တၢ်မၤလိ ၁၁
နအိၣ်ကတီၤပာ်သးလၢ တၢ်ဒိးဘျၢထံအဂီၢ် ကသ့ဒ်လဲၣ်
“တၢ်လၢအတြီယၤ ဒ်သိးယသု တဒိးဘျၢထံတဂ့ၤအဂီၢ်န့ၣ် အိၣ်တမံၤမံၤဧါ.”—မၤတၢ် ၈:၃၆.
တၢ်သးဝံၣ် ၅၀ ယတၢ်ထုကဖၣ်လၢ ယဟ့ၣ်လီၤယသး
တၢ်မၤလိအံၤ အတၢ်တိာ်ပာ် a
ပှၤသးစၢ် ဒီးပှၤသးပှၢ် လၢအအိၣ်လၢ ဟီၣ်ခိၣ်ဒီဘ့ၣ်ညါန့ၣ် အဝဲသ့ၣ် လဲၤထီၣ်လဲၤထီ လၢနီၢ်သးတခီ ဒီးအဝဲသ့ၣ် ဒိးဘျၢထံ (ကွၢ်တၢ်မၤလိ ၁၁, လံာ်အဆၢ ၁-၂)
၁-၂. နမ့ၢ်ဆိမိၣ်လၢ နဒိးဘျၢထံတန့ၢ်ဒံးဘၣ်န့ၣ် ဘၣ်မနုၤအဃိ နတလိၣ် သးဆံးဘၣ်လဲၣ်. (ကွၢ်တၢ်ဂီၤလၢလံာ်ကုခိၣ်.)
နမ့ၢ်ဆိမိၣ်လၢ နက ဒိးဘျၢထံန့ၣ် နတၢ်ဆိမိၣ်တခါအံၤ ဂ့ၤဒိၣ်မး. သနာ်က့ နကဒိးဘျၢဘၣ်ထံအဂီၢ် နမၤတၢ်လၢ နဘၣ်မၤလံဧါ. နမ့ၢ်ဆိမိၣ်လၢ နဒိးဘျၢထံန့ၢ်လံ ဒီးတၢ်အိၣ်ဖှိၣ်သးပှၢ်စ့ၢ်ကီး မ့ၢ်တဲနၤလၢ နဒိးဘျၢထံန့ၢ်လံန့ၣ် အိၣ်ခီးဖးယံာ်လၢၤတဂ့ၤ. နမ့ၢ်ဒိးဘျၢထံန့ၣ် နကမၤဘၣ် ယဟိဝၤယွၤ အတၢ်မၤအါအါ ဒီးနကန့ၢ်ဘၣ် တၢ်ဆိၣ်ဂ့ၤဒီဒူၣ်.
၂ ဘၣ်သ့ၣ်သ့ၣ် ပှၤတဂၤဂၤ ကတဲနၤ မ့တမ့ၢ် နကဆိမိၣ်လီၤသးလၢ နဒိးဘျၢထံခဲအံၤ တန့ၢ်ဒံးဘၣ် ဒီးနဘၣ်ဆီတလဲသးအိၣ်ဒံး. ပှၤမ့ၢ်တဲနၤဒ်န့ၣ် ဒီးနမ့ၢ်သ့ၣ်ညါလီၤသးန့ၣ် သးဆံးတဂ့ၤ. နကဲပှၤသးစၢ်မ့ၢ်ဂ့ၤ ပှၤသးပှၢ်မ့ၢ်ဂ့ၤ နဆီတလဲနသးတုၤလၢ နတုၤထီၣ်ထီၣ်ဘးလၢ တၢ်ဒိးဘျၢထံအဂီၢ်သ့.
“တၢ်လၢအတြီယၤ . . . အိၣ်တမံၤမံၤဧါ”
၃. ပှၤအဲၤသံအီးပး အပဒိၣ်တဂၤ တဲစီၤဖံလံးပူးဒ်လဲၣ် ဒီးတၢ်သံကွၢ် အိၣ်ထီၣ်ဒ်လဲၣ်. (မၤတၢ် ၈:၃၆, ၃၈)
၃ ဖး မၤတၢ် ၈:၃၆, ၃၈. ပှၤအဲၤသံအီးပး အပဒိၣ်တဂၤ တဲဘၣ်စီၤဖံလံးပူး လၢအမ့ၢ် ပှၤစံၣ်တဲၤတဲလီၤ တၢ်သးခုကစီၣ်န့ၣ်လၢ “တၢ်လၢအတြီယၤ ဒ်သိးယသု တဒိးဘျၢထံတဂ့ၤအဂီၢ်န့ၣ် အိၣ်တမံၤမံၤဧါ.” ပထံၣ်ဘၣ်လၢ ပှၤအဲၤသံအီးပးဖိတဂၤအံၤ ဘၣ်သးဒိးဘျၢထံနာ်က့ မ့ၢ်အတုၤထီၣ်ထီၣ်ဘးလၢ ကဒိးဘျၢထံအဂီၢ်လံဧါ.
ပှၤအဲၤသံအီးပး အပဒိၣ်တဂၤအံၤ ဆၢတဲာ်လီၤအသးလၢ အကမၤလိအါထီၣ် ယဟိဝၤယွၤအဂ့ၢ် (ကွၢ်လံာ်အဆၢ ၄)
၄. ပှၤအဲၤသံအီးပးဖိတဂၤအံၤ ဘၣ်သးဃုသ့ၣ်ညါအါထီၣ်တၢ်ဒံးန့ၣ် ပသ့ၣ်ညါဘၣ်ဒ်လဲၣ်.
၄ ပထံၣ်ဘၣ်လၢ ပှၤအဲၤသံအီးပးဖိတဂၤအံၤ “လဲၤ ဘူၣ်ထီၣ်ဘါထီၣ်တၢ်လၢ ဝ့ၢ်ယရူၤၡလ့ၣ် အပူၤ.” (မၤတၢ် ၈:၂၇) အဃိ ဘၣ်သ့ၣ်သ့ၣ် အဆီတလဲက့ၤ အတၢ်ဘူၣ်တၢ်ဘါလၢ ပှၤယူဒၤဖိ အတၢ်ဘူၣ်တၢ်ဘါလံ. ဒီးဘၣ်သ့ၣ်သ့ၣ် အမၤလိဘၣ် ယဟိဝၤယွၤအဂ့ၢ်လၢ ဧ့ၤဘြံၤအလံာ်စီဆှံ တကတြူၢ်အပူၤ ဒီးအသးဆူၣ်လၢ အကဃုသ့ၣ်ညါအါထီၣ်တၢ်ဒံး. ဖဲစီၤဖံလံးပူး ထံၣ်လိာ်သးဒီး ပှၤအဲၤသံအီးပးဖိတဂၤအံၤ လၢကျဲအခါ စီၤဖံလံးပူး ထံၣ်ဝဲလၢအဖး ဝံယၡါယၤအလံာ်. (မၤတၢ် ၈:၂၈) တၢ်လၢအဖးဝဲန့ၣ် အကဲဝံအတၢ်စံးပာ်အဃိ အကဲတၢ်မ့ၢ်တၢ်တီလၢ အဒိၣ်အယိာ်. ပထံၣ်ဘၣ်လၢ ပဒိၣ်တဂၤအံၤ တဘၣ်သးသ့ၣ်ညါဝဲထဲ တၢ်မ့ၢ်တၢ်တီ အခီၣ်ထံးခီၣ်ဘိဘၣ်. အဘၣ်သး သ့ၣ်ညါအါထီၣ်တၢ်ဒီဒူၣ်ဒံး.
၅. ပှၤအဲၤသံအီးပးဖိတဂၤအံၤ အမၤထွဲဝဲ တၢ်လၢအမၤလိဘၣ်ဝဲ ဒ်လဲၣ်.
၅ ပှၤအဲၤသံအီးပးဖိတဂၤအံၤ အကဲဝဲ အဲၤသံအီးပး အနီၢ်ပၤမုၣ်ကၣ်ဒါက့ၤ အပဒိၣ်. ဒီးအ “ပၢၤဝဲ နီၢ်ပၤမုၣ်အံၤ အတၢ်ထူးတၢ်တီၤ ခဲလၢာ်.” (မၤတၢ် ၈:၂၇) အဃိ အမူဒါအိၣ်အါ ဒီးအတၢ်မၤစ့ၢ်ကီး အိၣ်အါမး. ဘၣ်ဆၣ် အပာ်လီၤတၢ်ဆၢကတီၢ်လၢ အကဘူၣ်ထီၣ်ဘါထီၣ် ယဟိဝၤယွၤ. အမၤလိဘၣ် တၢ်မ့ၢ်တၢ်တီအဃိ အသးခုဒိၣ်မး တကးဒံးဘၣ် အမၤထွဲဝဲ တၢ်လၢအမၤလိဘၣ်ဝဲစ့ၢ်ကီး. ပှၤအဲၤသံအီးပးဖိတဂၤအံၤ အအိၣ်လၢ ကီၢ်အဲၤသံအီးပး ဒီးဒ်သိး အကဘူၣ်ထီၣ်ဘါထီၣ်ဘၣ် ယဟိဝၤယွၤအဂီၢ် အလဲၤလၢ တၢ်လုၢ်ဟံၣ်လၢ ဝ့ၢ်ယရူၤၡလ့ၣ်အပူၤ. ပထံၣ်ဘၣ်လၢ အမ့ၢ်ဘၣ်လဲၤတၢ်ဖၣ်ယံၤ, အတၢ်ဆၢကတီၢ် ဒီးအကျိၣ်အစ့ မ့ၢ်လၢာ်ဒီဒူၣ်နာ်က့ အမၤဝဲကဲ.
၆-၇. ပှၤအဲၤသံအီးပးဖိတဂၤအံၤ မၤအါထီၣ် အတၢ်အဲၣ်ယဟိဝၤယွၤ ဒ်လဲၣ်.
၆ ပှၤအဲၤသံအီးပးဖိတဂၤအံၤ အမၤလိဘၣ် တၢ်မ့ၢ်တၢ်တီအသီ အါမးလၢ စီၤဖံလံးပူးအအိၣ်. ဒီးအသ့ၣ်ညါဘၣ်စ့ၢ်ကီးလၢ ယ့ၣ်ၡူးကဲမ့းၡံအၤ. (မၤတၢ် ၈:၃၄, ၃၅) ပှၤတဂၤအံၤ အသ့ၣ်ညါဘၣ် တၢ်လၢယ့ၣ်ၡူးမၤန့ၢ်အီၤအဃိ အသးခုဒိၣ်မး. အဃိ အမၤဝဲဒ်လဲၣ်. အမ့ၢ်တဆီတလဲ အတၢ်ဘူၣ်တၢ်ဘါ ဒီးမ့ၢ်ဆဲးအိၣ်လၢ ပှၤယူဒၤဖိအတၢ်ဘူၣ်တၢ်ဘါန့ၣ်သ့. ဘၣ်ဆၣ် အအဲၣ် ယဟိဝၤယွၤ ဒီးယ့ၣ်ၡူး ဒိၣ်ထီၣ်အဃိ အဆၢတဲာ်လီၤသးလၢ အကဒိးဘျၢထံ ဒီးကဲထီၣ်ယ့ၣ်ၡူး အပျဲၢ်အဘီၣ်. စီၤဖံလံးပူး ထံၣ်ဝဲလၢ ပှၤတဂၤအံၤ ဒိးဘျၢထံန့ၢ်လံအဃိ အဒိးဘျၢအီၤလၢထံ.
၇ နမ့ၢ်ကွၢ်လိ ပှၤအဲၤသံအီးပးဖိတဂၤအံၤန့ၣ် ခါဆူညါ နၤစ့ၢ်ကီး နဒိးဘျၢထံသ့ကၠ့ၤ. ဒီးဒ်သိး ပှၤအဲၤသံအီးပးဖိတဂၤအံၤ တဲဝဲန့ၣ် နၤစ့ၢ်ကီး နကတဲလီၤနသးလၢ “တၢ်လၢအတြီယၤ ဒ်သိးယသု တဒိးဘျၢထံတဂ့ၤအဂီၢ်န့ၣ် အိၣ်တမံၤမံၤဧါ.” ပထံၣ်ဘၣ်လၢ ပှၤအဲၤသံအီးပးဖိတဂၤအံၤ အဆဲးမၤလိတၢ်, အမၤထွဲတၢ်လၢ အမၤလိဘၣ်ဝဲ ဒီးအမၤအါထီၣ် အတၢ်အဲၣ်ယဟိဝၤယွၤ. အဃိ နကွၢ်လိအီၤ ကသ့ဒ်လဲၣ်န့ၣ် ခဲအံၤပကတဲသကီး.
ဆဲးမၤလိအါထီၣ်တၢ်
၈. ယိၤဟၣ် ၁၇:၃ တဲပှၤလၢ ပကဘၣ်မၤ မနုၤလဲၣ်.
၈ ဖး ယိၤဟၣ် ၁၇:၃. ယ့ၣ်ၡူး အတၢ်ကတိၤအံၤ မၤစၢၤပှၤအါဂၤလၢ ကဆၢတဲာ်လီၤသးလၢ ကမၤလိ လံာ်စီဆှံ ဒီးဘၣ်သ့ၣ်သ့ၣ် အတၢ်ကတိၤအံၤ မၤစၢၤနၤကၠ့ၤ. ဒီးယ့ၣ်ၡူး အတၢ်ကတိၤအံၤ ဆီၣ်ထွဲပှၤလၢ ပကဆဲးမၤလိအါထီၣ်တၢ်စ့ၢ်ကီး. အဃိ ပကဘၣ် “သ့ၣ်ညါထီၣ် . . . ကစၢ်ယွၤ အမ့ၢ်အတီထဲ တဂၤဧိၤ” အဂ့ၢ်ထီဘိ. (စံၣ်တဲၤတဲလီၤတၢ် ၃:၁၁) ဒီးပက ဆဲးမၤလိဘၣ်အဂ့ၢ် လီၤထူလီၤယိာ်. ပမၤလိ ယဟိဝၤယွၤ အဂ့ၢ်မ့ၢ်အါထီၣ်န့ၣ် ပတၢ်ရ့လိာ်သးဒီးအီၤ ကဂ့ၤဒိၣ်ထီၣ်.—စံးထီၣ်ပတြၢၤ ၇၃:၂၈.
၉. ပမၤလိဘၣ် တၢ်မ့ၢ်တၢ်တီ အခီၣ်ထံးခီၣ်ဘိလံနာ်က့ ပကဘၣ်ဆဲးမၤဒံး မနုၤလဲၣ်.
၉ ဖဲပမၤလိယဟိဝၤယွၤအဂ့ၢ် သီသီခါန့ၣ် ပမၤလိဆိ လံာ်စီဆှံတၢ်မ့ၢ်တၢ်တီ အခီၣ်ထံးခီၣ်ဘိတဖၣ်. အဒိ ဖဲတၢ်မၢဖိပီလူး ကွဲးလံာ်ပရၢလၢ ပှၤဧ့ၤဘြံၤဖိအအိၣ်အခါ အကီးဝဲ တၢ်မ့ၢ်တၢ်တီ အခီၣ်ထံးခီၣ်ဘိတဖၣ်အံၤလၢ “ကစၢ်ယွၤ အကလုၢ်ကထါ အခီၣ်ထံးခီၣ်ဘိ” ဒီး “တၢ်သိၣ်လိ အခီၣ်ထံးခီၣ်ဘိ.” တၢ်မ့ၢ်တၢ်တီ အခီၣ်ထံးခီၣ်ဘိတဖၣ်အံၤ စီၤပီလူး တထံၣ်ဆံးဝဲဘၣ်. အထိၣ်သတြီၤဝဲ ဒ်သိးဒီး တၢ်နုၢ်ထံလၢ အမၤဒိၣ်ထီၣ်ဖိသၣ်. (ဧ့ၤဘြံၤ ၅:၁၂; ၆:၁) ဒီးအဟ့ၣ်ကူၣ်စ့ၢ်ကီး ခရံာ်ဖိကီးဂၤဒဲးလၢ အဝဲသ့ၣ် တဘၣ်သးမံထဲလၢ အမၤလိဘၣ် တၢ်မ့ၢ်တၢ်တီ အခီၣ်ထံးခီၣ်ဘိတဖၣ်ဘၣ်. အဝဲသ့ၣ်ကဘၣ် ဆဲးမၤလိအါထီၣ် တၢ်မ့ၢ်တၢ်တီ အဒိၣ်အယိာ်လၢ လံာ်စီဆှံပူၤ. အဃိ နၤမီၤ နဘၣ်သး မၤလိတၢ်မ့ၢ်တၢ်တီ အဒိၣ်အယိာ်လၢ လံာ်စီဆှံပူၤဧါ. နသးဆူၣ်လၢ နကဆဲးမၤလိအါထီၣ် ယဟိဝၤယွၤအဂ့ၢ် ဒီးအတၢ်တိာ်ပာ်ဧါ.
၁၀. ဘၣ်မနုၤအဃိ ပှၤတနီၤန့ၣ် တဘၣ်သးမၤလိတၢ်ဘၣ်လဲၣ်.
၁၀ ပဝဲအါဂၤန့ၣ် တဘျီတခီၣ် ပမၤလိတၢ်တမုာ်ဘၣ်. နၤမီၤ နမၤလိတၢ်မုာ်ကၠ့ၤဧါ. ဖဲနထီၣ်ကၠိခါန့ၣ် နဖးဘၣ်လံာ် ဒီးမၤလိဘၣ်တၢ် မူာ်မူာ်နီၢ်နီၢ်ကၠ့ၤဧါ. နဆိမိၣ်လၢ နမၤလိတၢ်န့ၣ် အကဲဘျုး လၢနဂီၢ်ကၠ့ၤဧါ. မ့တမ့ၢ်ဘၣ်န့ၣ် နဆိမိၣ်လၢ နမၤလိတၢ်နာ်က့ နတလဲၤထီၣ်လဲၤထီဘၣ်ဟီဧါ. နမ့ၢ်ဆိမိၣ်ဒ်န့ၣ်န့ၣ် တမ့ၢ်ထဲနၤတဂၤဘၣ် အဃိတဘၣ်သးဆံးတဂ့ၤ. ယဟိဝၤယွၤန့ၣ် အလၢအပှဲၤ ဒီးအကဲသရၣ် လၢအဂ့ၤကတၢၢ် တဂၤအဃိ အမၤစၢၤနၤသ့.
၁၁. ယဟိဝၤယွၤ ကဲ ‘ပသရၣ် လၢအဒိၣ်အထီတဂၤ’ န့ၣ်အပာ်ဖျါထီၣ်ဝဲဒ်လဲၣ်.
၁၁ ယဟိဝၤယွၤန့ၣ် အကီးလီၤသးလၢ ‘ပသရၣ် လၢအဒိၣ်အထီတဂၤ.’ (ယၡါယၤ ၃၀:၂၀, ၂၁) ဒီးအကဲသရၣ်တဂၤလၢ အသးစူၤ, အသးဂ့ၤ, အနၢ်ပၢၢ်စၢၤပှၤ ဒီးအဃုကွၢ်တၢ်ဂ့ၤ လၢအအိၣ်လၢ ပသးပူၤ. (စံးထီၣ်ပတြၢၤ ၁၃၀:၃) အဃိ တၢ်လၢပမၤတသ့ဘၣ်န့ၣ် အတမၢပမၤဘၣ်. တကးဒံးဘၣ် ပခိၣ်နူာ်လၢ ယဟိဝၤယွၤ တ့လီၤဝဲန့ၣ် အလီၤကမၢကမၣ်ဒိၣ်မး. (စံးထီၣ်ပတြၢၤ ၁၃၉:၁၄) ပဝဲပှၤဟီၣ်ခိၣ်ဖိန့ၣ် ပဘၣ်သး မၤလိတၢ် ဒီးဃုသ့ၣ်ညါတၢ်. ဒီးပတၢ်ဘၣ်တ့ကစၢ်စ့ၢ်ကီး အဘၣ်သးလၢ ပမၤလိတၢ်ကမုာ် ဒီးပကဆဲးမၤလိတၢ်ထီဘိ. အဃိ စးထီၣ်လၢခဲအံၤန့ၣ် ပကဘၣ်မၤအါထီၣ်ပတၢ် “သးအိၣ်ဆၢန့ၢ်ဘၣ်” လံာ်စီဆှံ တၢ်မ့ၢ်တၢ်တီ. (၁ ပ့းတရူး ၂:၂) ပာ်လီၤဖီတၢၣ်လၢ နမၤအီၤန့ၢ် ဒီးပာ်လီၤနသးလၢ နကဖးလံာ်စီဆှံ ဒီးမၤလိအီၤထီဘိ. (ယိၤၡူ ၁:၈) နမ့ၢ်မၤဒ်န့ၣ်န့ၣ် ယဟိဝၤယွၤ ကမၤစၢၤနၤဒ်သိး နဖးဒီးနမၤလိအဂ့ၢ် ကမုာ်အါထီၣ်.
၁၂. ဘၣ်မနုၤအဃိ ပကဘၣ်မၤလိ ယ့ၣ်ၡူးအတၢ်အိၣ်မူ ဒီးအတၢ်စံၣ်တဲၤတဲလီၤတၢ်မၤ အဂ့ၢ်လဲၣ်.
၁၂ ပအိၣ်မူဘၣ်လၢ တၢ်ဆၢကတီၢ်ကီခဲအဃိ ပမ့ၢ်ဘၣ်သးဆဲးမၤ ယဟိဝၤယွၤ အတၢ်မၤထီဘိန့ၣ် ပကဘၣ် ကွၢ်လိယ့ၣ်ၡူး ဒီးယီၢ်အခီၣ်လီၢ် ဘူးဘူးတံၢ်တံၢ်. (၁ ပ့းတရူး ၂:၂၁) အဃိ ပကဘၣ် ပာ်လီၤတၢ်ဆၢကတီၢ်လၢ ပကဆိမိၣ်ထံ ယ့ၣ်ၡူးအတၢ်အိၣ်မူ ဒီးအတၢ်စံၣ်တဲၤတဲလီၤတၢ်မၤ အဂ့ၢ်ထီဘိ. ယ့ၣ်ၡူးတဲဘၣ် အပျဲၢ်အဘီၣ်တဖၣ်လၢ အဝဲသ့ၣ် ကထံၣ်ဘၣ် တၢ်ကီတၢ်ခဲ. (လူၤကၣ် ၁၄:၂၇, ၂၈) ဒ်ယ့ၣ်ၡူးဆဲးတီဒီး ယဟိဝၤယွၤအသိး အနာ်ဝဲသပှၢ်တၢၢ်လၢ အပျဲၢ်အဘီၣ်စ့ၢ်ကီး ကဆဲးတီဒီး ယဟိဝၤယွၤ. (ယိၤဟၣ် ၁၆:၃၃) အဃိ ပာ်လီၤဖီတၢၣ်လၢ နကမၤလိယ့ၣ်ၡူးအဂ့ၢ် ဒီးမၤထွဲ အဒိအတဲာ် လၢနတၢ်အိၣ်မူပူၤကီးနံၤဒဲး.
၁၃. နကဘၣ်ဆဲးဃ့အါထီၣ် ယဟိဝၤယွၤ တၢ်မနုၤလဲၣ် ဒီးဘၣ်မနုၤအဃိလဲၣ်.
၁၃ ထဲနသ့ၣ်ညါ လံာ်စီဆှံ တၢ်မ့ၢ်တၢ်တီန့ၣ် တလၢပှဲၤဒံးဘၣ်. နတၢ်သ့ၣ်ညါအံၤ ကဘၣ်မၤစၢၤနၤလၢ နကဘၣ်သး မၤလိအါထီၣ် ယဟိဝၤယွၤအဂ့ၢ် ဒီးကဘၣ်မၤစၢၤနၤလၢ နတၢ်အဲၣ် ဒီးနတၢ်နာ် ယဟိဝၤယွၤ ကဒိၣ်ထီၣ်စ့ၢ်ကီး. (၁ ကရံၣ်သူး ၈:၁-၃) အဃိ ဖဲနဆဲးမၤလိ ယဟိဝၤယွၤ အဂ့ၢ်အခါ ဃ့အီၤလၢ အကမၤစၢၤနၤဒ်သိး နတၢ်နာ်ကအါထီၣ်. (လူၤကၣ် ၁၇:၅) နမ့ၢ်ဃ့အီၤ ဒ်အံၤန့ၣ် အကမၤစၢၤနၤ သပှၢ်တၢၢ်. ဒီးနမ့ၢ်သ့ၣ်ညါအါထီၣ် လံာ်စီဆှံ တၢ်မ့ၢ်တၢ်တီန့ၣ် နတၢ်နာ်ကအါထီၣ် ဒီးနကဘၣ်သး မၤထွဲက့ၤအီၤလၢ နတၢ်အိၣ်မူပူၤ.—ယၤကိာ် ၂:၂၆.
ဆဲးမၤထွဲ တၢ်လၢနမၤလိဘၣ်တဖၣ်
တချုးထံလုၢ်ဘၢတၢ်ဒံးဘၣ်န့ၣ် စီၤနိအၤ ဒီးအဟံၣ်ဖိဃီဖိ မၤထွဲဝဲဒ် ကစၢ်ယွၤတဲအဝဲသ့ၣ် (ကွၢ်လံာ်အဆၢ ၁၄)
၁၄. ဒ်တၢ်မၢဖိပ့းတရူး ပာ်ဖျါထီၣ်ဝဲအသိး ဘၣ်မနုၤအဃိ အရ့ဒိၣ်လၢ ပကဘၣ်ဆဲးမၤထွဲ တၢ်လၢပမၤလိဘၣ်တဖၣ်လဲၣ်. (ကွၢ်စ့ၢ်ကီးတၢ်ဂီၤ.)
၁၄ တၢ်မၢဖိပ့းတရူး တဲဝဲလၢ ယ့ၣ်ၡူးအပျဲၢ်အဘီၣ်တဖၣ် ကဘၣ်ဆဲးမၤထွဲ တၢ်လၢအဝဲသ့ၣ်မၤလိဘၣ်ဝဲလၢ လံာ်စီဆှံပူၤထီဘိ. အဝဲဒုးသ့ၣ်နီၣ်ထီၣ်ပှၤ ဘၣ်ဃးဒီး စီၤနိအၤအဂ့ၢ်. အတဲဝဲလၢ ယဟိဝၤယွၤ တဲဘၣ်စီၤနိအၤလၢ အကမၤဟးဂီၤ ပှၤအၢပှၤသီ လၢထံလုၢ်ဘၢတၢ်. ဘၣ်ဆၣ် ဒ်သိး စီၤနိအၤ ဒီးအဟံၣ်ဖိဃီဖိ ကပူၤဖျဲးအဂီၢ် ထဲအသ့ၣ်ညါလၢ ထံကလုၢ်ဘၢတၢ်န့ၣ် တလၢပှဲၤဒံးဘၣ်. ဒီးပထံၣ်ဘၣ်လၢ စီၤပ့းတရူး သူဝဲတၢ်ကတိၤ လၢအမ့ၢ် “ဖဲတၢ်တ့ထီၣ်ကဘီအခါ” လၢအဘၣ်သးတဲဝဲ တၢ်ဆၢကတီၢ် ဖဲတချုးထံလုၢ်ဘၢတၢ်. (၁ ပ့းတရူး ၃:၂၀) အဃိ ပသ့ၣ်ညါဘၣ်လၢ တချုးထံလုၢ်ဘၢတၢ်ဒံးဘၣ်န့ၣ် စီၤနိအၤ ဒီးအဟံၣ်ဖိဃီဖိ မၤထွဲဝဲဒ် ကစၢ်ယွၤ တဲအဝဲသ့ၣ် ဝံၤဒီး အဝဲသ့ၣ်တ့ထီၣ်ကဘီ. (ဧ့ၤဘြံၤ ၁၁:၇) စီၤပ့းတရူး ထိၣ်သတြီၤဝဲ တၢ်လၢစီၤနိအၤမၤဝဲန့ၣ် ဒ်သိးဒီး တၢ်ဒိးဘျၢထံ. အဃိ အတဲဝဲလၢ “ပထိၣ်သတြီၤ တၢ်မၤအသးတခါန့ၣ်ဒီး တၢ်ဒိးဘျၢထံလၢအမ့ၢ် တၢ်လၢအမၤပူၤဖျဲးသုလၢ ဆၢကတီၢ်ခဲအံၤ.” (၁ ပ့းတရူး ၃:၂၁) ဖဲအံၤ ပထံၣ်ဘၣ်လၢ ဒ်သိးစီၤနိအၤ အဟံၣ်ဖိဃီဖိ ကပူၤဖျဲးအဂီၢ် အဝဲသ့ၣ် ဘၣ်တ့ထီၣ်ကဘီ တဘျုးနံၣ်ညါ. အဃိ နၤစ့ၢ်ကီး ဒ်သိး နကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ် နကဘၣ်မၤ မနုၤလဲၣ်.
၁၅. နပာ်ဖျါထီၣ်လၢ နပီၢ်ယၢ်လီၤက့ၤသးနီၢ်ကီၢ် ကသ့ဒ်လဲၣ်.
၁၅ အဆိကတၢၢ်န့ၣ် နကဘၣ် ပီၢ်ယၢ်လီၤက့ၤသး နီၢ်ကီၢ်. (မၤတၢ် ၂:၃၇, ၃၈) နမ့ၢ်ပီၢ်ယၢ်လီၤက့ၤသး နီၢ်ကီၢ်န့ၣ် နကဘၣ်သး ဆီတလဲက့ၤ နတၢ်အိၣ်မူ. နပတုာ်ကွံာ် လုၢ်လၢ်သကဲာ်ပဝး လၢယဟိဝၤယွၤ တဘၣ်သးဘၣ် ဒ်သိးဒီး တၢ်မၤကမၣ်မုၣ်ကမၣ်ခွါ, တၢ်အီမီာ် ဒီးတၢ်တဲတၢ်ကတိၤလၢ အတဂ့ၤဘၣ်တဖၣ်လံဧါ. (၁ ကရံၣ်သူး ၆:၉, ၁၀; ၂ ကရံၣ်သူး ၇:၁; အ့းဖ့းစူး ၄:၂၉) နမ့ၢ်တပတုာ်ဒံးဘၣ်န့ၣ် ခဲအံၤ ပတုာ်ကွံာ်အီၤဟီ. တဲသကီးတၢ်ဒီး ပှၤလၢအမၤလိနၤ လံာ်စီဆှံ မ့တမ့ၢ် ဃ့တၢ်မၤစၢၤ ဒီးတၢ်ဟ့ၣ်ကူၣ်လၢ တၢ်အိၣ်ဖှိၣ်သးပှၢ်အအိၣ်. နမ့ၢ်ကဲပှၤသးစၢ် ဒီးနမ့ၢ်အိၣ်လၢ နမိနပါဟံၣ်ဒံးန့ၣ် ဒ်သိးနပတုာ်ကွံာ် လုၢ်လၢ်သကဲာ်ပဝး လၢအတဂ့ၤဘၣ်ကန့ၢ် ဒီးနကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ် နဃ့တၢ်မၤစၢၤလၢ အဝဲသ့ၣ်အအိၣ်သ့.
၁၆. ပဘူၣ်ထီၣ်ဘါထီၣ် ယဟိဝၤယွၤန့ၣ် အပၣ်ဃုာ်ဒီး မနုၤလဲၣ်.
၁၆ တၢ်ဘူၣ်ထီၣ်ဘါထီၣ် ယဟိဝၤယွၤန့ၣ် အကဲတၢ်လၢ အရ့ဒိၣ်ဒိၣ်မး. တၢ်ဘူၣ်ထီၣ်ဘါထီၣ် ယဟိဝၤယွၤန့ၣ် ပၣ်ဃုာ်ဒီး ပထီၣ်တၢ်အိၣ်ဖှိၣ် ဒီးဟ့ၣ်ထီၣ်တၢ်စံးဆၢ. (ဧ့ၤဘြံၤ ၁၀:၂၄, ၂၅) အဃိ နလဲၤဟးစံၣ်တဲၤတဲလီၤတၢ် မ့ၢ်န့ၢ်လံန့ၣ် လဲၤစံၣ်တဲၤတဲလီၤတၢ်ထီဘိ. နမ့ၢ်လဲၤမၢ်မၢ်န့ၣ် နလဲၤကမုာ်ဒိၣ်ထီၣ်. (၂ တံၤမသ့း ၄:၅) နမ့ၢ်ကဲပှၤသးစၢ် ဒီးနမ့ၢ်အိၣ်လၢ နမိနပါဟံၣ်ဒံးန့ၣ် သံကွၢ်လီၤနသးလၢ ‘ယမိယပါ ဘၣ်တဲနီၣ်ယၤလၢ ယကထီၣ်တၢ်အိၣ်ဖှိၣ် ဒီးဟးစံၣ်တဲၤတဲလီၤတၢ်ဒံးဧါ. မ့တမ့ၢ် ယကျဲးစၢးမၤလၢ ယနီၢ်ကစၢ်လံဧါ.’ နမ့ၢ်ကျဲးစၢးမၤ တၢ်သ့ၣ်တဖၣ်အံၤ လၢနနီၢ်ကစၢ်လံန့ၣ် နပာ်ဖျါထီၣ်လၢ နအိၣ်ဒီးတၢ်နာ်, နအဲၣ် ယဟိဝၤယွၤ ဒီးစံးဘျုးစံးဖှိၣ်က့ၤ တၢ်လၢအမၤန့ၢ်နၤတဖၣ်. တၢ်သ့ၣ်တဖၣ်အံၤ ကဲဝဲပ ‘မၤတၢ်လၢ အပာ်ဖျါထီၣ်လၢ ပသးတီဒီးကစၢ်ယွၤ’ ဒီးအကဲတၢ်ဟ့ၣ်လၢ ပဟ့ၣ်လုၢ်ထီၣ်လၢ ယဟိဝၤယွၤအအိၣ်. (၂ ပ့းတရူး ၃:၁၁; ဧ့ၤဘြံၤ ၁၃:၁၅) ပမ့ၢ်ဟ့ၣ် ယဟိဝၤယွၤ တၢ်ဟ့ၣ်လၢတၢ်သးအိၣ်န့ၣ် ယဟိဝၤယွၤ ဘၣ်သးဝဲ ခဲလၢာ်. (ထိၣ်သတြီၤဒီး ၂ ကရံၣ်သူး ၉:၇.) ဒီးပဟ့ၣ် ယဟိဝၤယွၤ တၢ်လၢအဂ့ၤကတၢၢ် အဃိ ပသးခုဒိၣ်မး.
ဆဲးမၤဒိၣ်ထီၣ်အါထီၣ် နတၢ်အဲၣ် ယဟိဝၤယွၤ
၁၇-၁၈. ဒ်သိး နကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ် နကဘၣ်အိၣ်ဒီး တၢ်ဂ့ၤတၢ်ဝါ အရ့ဒိၣ်ကတၢၢ် မနုၤလဲၣ် ဒီးဘၣ်မနုၤအဃိလဲၣ်. (ကတိၤဒိ ၃:၃-၆)
၁၇ ဖဲနကျဲးစၢး ဒ်သိးနကတုၤထီၣ်ထီၣ်ဘးလၢ တၢ်ဒိးဘျၢထံအခါ နကထံၣ်ဘၣ် တၢ်ကီတၢ်ခဲအါမး. ပှၤတနီၤ ကမၤမဲာ်ဆှးနၤ ခီဖျိလၢ နတၢ်စူၢ်တၢ်နာ်အသီအဃိ ဘၣ်သ့ၣ်သ့ၣ် အဝဲသ့ၣ် ကထီဒါနၤ ဒီးမၤအၢမၤနးနၤ. (၂ တံၤမသ့း ၃:၁၂) ဒီးဖဲနကျဲးစၢး ပတုာ်ကွံာ် လုၢ်လၢ်သကဲာ်ပဝး လၢအတဂ့ၤဘၣ်အခါ ဘၣ်သ့ၣ်သ့ၣ် တဘျီတခီၣ်န့ၣ် နကက့ၤမၤဘၣ်ဒံး. ဒီးဖဲန့ၣ် နကဆိမိၣ်ဘၣ်လၢ နဆီတလဲသး တန့ၢ်လၢၤဘၣ်အဃိ နသးတစူၤလၢၤဘၣ် ဒီးနသးကဟးဂီၤ. ဘၣ်ဆၣ် ဒ်သိး နတဟ့ၣ်အၡူ တဂ့ၤအဂီၢ် တၢ်မနုၤကမၤစၢၤနၤလဲၣ်. နတၢ်အဲၣ် ယဟိဝၤယွၤ ကမၤစၢၤနၤ.
၁၈ နတၢ်အဲၣ် ယဟိဝၤယွၤန့ၣ် အကဘၣ်ကဲ တၢ်လၢအရ့ဒိၣ်ကတၢၢ် လၢနတၢ်အိၣ်မူပူၤ. (ဖး ကတိၤဒိ ၃:၃-၆.) နမ့ၢ်အဲၣ် ယဟိဝၤယွၤနီၢ်ကီၢ်န့ၣ် နတၢ်အဲၣ်တခါအံၤ ကမၤစၢၤနၤလၢ နလဲၤခီဖျိ တၢ်ကီတၢ်ခဲကန့ၢ် ဒီးနကဆဲးမၤ ယဟိဝၤယွၤအတၢ်မၤ. လံာ်စီဆှံ ပာ်ဖျါထီၣ်စ့ၢ်ကီးလၢ ယဟိဝၤယွၤန့ၣ် အအိၣ်ဒီးတၢ်အဲၣ်လၢအတီ လၢအခ့အပှၤတဖၣ် အဖီခိၣ်. တၢ်အဲၣ်လၢအတီအံၤ အဲၣ်ဒိးတဲဝဲ ယဟိဝၤယွၤ တပာ်တီၢ် အခ့အပှၤ နီတဘျီဘၣ် ဒီးကဆဲးအဲၣ် အဝဲသ့ၣ်ထီဘိ. (စံးထီၣ်ပတြၢၤ ၁၀၀:၅) ယဟိဝၤယွၤ တ့လီၤနၤဒ်သိး နကွၢ်လိအီၤကသ့. (၁ မိၤၡ့ ၁:၂၆) အဃိ နပာ်ဖျါထီၣ်က့ၤ တၢ်အဲၣ်လၢအတီ ဒ်သိးဒီး ယဟိဝၤယွၤ ကသ့ဒ်လဲၣ်.
နစံးဘျုး ယဟိဝၤယွၤ သ့ကီးနံၤဒဲး (ကွၢ်လံာ်အဆၢ ၁၉) b
၁၉. နပာ်ဖျါထီၣ်လၢ နစံးဘျုးက့ၤ ယဟိဝၤယွၤ ကသ့ဒ်လဲၣ်. (ကလၤတံ ၂:၂၀.)
၁၉ ပအဲၣ်ယဟိဝၤယွၤန့ၣ် ပပာ်ဖျါထီၣ်သ့ခီဖျိ ပစံးဘျုးက့ၤအီၤ. (၁ သ့းစၤလနံ ၅:၁၈) သံကွၢ်လီၤနသး ကီးနံၤဒဲးလၢ ‘ယဟိဝၤယွၤ ပာ်ဖျါထီၣ်လၢ အအဲၣ်ယၤဒ်လဲၣ်.’ ဒီးဖဲနဃ့ထုကဖၣ်အခါ စံးဘျုးယဟိဝၤယွၤ ဒီးတဲဖျါထီၣ် တၢ်လၢအမၤန့ၢ်နၤတဖၣ် လီၤတံၢ်လီၤဆဲး. ပမ့ၢ်ဆိမိၣ်ထံ တၢ်လၢယဟိဝၤယွၤ မၤန့ၢ်ပှၤန့ၣ် ပကသ့ၣ်ညါဘၣ်လၢ အပာ်ဖျါထီၣ် တၢ်အဲၣ်လၢ ပဝဲတဂၤဘၣ်တဂၤ အဖီခိၣ်. ဘၣ်ဃးဒီး ယဟိဝၤယွၤ အတၢ်အဲၣ်အံၤ တၢ်မၢဖိပီလူးစ့ၢ်ကီး သ့ၣ်ညါဘၣ်ဝဲဂ့ၤဂ့ၤ. (ဖး ကလၤတံ ၂:၂၀.) အဃိ သံကွၢ်လီၤနသးလၢ ‘ယပာ်ဖျါထီၣ်လၢ ယအဲၣ်ဆၢက့ၤ ယဟိဝၤယွၤ ကသ့ဒ်လဲၣ်.’ နတၢ်အဲၣ် ယဟိဝၤယွၤန့ၣ် ကမၤစၢၤနၤလၢ နကတြီဆၢကွံာ် တၢ်လ့ပစီ ဒီးနမ့ၢ်ထံၣ်ဘၣ် တၢ်ကီတၢ်ခဲနာ်က့ နကဆဲးတီဒီး ယဟိဝၤယွၤ. တကးဒံးဘၣ် တၢ်အဲၣ်အံၤ ကမၤစၢၤနၤ ဒ်သိးဒီး နကဆဲးဘူၣ်ထီၣ်ဘါထီၣ် ယဟိဝၤယွၤ ဒီးပာ်ဖျါထီၣ်လၢ နအဲၣ်အီၤ ကီးနံၤဒဲး.
၂၀. ပဟ့ၣ်လုၢ်ထီၣ်သးလၢ ယဟိဝၤယွၤအအိၣ် သ့ဒ်လဲၣ် ဒီးဘၣ်မနုၤအဃိ အကဲဝဲ တၢ်ဆၢတဲာ်လၢ အရ့ဒိၣ်လဲၣ်.
၂၀ လၢခံကယီကယီန့ၣ် နတၢ်အဲၣ် ယဟိဝၤယွၤအံၤ ကမၤစၢၤနၤလၢ နကဟ့ၣ်လုၢ်ထီၣ်နသး လၢအအိၣ်. ဒီးနဟ့ၣ်လုၢ်ထီၣ်သး သ့ခီဖျိ နဃ့ထုကဖၣ် လီၤလီၤဆီဆီ လၢယဟိဝၤယွၤ အအိၣ်. နဟ့ၣ်လုၢ်ထီၣ်သးလၢ ယဟိဝၤယွၤအအိၣ် မ့ၢ်ဝံၤန့ၣ် နအိၣ်ဒီးတၢ်ခွဲးတၢ်ယာ် အဂ့ၤဒိၣ်မးတခါလၢ နကဲဘၣ် ယဟိဝၤယွၤ အခ့အပှၤ လီၤထူလီၤယိာ်. ဒီးဖဲနဟ့ၣ်လုၢ်ထီၣ်သးလၢ ယဟိဝၤယွၤအအိၣ်အခါ နအၢၣ်လီၤအီၤလၢ နမ့ၢ်ထံၣ်ဘၣ် တၢ်အိၣ်သးလၢအကီမ့ၢ်ဂ့ၤ အညီမ့ၢ်ဂ့ၤ နကဆဲးမၤအတၢ်မၤထီဘိ. ဒီးတၢ်အၢၣ်လီၤတခါအံၤ နဘၣ်မၤအီၤ ထဲတဘျီလီၤ. ပမ့ၢ်ဆိမိၣ်ကွၢ် လၢပတၢ်အိၣ်မူပူၤန့ၣ် ပဘၣ်ဆၢတဲာ်တၢ် အါမး ဒီးပတၢ်ဆၢတဲာ်တနီၤန့ၣ် အဂ့ၤမး. သနာ်က့ ပမ့ၢ်ဆၢတဲာ်လီၤသးလၢ ပကဟ့ၣ်လုၢ်ထီၣ်သး လၢယဟိဝၤယွၤအအိၣ်န့ၣ် အကဲဝဲ တၢ်ဆၢတဲာ်လၢ အရ့ဒိၣ် ဒီးအဂ့ၤကတၢၢ်လီၤ. (စံးထီၣ်ပတြၢၤ ၅၀:၁၄) ဒ်သိး နတတီဒီး ယဟိဝၤယွၤလၢၤတဂ့ၤအဂီၢ် မုၣ်ကီၤလံၢ် ကကျဲးစၢး မၤစှၤလီၤ နတၢ်အဲၣ် ယဟိဝၤယွၤ. ဘၣ်ဆၣ် တဘၣ်တူၢ်ၡူနသး နီတဘျီတဂ့ၤ. (ယိၤဘး ၂၇:၅) နတၢ်အဲၣ် ယဟိဝၤယွၤန့ၣ် ကမၤစၢၤနၤဒ်သိး နကမၤလၢပှဲၤနတၢ်အၢၣ်လီၤ လၢနကဆဲးမၤအတၢ်မၤ ဒီးနတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်ထီဘိ.
၂၁. ဘၣ်မနုၤအဃိ တၢ်ဒိးဘျၢထံန့ၣ် အကဲဝဲ နစးထီၣ်တၢ်အိၣ်မူအသီလဲၣ်.
၂၁ နဟ့ၣ်လုၢ်ထီၣ်သးလၢ ယဟိဝၤယွၤအအိၣ် မ့ၢ်ဝံၤန့ၣ် တဲဘၣ် နတၢ်အိၣ်ဖှိၣ်သးပှၢ်တဖၣ် ဒီးတဲအဝဲသ့ၣ်လၢ နဘၣ်သးဒိးဘျၢထံ. နကဘၣ် သ့ၣ်နီၣ်ထီၣ်လၢ တၢ်ဒိးဘျၢထံန့ၣ် အကဲဝဲ နစးထီၣ်တၢ်အိၣ်မူအသီ လၢနကဆဲးမၤယဟိဝၤယွၤ အတၢ်မၤထီဘိ. အဃိ ခဲအံၤန့ၣ် အရ့ဒိၣ်လၢ နကဘၣ် ပာ်လီၤဖီတၢၣ်လၢ နကမၤဒိၣ်ထီၣ်အါထီၣ် နတၢ်အဲၣ်ယဟိဝၤယွၤ ကီးနံၤဒဲး. နအဲၣ်ယဟိဝၤယွၤ မ့ၢ်ဒိၣ်ထီၣ်န့ၣ် အကမၤစၢၤနၤလၢ နကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ်. ဖဲနဒိးဘျၢထံ တနံၤန့ၣ် အကဲဝဲ မုၢ်နံၤလၢအရ့ဒိၣ်ကတၢၢ် ဒီးနစးထီၣ်တၢ်အိၣ်မူအသီ. ဒီးပဟ့ၣ်ဂံၢ်ဟ့ၣ်ဘါနၤလၢ နကမၤအါထီၣ် နတၢ်အဲၣ်ယဟိဝၤယွၤ ဒီးအဖိခွါယ့ၣ်ၡူးခရံာ် ကီးနံၤဒဲး.
တၢ်သးဝံၣ် ၁၃၅ ယဟိဝၤယွၤ အတၢ်ဃ့ကညးလၢ “ဖိခွါဧၢ, အိၣ်ဒီးတၢ်ကူၣ်သ့”
a ဒ်သိးပှၤတဂၤ ကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ် အကဘၣ်အဲၣ် တၢ်မ့ၢ်တၢ်တီ ဒီးတၢ်တီတၢ်လိၤ, အဲၣ်ယ့ၣ်ၡူးခရံာ်, အဲၣ်ယဟိဝၤယွၤ ဒီးအကဘၣ် မၤတၢ်လၢအဘၣ်. လၢတၢ်မၤလိတခါအံၤ ပကတဲသကီး ပှၤအဲၤသံအီးပး အပဒိၣ်တဂၤ အဒိအတဲာ် ဒ်သိးကမၤစၢၤ ပှၤမၤလိလံာ်စီဆှံဖိလၢ ကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ်.
b တၢ်ဂီၤအခီပညီ– ဒီပုၢ်ဝဲၢ်မုၣ်တဂၤ ဃ့ထုကဖၣ် လၢယဟိဝၤယွၤအအိၣ် ဒီးစံးဘျုး ယဟိဝၤယွၤလၢ တၢ်လၢယဟိဝၤယွၤ မၤန့ၢ်အီၤ.
