တၢ်မၤလိ ၁၄
“ပှၤခဲလၢာ် ကသ့ၣ်ညါလၢ သုမ့ၢ် ယပျဲၢ်ယဘီၣ်တဖၣ်”
“သုမ့ၢ် အဲၣ်လိာ်ကွံလိာ် သုသးကဒဲကဒဲန့ၣ် ပှၤခဲလၢာ် ကသ့ၣ်ညါလၢ သုမ့ၢ် ယပျဲၢ်ယဘီၣ်တဖၣ်.”—ယိၤဟၣ် ၁၃:၃၅.
တၢ်သးဝံၣ် ၁၀၆ မၤဒိၣ်ထီၣ်အါထီၣ် တၢ်အဲၣ်တၢ်ကွံ
တၢ်မၤလိအံၤ အတၢ်တိာ်ပာ် a
ပှၤလၢအတကဲ ယဟိဝၤပှၤအုၣ်အသးတနီၤ ထံၣ်ဘၣ်လၢ ယဟိဝၤပှၤအုၣ်အသးတဖၣ် အဲၣ်လိာ်သးနီၢ်ကီၢ်အဃိ အဝဲသ့ၣ် ဆိမိၣ်ဝဲဒ်လဲၣ် (ကွၢ်လံာ်အဆၢ ၁)
၁. ပှၤလၢအဟဲထီၣ် ပတၢ်အိၣ်ဖှိၣ် အဆိကတၢၢ်တဘျီန့ၣ် ညီနုၢ်အဝဲသ့ၣ် ထံၣ်ဘၣ်မနုၤလဲၣ်. (ကွၢ်စ့ၢ်ကီးတၢ်ဂီၤ.)
ထံၣ်တမှံကွၢ်လၢ ပှၤဒီမိၢ်ဝၤခံဂၤ လဲၤထီၣ် ယဟိဝၤပှၤအုၣ်အသး တၢ်အိၣ်ဖှိၣ် အဆိကတၢၢ်တဘျီ. ပှၤဒီမိၢ်ဝၤခံဂၤအံၤ ထံၣ်ဘၣ်လၢ ဒီပုၢ်ဝဲၢ်မုၣ်ခွါတဖၣ် တူၢ်လိာ်အဝဲသ့ၣ် ဂ့ၤဂ့ၤ ဒီးအဝဲသ့ၣ် ထံၣ်စ့ၢ်ကီး ဒီပုၢ်ဝဲၢ်မုၣ်ခွါတဖၣ် ရ့လိာ်သးလၢ တၢ်အဲၣ်တၢ်ကွံ အဃိ ထုးန့ၢ်အဝဲသ့ၣ်သးဒိၣ်မး. အဝဲသ့ၣ် ထီၣ်တၢ်အိၣ်ဖှိၣ်ဝံၤဒီး ဖဲအဟဲက့ၤလၢကျဲအခါ မါတဂၤ တဲဘၣ်အဝၤလၢ ‘ယဟိဝၤပှၤအုၣ်အသးတဖၣ်အံၤ တဒ်သိးဒီး ပှၤအဂၤလၢ ပရ့ဘၣ်ဘၣ်. ယကၠဲးအဝဲသ့ၣ်ညါ.’
၂. ဘၣ်မနုၤအဃိ ပှၤတနီၤ တဘူၣ်ထီၣ်ဘါထီၣ် ယဟိဝၤယွၤလၢၤဘၣ်လဲၣ်.
၂ ယဟိဝၤပှၤအုၣ်အသးတဖၣ် ရ့လိာ်သးလၢ တၢ်အဲၣ်တၢ်ကွံအဃိ အဝဲသ့ၣ် လီၤဆီန့ၢ်ပှၤဂၤ. နာ်က့ အဝဲသ့ၣ်စ့ၢ်ကီး တကဲပှၤလၢပှၤပှဲၤဘၣ်. (၁ ယိၤဟၣ် ၁:၈) ပရ့ဒီး ပဒီပုၢ်ဝဲၢ်မုၣ်ခွါ မ့ၢ်အါထီၣ်န့ၣ် ပကသ့ၣ်ညါအါထီၣ်အဂ့ၢ် ဒီးပကထံၣ်ဘၣ်စ့ၢ်ကီး အဝဲသ့ၣ် တၢ်ဂံၢ်စၢ်ဘါစၢ်. (ရိမ့ၤ ၃:၂၃) ဘၣ်ဆၣ် ပှၤတနီၤန့ၣ် အဝဲသ့ၣ်ထံၣ်ဘၣ် ပှၤဂၤတၢ်ဂံၢ်စၢ်ဘါစၢ် အဃိ အတဘူၣ်ထီၣ်ဘါထီၣ် ယဟိဝၤယွၤလၢၤဘၣ်.
၃. ခရံာ်ဖိအမ့ၢ်အတီန့ၣ် ပှၤသ့ၣ်ညါနီၤဖး အဝဲသ့ၣ် ကသ့ဒ်လဲၣ်. (ယိၤဟၣ် ၁၃:၃၄, ၃၅)
၃ ပကကွၢ်ကဒီး လံာ်စီဆှံအဆၢလၢ တၢ်မၤလိတခါအံၤအခီၣ်ထံး. (ဖး ယိၤဟၣ် ၁၃:၃၄, ၃၅.) ခရံာ်ဖိအမ့ၢ်အတီန့ၣ် ပှၤသ့ၣ်ညါနီၤဖး အဝဲသ့ၣ် ကသ့ဒ်လဲၣ်. အဝဲသ့ၣ် တကဲပှၤလၢပှၤပှဲၤဘၣ် နာ်က့ ပှၤသ့ၣ်ညါနီၤဖး အဝဲသ့ၣ် သ့ခီဖျိ အဝဲသ့ၣ် အဲၣ်လိာ်သးနီၢ်ကီၢ်အဃိ. ယ့ၣ်ၡူးစ့ၢ်ကီး တတဲဝဲလၢ ‘သုကသ့ၣ်ညါလၢ သုမ့ၢ် ယပျဲၢ်ယဘီၣ်တဖၣ်’ ဘၣ်. အတဲဝဲလၢ “ပှၤခဲလၢာ် ကသ့ၣ်ညါလၢ သုမ့ၢ် ယပျဲၢ်ယဘီၣ်တဖၣ်.” အဃိ ယ့ၣ်ၡူးတဲဝဲလၢ အပျဲၢ်အဘီၣ် တကးဒံးဘၣ် ပှၤဂၤစ့ၢ်ကီး ကသ့ၣ်ညါနီၤဖး ခရံာ်ဖိအမ့ၢ်အတီ ခီဖျိလၢ အဝဲသ့ၣ် အဲၣ်လိာ်သးနီၢ်ကီၢ် ဒီးသးအိၣ်ဟ့ၣ်လီၤသးလၢ တဂၤဒီးတဂၤအဂီၢ်.
၄. ဘၣ်ဃးဒီး ခရံာ်ဖိအမ့ၢ်အတီန့ၣ် ပှၤတနီၤ ဘၣ်သးသ့ၣ်ညါ တၢ်မနုၤလဲၣ်.
၄ ပှၤလၢအတကဲ ယဟိဝၤပှၤအုၣ်အသးတနီၤ ဘၣ်သးသ့ၣ်ညါဝဲလၢ ‘ခရံာ်ဖိ အမ့ၢ်အတီ အတၢ်ပနီၣ် မ့ၢ်မနုၤလဲၣ်. ယ့ၣ်ၡူး အဲၣ်အပျဲၢ်အဘီၣ်န့ၣ် အပာ်ဖျါထီၣ်ဝဲ ဒ်လဲၣ်. ခဲအံၤ ပကွၢ်လိယ့ၣ်ၡူး ကသ့ဒ်လဲၣ်.’ ပဝဲယဟိဝၤပှၤအုၣ်အသးတဖၣ်စ့ၢ်ကီး ပကဘၣ်ဆိမိၣ်ထံ တၢ်သံကွၢ်တဖၣ်အံၤ. ပမ့ၢ်ဆိမိၣ်ထံ တၢ်သံကွၢ်တဖၣ်အံၤန့ၣ် ကမၤစၢၤပှၤလၢ ပကပာ်ဖျါအါထီၣ်တၢ်အဲၣ် ဒီးနၢ်ပၢၢ်စၢၤ ပှၤဂၤတၢ်ဂံၢ်စၢ်ဘါစၢ်.—အ့းဖ့းစူး ၅:၂.
ခရံာ်ဖိအမ့ၢ်အတီ အတၢ်ပနီၣ် မ့ၢ်မနုၤလဲၣ်
၅. ယ့ၣ်ၡူး အတၢ်ကတိၤဖဲ ယိၤဟၣ် ၁၅:၁၂, ၁၃ န့ၣ်အဘၣ်သးတဲဝဲ အခီပညီဒ်လဲၣ်.
၅ ယ့ၣ်ၡူး တဲဝဲလၢ ပှၤကသ့ၣ်ညါနီၤဖး အပျဲၢ်အဘီၣ် ခီဖျိလၢ အဝဲသ့ၣ် အဲၣ်လိာ်သး တဂၤဒီးတဂၤအဃိ. (ဖး ယိၤဟၣ် ၁၅:၁၂, ၁၃.) ယ့ၣ်ၡူး မၤလိာ်အပျဲၢ်အဘီၣ်လၢ “အဲၣ်လိာ်သုသး တဂၤဒီးတဂၤ ဒ်ယအဲၣ်သု အသိး.” ယ့ၣ်ၡူး အတၢ်ကတိၤအံၤ အခီပညီဒ်လဲၣ်. ယ့ၣ်ၡူး ဘၣ်သးတဲဝဲလၢ ပကဘၣ် အဲၣ်ပှၤဂၤ အါန့ၢ်ဒံးပအဲၣ်လီၤပသး ဒီးပမ့ၢ်ဘၣ်သံနာ်က့ ပဟ့ၣ်လီၤကွံာ်ပသးသမူ လၢပှၤဂၤအဂီၢ်ကဲ. b
၆. တၢ်အဲၣ်တၢ်ကွံ ကဲဝဲ တၢ်ဂ့ၤတၢ်ဝါလၢ အရ့ဒိၣ်မးန့ၣ် လံာ်စီဆှံ ပာ်ဖျါထီၣ်ဝဲဒ်လဲၣ်.
၆ လံာ်စီဆှံ သိၣ်လိပှၤလၢ တၢ်အဲၣ်တၢ်ကွံန့ၣ် အရ့ဒိၣ်မး. အဒိ ပှၤတနီၤန့ၣ် အဝဲသ့ၣ် ကၠဲးဝဲ လံာ်စီဆှံအဆၢတဖၣ်အံၤဒိၣ်မး. “ကစၢ်ယွၤန့ၣ် မ့ၢ်တၢ်အဲၣ်တၢ်ကွံ.” (၁ ယိၤဟၣ် ၄:၈) “နကဘၣ်အဲၣ် ပှၤလၢနဃၢၤ ဒ်နအဲၣ်လီၤ နနီၢ်ကစၢ်အသး.” (မးသဲ ၂၂:၃၉) “တၢ်အဲၣ်တၢ်ကွံန့ၣ် ကျၢၢ်ဘၢတၢ်ဒဲးဘး အါမး.” (၁ ပ့းတရူး ၄:၈) “တၢ်အဲၣ်တၢ်ကွံန့ၣ် တလီၤတူာ်လီၤကာ် နီတဘျီဘၣ်.” (၁ ကရံၣ်သူး ၁၃:၈) လံာ်စီဆှံအဆၢတဖၣ်အံၤ ဒီးလံာ်စီဆှံအဆၢ လၢအဂၤတဖၣ် ဒုးသ့ၣ်ညါပှၤလၢ တၢ်အဲၣ်တၢ်ကွံန့ၣ် အကဲဝဲ တၢ်ဂ့ၤတၢ်ဝါလၢ အရ့ဒိၣ်မးတခါ.
၇. ဒ်သိး ပှၤကအဲၣ်လိာ်သး ဒီးအိၣ်ဃူအိၣ်ဖိးအဂီၢ် ဘၣ်မနုၤအဃိ မုၣ်ကီၤလံၢ် မၤဝဲတန့ၢ်ဘၣ်လဲၣ်.
၇ ပှၤအါဂၤတဲဝဲလၢ ‘တၢ်ဘူၣ်တၢ်ဘါခိၣ်နၢ် အါတက့ၢ်န့ၣ် တဲလီၤအသးလၢ အသိၣ်လိ တၢ်မ့ၢ်တၢ်တီ. ဘၣ်ဆၣ် ဘၣ်ဃးဒီး ကစၢ်ယွၤန့ၣ် အဝဲသ့ၣ် သိၣ်လိဝဲ တဂၤတမံၤတဂၤတမၠိ အဃိ ပသ့ၣ်ညါနီၤဖး တၢ်ဘူၣ်တၢ်ဘါအမ့ၢ်အတီ ကသ့ဒ်လဲၣ်.’ မုၣ်ကီၤလံၢ် ဒုးအိၣ်ထီၣ်ဝဲ တၢ်ဘူၣ်တၢ်ဘါကမၣ်ဒီဒူၣ် အဃိ တၢ်ဘူၣ်တၢ်ဘါ အဘၣ်ဖဲလဲၣ်တခါ အကမၣ်ဖဲလဲၣ်တခါန့ၣ် ပှၤတသ့ၣ်ညါလၢၤဘၣ်. ဘၣ်ဆၣ် မုၣ်ကီၤလံၢ် ကရၢကရိထီၣ်ဝဲ ခရံာ်ဖိလၢအအဲၣ်လိာ်သးနီၢ်ကီၢ် လၢဟီၣ်ခိၣ်ဒီဘ့ၣ်န့ၣ် တသ့နီတဘျီဘၣ်. ပှၤလၢ အမၤဝဲသ့န့ၣ် ကဲဝဲထဲ ယဟိဝၤယွၤတဂၤလီၤ. ခီဖျိလၢ တၢ်အဲၣ်တၢ်ကွံန့ၣ် ဟဲလၢ ယဟိဝၤယွၤ အအိၣ်အဃိ ပသ့ၣ်ညါလၢ ယဟိဝၤယွၤ ကရၢကရိထီၣ်ဝဲသ့. ဒီးယဟိဝၤယွၤမ့ၢ်ဆိၣ်ဂ့ၤ ဒီးဟ့ၣ်လီၤ ပှၤလၢအဘူၣ်ထီၣ်ဘါထီၣ်အီၤလၢ အသးစီဆှံမၣ် အဝဲသ့ၣ်ကအဲၣ်လိာ်သးနီၢ်ကီၢ်. (၁ ယိၤဟၣ် ၄:၇) အဃိန့ၣ် ယ့ၣ်ၡူးတဲဝဲလၢ အပျဲၢ်အဘီၣ်တဖၣ် ကအဲၣ်လိာ်သးနီၢ်ကီၢ် ဒီးသးအိၣ်ဟ့ၣ်လီၤသးလၢ တဂၤဒီးတဂၤအဂီၢ်.
၈-၉. ပှၤတနီၤ ထံၣ်ဘၣ်လၢ ယဟိဝၤပှၤအုၣ်အသးတဖၣ် အဲၣ်လိာ်သး တဂၤဒီးတဂၤအဃိ မၤစၢၤအဝဲသ့ၣ်ဒ်လဲၣ်.
၈ ခီဖျိလၢ ခရံာ်ဖိအမ့ၢ်အတီတဖၣ် အဲၣ်လိာ်သး တဂၤဒီးတဂၤ ဒ်သိးယ့ၣ်ၡူးမၤလိာ်ပာ်ဝဲအဃိ ပှၤအါဂၤ သ့ၣ်ညါနီၤဖးဝဲ ခရံာ်ဖိအမ့ၢ်အတီ. အဒိ ဒီပုၢ်ဝဲၢ်ခွါအံယဲ နီၣ်ဘၣ်က့ၤလၢ အထီၣ်ဘၣ် တၢ်အိၣ်ဖှိၣ်ဖးဒိၣ် အဆိကတၢၢ်တဘျီ ဒီးတၢ်အိၣ်ဖှိၣ်အံၤ ပှၤမၤဝဲဖဲတၢ်လိၣ်ကွဲလီၢ် ဘူးဒီးအဟံၣ်. တချုးလၢ အလဲၤထီၣ် တၢ်အိၣ်ဖှိၣ်အံၤဒံးဘၣ် စှၤကိာ်လါန့ၣ် အလဲၤကွၢ် ပှၤလိၣ်ကွဲ လၢတၢ်လိၣ်ကွဲလီၢ် တခါအံၤ. ဒီပုၢ်ဝဲၢ်ခွါအံယဲ တဲဝဲလၢ “ပှၤလၢအဟဲထီၣ် တၢ်အိၣ်ဖှိၣ်ဖးဒိၣ် ဒီးပှၤလၢအဟဲကွၢ် ပှၤလိၣ်ကွဲန့ၣ် အဝဲသ့ၣ် တၢ်ပာ်သး ဖၣ်လီၤဆီလိာ်သးညါ. ယဟိဝၤပှၤအုၣ်အသးတဖၣ်န့ၣ် အိၣ်ဒီးတၢ်ပာ်ကဲ ဒီးကူကၤတၢ် ကဆှဲကဆှီ ဒီးဖိသၣ်တဖၣ်စ့ၢ်ကီး နၢ်လိၤဂ့ၤမး. ယထံၣ်ဘၣ်လၢ ယဟိဝၤပှၤအုၣ်အသးတဖၣ်အံၤ အိၣ်ဒီး တၢ်သူၣ်မံသးမုာ် ဒီးတၢ်ဃူတၢ်ဖိး ဒီးတၢ်သ့ၣ်တဖၣ်အံၤန့ၣ် အကဲတၢ်လၢ ယဘၣ်သးန့ၢ်ဘၣ် ဖၣ်ယံာ်လံ. ပှၤစံၣ်တဲၤတဲလီၤတၢ် ဖဲတၢ်တနံၤန့ၣ် ယမၣ်တနီၣ်ဘၣ် နီတခါလၢၤဘၣ်. ဘၣ်ဆၣ် ယဟိဝၤပှၤအုၣ်အသးတဖၣ်အံၤ အသကဲာ်ပဝးဂ့ၤမးန့ၣ် ယနီၣ်ဘၣ်ဒံး.” c ပထံၣ်ဘၣ်လၢ ခရံာ်ဖိအမ့ၢ်အတီတဖၣ် အဲၣ်လိာ်သး တဂၤဒီးတဂၤနီၢ်ကီၢ်အဃိ အဝဲသ့ၣ် အိၣ်ဒီး သကဲာ်ပဝးလၢအဂ့ၤ. တကးဒံးဘၣ် ခီဖျိလၢပအဲၣ် ပဒီပုၢ်ဝဲၢ်မုၣ်ခွါအဃိ ပရ့ဒီးအဝဲသ့ၣ်ဂ့ၤဂ့ၤ ဒီးပပာ်ကဲလိာ်သး.
၉ ဒီပုၢ်ဝဲၢ်ခွါကၠီ စ့ၢ်ကီး ဖဲအလဲၤထီၣ် တၢ်အိၣ်ဖှိၣ် အဆိကတၢၢ်တဘျီန့ၣ် အတဲဝဲလၢ “ယထံၣ်ဘၣ်လၢ ပှၤဖဲန့ၣ်တဖၣ်န့ၣ် . . . ရ့လိာ်သးမုာ်မး. အဝဲသ့ၣ်သးဂ့ၤမးအဃိ ယဆိမိၣ်လၢအဝဲသ့ၣ် ကဲပှၤစီဆှံ. အဝဲသ့ၣ် အဲၣ်လိာ်သးတဂၤဒီးတဂၤ နီၢ်ကီၢ်အဃိ ယနာ်သပှၢ်တၢၢ်လၢ ယထံၣ်န့ၢ် တၢ်ဘူၣ်တၢ်ဘါ အမ့ၢ်အတီလံ.” d တၢ်လဲၤခီဖျိခံခါအံၤ ဒီးတၢ်လဲၤခီဖျိ လၢအဂၤတဖၣ် ပာ်ဖျါထီၣ်ဝဲလၢ ယဟိဝၤပှၤအုၣ်အသးတဖၣ်န့ၣ် ကဲဝဲခရံာ်ဖိအမ့ၢ်အတီ.
၁၀. ပပာ်ဖျါလၢ ပအဲၣ်လိာ်သး ဒ်သိးခရံာ်ဖိနီၢ်ကီၢ် ကသ့ဒ်လဲၣ်. (ကွၢ်စ့ၢ်ကီး တၢ်ဂ့ၢ်အဘျဲၣ်.)
၁၀ ဒ်သိးပတဲလၢ အခီၣ်ထံးန့ၣ် ယဟိဝၤပှၤအုၣ်အသးတဖၣ် တကဲပှၤလၢပှၤပှဲၤ နီတဂၤဘၣ်. တဘျီတခီၣ်န့ၣ် ပတဲဘၣ်တၢ် ဒီးမၤဘၣ်တၢ်တမံၤမံၤလၢ အမၤဘၣ်ဒိလိာ်သးသ့. e (ယၤကိာ် ၃:၂) အဃိ ဖဲပှၤမၤသးထီၣ်ပှၤ ဒီးမၤဘၣ်ဒိဘၣ်ပသးအခါ ပမ့ၢ်ရ့ဒီးအဝဲသ့ၣ်ဂ့ၤဂ့ၤဒံးန့ၣ် ပပာ်ဖျါလၢ ပအဲၣ်လိာ်သး ဒ်သိးခရံာ်ဖိနီၢ်ကီၢ်. ဘၣ်ဃးဒီး တၢ်အဲၣ်တခါအံၤန့ၣ် ယ့ၣ်ၡူး ပာ်လီၤန့ၢ်ပှၤ အဒိအတဲာ် ဒ်လဲၣ်.—ယိၤဟၣ် ၁၃:၁၅.
ယ့ၣ်ၡူး အဲၣ်အပျဲၢ်အဘီၣ်န့ၣ် အပာ်ဖျါထီၣ်ဝဲ ဒ်လဲၣ်
ယ့ၣ်ၡူး အပျဲၢ်အဘီၣ် တဆံခံဂၤန့ၣ် အတၢ်ပာ်သးတဂ့ၤဘၣ် နာ်က့ ယ့ၣ်ၡူး အဲၣ်အဝဲသ့ၣ်ဒံး (ကွၢ်လံာ်အဆၢ ၁၁-၁၃)
၁၁. စီၤယၤကိာ် ဒီးစီၤယိၤဟၣ် အိၣ်ဒီး တၢ်ပာ်သး လၢအတဂ့ၤဘၣ်ဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၁ ယ့ၣ်ၡူးသ့ၣ်ညါဝဲလၢ အပျဲၢ်အဘီၣ်တဖၣ်န့ၣ် တကဲပှၤလၢပှၤပှဲၤဘၣ် ဒီးတဘျီတခီၣ် အဝဲသ့ၣ်တၢ်ပာ်သး တဂ့ၤဘၣ်. အဃိ ယ့ၣ်ၡူး မၤစၢၤအဝဲသ့ၣ်လၢ ကဆီတလဲက့ၤ အတၢ်ပာ်သး ဒ်သိး ယဟိဝၤယွၤ ကဘၣ်သူၣ်ဘၣ်သး အဝဲသ့ၣ်. ဘၣ်တဘျီ ယ့ၣ်ၡူးအပျဲၢ်အဘီၣ် စီၤယၤကိာ် ဒီးစီၤယိၤဟၣ်န့ၣ် အဝဲသ့ၣ်မၢအမိ လဲၤဃ့ယ့ၣ်ၡူးလၢ ကဟ့ၣ်အဝဲသ့ၣ် လီၢ်လၤလၢအပတီၢ်ထီ လၢကစၢ်ယွၤဘီမုၢ်အပူၤ. (မးသဲ ၂၀:၂၀, ၂၁) စီၤယၤကိာ် ဒီးစီၤယိၤဟၣ် မၤဝဲဒ်အံၤအဃိ ပထံၣ်ဘၣ်လၢ အဝဲသ့ၣ်အိၣ်ဒီး တၢ်ပာ်ထီၣ်ထီသး ဒီးအဝဲသ့ၣ် ဘၣ်သးလၢ ပှၤကထံၣ်ဒိၣ်အီၤ.—ကတိၤဒိ ၁၆:၁၈.
၁၂. ယ့ၣ်ၡူးအပျဲၢ်အဘီၣ် အဂၤတဖၣ်စ့ၢ်ကီး အိၣ်ဒီး တၢ်ပာ်သး လၢအတဂ့ၤဘၣ်န့ၣ် ပသ့ၣ်ညါဘၣ်ဒ်လဲၣ်.
၁၂ ဖဲန့ၣ်အခါ ယ့ၣ်ၡူးအပျဲၢ်အဘီၣ် အဂၤတဖၣ်စ့ၢ်ကီး အိၣ်ဒီး တၢ်ပာ်သး လၢအတဂ့ၤဘၣ်. လံာ်စီဆှံ တဲဝဲလၢ “ဖဲအပျဲၢ်အဘီၣ် အဂၤတဆံ နၢ်ဟူဘၣ်ဝဲ တၢ်ဂ့ၢ်တခါအံၤအခါ အဝဲသ့ၣ် သးဒိၣ်ထီၣ် ပှၤဒီပုၢ်ဝဲၢ်ခွါ ခံဂၤအံၤ.” (မးသဲ ၂၀:၂၄) ထံၣ်တမှံကွၢ် ဖဲန့ၣ်အခါ စီၤယၤကိာ်, စီၤယိၤဟၣ် ဒီးယ့ၣ်ၡူးအပျဲၢ်အဘီၣ် အဂၤတဆံန့ၣ် ကတဲအါလိာ်သး ဖးအါညါ. ဘၣ်သ့ၣ်သ့ၣ် အဝဲသ့ၣ် ကတဲဝဲလၢ ‘သုဃ့လၢ သုကန့ၢ်ဘၣ် လီၢ်လၤလၢအပတီၢ်ထီန့ၣ် သုဆိမိၣ်လၢ သုဂ့ၤဒိၣ်န့ၢ်ဒံးပှၤဟီဧါ. ပဝဲနာ်က့ ပပိာ်ယ့ၣ်ၡူးအခံ ဒီးပမၤတၢ်ဆူၣ်ကၠ့ၤ. သုမ့ၢ်န့ၢ်ဘၣ် လီၢ်လၤလၢအပတီၢ်ထီန့ၣ် ပကဘၣ်န့ၢ်ဘၣ်ကၠ့ၤသၢၤ.’ နီၢ်ကီၢ်န့ၣ် တၢ်မ့ၢ်ကဲထီၣ်သး ဒ်အံၤနာ်က့ ယ့ၣ်ၡူး အပျဲၢ်အဘီၣ်တဖၣ်အံၤ တကြၢး တဲအါလိာ်သးဘၣ်. အဝဲသ့ၣ် ကဘၣ်အဲၣ်လိာ်သး ဒီးတဲသကိးတၢ်မုာ်မုာ်.
၁၃. ယ့ၣ်ၡူး အပျဲၢ်အဘီၣ်တဖၣ် အိၣ်ဒီး တၢ်ပာ်သး လၢအတဂ့ၤဘၣ်နာ်က့ ယ့ၣ်ၡူးမၤဝဲဒ်လဲၣ်. (မးသဲ ၂၀:၂၅-၂၈)
၁၃ ယ့ၣ်ၡူး အပျဲၢ်အဘီၣ်တဖၣ်အံၤ အိၣ်ဒီး တၢ်ပာ်သး လၢအတဂ့ၤဘၣ်နာ်က့ ယ့ၣ်ၡူး တသးပှံၢ်ထီၣ် အဝဲသ့ၣ်ဘၣ်. ဒီးယ့ၣ်ၡူး တတဲအဝဲသ့ၣ်လၢ အကဃုထၢထီၣ်က့ၤ အပျဲၢ်အဘီၣ်လၢအသီ လၢအအိၣ်ဒီး တၢ်ဆီၣ်လီၤသး ဒီးအဲၣ်လိာ်သးဒိၣ်န့ၢ်ဒံး အဝဲသ့ၣ်ဘၣ်. ယ့ၣ်ၡူး သ့ၣ်ညါဝဲလၢ အဝဲသ့ၣ် ဘၣ်သးမၤတၢ်လၢအဘၣ် အဃိ ယ့ၣ်ၡူး မၤစၢၤအဝဲသ့ၣ် လၢတၢ်သးစူၤ. (ဖး မးသဲ ၂၀:၂၅-၂၈.) ဒီးလၢခံနာ်က့ ယ့ၣ်ၡူး အပျဲၢ်အဘီၣ်တဖၣ် တဲအါလိာ်သးလၢ မတဂၤဂ့ၤဒိၣ် လၢအဝဲသ့ၣ်အကျါန့ၣ် တဘျုးဘျီဒံးညါ. ဘၣ်ဆၣ် ယ့ၣ်ၡူး ဆဲးရ့ဒီးအဝဲသ့ၣ်ဂ့ၤဂ့ၤ ဒီးအဲၣ်အဝဲသ့ၣ်ဒံး.—မၢ်ကူး ၉:၃၄; လူၤကၣ် ၂၂:၂၄.
၁၄. ယ့ၣ်ၡူး အပျဲၢ်အဘီၣ်တဖၣ် ဒိၣ်ထီၣ်ဘၣ်လၢ တၢ်လီၢ်ဒ်လဲၣ်.
၁၄ ယ့ၣ်ၡူးသ့ၣ်ညါဝဲ အပျဲၢ်အဘီၣ်တဖၣ် ဒိၣ်ထီၣ်တၢ်လီၢ် အဃိ အနၢ်ပၢၢ်စၢၤ အဝဲသ့ၣ်တၢ်အိၣ်သး. (ယိၤဟၣ် ၂:၂၄, ၂၅) ဖဲအဝဲသ့ၣ် ဒိၣ်ထီၣ်တၢ်လီၢ်န့ၣ် တၢ်ဘူၣ်တၢ်ဘါခိၣ်နၢ်တဖၣ် သိၣ်လိဝဲလၢ ပှၤတဂၤ မ့ၢ်အိၣ်ဒီး လီၢ်လၤလၢအပတီၢ်ထီမၣ် အဝဲသ့ၣ်ကဲပှၤလၢအရ့ဒိၣ် ဒီးပှၤပာ်ကဲအဝဲသ့ၣ်. (မးသဲ ၂၃:၆) ပှၤယူဒၤဖိ အတၢ်ဘူၣ်တၢ်ဘါခိၣ်နၢ်စ့ၢ်ကီး ထံၣ်လီၤအသးလၢ အဝဲသ့ၣ် ဂ့ၤဒိၣ်န့ၢ်ဒံးပှၤဂၤ. f (လူၤကၣ် ၁၈:၉-၁၂) ယ့ၣ်ၡူးသ့ၣ်ညါဝဲလၢ အပျဲၢ်အဘီၣ်တဖၣ် ဒိၣ်ထီၣ်ဘၣ် တၢ်လီၢ်လၢပှၤအါဂၤ အိၣ်ဒီးတၢ်ထံၣ်ဒ်န့ၣ်အဃိ အဝဲသ့ၣ်တၢ်ထံၣ်လီၤဂာ်ဒီး ပှၤသ့ၣ်တဖၣ်န့ၣ်သ့. (ကတိၤဒိ ၁၉:၁၁) ယ့ၣ်ၡူးသ့ၣ်ညါဝဲလၢ တဘျီတခီၣ် အပျဲၢ်အဘီၣ်တဖၣ်န့ၣ် မၤကမၣ်ဘၣ်တၢ်သ့ ဒီးအဝဲသ့ၣ်မ့ၢ် မၤကမၣ်တၢ်နာ်က့ ယ့ၣ်ၡူးရ့ဒီးအဝဲသ့ၣ်ဂ့ၤဂ့ၤဒံး. ဒီးယ့ၣ်ၡူးသ့ၣ်ညါဝဲလၢ အပျဲၢ်အဘီၣ်တဖၣ်န့ၣ် ဘၣ်သးမၤတၢ်လၢအဘၣ်. အဃိ ဒ်သိး အဝဲသ့ၣ် တထံၣ်ဒိၣ်လီၤသးတဂ့ၤန့ၣ် ယ့ၣ်ၡူး ဝံသးစူၤအဝဲသ့ၣ် ဒီးသိၣ်လိအဝဲသ့ၣ်လၢ အဝဲသ့ၣ် ကဆီၣ်လီၤသးအါထီၣ် ဒီးကအဲၣ်လိာ်သးအါထီၣ်.
ပကွၢ်လိ ယ့ၣ်ၡူး အဒိအတဲာ် ကသ့ဒ်လဲၣ်
၁၅. တၢ်ကီတၢ်ခဲလၢ အကဲထီၣ်သးလၢ ယ့ၣ်ၡူးအပျဲၢ်အဘီၣ် တဆံခံဂၤအံၤအကျါန့ၣ် ပန့ၢ်ဘၣ်တၢ်မၤလိဒ်လဲၣ်.
၁၅ တၢ်ကီတၢ်ခဲလၢ အကဲထီၣ်သးလၢ ယ့ၣ်ၡူးအပျဲၢ်အဘီၣ် ၁၂ ဂၤအံၤအကျါန့ၣ် ပန့ၢ်ဘၣ်တၢ်မၤလိဒ်လဲၣ်. စီၤယၤကိာ် ဒီးစီၤယိၤဟၣ် ဃ့ယ့ၣ်ၡူးလၢ ကဟ့ၣ်အဝဲသ့ၣ် လီၢ်လၤလၢအပတီၢ်ထီန့ၣ် ကမၣ်ဖးဒိၣ်ညါ. ဒီးယ့ၣ်ၡူးအပျဲၢ်အဘီၣ် လၢအဂၤတဆံနာ်က့ အဝဲသ့ၣ် တအိၣ်ဃူအိၣ်ဖိးဘၣ် အဃိအဝဲသ့ၣ် မၤကမၣ်တၢ်စ့ၢ်ကီး. ဘၣ်ဆၣ် ယ့ၣ်ၡူး ရ့ဒီးအဝဲသ့ၣ်ဂ့ၤဂ့ၤ ဒီးအဲၣ်အဝဲသ့ၣ် ကီးဂၤဒဲးဒံး. ပန့ၢ်ဘၣ် တၢ်မၤလိဒ်လဲၣ်. တၢ်လၢပှၤဂၤ မၤကမၣ်ဝဲန့ၣ် အရ့ဒိၣ်. ဘၣ်ဆၣ် ပမၤဆၢက့ၤတၢ်ဒ်လဲၣ်န့ၣ် အရ့ဒိၣ်စ့ၢ်ကီး. အဃိ ပကဘၣ်မၤဒ်လဲၣ်. ပမ့ၢ်သးထီၣ် ပဒီပုၢ်ဝဲၢ် တဂၤဂၤန့ၣ် ပကဘၣ် သံကွၢ်လီၤပသးလၢ ‘ဘၣ်မနုၤအဃိ တၢ်လၢအမၤဝဲန့ၣ် မၤသးထီၣ်ယၤလဲၣ်. မ့ၢ်ယကဘၣ် မၤဂ့ၤထီၣ်က့ၤ ယတၢ်ပာ်သး လၢအတဂ့ၤဘၣ် အိၣ်တမံၤမံၤဧါ. ပှၤလၢအမၤသးထီၣ်ယၤတဂၤန့ၣ် ဘၣ်သ့ၣ်သ့ၣ် အအိၣ်ဒီး တၢ်ကီတၢ်ခဲ တမံၤမံၤဟီဧါ. ပှၤတဂၤအံၤ မ့ၢ်မၤကမၣ်ယၤနာ်က့ ယကွၢ်ကပာ်ကွံာ် အတၢ်ကမၣ် ဒီးပာ်ဖျါထီၣ်လၢ ယအဲၣ်အီၤကသ့ဧါ.’ ပမ့ၢ်ရ့ဒီးပှၤဂၤဂ့ၤဂ့ၤ ဒီးအဲၣ်လိာ်သး တဂၤဒီးတဂၤန့ၣ် ပပာ်ဖျါထီၣ်လၢ ပကဲ ယ့ၣ်ၡူးအပျဲၢ်အဘီၣ်နီၢ်ကီၢ်.
၁၆. ယ့ၣ်ၡူး အဒိအတဲာ်န့ၣ် ပမၤလိဘၣ်ဒံး တၢ်မနုၤလဲၣ်.
၁၆ ယ့ၣ်ၡူး အဒိအတဲာ်န့ၣ် မၤစၢၤပှၤဒ်သိး ပကနၢ်ပၢၢ်စၢၤ ပှၤဂၤတၢ်အိၣ်သး. (ကတိၤဒိ ၂၀:၅) ယ့ၣ်ၡူးသ့ၣ်ညါ တၢ်အိၣ်လၢ ပှၤသးပူၤ. မ့မ့ၢ်ပှၤန့ၣ် ပတသ့ၣ်ညါဘၣ်. သနာ်က့ ပဒီပုၢ်ဝဲၢ်မုၣ်ခွါ မ့ၢ်မၤတၢ်တမံၤမံၤလၢ အမၤသးထီၣ်ပှၤန့ၣ် ပကဘၣ် ဝံသးစူၤအဝဲသ့ၣ်. (အ့းဖ့းစူး ၄:၁, ၂; ၁ ပ့းတရူး ၃:၈) ပမ့ၢ်သ့ၣ်ညါအါထီၣ် ပဒီပုၢ်ဝဲၢ်မုၣ်ခွါအဂ့ၢ်န့ၣ် ပဝံသးစူၤအဝဲသ့ၣ် ကညီထီၣ်. ခဲအံၤ ပကကွၢ်သကီး တၢ်အဒိတခါ.
၁၇. ကဝီၤအပှၤကွၢ်တၢ်တဂၤ သ့ၣ်ညါအါထီၣ် ဒီပုၢ်ဝဲၢ်ခွါတဂၤအဂ့ၢ်အဃိ မၤစၢၤအီၤဒ်လဲၣ်.
၁၇ ကဝီၤအပှၤကွၢ်တၢ်တဂၤလၢ အလီၤဘၣ်မူဒါလၢ အၤဖြံၤကၤ မုၢ်ထီၣ်တခီန့ၣ် အနီၣ်ဘၣ်က့ၤ အတၢ်လဲၤခီဖျိ ဘၣ်ဃးဒီး ဒီပုၢ်ဝဲၢ်ခွါတဂၤလၢ အအိၣ်ဒီး တၢ်ပာ်သး လၢအတဂ့ၤဘၣ်. ကဝီၤအပှၤကွၢ်တၢ်အံၤ ရ့ဒီးဒီပုၢ်ဝဲၢ်ခွါတဂၤအံၤ ဒ်လဲၣ်. အတဲဝဲလၢ “ယရ့အါထီၣ် ဒီပုၢ်ဝဲၢ်ခွါတဂၤအံၤ အဃိ ယသ့ၣ်ညါအါထီၣ်အဂ့ၢ်.” ကဝီၤအပှၤကွၢ်တၢ်အံၤ သ့ၣ်ညါထီၣ်ဘၣ်လၢ ဒီပုၢ်ဝဲၢ်ခွါတဂၤအံၤ အတၢ်ပာ်သး တဂ့ၤဘၣ်န့ၣ် ခီဖျိလၢ အဒိၣ်ထီၣ်တၢ်လီၢ် ဒီးအဟံၣ်ဖိဃီဖိ လုၢ်လၢ်အဃိ. ဒီးကဝီၤအပှၤကွၢ်တၢ်အံၤ ဆဲးတဲဝဲလၢ “ယသ့ၣ်ညါဘၣ်လၢ ဒီပုၢ်ဝဲၢ်ခွါတဂၤအံၤ ကဆီတလဲ အတၢ်ပာ်သး ဒီးကရ့ဒီးပှၤဂၤဂ့ၤဂ့ၤန့ၣ် ကီဒိၣ်မး. ဘၣ်ဆၣ် ယသ့ၣ်ညါဘၣ်လၢ အဆီတလဲအသး န့ၢ်ဒီဒူၣ်လံ အဃိ ယပာ်ကဲအီၤဒိၣ်ထီၣ်. ဒီးပကဲထီၣ်ဒီသကီး ဒီးပရ့လိာ်သးမုာ်မး.” ပထံၣ်ဘၣ်လၢ ပမ့ၢ်ကျဲးစၢး ရ့ဒီးပဒီပုၢ်ဝဲၢ်မုၣ်ခွါ ဒီးနၢ်ပၢၢ်စၢၤ အဝဲသ့ၣ်တၢ်အိၣ်သးန့ၣ် ပအဲၣ်အဝဲသ့ၣ် ကညီထီၣ်.
၁၈. ပဒီပုၢ်ဝဲၢ်မုၣ်ခွါတဂၤဂၤ မ့ၢ်မၤသးထီၣ်ပှၤန့ၣ် ပကဘၣ် သံကွၢ်လီၤပသးဒ်လဲၣ်. (ကတိၤဒိ ၂၆:၂၀)
၁၈ တဘျီတခီၣ် ပဒီပုၢ်ဝဲၢ်မုၣ်ခွါတဂၤဂၤ မ့ၢ်မၤသးထီၣ်ပှၤန့ၣ် ပကဘၣ် လဲၤတဲသကီးတၢ်ဒီးအီၤ. သနာ်က့ အဆိကတၢၢ်န့ၣ် ပကဘၣ် သံကွၢ်လီၤပသးလၢ ‘ယသ့ၣ်ညါ တၢ်ဂ့ၢ်တၢ်ကျိၤ ခဲလၢာ်ဧါ.’ (ကတိၤဒိ ၁၈:၁၃) ‘ယမ့ၢ်ဆိမိၣ်လၢ အမၤသးထီၣ်ယၤနာ်က့ ဘၣ်သ့ၣ်သ့ၣ် အတပာ်လီၤသးလၢ အကမၤယၤဒ်န့ၣ်ဘၣ်ဟီဧါ.’ (စံၣ်တဲၤတဲလီၤတၢ် ၇:၂၀) ‘ယမၤသးထီၣ်ဘၣ် ပှၤဂၤဒ်န့ၣ် ကၠ့ၤဧါ.’ (စံၣ်တဲၤတဲလီၤတၢ် ၇:၂၁, ၂၂) ‘ယမ့ၢ်လဲၤတဲတၢ်ဒီးအီၤန့ၣ် မ့ၢ်ယကမၤအါထီၣ် တၢ်ဂ့ၢ်ကီဧါ.’ (ဖး ကတိၤဒိ ၂၆:၂၀.) ပမ့ၢ်ဆိမိၣ်ထံ တၢ်သံကွၢ်တဖၣ်အံၤန့ၣ် ကမၤစၢၤပှၤလၢ ပကအဲၣ် ပဒီပုၢ်ဝဲၢ်မုၣ်ခွါ ဒီးကွၢ်ကပာ်ကွံာ် အတၢ်ကမၣ်.
၁၉. နပာ်လီၤသးလၢ နကမၤမနုၤလဲၣ်.
၁၉ ယဟိဝၤပှၤအုၣ်အသးတဖၣ် အဲၣ်လိာ်သး တဂၤဒီးတဂၤအဃိ အဝဲသ့ၣ် ပာ်ဖျါထီၣ်လၢ အကဲယ့ၣ်ၡူးအပျဲၢ်အဘီၣ်. ဒီးပဒီပုၢ်ဝဲၢ်မုၣ်ခွါ မ့ၢ်တကဲပှၤလၢပှၤပှဲၤဘၣ် နာ်က့ ပမ့ၢ်အဲၣ်အဝဲသ့ၣ်နီၢ်ကီၢ် ဒီးသးအိၣ်ဟ့ၣ်လီၤသးလၢ အဝဲသ့ၣ်အဂီၢ်န့ၣ် ပပာ်ဖျါထီၣ်လၢ ပကဲ ယ့ၣ်ၡူးအပျဲၢ်အဘီၣ်. ပမ့ၢ်အဲၣ်လိာ်သးနီၢ်ကီၢ်န့ၣ် ကမၤစၢၤ ပှၤအဂၤလၢ အဝဲသ့ၣ် ကသ့ၣ်ညါနီၤဖး တၢ်ဘူၣ်တၢ်ဘါ အမ့ၢ်အတီ. ဒီးဘၣ်သ့ၣ်သ့ၣ် အဝဲသ့ၣ် ကဘူၣ်ထီၣ်ဘါထီၣ် ယဟိဝၤယွၤ လၢအမ့ၢ် တၢ်အဲၣ်တၢ်ကွံကစၢ် တပူၤဃီဒီးပှၤ. အဃိ ဒ်သိးပှၤဂၤ သ့ၣ်ညါနီၤဖး ခရံာ်ဖိအမ့ၢ်အတီ ကဘၣ်အဂီၢ် ပကဘၣ် ပာ်လီၤသးလၢ ပကဆဲးအဲၣ်လိာ်သးနီၢ်ကီၢ်.
တၢ်သးဝံၣ် ၁၇ “ယသးအိၣ်”
a ပှၤအါဂၤန့ၣ် ထံၣ်ဘၣ်ဝဲလၢ ပအဲၣ်လိာ်သးနီၢ်ကီၢ်အဃိ အဝဲသ့ၣ် ဘၣ်သးမၤလိအါထီၣ် ယဟိဝၤယွၤအဂ့ၢ် ဒီးအကလုၢ်ကထါ လံာ်စီဆှံ. သနာ်က့ ပတကဲပှၤလၢပှၤပှဲၤဘၣ် အဃိတဘျီတခီၣ် ပတရ့ဒီး ပဒီပုၢ်ဝဲၢ်မုၣ်ခွါလၢ တၢ်အဲၣ်တၢ်ကွံဘၣ်. အဃိ ခဲအံၤ ပကတဲသကီး ဘၣ်မနုၤအဃိ တၢ်အဲၣ်တၢ်ကွံန့ၣ် အရ့ဒိၣ်လဲၣ် ဒီးပှၤဂၤမ့ၢ်မၤကမၣ်တၢ်န့ၣ် ပကွၢ်လိယ့ၣ်ၡူး ကသ့ဒ်လဲၣ်.
b ကွၢ်လံာ်လၢအမ့ၢ် “Come Be My Follower,” chap. 17, pars. 10-11.
c ကွၢ်တၢ်ဂ့ၢ်လၢ အခိၣ်တီမ့ၢ်ဝဲ “At Last, My Life Has a Purpose,” in The Watchtower, November 1, 2012, pp. 13-14.
d ကွၢ်တၢ်ဂ့ၢ်လၢ အခိၣ်တီမ့ၢ်ဝဲ “My Life Seemed Good,” in The Watchtower, May 1, 2012, pp. 18-19.
e လၢတၢ်မၤလိတခါအံၤ ပတတဲဘၣ်ဃးဒီး တၢ်ကမၣ်ဖးဒိၣ်လၢ တၢ်အိၣ်ဖှိၣ်သးပှၢ်တဖၣ် ဘၣ်မၤဘၣ်ဂီၢ်က့ၤဝဲ ဒ်သိးဒီး တၢ်ကမၣ်ဖးဒိၣ်လၢ ၁ ကရံၣ်သူး ၆:၉, ၁၀ ပာ်ဖျါဝဲန့ၣ်ဘၣ်.
f သရၣ်တဂၤ လၢယ့ၣ်ၡူးအစိၤန့ၣ် အတဲဝဲ “လၢဟီၣ်ခိၣ်ချၢ ပှၤတီပှၤလိၤ လၢအလီၤဂာ် ဒ်သိးဒီး စီၤအၤဘြၤဟၣ်န့ၣ် အစှၤကတၢၢ်အိၣ်ဝဲ အဂၤသၢဆံ. လၢပှၤအဂၤသၢဆံ အကျါန့ၣ် ပၣ်ဃုာ်ဒီး ယၤဒီးယဖိခွါ. ဘၣ်ဆၣ် မ့ၢ်အိၣ်အဂၤတဆံန့ၣ် ပၣ်ဃုာ်ဒီး ယၤဒီးယဖိခွါ. ဒီးမ့ၢ်အိၣ်ယဲၢ်ဂၤဟီန့ၣ် ပၣ်ဃုာ်ဒီး ယၤဒီးယဖိခွါ. ဒီးမ့ၢ်အိၣ်ထဲခံဂၤန့ၣ် အကဲဝဲ ယၤဒီးယဖိခွါ. သနာ်က့ ပှၤတီပှၤလိၤ မ့ၢ်အိၣ်ထဲတဂၤန့ၣ် အကဲဝဲယၤလီၤ.”
