ပှၤ​မ့ၢ်​ဖး​ကွၢ် တၢ်ဂ့ၢ်​တခါ​အံၤ​ယိယိ ဒီး​မ့ၢ်​တ​ဆိမိၣ်​ထံ တၢ်အိၣ်သး​လၢ အဂၤ​​ဘၣ်​န့ၣ်​ ပှၤ​က​သံကွၢ်​​ဘၣ်​​ဝဲ​ဒ်​န့ၣ်. ဘၣ်ဆၣ်​ လၢ​လံာ်စီဆှံ အဆၢဖိ​တဖၣ်​အံၤ​အ​ပူၤ​န့ၣ်​ စီၤ​မဖံဘိၤၡ့း အိၣ်​ဝဲ​ခံဂၤ ဒီး​ဖဲ​ပ​ဃု​သ့ၣ်ညါ တၢ်ဂ့ၢ်​အံၤ​အခါ ပ​က​ဒိးန့ၢ်​ဘၣ်​ တၢ်​မၤလိ​စ့ၢ်ကီး​လီၤ.

အံၣ်စရ့လး အ​စီၤပၤ​စီလူး​န့ၣ်​ အ​ဖိခွါ​အိၣ်​နွံ​ဂၤ ဒီး​အ​ဖိမုၣ်​အိၣ်​ခံဂၤ. အ​ဖိခွါ​ဝဲၢ်ကိ​န့ၣ်​ မ့ၢ်​ဝဲ​စီၤ​ယိနၤသၣ်. လၢခံ စီၤ​စီလူး အ​သံၣ်မါ နီၢ်​ရံးစဖၤ အိၣ်ဖျဲၣ်​ထီၣ်​န့ၢ်​အီၤ​အ​ဖိခွါ စီၤ​မဖံဘိၤၡ့း. ဒီး​မ့မ့ၢ်​လၢ စီၤ​ယိနၤသၣ်​စ့ၢ်ကီး အ​ဖိခွါ​န့ၣ်​ အ​မံၤ​မ့ၢ်ဝဲ စီၤ​မဖံဘိၤၡ့း. အဃိ စီၤပၤ​စီလူး​န့ၣ်​ အိၣ်ဒီး​အ​ဖိခွါ​တဂၤ​လၢ အ​မံၤ​မ့ၢ်ဝဲ စီၤ​မဖံဘိၤၡ့း ဒီး​အ​လံၤခွါ​တဂၤ​လၢ အ​မံၤ​မ့ၢ်ဝဲ စီၤ​မဖံဘိၤၡ့း​စ့ၢ်ကီး.

ဘၣ်​တဘျီ စီၤပၤ​စီလူး​သးဟ့ဝဲ ပှၤ​ကံးဘိၣ်​ဖိ ဒီး​ဂုာ်ကျဲးစၢး မၤ​လီၤတူာ်​ကွံာ်ဝဲ ပှၤ​ကံးဘိၣ်​ဖိ​တဖၣ်​လၢ ပှၤ​အံၣ်စရ့လး​ဖိ​တဖၣ်​အ​ကျါ. လီၤဂာ်​လၢ အဝဲသ့ၣ်​အါဂၤ​န့ၣ်​ ​ဘၣ်​တၢ်​မၤသံ​အီၤ. ဘၣ်ဆၣ်​ တၢ်​လၢ​စီၤ​စီလူး​မၤဝဲန့ၣ်​ ကမၣ်​ဒိၣ်မး. ​ဘၣ်​မနုၤ​အဃိ​လဲၣ်. မ့ၢ်​လၢ လၢ​စီၤ​ယိၤၡူ​အ​စိၤ​န့ၣ်​ ပှၤ​အံၣ်စရ့လး​ဖိ​တဖၣ်​ မၤ​တၢ်အၢၣ်​လီၤ​အီ​လီၤ​လၢ​အက​အိၣ်ဃူ​အိၣ်ဖိး​ဒီး ပှၤ​ကံးဘိၣ်​ဖိ​တဖၣ်​အဃိ.—ယိၤၡူ ၉:၃-၂၇.

တၢ်အၢၣ်​လီၤ​အီ​လီၤ​အံၤန့ၣ်​ အ​ဘၣ်ထွဲ​တုၤ​လၢ စီၤပၤ​စီလူး​အ​စိၤ​ဒံး. စီၤ​စီလူး​သ့ၣ်ညါ​ဝဲ တၢ်အၢၣ်​လီၤ​အီ​လီ​တခါ​အံၤ သနာ်က့ ဂုာ်ကျဲးစၢး မၤသံ​လီၤတူာ်​ဝဲ ပှၤ​ကံးဘိၣ်​ဖိ​ဒံး. မ့ၢ်​လၢ စီၤ​စီလူး​မၤ​ဝဲ​ဒ်​န့ၣ်​အဃိ “စီၤ​စီလူး​ဒီး​အပှၤ​ဟံၣ်ဖိ​ဃီဖိ​တဖၣ်​ အ​တၢ်​ကမၣ်​အိၣ်” ဝဲ. (၂ ၡမူၤအ့လး ၂၁:၁, ခ့ခါ​စှီၤကျိာ်​) လၢခံ​န့ၣ်​ စီၤ​ဒၤဝံး​ကဲထီၣ်​စီၤပၤ. ဒီး​ပှၤ​ကံးဘိၣ်​ဖိ​လၢ အ​ပူၤဖျဲး​ထီၣ်​တဖၣ်​န့ၣ်​ တဲ​ဘၣ်က့ၤ စီၤ​ဒၤဝံး​လၢ တၢ်​တတီ​တလိၤ​လၢ အဝဲသ့ၣ်​ ထံၣ်​ဘၣ်​​ဝဲ​တဖၣ်. စီၤ​ဒၤဝံး သံကွၢ်​အဝဲသ့ၣ်​လၢ စီၤ​စီလူး​မၤဝဲ တၢ်အၢ​တၢ်သီ​ဒ်အံၤ​အဃိ ဒ်သိး​သု​သး​ကမုာ်​ထီၣ်​ ဒီး​ယဟိဝၤ​ယွၤ က​ဆိၣ်ဂ့ၤ​ကီၢ်​အံၣ်စရ့​အဂီၢ် ပ​​ဘၣ်​မၤန့ၢ်​သု​လၢ တၢ်မနုၤ​လဲၣ်. ပှၤ​ကံးဘိၣ်​ဖိ​တဖၣ်​ တ​ဃ့​ဝဲ​ကျိၣ်စ့​ဘၣ်, လၢ​တၢ်န့ၣ်​အလီၢ် အဝဲသ့ၣ်​ ဃ့​ထီၣ်​ဝဲ​လၢ ပှၤ​က​မၤသံ​ပှၤလၢ​အ “ကူၣ်​မၤ​ဟးဂီၤ” အဝဲသ့ၣ်​တဂၤ​အံၤ အစၢၤ​အသွဲၣ်​နွံ​ဂၤ ဒီး​ဘျးထီၣ်​အဝဲသ့ၣ်​အစိၣ်​လီၤ. (၄ မိၤၡ့ ၃၅:၃၀, ၃၁) ဒီး​စီၤ​ဒၤဝံး မၤ​ဝဲ​ဒ် အဝဲသ့ၣ်​ ဃ့​ထီၣ်​ဝဲ​အသိး​လီၤ.—၂ ၡမူၤအ့လး ၂၁:၂-၆.

ဖဲန့ၣ်​အခါ စီၤ​စီလူး ဒီး​စီၤ​ယိနၤသၣ်​န့ၣ်​ သံ​ဝဲ​လၢ တၢ်ဒုးပျီ​အ​ပူၤ​လံ. ဘၣ်ဆၣ်​ စီၤ​ယိနၤသၣ်​အ​ဖိခွါ စီၤ​မဖံဘိၤၡ့း​န့ၣ်​အိၣ်မူ​​ဝဲ​ဒံး. စီၤ​မဖံဘိၤၡ့း​န့ၣ်​ ဖဲ​အ​ဖိသၣ်​အခါ အ​ဘၣ်​ဒိ​ဝဲ​အဃိ အ​ခီၣ်​ဟးဂီၤ​လီၤ. အဃိ ဖဲ​အ​ဖု​လဲၤ​ဒုး ပှၤ​ကံးဘိၣ်​ဖိ​တဖၣ်​အခါ တမ့ၢ်​လၢ အ​ဝဲ​က​ပၣ်ဃုာ် လၢ​ပှၤ​ကျါ​ဘၣ်. လၢ​အ​ပူၤကွံာ်​န့ၣ်​ စီၤ​ဒၤဝံး မၤ​တၢ်အၢၣ်​လီၤ​အီ​လီၤ​ဒီး အသကိး​စီၤ​ယိနၤသၣ်​ ဒီး​တၢ်အၢၣ်​လီၤ​အီ​လီၤ​အံၤ က​ကဲဘျုး​လၢ စီၤယိနၤသၣ်​ အစၢၤ​အသွဲၣ်​ ပၣ်ဃုာ်​ဒီး စီၤ​မဖံဘိၤၡ့း​လီၤ. (၁ ၡမူၤအ့လး ၁၈:၁; ၂၀:၄၂) လံာ်စီဆှံ တဲ​ဝဲ​လၢ “စီၤပၤ[ဒၤဝံး] သးလီ [ပာ်ဖျါ​ထီၣ်​ တၢ်သးကညီၤ​လၢ, NWT] စီၤ​စီလူး​အ​ဖိခွါ စီၤ​ယိနၤသၣ်​အ​ဖိခွါ စီၤ​မဖံဘိၤၡ့း​လၢ ယွၤ​အ​တၢ်ဆိၣ်​လၢ အ​အိၣ်​ဝဲ​လၢ အ​ဘၢၣ်စၢၤ​အဃိ” လီၤ.—၂ ၡမူၤအ့လး ၂၁:၇.

ဘၣ်ဆၣ်​ စီၤ​ဒၤဝံး သး​လီၤ​ပလိာ်​ဒီး ပှၤ​ကံးဘိၣ်​ဖိ​တဖၣ်​ အ​တၢ်​ဃ့​ထီၣ်​ဒံး. အဃိ အ​ဝဲ​ဟ့ၣ်​​လီၤ​ဝဲ စီၤ​စီလူး​အ​ဖိခွါ​ခံဂၤ ဒီး​စီၤ​စီလူး​အ​လံၤခွါ ယဲၢ်​ဂၤ​လီၤ. လၢ​စီၤ​စီလူး​အ​ဖိခွါ​ခံဂၤ​အံၤ​အ​ကျါ တဂၤ​န့ၣ်​ အ​မံၤ​မ့ၢ်ဝဲ စီၤ​မဖံဘိၤၡ့း. (၂ ၡမူၤအ့လး ၂၁:၈, ၉) စီၤ​ဒၤဝံး မၤ​ဝဲ​ဒ်အံၤ​အဃိ တၢ်​ကမၣ်​ ​လီၤ​တီ​လၢ ကီၢ်​ပူၤ​န့ၣ်​ ပတုာ်​ကွံာ်​ဝဲ​လီၤ.

ပ​ဟံးန့ၢ်​တၢ်​မၤလိ​လၢ တၢ်ဂ့ၢ်​တခါ​အံၤ​သ့. ကစၢ်​ယွၤ အ​တၢ်သိၣ်​တၢ်သီ ပာ်ဖျါ​ထီၣ်​ဝဲ​ၡဲၡဲ​ဖိ​လၢ “ဖိ​တဖၣ်​တ​ဘၣ်​ဘၣ်​ တၢ်​မၤသံ​အီၤ​လၢ အပၢ်​တဖၣ်​အဃိ​ဘၣ်.” (၅ မိၤၡ့ ၂၄:၁၆) ဘၣ်ဃး​ဒီး ပှၤ​မၤသံ စီၤ​စီလူး​အ​ဖိခွါ​ခံဂၤ ဒီး​အ​လံၤခွါ​ယဲၢ်​ဂၤန့ၣ်​ အဝဲသ့ၣ်​ အ​တၢ်​ကမၣ်​ မ့ၢ်​တအိၣ်​​ဘၣ်​န့ၣ်​ တမ့ၢ်​လၢ ယဟိဝၤ​ယွၤ က​တူၢ်လိာ်​​ဝဲ​ဘၣ်. တကး​ဒံးဘၣ်​ တၢ်သိၣ်​တၢ်သီ အိၣ်​စ့ၢ်ကီး​လၢ “ပှၤ​က​ဘၣ်​တၢ်​မၤသံ​အီၤ​လၢ အတၢ်​ဒဲးဘး​ဒၣ်ဝဲ အဃိ​လီၤ.” အဃိ ဖျါ​လၢ​စီၤ​စီလူး အစဲၤ​အသွဲၣ်​နွံ​ဂၤ​အံၤန့ၣ်​ ဖဲ​စီၤ​စီလူး ဂုာ်ကျဲးစၢး မၤ​လီၤတူာ်​ကွံာ် ပှၤ​ကံးဘိၣ်​ဖိ​တဖၣ်​အခါ အဝဲသ့ၣ်​ပၣ်ဃုာ်​လၢ စီၤ​စီလူး​အ​တၢ်မၤ​တခါ​အံၤ အ​ကျါ. အဃိ အဝဲသ့ၣ်​​ဘၣ်​သံ​န့ၣ်​ လၢ​အ​နီၢ်ကစၢ် အ​တၢ်​ကမၣ်​အဃိ​လီၤ.

တၢ်ဂ့ၢ်​တခါ​အံၤ ဒုး​သ့ၣ်ညါ​ပှၤလၢ ဖဲ​ပှၤ​တဂၤ မၤ​ကမၣ်​တၢ်​အခါ အတဲ​ပူၤဖျဲး​အသး​လၢ အ​မၤ​​ဘၣ်​တၢ်​ကမၣ်​ ခီဖျိ​လၢ အ​မၤထွဲ ​ဝဲ​တၢ်​ဟံးစု​နဲၣ်ကျဲ​အဃိ​​လီၤ​န့ၣ်​ တ​သ့​ဘၣ်. အဃိ လံာ်စီဆှံ အ​တၢ်​ကတိၤဒိ ဟ့ၣ်ကူၣ်​ပှၤလၢ “ကွၢ်​ဆိကမိၣ်​ န​ခီၣ်​အကျဲ ဒ်သိး​န​ကျဲဧိၤ​ကပူၤဧိၤ​ခဲလၢာ် က​အိၣ်ကျၢၤ​တက့ၢ်.”—ကတိၤဒိ ၄:၂၄-၂၇; အ့းဖ့းစူး ၅:၁၅.