ပှၤဖးလံာ်ဖိတဖၣ် အတၢ်သံကွၢ်
ပိာ်ခွါလၢ ပှၤကိးအီၤလၢ “ခွါဧၢ” တဂၤန့ၣ် အတဲဝဲလၢ အမ့ၢ်ဖျီသးဒီး နီၢ်ရူၤသးန့ၣ် အတၢ်န့ၢ်သါက “လီၤမၢ်.” ဘၣ်မနုၤအဃိ အတဲဝဲဒ်န့ၣ်လဲၣ်. (ရူၤသး ၄:၁, ၆)
▪ လၢလံာ်စီဆှံအစိၤန့ၣ် ပိာ်ခွါတဂၤမ့ၢ်သံ ဒီးအဖိမ့ၢ်တအိၣ် နီတဂၤဘၣ်န့ၣ် တၢ်သံကွၢ် အိၣ်ထီၣ်ဝဲလၢ မတဂၤကန့ၢ်ဘၣ်က့ၤ အဟီၣ်ခိၣ်လီၢ်လဲၣ်. ဒီးအဟံၣ်ဖိဃီဖိ အစၢၤအသွဲၣ်အမံၤ ကလီၤမၢ်ကွံာ် လီၤထူလီၤယိာ်ဧါ. ပမ့ၢ်ကွၢ်က့ၤလၢ စီၤမိၤၡ့ တၢ်သိၣ်တၢ်သီန့ၣ် ပကသ့ၣ်ညါဘၣ် တၢ်သံကွၢ်တဖၣ်အံၤ အတၢ်စံးဆၢ.
အဒိ ပိာ်ခွါတဂၤ မ့ၢ်သံ မ့တမ့ၢ် အမ့ၢ်ဖှီၣ်လီၤဒီးဆါကွံာ် အဟီၣ်ခိၣ်လီၢ်န့ၣ် တၢ်ကကဲထီၣ်သးဒီး အဟီၣ်ခိၣ်လီၢ်ဒ်လဲၣ်. အဒီပုၢ်ဝဲၢ်ခွါ မ့တမ့ၢ် အဘူးအတံၢ်လၢ အဘူးဒီးအီၤတဂၤဂၤ ကဟံက့ၤဝဲ မ့တမ့ၢ် ကဘၣ်ပှ့ၤက့ၤဝဲ အဟီၣ်ခိၣ်လီၢ်. အဃိ အဒီပုၢ်ဝဲၢ်ခွါ မ့တမ့ၢ် အဘူးအတံၢ်တဂၤဂၤ ကန့ၢ်ဘၣ်က့ၤဝဲ အဟီၣ်ခိၣ်လီၢ်.—၃ မိၤၡ့ ၂၅:၂၃-၂၈; ၄ မိၤၡ့ ၂၇:၈-၁၁.
ဒ်သိး ပိာ်ခွါလၢအသံတဂၤ အဟံၣ်ဖိဃီဖိ အစၢၤအသွဲၣ်အမံၤ တလီၤမၢ်တဂ့ၤအဂီၢ် စီၤမိၤၡ့ တၢ်သိၣ်တၢ်သီ ပာ်ဖျါထီၣ်ဝဲဒ်လဲၣ်. တၢ်သိၣ်တၢ်သီအိၣ်လၢ အဘူးအတံၢ်တဂၤဂၤ ကဘၣ်ဟံန့ၢ်က့ၤ ပိာ်ခွါလၢအသံတဂၤအံၤအမါ ဒ်သိး ပိာ်ခွါတဂၤန့ၣ် အမံၤတလီၤမၢ်တဂ့ၤ ဒီးကန့ၢ်ဘၣ်က့ၤ အဟီၣ်ခိၣ်လီၢ်. နီၢ်ရူၤသးစ့ၢ်ကီး ထံၣ်ဘၣ်ဒီး တၢ်အိၣ်သးဒ်န့ၣ်. အဃိ တၢ်ရဲၣ်တၢ်ကျဲၤအံၤ ကဲဘျုးလၢ ပှၤမုၣ်ကမဲအဂီၢ်.—၅ မိၤၡ့ ၂၅:၅-၇; မးသဲ ၂၂:၂၃-၂၈.
ပကကွၢ်သကီး နီၢ်နၤဧမံ အတၢ်လဲၤခီဖျိ. နီၢ်နၤဧမံန့ၣ် အဖျီအသးဒီး စီၤအလံၤမ့လ့း. ဖဲအဝၤဒီးအဖိခွါခံဂၤ သံဝံၤအလီၢ်ခံ လၢအဟံၣ်ဖိဃီဖိအကျါ ပိာ်ခွါလၢ ကကွၢ်ထွဲအီၤ တအိၣ်နီတဂၤလၢၤဘၣ်. (ရူၤသး ၁:၁-၅) ဖဲနီၢ်နၤဧမံ ဒီးအဒဲၣ်မုၣ် နီၢ်ရူၤသး က့ၤအိၣ်လၢ ကီၢ်ယူဒၤခါန့ၣ် အမၢအဒဲၣ်မုၣ်တဲဘၣ် စီၤဘိၤဧးလၢ ကပှ့ၤန့ၢ်က့ၤ အဟီၣ်ခိၣ်လီၢ်. စီၤဘိၤဧးန့ၣ် အကဲဝဲ စီၤအလံၤမ့လ့း အဘူးအတံၢ်. (ရူၤသး ၂:၁, ၁၉, ၂၀; ၃:၁-၄) ဘၣ်ဆၣ် စီၤဘိၤဧး သ့ၣ်ညါဝဲ ပိာ်ခွါလၢ ပှၤကိးအီၤလၢ “ခွါဧၢ” တဂၤန့ၣ် အဘူးဒီး စီၤအလံၤမ့လ့း ဒိၣ်န့ၢ်ဒံးအီၤ. အဃိ ပှၤတဂၤန့ၣ် အိၣ်ဒီးတၢ်ခွဲးတၢ်ယာ်လၢ အကကဲထီၣ် ပှၤလၢကပှ့ၤက့ၤတၢ် အါန့ၢ်ဒံးစီၤဘိၤဧး.—ရူၤသး ၃:၉, ၁၂, ၁၃.
အခီၣ်ထံးခါ ပိာ်ခွါလၢ ပှၤကိးအီၤလၢ “ခွါဧၢ” တဂၤအံၤ ဘၣ်သးမၤစၢၤ နီၢ်နၤဧမံ. (ရူၤသး ၄:၁-၄) ခီဖျိလၢ အသ့ၣ်ညါဝဲလၢ နီၢ်နၤဧမံန့ၣ် အသးပှၢ်လံ ဒီးအဖိလၢ ကဆဲးဟံဝဲ စီၤအလံၤမ့လ့း အဟီၣ်ခိၣ်လီၢ်အံၤ တအိၣ်နီတဂၤလၢၤဘၣ်. အဃိ ပှၤတဂၤအံၤ မ့ၢ်ဘၣ်ပှ့ၤက့ၤ စီၤအလံၤမ့လ့း အဟီၣ်ခိၣ်လီၢ်နာ်က့ အပှ့ၤဝဲကဲ. ဒီးဟီၣ်ခိၣ်လီၢ်အံၤ ကကဲထီၣ်က့ၤ အတၢ်န့ၢ်သါအဃိ အတၡူဘၣ်.
ဘၣ်ဆၣ် ဖဲပှၤတဂၤအံၤ သ့ၣ်ညါဝဲလၢ အကဘၣ်ဟံဒီး နီၢ်ရူၤသးအခါ အတဘၣ်သးပှ့ၤဝဲ ဟီၣ်ခိၣ်လီၢ်အံၤလၢၤဘၣ်. အတဲဝဲလၢ “ယတၢ်န့ၢ်သါ ကလီၤမၢ်ဘၣ်ဖုးအဃိ ယပှ့ၤက့ၤအီၤတသ့ဘၣ်.” (ရူၤသး ၄:၅, ၆) ဘၣ်မနုၤအဃိ အတဲဝဲဒ်န့ၣ်လဲၣ်.
ပိာ်ခွါလၢ ပှၤကိးအီၤလၢ “ခွါဧၢ” တဂၤအံၤ မ့တမ့ၢ် ပှၤအဂၤတဂၤ မ့ၢ်ဟံဒီးနီၢ်ရူၤသး ဒီးအဝဲသ့ၣ် အဖိခွါမ့ၢ်အိၣ်န့ၣ် ဖိတဂၤအံၤ ကန့ၢ်ဘၣ်ဝဲ စီၤအလံၤမ့လ့း အဟီၣ်ခိၣ်လီၢ်. အဃိ ပှၤတဂၤအံၤအ “တၢ်န့ၢ်သါ” ကလဲၤ “လီၤမၢ်” ဒ်လဲၣ်. လံာ်စီဆှံ တတဲဖျါထီၣ်ဝဲဘၣ်. သနာ်က့ ဘၣ်သ့ၣ်သ့ၣ် တၢ်ဂ့ၢ်ကအိၣ်ဝဲတနီၤ.
တၢ, စီၤအလံၤမ့လ့း အဟီၣ်ခိၣ်လီၢ်န့ၣ် နီၢ်ရူၤသးအဖိခွါ ကန့ၢ်ဘၣ်ဝဲအဃိ တကဲထီၣ် ပှၤတဂၤအံၤ အဟီၣ်ခိၣ်လီၢ်ဘၣ်. အဃိဖျါလၢ အစ့ကလၢာ်ဂီၤ.
ခံ, အမ့ၢ်ဟံဒီး နီၢ်ရူၤသးန့ၣ် အကဘၣ် ကွၢ်ထွဲဒီးလုၢ်အီၣ်လုၢ်အီ နီၢ်နၤဧမံ ဒီးနီၢ်ရူၤသး.
သၢ, ပှၤတဂၤအံၤ အဖိမ့ၢ်အိၣ်ပာ်စၢၤ ဒီးအမ့ၢ်ဟံဒီး နီၢ်ရူၤသး ဒီးအဖိမ့ၢ်အိၣ်အါထီၣ်န့ၣ် အဖိလၢအအိၣ်ပာ်စၢၤ ဒီးအဖိလၢ အန့ၢ်ဘၣ်ဝဲခီဖျိနီၢ်ရူၤသးန့ၣ် ကဘၣ်နီၤလီၤလိာ်သး ဟီၣ်ခိၣ်လီၢ်.
လွံၢ်, ပှၤတဂၤအံၤ အဖိမ့ၢ်တအိၣ်ပာ်စၢၤ နီတဂၤဘၣ် ဒီးအီၤဒီးနီၢ်ရူၤသး မ့ၢ်န့ၢ်ဘၣ်ဖိခွါန့ၣ် ဖိတဂၤအံၤ ကန့ၢ်ဘၣ်ဝဲ စီၤအလံၤမ့လ့း အဟီၣ်ခိၣ်လီၢ် ဒီးပှၤတဂၤအံၤ အဟီၣ်ခိၣ်လီၢ်စ့ၢ်ကီး. ဒီးခီဖျိလၢ ဖိသၣ်တဂၤအံၤ တအိၣ်ဖျဲၣ်ထီၣ်လၢ ပှၤတဂၤအံၤ အဟံၣ်ဖိဃီဖိ အစၢၤအသွဲၣ်အမံၤဘၣ်, ဘၣ်ဆၣ် အအိၣ်ဖျဲၣ်ထီၣ်လၢ စီၤအလံၤမ့လ့း အဟံၣ်ဖိဃီဖိ အစၢၤအသွဲၣ်အမံၤအဃိ ပှၤတဂၤအံၤ မ့ၢ်သံန့ၣ် ဖိသၣ်တဂၤအံၤ ကန့ၢ်ဘၣ်ဝဲ အဟီၣ်ခိၣ်လီၢ်စ့ၢ်ကီး. အဃိ ပထံၣ်ဘၣ်လၢ ပှၤတဂၤအံၤ တဘၣ်သး တူၢ်ၡူကွံာ် အတၢ်န့ၢ်သါ ဒီးမၤစၢၤနီၢ်နၤဧမံဘၣ်. အဃိ အပျဲဝဲလၢ စီၤဘိၤဧး ကကဲပှၤပှ့ၤက့ၤတၢ် လၢအလီၢ် ဒီးဟံထီၣ်ဖီၣ်ထီၣ်မူဒါအံၤ. တကးဒံးဘၣ် “ဒ်သိးပှၤလၢအသံတဂၤန့ၣ် အမံၤသုတလီၤမၢ်လၢ အတၢ်န့ၢ်သါအပူၤ” တဂ့ၤအဂီၢ် ပထံၣ်ဘၣ်လၢ စီၤဘိၤဧး ဘၣ်သးမၤစၢၤ နီၢ်နၤဧမံ.—ရူၤသး ၄:၁၀.
ပိာ်ခွါလၢ ပှၤကိးအီၤလၢ “ခွါဧၢ” တဂၤအံၤ အကျဲးစၢးဝဲဒ်သိး အနီၢ်ကစၢ်အမံၤ ဒီးအတၢ်န့ၢ်သါ တလီၤမၢ်တဂ့ၤအဃိ ပသ့ၣ်ညါဘၣ်လၢ အကဲပှၤလၢ အအဲၣ်လီၤထဲအသး. အကျဲးစၢးဝဲ ထဲလဲၣ်ဘၣ်ဆၣ် အမံၤဒ်လဲၣ်န့ၣ် ပမၣ်တသ့ၣ်ညါဘၣ်. တကးဒံးဘၣ် အတန့ၢ်ဘၣ် တၢ်ခွဲးတၢ်ယာ် ဒ်သိးစီၤဘိၤဧး န့ၢ်ဘၣ်ဝဲဘၣ်. ပထံၣ်ဘၣ်လၢ မ့းၡံအၤ လၢအမ့ၢ် ယ့ၣ်ၡူးခရံာ်န့ၣ် ဟဲလီၤစၢၤလၢ စီၤဘိၤဧး. ပိာ်ခွါလၢ ပှၤကိးအီၤလၢ “ခွါဧၢ” တဂၤအံၤ အဲၣ်လီၤထဲအသး ဒီးတဘၣ်သးမၤစၢၤ ပှၤလၢအလိၣ်ဘၣ် တၢ်မၤစၢၤဘၣ်အဃိ အတန့ၢ်ဘၣ် တၢ်ခွဲးတၢ်ယာ်လီၤဆီအံၤဘၣ်.—မးသဲ ၁:၅; လူၤကၣ် ၃:၂၃, ၃၂.
