၁-၂. ဘၣ်ဃးဒီး ပတၢ်ထုကဖၣ်န့ၣ်​ တဘျီတခီၣ်​ ပကဆိမိၣ်ဘၣ်ဒ်လဲၣ်.

 နဆိမိၣ်ဘၣ်လၢ ယဟိဝၤယွၤ တစံးဆၢနတၢ်ထုကဖၣ်ဘၣ်န့ၣ်​ အိၣ်တဘျီဘျီဧါ. ပှၤအဂၤနာ်က့ ဆိမိၣ်ဘၣ်ဝဲ ဒ်သိးဒီးနၤလီၤ. ပဒီပုၢ်ဝဲၢ်မုၣ်ခွါအါဂၤန့ၣ်​ လီၤဆီဒၣ်တၢ် ဖဲအဝဲသ့ၣ်ထံၣ်ဘၣ်​ တၢ်ကီတၢ်ခဲအခါ အဝဲသ့ၣ်​ ဆိမိၣ်ဝဲလၢ မ့ၢ်ယဟိဝၤယွၤ ကနၣ်အဝဲသ့ၣ်​ တၢ်ထုကဖၣ်စ့ၢ်ကီးဧါ. ပဝဲစ့ၢ်ကီး ပမ့ၢ်ထံၣ်ဘၣ်ဒီး တၢ်ကီတၢ်ခဲန့ၣ်​ ဘၣ်သ့ၣ်သ့ၣ်​ ပကဆိမိၣ်ဘၣ်ဒ်န့ၣ်.

^၂ ပကတဲသကီး တၢ်ဂ့ၢ်တနီၤလၢ ဘၣ်မနုၤအဃိ ပနာ်သပှၢ်တၢၢ်လၢ ယဟိဝၤယွၤ စံးဆၢအခ့အပှၤတဖၣ်​ အတၢ်ထုကဖၣ်လဲၣ်. (၁ ယိၤဟၣ်​ ၅:၁၅) တကးဒံးဘၣ်​ ပကတဲသကီး တၢ်သံကွၢ်လၢအမ့ၢ် တဘျီတခီၣ်​ ဘၣ်မနုၤအဃိ ဖျါလီၤဂာ်လၢ ယဟိဝၤယွၤ တစံးဆၢ ပတၢ်ထုကဖၣ်ဘၣ်လဲၣ်. ဒီးဆၢကတီၢ်ခဲအံၤ ယဟိဝၤယွၤ စံးဆၢပတၢ်ထုကဖၣ်ဒ်လဲၣ်.

၃. ဘၣ်မနုၤအဃိ ယဟိဝၤယွၤ ဘၣ်သးလၢ ပကဃ့ထုကဖၣ်​ လၢအအိၣ်လဲၣ်.

^၃ လံာ်စီဆှံပာ်ဖျါထီၣ်ဝဲလၢ ယဟိဝၤယွၤ ပာ်လုၢ်ပာ်ပှ့ၤပှၤ ဒီးအဲၣ်ပှၤဒိၣ်မး. (ဃးကဲ ၂:၇; ၁ ယိၤဟၣ်​ ၄:၁၀) အဃိ ယဟိဝၤယွၤ ဘၣ်သးလၢ ပကဃ့ထုကဖၣ်​ ဒီးဃ့တၢ်မၤစၢၤလၢအအိၣ်. (၁ ပ့းတရူး ၅:၆, ၇) ဒ်သိးပတၢ်ရ့လိာ်သးဒီး ယဟိဝၤယွၤကဂ့ၤအဂီၢ် ယဟိဝၤယွၤ ဘၣ်သးမၤစၢၤပှၤ ဒီးဖဲပထံၣ်ဘၣ်​ တၢ်ကီတၢ်ခဲအခါ ဒ်သိးဒီး ပလဲၤခီဖျိတၢ်ကန့ၢ်အဂီၢ် အကမၤစၢၤပှၤ.

၄. ယဟိဝၤယွၤ စံးဆၢအခ့အပှၤတဖၣ်​ အတၢ်ထုကဖၣ်န့ၣ်​ ပသ့ၣ်ညါဘၣ်ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၄ လၢလံာ်စီဆှံပူၤ ပထံၣ်ဘၣ်လၢ ယဟိဝၤယွၤ စံးဆၢအခ့အပှၤတဖၣ်​ အတၢ်ထုကဖၣ်​ အဘျီအါမး. နနီၣ်ဘၣ်​ တၢ်အဒိ တခါခါဧါ. ပကကွၢ်သကီး စီၤပၤဒၤဝံး အတၢ်လဲၤခီဖျိ. စီၤဒၤဝံးန့ၣ်​ အဒုၣ်အဒါ လၢအလီၤပျံၤလီၤဖုး အိၣ်ဒီဒူၣ်. အဃိ အဃ့ထုကဖၣ်လၢ ယဟိဝၤယွၤ ကမၤစၢၤအီၤထီဘိ. ဘၣ်တဘျီ အဃ့ကညး ယဟိဝၤယွၤလၢ “အိ ယဟိဝၤယွၤဧၢ, ဒိကနၣ်ယတၢ်ထုကဖၣ်​ ဒီးဒိကနၣ်​ ယတၢ်ဃ့ကညးလၢ တၢ်မၤစၢၤအဂီၢ်တက့ၢ်. နအိၣ်ဒီး တၢ်သးတီ ဒီးနတီနလိၤအဃိ စံးဆၢယၤ.” (စံးထီၣ်ပတြၢၤ ၁၄၃:၁)  ပထံၣ်ဘၣ်လၢ ယဟိဝၤယွၤ စံးဆၢဝဲ စီၤဒၤဝံးအတၢ်ထုကဖၣ်​ ဒီးမၤပူၤဖျဲးအီၤ. (၁ ၡမူၤအ့လး ၁၉:၁၀, ၁၈-၂၀; ၂ ၡမူၤအ့လး ၅:၁၇-၂၅) အဃိ စီၤဒၤဝံးနာ်ဝဲ သပှၢ်တၢၢ်လၢ “ယဟိဝၤယွၤ အိၣ်ဘူးဒီး ပှၤလၢအကိးထီၣ်အီၤ.” ဒီးပဝဲစ့ၢ်ကီး ပနာ်ဒ်န့ၣ်သပှၢ်တၢၢ်.—စံးထီၣ်ပတြၢၤ ၁၄၅:၁၈.

၅. ယဟိဝၤယွၤ စံးဆၢအခ့အပှၤလၢညါတဖၣ်​ အတၢ်ထုကဖၣ်​ ဒ်အဝဲသ့ၣ်ဆိမိၣ်ဝဲဧါ. ဟ့ၣ်တၢ်အဒိ. (ကွၢ်စ့ၢ်ကီးတၢ်ဂီၤ.)

^၅ ဘၣ်သ့ၣ်သ့ၣ်​ ယဟိဝၤယွၤ တစံးဆၢပတၢ်ထုကဖၣ်​ ဒ်သိးပဆိမိၣ်ဘၣ်. ပမ့ၢ်ကွၢ် တၢ်မၢဖိပီလူးန့ၣ်​ တၢ်ကဲထီၣ်သးဒီးအီၤဒ်န့ၣ်. တၢ်မၢဖိပီလူး ဃ့ထုကဖၣ်​ ဒီးဃ့ဝဲလီၤတံၢ်လီၤဆဲးလၢ ယဟိဝၤယွၤ ကမၤလီၤမၢ်ကွံာ် အတၢ်ကီတၢ်ခဲလၢ အလီၤဂာ်ဒ်သိးဒီး ‘တၤဆှုၣ်တၤမဲလၢ အဖံးအညၣ်အကျါ’ န့ၣ်အိၣ်ဝဲ သၢဘျီညါ. ယဟိဝၤယွၤ စံးဆၢတၢ်လၢအဃ့ဝဲ လီၤတံၢ်လီၤဆဲးအံၤဧါ. ယဟိဝၤယွၤစံးဆၢဝဲ သနာ်က့ ယဟိဝၤယွၤ တစံးဆၢအီၤ ဒ်သိးအဆိမိၣ်ဝဲဘၣ်. ပထံၣ်ဘၣ်စ့ၢ်ကီးလၢ ယဟိဝၤယွၤ တမၤလီၤမၢ်န့ၢ် စီၤပီလူး အတၢ်ကီတၢ်ခဲဘၣ်. ဘၣ်ဆၣ်​ ဒ်သိးဒီး စီၤပီလူး ကဆဲးအိၣ်ဒီး တၢ်သးတီ ဒီးဆဲးမၤယဟိဝၤယွၤအတၢ်မၤ ကန့ၢ်အဂီၢ် ယဟိဝၤယွၤ ဟ့ၣ်အီၤတၢ်စိတၢ်ကမီၤ.—၂ ကရံၣ်သူး ၁၂:၇-၁၀.

၆. ဘၣ်မနုၤအဃိ တဘျီတခီၣ်န့ၣ်​ ယဟိဝၤယွၤ တစံးဆၢပတၢ်ထုကဖၣ်​ ဒ်သိးပဆိမိၣ်ဘၣ်လဲၣ်.

^၆ တဘျီတခီၣ်န့ၣ်​ ယဟိဝၤယွၤ တစံးဆၢပတၢ်ထုကဖၣ်​ ဒ်သိးပဆိမိၣ်ဘၣ်. ဘၣ်ဆၣ်​ ပသ့ၣ်ညါသပှၢ်တၢၢ်လၢ ယဟိဝၤယွၤ ကဘၣ်မၤစၢၤပှၤဒ်လဲၣ်န့ၣ်​ အသ့ၣ်ညါဝဲအဂ့ၤကတၢၢ်. တကးဒံးဘၣ်​ ယဟိဝၤယွၤန့ၣ်အ “မၤတၢ်သ့ဒိၣ်န့ၢ်အါန့ၢ်ဒံး တၢ်လၢပဃ့ ဒီးတၢ်လၢ ပဆိကမိၣ်ထီၣ်ခဲလၢာ် စၢၢ်တလၢၢ်.” (အ့းဖ့းစူး ၃:၂၀) အဃိ ပနာ်သပှၢ်တၢၢ်လၢ အခါမ့ၢ်ဘၣ်န့ၣ်​ ယဟိဝၤယွၤ ကစံးဆၢပတၢ်ထုကဖၣ်​ ဒ်ပလိၣ်ဘၣ်အသိး.

၇. ဘၣ်မနုၤအဃိ တဘျီတခီၣ်န့ၣ်​ ပဘၣ်ဆီတလဲ ပတၢ်ထုကဖၣ်လဲၣ်. ဟ့ၣ်တၢ်အဒိ.

^၇ ဖဲပသ့ၣ်ညါထီၣ်​ ယဟိဝၤယွၤ အတၢ်ဘၣ်သးအိၣ်ဒ်လဲၣ်အခါ ဘၣ်သ့ၣ်သ့ၣ်​ ပကဘၣ်​ ဆီတလဲက့ၤ ပတၢ်ဃ့ထုကဖၣ်. ခဲအံၤ ပကတဲသကီး ဒီပုၢ်ဝဲၢ်ခွါမၤတ့ၤ ဖိစံကၢၣ်​ အတၢ်လဲၤခီဖျိ. ဖဲဒီပုၢ်ဝဲၢ်ခွါ ဖိစံကၢၣ်​ ဖျီသးဝံၤအလီၢ်ခံ တယံာ်ဘၣ်န့ၣ်​ အလီၤဘၣ်လၢ နးစံၤအဃိာ်ပူၤ. ဖဲအလဲၤတုၤလၢ နးစံၤဃိာ်ပူၤ သီသီခါန့ၣ်​ အဃ့ထုကဖၣ်လၢ ယဟိဝၤယွၤအအိၣ်လၢ အကဟးထီၣ်ဘၣ်​ လၢဃိာ်ပူၤ ဒ်သိးအကက့ၤကွၢ်ထွဲအမါ ဒီးကစံၣ်တဲၤတဲလီၤဘၣ်တၢ်အဂီၢ်. ဘၣ်ဆၣ်​ ခံနွံဝံၤအလီၢ်ခံ အသ့ၣ်ညါဘၣ်လၢ ယဟိဝၤယွၤ တစံးဆၢအတၢ်ထုကဖၣ်​ ဒ်သိးအဃ့ဝဲဘၣ်. အဃိ အဃ့ထုကဖၣ်ကဒီးလၢ “ယဟိဝၤယွၤဧၢ, ဝံသးစူၤ ဒုးသ့ၣ်ညါယၤတၢ်လၢ နဘၣ်သးမၢယမၤ.” ဖဲန့ၣ်ဝံၤအလီၢ်ခံ အဆိမိၣ်ဝဲ ဒီပုၢ်ဝဲၢ်လၢ အအိၣ်ဖဲ ဃိာ်ပူၤတဖၣ်အဂ့ၢ်. အသ့ၣ်ညါဘၣ်လၢ ဒီပုၢ်ဝဲၢ်ခွါအါဂၤန့ၣ်​ သးကိၢ်တၢ်လၢ အဖိအမါအဂီၢ်. အဃိ ဒီပုၢ်ဝဲၢ်ခွါ ဖိစံကၢၣ်​ ဃ့ထုကဖၣ်က့ၤလၢ “ယဟိဝၤယွၤဧၢ, တၢ်ဘျုးဒိၣ်မးလၢ နဟ့ၣ်ယၤမူဒါ အသီတခါအံၤ. ဒီးဒ်သိး ယဟ့ၣ်ဂံၢ်ဟ့ၣ်ဘါ ဒီးမၤဆူၣ်ထီၣ်​ ဒီပုၢ်ဝဲၢ်တဖၣ်အသးကသ့အဂီၢ် မၤစၢၤယၤ.” ဖဲဒီပုၢ်ဝဲၢ်ခွါဖိစံကၢၣ်​  အိၣ်လၢဃိာ်ပူၤခွံနံၣ်​ အဆၢကတီၢ် အမၤထွဲဝဲဒ်သိး အတၢ်ဃ့ထုကဖၣ်​ ဒီးအဆဲးဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်တဖၣ်ထီဘိ.

၈. ဖဲပဃ့ထုကဖၣ်အခါ ပကဘၣ်နီၣ်ဘၣ်​ တၢ်ဂ့ၢ်အရ့ဒိၣ်မနုၤလဲၣ်.

^၈ ပကဘၣ်နီၣ်ဘၣ်လၢ ယဟိဝၤယွၤ ကမၤလၢပှဲၤ အတၢ်တိာ်ပာ်အဂီၢ် အပာ်ပနီၣ်ဃာ်ဝဲ တၢ်ဆၢကတီၢ်ဝံၤလံ. ယဟိဝၤယွၤ တိာ်ပာ်ဝဲလၢ အကမၤလီၤမၢ်ကွံာ် တၢ်ကီတၢ်ခဲ ကိးမံၤဒဲး လၢပှၤဟီၣ်ခိၣ်ဖိ ထံၣ်ဘၣ်ဝဲလၢဆၢကတီၢ်ခဲအံၤ ဒ်သိးဒီး န့ဆၢၣ်တၢ်ဘၣ်ဒိဘၣ်ထံး, တၢ်ဆူးတၢ်ဆါ ဒီးတၢ်သံတၢ်ပှၢ်. ပသ့ၣ်ညါဘၣ်လၢ ယဟိဝၤယွၤ ကသူဝဲအဘီအမုၢ်ဒ်သိး အကမၤလၢပှဲၤထီၣ်​ အတၢ်တိာ်ပာ်. (ဒၤနံးယ့လး ၂:၄၄; လီၣ်ဖျါ ၂၁:၃, ၄) ဘၣ်ဆၣ်​ ဆၢကတီၢ်ခဲအံၤန့ၣ်​ ယဟိဝၤယွၤ ပျဲဝဲလၢ မုၣ်ကီၤလံၢ် ကပၢဟီၣ်ခိၣ်ဒံး. b (ယိၤဟၣ်​ ၁၂:၃၁; လီၣ်ဖျါ ၁၂:၉) ယဟိဝၤယွၤ မ့ၢ်မၤလီၤမၢ်န့ၢ် ပှၤဟီၣ်ခိၣ်ဖိ အတၢ်ကီတၢ်ခဲလၢ ဆၢကတီၢ်ခဲအံၤန့ၣ်​ ဖျါလီၤဂာ်လၢ မုၣ်ကီၤလံၢ် အတၢ်ပၢန့ၣ်အဂ့ၤ. အဃိ ပမ့ၢ်ဘၣ်အိၣ်ခီး ယဟိဝၤယွၤလၢ အကမၤလၢပှဲၤထီၣ်​ အတၢ်တိာ်ပာ်နာ်က့ ယဟိဝၤယွၤ ကဆဲးမၤစၢၤပှၤ ဒီးအတပာ်တ့ၢ်ပှၤဘၣ်. ခဲအံၤ ယဟိဝၤယွၤ ကမၤစၢၤပှၤဒ်လဲၣ်န့ၣ်​ ပကတဲသကီး တၢ်ဂ့ၢ်တနီၤ.

၉. ဖဲပဘၣ်ဆၢတဲာ်တၢ်အခါ ယဟိဝၤယွၤ မၤစၢၤပှၤ ကသ့ဒ်လဲၣ်. ဟ့ၣ်တၢ်အဒိ.

^၉ ယဟိဝၤယွၤ ဟ့ၣ်ပှၤတၢ်ကူၣ်သ့. ဒ်သိးပဆၢတဲာ်တၢ်ကဘၣ်အဂီၢ် ယဟိဝၤယွၤ အၢၣ်လီၤပှၤလၢ အကဟ့ၣ်ပှၤ တၢ်ကူၣ်သ့. ပမ့ၢ်ဘၣ်ဆၢတဲာ်တၢ်လၢ အကဆီတလဲ ပတၢ်အိၣ်မူန့ၣ်​ ပလိၣ်ဘၣ်​ ယဟိဝၤယွၤ အတၢ်ကူၣ်သ့. အဒိ ဖဲပဆၢတဲာ်လၢ ပကအိၣ်သဘျ့ မ့တမ့ၢ် ပကဆီဟံၣ်ဆီဃီအခါ ပလိၣ်ဘၣ်​ ယဟိဝၤယွၤ အတၢ်ကူၣ်သ့. (ယၤကိာ် ၁:၅) ပကကွၢ် ဒီပုၢ်ဝဲၢ်မုၣ်မရံယၤ လၢအကဲပှၤသဘျ့တဂၤ အတၢ်လဲၤခီဖျိ. c ဒီပုၢ်ဝဲၢ်မုၣ်အံၤ ဖဲအထံၣ်လိာ်သးဒီး ဒီပုၢ်ဝဲၢ်ခွါတဂၤအခါ အကဲပှၤလဲၤလၢညါလံ ဒီးအမၤပှၤလဲၤလၢညါမုာ်မး. အတဲဝဲလၢ “ပရ့လိာ်သး အါထီၣ်ဘျီ ပသးအိၣ်လိာ်သးဒိၣ်ထီၣ်. ယသ့ၣ်ညါလၢ ယကဘၣ်​ ဆၢတဲာ်တၢ်အဃိ ဘၣ်ဃးဒီး တၢ်ဂ့ၢ်အံၤ ယဃ့ထုကဖၣ်လၢ ယဟိဝၤယွၤအအိၣ်ဆူၣ်ဆူၣ်. ယလိၣ်ဘၣ်​ ယဟိဝၤယွၤ အတၢ်ဟံးစုနဲၣ်ကျဲ သနာ်က့ ယသ့ၣ်ညါလၢ ယဟိဝၤယွၤ တဆၢတဲာ်န့ၢ်တၢ်လၢ ယဂီၢ်ဘၣ်.” လၢခံ ဒီပုၢ်ဝဲၢ်မုၣ်အံၤ ဃုဖးဝဲပတၢ်ကရၢကရိ လံာ်လဲၢ်တဖၣ်​ ဒီးအထံၣ်န့ၢ်ဝဲ တၢ်ဂ့ၢ်တၢ်ကျိၤလၢ ကမၤစၢၤအီၤ ဒ်သိး အကအိၣ်ဒီးတၢ်ကူၣ်သ့ ဒီးကဆၢတဲာ်တၢ်လၢအဘၣ်. အဃိ အသ့ၣ်ညါဘၣ်ဝဲလၢ ယဟိဝၤယွၤ စံးဆၢအတၢ်ထုကဖၣ်. ဒီးဒီပုၢ်ဝဲၢ်မုၣ်မရံယၤအမိန့ၣ်​ ကဲပှၤလၢ အအဲၣ်ယဟိဝၤယွၤ ဒီးအဟ့ၣ်ကူၣ်အီၤဂ့ၤမး အဃိ အကနၣ်စ့ၢ်ကီး အမိကလုၢ်. အမိတၢ်ဟ့ၣ်ကူၣ်န့ၣ်​ မၤစၢၤအီၤလၢ အကဆိမိၣ်လီၤက့ၤ အတၢ်တူၢ်ဘၣ်. အဃိ လၢခံန့ၣ်​ အဆၢတဲာ်တၢ်လၢအဘၣ်​ လၢအနီၢ်ကစၢ်အဂီၢ်.

၁၀. ဖံလံးပံၤ ၄:၁၃ ပာ်ဖျါထီၣ်ဝဲလၢ ယဟိဝၤယွၤ မၤစၢၤအခ့အပှၤဒ်လဲၣ်. ဟ့ၣ်တၢ်အဒိ. (ကွၢ်စ့ၢ်ကီးတၢ်ဂီၤ.)

^၁၀ ယဟိဝၤယွၤဟ့ၣ်ပှၤ တၢ်စိကမီၤလၢ ပလဲၤခီဖျိတၢ်ကန့ၢ်. ဒ်ယဟိဝၤယွၤ ဟ့ၣ်တၢ်မၢဖိပီလူး တၢ်စိကမီၤလၢ အလဲၤခီဖျိတၢ်ကန့ၢ်အသိး ယဟိဝၤယွၤ ကဟ့ၣ်ပှၤ တၢ်စိကမီၤလၢ ပလဲၤခီဖျိ ပတၢ်ကီတၢ်ခဲကန့ၢ်စ့ၢ်ကီး. (ဖး ဖံလံးပံၤ ၄:၁၃.) အဒိ ယဟိဝၤယွၤ မၤစၢၤဝဲ ဒီပုၢ်ဝဲၢ်ခွါဘဲကၠၢၤမဲၤ ဒ်သိးအလဲၤခီဖျိ အတၢ်ကီတၢ်ခဲကန့ၢ်. စးထီၣ်လၢ ဒီပုၢ်ဝဲၢ်ခွါဘဲကၠၢၤမဲၤ နီၢ်ဆံးခါ  တုၤလၢ အနီၢ်ဒိၣ်ထီၣ်န့ၣ်​ အီၤဒီးအဟံၣ်ဖိဃီဖိ ဘၣ်အိၣ်လၢ အၤဖြံၤကၤ ဘၣ်ကီဘၣ်ခဲ ဒဲကဝီၤပူၤ. ဒီပုၢ်ဝဲၢ်ခွါဘဲကၠၢၤမဲၤ တဲဝဲလၢ “ယဃ့ထုကဖၣ်လၢ ယဟိဝၤယွၤအအိၣ်မၢ်မၢ်. ဒီးယဃ့အီၤလၢ အကဟ့ၣ်ယၤ တၢ်စိကမီၤလၢ ယကမၤတၢ်လၢ အဘၣ်အသး. ယဟိဝၤယွၤ စံးဆၢယတၢ်ထုကဖၣ်​ ခီဖျိအဟ့ၣ်ယၤ တၢ်သူၣ်မံသးမုာ်, အဟ့ၣ်ယၤ တၢ်သးဒူလၢ ယကဆဲးစံၣ်တဲၤတဲလီၤတၢ် ဒီးတၢ်ကရၢကရိ လံာ်လဲၢ်တဖၣ်န့ၣ်​ မၤစၢၤယၤဒ်သိး ယတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်.” အတဲစ့ၢ်ကီးဝဲလၢ “ဖဲယဖး ဒီပုၢ်ဝဲၢ်မုၣ်ခွါတဖၣ်​ အတၢ်လဲၤခီဖျိအခါ ယသ့ၣ်ညါဘၣ်လၢ ဒ်သိးအဝဲသ့ၣ်​ လဲၤခီဖျိ အတၢ်ကီတၢ်ခဲကန့ၢ်အဂီၢ် ယဟိဝၤယွၤ မၤစၢၤအဝဲသ့ၣ်. ဒီပုၢ်ဝဲၢ်မုၣ်ခွါတဖၣ်​ အတၢ်လဲၤခီဖျိန့ၣ်​ ဟ့ၣ်ဆူၣ်ထီၣ်ယဂံၢ်ယဘါလၢ ယကဆဲးတီဒီးယဟိဝၤယွၤ.”

၁၁-၁၂. ယဟိဝၤယွၤ ကသူဝဲ ပဒီပုၢ်ဝဲၢ်မုၣ်ခွါ တဂၤဂၤလၢ အကစံးဆၢ ပတၢ်ဃ့ထုကဖၣ်ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၁ ယဟိဝၤယွၤ မၤစၢၤပှၤ ခီဖျိပဒီပုၢ်ဝဲၢ်မုၣ်ခွါတဖၣ်. တချုးလၢ ယ့ၣ်ၡူးကသံတနၤန့ၣ်​ အဃ့ထုကဖၣ်တၢ်ဆူၣ်ဆူၣ်​ လၢအသးဒီဖျၢၣ်. အဃ့ကညး ယဟိဝၤယွၤဒ်သိး ပှၤအဂၤ တဆိမိၣ်ကမၣ်အီၤလၢ အမၤဟးဂီၤ ယဟိဝၤယွၤအမံၤ တဂ့ၤအဂီၢ်. ယဟိဝၤယွၤ တစံးဆၢ ယ့ၣ်ၡူးအတၢ်ဃ့တခါအံၤဘၣ်, သနာ်က့ ယဟိဝၤယွၤ ဆှၢလီၤဝဲ မူခိၣ်ကလူးတဂၤလၢ ကဟ့ၣ်ဂံၢ်ဟ့ၣ်ဘါအီၤ. (လူၤကၣ်​ ၂၂:၄၂, ၄၃) ပဝဲစ့ၢ်ကီး ယဟိဝၤယွၤ မၤစၢၤပှၤခီဖျိ ပဒီပုၢ်ဝဲၢ်မုၣ်ခွါတဖၣ်. ဒီပုၢ်ဝဲၢ်မုၣ်ခွါတဖၣ်အံၤ ကီးပှၤလၢလီတဲစိ ဒီးဟ့ၣ်ဂံၢ်ဟ့ၣ်ဘါပှၤ မ့တမ့ၢ် ဟဲဟးအိၣ်သကီးပှၤ. အဃိ ပသ့ၣ်ညါဘၣ်လၢ ပဝဲခဲလၢာ်န့ၣ်​ ပကဘၣ်ဟံန့ၢ် တၢ်ခွဲးတၢ်ယာ်လၢ ပကတဲ “တၢ်ကတိၤလၢ အမုာ်” လၢကကဲထီၣ်​ တၢ်ဟ့ၣ်ဂံၢ်ဟ့ၣ်ဘါလၢ ပဒီပုၢ်ဝဲၢ်မုၣ်ခွါအဂီၢ်.—ကတိၤဒိ ၁၂:၂၅.

^၁၂ ပကကွၢ်သကီး ဒီပုၢ်ဝဲၢ်မုၣ်မံးရယၢၤ အတၢ်လဲၤခီဖျိ. ဖဲဒီပုၢ်ဝဲၢ်မုၣ်မံးရယၢၤ အဝၤသံစှၤကိာ်နွံ ဝံၤအလီၢ်ခံ အဘၣ်အိၣ်သယုၢ်က့ၤ ထဲတဂၤအဃိ အသးအုး ဒီးသးဟးဂီၤဒိၣ်မး. အဟီၣ်ညါ တုၤလၢ အပတုာ်ဝဲတန့ၢ်ဘၣ်​ အဃိ အကဘၣ်တဲတၢ်ဒီး ပှၤတဂၤဂၤ. ဒီပုၢ်ဝဲၢ်မုၣ်အံၤ တဲဝဲလၢ “ယကကီးပှၤတဂၤမၣ်​ ယဂံၢ်ဘါတအိၣ်လၢၤဘၣ်. အဃိ ယဃ့ထုကဖၣ်လၢ ယဟိဝၤယွၤအအိၣ်. ဖဲယဟီၣ်ခီခီ ဒီးယဃ့ထုကဖၣ်တၢ်ခီခီ အခါန့ၣ်​ ပှၤကီးယလီတဲစိ. ပှၤကီးယၤတဂၤအံၤ အကဲဝဲတၢ်အိၣ်ဖှိၣ်သးပှၢ်.” ဒီးဖဲန့ၣ်​ တၢ်အိၣ်ဖှိၣ်သးပှၢ်တဂၤအံၤ ဒီးအမါန့ၣ်​ ဟ့ၣ်ဂံၢ်ဟ့ၣ်ဘါဝဲ ဒီပုၢ်ဝဲၢ်မုၣ်မံးရယၢၤ. ဒီပုၢ်ဝဲၢ်မုၣ်အံၤ သ့ၣ်ညါဝဲနီၢ်ကီၢ်လၢ ယဟိဝၤယွၤ သူဝဲ တၢ်အိၣ်ဖှိၣ်သးပှၢ်တဂၤအံၤလၢ ကကီးအီၤ ဒီးဟ့ၣ်ဂံၢ်ဟ့ၣ်ဘါအီၤ.

၁၃. ယဟိဝၤယွၤ စံးဆၢအခ့အပှၤ အတၢ်ထုကဖၣ်​ ခီဖျိအသူဝဲ ပှၤလၢအတဘူၣ်ထီၣ်ဘါထီၣ်အီၤဘၣ်န့ၣ်​ ဒ်လဲၣ်. ဟ့ၣ်တၢ်အဒိ.

^၁၃ ယဟိဝၤယွၤကသူဝဲ ပှၤလၢအတဘူၣ်ထီၣ်ဘါထီၣ်အီၤ. (ကတိၤဒိ ၂၁:၁) တဘျီတခီၣ်​ ယဟိဝၤယွၤ စံးဆၢအခ့အပှၤ အတၢ်ဃ့ထုကဖၣ်​ ခီဖျိအသူဝဲ ပှၤလၢအတဘူၣ်ထီၣ်ဘါထီၣ် အီၤတဖၣ်​ လၢကမၤစၢၤဝဲ အခ့အပှၤ. အဒိ ယဟိဝၤယွၤသူဝဲ စီၤပၤအၢ်တၤၡါၡတၤလၢ ကပျဲဝဲ စီၤနဃ့မယၤ ကက့ၤဘှီဂ့ၤထီၣ်က့ၤ ဝ့ၢ်ယရူၤၡလ့ၣ်. (နဃ့မယၤ ၂:၃-၆) ဆၢကတီၢ်ခဲအံၤစ့ၢ်ကီး ဖဲပလိၣ်ဘၣ်​ တၢ်မၤစၢၤအခါ တဘျီတခီၣ်​ ယဟိဝၤယွၤသူဝဲ ပှၤလၢအတဘူၣ်ထီၣ်ဘါထီၣ်အီၤတဖၣ်​ လၢကမၤစၢၤပှၤ.

၁၄. ဒီပုၢ်ဝဲၢ်မုၣ်စူဟ့ အတၢ်လဲၤခီဖျိန့ၣ်​ ဟ့ၣ်ဂံၢ်ဟ့ၣ်ဘါပှၤဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၄ ဒီပုၢ်ဝဲၢ်မုၣ်စူဟ့ သ့ၣ်ညါဝဲလၢ ယဟိဝၤယွၤ သူဝဲကသံၣ်သရၣ်တဂၤ လၢကမၤစၢၤအီၤ. ဒီပုၢ်ဝဲၢ်မုၣ်တဂၤအံၤ ဖဲအဖိခွါနီၢ်ဆံးခါန့ၣ်​ အဖိခွါန့ၢ်ဘၣ်​ တၢ်သးလီၤစၢ်တၢ်ဆါလၢ အနးတကလုာ် ဒီးလၢခံ အဖိခွါလီၤတဲာ်လၢ တၢ်လီၢ်ဖးထီ ဒီးအဘၣ်ဒိဝဲနးမး. အဃိ ဒ်သိး ဒီပုၢ်ဝဲၢ်မုၣ်ဒီးအဝၤ ကကွၢ်ထွဲက့ၤ အဖိခွါအဂီၢ် အဝဲသ့ၣ်​ ဘၣ်ဟးထီၣ်ကွံာ်လၢတၢ်မၤ. ဒီးအဝဲသ့ၣ်ကျိၣ်စ့ တအိၣ်လၢၤဘၣ်. ဒီပုၢ်ဝဲၢ်မုၣ်စူဟ့ တဲဝဲလၢ တၢ်ကီတၢ်ခဲလၢ အထံၣ်ဘၣ်ဝဲအံၤ လီၤဂာ်လၢ အလဲၤခီဖျိဝဲ တန့ၢ်လၢၤဘၣ်. အတဲဖျါထီၣ်​ အတၢ်တူၢ်ဘၣ်ခဲလၢာ် လၢယဟိဝၤယွၤအအိၣ်​ ဒီးဃ့လၢ ယဟိဝၤယွၤ ကမၤစၢၤအီၤ. တယံာ်ဘၣ်ဒီး ကသံၣ်သရၣ်တဂၤ ရဲၣ်ကျဲၤလၢ ကမၤစၢၤ အဟံၣ်ဖိဃီဖိ. ခီဖျိလၢ ကသံၣ်သရၣ်​ အတၢ်မၤစၢၤအဃိ အဝဲသ့ၣ်န့ၢ်ဘၣ်​ ပဒိၣ်အတၢ်မၤစၢၤ ဒီးငါအိၣ်ဘၣ်တၢ်လီၢ်လၢ အပှ့ၤဘၣ်. လၢခံ ဒီပုၢ်ဝဲၢ်မုၣ်စူဟ့ တဲဝဲလၢ “ပထံၣ်ဘၣ်​ သပှၢ်တၢၢ်လၢ ယဟိဝၤယွၤ မၤစၢၤပှၤ ဒီးယဟိဝၤယွၤန့ၣ်​ အကဲ ‘ပှၤလၢအဒိကနၣ်​ တၢ်ထုကဖၣ်တဂၤ’” နီၢ်ကီၢ်.—စံးထီၣ်ပတြၢၤ ၆၅:၂.

၁၅. ဒ်သိး ဒီပုၢ်ဝဲၢ်မုၣ်တဂၤ ကသ့ၣ်ညါလၢ ယဟိဝၤယွၤ စံးဆၢအတၢ်ထုကဖၣ်အဂီၢ် အမၤဝဲဒ်လဲၣ်.

^၁၅ ညီနုၢ်န့ၣ်​ ယဟိဝၤယွၤ တစံးဆၢ ပတၢ်ဃ့ထုကဖၣ်​ ဒ်သိးပဆိမိၣ်ဘၣ်. ဘၣ်ဆၣ်​ အတၢ်စံးဆၢန့ၣ်​ မၤစၢၤပှၤဒ်သိး ပကဆဲးတီဒီးအီၤ. အဃိ ယဟိဝၤယွၤ စံးဆၢပတၢ်ထုကဖၣ်ဒ်လဲၣ်န့ၣ်​ ပကဘၣ်ဆိမိၣ်ထံက့ၤအီၤ. ဒီပုၢ်ဝဲၢ်မုၣ်ယိခိၤ ဆိမိၣ်ဝဲလၢ ယဟိဝၤယွၤ တစံးဆၢအတၢ်ထုကဖၣ်ဘၣ်. ဘၣ်ဆၣ်လၢခံန့ၣ်​ အစးထီၣ်ကွဲးနီၣ်ဃာ်ဝဲ တၢ်ဂ့ၢ်လၢ အဃ့ဝဲတဖၣ်. တယံာ်ဘၣ်ဒီး တၢ်ဂ့ၢ်လၢ အဃ့ဝဲတနီၤန့ၣ်​ အသးပ့ၤနီၣ်ကွံာ်ဝဲ ဘၣ်ဆၣ်​ အကွၢ်ကဒါက့ၤ တၢ်ဂ့ၢ်လၢ အကွဲးနီၣ်ဃာ်လၢ လံာ်ပူၤ ဒီးအသ့ၣ်ညါဝဲလၢ တၢ်ဂ့ၢ်လၢအဃ့ ယဟိဝၤယွၤန့ၣ်​ အါတက့ၢ် ယဟိဝၤယွၤစံးဆၢအီၤလံ. လၢတၢ်လဲၤခီဖျိအံၤ ပသ့ၣ်ညါဘၣ်လၢ တဘျီတခီၣ်​ ပလိၣ်ဘၣ်​ တၢ်ဆၢကတီၢ်လၢ ပကဆိမိၣ်ထံက့ၤ ယဟိဝၤယွၤ စံးဆၢပတၢ်ဃ့ထုကဖၣ်.—စံးထီၣ်ပတြၢၤ ၆၆:၁၉, ၂၀.

၁၆. ဖဲပဃ့ထုကဖၣ်အခါ ပပာ်ဖျါထီၣ်​ ပတၢ်နာ် ကသ့ဒ်လဲၣ်. (ဧ့ၤဘြံၤ ၁၁:၆)

^၁၆ ပမ့ၢ်ဃ့ထုကဖၣ်လၢ ယဟိဝၤယွၤအအိၣ်န့ၣ်​ မ့ၢ်ဝဲပပာ်ဖျါထီၣ်​ ပတၢ်နာ်. တကးဒံးဘၣ်​ ပမ့ၢ်တူၢ်လိာ်လၢ ယဟိဝၤယွၤ ကစံးဆၢပတၢ်ထုကဖၣ်​ ဒ်လဲၣ်ဒ်လဲၣ်န့ၣ်​ မ့ၢ်ဝဲပပာ်ဖျါထီၣ်​ ပတၢ်နာ်စ့ၢ်ကီး. (ဖး ဧ့ၤဘြံၤ ၁၁:၆.) ပကတဲသကီး ဒီပုၢ်ဝဲၢ်ခွါမဲး ဒီး အမါခြံစံၤ အတၢ်လဲၤခီဖျိ. အဝဲသ့ၣ်ပာ်လီၤဖီတၢၣ်လၢ ကလဲၤမၤတၢ်လၢ ဘ့ၤသ့လး. အဝဲသ့ၣ်တဲဝဲလၢ “ဒ်သိးဒီး ပကလဲၤမၤဘၣ်တၢ်လၢ ဘ့ၤသ့လးအဂီၢ် ပတီၣ်ထီၣ်လံာ် တဘျုးဘျီညါ ဒီးပဃ့ထုကဖၣ်လၢ ယဟိဝၤယွၤအအိၣ်​ ဘၣ်ဃးဒီး ပဖီတၢၣ်အံၤမၢ်မၢ်.” ဒီပုၢ်ဝဲၢ်ခွါမဲး တဲဝဲလၢ “ဘၣ်ဆၣ်​ ပှၤတကီးပှၤနီတဘျီဘၣ်.” သနာ်က့ ဒီပုၢ်ဝဲၢ်ခွါမဲး ဒီးအမါ နာ်ဝဲလၢ ယဟိဝၤယွၤ ကသူအဝဲသ့ၣ်ဒ်လဲၣ်န့ၣ်​ ယဟိဝၤယွၤ သ့ၣ်ညါဝဲအဂ့ၤကတၢၢ်. အဃိ အဝဲသ့ၣ်ဆဲးမၤ ယဟိဝၤယွၤ အတၢ်မၤ လၢအဂ့ၤကတၢၢ် ဒီးမၤဝဲပှၤလဲၤလၢညါ လၢတၢ်လီၢ်လၢ ပှၤလိၣ်ဘၣ်​ ပှၤစံၣ်တဲၤတဲလီၤတၢ်ဖိ. တကးဒံးဘၣ်​ အဝဲသ့ၣ်လဲၤမၤစၢၤတၢ်လၢ တၢ်သူၣ်ထီၣ်ဘှီထီၣ်တကပၤ. ခဲအံၤန့ၣ်​ အဝဲသ့ၣ်မၤဝဲ ကဝီၤအပှၤကွၢ်တၢ်အတၢ်မၤ. ဒီပုၢ်ဝဲၢ်ခွါမဲး တဲဝဲလၢ “တဘျီတခီၣ်​ ယဟိဝၤယွၤ တစံးဆၢ ပတၢ်ထုကဖၣ်​ ဒ်သိးပဆိမိၣ်ဘၣ်. ဘၣ်ဆၣ်​ ယဟိဝၤယွၤ စံးဆၢပတၢ်ထုကဖၣ်န့ၣ်​ ဂ့ၤဒိၣ်န့ၢ် ပဆိမိၣ်ဒံး.”

၁၇-၁၈. ဒ်စံးထီၣ်ပတြၢၤ ၈၆:၆, ၇ ပာ်ဖျါထီၣ်ဝဲအသိး ပနာ်န့ၢ်တၢ်မနုၤသ့လဲၣ်.

^၁၇ ဖး စံးထီၣ်ပတြၢၤ ၈၆:၆, ၇. စီၤဒၤဝံး နာ်ဝဲသပှၢ်တၢၢ်လၢ ယဟိဝၤယွၤ နၢ်ဟူ ဒီးစံးဆၢ အတၢ်ထုကဖၣ်. ဒ်စီၤဒၤဝံးအသိး နၤစ့ၢ်ကီး နနာ်န့ၢ် ယဟိဝၤယွၤသ့. တၢ်လဲၤခီဖျိလၢ ပတဲသကီးလၢ တၢ်မၤလိတခါအံၤန့ၣ်​ ဒုးသ့ၣ်ညါပှၤလၢ ဒ်သိးပလဲၤခီဖျိ ပတၢ်ကီတၢ်ခဲကန့ၢ်အဂီၢ် ယဟိဝၤယွၤ ကဟ့ၣ်ပှၤ အတၢ်ကူၣ်သ့ ဒီးအတၢ်စိကမီၤ. ဒီးတဘျီတခီၣ်န့ၣ်​ ဒ်သိးယဟိဝၤယွၤ ကမၤစၢၤပှၤ အဂီၢ် အကသူဝဲ ပဒီပုၢ်ဝဲၢ်မုၣ်ခွါတဖၣ်​ မ့တမ့ၢ် ပှၤလၢအတဘူၣ်ထီၣ်ဘါထီၣ်အီၤတဖၣ်.

^၁၈ တဘျီတခီၣ်​ ယဟိဝၤယွၤ တစံးဆၢ ပတၢ်ထုကဖၣ်​ ဒ်သိးပဆိမိၣ်ဘၣ်. သနာ်က့ ပသ့ၣ်ညါလၢ အကစံးဆၢပှၤသပှၢ်တၢၢ်. တကးဒံးဘၣ်​ ပလိၣ်ဘၣ်​ မနုၤလဲၣ်​ ဒီးပလိၣ်ဘၣ်လၢအခါဖဲလဲၣ်န့ၣ်​ ယဟိဝၤယွၤသ့ၣ်ညါဝဲ ဒီးအကဟ့ၣ်ပှၤသပှၢ်တၢၢ်. အဃိ ပကဘၣ်​ ဆဲးဃ့ထုကဖၣ်​ ဒီးနာ်သပှၢ်တၢၢ်လၢ ယဟိဝၤယွၤ နၢ်ဟူပတၢ်ထုကဖၣ်. ဒီးခဲအံၤန့ၣ်​ ပကဘၣ်နာ်သပှၢ်တၢၢ်လၢ ယဟိဝၤယွၤ သးအိၣ်ပှၤ ဒီးခါဆူညါ လၢဟီၣ်ခိၣ်သီန့ၣ်​ အက “မၤလၢပှဲၤ တၢ်သးသမူခဲလၢာ် အတၢ်မိၣ်န့ၢ်သးလီတဖၣ်.”—စံးထီၣ်ပတြၢၤ ၁၄၅:၁၆.