တၢ်မၤလိ ၂၀
မၤဂ့ၤထီၣ် ပတၢ်ဃ့ထုကဖၣ်
“တဲဖျါထီၣ် သုတၢ်တူၢ်ဘၣ်ခဲလၢာ် လၢအအိၣ်.”—စံးထီၣ်ပတြၢၤ ၆၂:၈.
တၢ်သးဝံၣ် ၄၅ တၢ်လၢယဆိကမိၣ်ထံအီၤ
တၢ်မၤလိအံၤ အတၢ်တိာ်ပာ် a
ပဃ့ထုကဖၣ်လၢ ယဟိဝၤယွၤအအိၣ် ဒီးဃ့အတၢ်ဟံးစုနဲၣ်ကျဲ သ့ကိးဘျီဒဲး (ကွၢ်လံာ်အဆၢ ၁)
၁. ယဟိဝၤယွၤ ဘၣ်သးလၢ ပှၤလၢဘူၣ်ထီၣ်ဘါထီၣ်အီၤန့ၣ် ကမၤမနုၤလဲၣ်. (ကွၢ်စ့ၢ်ကီးတၢ်ဂီၤ.)
ဖဲပလိၣ်ဘၣ် တၢ်ဟံးစုနဲၣ်ကျဲ ဒီးတၢ်မၤမုာ်ထီၣ်သးအခါ ပကဃ့တၢ်မၤစၢၤလၢ မတဂၤအအိၣ်လဲၣ်. ပသ့ၣ်ညါလၢ ပဃ့ထုကဖၣ်လၢ ယဟိဝၤယွၤအအိၣ် ဒီးဃ့အီၤတၢ်မၤစၢၤသ့. ဒီးယဟိဝၤယွၤ ဘၣ်သးဝဲလၢ ပက “ဃ့ထုကဖၣ်တၢ် ထီဘိ.” (၁ သ့းစၤလနံ ၅:၁၇) တကးဒံးဘၣ် ပဃ့ထုကဖၣ်လၢ ယဟိဝၤယွၤအအိၣ် ဒီးဃ့အတၢ်ဟံးစုနဲၣ်ကျဲလၢ ပတၢ်အိၣ်မူ ကိးသနၢၣ်ဒဲးအဂီၢ်သ့. (ကတိၤဒိ ၃:၅, ၆) ယဟိဝၤယွၤန့ၣ် အကဲပှၤလၢ အသးဂ့ၤ ဒီးအဟ့ၣ်တၢ်ညီအဃိ ပဃ့ထုကဖၣ်လၢအအိၣ် အဘျီမ့ၢ်အါနာ်က့ အသးအိၣ်ကနၣ် ပတၢ်ထုကဖၣ် ကိးဘျီဒဲး.
၂. လၢတၢ်မၤလိအံၤန့ၣ် ပကတဲသကီး တၢ်ဂ့ၢ်မနုၤလဲၣ်.
၂ ပပာ်လုၢ်ပာ်ပှ့ၤ တၢ်ဟ့ၣ်လၢအမ့ၢ် တၢ်ဃ့ထုကဖၣ်. အဃိ ပတၢ်မၤမ့ၢ်အါနာ်က့ ပကျဲးစၢး ပာ်လီၤဃာ် တၢ်ဆၢကတီၢ်လၢ ပကဃ့ထုကဖၣ်လၢ ယဟိဝၤယွၤအအိၣ်. ဘၣ်သ့ၣ်သ့ၣ် ပကဘၣ်မၤဂ့ၤထီၣ် ပတၢ်ဃ့ထုကဖၣ်. တကးဒံးဘၣ် ပသ့ၣ်ညါလၢ လံာ်စီဆှံအဆၢလၢ အဟ့ၣ်ဂံၢ်ဟ့ၣ်ဘါပှၤ ဒီးဟ့ၣ်ကူၣ်ပှၤလၢ ပကမၤဂ့ၤထီၣ် ပတၢ်ထုကဖၣ်န့ၣ် အိၣ်ဝဲအါမးအဃိ ပသးခုဒိၣ်မး. အဃိ လၢတၢ်မၤလိတခါအံၤန့ၣ် ပကကွၢ်သကီး ယ့ၣ်ၡူးအဒိအတဲာ်လၢ ကမၤစၢၤပှၤဒ်သိးဒီး ပကပာ်လီၤဃာ် တၢ်ဆၢကတီၢ်လၢ တၢ်ဃ့ထုကဖၣ်အဂီၢ်. ပကတဲသကီးစ့ၢ်ကီး တၢ်ဂ့ၢ်အရ့ဒိၣ်ယဲၢ်ထံၣ်လၢ ကမၤစၢၤပှၤဒ်သိး ပကမၤဂ့ၤထီၣ်ပတၢ်ထုကဖၣ်.
ယ့ၣ်ၡူးပာ်လီၤဃာ် တၢ်ဆၢကတီၢ်လၢ အကဃ့ထုကဖၣ်
၃. ဘၣ်ဃးဒီး တၢ်ထုကဖၣ်န့ၣ် ယ့ၣ်ၡူးသ့ၣ်ညါဝဲ မနုၤလဲၣ်.
၃ ယ့ၣ်ၡူးသ့ၣ်ညါဝဲလၢ ယဟိဝၤယွၤ ပာ်လုၢ်ပာ်ပှ့ၤ ပတၢ်ထုကဖၣ်ဒိၣ်မး. တချုးလၢ ယ့ၣ်ၡူးဟဲလီၤလၢ ဟီၣ်ခိၣ်ချၢဒံးဘၣ်န့ၣ် ယ့ၣ်ၡူးထံၣ်ဘၣ်ဝဲလၢ အပါစံးဆၢဝဲ ပှၤလၢအသးတီတဖၣ် အတၢ်ဃ့ထုကဖၣ်. အဒိ ဖဲယ့ၣ်ၡူးအိၣ်လၢ အပါကပၤအခါ အထံၣ်ဘၣ်ဝဲလၢ အပါစံးဆၢ နီၢ်ဃးနၤ, စီၤဒၤဝံး, စီၤအ့ၤလံယၤ ဒီးပှၤသးတီလၢအဂၤ အတၢ်ထုကဖၣ်. (၁ ၡမူၤအ့လး ၁:၁၀, ၁၁, ၂၀; ၁ စီၤပၤ ၁၉:၄-၆; စံးထီၣ်ပတြၢၤ ၃၂:၅) အဃိ ယ့ၣ်ၡူးသိၣ်လိ အပျဲၢ်အဘီၣ်တဖၣ် လၢကဃ့ထုကဖၣ်တၢ်ထီဘိ ဒီးကနာ်နီၢ်ကီၢ်လၢ ယဟိဝၤယွၤကစံးဆၢ အဝဲသ့ၣ်တၢ်ထုကဖၣ်.—မးသဲ ၇:၇-၁၁.
၄. ယ့ၣ်ၡူးပာ်လီၤ အဒိအတဲာ် ဘၣ်ဃးဒီး တၢ်ဃ့ထုကဖၣ်န့ၣ် ပန့ၢ်ဘၣ် တၢ်မၤလိဒ်လဲၣ်.
၄ ယ့ၣ်ၡူးဃ့ထုကဖၣ်လၢ ယဟိဝၤယွၤအအိၣ် ဒီးအပာ်လီၤဝဲ အဒိအတဲာ်လၢ အပျဲၢ်အဘီၣ်တဖၣ် ကမၤထွဲဝဲအဂီၢ်. ဖဲယ့ၣ်ၡူး စံၣ်တဲၤတဲလီၤတၢ်လၢဟီၣ်ခိၣ်ချၢအခါ အဃ့ထုကဖၣ်ထီဘိ. ယ့ၣ်ၡူးန့ၣ် အတၢ်မၤအါ ဒီးပှၤဂီၢ်မုၢ်ဟဲလၢအအိၣ်မၢ်မၢ်အဃိ အဘၣ်ပာ်လီၤဃာ် တၢ်ဆၢကတီၢ်လၢ အကဃ့ထုကဖၣ်. (မၢ်ကူး ၆:၃၁, ၄၅, ၄၆) တကးဒံးဘၣ် ဒ်သိးယ့ၣ်ၡူး ကန့ၢ်ဘၣ်တၢ်ဆၢကတီၢ်လၢ အကဃ့ထုကဖၣ်ထဲတဂၤအဂီၢ် အဝဲဂဲၤဆၢထၢၣ်ဂီၤမး. (မၢ်ကူး ၁:၃၅) ဘၣ်တဘျီ တချုးလၢ ယ့ၣ်ၡူးဆၢတဲာ် တၢ်လၢအရ့ဒိၣ်တခါဒံးဘၣ်န့ၣ် အဃ့ထုကဖၣ်တၢ် ဒီတနၤကျၢၤညါ. (လူၤကၣ် ၆:၁၂, ၁၃) ဒီးတချုးဖဲ ယ့ၣ်ၡူးကသံတနၤန့ၣ် ဒ်သိးအမၤလၢပှဲၤ အမူဒါလၢဟီၣ်ခိၣ်ချၢ လၢအကီကတၢၢ်တခါ ကန့ၢ်အဂီၢ် အဃ့ထုကဖၣ်ခဲအံၤခဲအံၤ.—မးသဲ ၂၆:၃၉, ၄၂, ၄၄.
၅. ဘၣ်ဃးဒီး တၢ်ဃ့ထုကဖၣ်န့ၣ် ပကွၢ်လိယ့ၣ်ၡူး ကသ့ဒ်လဲၣ်.
၅ ယ့ၣ်ၡူးအဒိအတဲာ်န့ၣ် သိၣ်လိပှၤလၢ ပတၢ်မၤမ့ၢ်အါထဲလဲၣ်နာ်က့ ပကဘၣ်ပာ်လီၤ တၢ်ဆၢကတီၢ်လၢ ပကဃ့ထုကဖၣ်. ဒ်သိးပတၢ်ဆၢကတီၢ်လၢ ပဃ့ထုကဖၣ်တၢ် ကအိၣ်အဂီၢ် ဘၣ်သ့ၣ်သ့ၣ် ပကဘၣ်ဂဲၤဆၢထၢၣ်ဂီၤဂီၤ မ့တမ့ၢ် ပကဘၣ်ဟံန့ၢ်အါထီၣ် တၢ်ဆၢကတီၢ်လၢ မုၢ်နၤခီ ဒ်သိးဒီးယ့ၣ်ၡူးမၤဝဲ. ပမ့ၢ်မၤဒ်န့ၣ်န့ၣ် ပပာ်ဖျါထီၣ်လၢ ပပာ်လုၢ်ပာ်ပှ့ၤ တၢ်ထုကဖၣ်လၢအကဲဝဲ တၢ်ဟ့ၣ်လီၤဆီတခါ လၢယဟိဝၤယွၤဟ့ၣ်ပှၤ. ဒီပုၢ်ဝဲၢ်မုၣ်လ့ နီၣ်ဘၣ်က့ၤဝဲဖဲ အမၤလိဘၣ် တၢ်ဃ့ထုကဖၣ်အဂ့ၢ် အဆိကတၢၢ်တဘျီအခါ အသးခုဒိၣ်မး ဒီးအတဲဝဲလၢ “ယသ့ၣ်ညါဘၣ်လၢ ယတဲတၢ်ဒီးယဟိဝၤယွၤသ့ ကိးဘျီဒဲးအဃိ မၤစၢၤလၢ ယကထံၣ် ယဟိဝၤယွၤ ဒ်သိးဒီး ယသကီးလၢ အမုာ်ဒီးယၤတဂၤ. တကးဒံးဘၣ် ယဘၣ်သး မၤဂ့ၤထီၣ်ယတၢ်ဃ့ထုကဖၣ်.” ဒီပုၢ်ဝဲၢ်မုၣ်လ့ တဲတၢ်န့ၣ် ဖၣ်ဘၣ်ညါ. အဃိခဲအံၤ ပကတဲသကီး တၢ်ဂ့ၢ်အရ့ဒိၣ်ယဲၢ်ထံၣ်လၢ တၢ်ဃ့ထုကဖၣ်အဂီၢ်.
တၢ်ဂ့ၢ်အရ့ဒိၣ်ယဲၢ်ထံၣ်လၢ တၢ်ဃ့ထုကဖၣ်အဂီၢ်
၆. ဒ် လီၣ်ဖျါ ၄:၁၀, ၁၁ ပာ်ဖျါထီၣ်ဝဲအသိး ယဟိဝၤယွၤ ကြၢးဒိးန့ၢ်ဘၣ် မနုၤလဲၣ်.
၆ စံးထီၣ်ပတြၢၤ ယဟိဝၤယွၤ. တၢ်မၢဖိယိၤဟၣ်ထံၣ်ဝဲ တၢ်ထံၣ်လၢညါခီလၢ ပှၤသူၣ်က့သးပှၢ် ၂၄ ဂၤလၢ အအိၣ်လၢမူခိၣ်န့ၣ် ဘူၣ်ထီၣ်ဘါထီၣ်ဝဲ ယဟိဝၤယွၤ. အဝဲသ့ၣ်စံးထီၣ်ပတြၢၤ ကစၢ်ယွၤ ဒီးအဝဲသ့ၣ်သ့ၣ်ညါဝဲလၢ ကစၢ်ယွၤန့ၣ် ကြၢးဒိးန့ၢ်ဘၣ် “တၢ်လၤတၢ်ကပီၤ, တၢ်ယူးယီၣ် ဒီးတၢ်စိတၢ်ကမီၤ.” (ဖး လီၣ်ဖျါ ၄:၁၀, ၁၁.) မူခိၣ်ကလူး လၢအသးတီတဖၣ်စ့ၢ်ကီး အိၣ်ဒီးတၢ်ခွဲးတၢ်ယာ်အါမးလၢ ကစံးထီၣ်ပတြၢၤ ဒီးမၤလၤကပီၤ ယဟိဝၤယွၤ. အဝဲသ့ၣ်အိၣ်ဒီး ယဟိဝၤယွၤလၢမူခိၣ် ဒီးအသ့ၣ်ညါ ယဟိဝၤယွၤအဂ့ၢ်ဂ့ၤဂ့ၤ. တကးဒံးဘၣ် အဝဲသ့ၣ်ထံၣ်ဘၣ် ယဟိဝၤယွၤ အတၢ်ဂ့ၤတၢ်ဝါ ခီဖျိတၢ်လၢ ယဟိဝၤယွၤမၤဝဲ. အဃိ တၢ်လၢအဝဲသ့ၣ်ထံၣ်ဘၣ်ဝဲန့ၣ် မၤဆူၣ်ထီၣ်အသးလၢ အဝဲသ့ၣ် ကစံးထီၣ်ပတြၢၤ ယဟိဝၤယွၤ.—ယိၤဘး ၃၈:၄-၇.
၇. ပစံးထီၣ်ပတြၢၤ ယဟိဝၤယွၤ သ့ဒ်လဲၣ်.
၇ ပဝဲစ့ၢ်ကီး ဖဲပဃ့ထုကဖၣ်အခါ ပကဘၣ်စံးထီၣ်ပတြၢၤ ယဟိဝၤယွၤ. ပစံးထီၣ်ပတြၢၤ ယဟိဝၤယွၤ သ့ခီဖျိ ပတဲဘၣ်အီၤလၢ ပအဲၣ်အီၤ ဒီးစံးဘျုးအီၤလၢ တၢ်လၢအမၤန့ၢ်ပှၤ. ဖဲနဖးဒီးမၤလိလံာ်စီဆှံအခါ ဆိမိၣ်ထံ ယဟိဝၤယွၤ အတၢ်ဂ့ၤတၢ်ဝါ တခါခါလၢ နဘၣ်သးကွၢ်လိ ဒီးမၤထွဲအီၤ. (ယိၤဘး ၃၇:၂၃; ရိမ့ၤ ၁၁:၃၃) ဝံၤဒီး တဲဘၣ်ယဟိဝၤယွၤလၢ နဘၣ်သူၣ်ဘၣ်သး အတၢ်ဂ့ၤတၢ်ဝါတဖၣ်ဒိၣ်မး. တကးဒံးဘၣ် ယဟိဝၤယွၤန့ၣ် အမၤစၢၤပှၤ ဒီးပဒီပုၢ်ဝဲၢ်မုၣ်ခွါ လၢဟီၣ်ခိၣ်ချၢဒီဘ့ၣ်ညါ အဃိ ပသ့ၣ်ညါဘၣ်လၢ အသးအိၣ်ပှၤ ဒီးအဒီသဒၢပှၤထီဘိ. ပသ့ၣ်ညါဘၣ်ဒ်အံၤအဃိ ပကဘၣ် စံးထီၣ်ပတြၢၤအီၤ.—၁ ၡမူၤအ့လး ၁:၂၇; ၂:၁, ၂.
၈. ဘၣ်မနုၤအဃိ ပကဘၣ်စံးဘျုးစံးဖှိၣ် ယဟိဝၤယွၤလဲၣ်. (၁ သ့းစၤလနံ ၅:၁၈)
၈ စံးဘျုးစံးဖှိၣ် ယဟိဝၤယွၤ. ဖဲပဃ့ထုကဖၣ်အခါ တၢ်ဂ့ၢ်လၢ ပစံးဘျုး ယဟိဝၤယွၤသ့န့ၣ် အိၣ်ဒီဒူၣ်. (ဖး ၁ သ့းစၤလနံ ၅:၁၈.) ခီဖျိလၢ ယဟိဝၤယွၤဟ့ၣ်ပှၤ တၢ်လၢအဂ့ၤ ဒီးပသ့ၣ်ညါလၢ တၢ်ဟ့ၣ်လၢ အလၢအပှဲၤခဲလၢာ်န့ၣ် ဟဲလၢအအိၣ်အဃိ ပစံးဘျုးအီၤ. (ယၤကိာ် ၁:၁၇) အဒိ ပစံးဘျုး ယဟိဝၤယွၤ ခီဖျိလၢ အတ့လီၤန့ၢ်ပှၤ ဟီၣ်ခိၣ်ဖျၢၣ်လၢအဃံလၤ ဒီးအတၢ်ဘၣ်တ့လၢ အလီၤကမၢကမၣ်တဖၣ်. တကးဒံးဘၣ် ပစံးဘျုး ယဟိဝၤယွၤလၢ အဟ့ၣ်ပှၤသးသမူ, ပဟံၣ်ဖိဃီဖိ, ပသကီး ဒီးတၢ်မုၢ်လၢ်လၢ ခါဆူညါ. ဒီးခီဖျိလၢ ယဟိဝၤယွၤ ဟ့ၣ်ပှၤတၢ်ခွဲးတၢ်ယာ်လၢ ပကဲဘၣ်အသကီးအဃိ ပစံးဘျုးအီၤဒိၣ်မး.
၉. ဘၣ်မနုၤအဃိ ပကဘၣ်မၤအါထီၣ် ပတၢ်စံးဘျုးစံးဖှိၣ် ယဟိဝၤယွၤလဲၣ်.
၉ ပကစံးဘျုး ယဟိဝၤယွၤအဂီၢ် ဘၣ်သ့ၣ်သ့ၣ် ပကဘၣ်ကျဲးစၢး ဆိမိၣ်ထံတၢ်ဂ့ၢ်လၢ ပကစံးဘျုးအီၤ လီၤတံၢ်လီၤဆဲး. ပမ့ၢ်ကွၢ် ဆၢကတီၢ်ခဲအံၤ ပှၤအါတက့ၢ်န့ၣ် တသ့ၣ်ညါစံးဘျုးက့ၤတၢ်ဘၣ်. ပှၤအါတက့ၢ်န့ၣ် ဆိမိၣ်ထဲတၢ်လၢ အဝဲသ့ၣ်ဘၣ်သးန့ၢ်ဝဲ. မ့မ့ၢ်လၢ အဝဲသ့ၣ်ကဘၣ်ပာ်ဖျါထီၣ်က့ၤ တၢ်စံးဘျုးဟီန့ၣ် အဝဲသ့ၣ်တဆိမိၣ်ဝဲဘၣ်. ပတၢ်ဆိမိၣ် မ့ၢ်လီၤဂာ်ဒ်သိးဒီးအဝဲသ့ၣ်န့ၣ် ပတၢ်ဃ့ထုကဖၣ် ကအိၣ်ထဲ ပဃ့တၢ်လဲလဲလီၤ. အဃိ ဒ်သိးပတၢ်ဃ့ထုကဖၣ် တကဲထီၣ်ဒ်န့ၣ်တဂ့ၤအဂီၢ် ပကဘၣ်ဆဲး မၤအါထီၣ် ပတၢ်စံးဘျုးစံးဖှိၣ် ဒီးစံးဘျုး ယဟိဝၤယွၤလၢ တၢ်လၢအမၤန့ၢ်ပှၤ.—လူၤကၣ် ၆:၄၅.
ပမ့ၢ်စံးဘျုးစံးဖှိၣ်က့ၤ တၢ်လၢယဟိဝၤယွၤ ဟ့ၣ်ပှၤထီဘိန့ၣ် ကမၤစၢၤပှၤလၢ ပတူၢ်တၢ်ကကဲ (ကွၢ်လံာ်အဆၢ ၁၀)
၁၀. တၢ်သ့ၣ်ညါစံးဘျုးက့ၤတၢ်န့ၣ် မၤစၢၤဒီပုၢ်ဝဲၢ်မုၣ်တဂၤလၢ အလဲၤခီဖျိတၢ်ကန့ၢ်ဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၀ ပမ့ၢ်ကဲပှၤလၢ အသ့ၣ်ညါစံးဘျုးက့ၤတၢ်န့ၣ် ကမၤစၢၤပှၤလၢ ပလဲၤခီဖျိ တၢ်ကီတၢ်ခဲကန့ၢ်. ပကတဲသကီး ဒီပုၢ်ဝဲၢ်မုၣ်ယီစူ အတၢ်လဲၤခီဖျိ လၢအအိၣ်ဖဲ တၢးထီခိးတၢ် ၂၀၁၅ လါယနူၤအါရံၤ ၁၅ အပူၤ. ဒီပုၢ်ဝဲၢ်မုၣ်ယီစူန့ၣ် အဘၣ်ပသိၣ်ခဲစၢၢ်တၢ်ဆါ လၢအနးဒိၣ်မးတခါ. အတဲဝဲလၢ “ယတၢ်ဆါတခါအံၤ မၤလီၤစၢ် ယဂံၢ်ယဘါဒိၣ်မး. ယတူၢ်ဘၣ်လၢ ယတၢ်အိၣ်မူန့ၣ် အဘျုးတအိၣ် နီတမံၤလၢၤဘၣ် ဒီးယပျံၤတၢ်ဒိၣ်မး.” အဃိ ဒီပုၢ်ဝဲၢ်မုၣ်ယီစူ လဲၤခီဖျိအတၢ်ကီတၢ်ခဲ န့ၢ်ဒ်လဲၣ်. အတဲဝဲလၢ တချုးလၢ အက့ၤမံဒံးဘၣ်န့ၣ် အလဲၤထီၣ်လၢ အဟံၣ်ခိၣ်ဒူတကထြၢ ကိးနၤဒဲး. ဖဲန့ၣ် အဃ့ထုကဖၣ်လၢအကလုၢ်သီၣ် ဒီးအစံးဘျုးယဟိဝၤယွၤလၢ တၢ်ယဲၢ်မံၤ လၢယဟိဝၤယွၤမၤန့ၢ်အီၤ ဖဲတၢ်တနံၤန့ၣ်. ဒီပုၢ်ဝဲၢ်မုၣ်ယီစူ ဃ့ထုကဖၣ်ဒ်အံၤအဃိ အသးမုာ်ထီၣ် ဒီးမၤစၢၤအီၤလၢ အကအဲၣ်ယဟိဝၤယွၤဒိၣ်ထီၣ်. ဒီပုၢ်ဝဲၢ်မုၣ်အံၤ သ့ၣ်ညါဘၣ်ဝဲလၢ ဖဲယဟိဝၤယွၤ အခ့အပှၤလၢ အသးတီတဖၣ် ထံၣ်ဘၣ် တၢ်မၤကွၢ်အခါ ယဟိဝၤယွၤ မၤစၢၤအဝဲသ့ၣ်. ဒီးအသ့ၣ်ညါဘၣ်ဝဲလၢ ပန့ၢ်ဘၣ်တၢ်ဆိၣ်ဂ့ၤအါန့ၢ်ဒံး တၢ်မၤကွၢ်လၢ ပထံၣ်ဘၣ်ဒံး. ဒ်ဒီပုၢ်ဝဲၢ်မုၣ်ယီစူအသိး ပမ့ၢ်ထံၣ်ဘၣ် တၢ်မၤကွၢ်နာ်က့ ပအိၣ်ဒီးတၢ်ဂ့ၢ်အဂ့ၤအါမးလၢ ပကစံးဘျုးက့ၤ ယဟိဝၤယွၤ. ဒီးဖဲပဃ့ထုကဖၣ်အခါ ပမ့ၢ်စံးဘျုး ယဟိဝၤယွၤန့ၣ် ကမၤစၢၤပှၤလၢ ပတူၢ်တၢ်ကကဲ, ပလဲၤခီဖျိတၢ်ကန့ၢ် ဒီးပကပာ်သးမုာ်မုာ်.
၁၁. ယ့ၣ်ၡူး က့ၤထီၣ်လၢမူခိၣ် ဝံၤအလီၢ်ခံ ဘၣ်မနုၤအဃိ အပျဲၢ်အဘီၣ်တဖၣ် လိၣ်ဘၣ်တၢ်သးဒူလဲၣ်.
၁၁ ဖဲနလဲၤစံၣ်တဲၤတဲလီၤတၢ်အခါ ဃ့ယဟိဝၤယွၤ လၢကဟ့ၣ်နၤတၢ်သးဒူ. တချုးလၢ ယ့ၣ်ၡူး က့ၤထီၣ်လၢမူခိၣ်ဒံးဘၣ်န့ၣ် ယ့ၣ်ၡူးဒုးသ့ၣ်နီၣ်ထီၣ် အပျဲၢ်အဘီၣ်လၢ အဝဲသ့ၣ်အိၣ်ဒီးမူဒါလၢ ကစံၣ်တဲၤတဲလီၤ ယ့ၣ်ၡူးအဂ့ၢ်လၢ “ဝ့ၢ်ယရူၤၡလ့ၣ်အပူၤ, လၢယူဒၤ အဟီၣ်ကဝီၤဒီဘ့ၣ်, လၢၡၤမရံအပူၤ ဒီးပၢၢ်တုၤလၢ ဟီၣ်ခိၣ်ဒီဘ့ၣ်.” (မၤတၢ် ၁:၈; လူၤကၣ် ၂၄:၄၆-၄၈) လၢခံတယံာ်ဘၣ်န့ၣ် ပှၤယူဒၤဖိ တၢ်ဘူၣ်တၢ်ဘါခိၣ်နၢ်တဖၣ် ဖီၣ်ဝဲတၢ်မၢဖိပ့းတရူး ဒီးယိၤဟၣ် ဒီးလဲၤကိးအဝဲသ့ၣ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်တဖျၢၣ်. ဒီးဖဲန့ၣ်ဝံၤအလီၢ်ခံ တၢ်ဘူၣ်တၢ်ဘါခိၣ်နၢ်တဖၣ် တဲအဝဲသ့ၣ်လၢ တဘၣ်စံၣ်တဲၤတဲလီၤတၢ်လၢၤဘၣ် ဒီးတဲပျံၤစ့ၢ်ကီးအဝဲသ့ၣ်. (မၤတၢ် ၄:၁၈, ၂၁) ဘၣ်ဆၣ် စီၤပ့းတရူးဒီးစီၤယိၤဟၣ် မၤဝဲဒ်လဲၣ်.
၁၂. မၤတၢ် ၄:၂၉, ၃၁ ပာ်ဖျါထီၣ်ဝဲလၢ ယ့ၣ်ၡူးအပျဲၢ်အဘီၣ်တဖၣ် မၤမနုၤလဲၣ်.
၁၂ ဖဲပှၤယူဒၤဖိ တၢ်ဘူၣ်တၢ်ဘါခိၣ်နၢ်တဖၣ် တဲပျံၤစီၤပ့းတရူး ဒီးစီၤယိၤဟၣ်အခါ အဝဲသ့ၣ် တဲက့ၤဝဲ “လၢပကဒိကနၣ် ကစၢ်ယွၤအလီၢ် ပမ့ၢ်ဒိကနၣ်က့ၤလၢ သုကလုၢ်န့ၣ် မ့ၢ်ကစၢ်ယွၤ ကထံၣ်ဝဲလၢ အဘၣ်ဧါ တဘၣ်ဘၣ်ဧါန့ၣ် ဆၢတဲာ်လၢ သုနီၢ်ကစၢ်တက့ၢ်. ဘၣ်ဆၣ် မ့မ့ၢ်ပှၤန့ၣ် တၢ်လၢပထံၣ်ဘၣ် ဒီးတၢ်လၢပနၢ်ဟူဘၣ်တဖၣ်န့ၣ် ပဘၣ်စံၣ်တဲၤတဲလီၤအီၤ ဒီးပပတုာ်တသ့ဘၣ်.” (မၤတၢ် ၄:၁၉, ၂၀) ဖဲပှၤပျၢ်ကွံာ် စီၤပ့းတရူး ဒီးစီၤယိၤဟၣ် ဝံၤအလီၢ်ခံ ယ့ၣ်ၡူးအပျဲၢ်အဘီၣ်တဖၣ် ဃ့ထုကဖၣ်လၢ ယဟိဝၤယွၤအအိၣ် ဒ်သိးအဝဲသ့ၣ်ဆဲးမၤ ယဟိဝၤယွၤ အတၢ်ဘၣ်သး ကန့ၢ်အဂီၢ်. အဝဲသ့ၣ် ဃ့ထုကဖၣ် ဒီးတဲဝဲလၢ “မၤစၢၤ ပဝဲနကုၢ်တဖၣ်အံၤ ဒ်သိး ပကဆဲးစံၣ်တဲၤတဲလီၤ နကလုၢ်ကထါ ဒူဒူအဂီၢ်တက့ၢ်.” ဒီးပသ့ၣ်ညါဘၣ်လၢ ယဟိဝၤယွၤ စံးဆၢအဝဲသ့ၣ် တၢ်ထုကဖၣ်.—ဖး မၤတၢ် ၄:၂၉, ၃၁.
၁၃. ပမၤလိန့ၢ်ဘၣ်တၢ်လၢ ဒီပုၢ်ဝဲၢ်ခွါကၠ့ယူ အအိၣ်ဒ်လဲၣ်.
၁၃ ပဒိၣ်တဖၣ် မ့ၢ်တြီဃာ်ပတၢ်စံၣ်တဲၤတဲလီၤတၢ်မၤနာ်က့ ပဘၣ်ကွၢ်လိ ယ့ၣ်ၡူးအပျဲၢ်အဘီၣ်တဖၣ် ဒီးဆဲးစံၣ်တဲၤတဲလီၤတၢ်. ပကကွၢ်သကီး ဒီပုၢ်ဝဲၢ်ခွါကၠ့ယူ အတၢ်လဲၤခီဖျိ. ဒီပုၢ်ဝဲၢ်ခွါအံၤ ခီဖျိလၢ အတလဲၤကဲသုးဘၣ်အဃိ အလီၤဘၣ်လၢဃိာ်ပူၤ. ဖဲအအိၣ်လၢဃိာ်ပူၤအခါ အန့ၢ်ဘၣ်မူဒါလၢ ကနီၤလီၤန့ၢ် ပှၤဃိာ်ဖိတၢ်အီၣ် ဒီးတၢ်အဂၤ. သနာ်က့ အတဲသကီးလံာ်စီဆှံဒီး ပှၤဃိာ်ဖိတန့ၢ်ဘၣ်. အတဲတၢ်ဒီးအဝဲသ့ၣ် န့ၢ်ဒၣ်ထဲ တၢ်ဂ့ၢ်လၢအဘၣ်ဃးဒီးအမူဒါ. အဃိ အဃ့ထုကဖၣ်လၢ ယဟိဝၤယွၤအအိၣ် ဒ်သိးအကန့ၢ်ဘၣ် တၢ်သးဒူ ဒီးတၢ်ကူၣ်သ့လၢ အစံၣ်တဲၤတဲလီၤပှၤဂၤ ကဘူၣ်အဂီၢ်. (မၤတၢ် ၅:၂၉) အတဲဝဲလၢ “ယဟိဝၤယွၤ စံးဆၢယတၢ်ထုကဖၣ်. အဟ့ၣ်ယၤတၢ်သးဒူ ဒီးတၢ်ကူၣ်သ့အဃိ ယတဲသကီးဘၣ် လံာ်စီဆှံ ဒီးပှၤဃိာ်ဖိတဖၣ် န့ၢ်ဝဲတဘျီယဲၢ်မံးနံး. မ့မ့ၢ်လၢမုၢ်နၤခီန့ၣ် ယကွဲးလံာ်ပရၢဒ်သိး ယကဟ့ၣ် ပှၤဃိာ်ဖိ လၢခံတနံၤအဂီၢ်.” ဒ်ဒီပုၢ်ဝဲၢ်ခွါကၠ့ယူအသိး ပဃ့ယဟိဝၤယွၤလၢ အကဟ့ၣ်ပှၤ တၢ်သးဒူဒီးတၢ်ကူၣ်သ့ သ့စ့ၢ်ကီး. ဒီးပနာ်သပှၢ်တၢၢ်လၢ ယဟိဝၤယွၤ ကမၤစၢၤပှၤဒ်သိး ပကဆဲးစံၣ်တဲၤတဲလီၤတၢ်.
၁၄. ဖဲပဘၣ်လဲၤခီဖျိ တၢ်ကီတၢ်ခဲအခါ တၢ်မနုၤကမၤစၢၤပှၤလဲၣ်. (စံးထီၣ်ပတြၢၤ ၃၇:၃, ၅)
၁၄ ဃ့ယဟိဝၤယွၤလၢ ကမၤစၢၤနၤ ဒ်သိးနလဲၤခီဖျိ တၢ်ကီတၢ်ခဲကန့ၢ်. ပဝဲအါဂၤန့ၣ် ပထံၣ်ဘၣ်ဒီး တၢ်ဆူးတၢ်ဆါ, တၢ်သူၣ်အုးသးအုး, ပှၤလၢပအဲၣ်တဖၣ် သံသဒၣ်ကွံာ်ပှၤ, ဟံၣ်ဖိဃီဖိတၢ်အိၣ်သးကီခဲ, ပထံၣ်ဘၣ် တၢ်မၤအၢမၤနး ဒီးတၢ်ကီတၢ်ခဲအဂၤစ့ၢ်ကီး. တကးဒံးဘၣ် ပထံၣ်ဘၣ် တၢ်ကီတၢ်ခဲ ဒ်သိးဒီး တၢ်ဆါရၤလီၤသး ဒီးတၢ်ဒုးတၢ်ယၤ. အဃိ ပကဘၣ် ဃ့ထုကဖၣ်လၢ ယဟိဝၤယွၤအအိၣ် လၢပသးဒီဖျၢၣ်. ဒ်ပတဲဖျါထီၣ် ပတၢ်တူၢ်ဘၣ်လၢ ပသကီးလၢ ပမုာ်ဒီးအီၤတဂၤအသိး ပတဲဖျါထီၣ် ပတၢ်တူၢ်ဘၣ်လၢ ယဟိဝၤယွၤအအိၣ်သ့. ဒီးပကဘၣ် နာ်သပှၢ်တၢၢ်လၢ ယဟိဝၤယွၤ ‘ကမၤစၢၤပှၤ.’—ဖး စံးထီၣ်ပတြၢၤ ၃၇:၃, ၅.
၁၅. ဖဲပ “ဘၣ်ကီဘၣ်ခဲ” အခါ တၢ်ထုကဖၣ် မၤစၢၤပှၤဒ်သိးပ “အိၣ်ဂၢၢ်ဆိးကျၢၤ” ကသ့ဒ်လဲၣ်. ဟ့ၣ်တၢ်အဒိ.
၁၅ ဖဲပ “ဘၣ်ကီဘၣ်ခဲ” အခါ တၢ်ထုကဖၣ် မၤစၢၤပှၤဒ်သိးပက “အိၣ်ဂၢၢ်ဆိးကျၢၤ.” (ရိမ့ၤ ၁၂:၁၂) ယဟိဝၤယွၤ သ့ၣ်ညါဝဲလၢ အခ့အပှၤတဖၣ် ဘၣ်လဲၤခီဖျိ တၢ်ကီတၢ်ခဲ ဒီး “အဝဲနၢ်ဟူ အဝဲသ့ၣ် အတၢ်ကိးပသူထီၣ်လၢ တၢ်မၤစၢၤအဂီၢ်.” (စံးထီၣ်ပတြၢၤ ၁၄၅:၁၈, ၁၉) အဒိ ဒီပုၢ်ဝဲၢ်မုၣ်ခရံးစတံ လၢအအိၣ် ၂၉ နံၣ်ဒီးအကဲပှၤလဲၤလၢညါန့ၣ် အထံၣ်ဝဲလၢ ယဟိဝၤယွၤ မၤစၢၤအီၤနီၢ်ကီၢ်. ဖဲအအိၣ်တဆူၣ်ဘၣ်နးမးအခါ အသးအုး ဒီးအသးလီၤစၢ်ဒိၣ်မး. လၢခံ အသ့ၣ်ညါဝဲလၢ အမိစ့ၢ်ကီး အိၣ်ဒီးတၢ်ဆါနးမးတခါလၢ အမၤသံအီၤသ့. ဒီပုၢ်ဝဲၢ်မုၣ်ခရံးစတံ တဲဝဲလၢ “ဒ်သိးယဟိဝၤယွၤ ကဟ့ၣ်ယၤ တၢ်ဂံၢ်တၢ်ဘါလၢ ယလဲၤခီဖျိတၢ် ကိးနံၤဒဲးကန့ၢ်အဂီၢ် ယဃ့ထုကဖၣ်လၢ အအိၣ်ထီဘိ. ယကျဲးစၢးထီၣ်တၢ်အိၣ်ဖှိၣ် ဒီးမၤနီၢ်ကစၢ်တၢ်မၤလိလံာ်စီဆှံ ဒ်ယမၤညီနုၢ်အသိး.” ဒီးအဆဲးတဲဝဲလၢ “တၢ်ဃ့ထုကဖၣ် မၤစၢၤယၤလၢ ယလဲၤခီဖျိ တၢ်အိၣ်သးလၢ အကီအခဲကန့ၢ်. ယသ့ၣ်ညါလၢ ယဟိဝၤယွၤ အိၣ်ဒီးယၤထီဘိ ဒီးဒ်သိး ယသးကမုာ်ထီၣ်က့ၤအဂီၢ် အကမၤစၢၤယၤ. ယတၢ်ဆါဒု တလီၤမၢ်တဘျီဃီဘၣ်, ဘၣ်ဆၣ် ယဟိဝၤယွၤ စံးဆၢယတၢ်ထုကဖၣ် ခီဖျိ အမၤမုာ်ထီၣ်က့ၤယသး ဒီးမၤစၢၤယၤလၢ ယကပာ်သးမုာ်မုာ်.” ပထံၣ်ဘၣ်လၢ “ယဟိဝၤယွၤ ကဘၣ်မၤပူၤဖျဲး ပှၤလၢအတီဒီးအီၤတဖၣ်လၢ တၢ်မၤကွၢ်အပူၤဒ်လဲၣ်န့ၣ် အသ့ၣ်ညါဝဲ” ဒီးတၢ်ဂ့ၢ်တထံၣ်အံၤ ပတဘၣ် သးပ့ၤနီၣ် နီတဘျီဘၣ်.—၂ ပ့းတရူး ၂:၉.
နကမၤနၢၤကွံာ် တၢ်လ့ပစီအဂီၢ် (၁) ဃ့ထုကဖၣ်လၢ ယဟိဝၤယွၤအအိၣ် ဒ်သိးအကမၤစၢၤနၤ, (၂) အိၣ်မူမၤထွဲဒ် နဃ့ထုကဖၣ်အသိး (၃) မၤဂ့ၤထီၣ် နတၢ်ရ့လိာ်သးဒီး ယဟိဝၤယွၤထီဘိ (ကွၢ်လံာ်အဆၢ ၁၆-၁၇)
၁၆. ပကမၤနၢၤကွံာ် တၢ်လ့ပစီအဂီၢ် ဘၣ်မနုၤအဃိ ပလိၣ်ဘၣ် ယဟိဝၤယွၤ အတၢ်မၤစၢၤလဲၣ်.
၁၆ ဃ့ယဟိဝၤယွၤလၢ ကမၤစၢၤနၤ ဒ်သိးနမၤနၢၤကွံာ် တၢ်လ့ပစီကန့ၢ်. ခီဖျိလၢ ပတလၢတပှဲၤဘၣ်အဃိ ပကဘၣ်ကျဲးစၢး မၤနၢၤကွံာ်တၢ်လ့ပစီထီဘိ. မုၣ်ကီၤလံၢ် ကျဲးစၢးဝဲဆူၣ်ဆူၣ် ဒ်သိးအလ့ပစီပှၤကန့ၢ်အဂီၢ်. အသူဝဲ တၢ်မၤမုာ်မၤဖှံသး လၢအတဂ့ၤဘၣ်တဖၣ် ဒ်သိးပကဆိမိၣ်တၢ်လၢ အတကဆှီဘၣ်. အဃိ ပတၢ်ဆိမိၣ် မ့ၢ်တကဆှီဘၣ်န့ၣ် ပကမၤဘၣ် တၢ်ကမၣ်ဖးဒိၣ် ဒီးပတကဆှီလၢ ယဟိဝၤယွၤ အမဲာ်ညါလၢၤဘၣ်.—မၢ်ကူး ၇:၂၁-၂၃; ယၤကိာ် ၁:၁၄, ၁၅.
၁၇. ဒ်သိးပမၤနၢၤကွံာ် တၢ်လ့ပစီကန့ၢ်အဂီၢ် ပမၤထွဲဒ် ပတၢ်ဃ့ထုကဖၣ် ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၇ ဒ်သိးပမၤနၢၤကွံာ် တၢ်လ့ပစီ ကန့ၢ်အဂီၢ် ပလိၣ်ဘၣ် ယဟိဝၤယွၤ အတၢ်မၤစၢၤ. လၢကစၢ်အတၢ်ထုကဖၣ်န့ၣ် ပထံၣ်ဘၣ်လၢ ယ့ၣ်ၡူးမၢပဃ့စ့ၢ်ကီးလၢ “တဘၣ်ပျဲပလဲၤနုာ်လီၤဆူ တၢ်လ့ပစီအပူၤတဂ့ၤ. မ့မ့ၢ် မၤပူၤဖျဲးပှၤလၢ မုၣ်ကီၤလံၢ် အစုပူၤတက့ၢ်.” (မးသဲ ၆:၁၃) ယဟိဝၤယွၤ ဘၣ်သးမၤစၢၤပှၤလံ သနာ်က့ ပကဘၣ်ဃ့အီၤလၢ အကမၤစၢၤပှၤဒံး. ဒီးပကဘၣ်မၤထွဲ ဒ်ပဃ့အီၤအသိးစ့ၢ်ကီး. တကးဒံးဘၣ် တၢ်မၤမုာ်မၤဖှံသးလၢ ပှၤအါဂၤဘၣ်သူၣ်ဘၣ်သးဝဲ လၢဆၢကတီၢ်ခဲအံၤန့ၣ် ပကဘၣ်ကျဲးစၢး ဟးဆှဲးအီၤသပှၢ်တၢၢ်. (စံးထီၣ်ပတြၢၤ ၉၇:၁၀) အဃိ ဒ်သိးပဆိမိၣ်တၢ်လၢ အဂ့ၤကသ့အဂီၢ် ပကဘၣ် ဖးလံာ်စီဆှံ, မၤနီၢ်ကစၢ်တၢ်မၤလိလံာ်စီဆှံ, ထီၣ်တၢ်အိၣ်ဖှိၣ် ဒီးဟးစံၣ်တဲၤတဲလီၤတၢ်ထီဘိ. တကးဒံးဘၣ် ယဟိဝၤယွၤ အၢၣ်လီၤပှၤလၢ အတဟ့ၣ်အခွဲးလၢ တၢ်ကမၤကွၢ်ပှၤ တုၤလၢပတူၢ် တကဲလၢၤဘၣ်န့ၣ်ဘၣ်.—၁ ကရံၣ်သူး ၁၀:၁၂, ၁၃.
၁၈. ဒ်သိး ပကဃ့ထုကဖၣ်တၢ် ထီဘိအဂီၢ် ပကဘၣ်မၤ မနုၤလဲၣ်.
၁၈ ပအိၣ်မူဘၣ်လၢ မုၢ်နံၤခံကတၢၢ် အဆၢကတီၢ်အဃိ ဒ်သိးပကသးတီဒီး ယဟိဝၤယွၤအဂီၢ် ပကဘၣ်ဃ့ထုကဖၣ် ဆူၣ်ဒိၣ်န့ၢ်ဒံးလၢညါ. အဃိ ပကဘၣ်ပာ်လီၤဃာ် တၢ်ဆၢကတီၢ် ကိးနံၤဒဲးလၢ ပကဃ့ထုကဖၣ်လၢ ယဟိဝၤယွၤအအိၣ် လၢပသးဒီဖျၢၣ်. ဖဲပဃ့ထုကဖၣ်တၢ်အခါ ယဟိဝၤယွၤ ဘၣ်သးလၢပက ‘တဲဖျါထီၣ် ပတၢ်တူၢ်ဘၣ်ခဲလၢာ် လၢအအိၣ်.’ (စံးထီၣ်ပတြၢၤ ၆၂:၈) ဒီးပကဘၣ် စံးထီၣ်ပတြၢၤ ယဟိဝၤယွၤ ဒီးစံးဘျုးစံးဖှိၣ်အီၤလၢ တၢ်လၢအမၤန့ၢ်ပှၤ. ဒီးဖဲပဟးစံၣ်တဲၤတဲလီၤတၢ်အခါ ပကဘၣ်ဃ့ယဟိဝၤယွၤလၢ အကမၤစၢၤပှၤဒ်သိး ပကအိၣ်ဒီးတၢ်သးဒူ. တကးဒံးဘၣ် ဒ်သိးပလဲၤခီဖျိ တၢ်ကီတၢ်ခဲ ဒီးတၢ်လ့ပစီ တမံၤဂ့ၤတမံၤဂ့ၤ ကန့ၢ်အဂီၢ် ပကဘၣ်ဃ့ကညးအီၤလၢ အကမၤစၢၤပှၤ. ဒီးဒ်သိး ပကဆဲးဃ့ထုကဖၣ်လၢ ယဟိဝၤယွၤအအိၣ် ထီဘိအဂီၢ် ပတဘၣ်ပျဲ ပှၤတဂၤဂ့ၤတဂၤဂ့ၤ ဒီးတၢ်တမံၤဂ့ၤတမံၤဂ့ၤ မၤတံာ်တာ်ပှၤဘၣ်. လၢတၢ်မၤလိလၢခံတခါန့ၣ် ပကတဲသကီး တၢ်သံကွၢ် အရ့ဒိၣ်တဖျၢၣ် လၢအမ့ၢ် ယဟိဝၤယွၤ စံးဆၢပတၢ်ထုကဖၣ်ဒ်လဲၣ်.
တၢ်သးဝံၣ် ၄၂ ယွၤအခ့အပှၤအတၢ်ထုကဖၣ်
a ပဘၣ်သးလၢ ပတၢ်ဃ့ထုကဖၣ်န့ၣ် ကလီၤဂာ်ဒ်သိးဒီး လံာ်ပရၢတဘ့ၣ်လၢ ပကွဲးန့ၢ်ပသကီးလၢ ပအဲၣ်အီၤတဂၤ. သနာ်က့ ပကပာ်လီၤတၢ်ဆၢကတီၢ်လၢ ပကဃ့ထုကဖၣ်အဂီၢ် တညီထီဘိဘၣ်. ဒီးတဘျီတခီၣ် ပကဘၣ်ဃ့ မနုၤလဲၣ်န့ၣ် ပတသ့ၣ်ညါဘၣ်. အဃိ ပကတဲသကီး တၢ်ဂ့ၢ်အရ့ဒိၣ်ခံထံၣ်အံၤ လၢတၢ်မၤလိတခါအံၤ.
