ဒီပုၢ်ဝဲၢ်​မုၣ်​ခွါ​တနီၤ သူ​​ဝဲ​စဲးဖီကဟၣ်​ တၢ်ပီး​တၢ်လီ​တဖၣ်​လၢ က​ဆဲးကျိး​လိာ်သး ဒီး​အ​ဟံၣ်ဖိ​ဃီဖိ ဒီး​ဒီပုၢ်ဝဲၢ်​မုၣ်​ခွါ​တဖၣ်​အဂီၢ်​လီၤ. ဘၣ်ဆၣ်​ ခရံာ်ဖိ​လၢ​အ​ဒိၣ်တုာ်​ခိၣ်ပှဲၤ​န့ၣ်​ က​​​ဘၣ်​ဆိကမိၣ်​ထံ​ဝဲ လံာ်စီဆှံ​အ​တၢ်​ဟံးစု​နဲၣ်ကျဲ​လၢ​အ​မ့ၢ်ဝဲ “ပှၤ​ကူၣ်တၢ်​​​ဘၣ်​န့ၣ်​ ထံၣ်​​ဘၣ်​တၢ်အၢ, ဒီး​ပာ်တဒၢ​အသး​လီၤ. မ့မ့ၢ်​ပှၤလၢ​အ​တ​မၤလိ​​​ဘၣ်​တၢ်​​ဘၣ်​န့ၣ်​ လဲၤ​ဒၣ်တၢ်, ဒီး​​​ဘၣ်​တၢ်နး​တၢ်ဖှီၣ်​လီၤ.”—ကတိၤဒိ ၂၇:၁၂.

ပ​သ့ၣ်ညါ​​​ဘၣ်​လၢ ယဟိဝၤ​ယွၤ​အဲၣ်ဒိး​ဒီသဒၢ​ပှၤလီၤ. အဃိ ပ​တ​အဲၣ်ဒိး​ရ့​ဒီး​ပှၤလၢ ဒုးအိၣ်​ထီၣ်​တၢ်​လီၤမုၢ်​လီၤဖး, ပှၤလၢ​အ​​ဘၣ်​တၢ်​ဟီထီၣ်ကွံာ်​အီၤ ဒီး​ပှၤလၢ​အ​မၤ​ဘံဘူ တၢ်မ့ၢ်​တၢ်တီ​တဖၣ်​န့ၣ်​ဘၣ်. (ရိမ့ၤ ၁၆:၁၇; ၁ ကရံၣ်သူး ၅:၁၁; ၂ ယိၤဟၣ်​ ၁၀, ၁၁) ပှၤ​တနီၤ​လၢ အ​ဟဲ​မၤ​ဘၣ်ထွဲ​သး​ဒီး​တၢ်​အိၣ်ဖှိၣ်​န့ၣ်​ အဝဲသ့ၣ်​တ​အိၣ်မူ​မၤထွဲ လံာ်စီဆှံ​အ​တၢ်သိၣ်​တၢ်သီ​ဘၣ်. (၂ တံၤမသ့း ၂:၂၀, ၂၁) ဖဲ​ပ​ဃုထၢ​တံၤသကိး​တဖၣ်​အခါ ပ​က​​​ဘၣ်​ပလီၢ်​ပသး​လၢ တၢ်ဂ့ၢ်​တဖၣ်​အံၤ​လီၤ. ဘၣ်ဆၣ်​ ပမ့ၢ်​ဆဲးကျိး​ဒီး​ပှၤလၢ Messaging application အ​ပူၤ​န့ၣ်​ ပ​က​ဃုထၢ​တံၤသကိး​လၢ​အဂ့ၤ​န့ၣ်​ ကကီ​​​ဝဲ​လီၤ.

ဖဲ​ပ​ပၣ်ဃုာ်​လၢ မဲးစ့း​ကရူၢ်​ဖးဒိၣ်​လၢ အ​အိၣ်ဒီး​ပှၤ​အါမး​အခါ အရ့ဒိၣ်​ဒိၣ်မး​လၢ ပ​က​​​ဘၣ်​ပလီၢ်​ပသး​လၢ ပ​က​ဃုထၢ​တံၤသကိး လၢ​အဂ့ၤ​တဖၣ်​လီၤ. ခရံာ်ဖိ​ဒီပုၢ်ဝဲၢ်​တနီၤ အဝဲသ့ၣ်​ပၣ်ဃုာ်​​​ဘၣ်​လၢ မဲးစ့း​ကရူၢ်​ဖးဒိၣ်​ကျါ​အဃိ အဝဲသ့ၣ်​ထံၣ်ဘၣ်​ တၢ်ကီ​တၢ်ခဲ​တဖၣ်​လီၤ. အဃိ ဒီပုၢ်ဝဲၢ်​မုၣ်​ခွါ​တဂၤ​ဂၤ မ့ၢ်​ပၣ်ဃုာ်​​​ဘၣ်​လၢ မဲးစ့း​ကရူၢ်​ဖးဒိၣ်​လၢ ပှၤ​အိၣ်​​ဝဲ​လၢ အ​ကယၤ​အ​ကထိ​တဖၣ်​အ​ကျါ​န့ၣ်​ အဝဲသ့ၣ်​အိၣ်ဒီး တၢ်​ပလီၢ်သး​က​သ့​ဒ်လဲၣ်. ပှၤ​တဂၤ​လၢ်လၢ်​လၢ အ​အိၣ်​လၢ​ကရူၢ်​အ​ပူၤ အ​တၢ်အိၣ်သး​ဒီး​အ​နီၢ်သး​အိၣ်​ဒ်လဲၣ်​န့ၣ်​ ပ​တ​သ့ၣ်ညါ​လီၤတံၢ်​လီၤဆဲး​ဘၣ်. စံးထီၣ်​ပတြၢၤ ၂၆:၄ တဲ​​ဝဲ​လၢ “ယ​တ​ဆ့ၣ်နီၤ​ဘၣ်​ ဒီး​ပှၤ​လီတၢ်​ဘၣ်, ဒီး​ယ​တ​လဲၤနုာ်​ဘၣ်​ ဒီး​ပှၤ​မၤတၢ်​လၢ​ခူသူၣ်​ဘၣ်.” အဃိ လံာ်စီဆှံ​တ​ဆၢ​အံၤ ပာ်ဖျါ​ထီၣ်​​ဝဲ​လၢ ပ​မ့ၢ်​အိၣ်ဒီး​တၢ်​ကူၣ်သ့​န့ၣ်​ ပ​က​ဆဲးကျိး​ထဲ ပှၤလၢ​ပ​သ့ၣ်ညါ​အီၤ​တဖၣ်​လီၤ.

ခရံာ်ဖိ​တဂၤ မ့ၢ်​ပၣ်ဃုာ်​လၢ မဲးစ့း​ကရူၢ်​ဆံး​ဆံး​ဖိ​တခါ​အ​ကျါ​ဒၣ်လဲာ် အ​​ဝဲ​က​​​ဘၣ်​ပလီၢ်​အသး​လၢ အ​သူ​​ဝဲ​တၢ်​ဆၢကတီၢ် ဒီး​တၢ်ဂ့ၢ်​လၢ​ပှၤ​တဲ​​ဝဲ​တဖၣ်​န့ၣ်​လီၤ. ပှၤ​တဲသကိး​တၢ်ဂ့ၢ်​မနုၤ​လဲၣ်​ ဒီး​တဲ​​ဝဲ​တၢ်​ဆၢကတီၢ်​ယံာ်​ထဲလဲၣ်​န့ၣ်​ တ​လိၣ်​လၢ ပ​က​​​ဘၣ်​စံးဆၢ အဝဲသ့ၣ်​အ​မဲးစ့း ကိးဘျီဒဲး​ဘၣ်. စီၤ​ပီလူး​ဟ့ၣ်ပလီၢ် စီၤ​တံၤမသ့း​ဘၣ်ဃး​ဒီး “ပှၤလၢ​အ​ဟး​တဲ​အီၣ်​ပှၤ​ဂ့ၢ် ဒီး​ဟး​မၤ​ဘၣ်ထွဲ​လိာ်အသး​ဒီး ပှၤဂၤ​အ​တၢ်ဂ့ၢ်” တဖၣ်​န့ၣ်​လီၤ. (၁ တံၤမသ့း ၅:၁၃) မုၢ်မဆါ​တနံၤ​အံၤ တၢ်​သ့ၣ်​တဖၣ်​အံၤ​ကဲထီၣ်​အသး​သ့ ခီဖျိ​လၢ​အံၣ်လဲးထြီနံး အကျိၤ​အကျဲ​တဖၣ်​အဃိ​လီၤ.

ခရံာ်ဖိ​လၢ အ​ဒိၣ်တုာ်​ခိၣ်ပှဲၤ​တဂၤ​န့ၣ်​ တ​ဒိကနၣ်​ မ့တမ့ၢ် တ​တဲ​ဟးဂီၤ​ပှၤဂၤ​အဂ့ၢ် ဒီး​ပှၤဂၤ​အ​တၢ်​ခူသူၣ်​တဖၣ်​ဘၣ်. (စံးထီၣ်​ပတြၢၤ ၁၅:၃; ကတိၤဒိ ၂၀:၁၉) ဒီး​တၢ်ဂ့ၢ်​လၢ​တတီ​တလိၤ​​​ဘၣ်​န့ၣ်​ အ​​ဝဲ​တ​ဟး​တဲ​​ဘၣ်​ပှၤဂၤ ဒီး​တ​ဒိကနၣ်​ဝဲ တၢ်ဂ့ၢ်​သ့ၣ်​တဖၣ်​န့ၣ်​စ့ၢ်ကီး​ဘၣ်. (အ့းဖ့းစူး ၄:၂၅) ပ​ဒိးန့ၢ်​ဘၣ်​ တၢ်ဂ့ၢ်​တၢ်ကျိၤ​အါမး​လၢ အ​ဒိးသန့ၤ​ထီၣ်​အသး​လၢ လံာ်စီဆှံ​အ​ပူၤ ဒီး​တၢ်ဂ့ၢ်​လၢ​ပ​နာ်န့ၢ်​အီၤ​သ့​န့ၣ်​ အိၣ်​​ဝဲ​လၢ jw.org ပ​ပှာ်ယဲၤ​သန့​အ​ပူၤ ဒီး jw တၢ်ဂီၤမူ​တလါ​တဘျီ အ​တၢ်ရဲၣ်​တၢ်ကျဲၤ​အ​ပူၤ​လီၤ.

ယဟိဝၤ​ပှၤအုၣ်​အသး​တနီၤ သူ​​ဝဲ​အံၣ်လဲးထြီနံး မဲးစ့း​လၢ က​ဆါ​တၢ်​ပှ့ၤတၢ် ဒီး​တဲဖျါထီၣ်​ အ​တၢ်ဖိ​တၢ်လံၤ ဒီး​တဲ​ပှၤဂၤ​ဘၣ်ဃး​ဒီး အ​တၢ်ဖံး​တၢ်မၤ​အဂ့ၢ်​လီၤ. တၢ်​သ့ၣ်​တဖၣ်​အံၤ မ့ၢ်​​ဝဲ​တၢ်ဖံး​တၢ်မၤ​အကျိၤ​အကျဲ ဒီး​တ​ဘၣ်ထွဲ​လိာ်အသး​ဒီး တၢ်​ဘူၣ်ထီၣ်​ဘါထီၣ်​ ယဟိဝၤ​ယွၤ​ဘၣ်. ခရံာ်ဖိ​တဖၣ်​ က​ဘၣ်​ “ပူၤဖျဲး​ဒီး တၢ်အဲၣ်​ကျိၣ်​အဲၣ်​စ့” အဃိ တ​​ဘၣ်​သူဝဲ အ​ဒီပုၢ်ဝဲၢ်​မုၣ်​ခွါ​ဒ်သိး က​ဃုကျိၣ်​ဃုစ့​အဂီၢ်​ဘၣ်.—ဧ့ၤဘြံၤ ၁၃:၅.

မ့ၢ်​ပ​ကြၢး​သူ Messaging application ဒ်သိး​ပ​က​ဃ့​ကျိၣ်စ့​တၢ်​မၤစၢၤ​လၢ ပ​ဒီပုၢ်ဝဲၢ်​မုၣ်​ခွါ​တဖၣ်​အ​အိၣ်​ လၢ​က​မၤစၢၤ​ပှၤဂၤ​ဖဲ န့ဆၢၣ်​တၢ်​ဘၣ်ဒိ​ဘၣ်ထံး ကဲထီၣ်​အခါ​န့ၣ်​ဧါ. ထီဘိ​န့ၣ်​ ပ​က​​​ဘၣ်​ပာ်ဖျါ​ထီၣ်​ တၢ်အဲၣ်​ဒီး​တၢ်​သူၣ်အိၣ်​သးအိၣ်​ လၢ​ပ​ဒီပုၢ်ဝဲၢ်​မုၣ်​ခွါ တဂၤ​ဒီး​တဂၤ​အ​ဖီခိၣ်​လီၤ. (ယၤကိာ် ၂:၁၅, ၁၆) ဘၣ်ဆၣ်​ ပ​မ့ၢ်​သူ​မဲးစ့း​ကရူၢ်​ဖးဒိၣ်​လၢ ပ​က​မၤ​ဒ်​န့ၣ်​အဂီၢ်​န့ၣ်​ က​ကဲထီၣ်​တၢ်​သဘံၣ်​သဘုၣ်​လၢ ဝဲၤတြၢ် ဒီး​လီၢ်ကဝီၤ​တၢ်​အိၣ်ဖှိၣ်​လၢ က​မၤစၢၤ​ပ​ဒီပုၢ်ဝဲၢ်​မုၣ်​ခွါ​တဖၣ်​ အဂီၢ်​သ့​လီၤ. (၁ တံၤမသ့း ၅:၃, ၄, ၉, ၁၀, ၁၆) ပ​​ဝဲ​တဂၤ​မး ပ​တ​​ဘၣ်​ဆိကမိၣ်​လၢ ပအိၣ်ဒီး​မူဒါ​​​လီၤ​လီၤဆီ​ဆီ​တခါ​လၢ ပ​က​​​ဘၣ်​ကွၢ်ထွဲ ကစၢ်​ယွၤ​အသိ​န့ၣ်​ဘၣ်.

ပ​အဲၣ်ဒိး​မၤတၢ်​လၢ က​မၤလၤ​ကပီၤ​ကစၢ်​ယွၤ​အဂီၢ်​လီၤ. (၁ ကရံၣ်သူး ၁၀:၃၁) အဃိ ဖဲ​ပ​ပာ်လီၤသး​လၢ ပ​ကသူ Messaging application မ့တမ့ၢ် စဲးဖီကဟၣ်​ တၢ်ပီး​တၢ်လီ​အဂၤ​တဖၣ်​အခါ ပ​က​​​ဘၣ်​ဆိကမိၣ်​ထီၣ်​ တၢ်​​​လီၤ​ဘၣ်ယိၣ်​တဖၣ်​ ဒီး​ပ​က​​​ဘၣ်​အိၣ်ဒီး တၢ်​ပလီၢ်​ပဒီ​လီၤ.