တၢ်မၤလိ ၁၀
ဘ့ၣ်လီၤကွံာ် “လုၢ်လၢ်သကဲာ်ပဝး လၢအပူၤကွံာ်”
“ဘ့ၣ်လီၤကွံာ် လုၢ်လၢ်သကဲာ်ပဝး လၢအပူၤကွံာ် ဃုာ်ဒီးအတၢ်မၤသ့ၣ်တဖၣ် န့ၣ်တက့ၢ်.”—ကလီးစဲ ၃:၉.
တၢ်သးဝံၣ် ၂၉ အိၣ်မူဒ်ပမံၤအသိး
တၢ်မၤလိအံၤ အတၢ်တိာ်ပာ် *
၁. တချုးလၢ နမၤလိ လံာ်စီဆှံဒံးဘၣ်အခါ နတၢ်အိၣ်မူမၤသးဒ်လဲၣ်.
တချုးလၢ ပမၤလိလံာ်စီဆှံဒီး ယဟိဝၤပှၤအုၣ်အသး ဒံးဘၣ်အခါ ပတၢ်အိၣ်မူမၤသးဒ်လဲၣ်န့ၣ် ပဝဲအါဂၤ တမ့ၢ်လၢ ပကအဲၣ်ဒိး ဆိကမိၣ်က့ၤအီၤဘၣ်. ဖဲန့ၣ်အဆၢကတီၢ် ပတၢ်ထံၣ်ဒီး ပတၢ်သကဲာ်ပဝးတဖၣ်န့ၣ် ကလီၤဂာ်ဒ် ပှၤတၢ်ချၢအသိး ဒီးအဝဲသ့ၣ် အတၢ်ထံၣ်လၢ ဘၣ်ဃးဒီး တၢ်အဘၣ်ဒီးတၢ်အကမၣ်န့ၣ် လုၢ်ဘၢဝဲပှၤ. အဃိ ဖဲန့ၣ်အခါ ‘ပအိၣ်မူလၢ ဟီၣ်ခိၣ်ချၢဘၣ်ဆၣ် ပတသ့ၣ်ညါကစၢ်ယွၤဘၣ် ဒီးပတၢ်မုၢ်လၢ်တအိၣ်ဘၣ်.’ (အ့းဖ့းစူး ၂:၁၂) ဘၣ်ဆၣ် ဖဲပမၤလိလံာ်စီဆှံဝံၤအလီၢ်ခံ ပဆီတလဲ ပတၢ်အိၣ်မူလီၤ.
၂. နမၤလိလံာ်စီဆှံအဃိ နသ့ၣ်ညါထီၣ်ဘၣ် တၢ်မနုၤလဲၣ်.
၂ နမၤလိလံာ်စီဆှံအဃိ နသ့ၣ်ညါထီၣ်ဘၣ်လၢ ပပၢ်လၢမူခိၣ် လၢအအဲၣ်ပှၤဒိၣ်မးန့ၣ် အိၣ်ဝဲတဂၤ. ဒီးနသ့ၣ်ညါထီၣ်လၢ နမ့ၢ်အဲၣ်ဒိးမၤ ယဟိဝၤယွၤ အတၢ်ဘၣ်သး ဒီးကဲထီၣ် အဟံၣ်ဖိဃီဖိလၢ အဘူၣ်ထီၣ်ဘါထီၣ်အီၤတဂၤန့ၣ် နကဘၣ်ဆီတလဲ နတၢ်အိၣ်မူ, နတၢ်ထံၣ် ဒီးနတၢ်ဆိကမိၣ် ဒီးနကဘၣ်အိၣ်မူဒ် အတၢ်ဘျၢအသိးလီၤ.—အ့းဖ့းစူး ၅:၃-၅.
၃. ဒ် ကလီးစဲ ၃:၉, ၁၀ ပာ်ဖျါထီၣ်ဝဲအသိး ယဟိဝၤယွၤ အဲၣ်ဒိးလၢ ပကမၤတၢ်မနုၤလဲၣ် ဒီးလၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.
၃ ယဟိဝၤယွၤ မ့ၢ်ပပၢ် ဒီးပတၢ်ဘၣ်တ့ကစၢ်လၢ အအိၣ်လၢမူခိၣ်အဃိ အဟံၣ်ဖိဃီဖိတဖၣ် ကဘၣ်အိၣ်မူဝဲဒ်လဲၣ်န့ၣ် အဝဲအိၣ်ဒီးတၢ်ခွဲးတၢ်ယာ်လၢ ကပာ်လီၤန့ၢ်ဝဲ တၢ်သိၣ်တၢ်သီ. တချုးလၢ ပဒိးဘျၢထံဒံးဘၣ်န့ၣ် ယဟိဝၤယွၤ အဲၣ်ဒိးလၢ ပကဂုာ်ကျဲးစၢး “ဘ့ၣ်လီၤကွံာ် လုၢ်လၢ်သကဲာ်ပဝး လၢအပူၤကွံာ် ဃုာ်ဒီးအတၢ်မၤသ့ၣ်တဖၣ်.” * (ဖး ကလီးစဲ ၃:၉, ၁၀.) တၢ်မၤလိတခါအံၤ ကမၤစၢၤ ပှၤလၢအအဲၣ်ဒိး ဒိးဘျၢထံတဖၣ် ဒ်သိးကသ့ၣ်ညါထီၣ်ဝဲ တၢ်သံကွၢ် သၢဖျၢၣ်အတၢ်စံးဆၢ. (၁) “လုၢ်လၢ်သကဲာ်ပဝး လၢအပူၤကွံာ်” န့ၣ်မ့ၢ်မနုၤလဲၣ်. (၂) ဘၣ်မနုၤအဃိ ယဟိဝၤယွၤ အဲၣ်ဒိးလၢ ပကဘ့ၣ်လီၤကွံာ် လုၢ်လၢ်သကဲာ်ပဝး လၢအပူၤကွံာ်လဲၣ်. (၃) ပမၤအီၤကသ့ဒ်လဲၣ်. တကးဒံးဘၣ် တၢ်မၤလိတခါအံၤ ကမၤစၢၤ ပှၤလၢအဒိးဘျၢထံဝံၤတဖၣ် ဒ်သိးအလုၢ်လၢ်သကဲာ်ပဝး လၢအပူၤကွံာ် တဟဲက့ၤအိၣ်ထီၣ်ကဒါက့ၤ တဂ့ၤအဂီၢ်လီၤ.
“လုၢ်လၢ်သကဲာ်ပဝး လၢအပူၤကွံာ်” န့ၣ် မ့ၢ်မနုၤလဲၣ်
၄. ပှၤလၢအအိၣ်ဒီး “လုၢ်လၢ်သကဲာ်ပဝး လၢအပူၤကွံာ်” န့ၣ်မ့ၢ်ပှၤဒ်လဲၣ်.
၄ ပှၤလၢအအိၣ်ဒီး “လုၢ်လၢ်သကဲာ်ပဝး လၢအပူၤကွံာ်” န့ၣ် ညီနုၢ်အဝဲသ့ၣ် အတၢ်ဆိကမိၣ်ဒီး အတၢ်မၤန့ၣ်ကမၣ်ဝဲ. အဒိ, အဝဲ ကအဲၣ်လီၤထဲအသး, ကသးထီၣ်တၢ်ညီ, တသ့ၣ်ညါကဒါက့ၤ တၢ်ဘျုးတၢ်ဖှိၣ်ဘၣ် ဒီးကပာ်ထီၣ်ထီအသး. ဒီးအကွၢ်ဝဲ တၢ်ဂီၤဘ့ၣ်ဆ့ ဒီးတၢ်ဂီၤမူလၢ အပၣ်ဃုာ်ဒီး တၢ်မၤကမၣ်မုၣ်ကမၣ်ခွါ ဒီးတၢ်မၤဆူၣ်မၤစိးတဖၣ်န့ၣ်မုာ်မး. ဘၣ်သ့ၣ်သ့ၣ် အဝဲကအိၣ်ဒီး တၢ်ဂ့ၤတၢ်ဝါတနီၤ ဒီးတၢ်လၢ အတဲဝဲဒီးအမၤဝဲန့ၣ် ကတူၢ်ဘၣ်ဝဲလၢ အကမၣ်ဘၣ်ဆၣ် အဝဲတသးအိၣ်ဆီတလဲ အတၢ်ဆိကမိၣ် ဒီးအတၢ်မၤဘၣ်.—ကလၤတံ ၅:၁၉-၂၁; ၂ တံၤမသ့း ၃:၂-၅.
ဖဲပဘ့ၣ်လီၤကွံာ် “လုၢ်လၢ်သကဲာ်ပဝး လၢအပူၤကွံာ်” အခါ ပကပူၤဖျဲးထီၣ်လၢ တၢ်ပာ်သူၣ်ပာ်သး ဒီးလုၢ်လၢ်သကဲာ်ပဝးလၢ အတဂ့ၤဘၣ်တဖၣ် (ကွၢ်လံာ်အဆၢ ၅) *
၅. မ့ၢ်ပဘ့ၣ်လီၤကွံာ် လုၢ်လၢ်သကဲာ်ပဝး လၢအပူၤကွံာ်တဖၣ် ကသ့ဧါ, တဲဖျါထီၣ်တက့ၢ်. (မၤတၢ် ၃:၁၉)
၅ ပတလၢတပှဲၤဘၣ်အဃိ ပထုးထီၣ်ကွံာ် ပတၢ်ဆိကမိၣ် ဒီးပတၢ်သူၣ်လီသးကွံ လၢအကမၣ်တဖၣ် လၢပသးပူၤ လၢာ်လၢာ်ဆ့ဆ့တသ့ဘၣ်. ဒီးတဘျီတခီၣ်န့ၣ် ပကမၤဘၣ်တၢ်လၢ ပတအဲၣ်ဒိးမၤ ဒီးတဲဘၣ်တၢ်လၢ ပတအဲၣ်ဒိးတဲတဖၣ်. (ယံးရမံယၤ ၁၇:၉; ယၤကိာ် ၃:၂) ဘၣ်ဆၣ် ပမ့ၢ်ဘ့ၣ်လီၤကွံာ် ပလုၢ်လၢ်သကဲာ်ပဝးလၢ အပူၤကွံာ်န့ၣ် ပတဆိကမိၣ်တၢ်လၢအတဂ့ၤ ဒီးမၤလုၢ်လၢ်သကဲာ်ပဝးလၢ အတဂ့ၤလၢၤဘၣ်. အဃိ ပှၤဂၤကထံၣ်ဝဲလၢ ပဆီတလဲပသးလီၤ.—ယၡါယၤ ၅၅:၇; ဖး မၤတၢ် ၃:၁၉.
၆. ဘၣ်မနုၤအဃိ ယဟိဝၤယွၤ မၢပထုးထီၣ်ကွံာ် ပတၢ်ဆိကမိၣ်လၢ အတဂ့ၤဘၣ်တဖၣ် ဒီးပာ်တ့ၢ်ကွံာ် ပလုၢ်လၢ်သကဲာ်ပဝး လၢအတဂ့ၤဘၣ်တဖၣ်လဲၣ်.
၆ မ့ၢ်လၢယဟိဝၤယွၤ အဲၣ်ပှၤအဃိ အဝဲမၢပထုးထီၣ်ကွံာ် တၢ်ဆိကမိၣ်လၢ အတဂ့ၤဘၣ်တဖၣ် ဒီးပာ်တ့ၢ်ကွံာ် လုၢ်လၢ်သကဲာ်ပဝး လၢအတဂ့ၤဘၣ်တဖၣ်. (ယၡါယၤ ၄၈:၁၇, ၁၈) အဝဲသ့ၣ်ညါဝဲလၢ ပှၤလၢအအိၣ်ဒီး တၢ်မိၣ်န့ၢ်သးလီလၢ အတဂ့ၤဘၣ်တဖၣ်န့ၣ် အိၣ်ဒၣ်အမၤဘၣ်ဒိလီၤအသး ဒီးအမၤဘၣ်ဒိ ပှၤလၢအဃၢၤတဖၣ်. ဖဲယဟိဝၤယွၤ ထံၣ်ဘၣ်ဝဲလၢ ပနီၢ်ကစၢ် ဒီးပှၤဂၤဘၣ်ကီဘၣ်ခဲအခါ အတူၢ်ဘၣ်ဝဲတမုာ်ဘၣ်.
၇. ရိမ့ၤ ၁၂:၁, ၂ ပာ်ဖျါထီၣ်ဝဲလၢ ပအိၣ်ဒီး တၢ်ဃုထၢမနုၤလဲၣ်.
၇ ဖဲပဂုာ်ကျဲးစၢး ဆီတလဲ ပလုၢ်လၢ်သကဲာ်ပဝးအခါ ဘၣ်သ့ၣ်သ့ၣ် ပသကိး ဒီးပဟံၣ်ဖိဃီဖိတဖၣ် ကတဲဆဲးအဲး ဒီးတဲဆါပှၤ. (၁ ပ့းတရူး ၄:၃, ၄) ဘၣ်သ့ၣ်သ့ၣ် အဝဲသ့ၣ် ကတဲဝဲလၢ နတလိၣ်မၤဒ် ပှၤတဲနၤအသိးဘၣ်, တၢ်လၢနအဲၣ်ဒိးမၤအီၤန့ၣ် နမၤအီၤသ့. ဘၣ်ဆၣ် ပှၤလၢအတတူၢ်လိာ် ယဟိဝၤယွၤ အတၢ်ဘျၢတဖၣ်န့ၣ် တအိၣ်ဒီး တၢ်သဘျ့နီၢ်ကီၢ်ဘၣ်. အဝဲသ့ၣ် မ့ၢ်ဆိကမိၣ်လၢ အအိၣ်ဒီးတၢ်သဘျ့ဘၣ်ဆၣ် နီၢ်ကီၢ်န့ၣ် ပှၤအိၣ်လၢ မုၣ်ကီၤလံၢ်အတၢ်ပၢဖီလာ်တဖၣ် အတၢ်ပာ်သူၣ်ပာ်သးန့ၣ် ဒိၣ်စိလၢ အဝဲသ့ၣ်အဖီခိၣ်အဃိ အဝဲသ့ၣ် တအိၣ်ဒီးတၢ်သဘျ့ဘၣ်. (ဖး ရိမ့ၤ ၁၂:၁, ၂.) အဃိ မ့ၢ်ပကဆဲးမၤတၢ်ဒဲးဘး ဒီးဆဲးအိၣ်ဒီး လုၢ်လၢ်သကဲာ်ပဝးလၢအပူၤကွံာ် ခီဖျိ ပမၤဒ် ပှၤဟီၣ်ခိၣ်ဖိလၢ အိၣ်လၢမုၣ်ကီၤလံၢ် အတၢ်ပၢဖီလာ်တဖၣ်မၤဝဲအသိးဧါ. မ့ၢ်ပကပျဲ ယဟိဝၤယွၤ ဘှီဘၣ်ထီၣ်က့ၤပှၤ ဒ်သိးပကကဲထီၣ် ပှၤလၢအဂ့ၤဒိၣ်န့ၢ်အလီၢ်ဧါ. ပကမၤအီၤ ဖဲလဲၣ်တခါလဲၣ်န့ၣ် ပကဘၣ်ဃုထၢလၢ ပနီၢ်ကစၢ်.—ယၡါယၤ ၆၄:၈.
ဘၣ်မနုၤအဃိ ပကဘၣ် “ဘ့ၣ်လီၤကွံာ်” လုၢ်လၢ်သကဲာ်ပဝး လၢအပူၤကွံာ်လဲၣ်
၈. တၢ်မနုၤကမၤစၢၤနၤ ဒ်သိး နကဟးဆှဲး တၢ်ဆိကမိၣ် ဒီးလုၢ်လၢ်သကဲာ်ပဝး လၢအတဂ့ၤဘၣ်တဖၣ်လဲၣ်.
၈ ယဟိဝၤယွၤ သ့ၣ်ညါဝဲလၢ ဒ်သိးပဟးဆှဲး တၢ်ဆိကမိၣ်ဒီးလုၢ်လၢ်သကဲာ်ပဝး လၢအတဂ့ၤတဖၣ် ကန့ၢ်အဂီၢ် ပလိၣ်ဘၣ် တၢ်ဆၢကတီၢ် ဒီးတၢ်ထဲးဂံၢ်ထဲးဘါ. (စံးထီၣ်ပတြၢၤ ၁၀၃:၁၃, ၁၄) အဃိ ဒ်သိးပဆီတလဲပသး ကန့ၢ်အဂီၢ် ယဟိဝၤယွၤ ဟ့ၣ်လီၤပှၤ တၢ်ကူၣ်သ့, တၢ်ဂံၢ်တၢ်ဘါ ဒီးတၢ်မၤစၢၤ ခီဖျိလၢ အကလုၢ်ကထါ လံာ်စီဆှံ, အသးစီဆှံ ဒီးအတၢ်ကရၢကရိလီၤ. ဒီးအဝဲမၤစၢၤတ့ၢ်နၤ သပှၢ်ကတၢၢ်လံ. ခဲအံၤ ပကတဲသကိး တၢ်လၢကမၤစၢၤနၤ ဒ်သိးနကဆဲး ပာ်တ့ၢ်ကွံာ် လုၢ်လၢ်သကဲာ်ပဝး လၢအပူၤကွံာ်တဖၣ် ဒီးနကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ်လီၤ.
၉. ကစၢ်ယွၤ အကလုၢ်ကထါ မၤစၢၤနၤသ့ဒ်လဲၣ်.
၉ ဖးလံာ်စီဆှံ ဒီးသမံသမိးလီၤနသး လီၤတံၢ်လီၤဆဲး. လံာ်စီဆှံန့ၣ် လီၤဂာ်ဒ်သိးဒီးမဲာ်ထံကလၤ. အဃိ ကမၤစၢၤနၤဒ်သိး နကသ့ၣ်ညါလီၤ နတၢ်ဆိကမိၣ်, နတၢ်စံးတၢ်ကတိၤ ဒီးနတၢ်မၤတဖၣ်. (ယၤကိာ် ၁:၂၂-၂၅) ပှၤလၢအသိၣ်လိနၤလံာ်စီဆှံ ဒီးဒီပုၢ်ဝဲၢ်မုၣ်ခွါလၢ အဒိၣ်တုာ်ခိၣ်ပှဲၤတဖၣ် ဟ့ၣ်ကူၣ်ဟ့ၣ်ဖးနၤ သ့စ့ၢ်ကီး. အဒိ, အဝဲသ့ၣ် ကသူဝဲ လံာ်စီဆှံအဆၢတဖၣ်လၢ ကမၤစၢၤနၤ ဒ်သိးနကထံၣ်လီၤက့ၤ နတၢ်ဂ့ၤတၢ်ဝါ ဒီးနတၢ်ဂံၢ်စၢ်ဘါစၢ်တဖၣ်အဂီၢ်. တကးဒံးဘၣ် ဒ်သိးနမၤနၢၤကွံာ် နလုၢ်လၢ်သကဲာ်ပဝးလၢ အတဂ့ၤဘၣ် ကသ့အဂီၢ် နကဘၣ်ဃုထံၣ်န့ၢ် တၢ်ဟ့ၣ်ကူၣ်လၢ လံာ်စီဆှံပူၤဒ်လဲၣ်န့ၣ် အဝဲသ့ၣ် ကမၤစၢၤနၤ. ယဟိဝၤယွၤ အသးအိၣ်မၤစၢၤနၤ ထီဘိ ဒီးသ့ၣ်ညါ တၢ်အိၣ်လၢနသးအပူၤအဃိ အသ့ၣ်ညါဝဲ တၢ်အဂ့ၤကတၢၢ် လၢနဂီၢ်. (ကတိၤဒိ ၁၄:၁၀; ၁၅:၁၁) အဃိ မၤညီနုၢ်ထီၣ်နသးလၢ နကဃ့ဘါထုကဖၣ် ဒီးမၤလိလံာ်စီဆှံ ကိးနံၤဒဲး.
၁၀. နမၤလိန့ၢ်တၢ်မနုၤလၢ အ့လံၤအအိၣ်လဲၣ်.
၁၀ နာ်လၢ ယဟိဝၤယွၤအတၢ်ဘျၢန့ၣ် မ့ၢ်တၢ်လၢအဂ့ၤကတၢၢ်. တၢ်လၢယဟိဝၤယွၤ မၢပမၤတမံၤဂ့ၤတမံၤဂ့ၤန့ၣ် အကဲဘျုးလၢပဂီၢ်. ပှၤလၢအအိၣ်မူဒ် ယဟိဝၤယွၤ အတၢ်ဘျၢအသိးန့ၣ် အတၢ်ပာ်ကဲလီၤသးအါထီၣ်, အတၢ်အိၣ်မူန့ၣ် အိၣ်ဒီးတၢ်ပညိၣ် ဒီးအအိၣ်ဒီး တၢ်သးခုနီၢ်ကီၢ်. (စံးထီၣ်ပတြၢၤ ၁၉:၇-၁၁) ဘၣ်ဆၣ် ပှၤလၢအတတူၢ်လိာ် ယဟိဝၤယွၤ အတၢ်ဘျၢဘၣ်တဖၣ်န့ၣ် မ့ၢ်လၢအဝဲသ့ၣ် မၤဝဲလုၢ်လၢ်သကဲာ်ပဝးလၢ အတဂ့ၤဘၣ်တဖၣ်အဃိ ထံၣ်ဘၣ်တၢ်ကီတၢ်ခဲလီၤ. ပကဆိကမိၣ်ကွၢ် အ့လံၤအဂ့ၢ်, လၢညါန့ၣ် အဝဲတဒိကနၣ် ယဟိဝၤယွၤ အတၢ်သိၣ်တၢ်သီဘၣ်. အ့လံၤ အမိၢ်အပၢ် လၢအကွၢ်လုၢ်ဒိၣ်ထီၣ်အီၤန့ၣ် အမ့ၢ်ပှၤလၢ အအဲၣ်ယဟိဝၤယွၤ. ဘၣ်ဆၣ် ဖဲအ့လံၤ အနီၢ်ဒိၣ်ထီၣ်အခါ အဝဲရ့ဒီးအသကိးလၢ အတဂ့ၤဘၣ်တဖၣ်. အဃိ အ့လံၤန့ၣ် သူကသံၣ်မူၤဘှီး, မၤကမၣ်မုၣ်ကမၣ်ခွါ ဒီးဟုၣ်တၢ်လီၤ. အ့လံၤတဲဝဲလၢ အသးဒိၣ်ထီၣ်တၢ်ဆူၣ် ဒီးအမၤဆူၣ်မၤစိးတၢ်လီၤ. အတဲဝဲလၢ “တၢ်လၢယသ့ၣ်ညါလၢ ခရံာ်ဖိတဖၣ် တဘၣ်မၤဝဲန့ၣ် ယမၤအီၤကိးမံၤဒဲး.” ဘၣ်ဆၣ် အ့လံၤတသးပ့ၤနီၣ်ဝဲ တၢ်လၢအမၤလိဘၣ်ဝဲလၢ အနီၢ်ဆံးခါတဖၣ်ဘၣ်. အဃိ လၢခံန့ၣ် အဝဲက့ၤမၤလိလံာ်စီဆှံ ဒီးဂုာ်ကျဲးစၢးပာ်တ့ၢ်ကွံာ် လုၢ်လၢ်သကဲာ်ပဝးလၢ အတဂ့ၤဘၣ်တဖၣ် ဒီးဒိးဘျၢထံဖဲ ၂၀၀၀ နံၣ်. အ့လံၤအိၣ်မူဒ် ယဟိဝၤယွၤ အတၢ်သိၣ်တၢ်သီအဃိ ကဲဘျုးလၢအဂီၢ်ဒ်လဲၣ်. အ့လံၤတဲဝဲလၢ “ခဲအံၤန့ၣ် ယအိၣ်ဒီး တၢ်သူၣ်မံသးမုာ် ဒီးသးလၢအသ့ၣ်ညါဒၣ်တၢ်လၢ အကဆှီလံ.” * ဒ်တၢ်လဲၤခီဖျိတခါအံၤ ပာ်ဖျါထီၣ်ဝဲအသိး ပှၤလၢအတတူၢ်လိာ် ယဟိဝၤယွၤအတၢ်ဘျၢန့ၣ် မၤဘၣ်ဒိလီၤအသး. ဘၣ်ဆၣ် ယဟိဝၤယွၤ သးအိၣ်မၤစၢၤ အဝဲသ့ၣ် ဒ်သိးကဆီတလဲအသးအဂီၢ်လီၤ.
၁၁. ယဟိဝၤယွၤ သးဟ့ဝဲ တၢ်မနုၤတဖၣ်လဲၣ်.
၁၁ သးဟ့တၢ်လၢ ယဟိဝၤယွၤသးဟ့ဝဲ. (စံးထီၣ်ပတြၢၤ ၉၇:၁၀) လံာ်စီဆှံ ပာ်ဖျါထီၣ်ဝဲလၢ ယဟိဝၤယွၤသးဟ့ဝဲ “ပှၤအမဲာ်အိၣ်ထီၣ်ထီ, ပှၤအပျ့ၤလၢအကတိၤတၢ် ကဘျံးကဘျၣ်, ဒီးပှၤအစုလၢ အလူလီၤတၢ်သွံၣ်လၢ အတၢ်ဒဲးဘးတအိၣ်ဘၣ်.” (ကတိၤဒိ ၆:၁၆, ၁၇) တကးဒံးဘၣ် “ပှၤဘၣ်ဃးဒီးတၢ်သွံၣ်, ဒီးပှၤလီတၢ်န့ၣ် ယွၤသးဘၣ်အၢအီၤလီၤ.” (စံးထီၣ်ပတြၢၤ ၅:၆) ယဟိဝၤယွၤသးဟ့ဝဲ တၢ်ပာ်သူၣ်ပာ်သး ဒီးတၢ်မၤဒ်န့ၣ်တဖၣ်အဃိ ဖဲစီၤနိအၤအစိၤန့ၣ် အဝဲ မၤဟးဂီၤကွံာ်ဝဲ ပှၤအၢပှၤသီခဲလၢာ်လၢ အမၤဆူၣ်မၤစိးတၢ်လၢ ဟီၣ်ခိၣ်ချၢ. (၁ မိၤၡ့ ၆:၁၃) ဒီးအဂၤတခါန့ၣ် ဝံမံကၤတဲဝဲလၢ ယဟိဝၤယွၤ သးဟ့ဝဲ ပှၤလၢအကူၣ်ထီၣ်ဝဲလၢ အကမၤကတၢၢ်ကွံာ် အတၢ်ဆီဟံၣ်ဆီဃီဒီးအသးသမူတံၤသကိးလၢ အတၢ်ကမၣ်တအိၣ်ဘၣ်. ယဟိဝၤယွၤ တတူၢ်လိာ်ဝဲ ပှၤဒ်အံၤတဖၣ် အတၢ်ဘူၣ်ထီၣ်ဘါထီၣ်ဘၣ် ဒီးကစံၣ်ညီၣ်အဝဲသ့ၣ်လီၤ.—မၤလကံ ၂:၁၃-၁၆; ဧ့ၤဘြံၤ ၁၃:၄.
တၢ်လၢယဟိဝၤယွၤ တဲဝဲလၢအတဂ့ၤဘၣ်တဖၣ်န့ၣ် ပကြၢးသးဘၣ်အၢအီၤဒ် တၤသၣ်လၢအအုၣ်အသိး (ကွၢ်လံာ်အဆၢ ၁၁-၁၂)
၁၂. တၢ်ကတိၤလၢအမ့ၢ် “သးဟ့တၢ်အၢ” န့ၣ်အခီပညီဒ်လဲၣ်.
၁၂ ယဟိဝၤယွၤ အဲၣ်ဒိးလၢပက “သးဟ့တၢ်အၢ” လီၤ. (ရိမ့ၤ ၁၂:၉) တၢ်ကတိၤလၢ အမ့ၢ် “သးဟ့” တဖျၢၣ်အံၤန့ၣ် အသဟီၣ်ဆူၣ်မး ဒီးအအဲၣ်ဒိးတဲဝဲ ပကဘၣ်သးဟ့ တၢ်တမံၤမံၤ သပှၢ်ကတၢၢ် ဒီးသးဘၣ်အၢအီၤ. ဆိကမိၣ်ကွၢ် ပှၤမၢနအီၣ် တၤသၣ်လၢအအုၣ်တခွး. ဖဲန့ၣ်အခါ တမ့ၢ်နကဆိကမိၣ်လၢ နကအီၣ်ကွၢ်အီၤဘၣ်. ဒ်န့ၣ်အသိး လၢပတၢ်ဆိကမိၣ်အပူၤဒၣ်လဲာ် ပကဘၣ်သးဘၣ်အၢ တၢ်လၢယဟိဝၤယွၤ သးဟ့ဝဲလီၤ.
၁၃. ဘၣ်မနုၤအဃိ အရ့ဒိၣ်လၢ ပကဘၣ်ပၢၤ ပတၢ်ဆိကမိၣ်လဲၣ်.
၁၃ ပၢၤနတၢ်ဆိကမိၣ်. ညီနုၢ်န့ၣ်ပမၤဘၣ်တၢ်ဒ် တၢ်လၢပဆိကမိၣ်အီၤအသိး. အဃိ ယ့ၣ်ၡူးသိၣ်လိပှၤလၢ ပကဘၣ်ဟးဆှဲး တၢ်ဆိကမိၣ်လၢ ကဆှၢပှၤလၢ ပကမၤဘၣ်တၢ်ကမၣ်ဖးဒိၣ်. (မးသဲ ၅:၂၁, ၂၂, ၂၈, ၂၉) ပအဲၣ်ဒိးမၤ တၢ်ဘၣ်ကစၢ်ယွၤအသး အဃိ တၢ်ဆိကမိၣ်လၢအတဂ့ၤဘၣ် မ့ၢ်ဟဲနုာ်လီၤလၢပသးပူၤန့ၣ် အရ့ဒိၣ်ဒိၣ်မးလၢ ပကထုးထီၣ်ကွံာ်အီၤတဘျီဃီ.
၁၄. ပတၢ်စံးတၢ်ကတိၤန့ၣ် ပာ်ဖျါထီၣ်ဝဲ တၢ်မနုၤလဲၣ် ဒီးပကဘၣ် သံကွၢ်လီၤပသးဒ်လဲၣ်.
၁၄ ပၢၤနထးခိၣ်. ယ့ၣ်ၡူးတဲဝဲလၢ “တၢ်လၢအဟဲထီၣ်လၢ ပှၤကိာ်ပူၤန့ၣ် အိၣ်ပာ်စၢၤလၢ ပှၤသးပူၤလီၤ.” (မးသဲ ၁၅:၁၈) အါတက့ၢ်န့ၣ် ပတၢ်စံးတၢ်ကတိၤန့ၣ် ပာ်ဖျါထီၣ်ဝဲ တၢ်အိၣ်လၢပသးပူၤ. အဃိ သံကွၢ်လီၤနသးလၢ ‘ဖဲယသ့ၣ်ညါလၢ ယမ့ၢ်တဲတၢ်မ့ၢ်တၢ်တီန့ၣ် ယကထံၣ်ဘၣ် တၢ်ကီတၢ်ခဲအခါ မ့ၢ်ယတဲတၢ်တီတီလိၤလိၤဒံးဧါ, ယမ့ၢ်ပှၤလၢ အဆီဟံၣ်ဆီဃီအဃိ မ့ၢ်ယပလီၢ်ယသးဒ်သိး ယတလိာ်ကွဲတၢ်အဲၣ်ဒီး ပှၤဂၤတဂ့ၤဧါ, ယဟးဆှဲး တၢ်ကတိၤလၢ အလီၤသးဘၣ်အၢတဖၣ်ဧါ ဒီးဖဲပှၤမၤသးထီၣ်ယၤအခါ မ့ၢ်ယတဲဆၢအဝဲသ့ၣ် မုာ်မုာ်ဧါ.’ နမ့ၢ်သံကွၢ်လီၤနသးဒ်အံၤန့ၣ် ကကဲဘျုးဝဲဒိၣ်မး. ပတၢ်စံးတၢ်ကတိၤန့ၣ် လီၤဂာ်ဒ် လုၣ်လၢပှၤဆးတံၢ် ဆ့ကၤအတိၤလီၤ. လုၣ်တခါအံၤ မ့ၢ်တအိၣ်ဘၣ်န့ၣ် ဆ့ကၤကလီၤဃဲၣ်ကွံာ် ညီညီဖိလီၤ. ဒ်န့ၣ်အသိး ပမ့ၢ်တတဲ တၢ်ကတိၤလၢ အလီၤသးဘၣ်အၢ, အအၢအသီ ဒီးတဲလံၣ်တဲလီတၢ်လၢၤဘၣ်န့ၣ် ကညီလၢ ပကဘ့ၣ်လီၤကွံာ် လုၢ်လၢ်သကဲာ်ပဝး လၢအပူၤကွံာ်လီၤ.
၁၅. ပကဘၣ်ပျၤထီကွံာ် ပလုၢ်လၢ် သကဲာ်ပဝးလၢ အပူၤကွံာ် “လၢသ့ၣ်တၢၣ်အလိၤ” န့ၣ်အဲၣ်ဒိးတဲဝဲ အခီပညီဒ်လဲၣ်.
၁၅ မၤတၢ်လၢနကဘၣ်မၤအီၤ. ပကဘၣ်ဆီတလဲ ပတၢ်အိၣ်မူ မ့ၢ်တၢ်လၢ အရ့ဒိၣ်ထဲလဲၣ်န့ၣ် တၢ်မၢဖိပီလူး တဲဘၣ်ပှၤလၢ တၢ်အဒိတခါ. အတဲဝဲလၢ ပကဘၣ်ပျၤထီကွံာ် “ပလုၢ်လၢ် သကဲာ်ပဝးလၢ အပူၤကွံာ်” လၢ “သ့ၣ်တၢၣ်” အလိၤ. (ရိမ့ၤ ၆:၆) ပမ့ၢ်တဲလၢ ကျဲအဂၤတဘိန့ၣ် မ့ၢ်လၢပအဲၣ်ဒိး ကွၢ်လိယ့ၣ်ၡူး အဒိအတဲာ်အဃိ ပကဘၣ်မၤလီၤမၢ်ကွံာ် ပတၢ်ပာ်သူၣ်ပာ်သး ဒီးလုၢ်လၢ်သကဲာ်ပဝးလၢ ယဟိဝၤယွၤ သးဟ့ဝဲတဖၣ်. ပမ့ၢ်မၤဒ်န့ၣ်မး ပကအိၣ်ဒီး သးလၢအသ့ၣ်ညါဒၣ်တၢ်လၢ အကဆှီ ဒီးပကအိၣ်ဒီး တၢ်မုၢ်လၢ်လၢ ပကအိၣ်မူဘၣ် လီၤထူလီၤယိာ်. (ယိၤဟၣ် ၁၇:၃; ၁ ပ့းတရူး ၃:၂၁) ဒီးပကဘၣ်သ့ၣ်နီၣ်ထီၣ်လၢ တမ့ၢ်လၢယဟိဝၤယွၤ ကဆီတလဲ အတၢ်ဘျၢ ဒ်သိးကမၤသးခုပှၤအဂီၢ်ဘၣ်. အဃိ လၢပဝဲဒၣ်တခီန့ၣ် ပကဘၣ်ဆီတလဲပသး ဒီးမၤထွဲအတၢ်ဘျၢ.—ယၡါယၤ ၁:၁၆-၁၈; ၅၅:၉.
၁၆. ဘၣ်မနုၤအဃိ နပာ်လီၤနသးလၢ နကဆဲးတြီဆၢကွံာ် တၢ်မိၣ်န့ၢ်သးလီလၢ အတဂ့ၤဘၣ်တဖၣ်လဲၣ်.
၁၆ ဆဲးတြီဆၢ တၢ်မိၣ်န့ၢ်သးလီလၢ အကမၣ်တဖၣ်. ပဒိးဘျၢထံမ့ၢ်ဝံၤလံ သနာ်က့ ပကဘၣ်ဆဲးတြီဆှၢကွံာ် တၢ်သူၣ်လီသးကွံလၢ အတဂ့ၤဘၣ်တဖၣ်. ပကဆိကမိၣ်ကွၢ် ဒီပုၢ်ဝဲၢ်ခွါ မီၤရံစံၤအိၤ အတၢ်လဲၤခီဖျိ. ဖဲအသးစၢ်အခါ အမံဃုာ်အိၣ်ဃုာ်ဒီးပှၤပိာ်ခွါ. လၢခံ အထံၣ်လိာ်အသးဒီး ယဟိဝၤပှၤအုၣ်အသး ဒီးမၤလိလံာ်စီဆှံ. ဒီးအဝဲဆီတလဲ အတၢ်အိၣ်မူ ဒီးဒိးဘျၢထံဖဲ ၂၀၀၂. ခဲအံၤ ဒီပုၢ်ဝဲၢ်ခွါ မီၤရံစံၤအိၤ မၤယဟိဝၤယွၤ အတၢ်မၤ အနံၣ်အိၣ်အါမးလံသနာ်က့ အတဲဝဲလၢ “တဘျီတခီၣ် ယဘၣ်တြီဆှၢကွံာ် ယတၢ်သူၣ်လီသးကွံာ် လၢအတဂ့ၤဘၣ်တဖၣ်ဒံး.” ဘၣ်ဆၣ် မီၤရံစံၤအိၤ သးတဟးဂီၤဘၣ်. အတဲဝဲလၢ “ယသ့ၣ်ညါလၢ ယမ့ၢ်တလူၤဘၣ်ယသးန့ၣ် ယဟိဝၤယွၤ ကသးခုအဃိ ယသးမုာ်ထီၣ်ဝဲ.” *
၁၇. နဒိးန့ၢ်ဘၣ် တၢ်ဂံၢ်တၢ်ဘါလၢ နၤဘံဟၤ အတၢ်လဲၤခီဖျိဒ်လဲၣ်.
၁၇ ဃ့ယဟိဝၤယွၤ အတၢ်မၤစၢၤ, သန့ၤနသးလၢ ကစၢ်ယွၤ အသးစီဆှံ ဒီးတဘၣ်သန့ၤနသးလၢ နနီၢ်ကစၢ်တဂ့ၤ. (ကလၤတံ ၅:၂၂; ဖံလံးပံၤ ၄:၆) ပမ့ၢ်အဲၣ်ဒိးဘ့ၣ်လီၤကွံာ် လုၢ်လၢ်သကဲာ်ပဝး လၢအပူၤကွံာ် ဒီးဆဲးဘ့ၣ်လီၤဃာ်အီၤ ထီဘိန့ၣ် ပကဘၣ်ဂုာ်ကျဲးစၢး သပှၢ်ကတၢၢ်. ပကဆိကမိၣ်ကွၢ် ဒီပုၢ်ဝဲၢ်မုၣ်နၤဘံဟၤ အတၢ်လဲၤခီဖျိ. ဖဲအဝဲသးအိၣ်ဃုနံၣ်အခါ အပါပာ်တ့ၢ်ကွံာ်အီၤ. နၤဘံဟၤ တဲဝဲလၢ “ခီဖျိလၢ တၢ်ဂ့ၢ်တခါအံၤအဃိ ယသးဘၣ်ဒိဒိၣ်မး.” ဖဲနၤဘံဟၤ ဒိၣ်ထီၣ်အခါ အဝဲကဲထီၣ်ပှၤလၢအသးထီၣ်တၢ်ဆူၣ် ဒီးအသးချ့မး. အဝဲဆါဝဲ ကသံၣ်မူၤဘှီး ဒီးပှၤဖီၣ်န့ၢ်အီၤ ဒီးလီၤဘၣ်လၢဃိာ်ပူၤ တဘျုးနံၣ်ညါ. ဒီးယဟိဝၤပှၤအုၣ်အသးလၢ အလဲၤအိၣ်သကိးပှၤဃိာ်ဖိန့ၣ် မၤလိလံာ်စီဆှံဒီးအီၤ. အဃိ နၤဘံဟၤ ပာ်တ့ၢ်ကွံာ်ဝဲ အလုၢ်လၢ်သကဲာ်ပဝးလၢ အတဂ့ၤဘၣ်တဖၣ်. အဝဲတဲဝဲလၢ “ယလုၢ်လၢ်သကဲာ်ပဝးတနီၤန့ၣ် ယပာ်တ့ၢ်ဘၣ်အီၤ ညီညီဖိလီၤ. ဘၣ်ဆၣ် ယဖၠးမီာ်ကန့ၢ်အဂီၢ်ဒု ကီဒိၣ်မး.” နၤဘံဟၤ ဖၠးမီာ်ကန့ၢ်အဂီၢ် တံာ်တာ်ဝဲ တနံၣ်ဘျဲၣ်ညါ. အမၤဝဲန့ၢ်ဒ်လဲၣ်. အဝဲတဲဝဲလၢ “တၢ်ဃ့ဘါထုကဖၣ်ထီဘိန့ၣ် မၤစၢၤယၤဒ်သိး ယဖၠးမီာ်ကန့ၢ်အဂီၢ်.” ခဲအံၤ နၤဘံဟၤ တဲဘၣ်ပှၤဂၤလၢ “ယဆီတလဲယသး ဒ်သိးယကမၤ တၢ်ဘၣ်ယဟိဝၤယွၤအသး န့ၢ်အဃိ ယနာ်လၢ ပှၤတဂၤဂ့ၤတဂၤဂ့ၤ မၤဝဲကန့ၢ်စ့ၢ်ကီး.” *
နတုၤထီၣ်ထီၣ်ဘးလၢ တၢ်ဒိးဘျၢထံအဂီၢ်သ့
၁၈. ဒ် ၁ ကရံၣ်သူး ၆:၉-၁၁ ပာ်ဖျါထီၣ်ဝဲအသိး ကစၢ်ယွၤအခ့အပှၤအါဂၤန့ၣ် ပာ်တ့ၢ်ကွံာ် တၢ်မနုၤတဖၣ် န့ၢ်ဝဲလဲၣ်.
၁၈ ပှၤပိာ်မုၣ်ပိာ်ခွါတနီၤ လၢတၢ်မၢဖိအစိၤန့ၣ် တချုးလၢ ကစၢ်ယွၤဃုထၢထီၣ်အီၤလၢ ကပၢတၢ်ဒီးယ့ၣ်ၡူးခရံာ်ဒံးဘၣ်အခါ အဝဲသ့ၣ် အိၣ်ဒီးလုၢ်လၢ်သကဲာ်ပဝးလၢ အတဂ့ၤဘၣ်. အဒိ, အဝဲသ့ၣ်တနီၤန့ၣ် မ့ၢ်တ့ၢ်ပှၤလၢ အဟုၣ်တၢ်, အအဲၣ်ဘၢမါအဲၣ်ဘၢဝၤ, မံဃုာ်အိၣ်ဃုာ်ဒီးမုၣ်ဒ်သိးသိးခွါဒ်သိးသိး. ဘၣ်ဆၣ် ခီဖျိလၢ ကစၢ်ယွၤအသးစီဆှံ အတၢ်မၤစၢၤအဃိ အဝဲသ့ၣ်ဆီတလဲ အတၢ်အိၣ်မူန့ၢ်ဝဲ. (ဖး ၁ ကရံၣ်သူး ၆:၉-၁၁.) ဒ်န့ၣ်အသိး ဆၢကတီၢ်ခဲအံၤစ့ၢ်ကီး လံာ်စီဆှံ မၤစၢၤဝဲ ပှၤလၢအကကွဲၢ်တဖၣ် ဒ်သိးအဆီတလဲ အတၢ်အိၣ်မူကန့ၢ်အဂီၢ်. * အဝဲသ့ၣ် ကဆီတလဲ အတၢ်အိၣ်မူအဂီၢ် ကီဒိၣ်မး ဘၣ်ဆၣ် ဆီတလဲအသးန့ၢ်ဝဲ. အဝဲသ့ၣ် အဒိအတဲာ်န့ၣ် ပာ်ဖျါထီၣ်ဝဲလၢ နၤစ့ၢ်ကီး နဆီတလဲနတၢ်အိၣ်မူ ဒီးနပာ်ပတုာ်ကွံာ် လုၢ်လၢ်သကဲာ်ပဝးလၢ အတဂ့ၤ ဒီးနတုၤထီၣ်ထီၣ်ဘးလၢ နကဒိးဘျၢထံအဂီၢ်သ့.
၁၉. တၢ်မၤလိ လၢခံတခါန့ၣ် ပကတဲသကိး တၢ်ဂ့ၢ်မနုၤလဲၣ်.
၁၉ ပှၤလၢအအဲၣ်ဒိး ဒိးဘျၢထံတဂၤန့ၣ် ကဘၣ်ပာ်တ့ၢ်ကွံာ် လုၢ်လၢ်သကဲာ်ပဝး လၢအပူၤကွံာ် တကးဒံးဘၣ် ကဘၣ်ကူထီၣ်သိးထီၣ် လုၢ်လၢ်သကဲာ်ပဝး လၢအသီ. တၢ်မၤလိလၢခံတခါန့ၣ် ပကတဲသကိး ပကူထီၣ်သိးထီၣ် လုၢ်လၢ်သကဲာ်ပဝးအသီ ကသ့ဒ်လဲၣ် ဒီးပှၤဂၤကမၤစၢၤပှၤ ဒ်လဲၣ်.
တၢ်သးဝံၣ် ၄၁ ဒိကနၣ်ယတၢ်ထုကဖၣ်
^ လံာ်အဆၢ. 5 ဒ်သိးပကတုၤထီၣ်ထီၣ်ဘးလၢ ပကဒိးဘျၢထံအဂီၢ် ပကဘၣ်သးအိၣ် ဆီတလဲပသး. လၢတၢ်မၤလိအံၤ အပူၤ ပကတဲသကိး ဘၣ်ဃးဒီး လုၢ်လၢ်သကဲာ်ပဝး လၢအပူၤကွံာ်န့ၣ် မ့ၢ်မနုၤလဲၣ်, ဘၣ်မနုၤအဃိ ပကဘၣ်ပာ်တ့ၢ်ကွံာ်အီၤလဲၣ် ဒီးပမၤအီၤ ကသ့ဒ်လဲၣ်. ဒီးတၢ်မၤလိလၢခံတခါန့ၣ် ပကတဲသကိး ဘၣ်ဃးဒီး ဖဲပဒိးဘျၢထံဝံၤ အလီၢ်ခံဒၣ်လဲာ် ပဆဲးကူထီၣ်သိးထီၣ် လုၢ်လၢ်သကဲာ်ပဝးအသီ ကသ့ဒ်လဲၣ်.
^ လံာ်အဆၢ. 3 တၢ်ကတိၤအခီပညီ– ပ “ဘ့ၣ်လီၤကွံာ် လုၢ်လၢ်သကဲာ်ပဝး လၢအပူၤကွံာ်” န့ၣ်အဲၣ်ဒိးတဲဝဲ ပပာ်တ့ၢ်ကွံာ် တၢ်ပာ်သူၣ်ပာ်သး ဒီးတၢ်မိၣ်န့ၢ်သးလီ လၢအတဘၣ် ယဟိဝၤယွၤအသးတဖၣ်. ဒီးပကြၢးပာ်တ့ၢ်ကွံာ် တၢ်သ့ၣ်တဖၣ်အံၤ တချုးလၢပဒိးဘျၢထံဒံးဘၣ်အခါ.—အ့းဖ့းစူး ၄:၂၂.
^ လံာ်အဆၢ. 10 နမ့ၢ်အဲၣ်ဒိးသ့ၣ်ညါအါထီၣ် တၢ်ဂ့ၢ်န့ၣ် ကွၢ်လၢ “The Bible Changes Lives—‘I Needed to Return to Jehovah,’” published in the April 1, 2012, issue of The Watchtower.
^ လံာ်အဆၢ. 16 နမ့ၢ်အဲၣ်ဒိးသ့ၣ်ညါအါထီၣ် တၢ်ဂ့ၢ်န့ၣ် ကွၢ်လၢ “The Bible Changes Lives—‘They Were Very Kind to Me,’” published in the May 1, 2012, issue of The Watchtower.
^ လံာ်အဆၢ. 17 နမ့ၢ်အဲၣ်ဒိးသ့ၣ်ညါအါထီၣ် တၢ်ဂ့ၢ်န့ၣ် ကွၢ်လၢ “The Bible Changes Lives—‘I Became an Angry, Aggressive Young Woman,’” published in the October 1, 2012, issue of The Watchtower.
^ လံာ်အဆၢ. 18 ကွၢ်တၢ်လွံၢ်နၢၣ် လၢအမ့ၢ် “ လံာ်စီဆှံ ဆီတလဲ ပတၢ်အိၣ်မူ.”
^ လံာ်အဆၢ. 64 တၢ်တဲဖျါထီၣ်တၢ်ဂီၤ အခီပညီ– ပပာ်တ့ၢ်ကွံာ် တၢ်ပာ်သူၣ်ပာ်သး ဒီးလုၢ်လၢ်သကဲာ်ပဝးလၢ အတဂ့ၤဘၣ်တဖၣ်န့ၣ် လီၤဂာ်ဒ် ပဘ့ၣ်လီၤကွံာ် ဆ့ကၤအလီၢ်လံၤ.
