်လီၤအဒိအတဲာ် ဂ့ၤဒိၣ်မးလၢ ပှၤဒီမိၢ်ဝၤလၢ ဆၢကတီၢ်ခဲအံၤအဂီၢ်. အဒိ နဖိမ့ၢ်အိၣ်န့ၣ် နကထီၣ်တၢ်အိၣ်ဖှိၣ်, ပာ်လီၤတၢ်ဆၢကတီၢ်လၢ ကမၤဟံၣ်ဖိဃီဖိ တၢ်မၤလိလံာ်စီဆှံ ဒီးနကဟံန့ၢ် တၢ်ဆၢကတီၢ်လၢ နကဃ့ထုကဖၣ်ထဲခံဂၤအဂီၢ်န့ၣ် တညီထီဘိဘၣ်. ဘၣ်ဆၣ် နကွၢ်လိ နီၢ်မၤရံဒီးစီၤယိၤသး အဒိအတဲာ်သ့. ဒီးနမ့ၢ်ဘူၣ်ထီၣ်ဘါထီၣ် ယဟိဝၤယွၤ တပူၤဃီဒီး နဟံၣ်ဖိဃီဖိန့ၣ် နတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်. တကးဒံးဘၣ် နတၢ်ရ့လိာ်သးဒီး နဟံၣ်ဖိဃီဖိစ့ၢ်ကီး ကဂ့ၤဒိၣ်ထီၣ်. အဃိ အရ့ဒိၣ်ဒိၣ်မးလၢ နကဘၣ်ပာ်ဆိ တၢ်ဘူၣ်ထီၣ်ဘါထီၣ် ယဟိဝၤယွၤလၢ နီၣ်ဂံၢ်တၢ.
၈. ပှၤဒီမိၢ်ဝၤခံဂၤ မ့ၢ်အိၣ်ဒီး တၢ်ကီတၢ်ခဲလၢ အတၢ်ဆီဟံၣ်ဆီဃီန့ၣ် ဟံၣ်ဖိဃီဖိ တၢ်မၤလိလံာ်စီဆှံ ကမၤစၢၤအဝဲသ့ၣ်ဒ်လဲၣ်.
၈ ပှၤဒီမိၢ်ဝၤခံဂၤမ့ၢ်အိၣ်ဒီး တၢ်ကီတၢ်ခဲလၢ အတၢ်ဆီဟံၣ်ဆီဃီန့ၣ် အဝဲသ့ၣ် ကဘၣ်မၤဒ်လဲၣ်. ဘၣ်သ့ၣ်သ့ၣ် အဝဲသ့ၣ်တဘၣ်သးမၤ ဟံၣ်ဖိဃီဖိ တၢ်မၤလိလံာ်စီဆှံ တပူၤဃီလၢၤဘၣ်. တၢ်မ့ၢ်ကဲထီၣ်သး ဒ်န့ၣ်န့ၣ် ဖဲနကမၤ ဟံၣ်ဖိဃီဖိ တၢ်မၤလိလံာ်စီဆှံအခါ တဲသကီးဆိ တၢ်ဂ့ၢ်ဖုၣ်ဖုၣ်ဖိ ဒီးတၢ်ဂ့ၢ်လၢ အမၤသးခုသုသး. မ့တမ့ၢ် တဲသကီးတၢ်ဂ့ၢ်လၢ သုခံဂၤလၢာ် သးလီၤပလိာ်. သုမ့ၢ်မၤဒ်အံၤန့ၣ် ကမၤစၢၤသုလၢ သုတၢ်အဲၣ်လိာ်သး ကဒိၣ်ထီၣ်အါထီၣ် ဒီးသုကဘၣ်သး ဘူၣ်ထီၣ်ဘါထီၣ် ယဟိဝၤယွၤ တပူၤဃီ.
ဟ့ၣ်လိာ်သး တၢ်ဆၢကတီၢ်
၉. ဘၣ်မနုၤအဃိ ပှၤဒီမိၢ်ဝၤခံဂၤ ဘၣ်ဟ့ၣ်လိာ်သး တၢ်ဆၢကတီၢ်လဲၣ်.
၉ ပှၤဒီမိၢ်ဝၤခံဂၤ မ့ၢ်ဟ့ၣ်လိာ်သး တၢ်ဆၢကတီၢ်န့ၣ် ကမၤစၢၤအဝဲသ့ၣ်လၢ အဝဲသ့ၣ် ကဆဲးအဲၣ်လိာ်သး. ဒီးကမၤစၢၤအဝဲသ့ၣ်လၢ အကသ့ၣ်ညါအါထီၣ် အသးသမူတံၤသကိး အတၢ်ဆိမိၣ် ဒီးအတၢ်တူၢ်ဘၣ်. (၁ မိၤၡ့ ၂:၂၄) ဒီပုၢ်ဝဲၢ်မုၣ်လံလံယဲ ဒီးအဝၤရူးစလဲန့ၣ် ထီၣ်ပှၢ်န့ၢ် ၁၅ နံၣ်ဘျဲၣ်လံ. ဘၣ်ဆၣ် ဖဲအဝဲသ့ၣ်ထီၣ်ပှၢ်န့ၢ်တယံာ်ဒံးဘၣ်န့ၣ် ဒီပုၢ်ဝဲၢ်မုၣ် တဲဝဲလၢ “ပမ့ၢ်ဆိမိၣ်ထံက့ၤန့ၣ် ပတဟ့ၣ်လိာ်သး တၢ်ဆၢကတီၢ်အါအါဘၣ်. တနံၤတနံၤ ထဲပမၤတၢ် ဒီးမၤဟံၣ်ဃီတၢ်မၤန့ၣ် ပတၢ်ဆၢကတီၢ် မၣ်တယၢဘၣ် ဒီးလၢခံ ပဖိအိၣ်ဘျီ တၢ်အိၣ်သး နးထီၣ်ဝဲန့ၣ်. ပသ့ၣ်ညါဘၣ်လၢ ပတဟ့ၣ်လိာ်သး တၢ်ဆၢကတီၢ်ဘၣ်အဃိ ပတူၢ်ဘၣ်လၢ ပတၢ်ရ့လိာ်သး ယံၤထီၣ်ဝဲ ကယီကယီ.”
၁၀. ပှၤဒီမိၢ်ဝၤခံဂၤ မၤထွဲ တၢ်ဟံးစုနဲၣ်ကျဲဖဲ အ့းဖ့းစူး ၅:၁၅, ၁၆ န့ၣ်ကသ့ဒ်လဲၣ်.
၁၀ ပှၤဒီမိၢ်ဝၤခံဂၤ ဟ့ၣ်လိာ်သး တၢ်ဆၢကတီၢ် ကန့ၢ်အဂီၢ် အဝဲသ့ၣ်ကဘၣ်မၤ မနုၤလဲၣ်. အဝဲသ့ၣ်ကဘၣ်ပာ်လီၤဃာ် တၢ်ဆၢကတီၢ် မ့တမ့ၢ် ရဲၣ်ကျဲၤပာ်စၢၤ တၢ်ဆၢကတီၢ် လီၤလီၤဆီဆီ လၢကရ့လိာ်သး ထဲခံဂၤ. (ဖး အ့းဖ့းစူး ၅:၁၅, ၁၆.) ဒီပုၢ်ဝဲၢ်ခွါအူစီဒူ လၢအအိၣ်လၢ နဲးကၠံရံယါန့ၣ် တဲဝဲလၢ “ဖဲယရဲၣ်ကျဲၤပာ်စၢၤ တၢ်ဆၢကတီၢ်လၢ ယတၢ်မၤအဂီၢ်အခါ ယပာ်လီၤပာ်စၢၤ တၢ်ဆၢကတီၢ် လီၤလီၤဆီဆီ လၢယမါအဂီၢ် အဃိ တၢ်ဆၢကတီၢ်တခါအံၤန့ၣ် ယပာ်အီၤလၢ အရ့ဒိၣ်ဒိၣ်မး.” (ဖံလံးပံၤ ၁:၁၀) ဆိမိၣ်ကွၢ် ဒီပုၢ်ဝဲၢ်မုၣ်အဲနၤစတါစံယၤ လၢအမ့ၢ် ကဝီၤအပှၢ်ကွၢ်တၢ်အမါ လၢအအိၣ်လၢ မိၤဒိဘၤန့ၣ် အကျဲးစၢး သူအတၢ်ဆၢကတီၢ် လၢအဂ့ၤကတၢၢ်ဒ်လဲၣ်. အတဲဝဲလၢ “ဖဲယဝၤအတၢ်မၤအါလၢ အမူဒါအခါ ယကျဲးစၢးမၤဝံၤက့ၤ တၢ်လၢယဘၣ်မၤတဖၣ်. ခီဖျိလၢ ယမၤဒ်န့ၣ်အဃိ ပဟ့ၣ်လိာ်သး တၢ်ဆၢကတီၢ်လၢ တဂၤဒီးတဂၤအဂီၢ်န့ၢ်ဝဲ.” ဘၣ်ဆၣ် နရဲၣ်ကျဲၤပာ်စၢၤ တၢ်ဆၢကတီၢ်လၢ နကရ့လိာ်သးအဂီၢ် မ့ၢ်တညီဘၣ်န့ၣ် နကဘၣ်မၤဒ်လဲၣ်.
တၢ်လၢပှၤဒီမိၢ်ဝၤခံဂၤ မၤသကီးဝဲသ့န့ၣ် မ့ၢ်မနုၤလဲၣ် (ကွၢ်လံာ်အဆၢ ၁၁-၁၂)
၁၁. စီၤအကူလၤ ဒီးနီၢ်ပြံစကံးလၤ မၤသကီးတၢ် တပူၤဃီဒ်လဲၣ်.
၁၁ ပှၤဒီမိၢ်ဝၤခံဂၤ ဟံန့ၢ်တၢ်မၤလိလၢ စီၤအကူလၤ ဒီးနီၢ်ပြံစကံးလၤ အအိၣ်သ့. စီၤအကူလၤ ဒီးနီၢ်ပြံစကံးလၤန့ၣ် ဒီပုၢ်ဝဲၢ်မုၣ်ခွါ လၢအအိၣ်ဖဲ အဝဲသ့ၣ်အစိၤန့ၣ် အဲၣ်အဝဲသ့ၣ်ဒိၣ်မး. (ရိမ့ၤ ၁၆:၃, ၄) လံာ်စီဆှံ တဖျါထီၣ်ဝဲ စီၤအကူလၤ ဒီးနီၢ်ပြံစကံးလၤ အတၢ်ဆီဟံၣ်ဆီဃီအဂ့ၢ် အါအါဘၣ်. ဘၣ်ဆၣ် လံာ်စီဆှံပာ်ဖျါထီၣ်ဝဲလၢ အဝဲသ့ၣ်မၤသကီးတၢ်, စံၣ်တဲၤတဲလီၤတၢ် ဒီးမၤစၢၤသကီးပှၤဂၤ တပူၤဃီ. (မၤတၢ် ၁၈:၂, ၃, ၂၄-၂၆) တကးဒံးဘၣ် လၢလံာ်စီဆှံပူၤ နမ့ၢ်ဖးဘၣ် စီၤအကူလၤ ဒီးနီၢ်ပြံစကံးလၤအဂ့ၢ်န့ၣ် နကထံၣ်အဝဲသ့ၣ်ခံဂၤ အမံၤအိၣ်တပူၤဃီ ထီဘိ.
၁၂. ဒ်သိးပှၤဒီမိၢ်ဝၤခံဂၤ ဟ့ၣ်လိာ်သး တၢ်ဆၢကတီၢ် ကန့ၢ်အါထီၣ်အဂီၢ် အဝဲသ့ၣ် ကဘၣ်မၤဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၂ နကွၢ်လိ စီၤအကူလၤ ဒီးနီၢ်ပြံစကံးလၤ ကသ့ဒ်လဲၣ်. ဆိမိၣ်ကွၢ် တၢ်လၢနၤဒီးနသးသမူတံၤသကိး ကဘၣ်မၤန့ၣ် အိၣ်ဒီဒူၣ်. တၢ်မၤတနီၤန့ၣ် နမၤသကီးဒီး နသးသမူတံၤသကိးသ့ အဃိ တဘၣ်မၤထဲ နနီၢ်ကစၢ်တဂၤတဂ့ၤ. အဒိ စီၤအကူလၤ ဒီးနီၢ်ပြံစကံးလၤန့ၣ် အဝဲသ့ၣ် ဟးစံၣ်တဲၤတဲလီၤတၢ် တပူၤဃီ. အဃိ နရဲၣ်ကျဲၤပာ်စၢၤလၢ နကဟးစံၣ်တဲၤတဲလီၤတၢ် တပူၤဃီဒီး နသးသမူတံၤသကိးသ့. စီၤအကူလၤ ဒီးနီၢ်ပြံစကံးလၤန့ၣ် အဝဲသ့ၣ်မၤသကီးတၢ် တပူၤဃီ. ဘၣ်သ့ၣ်သ့ၣ် နၤဒီးနသးသမူတံၤသကိး တၢ်ဖံးတၢ်မၤ တဒ်သိးဘၣ် သနာ်က့ နမၤသကီး ဟံၣ်ဃီတၢ်ဖံးတၢ်မၤ တပူၤဃီသ့. (စံၣ်တဲၤတဲလီၤတၢ် ၄:၉) နၤဒီးနသးသမူတံၤသကိး မ့ၢ်မၤစၢၤလိာ်သးန့ၣ် လီၤဂာ်ဒ်သိးဒီး သုမၤသကီးတၢ် တပူၤဃီ. တကးဒံးဘၣ် သုအိၣ်ဒီး တၢ်ဆၢကတီၢ်လၢ သုကတဲသကီးတၢ်. အဒိ ဒီပုၢ်ဝဲၢ်ခွါရီဘၢၤ ဒီးအမါလ့ဒၤန့ၣ် အဝဲသ့ၣ်ထီၣ်ပှၢ်န့ၢ် အနံၣ် ၅၀ ဘျဲၣ်လံ. ဒီပုၢ်ဝဲၢ်ခွါတဲဝဲလၢ “ယမ့ၢ်တဲတီတီန့ၣ် ပကဟးကသုၣ်ကသီ ဒ်သိးသိးအဂီၢ် ပတၢ်ဆၢကတီၢ် တအိၣ်အါအါဘၣ်. ဘၣ်ဆၣ် ပမၤသကီးတၢ်ဒ်သိးသိးဒံး. အဒိ ဖဲယသ့ဃၢၤလီခီအခါ ယမါထွါသူထီၣ်က့ၤလီခီ. ဒီးဖဲယမၤပျီတၢ်လၢ ဟံၣ်ကရၢၢ်ပူၤအခါ ယမါဟဲမၤစၢၤယၤအဃိ ယသးခုဒိၣ်မး. တကးဒံးဘၣ် ပမၤသကိးတၢ် တပူၤဃီအဃိ ပတၢ်ရ့လိာ်သးဂ့ၤထီၣ် ဒီးပအဲၣ်လိာ်သးဒိၣ်ထီၣ်.”
၁၃. ဒ်သိး ပှၤဒီမိၢ်ဝၤခံဂၤ အတၢ်ရ့လိာ်သး ကဂၢၢ်ကျၢၤထီၣ်အဂီၢ် အဝဲသ့ၣ် ကဘၣ်မၤဒ်လဲၣ်.
၁၃ ပှၤဒီမိၢ်ဝၤခံဂၤ မ့ၢ်အိၣ်တပူၤဃီနာ်က့ အဝဲသ့ၣ် ကဘၣ်မၤဂ့ၤထီၣ် အတၢ်ရ့လိာ်သး ဒီးမၤဂၢၢ်ကျၢၤထီၣ် အတၢ်ဆီဟံၣ်ဆီဃီဒံး. မါတဂၤ လၢအအိၣ်လၢ ကီၢ်ဘြၣ်စ့န့ၣ် တဲဝဲလၢ “ဆၢကတီၢ်ခဲအံၤ ပဝဲအါတက့ၢ်န့ၣ် ပတၢ်မၤအိၣ်အါမးအဃိ ပဟ့ၣ်လိာ်သး တၢ်ဆၢကတီၢ် တချုးအါအါဘၣ်. ဒီးပအိၣ်ဟံၣ်တဖျၢၣ်ဃီအဃိ ပကဆိမိၣ်လၢ ပဟ့ၣ်လိာ်သး ပတၢ်ဆၢကတီၢ်လံ. ဘၣ်ဆၣ် ယသ့ၣ်ညါဘၣ်လၢ ပအိၣ်ဟံၣ်တဖျၢၣ်ဃီနာ်က့ ပကဘၣ်မၤဂ့ၤထီၣ် ပတၢ်ရ့လိာ်သး ဒီးဟ့ၣ်လိာ်သး တၢ်ဆၢကတီၢ်ဒံး.” ဒီပုၢ်ဝဲၢ်ခွါဘြူနိၤ ဒီးအမါထ့န့ၣ် ဟ့ၣ်လိာ်သး တၢ်ဆၢကတီၢ်ထီဘိ. ဒီပုၢ်ဝဲၢ်ခွါဘြူနိၤ တဲဝဲလၢ “ဖဲပအိၣ်တပူၤဃီအခါ အကဲဝဲ တၢ်ဆၢကတီၢ်လၢ ပဝဲခံဂၤအဂီၢ် အဃိ ဖဲန့ၣ်အဆၢကတီၢ် ပတကွၢ်ပလီတဲစိဘၣ်.”
၁၄. ပှၤဒီမိၢ်ဝၤခံဂၤ အတၢ်ဘၣ်သး မ့ၢ်တဒ်သိးဘၣ်န့ၣ် အဝဲသ့ၣ် ကဘၣ်မၤဒ်လဲၣ်.
၁၄ တဘျီတခီၣ် နၤဒီးနသးသမူတံၤသကိး တၢ်ဘၣ်သး မ့ၢ်တဒ်သိးဘၣ်န့ၣ် နကဘၣ်မၤဒ်လဲၣ်. ဆိမိၣ်ထီၣ်က့ၤ တၢ်အဒိဘၣ်ဃး မ့ၣ်အူပူၣ်လၢ ပတဲသကီးလၢ တၢ်မၤလိအံၤအခီၣ်ထံး. ပသ့ၣ်ညါဘၣ်လၢ မ့ၣ်အူတပူၣ်န့ၣ် အတကဲၤကပျီၤထီၣ်ဖးဒိၣ် တဘျီဃီဘၣ်. ဒ်သိး အကဆဲးကဲၤထီဘိအဂီၢ် ပှၤကဘၣ်ပၢနုာ် သ့ၣ်မုၣ်ခံခဲအံၤခဲအံၤ. ဒ်န့ၣ်အသိး နၤဒီးနသးသမူတံၤသကိးစ့ၢ်ကီး သုတၢ်ဘၣ်သး မ့ၢ်တဒ်သိးဘၣ်နာ်က့ သုဘၣ်ဟ့ၣ်လိာ်သး တၢ်ဆၢကတီၢ် ဒီးရ့လိာ်သးအါထီၣ်. ဒီးဖဲသုရ့လိာ်သးအခါ မၤသကိးတၢ်လၢ သုခံဂၤလၢာ်မၤအီၤမုာ် ဒီးတဘၣ်မၤတၢ်လၢ ကဒုးအိၣ်ထီၣ် တၢ်တဲအါလိာ်သးတဂ့ၤ. (ယၤကိာ် ၃:၁၈) နမ့ၢ်မၤဂ့ၤထီၣ် နတၢ်ရ့လိာ်သး ကယီကယီန့ၣ် နတၢ်အဲၣ်လိာ်သး ကဂၢၢ်ကျၢၤဒိၣ်ထီၣ်.
ပာ်ကဲလိာ်သး တဂၤဒီးတဂၤ
၁၅. ဘၣ်မနုၤအဃိ အရ့ဒိၣ်လၢ ပှၤဒီမိၢ်ဝၤခံဂၤ ကဘၣ်ပာ်ကဲလိာ်သးလဲၣ်.
၁၅ ပှၤဒီမိၢ်ဝၤခံဂၤန့ၣ် အရ့ဒိၣ်လၢ အဝဲသ့ၣ် ကဘၣ်ပာ်ကဲလိာ်သး. တၢ်ပာ်ကဲန့ၣ် အလီၤဂာ်ဒ်သိးဒီး သ့ၣ်မုၣ်လၢအမၤကဲၤဒိၣ်ထီၣ်မ့ၣ်အူ. အဃိ သ့ၣ်မုၣ် မ့ၢ်တအိၣ်ဘၣ်န့ၣ် မ့ၣ်အူလီၤပံာ်ကွံာ်ဝဲချ့မး. ဒ်န့ၣ်အသိး ပှၤဒီမိၢ်ဝၤခံဂၤ မ့ၢ်တပာ်ကဲလိာ်သးဘၣ်န့ၣ် အဝဲသ့ၣ် အတၢ်အဲၣ်လိာ်သး ကစှၤလီၤဝဲ ကယီကယီ. ဘၣ်ဆၣ် အဝဲသ့ၣ် မ့ၢ်ကျဲးစၢး ပာ်ကဲလိာ်သးန့ၣ် အတၢ်အဲၣ်လိာ်သး ကဂၢၢ်ကျၢၤဒိၣ်ထီၣ်. နကဘၣ်ပာ်ကဲ နသးသမူတံၤသကိးန့ၣ် အရ့ဒိၣ် ဘၣ်ဆၣ် တၢ်လၢအရ့ဒိၣ်ကတၢၢ်န့ၣ် နသးသမူတံၤသကိး ကဘၣ်သ့ၣ်ညါလၢ နပာ်ကဲအီၤနီၢ်ကီၢ်. ဒီပုၢ်ဝဲၢ်မုၣ်ဖဲနံၤ ဒီးအဝၤအဲရဲၣ်န့ၣ် ထီၣ်ပှၢ်န့ၢ် ၂၅ နံၣ်ဘျဲၣ်လံ. ဒီပုၢ်ဝဲၢ်မုၣ်ဖဲနံၤ တဲဝဲလၢ “ခီဖျိလၢ ပပာ်ကဲလိာ်သးအဃိ ပအဲၣ်လိာ်သး ဒီးပအိၣ်ဒီးတၢ်မုာ်တၢ်ခုၣ်. ဒီးပပာ်ကဲလိာ်သးတၢ်ထံၣ် အဃိ ပတဲဖျါထီၣ် ပတၢ်ထံၣ်ပျီပျီဘူၣ်.” အဃိ ဒ်သိးနသးသမူတံၤသကိး ကသ့ၣ်ညါလၢ နပာ်ကဲအီၤနီၢ်ကီၢ်အဂီၢ် နကဘၣ်မၤဒ်လဲၣ်. ပကကွၢ်သကီး စီၤအၤဘြၤဟၣ် ဒီးနီၢ်စၤရါအဒိအတဲာ်.
ဝၤတဂၤ ပာ်ဖျါထီၣ်လၢ အပာ်ကဲအမါ ခီဖျိအကနၣ် တၢ်လၢအမါတဲအီၤဂ့ၤဂ့ၤ (ကွၢ်လံာ်အဆၢ ၁၆)
၁၆. ဝၤတဖၣ် မၤလိန့ၢ်တၢ်လၢ စီၤအၤဘြၤဟၣ်အအိၣ် သ့ဒ်လဲၣ်. (၁ ပ့းတရူး ၃:၇) (ကွၢ်စ့ၢ်ကီးတၢ်ဂီၤ.)
၁၆ စီၤအၤဘြၤဟၣ် ရ့ဒီးအမါ နီၢ်စၤရါလၢ တၢ်ပာ်ကဲ. နီၢ်စၤရါ အတၢ်ထံၣ် ဒီးအတၢ်တူၢ်ဘၣ်အိၣ်ဒ်လဲၣ်န့ၣ် စီၤအၤဘြၤဟၣ် ကနၣ်န့ၢ်အီၤ ဒီးနၢ်ပၢၢ်စၢၤအီၤ. ဘၣ်တဘျီ နီၢ်စၤရါ အသးတမုာ်ဘၣ်အဃိ အတဲဘၣ် အတၢ်တူၢ်ဘၣ်လၢ စီၤအၤဘြၤဟၣ် ဒီးအပာ်တၢ်ကမၣ်လၢ စီၤအၤဘြၤဟၣ်အလိၤ. ဘၣ်ဆၣ် စီၤအၤဘြၤဟၣ် တသးထီၣ်အီၤ ဒီးအ့န့အီၤဘၣ်. စီၤအၤဘြၤဟၣ် သ့ၣ်ညါဝဲလၢ အမါနီၢ်စၤရါန့ၣ် အကဲမါလၢအဂ့ၤ ဒီးဆီၣ်ထွဲမၤစၢၤအီၤ ထီဘိ. (၁ မိၤၡ့ ၁၆:၅, ၆) ပန့ၢ်ဘၣ် တၢ်မၤလိဒ်လဲၣ်. ဝၤတဖၣ်န့ၣ် အိၣ်ဒီးတၢ်စိတၢ်ကမီၤလၢ ကဘၣ်ဆၢတဲာ်န့ၢ်တၢ်လၢ အဟံၣ်ဖိဃီဖိအဂီၢ်. (၁ ကရံၣ်သူး ၁၁:၃) ဘၣ်ဆၣ် တချုးလၢ အဆၢတဲာ်တၢ်ဒံးဘၣ်အခါ အတၢ်ဆၢတဲာ် မ့ၢ်ဘၣ်ဃးဒီးအမါန့ၣ် အကဘၣ် ဆိမိၣ်ဆိန့ၢ်တၢ်လၢ အမါအဂီၢ်. ဝၤတဖၣ် မ့ၢ်မၤဒ်န့ၣ်န့ၣ် အပာ်ဖျါထီၣ်လၢ အအဲၣ်အမါ. (၁ ကရံၣ်သူး ၁၃:၄, ၅) တဘျီတခီၣ် နမါအသးတမုာ်ဘၣ် ဒီးအကဘၣ်သး တဲဖျါထီၣ် အတၢ်တူၢ်ဘၣ်. ဖဲန့ၣ်အခါ နကကနၣ်န့ၢ်အီၤ ဒီးပာ်ကဲအတၢ်တူၢ်ဘၣ်ဧါ. (ဖး ၁ ပ့းတရူး ၃:၇.) ဒီပုၢ်ဝဲၢ်မုၣ် အဲကၠၢၤလၤ ဒီးအဝၤ ဒံၤမံထြံၤန့ၣ် အဝဲသ့ၣ်ထီၣ်ပှၢ် ကအိၣ်လၢ အနံၣ် ၃၀ လံ. ဒီပုၢ်ဝဲၢ်မုၣ်အံၤ အဝၤပာ်ကဲအတၢ်တူၢ်ဘၣ် ဒ်လဲၣ်န့ၣ် အတဲဝဲလၢ “ဖဲယသးတမုာ်ဘၣ် ဒီးယဘၣ်သးတဲဖျါထီၣ် ယတၢ်တူၢ်ဘၣ်အခါ ယဝၤကနၣ်န့ၢ်ယၤ ထီဘိ. ယတဲတၢ်လၢ တၢ်သူၣ်ဒိၣ်သးဒိၣ်နာ်က့ ယဝၤဝံသးစူၤယၤ ဒီးနၢ်ပၢၢ်စၢၤယၤ.”
၁၇. မါတဖၣ် မၤလိန့ၢ်တၢ်လၢ နီၢ်စၤရါအအိၣ် သ့ဒ်လဲၣ်. (၁ ပ့းတရူး ၃:၅, ၆)
၁၇ နီၢ်စၤရါ ပာ်ကဲအဝၤ ခီဖျိအဆီၣ်ထွဲ အဝၤအတၢ်ဆၢတဲာ်. (၁ မိၤၡ့ ၁၂:၅) ဘၣ်တဘျီ စီၤအၤဘြၤဟၣ် ဘၣ်သးတူၢ်လိာ် ပှၤတမှံၤလၢ အဟဲတုၤလၢအဟံၣ်. အဃိ စီၤအၤဘြၤကရီလဲၤလၢ နီၢ်စၤရါအအိၣ်ဒီး မၢအပတုာ် အတၢ်မၤခဲလၢာ် ဒီးမၢအတ့ ကိၣ်ဖးဒိၣ်တလိၣ်. (၁ မိၤၡ့ ၁၈:၆) နီၢ်စၤရါ ဆီၣ်ထွဲအဝၤ တၢ်ဆၢတဲာ် ဒီးဒ်အဝၤမၢအီၤအသိး အမၤဝဲချ့ချ့. မါတဖၣ် ကွၢ်လိ နီၢ်စၤရါ သ့ခီဖျိ သုဆီၣ်ထွဲ သုဝၤအတၢ်ဆၢတဲာ်. ဖဲသုမၤဒ်န့ၣ်အခါ မ့ၢ်ဝဲသုမၤဂၢၢ်ကျၢၤဒိၣ်ထီၣ် သုတၢ်ဆီဟံၣ်ဆီဃီ. (ဖး ၁ ပ့းတရူး ၃:၅, ၆.) ဒီပုၢ်ဝဲၢ်ခွါဒံၤမံထြံၤ လၢပတဲအဂ့ၢ် ဖဲမၢကၢာ်န့ၣ် အမါပာ်ကဲအီၤဒ်လဲၣ်န့ၣ် အတဲဝဲလၢ “ယစံးဘျုးဘၣ် ယမါအဲကၠၢၤလၤဒိၣ်မး. တဘျီတခီၣ် ယတၢ်ဆၢတဲာ် မ့ၢ်တဘၣ်လိာ်သးဒီး အတၢ်ဘၣ်သးဘၣ် နာ်က့ အကျဲးစၢးဆီၣ်ထွဲ ယတၢ်ဆၢတဲာ်ထီဘိ. ဒီးယတၢ်ဆၢတဲာ် မ့ၢ်ကမၣ်နာ်က့ အတတဲအါတဲစှၤယၤဘၣ်.” ပထံၣ်ဘၣ်လၢ ပှၤတဂၤမ့ၢ်ပာ်ကဲပှၤန့ၣ် ပအဲၣ်ဘၣ်အီၤညီဒိၣ်ထီၣ်.
၁၈. ပှၤဒီမိၢ်ဝၤခံဂၤ မ့ၢ်ဆဲးပာ်ဖျါထီၣ်တၢ်အဲၣ်န့ၣ် ကကဲဘျုးဒ်လဲၣ်.
၁၈ ဆၢကတီၢ်ခဲအံၤ မုၣ်ကီၤလံၢ်ဘၣ်သး မၤဟးဂီၤ ပှၤဒီမိၢ်ဝၤခံဂၤ အတၢ်အဲၣ်. မုၣ်ကီၤလံၢ် သ့ၣ်ညါဝဲလၢ ပှၤဒီမိၢ်ဝၤခံဂၤ မ့ၢ်တအဲၣ်လိာ်သးလၢၤဘၣ်န့ၣ် အဝဲသ့ၣ်ကယံၤထီၣ်ဒီး ယဟိဝၤယွၤ. ဘၣ်ဆၣ် လံာ်စီဆှံတဲဝဲလၢ တၢ်အဲၣ်အမ့ၢ်အတီန့ၣ် လီၤပံာ်တန့ၢ်ဘၣ်. အဃိဒ်သိး သုဒီမိၢ်ဝၤတၢ်အဲၣ် ကဂၢၢ်ကျၢၤထီဘိအဂီၢ် ကျဲးစၢးမၤထွဲ ဒ်စီၤၡလိၤမိၤအထါ ပာ်ဖျါထီၣ်ဝဲအသိး. ဒီးပာ်လီၤသုသး ဂၢၢ်ဂၢၢ်ကျၢၤကျၢၤလၢ သုကပာ်ဆိ ယဟိဝၤယွၤ လၢနီၣ်ဂံၢ်တၢ လၢသုတၢ်ဆီဟံၣ်ဆီဃီအပူၤ. သုဝဲပှၤဒီမိၢ်ဝၤတဖၣ်န့ၣ် သုကဘၣ်ဟ့ၣ်လိာ်သး တၢ်ဆၢကတီၢ်, ပာ်ကဲလိာ်သး ဒီးနၢ်ပၢၢ်စၢၤလိာ်သး တၢ်တူၢ်ဘၣ်. သုမ့ၢ်မၤဒ်န့ၣ်န့ၣ် သုတၢ်ဆီဟံၣ်ဆီဃီ ကမၤလၤကပီၤ ယဟိဝၤယွၤ လၢအကဲဝဲ တၢ်အဲၣ်အမ့ၢ်အတီ အခီၣ်ထံးခီၣ်ဘိ. ဒီးသုတၢ်အဲၣ်န့ၣ် ကဆဲးကဲၤဝဲထီဘိ.
တၢ်သးဝံၣ် ၁၃၂ ခဲအံၤပကဲထီၣ်တၢ်တမံၤဃီ
a ယဟိဝၤယွၤ ဒုးအိၣ်ထီၣ်တၢ်ဆီဟံၣ်ဆီဃီ ဒီးယဟိဝၤယွၤ ဘၣ်သးဝဲလၢ ပှၤဒီမိၢ်ဝၤန့ၣ် ကအဲၣ်လိာ်သးထီဘိ. သနာ်က့ တဘျီတခီၣ် ပှၤဒီမိၢ်ဝၤ အတၢ်အဲၣ်လိာ်သးန့ၣ် လီၤစၢ်ဝဲသ့. နမ့ၢ်ဆီဟံၣ်ဆီဃီလံန့ၣ် တၢ်မၤလိတခါအံၤ ကမၤစၢၤနၤဒ်သိး နကဆဲးအဲၣ် နသးသမူတံၤသကိး ဒီးကမၤစၢၤနၤ ဒ်သိးဒီး နတၢ်ဆီဟံၣ်ဆီဃီ ကအိၣ်ဒီးတၢ်သးခု.
b တၢ်အဲၣ်အမ့ၢ်အတီန့ၣ် အတဆီတလဲဘၣ် ဒီးအကတၢၢ်တသ့ဘၣ်. ဒီးခီဖျိလၢ ယဟိဝၤယွၤန့ၣ် အကဲဝဲ တၢ်အဲၣ်အခီၣ်ထံးခီၣ်ဘိအဃိ တၢ်အဲၣ်အမ့ၢ်အတီန့ၣ် လံာ်စီဆှံကိးဝဲလၢ “ယဟိဝၤယွၤ အမ့ၣ်အူလၣ်.”
c နသးသမူတံၤသကိး မ့ၢ်တကဲ ယဟိဝၤပှၤအုၣ်အသးဘၣ်နာ်က့ တၢ်ဟ့ၣ်ကူၣ်တဖၣ်အံၤ ကမၤစၢၤနၤလၢ နကမၤဂ့ၤထီၣ် နတၢ်ရ့လိာ်သးဒီးနသးသမူတံၤသကိး.—၁ ကရံၣ်သူး ၇:၁၂-၁၄; ၁ ပ့းတရူး ၃:၁, ၂.
d ကွၢ်တၢ်ဟ့ၣ်ကူၣ်လၢ အအိၣ်လၢ တၢ်ဂ့ၢ်ပိာ်ထွဲလိာ်အခံတဖၣ် လၢအခိၣ်တီမ့ၢ်ဝဲ “တၢ်မၤစၢၤလၢ ဟံၣ်ဖိဃီဖိအဂီၢ်,” လၢအအိၣ်လၢ jw.org ဒီးလၢ JW Library®.
