တၢ်မၤလိ ၁၀
ပှၤလၢတၢ်အိၣ်ဖှိၣ်ပူၤတဖၣ် မၤစၢၤပှၤမၤလိလံာ်စီဆှံဖိ ဒ်သိးကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ်
“က့ၢ်ဂီၤတခါစုာ်စုာ် . . . ကမၤဒိၣ်ထီၣ် အနီၢ်ကစၢ်” လီၤ.—အ့းဖ့းစူး ၄:၁၆.
တၢ်သးဝံၣ် ၈၅ တူၢ်လိာ်မုာ် ပှၤဂၤလၢတၢ်သးခု
တၢ်မၤလိအံၤ အတၢ်တိာ်ပာ် *
၁-၂. ဒ်သိးပှၤမၤလိလံာ်စီဆှံဖိ ကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ် မတဂၤမၤစၢၤ အဝဲသ့ၣ်သ့လဲၣ်.
ဒီပုၢ်ဝဲၢ်မုၣ်အ့မံၤ လၢအအိၣ်လၢ ကီၢ်ဖံၣ်ကၠံၣ် န့ၣ်တဲဝဲလၢ “ယမၤလိလံာ်စီဆှံမုာ်ဒိၣ်မး, ယသ့ၣ်ညါလၢ အမ့ၢ် တၢ်မ့ၢ်တၢ်တီလီၤ. ဘၣ်ဆၣ် ဖဲယစးထီၣ်ရ့ဒီး ဒီပုၢ်ဝဲၢ်မုၣ်ခွါတဖၣ်မး ယစးထီၣ်ဆီတလဲယတၢ်အိၣ်မူ ဒီးယဒိးဘျၢထံလီၤ.” ဒီပုၢ်ဝဲၢ်မုၣ်အံၤ အတၢ်လဲၤခီဖျိန့ၣ် ဒုးသ့ၣ်ညါပှၤလၢ ဒ်သိးပှၤမၤလိလံာ်စီဆှံဖိတဂၤ ကလဲၤထီၣ်လဲၤထီ တုၤလၢတၢ်ဒိးဘျၢထံအဂီၢ် ကဘၣ်မၤလိလံာ်စီဆှံထီဘိ တကးဒံးဘၣ် ဒီပုၢ်ဝဲၢ်မုၣ်ခွါတဖၣ်လၢ တၢ်အိၣ်ဖှိၣ်အပူၤ ကဘၣ်မၤစၢၤအီၤလီၤ.
၂ ပှၤစံၣ်တဲၤတဲလီၤတၢ်ဖိ တဂၤစုာ်စုာ် မၤစၢၤပှၤဂၤလၢ ကကဲထီၣ်ဒီပုၢ်ဝဲၢ်အဂီၢ်သ့ဝဲလီၤ. (အ့းဖ့းစူး ၄:၁၆) ဒီပုၢ်ဝဲၢ်မုၣ်လၤလံနံၤ လၢအမ့ၢ်ပှၤလဲၤလၢညါလၢ အအိၣ်လၢ ကီၢ်ဘၣ်နူၤအတူၣ်န့ၣ် တဲဝဲလၢ “ဒ်သိးနကကွၢ်လုၢ်ဒိၣ်ထီၣ် ဖိသၣ်တဂၤအဂီၢ် သဝီဒီတဖျၢၣ် ကဘၣ်မၤသကိးတၢ်လီၤ. တၢ်ဒုးကဲထီၣ်ပှၤဂၤလၢ ခရံာ်အပျဲၢ်အဘီၣ်န့ၣ် ယဆိကမိၣ် ပကဘၣ်မၤသကိးတၢ်ဒ်န့ၣ်လီၤ. ဒ်သိးပှၤတဂၤကဒိးန့ၢ်ဘၣ် တၢ်မ့ၢ်တၢ်တီအဂီၢ် တၢ်အိၣ်ဖှိၣ်ဒီတဖျၢၣ် ကဘၣ်မၤသကိးတၢ်လီၤ. မိၢ်ပၢ်, အဘူးအတံၢ်, အတံၤသကိး ဒီးအကၠိသရၣ်တဖၣ်န့ၣ် ကဘၣ်မၤစၢၤဝဲ ဖိသၣ်တဂၤအံၤလၢ အကဒိၣ်တုၤခိၣ်ပှဲၤဝဲအဂီၢ်လီၤ. အဝဲသ့ၣ်မၤဝဲဒ်န့ၣ်သ့ ခီဖျိဟ့ၣ်ဂံၢ်ဟ့ၣ်ဘါ ဒီးသိၣ်လိဖိသၣ် တၢ်လၢအရ့ဒိၣ်တဖၣ်လီၤ. ဒ်န့ၣ်အသိး ပှၤစံၣ်တဲၤတဲလီၤတၢ်ဖိတဖၣ် ကဟ့ၣ်ကူၣ်ဟ့ၣ်ဖး, ဟ့ၣ်ဂံၢ်ဟ့ၣ်ဘါဒီး ပာ်လီၤဒိဂ့ၤတဲာ်ဘၣ်လၢ ပှၤမၤလိလံာ်စီဆှံဖိတဖၣ်အဂီၢ်လီၤ. အဝဲသ့ၣ်မ့ၢ်မၤဝဲဒ်န့ၣ်န့ၣ် ပှၤမၤလိလံာ်စီဆှံဖိ ကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ်လီၤ.—ကတိၤဒိ ၁၅:၂၂.
၃. ဒီပုၢ်ဝဲၢ် အဲနၤ, ဒိၤရံ ဒီး လၤလံနံၤ အတၢ်ကတိၤန့ၣ် နမၤလိန့ၢ်ဘၣ် တၢ်မနုၤလဲၣ်.
၃ ဘၣ်မနုၤအဃိ ပှၤစံၣ်တဲၤတဲလီၤတၢ်ဖိလၢ အဒိးန့ၢ်ဘၣ်ဝဲ ဒီပုၢ်ဝဲၢ်မုၣ်ခွါတဖၣ်အတၢ်မၤစၢၤန့ၣ် အပှၤမၤလိလံာ်စီဆှံဖိ လဲၤထီၣ်လဲၤထီဝဲလဲၣ်. ဒီပုၢ်ဝဲၢ်မုၣ်အဲနၤ လၢအမၤပှၤလဲၤလၢညါလီၤဆီ လၢတၢ်လီၢ်မိၤဒိဘၤန့ၣ် တဲဝဲလၢ “ဒ်သိးပှၤမၤလိလံာ်စီဆှံဖိတဂၤ ကလဲၤထီၣ်လဲၤထီလၢ နီၢ်သးအဂီၢ် ပှၤတဂၤကမၤလၢပှဲၤအမူဒါခဲလၢာ် တညီဝဲဘၣ်.” ဒီပုၢ်ဝဲၢ်ခွါဒိၤရံ လၢအမ့ၢ်စ့ၢ်ကီး ပှၤလဲၤလၢညါလီၤဆီလၢထံကီၢ်အံၤ တဲဝဲလၢ “ညီနုၢ် ပှၤစံၣ်တဲၤတဲလီၤတၢ်ဖိလၢအဂၤ အတၢ်ကတိၤန့ၣ် ဆီတလဲ ပှၤမၤလိလံာ်စီဆှံဖိ အသးသ့ဝဲလီၤ. မ့မ့ၢ်လၢယၤန့ၣ် ယကဘၣ်တဲဒ်အံၤန့ၣ် ယတဆိကမိၣ်ဘၣ်နီတဘျီဘၣ်.” ဒီပုၢ်ဝဲၢ်မုၣ်လၤလံနံၤ စ့ၢ်ကီးတဲဖျါထီၣ်ဝဲလၢ “ဖဲပှၤမၤလိလံာ်စီဆှံဖိ ဒိးန့ၢ်ဘၣ် တၢ်အဲၣ်ဒီးတၢ်ကဟုကယာ်လၢ ဒီပုၢ်ဝဲၢ်မုၣ်ခွါတဖၣ် ပာ်ဖျါထီၣ်ဝဲအခါ ပှၤမၤလိလံာ်စီဆှံဖိ သ့ၣ်ညါဝဲလၢ ပမ့ၢ်ယဟိဝၤယွၤ အခ့အပှၤလီၤ.”—ယိၤဟၣ် ၁၃:၃၅.
၄. လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.
၄ ဘၣ်သ့ၣ်သ့ၣ် နကဆိကမိၣ်ဘၣ်လၢ ‘အဝဲသ့ၣ်တမ့ၢ် ယပှၤမၤလိလံာ်စီဆှံဖိဒၢး, ယမၤစၢၤအဝဲသ့ၣ် လၢကလဲၤထီၣ်လဲၤထီကသ့ဒ်လဲၣ်.’ ပကတဲသကိး ဖဲပှၤကွဲမုာ်ပှၤလၢ ပကလဲၤမၤလိလံာ်စီဆှံဒီး ပှၤဂၤတဖၣ်အခါ ပမၤတၢ်မနုၤသ့လဲၣ်. ဒီးဖဲပှၤမၤလိလံာ်စီဆှံဖိ စးထီၣ်ဟဲထီၣ်တၢ်အိၣ်ဖှိၣ်အခါ ပမၤတၢ်မနုၤကသ့လဲၣ်. တကးဒံးဘၣ် ဒ်သိးပှၤမၤလိလံာ်စီဆှံဖိ ကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ် တၢ်အိၣ်ဖှိၣ်သးပှၢ်တဖၣ် မၤစၢၤဝဲကသ့ဒ်လဲၣ်.
ဖဲပှၤကွဲမုာ်နၤလၢ နကလဲၤမၤလိလံာ်စီဆှံဒီးပှၤဂၤအခါ
ဖဲနလဲၤပိာ် ပှၤမၤလိလံာ်စီဆှံဖိအခံအခါ ကတဲာ်ကတီၤပာ်တၢ်ဂ့ၢ်လၢ ပှၤကမၤလိသကိးအီၤတဖၣ်တက့ၢ် (ကွၢ်လံာ်အဆၢ ၅-၇)
၅. ဖဲပှၤကွဲမုာ်နၤလၢ နကလဲၤမၤလိ လံာ်စီဆှံဒီးပှၤဂၤအခါ နကြၢးမၤတၢ်မနုၤလဲၣ်.
၅ ဖဲတၢ်မၤလိလံာ်စီဆှံအခါ ပှၤလၢအသိၣ်လိတၢ်န့ၣ် အမူဒါအိၣ်လၢ ကဘၣ်မၤစၢၤ ပှၤမၤလိလံာ်စီဆှံဖိလၢ ကနၢ်ပၢၢ်ထီၣ် ကစၢ်ယွၤအကလုၢ်ကထါလီၤ. ဘၣ်ဆၣ် ပှၤသိၣ်လိတၢ်တဂၤ မ့ၢ်ဃ့နၤတၢ်မၤစၢၤလၢ နကလဲၤပိာ်အခံလၢ အတၢ်မၤလိလံာ်စီဆှံန့ၣ် နကြၢးမၤစၢၤအီၤလီၤ. (စံၣ်တဲၤတဲလီၤတၢ် ၄:၉, ၁၀) ဖဲအဝဲသိၣ်လိ အပှၤမၤလိလံာ်စီဆှံဖိအခါ နဆီၣ်ထွဲမၤစၢၤအီၤ ကသ့ဒ်လဲၣ်.
၆. နမ့ၢ်လဲၤပိာ် ပှၤသိၣ်လိတၢ်ဖိအခံန့ၣ် နမၤထွဲတၢ်ဟံးစုနဲၣ်ကျဲလၢ ကတိၤဒိ ၂၀:၁၈ အပူၤကသ့ဒ်လဲၣ်.
၆ ကတဲာ်ကတီၤပာ်စၢၤလၢ တၢ်မၤလိလံာ်စီဆှံအဂီၢ်တက့ၢ်. အဆိကတၢၢ် သံကွၢ်ပှၤလၢကလဲၤသိၣ်လိတၢ်တဂၤ ကတဲဘၣ်နၤဘၣ်ဃးဒီး အပှၤမၤလိလံာ်စီဆှံဖိအဂ့ၢ်တနီၤတက့ၢ်. (ဖး ကတိၤဒိ ၂၀:၁၈ တက့ၢ်.) နသံကွၢ်ဒ်အံၤသ့ “နပှၤမၤလိလံာ်စီဆှံဖိ အတၢ်အိၣ်သးအိၣ်ဒ်လဲၣ်. ဖဲပမၤလိလံာ်စီဆှံအဆၢကတီၢ် တၢ်လၢယကြၢးတဲဒီး ယတကြၢးတဲဘၣ်န့ၣ် မ့ၢ်မနုၤလဲၣ်. တၢ်လၢကမၤစၢၤပှၤမၤလိလံာ်စီဆှံဖိ ဒ်သိးကလဲၤထီၣ်လဲၤထီအဂီၢ်န့ၣ် မ့ၢ်မနုၤလဲၣ်.’ သ့ၣ်နီၣ်ထီၣ်က့ၤလၢ ပှၤသိၣ်လိတၢ်ဖိ တတဲဘၣ်နၤ ဘၣ်ဃးဒီး ပှၤမၤလိလံာ်စီဆှံဖိ အတၢ်ဂ့ၢ်ခူသူၣ်တဖၣ်ဘၣ်. ဘၣ်ဆၣ် အဝဲကတဲဘၣ်နၤ တၢ်ဂ့ၢ်တၢ်ကျိၤလၢ ကကဲထီၣ်တၢ်မၤစၢၤအဂီၢ်လီၤ. မံးၡ့ၣ်နရ့ၣ်တဂၤ လၢအမံၤမ့ၢ်ကၠဝဲ န့ၣ်တဲဘၣ်ပှၤလၢ ကလဲၤပိာ်အခံလၢ အတၢ်မၤလိလံာ်စီဆှံဒီးအီၤ ဘၣ်ဃးဒီး တၢ်ဂ့ၢ်တဖၣ်အံၤလီၤ. အဝဲတဲဝဲလၢ “တၢ်ဂ့ၢ်တၢ်ကျိၤလၢယတဲဘၣ် ပှၤလၢကလဲၤပိာ်ယခံန့ၣ် ကဲထီၣ်တၢ်မၤစၢၤလၢ အကသးအိၣ်ဝဲ ပှၤမၤလိလံာ်စီဆှံဖိ ဒီးသ့ၣ်ညါထီၣ်ဝဲလၢ အကဘၣ်မၤစၢၤပှၤမၤလိလံာ်စီဆှံဖိဒ်လဲၣ်န့ၣ်လီၤ.”
၇. နမ့ၢ်လဲၤပိာ်ဘၣ် ပှၤသိၣ်လိတၢ်ဖိအခံန့ၣ် ဘၣ်မနုၤအဃိ နကဘၣ်ကတဲာ်ကတီၤဃာ် တၢ်ဂ့ၢ်တၢ်ကျိၤဂ့ၤဂ့ၤလဲၣ်.
၇ ဖဲပှၤကွဲမုာ်နၤလၢ နကလဲၤမၤလိလံာ်စီဆှံဒီးပှၤဂၤအခါ နမ့ၢ်ကတဲာ်ကတီၤဃာ် တၢ်ဂ့ၢ်တၢ်ကျိၤလၢ ပှၤကတဲသကိးအီၤန့ၣ် ကကဲဘျုးဝဲလီၤ. (ဧ့စြၤ ၇:၁၀) ဒီပုၢ်ဝဲၢ်ခွါဒိၤရံ တဲဝဲလၢ “ဖဲပှၤလၢအလဲၤပိာ်ယခံတဂၤ ကတဲာ်ကတီၤဃာ် တၢ်မၤလိဂ့ၤဂ့ၤအခါ ယပာ်လုၢ်ပာ်ပှ့ၤအီၤဒိၣ်မး. တၢ်လၢအကတဲာ်ကတီၤဝဲတဖၣ်န့ၣ် ကဲဘျုးဝဲလၢ ပတၢ်မၤလိအဂီၢ်လီၤ.” တကးဒံးဘၣ် ပှၤမၤလိလံာ်စီဆှံဖိန့ၣ် ကပလီၢ်ဘၣ်အသးလၢ ပဝဲခံဂၤလၢာ် ပကတဲာ်ကတီၤဃာ် တၢ်ဂ့ၢ်တၢ်ကျိၤဂ့ၤဂ့ၤဒီး ကဲထီၣ်တၢ်ဒိဂ့ၤတဲာ်ဘၣ် လၢအဂီၢ်လီၤ. နတၢ်ဆၢကတီၢ်မ့ၢ်တအိၣ်လၢ နကကတဲာ်ကတီၤဃာ် တၢ်မၤလိဂ့ၤဂ့ၤဘၣ်န့ၣ် ကွၢ်န့ၢ်တၢ်ဂ့ၢ်လၢ အရ့ဒိၣ်တနီၤလၢ ကမၤစၢၤ ပှၤမၤလိလံာ်စီဆှံဖိအဂီၢ်တက့ၢ်.
၈. ဖဲပဃ့ဘါထုကဖၣ်လၢ တၢ်မၤလိလံာ်စီဆှံအဂီၢ်အခါ ဒ်သိးပတၢ်ဃ့ထုကဖၣ် ကအိၣ်ဒီးအခီပညီအဂီၢ် ပကဘၣ်မၤဒ်လဲၣ်.
၈ တၢ်ဃ့ဘါဃုကဖၣ်န့ၣ် အရ့ဒိၣ်ဒိၣ်မးလၢ တၢ်မၤလိလံာ်စီဆှံအဂီၢ်လီၤ. အဃိ ဆိကမိၣ်ပာ်စၢၤ တၢ်လၢနကဃ့အီၤတဖၣ်တက့ၢ်. နမ့ၢ်မၤဒ်န့ၣ်န့ၣ် ဖဲပှၤမ့ၢ်မၢ နဃ့ဘါထုကဖၣ်တၢ်အခါ နဃ့အီၤသ့ ဒီးနတၢ်ထုကဖၣ်န့ၣ် ကအိၣ်ဒီးအခီပညီလီၤ. (စံးထီၣ်ပတြၢၤ ၁၄၁:၂) ဒီပုၢ်ဝဲၢ်မုၣ်ဟဲနၣ် လၢအအိၣ်လၢ ကီၢ်ယၤပၣ်န့ၣ် အနီၣ်ဘၣ်ဝဲ ပှၤလၢအဟဲပိာ် ပှၤလၢအသိၣ်လိအီၤလံာ်စီဆှံတဂၤန့ၣ် အတၢ်ဃ့ဘါထုကဖၣ်လီၤ. အဝဲတဲဝဲလၢ “ခီဖျိလၢ အတၢ်ဃ့ဘါထုကဖၣ်အဃိ ယသ့ၣ်ညါလၢ အဝဲအိၣ်ဒီး တၢ်ရ့လိာ်သးဒီးယဟိဝၤယွၤ ဘူးဘူးတံၢ်တံၢ် ဒီးယၤစ့ၢ်ကီး ယအဲၣ်ဒိးကဲထီၣ်ဒ်သိးဒီးအီၤလီၤ. ဖဲအဝဲဃ့ထုကဖၣ်အခါ အဝဲယၢၤထီၣ်ဃုာ်ဒီးယမံၤအဃိ ယတူၢ်ဘၣ်လၢအအဲၣ်ယၤလီၤ.”
၉. ဒ် ယၤကိာ် ၁:၁၉ ပာ်ဖျါထီၣ်ဝဲအသိး နမၤစၢၤပှၤလၢအသိၣ်လိ လံာ်စီဆှံတဂၤကသ့ဒ်လဲၣ်.
၉ ဆီၣ်ထွဲမၤစၢၤ ပှၤသိၣ်လိတၢ်ဖိ ဖဲအသိၣ်လိလံာ်စီဆှံအခါန့ၣ်တက့ၢ်. ဒီပုၢ်ဝဲၢ်မုၣ်အိမၤမူယိၤဘံ လၢအမၤပှၤလဲၤလၢညါလီၤဆီလၢ နဲးကၠံရံယါန့ၣ် တဲဝဲလၢ “ပှၤမၤသကိးတၢ်ဖိလၢအဂ့ၤန့ၣ် အဝဲကဟ့ၣ်ထီၣ်အတၢ်ထံၣ်လၢ အကဲဘျုးတဖၣ် ဘၣ်ဆၣ် အဝဲတတဲတၢ်အါအါဘၣ်. မ့ၢ်လၢအဝဲသ့ၣ်ညါဝဲလၢ မူဒါအံၤ မ့ၢ်ဝဲပှၤလၢအသိၣ်လိ လံာ်စီဆှံတဂၤကဘၣ်မၤဝဲလီၤ.” နမ့ၢ်မၤဒ်န့ၣ်န့ၣ် ဖဲတၢ်မၤလိလံာ်စီဆှံအခါ နကသ့ၣ်ညါထီၣ်လၢ နကဘၣ်တဲတၢ်လၢအခါဖဲလဲၣ် ဒီးနကဘၣ်တဲတၢ်ဂ့ၢ်မနုၤလဲၣ်န့ၣ်လီၤ. (ကတိၤဒိ ၂၅:၁၁) ဖဲပှၤသိၣ်လိတၢ်ဒီး အပှၤမၤလိလံာ်စီဆှံဖိ တဲသကိးတၢ်အခါန့ၣ် ဒိကနၣ်အီၤလီၤတံၢ်လီၤဆဲးတက့ၢ်. (ဖး ယၤကိာ် ၁:၁၉ တက့ၢ်.) နမ့ၢ်မၤဒ်န့ၣ်န့ၣ် နကအိၣ်ကတဲာ်ကတီၤနသးလၢ နကမၤစၢၤအဝဲသ့ၣ်လီၤ. ထဲန့ၣ်မး နကသ့ၣ်ညါလၢ နကဘၣ်မၤတၢ်မနုၤလဲၣ်. အဒိ, နတတဲတၢ်အါတလၢ တုၤဒၣ်လဲာ် ပှၤသိၣ်လိတၢ်တဂၤ အသးကဒံဝ့ၤဒံဝီၤဘၣ် မ့တမ့ၢ် နတစးထီၣ်တဲ တၢ်ဂ့ၢ်မိၢ်ပှၢ်လၢ အဂၤတခါဘၣ်. ဘၣ်ဆၣ် နကဟ့ၣ်ထီၣ်တၢ်ထံၣ်ဖုၣ်ကိာ်ဖိ, တၢ်အဒိတနီၤ, တၢ်သံကွၢ်တနီၤလၢ ကကဲထီၣ်တၢ်မၤစၢၤလၢ ပှၤသိၣ်လိတၢ်ဖိ ကၡဲပၠးတၢ် ကတုၤထီၣ်ထီၣ်ဘးအဂီၢ်လီၤ. တဘျီတခီၣ် နကဆိကမိၣ်လၢ နတမၤစၢၤဘၣ်တၢ်အါအါဘၣ်. သနာ်က့ နမ့ၢ်ပတြၢၤ ပှၤမၤလိလံာ်စီဆှံဖိ ဒီးပာ်ဖျါထီၣ်လၢ နသူၣ်အိၣ်သးအိၣ်အဝဲသ့ၣ်န့ၣ် နကမၤစၢၤဘၣ် အဝဲသ့ၣ်လၢ ကလဲၤထီၣ်လဲၤထီအဂီၢ်လီၤ.
၁၀. နတၢ်လဲၤခီဖျိန့ၣ် ဘၣ်သ့ၣ်သ့ၣ် ကကဲထီၣ်တၢ်မၤစၢၤလၢ ပှၤမၤလိလံာ်စီဆှံဖိအဂီၢ်ဒ်လဲၣ်.
၁၀ တဲပၠးအဝဲသ့ၣ် နတၢ်လဲၤခီဖျိတက့ၢ်. နမ့ၢ်ဆိကမိၣ်လၢ အမ့ၢ်ကဲထီၣ်တၢ်မၤစၢၤလၢ ပှၤမၤလိလံာ်စီဆှံဖိအဂီၢ်န့ၣ် တဲပၠးအဝဲသ့ၣ်လၢ နမၤလိန့ၢ် တၢ်မ့ၢ်တၢ်တီဒ်လဲၣ်, နလဲၤခီဖျိ တၢ်ကီတၢ်ခဲတဖၣ်ဒ်လဲၣ် ဒီးနထံၣ်ဘၣ် ယဟိဝၤယွၤ အတၢ်မၤစၢၤလၢ နတၢ်အိၣ်မူအပူၤဒ်လဲၣ်န့ၣ်တက့ၢ်. (စံးထီၣ်ပတြၢၤ ၇၈:၄, ၇) နတၢ်လဲၤခီဖျိန့ၣ် ကကဲဘျုးလၢ အဝဲသ့ၣ်အဂီၢ်လီၤ. ဘၣ်သ့ၣ်သ့ၣ် ကမၤဆူၣ်ထီၣ်အဝဲသ့ၣ် အတၢ်နာ် မ့တမ့ၢ် ကဟ့ၣ်ဂံၢ်ဟ့ၣ်ဘါအဝဲသ့ၣ်လၢ ကဆဲးလဲၤထီၣ်လဲၤထီတုၤလၢ တၢ်ဒိးဘျၢထံအဂီၢ်လီၤ. တကးဒံးဘၣ် ကမၤစၢၤအဝဲသ့ၣ်လၢ ကဘၣ်လဲၤခီဖျိတၢ်ကီတၢ်ခဲလၢ အဝဲသ့ၣ်ထံၣ်ဘၣ်ဝဲတဖၣ် ဒ်လဲၣ်န့ၣ်လီၤ. (၁ ပ့းတရူး ၅:၉) ဒီပုၢ်ဝဲၢ်ခွါကၤဘြံအ့(လ်) မ့ၢ်ပှၤလဲၤလၢညါ လၢအအိၣ်လၢ ဘြၣ်စ့(လ်) န့ၣ်အနီၣ်ဘၣ်က့ၤဝဲ တၢ်လၢအမၤစၢၤအီၤ ဖဲအမၤလိလံာ်စီဆှံအခါန့ၣ်လီၤ. အဝဲတဲဝဲလၢ “ဖဲယနၢ်ဟူဘၣ် ဒီပုၢ်ဝဲၢ်မုၣ်ခွါတဖၣ် အတၢ်လဲၤခီဖျိအခါ ယထံၣ်ဘၣ်လၢ ယဟိဝၤယွၤ မၤစၢၤအဝဲသ့ၣ်လၢ ကလဲၤခီဖျိ တၢ်ကီတၢ်ခဲလီၤ. အဝဲသ့ၣ် လဲၤခီဖျိ တၢ်ကီတၢ်ခဲ မ့ၢ်န့ၢ်န့ၣ် ယၤစ့ၢ်ကီး ယလဲၤခီဖျိအီၤကန့ၢ်လီၤ.”
ဖဲပှၤမၤလိလံာ်စီဆှံဖိ ဟဲထီၣ်တၢ်အိၣ်ဖှိၣ်အခါ
ပဝဲခဲလၢာ် ပဟ့ၣ်ဂံၢ်ဟ့ၣ်ဘါ ပှၤမၤလိလံာ်စီဆှံဖိ လၢကဟဲထီၣ် တၢ်အိၣ်ဖှိၣ်ထီဘိသ့ဝဲလီၤ (ကွၢ်လံာ်အဆၢ ၁၁)
၁၁-၁၂. ဘၣ်မနုၤအဃိ ပကဘၣ်တူၢ်လိာ်မုာ် ပှၤမၤလိလံာ်စီဆှံဖိဂ့ၤဂ့ၤလၢ အဟဲထီၣ်တၢ်အိၣ်ဖှိၣ်လဲၣ်.
၁၁ ဒ်သိးပှၤမၤလိလံာ်စီဆှံဖိတဂၤ ကလဲၤထီၣ်လဲၤထီတုၤလၢ တၢ်ဒိးဘျၢထံအဂီၢ် အဝဲကဘၣ်ဟဲထီၣ် တၢ်အိၣ်ဖှိၣ်ထီဘိ ဒီးအမ့ၢ်ဟဲထီၣ်တၢ်အိၣ်ဖှိၣ်န့ၣ် ကဒိးန့ၢ်ဘၣ်ဝဲ အဘျုးအဖှိၣ်လီၤ. (ဧ့ၤဘြံၤ ၁၀:၂၄, ၂၅) ပှၤလၢအသိၣ်လိအီၤ လံာ်စီဆှံတဂၤန့ၣ် ကကွဲမုာ်အီၤလၢ ကဟဲထီၣ်တၢ်အိၣ်ဖှိၣ် အဆိကတၢၢ်တဘျီလီၤ. ဖဲအဝဲဟဲထီၣ်တၢ်အိၣ်ဖှိၣ်အခါ ပဝဲခဲလၢာ် ပကဘၣ်ဟ့ၣ်ဂံၢ်ဟ့ၣ်ဘါအီၤ ဒ်သိးအဝဲကဆဲးဟဲထီၣ် တၢ်အိၣ်ဖှိၣ်အဂီၢ်လီၤ. ပမၤဒ်န့ၣ် ကသ့ဒ်လဲၣ်.
၁၂ တူၢ်လိာ်မုာ် ပှၤမၤလိလံာ်စီဆှံဖိ ဂ့ၤဂ့ၤတက့ၢ်. (ရိမ့ၤ ၁၅:၇) ပှၤမၤလိလံာ်စီဆှံဖိတဂၤ မ့ၢ်ထံၣ်ဝဲပှၤတူၢ်လိာ်မုာ်အီၤဂ့ၤဂ့ၤ ဖဲအဟဲထီၣ်တၢ်အိၣ်ဖှိၣ်အခါန့ၣ် အဝဲကသးအိၣ်ဟဲထီၣ် တၢ်အိၣ်ဖှိၣ်ထီဘိလီၤ. ပတူၢ်လိာ်မုာ်အီၤ ခီဖျိပဆၢဂ့ၤဆၢဝါအီၤ ဒီးပဒုးသ့ၣ်ညါအီၤ ဒီးပှၤအဂၤတဖၣ်လီၤ. ပတဘၣ်ဆိကမိၣ်လၢ ပှၤကွၢ်ထွဲအီၤအိၣ်လံန့ၣ်တဂ့ၤ. ပှၤလၢအသိၣ်လိအီၤ လံာ်စီဆှံတဂၤ ဘၣ်သ့ၣ်သ့ၣ် ကဟဲစဲၤခံ မ့တမ့ၢ် အတၢ်ဖံးတၢ်မၤအါ လၢအဂၤတဖၣ်ကအိၣ်ဝဲလီၤ. အဃိ နကဘၣ်ဒိကနၣ်န့ၢ် တၢ်လၢပှၤမၤလိလံာ်စီဆှံဖိတဂၤတဲဝဲ ဒီးပာ်ဖျါထီၣ်လၢ နသးအိၣ်အီၤန့ၣ်လီၤ. နမ့ၢ်တူၢ်လိာ်အီၤဂ့ၤဂ့ၤန့ၣ် ကကဲဘျုးလၢအဂီၢ်လီၤ. ခဲအံၤပကကွၢ်သကိး ဒီပုၢ်ဝဲၢ်ခွါဒၤမ့ထြံၤ အတၢ်လဲၤခီဖျိလီၤ. အဝဲဒိးဘျၢထံဝံၤ န့ၢ်စှၤကိးနံၣ်ဒံးလီၤ. ဒီးခဲအံၤအကဲထီၣ်ဝဲ တၢ်အိၣ်ဖှိၣ်အပှၤမၤစၢၤတၢ်တဂၤလံ. အဝဲတဲဝဲလၢ “ဖဲယလဲၤထီၣ်တၢ်အိၣ်ဖှိၣ် အဆိကတၢၢ်တဘျီအခါ ဒီပုၢ်ဝဲၢ်ခွါတဂၤထံၣ်ဝဲလၢ ယဆၢထၢၣ်အိၣ်ခိးတၢ်လၢ ဘီမုၢ်ဘျီၣ်ဒိၣ်အချၢ ဒီးဖျါလၢယသးကနိးလီၤ. ဒီပုၢ်ဝဲၢ်ခွါတဂၤအံၤ ကွဲနုာ်လီၤယၤလၢ တၢ်အိၣ်ဖှိၣ်အပူၤလီၤ. ဝံၤဒီး ပှၤအဂၤတဖၣ်စ့ၢ်ကီး ဟဲဆၢဂ့ၤဆၢဝါယၤလီၤ. ယထံၣ်ဘၣ်တၢ်ဒ်အံၤန့ၣ် ယသးမုာ်ဒိၣ်မး ဒီးယမုၢ်လၢ်လၢ တၢ်အိၣ်ဖှိၣ်ကအိၣ်ကိးနံၤဒဲးလီၤ. တၢ်မၤအသးဒ်အံၤန့ၣ် ယတထံၣ်ဘၣ်လၢ ယတၢ်အိၣ်မူအပူၤ နီတဘျီဘၣ်.”
၁၃. နတၢ်ဒိဂ့ၤတဲာ်ဘၣ်န့ၣ် မၤစၢၤပှၤမၤလိလံာ်စီဆှံဖိသ့ဒ်လဲၣ်.
၁၃ ပာ်လီၤဒိဂ့ၤတဲာ်ဘၣ်တက့ၢ်. ပတၢ်ဒိဂ့ၤတဲာ်ဘၣ်န့ၣ် မၤစၢၤပှၤမၤလိ လံာ်စီဆှံဖိလၢ ကနာ်ဝဲလၢ အဝဲသ့ၣ်ထံၣ်န့ၢ် တၢ်မ့ၢ်တၢ်တီလံန့ၣ်လီၤ. (မးသဲ ၅:၁၆) ခဲအံၤ ဒီပုၢ်ဝဲၢ်ခွါဘံၤထၤလံၤ လၢအမၤပှၤလဲၤလၢညါလၢ တၢ်လီၢ်မိၤဒိဘၤန့ၣ် တဲဝဲလၢ “ယသ့ၣ်ညါထီၣ်ဘၣ်လၢ ပှၤလၢတၢ်အိၣ်ဖှိၣ်အပူၤတဖၣ်န့ၣ် အဝဲသ့ၣ်အိၣ်မူဒ်လဲၣ်, အတၢ်ထံၣ်အိၣ်ဒ်လဲၣ် ဒီးအတၢ်အိၣ်ထီၣ်အိၣ်လီၤဒ်လဲၣ်န့ၣ်လီၤ. ဖဲယထံၣ်ဘၣ်ဒ်အံၤအခါ ယသ့ၣ်ညါလၢ ယဟိဝၤပှၤအုၣ်အသးတဖၣ်န့ၣ် မ့ၢ်ဝဲပှၤလၢအလဲၤတၢ်ဒီးကစၢ်ယွၤလီၤ.”
၁၄. နတၢ်ဒိဂ့ၤတဲာ်ဘၣ်န့ၣ် မၤစၢၤပှၤဂၤလၢ ကဒိၣ်ထီၣ်ထီထီၣ်လၢ နီၢ်သးတခီဒ်လဲၣ်.
၁၄ ဒ်သိး ပှၤမၤလိလံာ်စီဆှံဖိတဂၤ ကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ် ကဘၣ်အိၣ်မူမၤထွဲဝဲ တၢ်လၢအမၤလိဘၣ်ဝဲတဖၣ်လီၤ. အဝဲကမၤဝဲဒ်န့ၣ်အဂီၢ် တညီထီဘိဘၣ်. ဘၣ်ဆၣ် ဖဲပှၤမၤလိလံာ်စီဆှံဖိ ထံၣ်ဝဲလၢ ပအိၣ်မူမၤထွဲ လံာ်စီဆှံအတၢ်ဟံးစုနဲၣ်ကျဲန့ၣ် ကဲဘျုးလၢပဂီၢ်အခါ အဝဲကအဲၣ်ဒိး အိၣ်မူမၤထွဲဝဲစ့ၢ်ကီးလီၤ. (၁ ကရံၣ်သူး ၁၁:၁) ဆိကမိၣ်ကွၢ် ဒီပုၢ်ဝဲၢ်မုၣ်ဟဲနၣ် အတၢ်လဲၤခီဖျိတက့ၢ်. အဝဲတဲဝဲလၢ “ယထံၣ်ဘၣ်လၢ ဒီပုၢ်ဝဲၢ်မုၣ်ခွါတဖၣ် အိၣ်မူမၤထွဲဝဲ တၢ်လၢယမၤလိဘၣ်တဖၣ်လီၤ. ဒီးယသ့ၣ်ညါထီၣ်လၢ ယကဘၣ်ဟ့ၣ်ဂံၢ်ဟ့ၣ်ဘါပှၤဂၤ, ယကဘၣ်ပျၢ်ကွံာ်ပှၤဂၤအတၢ်ကမၣ် ဒီးယကဘၣ်ပာ်ဖျါထီၣ် တၢ်အဲၣ်ဒ်လဲၣ်န့ၣ်လီၤ. အဝဲသ့ၣ်တဲတၢ် လၢအကဲဘျုးကဲဖှိၣ် လၢပှၤဂၤအဂီၢ်ထီဘိအဃိ ယအဲၣ်ဒိးကွၢ်လိမၤဒိးအဝဲသ့ၣ်လီၤ.”
၁၅. ကတိၤဒိ ၂၇:၁၇ န့ၣ်မၤစၢၤပှၤလၢ ပကရ့ဒီးပှၤမၤလိလံာ်စီဆှံဖိလၢ အဟဲထီၣ်တၢ်အိၣ်ဖှိၣ် ထီဘိတဖၣ်ဒ်လဲၣ်.
၁၅ ရ့ဒီးပှၤမၤလိလံာ်စီဆှံဖိတက့ၢ်. ဖဲပှၤမၤလိလံာ်စီဆှံဖိ စးထီၣ်ဟဲထီၣ် တၢ်အိၣ်ဖှိၣ်အခါ ပာ်ဖျါထီၣ်လၢ နသးအိၣ်အီၤတက့ၢ်. (ဖံလံးပံၤ ၂:၄) ပကဘၣ်ဃုသ့ၣ်ညါအါထီၣ် အဝဲသ့ၣ်အဂ့ၢ်လီၤ. နပတြၢၤအီၤလၢ အဆီတလဲအတၢ်အိၣ်မူအဃိ နသးခုဒိၣ်မးလီၤ. နသံကွၢ်အီၤလၢ အတၢ်မၤလိလံာ်စီဆှံ မၤအသးဒ်လဲၣ်, အဟံၣ်ဖိဃီဖိ ဒီးအတၢ်ဖံးတၢ်မၤ မၤအသးဒ်လဲၣ်သ့ဝဲလီၤ. ဘၣ်ဆၣ် နတဘၣ်သံကွၢ်အီၤ တၢ်လၢအကကဲထီၣ် တၢ်မဲာ်ဆှးလၢအဂီၢ်တဂ့ၤ. ပမ့ၢ်မၤဒ်အံၤန့ၣ် ပတၢ်ရ့လိာ်သးဒီးအီၤ ကဂ့ၤဒိၣ်ထီၣ်ဝဲလီၤ. ဖဲနကဲထီၣ် ပှၤမၤလိလံာ်စီဆှံဖိ အတံၤသကိးအခါ နမၤစၢၤအီၤလၢ ကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ်လီၤ. (ဖး ကတိၤဒိ ၂၇:၁၇ တက့ၢ်.) ခဲအံၤ ဒီပုၢ်ဝဲၢ်မုၣ်ဟဲနၣ် မၤဝဲပှၤလဲၤလၢညါလံ. ဖဲအဝဲဟဲထီၣ် တၢ်အိၣ်ဖှိၣ် အဆိကတၢၢ်တဘျီအခါ အဝဲတဲဝဲလၢ “ဖဲယရ့ဒီးဒီပုၢ်ဝဲၢ်မုၣ်ခွါတဖၣ်လၢ တၢ်အိၣ်ဖှိၣ်ပူၤအခါ ယအဲၣ်ဒိးဟဲထီၣ်တၢ်အိၣ်ဖှိၣ်လီၤ. ယလီၤဘှံးလီၤတီၤ သနာ်က့ ယဟဲထီၣ်တၢ်အိၣ်ဖှိၣ် ခီဖျိလၢ ယရ့ဒီးယတံၤသကိးအသီတဖၣ်အံၤ မုာ်မးအဃိလီၤ. အဝဲသ့ၣ်မၤစၢၤယၤ ဒ်သိးယကပတုာ်ရ့ဒီး ယတံၤသကိးလၢတၢ်ချၢတဖၣ်အဂီၢ်လီၤ. ယအဲၣ်ဒိးသုးဘူးယသးလၢ ယဟိဝၤယွၤ ဒီးဒီပုၢ်ဝဲၢ်မုၣ်ခွါတဖၣ်အအိၣ်လီၤ. အဃိ ယပာ်လီၤသးလၢ ယကဒိးဘျၢထံလီၤ.
၁၆. ဒ်သိးပှၤမၤလိလံာ်စီဆှံဖိ ကတူၢ်ဘၣ်ဝဲလၢ အဝဲသ့ၣ်မ့ၢ်ပှၤလုၢ်ဒိၣ်ပှ့ၤဒိၣ်လၢ တၢ်အိၣ်ဖှိၣ်ပူၤအဂီၢ် ပမၤစၢၤအဝဲသ့ၣ်ကသ့ဒ်လဲၣ်.
၁၆ ဖဲပှၤမၤလိလံာ်စီဆှံဖိ ဆဲးလဲၤထီၣ်လဲၤထီ ဒီးဆီတလဲအတၢ်အိၣ်မူအခါ အဝဲကတူၢ်ဘၣ်ဝဲလၢ အမ့ၢ်ပှၤလုၢ်ဒိၣ်ပှ့ၤဒိၣ်လၢ တၢ်အိၣ်ဖှိၣ်အပူၤလီၤ. နမၤစၢၤအဝဲသ့ၣ်ဒ်အံၤသ့ ခီဖျိလၢနတူၢ်လိာ်ခီၣ်ဆၢ အဝဲသ့ၣ်န့ၣ်လီၤ. (ဧ့ၤဘြံၤ ၁၃:၂) ဒီပုၢ်ဝဲၢ်ခွါဒဲနံး လၢအမၤကစၢ်ယွၤအတၢ်မၤ လၢတၢ်လီၢ်မိၤဒိဘၤန့ၣ် အဝဲနီၣ်ဘၣ်က့ၤဝဲ ဖဲအဝဲမၤလိလံာ်စီဆှံအခါ အတဲဝဲလၢ “အါဘျီန့ၣ် ယၤဒီးယမါပှၤကွဲမုာ်ပှၤလၢ ပကလဲၤရ့လိာ်ပသးဒီး ဒီပုၢ်ဝဲၢ်မုၣ်ခွါတဖၣ်လီၤ. ဒီးပနၢ်ဟူဘၣ်လၢ ယဟိဝၤယွၤ မၤစၢၤအဝဲသ့ၣ်ဒ်လဲၣ်န့ၣ် ကဲထီၣ်တၢ်ဂံၢ်တၢ်ဘါလၢ ပဂီၢ်ဒိၣ်မးလီၤ. တၢ်အိၣ်သးဒ်အံၤန့ၣ် မၤစၢၤပှၤသပှၢ်ကတၢၢ်လၢ ပအဲၣ်ဒိးမၤယဟိဝၤယွၤအတၢ်မၤ ဒီးပအိၣ်ခိးကွၢ်လၢ် ပတၢ်အိၣ်မူလၢခါဆူညါလီၤ.” ဖဲပှၤမၤလိလံာ်စီဆှံဖိ တုၤထီၣ်ထီၣ်ဘးလၢ ကကဲထီၣ်ပှၤစံၣ်တဲၤတဲလီၤတၢ်ဖိအခါ နကွဲမုာ်အီၤလၢ ကလဲၤစံၣ်တဲၤတဲလီၤတၢ်ဒီးနၤန့ၣ် သ့ဝဲလီၤ. ဒီပုၢ်ဝဲၢ်ခွါဒံအဲကိၤ လၢအမ့ၢ်ပှၤစံၣ်တဲၤတဲလီၤတၢ်ဖိ လၢအအိၣ်လၢ ဘြၣ်စ့(လ်) န့ၣ်တဲဝဲလၢ “ဒီပုၢ်ဝဲၢ်မုၣ်ခွါအါဂၤ ကွဲမုာ်ယၤလၢ ယကလဲၤစံၣ်တဲၤတဲလီၤတၢ်ဒီး အဝဲသ့ၣ်လီၤ. ခီဖျိလၢ အဝဲသ့ၣ်မၤဝဲဒ်အံၤအဃိ ယသ့ၣ်ညါထီၣ်အဝဲသ့ၣ်ဂ့ၤဂ့ၤလီၤ. ယမၤလိန့ၢ်ဘၣ်တၢ်လၢ အဝဲသ့ၣ်အအိၣ်အါမး ဒီးယတၢ်ရ့လိာ်သးဒီး ယဟိဝၤယွၤဒီးယ့ၣ်ၡူးန့ၣ် ဟဲဘူးဒိၣ်ထီၣ်ဝဲလီၤ.”
တၢ်အိၣ်ဖှိၣ်သးပှၢ်တဖၣ် မၤစၢၤတၢ်ကသ့ဒ်လဲၣ်
တၢ်အိၣ်ဖှိၣ်သးပှၢ်တဖၣ် အတၢ်သူၣ်အိၣ်သးအိၣ် ပှၤမၤလိလံာ်စီဆှံဖိန့ၣ် ကဲထီၣ်တၢ်မၤစၢၤလၢ အဝဲသ့ၣ်ကလဲၤထီၣ်လဲၤထီအဂီၢ်လီၤ (ကွၢ်လံာ်အဆၢ ၁၇)
၁၇. တၢ်အိၣ်ဖှိၣ်သးပှၢ်တဖၣ် မၤစၢၤပှၤမၤလိလံာ်စီဆှံဖိ ကသ့ဒ်လဲၣ်.
၁၇ ဟ့ၣ်နတၢ်ဆၢကတီၢ်ဒီး ပှၤမၤလိလံာ်စီဆှံဖိတဖၣ်တက့ၢ်. တၢ်အိၣ်ဖှိၣ်သးပှၢ်တဖၣ် ဖဲနပာ်ဖျါထီၣ်တၢ်အဲၣ် ဒီးတၢ်သးအိၣ်ပှၤမၤလိလံာ်စီဆှံဖိအခါ မ့ၢ်ဒၣ်နမၤစၢၤအဝဲသ့ၣ်လၢ ကတုၤထီၣ်ထီၣ်ဘးလၢ ကဒိးဘျၢထံအဂီၢ်လီၤ. ဖဲအဝဲသ့ၣ်ဟဲထီၣ်တၢ်အိၣ်ဖှိၣ်အခါ နတဲသကိးတၢ်ဒီးအဝဲသ့ၣ်ထီဘိကသ့ဧါ. လီၤဆီဒၣ်တၢ် ဖဲအဝဲသ့ၣ်ဟ့ၣ်ထီၣ်တၢ်စံးဆၢတၢ်အခါ နတိၢ်နီၣ်အဝဲသ့ၣ်အမံၤမ့ၢ်ဘၣ်န့ၣ် အဝဲသ့ၣ်ကတူၢ်ဘၣ်ဝဲလၢ နသူၣ်အိၣ်သးအိၣ်အီၤလီၤ. မ့ၢ်နမၤချုးနသး ဒ်သိးနကလဲၤပိာ် ပှၤစံၣ်တဲၤတဲလီၤတၢ်ဖိအခံ ဖဲအဝဲလဲၤသိၣ်လိပှၤဂၤလိလံာ်စီဆှံအခါန့ၣ် ကသ့ဧါ. ဘၣ်သ့ၣ်သ့ၣ် နကမၤစၢၤဘၣ် ပှၤမၤလိလံာ်စီဆှံဖိတဂၤန့ၣ် အါန့ၢ်ဒံးနဆိမိၣ်ပာ်စၢၤအီၤလီၤ. ဒီပုၢ်ဝဲၢ်မုၣ်ကၠဲးကံၣ် လၢအမ့ၢ်ပှၤလဲၤလၢညါ လၢအအိၣ်လၢ နဲးကၠံရံယါန့ၣ် တဲဝဲလၢ “ဖဲပှၤမၤလိလံာ်စီဆှံဖိတဖၣ် သ့ၣ်ညါဝဲလၢ ပှၤလၢအဟဲပိာ်ယခံတဖၣ် မ့ၢ်ဝဲတၢ်အိၣ်ဖှိၣ်သးပှၢ်အခါ အဝဲသ့ၣ်ကမၢကမၣ်ဒိၣ်မးလီၤ. ပှၤမၤလိလံာ်စီဆှံဖိတဂၤ တဲဘၣ်ယၤလၢ ‘ယတၢ်အိၣ်ဖှိၣ်သရၣ်န့ၣ် တမၤဝဲဒ်အံၤနီတဘျီဘၣ်. အဝဲသ့ၣ် လဲၤအိၣ်သကိးထဲပှၤလၢအကဲဒိၣ် ဒီးပှၤလၢအဟ့ၣ်အီၤစ့န့ၢ်တဖၣ်လီၤ.’” ပှၤမၤလိလံာ်စီဆှံဖိတဂၤအံၤ ခဲအံၤန့ၣ် အဝဲဟဲထီၣ်ဝဲ တၢ်အိၣ်ဖှိၣ်လံန့ၣ်လီၤ.
၁၈. တၢ်အိၣ်ဖှိၣ်သးပှၢ်တဖၣ် ကမၤလၢပှဲၤအမူဒါလၢ အဒိးန့ၢ်ဘၣ်ဝဲတဖၣ်ဒ် မၤတၢ် ၂၀:၂၈ ပာ်ဖျါထီၣ်ဝဲအသိး ကသ့ဒ်လဲၣ်.
၁၈ သိၣ်လိနဲၣ်လိဒီး ဟ့ၣ်ဂံၢ်ဟ့ၣ်ဘါ ပှၤသိၣ်လိလံာ်စီဆှံဖိတဖၣ်တက့ၢ်. တၢ်အိၣ်ဖှိၣ်သးပှၢ်တဖၣ် အိၣ်ဒီးမူဒါအါမးလၢ ကဘၣ်မၤစၢၤ ပှၤစံၣ်တဲၤတဲလီၤဖိတဖၣ် ဒ်သိးအဝဲသ့ၣ် ကစံၣ်တဲၤတဲလီၤတၢ် ဒီးကသိၣ်လိပှၤဂၤလံာ်စီဆှံ ကသ့ဂ့ၤဂ့ၤအဂီၢ်လီၤ. (ဖး မၤတၢ် ၂၀:၂၈ တက့ၢ်.) ဒီပုၢ်ဝဲၢ်တဂၤ မ့မ့ၢ်ပှၤလၢအမဲာ်ဆှးသ့ ဒီးသိၣ်လိလံာ်စီဆှံလၢ နမဲာ်ညါမ့ၢ်တဘူၣ်ဘၣ်န့ၣ် နမၤစၢၤအီၤလၢ နကသိၣ်လိန့ၢ်တၢ်လၢအလီၢ်သ့ဝဲလီၤ. ဒီပုၢ်ဝဲၢ်မုၣ်ကၠဲးကံၣ် တဲဝဲလၢ “တၢ်အိၣ်ဖှိၣ်သးပှၢ်တဖၣ်န့ၣ် သံကွၢ်ယၤလၢ ကလဲၤပိာ်ယခံလၢ ယတၢ်မၤလိလံာ်စီဆှံလီၤ. ဖဲယမၤလိလံာ်စီဆှံ ဒီးပှၤမၤလိလံာ်စီဆှံဖိအခါ ယတၢ်ကီတၢ်ခဲအိၣ်ဝဲအဃိ အဝဲသ့ၣ်မၤစၢၤယၤလီၤ. တၢ်အိၣ်ဖှိၣ်သးပှၢ်တဖၣ် မၤတၢ်သ့အါမး ဒ်သိးကဟ့ၣ်ဂံၢ်ဟ့ၣ်ဘါ ဒီးထိၣ်ဟူးထိၣ်ဂဲၤထီၣ် ပှၤသိၣ်လိတၢ်ဖိတဖၣ်အဂီၢ်လီၤ. (၁ သ့းစၤလနံ ၅:၁၁) ဒီပုၢ်ဝဲၢ်မုၣ်ကၠဲးကံၣ် တဲကဒီးဝဲလၢ “ဖဲတၢ်အိၣ်ဖှိၣ်သးပှၢ်တဖၣ် ဟ့ၣ်ဂံၢ်ဟ့ၣ်ဘါယၤဒီး တဲဘၣ်ယၤလၢ အဝဲသ့ၣ်ပာ်လုၢ်ပာ်ပှ့ၤတၢ်လၢ ယမၤတဖၣ်အခါ ယသးခုဒိၣ်မးလီၤ. အဝဲသ့ၣ်အတၢ်ကတိၤန့ၣ် လီၤဂာ်ဒ်ထံချံၣ်တခွးလၢ ယအီဘၣ်အီၤဖဲ တၢ်ကိၢ်အဆၢကတီၢ်န့ၣ်လီၤ. ဒီးအဝဲသ့ၣ်အတၢ်စံးပတြၢၤန့ၣ် ဒုးနာ်န့ၢ်ယၤလၢ ယသိၣ်လိပှၤဂၤလံာ်စီဆှံသ့ဂ့ၤဂ့ၤဒီး မၤအါထီၣ်ယတၢ်သးခုလီၤ.”—ကတိၤဒိ ၂၅:၂၅.
၁၉. ပဝဲခဲလၢာ် ပဒိးန့ၢ်ဘၣ် တၢ်သးခုကသ့ဒ်လဲၣ်.
၁၉ ပတၢ်မၤလိလံာ်စီဆှံဒီးပှၤဂၤ မ့ၢ်တအိၣ်ဘၣ် သနာ်က့ ပမၤစၢၤပှၤဂၤလၢ ကလဲၤထီၣ်လဲၤထီလၢ နီၢ်သးတခီသ့ဝဲလီၤ. ပမ့ၢ်ကတဲာ်ကတီၤပာ် တၢ်ဂ့ၢ်တၢ်ကျိၤဂ့ၤဂ့ၤ ဒ်သိးပကဆီၣ်ထွဲမၤစၢၤ ပှၤလၢအလဲၤသိၣ်လိပှၤဂၤလံာ်စီဆှံအခါန့ၣ် ပတတဲတၢ်အါတလၢဘၣ်. ပကဲထီၣ်ပှၤမၤလိလံာ်စီဆှံဖိ အတံၤသကိးသ့ ဖဲအဝဲသ့ၣ်ဟဲထီၣ်တၢ်အိၣ်ဖှိၣ်အခါ ဒီးပပာ်လီၤဒိဂ့ၤတဲာ်ဘၣ်လၢ အဝဲသ့ၣ်အဖီခိၣ်သ့လီၤ. တၢ်အိၣ်ဖှိၣ်သးပှၢ်တဖၣ် ဟ့ၣ်ဂံၢ်ဟ့ၣ်ဘါ ပှၤမၤလိလံာ်စီဆှံဖိတဖၣ်သ့ ခီဖျိဟ့ၣ်တၢ်ဆၢကတီၢ်ဒီးအဝဲသ့ၣ်လီၤ. တကးဒံးဘၣ် တၢ်အိၣ်ဖှိၣ်သးပှၢ် ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်လၢ အသိၣ်လိပှၤဂၤလံာ်စီဆှံတဖၣ် ခီဖျိသိၣ်လိဒီးစံးပတြၢၤအဝဲသ့ၣ်သ့လီၤ. ဖဲပမၤဝဲတၢ်သ့ၣ်တဖၣ်အံၤအခါ ပသးခုဒိၣ်မးလီၤ. တၢ်လၢပမၤတဖၣ် မ့မ့ၢ်တၢ်လၢအဆံးဆံးဖိ သနာ်က့ ပမၤစၢၤဘၣ်ပှၤဂၤလၢ ကအဲၣ်ယဟိဝၤယွၤ ဒီးကမၤဝဲ ပပၢ်ယဟိဝၤယွၤအတၢ်မၤလီၤ.
တၢ်သးဝံၣ် ၇၉ သိၣ်လိအဝဲသ့ၣ်ဒ်သိး ကအိၣ်ဂၢၢ်ဆိးကျၢၤအဂီၢ်
^ လံာ်အဆၢ. 5 ခဲအံၤ ပဝဲတနီၤ ပပှၤမၤလိလံာ်စီဆှံဖိ တအိၣ်ဘၣ်. ဘၣ်ဆၣ် ပဝဲခဲလၢာ် ပမၤစၢၤပှၤဂၤလၢ ကတုၤထီၣ်ထီၣ်ဘးလၢ ကဒိးဘျၢထံအဂီၢ် သ့ဝဲလီၤ. လၢတၢ်မၤလိအံၤအပူၤ ပကတဲသကိး ပဝဲတဂၤစုာ်စုာ် ပမၤစၢၤပှၤမၤလိလံာ်စီဆှံဖိ ဒ်သိးကတုၤထီၣ်ထီၣ်ဘးလၢ အဖီတၢၣ်ကသ့ဒ်လဲၣ်.
