တၢ်မၤလိ ၅
“တၢ်ဆၢကတီၢ်လၢ အအိၣ်ဒီးသုန့ၣ် သူအီၤလၢ အဂ့ၤကတၢၢ်”
“ပလီၢ်သုသးဂ့ၤဂ့ၤ ဒ်သိးသုကအိၣ်မူ ဒ်ပှၤကူၣ်တၢ်သ့အသိး ဒီးတမ့ၢ်ဒ် ပှၤဟးဂီၤဖိအသိးဘၣ် န့ၣ်တက့ၢ်. . . . တၢ်ဆၢကတီၢ်လၢ အအိၣ်ဒီးသုန့ၣ် သူအီၤလၢ အဂ့ၤကတၢၢ်တက့ၢ်.”—အ့းဖ့းစူး ၅:၁၅, ၁၆.
တၢ်သးဝံၣ် ၈ ယဟိဝၤမ့ၢ်ပတၢ်ပူၤဖျဲးလီၢ်
တၢ်မၤလိအံၤ အတၢ်တိာ်ပာ် *
၁. ပရ့လိာ်ပသးဒီး ယဟိဝၤယွၤသ့လၢ ကျဲဒ်လဲၣ်.
ပှၤလၢပအဲၣ်အီၤန့ၣ် ပဟ့ၣ်အီၤတၢ်ဆၢကတီၢ် ဒီးရ့ဒီးအီၤမုာ်မး. ပှၤနီၢ်ဒီမါဝၤလၢ အအဲၣ်လိာ်ကွံလိာ်သးန့ၣ် အဝဲသ့ၣ် အဲၣ်ဒိးဟ့ၣ်လိာ်သး တၢ်ဆၢကတီၢ် ဒီးရ့လိာ်သး. ဒီးပှၤသးစၢ်တဖၣ်န့ၣ် အဝဲသ့ၣ် ရ့လိာ်သးဒီး အသကိးတဖၣ်မုာ်မး. မ့မ့ၢ်လၢ ပဝဲသ့ၣ်တဖၣ်န့ၣ် ဖဲပဟ့ၣ်တၢ်ဆၢကတီၢ် ဒီးရ့လိာ်သးဒီး ပဒီပုၢ်ဝဲၢ်မုၣ်ခွါတဖၣ်အခါ ပသးခုဒိၣ်မး. ဒီးပသူပတၢ်ဆၢကတီၢ်လၢ ပရ့လိာ်သးဒီး ယဟိဝၤယွၤန့ၣ် မုာ်ဒိၣ်မး. ပရ့လိာ်သးဒီး ယဟိဝၤယွၤသ့ခီဖျိ ပဃ့ဘါထုကဖၣ်ဆူအအိၣ်, ဖးအကလုၢ်ကထါ ဒီးဆိကမိၣ်ထံ အတၢ်တိာ်ပာ် ဒီးအတၢ်ဂ့ၤတၢ်ဝါတဖၣ်လီၤ. တၢ်ဆၢကတီၢ်လၢ ပသူအီၤလၢ ပကရ့လိာ်သးဒီး ယဟိဝၤယွၤန့ၣ် အလုၢ်အပှ့ၤဒိၣ်ဒိၣ်မး.—စံးထီၣ်ပတြၢၤ ၁၃၉:၁၇.
၂. ပထံၣ်ဘၣ်ဒီး တၢ်ကီတၢ်ခဲမနုၤလဲၣ်.
၂ ပရ့လိာ်သးဒီး ယဟိဝၤယွၤ ခီဖျိ ပဃ့ဘါထုကဖၣ် ဒီးပဖးလံာ်စီဆှံန့ၣ် မုာ်ဘၣ်ပှၤဒိၣ်မး. ဘၣ်ဆၣ် ပကမၤဒ်န့ၣ်အဂီၢ်န့ၣ် တညီထီဘိဘၣ်. ပဘၣ်မၤတၢ်အိၣ်ဝဲအါမးအဃိ ကကီလၢပကဟံးန့ၢ် တၢ်ဆၢကတီၢ် လၢပကမၤ နီၢ်သးအတၢ်ဖံးတၢ်မၤအဂီၢ်. ဘၣ်သ့ၣ်သ့ၣ် ပကဘၣ်ဖံးအီၣ်မၤအီၣ်တၢ်, ကွၢ်ထွဲဟံၣ်ဖိဃီဖိ တၢ်လိၣ်ဘၣ် ဒီးမၤတၢ်လၢအဂၤတဖၣ်အဃိ ပတၢ်ဆၢကတီၢ် လၢာ်ဝဲအါမး. အဃိ ပကတူၢ်ဘၣ်လၢ ပဃ့ဘါထုကဖၣ်, မၤလိလံာ်စီဆှံ ဒီးဆိကမိၣ်ထံအီၤ တချုးလၢၤဘၣ်.
၃. တၢ်အဂၤလၢအမၤလၢာ်ဂီၤ ပတၢ်ဆၢကတီၢ်န့ၣ် မ့ၢ်မနုၤလဲၣ်.
၃ တၢ်အဂၤလၢ အမၤလၢာ်ဂီၤ ပတၢ်ဆၢကတီၢ်န့ၣ် အိၣ်ဒံးလီၤ. အဒိ, ပဝဲသ့ၣ်တဖၣ်န့ၣ် ပလိၣ်ဘၣ် တၢ်မၤမုာ်မၤဖှံသး. ဘၣ်ဆၣ် တၢ်မၤမုာ်မၤဖှံသးလၢ အဂ့ၤဒၣ်လၢာ် မၤလၢာ်ဂီၤပတၢ်ဆၢကတီၢ် တုၤဒၣ်လဲာ် ပတၢ်ဆၢကတီၢ် အိၣ်တ့ၢ်ထဲတစဲးဖိ လၢပကမၤ နီၢ်သးအတၢ်ဖံးတၢ်မၤအဂီၢ်သ့. အဃိ တၢ်မၤမုာ်မၤဖှံသးန့ၣ် တဘၣ်မ့ၢ် တၢ်အရ့ဒိၣ်ကတၢၢ် လၢပဂီၢ်ဘၣ်.—ကတိၤဒိ ၂၅:၂၇; ၁ တံၤမသ့း ၄:၈.
၄. ခဲအံၤ ပကတဲသကိး တၢ်ဂ့ၢ်မနုၤလဲၣ်.
၄ လၢတၢ်မၤလိအံၤအပူၤ ပကတဲသကိး ဘၣ်မနုၤအဃိ ပကဘၣ်ပာ်ဆိ တၢ်အရ့ဒိၣ်လၢညါလဲၣ်. ဒီးပကတဲသကိးစ့ၢ်ကီး ပသူပတၢ်ဆၢကတီၢ် လၢအဂ့ၤကတၢၢ် လၢပကရ့ဒီး ယဟိဝၤယွၤ ကသ့ဒ်လဲၣ်. ဒီးပမ့ၢ်သူ ပတၢ်ဆၢကတီၢ်လၢ တၢ်ကူၣ်သ့အပူၤ ဒ်အံၤန့ၣ် ကကဲဘျုးလၢပဂီၢ်ဒ်လဲၣ်.
အိၣ်ဒီးတၢ်ကူၣ်သ့ ခီဖျိပာ်ဆိ တၢ်အရ့ဒိၣ်လၢညါ
၅. ဒ်သိး ပှၤသးစၢ်တဖၣ် ဆၢတဲာ်တၢ်လၢအဘၣ် လၢအတၢ်အိၣ်မူပူၤ ကသ့အဂီၢ် ဖဲအဝဲသ့ၣ်ဖး အ့းဖ့းစူး ၅:၁၅-၁၇ အခါ အကဘၣ်သံကွၢ်လီၤအသးဒ်လဲၣ်.
၅ ဃုထၢတၢ်အဂ့ၤကတၢၢ် လၢနတၢ်အိၣ်မူအဂီၢ်. ပှၤသးစၢ်တဖၣ်န့ၣ် ညီနုၢ်ဆိကမိၣ်တၢ် ဘၣ်ဃးဒီး ကဘၣ်မၤတၢ်မနုၤလၢ အတၢ်အိၣ်မူပူၤလဲၣ်လီၤ. ဘၣ်သ့ၣ်သ့ၣ် ကၠိသရၣ် ဒီးအဘူးအတံၢ်လၢ တမ့ၢ်ယဟိဝၤပှၤအုၣ်သးတဖၣ်န့ၣ် ကဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကဃုတၢ်ကူၣ်ဘၣ်ကူၣ်သ့ လၢအပတီၢ်ထီ ဒ်သိး ကန့ၢ်တၢ်မၤလၢအပတီၢ်ထီ ဒီးကန့ၢ်စ့အါအါအဂီၢ်. အဝဲသ့ၣ် မ့ၢ်ဃုတၢ်ကူၣ်ဘၣ်ကူၣ်သ့ လၢအပတီၢ်ထီဒု အတၢ်ဆၢကတီၢ် ကလၢာ်ဝဲဒီဒူၣ်ညါ. ဘၣ်ဆၣ် မ့မ့ၢ်လၢ အမိၢ်အပၢ် ဒီးအသကိးလၢ တၢ်အိၣ်ဖှိၣ်ပူၤတဖၣ်န့ၣ် ကဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကမၤယဟိဝၤယွၤ အတၢ်မၤလၢ အတၢ်အိၣ်မူအပူၤ. အဃိ တၢ်မနုၤကမၤစၢၤ ပှၤသးစၢ်လၢ အအဲၣ်ယဟိဝၤယွၤ လၢကမၤတၢ်ဆၢတဲာ်လၢ အဂ့ၤကတၢၢ်လဲၣ်. အဝဲသ့ၣ် မ့ၢ်ဖးဝဲ အ့းဖ့းစူး ၅:၁၅-၁၇ ဒီးဆိကမိၣ်ထံအီၤန့ၣ် ကကဲထီၣ် တၢ်မၤစၢၤလၢ အဝဲသ့ၣ်အဂီၢ်လီၤ. (ဖး.) အဃိ နမ့မ့ၢ်ပှၤသးစၢ်န့ၣ် ဖဲနဖးလံာ်စီဆှံအဆၢအံၤအခါ သံကွၢ်လီၤနသးလၢ ‘“တၢ်ဘၣ်ယဟိဝၤယွၤအသး” မ့ၢ်မနုၤလဲၣ်, တၢ်ဆၢတဲာ်လၢ ကဘၣ်အသးန့ၣ် မ့ၢ်မနုၤလဲၣ်. တၢ်ဆၢတဲာ်လၢ အကမၤစၢၤယၤ ဒ်သိးယကသူ ယတၢ်ဆၢကတီၢ်လၢ အဂ့ၤကတၢၢ်န့ၣ် မ့ၢ်မနုၤလဲၣ်.’ ပကဘၣ်သ့ၣ်နီၣ်ထီၣ်လၢ “မုၢ်နံၤတဖၣ်အံၤ အၢဝဲသီဝဲ” ဒီးမုၣ်ကီၤလံၢ် အတၢ်ရဲၣ်တၢ်ကျဲၤန့ၣ် ကကတၢၢ်ကွံာ်ဝဲဘူးထီၣ်လံ. အဃိ လၢပတၢ်အိၣ်မူပူၤ ပမ့ၢ်မၤ တၢ်လၢအဘၣ် ယဟိဝၤယွၤအသးန့ၣ် မ့ၢ်ဝဲပအိၣ်ဒီး တၢ်ကူၣ်သ့လီၤ.
၆. နီၢ်မၤရံ ဃုထၢလၢ အကမၤတၢ်မနုၤလဲၣ် ဒီးဘၣ်မနုၤအဃိ ပတဲသ့လၢ အတၢ်ဃုထၢအံၤ ပှဲၤဒီးတၢ်ကူၣ်သ့လဲၣ်.
၆ ပာ်ဆိတၢ်လၢ အရ့ဒိၣ်. တဘျီတခီၣ် တၢ်လၢပကမၤအီၤတဖၣ်န့ၣ် တမ့ၢ်တၢ်လၢ အကမၣ်ဘၣ်. ဘၣ်ဆၣ် ဒ်သိးပသူပတၢ်ဆၢကတီၢ် လၢအဂ့ၤကတၢၢ် ကသ့အဂီၢ် ပကဘၣ် ဃုထၢဆိ တၢ်လၢအရ့ဒိၣ်ကတၢၢ်တခါ. ဘၣ်ဃးဒီး တၢ်ဂ့ၢ်အံၤန့ၣ် ပသ့ၣ်ညါဘၣ်အီၤ ဖဲယ့ၣ်ၡူးလဲၤအိၣ်သကိးဝဲ နီၢ်မၤရံ ဒီးနီၢ်မၢ်သၤအခါလီၤ. ဖဲယ့ၣ်ၡူး လဲၤအိၣ်သကိး အဝဲသ့ၣ်အခါ နီၢ်မၢ်သၤ အသးခုဒိၣ်မးအဃိ အဝဲအဲၣ်ဒိးဖီအီၣ်တ့ၤအီၣ်န့ၢ်တၢ်လၢ ယ့ၣ်ၡူးအဂီၢ်ဒီဒူၣ်ညါ. ဘၣ်ဆၣ် မ့မ့ၢ်လၢ အဒီပုၢ်ဝဲၢ်မုၣ် နီၢ်မၤရံဟီန့ၣ် ဟံးန့ၢ်တၢ်ခွဲးတၢ်ယာ်လၢ ကလဲၤဆ့ၣ်နီၤလၢ ယ့ၣ်ၡူးအခီၣ်ထံး ဒီးဒိကနၣ် အတၢ်သိၣ်လိလီၤ. တၢ်လၢနီၢ်မၢ်သၤမၤဝဲန့ၣ် တကမၣ်ဘၣ်, ဘၣ်ဆၣ် ယ့ၣ်ၡူးတဲဝဲလၢ နီၢ်မၤရံ “ဃုထၢဝဲတၢ်အဂ့ၤတမံၤ” လီၤ. (လူၤကၣ် ၁၀:၃၈-၄၂) လၢခံန့ၣ် ဘၣ်သ့ၣ်သ့ၣ် နီၢ်မၤရံ ကသးပ့ၤနီၣ်ဝဲ တၢ်အီၣ်သ့ၣ်တဖၣ်န့ၣ်, ဘၣ်ဆၣ် တၢ်လၢယ့ၣ်ၡူး သိၣ်လိအီၤန့ၣ် တမ့ၢ်လၢ အကသးပ့ၤနီၣ်ဝဲဘၣ်. ဒ်နီၢ်မၤရံ ပာ်လုၢ်ပာ်ပှ့ၤ တၢ်ဆၢကတီၢ်လၢ အရ့ဒီးယ့ၣ်ၡူးအသိး ပဝဲစ့ၢ်ကီး ပပာ်လုၢ်ပာ်ပှ့ၤ တၢ်ဆၢကတီၢ်လၢ ပရ့ဒီး ယဟိဝၤယွၤလီၤ. ပသူပတၢ်ဆၢကတီၢ်လၢ အဂ့ၤကတၢၢ် ကသ့ဒ်လဲၣ်.
သူတၢ်ဆၢကတီၢ် အဂ့ၤကတၢၢ် ဖဲနရ့ဒီးယဟိဝၤယွၤအခါ
၇. ဘၣ်မနုၤအဃိ ပကဘၣ်ဟံးန့ၢ် တၢ်ဆၢကတီၢ်လၢ ပကဃ့ဘါထုကဖၣ်, မၤလိလံာ်စီဆှံ ဒီးဆိကမိၣ်ထံအီၤအဂီၢ်လဲၣ်.
၇ တၢ်ဃ့ဘါထုကဖၣ်, တၢ်မၤလိလံာ်စီဆှံ ဒီးတၢ်ဆိကမိၣ်ထံအီၤန့ၣ် ပၣ်ဃုာ်လၢ တၢ်ဘူၣ်ထီၣ်ဘါထီၣ် ယဟိဝၤယွၤ. ဖဲပဃ့ဘါထုကဖၣ်တၢ်အခါ မ့ၢ်ဝဲပတဲတၢ်ဒီး ပပၢ်လၢမူခိၣ် လၢအအဲၣ်ပှၤဒိၣ်မးတဂၤ အအိၣ်လီၤ. (စံးထီၣ်ပတြၢၤ ၅:၇) ဖဲပမၤလိလံာ်စီဆှံအခါ မ့ၢ်ဒၣ်ပဃု “သ့ၣ်ညါယွၤ” လၢအမ့ၢ် တၢ်ကူၣ်သ့အဂံၢ်ခီၣ်ထံးတဂၤအဂ့ၢ်. (ကတိၤဒိ ၂:၁-၅) ဖဲပဆိကမိၣ်ထံ တၢ်ဂ့ၢ်လၢပမၤလိ ဘၣ်ဃးဒီး ယဟိဝၤယွၤအခါ ပဆိကမိၣ်ဘၣ်ဃး ယဟိဝၤယွၤ အတၢ်ဂ့ၤတၢ်ဝါတဖၣ် ဒီးပဆိကမိၣ်ဃုာ်ဒီး အတၢ်တိာ်ပာ်လၢပဂီၢ် ဒီးပှၤဟီၣ်ခိၣ်ဖိခဲလၢာ်အဂီၢ်. အဃိ ပမ့ၢ်မၤဒ်န့ၣ်န့ၣ် မ့ၢ်ဝဲပသူပတၢ်ဆၢကတီၢ် လၢကျဲလၢအဂ့ၤကတၢၢ်လီၤ. ပတၢ်ဆၢကတီၢ် မ့ၢ်တအိၣ်အါအါသနာ်က့ တၢ်မနုၤကမၤစၢၤပှၤဒ်သိး ပကသူပတၢ်ဆၢကတီၢ် လၢအဂ့ၤကတၢၢ်လဲၣ်.
ဃုန့ၢ်တၢ်လီၢ်လၢ အဘှ့ၣ်အဘှီၣ် လၢနကမၤ နီၢ်ကစၢ်တၢ်မၤလိလံာ်စီဆှံအဂီၢ် (ကွၢ်လံာ်အဆၢ ၈-၉)
၈. ယ့ၣ်ၡူးအိၣ်လၢ ပှၢ်မုၢ်ကနၢအခါ အသူအတၢ်ဆၢကတီၢ်ဒ်လဲၣ်န့ၣ် ပဒိးန့ၢ်ဘၣ် တၢ်မၤလိမနုၤလဲၣ်.
၈ မ့ၢ်သ့န့ၣ် ဃုတၢ်လီၢ်လၢ အဘှ့ၣ်အဘှီၣ်. ပကကွၢ်သကိး ယ့ၣ်ၡူးအဒိအတဲာ်. တချုးလၢ အစးထီၣ် တၢ်စံၣ်တဲၤတဲလီၤ တၢ်မၤဒံးဘၣ်န့ၣ် ယ့ၣ်ၡူးအိၣ်လၢ ပှၢ်မုၢ်ကနၢပူၤ အသီ ၄၀ လီၤ. (လူၤကၣ် ၄:၁, ၂) ဖဲန့ၣ် တၢ်ဘှ့ၣ်ဘှီၣ်ဒိၣ်မးအဃိ ယ့ၣ်ၡူးဃ့ဘါထုကဖၣ်လၢ ယဟိဝၤယွၤအအိၣ် ဒီးဆိကမိၣ်ထံ ဘၣ်ဃးဒီး အပၢ်အဲၣ်ဒိးလၢ အကမၤ တၢ်မနုၤလဲၣ်လီၤ. ယ့ၣ်ၡူးမၤဝဲဒ်အံၤအဃိ မၤစၢၤအီၤလၢ အကအိၣ်ကတဲာ်ကတီၤအသးလၢ တၢ်မၤကွၢ်လၢ အကထံၣ်ဘၣ်ဝဲတဖၣ်လီၤ. ယ့ၣ်ၡူးအဒိအတဲာ်န့ၣ် ပမၤလိန့ၢ်ဘၣ် တၢ်မနုၤလဲၣ်. နမ့ၢ်အိၣ်ဘၣ်လၢ ဟံၣ်ဖိဃီဖိလၢ ပှၤအိၣ်အါဂၤအကျါန့ၣ် နကဃုတၢ်လီၢ်လၢ အဘှ့ၣ်အဘှီၣ်န့ၣ် တမ့ၢ်ကညီဝဲ ထီဘိဘၣ်. မ့မ့ၢ်ဒ်န့ၣ်န့ၣ် နဃုတၢ်လီၢ်အဘှ့ၣ်အဘှီၣ် လၢတၢ်လီၢ်အဂၤသ့ဝဲလီၤ. အဒိ, ဒီပုၢ်ဝဲၢ်မုၣ်ကၠူလံၤ လၢအအိၣ်လၢကီၢ်ဖြၣ်စ့ၣ်န့ၣ် ဖဲအအဲၣ်ဒိး ဟံးန့ၢ်တၢ်ဆၢကတီၢ်လၢ ကဃ့ဘါထုကဖၣ်လၢ ယဟိဝၤယွၤအအိၣ်အခါန့ၣ် အမၤဝဲဒ်န့ၣ်လီၤ. အီၤဒီးအဝၤန့ၣ် အိၣ်လၢတၢ်သူၣ်ထီၣ်ဆံးဆံးဖိ လၢအိၣ်ဒီးအဒၢးအါမး အဃိကီဒိၣ်မးလၢ အကအိၣ်ဘၣ် ဘှ့ၣ်ဘှ့ၣ်ဘှီၣ်ဘှီၣ်အဂီၢ်. ဒီပုၢ်ဝဲၢ်မုၣ်ကၠူလံၤ တဲဝဲလၢ “ကိးနံၤဒဲးန့ၣ် ယလဲၤဟးလၢ ဖီကရၢၢ်အဃိ ဖဲယဃ့ထုကဖၣ်တၢ်လၢ ယဟိဝၤယွၤအအိၣ်အခါ ယသးစၢၢ်ဆၢအီၤန့ၢ်ဝဲ.”
၉. ယ့ၣ်ၡူးအတၢ်မၤအါမး သနာ်က့ အပာ်ဖျါထီၣ်လၢ အပာ်လုၢ်ပာ်ပှ့ၤ အတၢ်ရ့လိာ်သးဒီး ယဟိဝၤယွၤဒ်လဲၣ်.
၉ ယ့ၣ်ၡူးန့ၣ် အတၢ်မၤအါမး. ဖဲအမၤဝဲ တၢ်စံၣ်တဲၤတဲလီၤတၢ်မၤအခါ အလဲၤဝဲလၢ တၢ်လီၢ်တတီၤဘၣ်တတီၤ ဒီးပှၤဂီၢ်မုၢ်တဖၣ် အဲၣ်ဒိးအိၣ်ဒီးအီၤ. ဘၣ်တဘျီ “ပှၤဒီတဝ့ၢ် ဟဲအိၣ်ဖှိၣ်ဝဲလၢ တြဲၤအခီၣ်ထံး” ဒ်သိး ကထံၣ်လိာ်သးဒီးအီၤအဂီၢ်. ဒီးလၢခံ တချုးလၢ မုၢ်ဟဲထီၣ်ဒံးဘၣ်န့ၣ် အဝဲလဲၤလၢ တၢ်လီၢ်လၢ “ပှၤတအိၣ် နီတဂၤဘၣ်အလီၢ်” ထဲတဂၤဧိၤ လၢကဟံးန့ၢ် တၢ်ဆၢကတီၢ်လၢ ကဃ့ဘါထုကဖၣ်ဆူ အပၢ်အအိၣ်လီၤ. အဃိ ပထံၣ်ဘၣ်လၢ ယ့ၣ်ၡူး အတၢ်မၤမ့ၢ်အါ ထဲလဲၣ်သနာ်က့ အဝဲဟံးန့ၢ် တၢ်ဆၢကတီၢ်လၢ ကဃ့ဘါထုကဖၣ်တၢ်လၢ ယဟိဝၤယွၤအအိၣ် ထီဘိလီၤ.—မၢ်ကူး ၁:၃၂-၃၅.
၁၀-၁၁. ဒ် မးသဲ ၂၆:၄၀, ၄၁ ပာ်ဖျါထီၣ်ဝဲအသိး လၢက့ၤသစ့းမနၤ တၤသၣ်လီၢ်အပူၤန့ၣ် ယ့ၣ်ၡူးမၢအပျဲၢ်အဘီၣ်တဖၣ် မၤတၢ်မနုၤလဲၣ်, ဘၣ်ဆၣ် တၢ်ကဲထီၣ်အသးဒ်လဲၣ်.
၁၀ ဖဲယ့ၣ်ၡူး အတၢ်အိၣ်မူလၢဟီၣ်ခိၣ် အလီၢ်ခံကတၢၢ်တနၤ ဒီးတၢ်စံၣ်တဲၤတဲလီၤတၢ်မၤ ကကတၢၢ်ဝဲအခါ အဃုဝဲ တၢ်လီၢ်လၢ အဘှ့ၣ်အဘှီၣ် ဒ်သိး ကဆိကမိၣ်ထံတၢ် ဒီးကဃ့ဘါထုကဖၣ်တၢ်အဂီၢ်လီၤ. အထံၣ်န့ၢ်ဝဲ တၢ်လီၢ်လၢအဘှ့ၣ်အဘှီၣ် ဖဲက့ၤသစ့းမနၤ တၤသၣ်လီၢ်လီၤ. (မးသဲ ၂၆:၃၆) ဖဲန့ၣ်ယ့ၣ်ၡူးတဲဘၣ် အပျဲၢ်အဘီၣ်တဖၣ် ဘၣ်ဃးဒီး တၢ်ဃ့ထုကဖၣ်န့ၣ် မ့ၢ်တၢ်လၢအရ့ဒိၣ်ဒိၣ်မး.
၁၁ ပကကွၢ်သကိး တၢ်ကဲထီၣ်အသးဒ်လဲၣ်. ဖဲအဝဲသ့ၣ် လဲၤတုၤလၢ က့ၤသစ့းမနၤ တၤသၣ်လီၢ်အခါ မုၢ်နၤယိာ်ဝဲဒိၣ်မး ဒီးဘၣ်သ့ၣ်သ့ၣ် ဖးဖီမုၢ်ကတလၢလံ. ဖဲန့ၣ်ယ့ၣ်ၡူးတဲဘၣ် အပျဲၢ်အဘီၣ်တဖၣ်လၢက “စီၣ်မဲာ်စီၣ်နါ” ဒီးအလဲၤ ဃ့ဘါထုကဖၣ်လီၤ. (မးသဲ ၂၆:၃၇-၃၉) ဘၣ်ဆၣ် ဖဲယ့ၣ်ၡူးဃ့ဘါထုကဖၣ်အခါ အဝဲသ့ၣ် မံကမၣ်ဘၣ်အသးလီၤ. ဖဲယ့ၣ်ၡူး ထံၣ်ဝဲလၢအဝဲသ့ၣ် မံဘၣ်အသးအခါ တဲဘၣ်ကဒီး အဝဲသ့ၣ်လၢ “စီၣ်မဲာ်စီၣ်နါ ဒီးဃ့ဘါထုကဖၣ်တၢ် ထီဘိတက့ၢ်.” (ဖး မးသဲ ၂၆:၄၀, ၄၁.) ယ့ၣ်ၡူးသ့ၣ်ညါဝဲလၢ အဝဲသ့ၣ် သူၣ်ကိၢ်သးဂီၤတၢ် ဒီးလီၤဘှံးလီၤတီၤလီၤ. ယ့ၣ်ၡူး ဒိသူၣ်ဒိသး အဝဲသ့ၣ် ဒီးသ့ၣ်ညါဝဲလၢ “နီၢ်ခိန့ၣ် အဂံၢ်အဘါ စၢ်ဝဲ.” ယ့ၣ်ၡူး လဲၤဃ့ဘါထုကဖၣ်ကဒီး လၢအသီခံဘျီ ဒီးဖဲအဟဲက့ၤအခါ ထံၣ်ဝဲလၢ အပျဲၢ်အဘီၣ်တဖၣ်န့ၣ် လၢကဃ့ဘါထုကဖၣ်အလီၢ် မံကမၣ်ဘၣ်ကဒီးအသးလီၤ.—မးသဲ ၂၆:၄၂-၄၅.
တချုးလၢ နလီၤဘှံးလီၤတီၤဒံးဘၣ်န့ၣ် ဟံးန့ၢ်တၢ်ဆၢကတီၢ်လၢ နကဃ့ဘါထုကဖၣ်တၢ်အဂီၢ် (ကွၢ်လံာ်အဆၢ ၁၂)
၁၂. တဘျီတခီၣ် ဖဲပဘၣ်ယိၣ်တၢ်အါတလၢ မ့တမ့ၢ် ပလီၤဘှံးလီၤတီၤလၢ ပကဃ့ဘါထုကဖၣ်တၢ်အဂီၢ်အခါ ပမၤတၢ်မနုၤသ့လဲၣ်.
၁၂ ဃုထၢတၢ်ဆၢကတီၢ် လၢအဂ့ၤကတၢၢ်. တဘျီတခီၣ်န့ၣ် မ့ၢ်လၢပဘၣ်ယိၣ်ဘၣ်ဘှီတၢ် အါတလၢ မ့တမ့ၢ် ပလီၤဘှံးလီၤတီၤ ဒိၣ်တလၢအဃိ ဘၣ်သ့ၣ်သ့ၣ် ပကတူၢ်ဘၣ်လၢ ပဃ့ဘါထုကဖၣ်တၢ် တကဲလၢၤဘၣ်. တၢ်မ့ၢ်ကဲထီၣ်အသးဒီးနၤ ဒ်န့ၣ်န့ၣ် တဘၣ်သးဟးဂီၤတဂ့ၤ, ပှၤအါဂၤန့ၣ် တူၢ်ဘၣ်ဝဲဒ်သိးဒီးနၤ. နမ့ၢ်တူၢ်ဘၣ်ဒ်န့ၣ်န့ၣ် နမၤတၢ်မနုၤကသ့လဲၣ်. ပှၤလၢအဃ့ထုကဖၣ် ညီနုၢ်တၢ်လၢ မုၢ်နၤခီတနီၤန့ၣ် တဲဝဲလၢ အဝဲသ့ၣ် မ့ၢ်ဟံးန့ၢ်တၢ်ဆၢကတီၢ်လၢ ကဃ့ဘါထုကဖၣ်ဆိတစဲး တချုးလၢအလီၤဘှံးဒံးဘၣ်န့ၣ် အဝဲသ့ၣ်သးစၢၢ်ဆၢတၢ် န့ၢ်ဒိၣ်တစဲးလီၤ. ပှၤတနီၤတဲဝဲလၢ အဝဲသ့ၣ် မ့ၢ်ဆ့ၣ်နီၤ ချံးလီၤခီၣ်ဒီး ဃ့ထုကဖၣ်တၢ်န့ၣ် အဝဲသ့ၣ် သးစၢၢ်ဆၢတၢ် န့ၢ်ဒိၣ်တစဲး. ဘၣ်ဆၣ် နမ့ၢ်အိၣ်ဒီး တၢ်သူၣ်ကိၢ်သးဂီၤ အါတလၢ မ့တမ့ၢ် နသးဂံၢ်ဘါ မ့ၢ်လီၤစၢ်လၢ နကဃ့ဘါထုကဖၣ်တၢ်အဂီၢ်ဟီမီၤ. ဖဲန့ၣ်တဲဘၣ် ယဟိဝၤယွၤလၢနတၢ်တူၢ်ဘၣ် အိၣ်ဒ်လဲၣ်. နမ့ၢ်မၤဒ်န့ၣ်န့ၣ် နနာ်သ့သပှၢ်ကတၢၢ်လၢ ပပၢ်လၢအပှဲၤဒီး တၢ်သးကညီၤန့ၣ် ကနၢ်ပၢၢ်စၢၤနၤလီၤ.—စံးထီၣ်ပတြၢၤ ၁၃၉:၄.
ဖဲနထီၣ်တၢ်အိၣ်ဖှိၣ်အခါ မ့ၢ်သ့န့ၣ် ဆှၢကဒါက့ၤ မဲးစ့း ဒီးအံမ့(လ်) တဂ့ၤ (ကွၢ်လံာ်အဆၢ ၁၃-၁၄)
၁၃. ဖဲပဃ့ဘါထုကဖၣ်, မၤလိလံာ်စီဆှံ ဒီးပထီၣ်တၢ်အိၣ်ဖှိၣ်အခါ ပအံၣ်လဲးထြီနံး တၢ်ပီးတၢ်လီတဖၣ် မၤတံာ်တာ်ပှၤသ့ဒ်လဲၣ်.
၁၃ ဖဲနမၤလိလံာ်စီဆှံအခါ တဘၣ်ပျဲလၢ တၢ်ကမၤတံာ်တာ်နၤ နီတမံၤတဂ့ၤ. တၢ်လၢအကမၤဘူးဒိၣ်ထီၣ်ပှၤဒီး ယဟိဝၤယွၤန့ၣ် တမ့ၢ်ထဲ တၢ်ဃ့ဘါထုကဖၣ် တခါဧိၤဘၣ်. တၢ်မၤလိလံာ်စီဆှံ ဒီးတၢ်ထီၣ်တၢ်အိၣ်ဖှိၣ်စ့ၢ်ကီး မၤစၢၤပှၤလၢ ပကဘူးဒိၣ်ထီၣ်ဒီး ကစၢ်ယွၤလီၤ. ဖဲပမၤလိလံာ်စီဆှံ ဒီးထီၣ်တၢ်အိၣ်ဖှိၣ်အခါ ပဟ့ၣ်ပတၢ်ဆၢကတီၢ် လၢအဂ့ၤကတၢၢ် ကသ့ဒ်လဲၣ်. သံကွၢ်လီၤနသးလၢ ‘ဖဲယထီၣ်တၢ်အိၣ်ဖှိၣ် ဒီးမၤလိတၢ်အဆၢကတီၢ် တၢ်မနုၤ မၤတံာ်တာ်ယၤလၢ ယကသးစၢၢ်ဆၢတၢ် အဂီၢ်လဲၣ်.’ ဘၣ်သ့ၣ်သ့ၣ် ကမ့ၢ်ပှၤကိးနၤ လီတဲစိ, ပှၤဆှၢန့ၢ်နၤ အံမ့(လ်) ဒီးမဲးစ့းလၢ နလီတဲစိ မ့တမ့ၢ် အံၣ်လဲးထြီနံး တၢ်ပီးတၢ်လီတခါခါအပူၤလီၤ. မုၢ်မဆါတနံၤအံၤ ပှၤအါဂၤန့ၣ် သူဝဲတၢ်ပီးတၢ်လီတဖၣ်အံၤ. ပှၤဃုသ့ၣ်ညါတၢ်ဖိတနီၤ တဲဝဲလၢ ဖဲနဂုာ်ကျဲးစၢး သးစၢၢ်ဆၢတၢ်အခါ ထဲဒၣ်နလီတဲစိ မ့ၢ်အိၣ်လၢ နခီၣ်ထံးန့ၣ် မၤတံာ်တာ်နၤသ့ဝဲ. ပှၤကူၣ်ဘၣ်ကူၣ်သ့တဂၤ တဲဝဲလၢ ‘ထဲဒၣ်နလီတဲစိ မ့ၢ်အိၣ်လၢနကပၤန့ၣ် နတသးစၢၢ်ဆၢ တၢ်လၢနမၤအီၤဘၣ်, နဆိကမိၣ်ဘၣ်လၢ တၢ်အဂၤသ့.’ ဖဲကဝီၤတၢ်အိၣ်ဖှိၣ် ဒီးတၢ်အိၣ်ဖှိၣ်ဖးဒိၣ် ကစးထီၣ်အသးအခါ ညီနုၢ်န့ၣ် ပှၤဒုးသ့ၣ်နီၣ်ထီၣ်ပှၤလၢ ပကပံးကွံာ် ပအံၣ်လဲးထြီနံး တၢ်ပီးတၢ်လီတဖၣ် အကလုၢ် ဒ်သိးအသုတမၤတံာ်တာ် ပှၤဂၤတဂ့ၤအဂီၢ်. ဒ်န့ၣ်အသိး ဖဲပဃ့ဘါထုကဖၣ်, မၤလိလံာ်စီဆှံ ဒီးပထီၣ်တၢ်အိၣ်ဖှိၣ်အခါ ဒ်သိး ပအံၣ်လဲးထြီနံး တၢ်ပီးတၢ်လီ သုတမၤတံာ်တာ်ပှၤတဂ့ၤအဂီၢ် ပပံးကွံာ်အကလုၢ်ကသ့ဧါ.”
၁၄. ဒ် ဖံလံးပံၤ ၄:၆, ၇ ပာ်ဖျါထီၣ်ဝဲအသိး ယဟိဝၤယွၤ ကမၤစၢၤပှၤလၢ ပကသးစၢၢ်ဆၢတၢ်ဒ်လဲၣ်.
၁၄ ဃ့ယဟိဝၤယွၤ အတၢ်မၤစၢၤ ဒ်သိး နသးစၢၢ်ဆၢတၢ် ကန့ၢ်အဂီၢ်. ဖဲနမၤလိလံာ်စီဆှံ ဒီးထီၣ်တၢ်အိၣ်ဖှိၣ်အခါ နမ့ၢ်ဆိကမိၣ်ဘၣ် တၢ်ဂ့ၢ်လၢအဂၤန့ၣ် ဃ့ယဟိဝၤယွၤ အတၢ်မၤစၢၤ. နမ့ၢ်ဘၣ်ယိၣ်ဘၣ်ဘှီတၢ် ဒီးသူၣ်ကိၢ်သးဂီၤတၢ်န့ၣ် တညီလၢ နကသးစၢၢ်ဆၢလၢ နနီၢ်သးတကပၤဘၣ်, ဘၣ်ဆၣ် အရ့ဒိၣ်လၢ နကဘၣ် သးစၢၢ်ဆၢ တၢ်လၢနီၢ်သးတကပၤလီၤ. အဃိ ဃ့ဘါထုကဖၣ်ဒ်သိး နကအိၣ်ဒီး တၢ်သူၣ်မံသးမုာ် လၢနကပၢၤ နသူၣ်နသး ဒီးန “တၢ်ဆိကမိၣ်တဖၣ်” တက့ၢ်.—ဖး ဖံလံးပံၤ ၄:၆, ၇.
ပမ့ၢ်ဟံးန့ၢ် တၢ်ဆၢကတီၢ်လၢ ပကရ့ဒီး ယဟိဝၤယွၤန့ၣ် ကကဲဘျုးဝဲဒိၣ်မး
၁၅. ပမ့ၢ်ဟ့ၣ်တၢ်ဆၢကတီၢ် လၢပကရ့ဒီး ယဟိဝၤယွၤန့ၣ် ကကဲဘျုးလၢပဂီၢ်ဒ်လဲၣ်.
၁၅ နမ့ၢ်ဟံးန့ၢ် တၢ်ဆၢကတီၢ်လၢ နကတဲတၢ်ဒီးယဟိဝၤယွၤ, ဒိကနၣ်အီၤ ဒီးဆိကမိၣ်ထံအဂ့ၢ်န့ၣ် ကကဲဘျုးဝဲဒိၣ်မး. ကကဲဘျုးလၢကျဲဒ်လဲၣ်. အဆိကတၢၢ်န့ၣ် နဆၢတဲာ်တၢ်လၢအဘၣ် ကသ့အါထီၣ်. လံာ်စီဆှံတဲဝဲလၢ “ပှၤလၢအလဲၤတၢ်ဒီး ပှၤကူၣ်တၢ်သ့န့ၣ် ကကဲထီၣ်ပှၤကူၣ်တၢ်သ့လီၤ.” (ကတိၤဒိ ၁၃:၂၀) နမ့ၢ်ဟ့ၣ်တၢ်ဆၢကတီၢ်လၢ နကရ့ဒီး ယဟိဝၤယွၤလၢအမ့ၢ် တၢ်ကူၣ်ဘၣ်ကူၣ်သ့ အဂံၢ်ခီၣ်ထံးန့ၣ် နကကဲထီၣ် ပှၤလၢအကူၣ်တၢ်သ့ဒိၣ်ထီၣ်. ဒီးနကဘၣ်မၤ အတၢ်ဘၣ်သးဒ်လဲၣ် ဒီးနကဘၣ်ဟးဆှဲး တၢ်လၢအကမၤဘၣ်ဒိအသး ဒ်လဲၣ်န့ၣ် နကသ့ၣ်ညါအါထီၣ်လီၤ.
၁၆. ပမ့ၢ်ဟ့ၣ်တၢ်ဆၢကတီၢ် လၢပကရ့ဒီး ယဟိဝၤယွၤန့ၣ် ပသိၣ်လိတၢ် ကသ့အါထီၣ်ဒ်လဲၣ်.
၁၆ ခံထံၣ်တထံၣ်န့ၣ် နသိၣ်လိတၢ် ကသ့ဒိၣ်ထီၣ်. ဖဲပသိၣ်လိပှၤဂၤ လံာ်စီဆှံအခါ ပတၢ်တိာ်ပာ်အခိၣ်သ့ၣ်န့ၣ် မ့ၢ်ဝဲ ပကမၤစၢၤ ပှၤမၤလိလံာ်စီဆှံဖိ လၢကသုးဘူးအသးဒီး ယဟိဝၤယွၤလီၤ. ဖဲပဃ့ဘါထုကဖၣ် လၢယဟိဝၤယွၤအအိၣ် ဒီးမၤလိအါထီၣ်အဂ့ၢ်အခါ ပတၢ်အဲၣ်အီၤ ကဟဲဒိၣ်ထီၣ်အါထီၣ် ဒီးပသိၣ်လိ ပပှၤမၤလိလံာ်စီဆှံဖိလၢ အတၢ်အဲၣ် ယဟိဝၤယွၤကဒိၣ်ထီၣ်အဂီၢ် ကသ့လီၤ. ပကကွၢ်သကိး ယ့ၣ်ၡူးအဒိအတဲာ်. ယ့ၣ်ၡူးတဲဘၣ်ဃးဒီး ယဟိဝၤယွၤ အတၢ်အဲၣ်, အတၢ်ကဟုကယာ်အဃိ မၤစၢၤဝဲ အပျဲၢ်အဘီၣ်တဖၣ်လၢ ကအဲၣ်ယဟိဝၤယွၤစ့ၢ်ကီးလီၤ.—ယိၤဟၣ် ၁၇:၂၅, ၂၆.
၁၇. ဘၣ်မနုၤအဃိ တၢ်ဃ့ဘါထုကဖၣ် ဒီးတၢ်မၤလိလံာ်စီဆှံန့ၣ် မၤစၢၤပှၤလၢ ပတၢ်နာ် ကဟဲဂၢၢ်ကျၢၤထီၣ်အဂီၢ်လဲၣ်.
၁၇ သၢထံၣ်တထံၣ်န့ၣ် နတၢ်နာ်ကဟဲဂၢၢ်ကျၢၤဒိၣ်ထီၣ်. အဒိ, ဖဲပဃ့ယဟိဝၤယွၤ အတၢ်ဟံးစုနဲၣ်ကျဲ, တၢ်မၤမုာ်ထီၣ်ပသး ဒီးတၢ်မၤစၢၤအခါ ကကဲဘျုးဒ်လဲၣ်. ဖဲပထံၣ်ဘၣ်လၢ ယဟိဝၤယွၤ စံးဆၢပတၢ်ထုကဖၣ် တဘျီလၢ်လၢ်အခါ ပတၢ်နာ်န့ၢ်အီၤ ကဟဲဒိၣ်ထီၣ်ဝဲ. (၁ ယိၤဟၣ် ၅:၁၅) တကးဒံးဘၣ် မ့ၢ်လၢ “တၢ်နာ်န့ၣ် ဟဲခီဖျိလၢ တၢ်နၢ်ဟူ” အဃိ ဒ်သိး ပတၢ်နာ် ကဟဲဒိၣ်ထီၣ်အဂီၢ် ပကဘၣ်မၤ နီၢ်ကစၢ်တၢ်မၤလိလံာ်စီဆှံစ့ၢ်ကီး. (ရိမ့ၤ ၁၀:၁၇) ဘၣ်ဆၣ် ဒ်သိး ပတၢ်နာ် ကဂၢၢ်ကျၢၤထီၣ်အဂီၢ် ပကဘၣ်မၤအီၤ အါန့ၢ်ဒံး တၢ်မၤလိလံာ်စီဆှံလီၤ.
၁၈. ဘၣ်မနုၤအဃိ ပကဘၣ် ဆိကမိၣ်ထံတၢ်လဲၣ်.
၁၈ တၢ်လၢပမၤလိအီၤတဖၣ်န့ၣ် ပကဘၣ်ဆိကမိၣ်ထံအီၤလီၤ. ပကကွၢ်သကိး ပှၤကွဲးထါစံးထီၣ်ပတြၢၤ အဆၢဒိၣ် ၇၇ တဂၤအတၢ်လဲၤခီဖျိ. အတူၢ်ဘၣ်ဝဲဒၣ်လၢ အီၤဒီးပှၤအံၣ်စရ့လးဖိတဖၣ် တဒိးန့ၢ်ဘၣ် ယဟိဝၤယွၤ အတၢ်ဘၣ်သးလၢၤဘၣ်အဃိ အသူၣ်ကိၢ်သးဂီၤတၢ်လီၤ. ခီဖျိလၢ အဘၣ်ယိၣ်ဘၣ်ဘှီတၢ် ဒိၣ်တလၢအဃိ လၢမုၢ်နၤခီန့ၣ် အမံတန့ၢ်ဘၣ်. (အဆၢဖိ ၂-၈) အဃိ အမၤတၢ်မနုၤလဲၣ်. အတဲဘၣ် ယဟိဝၤယွၤလၢ “ယကဆိကမိၣ်လၢ နတၢ်မၤခဲလၢာ်အဂ့ၢ်, ဒီးလၢနမၤတၢ်ဖံးတၢ်တဖၣ် အဂ့ၢ်အကျိၤန့ၣ် ယကဆိကမိၣ်လီၤ.” (အဆၢဖိ ၁၂) လၢအပူၤကွံာ် ယဟိဝၤယွၤ မၤတ့ၢ်တၢ်လၢ အခ့အပှၤတဖၣ်အဂီၢ် ဒ်လဲၣ်န့ၣ် ပှၤကွဲးထါစံးထီၣ်ပတြၢၤတဂၤအံၤ သ့ၣ်ညါဝဲဒၣ်ဂ့ၤဂ့ၤ. ဘၣ်ဆၣ် မ့ၢ်လၢအအိၣ်ဒီး တၢ်ဘၣ်ယိၣ်ဘၣ်ဘှီဒံးအဃိ အတဲဝဲလၢ “ယွၤသးပ့ၤနီၣ် သးကညီၤတၢ်န့ၣ်စ့ၢ်ကီးဧါ. လၢအသးထီၣ်အဃိန့ၣ် ကးတံာ်ဃာ် အတၢ်သးကညီၤစ့ၢ်ကီးဧါ.” (အဆၢဖိ ၉) ပှၤကွဲးထါစံးထီၣ်ပတြၢၤတဂၤအံၤ ဆိကမိၣ်ထံဝဲ တၢ်လၢယဟိဝၤယွၤ မၤတ့ၢ်ဝဲတဖၣ် ဒီးယဟိဝၤယွၤ ပာ်ဖျါထီၣ် တၢ်သးကညီၤ ဒီးတၢ်ဒိသူၣ်ဒိသး လၢအပူၤကွံာ်တဖၣ်လီၤ. (အဆၢဖိ ၁၁) အဃိ အတၢ်နာ် ဟဲဂၢၢ်ကျၢၤထီၣ်လၢ ယဟိဝၤယွၤ တပာ်တ့ၢ်အခ့အပှၤဘၣ်. (အဆၢဖိ ၁၅) ဒ်န့ၣ်အသိး ဖဲပဆိကမိၣ် တၢ်လၢယဟိဝၤယွၤ မၤတ့ၢ်ဝဲလၢ အခ့အပှၤတဖၣ်အဂီၢ် ဒီးတၢ်လၢအမၤတ့ၢ်ဝဲလၢ ပဝဲတဂၤစုာ်စုာ်အဂီၢ်အခါ ပတၢ်နာ် ကဟဲဂၢၢ်ကျၢၤထီၣ်ဝဲလီၤ.
၁၉. ပမ့ၢ်ဟံးန့ၢ် တၢ်ဆၢကတီၢ်လၢ ပကရ့လိာ်သးဒီး ယဟိဝၤယွၤန့ၣ် ပကဒိးန့ၢ်ဘၣ်ဒံး အဘျုးမနုၤလဲၣ်.
၁၉ လွံၢ်ထံၣ်တထံၣ် တၢ်လၢအရ့ဒိၣ်ကတၢၢ်န့ၣ် ပတၢ်အဲၣ်ယဟိဝၤယွၤ ကဟဲဒိၣ်ထီၣ်. တၢ်အဲၣ်န့ၣ် အသဟီၣ်ဆူၣ်န့ၢ်ဒံး တၢ်ဂ့ၤတၢ်ဝါအဂၤတဖၣ် ဒီးကထိၣ်ဟူးထိၣ်ဂဲၤထီၣ်နၤလၢ နကဒိကနၣ် ယဟိဝၤယွၤအကလုၢ်, နကတူၢ်ဆါနသးလၢ နကမၤအတၢ်ဘၣ်သး ဒီးနကအိၣ်ဒီး တၢ်တူၢ်န့ၢ်ခီၣ်ကဲလၢ နကလဲၤခီဖျိ တၢ်မၤကွၢ်တဖၣ်အဂီၢ်လီၤ. (မးသဲ ၂၂:၃၇-၃၉; ၁ ကရံၣ်သူး ၁၃:၄, ၇; ၁ ယိၤဟၣ် ၅:၃) တၢ်လၢအရ့ဒိၣ်န့ၢ်ဒံး ပတၢ်ရ့လိာ်သးဒီး ယဟိဝၤယွၤန့ၣ် တဘၣ်အိၣ်နီတမံၤဘၣ်.—စံးထီၣ်ပတြၢၤ ၆၃:၁-၈.
၂၀. ဖဲနဃ့ဘါထုကဖၣ်, မၤလိလံာ်စီဆှံ ဒီးဆိကမိၣ်ထံတၢ်အခါ ဒ်သိး နသူနတၢ်ဆၢကတီၢ်လၢ အဂ့ၤကတၢၢ်ကသ့အဂီၢ် နကဘၣ်မၤဒ်လဲၣ်.
၂၀ ပကဘၣ်သ့ၣ်နီၣ်ထီၣ်လၢ တၢ်ဃ့ဘါထုကဖၣ်, တၢ်မၤလိလံာ်စီဆှံ ဒီးတၢ်ဆိကမိၣ်ထံတၢ်န့ၣ် မ့ၢ်ဝဲ တၢ်ဘူၣ်ထီၣ်ဘါထီၣ် ယဟိဝၤယွၤစ့ၢ်ကီး. အဃိ ဒ်သိး နကဟံးန့ၢ် တၢ်ဆၢကတီၢ်လၢ နကရ့လိာ်သးဒီး ယဟိဝၤယွၤအဂီၢ်န့ၣ် ဃုတၢ်လီၢ်လၢ အဘှ့ၣ်အဘှီၣ် ဒ်ယ့ၣ်ၡူးအသိးတက့ၢ်. ဒီးဖဲနမၤဒ်န့ၣ်အခါ တသ့ဖဲအသ့ ဟးဆှဲးတၢ်လၢ အကမၤတံာ်တာ်နၤတဖၣ် ဒီးဖဲနမၤနီၢ်သး အတၢ်ဖံးတၢ်မၤအခါ ဒ်သိးနသးစၢၢ်ဆၢတၢ်ကန့ၢ်အဂီၢ် ဃ့ယဟိဝၤယွၤ အတၢ်မၤစၢၤ. ဆၢကတီၢ်ခဲအံၤ နမ့ၢ်သူ တၢ်ဆၢကတီၢ် လၢအဂ့ၤကတၢၢ်န့ၣ် ယဟိဝၤယွၤ ကဟ့ၣ်နၤ တၢ်မူအထူအယိာ် လၢဟီၣ်ခိၣ်သီအပူၤလီၤ.—မၢ်ကူး ၄:၂၄.
တၢ်သးဝံၣ် ၂၈ ကဲထီၣ်ယဟိဝၤယွၤ အတံၤသကိး
^ လံာ်အဆၢ. 5 ယဟိဝၤယွၤန့ၣ် မ့ၢ်ပသကိးလၢ အဂ့ၤကတၢၢ်. ဒီးပပာ်လုၢ်ပာ်ပှ့ၤ ပတၢ်ရ့လိာ်သးဒီးအီၤ ဒီးပအဲၣ်ဒိးသ့ၣ်ညါ အါထီၣ်အီၤလီၤ. ဒ်သိး ပကသ့ၣ်ညါအါထီၣ်ပှၤတဂၤအဂီၢ် ပကဘၣ်ဟံးန့ၢ် တၢ်ဆၢကတီၢ်လၢ ပကရ့လိာ်သးဒီးအီၤ, ဒ်န့ၣ်အသိး ပတၢ်ရ့လိာ်သးဒီး ယဟိဝၤယွၤ ကဂၢၢ်ကျၢၤဒိၣ်ထီၣ်အဂီၢ် ပကဘၣ်ဟံးန့ၢ်တၢ်ဆၢကတီၢ် လၢပကရ့လိာ်သးဒီးအီၤအဂီၢ်. လၢပတၢ်အိၣ်မူပူၤန့ၣ် ပဘၣ်မၤတၢ်အိၣ်အါမးအဃိ ဒ်သိးပတၢ်ဆၢကတီၢ် ကအိၣ်လၢ ပကသုးဘူးပသးဆူ ကစၢ်ယွၤအအိၣ်အဂီၢ် ပကဘၣ်မၤဒ်လဲၣ်. ဒီးပမ့ၢ်မၤဒ်န့ၣ်န့ၣ် ပကဒိးန့ၢ်ဘၣ်အဘျုးဒ်လဲၣ်.
