၁-၂. ဖဲ​ပှၤ​ဒိးဘျၢထံ​အခါ တၢ်မၤအသး​ဒ်လဲၣ်​ ဒီး​နၤမီၤ န​ပာ်လီၤသး​လၢ န​က​မၤ​မနုၤလဲၣ်.

 တနွံ​​ဘၣ်​တနွံ ပှၤလၢ​အဟ့ၣ်လုၢ်ထီၣ်အသး ဒီး​ဒိးဘျၢထံ ဒ်သိး​က​ကဲထီၣ်​ ယဟိဝၤ​ပှၤအုၣ်အသး​န့ၣ်​ အိၣ်​ဝဲ​လၢ အကထိညါ. န​ထံၣ်ဘၣ်​ ပှၤ​ဒိးဘျၢထံ​တဘျီဘျီဧါ. ဖဲ​ပှၤ​ဒိးဘျၢထံ​အခါ ပှၤလၢ​က​ဒိးဘျၢထံတဖၣ်​ က​စံးဆၢဝဲ တၢ်သံကွၢ်​ခံဖျၢၣ်​ လၢ​တၢ်သးဆူၣ်. န​က​ထံၣ်​ဘၣ်​လၢ အဟံၣ်ဖိဃီဖိ ဒီး​အသကီးတဖၣ်​ သးခု​ဒိၣ်မး. ဒီး​ဖဲ​ပှၤလၢ​အဒိးဘျၢထံ​တဂၤ ဟဲက့ၤထီၣ်​လၢ ထံကျါ​အခါ န​က​ထံၣ်ဘၣ်​ အနံၤကမှံ ဒီး​န​က​နၢ်ဟူ​ဘၣ်​ပှၤ​ဒဲစု.

^၂ န​မ့​မ့ၢ်​ပှၤသးပှၢ်​မ့ၢ်ဂ့ၤ ပှၤသးစၢ်​မ့ၢ်ဂ့ၤ တၢ်မၤလိ​တခါအံၤ က​မၤစၢၤ​နၤ ဖးအါညါ. အဃိ န​ပာ်လီၤသး​လၢ န​က​ဒိးဘျၢထံ​စ့ၢ်ကီးဧါ. န​မ့ၢ်​ပာ်လီၤသး​ဒ်န့ၣ်န့ၣ်​ အဂ့ၤ​ဒိၣ်မး. န​အိၣ်မူ​ဘၣ်​လၢ ဟီၣ်ခိၣ်​လၢ အအၢအသီ​နာ်က့ ခီဖျိလၢ​န “ဃု ယဟိဝၤယွၤ” အဃိ အထံၣ်​နၤ​ဒ် ပှၤလုၢ်ဒိၣ်ပှ့ၤဒိၣ်​တဂၤ. (စံးထီၣ်ပတြၢၤ ၁၄:၁, ၂) ဒီး​န​ဒိးဘျၢထံ မ့ၢ်​ဝံၤ​နာ်က့ န​​ဘၣ်​ကျဲးစၢး​ဒ်သိး န​က​သးဆူၣ်​လၢ န​က​ဆဲး​မၤ ယဟိဝၤယွၤ အတၢ်မၤ​ထီဘိ. အဃိ ခဲအံၤန့ၣ်​ ပ​က​တဲသကီး တၢ်ဂ့ၢ်​သၢထံၣ်​လၢ ဘၣ်မနုၤအဃိ ပ​ဘၣ်သး​မၤ ယဟိဝၤယွၤ အတၢ်မၤ​လဲၣ်.

၃. ဘၣ်မနုၤအဃိ ယဟိဝၤယွၤ အပှၤဂီၢ်မုၢ် အဲၣ်​တၢ်မ့ၢ်တၢ်တီ ဒီး​တၢ်တီတၢ်လိၤလဲၣ်. (စံးထီၣ်ပတြၢၤ ၁၁၉:၁၂၈, ၁၆၃)

^၃ ယဟိဝၤယွၤ မၤလိာ်​အပှၤဂီၢ်မုၢ်​လၢ​က “အဲၣ်​တၢ်မ့ၢ်တၢ်တီ.” (စကၤရယၤ ၈:၁၉) ယ့ၣ်ၡူး တဲဘၣ်​ အပျဲၢ်အဘီၣ်​လၢ အဝဲသ့ၣ်​ က​​ဘၣ်​မၤ တၢ်တီတၢ်လိၤ. (မးသဲ ၅:၆) ပှၤလၢ​အအဲၣ်​တၢ်မ့ၢ်တၢ်တီ ဒီး​မၤ​တၢ်တီတၢ်လိၤန့ၣ်​ အဘၣ်သး​မၤ တၢ်လၢအဘၣ်​ ဒီး​မၤ​တၢ်ဂ့ၤ​လၢ ကစၢ်ယွၤ​မဲာ်ညါ. ပ​သ့ၣ်ညါ​လၢ နၤ​စ့ၢ်ကီး န​အဲၣ်​တၢ်မ့ၢ်တၢ်တီ ဒီး​န​ဘၣ်သး​မၤ တၢ်တီတၢ်လိၤ. အဃိ န​သးဟ့ တၢ်လံၣ်တၢ်လီ, တၢ်အၢတၢ်သီ ဒီး​တၢ်လၢ​အကမၣ်​ခဲလၢာ်. (ဖး စံးထီၣ်ပတြၢၤ ၁၁၉:၁၂၈, ၁၆၃.) ပှၤလၢ​အလံၣ်တၢ်န့ၣ်​  အကွၢ်လိဝဲ မုၣ်ကီၤလံၢ် လၢ​အကဲ ပှၤလၢ​အပၢဟီၣ်ခိၣ်. (ယိၤဟၣ်​ ၈:၄၄; ၁၂:၃၁) မုၣ်ကီၤလံၢ် အတၢ်တိာ်ပာ်​န့ၣ်​ကဲဝဲ အက​တဲဟးဂီၤ ယဟိဝၤယွၤ​အမံၤ. အဃိ အတဲလံၣ်တဲလီ ယဟိဝၤယွၤ​အဂ့ၢ် စးထီၣ်လၢ ဧ့ၤဒ့ၣ်​တၤသၣ်လီၢ်​အခါ​လံ. မုၣ်ကီၤလံၢ် တဲဝဲလၢ ယဟိဝၤယွၤန့ၣ်​ အအဲၣ်လီၤထဲအသး, အကဲ​ပှၤပၢတၢ်​လၢ အတတီတလိၤဘၣ်​ ဒီး​အတဟ့ၣ်​ ပှၤဟီၣ်ခိၣ်ဖိ တၢ်လၢအဂ့ၤဘၣ်. (၁ မိၤၡ့ ၃:၁, ၄, ၅) ခီဖျိလၢ မုၣ်ကီၤလံၢ် တဲ​လံၣ်တၢ်​အဃိ ပှၤဟီၣ်ခိၣ်ဖိ ဆိမိၣ်ကမၣ်​ ယဟိဝၤယွၤ. တကးဒံးဘၣ်​ ပှၤတဂၤဂၤ မ့ၢ်​တ “အဲၣ်​တၢ်မ့ၢ်တၢ်တီ” ဘၣ်န့ၣ်​ မုၣ်ကီၤလံၢ် ကွဲန့ၢ်လွဲန့ၢ်​အီၤ​လၢ က​မၤ​တၢ်တတီတလိၤ ဒီး​တၢ်အၢတၢ်သီ န့ၢ်​ညီညီ.—ရိမ့ၤ ၁:၂၅-၃၁.

၄. ယဟိဝၤယွၤ ကဲဝဲ “တၢ်မ့ၢ်တၢ်တီ​ကစၢ်” န့ၣ်​ပ​သ့ၣ်ညါ​ဘၣ်​ဒ်လဲၣ်. (ကွၢ်​စ့ၢ်ကီး​တၢ်ဂီၤ.)

^၄ ယဟိဝၤယွၤန့ၣ်​ အကဲဝဲ “တၢ်မ့ၢ်တၢ်တီ​ကစၢ်.” အသးအိၣ်​ ပှၤလၢ​အအဲၣ်​အီၤ ဒီး​သိၣ်လိ​အဝဲသ့ၣ်​လၢ တၢ်မ့ၢ်တၢ်တီ. (စံးထီၣ်ပတြၢၤ ၃၁:၅) ခီဖျိလၢ ယဟိဝၤယွၤ မၤ​ဝဲ​ဒ်န့ၣ်​အဃိ မုၣ်ကီၤလံၢ် လံၣ်န့ၢ်​အဝဲသ့ၣ်​ တန့ၢ်လၢၤဘၣ်. ယဟိဝၤယွၤ သိၣ်လိ​စ့ၢ်ကီး အပှၤဂီၢ်မုၢ်​လၢ က​အဲၣ်​တၢ်တီတၢ်လိၤ ဒီး​မၤတၢ်​တီတီလိၤလိၤ. အဃိ အဝဲသ့ၣ်​ အိၣ်ဒီး​တၢ်သူၣ်မံသးမုာ် ဒီး​ပာ်လုၢ်ပာ်ပှ့ၤ​လီၤ အနီၢ်ကစၢ်​သး. (ကတိၤဒိ ၁၃:၅, ၆) နၤ​စ့ၢ်ကီး ခီဖျိလၢ န​မၤလိ လံာ်စီဆှံ​အဃိ န​သ့ၣ်ညါ​​ဘၣ်​လၢ ယဟိဝၤယွၤ အတၢ်သိၣ်လိန့ၣ်​ အဂ့ၤကတၢၢ်​လၢ ပှၤဟီၣ်ခိၣ်ဖိ​အဂီၢ် ဒီး​အကဲဘျုး​လၢ န​တၢ်အိၣ်မူ​ပူၤ. (ယၡါယၤ ၄၈:၁၇) ဒီး​န​ဘၣ်သး​မၤ​တၢ်လၢ ကစၢ်ယွၤ တဲဝဲလၢ​အဘၣ်. (မးသဲ ၆:၃၃) တကးဒံးဘၣ်​ န​ဘၣ်သး တဲ​ဘၣ်​ပှၤဂၤ တၢ်မ့ၢ်တၢ်တီ ဒ်သိး​အဝဲသ့ၣ်​က​သ့ၣ်ညါ​လၢ မုၣ်ကီၤလံၢ်န့ၣ်​ အကဲ​ပှၤလၢ အတဲဟးဂီၤ ယဟိဝၤယွၤ​အဂ့ၢ်. အဃိ န​က​​ဘၣ်​မၤ​ဒ်​လဲၣ်.

၅. န​ပာ်ဖျါထီၣ်​လၢ န​အဲၣ်​တၢ်မ့ၢ်တၢ်တီ ဒီး​တၢ်တီတၢ်လိၤ ကသ့​ဒ်လဲၣ်.

^၅ န​မ့ၢ်​အဲၣ်​တၢ်မ့ၢ်တၢ်တီ ဒီး​တၢ်တီတၢ်လိၤန့ၣ်​ အကမၤစၢၤ​နၤ​လၢ န​ကဘၣ်သး ဒိးဘျၢထံ. အဃိ န​ပာ်ဖျါ​လၢ န​အဲၣ်​တၢ်မ့ၢ်တၢ်တီ ကသ့​ဒ်လဲၣ်. န​ပာ်ဖျါထီၣ်​ သ့​ခီဖျိ န​ပျဲလၢ ယဟိဝၤယွၤ က​ကဲ​န​တၢ်ပၢကစၢ်, မၤ​တၢ်လၢ ယဟိဝၤယွၤ တဲဝဲလၢ​အဘၣ်​ ဒီး​န​တကနၣ်​ မုၣ်ကီၤလံၢ် တၢ်လံၣ်တၢ်လီ​ဘၣ်. တကးဒံးဘၣ်​ န​က​ဘၣ်​ဃ့ထုကဖၣ်​ လၢ​ယဟိဝၤယွၤ​အအိၣ်​ ဒီး​အၢၣ်​လီၤ​အီၤ​လၢ န​က​မၤ​အတၢ်မၤ တစိၤသး ဒီး​ဒိးဘျၢထံ.

၆. ဘၣ်မနုၤအဃိ ပ​အဲၣ်​ယ့ၣ်ၡူး​ခရံာ်​လဲၣ်. (စံးထီၣ်ပတြၢၤ ၄၅:၄)

^၆ ဘၣ်မနုၤအဃိ န​အဲၣ်​ယ့ၣ်ၡူး​ခရံာ်​လဲၣ်. (ဖး စံးထီၣ်ပတြၢၤ ၄၅:၄.) ယ့ၣ်ၡူး​အဲၣ်​ တၢ်မ့ၢ်တၢ်တီ, အအိၣ်ဒီး တၢ်ဆီၣ်လီၤသး ဒီး​အမၤ​တၢ်တီတၢ်လိၤ. န​မ့ၢ်​အဲၣ်​ တၢ်မ့ၢ်တၢ်တီ ဒီး​မၤ​တၢ်တီတၢ်လိၤန့ၣ်​ ပ​သ့ၣ်ညါ​လၢ န​အဲၣ်​ယ့ၣ်ၡူး​ခရံာ်. ပ​သ့ၣ်ညါ​လၢ ယ့ၣ်ၡူးန့ၣ်​ အသးဆူၣ်​လၢ တၢ်မ့ၢ်တၢ်တီ ဒီး​တၢ်တီတၢ်လိၤ​ အဂီၢ်. (ယိၤဟၣ်​ ၁၈:၃၇) ဘၣ်ဆၣ်​ ယ့ၣ်ၡူး ကဲပှၤလၢ​အဆီၣ်လီၤသး​န့ၣ်​ ပ​သ့ၣ်ညါ​ဘၣ်​ဒ်လဲၣ်.

၇. ယ့ၣ်ၡူး အိၣ်ဒီး​တၢ်ဆီၣ်လီၤသးန့ၣ်​ ပ​သ့ၣ်ညါ​ဘၣ်​ဒ်လဲၣ်.

^၇ ယ့ၣ်ၡူး ကဲပှၤလၢ​အဆီၣ်လီၤသးန့ၣ်​ ပ​သ့ၣ်ညါ​ဘၣ်​ခီဖျိ အတၢ်ဒိတၢ်တဲာ်. အဒိ ယ့ၣ်ၡူးန့ၣ်​ အဟ့ၣ်​တၢ်လၤကပီၤ လၢ​အပါ​အအိၣ်​ထီဘိ ဒီး​တမၤလၤကပီၤလီၤအသး နီတဘျီဘၣ်. (မၢ်ကူး ၁၀:၁၇, ၁၈; ယိၤဟၣ်​ ၅:၁၉) ယ့ၣ်ၡူး အိၣ်ဒီး​တၢ်ဆီၣ်လီၤသး ဒ်အံၤ​အဃိ ပ​အဲၣ်​အီၤ​ဒိၣ်ထီၣ်​ ဒီး​ပ​ဘၣ်သး​ကွၢ်လိ​အီၤ. ဘၣ်မနုၤအဃိ ယ့ၣ်ၡူး ကဲပှၤလၢ​အဆီၣ်လီၤသး​လဲၣ်. ခီဖျိလၢ အအဲၣ်​အပါ ဒီး​အကွၢ်လိ​အပါ လၢ​အကဲ​ပှၤလၢ​အဆီၣ်လီၤသး. (စံးထီၣ်ပတြၢၤ ၁၈:၃၅; ဧ့ၤဘြံၤ ၁:၃) ယ့ၣ်ၡူး​ကွၢ်လိ ယဟိဝၤယွၤ အတၢ်ဂ့ၤတၢ်ဝါ လၢလၢပှဲၤပှဲၤ​အဃိ န​တဘၣ်သး ကွၢ်လိ​အီၤ​ဧီၤ.

၈. ဘၣ်မနုၤအဃိ ပ​က​ဘၣ်​အဲၣ်​ ပ​စီၤပၤ​ယ့ၣ်ၡူး​လဲၣ်.

^၈ ယဟိဝၤယွၤ သိၣ်လိ​အဖိခွါ ဒီး​ပာ်ထီၣ်​အီၤ​လၢ အက​ကဲ​စီၤပၤ​အဃိ ပ​သ့ၣ်ညါ​လၢ ယ့ၣ်ၡူးန့ၣ်​ အကဲ​စီၤပၤ​လၢ အဂ့ၤကတၢၢ်​တဂၤ. (ယၡါယၤ ၅၀:၄, ၅) တကးဒံးဘၣ်​ ယ့ၣ်ၡူး အဲၣ်​ပှၤ ဒီး​အဟ့ၣ်လီၤကွံာ် အသးသမူ လၢ​ပဂီၢ်​အဃိ ပ​က​ဘၣ်​အဲၣ်​အီၤ. (ယိၤဟၣ်​ ၁၃:၁) ယ့ၣ်ၡူး တဲဝဲလၢ ပ​မ့ၢ်​အဲၣ်​အီၤ​နီၢ်ကီၢ်န့ၣ်​ ပ​က​ကဲထီၣ်​အသကီး. အဃိ ဖဲ​ပ​မၤထွဲ ယ့ၣ်ၡူး​အတၢ်မၤလိာ်​အခါ ပ​ပာ်ဖျါထီၣ်​လၢ ပ​အဲၣ်​အီၤ. (ယိၤဟၣ်​ ၁၄:၁၅; ၁၅:၁၄, ၁၅) ဒီး​ပ​ကဲ​ဘၣ်​ ယ့ၣ်ၡူး အသကီး​အဃိ ပ​သးခုညါ.

၉. ယ့ၣ်ၡူး အပျဲၢ်အဘီၣ်​ အတၢ်ဒိးဘျၢထံန့ၣ်​ လီၤဂာ်လိာ်သးဒီး ယ့ၣ်ၡူး တၢ်ဒိးဘျၢထံ​ဒ်လဲၣ်.

^၉ ယ့ၣ်ၡူး မၤလိာ်​အပျဲၢ်အဘီၣ်တဖၣ်​လၢ အဝဲသ့ၣ်​ က​ဘၣ်​ဒိးဘျၢထံ. (မးသဲ ၂၈:၁၉, ၂၀) တကးဒံးဘၣ်​ ယ့ၣ်ၡူး​စ့ၢ်ကီး အဒိးဘျၢထံ. ဘၣ်ဆၣ်​ ယ့ၣ်ၡူး တၢ်ဒိးဘျၢထံန့ၣ်​ လီၤဆီဒီး အပျဲၢ်အဘီၣ်​ တၢ်ဒိးဘျၢထံ​တစဲး. (ကွၢ်​တၢ်လွံၢ်နၢၣ်​ လၢအမ့ၢ် “ ယ့ၣ်ၡူး တၢ်ဒိးဘျၢထံန့ၣ်​ လီၤဆီဒီး အပျဲၢ်အဘီၣ်​ တၢ်ဒိးဘျၢထံ​ဒ်လဲၣ်”) သနာ်က့ တၢ်လၢ​အလီၤဂာ်လိာ်သးန့ၣ်​ အိၣ်​စ့ၢ်ကီး. ဖဲယ့ၣ်ၡူး ဒိးဘျၢထံ​အခါ အပာ်ဖျါထီၣ်​လၢ အဟ့ၣ်​လီၤ​အသး​လၢ အက​မၤ အပါ​တၢ်ဘၣ်သး. (ဧ့ၤဘြံၤ ၁၀:၇) ယ့ၣ်ၡူး အပျဲၢ်အဘီၣ်​စ့ၢ်ကီး ဖဲ​အဝဲသ့ၣ်​ ဒိးဘျၢထံ​အခါ အပာ်ဖျါထီၣ်​လၢ အဟ့ၣ်လုၢ်ထီၣ်အသး လၢ​ယဟိဝၤယွၤ​အအိၣ်. ဒီး​အဝဲသ့ၣ်​ အၢၣ်လီၤ​ဝဲ​လၢ အက​ပာ်ဆိ ကစၢ်ယွၤ​အတၢ်ဘၣ်သး လၢ​အတၢ်အိၣ်မူ​ပူၤ. အဝဲသ့ၣ်​ မၤ​ဝဲ​ဒ်အံၤ​အဃိ အဝဲသ့ၣ်​ ကွၢ်လိ​ယ့ၣ်ၡူး.

၁၀. ဘၣ်မနုၤအဃိ န​အဲၣ်​ယ့ၣ်ၡူး​လဲၣ်​ ဒီး​န​ပာ်ဖျါထီၣ်​လၢ န​အဲၣ်​အီၤ ကသ့​ဒ်လဲၣ်.

^၁၀ နနာ်လၢ ယ့ၣ်ၡူးန့ၣ်​ အကဲဝဲ ယဟိဝၤယွၤ အဖိခွါ​ထဲတဂၤ ဒီး​န​သးခု​လၢ ယဟိဝၤယွၤ ပာ်ထီၣ်​အီၤ​လၢ အက​ကဲ​န​စီၤပၤ. န​သ့ၣ်ညါ​လၢ ယ့ၣ်ၡူးန့ၣ်​ အကဲ​ပှၤလၢ အဆီၣ်လီၤအသး ဒီး​အကွၢ်လိ​အပါ အတၢ်ဂ့ၤတၢ်ဝါ လၢလၢပှဲၤပှဲၤ. န​သ့ၣ်ညါ​ဘၣ်​စ့ၢ်ကီး​လၢ ယ့ၣ်ၡူးန့ၣ်​ အဒုးအီၣ်ဒုးအီ ပှၤ​ဂၤ, အမၤမုာ်ထီၣ်က့ၤ ပှၤလၢ​အသးဘၣ်ဖှီၣ်​ ဒီး​အမၤဘျါက့ၤ ပှၤဆါ. (မးသဲ ၁၄:၁၄-၂၁) န​ထံၣ်​ဘၣ်​စ့ၢ်ကီး​လၢ ယ့ၣ်ၡူး ဟံးစုနဲၣ်ကျဲဝဲ အတၢ်အိၣ်ဖှိၣ်​ လၢ​ဆၢကတီၢ်ခဲအံၤ. (မးသဲ ၂၃:၁၀) ဒီး​န​သ့ၣ်ညါ​လၢ ယ့ၣ်ၡူးန့ၣ်​အကဲဝဲ ကစၢ်ယွၤအဘီမုၢ် အစီၤပၤ​အဃိ ခါဆူညါ အက​မၤန့ၢ်​ပှၤ တၢ်လၢ​အဂ့ၤ​ဒီဒူၣ်. အဃိ န​ပာ်ဖျါထီၣ်​လၢ န​အဲၣ်​ယ့ၣ်ၡူး ကသ့​ဒ်လဲၣ်. န​ပာ်ဖျါထီၣ်​ သ့​ခီဖျိ န​ကွၢ်လိ​အီၤ. (ယိၤဟၣ်​ ၁၄:၂၁) ဒီး​န​ကွၢ်လိ​အီၤ သ့​ခီဖျိ န​ဟ့ၣ်လုၢ်ထီၣ်သး​လၢ ယဟိဝၤယွၤ​အအိၣ်​ ဒီး​ဒိးဘျၢထံ.

၁၁. တၢ်ဂ့ၢ်​အရ့ဒိၣ်ကတၢၢ်​လၢ န​ဒိးဘျၢထံန့ၣ်​ မ့ၢ်​မနုၤလဲၣ်.

^၁၁ တၢ်ဂ့ၢ်​အရ့ဒိၣ်ကတၢၢ်​လၢ န​ဒိးဘျၢထံန့ၣ်​ မ့ၢ်​မနုၤလဲၣ်. ယ့ၣ်ၡူး တဲဖျါထီၣ်​ ကစၢ်ယွၤ အတၢ်မၤလိာ် အရ့ဒိၣ်ကတၢၢ်​တထံၣ်​ ဒီး​အတဲဝဲလၢ “န​က​ဘၣ်​အဲၣ်​ န​ကစၢ် ယဟိဝၤယွၤ လၢ​န​သးဒီဖျၢၣ်, လၢ​န​တၢ်အိၣ်မူ ကိးသနၢၣ်ဒဲး​အပူၤ, လၢ​န​တၢ်ကူၣ်တၢ်ဆး ခဲလၢာ် ဒီး​လၢ​နဂံၢ်နဘါ ခဲလၢာ်.” (မၢ်ကူး ၁၂:၃၀) နၤမီၤ န​တၢ်အဲၣ်​ကစၢ်ယွၤန့ၣ်​ အလီၤဂာ်​ဒ်သိးဒီး ယ့ၣ်ၡူး​တဲဝဲဧါ.

၁၂. ဘၣ်မနုၤအဃိ န​အဲၣ်​ယဟိဝၤယွၤ​လဲၣ်. (ကွၢ်​စ့ၢ်ကီး​တၢ်ဂီၤ.)

^၁၂ ဘၣ်မနုၤအဃိ ပ​အဲၣ်​ယဟိဝၤယွၤ​လဲၣ်​န့ၣ်​ တၢ်ဂ့ၢ်အိၣ်​ဝဲ​ဒီဒူၣ်. အဒိ ပ​သ့ၣ်ညါ​ဘၣ်​လၢ ယဟိဝၤယွၤန့ၣ်​ အကဲဝဲ “တၢ်မူ​အဂံၢ်ခီၣ်ထံး” ဒီး​အဟ့ၣ်ပှၤ “တၢ်ဟ့ၣ်​လၢ​အဂ့ၤ ဒီး​တၢ်ဟ့ၣ်​လၢအလၢအပှဲၤ ခဲလၢာ်.” (စံးထီၣ်ပတြၢၤ ၃၆:၉; ယၤကိာ်  ၁:၁၇) ဒီး​ပ​သ့ၣ်ညါ​ဘၣ်​လၢ ယဟိဝၤယွၤ​အဲၣ်​ပှၤ ဒီး​အကဲ​ပှၤလၢ အဟ့ၣ်တၢ်ညီ.

၁၃. ဘၣ်မနုၤအဃိ တၢ်ပှ့ၤက့ၤန့ၣ်​ အကဲဝဲ တၢ်ဟ့ၣ်​အဂ့ၤကတၢၢ်​တခါ​လဲၣ်.

^၁၃ တၢ်ပှ့ၤက့ၤန့ၣ်​ အကဲဝဲ တၢ်ဟ့ၣ်​အဂ့ၤကတၢၢ်​တခါ​လၢ ယဟိဝၤယွၤ​ဟ့ၣ်ပှၤ. ဘၣ်မနုၤအဃိ ပတဲဒ်န့ၣ်လဲၣ်. ယဟိဝၤယွၤ ဒီး​အဖိခွါ​ယ့ၣ်ၡူးန့ၣ်​ အဲၣ်လိာ်သး​ဒိၣ်​မး. ယ့ၣ်ၡူး​တဲဝဲလၢ “ပၢ်​အဲၣ်​ယၤ” ဒီး “ယ​အဲၣ်​ပၢ်.” (ယိၤဟၣ်​ ၁၀:၁၇; ၁၄:၃၁) အဝဲသ့ၣ်​ အိၣ်​ဘၣ်​တပူၤဃီ ဒ်သိးသိး လၢ​အနံၣ်​လၢ အကကွဲၢ်တဖၣ်​အကကွဲၢ်ညါ အဃိ အဝဲသ့ၣ်​ အတၢ်ရ့လိာ်သး​ဂ့ၤ​ဒိၣ်မး. (ကတိၤဒိ ၈:၂၂, ၂၃, ၃၀) အဃိ ဖဲ​ယဟိဝၤယွၤ ပျဲ​ဝဲ​လၢ အဖိခွါ​ဘၣ်တူၢ်တၢ် ဒီး​သံ​အခါ န​ဆိမိၣ်ကွၢ် ယဟိဝၤယွၤ အသး​ကဘၣ်ဒိ​ထဲလဲၣ်. ဘၣ်ဆၣ်​ ခီဖျိလၢ ယဟိဝၤယွၤ အဲၣ်​ပှၤဟီၣ်ခိၣ်ဖိ ဒီး​အအဲၣ်​နၤ​ဒိၣ်မး​အဃိ ဒ်သိး ပှၤခဲလၢာ် က​အိၣ်မူဘၣ်​ လီၤထူလီၤယိာ်​အဂီၢ် အဟ့ၣ်လီၤကွံာ် အဖိခွါလၢ​အအဲၣ်​ဝဲ​ဒိၣ်မး. (ယိၤဟၣ်​ ၃:၁၆; ကလၤတံ ၂:၂၀) ယဟိဝၤယွၤ အဲၣ်​ပှၤ​ဒိၣ်ထဲအံၤညါ​အဃိ ပ​က​ဘၣ်​အဲၣ်ဆၢက့ၤ​အီၤ.

၁၄. တၢ်ဃုထၢ အဂ့ၤကတၢၢ်​လၢ ပ​တၢ်အိၣ်မူပူၤန့ၣ်​ မ့ၢ်​မနုၤလဲၣ်.

^၁၄ န​သ့ၣ်ညါ​ယဟိဝၤယွၤ​အဂ့ၢ် မ့ၢ်အါထီၣ်န့ၣ်​ န​တၢ်အဲၣ်​အီၤ​စ့ၢ်ကီး က​အါထီၣ်. ဒီး​န​ကဘၣ်သး ကဲ​အသကီး​လၢ​ခဲအံၤ ဒီး​လၢ​ခါဆူညါ လီၤထူလီၤယိာ်. ယဟိဝၤယွၤ ဘၣ်သး​လၢ ပ​က​ကဲ​အသကီး ဒီး​မၤသးခု​အသး. (ကတိၤဒိ ၂၃:၁၅, ၁၆) ပ​မၤသးခု ယဟိဝၤယွၤ​အသး သ့​ခီဖျိ တၢ်​လၢ​ပ​တဲ​ဒီး​ပ​မၤ. ဒီး​ပ​အဲၣ်​ယဟိဝၤယွၤ နီၢ်ကီၢ်န့ၣ်​ ပ​ပာ်ဖျါထီၣ်​ သ့​ခီဖျိ ပ​အိၣ်မူ​ဒ်သိး အတၢ်ဘၣ်သး.  (၁ ယိၤဟၣ်​ ၅:၃) ပ​မ့ၢ်​ပာ်လီၤသး​လၢ ပ​က​မၤသးခု ယဟိဝၤယွၤ​အသး​န့ၣ်​ အကဲဝဲ တၢ်ဃုထၢ​လၢ အဂ့ၤကတၢၢ်.

၁၅. ပ​အဲၣ်​ယဟိဝၤယွၤန့ၣ်​ ပ​ပာ်ဖျါထီၣ်​ ကသ့​ဒ်လဲၣ်.

^၁၅ ပ​အဲၣ်​ယဟိဝၤယွၤန့ၣ်​ ပ​ပာ်ဖျါထီၣ်​ ကသ့​ဒ်လဲၣ်. အဆိကတၢၢ်န့ၣ်​ ပ​ကဘၣ်​ ဃ့ထုကဖၣ်​ ဒီး​ဟ့ၣ်လုၢ်ထီၣ်ပသး လၢ​ယဟိဝၤယွၤ​အအိၣ်. (စံးထီၣ်ပတြၢၤ ၄၀:၈) ဝံၤဘျီ ပ​ကဘၣ်​ ဒိးဘျၢထံ ဒ်သိး​ပှၤဂၤ​က​သ့ၣ်ညါ​လၢ ပ​ဟ့ၣ်လုၢ်ထီၣ်ပသး​လၢ ယဟိဝၤယွၤ​အအိၣ်​လံ. ဒ်​ပ​တဲသကီး လၢ​အခီၣ်ထံး​အသိး ဖဲ​န​ဒိးဘျၢထံ​တနံၤန့ၣ်​ အကဲဝဲ မုၢ်နံၤ​လၢ​အရ့ဒိၣ်​ ဒီး​လီၤသးခု​ကတၢၢ် လၢ​န​တၢ်အိၣ်မူ​ပူၤ. စးထီၣ်ဖဲန့ၣ်​ န​အိၣ်မူက့ၤ​လၢ ယဟိဝၤယွၤ​အဂီၢ် ဒီး​န​တအိၣ်မူ​လၢ န​နီၢ်ကစၢ်​အဂီၢ်လၢၤဘၣ်. (ရိမ့ၤ ၁၄:၈; ၁ ပ့းတရူး ၄:၁, ၂) န​က​ဆၢတဲာ်လီၤသး ဒ်အံၤ​အဂီၢ် တညီဘၣ်. သနာ်က့ န​မ့ၢ်​မၤ​ဒ်အံၤန့ၣ်​ အကဲဝဲ တၢ်ဆၢတဲာ်​အဂ့ၤကတၢၢ် လၢ​န​တၢ်အိၣ်မူ​ပူၤ. ဘၣ်မနုၤအဃိ ပတဲဒ်န့ၣ်လဲၣ်.

၁၆. န​မ့ၢ်​ဟ့ၣ်လီၤသး​လၢ န​က​မၤ ယဟိဝၤယွၤ​အတၢ်မၤန့ၣ်​ အက​ဆိၣ်ဂ့ၤက့ၤ​နၤ​ဒ်လဲၣ်. (စံးထီၣ်ပတြၢၤ ၄၁:၁၂)

^၁၆ ယဟိဝၤယွၤန့ၣ်​ အကဲ​ပှၤလၢ အဟ့ၣ်တၢ်ညီ​ကတၢၢ်. န​မ့ၢ်​ဟ့ၣ်အီၤ တၢ်တမံၤမံၤန့ၣ်​ အက​ဟ့ၣ်က့ၤ​နၤ အါန့ၢ်ဒံး​န​ဟ့ၣ်အီၤ. (မၢ်ကူး ၁၀:၂၉, ၃၀) ခဲအံၤ​န​အိၣ်​ဘၣ်​လၢ ဟီၣ်ခိၣ်​လၢ အအၢအသီ​အပူၤ​နာ်က့ ယဟိဝၤယွၤ ကဟ့ၣ်နၤ တၢ်အိၣ်မူ​လၢ​အဂ့ၤ ဒီး​အလီၤသူၣ်မံသးမုာ်. ဖဲ​န​ဒိးဘျၢထံ​အခါ လီၤဂာ်​ဒ်သိးဒီး န​စးထီၣ်​န့ၢ်ဘၣ်​ တၢ်အိၣ်မူ လၢ​အဂ့ၤကတၢၢ် လၢ​ယဟိဝၤယွၤ​ဟ့ၣ်​နၤ ဒီး​န​အိၣ်ဒီး​တၢ်ခွဲးတၢ်ယာ်​လၢ န​က​ဆဲး​မၤဘၣ်​ ယဟိဝၤယွၤ​အတၢ်မၤ လီၤထူလီၤယိာ်. န​တၢ်ရ့လိာ်သး​ဒီး ယဟိဝၤယွၤန့ၣ်​ က​ဂ့ၤ​ဒိၣ်ထီၣ်မၣ်ဒိၣ်ထီၣ်​ ဒီး​န​က​ရ့လိာ်ဘၣ်သးဒီး​အီၤ လီၤထူလီၤယိာ်.—ဖး စံးထီၣ်ပတြၢၤ ၄၁:၁၂.

၁၇. ယဟိဝၤယွၤ တလိၣ်ဘၣ်​ တၢ်နီတမံၤလၢၤ​ဘၣ်​နာ်က့ ပ​ဟ့ၣ်အီၤ​မနုၤ​သ့လဲၣ်.

^၁၇ ပ​မ့ၢ်​ဟ့ၣ်လုၢ်ထီၣ်ပသး ဒီး​ဒိးဘျၢထံန့ၣ်​ ပ​အိၣ်ဒီး တၢ်ခွဲးတၢ်ယာ်​လၢ ပ​က​ဟ့ၣ်​ ယဟိဝၤယွၤ တၢ်ဟ့ၣ်​အဂ့ၤ​ဒိၣ်ကတၢၢ်​တခါ. ယဟိဝၤယွၤ​ဟ့ၣ်ပှၤ တၢ်လၢ​အဂ့ၤ​ခဲလၢာ် ဒီး​တၢ်လၢ​အမၤသးခုပှၤ. ဒီး​ပ​သ့ၣ်ညါ​လၢ ယဟိဝၤယွၤ တ့လီၤတၢ်​ခဲလၢာ်​အဃိ အတလိၣ်ဘၣ်​ တၢ်နီတမံၤလၢၤဘၣ်. သနာ်က့ တၢ်လၢ​ပ​ဟ့ၣ်အီၤ​သ့​တမံၤန့ၣ်​ အကဲဝဲ ပ​တၢ်သးတီ. (ယိၤဘး ၁:၈; ၄၁:၁၁; ကတိၤဒိ ၂၇:၁၁) ဒီး​ပ​မ့ၢ်​ဟ့ၣ်​လီၤ​ပ​သး​လၢ ပ​က​မၤ ယဟိဝၤယွၤ​အတၢ်မၤန့ၣ်​ အကဲဝဲ တၢ်အိၣ်မူ လၢ​အဂ့ၤကတၢၢ်​လီၤ. အဃိ တၢ်ဂ့ၢ်​အရ့ဒိၣ်ကတၢၢ်​လၢ ပ​ဒိးဘျၢထံန့ၣ်​ မ့ၢ်ဝဲ ပ​အဲၣ်​ယဟိဝၤယွၤ.

၁၈. န​က​အိၣ်ကတီၤသး လၢ​န​က​ဒိးဘျၢထံ​အဂီၢ် န​က​ဘၣ်​သံကွၢ်​လီၤ​န​သး​ဒ်လဲၣ်.

^၁၈ ပှၤ​မ့ၢ်​သံကွၢ်​နၤ​လၢ န​က​ဒိးဘျၢထံဧါ​န့ၣ်​ န​က​စံးဆၢက့ၤ​ဒ်လဲၣ်. တၢ်သံကွၢ်​တဖျၢၣ်အံၤ ပှၤဂၤ​စံးဆၢ​န့ၢ်​နၤ တသ့ဘၣ်. အဃိ သံကွၢ်​လီၤ​န​သး​လၢ ‘ဘၣ်မနုၤအဃိ ယ​ထုးယံာ်သး​ဒံး​လဲၣ်.’ (မၤတၢ် ၈:၃၆) ဒီး​ဆိမိၣ်ထံက့ၤ တၢ်ဂ့ၢ်​သၢထံၣ်​လၢ ပ​တဲသကီး​လၢ တၢ်မၤလိ​တခါအံၤ. တၢ​တထံၣ်​န့ၣ်​ န​အဲၣ်​တၢ်မ့ၢ်တၢ်တီ ဒီး​တၢ်တီတၢ်လိၤ. အဃိ သံကွၢ်​လီၤ​န​သး​လၢ ‘မ့ၢ်​ယဘၣ်သး​ထံၣ်​လၢ ပှၤကီးဂၤဒဲး က​တဲ​တၢ်မ့ၢ်တၢ်တီ ဒီး​မၤ​တၢ်တီတၢ်လိၤဧါ.’ ခံထံၣ်တထံၣ်န့ၣ်​ န​အဲၣ်​ ယ့ၣ်ၡူး​ခရံာ်. အဃိ သံကွၢ်​လီၤ​န​သး​လၢ ‘မ့ၢ်​ယဘၣ်သး​လၢ ကစၢ်ယွၤ​အဖိခွါ က​ကဲ​ယ​စီၤပၤဧါ ဒီး​မ့ၢ်​ယဘၣ်သး ကွၢ်လိအီၤဧါ.’ ဒီး​တၢ်ဂ့ၢ်​အရ့ဒိၣ်ကတၢၢ် သၢထံၣ်တထံၣ်န့ၣ်​ န​အဲၣ်​ယဟိဝၤယွၤ. အဃိ သံကွၢ်​လီၤ​န​သး​လၢ ‘မ့ၢ်​ယဘၣ်သး မၤ​ယဟိဝၤယွၤ​အတၢ်မၤ ဒီး​မၤသးခု​အသးဧါ.’ န​မ့ၢ်​စံးဆၢ​လၢ မ့ၢ် ခဲလၢာ်န့ၣ်​ ဘၣ်မနုၤအဃိ န​ထုးယံာ်သး​ဒံး​လဲၣ်.—မၤတၢ် ၁၆:၃၃.

၁၉. န​က​ဒိးဘျၢထံ​အဂီၢ် ဘၣ်မနုၤအဃိ န​တလိၣ်​ဘၣ်ယိၣ်တၢ် ဒီး​ထုးယံာ်သး​ဘၣ်လဲၣ်. ဟ့ၣ်တၢ်အဒိ. (ယိၤဟၣ်​ ၄:၃၄)

^၁၉ န​မ့ၢ်​ဘၣ်ယိၣ်တၢ် ဒီး​ထုးယံာ်သး လၢ​န​က​ဒိးဘျၢထံန့ၣ်​ ဆိမိၣ်ထီၣ်က့ၤ တၢ်လၢ​ယ့ၣ်ၡူး​တဲဝဲ. (ဖး ယိၤဟၣ်​ ၄:၃၄.) အဒိ ယ့ၣ်ၡူး တဲဝဲလၢ အမၤ​ကစၢ်ယွၤ​အတၢ်မၤန့ၣ်​ အလီၤဂာ်​ဒ်သိးဒီး အတၢ်အီၣ်. ဘၣ်မနုၤအဃိ ယ့ၣ်ၡူး​တဲ​ဝဲ​ဒ်န့ၣ်လဲၣ်. ပ​သ့ၣ်ညါ​လၢ တၢ်အီၣ်န့ၣ်​ အဂ့ၤ​လၢ​ပဂီၢ်. ဒီး​ယ့ၣ်ၡူး သ့ၣ်ညါ​ဝဲ​လၢ တၢ်လၢ​ယဟိဝၤယွၤ မၢ​ပ​မၤ​ကီးမံၤဒဲးန့ၣ်​ အဂ့ၤ​လၢ​ပဂီၢ် ဒီး​အတမၤဘၣ်ဒိ​ပှၤ နီတဘျီဘၣ်. အဃိ ယဟိဝၤယွၤ ဘၣ်သး​လၢ န​က​ဒိးဘျၢထံ. (မၤတၢ် ၂:၃၈) န​မ့ၢ်​ကနၣ်​ အကလုၢ်​ဒီး​ဒိးဘျၢထံ​န့ၣ်​ အက​ကဲဘျုး​လၢ​နဂီၢ်. ဆိမိၣ်ကွၢ် တၢ်အီၣ်​လၢ ပ​အီၣ်ဝံၣ်ကတၢၢ်န့ၣ်​ ပ​အီၣ်​အီၤ​တဘျီဃီ ဒီး​ပ​တထုးယံာ်သးဘၣ်. အဃိ န​က​ဒိးဘျၢထံ​အဂီၢ် န​တလိၣ်​ဘၣ်ယိၣ်တၢ် ဒီး​ထုးယံာ်သး​ဘၣ်.

၂၀. တၢ်မၤလိ လၢခံ​တခါန့ၣ်​ ပ​က​တဲသကီး တၢ်ဂ့ၢ်​မနုၤလဲၣ်.

^၂၀ ဘၣ်မနုၤအဃိ ပှၤတနီၤ ထုးယံာ်သး​ဒံး​လဲၣ်. ဘၣ်သ့ၣ်သ့ၣ်​ အဝဲသ့ၣ်​ က​တဲဝဲလၢ “ယ​ဒိးဘျၢထံ တန့ၢ်ဒံးဘၣ်.” နီၢ်ကီၢ်​န့ၣ်​ န​က​ဆၢတဲာ်လီၤသး​လၢ န​က​ဟ့ၣ်လုၢ်ထီၣ်သး လၢ​ယဟိဝၤယွၤ​အအိၣ်​ ဒီး​ဒိးဘျၢထံန့ၣ်​ အကဲဝဲ တၢ်ဆၢတဲာ် လၢ​အရ့ဒိၣ်ကတၢၢ်​တခါ. အဃိ န​ကဘၣ်​ ဟံးန့ၢ်​တၢ်ဆၢကတီၢ်, ဆိမိၣ်ထံ​အီၤ​ဂ့ၤဂ့ၤ ဒီး​ဂုာ်ကျဲးစၢး​ဆူၣ်ဆူၣ်​ဒ်သိး န​က​တုၤထီၣ်ထီၣ်ဘး​လၢ တၢ်ဒိးဘျၢထံ​အဂီၢ်. ဘၣ်ဆၣ်​ န​မ့ၢ်​ဘၣ်သး ဒိးဘျၢထံ​နီၢ်ကီၢ်န့ၣ်​ ခဲအံၤ န​အိၣ်ကတဲာ်ကတီၤ​န​သး ကသ့​ဒ်လဲၣ်. ပ​က​တဲသကီး တၢ်သံကွၢ်​တဖျၢၣ်အံၤ အတၢ်စံးဆၢ​လၢ တၢ်မၤလိ လၢခံ​တခါ.