တၢ်မၤလိ ၁၃
သိၣ်လိနဖိလၢ ယဟိဝၤယွၤ အတၢ်ဘၣ်တ့
“မတဂၤတ့လီၤ ဆၣ်တဖၣ်အံၤလဲၣ်.”—ယၡါယၤ ၄၀:၂၆.
တၢ်သးဝံၣ် ၁၁ တၢ်ဘၣ်တ့တဖၣ် စံးထီၣ်ပတြၢၤယွၤ
တၢ်မၤလိအံၤ အတၢ်တိာ်ပာ် a
၁. မိပါတဖၣ် ဘၣ်သးမၤစၢၤအဖိ ဒ်လဲၣ်.
မိပါသ့ၣ်ဧၢ, ပသ့ၣ်ညါလၢ နဘၣ်သးမၤစၢၤနဖိလၢ အဝဲသ့ၣ် ကသ့ၣ်ညါထီၣ် ယဟိဝၤယွၤ ဒီးကအဲၣ်အီၤ. သနာ်က့ ယဟိဝၤယွၤန့ၣ် ပထံၣ်အီၤ တသ့ဘၣ်. အဃိ နမၤစၢၤနဖိလၢ အဝဲသ့ၣ် ကထံၣ်အီၤ ဒ်ပှၤနီၢ်ကီၢ်တဂၤ ဒီးကဲထီၣ် အသကီး ကသ့ဒ်လဲၣ်.—ယၤကိာ် ၄:၈.
၂. မိပါတဖၣ် သိၣ်လိအဖိလၢ ယဟိဝၤယွၤ အတၢ်ဂ့ၤတၢ်ဝါ ကသ့ဒ်လဲၣ်.
၂ နဖိကကဲထီၣ် ယဟိဝၤယွၤ အသကီးအဂီၢ် အရ့ဒိၣ်လၢ နကဘၣ်သိၣ်လိအီၤ လံာ်စီဆှံ. (၂ တံၤမသ့း ၃:၁၄-၁၇) ဒီးလၢလံာ်စီဆှံပူၤန့ၣ် အိၣ်စ့ၢ်ကီးဒီး တၢ်ဟ့ၣ်ကူၣ်လၢ ကမၤစၢၤဝဲ ပှၤသးစၢ် ဒ်သိး အဝဲသ့ၣ် ကမၤလိအါထီၣ် ယဟိဝၤယွၤအဂ့ၢ်. အဒိ လၢလံာ်ကတိၤဒိအပူၤန့ၣ် ပါတဂၤ တဲနီၣ်ထီၣ် အဖိခွါဘၣ်ဃးဒီး ယဟိဝၤယွၤ အတၢ်ဂ့ၤတၢ်ဝါ လၢအမၤလိဘၣ်ဝဲလၢ တၢ်ဘၣ်တ့ အအိၣ်. (ကတိၤဒိ ၃:၁၉-၂၁) အဃိ မိပါတဖၣ် သိၣ်လိအဖိလၢ ကသ့ၣ်ညါထီၣ် ယဟိဝၤယွၤ အတၢ်ဂ့ၤတၢ်ဝါ လၢအတၢ်ဘၣ်တ့ ကသ့ဒ်လဲၣ်. ခဲအံၤ ပကတဲသကီး တၢ်ဟ့ၣ်ကူၣ်တနီၤ.
နသိၣ်လိနဖိလၢ ယဟိဝၤယွၤ အတၢ်ဘၣ်တ့ ကသ့ဒ်လဲၣ်
၃. မိပါတဖၣ် ကဘၣ်မၤစၢၤအဖိ ဒ်လဲၣ်.
၃ လံာ်စီဆှံ တဲဝဲလၢ “စးထီၣ်လၢ ကစၢ်ယွၤတ့လီၤ ဟီၣ်ခိၣ်လံၤလံၤန့ၣ် အတၢ်ဂ့ၤတၢ်ဝါလၢ ပထံၣ်အီၤ တသ့ဘၣ်တဖၣ်အံၤ အိၣ်ဖျါထီၣ်ဝဲ ပျီပျီ.” (ရိမ့ၤ ၁:၂၀) ဘၣ်သ့ၣ်သ့ၣ် မိပါတနီၤ ဟးကသုၣ်ကသီဒီး အဖိတဖၣ်မုာ်မး. နမ့ၢ်ဟးကသုၣ်ကသီဒီး နဖိန့ၣ် မၤစၢၤနဖိဒ်သိး အဝဲသ့ၣ် ကသ့ၣ်ညါထီၣ် ယဟိဝၤယွၤ အတၢ်ဂ့ၤတၢ်ဝါလၢ “တၢ်လၢ အတ့လီၤဝဲတဖၣ်.” နမၤစၢၤနဖိ ကသ့အဂီၢ် ပကကွၢ်သကီး ယ့ၣ်ၡူးအဒိအတဲာ်.
၄. ယ့ၣ်ၡူး သိၣ်လိအပျဲၢ်အဘီၣ်တဖၣ်လၢ တၢ်ဘၣ်တ့အဂ့ၢ်ဒ်လဲၣ်. (လူၤကၣ် ၁၂:၂၄, ၂၇-၃၀)
၄ ပကကွၢ်သကီး ယ့ၣ်ၡူး သိၣ်လိဘၣ်ဃးဒီး တၢ်ဘၣ်တ့အဂ့ၢ်တခါ. ဘၣ်တဘျီ ယ့ၣ်ၡူးမၢ အပျဲၢ်အဘီၣ်တဖၣ် ကွၢ်ဒီးဆိမိၣ်ထံဝဲ စိးဝၣ်ဃး ဒီးဖီဒ့ၣ်ညါအဂ့ၢ်. (ဖး လူၤကၣ် ၁၂:၂၄, ၂၇-၃၀.) ယ့ၣ်ၡူး မ့ၢ်တဲဘၣ်ဃးဒီး ဆၣ်ဖိကီၢ်ဖိ ဒီးတၢ်မုၢ်တၢ်ဘိ လၢအဂၤတဖၣ်အဂ့ၢ်သ့. သနာ်က့ အတဲဘၣ်ဃးဒီး ထိၣ်ဒီးဖီတကလုာ်လၢ အပျဲၢ်အဘီၣ်တဖၣ် ထံၣ်ညီနုၢ်ဝဲ. ဖဲယ့ၣ်ၡူး သိၣ်လိတၢ်အခါ ဘၣ်သ့ၣ်သ့ၣ် အပျဲၢ်အဘီၣ် ကထံၣ်ဝဲ စိးဝၣ်ဃး ယူၤလၢတၢ်ဖးဖီ ဒီးထံၣ်စ့ၢ်ကီး ဖီတဖၣ်လၢတၢ်ပျီပူၤ. ဒီးဖဲယ့ၣ်ၡူး တဲတၢ်အခါ ဘၣ်သ့ၣ်သ့ၣ် အကနဲၣ်စိဝဲ ထိၣ်ဒီးဖီတဖၣ်. ယ့ၣ်ၡူး တဲဘၣ်အဝဲသ့ၣ်လၢ တၢ်ဘၣ်တ့ခံခါအံၤအဂ့ၢ် ဝံၤဒီး အမၤဝဲဒ်လဲၣ်. ယ့ၣ်ၡူးသိၣ်လိ အပျဲၢ်အဘီၣ်တဖၣ်လၢ အပၢ်အိၣ်လၢမူခိၣ်န့ၣ် ကဲပှၤလၢ အသးဂ့ၤ ဒီးဟ့ၣ်တၢ်ညီ. ဒ်ယဟိဝၤယွၤ ဒုးအီၣ်ဒုးအီ စိးဝၣ်ဃး ဒီးကွၢ်ထွဲဝဲ ဖီတဖၣ်အသိး ယဟိဝၤယွၤ ကကွၢ်ထွဲ ဒီးမၤလၢပှဲၤန့ၢ် အခ့အပှၤလၢ အသးတီတဖၣ် အတၢ်လိၣ်ဘၣ်.
၅. မိပါတဖၣ် တဲပၠးအဖိလၢ တၢ်ဘၣ်တ့ ဒီးသိၣ်လိအဖိလၢ ယဟိဝၤယွၤအဂ့ၢ် ကသ့ဒ်လဲၣ်.
၅ မိပါသ့ၣ်ဧၢ, ဖဲနသိၣ်လိနဖိအခါ နကွၢ်လိယ့ၣ်ၡူး ကသ့ဒ်လဲၣ်. တဲပၠးနဖိလၢ တၢ်ဘၣ်တ့ ဒ်သိးဒီး ဆၣ်ဖိကီၢ်ဖိ ဒီးတၢ်မုၢ်တၢ်ဘိ လၢနကၠဲးဒိၣ်ကတၢၢ်အဂ့ၢ်. ဒီးဖဲနတဲပၠးအဝဲသ့ၣ် တၢ်ဘၣ်တ့အဂ့ၢ်ခါန့ၣ် ၡဲပၠးအဝဲသ့ၣ်လၢ တၢ်ဘၣ်တ့တဖၣ်အံၤ သိၣ်လိပှၤ ယဟိဝၤယွၤအဂ့ၢ်. မၢနဖိတဲပၠးနၤ ဘၣ်ဃးဒီး ဆၣ်ဖိကီၢ်ဖိ မ့တမ့ၢ် တၢ်မုၢ်တၢ်ဘိ လၢအဝဲသ့ၣ် ကၠဲးဝဲဒိၣ်ကတၢၢ် တခါခါအဂ့ၢ်. ဖဲနသိၣ်လိ နဖိလၢ ယဟိဝၤယွၤ အဂ့ၢ်အခါ နမ့ၢ်တဲသကီး တၢ်ဘၣ်တ့လၢ အဝဲသ့ၣ်ကၠဲးဝဲ အဂ့ၢ်န့ၣ် အဝဲသ့ၣ် ကဘၣ်သး ကနၣ်ထံတၢ် ဒီးမၤလိအါထီၣ်တၢ်.
၆. ပမၤလိန့ၢ်တၢ်လၢ ခရံာ်စတိဖၢၣ်အမိ အဒိအတဲာ် ကသ့ဒ်လဲၣ်.
၆ မိပါတဖၣ် တဲပၠးအဖိလၢ ယဟိဝၤယွၤ အတၢ်ဘၣ်တ့ ဒီးမၤစၢၤအဖိလၢ ကသ့ၣ်ညါထီၣ် ယဟိဝၤယွၤအဂ့ၢ်သ့. အဝဲသ့ၣ် ကမၤစၢၤအဖိဒ်န့ၣ်အဂီၢ် တလိၣ်လၢ အဃုသ့ၣ်ညါ တၢ်ဘၣ်တ့ တခါခါအဂ့ၢ် လီၤတံၢ်လီၤဆဲးဘၣ်. ဖဲယ့ၣ်ၡူး သိၣ်လိအပျဲၢ်အဘီၣ်အခါ အတၡဲပၠးဝဲ စိးဝၣ်ဃး အီၣ်တၢ်ဒ်လဲၣ် ဒီးဖီဒ့ၣ်ညါ ဖးထီၣ်ဒ်လဲၣ်အဂ့ၢ် ခဲလၢာ်ဘၣ်. နဖိမ့ၢ်ကဲ ပှၤတဂၤလၢ အဘၣ်သးသ့ၣ်ညါ တၢ်ဘၣ်တ့အဂ့ၢ် လီၤတံၢ်လီၤဆဲးနာ်က့ ဖဲနသိၣ်လိအီၤအခါ နမ့ၢ်တဲအီၤ တၢ်ကတိၤယိယိဖိ ဒီးကၠးအီၤ တၢ်သံကွၢ်ယိယိဖိန့ၣ် အဝဲသ့ၣ် ကနၢ်ပၢၢ်ထီၣ် တၢ်ဂ့ၢ်လၢအရ့ဒိၣ်. အဒိ ဒီပုၢ်ဝဲၢ်ခွါခရံာ်စတိဖၢၣ် နီၣ်ဘၣ်က့ၤလၢ အနီၢ်ဆံးခါ ဒီးအတဲဝဲလၢ “ယမိန့ၣ် အသိၣ်လိပှၤလၢ တၢ်ဘၣ်တ့ လၢပခိၣ်ပဃၢၤ ဒီးအတဲ တၢ်ကတိၤယိယိဖိလီၤ. ပမ့ၢ်ထံၣ်ကစၢၢ်န့ၣ် ယမိတဲဝဲလၢ ‘နကွၢ်ကစၢၢ်တဖၣ်န့ၣ် ဖးဒိၣ်ဖးထီ ဒီးအဂ့ၤညါ. ယဟိဝၤယွၤ တ့လီၤတၢ်တခါအံၤ ဖၣ်လီၤကမၢကမၣ်ညါမ့ၢ်ဧါ.’ ဒီးပမ့ၢ်ထံၣ်ပီၣ်လဲၣ်န့ၣ် ယမိတဲဝဲလၢ ‘နကွၢ်လပီတဖၣ်န့ၣ် အသဟီၣ်ဆူၣ်မး. ယဟိဝၤယွၤန့ၣ် အဂံၢ်ဆူၣ် ဒီးအစိကမီၤဒိၣ်မးနီၤ.’” ခရံာ်စတိဖၢၣ် တဲဝဲလၢ “တၢ်လၢ ယမိတဲဝဲတဖၣ်န့ၣ် အကဲတၢ်ကတိၤယိယိဖိလီၤ ဘၣ်ဆၣ် အမၤစၢၤပှၤလၢ ပကဆိမိၣ်ထံတၢ်.”
၇. နမၤစၢၤနဖိ ဒ်သိးအဝဲသ့ၣ် ကဆိမိၣ်ထံ တၢ်ဘၣ်တ့အဂ့ၢ် ကသ့ဒ်လဲၣ်.
၇ နဖိမ့ၢ်ဒိၣ်ထီၣ်န့ၣ် သိၣ်လိအဝဲသ့ၣ်လၢ အကဆိမိၣ်ထံ ကစၢ်ယွၤ အတၢ်ဘၣ်တ့ အဂ့ၢ် ဒီးမၤလိအါထီၣ် ယဟိဝၤယွၤ အတၢ်ဂ့ၤတၢ်ဝါ လၢအတၢ်ဘၣ်တ့တဖၣ်. တဲပၠးအဝဲသ့ၣ် တၢ်ဘၣ်တ့ တခါခါအဂ့ၢ် ဒီးကၠးအဝဲသ့ၣ်လၢ “တၢ်ဘၣ်တ့တခါအံၤ အသိၣ်လိနၤ ယဟိဝၤယွၤ အဂ့ၢ်ဒ်လဲၣ်.” နမ့ၢ်နၢ်ဟူ အဝဲသ့ၣ်တဲဖျါထီၣ် အတၢ်ထံၣ် ဘၣ်ဃးဒီး တၢ်ဘၣ်တ့အဂ့ၢ်န့ၣ် ဘၣ်သ့ၣ်သ့ၣ် နကကမၢကမၣ် ဒီးနကသးခု.—မးသဲ ၂၁:၁၆.
နသိၣ်လိနဖိလၢ တၢ်ဘၣ်တ့အဂ့ၢ် သ့အခါဖဲလဲၣ်
၈. ဖဲပှၤအံၣ်စရ့လးဖိတဖၣ် ဟး “လၢကျဲအခါ” အသိၣ်လိအဖိ မနုၤသ့လဲၣ်.
၈ ယဟိဝၤယွၤ မၢပှၤအံၣ်စရ့လးဖိတဖၣ် သိၣ်လိအဖိလၢ အတၢ်မၤလိာ် ဖဲအဝဲသ့ၣ်ဟး “လၢကျဲအခါ” စ့ၢ်ကီး. (၅ မိၤၡ့ ၁၁:၁၉) ဖဲပှၤအံၣ်စရ့လးဖိတဖၣ် ဟးလၢဝ့ၢ်ချၢအခါ လၢကျဲန့ၣ် အဝဲသ့ၣ် ကထံၣ်ဘၣ်ဝဲ ဆၣ်ဖိကီၢ်ဖိ, ထိၣ်ဖိလံၣ်ဖိ ဒီးဖီအကလုာ်ကလုာ်. အဃိ မိပါတဖၣ် မ့ၢ်လဲၤတၢ်က့ၤတၢ်ဒီး အဟံၣ်ဖိဃီဖိန့ၣ် အဝဲသ့ၣ်တဲဘၣ် အဖိတဖၣ်လၢ ယဟိဝၤယွၤ အတၢ်ဘၣ်တ့အဂ့ၢ်သ့. မိပါတနီၤ လၢဆၢကတီၢ် ခဲအံၤစ့ၢ်ကီး အဝဲသ့ၣ်ကွၢ်လိ ပှၤအံၣ်စရ့လးဖိ ဒီးသိၣ်လိအဖိလၢ ယဟိဝၤယွၤ အတၢ်ဘၣ်တ့အဂ့ၢ်သ့. မိပါတနီၤ မၤဝဲဒ်လဲၣ်န့ၣ် ပကကွၢ်သကီး.
၉. နမၤလိန့ၢ်တၢ်လၢ ဒီပုၢ်ဝဲၢ်မုၣ်ဖူၤနံသၤ ဒီးဒီပုၢ်ဝဲၢ်မုၣ်ခဲၣ်ထယါ အအိၣ်ဒ်လဲၣ်.
၉ ဒီပုၢ်ဝဲၢ်မုၣ်ဖူၤနံသၤန့ၣ် အကဲဝဲမိ ဒီးအအိၣ်လၢဝ့ၢ်ပူၤ လၢအ့ဒံယါကီၢ်. ဒီပုၢ်ဝဲၢ်မုၣ်ဖူၤနံသၤ တဲဝဲလၢ “ပမ့ၢ်က့ၤဟးအိၣ်သကီး ပဟံၣ်ဖိဃီဖိ လၢဝ့ၢ်ချၢန့ၣ် ပမၤစၢၤအါထီၣ်ဘၣ်ပဖိလၢ ကမၤလိ ယဟိဝၤယွၤ အတၢ်ဘၣ်တ့အဂ့ၢ်. ဖဲယဖိတဖၣ် လဲၤဟးလၢ ဝ့ၢ်ချၢအခါ ယထံၣ်လၢ အဝဲသ့ၣ်မၤလိ ယဟိဝၤယွၤ အတၢ်ဘၣ်တ့အဂ့ၢ် ညီဒိၣ်တကၠဲး.” ဒီပုၢ်ဝဲၢ်မုၣ်ခဲၣ်ထယါ လၢအအိၣ်လၢ မိၤဒိဘၤန့ၣ် အတဲဝဲလၢ “ယနီၣ်ဘၣ်က့ၤ ဖဲယနီၢ်ဆံးခါ ယမ့ၢ်လဲၤဟးဘၣ်ဒီး ယမိယပါ လၢဝ့ၢ်ချၢတဘျီဘျီန့ၣ် အဝဲသ့ၣ် သိၣ်လိယၤလၢ ယကကွၢ်ဒီးဆိမိၣ်ထံ ယဟိဝၤယွၤ အတၢ်ဘၣ်တ့ ဒီးမၤလိအါထီၣ် ယဟိဝၤယွၤအဂ့ၢ် လၢအတၢ်ဘၣ်တ့တဖၣ်.” မိပါတဖၣ် မ့ၢ်ဟးလိၣ်ကွဲဒီးအဖိ လၢတၢ်လီၢ်လၢအဃံလၤန့ၣ် ဘၣ်သ့ၣ်သ့ၣ် အဖိတဖၣ် ကနီၣ်ဘၣ်က့ၤဝဲထီဘိ.
နမ့ၢ်အိၣ်လၢဝ့ၢ်ပူၤနာ်က့ နကွၢ် ယဟိဝၤယွၤ အတၢ်ဘၣ်တ့ လၢနခိၣ်နဃၢၤ ဒီးသိၣ်လိနဖိလၢ ယဟိဝၤယွၤ အဂ့ၢ်သ့ (ကွၢ်လံာ်အဆၢ ၁၀)
၁၀. မိပါတဖၣ် ဟးလိၣ်ကွဲဒီးအဖိ လၢဝ့ၢ်ချၢ မ့ၢ်တညီဘၣ်န့ၣ် အဝဲသ့ၣ် မၤတၢ်အဂၤမနုၤသ့လဲၣ်. (ကွၢ်တၢ်လွံၢ်နၢၣ် လၢအမ့ၢ် “ တၢ်ဟ့ၣ်ကူၣ်လၢ မိပါတဖၣ်အဂီၢ်.”)
၁၀ မိပါတဖၣ် ဟးလိၣ်ကွဲဒီးအဖိ လၢဝ့ၢ်ချၢ မ့ၢ်တညီဘၣ်န့ၣ် အဝဲသ့ၣ် ဘၣ်မၤဒ်လဲၣ်. ဒီပုၢ်ဝဲၢ်ခွါအ့ၤမီ လၢအအိၣ်လၢ အ့ဒံယါကီၢ်န့ၣ် တဲဝဲလၢ “ဖဲယအိၣ်တၢ်လီၢ်န့ၣ် မိပါတဖၣ် ဘၣ်မၤတၢ်အါအဃိ အဝဲသ့ၣ် ဟးမၣ်တချုးဘၣ်. နမ့ၢ်ဟးလၢဝ့ၢ်ချၢ တဘျီဘျီန့ၣ် လၢာ်စ့ဒီဒူၣ်. သနာ်က့ နမ့ၢ်လဲၤဟးလၢ ဖီကရၢၢ် မ့တမ့ၢ် ကွၢ်စိတၢ်လၢ ဟံၣ်ချၢန့ၣ် နကထံၣ်ဘၣ် ယဟိဝၤယွၤ အတၢ်ဘၣ်တ့ ဒီးနဆိမိၣ်ထံ အတၢ်ဂ့ၤတၢ်ဝါ အဂ့ၢ်သ့.” နမ့ၢ်ကွၢ်တၢ်လၢ နခိၣ်နဃၢၤန့ၣ် နကထံၣ်ဘၣ် ကစၢ်ယွၤ အတၢ်ဘၣ်တ့ ဒ်သိးဒီး ထိၣ်, တၢ်ဖိဃၢ်, တၢ်မုၢ်တၢ်ဘိ ဒီးတၢ်ဘၣ်တ့အဂၤဒီဒူၣ်. အဃိ နသိၣ်လိနဖိလၢ တၢ်ဘၣ်တ့တဖၣ်အံၤအဂ့ၢ်သ့. (စံးထီၣ်ပတြၢၤ ၁၀၄:၂၄) ဒီပုၢ်ဝဲၢ်မုၣ်ခၤရံနၤ လၢအအိၣ်လၢ ကီၢ်ကၠၢမနံၣ် န့ၣ် တဲဝဲလၢ “ယမိန့ၣ် အကၠဲးဖီညါ. ဖဲယနီၢ်ဆံးခါ ယမ့ၢ်ဟးဒီးယမိ တဘျီဂ့ၤတဘျီဂ့ၤန့ၣ် အဒုးနဲၣ်ယၤဖီ ဒီးအတဲပၠးယၤ ဖီတဖၣ်အဂ့ၢ်ဆူၣ်မး.” အဃိ နမ့ၢ်အိၣ် ဖဲလဲၣ်ဂ့ၤဖဲလဲၣ်ဂ့ၤနာ်က့ နမၤစၢၤနဖိလၢ အကကွၢ်ဒီးဆိမိၣ်ထံ ကစၢ်ယွၤ အတၢ်ဘၣ်တ့အဂ့ၢ်သ့. တကးဒံးဘၣ် မိပါတဖၣ် ကသိၣ်လိအဖိအဂီၢ် အဝဲသ့ၣ်ပၠးအဖိလၢ တၢ်ဂီၤမူဒီးလံာ်လဲၢ် ဘၣ်ဃးဒီးတၢ်ဘၣ်တ့အဂ့ၢ် လၢပတၢ်ကရၢကရိထုးထီၣ်ဝဲ သ့စ့ၢ်ကီး. ခဲအံၤ ပကတဲသကီး ယဟိဝၤယွၤ အတၢ်ဂ့ၤတၢ်ဝါတနီၤလၢ နသိၣ်လိနဖိသ့.
ယဟိဝၤယွၤ “အတၢ်ဂ့ၤတၢ်ဝါလၢ ပထံၣ်အီၤ တသ့ဘၣ်တဖၣ်အံၤ အိၣ်ဖျါထီၣ်ဝဲ ပျီပျီ”
၁၁. မိပါတဖၣ် မၤစၢၤအဖိလၢ ကသ့ၣ်ညါထီၣ် ယဟိဝၤယွၤ အတၢ်အဲၣ် ကသ့ဒ်လဲၣ်.
၁၁ နမ့ၢ်တဲပၠးနဖိလၢ ဆၣ်ဖိကီၢ်ဖိ ကဟုကယာ်အဖိ အဂ့ၢ်န့ၣ် ကမၤစၢၤနဖိလၢ အကသ့ၣ်ညါထီၣ် ယဟိဝၤယွၤ အတၢ်အဲၣ်. (မးသဲ ၂၃:၃၇) ဒီးတဲပၠးအဝဲသ့ၣ်လၢ ယဟိဝၤယွၤ ဘၣ်သးလၢ ပကသးခုအဃိ အတ့လီၤန့ၢ်ပှၤ တၢ်အကလုာ်ကလုာ်. ဒီပုၢ်ဝဲၢ်မုၣ်ခၤရံနၤ လၢပတဲသကီး အဂ့ၢ်မၢကၢာ်န့ၣ် အတဲဝဲလၢ “ဖဲယဟးလိၣ်ကွဲဒီး ယမိအခါ ယမိမၢယကွၢ်ဒီးဆိမိၣ်ထံ ဖီတဖီးဒီးတဖီးန့ၣ် အလီၤဆီလိာ်သးဒ်လဲၣ် ဒီးအတၢ်ဃံတၢ်လၤန့ၣ် ပာ်ဖျါထီၣ် ယဟိဝၤယွၤ အတၢ်အဲၣ်ဒ်လဲၣ်. ပူၤကွံာ်ဖးယံာ်လံ နာ်က့ ယမ့ၢ်ထံၣ်ဖီန့ၣ် ယကွၢ်ထံအီၤ ဒီးယထံၣ်ဘၣ်လၢ ဖီတဖီးဒီးတဖီးန့ၣ် အလွဲၢ်ဒီး အက့ၢ်အဂီၤ လီၤဆီလိာ်သး. ယမၤဒ်န့ၣ်အဃိ ယသ့ၣ်ညါဘၣ်လၢ ယဟိဝၤယွၤ အဲၣ်ပှၤဒိၣ်မး.”
နဖိကသ့ၣ်ညါထီၣ် ယဟိဝၤယွၤ အတၢ်ကူၣ်သ့အဂီၢ် တဲပၠးအဝဲသ့ၣ်လၢ ယဟိဝၤယွၤတ့လီၤ ပှၤကညီအနီၢ်ခိမိၢ်ပှၢ်န့ၣ် လီၤကမၢကမၣ်ဒိၣ်မး (ကွၢ်လံာ်အဆၢ ၁၂)
၁၂. မိပါတဖၣ် မၤစၢၤအဖိလၢ ကသ့ၣ်ညါထီၣ် ယဟိဝၤယွၤ အတၢ်ကူၣ်သ့ ကသ့ဒ်လဲၣ်. (စံးထီၣ်ပတြၢၤ ၁၃၉:၁၄) (ကွၢ်စ့ၢ်ကီးတၢ်ဂီၤ.)
၁၂ ယဟိဝၤယွၤန့ၣ် အကူၣ်တၢ်သ့ ဒိၣ်ကတၢၢ်. (ရိမ့ၤ ၁၁:၃၃) အဃိ မိပါတဖၣ် ကဘၣ်မၤစၢၤအဖိလၢ ကသ့ၣ်ညါထီၣ် ယဟိဝၤယွၤ အတၢ်ကူၣ်သ့. အဒိ တဲပၠးနဖိလၢ တၢ်ဘၣ်တ့အဂ့ၢ် ဒ်သိးဒီး ထံသဝံထီၣ်ဝံၤဘျီ အကဲထီၣ် တၢ်အၢၣ် ဒီးတၢ်အၢၣ်လၢအစိာ်ဃာ် ထံတဖၣ်န့ၣ် ဒံဝဲလၢအံၤတပူၤ လၢန့ၣ်တပူၤ ညီညီဖိလီၤ. (ယိၤဘး ၃၈:၃၆, ၃၇) ဒီးတဲပၠးနဖိလၢ ကစၢ်ယွၤတ့လီၤ ပှၤကညီအနီၢ်ခိမိၢ်ပှၢ်န့ၣ် လီၤကမၢကမၣ်ဒိၣ်မး. (ဖး စံးထီၣ်ပတြၢၤ ၁၃၉:၁၄.) ပါတဂၤ လၢအမံၤမ့ၢ် ဘျၤဒံမၤန့ၣ် တဲဝဲလၢ “ဘၣ်တနံၤ ပဖိခွါ ယီၢ်လ့ၣ်ယီၢ် ဒီးလ့ၣ်ယီၢ်လီၤတကျၢၢ်အဃိ အခီၣ်ဘၣ်ဒိ. ဘၣ်ဆၣ် လၢခံတသီခံသီန့ၣ် အခီၣ်ပူၤလီၢ်ဘျါက့ၤဝဲ. ပတဲပၠး ပဖိခွါလၢ ယဟိဝၤယွၤ တ့လီၤပှၤဒ်သိး ပနီၢ်ခိမိၢ်ပှၢ်မ့ၢ်ဘၣ်ဒိန့ၣ် အဘျါက့ၤလၢအကစၢ်သ့. ဒီးပတဲအီၤလၢ မ့မ့ၢ်တၢ်လၢ ပှၤဟီၣ်ခိၣ်ဖိတ့ဝဲန့ၣ် အဂ့ၤထီၣ်က့ၤလၢ အကစၢ်တသ့ဘၣ်. အဒိ ကါတခိၣ် မ့ၢ်ဟးဂီၤန့ၣ် အဂ့ၤထီၣ်က့ၤလၢ အကစၢ်တသ့ဘၣ်. ပတဲပၠးပဖိခွါ တၢ်ဂ့ၢ်တခါအံၤအဃိ အသ့ၣ်ညါအါထီၣ် ယဟိဝၤယွၤ အတၢ်ကူၣ်သ့.”
၁၃. မိပါတဖၣ် မၤစၢၤအဖိလၢ ကသ့ၣ်ညါထီၣ် ယဟိဝၤယွၤ အတၢ်စိတၢ်ကမီၤ ကသ့ဒ်လဲၣ်. (ယၡါယၤ ၄၀:၂၆)
၁၃ ပမ့ၢ်ကွၢ်ထီၣ်လၢမူခိၣ် ဒီးထံၣ်ဘၣ် ဆၣ်တဖၣ်အိၣ်လၢ အလီၢ်အကျဲဒၣ်ဝဲန့ၣ် ပကသ့ၣ်ညါဘၣ်လၢ ယဟိဝၤယွၤန့ၣ် အအိၣ်ဒီး တၢ်စိတၢ်ကမီၤ အါမး. (ဖး ယၡါယၤ ၄၀:၂၆.) အဃိ သိၣ်လိနဖိလၢ အကကွၢ်ကစၢ်ယွၤ အတၢ်ဘၣ်တ့လၢမူခိၣ် ဒီးဆိမိၣ်ထံ တၢ်လၢ အဝဲသ့ၣ်ထံၣ်ဝဲတဖၣ်. ဒီပုၢ်ဝဲၢ်မုၣ်ထ့ထ့ လၢအအိၣ်လၢ ကီၢ်ထဲၣ်ဝၣ်န့ၣ် အနီၣ်ဘၣ်က့ၤ တၢ်လၢအကဲထီၣ်သး ဖဲအနီၢ်ဆံးခါ. အတဲဝဲလၢ “ဘၣ်တဘျီ ယၤဒီးယမိန့ၣ် ပလဲၤဟးမံတ့ၢ်လၢပှၢ်ပူၤ ဒီးလၢမုၢ်နၤခီန့ၣ် ပထံၣ်ဘၣ်ဆၣ်ဒီဒူၣ်. ဖဲန့ၣ်အခါ ယဘၣ်ယိၣ်တၢ်အါမး ခီဖျိလၢ ယသကီးလၢကၠိန့ၣ် မၤကီမၤခဲယၤ အဃိ ယသးကိၢ်လၢ ယတတီဒီး ယဟိဝၤယွၤလၢၤဘၣ်. ဖဲပကွၢ်ဆၣ်တဖၣ်အခါ ယမိမၤစၢၤယၤဒ်သိး ယကဆိမိၣ်ထံလၢ ယဟိဝၤယွၤန့ၣ် အတၢ်စိတၢ်ကမီၤ အိၣ်အါမး. ဒီးယမိတဲနီၣ်ယၤလၢ ယဟိဝၤယွၤ အိၣ်ဒီး တၢ်စိတၢ်ကမီၤအါမးအဃိ အမၤစၢၤယၤ ဒ်သိး ယလဲၤခီဖျိ တၢ်ကီတၢ်ခဲ တမံၤဂ့ၤတမံၤဂ့ၤသ့. ဖဲပလဲၤဟး တဘျီအံၤန့ၣ် ယကွၢ်ဒီးဆိမိၣ်ထံဘၣ် တၢ်ဘၣ်တ့အဂ့ၢ်အဃိ ယသ့ၣ်ညါအါထီၣ် ယဟိဝၤယွၤအဂ့ၢ် ဒီးယပာ်လီၤသးလၢ ယကမၤအတၢ်မၤ.”
၁၄. မိပါတဖၣ် မၤစၢၤအဖိလၢ ကသ့ၣ်ညါထီၣ် ယဟိဝၤယွၤ ကဲပှၤလၢအသးခု ကသ့ဒ်လဲၣ်.
၁၄ ယဟိဝၤယွၤ အတၢ်ဘၣ်တ့တဖၣ် ပာ်ဖျါထီၣ်လၢ အကဲပှၤလၢအသးခု ဒီးအဘၣ်သးလၢ ပကသးခုစ့ၢ်ကီး. ပှၤစဲအ့ၣ်ဖိ လၢအဃုသ့ၣ်ညါ ဆၣ်ဖိကီၢ်ဖိအဂ့ၢ်န့ၣ် တဲဝဲလၢ ဆၣ်ဖိကီၢ်ဖိ အါတက့ၢ်လိၣ်ကွဲ တကးဒံးဘၣ် ထိၣ်ဒီးညၣ်စ့ၢ်ကီး အဝဲသ့ၣ်လိၣ်ကွဲ. (ယိၤဘး ၄၀:၂၀) ဖဲနဖိတဖၣ် ကွၢ်ဝဲ ဆၣ်ဖိကီၢ်ဖိ လိၣ်ကွဲအခါ နထံၣ်လၢ အဝဲသ့ၣ်သးခု ဒီးနံၤကၠ့ၤဧါ. အဒိ အဝဲသ့ၣ် ကထံၣ်ဘၣ်ဝဲ သၣ်မံညီၤဖိ လိၣ်ကွဲလီၤအမဲၢ် ဒီးထွံၣ်ဖိတဖၣ် လိၣ်ကွဲကနိလိာ်သး. လၢခံတဘျီ နမ့ၢ်ထံၣ်နဖိ ကွၢ်ဆၣ်ဖိကီၢ်ဖိလိၣ်ကွဲဒီး အသးခု ဒီးအနံၤန့ၣ် တဲဘၣ်အဝဲသ့ၣ်လၢ ကစၢ်ယွၤလၢ ပဘူၣ်ထီၣ်ဘါထီၣ်အီၤန့ၣ် အကဲပှၤလၢအသးခု.—၁ တံၤမသ့း ၁:၁၁.
ကွၢ်သကီး ယဟိဝၤယွၤ အတၢ်ဘၣ်တ့ဒီး နဟံၣ်ဖိဃီဖိ
နမ့ၢ်ဟးလိၣ်ကွဲ ဒီးကွၢ်သကီး တၢ်ဘၣ်တ့ဒီးနဖိန့ၣ် အဝဲသ့ၣ် ကသးခု ဒီးအဝဲသ့ၣ် တဲပၠးနၤ တၢ်အိၣ်လၢအသးပူၤကဘူၣ် (ကွၢ်လံာ်အဆၢ ၁၅)
၁၅. မိပါတဖၣ် ကသ့ၣ်ညါ တၢ်အိၣ်လၢအဖိအသးပူၤအဂီၢ် အဝဲသ့ၣ် ကဘၣ်မၤဝဲဒ်လဲၣ်. (ကတိၤဒိ ၂၀:၅) (ကွၢ်စ့ၢ်ကီးတၢ်ဂီၤ.)
၁၅ မိပါတနီၤ တဲဝဲလၢ တဘျီတခီၣ် အဖိတဖၣ် တဲပၠးအဝဲသ့ၣ်လၢ အတၢ်ကီတၢ်ခဲ တဘူၣ်ဘၣ်. နၤစ့ၢ်ကီး နမ့ၢ်သ့ၣ်ညါလၢ နဖိတဲပၠးနၤ အတၢ်ကီတၢ်ခဲ မ့ၢ်တဘူၣ်ဘၣ်န့ၣ် ဘၣ်သ့ၣ်သ့ၣ် နကဘၣ် မၤတၢ်တမံၤမံၤ ဒ်သိးနကမၤစၢၤအီၤလၢ အကတဲပၠးနၤ တၢ်အိၣ်လၢအသးပူၤ. (ဖး ကတိၤဒိ ၂၀:၅.) မိပါတနီၤ တဲဝဲလၢ အဝဲသ့ၣ်မ့ၢ်ကွၢ်သကီး ယဟိဝၤယွၤ အတၢ်ဘၣ်တ့ဒီးအဖိန့ၣ် အဖိတဖၣ် တဲပၠးအဝဲသ့ၣ် တၢ်အိၣ်လၢအသးပူၤ ညီတစဲး. ဘၣ်မနုၤအဃိလဲၣ်. ဖဲန့ၣ်အခါ တၢ်အဂၤလၢ အကမၤတံာ်တာ် အဝဲသ့ၣ်တၢ်ဆိမိၣ် တအိၣ်အါအါဘၣ်. အဒိ ပါတဂၤ လၢအမံၤမ့ၢ် မါစၤဟံကိၤ ဒီးအအိၣ်လၢ ကီၢ်ထဲၣ်ဝၣ်န့ၣ် တဲဝဲလၢ “ပမ့ၢ်ဟးထီၣ်ကစၢၢ် မ့တမ့ၢ် လဲၤဟးလိၣ်ကွဲဒီးပဖိ လၢပီၣ်လဲၣ်နံၤန့ၣ် ပထံၣ်ဘၣ်လၢ ပဖိတဖၣ် သးခုဒိၣ်မး. ဖဲန့ၣ်အခါ ပမ့ၢ်ကၠးအဝဲသ့ၣ် တၢ်အိၣ်လၢအသးပူၤန့ၣ် အတဲပၠးပှၤဘူၣ်တကၠဲး.” ဒီးဒီပုၢ်ဝဲၢ်မုၣ်ခဲၣ်ထယါ လၢပတဲသကီးအဂ့ၢ် လၢအခီၣ်ထံးန့ၣ် အတဲဝဲလၢ “ဖဲဟါလီၤခီ ကၠိပျၢ်ဝံၤအလီၢ်ခံ ယမိလဲၤဟးဒီးယၤလၢ ဖီကရၢၢ်မၢ်မၢ်လီၤ. လၢဖီကရၢၢ်န့ၣ် တၢ်တသီၣ်တသဲအါအါဘၣ် ဒီးတၢ်လီၢ်မုာ်မး. အဃိ လၢကၠိ တၢ်မ့ၢ်ကဲထီၣ်သးဒီးယၤတမံၤမံၤ ဒီးယမ့ၢ်သးကိၢ်တၢ်တမံၤမံၤန့ၣ် ယတဲပၠးယမိဘူၣ်.”
၁၆. ဟံၣ်ဖိဃီဖိတနီၤ လဲၤဟးမုာ်လၢ တၢ်လီၢ်ဖဲလဲၣ်.
၁၆ ဟံၣ်ဖိဃီဖိတဖၣ် မ့ၢ်ကွၢ်သကီး ယဟိဝၤယွၤ အတၢ်ဘၣ်တ့န့ၣ် အဝဲသ့ၣ် ကသးခု ဒီးအတၢ်ရ့လိာ်သး ကဂ့ၤဒိၣ်ထီၣ်. လံာ်စီဆှံ တဲဝဲလၢ “တၢ်ဆၢကတီၢ်လၢ ပှၤကနံၤအဂီၢ်” ဒီး “တၢ်ဆၢကတီၢ်လၢ ပှၤကဂဲၤကလံၣ်အဂီၢ်” အိၣ်ဝဲ. (စံၣ်တဲၤတဲလီၤတၢ် ၃:၁, ၄) လၢဟီၣ်ခိၣ်ချၢန့ၣ် ယဟိဝၤယွၤ တ့လီၤန့ၢ်ပှၤ တၢ်လီၢ်ဃံလၤဒီဒူၣ်. အဃိ ပဘၣ်သးလဲၤဖဲလဲၣ်န့ၣ် ပလဲၤသ့. အဒိ ဟံၣ်ဖိဃီဖိတနီၤန့ၣ် လဲၤဟးမုာ်လၢ ပှၢ်ကျါ, လဲၤဟးလၢသဝီ, လဲၤဟးထီၣ်ကစၢၢ် ဒီးတနီၤန့ၣ် လဲၤဟးမုာ်လၢပီၣ်လဲၣ်နံၤ. ဒီးဖိသၣ်တနီၤန့ၣ် ကၠံၣ်လိၣ်ကွဲ လၢဖီကရၢၢ်, ကွၢ်ကီဆၣ်ဖိကီၢ်ဖိ, ပီၢ်ထံလၢထံကျိ, လၢနိၣ်ပူၤ ဒီးလၢပီၣ်လဲၣ်ပူၤ မုာ်မး. ပမ့ၢ်ဟးလိၣ်ကွဲ ဒီးကွၢ်ကီ ကစၢ်ယွၤ အတၢ်ဘၣ်တ့န့ၣ် ပကသးခု.
၁၇. ဘၣ်မနုၤအဃိ မိပါတဖၣ် ကဘၣ်သိၣ်လိအဖိလၢ ယဟိဝၤယွၤ အတၢ်ဘၣ်တ့လဲၣ်.
၁၇ လၢဟီၣ်ခိၣ်သီန့ၣ် မိပါ ဒီးဖိတဖၣ် ကထံၣ်ဘၣ် ယဟိဝၤယွၤ အတၢ်ဘၣ်တ့ဒီဒူၣ် ဒီးအဝဲသ့ၣ် ဟးလိၣ်ကွဲ ကမုာ်ဒိၣ်န့ၢ်ဒံးခဲအံၤ. ဖဲန့ၣ်အခါ ပတလိၣ်ပျံၤ ဆၣ်ဖိကီၢ်ဖိလၢၤဘၣ် ဒီးအဝဲသ့ၣ်စ့ၢ်ကီး တပျံၤပှၤလၢၤဘၣ်. (ယၡါယၤ ၁၁:၆-၉) တကးဒံးဘၣ် ပကဟးလိၣ်ကွဲ ဒီးကွၢ်ကီဘၣ် ယဟိဝၤယွၤ အတၢ်ဘၣ်တ့ လီၤထူလီၤယိာ်. (စံးထီၣ်ပတြၢၤ ၂၂:၂၆) ခဲအံၤ ဟီၣ်ခိၣ်သီ မ့ၢ်တတုၤဒံးဘၣ်နာ်က့ နသိၣ်လိနဖိလၢ ယဟိဝၤယွၤ အတၢ်ဘၣ်တ့အဂ့ၢ်သ့. နမ့ၢ်သိၣ်လိနဖိလၢ ယဟိဝၤယွၤ အတၢ်ဘၣ်တ့န့ၣ် အဝဲသ့ၣ် ကသ့ၣ်ညါအါထီၣ် ယဟိဝၤယွၤအဂ့ၢ်. ဒီးအဝဲသ့ၣ် ကတဲဝဲ ဒ်သိးဒီး စီၤဒၤဝံး လၢအတဲဝဲလၢ “အိ ယဟိဝၤယွၤဧၢ, . . . ပှၤလၢအမၤတ့ၢ်တၢ် ဒ်သိးဒီးနၤန့ၣ် တအိၣ်နီတဂၤဘၣ်.”—စံးထီၣ်ပတြၢၤ ၈၆:၈.
တၢ်သးဝံၣ် ၁၃၄ ပဖိမ့ၢ် တၢ်န့ၢ်သါလၢယွၤ
a ဒီပုၢ်ဝဲၢ်မုၣ်ခွါအါဂၤ နီၣ်ဘၣ်က့ၤလၢ အမိအပါ သိၣ်လိအဝဲသ့ၣ်လၢ ယဟိဝၤယွၤ အတၢ်ဘၣ်တ့အဂ့ၢ်. အမိအပါ သိၣ်လိအဝဲသ့ၣ်လၢ တၢ်ဘၣ်တ့တဖၣ်အံၤ ပာ်ဖျါထီၣ် ယဟိဝၤယွၤ အတၢ်ဂ့ၤတၢ်ဝါဒ်လဲၣ်န့ၣ် အဝဲသ့ၣ် တသးပ့ၤနီၣ်ဝဲဘၣ်. နဖိမ့ၢ်အိၣ်န့ၣ် နမၤစၢၤအဝဲသ့ၣ်လၢ ကသ့ၣ်ညါထီၣ် ယဟိဝၤယွၤ အတၢ်ဂ့ၤတၢ်ဝါ လၢအတၢ်ဘၣ်တ့ ကသ့ဒ်လဲၣ်. ပကတဲသကီး တၢ်သံကွၢ်တဖျၢၣ်အံၤ အတၢ်စံးဆၢ လၢတၢ်မၤလိတခါအံၤ.